KƖGALƲƲ

1 Nɛ Yehowa yɔɔdɩnɩ Moyizi Sinayii kañɩmbusuu taa,+ kediɣzaɣ kizinziku tɛɛ+ fenaɣ 2 ñɩŋga taa kɩyakʋ kajalaɣ ñɩŋgʋ wiye, pɩnaɣ 2 ñɩŋga taa, pɛtɛm lɩʋ Ejipiti ɛjaɖɛ taa lɛ.+ Ɛyɔɔdaa se: 2 «Ɩkalɩ+ Izrayɛɛlɩ mba* kpeekpe kʋɖʋm kʋɖʋm,* ɩma abalaa kpeekpe hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. 3 Pɩwɛɛ se ña nɛ Aarɔɔnɩ ɩkalɩ mba payɩ pɛwɛnɩ kpaɣnɩ pɩnzɩ 20 nɛ pɩɖɛɛ+ nɛ papɩzɩɣ nɛ pala sɔɔjatʋ tʋmɩyɛ Izrayɛɛlɩ taa yɔ nɛ ɩma pa-hɩla, paa mba lɛ pe-tindima* taa.

4 «Ɩlɩzɩ abalʋ kʋɖʋm paa cejewiye nɖɩ lɛ ɖɩ-taa nɛ ɩsɔzɩ mɩ-yɔɔ; pɩwɛɛ se pa-taa paa weyi lɛ, ɛkɛ ɛ-caanaa ɖɩɣa ñʋʋdʋ.+ 5 Abalaa mba pakaɣ-mɩ sɩnʋʋ yɔ pa-hɩla yɔ: Rubɛɛnɩ cejewiye taa lɛ, Sedewuuri pɩyalʋ Elizuuri;+ 6 Siimeyɔɔ cejewiye taa lɛ, Zurisadaayɩ pɩyalʋ Selumɩyɛɛlɩ;+ 7 Yuuda cejewiye taa lɛ, Aminadaabɩ pɩyalʋ Naasɔɔnɩ;+ 8 Isakaarɩ cejewiye taa lɛ, Zuwaarɩ pɩyalʋ Netanɛɛlɩ;+ 9 Zebulɔɔnɩ cejewiye taa lɛ, Helɔɔnɩ pɩyalʋ Eliyaabɩ;+ 10 mba palɩnɩ Yosɛɛfʋ pɩyalaa taa yɔ mba yɔ: Efrayim+ cejewiye taa lɛ, Amihuudɩ pɩyalʋ Eliisama; Manaasee cejewiye taa lɛ, Pedazuuri pɩyalʋ Gamaalɩyɛɛlɩ; 11 Bɛnjamɛɛ cejewiye taa lɛ, Gideyoni pɩyalʋ Abidaanɩ;+ 12 Daanɩ cejewiye taa lɛ, Amisadaayɩ pɩyalʋ Ahiyezɛɛrɩ;+ 13 Asɛɛrɩ cejewiye taa lɛ, Okɩraanɩ pɩyalʋ Pagiyɛɛlɩ;+ 14 Gaadɩ cejewiye taa lɛ, Dewuwɛɛlɩ pɩyalʋ Eliyasafʋ;+ 15 Naftalii cejewiye taa lɛ, Enaanɩ pɩyalʋ Ahira.+ 16 Ɛyaa mba paya-wɛ nɛ samaɣ hɛkʋ taa yɔ mba lɛ. Pɛkɛ pa-caanaa cejewe ñʋndɩnaa,+ Izrayɛɛlɩ ɛyaa kudokiŋ ñʋndɩnaa.»+

17 Ðɩnɛ ɛlɛ Moyizi nɛ Aarɔɔnɩ pakpaɣ abalaa mba paya pa-hɩla yɔ. 18 Nɛ pekpeɣli samaɣ kpeekpe fenaɣ 2 ñɩŋga taa, kɩyakʋ kajalaɣ ñɩŋgʋ wiye, se pɩsa nɛ pakalɩ mba pɛwɛnɩ kpaɣnɩ pɩnzɩ 20 nɛ pɩɖɛɛ yɔ+ nɛ pama pa-hɩla kʋɖʋm kʋɖʋm, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa, 19 ɛzɩ Yehowa kaaɖʋʋ paɣtʋ Moyizi yɔ. Mbʋ ɛkalɩ pa-ñʋʋ Sinayii kañɩmbusuu taa nɛ ɛma pa-hɩla.+

20 Pama Rubɛɛnɩ pɩyalaa, Izrayɛɛlɩ kajalaɣ pɩɣa+ lʋlʋʋ taa mba hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ-wɛ kʋɖʋm kʋɖʋm, 21 nɛ Rubɛɛnɩ cejewiye taa ɛyaa mba paama pa-hɩla yɔ paakpɛndɩ 46 500.

22 Pama Siimeyɔɔ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ-wɛ kʋɖʋm kʋɖʋm, 23 nɛ Siimeyɔɔ cejewiye taa ɛyaa mba paama pa-hɩla yɔ paakpɛndɩ 59 300.

24 Pama Gaadɩ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 25 nɛ Gaadɩ cejewiye taa ɛyaa mba paama pa-hɩla yɔ paakpɛndɩ 45 650.

26 Pama Yuuda lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 27 nɛ Yuuda cejewiye taa ɛyaa mba paama pa-hɩla yɔ paakpɛndɩ 74 600.

28 Pama Isakaarɩ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 29 nɛ Isakaarɩ cejewiye taa ɛyaa mba paama pa-hɩla yɔ paakpɛndɩ 54 400.

30 Pama Zebulɔɔnɩ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 31 nɛ Zebulɔɔnɩ cejewiye taa ɛyaa mba paama pa-hɩla yɔ paakpɛndɩ 57 400.

32 Pama Yosɛɛfʋ lʋlʋʋ taa ñɩma mba palɩnɩ Efrayim taa yɔ+ pa-hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 33 nɛ Efrayim cejewiye taa ɛyaa mba paama pa-hɩla yɔ paakpɛndɩ 40 500.

34 Pama Manaasee lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 35 nɛ Manaasee cejewiye taa ɛyaa mba paama pa-hɩla yɔ paakpɛndɩ 32 200.

36 Pama Bɛnjamɛɛ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 37 nɛ Bɛnjamɛɛ cejewiye taa ɛyaa mba paama pa-hɩla yɔ paakpɛndɩ 35 400.

38 Pama Daanɩ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 39 nɛ Daanɩ cejewiye taa ɛyaa mba paama pa-hɩla yɔ paakpɛndɩ 62 700.

40 Pama Asɛɛrɩ lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 41 nɛ Asɛɛrɩ cejewiye taa ɛyaa mba paama pa-hɩla yɔ paakpɛndɩ 41 500.

42 Pama Naftalii lʋlʋʋ taa mba+ hɩla, pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. Abalaa mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ yɔ, paakalɩ pa-ñʋʋ, 43 nɛ Naftalii cejewiye taa ɛyaa mba paama pa-hɩla yɔ paakpɛndɩ 53 400.

44 Ɛyaa panɛ Moyizi nɛ Aarɔɔnɩ nɛ Izrayɛɛlɩ ñʋndɩnaa 12 mba pa-taa paa weyi kaakɛ ɛ-caanaa ɖɩɣa lone taa caɣyʋ yɔ, paakalaa nɛ pama pa-hɩla. 45 Izrayɛɛlɩ ñɩma mba payɩ paawɛnɩ kpaɣnɩ pɩnzɩ 20 nɛ pɩɖɛɛ nɛ papɩzaɣ se pala sɔɔjatʋ tʋmɩyɛ Izrayɛɛlɩ taa yɔ, paakalɩ pa-ñʋʋ nɛ pama pa-hɩla pa-caanaa ɖɩsɩ nɔsɩ taa, 46 nɛ mba paama pa-hɩla yɔ, pa-tɩŋa paakpɛndɩ 603 550.+

47 Ɛlɛ pataama Leevi mba+ hɩla nɛ patɩkalɩ-wɛ pa-caanaa cejewiye taa nɛ pɔsɔzɩ lalaa yɔɔ.+ 48 Peeɖe Yehowa heyi Moyizi se: 49 «Leevi cejewiye taa mba ɖeke hɩla pɩfɛyɩ se ŋma, nɛ pɩfɛyɩ se ŋkalɩ-wɛ nɛ ŋsɔzɩ Izrayɛɛlɩ mba lalaa yɔɔ.+ 50 Pɩwɛɛ se ŋɖʋ Leevi mba tʋmɩyɛ nɛ pɔcɔnɩ Aseɣɖe Lɩzʋʋ+ kɩɖanɖʋʋ yɔɔ, nɛ pɔcɔnɩ ki-wondu nɛ mbʋ payɩ pɩkɛ kɩ-pʋyʋ yɔ pɩ-yɔɔ.+ Mba kaɣnɩ kpaɣʋ Ɛsɔ sɛtʋ kɩɖanɖʋʋ nɛ ki-wondu kpeekpe,+ pakaɣ tʋmɩyɛ labʋ kɩ-tɛɛ,+ nɛ pɩwɛɛ se pesiɣ pe-kizinzikiŋ nɛ pɩcɔɔ Ɛsɔ sɛtʋ kɩɖanɖʋʋ kpɛɛɛ.+ 51 Ye pɩpɔzʋʋ se pɛlɛɣzɩ Ɛsɔ sɛtʋ kɩɖanɖʋʋ lone yɔ, Leevi mba kaɣnɩ-kʋ kpɛzʋʋ;+ nɛ ye pɩpɔzʋʋ se paɖaɣnɩ-kʋ siɣu yɔ, Leevi mba pɩwɛɛ se pesiɣ-kʋ; ye ɛyʋ weyi pɩtɩha-ɩ nʋmɔʋ yɔ* ɛñɔtɩnɩ-kʋ yɔ, pɩwɛɛ se pakʋ-ɩ.+

52 «Paa Izrayɛɛlɩ tʋ weyi lɛ, pɩwɛɛ se esiɣ e-kizinziku lone nɖɩ paha-ɩ yɔ ɖɩ-taa, paa weyi lɛ, pɩwɛɛ se ɛwɛɛ cejewe 3 tindimiye nɖɩ ɖɩ-taa paɖʋ-ɩ yɔ ɖɩ-taa,*+ ɛ-hɔɔlʋʋ taa.* 53 Nɛ pɩwɛɛ se Leevi mba isiɣ pe-kizinzikiŋ Aseɣɖe Lɩzʋʋ kɩɖanɖʋʋ cɔlɔ kpɛɛɛ, ɖɩnɛ ɛlɛ pana ɛɛkɔŋ Izrayɛɛlɩ mba samaɣ yɔɔ;+ Leevi mba tʋmɩyɛ pɩkɛnaa se pɔcɔnɩ* Aseɣɖe Lɩzʋʋ kɩɖanɖʋʋ yɔɔ.»+

54 Nɛ Izrayɛɛlɩ samaɣ la mbʋ payɩ Yehowa ɖʋ Moyizi paɣtʋ se pala yɔ. Palabɩ mbʋ ɖeyi ɖeyi.

2 Nɛ Yehowa yɔɔdɩnɩ Moyizi nɛ Aarɔɔnɩ nɛ eheyi-wɛ se: 2 «Pɩwɛɛ se Izrayɛɛlɩ mba isiɣ pe-kizinzikiŋ lone nɖɩ paha pe-cejewe 3 tindimiye+ yɔ ɖɩ-taa, pɩwɛɛ se paa abalʋ weyi lɛ, ɛñɔtɩnɩ ɛ-caanaa ɖɩɣa yʋsaɣ.* Pɩwɛɛ se pesiɣ pe-kizinzikiŋ nɛ paha ɛsa nɛ kediɣzaɣ kizinziku, nɛ pɔcɔɔ-kʋ kpɛɛɛ.

3 «Cejewe 3 tindimiye taa ñɩma mba pɛwɛ Yuuda pɩlʋʋ taa yɔ, mba pɩwɛɛ se pesiɣ pe-kizinzikiŋ wɩsɩ ɖɩlɩyɛ hɔɔlʋʋ taa, pɔ-sɔɔjanaa tindima nɔsɩ taa; Yuuda pɩyalaa ñʋʋdʋ lɛ Aminadaabɩ pɩyalʋ Naasɔɔnɩ.+ 4 Ɛ-sɔɔjanaa mba pama pa-hɩla yɔ paakpɛndɩ 74 600.+ 5 Isakaarɩ cejewiye kaɣnɩ siɣu ɖi-kizinzikiŋ ɛ-cɔlɔ; Isakaarɩ pɩyalaa ñʋʋdʋ lɛ Zuwaarɩ pɩyalʋ Netanɛɛlɩ.+ 6 Ɛ-sɔɔjanaa mba pama pa-hɩla yɔ paakpɛndɩ 54 400.+ 7 Zebulɔɔnɩ cejewiye kaɣ wɛʋ ɖɔɖɔ ɛ-cɔlɔ;* Zebulɔɔnɩ pɩyalaa ñʋʋdʋ lɛ Helɔɔnɩ pɩyalʋ Eliyaabɩ.+ 8 Ɛ-sɔɔjanaa mba pama pa-hɩla yɔ paakpɛndɩ 57 400.+

9 «Sɔɔjanaa mba pama pa-hɩla Yuuda pɩlʋʋ taa yɔ, pa-tɩŋa paakpɛndɩ 186 400. Mba pɩwɛɛ se pacalɩ kpɛzʋʋ nɛ pɛɖɛɛ.+

10 «Cejewe 3 tindimiye taa ñɩma mba pɛwɛ Rubɛɛnɩ pɩlʋʋ taa yɔ,+ mba pɩwɛɛ se pesiɣ pe-kizinzikiŋ hadɛ kiŋ hɔɔlʋʋ taa, pɔ-sɔɔjanaa tindima nɔsɩ taa; Rubɛɛnɩ pɩyalaa ñʋʋdʋ lɛ Sedewuuri pɩyalʋ Elizuuri.+ 11 Ɛ-sɔɔjanaa mba pama pa-hɩla yɔ paakpɛndɩ 46 500.+ 12 Siimeyɔɔ cejewiye kaɣnɩ siɣu ɖi-kizinzikiŋ ɛ-cɔlɔ; Siimeyɔɔ pɩyalaa ñʋʋdʋ lɛ Zurisadaayɩ pɩyalʋ Selumɩyɛɛlɩ.+ 13 Ɛ-sɔɔjanaa mba pama pa-hɩla yɔ paakpɛndɩ 59 300.+ 14 Gaadɩ cejewiye kaɣ wɛʋ ɖɔɖɔ ɛ-cɔlɔ;* Gaadɩ pɩyalaa ñʋʋdʋ lɛ Rewuwɛɛlɩ pɩyalʋ Eliyasafʋ.+ 15 Ɛ-sɔɔjanaa mba pama pa-hɩla yɔ paakpɛndɩ 45 650.+

16 «Sɔɔjanaa mba pama pa-hɩla Rubɛɛnɩ pɩlʋʋ taa yɔ, pa-tɩŋa paakpɛndɩ 151 450, mba pɩwɛɛ se pɛkpɛzɩ nɛ pɛɖɛɛ nabʋlɛ ɖeɖe.+

17 «Paalɛɣzɩɣ kediɣzaɣ kizinziku lone lɛ,+ pɩwɛɛ se Leevi mba pɩlʋʋ ɛwɛɛ pɩlɩŋ lɛɛŋ hɛkʋ taa.

«Pesiki pe-kizinzikiŋ siɣu mbʋ yɔ, pɩ-nɔɔ taa pɩwɛɛ se pɔɖɔ nʋmɔʋ,+ paa anɩ ɛwɛɣ e-lone taa, pe-cejewe 3 tindima nɔsɩ taa.

18 «Cejewe 3 tindimiye taa ñɩma mba pɛwɛ Efrayim pɩlʋʋ taa yɔ, mba pɩwɛɛ se pesiɣ pe-kizinzikiŋ wɩsɩ ɖɩɖʋyɛ hɔɔlʋʋ taa, pɔ-sɔɔjanaa tindima nɔsɩ taa; Efrayim pɩyalaa ñʋʋdʋ lɛ Amihuudɩ pɩyalʋ Eliisama.+ 19 Ɛ-sɔɔjanaa mba pama pa-hɩla yɔ paakpɛndɩ 40 500.+ 20 Manaasee+ cejewiye kaɣnɩ wɛʋ ɛ-cɔlɔ; Manaasee pɩyalaa ñʋʋdʋ lɛ Pedazuuri pɩyalʋ Gamaalɩyɛɛlɩ.+ 21 Ɛ-sɔɔjanaa mba pama pa-hɩla yɔ paakpɛndɩ 32 200.+ 22 Bɛnjamɛɛ cejewiye kaɣ wɛʋ ɖɔɖɔ ɛ-cɔlɔ;* Bɛnjamɛɛ pɩyalaa ñʋʋdʋ lɛ Gideyoni pɩyalʋ Abidaanɩ.+ 23 Ɛ-sɔɔjanaa mba pama pa-hɩla yɔ paakpɛndɩ 35 400.+

24 «Sɔɔjanaa mba pama pa-hɩla Efrayim pɩlʋʋ taa yɔ, pa-tɩŋa paakpɛndɩ 108 100, mba pɩwɛɛ se pɛkpɛzɩ nɛ pɛɖɛɛ tozo ɖeɖe.+

25 «Cejewe 3 tindimiye taa ñɩma mba pɛwɛ Daanɩ pɩlʋʋ taa yɔ, mba pɩwɛɛ se pesiɣ pe-kizinzikiŋ hayo kiŋ hɔɔlʋʋ taa, pɔ-sɔɔjanaa tindima nɔsɩ taa; Daanɩ pɩyalaa ñʋʋdʋ lɛ Amisadaayɩ pɩyalʋ Ahiyezɛɛrɩ.+ 26 Ɛ-sɔɔjanaa mba pama pa-hɩla yɔ paakpɛndɩ 62 700.+ 27 Asɛɛrɩ cejewiye kaɣnɩ siɣu ɖi-kizinzikiŋ ɛ-cɔlɔ; Asɛɛrɩ pɩyalaa ñʋʋdʋ lɛ Okɩraanɩ pɩyalʋ Pagiyɛɛlɩ.+ 28 Ɛ-sɔɔjanaa mba pama pa-hɩla yɔ paakpɛndɩ 41 500.+ 29 Naftalii cejewiye kaɣ wɛʋ ɖɔɖɔ ɛ-cɔlɔ;* Naftalii pɩyalaa ñʋʋdʋ lɛ Enaanɩ pɩyalʋ Ahira.+ 30 Ɛ-sɔɔjanaa mba pama pa-hɩla yɔ paakpɛndɩ 53 400.+

31 «Mba pama pa-hɩla Daanɩ pɩlʋʋ taa yɔ, pa-tɩŋa paakpɛndɩ 157 600. Mba pɩwɛɛ se pɛkpɛzɩ nɛ pɛɖɛɛ kɛdɛzaɣ ɖeɖe,+ pe-cejewe 3 tindima nɔsɩ taa.»

32 Izrayɛɛlɩ ñɩma mba paama pa-hɩla pa-caanaa ɖɩsɩ nɔsɩ taa yɔ mba lɛ; mba paama pa-hɩla pɩlɩŋ taa se pala sɔɔjatʋ tʋmɩyɛ yɔ pa-tɩŋa paakpɛndɩ 603 550.+ 33 Ɛlɛ, ɛzɩ Yehowa kaaɖʋʋ paɣtʋ Moyizi yɔ, pataama Leevi mba hɩla+ nɛ patɩkalɩ-wɛ nɛ pɔsɔzɩ Izrayɛɛlɩ mba lalaa yɔɔ.+ 34 Izrayɛɛlɩ mba ɖɔm paɣtʋ ndʋ payɩ Yehowa kaaɖʋ Moyizi yɔ tɩ-yɔɔ. Mbʋ pesikaɣ pe-kizinzikiŋ pe-cejewe 3 tindima nɔsɩ taa,+ nɛ mbʋ pɛkpɛzaɣ nɛ pɛɖɛɣ,+ pɔ-hɔŋ nɔsɩ taa nɛ pa-caanaa ɖɩsɩ nɔsɩ taa.

3 Aarɔɔnɩ nɛ Moyizi pa-lʋlʋʋ taa mba* yɔ, alɩwaatʋ ndʋ Yehowa yɔɔdɩnɩ Moyizi Sinayii+ Pʋʋ taa yɔ. 2 Aarɔɔnɩ pɩyalaa hɩla yɔ: ɛ-kajalaɣ pɩɣa yɔ Naadaabʋ, ɛ-wayɩ lɛ Abihu,+ Eleyaazaarɩ+ nɛ Itamaarɩ.+ 3 Aarɔɔnɩ pɩyalaa hɩla lɛ, cɔjɔnaa mba pata-wɛ num nɛ pasɩɩ-wɛ se pala cɔjɔtʋ tʋmɩyɛ yɔ mba lɛ.+ 4 Ɛlɛ, Naadaabʋ nɛ Abihu paasɩbɩ Yehowa ɛsɩndaa Sinayii kañɩmbusuu taa, alɩwaatʋ ndʋ paawoni Yehowa ɛsɩndaa miŋ weyi pɩtɩha-wɛ nʋmɔʋ se powona yɔ,+ nɛ pataawɛɛnɩ abalɩbiya. Piyele Eleyaazaarɩ+ nɛ Itamaarɩ+ lɛ, pa nɛ pa-caa Aarɔɔnɩ palakaɣ cɔjɔtʋ tʋmɩyɛ mbʋ.

5 Nɛ Yehowa heyi Moyizi se: 6 «Kɔnɩ Leevi cejewiye taa mba,+ nɛ ŋsɩnzɩ-wɛ cɔjɔ Aarɔɔnɩ ɛsɩndaa, pakaɣ-ɩ lɩm ɖʋʋ.+ 7 Pɩwɛɛ se pala pa-tʋmɩyɛ Ɛsɔ sɛtʋ kɩɖanɖʋʋ tɛɛ nɛ palabɩ-ɩ tʋma wena paɖʋ-wɛ yɔ, nɛ pala ɖɔɖɔ samaɣ kpeekpe tʋma wena paɖʋ-wɛ yɔ kediɣzaɣ kizinziku ɛsɩndaa. 8 Pɩwɛɛ se pala Ɛsɔ sɛtʋ kɩɖanɖʋʋ tɛɛ tʋma+ nɛ pɔcɔnɩ kediɣzaɣ kizinziku wondu kpeekpe yɔɔ+ nɛ pala Izrayɛɛlɩ samaɣ tʋma wena paɖʋ-wɛ yɔ. 9 Pɩwɛɛ se ŋkpaɣ Leevi mba nɛ ŋha Aarɔɔnɩ nɛ ɛ-pɩyalaa. Pɛkɛ mba pakpaɣ-wɛ nɛ paha yɔ, mba palɩzɩ-wɛ nɛ Izrayɛɛlɩ mba hɛkʋ taa nɛ paha-ɩ yɔ.+ 10 Pɩwɛɛ se ŋlɩzɩ Aarɔɔnɩ nɛ ɛ-pɩyalaa nɛ pala pɔ-cɔjɔtʋ tʋma;+ ye ɛyʋ weyi pɩtɩha-ɩ nʋmɔʋ yɔ,* ɛñɔtɩnɩ kooka kiɖeɖeɣa yɔ, pɩwɛɛ se pakʋ-ɩ.»+

11 Yehowa tasɩ yɔɔdɩnʋʋ Moyizi nɛ eheyi-i se: 12 «Na! Ma lɛ, Izrayɛɛlɩ mba kajalaɣ piya kpeekpe* lone taa lɛ, mankpakɩɣ Leevi mba Izrayɛɛlɩ mba hɛkʋ taa,+ nɛ Leevi mba kaɣ kɛʋ man-pʋyʋ. 13 Mbʋ pʋyɔɔ yɔ paa kajalaɣ pɩɣa ŋga lɛ, matɩnɩ-kɛ.+ Kɩyakʋ ŋgʋ mankʋ kajalaɣ piya kpeekpe Ejipiti ɛjaɖɛ taa yɔ,+ manpɩsɩ Izrayɛɛlɩ kajalaɣ piya tɩŋa kiɖeɖesi se sɩkɛ man-pʋyʋ, kpaɣnɩ ɛyaa nɛ piwolo kpɩna.+ Sɩkɛɣnɩ man-pʋyʋ. Mɛkɛnɩ Yehowa.»

14 Yehowa tasɩ yɔɔdɩnʋʋ Moyizi Sinayii kañɩmbusuu taa+ nɛ eheyi-i se: 15 «Kalɩ Leevi pɩyalaa nɛ ŋma pa-hɩla pa-caanaa ɖɩsɩ nɔsɩ taa nɛ pɔ-hɔŋ nɔsɩ taa. Pɩwɛɛ se ŋkalɩ abalaa mba payɩ pɛwɛnɩ kpaɣnɩ fenaɣ nɛ pɩɖɛɛ yɔ.»+ 16 Nɛ Moyizi ɖɔ Yehowa tɔm yɔɔ nɛ ɛkalɩ pa-ñʋʋ nɛ ɛma pa-hɩla, ɛzɩ ɛɖʋʋ-ɩ paɣtʋ yɔ. 17 Leevi pɩyalaa hɩla yɔ: Gɛrɩsɔɔnɩ, Kehaatɩ nɛ Merarii.+

18 Gɛrɩsɔɔnɩ pɩyalaa hɩla yɔ, pɔ-hɔŋ nɔsɩ taa: Libinii nɛ Simeyii.+

19 Kehaatɩ pɩyalaa hɩla yɔ, pɔ-hɔŋ nɔsɩ taa: Amɩram, Izihaarɩ, Ebrɔŋ nɛ Uziyɛɛlɩ.+

20 Merarii pɩyalaa hɩla yɔ, pɔ-hɔŋ nɔsɩ taa: Maalii+ nɛ Muusi.+

Leevi mba hɔŋ lɛ, pa-caanaa ɖɩsɩ nɔsɩ taa.

21 Gɛrɩsɔɔnɩ taa Libinii mba+ hɔʋ nɛ Simeyii mba hɔʋ lɩnaa. Gɛrɩsɔɔnɩ mba hɔŋ lɛ. 22 Pa-abalaa mba payɩ pɛwɛnɩ kpaɣnɩ fenaɣ nɛ pɩɖɛɛ nɛ paama pa-hɩla yɔ, paakpɛndɩ 7 500.+ 23 Gɛrɩsɔɔnɩ mba hɔŋ siɣ i-kizinzikiŋ Ɛsɔ sɛtʋ kɩɖanɖʋʋ wayɩ,+ wɩsɩ ɖɩɖʋyɛ hɔɔlʋʋ taa. 24 Gɛrɩsɔɔnɩ mba caanaa ɖɩɣa ñʋʋdʋ lɛ Lahɛɛlɩ pɩyalʋ Eliyasafʋ. 25 Tʋmɩyɛ nɖɩ pɩɩwɛɛ se Gɛrɩsɔɔnɩ pɩyalaa+ ɩla kediɣzaɣ kizinziku tɛɛ yɔ nɖɩ lɛ se pɔcɔnɩ Ɛsɔ sɛtʋ kɩɖanɖʋʋ nɛ kizinziku yɔɔ,+ pɔcɔnɩ ɖɔɖɔ kɩ-yɔɔ kuhuuzuu+ nɛ kediɣzaɣ kizinziku nɔnɔɔ yɔɔ pɩsaʋ kikenduu+ yɔɔ, 26 pɩsaŋ weyi popuzaa+ nɛ pɔcɔzɩnɩ kadaɣ yɔ, kadaɣ ŋga kɔcɔ Ɛsɔ sɛtʋ kɩɖanɖʋʋ nɛ altaaru nɛ kata yɔ kɔ-nɔnɔɔ yɔɔ pɩsaʋ kikenduu,+ ki-nimee, nɛ pala tʋma wena payɩ atukuuni wondu ndʋ yɔ.

27 Hɔŋ weyi ɩlɩnɩ Kehaatɩ taa yɔ ɛnɩ yɔ Amɩram mba hɔʋ, Izihaarɩ mba hɔʋ, Ebrɔŋ mba hɔʋ nɛ Uziyɛɛlɩ mba hɔʋ. Kehaatɩ mba hɔŋ lɛ.+ 28 Abalaa mba payɩ paawɛnɩ kpaɣnɩ fenaɣ nɛ pɩɖɛɛ yɔ, paakpɛndɩ 8 600; pa-tʋmɩyɛ pɩɩkɛnaa se pɔcɔnɩ lone kiɖeɖeye yɔɔ.+ 29 Kehaatɩ pɩyalaa hɔŋ sikaɣ i-kizinzikiŋ Ɛsɔ sɛtʋ kɩɖanɖʋʋ nɛ hadɛ kiŋ.+ 30 Uziyɛɛlɩ+ pɩyalʋ Elizafaanɩ kaakɛnɩ Kehaatɩ mba caanaa* ɖɩɣa ñʋʋdʋ. 31 Pa-tʋmɩyɛ pɩɩkɛnaa se pɔcɔnɩ Aɖakaɣ,+ taabɩlɩ,+ kanɖʋnaa ɖɩzɩyɛ,+ altaarunaa,+ wondu+ ndʋ palakɩnɩ tʋmɩyɛ lone kiɖeɖeye taa yɔ nɛ pɩsaʋ kikenduu+ yɔɔ, nɛ pala tʋma wena payɩ atukuuni wondu ndʋ yɔ.+

32 Cɔjɔ Aarɔɔnɩ pɩyalʋ Eleyaazaarɩ+ kaakɛnɩ Leevi mba ñʋndɩnaa nɔɔ ɖɛyʋ, ɛnʋ cɔŋnaɣnɩ mba pɔcɔŋnɩ lone kiɖeɖeye yɔɔ yɔ pa-tʋma yɔɔ.

