KƆƆNƆƆ TƆM

Tɔm ndʋ Ɛsɔ sɔɔlaa se ɖa-tɩŋa ɖɩtɩlɩ yɔ ndʋ eyeba nɛ pama Takayaɣ Kiɖeɖeɣa yaa Bibl taa. Pɩwɛɛ se ɖɩkpɛlɩkɩ-kʋ nɛ ɖɩtɩlɩ weyi ɛ-cɔlɔ kɩlɩnaa yɔ. (Yohanɛɛsɩ 17:3; 2 Timootee 3:16) Kɩ-taa, Ɛsɔ Yehowa wɩlɩɣ kaɖʋwa ŋga ɛwɛnɩ ɛyaa yɔɔ yɔ nɛ kaɖʋwa ŋga ɛwɛnɩ tɛtʋ ndʋ tɩkɛ pa-ɖɩɣa yɔ tɩ-yɔɔ yɔ.—Kiɖe Tɛɛ Tɔm 3:15; Natʋ 21:3, 4.

Takayaɣ nakɛyɛ fɛyɩ se kɛwɛnɩ ɖoŋ ɛyaa weziŋ yɔɔ nɛ pɩtalɩ Bibl. Bibl seɣtiɣ-ɖʋ se ɖɩmaɣzɩnɩ Yehowa sɔɔlɩm, ɛ-pʋtɔdɩyɛ naʋ, nɛ ɛzɩma ɛnɩɣ ɛyaa siziŋ yɔ. Kɩhaɣ ɛyʋ lidaʋ nɛ kɩsɩɣnɩ-ɩ se ɛɖɔkɩ ɛ-tɩ kʋñɔmɩŋ sɔsɔŋ taa. Pɩtasɩ lɛ, kikuluu mbʋ mbʋ pɩwɛ ɛjaɖɛ yɔɔ nɛ pɩɩlakɩ nɔɔ kʋɖʋmaɣ nɛ Ɛsɔ sɔɔlɩm mbʋ pɩtalɩ pilim yɔ pɩ-yɔɔ.—Keɣa 119:105; Ebree mba 4:12; 1 Yohanɛɛsɩ 2:15-17.

Kiɖe tɛɛ lɛ, paama Bibl Ebree, Arameya nɛ Grɛɛkɩ kʋnʋmɩŋ taa; ɛlɛ pʋwayɩ lɛ pɛɖɛzɩ kɩ-tɩŋa yaa kɩ-hɔɔlʋʋ nakʋyʋ kʋnʋmɩŋ weyi ɩ-taa yɔ, ɩcɛzɩ 3 000. Bibl kɛnɩ takayaɣ ŋga pakɩlɩ ɖɛzʋʋ nɛ pakɩlɩ tayʋʋ yɔ. Nɛ pɩmʋnɩ mbʋ, mbʋ pʋyɔɔ yɔ Bibl taa natʋ tɔm natʋyʋ yɔɔdʋʋ se: «Pakaɣ susuu Kewiyaɣ tɔm kɩbandʋ tʋnɛ [tɔm kɩcɛyɩtʋ ndʋ tɩwɛ Bibl taa yɔ] tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.»—Maatiyee 24:14.

Ðɩnawa se tɔm ndʋ tɩwɛ Bibl taa yɔ tɩkɛ tɔm kɩcɛyɩtʋ, pʋyɔɔ ɖɩɖɛzɩ Bibl kʋnɛ nɛ kɩla nɔɔ kʋɖʋmaɣ nɛ kiɖe tɛɛ masɩ nɛ kɩ-taa tʋ kpayɩ kpayɩ nɛ kɩ-kalʋʋ wɛɛ kɛlɛʋ. Tɔm kɩsɔzɩtʋ taa tɔm ñʋŋ «Paɣtʋ ndʋ tiɖiyiɣ Bibl ɖɛzʋʋ yɔ,» «Bibl kʋnɛ kɩ-wɛtʋ,» nɛ «Ɛzɩma pɩɖɔma nɛ Bibl talɩ-ɖʋ?» taa, patazɩ paɣtʋ ndʋ tiɖiyi Bibl ɖɛzɩyaa yɔ tɩ-taa natʋyʋ taa nɛ Bibl kʋnɛ kɩ-wɛtʋ natʋyʋ taa.

Mba pɔsɔɔlɩ Yehowa nɛ pɛsɛɣ-ɩ yɔ, pɔsɔɔlaa se pɛwɛɛnɩ Ɛsɔ Tɔm ndʋ pɛɖɛzɩ-tʋ nɛ tɩla nɔɔ kʋɖʋmaɣ nɛ kiɖe tɛɛ masɩ nɛ tɩ-taa wɛ nɩʋ yɔ. (1 Timootee 2:4) Pʋyɔɔ ɖɩlɩzɩ Bibl kʋnɛ Kabɩyɛ taa, nɛ ɖa-kaɖʋwa lɛ se ɖɩɖɛzɩ Ɛjaɖɛ kɩfaɖɛ tɔm ɖɛzʋʋ Bibl kʋnʋmɩŋ sakɩyɛ taa. Mɩ mba ɩkalɩɣ Masɩ Kiɖeɖesi sɩnɛ nɛ ɩñakɩ pana se ‘ɩñɩnɩ Ɛsɔ’ yɔ, ɖɩtɩmɩɣ se sɩwazɩ-mɩ nɛ ‘ɩna-ɩ toovenim taa.’—Tʋma Labʋ 17:27.