Kroniiki takayaɣ naalɛ ñɩŋga
24 Yehowaasɩ kaawɛnɩ pɩnzɩ 7 alɩwaatʋ ndʋ ɛpɩsɩ wiyaʋ yɔ,+ nɛ ɛtɔɔ kewiyitu pɩnzɩ 40 Yeruzalɛm. Payaɣaɣ e-ɖoo se Zibiya, Beyɛɛrɩ-Seeba tʋ.+ 2 Yehowaasɩ wolo pɩ-yɔɔ nɛ ɛlakɩ mbʋ pɩtʋʋzɩ Yehowa ɛsɩndaa yɔ cɔjɔ Yehoyiyada alɩwaatʋ kpeekpe taa.+ 3 Yehoyiyada ñɩnɩ-ɩ halaa 2, nɛ palʋlɩ-ɩ abalɩbiya nɛ halɩbiya.
4 Pʋwayɩ lɛ, Yehowaasɩ sɔɔlɩnɩ ɛ-laŋɩyɛ pilim se ɛñɔɔzʋʋ Yehowa ɖɩɣa.+ 5 Nɛ ekpeɣli cɔjɔnaa nɛ Leevi mba nɛ eheyi-wɛ se: «Ɩlɩɩ nɛ iwolo Yuuda tɛtʋ ndɩ ndɩ taa nɛ ɩmʋ liidiye Izrayɛɛlɩ kpeekpe cɔlɔ nɛ ɩñɔɔzɩnɩ mɩ-Ɛsɔ ɖɩɣa,+ paa pɩnaɣ ŋga; nɛ pɩwɛɛ se ɩkʋyɩ tɔm ndʋ tɩ-yɔɔ lɛɛ lɛɛ.» Ɛlɛ Leevi mba tɩkʋyɩ tɔm ndʋ tɩ-yɔɔ lɛɛ lɛɛ.+ 6 Nɛ wiyaʋ yaa cɔjɔ Yehoyiyada nɛ ɛpɔzɩ-ɩ se:+ «Ɛbɛ yɔɔ ŋtɩpɔzɩ Leevi mba se powolo Yuuda nɛ Yeruzalɛm nɛ pamʋ lambuu kiɖeɖeu ŋgʋ Yehowa lɩmɖʋyʋ Moyizi kaaɖʋwa+ se pɛhɛyɩ yɔ nɛ pɔkɔna, Izrayɛɛlɩ samaɣ lambuu kiɖeɖeu, se palabɩnɩ Aseɣɖe Lɩzʋʋ kizinziku tʋmɩyɛ?+ 7 Mbʋ pʋyɔɔ yɔ Ataali,+ halʋ kañatʋ tʋ ɛnʋ, ɛ-pɩyalaa kaayɔkaa nɛ pasʋʋ Ɛsɔ toovenim tʋ ɖɩɣa taa,+ nɛ pakpaɣ Yehowa ɖɩɣa taa wondu kiɖeɖetu tɩŋa nɛ palabɩnɩ tʋmɩyɛ Baalɩwaa sɛtʋ taa.» 8 Nɛ wiyaʋ ha nɔɔ lɛ, pala aɖakaɣ nakɛyɛ+ nɛ pasɩɩ-kɛ awayɩ, Yehowa ɖɩɣa nɔnɔɔ taa.+ 9 Pʋwayɩ lɛ, posusi Yuuda nɛ Yeruzalɛm taa se pɩwɛɛ se pɔkɔnɩ Yehowa lambuu kiɖeɖeu+ ŋgʋ Ɛsɔ toovenim tʋ lɩmɖʋyʋ Moyizi kaapɔzɩ Izrayɛɛlɩ kañɩmbusuu taa se kɩhɛyɩ yɔ. 10 Awumbiya kpeekpe nɛ samaɣ kpeekpe wɛɛ amɛya taa,+ nɛ pɛwɛɛ pɔkɔŋnɩ haɖɛ nɛ paɖʋʋ aɖakaɣ taa nɛ pɩkɔɔ pisu.*
