Roma mba
11 Ye mbʋ, mɔnpɔzʋʋ se ɛzɩ Ɛsɔ lɔ ɛ-samaɣ na?+ Aayɩ, pɩlɩ! Mbʋ pʋyɔɔ yɔ ma ɖɔɖɔ mɛnkɛ Izrayɛɛlɩ tʋ, Abraham lʋlʋʋ taa tʋ,* malɩnɩ Bɛnjamɛɛ cejewiye taa. 2 Ɛsɔ tɩlɔ ɛ-samaɣ ŋga ɛcalɩ tɩlʋʋ yɔ.+ Ɩɩsɩŋ tɔm ndʋ mayaɣ yɔɔdʋʋ Eliya yɔɔ alɩwaatʋ ndʋ ɛkʋ Izrayɛɛlɩ tɔm Ɛsɔ cɔlɔ yɔ? 3 «Yehowa,* pakʋ ña-nayaa, pɛkpɛzɩ ña-altaarunaa, nɛ men-ɖeke koŋ pɩkazaa, nɛ lɛɛlɛɛyɔ lɛ, pɛwɛɛ nɛ pañɩnɩɣ se palɩzɩ me-wezuu.»*+ 4 Ɛlɛ suwe Ɛsɔ heyi-i? «Mankazɩ man-tɩ ɛyaa 7 000 mba patiluŋ Baalɩ tɛɛ yɔ.»+ 5 Mbʋ ɖɔɖɔ alɩwaatʋ tʋnɛ tɩ-taa, ɛyaa nabɛyɛ kazaa+ nɛ lootiye yɔɔ patɩŋnaa nɛ palɩzɩ-wɛ. 6 Nɛ ye lootiye yɔɔ pɩtɩŋnaa yɔ,+ pɩtɩtasɩ kɛʋ tʋma yɔɔ;+ ye pɩtɩkɛ mbʋ yɔ lootiye ɛɛtasɩɣ kɛʋ lootiye.
7 Ye mbʋ, ɖɩyɔɔdɩ suwe yɔ? Mbʋ ɖeyi ɖeyi Izrayɛɛlɩ wɛɛ nɛ kɩñɩnɩɣ siŋŋ yɔ, kitihiɣ-pʋ; ɛlɛ mba palɩzɩ-wɛ yɔ pehiɣ-pʋ.+ Mba pɩkazaa yɔ, pa-laŋa sʋ kpɩzɩŋ,+ 8 ɛzɩ pamaʋ yɔ: «Ɛsɔ ha-wɛ ɖom cukaŋ ñɩmbʋ fezuu,+ ɛsa wena aanaɣ yɔ nɛ nɩŋgbaaŋ weyi ɩɩnɩɣ yɔ nɛ pɩkɔɔ nɛ pɩtalɩ sɔnɔ kɩyakʋ kʋnɛ.»+ 9 Pɩtasɩ lɛ, Daviid yɔɔdaa se: «Pa-taabɩlɩ ɛpɩsɩ-wɛ kaamʋʋ nɛ kpaca nɛ pɩyɛ nɖɩ ɖituuluu yɔ nɛ kɩhɛyʋʋ.* 10 Pɛ-ɛsa iyu cɩkpɛndʋʋ nɛ pataapɩzɩ pana; nɛ paa ɛzɩmtaa lɛ, pe-siɣa ɩpa.»+
11 Pʋyɔɔ mɔnpɔzʋʋ se ɛzɩ pituuli-wɛ nɛ pɔtɔlɩ kpaagbaa tɔlʋʋ na? Aayɩ, pɩlɩ! Ɛlɛ nɩŋgbaŋaɣ kɩdɛkɛdaɣ ŋga pɛkpɛzaa yɔ, keyeba nɛ ajɛɛ taa mba hiɣ ñʋʋ yabʋ se piseɣti-wɛ nɛ pala sʋsɩ.+ 12 Ye pɛkpɛzɩ nɩŋgbaŋaɣ kɩdɛkɛdaɣ nɛ piyele nɛ ɛjaɖɛ hiɣ ñɩm nɛ ye papɩsɩ ññɩɩ nɛ piyele nɛ ajɛɛ taa mba hiɣ ñɩm yɔ,+ alɩwaatʋ ndʋ pe-kpeekpe pɛwɛɣ yɔ, pɩɩkaɣ kɔnʋʋ ñɩm sakɩyɛ nɛ pɩkɩlɩ yaa we?