33 Merarii taa Maalii mba hɔʋ nɛ Muusi mba hɔʋ lɩnaa. Merarii hɔŋ lɛ.+ 34 Abalaa mba payɩ paawɛnɩ kpaɣnɩ fenaɣ nɛ pɩɖɛɛ nɛ paama pa-hɩla yɔ paakpɛndɩ 6 200.+ 35 Abihayɩlɩ pɩyalʋ Zuriyɛɛlɩ kaakɛnɩ Merarii mba caanaa* ɖɩɣa ñʋʋdʋ. Pesikaɣ pe-kizinzikiŋ Ɛsɔ sɛtʋ kɩɖanɖʋʋ nɛ hayo kiŋ.+ 36 Merarii pɩyalaa tʋmɩyɛ pɩɩkɛnaa se pɔcɔnɩ Ɛsɔ sɛtʋ kɩɖanɖʋʋ kpoŋgbolonaa,*+ kɩ-ɖaŋ,+ ki-tilima,+ kɩ-ɖɩdɩnɩyɛ nɛ ki-wondu tɩŋa+ yɔɔ, nɛ pala tʋma wena payɩ atukuuni wondu ndʋ yɔ,+ 37 mba pɩɩwɛɛ se pɔcɔnɩ ɖɔɖɔ tilima wena payɩ acɔ kadaɣ nɛ ata yɔ a-yɔɔ, a-ɖɩdɩnɩyɛ,+ a-kaŋgamasɩ nɛ a-nimee yɔɔ.

38 Moyizi nɛ Aarɔɔnɩ nɛ ɛlɛ pɩyalaa, mba sikaɣni pe-kizinzikiŋ Ɛsɔ sɛtʋ kɩɖanɖʋʋ ɛsɩndaa, wɩsɩ ɖɩlɩyɛ taa kiŋ, pʋ-tɔbʋʋ se kediɣzaɣ kizinziku ɛsɩndaa wɩsɩ ɖɩlɩyɛ taa kiŋ. Mba lakaɣnɩ Izrayɛɛlɩ mba samaɣ tʋmɩyɛ, pɩɩkɛnɩ-wɛ tʋmɩyɛ se pɔcɔnɩ kooka kiɖeɖeɣa yɔɔ. Ye ɛyʋ weyi pɩtɩha-ɩ nʋmɔʋ yɔ,* ɛñɔtaa kɔyɔ, pɩwɛɛ se pakʋ-ɩ.+

39 Leevi mba abalɩñɩma mba payɩ paawɛnɩ kpaɣnɩ fenaɣ nɛ pɩɖɛɛ, mba Yehowa kaaɖʋ Moyizi nɛ Aarɔɔnɩ paɣtʋ nɛ pama pa-hɩla pɔ-hɔŋ nɔsɩ taa yɔ, paakpɛndɩ 22 000.

40 Pʋwayɩ lɛ, Yehowa heyi Moyizi se: «Ma Izrayɛɛlɩ mba kajalaɣ piya abalɩñɩnzɩ nzɩ payɩ sɩwɛnɩ kpaɣnɩ fenaɣ nɛ pɩɖɛɛ yɔ sɩ-hɩla;+ kalɩ sɩ-ñʋʋ nɛ ŋma sɩ-hɩla takayaɣ taa. 41 Cɛlɩ-m Leevi mba Izrayɛɛlɩ mba kajalaɣ piya kpeekpe lone taa,+ mɛkɛnɩ Yehowa, cɛlɩ-m ɖɔɖɔ Leevi mba ɖɩɣa kpɩna Izrayɛɛlɩ mba ɖɩɣa kpɩna kajalaɣ piya kpeekpe lone taa.»+ 42 Mbʋ Moyizi ma Izrayɛɛlɩ mba kajalaɣ piya kpeekpe hɩla, ɛzɩ Yehowa kaaɖʋʋ-ɩ paɣtʋ yɔ. 43 Kajalaɣ piya abalɩñɩnzɩ nzɩ sɩɩwɛnɩ kpaɣnɩ fenaɣ nɛ pɩɖɛɛ nɛ ɛma sɩ-hɩla yɔ, sɩɩkpɛndɩ 22 273.

44 Yehowa tasɩ yɔɔdɩnʋʋ Moyizi nɛ eheyi-i se: 45 «Kpaɣ Leevi mba Izrayɛɛlɩ mba kajalaɣ piya kpeekpe lone taa, nɛ ŋkpaɣ ɖɔɖɔ Leevi mba ɖɩɣa kpɩna pa-ɖɩɣa kpɩna lone taa, nɛ Leevi mba kaɣ kɛʋ man-pʋyʋ. Mɛkɛnɩ Yehowa. 46 Izrayɛɛlɩ mba kajalaɣ piya 273 nzɩ pakɩlɩnɩ ɖɔʋ Leevi mba yɔ+ pɩwɛɛ se ŋmʋ kɩhɛyʋʋ sɩ-ñʋʋ taa,+ 47 pɩwɛɛ se ŋmʋ siklinaa* 5 paa weyi lɛ ɛ-ñʋʋ taa,+ pɩwɛɛ se siklinaa mba pamʋnɩ lone kiɖeɖeye taa sikli.* Sikli kʋɖʋmʋʋ kɛɣnɩ gerawaa* 20.+ 48 Pɩwɛɛ se ŋcɛlɩ liidiye nɖɩ Aarɔɔnɩ nɛ ɛ-pɩyalaa nɛ ɖɩkɛnɩ kɩhɛyʋʋ mba Izrayɛɛlɩ kajalaɣ piya kɩlɩnɩ ɖɔʋ Leevi mba yɔ pa-ñʋʋ taa.» 49 Ðɩnɛ ɛlɛ, ɛyaa mba Izrayɛɛlɩ mba lalaa kɩlɩnɩ ɖɔʋ Leevi mba kɩhɛyʋʋ pʋ-ñʋʋ taa yɔ, Moyizi mʋ kɩhɛyʋʋ liidiye pɔ-cɔlɔ.* 50 Ɛmʋ liidiye nɖɩ Izrayɛɛlɩ mba kajalaɣ piya cɔlɔ, ɖɩɩkpɛndɩ siklinaa 1 365, ɖɩɩmʋnɩ lone kiɖeɖeye taa sikli. 51 Ðɩnɛ ɛlɛ Moyizi cɛlɩ kɩhɛyʋʋ pʋ-ñʋʋ taa liidiye nɖɩ Aarɔɔnɩ nɛ ɛ-pɩyalaa, ɛzɩ Yehowa yɔɔdʋʋ yɔ,* ɛzɩ Yehowa ɖʋʋ paɣtʋ Moyizi yɔ.

4 Yehowa yɔɔdɩnɩ Moyizi nɛ Aarɔɔnɩ nɛ eheyi-wɛ se: 2 «Leevi pɩyalaa taa lɛ, pɩwɛɛ se ɩkalɩ Kehaatɩ pɩyalaa,+ pɔ-hɔŋ nɔsɩ taa nɛ pa-caanaa ɖɩsɩ nɔsɩ taa, 3 pɩwɛɛ se ɩkalɩ mba payɩ pɛwɛnɩ pɩnzɩ 30+ nɛ piwolo 50+ nɛ pɛwɛ mba palɩzaa se pala tʋmɩyɛ kediɣzaɣ kizinziku tɛɛ yɔ pa-taa yɔ.+

4 «Tʋmɩyɛ nɖɩ Kehaatɩ pɩyalaa lakɩ kediɣzaɣ kizinziku tɛɛ yɔ nɖɩ yɔ.+ Pɩkɛ pʋyʋ kiɖeɖeu siŋŋ: 5 Samaɣ kaakpɛzɩɣ se kɛɖɛɣ lɛ, Aarɔɔnɩ nɛ ɛ-pɩyalaa pɔkɔŋ nɛ pasʋʋ nɛ petisi pɩsaʋ kikenduu+ nɛ pakpaɣ-kʋ nɛ pohuuzini Aseɣɖe Lɩzʋʋ aɖakaɣ+ yɔɔ. 6 Pakaɣ pɔʋ kɔ-yɔɔ pɩsaʋ ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ, nɛ poposi kɔ-yɔɔ pɩsaʋ ŋgʋ kɩwɛnɩ tɔlɩm pʋlɔɔ kɩ-tɩŋa yɔ, nɛ patʋʋ* ka-ɖaŋ+ weyi pɛkɛyɩɣnɩ-kɛ yɔ.

7 «Pakaɣ posuu ɖɔɖɔ pɩsaʋ ŋgʋ kɩwɛnɩ tɔlɩm pʋlɔɔ yɔ nɛ pɔpɔ taabɩlɩ ŋgʋ kɩ-yɔɔ pasɩɣ Ɛsɔ ɛsɩndaa kpɔnɔnaa yɔ+ kɩ-yɔɔ, nɛ pasɩɩ kɩ-yɔɔ tɛlɛmnaa, kɔpʋnaa, ñanzɩ nɛ kilizaɣ peeɣsi;+ pɩwɛɛ se kpɔnɔnaa mba palaɣ tam yɔ+ pɛwɛɛ kɩ-yɔɔ mbʋ. 8 Pakaɣ posuu pɩsaʋ kɩsɛɛmʋʋ cɩɩɩ nɛ pohuuzini wondu ndʋ tɩ-yɔɔ, nɛ pɔpɔ kɩ-yɔɔ pɩsaʋ ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ nɛ patʋʋ* kɩ-ɖaŋ weyi pɛkɛyɩɣnɩ-kʋ yɔ.+ 9 Pʋwayɩ lɛ, pakaɣ kpaɣʋ pɩsaʋ ŋgʋ kɩwɛnɩ tɔlɩm pʋlɔɔ yɔ nɛ pohuuzini kanɖʋnaa ɖɩzɩyɛ+ yɔɔ, nɛ pɩkpɛndɩnɩ ɖɩ-kanɖʋnaa,+ ɖɩ-kpɩɖɩŋ,* ɖi-miŋ ñanzɩ+ nɛ ɖɩ-ñanzɩ nzɩ payɩ sɩ-taa paɖʋʋ kanɖʋnaa num yɔ. 10 Pakaɣ ɖɩ nɛ ɖi-wondu tɩŋa hɔkʋʋ pɩsaʋ ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ kɩ-taa, nɛ pasɩɩ-ɖɩ ɖaʋ ŋgʋ pakaɣ-ɖɩ kpaɣnʋʋ yɔ kɩ-yɔɔ. 11 Nɛ pakaɣ posuu pɩsaʋ ŋgʋ kɩwɛnɩ tɔlɩm pʋlɔɔ yɔ nɛ pɔpɔ altaaru ŋgʋ palabɩnɩ sika yɔ+ kɩ-yɔɔ, pakaɣ huuzuu kɩ-yɔɔ pɩsaʋ ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ, nɛ patʋʋ* kɩ-ɖaŋ weyi pakpakɩɣnɩ-kʋ yɔ.+ 12 Pʋwayɩ lɛ, pakaɣ kpaɣʋ lɩm ɖʋʋ tʋmɩyɛ wondu+ ndʋ payɩ palakɩnɩ tʋmɩyɛ ɖoŋ ɖoŋ lone kiɖeɖeye taa yɔ nɛ pasɩɩ-tʋ pɩsaʋ ŋgʋ kɩwɛnɩ tɔlɩm pʋlɔɔ yɔ kɩ-yɔɔ, nɛ pakpaɣ pɩsaʋ ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ nɛ pohuuzini tɩ-yɔɔ, nɛ pasɩɩ-tʋ ɖaʋ ŋgʋ pakpakɩɣnɩ-tʋ yɔ kɩ-yɔɔ.

13 «Pɩwɛɛ se pokuu tɔlɩma* altaaru taa,+ nɛ poposi pɩsaʋ kɩsɛɛmʋʋ yuulee nɛ pɔpɔ altaaru yɔɔ. 14 Pakaɣ sɩʋ kɩ-yɔɔ wondu ndʋ payɩ palakɩnɩ lɩm ɖʋʋ tʋmɩyɛ altaaru yɔɔ yɔ: miŋ ñanzɩ, kela lɔɔyɩsɩ, pɛɛlɩnaa, nɛ ñanzɩ, altaaru wondu kpeekpe;+ nɛ pɩwɛɛ se poposi pɩsaʋ ŋgʋ palabɩnɩ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ nɛ pohuuzini kɩ-yɔɔ nɛ patʋʋ* kɩ-ɖaŋ weyi pakpakɩɣnɩ-kʋ yɔ.+

15 «Samaɣ kaakpɛzɩɣ se kɛɖɛɣ lɛ, pɩwɛɛ se Aarɔɔnɩ nɛ ɛ-pɩyalaa pɛtɛ lone kiɖeɖeye+ nɛ lone kiɖeɖeye wondu tɩŋa yɔɔ huuzuu. Pʋwayɩ lɛ, Kehaatɩ pɩyalaa kaɣ sʋʋ nɛ pakpaɣ-tʋ,+ ɛlɛ pɩfɛyɩ se potukuni lone kiɖeɖeye, pɩtɩkɛ mbʋ yɔ pasɩkɩ.+ Mbʋ kɛnɩnɩ Kehaatɩ pɩyalaa tʋma* wena atukuuni kediɣzaɣ kizinziku yɔ.

16 «Cɔjɔ Aarɔɔnɩ pɩyalʋ Eleyaazaarɩ+ tʋmɩyɛ pɩkɛnaa se ɛcɔnɩ kanɖʋnaa num+ yɔɔ, ŋgee tɩlaaɖɩ,+ tɔɔnaɣ pee kɩlaʋ ŋgʋ palaɣ tam yɔ nɛ ŋgee num+ yɔɔ. Pɩwɛɛ se ɛcɔnɩ Ɛsɔ sɛtʋ kɩɖanɖʋʋ kpeekpe nɛ mbʋ payɩ pɩwɛ kɩ-taa yɔ pɩ-yɔɔ, pɩkpɛndɩnɩ lone kiɖeɖeye nɛ ɖi-wondu.»

17 Yehowa tasɩ yɔɔdɩnʋʋ Moyizi nɛ Aarɔɔnɩ nɛ eheyi-wɛ se: 18 «Itaayele nɛ Kehaatɩ mba hɔŋ+ ɖɩ Leevi mba hɛkʋ taa. 19 Ɛlɛ ɛzʋnɔ pɩwɛɛ se ɩlabɩ-wɛ nɛ pacaɣ wezuu nɛ pataasɩ se pɔñɔtɩnɩ wondu kiɖeɖetu siŋŋ.+ Pɩwɛɛ se Aarɔɔnɩ nɛ ɛ-pɩyalaa pasʋʋ nɛ paɖʋ paa weyi lɛ ɛ-tʋmɩyɛ nɛ peheyi paa weyi mbʋ pɩwɛɛ se ɛkpaɣ yɔ. 20 Pɩfɛyɩ se pasʋʋ nɛ pɔcɔnɩ wondu kiɖeɖetu, paa pɩtɩɩkɛ alɩwaatʋ pazɩ yem, pɩtɩkɛ mbʋ yɔ pasɩkɩ.»+

21 Nɛ Yehowa yɔɔdɩnɩ Moyizi nɛ eheyi-i se: 22 «Pɩwɛɛ se ŋkalɩ Gɛrɩsɔɔnɩ pɩyalaa+ ñʋʋ pa-caanaa ɖɩsɩ nɔsɩ taa nɛ pɔ-hɔŋ nɔsɩ taa. 23 Mba payɩ pɛwɛnɩ pɩnzɩ 30 nɛ piwolo 50 nɛ pɛwɛ mba palɩzaa se pala tʋmɩyɛ kediɣzaɣ kizinziku tɛɛ yɔ pa-taa yɔ, pɩwɛɛ se ŋma pa-hɩla. 24 Wondu ndʋ tɩ-yɔɔ pɩwɛɛ se Gɛrɩsɔɔnɩ mba hɔŋ ɩcɔna, nɛ mbʋ pɩwɛɛ se pakpaɣ yɔ mbʋ yɔ:+ 25 Pakaɣ kpaɣʋ Ɛsɔ sɛtʋ kɩɖanɖʋʋ pɩsaŋ,+ kediɣzaɣ kizinziku, kɩ-pɩsaʋ nɛ pɩsaʋ ŋgʋ kɩwɛ kɩ-ñʋʋ taa nɛ palabɩ-kʋ nɛ kpɩnɛ nɖɩ payaɣ se fɔɔkɩ yɔ ɖɩ-tɔnɛ yɔ,+ kediɣzaɣ kizinziku nɔnɔɔ yɔɔ pɩsaʋ kikenduu,+ 26 pɩsaŋ kikendiŋ weyi popuzaa nɛ pɔcɔzɩnɩ kadaɣ yɔ,+ kadaɣ ŋga kɔcɔ Ɛsɔ sɛtʋ kɩɖanɖʋʋ nɛ altaaru nɛ kata yɔ kɔ-nɔnɔɔ yɔɔ pɩsaʋ kikenduu,+ pe-nimee nɛ po-wondu nɛ mbʋ payɩ palakɩnɩ kɩ-tʋmɩyɛ yɔ. Pa-tʋmɩyɛ lɛ. 27 Aarɔɔnɩ nɛ ɛ-pɩyalaa pɩwɛɛ se pɔcɔnɩ Gɛrɩsɔɔnɩ mba+ tʋmɩyɛ nɛ pa-sʋʋtʋ kpeekpe yɔɔ; ɩkaɣ-wɛ cɛlʋʋ sʋʋtʋ ndʋ tɩ-tɩŋa nɛ pɩkɛnɩ pa-tʋmɩyɛ. 28 Tʋmɩyɛ nɖɩ pɩwɛɛ se Gɛrɩsɔɔnɩ mba hɔŋ ɩla kediɣzaɣ kizinziku tɛɛ yɔ nɖɩ lɛ,+ nɛ cɔjɔ Aarɔɔnɩ pɩyalʋ Itamaarɩ+ kaɣnɩ ɖɛʋ nɔɔ ɖɩ-taa.

29 «Piyele nɛ Merarii pɩyalaa+ lɛ, pɩwɛɛ se ŋma pa-hɩla pɔ-hɔŋ nɔsɩ taa nɛ pa-caanaa ɖɩsɩ nɔsɩ taa. 30 Ŋkaɣ maʋ mba pɛwɛnɩ pɩnzɩ 30 nɛ piwolo 50 yɔ pa-hɩla, mba payɩ pɛwɛ ɛyaa mba palɩzaa se pala tʋmɩyɛ kediɣzaɣ kizinziku tɛɛ yɔ pa-taa yɔ. 31 Pa-tʋmɩyɛ nɖɩ palakɩ kediɣzaɣ kizinziku tɛɛ yɔ ɖɩ-taa lɛ, mbʋ pɩwɛɛ se pakpaɣ yɔ+ mbʋ yɔ: Ɛsɔ sɛtʋ kɩɖanɖʋʋ kpoŋgbolonaa,*+ kɩ-ɖaŋ,+ ki-tilima,+ kɩ-ɖɩdɩnɩyɛ;+ 32 tilima+ wena acɔ kadaɣ nɛ ata yɔ, a-ɖɩdɩnɩyɛ,+ a-kaŋgamasɩ,+ a-nimee nɛ a-wondu tɩŋa; pɩwɛɛ ɖɔɖɔ se pala tʋma wena payɩ atukuuni wondu ndʋ yɔ. Ɩkaɣ-wɛ heyuu mbʋ pɩwɛɛ se pakpaɣ yɔ pa-hɩla nɔsɩ taa. 33 Tʋmɩyɛ nɖɩ pɩwɛɛ se Merarii+ pɩyalaa hɔŋ ɩla kediɣzaɣ kizinziku tɛɛ yɔ, nɖɩ lɛ; cɔjɔ Aarɔɔnɩ pɩyalʋ Itamaarɩ ɖɛɣnɩ nɔɔ ɖɩ-labʋ taa.»+

34 Moyizi nɛ Aarɔɔnɩ nɛ samaɣ ñʋndɩnaa+ pama Kehaatɩ pɩyalaa+ hɩla pɔ-hɔŋ nɔsɩ taa nɛ pa-caanaa ɖɩsɩ nɔsɩ taa, 35 pama mba payɩ paawɛnɩ pɩnzɩ 30 nɛ piwolo 50 nɛ paawɛ mba palɩzɩ-wɛ se pala tʋmɩyɛ kediɣzaɣ kizinziku tɛɛ yɔ pa-taa yɔ pa-hɩla.+ 36 Mba pama pa-hɩla pɔ-hɔŋ nɔsɩ taa yɔ, pa-tɩŋa paakpɛndɩ 2 750.+ 37 Kehaatɩ mba hɔŋ taa ñɩma mba paama pa-hɩla yɔ mba lɛ; mba kɛnɩ mba payɩ palakaɣ tʋmɩyɛ kediɣzaɣ kizinziku tɛɛ yɔ. Moyizi nɛ Aarɔɔnɩ paama ɛyaa mba pa-hɩla ɛzɩ Yehowa tɩŋnʋʋ Moyizi yɔɔ nɛ ɛɖʋ paɣtʋ yɔ.+

38 Paama Gɛrɩsɔɔnɩ pɩyalaa+ hɩla pɔ-hɔŋ nɔsɩ taa nɛ pa-caanaa ɖɩsɩ nɔsɩ taa, 39 pama mba payɩ paawɛnɩ pɩnzɩ 30 nɛ piwolo 50 nɛ paawɛ mba palɩzɩ-wɛ se pala tʋmɩyɛ kediɣzaɣ kizinziku tɛɛ yɔ pa-taa yɔ pa-hɩla. 40 Mba pama pa-hɩla pɔ-hɔŋ nɔsɩ taa nɛ pa-caanaa ɖɩsɩ nɔsɩ taa yɔ, pa-tɩŋa paakpɛndɩ 2 630.+ 41 Gɛrɩsɔɔnɩ pɩyalaa hɔŋ taa ñɩma mba paama pa-hɩla yɔ mba lɛ, mba payɩ palakaɣ tʋmɩyɛ kediɣzaɣ kizinziku tɛɛ yɔ. Moyizi nɛ Aarɔɔnɩ peyeba nɛ pama ɛyaa mba pa-hɩla ɛzɩ Yehowa ɖʋʋ paɣtʋ yɔ.+

42 Paama Merarii pɩyalaa hɩla pɔ-hɔŋ nɔsɩ taa nɛ pa-caanaa ɖɩsɩ nɔsɩ taa, 43 pama mba payɩ paawɛnɩ pɩnzɩ 30 nɛ piwolo 50 nɛ paawɛ mba palɩzɩ-wɛ se pala tʋmɩyɛ kediɣzaɣ kizinziku tɛɛ yɔ pa-taa yɔ pa-hɩla.+ 44 Pa-taa mba pama pa-hɩla pɔ-hɔŋ nɔsɩ taa yɔ, pa-tɩŋa paakpɛndɩ 3 200.+ 45 Merarii pɩyalaa hɔŋ taa ñɩma mba paama pa-hɩla yɔ mba lɛ, mba Moyizi nɛ Aarɔɔnɩ pama pa-hɩla ɛzɩ Yehowa tɩŋnʋʋ Moyizi yɔɔ nɛ ɛɖʋ paɣtʋ yɔ.+

46 Moyizi nɛ Aarɔɔnɩ nɛ Izrayɛɛlɩ ñʋndɩnaa paama Leevi mba panɛ pa-tɩŋa pa-hɩla pɔ-hɔŋ nɔsɩ taa nɛ pa-caanaa ɖɩsɩ nɔsɩ taa; 47 paawɛnɩ pɩnzɩ 30 nɛ piwolo 50, nɛ paaɖʋ pa-tɩŋa se pala tʋmɩyɛ nɖɩ ɖitukuuni kediɣzaɣ kizinziku yɔ nɛ pasɩɣlɩ kɩ-sʋʋtʋ.+ 48 Mba paama pa-hɩla yɔ pa-tɩŋa paakpɛndɩ 8 580.+ 49 Paama pa-hɩla ɛzɩ Yehowa kaatɩŋnʋʋ Moyizi yɔɔ nɛ ɛɖʋ paɣtʋ yɔ; paa weyi lɛ, paama ɛ-hɩɖɛ nɛ paɖʋ-ɩ ɛ-tʋmɩyɛ nɛ pawɩlɩ-ɩ ɛ-sʋʋtʋ; paama pa-hɩla ɛzɩ Yehowa kaaɖʋʋ paɣtʋ Moyizi yɔ.

5 Yehowa tasɩ yɔɔdɩnʋʋ Moyizi nɛ eheyi-i se: 2 «Ðʋ Izrayɛɛlɩ mba paɣtʋ se pɔɖɔɔnɩ ɖigbeɣliye* taa canasɩ tɩŋa,+ mba payɩ nabʋyʋ kpeŋni-wɛ yɔ+ nɛ mba payɩ potukuni sɩɖʋ* nɔɔyʋ nɛ piyele nɛ pɛfɛyɩ kele kele yɔ.+ 3 Paa pɩtɩɩkɛ abalʋ yaa halʋ yɔ, pɩwɛɛ se ɩɖɔɔnɩ-ɩ. Pɩwɛɛ se ɩɖɔɔnɩ-wɛ maalika taa nɛ pataapisi+ mba pɛ-hɛkʋ taa mɛwɛɛ yɔ* pa-maalikasɩ.»+ 4 Pʋyɔɔ Izrayɛɛlɩ mba labɩ mbʋ nɛ pɔɖɔɔnɩ ɛyaa mba ɖigbeɣliye* taa. Izrayɛɛlɩ mba labɩ ɖeyi ɖeyi ɛzɩ Yehowa kaaheyuu Moyizi yɔ.

5 Yehowa tasɩ yɔɔdɩnʋʋ Moyizi nɛ eheyi-i se: 6 «Heyi Izrayɛɛlɩ mba se: “Ye abalʋ yaa halʋ nɔɔyʋ ɛlabɩ kɩdɛkɛdɩm mbʋ ɛyaa lakɩ yɔ pɩ-taa nabʋyʋ nɛ ɛla lakasɩ nzɩ sɩfɛyɩ siɣsiɣ yɔ Yehowa ɛsɩndaa yɔ, ɛyʋ* ɛnʋ ɛɖɔ wɛɛ.+ 7 Pɩwɛɛ se ekuli* kɩdɛkɛdɩm mbʋ ɛlaba* yɔ pɩ-yɔɔ,+ nɛ pɩwɛɛ se ɛhɛyɩ mbʋ ɛwɛɛkaa nɛ ɛɖɔɔ wɛɛ yɔ pi-lone taa ɖeyi ɖeyi nɛ ɛsɔzɩ pɩ-hɔɔlʋʋ 5 ñɩŋgʋ;+ pɩwɛɛ se ɛhɛyɩ-pʋ weyi ɛyʋsɩnaa yɔ. 8 Ɛlɛ ye weyi payʋsɩnɩ-ɩ yɔ ɛfɛyɩnɩ hɔʋ taa tʋ weyi ɛñɔtɩnɩ-ɩ kpam yɔ se ɛmʋ mbʋ pɩwɛɛ se wɛɛkɩyʋ ɛhɛyɩ yɔ, ɖɩnɛ ɛlɛ papɩsɩɣnɩ-pʋ Yehowa, pɩpɩsɩɣ cɔjɔ pʋyʋ. Nɛ pɩwɛɛ ɖɔɖɔ se ewoni kɩwɛɛkɩm yɔɔ huuzuu ɛyaʋ ŋgʋ cɔjɔ kaɣnɩ-ɩ labʋ kɩwɛɛkɩm yɔɔ huuzuu sɔnzɩ yɔ.+

9 «“Ye Izrayɛɛlɩ mba iwoni haɖɛ kiɖeɖeye+ naɖɩyɛ cɔjɔ yɔ, ɖɩpɩsɩɣ ɛ-ñɩnɖɛ.+ 10 Paa weyi lɛ, e-wondu kiɖeɖetu kɛɣ ɛ-pʋyʋ. Mbʋ nɔɔyʋ cɛlɩɣ cɔjɔ yɔ, mbʋ kaɣnɩ kɛʋ cɔjɔ pʋyʋ.”»

11 Yehowa tasɩ yɔɔdɩnʋʋ Moyizi nɛ eheyi-i se: 12 «Yɔɔdɩnɩ Izrayɛɛlɩ mba nɛ ŋheyi-wɛ se: “Pʋnɛ pɩwɛɛ se ɩla ye halʋ nɔɔyʋ ɛpaɣzɩ labʋ mbʋ pɩfɛyɩ ɖeu yɔ nɛ ɛcɛtɩɣ ɛ-walʋ 13 nɛ abalʋ lɛlʋ sʋʋnɩ-ɩ,+ ɛlɛ ɛ-walʋ tiɖiɣzina nɛ pɩwɛɛ mɛsaɣ tɛɛ, nɛ piyele nɛ halʋ ɛnʋ episi ɛ-tɩ, ɛlɛ aseɣɖe tʋ nɔɔyʋ fɛyɩ se ekuli ɛ-yɔɔ nɛ patɩkpa-ɩ kaɣlaa yɔ: 14 Ye pɩlaba se ɛ-walʋ paɣzɩ sʋsɩ labʋ nɛ pɩlakɩ-ɩ ɛzɩ ɛ-halʋ paɣzɩ-ɩ cɛtʋʋ, nɛ toovenim taa lɛ ɛ-halʋ pisi ɛ-tɩ yɔ; yaa ye pɩlaba se abalʋ paɣzɩ sʋsɩ labʋ nɛ pɩlakɩ-ɩ ɛzɩ ɛ-halʋ paɣzɩ-ɩ cɛtʋʋ, ŋgʋ halʋ tipisi ɛ-tɩ yɔ, 15 ɖɩnɛ ɛlɛ pɩwɛɛ se abalʋ ewoni ɛ-halʋ cɔjɔ ɛsɩndaa, ɛkpɛndɩnɩ ɖɔɖɔ halʋ yɔɔ kɩlaʋ, orjɩ* mʋlʋm efa hɔɔlʋʋ 10 ñɩŋgʋ.* Pɩfɛyɩ se ɛpɩyɩ num pɩ-yɔɔ nɛ pɩfɛyɩ ɖɔɖɔ se ɛɖʋ pɩ-yɔɔ tɩlaaɖɩ kʋhʋlʋmʋʋ, mbʋ pʋyɔɔ yɔ kɩkɛ sʋsɩ tɔɔnaɣ pee kɩlaʋ, tɔɔnaɣ pee kɩlaʋ ŋgʋ kɩtɔzʋʋ wɛɛ ɖɔʋ yɔɔ yɔ.

