Pɩyɛɛrɩ takayaɣ kajalaɣ ñɩŋga

5 Pʋyɔɔ lɛ, ma weyi mɛnkɛ ɛzʋtʋyʋ ɖɔɖɔ yɔ, ma weyi mɛnkɛ Krɩstʋ kʋñɔmɩŋ tɛ aseɣɖe tʋ nɛ weyi ɛkaɣ hiɣu ɖɔɖɔ samtʋ ndʋ pakaɣ tɩ-yɔɔ kuluu yɔ,+ mentendiɣ* ɛzʋtʋyaa mba pɛwɛ mɩ-hɛkʋ taa yɔ nɛ meheyiɣ-wɛ se: 2 Iɖiyi Ɛsɔ ewiɖe+ nɖɩ pɛcɛlɩ-mɩ se ɩcɔnɩ ɖɩ-yɔɔ yɔ, ɩla tʋmɩyɛ nɖɩ ɛzɩ ɛgbɛyɛ yɔɔ cɔnɩyaa yɔ,* pɩtaakɛnɩ kɩjɛyʋʋ, ɛlɛ ɩlabɩ-ɖɩ nɛ laŋɩyɛ faaa Ɛsɔ ɛsɩndaa;+ pɩtaakɛnɩ mulum kɛzɛɣa yɔɔ,+ ɛlɛ ɩlabɩ-ɖɩ nɛ sɔɔlɩm faaa; 3 ɩtaapɩsɩ kɩbaɣlaa mba pɛkɛ Ɛsɔ ñɩm yɔ pɔ-yɔɔ,+ ɛlɛ ɩpɩsɩ mba pahaɣ ewiɖe kɩɖaŋ kɩbaŋ yɔ.+ 4 Nɛ alɩwaatʋ ndʋ palɩzɩɣ ninɖiɣyu sɔsɔ+ nɛ pawɩlɩ yɔ, ɩkaɣ mʋʋ samtʋ hulaɣ ŋga kaacadɩɣ yɔ.+

5 Mbʋ ɖɔɖɔ mɩ evebiya, iluzi mɩ-tɩ mba pasʋtʋyaa yɔ pɛ-tɛɛ.*+ Ɛlɛ mɩ-tɩŋa payɩ, iluzi mɩ-tɩ ɖama tɛɛ;* mbʋ pʋyɔɔ yɔ Ɛsɔ kaɖɩɣnɩ tɩ kpazɩyaa, ɛlɛ ɛlakɩ lootiye mba poluzuu pa-tɩ yɔ.+

6 Pʋyɔɔ lɛ, iluzi mɩ-tɩ Ɛsɔ nesi ɖoŋ ñɩnzɩ tɛɛ, se pɩsa nɛ ɛkpazɩ-mɩ alɩwaatʋ kɩbandʋ yɔɔ,+ 7 nɛ ɩɖʋzɩ mɩ-nɩɣzɛ kpeekpe e-nesi tɛɛ,*+ mbʋ pʋyɔɔ yɔ ɛcɔŋnɩ mɩ-yɔɔ.+ 8 Ɩɖɔkɩ mɩ-maɣzɩm, ifeŋiɣ!+ Mi-koyindu Eleeu cɔʋ ɛzɩ mʋʋzʋʋ ŋgʋ kɩmakɩ kubusi yɔ, nɛ ɛñɩnɩɣ se ɛtɔɔ nɔɔyʋ.*+ 9 Ɛlɛ ɩkaɖɩnɩ-ɩ,+ ɩɖɔkɩ kpam tisuu taa, mbʋ pʋyɔɔ yɔ ɩsɩm mbʋ se mi-koobiya kpeekpe ɖiɣni katʋʋ kʋñɔmɩŋ kʋɖʋmɩŋ ɛnɩ ɛjaɖɛ yɔɔ.+ 10 Ɛlɛ ɩtɛŋ kʋñɔmɩŋ tɔɔʋ alɩwaatʋ pazɩ lɛ, lootiye kpeekpe tɛ Ɛsɔ, weyi ɛya-mɩ ɛ-tamtam samtʋ taa+ mɩ nɛ Krɩstʋ mɩ-nɔɔ kʋɖʋmaɣ labʋ taa yɔ, ɛ-maɣmaɣ ɛkaɣ-mɩ tɛzʋʋ falɩsʋʋ. Ɛkaɣ labʋ nɛ ɩɖɔkɩ kpam,+ ɛkaɣ labʋ nɛ ɩkpa ɖoŋ,+ ɛkaɣ yebu nɛ ɩka camɩyɛ. 11 Ɛnʋ tɩnɩ ɖoŋ tam. Amɛn.

12 Mantɩŋnɩ Silɩvɛɛ,*+ weyi ɛkɛ koobu siɣsiɣ tʋ mɛ-ɛsɩndaa yɔ ɛ-yɔɔ nɛ mama-mɩ tɔm pazɩ se mankpazɩ-mɩ ɖoŋ nɛ malɩzɩ-mɩ aseɣɖe siŋŋ se lootiye nɖɩ Ɛsɔ labɩ-mɩ yɔ, ɖɩkɛ toovenim. Ɩɖɔkɩ mɩ-tɩ kpam ɖɩ-taa. 13 Halʋ* weyi ɛwɛ Babilɔɔnɩ yɔ, weyi palɩzɩ-ɩ ɛzɩ mɩ ɖɔɖɔ yɔ, etiyiɣni-mɩ ɛ-sɛtʋ, nɛ man-pɩyalʋ Maarɩkɩ+ ɖɔɖɔ tiyiɣni-mɩ ɛ-sɛtʋ. 14 Ɩsɛɛ ɖama nɛ sɔɔlɩm.*

Tɛtɛ nɛ mɩ mba payɩ mɩ nɛ Krɩstʋ ɩwɛ nɔɔ kʋɖʋmaɣ yɔ, ɩwɛɛnɩ laŋhɛzɩyɛ.