Ezekɩyɛɛlɩ
38 Yehowa tɔm tasɩ-m talʋʋ se: 2 «Ɛyʋ pɩyalʋ, pa ñɛ-ɛsa nɛ Gɔɔgɩ, weyi ɛlɩnɩ Maagɔɔgɩ ɛjaɖɛ taa yɔ,+ Mesɛɛkɩ nɛ Tubaalɩ+ pa-ñʋʋdʋ* sɔsɔ, nɛ ŋyɔɔdɩ mbʋ pɩkaɣ-ɩ talʋʋ yɔ pɩ-natʋ tɔm.+ 3 Yɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Na, mankʋyʋʋ ñɔ-yɔɔ, Oo Gɔɔgɩ, Mesɛɛkɩ nɛ Tubaalɩ pa-ñʋʋdʋ* sɔsɔ. 4 Mankaɣ labʋ nɛ ŋpɩsɩ, nɛ manɖʋʋ kolasɩ ña-lɩkpaɣzasɩ taa+ nɛ malɩzɩ ña nɛ ñɔ-sɔɔjanaa kpeekpe,+ ña-kpaŋnaŋ nɛ ña-kpaŋnaŋ yɔɔ caɣyaa, pa-tɩŋa posu wondu ndʋ tiɖewa yɔ, pɛkɛ samaɣ sɔsɔɔ ŋga kɔɖɔkɩ kpayɩŋ sɔsɔŋ nɛ kpayɩŋ cikpeŋ* yɔ, pa-tɩŋa pɔɖɔkɩ laɣla; 5 pa nɛ Pɛrɩsɩ, Etiyoopii nɛ Puti+ pɛwɛna, pa-tɩŋa pɔɖɔkɩ kpayɩŋ cikpeŋ nɛ papa ñɩɣtʋ hulasɩ; 6 Gomɛɛrɩ nɛ kɩ-sɔɔjanaa kpeekpe, Togarɩma lʋlʋʋ taa ñɩma+ mba palɩnɩ hayo kiŋ hɔɔlɩŋ weyi ɩkɩlɩ posuu yɔ ɩ-taa yɔ nɛ pɔ-sɔɔjanaa kpeekpe—samasɩ sakɩyɛ wɛ ñɔ-cɔlɔ.+
7 «“‘Ñɔɔzɩ ña-tɩ nɛ ŋɖaŋ, ña nɛ ñɔ-sɔɔjanaa kpeekpe mba pekpeɣli ñɔ-cɔlɔ yɔ, ɩñɔɔzɩ mɩ-tɩ, nɛ ŋkaɣ kɛʋ pa-ñʋʋdʋ.*
8 «“‘Kɩyakɩŋ sakɩyɛ wayɩ lɛ, mankaɣ kɛzʋʋ ma-lɩmaɣza nɛ ñɔ-yɔɔ.* Pɩnzɩ ɖɩdɛnɖɛ alɩwaatʋ taa lɛ, ŋkaɣ kɔm ɛjaɖɛ nɖɩ laɣɖɛ kaakɔnɩ ɖɩ-taa mba kaɖɛ nɛ pʋwayɩ paɖaɣnɩ-wɛ pɩsɩnʋʋ ɛjaɖɛ nɖɩ ɖɩ-taa yɔ ɖɩ-wayɩ. Pekpeɣli ɛyaa mba nɛ samasɩ sakɩyɛ taa nɛ pɔkɔnɩ-wɛ Izrayɛɛlɩ pʋŋ weyi ɩɩcaɣ kpɛɖɛ alɩwaatʋ sakɩyɛ yɔ ɩ-yɔɔ. Samasɩ taa paakpaɣnɩ ɛjaɖɛ nɖɩ ɖɩ-taa mba nɛ papɩsɩnɩ-wɛ pɛ-ɛjaɖɛ taa, nɛ pa-tɩŋa pɛwɛ pɛɛyɛ taa.+ 9 Ŋkaɣ kɔm pa-wayɩ ɛzɩ tɛʋ ŋgʋ kɩnɩɣnɩ helim sɔsɔm yɔ, nɛ ŋkaɣ huuzuu ɛjaɖɛ yɔɔ ɛzɩ mɩndʋ yɔ, ña nɛ ñɔ-sɔɔjanaa kpeekpe nɛ samasɩ sakɩyɛ nzɩ sɩwɛ ñɔ-cɔlɔ yɔ.’”
