Ɛsɩtɛɛrɩ
3 Pʋwayɩ lɛ, Wiyaʋ Asiyeruusi ha ɖoŋ sɔsɔŋ Hamaanɩ,+ Agaagɩ tʋ+ Amedataa pɩyalʋ, nɛ ɛha-ɩ lone sɔsɔɖɛ nɛ ɛkpazɩ e-kpelaɣ awumbiya lalaa mba ɛ nɛ wɛ paawɛɛ yɔ pa-tɩŋa pa-ñʋŋ yɔɔ.+ 2 Nɛ wiyaʋ lɩmɖʋyaa mba payɩ paawɛ wiyaʋ nɔnɔɔ taa yɔ, poluŋaɣ Hamaanɩ tɛɛ nɛ papaŋ pɛ-ɛsa nɛ tɛtʋ, mbʋ pʋyɔɔ yɔ mbʋ wiyaʋ ɖʋ paɣtʋ se pala Hamaanɩ. Ɛlɛ Mɔrɩdekayɩ kizi se eeluŋuu yaa ɛɛpaŋ ɛ-ɛsa nɛ tɛtʋ. 3 Peeɖe lɩmɖʋyaa mba paawɛ wiyaʋ nɔnɔɔ taa yɔ pɔpɔzɩ Mɔrɩdekayɩ se: «Ɛbɛ yɔɔ ŋŋñaŋ wiyaʋ paɣtʋ?» 4 Pɔpɔzaɣ-ɩ tɔm ndʋ paa evemiye nɖɩ, ɛlɛ etaawelisiɣni-wɛ. Pʋyɔɔ peheyi-tʋ Hamaanɩ se pana se etisiɣ se Mɔrɩdekayɩ ɛlakɩ mbʋ yaa we;+ mbʋ pʋyɔɔ yɔ Mɔrɩdekayɩ kaaheyi-wɛ se ɛkɛ Yuuda tʋ.+
5 Hamaanɩ kɔm nɛ ɛna se Mɔrɩdekayɩ kizaa se eeluŋuu ɛ-tɛɛ nɛ ɛpa ɛ-ɛsa nɛ tɛtʋ lɛ, ɛkɔ pana siŋŋ.+ 6 Ɛlɛ ɛtaasɔɔlɩ se ɛkʋ Mɔrɩdekayɩ ɖeke,* mbʋ pʋyɔɔ yɔ paaheyi-i tɔm Mɔrɩdekayɩ samaɣ yɔɔ. Pʋyɔɔ lɛ, Hamaanɩ paɣzɩ ñɩnʋʋ se ɛɖɩzɩ Yuuda ñɩma mba payɩ paawɛ Asiyeruusi kewiyaɣ kpeekpe taa yɔ, Mɔrɩdekayɩ samaɣ tɩŋa.
