Samɩyɛɛlɩ takayaɣ naalɛ ñɩŋga
10 Pʋwayɩ lɛ, Amooni mba+ wiyaʋ sɩ, nɛ ɛ-pɩyalʋ Hanuuni pɩsɩ wiyaʋ e-lone taa.+ 2 Peeɖe Daviid yɔɔdaa se: «Mankaɣ wɩlʋʋ sɔɔlɩm siɣsiɣ ñɩmbʋ Nahaasɩ pɩyalʋ Hanuuni ɛzɩ ɛ-caa kaawɩlʋʋ-m sɔɔlɩm siɣsiɣ ñɩmbʋ yɔ.» Nɛ Daviid tiyi ɛ-lɩmɖʋyaa ɛ-cɔlɔ se pɛhɛzɩ ɛ-laŋɩyɛ ɛ-caa sɩm yɔɔ. Ɛlɛ Daviid lɩmɖʋyaa wobi Amooni mba ɛjaɖɛ taa lɛ, 3 Amooni mba awumbiya heyi pa-kɩbaɣlʋ Hanuuni se: «Ŋmaɣzɩɣ se ña-caa hɩɖɛ ɖʋʋ yɔɔ Daviid tiyi laŋɩyɛ hɛzɩyaa ñɔ-cɔlɔ yaa we? Ɛzɩ Daviid titiyi ɛ-lɩmɖʋyaa ñɔ-cɔlɔ se pɩsa nɛ ɛtɩlɩ tɛtʋ nɛ ɛcɔŋ-tʋ nɛ ɛkɔɔ ɛyɔkɩ-tʋ yaa we?» 4 Peeɖe Hanuuni kpa Daviid lɩmɖʋyaa nɛ ɛhʋ pa-tandaŋ hɔɔlʋʋ kʋɖʋmʋʋ yɔɔ+ nɛ ɛsɛtɩ po-tokonaa pɔ-tɔbɩŋ yɔɔ nɛ eyebi-wɛ nɛ pɛɖɛɛ. 5 Peheyi tɔm ndʋ Daviid lɛ, ɛcaŋ etiyi ɛyaa se pakatɩ-wɛ, mbʋ pʋyɔɔ yɔ paaɖʋ ɛyaa mba fɛyɛ sɔsɔɖɛ; nɛ wiyaʋ heyi-wɛ se: «Ɩcaɣ Yeriikoo+ pɩkɔɔ nɛ pɩsɩɩnɩ alɩwaatʋ ndʋ mɩ-tandaŋ ɖaɣnɩ ñɔʋ yɔ; nɛ pʋwayɩ lɛ, ɩpɩsɩ nɛ ɩkɔɔ.»
6 Pʋwayɩ lɛ, Amooni mba na se papɩsɩ mbʋ pɩlɩɣ sɔŋ siŋŋ yɔ Daviid mɔɔŋ tɛɛ; peeɖe Amooni mba tiyaa nɛ pɛtɛɣ Siirii ñɩma mba pɛwɛ Bɛtɩ-Rehob+ nɛ Siirii ñɩma mba pɛwɛ Zobaa+ yɔ pɔ-sɔɔjanaa nɩŋgbanzɩ ɖɔnaa 20 000; nɛ Maaka+ wiyaʋ nɛ ɛ-ɛyaa 1 000; nɛ Istɔɔb mba* 12 000.+ 7 Alɩwaatʋ ndʋ Daviid nɩ tɔm ndʋ lɛ, etiyi Yowaabʋ nɛ sɔɔjanaa kpeekpe, pɩkpɛndɩnɩ ɛ-sɔdɩŋ weyi ɩkɩlɩ ɖoŋ yɔ.+ 8 Nɛ Amooni mba lɩɩ nɛ pɔñɔɔzɩ pa-tɩ tɛtʋ nɔnɔɔ taa se poyoo, alɩwaatʋ ndʋ lɛ, Siirii ñɩma mba palɩnɩ Zobaa nɛ Rehob yɔ, pa nɛ Istɔɔb mba* nɛ Maaka ñɩma paba ñaawɛ pe-ɖeke tɛtʋ nɛ wayɩ kiŋ.