10 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Kɩyakʋ ŋgʋ ki-wiye, lɩmaɣza naayɛ kaɣ kpaʋ ña-ñʋʋ taa, nɛ ŋkaɣ labʋ tamaɣ kɩdɛkɛdaɣ. 11 Ŋkaɣ yɔɔdʋʋ se: ‘Mankaɣ kɔm ɛjaɖɛ nɖɩ patɩkandɩyɩ ɖɩ-tɛtʋ cikpetu ndɩ ndɩ yɔɔ yɔ ɖɩ-wayɩ.+ Mankaɣ kɔm mba pɛwɛ pɛɛyɛ taa nɛ nabʋyʋ ɛɛcɛyɩɣ-wɛ yɔ pa-wayɩ, pa-tɩŋa pɛwɛ tɛtʋ cikpetu ndɩ ndɩ ndʋ tɩfɛyɩnɩ kolonzi, ñɩɣtʋ ndʋ pakaɖɩɣnɩ pɔɔyɩŋ yɔ, yaa nɔnɔsɩ se pɩkandɩyɩ tɩ-yɔɔ yɔ tɩ-taa.’ 12 Ŋkaɣ ɖʋʋ ña-taa se ŋlazɩɣ wondu sakɩyɛ nɛ ŋɖɛna, se ŋwoki lona wena paayɔkɩ-yɛ nɛ lɛɛlɛɛyɔ lɛ ɛyaa wɛ a-taa yɔ a-wayɩ+ nɛ ŋyooni ɖɔɖɔ samaɣ ŋga paɖaɣnɩ-kɛ kpeɣluu nɛ ajɛɛ taa yɔ,+ ŋga kɛwɛɛ nɛ kekpeɣliɣ ñɩm nɛ wondu nɛ kakpazɩɣ huwa yɔ,+ ŋga kɛwɛ tɛtʋ hɛkʋ taa yɔ.
13 «“Seeba+ nɛ Dedaanɩ,+ Tarɩsiisi+ tadɩyɛ laɖaa nɛ ki-you laɖaa* tɩŋa pakaɣ-ŋ pɔzʋʋ se: ‘Ŋwoki ɛjaɖɛ wayɩ se ŋhiɣ wondu sakɩyɛ nɛ ŋlazɩ? Ŋkpeɣli ñɔ-sɔɔjanaa se ŋkpaɣ liidiye nɛ sika nɛ ŋɖɛna, se ŋkpaɣ ñɩm nɛ wondu nɛ ŋɖɛna, se ŋkuu ñɩm sakɩyɛ na?’”
