Kroniiki takayaɣ naalɛ ñɩŋga
23 Pɩnaɣ 7 ñɩŋga taa lɛ, Yehoyiyada la abalɩtʋ nɛ ɛɖʋ ɛgbɛyɛ nɛ mɩnɩŋ ñʋndɩnaa,+ pʋ-tɔbʋʋ se Yeroham pɩyalʋ Azariya, Yehohanaanɩ pɩyalʋ Isimayɛɛlɩ, Obɛɛdɩ pɩyalʋ Azariya, Adayaa pɩyalʋ Maaseyiya, nɛ Zikiri pɩyalʋ Eliisafaatɩ. 2 Nɛ pɔcɔɔ Yuuda taa nɛ pekpeɣli Leevi ñɩma+ mba pɛwɛ Yuuda tɛtʋ kpeekpe taa yɔ nɛ Izrayɛɛlɩ ɛjaɖɛ taa caanaa ɖɩsɩ ñʋndɩnaa. Patalɩ Yeruzalɛm lɛ, 3 samaɣ kpeekpe ɖʋ ɛgbɛyɛ+ nɛ wiyaʋ, Ɛsɔ toovenim tʋ ɖɩɣa taa, pʋwayɩ lɛ eheyi-wɛ se:
«Ɩna! Wiyaʋ pɩyalʋ kaɣ kewiyitu tɔɔʋ, ɛzɩ Yehowa kaayɔɔdʋʋ lidaʋ tɔm pɩlɩɩnɩ Daviid pɩyalaa yɔɔ yɔ.+ 4 Pʋnɛ pɩwɛɛ se ɩla: Cɔjɔnaa hɔɔlʋʋ tozo ñɩŋgʋ nɛ Leevi mba hɔɔlʋʋ tozo ñɩŋgʋ taa mba pakaɣ wobu tʋmɩyɛ+ Sabaatɩ wiye yɔ, pakaɣ kɛʋ nɔnɔsɩ yɔɔ ɖaŋɩyaa;+ 5 hɔɔlʋʋ tozo ñɩŋgʋ lɛɛkʋ kaɣ wɛʋ wiyaʋ ɖɩɣa taa,+ nɛ hɔɔlʋʋ tozo ñɩŋgʋ lɛɛkʋ kaɣ wɛʋ Tigiɖe Nɔnɔɔ taa, nɛ samaɣ tɩŋa kaɣ wɛʋ Yehowa ɖɩɣa kadasɩ taa.+ 6 Itaayele nɔɔyʋ nɛ ɛsʋʋ Yehowa ɖɩɣa taa nɛ pɩtasɩnɩ cɔjɔnaa nɛ Leevi ñɩma mba pakaɣ labʋ tʋmɩyɛ yɔ.+ Mba pɩzɩɣna nɛ pasʋʋ mbʋ pʋyɔɔ yɔ pɛkɛ tindimiye kiɖeɖeye, nɛ samaɣ tɩŋa kaɣ labʋ mbʋ Yehowa pɔzʋʋ-kɛ se kala yɔ. 7 Pɩwɛɛ se Leevi mba ɩcɔɔ wiyaʋ nɛ pata hɔɔlɩŋ tɩŋa yɔɔ, paa weyi lɛ ɛ nɛ e-you wondu e-nesi taa. Ye nɔɔyʋ ɛcaɣ se ɛsʋʋ ɖɩɣa taa yɔ, pakʋ-ɩ. Ɩwɛɛ wiyaʋ cɔlɔ paa le ewoki yɔ.»*
8 Leevi mba nɛ Yuuda kpeekpe pala ɖeyi ɖeyi ɛzɩ cɔjɔ Yehoyiyada kaaɖʋʋ paɣtʋ yɔ. Nɛ paa weyi ɛkpaɣ ɛ-ɛyaa mba pɛwɛ tʋmɩyɛ taa Sabaatɩ wiye yɔ, pɩkpɛndɩnɩ mba pɛfɛyɩ tʋmɩyɛ taa Sabaatɩ wiye yɔ,+ mbʋ pʋyɔɔ yɔ cɔjɔ Yehoyiyada taayele tindima+ wena awɛ a-tʋmɩyɛ taa yɔ se akpe. 9 Nɛ cɔjɔ Yehoyiyada cɛlɩ mɩnɩŋ ñʋndɩnaa+ kɩgbɛzɛmɩŋ nɛ kpayɩŋ cikpeŋ* nɛ kpayɩŋ kulukulu ñɩŋ weyi ɩɩkɛ Wiyaʋ Daviid ñɩŋ yɔ,+ weyi ɩɩwɛ Ɛsɔ toovenim tʋ ɖɩɣa taa yɔ.+ 10 Nɛ eyele nɛ samaɣ tɩŋa sɩŋ, paa weyi ɛ nɛ e-you wonuu* e-nesi taa, kpaɣnɩ ɖɩɣa nɩwaŋ yɔɔ nɛ piwolo ɖɩɣa nɩmɩyɛ yɔɔ, altaaru cɔlɔ nɛ ɖɩɣa cɔlɔ, nɛ pɔcɔɔ wiyaʋ nɛ pata. 11 Nɛ palɩnɩ wiyaʋ pɩyalʋ+ nɛ papamɩ-ɩ awiya hulaɣ* nɛ Aseɣɖe Lɩzʋʋ*+ nɛ pasɩɩ-ɩ wiyaʋ, nɛ Yehoyiyada nɛ ɛ-pɩyalaa pataa-ɩ num. Nɛ pɔyɔɔdɩ se: «Wiyaʋ wezuu ɛɖaɣlɩ!»+