7 Fenaɣ kajalaɣ ñɩŋga taa, pʋ-tɔbʋʋ se Nisaŋ* fenaɣ taa, Wiyaʋ Asiyeruusi kewiyitu tɔɔʋ pɩnaɣ 12 ñɩŋga taa,+ pɔtɔ Puur+ (pʋ-tɔbʋʋ se pɔtɔ Piye) Hamaanɩ ɛsɩndaa se patɩlɩ evemiye nɛ fenaɣ, nɛ pɩtɔlɩ fenaɣ 12 ñɩŋga yɔɔ, pʋ-tɔbʋʋ se Adaarɩ* fenaɣ+ yɔɔ. 8 Peeɖe Hamaanɩ heyi Wiyaʋ Asiyeruusi se: «Samaɣ nakɛyɛ mɩzaa nɛ kɛwɛɛ paa le+ ñe-kewiyaɣ ageeta kpeekpe taa,+ ka-paɣtʋ wɛ ndɩ nɛ samasɩ lɛɛsɩ ñɩndʋ; nɛ kaañaŋ wiyaʋ paɣtʋ, nɛ pɩɩwazɩɣ wiyaʋ pʋyʋ se eyebi-kɛ nɛ kɛwɛɛ. 9 Ye pɩkɛdɩnɩ wiyaʋ yɔ, eyele nɛ palɩzɩ paɣtʋ se paɖɩzɩ-kɛ nɛ pama-tʋ. Mankaɣ hɛyʋʋ liidiye pɔɔyɩsɩ talaŋwaa* 10 000 kaɖɩsɩ nɛ paɖʋ-sɩ kewiyaɣ koozaɣ taa.»*
10 Peeɖe wiyaʋ lɩzɩ niye ñɩɣʋ kokooye+ ɛ-maɣmaɣ e-nesi yɔɔ nɛ ɛcɛlɩ Hamaanɩ,+ Agaagɩ tʋ+ Amedataa pɩyalʋ, weyi ɛɛkɛ Yuuda mba koyindu yɔ. 11 Nɛ wiyaʋ heyi Hamaanɩ se: «Pɛcɛlɩ-ŋ liidiye pɔɔyɩsɩ nɛ samaɣ, se ŋlabɩnɩ-wɛ mbʋ ŋnawa se pɩmʋnaa yɔ.» 12 Pʋwayɩ lɛ, payaa wiyaʋ takayɩsɩ taa mayaa+ fenaɣ kajalaɣ ñɩŋga tɛ kɩyakʋ 13 ñɩŋgʋ wiye. Nɛ pama+ paɣtʋ ndʋ payɩ Hamaanɩ ɖʋwa yɔ nɛ petiyini wiyaʋ kaɖɩsɩ sɔsɔsɩ, ageeta taa komina ñʋndɩnaa, nɛ samasɩ ndɩ ndɩ taa awumbiya, paa egeetiye nɖɩ lɛ ɖɩ-kʋnʋŋ matʋ taa nɛ paa samaɣ ŋga lɛ ka-kʋnʋŋ taa. Wiyaʋ Asiyeruusi hɩɖɛ taa pama-tʋ nɛ pakpaɣ wiyaʋ niye ñɩɣʋ kokooye nɛ pañɩɣnɩ niye tɩ-yɔɔ.+
13 Pɛcɛlɩ takayɩsɩ nzɩ mba patɩŋɩɣnɩ pɔ-yɔɔ nɛ petiyiɣni takayɩsɩ yɔ se powoni-sɩ wiyaʋ ageeta tɩŋa taa, se paɖʋ paɣtʋ se pɔtɔyɩtɩ Yuuda mba tɩŋa, pakʋ-wɛ nɛ paɖɩzɩ-wɛ, paa pɩtɩɩkɛ pɩɣa yaa sɔsɔ yɔ, piya nɛ halaa, evemiye kʋɖʋmɖɩyɛ taa, fenaɣ 12 ñɩŋga, pʋ-tɔbʋʋ se Adaarɩ fenaɣ tɛ kɩyakʋ 13 ñɩŋgʋ wiye,+ nɛ pakpaɣ pa-ñɩm.+ 14 Pɩwɛɛ se takayɩsɩ nzɩ sɩ-taa tɔm ɛpɩsɩ paɣtʋ paa egeetiye nɖɩ lɛ ɖɩ-taa, nɛ posusi-tʋ samasɩ kpeekpe taa, se pɩsa nɛ ɛyaa ñɔɔzɩ pa-tɩ nɛ paɖaŋ evemiye nɖɩ. 15 Nɛ wiyaʋ ha nɔɔ nɛ mba pɛcɛlɩ takayɩsɩ se powona yɔ, pɛɖɛɛ lɛɛ lɛɛ;+ Suuzaŋ,*+ wiyaʋ ɖɩɣa* taa paɖʋ paɣtʋ ndʋ. Nɛ wiyaʋ nɛ Hamaanɩ pacaɣ se pɔñɔɔ, ɛlɛ tɔm ndʋ tiisidi Suuzaŋ* tɛtʋ taa mba lɩmaɣza taa.