Kɔrɛntɩ mba takayaɣ naalɛ ñɩŋga
9 Piyele nɛ lɩm ɖʋʋ tʋmɩyɛ nɖɩ pɩwɛɛ se pala ɛyaa kiɖeɖema yɔ ɖɩ-hɔɔlʋʋ taa lɛ,+ toovenim taa lɛ, pɩtɩcɛyɩ se mama-mɩ; 2 mbʋ pʋyɔɔ yɔ manawa se mi-liu wɛɛ siŋŋ se ɩla mbʋ, nɛ mankʋndʋʋ pɩ-yɔɔ Masedonii mba cɔlɔ, se Akayii mba tɛm pa-tɩ ñɔɔzʋʋ pɩlakɩ pɩnaɣ yɔ; nɛ mi-kpekpeka seɣti pa-taa sakɩyɛ. 3 Ɛlɛ mentiyiɣ koobiya se pɩsa nɛ ɛzɩma ɖɩkʋndʋʋ mɩ-yɔɔ yɔ, pɩtaapɩsɩ falaa hɔɔlʋʋ ŋgʋ kɩ-taa, nɛ ɖɔɖɔ se ɩpɩzɩ nɛ ɩñɔɔzɩ mɩ-tɩ toovenim taa nɛ ɩɖaŋ, ɛzɩ maayɔɔdʋʋ se ɩkaɣ labʋ yɔ. 4 Pɩtɩkɛ mbʋ yɔ, ye ma nɛ Masedonii mba ɖɩkɔma nɛ pamaɣnɩ-mɩ ɩtɩñɔɔzɩtɩ mɩ-tɩ yɔ, fɛyɛ kaɣ-ɖʋ kpaʋ lidaʋ ŋgʋ ɖɩwɛnɩ mɩ-yɔɔ yɔ kɩ-yɔɔ; ɛlɛ fɛyɛ kaɣ-mɩ kpaʋ ɖɔɖɔ. 5 Pʋyɔɔ mamaɣzaa se pɩcɛyaa se mansazɩ koobiya se pɛɖɛɛ nɔɔ nɛ pɔkɔɔ mɩ-cɔlɔ nɛ pacalɩnɩ ñɔɔzʋʋ kʋjɔŋ sakɩyɛ weyi ɩɖʋwa se ɩlakɩ yɔ, se pɩsa nɛ ɩkɛ kʋjɔŋ weyi ɩlabɩnɩ laŋɩyɛ faaa nɛ ɩñɔɔzɩ-ɩ nɛ ɩsɩɩ yɔ, nɛ pɩtaawɛɛ ɛzɩ mbʋ pamʋnɩ ɖoŋ yɔ.
6 Ɛlɛ hɔɔlʋʋ ŋgʋ kɩ-taa lɛ, weyi eɖuu pazɩ yɔ, ɛkaɣ kʋm ɖɔɖɔ pazɩ; nɛ weyi eɖuu sakɩyɛ yɔ, ɛkaɣ kʋm ɖɔɖɔ sakɩyɛ.+ 7 Paa weyi lɛ, ɛla ɛzɩ ɛɖʋʋ ɛ-laŋɩyɛ taa yɔ, ɛtaalabɩnɩ agbiɖa yaa pɩtaawɛɛ ɛzɩ pakpa-ɩ nɛ ɖoŋ yɔ,+ mbʋ pʋyɔɔ yɔ Ɛsɔ sɔɔlɩ weyi ɛhaɣnɩ taa leleŋ yɔ.+
8 Pɩtasɩ lɛ, Ɛsɔ pɩzɩɣ eyele nɛ e-lootiye tɩŋa wɛɛ mɩ-yɔɔ siŋŋ, se pɩsa nɛ paa ɛzɩmtaa lɛ ɩwɛɛnɩ mbʋ pɩpɔzʋʋ-mɩ yɔ pɩtɩŋa pɩ-taa, nɛ ɩwɛɛnɩ ɖɔɖɔ mbʋ payɩ pɩpɔzʋʋ-mɩ yɔ sakɩyɛ nɛ ɩpɩzɩ nɛ ɩla paa tʋmɩyɛ kɩbanɖɛ nɖɩ.+ 9 (Ɛzɩ pamaʋ yɔ: «Ɛlabɩ kʋjɔŋ kamaɣ fɛyɩ; ɛha kʋñɔndɩnaa. E-siɣsiɣ wɛtʋ wɛɣ tam.»+ 10 Nɛ Weyi ɛhaɣ ɖomaɣ ɖuyu ɖomaɣ sakɩyɛ nɛ tɔɔnaɣ* se ɛyaa ɩtɔɔ yɔ, ɛkaɣ-mɩ haʋ ɖomaɣ se iɖuu nɛ ɛkaɣ-mɩ kɛ haʋ sakɩyɛ, nɛ ɛkaɣ yebu nɛ mi-siɣsiɣ wɛtʋ kʋmtʋ huu.) 11 Pɩtɩŋa pɩ-taa lɛ, peɖiɣni-mɩ pɩsʋʋ ñɩm tɩnaa kʋjɔŋ labʋ ndɩ ndɩ taa, weyi iseɣtiɣ ɛyaa se pɛsɛɛ Ɛsɔ se ɛlabaɣ lɛ pɩtɩŋnɩ ɖɔ-yɔɔ yɔ; 12 mbʋ pʋyɔɔ yɔ lɩm ɖʋʋ tʋmɩyɛ nɖɩ ɩlakɩ yɔ, pɩtɩkɛ ɛyaa kiɖeɖema kɩcɛyɩm yɔɔ ɖeke ɖɩcɔŋna,+ ɛlɛ ɖiyeki ɖɔɖɔ se ɛyaa sakɩyɛ ɩsɛɛ Ɛsɔ se ɛlabaɣ lɛ. 13 Pɩtɩŋnɩ mbʋ sɩnʋʋ tʋmɩyɛ nɖɩ ɖɩlakɩ yɔ pɩ-yɔɔ lɛ, pasaŋ Ɛsɔ mbʋ pʋyɔɔ yɔ Krɩstʋ yɔɔ lɛ, iluzi mɩ-tɩ tɔm kɩbandʋ tɛɛ, ɛzɩ isusuu-tʋ kaɣlaa yɔ; nɛ pɩtasɩ lɛ, haɖɛ nɖɩ ɩlabɩ pa nɛ ɛyaa tɩŋa yɔ, ɩlabɩ-ɖɩ nɛ laŋɩyɛ faaa.+ 14 Nɛ patɩŋɩɣnɩ ɛzɩma petendiɣ mɩ-yɔɔ yɔ pɩ-yɔɔ nɛ pawɩlɩɣ-mɩ sɔɔlɩm, mbʋ pʋyɔɔ yɔ Ɛsɔ lootiye nɖɩ ɖɩ-wayɩ fɛyɩ yɔ, ɖɩwɛ mɩ-yɔɔ.
15 Pɛsɛɛ Ɛsɔ se ɛlabaɣ lɛ ɛ-kʋjɔʋ* ŋgʋ kɩ-wayɩ fɛyɩ yɔ kɩ-yɔɔ.