13 Lɛɛlɛɛyɔ, mɩ mba ɩkɛ ajɛɛ taa mba yɔ mɔyɔɔdʋʋna. Mɛnkɛ ajɛɛ tɛ apostoloo,+ pʋyɔɔ lɛ mansaŋ lɩm ɖʋʋ tʋmɩyɛ nɖɩ paɖʋ-m yɔ+ 14 se mana se manpɩzɩɣ nɛ mantɩŋnɩ nʋmɔʋ nakʋyʋ yɔɔ nɛ menseɣti man-samaɣ maɣmaɣ se kala sʋsɩ nɛ maya pa-taa nabɛyɛ ñʋʋ na. 15 Mbʋ pʋyɔɔ yɔ pɔlɔ-wɛ lɔʋ mbʋ yɔ+ ye piyeba nɛ ɛjaɖɛ nɛ Ɛsɔ peceɣ yɔ, ɛbɛ pɩkaɣ kɔnʋʋ ye pamʋ-wɛ yɔ? Palɩzɩɣ-wɛ sɩm taa nɛ powoni-wɛ wezuu taa. 16 Pɩtasɩ lɛ, ye kpɔnɔ hɔɔlaɣ ŋga pakpaɣ-kɛ ɛzɩ kajalaɣ tɔɔnaɣ pee kɩlaʋ yɔ kɛkɛ kiɖeɖeɣa yɔ, kpɔnɔ tɩŋa kɛ kiɖeɖeu ɖɔɖɔ; nɛ ye liɖe ɛkɛ kiɖeɖeye yɔ, pilinzi ɖɔɖɔ kɛ kiɖeɖesi.
17 Ɛlɛ ye paasɛtɩ oliivi pilinzi nasɩyɩ, nɛ patamɩ-ŋ nzɩ sɩkazaa yɔ sɩ-hɛkʋ taa, nɛ ŋhiɣ ɖɔɖɔ ñɩm mbʋ pɩwɛ oliivi liɖe taa yɔ, ŋgʋ ŋkɛ ñɩtʋ taa oliivi yɔ, 18 taakpazɩ ña-tɩ* pilinzi yɔɔ. Ɛlɛ ye ŋkpazɩɣ ña-tɩ* sɩ-yɔɔ yɔ,+ tɔzɩ se pɩtɩkɛ ñɔ-yɔɔ liɖe wɛɛ, ɛlɛ ñɛwɛnɩ liɖe yɔɔ. 19 Ye mbʋ, ŋkaɣ yɔɔdʋʋ se: «Pɛsɛtɩ pilinzi se pɩsa nɛ patamɩ-m.»+ 20 Pɩkɛ toovenim! Pataawɛɛnɩ tisuu, pʋyɔɔ pɛsɛtɩ-wɛ;+ ɛlɛ ña lɛ, tisuu yɔɔ ŋsɩŋaa.+ Taakpazɩ ña-tɩ, ɛlɛ wɛɛ sɔɔndʋ taa. 21 Mbʋ pʋyɔɔ yɔ, ye Ɛsɔ ɛtɩfɛɛ oliivi tɩʋ ŋgʋ kɩ-maɣmaɣ ki-pilinzi yɔ, ɛɛkaɣ-ŋ fɛʋ ɖɔɖɔ. 22 Ye mbʋ, maɣzɩ Ɛsɔ camɩyɛ lakasɩ yɔɔ+ nɛ ɛ-ñaŋ yɔɔ. Ɛwɩlɩɣ ñaŋ mba pɔtɔlaa yɔ;+ ɛlɛ ña lɛ, ye ŋcaɣ ɛ-camɩyɛ lakasɩ taa yɔ, ɛwɩlɩɣ-ŋ camɩyɛ lakasɩ; ye pɩtɩkɛ mbʋ yɔ ɛkaɣ-ŋ sɛtʋʋ ɖɔɖɔ. 23 Nɛ mba ɖɔɖɔ lɛ, ye papaɣzɩ wɛnʋʋ tisuu yɔ, ɛkaɣ-wɛ tam;+ mbʋ pʋyɔɔ yɔ Ɛsɔ pɩzɩɣ nɛ ɛɖaɣnɩ-wɛ tam. 24 Mbʋ pʋyɔɔ yɔ, ye paasɛtɩ-ŋ oliivi tɩʋ ŋgʋ kɩwɛ ñɩtʋ taa yɔ kɩ-yɔɔ nɛ patamɩ-ŋ oliivi tɩʋ ŋgʋ kɩwɛ kaɖaɣ taa yɔ kɩ-yɔɔ, ŋgʋ pɩtɩkɛ mbʋ palakɩ ɖoŋ ɖoŋ yɔ, paakaɣ ɖaɣnʋʋ tam pilinzi nzɩ paasɛtaa yɔ sɩ-maɣmaɣ sɩ-tɩʋ yɔɔ nɛ pɩkɩlɩ yaa we?