11 Alɩwaatʋ ndʋ payɩ Leevi mba kɔŋnaɣ aɖakaɣ se pɛcɛlɩ-kɛ wiyaʋ nɛ panaɣ se liidiye sakɩyɛ wɛ ka-taa lɛ, wiyaʋ takayaɣ taa mayʋ nɛ cɔjɔ sɔsɔ lone taa caɣyʋ powokaɣ nɛ pohutuu aɖakaɣ taa liidiye,+ nɛ pʋwayɩ lɛ papɩsɩɣnɩ-kɛ ko-lone taa. Mbʋ palakaɣ paa evemiye nɖɩ, nɛ pokuu liidiye sakɩyɛ. 12 Pʋwayɩ lɛ, wiyaʋ nɛ Yehoyiyada pɛcɛlaɣ-ɖɩ mba pɔcɔŋnaɣ Yehowa ɖɩɣa tʋmɩyɛ yɔɔ yɔ, nɛ paba mʋwaɣ pɛɛ saɣyaa nɛ nesi tɛɛ tʋmlaɖaa se pɔñɔɔzɩ Yehowa ɖɩɣa,+ nɛ pamʋʋ ɖɔɖɔ ñɩɣyʋʋ nɛ ñɩɣyʋʋ kɩsɛɛmʋʋ yɔɔ tʋmlaɖaa se pɔñɔɔzɩ Yehowa ɖɩɣa. 13 Nɛ mba pɔcɔŋnaɣ tʋmɩyɛ yɔɔ yɔ peyele nɛ tʋmɩyɛ paɣzɩ, nɛ pɛwɛɛ pɔcɔŋnɩ ñɔɔzʋʋ tʋmɩyɛ yɔɔ nɛ ɖiwokini ɛsɩndaa, nɛ pɔñɔɔzɩ Ɛsɔ toovenim tʋ ɖɩɣa nɛ kɛwɛɛ ɛzɩ pɩpɔzʋʋ yɔ nɛ pɛcɛyɩsɩ-kɛ. 14 Nɛ patɩɩtɛma lɛ, powoni liidiye nɖɩ ɖɩkazaa yɔ wiyaʋ nɛ Yehoyiyada pɔ-cɔlɔ, nɛ pakpaɣ-ɖɩ nɛ palabɩnɩ Yehowa ɖɩɣa taa wondu, lɩm ɖʋʋ tʋmɩyɛ wondu nɛ wondu ndʋ palakɩnɩ kɩlaŋ yɔ, nɛ kɔpʋnaa nɛ sika nɛ liidiye* wondu.+ Nɛ palaɣaɣ kɩlaŋ kɩñaɣzɩŋ+ Yehowa ɖɩɣa taa ɖoŋ ɖoŋ Yehoyiyada alɩwaatʋ kpeekpe taa.
15 Yehoyiyada kpadɩyaa nɛ ɛñɩɣzɩ pɩnzɩ lɛ, ɛsɩ; ɛɛwɛnɩ pɩnzɩ 130 alɩwaatʋ ndʋ ɛsɩba yɔ. 16 Nɛ pepimi-i awiya cɔlɔ Daviid Tɛtʋ taa,+ mbʋ pʋyɔɔ yɔ ɛlabɩ kɩbam Izrayɛɛlɩ+ taa pɩlɩɩnɩ Ɛsɔ toovenim tʋ nɛ Ɛsɔ ɖɩɣa pɔ-yɔɔ.