12 Ataali nɩ ɛyaa mba peseɣaɣ nɛ pasaŋ wiyaʋ yɔ pa-taŋ lɛ, ɛcaŋ nɛ ewolo samaɣ cɔlɔ Yehowa ɖɩɣa taa.+ 13 Nɛ ɛna wiyaʋ sɩŋ peeɖe e-tilimiye cɔlɔ nɔnɔɔ taa. Awumbiya+ nɛ aganda hʋlɩyaa paawɛ wiyaʋ cɔlɔ. Nɛ ɛjaɖɛ taa ɛyaa kpeekpe kaawɛɛ nɛ pɛmɛyɩɣ amɛya+ nɛ pahʋlʋʋ aganda, nɛ hendu teyaa kpaɣ pe-minziiki wondu nɛ pɛwɛɛ peɖiyiɣ* mba peteɣ samtʋ hendu yɔ. Peeɖe Ataali cɩyɩ e-tokonaa nɛ ɛma kubuka se: «Kɔlɔmɔtʋ! Kɔlɔmɔtʋ!» 14 Ɛlɛ cɔjɔ Yehoyiyada lɩnɩ mɩnɩŋ ñʋndɩnaa, mba pɛkɛ sɔɔjanaa ñʋndɩnaa yɔ, nɛ eheyi-wɛ se: «Ɩlɩzɩ halʋ ɛnɛ ɛyaa hɛkʋ taa, nɛ ye nɔɔyʋ ɛtɩŋɩɣ-ɩ lɛ, ɩkʋ-ɩ nɛ laɣɖɛ!» Mbʋ pʋyɔɔ yɔ cɔjɔ kaayɔɔdaa se: «Ɩtaakʋ-ɩ Yehowa ɖɩɣa taa.» 15 Nɛ pakpa-ɩ, nɛ patanɩ-ɩ wiyaʋ ɖɩɣa tɛ Kpaŋnʋ Nɔnɔɔ taa lɛ, pacaŋ pakʋ-ɩ peeɖe.
16 Nɛ Yehoyiyada ɖʋ ɛgbɛyɛ ɛ nɛ samaɣ kpeekpe nɛ wiyaʋ pɛ-hɛkʋ taa, se powoki pɩ-yɔɔ nɛ pɛkɛ Yehowa samaɣ.+ 17 Pʋwayɩ lɛ, samaɣ kpeekpe wolo Baalɩ ɖɩɣa* taa nɛ pɔyɔkɩ-kɛ,+ nɛ papʋʋtɩ ɛ-altaarunaa nɛ ɛ-sɩʋ kpelisi,+ nɛ pakʋ Baalɩ cɔjɔ+ Maataanɩ altaarunaa ɛsɩndaa. 18 Nɛ Yehoyiyada kpaɣ Yehowa ɖɩɣa yɔɔ cɔnʋʋ nɛ ɛɖʋzɩ cɔjɔnaa nɛ Leevi mba nesi tɛɛ, mba Daviid kaatayɩ-wɛ tindima tindima Yehowa ɖɩɣa taa se palaɣ kɩlaŋ kɩñaɣzɩŋ Yehowa+ ɛzɩ pamaʋ Moyizi Paɣtʋ taa yɔ,+ nɛ amɛya nɛ hendu ɛzɩ Daviid kaaɖʋʋ yɔ.* 19 Ɛsɩ ɖɔɖɔ nɔnɔsɩ yɔɔ ɖaŋɩyaa+ Yehowa ɖɩɣa nɔnɔsɩ taa, se pɩsa nɛ weyi ɛwɛnɩ azuluma, paa pɩtɩɩkɛ hɔɔlʋʋ ŋgʋ kɩ-taa yɔ, ɛtaapɩzɩ nɛ ɛsʋʋ. 20 Nɛ ɛkpaɣ mɩnɩŋ ñʋndɩnaa,+ mba pa-hɩla sɛwa yɔ, samaɣ ñʋndɩnaa, nɛ ɛjaɖɛ taa ɛyaa kpeekpe nɛ pasɩɩ wiyaʋ, kpaɣnɩ Yehowa ɖɩɣa taa nɛ pitii. Nɛ patɩŋnɩ hayo nɔnɔɔ nɛ powolo wiyaʋ ɖɩɣa taa nɛ pacaɣzɩ wiyaʋ kewiyaɣ+ kpelaɣ yɔɔ.+ 21 Nɛ ɛjaɖɛ taa ɛyaa kpeekpe taa la leleŋ nɛ tɛtʋ taa hɛɛ niɣ niɣ, mbʋ pʋyɔɔ yɔ pakʋ Ataali nɛ laɣɖɛ.