16 «“Cɔjɔ kaɣ halʋ ɛnʋ lɩzʋʋ ɛsɩndaa nɛ ɛsɩnzɩ-ɩ Yehowa ɛsɩndaa.+ 17 Cɔjɔ kaɣ cozuu lɩm kiɖeɖem cʋʋ ñanaɣ nakɛyɛ taa, nɛ ecozi ɖɔɖɔ puuyuu Ɛsɔ sɛtʋ kɩɖanɖʋʋ tɛɛ nɛ ɛpɩyɩ lɩm mbʋ pɩ-taa. 18 Cɔjɔ kaɣ yebu nɛ halʋ sɩŋ Yehowa ɛsɩndaa, nɛ ɛhɛɖɩ halʋ ñɔsɩ* nɛ ɛtaɣ ɛ-nandasɩ taa tɔɔnaɣ pee kɩlaʋ ŋgʋ kɩtɔzʋʋ nabʋyʋ yɔɔ yɔ, pʋ-tɔbʋʋ se sʋsɩ tɔɔnaɣ pee kɩlaʋ,+ cɔjɔ kaɣ ɖɔkʋʋ e-nesi taa lɩm ñaŋ ñɩmbʋ mbʋ pɩkɔŋnɩ kigiluu yɔ.+

19 «“Pʋwayɩ lɛ, cɔjɔ kaɣ yebu nɛ halʋ ɖuu, ɛkaɣ heyuu halʋ se: ‘Ye abalʋ nɔɔyʋ ɛtɩsʋʋnɩ-ŋ nɛ pɩtasɩnɩ ña-walʋ alɩwaatʋ ndʋ ŋŋwɛ ɛlɛ ɖoŋ tɛɛ yɔ yɔ,+ nɛ ye ŋtɩla mbʋ pɩfɛyɩ ɖeu yɔ nɛ pipisi-ŋ yɔ, ɖɩnɛ ɛlɛ lɩm ñaŋ ñɩmbʋ pʋnɛ, mbʋ pɩkɔŋnɩ kigiluu yɔ pɩtaalabɩ-ŋ pʋyʋ. 20 Ɛlɛ alɩwaatʋ ndʋ ŋŋwɛ ña-walʋ ɖoŋ tɛɛ yɔ, ye ŋlabɩ mbʋ pɩfɛyɩ ɖeu yɔ nɛ ŋpisini ña-tɩ, nɛ abalʋ nɔɔyʋ sʋʋnɩ-ŋ+ nɛ pɩtasɩnɩ ña-walʋ yɔ . . .’ 21 Pʋwayɩ lɛ, cɔjɔ kaɣ yebu nɛ halʋ ɖuu ɖuutu ndʋ tɩ-taa wɛ nɔɔ kɩdɛkɛdaɣ lɔʋ yɔ, nɛ cɔjɔ kaɣ heyuu halʋ se: ‘Yehowa ɛla nɛ ña-taɖɩyɛ* camɩ* nɛ ño-lotu huu nɛ Yehowa la nɛ ŋpɩsɩ nɔɔ kɩdɛkɛdaɣ lɔʋ pʋyʋ nɛ ɖuutu pʋyʋ ña-samaɣ taa. 22 Lɩm pʋnɛ, mbʋ pɩkɔŋnɩ kigiluu yɔ, pɩkaɣ tibu ño-lotu taa nɛ pɩla nɛ ño-lotu huu nɛ piyele nɛ ña-taɖɩyɛ* camɩ.’* Ðɩnɛ ɛlɛ, pɩwɛɛ se halʋ ɛyɔɔdɩ se: ‘Amɛn! Amɛn!’*

23 «“Nɛ cɔjɔ kaɣ maʋ nɔɔ kɩdɛkɛdaɣ lɔʋ tɔm ndʋ takayaɣ taa nɛ ɛñalɩ-tʋ lɩm ñaŋ ñɩmbʋ mbʋ pɩ-taa. 24 Pʋwayɩ lɛ, ɛkaɣ yebu nɛ halʋ ɛnʋ ɛñɔɔ lɩm ñaŋ ñɩmbʋ mbʋ pɩkɔŋnɩ kigiluu yɔ, nɛ lɩm mbʋ pɩkɔŋnɩ kigiluu yɔ pitii ɛ-taa nɛ pɩkɔnɩ-ɩ wɩzasɩ.* 25 Nɛ cɔjɔ kaɣ mʋʋ sʋsɩ tɔɔnaɣ pee kɩlaʋ+ halʋ nesi tɛɛ nɛ efiɣdi tɔɔnaɣ pee kɩlaʋ ŋgʋ Yehowa ɛsɩndaa nɛ ewoni-kʋ altaaru cɔlɔ. 26 Nɛ cɔjɔ kaɣ cozuu tɔɔnaɣ pee kɩlaʋ nɛ pisu e-nikpiɖe taa nɛ ɛñaɣzɩ-kʋ miŋ altaaru yɔɔ, kɩlaʋ kpeekpe lone taa;+ nɛ pʋwayɩ lɛ eyele nɛ halʋ ñɔɔ lɩm mbʋ. 27 Eyeki nɛ halʋ ñɔɔ lɩm mbʋ lɛ, ye halʋ ɛnʋ episi ɛ-tɩ nɛ ɛcɛtɩ ɛ-walʋ yɔ, ɖɩnɛ ɛlɛ lɩm mbʋ pɩkɔŋnɩ kigiluu yɔ pitiki ɛ-taa nɛ pɩpɩsɩ ñaŋ pʋyʋ, nɛ e-lotu huu nɛ ɛ-taɖɩyɛ* camɩ,* nɛ halʋ ɛnʋ ɛkaɣ pɩsʋʋ nɔɔ kɩdɛkɛdaɣ lɔʋ pʋyʋ ɛ-samaɣ taa. 28 Ɛlɛ ye halʋ ɛnʋ, etipisi ɛ-tɩ, nɛ ɛwɛ kele kele yɔ, nɩŋgbaŋʋʋ hɔm mbʋ pɩɩkaɣ kɔm ɛ-yɔɔ, nɛ ɛkaɣ pɩzʋʋ nɛ ɛhaɣ hoɣa nɛ ɛlʋlɩ piya.

29 «“Sʋsɩ yɔɔ paɣtʋ lɛ,+ ye halʋ nɔɔyʋ ɛpaɣzɩ labʋ mbʋ pɩfɛyɩ ɖeu yɔ nɛ episiɣ ɛ-tɩ alɩwaatʋ ndʋ ɛwɛ ɛ-walʋ ɖoŋ tɛɛ yɔ, 30 yaa ye abalʋ nɔɔyʋ ɛpaɣzɩ sʋsɩ labʋ nɛ pɩlakɩ-ɩ ɛzɩ ɛ-halʋ cɛtɩɣ-ɩ yɔ; pɩwɛɛ se ɛsɩnzɩ ɛ-halʋ Yehowa ɛsɩndaa, nɛ cɔjɔ labɩ-ɩ mbʋ payɩ paɣtʋ tʋnɛ tɩpɔzʋʋ yɔ. 31 Abalʋ ɛnʋ ɛɛkaɣ ɖɔʋ wɛɛ, ɛlɛ pakaɣ pɔzʋʋ ɛ-halʋ akɔnta ɛ-wɛɛ ɖɔʋ yɔɔ.”»

6 Yehowa tasɩ yɔɔdɩnʋʋ Moyizi nɛ eheyi-i se: 2 «Yɔɔdɩnɩ Izrayɛɛlɩ mba nɛ ŋheyi-wɛ se: “Ye abalʋ nɔɔyʋ yaa halʋ nɔɔyʋ eɖuu ŋgee ɖuutu natʋyʋ se ɛcɛlɩɣ ɛ-tɩ Yehowa nɛ ɛpɩsɩ Naziireya tʋ*+ yɔ, 3 pɩwɛɛ se ɛsɔ* vɛɛ nɛ sʋlʋm lɛɛbʋ mbʋ payɩ pɩkʋʋ ɛyʋ yɔ. Pɩfɛyɩ se ɛñɔɔ vɛɛ ñɩmɩŋ ñɩŋgʋ yaa sʋlʋm ñɩmɩŋ ñɩmbʋ mbʋ pɩkʋʋ ɛyʋ yɔ.+ Pɩfɛyɩ se ɛñɔɔ mbʋ payɩ pakpaɣ viiñi pee nɛ palabɩna yɔ, nɛ pɩfɛyɩ ɖɔɖɔ se ɛtɔɔ viiñi pee, paa pɩtɩɩkɛ lɛŋ ñɩna yaa kɩwɩlɛɛ yɔ. 4 Kɩyakɩŋ weyi payɩ ɩ-taa ɛkɛɣ Naziireya tʋ yɔ, pɩfɛyɩ se ɛtɔɔ mbʋ pakpaɣ viiñi nɛ palabɩna yɔ, paa pɩtɩɩkɛ viiñi pee wena atɩsɛɛ yɔ yaa a-hʋndʋ yɔ.

5 «“Kɩyakɩŋ weyi payɩ eɖuu ɖuutu se ɛpɩsɩɣ Naziireya tʋ yɔ, pɩfɛyɩ se hʋnʋʋ nakʋyʋ etukuni ɛ-ñʋʋ.+ Pɩsa nɛ ɛwɛɛ kele kele lɛ, pɩwɛɛ se eyele nɛ ɛ-ñʋʋ taa ñɔsɩ ɖɔɔ nɛ pɩkɔɔ pɩsɩɩnɩ alɩwaatʋ ndʋ kɩyakɩŋ weyi ɛlɩzɩ ɛ-tɩ kɩjaʋ se ɛkɛɣ Yehowa pʋyʋ yɔ ɩtɛŋ yɔ. 6 Pɩfɛyɩ se ɛñɔtɩnɩ sɩɖʋ* nɔɔyʋ* kɩyakɩŋ weyi payɩ ɛlɩzɩɣ ɛ-tɩ kɩjaʋ se ɛkɛɣ Yehowa pʋyʋ yɔ. 7 Paa ɛ-caa yaa e-ɖoo yaa ɛ-ɖalʋ yaa e-neu yaa ɛ-kɔɔ ɛsɩbɩna yɔ, pɩfɛyɩ se episi ɛ-tɩ,+ mbʋ pʋyɔɔ yɔ yʋsaɣ ŋga kawɩlɩɣ se ɛkɛ ɛ-Ɛsɔ tɛ Naziireya tʋ yɔ kɛwɛ ɛ-ñʋʋ taa.

8 «“Ɛkɛ kiɖeɖeu Yehowa ɛsɩndaa kɩyakɩŋ weyi payɩ ɛkɛɣ Naziireya tʋ yɔ. 9 Ɛlɛ ye nɔɔyʋ ɛsɩbɩ ɛ-cɔlɔ tuda+ nɛ episi ñɔsɩ nzɩ sɩwɩlɩɣ se ɛlɩzɩ ɛ-tɩ kɩjaʋ se ɛkɛɣ Ɛsɔ pʋyʋ yɔ* yɔ, pɩwɛɛ se ɛhʋ ɛ-ñʋʋ koloŋgolo+ kɩyakʋ ŋgʋ ɛwɩlɩɣ se ɛpɩsɩ ɛ-tɩ kele kele yɔ. Ɛhʋŋ ɛ-ñʋʋ koloŋgolo kɩyakʋ 7 ñɩŋgʋ wiye. 10 Nɛ kɩyakʋ 8 ñɩŋgʋ wiye lɛ, ɛkaɣ wonuu ahoo 2 yaa halikuku piya 2 cɔjɔ, kediɣzaɣ kizinziku nɔnɔɔ taa. 11 Pɩwɛɛ se cɔjɔ ɛñɔɔzɩ sumasɩ nzɩ sɩ-taa kʋɖʋmaɣ nɛ ɛlaanɩ kɩwɛɛkɩm yɔɔ kɩlaʋ, nɛ ɛñɔɔzɩ lɛɛka nɛ ɛlaanɩ kɩlaʋ kɩñaɣzʋʋ nɛ ɛlabɩnɩ-ɩ kɩwɛɛkɩm yɔɔ huuzuu sɔnzɩ,+ mbʋ pʋyɔɔ yɔ, sɩɖʋ* yɔɔ lɛ, ɛɖɔ wɛɛ. Pʋwayɩ lɛ, pɩwɛɛ se ɛpɩsɩ ɛ-ñʋʋ kele kele kɩyakʋ ŋgʋ ki-wiye. 12 Nɛ pɩwɛɛ se ɛtasɩ ɛ-tɩ lɩzʋʋ kɩjaʋ nɛ ɛkɛ Yehowa pʋyʋ kɩyakɩŋ weyi ɛha ɛ-tɩ se ɛkɛɣ Naziireya tʋ yɔ, nɛ pɩwɛɛ se ɛkɔnɩ ɛyaʋ ŋgʋ kɩtɩcɛzɩ pɩnaɣ yɔ nɛ kɩkɛnɩ wɛɛ ɖɔʋ kɩlaʋ kpɩnɛ. Ɛlɛ kɩyakɩŋ weyi ɩ-taa ɛɛkɛ Naziireya tʋ yɔ, paakalɩɣ-ɩ mbʋ pʋyɔɔ yɔ episi ɛ-tɩ ɩ-taa.

13 «“Paɣtʋ ndʋ titukuuni Naziireya tʋ yɔ ndʋ yɔ: Kɩyakɩŋ weyi ɛɖʋwa se ɛkɛɣ Naziireya tʋ yɔ ɩtɛŋ lɛ,+ pɩwɛɛ se pɔkɔnɩ-ɩ kediɣzaɣ kizinziku nɔnɔɔ taa. 14 Peeɖe pɩwɛɛ se ɛkɔnɩ ɛ-haɖɛ Yehowa: ɛkɔŋnɩ ɛyaʋ ŋgʋ kɩfɛyɩnɩ ɛjandʋ natʋyʋ nɛ kɩtɩcɛzɩ pɩnaɣ yɔ nɛ kɩkɛnɩ kɩlaʋ kɩñaɣzʋʋ,+ heɣa halɩñɩŋga ŋga kɛfɛyɩnɩ ɛjandʋ natʋyʋ nɛ katɩcɛzɩ pɩnaɣ yɔ nɛ kɛkɛnɩ kɩwɛɛkɩm yɔɔ kɩlaʋ,+ ɛyaʋ ŋgʋ kɩfɛyɩnɩ ɛjandʋ natʋyʋ yɔ nɛ kɩkɛnɩ laŋhɛzɩyɛ kɩlaʋ,+ 15 kpɔnɔnaa mba pɛwɛ kulukulu kokoo tɩyɛ, patɩɖʋ pa-taa lɔlɔm nɛ palabɩ-wɛ nɛ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ, nɛ mba pɛwɛ tatayaa tatayaa nɛ patɩɖʋ pa-taa lɔlɔm nɛ pata pɔ-yɔɔ num yɔ ɖɔkʋ kʋɖʋmʋʋ, pa nɛ pɔ-tɔɔnaɣ pee kɩlaʋ+ nɛ pe-kilizasɩ.+ 16 Cɔjɔ kaɣ pɩtɩŋa wonuu Yehowa ɛsɩndaa nɛ ɛlaa ɛ-kɩwɛɛkɩm yɔɔ kɩlaʋ nɛ ɛ-kɩlaʋ kɩñaɣzʋʋ. 17 Pɩwɛɛ se ɛlaa ɛyaʋ Yehowa nɛ kɩkɛnɩ laŋhɛzɩyɛ kɩlaʋ, kɩ nɛ kpɔnɔnaa ɖɔkʋ, mba pa-taa patɩɖʋ lɔlɔm yɔ, nɛ ɛlaa kɩ-tɔɔnaɣ pee kɩlaʋ+ nɛ ki-kilizaɣ.

18 «“Pʋwayɩ lɛ, pɩwɛɛ se Naziireya tʋ ɛhʋ ɛ-ñɔsɩ nzɩ eeyebi-sɩ nɛ sɩɖɔɔ ɛ-ñʋʋ taa yɔ*+ kediɣzaɣ kizinziku nɔnɔɔ tɛɛ, nɛ ɛkpaɣ ñɔsɩ nzɩ sɩɩwɛ ɛ-ñʋʋ taa alɩwaatʋ ndʋ ɛɛkɛ Naziireya tʋ yɔ nɛ ewoni-sɩ nɛ ɛɖʋ miŋ weyi ɛwɛ laŋhɛzɩyɛ kɩlaʋ tɛɛ yɔ ɛ-taa. 19 Pɛtɛŋ yʋsaɣ ŋga kawɩlɩɣ se ɛɛkɛ Naziireya tʋ yɔ hʋm ɛ-ñʋʋ taa lɛ, pɩwɛɛ se cɔjɔ ɛkpaɣ ɛyaʋ hamʋʋ ŋgʋ patɩzaa yɔ,+ kpɔnɔnaa mba pa-taa patɩɖʋ lɔlɔm nɛ pɛwɛ kulukulu kokoo tɩyɛ yɔ pa-taa kʋɖʋmʋʋ ɖɔkʋ taa, kpɔnɔnaa mba pa-taa patɩɖʋ lɔlɔm nɛ pɛwɛ tatayaa tatayaa yɔ pa-taa kʋɖʋmʋʋ, nɛ ɛtaɣ pɩtɩŋa Naziireya tʋ nandasɩ taa. 20 Nɛ pɩwɛɛ se cɔjɔ efiɣdi pɩtɩŋa nɛ pɩkɛnɩ kɩlaʋ kifiɣduu Yehowa ɛsɩndaa.+ Pɩkɛnɩ pʋyʋ kiɖeɖeu cɔjɔ, pɩ nɛ kɩlaʋ kifiɣduu laŋɩyɛ nɛ haɖɛ yuye.+ Pʋwayɩ lɛ, Naziireya tʋ pɩzɩɣ nɛ ɛñɔɔ vɛɛ.

21 «“Paɣtʋ ndʋ titukuuni Naziireya tʋ+ weyi eɖuu ɖuutu natʋyʋ yɔ ndʋ yɔ: Ye eɖuwaa nɛ ɛpɩzɩɣ se ɛla haɖɛ Yehowa, nɖɩ ɖɩcɛzɩ mbʋ pɩpɔzʋʋ se ɛla nɛ pɩwɩlɩ se ɛkɛ Naziireya tʋ yɔ, pɩwɛɛ se ɛɖɔ e-ɖuutu yɔɔ ɛzɩ Naziireya tʋ paɣtʋ pɔzʋʋ yɔ.”»

22 Nɛ Yehowa heyi Moyizi se: 23 «Heyi Aarɔɔnɩ nɛ ɛ-pɩyalaa se: “Ɛzʋnɔ pɩwɛɛ se ɩwazɩ+ Izrayɛɛlɩ samaɣ. Iheyi-kɛ se:

24 ‘Yehowa ɛwazɩ-ŋ+ nɛ ɛkandɩyɩ ñɔ-yɔɔ.

25 Yehowa eyele nɛ ɛ-ɛsɩndaa ñandɩ ñɔ-yɔɔ,+ nɛ ɛna ña-pʋtɔdɩyɛ.

26 Yehowa ɛkʋsɩ ɛ-ɛsa nɛ ñɔ-yɔɔ kiŋ nɛ ɛha-ŋ laŋhɛzɩyɛ.’”+

27 Nɛ pɩwɛɛ se pasɩɩ ma-hɩɖɛ Izrayɛɛlɩ samaɣ yɔɔ,+ nɛ mawazɩ-kɛ.»+

7 Kɩyakʋ ŋgʋ Moyizi tɛm Ɛsɔ sɛtʋ kɩɖanɖʋʋ labʋ yɔ,+ puwiye nɖɩ ɛta-kʋ num+ nɛ ɛpɩsɩ-kʋ kele kele, kɩ nɛ ki-wondu kpeekpe, altaaru nɛ ki-wondu kpeekpe.+ Ɛta wondu ndʋ num nɛ ɛpɩsɩ-tʋ kele kele lɛ,+ 2 Izrayɛɛlɩ mba ñʋndɩnaa,+ pa-caanaa ɖɩsɩ ñʋndɩnaa la haɖɛ naɖɩyɛ. Cejewe ñʋndɩnaa mba, mba paaɖɛ nɔɔ kɩgalʋʋ tʋmɩyɛ taa yɔ, 3 pɔkɔnɩ Yehowa ɛsɩndaa pa-haɖɛ, ɖɩɩkɛ kɛɛkɛɛnaa 6 mba pohuuzi pɔ-yɔɔ yɔ nɛ naŋ abalɩñɩŋ 12; paa ñʋndɩnaa 2 mba lɛ paaha kɛɛkɛɛ kʋɖʋmʋʋ nɛ paa ñʋʋdʋ weyi lɛ ɛɛha nɔ abalɩñɩnʋ kʋɖʋm; nɛ powoni pɩtɩŋa Ɛsɔ sɛtʋ kɩɖanɖʋʋ ɛsɩndaa. 4 Yehowa heyi Moyizi se: 5 «Mʋ wondu ndʋ pɔ-cɔlɔ, mbʋ pʋyɔɔ yɔ tɩkaɣ wazʋʋ kediɣzaɣ kizinziku tʋmɩyɛ taa; pɩwɛɛ se ŋcɛlɩ-tʋ Leevi mba, cɛlɩ paa weyi lɛ mbʋ pɩpɔzʋʋ-ɩ ɛ-tʋma taa yɔ.»

6 Mbʋ Moyizi mʋ kɛɛkɛɛnaa nɛ naŋ nɛ ɛcɛlɩ Leevi mba. 7 Ɛcɛlɩ kɛɛkɛɛnaa 2 nɛ naŋ abalɩñɩŋ 4 Gɛrɩsɔɔnɩ pɩyalaa, ɛzɩ pa-tʋma taa kɩcɛyɩm pɔzʋʋ yɔ;+ 8 nɛ ɛcɛlɩ kɛɛkɛɛnaa 4 nɛ naŋ abalɩñɩŋ 8 Merarii pɩyalaa, ɛzɩ pa-tʋma taa kɩcɛyɩm pɔzʋʋ yɔ, cɔjɔ Aarɔɔnɩ pɩyalʋ Itamaarɩ ɖɛɣaɣnɩ-wɛ nɔɔ pa-tʋma taa.+ 9 Ɛlɛ ɛtɩcɛlɩ Kehaatɩ pɩyalaa nabʋyʋ, mbʋ pʋyɔɔ yɔ lone kiɖeɖeye tʋma palakaɣ,+ nɛ pa-hazasɩ yɔɔ pɔhɔɔlaɣ wondu kiɖeɖetu.+

10 Ñʋndɩnaa labɩ pa-haɖɛ kɩyakʋ ŋgʋ paɖʋzaɣ altaaru Ɛsɔ nesi tɛɛ yɔ,*+ kɩyakʋ ŋgʋ pata-kʋ num yɔ. Ñʋndɩnaa kɔnɩ pa-haɖɛ altaaru ɛsɩndaa lɛ, 11 Yehowa heyi Moyizi se: «Paa evemiye nɖɩ lɛ, ñʋʋdʋ kʋɖʋm kɔŋnɩ ɛ-haɖɛ nɛ paɖʋzɩnɩ altaaru Ɛsɔ nesi tɛɛ.»

12 Yuuda cejewiye taa tʋ Aminadaabɩ pɩyalʋ Naasɔɔnɩ+ kɔnɩnɩ ɛ-haɖɛ kajalaɣ kɩyakʋ wiye. 13 Mbʋ ɛɛhawa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa* 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,*+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 14 sika kɔpʋ* kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 15 nɔ* abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 16 pʋnʋ* kʋɖʋm, se paalaanɩ kɩwɛɛkɩm yɔɔ kɩlaʋ;+ 17 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Aminadaabɩ+ pɩyalʋ Naasɔɔnɩ haɖɛ lɛ.

18 Kɩyakʋ 2 ñɩŋgʋ wiye lɛ, Zuwaarɩ pɩyalʋ Netanɛɛlɩ,+ Isakaarɩ mba ñʋʋdʋ kɔnɩ haɖɛ naɖɩyɛ. 19 Ɛ-haɖɛ nɖɩ ɛkɔnaa yɔ nɖɩ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 20 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 21 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 22 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 23 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Zuwaarɩ pɩyalʋ Netanɛɛlɩ haɖɛ lɛ.

24 Kɩyakʋ 3 ñɩŋgʋ wiye lɛ, Helɔɔnɩ pɩyalʋ Eliyaabɩ,+ Zebulɔɔnɩ pɩyalaa ñʋʋdʋ 25 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 26 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 27 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 28 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 29 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Helɔɔnɩ pɩyalʋ Eliyaabɩ+ haɖɛ lɛ.

30 Kɩyakʋ 4 ñɩŋgʋ wiye lɛ, Sedewuuri pɩyalʋ Elizuuri,+ Rubɛɛnɩ pɩyalaa ñʋʋdʋ 31 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 32 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 33 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 34 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 35 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Sedewuuri pɩyalʋ Elizuuri+ haɖɛ lɛ.

36 Kɩyakʋ 5 ñɩŋgʋ wiye lɛ, Zurisadaayɩ pɩyalʋ Selumɩyɛɛlɩ,+ Siimeyɔɔ pɩyalaa ñʋʋdʋ 37 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 38 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 39 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 40 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 41 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Zurisadaayɩ pɩyalʋ Selumɩyɛɛlɩ+ haɖɛ lɛ.

42 Kɩyakʋ 6 ñɩŋgʋ wiye lɛ, Dewuwɛɛlɩ pɩyalʋ Eliyasafʋ,+ Gaadɩ pɩyalaa ñʋʋdʋ, 43 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 44 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 45 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 46 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 47 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Dewuwɛɛlɩ pɩyalʋ Eliyasafʋ+ haɖɛ lɛ.

48 Kɩyakʋ 7 ñɩŋgʋ wiye lɛ, Amihuudɩ pɩyalʋ Eliisama,+ Efrayim pɩyalaa ñʋʋdʋ 49 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 50 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 51 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 52 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 53 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Amihuudɩ pɩyalʋ Eliisama+ haɖɛ lɛ.

54 Kɩyakʋ 8 ñɩŋgʋ wiye lɛ, Pedazuuri pɩyalʋ Gamaalɩyɛɛlɩ,+ Manaasee pɩyalaa ñʋʋdʋ 55 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 56 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 57 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 58 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 59 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Pedazuuri pɩyalʋ Gamaalɩyɛɛlɩ+ haɖɛ lɛ.

60 Kɩyakʋ 9 ñɩŋgʋ wiye lɛ, Gideyoni pɩyalʋ Abidaanɩ,+ Bɛnjamɛɛ pɩyalaa ñʋʋdʋ+ 61 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 62 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 63 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 64 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 65 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Gideyoni pɩyalʋ Abidaanɩ+ haɖɛ lɛ.

66 Kɩyakʋ 10 ñɩŋgʋ wiye lɛ, Amisadaayɩ pɩyalʋ Ahiyezɛɛrɩ,+ Daanɩ pɩyalaa ñʋʋdʋ 67 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 68 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 69 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 70 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 71 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Amisadaayɩ pɩyalʋ Ahiyezɛɛrɩ+ haɖɛ lɛ.

72 Kɩyakʋ 11 ñɩŋgʋ wiye lɛ, Okɩraanɩ pɩyalʋ Pagiyɛɛlɩ,+ Asɛɛrɩ pɩyalaa ñʋʋdʋ 73 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 74 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 75 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 76 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 77 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Okɩraanɩ pɩyalʋ Pagiyɛɛlɩ+ haɖɛ lɛ.

78 Kɩyakʋ 12 ñɩŋgʋ wiye lɛ, Enaanɩ pɩyalʋ Ahira,+ Naftalii pɩyalaa ñʋʋdʋ 79 kɔnɩ ɛ-haɖɛ; mbʋ ɛkɔnaa yɔ mbʋ yɔ: Liidiye ñɩɣyʋʋ tɛlɛm kʋɖʋmʋʋ, ki-yuŋ kɛnɩ siklinaa 130, nɛ liidiye ñɩɣyʋʋ ñanaɣ, kaka yuŋ kɛnɩ siklinaa 70, paamʋnɩ lone kiɖeɖeye taa sikli,+ ñanzɩ nzɩ sɩ-naalɛ sɩ-taa kaasuni mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ se paakpaɣ-pʋ nɛ palaanɩ tɔɔnaɣ pee kɩlaʋ;+ 80 sika kɔpʋ kʋɖʋmʋʋ, ki-yuŋ kɛnɩ siklinaa 10, ŋgee tɩlaaɖɩ kaasu kɩ-taa; 81 nɔ abalɩñɩnʋ kʋɖʋm, ɛyaʋ kʋɖʋmʋʋ, nɛ heɣa abalɩñɩŋga ŋga katɩcɛzɩ pɩnaɣ yɔ, se paalaanɩ kɩlaʋ kɩñaɣzʋʋ;+ 82 pʋnʋ kʋɖʋm, se paalaanɩ kɩwɛɛkɩm yɔɔ kɩlaʋ;+ 83 nɛ naŋ 2, ɛyaŋ 5, tuliŋ 5 nɛ heɣsi abalɩñɩnzɩ 5, paa ŋga lɛ kɛwɛnɩ pɩnaɣ kʋɖʋmaɣ, se paalaanɩ laŋhɛzɩyɛ kɩlaʋ.+ Enaanɩ pɩyalʋ Ahira+ haɖɛ lɛ.