17 Yehoyiyada sɩm wayɩ lɛ, Yuuda awumbiya kɔɔ nɛ poluŋ wiyaʋ tɛɛ, nɛ wiyaʋ welisini-wɛ. 18 Peyebi pɔ-cɔzɔnaa tɛ Ɛsɔ Yehowa ɖɩɣa nɛ papaɣzɩ sɛʋ sizikasɩ kiɖeɖesi* nɛ sɩʋ kpelisi, nɛ piyele nɛ Ɛsɔ pana tii* Yuuda nɛ Yeruzalɛm yɔɔ, pa-kɩwɛɛkɩm yɔɔ. 19 Yehowa wɛɛ nɛ etiyiɣ nayaa pɛ-hɛkʋ taa se papɩsɩnɩ-wɛ ɛ-cɔlɔ, nɛ pɛwɛɛ nɛ papakɩ-wɛ, ɛlɛ pekizi welisuu.+
20 Ɛsɔ fezuu tii* cɔjɔ Yehoyiyada+ pɩyalʋ Zakarii yɔɔ, nɛ ɛkʋyɩ ɛsɩŋ lone kʋkʋyɩyɛ naɖɩyɛ yɔɔ nɛ eheyi samaɣ se: «Tɔm tʋnɛ Ɛsɔ toovenim tʋ yɔɔdʋʋ: “Ɛbɛ yɔɔ ɩwɛɛ nɛ ɩmaɣnɩ Yehowa paɣtʋ yɔɔ? Pɩɩkaɣ-mɩ ɖenuu! Ɩlɔ Yehowa; pʋyɔɔ lɛ, ɛnʋ ɖɔɖɔ ɛkaɣ-mɩ lɔʋ.”»+ 21 Ɛlɛ palɩɩ ɛ-wayɩ+ nɛ payaɣ-ɩ pɛɛ ɛzɩ wiyaʋ haʋ nɔɔ yɔ, Yehowa ɖɩɣa kadaɣ taa.+ 22 Wiyaʋ Yehowaasɩ tɩtɔzɩ sɔɔlɩm siɣsiɣ ñɩmbʋ mbʋ ɛ-caa* Yehoyiyada kaalɩzaa nɛ ɛwɩlɩ-ɩ yɔ pɩ-yɔɔ, nɛ ɛkʋ ɛ-pɩyalʋ. Ɛlɛ sɩkaɣ lɛ ɛyɔɔdɩ se: «Yehowa ɛcɔnɩ tɔm ndʋ ti-ɖeɖe nɛ ɛpɔzɩ-ŋ akɔnta.»+
23 Pɩnaɣ paɣzaa lɛ,* Siirii sɔɔjanaa kpa Yehowaasɩ wayɩ, nɛ powolo Yuuda nɛ Yeruzalɛm pa-wayɩ.+ Nɛ paɖɩzɩ samaɣ taa awumbiya kpeekpe,+ nɛ petiyini mbʋ payɩ pamʋ pɔ-cɔlɔ yɔ Damaasɩ wiyaʋ. 24 Mbʋ pʋyɔɔ yɔ, paa Siirii sɔɔjanaa mba pɔkɔm pa-wayɩ yɔ pataaɖɔɔ yɔ, Yehowa ɖʋzɩ Yuuda sɔɔjanaa mba pɔɖɔ sakɩyɛ yɔ pe-nesi tɛɛ,+ mbʋ pʋyɔɔ yɔ peyebi pɔ-cɔzɔnaa tɛ Ɛsɔ Yehowa. Mbʋ pɔhɔm* Yehowaasɩ nɩŋgbaŋʋʋ. 25 Nɛ peyebi-i nɛ pɛɖɛɛ lɛ (mbʋ pʋyɔɔ yɔ paɖʋ-ɩ heŋ siŋŋ*), ɛ-maɣmaɣ ɛ-lɩmɖʋyaa lɩɩ ɛ-wayɩ, mbʋ pʋyɔɔ yɔ ɛɛkpɛdɩ cɔjɔ Yehoyiyada pɩyalaa* calɩm.+ Pakʋ-ɩ ɛ-maɣmaɣ ɛ-kaɖʋ yɔɔ.+ Nɛ ɛsɩ nɛ pepimi-i Daviid Tɛtʋ taa,+ ɛlɛ patipimi-i awiya pɩlaŋ yɔɔ.+
26 Mba palɩ ɛ-wayɩ yɔ+ mba yɔ: Halʋ Amooni tʋ Simeyatɩ pɩyalʋ Zabaadɩ nɛ halʋ Mowaabʋ tʋ Simriitɩ pɩyalʋ Yehozabaadɩ. 27 Piyele nɛ ɛ-pɩyalaa tɔm nɛ tɔm hʋʋ tɔm sakɩyɛ ndʋ pɔyɔɔdɩ ɛ-yɔɔ yɔ+ nɛ Ɛsɔ toovenim tʋ ɖɩɣa ñɔɔzʋʋ* tɔm lɛ,+ pama tɔm ndʋ tɩ-tɩŋa tɔm ndʋ tɩwɛ Awiya Takayaɣ taa yɔ tɩ-taa.* Nɛ ɛ-pɩyalʋ Amaziya pɩsɩ wiyaʋ e-lone taa.