Ɛsɩtɛɛrɩ
2 Pɩlabɩ mbʋ nɛ pɩtɛ, nɛ Wiyaʋ Asiyeruusi+ pana hɛwa lɛ, ɛtɔzɩ mbʋ Vasɩti kaalaba+ nɛ mbʋ paaɖʋwa se palakɩ-ɩ yɔ+ pɩ-yɔɔ. 2 Nɛ lɩmɖʋyaa mba paɖʋwaɣ wiyaʋ maɣmaɣ lɩm yɔ pɔtɔ se: «Pɩwɛɛ se pañɩnɩ wiyaʋ pɛlaa mba peɖewa nɛ patɩsɩ abalaa yɔ. 3 Nɛ wiyaʋ ɛlɩzɩ ageeta kpeekpe wena a-yɔɔ ɛtɔkɩ kewiyitu yɔ+ a-taa kaɖɩsɩ nɛ sikpeɣli pɛlaa mba payɩ patɩsɩ abalaa yɔ Suuzaŋ,* wiyaʋ ɖɩɣa* taa, halaa ɖɩɣa taa. Paɖʋzɩ-wɛ Egaayi+ weyi ɛkɛ wiyaʋ tɛ eliŋgiye nɛ halaa yɔɔ cɔnɩyʋ yɔ e-nesi taa, nɛ pataɣ-wɛ* keɖeɣa num. 4 Nɛ pɛlɛ weyi ɛ-tɔm kɛdɩɣnɩ wiyaʋ nɛ pɩkɩlɩ yɔ, ɛkaɣ abiɖe pɩsʋʋ Vasɩti lone taa.»+ Lɩmaɣzɩyɛ nɖɩ ɖɩkɛdɩnɩ wiyaʋ, nɛ ɛla mbʋ.
5 Yuuda abalʋ nɔɔyʋ kaawɛ Suuzaŋ,*+ wiyaʋ ɖɩɣa* taa, payaɣ-ɩ se Mɔrɩdekayɩ,+ ɛkɛ Yayiirɩ pɩyalʋ, Simeyii pɩyalʋ, Kiisi pɩyalʋ, nɛ ɛkɛ Bɛnjamɛɛ tʋ;+ 6 ɛɛwɛ ɛyaa mba paakpaɣ-wɛ nɛ Yeruzalɛm nɛ powoni-wɛ yomiye taa yɔ pa-taa, pa nɛ Yuuda wiyaʋ Yekoniya*+ weyi Babilɔɔnɩ wiyaʋ Nabukodonozɔɔrɩ kaawoni yomiye taa yɔ. 7 Mɔrɩdekayɩ kaakɛnɩ Hadasa* yɔɔ cɔnɩyʋ, mbʋ pʋyɔɔ yɔ ɛlɛ taawɛɛnɩ caa nɛ ɛtaawɛɛnɩ ɖoo. Ɛsɩtɛɛrɩ payaɣ se Hadasa, Mɔrɩdekayɩ caa hɔʋ taa tʋ nɔɔyʋ*+ pɛlɛ ɛkɛnaa. Pɛlɛ ɛnʋ eɖewa pɩdɩɩfɛyɩ nɛ ɛwɛɛ cɔnʋʋ siŋŋ; nɛ ɛ-caa nɛ e-ɖoo pa-sɩm wayɩ lɛ, Mɔrɩdekayɩ mʋ-ɩ nɛ ɛcɔnɩ ɛ-yɔɔ ɛzɩ ɛ-pɛlɛ yɔ. 8 Alɩwaatʋ ndʋ posusi wiyaʋ tɔm nɛ ɛ-paɣtʋ nɛ pekpeɣli pɛlaa sakɩyɛ Suuzaŋ,* wiyaʋ ɖɩɣa* taa nɛ paɖʋzɩ-wɛ Egaayi+ nesi taa lɛ, pɔkɔnɩ ɖɔɖɔ Ɛsɩtɛɛrɩ wiyaʋ ɖɩɣa taa nɛ paɖʋzɩ-ɩ Egaayi weyi ɛkɛ halaa yɔɔ cɔnɩyʋ yɔ e-nesi taa.
9 Nɛ pɛlɛ ɛnʋ ɛ-tɔm kaakɛdɩnɩ-ɩ nɛ ɛsɔɔlɩ ɛ-tɔm, pʋyɔɔ ɛlabɩ ɖʋtʋ kpaagbaa se pataɣ-ɩ* keɖeɣa num+ nɛ pɛcɛlɩ-ɩ ŋgee tɔɔnaɣ; nɛ ɛlɩzɩ wiyaʋ ɖɩɣa taa pɛlaa 7 se pɛkɛ Ɛsɩtɛɛrɩ lɩmɖʋyaa. Pɩtasɩ lɛ, ɛkpaɣ Ɛsɩtɛɛrɩ nɛ ɛ-lɩmɖʋyaa nɛ ewoni-wɛ halaa ɖɩɣa taa lone nɖɩ ɖɩkɩlɩ ɖeu yɔ ɖɩ-taa. 10 Ɛsɩtɛɛrɩ tɩyɔɔdɩ natʋyʋ ɛ-samaɣ yɔɔ+ yaa ɛ-hɔʋ taa mba yɔɔ, mbʋ pʋyɔɔ yɔ Mɔrɩdekayɩ+ kaapaɣ-ɩ se etaaheyi-tʋ nɔɔyʋ.+ 11 Paa evemiye nɖɩ lɛ, Mɔrɩdekayɩ ɖɔŋaɣ halaa ɖɩɣa kadaɣ ɛsɩndaa se ɛna se Ɛsɩtɛɛrɩ wɛ alaafɩya camɩyɛ na, nɛ ɛna ɖɔɖɔ mbʋ pɩ-taa ɛwɛɛ yɔ.
12 Paa pɛlɛ weyi lɛ, ɛwɛnɩ alɩwaatʋ ndʋ pɩwɛɛ se ewolo Wiyaʋ Asiyeruusi cɔlɔ, alɩwaatʋ ndʋ ɛtɛŋ fenasɩ 12 nzɩ paha halaa se pataanɩ-wɛ* keɖeɣa num yɔ, mbʋ pʋyɔɔ yɔ alɩwaatʋ ndʋ paha-wɛ se pataanɩ-wɛ keɖeɣa num—pataɣ-wɛ* miiri+ num fenasɩ 6, nɛ balɩsam num+ nɛ keɖeɣa num lɛɛbʋ ndɩ ndɩ fenasɩ 6. 13 Ðɩnɛ ɛlɛ, pɛlɛ ɛnʋ ɛpɩzɩɣ nɛ ewolo wiyaʋ cɔlɔ; nɛ alɩwaatʋ ndʋ ɛlɩɣnɩ halaa ɖɩɣa taa se ewolo wiyaʋ ɖɩɣa taa yɔ, paa ɛbɛ ɛpɔzaa yɔ pɛcɛlɩɣ-ɩ. 14 Ewoki ɖanaɣ yɔɔ, nɛ tanaŋ tɛɛ lɛ ɛpɩsɩ halaa ɖɩɣa 2 ñɩŋga taa, ŋga paɖʋzɩ Saasɩgazɩ, weyi ɛkɛ wiyaʋ eliŋgiye+ nɛ ɛcɔŋnɩ wiyaʋ ɖaŋnaa yɔɔ yɔ e-nesi taa yɔ. Nɛ pɛlɛ ɛnʋ ɛɛpɩzɩɣ nɛ ɛtasɩ wiyaʋ cɔlɔ wobu ye wiyaʋ taa ɛtɩlabɩ-ɩ nɛ leleŋ nɛ ɛyaa-ɩ nɛ ɛ-hɩɖɛ se ewolo yɔ.+