84 Alɩwaatʋ ndʋ pata altaaru num yɔ, haɖɛ nɖɩ Izrayɛɛlɩ ñʋndɩnaa laba se paɖʋzɩnɩ-kʋ Ɛsɔ nesi tɛɛ yɔ+ nɖɩ yɔ: Liidiye ñɩɣyʋʋ tɛlɛmnaa 12, liidiye ñɩɣyʋʋ ñanzɩ 12, sika kɔpʋnaa 12;+ 85 paa liidiye ñɩɣyʋʋ tɛlɛm ŋgʋ lɛ, ki-yuŋ kaakɛnɩ siklinaa 130, nɛ ñanzɩ nzɩ sɩ-taa paa ŋga yuŋ kaakɛnɩ siklinaa 70, liidiye ñɩɣtʋ ndʋ payɩ paalabɩnɩ tɛlɛmnaa nɛ ñanzɩ nzɩ yɔ, ti-yuŋ kaakpɛndɩ siklinaa 2 400, paamʋnɩ lone kiɖeɖeye taa sikli;+ 86 sika kɔpʋnaa 12 mba ŋgee tɩlaaɖɩ kaasu pa-taa yɔ, pa-taa paa ŋgʋ lɛ, ki-yuŋ kaakɛnɩ siklinaa 10, siklinaa mba paamʋnɩ lone kiɖeɖeye taa sikli; sika ŋga payɩ paalabɩnɩ kɔpʋnaa mba yɔ, ko-yuŋ kaakpɛndɩ siklinaa 120. 87 Kpɩna wena a-tɩŋa paahawa se palaanɩ kɩlaʋ kɩñaɣzʋʋ yɔ, ana yɔ: Naŋ abalɩñɩŋ 12, ɛyaŋ 12, heɣsi abalɩñɩnzɩ 12, sɩ-taa paa ŋga lɛ kaawɛnɩ pɩnaɣ kʋɖʋmaɣ, nɛ a-tɔɔnaɣ pee kɩlaŋ; paaha ɖɔɖɔ pʋŋ 12 se palaanɩ kɩwɛɛkɩm yɔɔ kɩlaʋ; 88 nɛ laŋhɛzɩyɛ kɩlaʋ kpɩna tɩŋa kaakpɛndɩ naŋ abalɩñɩŋ 24, ɛyaŋ 60, tuliŋ 60, nɛ heɣsi abalɩñɩnzɩ 60, paa ŋga lɛ kaawɛnɩ pɩnaɣ kʋɖʋmaɣ. Pɛtɛm altaaru num taʋ lɛ,+ haɖɛ nɖɩ palaba se paɖʋzɩnɩ-kʋ Ɛsɔ nesi tɛɛ.+

89 Paa ɛzɩmtaa, Moyizi sʋʋ kediɣzaɣ kizinziku tɛɛ se ɛyɔɔdɩnɩ Ɛsɔ* lɛ,+ ɛnɩɣ nɔɔ ŋga kɔyɔɔdaɣnaɣ-ɩ yɔ ka-taŋ nɛ Aseɣɖe Lɩzʋʋ aɖakaɣ sulaɣ yɔɔ,+ ɛnɩɣ ka-taŋ kerebimwaa 2 hɛkʋ taa;+ nɛ Ɛsɔ yɔɔdʋʋnɩ-ɩ.

8 Yehowa yɔɔdɩnɩ Moyizi nɛ eheyi-i se: 2 «Yɔɔdɩnɩ Aarɔɔnɩ nɛ ŋheyi-i se: “Ŋsɔkɩ kanɖʋnaa lɛ, pɩwɛɛ se kanɖʋnaa mba pa-lʋbɛ pañandɩ lone nɖɩ ɖɩwɛ kanɖʋnaa ɖɩzɩyɛ ɛsɩndaa yɔ.”»+ 3 Nɛ Aarɔɔnɩ la mbʋ: Ɛsɔbɩ kanɖʋnaa se pañandɩ lone nɖɩ ɖɩwɛ kanɖʋnaa ɖɩzɩyɛ ɛsɩndaa yɔ,+ ɛzɩ Yehowa ɖʋʋ paɣtʋ Moyizi yɔ. 4 Ɛzʋnɔ palabɩ kanɖʋnaa ɖɩzɩyɛ nɖɩ: Sika polubini-ɖɩ, hama palabɩnɩ tʋmɩyɛ nɖɩ; kpaɣnɩ ɖɩ-hɛkʋ taa ɖaʋ nɛ piwolo ɖɩ-hɛtʋ, hama palabɩnɩ tʋmɩyɛ nɖɩ.+ Palabɩ-ɖɩ ɛzɩ Yehowa kaawɩlʋʋ Moyizi natʋ+ taa yɔ.

5 Yehowa tasɩ yɔɔdɩnʋʋ Moyizi nɛ eheyi-i se: 6 «Lɩzɩ Izrayɛɛlɩ mba taa Leevi mba nɛ ŋpɩsɩ-wɛ kele kele.+ 7 Ɛzʋnɔ pɩwɛɛ se ŋla nɛ ŋpɩsɩ-wɛ kele kele: Mɩzɩ kɩwɛɛkɩm hɩzʋʋ lɩm pɔ-yɔɔ, pʋwayɩ lɛ pahʋ po-tomnaɣ tɩŋa nɛ hʋnʋʋ, pɔcɔtɩ po-tokonaa, nɛ papɩsɩ pa-tɩ kele kele.+ 8 Pʋwayɩ lɛ, pakpaɣ nɔ* abalɩñɩnʋ+ nɛ ɛ-tɔɔnaɣ pee kɩlaʋ+ ŋgʋ kɩkɛ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ, nɛ ŋkpaɣ nɔ abalɩñɩnʋ lɛlʋ nɛ pɩkɛnɩ kɩwɛɛkɩm yɔɔ kɩlaʋ.+ 9 Pɩwɛɛ se ŋwoni Leevi mba kediɣzaɣ kizinziku ɛsɩndaa nɛ ŋkpeɣli Izrayɛɛlɩ samaɣ kpeekpe.+ 10 Ŋwokini Leevi mba Yehowa ɛsɩndaa lɛ, pɩwɛɛ se Izrayɛɛlɩ mba ɩtɩnɩ pe-nesi Leevi mba yɔɔ.+ 11 Nɛ pɩwɛɛ se Aarɔɔnɩ ɛkpaɣ Leevi mba nɛ ɛha Yehowa* ɛzɩ Izrayɛɛlɩ mba kɩlaʋ kifiɣduu yɔ,+ nɛ pala Yehowa tʋmɩyɛ.+

12 «Pʋwayɩ lɛ, Leevi mba kaɣ tɩnʋʋ pe-nesi naŋ abalɩñɩŋ ɛnɩ ɩ-ñʋŋ taa.+ Nɛ pʋwayɩ lɛ, palaa kʋɖʋm nɛ pɩkɛnɩ kɩwɛɛkɩm yɔɔ kɩlaʋ nɛ palaa lɛlʋ nɛ pɩkɛnɩ kɩlaʋ kɩñaɣzʋʋ Yehowa, se palabɩnɩ kɩwɛɛkɩm yɔɔ huuzuu sɔnzɩ+ Leevi mba. 13 Pʋwayɩ lɛ, ŋha nɔɔ nɛ Leevi mba sɩŋ Aarɔɔnɩ nɛ ɛ-pɩyalaa pɛ-ɛsɩndaa nɛ ŋkpaɣ-wɛ nɛ ŋha* Yehowa ɛzɩ kɩlaʋ kifiɣduu yɔ. 14 Pɩwɛɛ se ŋlɩzɩ Leevi mba nɛ hɔɔlʋʋ Izrayɛɛlɩ mba taa, Leevi mba kaɣ pɩsʋʋ man-pʋyʋ.+ 15 Pʋwayɩ lɛ, Leevi mba kaɣ sʋʋ nɛ pala tʋmɩyɛ nɖɩ ɖitukuuni kediɣzaɣ kizinziku yɔ. Mbʋ pɩwɛɛ se ŋla nɛ ŋpɩsɩ-wɛ kele kele nɛ ŋkpaɣ-wɛ nɛ ŋha* ɛzɩ kɩlaʋ kifiɣduu yɔ. 16 Mbʋ pʋyɔɔ yɔ pɛkɛ mba pakpaɣ-wɛ nɛ paha yɔ, paha-m wɛ Izrayɛɛlɩ mba hɛkʋ taa. Izrayɛɛlɩ mba kajalaɣ piya kpeekpe* lone taa lɛ,+ mankaɣ-wɛ kpaɣʋ nɛ papɩsɩ man-pʋyʋ. 17 Mbʋ pʋyɔɔ yɔ paa Izrayɛɛlɩ mba kajalaɣ pɩɣa ŋga lɛ, man-pʋyʋ kɛkɛnaa, paa pɩtɩɩkɛ ɛyʋ yaa kpɩnɛ yɔ.+ Manpɩsɩ-sɩ kele kele man-tɩ, kɩyakʋ ŋgʋ mankʋ kajalaɣ piya kpeekpe Ejipiti ɛjaɖɛ taa yɔ.+ 18 Mankaɣ kpaɣʋ Leevi mba Izrayɛɛlɩ mba kajalaɣ piya kpeekpe lone taa. 19 Mankaɣ kpaɣʋ Leevi mba Izrayɛɛlɩ mba hɛkʋ taa nɛ mɛncɛlɩ Aarɔɔnɩ nɛ ɛ-pɩyalaa nɛ pɛkɛ mba pakpaɣ-wɛ nɛ paha yɔ, nɛ pala tʋmɩyɛ nɖɩ ɖitukuuni kediɣzaɣ kizinziku yɔ Izrayɛɛlɩ mba,+ nɛ pala ɖɔɖɔ Izrayɛɛlɩ mba kɩwɛɛkɩm yɔɔ huuzuu sɔnzɩ, ɖɩnɛ ɛlɛ Izrayɛɛlɩ samaɣ ɛɛkaɣ ñɔtɩnʋʋ lone kiɖeɖeye nɛ asɛyʋʋ nakʋyʋ talɩ-kɛ.»+

20 Nɛ Moyizi, Aarɔɔnɩ nɛ Izrayɛɛlɩ samaɣ kpeekpe pala Leevi mba mbʋ. Mbʋ payɩ Yehowa kaaheyi Moyizi se pala Leevi mba yɔ, mbʋ ɖɔɖɔ Izrayɛɛlɩ mba labɩ-wɛ. 21 Mbʋ Leevi mba pɩsɩ pa-tɩ kele kele nɛ pɔcɔtɩ po-tokonaa;+ pʋwayɩ lɛ, Aarɔɔnɩ kpaɣ-wɛ nɛ ɛha Yehowa* ɛzɩ kɩlaʋ kifiɣduu yɔ.+ Nɛ Aarɔɔnɩ labɩ-wɛ kɩwɛɛkɩm yɔɔ huuzuu sɔnzɩ se ɛpɩsɩ-wɛ kele kele.+ 22 Pʋwayɩ lɛ, Leevi mba sʋʋ se pala pa-tʋmɩyɛ nɖɩ ɖitukuuni kediɣzaɣ kizinziku yɔ Aarɔɔnɩ nɛ ɛ-pɩyalaa pɛ-ɛsɩndaa. Palabɩ Leevi mba ɖeyi ɖeyi ɛzɩ Yehowa kaaɖʋʋ paɣtʋ Moyizi se palabɩ-wɛ yɔ.

23 Nɛ Yehowa yɔɔdɩnɩ Moyizi nɛ eheyi-i se: 24 «Paɣtʋ tʋnɛ tɩ-yɔɔ pɩwɛɛ se Leevi mba ɩɖɔ: Ye abalʋ nɔɔyʋ ɛwɛnɩ kpaɣnɩ pɩnzɩ 25 nɛ pɩɖɛɛ yɔ, pɩwɛɛ se ɛsʋʋ mba palakɩ tʋmɩyɛ nɖɩ ɖitukuuni kediɣzaɣ kizinziku yɔ pa-taa. 25 Ɛlɛ ɛcɛzɩɣ pɩnzɩ 50 lɛ, pɩwɛɛ se ɛlɩɩ kediɣzaɣ kizinziku tʋmlaɖaa taa, ɛɛtasɩɣ tʋmɩyɛ nɖɩ labʋ. 26 Ɛpɩzɩɣ nɛ ɛsɩnɩ e-koobiya mba palakɩ tʋma wena atukuuni kediɣzaɣ kizinziku yɔ, ɛlɛ pɩfɛyɩ se ɛla tʋmɩyɛ peeɖe. Leevi mba nɛ pa-tʋma hɔɔlʋʋ taa lɛ, mbʋ pɩwɛɛ se ŋla.»+

9 Yehowa yɔɔdɩnɩ Moyizi Sinayii kañɩmbusuu taa pɩnaɣ 2 ñɩŋga fenaɣ kajalaɣ ñɩŋga taa,+ palɩnɩ Ejipiti ɛjaɖɛ taa nɛ pɩtɛ lɛ, nɛ eheyi-i se: 2 «Pɩwɛɛ se Izrayɛɛlɩ mba ɩñɔɔzɩ Paska kɩlaʋ+ kɩ-alɩwaatʋ yɔɔ.+ 3 Pɩwɛɛ se ɩñɔɔzɩ-kʋ kɩ-alɩwaatʋ yɔɔ, fenaɣ kanɛ ka-kɩyakʋ 14 ñɩŋgʋ wiye wɩsɩ ɖʋʋ lɛ.* Pɩwɛɛ se ɩñɔɔzɩ-kʋ nɛ pɩla nɔɔ kʋɖʋmaɣ nɛ kɩ-yɔɔ paɣtʋ tɩŋa nɛ kɩ-yɔɔ ɖʋtʋ tɩŋa.»+

4 Nɛ Moyizi heyi Izrayɛɛlɩ mba se pɔñɔɔzɩ Paska kɩlaʋ. 5 Mbʋ pɔñɔɔzɩ Paska kɩlaʋ fenaɣ kajalaɣ ñɩŋga kɩyakʋ 14 ñɩŋgʋ wiye wɩsɩ ɖʋʋ alɩwaatʋ taa,* Sinayii kañɩmbusuu taa. Izrayɛɛlɩ mba la pɩtɩŋa ɖeyi ɖeyi ɛzɩ Yehowa kaaɖʋʋ paɣtʋ Moyizi yɔ.

6 Ɛlɛ abalaa nabɛyɛ taawɛɛ kele kele, mbʋ pʋyɔɔ yɔ paatukuni sɩɖʋ nɔɔyʋ nɛ pipisi-wɛ,*+ nɛ pʋyɔɔ lɛ, pataapɩzɩɣ se pɔñɔɔzɩ Paska kɩlaʋ puwiye. Pʋyɔɔ abalaa mba powobi Moyizi nɛ Aarɔɔnɩ pɔ-cɔlɔ puwiye+ 7 nɛ peheyi Moyizi se: «Ðɩfɛyɩ kele kele, mbʋ pʋyɔɔ yɔ ɖitukuni sɩɖʋ nɔɔyʋ.* Paa mbʋ yɔ, ɛbɛ yɔɔ paahaɣ-ɖʋ nʋmɔʋ se ɖɩlaa kɩlaʋ Yehowa kɩ-alɩwaatʋ yɔɔ Izrayɛɛlɩ mba hɛkʋ taa?»+ 8 Ðɩnɛ ɛlɛ Moyizi heyi-wɛ se: «Ɩsɩŋ peeɖe yɔ, nɛ manɩɩ paɣtʋ ndʋ Yehowa ɖʋʋ mɩ-yɔɔ yɔ.»+

9 Nɛ Yehowa heyi Moyizi se: 10 «Heyi Izrayɛɛlɩ mba se: “Paa pɩlaba se mɩ-taa nɔɔyʋ yaa mɩ-lʋlʋʋ taa tʋ nɔɔyʋ tukuni sɩɖʋ nɔɔyʋ nɛ pɩla se ɛfɛyɩ kele kele*+ yaa pɩlaba se ɛɖɛ nʋmɔʋ poliŋ taa ɖoli yɔ, pɩwɛɛ ɖɔɖɔ se ɛñɔɔzɩ Yehowa Paska kɩlaʋ. 11 Pɩwɛɛ se pɔñɔɔzɩ-kʋ fenaɣ 2 ñɩŋga+ kɩyakʋ 14 ñɩŋgʋ wiye, wɩsɩ ɖʋʋ lɛ.* Pɩwɛɛ se pɛkpɛndɩ kpɔnɔ ŋgʋ kɩ-taa patɩɖʋ lɔlɔm yɔ nɛ ñɩtʋ ñaŋ ñɩndʋ nɛ pɔtɔɔnɩ-kʋ.+ 12 Pɩfɛyɩ se pakazɩ kɩlaʋ hɔɔlʋʋ nakʋyʋ nɛ tɛʋ fe,+ nɛ pɩfɛyɩ ɖɔɖɔ se pɛpɛlɩ kɩ-mɔɔyɛ naɖɩyɛ.+ Pɩwɛɛ se pɔñɔɔzɩ-kʋ nɛ pɩla nɔɔ kʋɖʋmaɣ nɛ Paska yɔɔ paɣtʋ tɩŋa. 13 Ɛlɛ ye nɔɔyʋ ɛɛwɛ kele kele, yaa etaawolo nʋmɔʋ, ɛlɛ ɛla kaakendu nɛ ɛtɩñɔɔzɩ Paska kɩlaʋ yɔ, ɖɩnɛ ɛlɛ pɩwɛɛ se palɩzɩ* ɛyʋ ɛnʋ* ɛ-samaɣ hɛkʋ taa,+ mbʋ pʋyɔɔ yɔ ɛtɩlaa Yehowa kɩlaʋ kɩ-alɩwaatʋ yɔɔ. Pakaɣ ɛyʋ ɛnʋ pɔzʋʋ akɔnta ɛ-kɩdɛkɛdɩm yɔɔ.

14 «“Nɛ ye ɛgɔm nɔɔyʋ ɛkɔma nɛ ɛcaɣ mɩ-cɔlɔ yɔ, pɩwɛɛ se ɛnʋ ɖɔɖɔ ɛñɔɔzɩ Yehowa Paska kɩlaʋ.+ Pɩwɛɛ se ɛñɔɔzɩ-kʋ nɛ pɩla nɔɔ kʋɖʋmaɣ nɛ Paska paɣtʋ nɛ kɩ-ɖʋtʋ.+ Mɩ-tɩŋa ɩwɛɣnɩ paɣtʋ kʋɖʋmtʋ, paa pɩtɩɩkɛ ɛgɔm yaa ɛjaɖɛ taa tʋ maɣmaɣ yɔ.”»+

15 Kɩyakʋ ŋgʋ pesiɣ Ɛsɔ sɛtʋ kɩɖanɖʋʋ yɔ,+ mɩndʋ kaahuuzi Ɛsɔ sɛtʋ kɩɖanɖʋʋ yɔɔ, Aseɣɖe Lɩzʋʋ kizinziku yɔɔ; ɛlɛ ɖanaɣ lɛ, nabʋyʋ kaawɛ miŋ tɩyɛ Ɛsɔ sɛtʋ kɩɖanɖʋʋ yɔɔ nɛ tɛʋ kɔɔ nɛ kife.+ 16 Mbʋ pɩlakaɣ tam: Mɩndʋ huuzaɣ kɩ-yɔɔ wɩsɩ taa, nɛ mbʋ pɩɩwɛ ɛzɩ miŋ yɔ, pihuuzaɣ kɩ-yɔɔ ɖoo taa.+ 17 Paa ɛzɩmtaa mɩndʋ ñɩtɩɣ nɛ tɩkʋyɩ kizinziku yɔɔ lɛ, Izrayɛɛlɩ mba kʋyaɣ nɛ pɛɖɛɣ,+ nɛ ɖenɖe mɩndʋ sɩŋaɣ yɔ, peeɖe Izrayɛɛlɩ mba sikaɣ pe-kizinzikiŋ.+ 18 Ye Yehowa ɛɖʋ paɣtʋ Izrayɛɛlɩ mba se pɛɖɛɛ yɔ, pakʋyaɣ nɛ pɛɖɛɣ, nɛ ye Yehowa ɛɖʋ-wɛ paɣtʋ se pesiɣ pe-kizinzikiŋ yɔ, pesikaɣ-ɩ.+ Alɩwaatʋ ndʋ payɩ mɩndʋ wɛɣ Ɛsɔ sɛtʋ kɩɖanɖʋʋ yɔɔ lɛ, pacakaɣ mbʋ ɖenɖe pesiɣ pe-kizinzikiŋ yɔ. 19 Ye mɩndʋ ɛcaɣ Ɛsɔ sɛtʋ kɩɖanɖʋʋ yɔɔ kɩyakɩŋ sakɩyɛ yɔ, Izrayɛɛlɩ mba ñaŋaɣ Yehowa nɛ pataaɖɛɣ.+ 20 Nabʋyʋ taa lɛ, mɩndʋ wɛɣ Ɛsɔ sɛtʋ kɩɖanɖʋʋ yɔɔ kɩyakɩŋ pazɩ. Yehowa ɛɖʋ paɣtʋ se pesiɣ pe-kizinzikiŋ mbʋ yɔ, pesiki-i mbʋ; nɛ ye Yehowa ɛɖʋ paɣtʋ se pɛɖɛɛ yɔ, pɛɖɛɣ. 21 Nabʋyʋ taa lɛ, mɩndʋ wɛɣ kpaɣnɩ ɖanaɣ nɛ piwolo tanaŋ tɛɛ ɖeke, nɛ mɩndʋ kʋyʋʋ tanaŋ tɛɛ lɛ, pakʋyɩ nɛ pɛɖɛɛ. Paa wɩsɩ taa yaa ɖoo taa mɩndʋ ɛkʋyaa yɔ, pakʋyʋʋ ɖɔɖɔ nɛ pɛɖɛɛ.+ 22 Paa kɩyakɩŋ 2 yaa fenaɣ kʋɖʋmaɣ mɩndʋ ɛcaɣ Ɛsɔ sɛtʋ kɩɖanɖʋʋ yɔɔ yaa pɩcɛzɩ mbʋ yɔ, Izrayɛɛlɩ mba cakaɣ ɖenɖe pesiɣ pe-kizinzikiŋ yɔ nɛ pataaɖɛɣ. Ɛlɛ ye tɩkʋyaa yɔ, pakʋyʋʋ nɛ pɛɖɛɛ. 23 Ye Yehowa ɛɖʋ paɣtʋ se pesiɣ pe-kizinzikiŋ yɔ, pesiki-i; nɛ ye Yehowa ɛɖʋ paɣtʋ se pɛɖɛɛ yɔ pɛɖɛɣ. Pɔɖɔŋaɣ Yehowa paɣtʋ yɔɔ, ndʋ Yehowa tɩŋaɣnɩ Moyizi yɔɔ nɛ ɛɖʋʋ-wɛ yɔ.

10 Pʋwayɩ lɛ, Yehowa heyi Moyizi se: 2 «Kpaɣ liidiye ñɩɣtʋ nɛ ŋlubini ña-tɩ aganda 2;+ hama ŋlakɩnɩ tʋmɩyɛ nɖɩ; ana ŋkaɣ yanʋʋ samaɣ nɛ ana ɖɔɖɔ ŋkaɣ hʋlʋʋ nɛ ŋwɩlɩnɩ samaɣ se pɩwɛɛ se kakʋyɩ nɛ kɛɖɛɛ. 3 Pahʋlʋʋ a-naalɛ lɛ, pɩwɛɛ se samaɣ kpeekpe ekpeɣli ñɔ-cɔlɔ kediɣzaɣ kizinziku nɔnɔɔ tɛɛ.+ 4 Ye pahʋlɩ kʋɖʋmɖɩyɛ ɖeke yɔ, ɖɩnɛ ɛlɛ ñʋndɩnaa ɖeke, Izrayɛɛlɩ ɛyaa kudokiŋ ñʋndɩnaa ɖeke kaɣnɩ kpeɣluu ñɔ-cɔlɔ.+

5 «Ye ɩhʋlʋʋ ɛgandɩyɛ nɛ ɩlɛɣzɩɣ ɖi-witu yɔ, pɩlɩŋ weyi ɩwɛnɩ wɩsɩ ɖɩlɩyɛ taa kiŋ yɔ,+ ɩkaɣ kʋyʋʋ nɛ ɩɖɛɛ. 6 Ɩhʋlʋʋ ɛgandɩyɛ nɛ ɩlɛɣzɩɣ ɖi-witu nabʋlɛ ɖeɖe lɛ, ɖɩnɛ ɛlɛ pɩlɩŋ weyi ɩwɛnɩ hadɛ kiŋ yɔ,+ ɩkaɣ kʋyʋʋ nɛ ɩɖɛɛ. Paa ɛzɩmtaa pɩlʋʋ nakʋyʋ ɖɛɣ lɛ, mbʋ pɩwɛɛ se pahʋlɩ ɛgandɩyɛ.

7 «Ɛlɛ ye ɩyaɣ samaɣ se kekpeɣli yɔ, pɩwɛɛ se ɩhʋlɩ aganda,+ ɛlɛ pɩfɛyɩ se ɩlɛɣzɩɣ a-witu. 8 Cɔjɔnaa, Aarɔɔnɩ pɩyalaa kaɣnɩ hʋlʋʋ aganda,+ nɛ a-hʋlʋʋ kaɣ-mɩ kɛʋ tamtam paɣtʋ, mɩ nɛ mɩ-lʋlʋʋ taa mba kpeekpe.

9 «Ye pɩwɛɛ se iyooni nazɩyʋ nɔɔyʋ weyi ɛwɩlɩɣ-mɩ ñaŋ yɔ mɩ-ɛjaɖɛ taa yɔ, pɩwɛɛ se ɩhʋlɩ aganda nɛ ɩyaanɩ ɛyaa se pɛɖɛɛ you,+ ɖɩnɛ ɛlɛ mɩ-Ɛsɔ Yehowa kaɣ mɩ-yɔɔ tɔzʋʋ nɛ ɛlɩzɩ-mɩ mi-koyindinaa nesi tɛɛ.

10 «Pɩtasɩ lɛ, alɩwaatʋ ndʋ ɩwɛɣ laŋhʋlʋmɩyɛ taa yɔ+—mɩ-kazandʋ alɩwaatʋ taa+ nɛ mi-fenasɩ ɖɩbazɩyɛ—pɩwɛɛ se ɩhʋlɩ aganda mɩ-kɩlaŋ kɩñaɣzɩŋ+ nɛ mɩ-laŋhɛzɩyɛ kɩlaŋ+ yɔɔ; ana kaɣnɩ yebu nɛ pɔtɔzɩ mɩ-yɔɔ mɩ-Ɛsɔ ɛsɩndaa. Mɛkɛnɩ mɩ-Ɛsɔ Yehowa.»+

11 Pɩkɔm nɛ pɩtalɩ pɩnaɣ 2 ñɩŋga, fenaɣ 2 ñɩŋga kɩyakʋ 20 ñɩŋgʋ wiye lɛ,+ mɩndʋ kʋyɩ Aseɣɖe Lɩzʋʋ kɩɖanɖʋʋ yɔɔ.+ 12 Pʋyɔɔ Izrayɛɛlɩ mba kʋyɩ Sinayii kañɩmbusuu taa, paatɩŋ ɖama wayɩ ɖeyi ɖeyi ɛzɩ paaheyuu-wɛ yɔ,+ nɛ mɩndʋ wolo tɩsɩŋ Paraanɩ kañɩmbusuu taa.+ 13 Kajalaɣ ɖeɖe lɛ pakʋyʋʋ ɛzɩ Yehowa kaatɩŋnʋʋ Moyizi yɔɔ nɛ ɛɖʋ paɣtʋ yɔ.+

14 Ðɩnɛ ɛlɛ Yuuda pɩyalaa cejewe 3 tindimiye pɩlʋʋ ɖɛɛ nɔɔ, pɔ-sɔɔjanaa tindima nɔsɩ taa, Aminadaabɩ pɩyalʋ Naasɔɔnɩ+ kaakɛnɩ tindimiye nɖɩ ɖɩ-ñʋʋdʋ. 15 Isakaarɩ pɩyalaa cejewiye ñʋʋdʋ lɛ Zuwaarɩ pɩyalʋ Netanɛɛlɩ.+ 16 Zebulɔɔnɩ pɩyalaa cejewiye ñʋʋdʋ lɛ Helɔɔnɩ pɩyalʋ Eliyaabɩ.+

17 Pɛkpɛzɩ Ɛsɔ sɛtʋ kɩɖanɖʋʋ lɛ,+ kɩ-kpaɣyaa, Gɛrɩsɔɔnɩ pɩyalaa+ nɛ Merarii pɩyalaa+ pakpaɣ nʋmɔʋ.

18 Pʋwayɩ lɛ, Rubɛɛnɩ mba cejewe 3 tindimiye pɩlʋʋ ɖɛɛ, pe-tindima* nɔsɩ taa, nɛ Sedewuuri pɩyalʋ Elizuuri+ kaakɛnɩ tindimiye nɖɩ ɖɩ-ñʋʋdʋ. 19 Siimeyɔɔ pɩyalaa cejewiye ñʋʋdʋ lɛ Zurisadaayɩ pɩyalʋ Selumɩyɛɛlɩ.+ 20 Gaadɩ pɩyalaa cejewiye ñʋʋdʋ lɛ Dewuwɛɛlɩ pɩyalʋ Eliyasafʋ.+

21 Pʋwayɩ lɛ, Kehaatɩ ñɩma mba pakpakɩɣ kooka kiɖeɖeɣa wondu yɔ+ pɛɖɛɛ. Pɩɩwɛɛ se pesiɣ Ɛsɔ sɛtʋ kɩɖanɖʋʋ pʋcɔ nɛ paba talɩ.

22 Pʋwayɩ lɛ, Efrayim pɩyalaa cejewe 3 tindimiye pɩlʋʋ ɖɛɛ, pe-tindima* nɔsɩ taa, nɛ Amihuudɩ pɩyalʋ Eliisama+ kaakɛnɩ tindimiye nɖɩ ɖɩ-ñʋʋdʋ. 23 Manaasee pɩyalaa cejewiye ñʋʋdʋ lɛ Pedazuuri pɩyalʋ Gamaalɩyɛɛlɩ.+ 24 Bɛnjamɛɛ pɩyalaa cejewiye ñʋʋdʋ lɛ Gideyoni pɩyalʋ Abidaanɩ.+

25 Pʋwayɩ lɛ, Daanɩ pɩyalaa cejewe 3 tindimiye pɩlʋʋ ɖɛɛ, pe-tindima* nɔsɩ taa, mba kaakɛnɩ pɩlɩŋ tɩŋa payɩ wayɩ feŋiyaa, nɛ Amisadaayɩ pɩyalʋ Ahiyezɛɛrɩ+ kaakɛnɩ tindimiye nɖɩ ɖɩ-ñʋʋdʋ. 26 Asɛɛrɩ pɩyalaa cejewiye ñʋʋdʋ lɛ Okɩraanɩ pɩyalʋ Pagiyɛɛlɩ.+ 27 Naftalii pɩyalaa cejewiye ñʋʋdʋ lɛ Enaanɩ pɩyalʋ Ahira.+ 28 Izrayɛɛlɩ mba nɛ pe-tindima* paaɖɛɣ lɛ, mbʋ patɩŋaɣ ɖama wayɩ.+

29 Ðɩnɛ ɛlɛ Moyizi heyi ɛ-ɛtɩ Madiyaŋ tʋ Rewuwɛɛlɩ*+ pɩyalʋ Hobaabɩ se: «Ðɩɖɛɣ lone nɖɩ ɖɩ-tɔm Yehowa yɔɔdaa se: “Mankaɣ-mɩ ɖɩ cɛlʋʋ” yɔ ɖɩ-taa.+ Kɔɔ nɛ ɖɩɖɛɛ,+ ɖɩkaɣ-ŋ labʋ camɩyɛ, mbʋ pʋyɔɔ yɔ Yehowa labɩ Izrayɛɛlɩ mba tamaɣ se ɛkaɣ-wɛ haʋ wondu kɩbandʋ.»+ 30 Ɛlɛ, ɛlɛ cosi-i se: «Maawoki. Manpɩsɩɣ mɛ-ɛjaɖɛ taa, mɔ-hɔʋ taa mba cɔlɔ.» 31 Peeɖe Moyizi kitini-i se: «Mentendi-ŋ, taayebi-ɖʋ, mbʋ pʋyɔɔ yɔ ŋsɩm ɖenɖe ɖɩpɩzɩɣ nɛ ɖisiɣ kizinzikiŋ kañɩmbusuu taa yɔ, nɛ ŋpɩzɩɣ nɛ ŋkɛ-ɖʋ nʋmɔʋ wɩlɩyʋ.* 32 Nɛ ye ŋtɩŋ-ɖʋ yɔ,+ kɩbandʋ ndʋ payɩ Yehowa lakɩ-ɖʋ yɔ, ɖɩkaɣ-ŋ tʋ labʋ ɖɔɖɔ.»