25 Mbʋ pʋyɔɔ yɔ koobiya, mantɩsɔɔlɩ se ɩwɛɛ nɛ ɩɩsɩŋ mɛsaɣ tɛɛ tɔm kiɖeɖetu tʋnɛ,+ se ɩtaapɩsɩ lɔŋsɩnɖaa mɩ-maɣmaɣ mɩ-ɛsɩndaa: Izrayɛɛlɩ hɔɔlʋʋ nakʋyʋ laŋɩyɛ sʋ kpɩzɩŋ nɛ pɩkɔɔ nɛ pɩsɩɩnɩ alɩwaatʋ ndʋ ajɛɛ taa ñɩma mba Ɛsɔ lɩzaa yɔ pa-tɩŋa pasʋwa yɔ, 26 mbʋ Izrayɛɛlɩ kpeekpe+ kaɣ hiɣu ñʋʋ yabʋ. Ɛzɩ pamaʋ yɔ: «Holiyu* kaɣ lɩnʋʋ Siyɔŋ+ nɛ ɛlɩzɩ lakasɩ nzɩ sɩɩɖʋʋ Ɛsɔ hɩɖɛ yɔ Yakɔɔb tɛ. 27 Nɛ ɛgbɛyɛ ɖɩnɛ manɖʋʋnɩ-wɛ,+ alɩwaatʋ ndʋ mahɩzɩɣ pa-kɩwɛɛkɩm yɔ.»+ 28 Toovenim, tɔm kɩbandʋ hɔɔlʋʋ taa lɛ, pɛkɛ koyindinaa mɩ-yɔɔ; ɛlɛ ɛzɩma Ɛsɔ lɩzɩ-wɛ yɔ pɩ-hɔɔlʋʋ taa lɛ, pɛkɛ kʋsɔɔlaa pɔ-cɔzɔnaa yɔɔ.+ 29 Mbʋ pʋyɔɔ yɔ Ɛsɔ ɛɛkaɣ kpiɖuu ɛ-kʋjɔŋ nɛ ɛ-yatʋ yɔɔ. 30 Mbʋ pʋyɔɔ yɔ ɛzɩma ɖooo lɛ, ɩtaañaŋ Ɛsɔ,+ ɛlɛ ɛna mɩ-pʋtɔdɩyɛ lɛɛlɛɛyɔ+ pa-kaañamtʋ yɔɔ yɔ,+ 31 mbʋ ɖɔɖɔ panɛ, palabɩ kaañamtʋ lɛɛlɛɛyɔ nɛ piyele nɛ pana mɩ-pʋtɔdɩyɛ, se pɩsa nɛ mba ɖɔɖɔ lɛ papɩzɩ nɛ pana pa-pʋtɔdɩyɛ lɛɛlɛɛyɔ. 32 Mbʋ pʋyɔɔ yɔ Ɛsɔ kpɛndɩ pa-tɩŋa nɛ ɛɖɩɣ-wɛ kaañamtʋ taa,+ se ɛna pa-tɩŋa pa-pʋtɔdɩyɛ.+
33 Hayɩ, Ɛsɔ ñɩm nɛ ɛ-lɔŋsɩnɖɛ nɛ ɛ-sɩmtʋ wɛ cukaŋ mbʋ suwe! Ɛyʋ ɛɛpɩzɩɣ nɛ ɛnɩɩ ɛzɩma ɛhʋʋ tɔm yɔ pɩtɩŋa pɩ-taa tete nɛ ɛɛpɩzɩɣ nɛ ɛtɩlɩ ɛ-nʋmɔŋ! 34 Mbʋ pʋyɔɔ yɔ «apɩzaa nɛ ɛtɩlɩ Yehowa* maɣzɩm, yaa apɩsɩ ɛ-lɔŋ tasɩyʋ?»+ 35 Yaa «acalɩ-ɩ nabʋyʋ haʋ, se pɩsa nɛ ɛhɛyɩ-ɩ pi-lone taa?»+ 36 Mbʋ pʋyɔɔ yɔ, ɛ-cɔlɔ wondu tɩŋa lɩnaa, nɛ ɛnʋ labɩnɩ-tʋ nɛ ɛnʋ tɩnɩ-tʋ. Pasamɩ-ɩ tam tam. Amɛn.