14 «Pʋyɔɔ lɛ, ɛyʋ pɩyalʋ, yɔɔdɩ natʋ tɔm nɛ ŋheyi Gɔɔgɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Kɩyakʋ ŋgʋ ki-wiye, man-samaɣ Izrayɛɛlɩ wɛɣ pɛɛyɛ taa lɛ, ɛzɩ ŋŋkaɣ ɖiɣzinuu na?+ 15 Ŋkaɣ lɩnʋʋ ño-lone taa nɛ ŋkɔɔ, ŋkaɣ lɩnʋʋ hayo kiŋ hɔɔlɩŋ weyi ɩkɩlɩ posuu yɔ ɩ-taa,+ ña nɛ samasɩ sakɩyɛ nzɩ sɩwɛ ñɔ-cɔlɔ yɔ, pa-tɩŋa pacakɩ kpaŋnaŋ yɔɔ, pɛkɛ samaɣ sɔsɔɔ, sɔɔjanaa samaɣ sɔsɔɔ.+ 16 Ɛzɩ mɩndʋ huuzuu ɛjaɖɛ yɔɔ yɔ, mbʋ ŋkaɣ kɔm man-samaɣ Izrayɛɛlɩ wayɩ. Kɩyakɩŋ ɖɩdɛnɖɛ alɩwaatʋ taa lɛ, mankaɣ-ŋ kɔnʋʋ mɛ-ɛjaɖɛ wayɩ+ se pɩsa nɛ ajɛɛ tɩlɩ-m alɩwaatʋ ndʋ mantɩŋɩɣnɩ ñɔ-yɔɔ nɛ manpɩsɩ man-tɩ kiɖeɖeu a-ɛsɩndaa yɔ, Oo Gɔɔgɩ.’”+
17 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ɛzɩ pɩtɩkɛ kʋɖʋm ña ñɔ-tɔm maatɩŋnɩ ma-lɩmɖʋyaa mba pɛkɛ Izrayɛɛlɩ nayaa yɔ pɔ-yɔɔ nɛ mɔyɔɔdɩ ɖooo lɔndaa, mba paayɔɔdɩ natʋ tɔm pɩnzɩ sakɩyɛ se mankaɣ yebu nɛ ŋkɔɔ pa-wayɩ yɔ?”
18 «“Kɩyakʋ ŋgʋ ki-wiye, kɩyakʋ ŋgʋ Gɔɔgɩ kɔŋ Izrayɛɛlɩ ɛjaɖɛ wayɩ yɔ, man-pana sɔsɔna kaɣ mʋʋ miŋ,+ Kɩbaɣlʋ Kɩlɩm Yehowa yɔɔdʋʋna. 19 Men-kpekpeka taa, man-pana miŋ taa, mankaɣ yɔɔdʋʋ; nɛ kɩyakʋ ŋgʋ ki-wiye tɛtʋ kaɣ ñamsʋʋ siŋŋ Izrayɛɛlɩ ɛjaɖɛ taa. 20 Mɔ-yɔɔ lɛ, teŋgu taa kpakpasɩ, ɛsɔdaa sumasɩ, ñɩtʋ taa tɛtɛgbɩna, kpɩna wena atuu tataa yɔ a-kpeekpe, nɛ tɛtʋ yɔɔ ɛyaa kpeekpe kaɣ seluu; pʋŋ kaɣ ɖabʋ,+ kaaŋ kaɣ cɛbʋ nɛ ɩtɔlɩ nɛ kolonzi tɩŋa kaɣ ɖabʋ.”
21 «“Mankaɣ yaʋ laɣɖɛ nɛ ɖɩkɔɔ ɛ-wayɩ man-pʋŋ tɩŋa yɔɔ. Paa weyi lɛ, ɛkaɣ kpazʋʋ laɣɖɛ e-koobu yɔɔ,+ Kɩbaɣlʋ Kɩlɩm Yehowa yɔɔdʋʋna. 22 Mankaɣ-ɩ hʋnʋʋ tɔm* nɛ kɩzɩkʋ+ nɛ calɩm kpɛdʋʋ; nɛ mankaɣ labʋ nɛ tɛʋ sɔsɔʋ nɛ ɖɔmbɛɛ+ nɛ miŋ+ nɛ tɩm+ tii ɛ nɛ ɛ-sɔɔjanaa pɔ-yɔɔ nɛ samasɩ sakɩyɛ nzɩ sɩwɛ ɛ-cɔlɔ yɔ sɩ-yɔɔ.+ 23 Nɛ pɩtʋʋ fɛyɩ se mankaɣ wɩlʋʋ man-paɣlɩka nɛ manpɩsɩ man-tɩ kiɖeɖeu nɛ meyele nɛ patɩlɩ-m ajɛɛ sakɩyɛ ɛsɩndaa; nɛ toovenim taa lɛ pakaɣ tɩlʋʋ se ma lɛ Yehowa.”