33 Mbʋ pakʋyɩnɩ Yehowa pʋʋ+ yɔɔ nɛ pɔɖɔ kɩyakɩŋ 3 nʋmɔʋ, Yehowa ɛgbɛyɛ ɖʋʋ aɖakaɣ+ kaawɛ pɛ-ɛsɩndaa kɩyakɩŋ 3 nʋmɔʋ ɖɔm mbʋ pɩ-taa se kañɩnɩ-wɛ ɖɩhɛzɩyɛ.+ 34 Nɛ alɩwaatʋ ndʋ pakʋyʋʋnɩ lone nɖɩ ɖɩ-taa pesiɣ pe-kizinzikiŋ yɔ lɛ, Yehowa mɩndʋ+ wɛɣ pa-ñʋʋ yɔɔ evemiye taa.

35 Paa ɛzɩmtaa, pakpakaɣ aɖakaɣ se pɛɖɛɣ lɛ, Moyizi yɔɔdaɣ se: «Hayɩ Yehowa, kʋyɩ,+ ño-koyindinaa ɩmɩzɩ, nɛ mba papaɖɩɣ-ŋ yɔ pese ñɛ-ɛsɩndaa.» 36 Nɛ kasɩŋaɣ lɛ, ɛyɔɔdaɣ se: «Hayɩ Yehowa, pɩsɩ Izrayɛɛlɩ ɛyaa kudokiŋ weyi ɩfɛyɩ kalʋʋ yɔ ɩ-cɔlɔ.»*+

11 Nɛ samaɣ paɣzɩ miduu siŋŋ Yehowa ɛsɩndaa. Yehowa nɩ-tʋ lɛ, ɛkɔ pana siŋŋ, nɛ miŋ nɩɩyɩ lɩɩnɩ Yehowa cɔlɔ nɛ etii pɔ-yɔɔ nɛ ɛpaɣzɩ pa-taa nabɛyɛ ñaɣʋ ɖigbeɣliye* nɔɔ yɔɔ. 2 Samaɣ paɣzɩ kubusi mabʋ nɛ Moyizi cɔlɔ kiŋ lɛ, ɛlɛ tendi Yehowa+ nɛ miŋ ɖɩ. 3 Pʋyɔɔ paya lone nɖɩ se Taberaa,* mbʋ pʋyɔɔ yɔ miŋ kaalɩnɩ Yehowa cɔlɔ nɛ ɛñaɣ-wɛ.+

4 Ðɩnɛ ɛlɛ ɛyaa samaɣ ŋga kaasidi pa-taa yɔ,*+ kapaɣzɩ wɛnʋʋ piɖeni men-ɖeke kɔɖɛyɩ,+ nɛ Izrayɛɛlɩ mba ɖɔɖɔ ɖaɣnɩ paɣzʋʋ wiu nɛ pɔtɔŋ se: «Akaɣ-ɖʋ haʋ nandʋ nɛ ɖɩtɔɔ?+ 5 Ðɩtɔzʋʋ kpakpasɩ nzɩ ɖɩtɔkaɣ yem falaa Ejipiti ɛjaɖɛ taa yɔ sɩ-yɔɔ mbʋ suwe! Ðɩtɔzʋʋ ɖɔɖɔ kɔŋkɔmbɩrɩnaa, pastɛɛkɩnaa, kaabʋnaa nɛ ayoonaa yɔɔ!+ 6 Ɛlɛ lɛɛlɛɛyɔ lɛ, ɖiɖiɣni* wɩlʋʋ. Ðɩɩnaɣ nabʋyʋ nɛ pɩtasɩnɩ maana kʋnɛ.»+

7 Maana+ kaawɛ ɛzɩ koriyandɩrɩ* piye yɔ,+ kɩ-wɛtʋ wɛ ɛzɩ bideliyɔɔm tɩʋ ketu yɔ. 8 Samaɣ lɩɣaɣ nɛ kokuu-kʋ nɛ kanaŋɩɣ-kʋ nama yɔɔ yaa kɔsɔkɩ-kʋ sɔɔyɛ taa. Pʋwayɩ lɛ, patɩzɩɣ-kʋ ɖeɣsi taa yaa pakpakɩɣ-kʋ nɛ palakɩnɩ kpɔnɔnaa mba pɛwɛ kulukulu yɔ;+ ye ŋɖɩkɩ-kʋ yɔ, kɩwɛ ɛzɩ kpɔnɔnaa leleŋ ñɩma mba pa-taa pesidi num yɔ. 9 Ðoluu kpaɣ ɖigbeɣliye taa ɖoo taa lɛ, maana tii kɩ-yɔɔ.+

10 Nɛ Moyizi nɩɩ samaɣ wɛɛ nɛ kewiɣ, paa hɔʋ ŋgʋ lɛ kɩɩwɛɛ nɛ kiwiɣ, paa ɛyʋ weyi lɛ ewiɣaɣ e-kizinziku nɔnɔɔ tɛɛ. Nɛ Yehowa kɔ pana siŋŋ,+ pɩtaakɛdɩnɩ Moyizi ɖɔɖɔ paa ññɩɩ. 11 Ðɩnɛ ɛlɛ Moyizi pɔzɩ Yehowa se: «Ɛbɛ yɔɔ ŋnazɩ ña-lɩmɖʋyʋ? Ɛbɛ yɔɔ ŋtɩna man-pʋtɔdɩyɛ nɛ ŋkpaɣ samaɣ kanɛ ke-kpeekpe ka-sʋʋtʋ nɛ ŋsʋʋ-m?+ 12 Ɛzɩ mahaɣnɩ samaɣ kanɛ ke-kpeekpe ko-hoɣa na? Ɛzɩ malʋlɩnɩ-wɛ nɛ ŋheyiɣ-m se: “Kpaɣ-wɛ ñɔ-nɔkɔyʋʋ taa ɛzɩ lɩmɖʋyʋ* kpakʋʋ hɩɖɛ yɔɔ pɩɣa yɔ,” nɛ mowoni-wɛ tɛtʋ ndʋ ŋɖuwaa se ŋcɛlɩɣ pɔ-cɔzɔnaa yɔ tɩ-taa?+ 13 Le mankaɣ lɩʋ nandʋ yɔɔ nɛ mɛncɛlɩ samaɣ kanɛ ke-kpeekpe? Mbʋ pʋyɔɔ yɔ pɛwɛɛ nɛ pewiɣ mɛ-ɛsɩndaa nɛ pɔyɔɔdʋʋ se: “Ha-ɖʋ nandʋ nɛ ɖɩtɔɔ!” 14 Men-ɖeke maapɩzɩɣ nɛ mansɩɣlɩ samaɣ kanɛ ke-kpeekpe ka-sʋʋtʋ; pɩcɛzɩ-m.+ 15 Ye mbʋ ŋlakɩ-m yɔ, mentendi-ŋ kʋ-m kpaagbaa.+ Ye mɔn-tɔm ɛkɛdɩnɩ-ŋ yɔ, taayele nɛ mantasɩ tɔɔʋ kʋñɔŋ.»

16 Yehowa kitini Moyizi se: «Kpeɣli-m Izrayɛɛlɩ ɛzʋtʋyaa taa abalaa 70, abalaa mba ŋɖiɣzinaa* se pɛkɛ ɛzʋtʋyaa nɛ samaɣ taa sɔsaa yɔ,+ nɛ ŋwoni-wɛ kediɣzaɣ kizinziku cɔlɔ nɛ pasɩŋ peeɖe ñɔ-cɔlɔ. 17 Mankaɣ tibu+ nɛ mɔyɔɔdɩnɩ-ŋ peeɖe,+ nɛ malɩzɩ fezuu+ ŋgʋ kɩwɛ ñɔ-yɔɔ yɔ kɩ-hɔɔlʋʋ nakʋyʋ nɛ manɖʋ-kʋ pɔ-yɔɔ, nɛ pasɩnɩ-ŋ samaɣ sʋʋtʋ sɩɣlʋʋ nɛ ŋtaasɩɣlɩ-tʋ ñe-ɖeke.+ 18 Pɩwɛɛ se ŋheyi samaɣ se: “Ɩpɩsɩ mɩ-tɩ kele kele pʋcɔ nɛ cee tɛʋ fe,+ mbʋ pʋyɔɔ yɔ paa pɩɩla ɛzɩma yɔ, ɩkaɣ tɔɔʋ nandʋ; mbʋ pʋyɔɔ yɔ iwi Yehowa nɩŋgbaaŋ taa+ nɛ ɩyɔɔdɩ se: ‘Akaɣ-ɖʋ haʋ nandʋ nɛ ɖɩtɔɔ? Ðɩɩwɛ Ejipiti lɛ, pɩɩwɛ-ɖʋ weewee.’+ Paa pɩɩla ɛzɩma yɔ, Yehowa kaɣ-mɩ haʋ nandʋ nɛ ɩtɔɔ.+ 19 Ɩkaɣ-tʋ tɔɔʋ, pɩtɩkɛ kɩyakʋ kʋɖʋmʋʋ yaa kɩyakɩŋ 2, yaa kɩyakɩŋ 5, yaa kɩyakɩŋ 10 yaa kɩyakɩŋ 20, 20 ɛlɛ fenaɣ pilim, nɛ pɩkɔɔ pɩsɩɩnɩ alɩwaatʋ ndʋ tɩlɩnɩ mɩ-mɔɔŋ tɛɛ nɛ tɩlɩɩ-mɩ sɔŋ yɔ,+ mbʋ pʋyɔɔ yɔ ɩlɔ Yehowa, weyi ɛwɛ mɩ-hɛkʋ taa yɔ, nɛ iwii ɛ-ɛsɩndaa nɛ ɩyɔɔdɩ se: ‘Ɛbɛ yɔɔ ɖɩlɩ Ejipiti ɛjaɖɛ taa?’”»+

21 Ðɩnɛ ɛlɛ Moyizi yɔɔdɩ se: «Samaɣ ŋga mɛwɛ kɛ-hɛkʋ taa yɔ, ka-taa abalaa* kpɛndɩ 600 000,+ nɛ ña ñɔyɔɔdʋʋ se: “Mankaɣ-wɛ cɛlʋʋ nandʋ nɛ pɔtɔɔ nɛ pɩtalɩ-wɛ fenaɣ pilim”! 22 Paa pakʋ heŋ nɛ naŋ sakɩyɛ ɛzɩma yɔ, pɩkaɣ-wɛ talʋʋ na? Nɛ paa pakpa teŋgu taa kpakpasɩ kpeekpe yɔ, pɩkaɣ-wɛ talʋʋ na?»

23 Nɛ Yehowa cosi Moyizi se: «Yehowa nesi kɩlɩ tobiyuu yaa we?+ Lɛɛlɛɛyɔ ŋkaɣ naʋ se tɔm ndʋ meheyi-ŋ yɔ, tɩlakɩ yaa tɩɩlakɩ.»

24 Ðɩnɛ ɛlɛ Moyizi lɩɩ nɛ eheyi samaɣ tɔm ndʋ Yehowa yɔɔdaa yɔ. Nɛ ɛlɩzɩ abalaa 70 samaɣ taa ɛzʋtʋyaa hɛkʋ taa nɛ ekpeɣli-wɛ nɛ eyele nɛ pasɩŋ kizinziku cɔlɔ kpɛɛɛ.+ 25 Nɛ Yehowa tii mɩndʋ taa+ nɛ ɛyɔɔdɩnɩ-ɩ+ nɛ ɛlɩzɩ fezuu+ ŋgʋ kɩɩwɛ ɛ-yɔɔ yɔ kʋ-hɔɔlʋʋ nakʋyʋ nɛ ɛɖʋ-kʋ ɛzʋtʋyaa 70 mba pa-taa paa weyi lɛ ɛ-yɔɔ. Nɛ fezuu ñɩtaa nɛ kitii kɩcaɣ pɔ-yɔɔ lɛ, papaɣzɩ labʋ ɛzɩ nayaa yɔ,*+ ɛlɛ patɩtasɩ mbʋ labʋ pʋwayɩ.

26 Abalaa mba pa-taa 2 kaakazɩ maalika taa. Payaɣaɣ kʋɖʋm se Elɩdadɩ nɛ payaa lɛlʋ se Medadɩ. Nɛ fezuu tii pɔ-yɔɔ, mbʋ pʋyɔɔ yɔ paawɛ ɛyaa mba pama pa-hɩla yɔ pɛ-hɛkʋ taa, ɛlɛ pataalɩɩ nɛ powolo kizinziku cɔlɔ. Nɛ papaɣzɩ labʋ ɛzɩ nayaa yɔ maalika taa. 27 Nɛ evebu nɔɔyʋ se nɛ ewolo eheyi Moyizi se: «Elɩdadɩ nɛ Medadɩ pɛwɛɛ nɛ palakɩ ɛzɩ nayaa yɔ maalika taa!» 28 Ðɩnɛ ɛlɛ Nuuni pɩyalʋ Yozuwee,+ weyi ɛɛkɛ Moyizi lɩmɖʋyʋ kpaɣnɩ e-evebitu taa yɔ ɛyɔɔdɩ se: «Man-kɩbaɣlʋ Moyizi, kizini-wɛ!»+ 29 Ɛlɛ Moyizi kitini-i se: «Ŋlakɩ sʋsɩ mɔ-yɔɔ? Aayɩ, mɔnsɔɔlaa se Yehowa samaɣ taa mba kpeekpe ɩkɛ nayaa nɛ Yehowa ɖʋ e-fezuu pɔ-yɔɔ.» 30 Pʋwayɩ lɛ, Moyizi nɛ Izrayɛɛlɩ ɛzʋtʋyaa papɩsɩ maalika taa.

31 Pʋwayɩ lɛ, helim nabʋyʋ lɩɩnɩ Yehowa cɔlɔ tuda nɛ pɩkpaɣ pɩtɛɣsɩ* nɛ teŋgu yɔɔ nɛ pɩkɔna, nɛ sɩtɔlɩ nɛ sɩcɔɔ maalika kpɛɛɛ+ nɛ pɩtalɩ ɛzɩ evemiye nʋmɔʋ ɖɔm ɖaɣlɩkɩŋ mbʋ yɔ maalika hɔɔlʋʋ kʋɖʋmʋʋ yɔɔ nɛ ɛzɩ evemiye nʋmɔʋ ɖɔm ɖaɣlɩkɩŋ mbʋ yɔ kɩ-hɔɔlʋʋ lɛɛkʋ yɔɔ, sɩɩcɔ maalika nɛ sɩta, sɩɩka ɖama yɔɔ ɛzɩ nuŋgolonzi* 2 mbʋ yɔ tataa. 32 Nɛ samaɣ caɣnɩ kɛ-ɛsa nɛ kokuu pɩtɛɣsɩ evemiye nɖɩ ɖɩ-tɩŋa nɛ ɖoo tɩŋa nɛ evemiye nɖɩ ɖɩtɩŋ pʋwayɩ yɔ ɖɩ-tɩŋa. Nɔɔyʋ fɛyɩ se etikuu pɩtɛɣsɩ nɛ pɩtalɩ homɛrwaa* 10, nɛ paawɛɛ nɛ peleŋ-sɩ nɛ pɩcɔɔ maalika kpɛɛɛ. 33 Ɛlɛ nandʋ kaawɛ pe-kela taa nɛ patɩtɩɩtɔɔtɩ-tʋ lɛ, Yehowa kɔ pana siŋŋ nɛ samaɣ, nɛ Yehowa paɣzɩ asɛyʋʋ sɔsɔʋ nakʋyʋ kɔnʋʋ samaɣ yɔɔ nɛ ɛyaa sɩ pɩfɛyɩ yɔɔdʋʋ.+

34 Pʋyɔɔ paya lone nɖɩ se Kibɩrɔɔtɩ-Hataava,*+ mbʋ pʋyɔɔ yɔ peeɖe pepim mba paawɛ kujonjoŋ yɔ.*+ 35 Nɛ samaɣ kʋyɩnɩ Kibɩrɔɔtɩ-Hataava nɛ kowolo Hazerɔɔtɩ, nɛ kacaɣ Hazerɔɔtɩ.+

12 Halʋ Kuusi tʋ weyi Moyizi kaakpaɣaa yɔ ɛ-yɔɔ lɛ, Miriyam nɛ Aarɔɔnɩ papaɣzɩ tɔm kɩdɛkɛdɩtʋ yɔɔdʋʋ Moyizi yɔɔ, mbʋ pʋyɔɔ yɔ ɛ-halʋ kaakɛ Kuusi tʋ.+ 2 Pɔtɔŋaɣ se: «Moyizi ɖeke yɔɔ Yehowa tɩŋnaa nɛ ɛyɔɔdɩ yaa we? Ɛzɩ ɛtɩtɩŋnɩ ɖa ɖɔɖɔ ɖɔ-yɔɔ nɛ ɛyɔɔdɩ?»+ Ɛlɛ Yehowa kaawɛɛ nɛ ewelisiɣ.+ 3 Ŋgʋ tataa ɛyaa kpeekpe taa lɛ, Moyizi kɩlaɣnɩ ɛ-tɩ luzuu.*+

4 Peeɖe peeɖe lɛ, Yehowa heyi Moyizi nɛ Aarɔɔnɩ nɛ Miriyam se: «Mɩ-naadozo ɩlɩɩ nɛ iwolo kediɣzaɣ kizinziku cɔlɔ.» Ðɩnɛ ɛlɛ pa-naadozo palɩɩ. 5 Peeɖe Yehowa tibi mɩndʋ tilimiye taa+ nɛ ɛsɩŋ kizinziku nɔnɔɔ taa nɛ ɛyaa Aarɔɔnɩ nɛ Miriyam. Nɛ pa-naalɛ palɩɩ ɛsɩndaa. 6 Ðɩnɛ ɛlɛ ɛyɔɔdɩ se: «Mentendi-mɩ, ɩnɩɩ tɔm ndʋ meheyiɣ-mɩ yɔ. Ye Yehowa nayʋ nɔɔyʋ ɛɛwɛ mɩ-hɛkʋ taa kɔyɔ, maatɩŋnɩ natʋ natʋyʋ yɔɔ nɛ meyele nɛ ɛtɩlɩ-m,+ nɛ maatɩŋnɩ ɖoziye naɖɩyɛ yɔɔ nɛ mɔyɔɔdɩnɩ-ɩ.+ 7 Ɛlɛ pɩtɩkɛ mbʋ pɩwɛ ma-lɩmɖʋyʋ Moyizi hɔɔlʋʋ taa. Man-ɖɩɣa kpeekpe wɛ e-nesi taa.*+ 8 Ma nɛ ɩ ɖɩnaɣ ɖama ɛsɩndaa alɩwaatʋ ndʋ mɔyɔɔdʋʋnɩ-ɩ yɔ,*+ mɔyɔɔdʋʋnɩ-ɩ kaɣlaa, maatɩŋɩɣnɩ ɖimɖimɖanaa yɔɔ; ɛnaɣ ɛzɩma Yehowa wɛɛ yɔ. Ye mbʋ, ɛbɛ yɔɔ sɔɔndʋ tɩkpa-mɩ nɛ ɩyɔɔdɩ tɔm kɩdɛkɛdɩtʋ ma-lɩmɖʋyʋ Moyizi yɔɔ?»

9 Pʋyɔɔ Yehowa taa wɩnɩ-wɛ kpem, nɛ ɛɖɛɛ eyebi-wɛ. 10 Nɛ mɩndʋ kʋyɩ kizinziku yɔɔ, nɛ kpaagbaa mbʋ lɛ, canatʋ kpa Miriyam, tɩhʋlʋmɩ ɛzɩ ɖɔmbɛɛ yɔ.+ Aarɔɔnɩ kɛzɩ ɛ-tɩ nɛ ɛcɔnɩ Miriyam lɛ, ɛnaɣ se canatʋ kʋdɔŋ kpa-ɩ.+ 11 Peeɖe Aarɔɔnɩ heyi Moyizi kpaagbaa se: «Man-kɩbaɣlʋ, mentendi-ŋ! Mentendi-ŋ, taayele nɛ kɩwɛɛkɩm pʋnɛ pɩcaɣ ɖa-ñʋŋ taa! Mbʋ ɖɩlaba yɔ pɩkɛnɩ kɩmɛlɛndʋ lakasɩ. 12 Mentendi-ŋ, taayebi-i nɛ ɛwɛɛ ɛzɩ sɩɖʋ yɔ, weyi pɩtɔɔ e-tomnaɣ hɔɔlʋʋ pʋcɔ nɛ palʋlʋʋ-ɩ yɔ!» 13 Nɛ Moyizi paɣzɩ kubusi mabʋ nɛ Yehowa cɔlɔ kiŋ nɛ ɛyɔɔdʋʋ se: «Mentendi-ŋ! Hayɩ Ɛsɔ, mentendi-ŋ, la nɛ ɛ-yɔɔ cɛ!»+

14 Yehowa cosi Moyizi se: «Ye ɛ-caa ɛtɔ ɛ-ɛsɩndaa ndaatʋ, pɩɩɖʋʋ-ɩ fɛyɛ kɩyakɩŋ 7 yaa we? Yele nɛ pasɩɩ-ɩ kɩjaʋ ɖigbeɣliye* wayɩ kɩyakɩŋ 7,+ nɛ pʋwayɩ lɛ papɩzɩɣ nɛ papɩsɩnɩ-ɩ ɖigbeɣliye taa.» 15 Mbʋ yebina nɛ pasɩɩ Miriyam kɩjaʋ ɖigbeɣliye wayɩ kɩyakɩŋ 7,+ nɛ samaɣ tɩkpɛzɩ nɛ kɛɖɛɛ, pɩkɔɔ nɛ pɩsɩɩnɩ alɩwaatʋ ndʋ papɩsɩnɩ Miriyam yɔ. 16 Pʋwayɩ lɛ, samaɣ kʋyɩnɩ Hazerɔɔtɩ+ nɛ kesiɣ kizinzikiŋ Paraanɩ kañɩmbusuu taa.+

13 Yehowa yɔɔdɩnɩ Moyizi nɛ eheyi-i se: 2 «Tiyi abalaa nabɛyɛ nɛ powolo pɔcɔŋ Kanaŋ ɛjaɖɛ, nɖɩ mɛncɛlɩɣ Izrayɛɛlɩ mba yɔ. Pɩwɛɛ se ŋlɩzɩ abalʋ kʋɖʋm paa cejewiye nɖɩ lɛ ɖɩ-taa nɛ ŋtiyi-wɛ, pɩwɛɛ se pa-taa paa weyi lɛ, ɛkɛ ñʋʋdʋ+ nɔɔyʋ pɛ-hɛkʋ taa.»+

3 Mbʋ Moyizi kʋsɩ-wɛ nɛ Paraanɩ kañɩmbusuu taa+ nɛ etiyi-wɛ ɛzɩ Yehowa ɖʋʋ paɣtʋ yɔ. Abalaa mba pa-tɩŋa paakɛ Izrayɛɛlɩ mba ñʋndɩnaa. 4 Pa-hɩla yɔ: Rubɛɛnɩ cejewiye taa lɛ, Zakuurɩ pɩyalʋ Samuwaa; 5 Siimeyɔɔ cejewiye taa lɛ, Horii pɩyalʋ Safaatɩ; 6 Yuuda cejewiye taa lɛ, Yefunee pɩyalʋ Kalɛɛbɩ;+ 7 Isakaarɩ cejewiye taa lɛ, Yosɛɛfʋ pɩyalʋ Igaalɩ; 8 Efrayim cejewiye taa lɛ, Nuuni pɩyalʋ Osee;+ 9 Bɛnjamɛɛ cejewiye taa lɛ, Rafu pɩyalʋ Palitii; 10 Zebulɔɔnɩ cejewiye taa lɛ, Sodi pɩyalʋ Gaadɩyɛɛlɩ; 11 Yosɛɛfʋ cejewiye+ taa, Manaasee cejewiye+ hɔɔlʋʋ taa lɛ, Susi pɩyalʋ Gaadii; 12 Daanɩ cejewiye taa lɛ, Gemalii pɩyalʋ Amiyɛɛlɩ; 13 Asɛɛrɩ cejewiye taa lɛ, Mikayɛɛlɩ pɩyalʋ Seturi; 14 Naftalii cejewiye taa lɛ, Vofisii pɩyalʋ Naabi; 15 Gaadɩ cejewiye taa lɛ, Maki pɩyalʋ Gewuwɛɛlɩ. 16 Abalaa mba Moyizi tiyaa se powolo nɛ pɔcɔŋ ɛjaɖɛ yɔ, pa-hɩla lɛ. Nɛ Moyizi kʋ hɩɖɛ Nuuni pɩyalʋ Osee se Yozuwee.*+

17 Moyizi tiyaɣ-wɛ se powolo nɛ pɔcɔŋ Kanaŋ ɛjaɖɛ lɛ, eheyi-wɛ se: «Ɩɖɛɛ nɛ ɩkpa Negɛɛbʋ peeɖeyɔ, nɛ pʋwayɩ lɛ ɩkpa pʋŋ egeetiye taa.+ 18 Pɩwɛɛ se ɩcɔna nɛ ɩna se ɛjaɖɛ nɖɩ ɖɩwɛ ɛzɩma,+ nɛ ɩna ɖɔɖɔ se mba pɛwɛ ɛjaɖɛ nɖɩ ɖɩ-taa yɔ pɛwɛ ɖoŋ yaa pɛkɛ sɩkasɩ, pɔɖɔwa yaa patɩɖɔɔ, 19 nɛ ɩna ɖɔɖɔ se ɛjaɖɛ nɖɩ ɖɩwɛ ɖeu yaa ɖɩfɛyɩ ɖeu, tɛtʋ ndɩ ndɩ ndʋ tɩ-taa ɛyaa wɛ peeɖe yɔ, pɔcɔzɩ-tʋ kolonzi yaa kizinzikiŋ pesiɣaa. 20 Pɩtasɩ lɛ, pɩwɛɛ se ɩna se peeɖe tɛtʋ wɛ mʋzʋŋ* yaa tɩsɩba,*+ nɛ tɩŋ wɛ tɩ-yɔɔ yaa pɩfɛyɩ. Pɩwɛɛ se ɩwɛɛ abalɩtʋ+ nɛ ɩkpaɣ ɛjaɖɛ nɖɩ ɖɩ-taa tɩŋ pee naayɛ nɛ ɩkɔna.» Pɩɩtʋʋzɩnɩ kajalaɣ viiñi pee wena apɩwa yɔ a-alɩwaatʋ.+

21 Nɛ pɛɖɛɛ pakpa nɛ pɔcɔŋ ɛjaɖɛ kpaɣnɩ Ziini kañɩmbusuu+ nɛ piwolo Rehob,+ Lebo-Hamatɩ+ cɔlɔ.* 22 Pakpa Negɛɛbʋ lɛ, patalɩ Ebrɔŋ,+ peeɖe Ahimaanɩ, Sesaayɩ nɛ Talɩmaayɩ,+ mba pɛkɛ Anakɩ mba+ yɔ paawɛɛ. (Paama Ebrɔŋ tɛtʋ nɛ pɩla pɩnzɩ 7 pʋcɔ nɛ pamaɣ Ejipiti tɛtʋ Zowaanɩ.) 23 Patalɩ Ɛsɩkɔɔlɩ Fɛɛʋ*+ taa lɛ, pɛsɛtɩ viiñi piliŋa nakɛyɛ ŋga kɔ-yɔɔ wɛ viiñi pee tiku* kʋɖʋmʋʋ yɔ, nɛ pɩpɔzɩ se abalaa mba pa-taa 2 ɩkpaɣnɩ-kʋ ɖaʋ yɔɔ nɛ pɔhɔɔlɩ, kɩ nɛ girenaadɩ pee naayɛ nɛ fiigi pee naayɛ.+ 24 Tiku ŋgʋ Izrayɛɛlɩ mba sɛtɩ peeɖe yɔ kɩ-yɔɔ lɛ, payaa lone nɖɩ se Ɛsɩkɔɔlɩ* Fɛɛʋ.*+

25 Kɩyakɩŋ 40 tɛŋaɣ lɛ,+ pɛtɛm cɔŋʋʋ ɛjaɖɛ nɛ papɩsɩ nɛ pɔkɔɔ. 26 Mbʋ papɩsɩ Moyizi nɛ Aarɔɔnɩ nɛ Izrayɛɛlɩ samaɣ kpeekpe cɔlɔ Paraanɩ kañɩmbusuu taa Kadɛɛsɩ.+ Nɛ pɛkɛdɩ samaɣ kpeekpe mbʋ pɩlɩ pa-nʋmɔʋ ɖɔm taa yɔ nɛ pawɩlɩ-kɛ ɛjaɖɛ nɖɩ ɖɩ-taa tɩŋ pee. 27 Tɔm ndʋ pɛkɛdɩ Moyizi yɔ ndʋ yɔ: «Ðɩsʋ ɛjaɖɛ nɖɩ ɖɩ-taa ŋtiyi-ɖʋ yɔ ɖɩ-taa, nɛ toovenim taa lɛ, naalɩm nɛ tʋŋ num pikpeŋ peeɖe yem,+ nɛ ɖɩ-taa tɩŋ pee yɔ.+ 28 Paa mbʋ yɔ, ɛyaa mba pɛwɛ ɛjaɖɛ nɖɩ ɖɩ-taa yɔ pɛwɛ ɖoŋ, nɛ tɛtʋ ndɩ ndɩ ndʋ pɔcɔzɩ-tʋ kolonzi yɔ tɩpaɣlaa kpem. Ðɩna ɖɔɖɔ Anakɩ mba peeɖe.+ 29 Amalɛɛkɩ mba+ wɛ Negɛɛbʋ+ egeetiye taa, nɛ Hɛɛtɩ mba, Yebuusi mba+ nɛ Amoori mba,+ paba ñɛwɛɛ pʋŋ egeetiye taa, piyele nɛ Kanaŋ mba+ ñɛwɛɛ teŋgu nɔɔ+ nɛ Yɔɔrdaŋ pɔɔ nɔɔ.»