9 Alɩwaatʋ ndʋ Yowaabʋ nawa se pɛwɛɛ nɛ pɔkɔŋ se palabɩ-wɛ nɛ you nɛ pɛ-ɛsɩndaa kiŋ nɛ pa-wayɩ kiŋ lɛ, ɛlɩzɩ Izrayɛɛlɩ taa sɔɔjanaa mba pasɩm you labʋ nɛ pɩkpaɖɩ yɔ nɛ ɛñɔɔzɩ-wɛ se palɩɩ nɛ pakatɩ Siirii mba.+ 10 Pɩkazɩ mba yɔ, ɛɖʋzɩ-wɛ ɛ-ɖalʋ* Abisayii+ nesi tɛɛ, se ɛlɛ ɛñɔɔzɩ-wɛ nɛ palɩɩ nɛ pakatɩ Amooni mba.+ 11 Nɛ eheyi-i se: «Ye Siirii mba ɩkɔm nɛ pakɩlɩɣ-m ɖoŋ yɔ, ɖɩnɛ ɛlɛ pɩwɛɛ se ŋkɔɔ nɛ ŋya ma-ñʋʋ; ɛlɛ ye Amooni mba ɩkɔm nɛ pakɩlɩɣ-ŋ ɖoŋ yɔ, mankaɣ kɔm nɛ maya ña-ñʋʋ. 12 Pɩwɛɛ se ɖɩwɛɛ ɖoŋ nɛ ɖɩwɛɛ abalɩtʋ+ ɖa-samaɣ yɔɔ nɛ ɖɛ-Ɛsɔ tɛtʋ ndɩ ndɩ yɔɔ, nɛ Yehowa kaɣ labʋ mbʋ pɩwɛ ɖeu ɛ-ɛsɩndaa yɔ.»+
13 Ðɩnɛ ɛlɛ Yowaabʋ nɛ ɛ-ɛyaa pɔñɔtɩnɩ Siirii mba se poyooni-wɛ, nɛ Siirii mba se ɛ-ɛsɩndaa.+ 14 Amooni mba nawa se Siirii mba sewa lɛ, pese Abisayii ɛsɩndaa nɛ pasʋʋ tɛtʋ taa. Yowaabʋ tɛm Amooni mba yonuu lɛ, ɛpɩsɩ Yeruzalɛm.
15 Siirii mba nawa se Izrayɛɛlɩ mba wabɩ-wɛ lɛ, paɖaɣnɩ kpeɣluu.+ 16 Nɛ Hadadezɛɛrɩ+ tiyi se payaa Siirii ñɩma mba pɛwɛ Pɔɔ* egeetiye taa yɔ nɛ pɔkɔɔ.+ Nɛ pɔkɔɔ Helam. Hadadezɛɛrɩ sɔɔjanaa ñʋʋdʋ Sobaakɩ ɖiyaɣni-wɛ.
17 Alɩwaatʋ ndʋ powoba nɛ peheyi Daviid tɔm ndʋ lɛ, ɛcaŋ nɛ ekpeɣli Izrayɛɛlɩ sɔɔjanaa kpeekpe nɛ ɛtɛzɩ Yɔɔrdaŋ nɛ ewolo Helam. Ðɩnɛ ɛlɛ Siirii mba ñɔɔzɩ pɔ-sɔɔjanaa nɛ palɩɩ se pakatɩ Daviid nɛ poyooni-i.+ 18 Ɛlɛ Siirii mba se Izrayɛɛlɩ ɛsɩndaa; nɛ Daviid kʋ Siirii mba kɛɛkɛɛnaa sayaa 700 nɛ kpaŋnaŋ yɔɔ caɣyaa 40 000, nɛ ɛkʋ pɔ-sɔɔjanaa ñʋʋdʋ Sobaakɩ.+ 19 Alɩwaatʋ ndʋ awiya kpeekpe wena akɛ Hadadezɛɛrɩ lɩmɖʋyaa yɔ anawa se Izrayɛɛlɩ wabɩ-yɛ lɛ, acaŋ nɛ ala laŋhɛzɩyɛ nɛ Izrayɛɛlɩ nɛ aluzi a-tɩ Izrayɛɛlɩ tɛɛ;+ nɛ sɔɔndʋ kpaɣaɣ Siirii mba se patasɩ sɩnʋʋ Amooni mba.