Apostoloowaa Tʋma Labʋ
4 Pa-naalɛ pɛwɛɛ nɛ pɔyɔɔdʋʋnɩ samaɣ lɛ, cɔjɔnaa, templo yɔɔ cɔnɩyʋ nɛ Saduki mba+ palɩɩ pɔ-yɔɔ. 2 Pɩɩwɩzɩ-wɛ mbʋ pʋyɔɔ yɔ apostoloowaa wɛɛ nɛ pawɩlɩɣ samaɣ tɔm nɛ posusuu kaɣlaa se Yesu femni sɩɖaa taa.+ 3 Nɛ pakpa-wɛ nɛ paɖʋ-wɛ salaka+ nɛ tɛʋ kɔɔ kife, mbʋ pʋyɔɔ yɔ ɖanaɣ kaatɛm ɖanʋʋ. 4 Paa mbʋ yɔ, mba paawelisi pɔ-tɔm yɔɔdʋʋ yɔ, pa-taa sakɩyɛ tisi, nɛ abalaa mba papɩsɩ tɔm mʋyaa yɔ patalɩ ɛzɩ 5 000 mbʋ yɔ.+
5 Tɛʋ fema lɛ, pa-ñʋndɩnaa, ɛzʋtʋyaa, nɛ takayɩsɩ mayaa pekpeɣli Yeruzalɛm, 6 pa nɛ Ana+ weyi ɛkɛ cɔjɔ sɔsɔ yɔ, nɛ Kayifu,+ Yohanɛɛsɩ, Alɛkɩsandrɩ, nɛ mba payɩ paakɛ cɔjɔ sɔsɔ hɔʋ taa ñɩma yɔ. 7 Pasɩnzɩ Pɩyɛɛrɩ nɛ Yohanɛɛsɩ pɛ-hɛkʋ taa nɛ papaɣzɩ-wɛ tɔm pɔzʋʋ se: «Ðoŋ weyi ɩlabɩnɩ mbʋ, yaa a-hɩɖɛ taa ɩlabɩ mbʋ?» 8 Ðɩnɛ ɛlɛ fezuu kiɖeɖeu su Pɩyɛɛrɩ taa ɖo,+ nɛ eheyi-wɛ se:
«Samaɣ ñʋndɩnaa nɛ ɛzʋtʋyaa, 9 ye pɔpɔzʋʋ-ɖʋ tɔm sɔnɔ lakasɩ kɩbanzɩ nzɩ ɖɩlabɩ kaakalaɣ kanɛ yɔ sɩ-yɔɔ,+ nɛ ɩñɩnɩɣ se ɩtɩlɩ weyi eyeba nɛ abalʋ ɛnɛ ɛ-yɔɔ cɛ yɔ, 10 pɩwɛɛ se mɩ-tɩŋa payɩ nɛ Izrayɛɛlɩ samaɣ kpeekpe ɩtɩlɩ se Yesu Krɩstʋ Nazarɛɛtɩ tʋ, weyi ɩkamɩ-ɩ sizika yɔɔ+ ɛlɛ Ɛsɔ fezi-i nɛ sɩɖaa taa+ yɔ ɛ-hɩɖɛ taa,+ nɛ ɛ-yɔɔ pɩtɩŋnaa nɛ abalʋ ɛnɛ ɛsɩŋ mɩ-ɛsɩndaa cɩnɛ ɛ nɛ ɛ-alaafɩya. 11 Yesu ɛnʋ ɛkɛnɩ “pɩyɛ nɖɩ mɩ kuduyuŋ mayaa ɩtɩkpaɣ-ɖɩ nɛ ɩyaa pʋyʋ yɔ, nɖɩ pɩsɩnɩ kɔna taa pɩyɛ nɖɩ ɖɩ-tɔm kɩlɩ cɛyʋʋ yɔ.”*+ 12 Pɩtasɩ lɛ, ñʋʋ yaɖʋ nɔɔyʋ fɛyɩ nɛ pɩtasɩnɩ-ɩ, mbʋ pʋyɔɔ yɔ hɩɖɛ naɖɩyɛ tɩtasɩ wɛʋ tataa cɩnɛ,+ nɖɩ paha ɛyaa, nɖɩ ɖɩ-yɔɔ pɩwɛɛ se ɖɩtɩŋna nɛ ɖihiɣ ñʋʋ yabʋ yɔ.»+
13 Nɛ pana ɛzɩma Pɩyɛɛrɩ nɛ Yohanɛɛsɩ pɔyɔɔdaɣ tɔm kaalɛyɩtʋ,* nɛ peɖiɣzina se patɩla sukuli* nɛ pɛkɛ ɛyaa yemwaa lɛ,+ pɩlabɩ-wɛ piti. Ðɩnɛ ɛlɛ peɖiɣzina se pa nɛ Yesu paawɛna.+ 14 Abalʋ weyi ɛ-yɔɔ cɛba yɔ ɛsɩŋ pɔ-cɔlɔ nɛ pɛwɛɛ nɛ pɔcɔŋnɩ-ɩ lɛ,+ paanaɣ se pɔyɔɔdɩ suwe.+ 15 Peeɖe peheyi-wɛ se palɩɩ Sahedrɛɛ kuduyuu tɛɛ, nɛ papaɣzɩ ɖama yɔɔdɩnʋʋ, 16 nɛ pɔtɔŋ se: «Ɛbɛ ɖɩkaɣ labʋ ɛyaa panɛ?+ Mbʋ pʋyɔɔ yɔ toovenim taa lɛ, palabɩ maamaaci lakasɩ sɔsɔsɩ,* nɛ Yeruzalɛm mba tɩŋa na-sɩ,+ nɛ ɖɩɩpɩzɩɣ ɖɩkpɛzɩ. 17 Pɩsa nɛ tɔm ndʋ tɩtaatasɩ yɛlʋʋ samaɣ hɛkʋ taa lɛ, iyele nɛ ɖɩñazɩ-wɛ nɛ ɖiheyi-wɛ se pataatasɩ yɔɔdɩnʋʋ nɔɔyʋ abalʋ ɛnʋ ɛ-hɩɖɛ taa.»+
18 Ðɩnɛ ɛlɛ payaa-wɛ nɛ paɖʋ-wɛ paɣtʋ se pataatasɩ natʋyʋ yɔɔdʋʋ yaa wɩlʋʋ Yesu hɩɖɛ taa. 19 Ɛlɛ Pɩyɛɛrɩ nɛ Yohanɛɛsɩ pocosi-wɛ se: «Ye pɩwɛ siɣsiɣ Ɛsɔ ɛsɩndaa se ɖiwelisini-mɩ nɛ ɖiyele Ɛsɔ yɔ, mɩ-maɣmaɣ ɩhʋʋ-tʋ nɛ ɩna. 20 Ɛlɛ ɖa lɛ, ɖɩɩpɩzɩɣ nɛ ɖiyele mbʋ ɖɩnawa nɛ ɖɩnɩɩ yɔ pɩ-tɔm yɔɔdʋʋ.»+ 21 Pʋyɔɔ, patasɩ-wɛ ñazʋʋ nɛ pɩtɛ lɛ, peyebi-wɛ mbʋ pʋyɔɔ yɔ patihiɣ natʋyʋ se tɩ-yɔɔ lɛ pɔhɔ pa-nɩŋgbaŋʋʋ; nɛ pɩtasɩ lɛ, sɔɔndʋ kpaɣaɣ-wɛ nɛ samaɣ,+ mbʋ pʋyɔɔ yɔ ka-tɩŋa kɛwɛɛ nɛ kasaŋ Ɛsɔ mbʋ pɩlaba yɔ pɩ-yɔɔ. 22 Mbʋ pʋyɔɔ yɔ abalʋ weyi palabɩ maamaaci lakasɩ* nzɩ nɛ ɛ-yɔɔ cɛ yɔ, ɛcɛzɩ pɩnzɩ 40.
23 Peyebi-wɛ lɛ, powolo tɔm mʋyaa lalaa cɔlɔ nɛ pɛkɛdɩ-wɛ tɔm ndʋ cɔjɔnaa sɔsaa nɛ ɛzʋtʋyaa peheyi-wɛ yɔ. 24 Panɩ-tʋ lɛ, pɛkpɛndɩ nɔɔ kʋɖʋmaɣ nɛ patɩmnɩ Ɛsɔ nɛ nɔɔ kɩkʋyaɣ nɛ pɔtɔ se:
«Kɩbaɣlʋ Kɩlɩm, ñɛkɛnɩ Weyi ɛlabɩ ɛsɔdaa nɛ tɛtʋ nɛ teŋgu nɛ mbʋ payɩ pɩwɛ pa-taa yɔ,+ 25 nɛ weyi ɛtɩŋnɩ fezuu kiɖeɖeu yɔɔ nɛ ɛyɔɔdɩnɩ ɖɔ-cɔzɔ, ña-lɩmɖʋyʋ Daviid nɔɔ yɔ se:+ “Ɛbɛ yɔɔ ajɛɛ peendiɣ nɛ ɛyaa samasɩ maɣzɩɣ mbʋ pɩɩwazɩɣ pʋyʋ yɔ pɩ-yɔɔ? 26 Tɛtʋ yɔɔ awiya kʋyaa nɛ ñʋndɩnaa kpeɣli ɛzɩ ɛyʋ kʋɖʋm yɔ se pakaɖɩnɩ Yehowa* nɛ ɛ-tɛ patam num.”*+ 27 Mbʋ pʋyɔɔ yɔ toovenim taa lɛ, Eroodi nɛ Pɔɔnsɩ Pilaatɩ+ nɛ ajɛɛ taa ɛyaa nɛ Izrayɛɛlɩ samaɣ pekpeɣli tɛtʋ tʋnɛ tɩ-taa nɛ pakaɖɩnɩ ña-lɩmɖʋyʋ kiɖeɖeu Yesu, weyi ŋta-ɩ num yɔ,+ 28 se pala mbʋ ñe-nesi nɛ ñɔ-lɔŋ tasʋʋ pɛlɛyɩ ɖʋʋ se pɩkaɣ labʋ yɔ.+ 29 Nɛ lɛɛlɛɛyɔ lɛ, Yehowa,* cɔna nɛ ŋna pañazʋʋ-ɖʋ yɔ, nɛ ŋyele nɛ ño-yomaa wolo ñɔ-tɔm susuu yɔɔ nɛ abalɩtʋ tɩŋa, 30 alɩwaatʋ ndʋ ŋseziɣ ñe-nesi nɛ ŋwaɣ kʋdɔndɩnaa nɛ ŋlakɩ yʋsasɩ nɛ piti lakasɩ+ ña-lɩmɖʋyʋ kiɖeɖeu Yesu hɩɖɛ taa yɔ.»+
31 Nɛ petendi Ɛsɔ* mbʋ lɛ, lone nɖɩ ɖɩ-taa paakpeɣlaa yɔ ɖɩñamsɩ, nɛ fezuu kiɖeɖeu su pe-kpeekpe pa-taa ɖo+ nɛ posusuu Ɛsɔ tɔm nɛ abalɩtʋ.+
32 Pɩtasɩ lɛ, ɛyaa sakɩyɛ mba petisaa yɔ, pɛkpɛndɩ laŋɩyɛ kʋɖʋmɖɩyɛ nɛ kalɩzaɣ* kʋɖʋmaɣ, nɛ halɩ pa-taa nɔɔyʋ taayɔɔdʋʋ se mbʋ ɛwɛna yɔ pɩ-taa nabʋyʋ kɛ ɛ-pʋyʋ, ɛlɛ pɛkpɛndaɣ pɩtɩŋa.+ 33 Nɛ apostoloowaa wɛɛ nɛ palɩzɩɣ aseɣɖe Kɩbaɣlʋ Yesu femtu yɔɔ nɛ ɖoŋ sɔsɔŋ,+ nɛ Ɛsɔ lootiye kaawɛ pa-tɩŋa pɔ-yɔɔ siŋŋ. 34 Toovenim taa lɛ, pa-taa nɔɔyʋ taawɛɛ kɩcɛyɩm taa,+ mbʋ pʋyɔɔ yɔ mba payɩ paawɛnɩ hayɩm yaa ɖɩsɩ yɔ pɛpɛdaɣ-sɩ nɛ pɔkɔŋnɩ liidiye, 35 nɛ pasɩɣ-ɖɩ apostoloowaa nɩŋgbanzɩ tɛɛ.+ Nɛ patayɩɣ-ɖɩ paa weyi ɛzɩ ɛ-kɩcɛyɩm pɔzʋʋ yɔ.+ 36 Nɛ Yosɛɛfʋ, weyi apostoloowaa yaɣaɣ ɖɔɖɔ se Barnaabaasɩ+ (pʋ-tɔbʋʋ se «Laŋɩyɛ hɛzʋʋ pɩyalʋ»), nɛ ɛkɛ Leevi tʋ nɛ ɛlɩnɩ Siiprɩ yɔ, 37 ɛɛwɛnɩ tɛtʋ hɔɔlaɣ nakɛyɛ, nɛ ɛpɛdɩ-kɛ nɛ ɛkɔnɩ liidiye nɛ ɛsɩɩ-ɖɩ apostoloowaa nɩŋgbanzɩ tɛɛ.+