30 Peeɖe Kalɛɛbɩ ñaɣ pana se ɛhɛzɩ samaɣ ŋga kaasɩŋ Moyizi ɛsɩndaa yɔ ka-laŋɩyɛ. Ɛyɔɔdaa se: «Ðɩɖɛɛ nɛ ɖɩkpa kpaagbaa, paa pɩɩla ɛzɩma yɔ ɖɩkaɣ ɛjaɖɛ nɖɩ mʋʋ, mbʋ pʋyɔɔ yɔ toovenim taa lɛ, ɖɩpɩzɩɣ nɛ ɖɩwabɩ-ɖɩ.»+ 31 Ɛlɛ abalaa mba ɛ nɛ wɛ paakpawa yɔ, pɔyɔɔdɩ se: «Ðɩɩpɩzɩɣ nɛ ɖɩkpa samaɣ ŋga ka-wayɩ, mbʋ pʋyɔɔ yɔ kakɩlɩ-ɖʋ ɖoŋ.»+ 32 Nɛ pɛwɛɛ nɛ pɛkɛdɩɣ ɛjaɖɛ nɖɩ pakpawa nɛ pɔcɔŋ yɔ, ɖɩ-yɔɔ tɔm kɩdɛkɛdɩtʋ+ Izrayɛɛlɩ mba nɛ pɔtɔŋ se: «Ɛjaɖɛ nɖɩ ɖɩ-taa ɖɩcɔwa nɛ ɖɩcɔŋ yɔ, ɖɩkɛ ɛjaɖɛ nɖɩ ɖɩpʋʋtʋʋ ɖɩ-taa mba yɔ, nɛ samaɣ ŋga ka-tɩŋa ɖɩna peeɖe yɔ, ka-taa abalaa kpeetaa pɩfɛyɩ yɔɔdʋʋ.+ 33 Ðɩna peeɖe Nefilimwaa, Anakɩ pɩyalaa,+ mba palɩnɩ Nefilimwaa taa yɔ;* nɛ ɖɩɩwɛ ɛzɩ nakaŋ yɔ pɛ-ɛsɩndaa, nɛ mbʋ ɖɔɖɔ panaɣaɣ-ɖʋ.»

14 Nɛ samaɣ kpeekpe tʋlɩ nɔɔ, nɛ kɛwɛɛ kubusi mabʋ yɔɔ nɛ kɛwɛɛ wiu yɔɔ ɖoo ana a-tɩŋa.+ 2 Izrayɛɛlɩ mba kpeekpe paɣzɩ midinuu Moyizi nɛ Aarɔɔnɩ,+ nɛ samaɣ kpeekpe yɔɔdʋʋ pɔ-yɔɔ tɔm kɩdɛkɛdɩtʋ, kɔyɔɔdaɣ se: «Ye ɖɩɩsɩbɩ Ejipiti ɛjaɖɛ taa, yaa ye ɖɩɩsɩbɩ kañɩmbusuu kʋnɛ kɩ-taa, pɩtaakɩlɩ ɖeu na? 3 Ɛbɛ yɔɔ Yehowa wokini-ɖʋ ɛjaɖɛ nɖɩ ɖɩ-taa se pakʋ-ɖʋ nɛ laɣɖɛ?+ Pakaɣ kpaʋ ɖa-halaa nɛ ɖe-piya yomiye.+ Pɩɩkɩlɩɣ weewee se ɖɩpɩsɩ Ejipiti ɛjaɖɛ taa?»+ 4 Halɩ peheyaɣ ɖama se: «Ðɩlɩzɩ nɔɔyʋ nɛ ɛkɛ ɖe-ɖiyiyu nɛ ɖɩpɩsɩ Ejipiti ɛjaɖɛ taa!»+

5 Ðɩnɛ ɛlɛ Moyizi nɛ Aarɔɔnɩ poluŋ nɛ papa pɛ-ɛsa nɛ tɛtʋ Izrayɛɛlɩ samaɣ ŋga payɩ kaakpeɣlaa yɔ kɛ-ɛsɩndaa. 6 Nuuni pɩyalʋ Yozuwee+ nɛ Yefunee pɩyalʋ Kalɛɛbɩ,+ mba paawɛ mba powoba nɛ pɔcɔŋ ɛjaɖɛ yɔ pa-taa yɔ, pacɩyɩ po-tokonaa, 7 nɛ peheyi Izrayɛɛlɩ samaɣ kpeekpe se: «Ɛjaɖɛ nɖɩ ɖɩ-taa ɖiwoba nɛ ɖɩcɔɔ nɛ ɖɩcɔŋ-ɖɩ yɔ, ɖɩkɛ ɛjaɖɛ kɩbanɖɛ siŋŋ, ɖɩwɛ ɖeu pɩfɛyɩ yɔɔdʋʋ.+ 8 Ye ɖɔ-tɔm ɛkɛdɩnɩ Yehowa yɔ, paa pɩɩlabɩ ɛzɩma yɔ ɛkaɣ-ɖʋ wonuu ɛjaɖɛ nɖɩ ɖɩ-taa nɛ ɛcɛlɩ-ɖʋ ɖɩ, ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+ 9 Ɛlɛ pɩfɛyɩ se ɩkaɖɩnɩ Yehowa, pɩfɛyɩ ɖɔɖɔ se ise sɔɔndʋ samaɣ ŋga kɛwɛ ɛjaɖɛ nɖɩ ɖɩ-taa yɔ,+ mbʋ pʋyɔɔ yɔ ɖɩkaɣ-wɛ cɩyʋʋ.* Patɩtasɩ wɛnʋʋ nɔɔyʋ se ɛkandɩyɩ pɔ-yɔɔ, nɛ Yehowa wɛ ɖɔ-cɔlɔ.+ Itaase-wɛ sɔɔndʋ.»

10 Paa mbʋ yɔ, samaɣ kpeekpe yɔɔdaɣ se kayakɩ-wɛ pɛɛ.+ Peeɖe Yehowa samtʋ lɩ kediɣzaɣ kizinziku yɔɔ, nɛ Izrayɛɛlɩ samaɣ kpeekpe na-tʋ.+

11 Ðɩnɛ ɛlɛ Yehowa heyi Moyizi se: «Samaɣ kanɛ kɛwɛɣ nɛ kalakɩ-m kaañamtʋ lakasɩ nɛ pɩkɔɔ pɩsɩɩnɩ ɖooye?+ Yʋsasɩ nzɩ payɩ malabɩ kɛ-hɛkʋ taa yɔ, kekiziɣ se kaatisiɣ mɔ-yɔɔ nɛ pɩkɔɔ nɛ pɩsɩɩnɩ ɖooye?+ 12 Yele nɛ mɔnkɔnɩ kɩzɩkʋ kɔ-yɔɔ nɛ manɖɩzɩnɩ-kɛ, nɛ mala nɛ ŋpɩsɩ samaɣ ŋga kakɩlɩ-kɛ ɖɔʋ nɛ kakɩlɩ-kɛ ɖoŋ yɔ.»+

13 Ɛlɛ Moyizi kitini Yehowa se: «Ye ŋlabɩ mbʋ yɔ, Ejipiti ñɩma mba pɛ-hɛkʋ taa ŋlɩzɩ samaɣ kanɛ nɛ ño-ɖoŋ yɔ, pakaɣ-tʋ nɩʋ,+ 14 nɛ pakaɣ-tʋ kɛdʋʋ ɛjaɖɛ ɖɩnɛ ɖɩ-taa mba. Paba ɖɔɖɔ panɩwa se ña, Yehowa, ŋwɛ samaɣ kanɛ kɛ-hɛkʋ taa+ nɛ ŋlɩzɩ ña-tɩ nɛ ŋwɩlɩ-kɛ nɛ kana-ŋ kaɣlaa.+ Ñɛkɛnɩ Yehowa, nɛ ña-mɩndʋ wɛ pɔ-yɔɔ; wɩsɩ taa lɛ, ŋɖɛɣ-wɛ nɔɔ mɩndʋ tilimiye taa, nɛ ɖoo taa lɛ, miŋ tilimiye taa.+ 15 Ye ŋkʋ samaɣ kanɛ nɔɔ kʋɖʋmaɣ yɔ,* ajɛɛ wena anɩ ña-hɩɖɛ sɛʋ taŋ yɔ, akaɣ yɔɔdʋʋ se: 16 “Yehowa taapɩzɩɣ se ewoni samaɣ kanɛ ɛjaɖɛ nɖɩ eeɖuwaa se ɛcɛlɩɣ-kɛ yɔ ɖɩ-taa, pʋyɔɔ ɛkʋ-kɛ kañɩmbusuu taa.”+ 17 Lɛɛlɛɛyɔ lɛ, Yehowa mentendi-ŋ, yele nɛ ño-ɖoŋ kɛ sɔsɔŋ, ɛzɩ ŋŋlabʋ tamaɣ nɛ ŋyɔɔdɩ yɔ: 18 “Yehowa kɛ weyi ɛɛkɔʋ pana lɛɛ lɛɛ nɛ weyi ɛ-sɔɔlɩm siɣsiɣ ñɩmbʋ* ɖɔ pɩdɩɩfɛyɩ yɔ,+ ekpeɣu kɩwɛɛkɩm nɛ paɣtʋ yɔɔ maʋ, ɛlɛ ɛɛkaɣ yebu weyi ɛɖɔ wɛɛ yɔ ɛ-nɩŋgbaŋʋʋ hɔm kaaʋ, nɛ ɛkɔŋnɩ caanaa kɩwɛɛkɩm nɩŋgbaŋʋʋ hɔm pɩyalaa yɔɔ, kpaɖʋʋ 3 ñɩŋgʋ yɔɔ nɛ kpaɖʋʋ 4 ñɩŋgʋ yɔɔ.”+ 19 Mentendi-ŋ, kpeɣ samaɣ kanɛ ka-kɩwɛɛkɩm nɛ pɩla nɔɔ kʋɖʋmaɣ nɛ ñɔ-sɔɔlɩm siɣsiɣ ñɩmbʋ sɔsɔm, ɛzɩ ŋŋkpeɣu samaɣ kanɛ kpaɣnɩ ɖooo Ejipiti ɛjaɖɛ taa nɛ pɩkɔɔ nɛ pɩtalɩ lɛɛlɛɛyɔ yɔ.»+

20 Nɛ Yehowa yɔɔdɩ se: «Menkpeɣ-kɛ ɛzɩ ŋyɔɔdʋʋ yɔ.+ 21 Ɛlɛ monɖukini me-wezuu,* Yehowa samtʋ kaɣ suu tɛtʋ kpeekpe yɔɔ.+ 22 Paa mbʋ yɔ, abalaa mba pana man-samtʋ nɛ yʋsasɩ+ nzɩ malabɩ Ejipiti ɛjaɖɛ taa nɛ kañɩmbusuu taa, ɛlɛ pɛwɛ-m takʋʋ yɔɔ+ tam 10 pʋnɛ yɔ nɛ patiwelisi mɔ-nɔɔ taa tɔm+ yɔ, pa-taa nɔɔyʋ 23 ɛɛkaɣ naʋ ɛjaɖɛ nɖɩ maaɖuwaa se mɛncɛlɩɣ pɔ-cɔzɔnaa yɔ kpa. Ɛɛɛ, mba paañaŋɩ-m yɔ pa-taa nɔɔyʋ ɛɛkaɣ-ɖɩ naʋ.+ 24 Ɛlɛ ma-lɩmɖʋyʋ Kalɛɛbɩ+ fezuu ñɛwɛ ndɩ nɛ ɛtɩŋɩɣ-m nɛ ɛ-laŋɩyɛ pilim; pʋyɔɔ lɛ, paa pɩɩlabɩ ɛzɩma yɔ, mankaɣ-ɩ wonuu ɛjaɖɛ nɖɩ ɖɩ-taa eewoba yɔ, nɛ ɛ-lʋlʋʋ taa mba kaɣ-ɖɩ mʋʋ nɛ ɖɩpɩsɩ pa-ñɩm.+ 25 Amalɛɛkɩ mba nɛ Kanaŋ mba+ pɛwɛ fɛɛʋ* taa; pʋyɔɔ lɛ cee lɛ, pɩwɛɛ se ɩpɩsɩ nɛ ɩkpaɣ Teŋgu Kɩsɛɛmʋʋ nʋmɔʋ nɛ ɩɖɛɛnɩ kañɩmbusuu taa.»+

26 Pʋwayɩ lɛ, Yehowa heyi Moyizi nɛ Aarɔɔnɩ se: 27 «Samaɣ kɩdɛkɛdaɣ kanɛ kɛwɛɣ nɛ kemidiɣni-m nɛ pɩkɔɔ nɛ pɩsɩɩnɩ ɖooye?+ Manɩ tɔm ndʋ Izrayɛɛlɩ mba midiɣ nɛ pɔyɔɔdʋʋ mɔ-yɔɔ yɔ.+ 28 Heyi-wɛ se: “Monɖukini me-wezuu, mankaɣ-mɩ labʋ ɖeyi ɖeyi ɛzɩ ɩyɔɔdʋʋ nɛ manɩɩ yɔ,+ Yehowa yɔɔdʋʋna. 29 Kañɩmbusuu kʋnɛ yɔ kɩ-taa ɩkaɣ sɩbʋ,*+ ɛɛɛ, mɩ mba payɩ ɩwɛnɩ kpaɣnɩ pɩnzɩ 20 nɛ pɩɖɛɛ nɛ paama mɩ-hɩla yɔ, mɩ mba payɩ imidini-m yɔ.+ 30 Mɩ-taa nɔɔyʋ ɛɛkaɣ sʋʋ ɛjaɖɛ nɖɩ monɖuwaa* se mɛncɛlɩɣ-mɩ nɛ ɩcaɣ ɖɩ-taa yɔ ɖɩ-taa,+ ye pɩtɩkɛ Yefunee pɩyalʋ Kalɛɛbɩ nɛ Nuuni pɩyalʋ Yozuwee yɔ.+

31 «“Nɛ mi-piya nzɩ ɩtɔma se pakaɣ-sɩ kpaʋ yomiye yɔ,+ nzɩ mankaɣ wonuu ɛjaɖɛ nɖɩ ikizaa yɔ+ ɖɩ-taa nɛ sɩtɩlɩ-ɖɩ. 32 Ɛlɛ mɩ-maɣmaɣ lɛ, ɩkaɣ sɩbʋ kañɩmbusuu taa cɩnɛ. 33 Mɩ-pɩyalaa kaɣ pɩsʋʋ ninɖiɣyaa kañɩmbusuu taa pɩnzɩ 40,+ nɛ mankaɣ-wɛ pɔzʋʋ akɔnta mi-siɣsiɣ kɩɩwɛʋ* lakasɩ yɔɔ nɛ pɩkɔɔ nɛ pɩsɩɩnɩ alɩwaatʋ ndʋ mɩ-taa kɛdɛzaɣ tʋ sɩbɩ kañɩmbusuu taa yɔ.+ 34 Kɩyakɩŋ 40 weyi ɩkpaɣaa nɛ ɩcɔŋnɩ ɛjaɖɛ yɔ+ ɩ-nɔɔ taa mankaɣ-mɩ pɔzʋʋ akɔnta mɩ-kɩwɛɛkɩm yɔɔ pɩnzɩ 40,+ kɩyakʋ kʋɖʋmʋʋ kɛɣ pɩnaɣ kʋɖʋmaɣ, kɩyakʋ kʋɖʋmʋʋ kɛ pɩnaɣ kʋɖʋmaɣ, ɖɩnɛ ɛlɛ ɩkaɣ naʋ mbʋ man-kaɖɩnʋʋ kɔŋna yɔ.*

35 «“Ma Yehowa, mɔyɔɔdɩna. Mbʋ mankaɣ labʋ samaɣ kɩdɛkɛdaɣ kanɛ ke-kpeekpe yɔ, ŋga kekpeɣlaa nɛ kakaɖɩnɩ-m yɔ mbʋ yɔ: Kañɩmbusuu taa cɩnɛ kakaɣ tɛŋɩlʋʋ, cɩnɛ kakaɣ sɩbʋ.+ 36 Abalaa mba Moyizi tiyaa nɛ powolo nɛ pɔcɔŋ ɛjaɖɛ nɛ papɩsɩ nɛ pɔkɔɔ nɛ pɔyɔɔdɩ tɔm kɩdɛkɛdɩtʋ ɛjaɖɛ nɖɩ ɖɩ-yɔɔ+ nɛ peyele nɛ samaɣ kpeekpe midini-i yɔ, 37 ɛɛɛ, abalaa mba papɩsaa nɛ pɔkɔɔ nɛ pɔyɔɔdɩ tɔm kɩdɛkɛdɩtʋ ɛjaɖɛ nɖɩ ɖɩ-yɔɔ yɔ, pakaɣ pa-nɩŋgbaŋʋʋ hɔm nɛ pasɩ Yehowa ɛsɩndaa.+ 38 Ɛlɛ paa pɩɩlabɩ ɛzɩma yɔ, Nuuni pɩyalʋ Yozuwee nɛ Yefunee pɩyalʋ Kalɛɛbɩ, mba paawɛ mba paawoba nɛ pɔcɔŋ ɛjaɖɛ yɔ pa-taa yɔ, paba lɛ paakaɣ sɩbʋ.”»+

39 Moyizi heyi tɔm ndʋ Izrayɛɛlɩ mba tɩŋa lɛ, samaɣ caɣ kʋñɔwiye sɔsɔɖɛ. 40 Pʋwayɩ lɛ, pakʋyɩ tanaŋ tɛɛ pala nɛ pañɩnɩɣ se pakpa pʋʋ ñʋʋ taa, pɔtɔŋaɣ se: «Lɛɛlɛɛyɔ lɛ, ɖɩñɔɔzɩ ɖa-tɩ se ɖɩkpaɣ lone nɖɩ ɖɩ-tɔm Yehowa yɔɔdaa yɔ ɖɩ-taa, mbʋ pʋyɔɔ yɔ ɖɩlabɩ kɩwɛɛkɩm.»+ 41 Ɛlɛ Moyizi heyi-wɛ se: «Ɛbɛ yɔɔ ɩmaɣnɩ Yehowa paɣtʋ yɔɔ? Pɩɩkaɣ-mɩ ɖɔmnʋʋ ɖeu. 42 Ɩtaakpa, mbʋ pʋyɔɔ yɔ Yehowa fɛyɩ mɩ-cɔlɔ; mi-koyindinaa kaɣ-mɩ wabʋ.+ 43 Mbʋ pʋyɔɔ yɔ Amalɛɛkɩ mba nɛ Kanaŋ mba pɛwɛ peeɖe nɛ pakaɣ-mɩ pam nɛ ɛsa,+ nɛ pakaɣ-mɩ kʋʋ nɛ laɣɖɛ. Yehowa ɛɛkaɣ mɩ-cɔlɔ wɛʋ, mbʋ pʋyɔɔ yɔ ɩha siɣye Yehowa.»+

44 Paa mbʋ yɔ, palabɩ ñʋʋ taa ɖoŋ nɛ pakʋyɩ nɛ pɛɖɛɛnɩ pʋʋ ñʋʋ taa kiŋ,+ ɛlɛ Yehowa ɛgbɛyɛ ɖʋʋ aɖakaɣ nɛ Moyizi paawɛ ɖigbeɣliye* hɛkʋ taa nɛ patituu.+ 45 Ðɩnɛ ɛlɛ Amalɛɛkɩ mba nɛ Kanaŋ ñɩma mba paawɛ pʋʋ ŋgʋ kɩ-taa yɔ, petii nɛ pawabɩ-wɛ, nɛ pamɩzɩ-wɛ piwolo nɛ pɩtalɩ ɖooo Hɔrma.+

15 Yehowa tasɩ yɔɔdɩnʋʋ Moyizi nɛ eheyi-i se: 2 «Yɔɔdɩnɩ Izrayɛɛlɩ mba nɛ ŋheyi-wɛ se: “Ɛjaɖɛ nɖɩ mɛncɛlɩɣ-mɩ se ɩcaɣ ɖɩ-taa yɔ,+ ɩkɔŋ nɛ ɩtalɩ ɖɩ-taa 3 nɛ ɩtɩŋnɩ miŋ yɔɔ nɛ ɩlaa nɔ yaa heu yaa pʋnʋ Yehowa lɛ, paa pɩtɩɩkɛ kɩlaʋ kɩñaɣzʋʋ+ yaa kɩlaʋ nakʋyʋ se ɩɖɔmnɩ ŋgee ɖuutu natʋyʋ yɔɔ, yaa sɔɔlɩm haɖɛ+ yaa mɩ-kazandʋ alɩwaatʋ taa+ kɩlaʋ nakʋyʋ ɩlawa se pɩkɛnɩ sɔzɩŋ weyi ɛkɛdɩɣnɩ Yehowa yɔ,*+ 4 weyi ɛkɔŋnɩ ɛ-haɖɛ yɔ, pɩwɛɛ ɖɔɖɔ se ɛkɔnɩ tɔɔnaɣ pee kɩlaʋ Yehowa, kɩkɛɣnɩ mʋlʋm mbʋ pɩkpɩzɩ camɩyɛ yɔ+ efa hɔɔlʋʋ 10 ñɩŋgʋ,* mbʋ pesidi-pʋ nɛ num hiini* hɔɔlʋʋ 4 ñɩŋgʋ yɔ. 5 Pɩwɛɛ ɖɔɖɔ se ŋha vɛɛ hiini hɔɔlʋʋ 4 ñɩŋgʋ nɛ pɩkɛnɩ kilizaɣ kɩlaʋ kɩñaɣzʋʋ+ yɔɔ, pɩwɛɛ se ŋha-kʋ ɖɔɖɔ paa heɣa abalɩñɩŋga ŋga lɛ, ka-kɩlaʋ yɔɔ. 6 Yaa ye ɛyaʋ ŋlaɣ yɔ, pɩwɛɛ se ŋkɔnɩ mʋlʋm mbʋ pɩkpɩzɩ camɩyɛ yɔ efa hɔɔlɩŋ 2 hɔɔlɩŋ 10 taa, mbʋ pesidi-pʋ nɛ num hiini hɔɔlʋʋ 3 ñɩŋgʋ yɔ nɛ pɩkɛnɩ tɔɔnaɣ pee kɩlaʋ. 7 Nɛ pɩwɛɛ se ŋkɔnɩ vɛɛ hiini hɔɔlʋʋ 3 ñɩŋgʋ nɛ pɩkɛnɩ kilizaɣ, nɛ pɩkɛnɩ sɔzɩŋ weyi ɛkɛdɩɣnɩ Yehowa yɔ.*

8 «“Ɛlɛ ye ŋlaɣ nɔ abalɩñɩnʋ se pɩkɛnɩ kɩlaʋ kɩñaɣzʋʋ+ yaa kɩlaʋ ŋgʋ ŋlaɣ se ŋɖɔmnɩ ŋgee ɖuutu+ natʋyʋ yɔɔ yaa laŋhɛzɩyɛ kɩlaŋ Yehowa yɔ,+ 9 ŋŋkɔŋnɩ nɔ abalɩñɩnʋ lɛ, pɩwɛɛ ɖɔɖɔ se ŋkpɛndɩnɩ mʋlʋm mbʋ pɩkpɩzɩ camɩyɛ yɔ efa hɔɔlɩŋ 3 hɔɔlɩŋ 10 taa, mbʋ pesidi-pʋ nɛ num hiini hɔɔlʋʋ yɔ nɛ pɩkɛnɩ tɔɔnaɣ pee kɩlaʋ.+ 10 Pɩwɛɛ ɖɔɖɔ se ŋkɔnɩ vɛɛ hiini hɔɔlʋʋ nɛ pɩkɛnɩ kilizaɣ,+ pɩkɛnɩ kɩlaʋ ŋgʋ pañaɣzɩ miŋ yɔ, pɩkɛnɩ sɔzɩŋ weyi ɛkɛdɩɣnɩ Yehowa yɔ.* 11 Mbʋ pɩwɛɛ se pala paa nɔ abalɩñɩnʋ weyi, yaa paa ɛyaʋ ŋgʋ, yaa paa heɣa abalɩñɩŋga ŋga yaa paa pʋnʋ weyi lɛ ɛ-yɔɔ. 12 Paa kpɩna ɛzɩma ɩlaɣ yɔ, mbʋ pɩwɛɛ se ɩla a-tɩŋa a-yɔɔ kʋɖʋm kʋɖʋm, ɩlakɩ mbʋ paa kpɩnɛ nɖɩ lɛ ɖɩ-ñʋʋ taa. 13 Mbʋ pɩwɛɛ se paa Izrayɛɛlɩ pɩɣa kʋlʋlaɣ ŋga lɛ, kalaa kɩlaʋ ŋgʋ pañaɣzɩɣ-kʋ miŋ yɔ, nɛ pɩkɛnɩ sɔzɩŋ weyi ɛkɛdɩɣnɩ Yehowa yɔ.*

14 «“Ye ɛgɔm nɔɔyʋ weyi ɛwɛ mɩ-tɛ yɔ, yaa weyi ɛwɛ mɩ-hɛkʋ taa pɩlakɩ kpaɖɩŋ sakɩyɛ yɔ, ɛsɔɔlaa ɖɔɖɔ se ɛlaa kɩlaʋ ŋgʋ pañaɣzɩɣ-kʋ miŋ yɔ nɛ pɩkɛnɩ sɔzɩŋ weyi ɛkɛdɩɣnɩ Yehowa yɔ,* pɩwɛɛ se ɛla ɖeyi ɖeyi ɛzɩ ɩlakʋʋ yɔ.+ 15 Mɩ mba ɩkɛ Izrayɛɛlɩ mba yɔ,* mɩ nɛ ɛgɔm weyi ɛwɛ mɩ-hɛkʋ taa yɔ, ɩkaɣ wɛnʋʋ paɣtʋ kʋɖʋmtʋ. Tɩkaɣ kɛʋ tamtam paɣtʋ mɩ-kpaɖɩŋ kpeekpe taa. Yehowa ɛsɩndaa lɛ, tʋkaɣ fɛyɩ mɩ nɛ ɛgɔm mɩ-hɛkʋ taa.+ 16 Paɣtʋ kʋɖʋmtʋ nɛ tɔm hʋʋ paɣtʋ kʋɖʋmtʋ yɔɔ pɩwɛɛ se mɩ nɛ ɛgɔm weyi ɛwɛ mɩ-hɛkʋ taa yɔ ɩɖɔ.”»

17 Yehowa tasɩ heyuu Moyizi se: 18 «Yɔɔdɩnɩ Izrayɛɛlɩ mba nɛ ŋheyi-wɛ se: “Alɩwaatʋ ndʋ ɩsʋʋ ɛjaɖɛ nɖɩ ɖɩ-taa mɛwɛɛ nɛ mowokini-mɩ yɔ 19 nɛ ɩtɔɔ ɛjaɖɛ nɖɩ ɖɩ-taa tɔɔnaɣ*+ nakɛyɛ lɛ, pɩwɛɛ se ɩla Yehowa haɖɛ naɖɩyɛ. 20 Pɩwɛɛ se ɩha mɩ-kajalaɣ tɔɔnaɣ pee+ mʋlʋm* kpɔnɔnaa mba palabɩ-wɛ kulukulu kokoo tɩyɛ yɔ. Pɩwɛɛ se ŋha-pʋ ɛzɩ pahaɣʋ tɔɔnaɣ ŋga kalɩnɩ tɔɔnaɣ ɖɩmaɖɛ yɔ. 21 Pɩwɛɛ se ɩha Yehowa mɩ-kajalaɣ tɔɔnaɣ pee mʋlʋm* taa nabʋyʋ mɩ-kpaɖɩŋ kpeekpe taa.

22 «“Nɛ ye piyiɣdi-mɩ nɛ ɩtɩpɩzɩ nɛ ɩɖɔ paɣtʋ ndʋ payɩ Yehowa ɖʋ Moyizi yɔ tɩ-yɔɔ yɔ, 23 paɣtʋ ndʋ payɩ Yehowa tɩŋnɩ Moyizi yɔɔ nɛ ɛɖʋ-mɩ yɔ, kpaɣnɩ kɩyakʋ ŋgʋ Yehowa ɖʋ-tʋ yɔ nɛ pɩkpaɣ nɛ pɩɖɛɛ mɩ-kpaɖɩŋ weyi ɩwɛnɩ ɛsɩndaa yɔ ɩ-taa yɔ, 24 nɛ ye piyiɣdi-mɩ kiyiɣduu nɛ pɩla mbʋ nɛ samaɣ tɩtɩlɩ yɔ, pɩwɛɛ se samaɣ kpeekpe ɛlaa nɔ* abalɩñɩnʋ kɩlaʋ kɩñaɣzʋʋ nɛ pɩkɛnɩ sɔzɩŋ weyi ɛkɛdɩɣnɩ Yehowa yɔ,* pɩkpɛndɩnɩ kɩ-tɔɔnaɣ pee kɩlaʋ nɛ ki-kilizaɣ ɛzɩ paɣtʋ pɔzʋʋ yɔ,+ nɛ pʋnʋ* nɛ pɩkɛnɩ kɩwɛɛkɩm yɔɔ kɩlaʋ.+ 25 Cɔjɔ kaɣ labʋ kɩwɛɛkɩm yɔɔ huuzuu sɔnzɩ Izrayɛɛlɩ samaɣ kpeekpe, nɛ pakaɣ-kɛ kpeɣu,+ mbʋ pʋyɔɔ yɔ piiyiɣdi-kɛ kiyiɣduu; pɩtasɩ lɛ, kɔkɔnɩ ka-haɖɛ se palaa kɩlaʋ ŋgʋ pañaɣzɩɣ-kʋ miŋ yɔ Yehowa nɛ ka-kɩwɛɛkɩm yɔɔ kɩlaʋ Yehowa ɛsɩndaa mbʋ pʋyɔɔ yɔ piyiɣdi-kɛ. 26 Pakaɣ kpeɣu Izrayɛɛlɩ samaɣ kpeekpe nɛ ɛgɔm weyi ɛwɛ kɛ-hɛkʋ taa yɔ, mbʋ pʋyɔɔ yɔ piiyiɣdi samaɣ kpeekpe kiyiɣduu.

27 «“Ye piyiɣdi ɛyʋ* nɔɔyʋ nɛ ɛla kɩwɛɛkɩm yɔ, ɖɩnɛ ɛlɛ pɩwɛɛ se ɛkɔnɩ pʋnʋ halɩñɩnʋ weyi ɛtɩcɛzɩ pɩnaɣ yɔ nɛ pɩkɛnɩ kɩwɛɛkɩm yɔɔ kɩlaʋ.+ 28 Nɛ cɔjɔ kaɣ labʋ kɩwɛɛkɩm yɔɔ huuzuu sɔnzɩ ɛyʋ* weyi piyiɣdi-i nɛ ɛla kɩwɛɛkɩm Yehowa ɛsɩndaa ɛlɛ ɛtaaɖʋna yɔ, se pɩsa nɛ pohuuzi ɛ-kɩwɛɛkɩm yɔɔ, nɛ pakaɣ ɛyʋ ɛnʋ kpeɣu.+ 29 Ye nɔɔyʋ ɛlabɩ nabʋyʋ nɛ ɛtɩɖʋna yɔ, paa pɩtɩɩkɛ Izrayɛɛlɩ lʋlʋʋ taa tʋ yaa ɛgɔm weyi ɛwɛ mɩ-hɛkʋ taa yɔ, paɣtʋ kʋɖʋmtʋ yɔɔ pɩwɛɛ se ɩɖɔ.+

30 «“Ɛlɛ ɛyʋ* weyi ɛnaɣ faɖaɖa nɛ ɛla nabʋyʋ yɔ,+ paa ɛtɩɩkɛ ɛjaɖɛ taa pɩɣa maɣmaɣ yaa ɛgɔm yɔ, ɛtʋ Yehowa nɛ pɩwɛɛ se palɩzɩ-ɩ* ɛ-samaɣ taa. 31 Ɛyʋ* ɛnʋ enim Yehowa tɔm nɛ ɛmaanɩ ɛ-paɣtʋ yɔɔ; pʋyɔɔ lɛ, paa pɩɩkpawa nɛ pitii yɔ pɩwɛɛ se pakʋ-ɩ.+ Ɛ-kɩwɛɛkɩm cakɩ ɛ-maɣmaɣ ɛ-ñʋʋ taa.”»+

32 Izrayɛɛlɩ mba kaawɛ kañɩmbusuu taa lɛ, pana abalʋ nɔɔyʋ wɛɛ nɛ ɛcaɣ ɖasɩ Sabaatɩ wiye.+ 33 Mba pana-ɩ ɛwɛɛ nɛ ɛcaɣ ɖasɩ yɔ, powoni-i Moyizi nɛ Aarɔɔnɩ nɛ samaɣ kpeekpe cɔlɔ. 34 Pakpa-ɩ nɛ pasɩɩ,+ mbʋ pʋyɔɔ yɔ pataatɩlɩtɩ mbʋ ɖeyi ɖeyi pɩɩwɛɛ se palabɩ-ɩ yɔ.

35 Nɛ Yehowa heyi Moyizi se: «Paa pɩɩkpawa nɛ pitii yɔ, pɩwɛɛ se pakʋ abalʋ ɛnʋ.+ Pɩwɛɛ se samaɣ kpeekpe ɛyaɣ-ɩ pɛɛ ɖigbeɣliye* wayɩ.»+ 36 Ðɩnɛ ɛlɛ samaɣ kpeekpe lɩnɩ-ɩ ɖigbeɣliye wayɩ nɛ kayaɣ-ɩ pɛɛ nɛ ɛsɩ, ɛzɩ Yehowa ɖʋʋ paɣtʋ Moyizi yɔ.

37 Yehowa tasɩ heyuu Moyizi se: 38 «Yɔɔdɩnɩ Izrayɛɛlɩ mba nɛ ŋheyi-wɛ se pa-kpaɖɩŋ kpeekpe taa lɛ, pɩwɛɛ se palʋʋ pa-tɩ tokonaa nɛ pɩsatʋ wɛɛ pɛ-tɛɛ yɔm yɔm, nɛ pɩwɛɛ se paɖʋ nimiye nɖɩ ɖɩwɛnɩ tɔlɩm pʋlɔɔ yɔ toko tɛɛ pɩsatʋ ndʋ tɩ-ñʋʋ yɔɔ.+ 39 “Pɩwɛɛ se pɩsatʋ ɩwɛɛ pɛ-tɛɛ yɔm yɔm mbʋ, ɖɩnɛ ɛlɛ ɩnaɣ-tʋ nɛ ɩtɔzʋʋ Yehowa paɣtʋ tɩŋa yɔɔ nɛ ɩɖɔŋ tɩ-yɔɔ.+ Ɩtaatɩŋ mɩ-maɣmaɣ mɩ-laŋa yaa mɩ-ɛsa, awokini-mɩ fezuu taa hayitu ɖeɖe.+ 40 Pɩkaɣ-mɩ sɩnʋʋ nɛ ɩtɔzʋʋ man-paɣtʋ tɩŋa yɔɔ nɛ ɩɖɔŋ tɩ-yɔɔ nɛ ɩkɛ kiɖeɖema mɩ-Ɛsɔ.+ 41 Mɛkɛnɩ mɩ-Ɛsɔ Yehowa, weyi ɛlɩzɩ-mɩ nɛ Ejipiti ɛjaɖɛ taa yɔ, se mawɩlɩ se mɛnkɛ mɩ-Ɛsɔ.+ Mɛkɛnɩ mɩ-Ɛsɔ Yehowa.”»+

16 Ðɩnɛ ɛlɛ Kora,+ weyi ɛkɛ Izihaarɩ+ pɩyalʋ, Kehaatɩ+ pɩyalʋ, Leevi+ pɩyalʋ yɔ, ɛ nɛ Eliyaabɩ+ pɩyalaa Dataanɩ nɛ Abiram, nɛ Peelɛɛtɩ pɩyalʋ Oni, mba paalɩnɩ Rubɛɛnɩ+ pɩyalaa taa yɔ pala nɔɔ; 2 pa nɛ Izrayɛɛlɩ abalaa 250 pakʋyɩ Moyizi yɔɔ; abalaa mba, paakɛ ɛyaa mba pɔtɔzɩ-wɛ samaɣ taa yɔ, samaɣ ñʋndɩnaa, abalaa mba pa-hɩla kaasɛwa yɔ. 3 Ðɩnɛ ɛlɛ pekpeɣli ɖama nɛ pakʋyɩ+ Moyizi nɛ Aarɔɔnɩ pɔ-yɔɔ nɛ peheyi-wɛ se: «Mɩ-tɔm lɩ-ɖʋ sɔŋ! Samaɣ kpeekpe kɛ kiɖeɖeɣa,+ samaɣ taa ɛyaa tɩŋa kɛ kiɖeɖema, nɛ Yehowa wɛ pɛ-hɛkʋ taa.+ Ye mbʋ, ɛbɛ yɔɔ ɩkpazɩɣ mɩ-tɩ Yehowa samaɣ yɔɔ mbʋ?»

4 Moyizi tɩɩnɩ tɔm ndʋ lɛ, eluŋ nɛ ɛpa ɛsa nɛ tɛtʋ. 5 Pʋwayɩ lɛ, eheyi Kora nɛ mba payɩ patɩnɩɣ ɛ-yɔɔ yɔ se: «Cee tanaŋ tɛɛ Yehowa kaɣ yebu nɛ patɩlɩ weyi ɛkɛ ɛ-ñɩnʋ yɔ,+ ɛkaɣ yebu nɛ patɩlɩ weyi ɛkɛ kiɖeɖeu yɔ, nɛ weyi pɩmʋnaa se ɛñɔtɩnɩ-ɩ yɔ,+ nɛ weyi ɛkaɣ lɩzʋʋ yɔ,+ ɛnʋ kaɣnɩ-ɩ ñɔtɩnʋʋ. 6 Ɩla ɛzʋnɔ: Ña Kora nɛ mba payɩ patɩnɩɣ ñɔ-yɔɔ yɔ,+ ɩkpaɣ miŋ ñanzɩ,+ 7 nɛ ɩɖʋ miŋ sɩ-taa nɛ ɩɖʋ ŋgee tɩlaaɖɩ pɩ-yɔɔ Yehowa ɛsɩndaa cee, nɛ abalʋ weyi Yehowa kaɣ lɩzʋʋ yɔ,+ ɛnʋ kɛnɩ kiɖeɖeu. Mɩ Leevi pɩyalaa,+ ɩɖɛlɛsɩ niye kpem!»

8 Pʋwayɩ lɛ, Moyizi heyi Kora se: «Mɩ Leevi pɩyalaa, mentendi-mɩ iwelisi. 9 Ɛzɩ Izrayɛɛlɩ tɛ Ɛsɔ lɩzʋʋ-mɩ nɛ hɔɔlʋʋ Izrayɛɛlɩ samaɣ taa+ nɛ ɛha-mɩ nʋmɔʋ se ɩñɔtɩnɩ-ɩ nɛ ɩla Yehowa kɩɖanɖʋʋ tʋmɩyɛ nɛ ɩsɩŋ samaɣ ɛsɩndaa nɛ ɩla ka-tʋmɩyɛ yɔ,+ pɩtɩlɩɩ pʋyʋ mɩ-ɛsɩndaa yaa we? 10 Nɛ eyebu nɛ ŋñɔtɩnɩ-ɩ, ña nɛ ño-koobiya Leevi pɩyalaa kpeekpe yɔ, pɩtɩlɩɩ pʋyʋ ñɛ-ɛsɩndaa? Nɛ ɩñɩnɩɣ se ɩmʋ cɔjɔtʋ ɖɔɖɔ yaa we?+ 11 Pʋyɔɔ lɛ, ña nɛ mba payɩ patɩnɩɣ ñɔ-yɔɔ yɔ, mɩ mba ɩlabɩ nɔɔ yɔ, iɖiɣni Yehowa kaɖɩnʋʋ. Piyele Aarɔɔnɩ ɛlɛ yɔ, ɛnʋ yɔ anɩ nɛ imidiɣni-i?»+

12 Pʋwayɩ lɛ, Moyizi tiyi se payaa Eliyaabɩ pɩyalaa Dataanɩ nɛ Abiram,+ ɛlɛ pocosi se: «Ðɩɩkɔŋ! 13 Ŋlɩzʋʋ-ɖʋ nɛ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ se ŋkʋ-ɖʋ kañɩmbusuu taa cɩnɛ yɔ, pɩtɩmaɣ-ŋ?+ Lɛɛlɛɛyɔ lɛ ŋñɩnɩɣ ɖɔɖɔ se ŋpɩsɩ ña-tɩ ñʋʋdʋ kɩlɩm ɖɔ-yɔɔ?* 14 Ɛzɩ pɩnaʋ yɔ, ŋtiwoni-ɖʋ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ,+ nɛ ŋtɩcɛlɩ-ɖʋ tɛtʋ natʋyʋ yaa viiñi hayɩm nabʋyʋ se pɩpɩsɩ ɖa-ñɩm. Ŋcaɣ ŋlɩzɩ abalaa mba pɛ-ɛsa na? Aayɩ, ɖɩɩkɔŋ!»

15 Ðɩnɛ ɛlɛ Moyizi kɔ pana kpem nɛ eheyi Yehowa se: «Taakisi nɛ ŋcɔnɩ pɔ-tɔɔnaɣ pee kɩlaʋ. Paa kpaŋaɣ kʋɖʋmaɣ maɣmaɣ mantɩlɛɣ pa-taa nɔɔyʋ nesi tɛɛ, nɛ mantɩla kɩdɛkɛdɩm pa-taa nɔɔyʋ.»+

16 Nɛ Moyizi heyi Kora se: «Ña nɛ mba payɩ patɩnɩɣ ñɔ-yɔɔ yɔ ɩlɩɩ nɛ ɩsɩŋ Yehowa ɛsɩndaa cee, ña nɛ wɛ nɛ Aarɔɔnɩ. 17 Paa weyi lɛ, pɩwɛɛ se ɛɖɔkɩ e-miŋ ñanaɣ nɛ ɛɖʋ ka-taa ŋgee tɩlaaɖɩ, nɛ paa weyi lɛ ewoni e-miŋ ñanaɣ Yehowa ɛsɩndaa, miŋ ñanzɩ 250, ña nɛ Aarɔɔnɩ ɖɔɖɔ, paa weyi lɛ ɛ nɛ e-miŋ ñanaɣ.» 18 Mbʋ pa-taa paa weyi kpaɣ e-miŋ ñanaɣ, nɛ paɖʋ miŋ nɛ ŋgee tɩlaaɖɩ sɩ-taa nɛ powolo nɛ pasɩŋ kediɣzaɣ kizinziku nɔnɔɔ tɛɛ, pa nɛ Moyizi nɛ Aarɔɔnɩ. 19 Kora kpeɣli mba patɩnɩɣ ɛ-yɔɔ yɔ+ nɛ ɛ nɛ wɛ pakʋyɩ pɔ-yɔɔ kediɣzaɣ kizinziku nɔnɔɔ tɛɛ lɛ, Yehowa samtʋ lɩɩ nɛ samaɣ kpeekpe na-tʋ.+

20 Peeɖe lɛ, Yehowa heyi Moyizi nɛ Aarɔɔnɩ se: 21 «Iposi mɩ-tɩ nɛ ɛyaa mba yɔ nɛ manɖɩzɩ-wɛ nɔɔ kʋɖʋmaɣ.»+ 22 Ðɩnɛ ɛlɛ, poluŋ nɛ papa pɛ-ɛsa nɛ tɛtʋ nɛ pɔyɔɔdɩ se: «Hayɩ! Ɛsɔ, ɛyaa kpeekpe fezuu* Ɛsɔ,+ ɛyʋ kʋɖʋm kɩwɛɛkɩm yeki se ña-taa ɛwɩɩnɩ samaɣ kpeekpe yaa we?»+

23 Ðɩnɛ ɛlɛ, Yehowa heyi Moyizi se: 24 «Yɔɔdɩnɩ samaɣ nɛ ŋheyi-kɛ se: “Iposi mɩ-tɩ nɛ Kora, Dataanɩ nɛ Abiram+ pe-kizinzikiŋ!”»

25 Ðɩnɛ ɛlɛ Moyizi kʋyɩ nɛ ewolo Dataanɩ nɛ Abiram pɔ-cɔlɔ, ɛ nɛ Izrayɛɛlɩ ɛzʋtʋyaa+ paawobina. 26 Eheyi samaɣ se: «Mentendi-mɩ, iposi mɩ-tɩ nɛ abalaa kɩdɛkɛdaa panɛ pe-kizinzikiŋ nɛ itaatukuni po-wonuu nakʋyʋ, nɛ pataaɖɩzɩ-mɩ pa-kɩwɛɛkɩm kpeekpe yɔɔ.» 27 Kpaagbaa mbʋ lɛ, poposi pa-tɩ nɛ Kora, Dataanɩ nɛ Abiram pe-kizinzikiŋ, ɩ-hɔɔlɩŋ tɩŋa yɔɔ, nɛ Dataanɩ nɛ Abiram palɩɩ nɛ pasɩŋ pe-kizinzikiŋ nɔnɔsɩ taa, pa nɛ pa-halaa, pa-pɩyalaa nɛ pe-piya cikpesi.

28 Pʋwayɩ lɛ, Moyizi yɔɔdɩ se: «Pʋnɛ ɩkaɣnɩ naʋ se Yehowa tiyini-m se mala pɩtɩŋa payɩ ɛzʋnɔ, nɛ ɩna se pɩtɩkɛ ma-maɣmaɣ man-tɩ yɔɔ* malakɩ mbʋ: 29 Ye ɛyaa panɛ yɔ, pasɩbɩ ɛzɩ ɛyaa kpeekpe sɩkʋʋ ɖɔɖɔ yɔ, nɛ ye pa-nɩŋgbaŋʋʋ hɔm ɛfɛyɩ ndɩ nɛ ɛyaa kpeekpe ñɩmbʋ yɔ, ɖɩnɛ ɛlɛ Yehowa titiyi-m.+ 30 Ɛlɛ ye Yehowa ɛlabɩ-wɛ nabʋyʋ mbʋ pɩtɩla wiɖiyi nɛ pɩna yɔ nɛ tɛtʋ haa tɩ-nɔɔ nɛ tilibi-wɛ nɛ pɩkpɛndɩnɩ mbʋ payɩ pɛwɛna yɔ, nɛ petii Pɩlaʋ* taa nɛ pɛ-ɛsa yɔ, ɖɩnɛ ɛlɛ ɩkaɣ naʋ se abalaa panɛ patɩña Yehowa.»

31 Ɛtɩɩtɛm tɔm ndʋ yɔɔdʋʋ lɛ, tɛtʋ faɣ pɛ-tɛɛ kpu.+ 32 Nɛ tɛtʋ haa tɩ-nɔɔ nɛ tilibi-wɛ, pa nɛ pa-ɖɩsɩ taa mba nɛ Kora ñɩma+ tɩŋa payɩ nɛ pa-ñɩm tɩŋa. 33 Mbʋ pa-maɣmaɣ nɛ mba payɩ pɛkɛ pa-ñɩma yɔ petibi Pɩlaʋ* taa nɛ pɛ-ɛsa, nɛ tɛtʋ huuzi pɔ-yɔɔ nɛ pɛtɛŋɩlɩ.+ 34 Pamakaɣ kubusi lɛ, Izrayɛɛlɩ ñɩma mba payɩ paacɔ-wɛ nɛ pata yɔ pese, mbʋ pʋyɔɔ yɔ pɔtɔŋaɣ se: «Sɔɔndʋ kpaɣ-ɖʋ se pɩtaakɛdɩ nɛ tɛtʋ libi-ɖʋ ɖɔɖɔ!» 35 Ðɩnɛ ɛlɛ miŋ lɩɩnɩ Yehowa cɔlɔ+ nɛ ɛñaɣ abalaa 250 mba paawɛɛ nɛ pañaɣzɩɣ ŋgee tɩlaaɖɩ yɔ.+

36 Nɛ Yehowa heyi Moyizi se: 37 «Heyi cɔjɔ Aarɔɔnɩ pɩyalʋ Eleyaazaarɩ se ɛlɩzɩ miŋ ñanzɩ+ miŋ taa, mbʋ pʋyɔɔ yɔ sɩkɛ kiɖeɖesi. Heyi-i ɖɔɖɔ se ɛmɩzɩ miŋ poliŋ taa. 38 Pɩwɛɛ se pakpaɣ abalaa mba palabɩ kɩwɛɛkɩm nɛ pelesi pe-weziŋ yɔ* pe-miŋ ñanzɩ nɛ pamabɩ-sɩ nɛ sɩpɩsɩ tatayaa tatayaa nɛ pɔpɔ altaaru yɔɔ,+ mbʋ pʋyɔɔ yɔ pɔkɔnɩ ñanzɩ nzɩ Yehowa ɛsɩndaa, nɛ sɩpɩsɩ kiɖeɖesi. Sɩkaɣ kɛʋ yʋsaɣ Izrayɛɛlɩ mba.»+ 39 Ðɩnɛ ɛlɛ cɔjɔ Eleyaazaarɩ kpaɣ mba miŋ ñaɣ-wɛ yɔ pa-ñanzɩ nzɩ palabɩ-sɩ nɛ ñɩɣyʋʋ kɩsɛɛmʋʋ yɔ, nɛ ɛmabɩ-sɩ nɛ sɩpɩsɩ tatayaa tatayaa nɛ pɔpɔ altaaru yɔɔ, 40 ɛzɩ Yehowa kaatɩŋnʋʋ Moyizi yɔɔ nɛ eheyi-i yɔ. Pɩtɔzaɣ Izrayɛɛlɩ mba se pɩfɛyɩ se ɛyʋ weyi pɩtɩha-ɩ nʋmɔʋ yɔ,* weyi ɛtɩkɛ Aarɔɔnɩ lʋlʋʋ taa tʋ yɔ, ɛñɔtɩ se ɛñaɣzɩɣ ŋgee tɩlaaɖɩ Yehowa ɛsɩndaa+ nɛ pɩfɛyɩ ɖɔɖɔ se nɔɔyʋ ɛla ɛzɩ Kora nɛ mba patɩnaɣ ɛ-yɔɔ yɔ.+

41 Tɛʋ fem kpaagbaa lɛ, Izrayɛɛlɩ samaɣ kpeekpe paɣzɩ midinuu Moyizi nɛ Aarɔɔnɩ+ nɛ kɔtɔŋ se: «Mɩ-naalɛ mɩkʋnɩ Yehowa samaɣ.» 42 Alɩwaatʋ ndʋ samaɣ kpeɣlaa se kakaɖɩnɩ Moyizi nɛ Aarɔɔnɩ lɛ, pɛkɛzɩ pa-tɩ nɛ paha ɛsa nɛ kediɣzaɣ kizinziku, nɛ pana mɩndʋ huuzi kɩ-yɔɔ, nɛ pɩpaɣzɩ naʋ Yehowa samtʋ.+

43 Moyizi nɛ Aarɔɔnɩ powolo kediɣzaɣ kizinziku ɛsɩndaa,+ 44 nɛ Yehowa heyi Moyizi se: 45 «Ɛyaa mɩ, iposi mɩ-tɩ nɛ samaɣ kanɛ nɛ manɖɩzɩ-kɛ nɔɔ kʋɖʋmaɣ.»+ Ðɩnɛ ɛlɛ poluŋ nɛ papa pɛ-ɛsa nɛ tɛtʋ.+ 46 Nɛ Moyizi heyi Aarɔɔnɩ se: «Kpaɣ miŋ ñanaɣ nɛ ŋhaa miŋ altaaru yɔɔ+ nɛ ŋɖʋ ka-taa nɛ ŋɖʋ pɩ-yɔɔ ŋgee tɩlaaɖɩ nɛ ŋwolo lɛɛ lɛɛ samaɣ cɔlɔ nɛ ŋlabɩ-kɛ kɩwɛɛkɩm yɔɔ huuzuu sɔnzɩ,+ mbʋ pʋyɔɔ yɔ Yehowa kɔ pana. Kɩzɩkʋ paɣzaa!» 47 Kpaagbaa mbʋ lɛ, Aarɔɔnɩ kpaɣ miŋ ñanaɣ ɛzɩ Moyizi heyuu-i yɔ nɛ ese ɛsʋʋ samaɣ hɛkʋ taa, nɛ ɩna, kɩzɩkʋ kaatɛm paɣzʋʋ samaɣ taa. Ðɩnɛ ɛlɛ ɛɖʋ ŋgee tɩlaaɖɩ miŋ ñanaɣ taa nɛ ɛpaɣzɩ labʋ samaɣ kɩwɛɛkɩm yɔɔ huuzuu sɔnzɩ. 48 Ewolo nɛ ɛsɩŋ sɩɖaa nɛ ɛsadɩnaa pɛ-hɛkʋ taa, nɛ pɩtɛmna se kɩzɩkʋ sɩ tɩnaɣ. 49 Mba kɩzɩkʋ kʋ-wɛ yɔ paakpɛndɩ 14 700, nɛ pɩtasɩnɩ mba Kora lakasɩ yeba nɛ pasɩ yɔ. 50 Pʋwayɩ Aarɔɔnɩ pɩsaɣ Moyizi cɔlɔ kediɣzaɣ kizinziku nɔnɔɔ tɛɛ lɛ, kɩzɩkʋ kaatɛm sɩŋʋʋ.

17 Yehowa heyi Moyizi se: 2 «Yɔɔdɩnɩ Izrayɛɛlɩ mba nɛ ŋmʋ pɔ-cɔlɔ ɖaʋ kʋɖʋmʋʋ paa cejewiye nɖɩ* lɛ ɖɩ-ñʋʋ taa, ñʋndɩnaa cɔlɔ paa cejewiye nɖɩ lɛ ɖɩ-taa,+ ɩ-tɩŋa ɩkpɛndɩɣ ɖaŋ 12. Ma paa weyi ɛ-hɩɖɛ ɛ-ɖaʋ yɔɔ. 3 Pɩwɛɛ se ŋma Aarɔɔnɩ hɩɖɛ Leevi ɖaʋ yɔɔ, mbʋ pʋyɔɔ yɔ paa cejewiye ñʋʋdʋ weyi lɛ, ɛwɛnɩ ɖaʋ kʋɖʋmʋʋ. 4 Sɩɩ ɖaŋ ɛnɩ kediɣzaɣ kizinziku tɛɛ, Aseɣɖe Lɩzʋʋ+ ɛsɩndaa, ɖenɖe mawɩlɩɣ-mɩ man-tɩ ɖoŋ ɖoŋ yɔ.+ 5 Nɛ abalʋ weyi malɩzɩɣ yɔ+ ɛ-ɖaʋ kaɣ yɛzʋʋ, nɛ meyele nɛ miduu mbʋ Izrayɛɛlɩ mba midiɣni-m yɔ pɩsɩɩ tɩnaɣ,+ nɛ miduu mbʋ pemidiɣni-mɩ ɖɔɖɔ yɔ.»+

6 Mbʋ Moyizi yɔɔdɩnɩ Izrayɛɛlɩ mba, nɛ pa-ñʋndɩnaa tɩŋa cɛlɩ-ɩ ɖaŋ—paa cejewiye ñʋʋdʋ weyi lɛ, ɖaʋ kʋɖʋmʋʋ, ɖaŋ kpɛndɩ 12—Aarɔɔnɩ ɖaʋ kaawɛ pa-ɖaŋ taa. 7 Nɛ Moyizi sɩɩ ɖaŋ ɛnɩ Yehowa ɛsɩndaa, Aseɣɖe Lɩzʋʋ kizinziku tɛɛ.

8 Tɛʋ fema nɛ Moyizi sʋʋ Aseɣɖe Lɩzʋʋ kizinziku tɛɛ lɛ, ɛnaɣ se Aarɔɔnɩ ɖaʋ ŋgʋ kɩkɛ Leevi ɖɩɣa ñɩŋgʋ yɔ kɩyɛzaa, kɩyɛzɩ pilinzi nɛ kɩkpaɣ hɛtʋ nɛ kɩlʋlɩ amandɩ pee wena apɩwa yɔ. 9 Nɛ Moyizi kpaɣ ɖaŋ ɛnɩ ɩ-tɩŋa Yehowa ɛsɩndaa nɛ ɛlɩnɩ-ɩ Izrayɛɛlɩ samaɣ kpeekpe cɔlɔ. Nɛ pɔcɔnɩ ɖaŋ ɛnɩ nɛ paa abalʋ weyi lɛ, ɛkpaɣ ɛ-ñɩŋgʋ.

10 Pʋwayɩ lɛ, Yehowa heyi Moyizi se: «Pɩsɩnɩ Aarɔɔnɩ ɖaʋ+ nɛ ŋsɩɩ Aseɣɖe Lɩzʋʋ ɛsɩndaa nɛ kɩwɛɛ peeɖe nɛ kɩkɛnɩ kaañamtʋ pɩyalaa+ yʋsaɣ+ nɛ peyebi-m midinuu, ɖɩnɛ ɛlɛ paakaɣ sɩbʋ.» 11 Kpaagbaa mbʋ lɛ, Moyizi la ɖeyi ɖeyi ɛzɩ Yehowa ɖʋʋ-ɩ paɣtʋ yɔ. Ɛlabɩ mbʋ ɖeyi ɖeyi.

12 Pʋwayɩ lɛ, Izrayɛɛlɩ mba heyi Moyizi se: «Lɛɛlɛɛyɔ ɖɩkaɣ sɩbʋ, paa pɩɩlabɩ ɛzɩma ɖɩkaɣ tɛŋɩlʋʋ, ɖa-tɩŋa ɖɩkaɣ tɛŋɩlʋʋ! 13 Nɔɔyʋ ɛñɩtaa nɛ ɛñɔtɩnɩ Yehowa kɩɖanɖʋʋ yɔ, sɩm pɩtɛŋnɩ-ɩ!+ Ða-tɩŋa ɖɩsɩkɩ mbʋ nɛ ɖɩtɛ na?»+

18 Pʋwayɩ lɛ, Yehowa heyi Aarɔɔnɩ se: «Ye pamanɩ kooka kiɖeɖeɣa+ paɣtʋ natʋyʋ yɔɔ yɔ, ña nɛ ña-pɩyalaa nɛ ña-caanaa ɖɩɣa ñʋʋ taa kɩwɛɛkɩm mbʋ pɩcakɩ; nɛ ye pamanɩ mɩ-cɔjɔtʋ paɣtʋ natʋyʋ yɔɔ kɔyɔ, ña nɛ ña-pɩyalaa mɩ-ñʋʋ taa kɩwɛɛkɩm mbʋ pɩcakɩ.+ 2 Pɩtasɩ lɛ, pɩwɛɛ se ŋkɔnɩ ño-koobiya, Leevi cejewiye taa mba, ñɔ-cɔzɔnaa cejewiye taa mba nɛ pɔsɔzɩ ñɔ-yɔɔ nɛ pasɩnɩ ña nɛ ña-pɩyalaa tʋmɩyɛ labʋ+ Aseɣɖe Lɩzʋʋ kizinziku ɛsɩndaa.+ 3 Pɩwɛɛ se pala tʋma wena ŋɖʋʋ-wɛ yɔ, nɛ pala ɖɔɖɔ kizinziku tʋma kpeekpe.+ Ɛlɛ pɩfɛyɩ se pɔñɔtɩnɩ lone kiɖeɖeye wondu nɛ altaaru, pɩtɩkɛ mbʋ yɔ pasɩkɩ nɛ mɩ ɖɔɖɔ ɩsɩkɩ.+ 4 Pakaɣ ñɔ-yɔɔ sɔzʋʋ nɛ pala kediɣzaɣ kizinziku tʋma wena paɖʋ-wɛ yɔ nɛ pala ɖɔɖɔ kizinziku tʋma tɩŋa, nɛ pɩfɛyɩ se ɛyʋ weyi pɩtɩha-ɩ nʋmɔʋ yɔ* ɛñɔtɩnɩ-mɩ.+ 5 Pɩwɛɛ se ɩla lone kiɖeɖeye nɛ altaaru tʋma wena paɖʋ-mɩ yɔ,+ ɖɩnɛ ɛlɛ pana+ ɛɛkaɣ tasʋʋ kɔm Izrayɛɛlɩ samaɣ yɔɔ. 6 Ma-maɣmaɣ malɩzɩnɩ mi-koobiya, Leevi mba, Izrayɛɛlɩ mba hɛkʋ taa nɛ mɛncɛlɩ-mɩ se pɛkɛnɩ-mɩ kʋjɔʋ.+ Pakpaɣ-wɛ nɛ paha Yehowa se pala kediɣzaɣ kizinziku tʋmɩyɛ.+ 7 Mɩ-cɔjɔtʋ tʋma wena atukuuni altaaru nɛ mbʋ pɩwɛ pɩsaʋ kikenduu wayɩ+ yɔ, ña nɛ ña-pɩyalaa mɩ-sʋʋtʋ pɩkɛnaa, pɩwɛɛ se ɩla tʋma ana.+ Mankpaɣ cɔjɔtʋ tʋmɩyɛ nɛ mɛncɛlɩ-mɩ se pɩkɛnɩ-mɩ kʋjɔʋ, nɛ ye ɛyʋ weyi pɩtɩha-ɩ nʋmɔʋ yɔ* ɛñɔtaa yɔ, pɩwɛɛ se pakʋ-ɩ.»+

8 Yehowa tasɩ heyuu Aarɔɔnɩ se: «Ma-maɣmaɣ malɩzɩnɩ-ŋ se ŋcɔŋnɩ haɖɛ nɖɩ palakɩ-m yɔ ɖɩ-yɔɔ.+ Mɛncɛlɩ ña nɛ ña-pɩyalaa wondu kiɖeɖetu ndʋ payɩ Izrayɛɛlɩ mba haɣ yɔ tɩ-hɔɔlʋʋ nakʋyʋ se pɩkɛnɩ mi-ɖeɖe tam.+ 9 Kɩlaŋ kiɖeɖeŋ siŋŋ weyi pañaɣzɩɣ miŋ yɔ ɩ-taa lɛ, ñe-ɖeɖe yɔ: kɩlaŋ weyi payɩ palaɣ yɔ, pɩkpɛndɩnɩ pɔ-tɔɔnaɣ pee kɩlaŋ+ nɛ pa-kɩwɛɛkɩm yɔɔ kɩlaŋ+ nɛ wɛɛ ɖɔʋ kɩlaŋ+ weyi pɔkɔŋnɩ-m yɔ. Pɩkɛnɩ ña nɛ ña-pɩyalaa pʋyʋ kiɖeɖeu siŋŋ. 10 Lone kiɖeɖeye siŋŋ naɖɩyɛ taa pɩwɛɛ se ŋtɔɔ ñe-ɖeɖe.+ Paa abalʋ weyi ɛpɩzɩɣ nɛ ɛtɔɔ-ɖɩ. Pɩkɛɣnɩ-ŋ pʋyʋ kiɖeɖeu.+ 11 Ñatɩnɩ pʋnɛ ɖɔɖɔ: kʋjɔŋ+ weyi Izrayɛɛlɩ mba kpɛndɩɣ pa-kɩlaŋ kifiɣdiŋ+ tɩŋa yɔɔ nɛ pɔkɔŋna yɔ. Mɛncɛlɩ-ɩ ña nɛ ña-pɩyalaa nɛ ñɛ-pɛlaa se ɩkɛ mi-ɖeɖe tam.+ Ña-ɖɩɣa taa ñɩma mba payɩ pɛwɛ kele kele yɔ, papɩzɩɣ nɛ pɔtɔɔ-ɩ.+

12 «Mɛncɛlɩɣ-ŋ num mbʋ pɩkɩlɩ ɖeu yɔ pɩtɩŋa, vɛɛ kɩfalʋʋ nɛ tɔɔnaɣ pee wena akɩlɩ ɖeu yɔ a-tɩŋa, pa-kajalaɣ tɔɔnaɣ pee,+ wena pɛcɛlɩɣ Yehowa yɔ.+ 13 Pɛ-ɛjaɖɛ taa tɔɔnasɩ nzɩ pacalɩɣ kʋm yɔ sɩ-tɩŋa, nzɩ pɔkɔŋnɩ Yehowa yɔ sɩpɩsɩɣ ña-pʋyʋ.+ Ña-ɖɩɣa taa ñɩma mba payɩ pɛwɛ kele kele yɔ, papɩzɩɣ nɛ pɔtɔɔ-sɩ.

14 «Mbʋ payɩ pasɩ-pʋ nɛ kɩjaʋ* Izrayɛɛlɩ ɛjaɖɛ taa se pahaɣ-pʋ Ɛsɔ yɔ, pɩpɩsɩɣ ña-pʋyʋ.+

15 «Mbʋ payɩ pɩwɛ wezuu yɔ* pɩ-kajalaɣ pɩɣa,+ ŋga pɔkɔŋnɩ Yehowa yɔ, paa pɩtɩɩkɛ ɛyʋ yaa kpɩnɛ yɔ, pɩpɩsɩɣ ña-pʋyʋ. Ɛlɛ paa pɩɩlabɩ ɛzɩma yɔ, pɩwɛɛ se ŋyele nɛ paɖaɣnɩ yabʋ ɛyaa kajalaɣ piya,+ nɛ kpɩna wena afɛyɩ kele kele yɔ pɩwɛɛ se ŋyele nɛ paɖaɣnɩ yabʋ a-kajalaɣ piya.+ 16 Kajalaɣ pɩɣa talɩɣ fenaɣ kʋɖʋmaɣ nɛ pɩɖɛɛ lɛ, pɩwɛɛ se ŋyele nɛ pɛhɛyɩ ñʋʋ yabʋ liidiye nɛ paɖaɣnɩnɩ-kɛ yabʋ, liidiye nɖɩ paɖʋ kɔ-yɔɔ yɔ nɖɩ pɛhɛyɩɣ, ɖɩkɛɣnɩ liidiye siklinaa* 5,+ pɩwɛɛ se siklinaa mba pamʋnɩ lone kiɖeɖeye taa sikli.* Kɩkɛ gerawaa* 20. 17 Ɛlɛ pɩfɛyɩ se paɖaɣnɩ yabʋ kajalaɣ neɣye abalɩñɩnɖɛ, yaa kajalaɣ heɣa abalɩñɩŋga yaa kajalaɣ mbeɣa ŋga pɩlʋlʋʋ yɔ.+ Pɛkɛ pʋyʋ kiɖeɖeu. Pɩwɛɛ se ŋmɩzɩ pa-calɩm altaaru yɔɔ,+ nɛ ŋñaɣzɩ po-num nɛ ñɔsɩ kpa nɛ pɩkɛ kɩlaʋ ŋgʋ pañaɣzɩ miŋ se pɩkɛnɩ sɔzɩŋ weyi ɛkɛdɩɣnɩ Yehowa yɔ.*+ 18 Ñatɩnɩ kpɩna ana a-nandʋ. Tɩkɛɣ ña-ñɩndʋ ɛzɩ kɩlaʋ kifiɣduu kpɩnɛ laŋɩyɛ nɛ ɖɩ-nɩwaŋ yuye ɖɔɖɔ yɔ.+ 19 Haɖɛ kiɖeɖeye nɖɩ payɩ Izrayɛɛlɩ mba kaɣ labʋ Yehowa yɔ,+ maha-ɖɩ ña nɛ ña-pɩyalaa nɛ ñɛ-pɛlaa se pɩkɛnɩ mi-ɖeɖe tam.+ Pɩkɛ ña nɛ ña-lʋlʋʋ taa mba ɖɔm ɛgbɛyɛ* nɖɩ ɖɩwɛɣ tam yɔ Yehowa ɛsɩndaa.»

20 Yehowa tasɩ heyuu Aarɔɔnɩ se: «Ŋŋkaɣ wɛnʋʋ ñɩm nabʋyʋ pɛ-ɛjaɖɛ taa, nɛ kotoŋa nakɛyɛ ɛɛkaɣ pɩsʋʋ ña-pʋyʋ pɛ-hɛkʋ taa.+ Mɛkɛnɩ ñe-ɖeɖe nɛ ña-ñɩm Izrayɛɛlɩ mba hɛkʋ taa.+

21 «Mɛncɛlɩ Leevi pɩyalaa paa hɔɔlʋʋ 10 ñɩŋgʋ ŋgʋ lɛ+ Izrayɛɛlɩ ɛjaɖɛ taa se pɩkɛ pa-ñɩm tʋmɩyɛ nɖɩ palakɩ yɔ ɖi-lone taa, kediɣzaɣ kizinziku tʋmɩyɛ. 22 Pɩfɛyɩ se Izrayɛɛlɩ samaɣ ɛtasɩ ñɔtɩnʋʋ kediɣzaɣ kizinziku, pɩtɩkɛ mbʋ yɔ pɩkɛɣnɩ-wɛ kɩwɛɛkɩm nɛ pasɩ. 23 Leevi mba maɣmaɣ pɩwɛɛ se pala kediɣzaɣ kizinziku tʋmɩyɛ, nɛ mba kaɣnɩ pa-kɩwɛɛkɩm sʋʋtʋ sɩɣlʋʋ.+ Pɩkɛnɩ tamtam paɣtʋ mɩ nɛ mɩ-lʋlʋʋ taa mba kpeekpe se pɩfɛyɩ se pamʋ ñɩm nabʋyʋ Izrayɛɛlɩ mba hɛkʋ taa.+ 24 Mbʋ pʋyɔɔ yɔ hɔɔlʋʋ 10 ñɩŋgʋ haɖɛ nɖɩ Izrayɛɛlɩ samaɣ haɣ Yehowa yɔ, mɛncɛlɩ-ɖɩ Leevi mba se ɖɩkɛ pa-ñɩm. Mbʋ yebina nɛ meheyi-wɛ se: “Pɩfɛyɩ se pamʋ ñɩm nabʋyʋ Izrayɛɛlɩ mba hɛkʋ taa.”»+

25 Pʋwayɩ lɛ Yehowa heyi Moyizi se: 26 «Pɩwɛɛ se ŋheyi Leevi mba se: “Ɩkaɣ mʋʋ Izrayɛɛlɩ mba cɔlɔ hɔɔlʋʋ 10 ñɩŋgʋ ŋgʋ mamʋ pɔ-cɔlɔ nɛ mɛncɛlɩ-mɩ se kɩkɛ mɩ-ñɩm yɔ,+ nɛ pɩwɛɛ se ɩlɩzɩ hɔɔlʋʋ 10 ñɩŋgʋ ŋgʋ kɩ-hɔɔlʋʋ 10 ñɩŋgʋ nɛ ɩha Yehowa.+ 27 Nɛ pakaɣ-kʋ kpaɣʋ se kɩkɛ mɩ-haɖɛ, pakaɣ-kʋ kpaɣʋ ɛzɩ tɔɔnaɣ pee wena alɩnɩ tɔɔnaɣ ɖɩmaɖɛ yɔ+ yaa ɛzɩ mbʋ pɩlɩnɩ viiñi ɖɩfɛyɩyɛ yaa num ɖɩlaɖɛ tɔɖɩɩɩ yɔ. 28 Ðɩnɛ ɛlɛ mɩ ɖɔɖɔ ɩkaɣ lɩzʋʋ hɔɔlɩŋ 10 ñɩŋ weyi payɩ ɩmʋʋ Izrayɛɛlɩ mba cɔlɔ yɔ ɩ-taa nɛ ɩlabɩnɩ haɖɛ Yehowa, ɩ-taa ɩkaɣ lɩzʋʋ nɛ ɩla haɖɛ Yehowa nɛ ɩcɛlɩ-ɖɩ cɔjɔ Aarɔɔnɩ. 29 Haɖɛ nɖɩ palakɩ-mɩ payɩ yɔ, ɩkaɣ lɩzʋʋ ɖɩ-taa mbʋ pɩkɩlɩ ɖeu yɔ nɛ ɩlabɩnɩ kʋjɔŋ ndɩ ndɩ Yehowa+ nɛ pɩkɛnɩ pʋyʋ kiɖeɖeu.”

30 «Heyi-wɛ se: “Ɩhaɣ ɖɩ-taa mbʋ pɩkɩlɩ ɖeu yɔ lɛ, pakaɣ-ɖɩ kpaɣʋ ɛzɩ mɩ Leevi mba mɩ-pʋyʋ yɔ, ɛzɩ mbʋ pɩlɩnɩ tɔɔnaɣ ɖɩmaɖɛ yaa mbʋ pɩlɩnɩ viiñi ɖɩfɛyɩyɛ yaa num ɖɩlaɖɛ yɔ. 31 Mɩ nɛ mɩ-ɖɩsɩ taa mba ɩpɩzɩɣ nɛ ɩtɔɔ haɖɛ nɖɩ paa le, mbʋ pʋyɔɔ yɔ kediɣzaɣ kizinziku tʋmɩyɛ nɖɩ ɩlakɩ yɔ ɖɩ-kɩhɛyʋʋ lɛ.+ 32 Ye ɩñɩtɩɣ nɛ ɩhaɣ ɖɩ-taa mbʋ pɩkɩlɩ ɖeu kɔyɔ, pɩɩkɛɣnɩ-mɩ kɩwɛɛkɩm, pɩtɩpɔzɩ se ipisi Izrayɛɛlɩ mba wondu kiɖeɖetu, pɩtɩkɛ mbʋ yɔ ɩsɩkɩ.”»+

19 Yehowa tasɩ yɔɔdɩnʋʋ Moyizi nɛ Aarɔɔnɩ nɛ eheyi-wɛ se: 2 «Paɣtʋ ndʋ Yehowa ɖʋwa yɔ ndʋ yɔ: “Heyi Izrayɛɛlɩ mba se pɩwɛɛ se pɔkɔnɩ-ŋ nɔ halɩñɩnʋ kɩsɛm weyi ɛwɛ camɩyɛ nɛ ɛfɛyɩnɩ ɛjandʋ natʋyʋ yɔ+ nɛ weyi ɛ-yɔɔ patɩtɩnɩ sʋʋtʋ ɖaʋ nakʋyʋ nɛ pana yɔ. 3 Pɩwɛɛ se ɩcɛlɩ-ɩ cɔjɔ Eleyaazaarɩ, nɛ ɛlɛ kaɣ-ɩ wonuu ɖigbeɣliye* wayɩ nɛ pakʋ-ɩ ɛ-ɛsɩndaa. 4 Pʋwayɩ lɛ, cɔjɔ Eleyaazaarɩ lii e-niye nɔ ɛnʋ ɛ-calɩm taa nɛ ɛmɩzɩ-pʋ tam 7 nɛ kediɣzaɣ kizinziku ɛsɩndaa kiŋ.+ 5 Pʋwayɩ lɛ, pañaɣzɩ nɔ halɩñɩnʋ ɛnʋ miŋ ɛ-ɛsɩndaa. Pañaɣzɩɣ ɛ-tɔnɛ, ɛ-nandʋ, ɛ-calɩm nɛ pɩkpɛndɩnɩ ɛ-pɩndʋ.+ 6 Pɩwɛɛ se cɔjɔ ɛkpaɣ tɩʋ ŋgʋ payaɣ se sɛɛdrɩ yɔ kɩ-ɖaka, ñɩtʋ ndʋ payaɣ se izɔɔpʋ yɔ+ nɛ pɩsaʋ kɩsɛɛmʋʋ cɩɩɩ nɛ ɛpɛɖɩ miŋ weyi ɛ-taa peɖiɣni ñaɣzʋʋ nɔ halɩñɩnʋ yɔ ɛ-taa. 7 Pʋwayɩ lɛ, pɩwɛɛ se cɔjɔ ɛcɔtɩ e-tokonaa nɛ ɛsɔ lɩm,* ɖɩnɛ ɛlɛ ɛpɩzɩɣ nɛ ɛsʋʋ ɖigbeɣliye taa; ɛlɛ ɛkaɣ kɛʋ weyi ɛfɛyɩ kele kele yɔ nɛ pɩkɔɔ nɛ pɩtalɩ ɖanaɣ.

8 «“Weyi ɛñaɣzɩ nɔ halɩñɩnʋ ɛnʋ miŋ yɔ, pɩwɛɛ se ɛcɔtɩ e-tokonaa lɩm taa nɛ ɛsɔ lɩm,* nɛ ɛkaɣ kɛʋ weyi ɛfɛyɩ kele kele yɔ nɛ pɩkɔɔ nɛ pɩtalɩ ɖanaɣ.

9 «“Abalʋ weyi ɛwɛ kele kele yɔ ɛnʋ kaɣnɩ kuu nɔ halɩñɩnʋ ɛnʋ ɛ-tɔlɩma+ nɛ ɛsɩɩ-yɛ lone cɩɖɩ cɩɖɩ ñɩnɖɛ naɖɩyɛ taa ɖigbeɣliye wayɩ; nɛ pɩwɛɛ se Izrayɛɛlɩ samaɣ ɛsɩɩ tɔlɩma ana nɛ paapɩyɩ-yɛ lɩm mbʋ pakaɣ kpaɣʋ nɛ palabɩnɩ kele kele pɩsʋʋ sɔnzɩ yɔ pɩ-taa.+ Pɩkɛ kɩwɛɛkɩm yɔɔ kɩlaʋ. 10 Weyi ekuu nɔ halɩñɩnʋ ɛnʋ ɛ-tɔlɩma yɔ, pɩwɛɛ se ɛcɔtɩ e-tokonaa, nɛ ɛkɛɣ weyi ɛfɛyɩ kele kele yɔ nɛ pɩkɔɔ nɛ pɩtalɩ ɖanaɣ.

«“Pʋnɛ pɩkɛɣnɩ tamtam paɣtʋ Izrayɛɛlɩ mba nɛ ɛgɔm weyi ɛwɛ pɛ-hɛkʋ taa yɔ.+ 11 Weyi etukuuni sɩɖʋ nɔɔyʋ yɔ,* ɛkaɣ kɛʋ weyi ɛfɛyɩ kele kele yɔ kɩyakɩŋ 7.+ 12 Lɩm mbʋ* pɩwɛɛ se ɛyʋ ɛnʋ ɛkpaɣ nɛ ɛpɩsɩnɩ ɛ-tɩ kele kele kɩyakʋ 3 ñɩŋgʋ wiye, nɛ ɛkaɣ wɛʋ kele kele kɩyakʋ 7 ñɩŋgʋ wiye. Ɛlɛ ye ɛtɩpɩsɩ ɛ-tɩ kele kele kɩyakʋ 3 ñɩŋgʋ wiye yɔ, ɛɛkaɣ wɛʋ kele kele kɩyakʋ 7 ñɩŋgʋ wiye. 13 Weyi etukuni sɩɖʋ tomnaɣ nɛ ɛtɩpɩsɩ ɛ-tɩ kele kele yɔ, episi Yehowa kɩɖanɖʋʋ;+ nɛ pɩwɛɛ se palɩzɩ* ɛyʋ* ɛnʋ Izrayɛɛlɩ taa.+ Ɛwɛ azuluma taa, mbʋ pʋyɔɔ yɔ patɩmɩzɩ ɛ-yɔɔ lɩm mbʋ palakɩnɩ kele kele pɩsʋʋ sɔnzɩ yɔ.+ Ɛkpɛndɩ ɛwɛ ɛ-azuluma ana a-taa mbʋ.

14 «“Ye ɛyʋ nɔɔyʋ ɛsɩbɩ kizinziku nakʋyʋ tɛɛ yɔ, paɣtʋ tʋnɛ tɩ-yɔɔ pɩwɛɛ se pɔɖɔ: Weyi ɛsʋʋ kizinziku ŋgʋ kɩ-tɛɛ yaa weyi ɛɛtɛm wɛʋ kɩ-tɛɛ yɔ, ɛkɛɣ weyi ɛfɛyɩ kele kele yɔ kɩyakɩŋ lʋbɛ. 15 Mbʋ payɩ peyebi yem haaa nɛ patisuli pɩ-yɔɔ sulaɣ* nakɛyɛ yɔ, pɩfɛyɩ kele kele.+ 16 Ye nɔɔyʋ ɛwɛ awayɩ nɛ etukuni weyi pakʋ-ɩ nɛ laɣɖɛ yɔ, yaa tomnaɣ kɩsɩbaɣ nakɛyɛ yaa ɛyʋ nɔɔyʋ mɔɔyɛ yaa pɩlaʋ nakʋyʋ yɔ, ɛkɛɣ weyi ɛfɛyɩ kele kele yɔ kɩyakɩŋ 7.+ 17 Pɩsa nɛ papɩsɩ ɛyʋ weyi ɛfɛyɩ kele kele yɔ kele kele lɛ, pɩwɛɛ se pocozi kɩwɛɛkɩm yɔɔ kɩlaʋ ŋgʋ pañaɣzɩ miŋ yɔ kɩ-tɔlɩma ñanaɣ nakɛyɛ taa nɛ papɩyɩ a-yɔɔ lɩm mbʋ pikpeŋ yɔ. 18 Pʋwayɩ lɛ, pɩwɛɛ se abalʋ weyi ɛwɛ kele kele yɔ+ ɛkpaɣ ñɩtʋ ndʋ payaɣ se izɔɔpʋ yɔ+ nɛ elii-tʋ lɩm mbʋ pɩ-taa nɛ ɛmɩzɩ-pʋ kizinziku, ñanzɩ* tɩŋa nɛ ɛyaa* mba paawɛ peeɖe yɔ pɔ-yɔɔ nɛ ɛmɩzɩ-pʋ ɖɔɖɔ ɛyʋ weyi etukuni mɔɔyɛ yaa etukuni weyi pakʋ-ɩ yɔ yaa tomnaɣ kɩsɩbaɣ yaa pɩlaʋ yɔ ɛ-yɔɔ. 19 Ɛyʋ weyi ɛwɛ kele kele yɔ, ɛkaɣ-pʋ mɩzʋʋ ɛyʋ weyi ɛfɛyɩ kele kele yɔ ɛ-yɔɔ kɩyakʋ 3 ñɩŋgʋ wiye nɛ kɩyakʋ 7 ñɩŋgʋ wiye, nɛ ɛkaɣ ɛ-kɩwɛɛkɩm hɩzʋʋ nɛ ɛpɩsɩ-ɩ kele kele kɩyakʋ 7 ñɩŋgʋ wiye;+ pʋwayɩ lɛ pɩwɛɛ se ɛcɔtɩ e-tokonaa nɛ ɛsɔ lɩm, nɛ ɛkaɣ wɛʋ kele kele ɖanaɣ yɔɔ.

20 «“Ɛlɛ ye nɔɔyʋ ɛfɛyɩ kele kele nɛ ɛtɩpɩsɩ ɛ-tɩ kele kele yɔ, pɩwɛɛ se palɩzɩ* ɛyʋ* ɛnʋ samaɣ* taa,+ mbʋ pʋyɔɔ yɔ episi Yehowa kooka kiɖeɖeɣa. Ɛfɛyɩ kele kele, mbʋ pʋyɔɔ yɔ patɩmɩzɩ ɛ-yɔɔ lɩm mbʋ palakɩnɩ kele kele pɩsʋʋ sɔnzɩ yɔ.

21 «“Pʋnɛ pɩkɛɣnɩ-wɛ tamtam paɣtʋ: Weyi ɛmɩzɩɣ lɩm mbʋ palakɩnɩ kele kele pɩsʋʋ sɔnzɩ yɔ+ pɩwɛɛ se ɛcɔtɩ e-tokonaa, nɛ weyi etukuuni lɩm mbʋ palakɩnɩ kele kele pɩsʋʋ sɔnzɩ yɔ, ɛkɛɣ weyi ɛfɛyɩ kele kele yɔ nɛ pɩkɔɔ nɛ pɩtalɩ ɖanaɣ. 22 Mbʋ payɩ ɛyʋ weyi ɛfɛyɩ kele kele yɔ etukuuna yɔ, pɩkɛɣ mbʋ pɩfɛyɩ kele kele yɔ, nɛ ɛyʋ* weyi etukuuni-pʋ yɔ, ɛkɛɣ weyi ɛfɛyɩ kele kele yɔ nɛ pɩkɔɔ nɛ pɩtalɩ ɖanaɣ.”»+

20 Fenaɣ kajalaɣ ñɩŋga taa lɛ, Izrayɛɛlɩ samaɣ kpeekpe talɩ Ziini kañɩmbusuu taa, nɛ samaɣ caɣ Kadɛɛsɩ.+ Peeɖe Miriyam+ sɩba, nɛ peeɖe pepimi-i.

2 Samaɣ taawɛɛnɩ lɩm,+ nɛ pekpeɣli nɛ pakaɖɩnɩ Moyizi nɛ Aarɔɔnɩ. 3 Nɛ samaɣ paɣzɩ yonuu Moyizi+ nɛ kɔtɔŋ se: «Ye ɖɩɩsɩbɩ alɩwaatʋ ndʋ ɖo-koobiya kaasɩbɩ Yehowa ɛsɩndaa yɔ, pɩtaakɩlɩ ɖeu na! 4 Ɛbɛ yɔɔ ɩkɔnɩ Yehowa samaɣ* kañɩmbusuu kʋnɛ kɩ-taa se ɖa nɛ ɖa-kpɩna ɖɩsɩ cɩnɛ?+ 5 Ɛbɛ yɔɔ ɩlɩzɩ-ɖʋ Ejipiti ɛjaɖɛ taa nɛ ɩkɔnɩ-ɖʋ lone kɩdɛkɛdɩyɛ ɖɩnɛ ɖɩ-taa?+ Ðɩɩpɩzɩɣ nɛ ɖiɖuu ɖomaɣ cɩnɛ, nɛ fiigi tɩŋ nɛ viiñi tɩŋ nɛ girenaadɩ tɩŋ fɛyɩ, nɛ lɩm ɖɔɖɔ fɛyɩ se ɖɩñɔɔ.»+ 6 Ðɩnɛ ɛlɛ Moyizi nɛ Aarɔɔnɩ pakʋyɩnɩ samaɣ ɛsɩndaa nɛ powolo kediɣzaɣ kizinziku nɔnɔɔ tɛɛ nɛ poluŋ nɛ papa pɛ-ɛsa nɛ tɛtʋ, nɛ Yehowa samtʋ lɩɩ nɛ pana-tʋ.+

7 Nɛ Yehowa heyi Moyizi se: 8 «Kpaɣ ɖaʋ nɛ ña nɛ ña-ɖalʋ Aarɔɔnɩ ikpeɣli samaɣ kpeekpe nɛ ɩyɔɔdɩnɩ kaaʋ pɛ-ɛsɩndaa nɛ kɩha kɩ-lɩm, nɛ ŋlɩzɩ-wɛ lɩm nɛ kaaʋ taa nɛ ŋha samaɣ nɛ ka-kpɩna nɛ pɔñɔɔ.»+

9 Ðɩnɛ ɛlɛ Moyizi kpaɣ ɖaʋ Yehowa ɛsɩndaa,+ ɛzɩ ɛɛɖʋʋ-ɩ paɣtʋ yɔ. 10 Nɛ Moyizi nɛ Aarɔɔnɩ pekpeɣli samaɣ kaaʋ ɛsɩndaa, nɛ eheyi-kɛ se: «Ñʋʋ taa ɖoŋ tɩnaa mɩ, iwelisi! Ɛzɩ pɩwɛɛ se ɖɩlɩzɩ-mɩ lɩm nɛ kaaʋ kʋnɛ kɩ-taa?»+ 11 Ðɩnɛ ɛlɛ Moyizi kpazɩ e-nesi nɛ ɛma kaaʋ tam nabʋlɛ nɛ ɛ-ɖaʋ, nɛ lɩm sakɩyɛ paɣzɩ yabɩtʋʋ, nɛ samaɣ kpeekpe nɛ ka-kpɩna papaɣzɩ ñɔʋ.+

12 Pʋwayɩ lɛ Yehowa heyi Moyizi nɛ Aarɔɔnɩ se: «Ɩtɩwɩlɩ se ɩwɛnɩ tisuu mɔ-yɔɔ nɛ ɩtɩwɩlɩ Izrayɛɛlɩ samaɣ ɛsɩndaa se mɛnkɛ kiɖeɖeu;* pʋyɔɔ lɛ, ɩɩkaɣ wonuu samaɣ kanɛ ɛjaɖɛ nɖɩ mankaɣ-kɛ cɛlʋʋ yɔ ɖɩ-taa.»+ 13 Meriba* lɩm+ kɛlɛ, ɖenɖe Izrayɛɛlɩ mba yoni Yehowa nɛ piyele nɛ ɛlɩzɩ ɛ-tɩ nɛ ɛwɩlɩ-wɛ se ɛkɛ kiɖeɖeu yɔ.

14 Pʋwayɩ lɛ, Moyizi tiyi ɛyaa nɛ Kadɛɛsɩ se powolo nɛ peheyi Edom wiyaʋ+ se: «Tɔm tʋnɛ ño-koobu Izrayɛɛlɩ+ yɔɔdʋʋ: “Ŋsɩm camɩyɛ kʋñɔŋ ŋgʋ payɩ ɖɩtɔwaa yɔ. 15 Ða-caanaa kaawobi Ejipiti+ ɛjaɖɛ taa, nɛ ɖɩcaɣ Ejipiti ɛjaɖɛ taa pɩnzɩ* sakɩyɛ,+ nɛ Ejipiti mba wɩlɩ ɖa nɛ ɖa-caanaa ñaŋ.+ 16 Nɛ ɖɩma kubusi nɛ Yehowa cɔlɔ kiŋ,+ nɛ ewelisini-ɖʋ nɛ etiyi tiyiyu+ nɔɔyʋ nɛ ɛlɩzɩ-ɖʋ Ejipiti ɛjaɖɛ taa; nɛ lɛɛlɛɛyɔ ɖɩwɛ Kadɛɛsɩ, tɛtʋ ndʋ tɩwɛ ñe-egeetiye kamaɣ yɔɔ yɔ. 17 Ðitendi-ŋ, ha-ɖʋ nʋmɔʋ nɛ ɖɩtɩŋnɩ ñɛ-ɛjaɖɛ taa. Ðɩɩkaɣ tɩŋnʋʋ hayɩm yaa viiñi hayɩm nabʋyʋ taa, nɛ ɖɩɩkaɣ ñɔʋ lɔkɔ nakʋyʋ taa lɩm. Ðɩkaɣ ɖɔm Wiyaʋ Habɩyɛ yɔɔ nɛ ