Keɣa
Daviid adɩma.
17 Hayɩ Yehowa, welisi tenduu mbʋ mentendiɣ-ŋ se ŋhʋʋ mɔn-tɔm siɣsiɣ yɔ;
Welisi kubusi nzɩ mamakɩ se ŋsɩnɩ-m yɔ;
Welisi ma-adɩma wena a-taa fɛyɩ cɛtɩm yɔ.+
2 Hʋʋ tɔm siɣsiɣ nɛ ŋɖezi mɔn-tɔm;+
Ñɛ-ɛsa ɩna mbʋ pɩtʋʋzaa yɔ.
3 Ŋtazɩ ma-laŋɩyɛ taa, ŋwili-m ɖoo taa;+
Ŋkelisi-m;+
Ŋkaɣ naʋ se mantɩta tamaɣ kɩdɛkɛdaɣ nakɛyɛ,
Nɛ mɔ-nɔɔ tɩla kɩwɛɛkɩm nabʋyʋ.
4 Ɛyaa lakasɩ hɔɔlʋʋ taa lɛ,
Ñɔ-nɔɔ taa tɔm yɔɔ lɛ, menkizi mɩlʋ nʋmɔŋ.+
5 Yele nɛ ma-naataŋ wɛɛ ña-nʋmɔŋ taa
Se pɩsa nɛ pitaatuuli-m.+
6 Hayɩ Ɛsɔ, mayaɣ-ŋ, mbʋ pʋyɔɔ yɔ ŋkaɣ-m cosuu.+
Kʋ nɩŋgbaŋʋʋ.* Welisi mɔn-tɔm.+
7 Wɩlɩ ñɔ-sɔɔlɩm siɣsiɣ ñɩmbʋ nɛ pɩwɛɛ piti kpem,+
Ñɛkɛnɩ mba pɔkɔŋ nɛ paɖʋʋ kʋyʋʋ ñe-nesi kɩbanzɩ yɔɔ yɔ pa-Ñʋʋ Yaɖʋ,
Ñalɩzɩɣnɩ-wɛ mba pakaɖɩɣnɩ-ŋ yɔ pe-nesi tɛɛ.
8 Kandɩyɩ mɔ-yɔɔ ɛzɩ ñɛ-ɛsɩyɛ piye yɔ;+
Mɛsɩ-m ñe-keŋ kuzotuu taa.+
9 Kandɩyɩ mɔ-yɔɔ nɛ kañatʋ tɩnaa mba poyouni-m yɔ pataahiɣ-m,
Kandɩyɩ mɔ-yɔɔ nɛ mon-koyindinaa mba pɔcɔ-m nɛ pata nɛ pañɩnɩɣ se pakʋ-m yɔ* pataahiɣ-m.+
10 Papɩsɩ mba pa-laŋa sʋ kpɩzɩŋ yɔ;*
Pɔyɔɔdʋʋnɩ tɩ kpazʋʋ;
11 Lɛɛlɛɛyɔ, pɔcɔ-ɖʋ nɛ pata;+
Pañɩnɩɣ waɖɛ se pala nɛ ɖɩtɔlɩ.*
12 Pa-taa paa weyi wɛ ɛzɩ mʋʋzʋʋ ŋgʋ pɩɩlakɩ-kʋ lɔŋ se kɩcɩyɩ mbʋ kɩkpawa yɔ,
Ɛzɩ mʋʋzʋʋ* ŋgʋ kɩpabɩ nabʋyʋ yɔ.