15 Nɛ pɩtalɩnɩ Mɔrɩdekayɩ hɔʋ taa tʋ* Abihayɩlɩ pɛlɛ Ɛsɩtɛɛrɩ, weyi Mɔrɩdekayɩ kaamʋ-ɩ nɛ ɛcɔnɩ ɛ-yɔɔ ɛzɩ ɛ-pɛlɛ yɔ,+ se ewolo wiyaʋ cɔlɔ. Ɛsɩtɛɛrɩ tɩpɔzɩ nabʋyʋ nɛ pɩtasɩnɩ mbʋ wiyaʋ eliŋgiye Egaayi, weyi ɛkɛ halaa yɔɔ cɔnɩyʋ yɔ eheyi-i se ɛpɔzɩ yɔ. (Alɩwaatʋ ndʋ tɩ-tɩŋa tɩ-taa lɛ, Ɛsɩtɛɛrɩ tɔm kɛdaɣnɩ mba payɩ panaɣaɣ-ɩ yɔ.) 16 Pakpaɣ Ɛsɩtɛɛrɩ nɛ powoni-i Wiyaʋ Asiyeruusi tɛ, e-kewiyaɣ ɖɩɣa taa, fenaɣ 10 ñɩŋga taa, pʋ-tɔbʋʋ se Tebɛɛtɩ* fenaɣ taa, e-kewiyaɣ pɩnaɣ 7 ñɩŋga taa.+ 17 Nɛ wiyaʋ sɔɔlɩ Ɛsɩtɛɛrɩ nɛ pɩkɩlɩ halaa lalaa tɩŋa, nɛ Ɛsɩtɛɛrɩ tɔm kɛdɩnɩ-ɩ nɛ ɛsɔɔlɩ ɛ-tɔm nɛ pɩkɩlɩ pɛlaa lalaa. Nɛ ete ɛ-ñʋʋ abila ñʋʋ kitemuu nɛ ɛpɩsɩ-ɩ abiɖe,+ Vasɩti lone taa.+ 18 Nɛ wiyaʋ la kazandʋ sɔsɔtʋ natʋyʋ ɛ-awumbiya tɩŋa nɛ ɛ-lɩmɖʋyaa tɩŋa, se ɛɖʋnɩ hɩɖɛ Ɛsɩtɛɛrɩ. Nɛ esusi se poholi ageeta kpeekpe,* nɛ ɛwɛɛ kʋjɔŋ labʋ yɔɔ ɛzɩ wiyaʋ ñɩm pɔzʋʋ yɔ.
19 Nɛ alɩwaatʋ ndʋ patasɩ pɛlaa*+ mba kpeɣluu nabʋlɛ ɖeɖe yɔ, Mɔrɩdekayɩ kaacaɣ wiyaʋ nɔnɔɔ taa. 20 Ɛsɩtɛɛrɩ tɩyɔɔdɩ natʋyʋ ɛ-hɔʋ taa mba yɔɔ yaa ɛ-samaɣ yɔɔ,+ ɛzɩ Mɔrɩdekayɩ kaatasʋʋ-ɩ lɔŋ yɔ; Ɛsɩtɛɛrɩ wobi pɩ-yɔɔ nɛ ɛɖɔŋ tɔm ndʋ Mɔrɩdekayɩ heyaɣ-ɩ yɔ tɩ-yɔɔ, ɛzɩ ɛɛlakʋʋ alɩwaatʋ ndʋ ɛɛwɛ ɛ-cɔlɔ yɔ.+
21 Kɩyakɩŋ ɛnɩ ɩ-taa, alɩwaatʋ ndʋ Mɔrɩdekayɩ cakaɣ wiyaʋ nɔnɔɔ taa yɔ, Bikɩtaanɩ nɛ Terɛɛzɩ, wiyaʋ kaɖɩsɩ 2, nzɩ sɩɩkɛ nɔnɔɔ yɔɔ ɖaŋɩyaa yɔ, sɩkɔ pana nɛ sɩkpɛyɩ se sɩkʋʋ Wiyaʋ Asiyeruusi.* 22 Ɛlɛ Mɔrɩdekayɩ nɩɩ tɔm ndʋ, nɛ eheyi-tʋ Abiɖe Ɛsɩtɛɛrɩ kpaagbaa. Nɛ Ɛsɩtɛɛrɩ yɔɔdɩnɩ wiyaʋ, Mɔrɩdekayɩ hɩɖɛ taa.* 23 Peeɖe patazɩ tɔm ndʋ tɩ-taa nɛ pɔkɔɔ nɛ pana se tɩkɛ toovenim, nɛ popuzi abalaa mba pa-naalɛ sizika yɔɔ; nɛ pama tɔm ndʋ tɩ-tɩŋa takayaɣ ŋga ka-taa pamaɣ tɔm ndʋ tɩlakɩ yɔ, wiyaʋ ɛsɩndaa.+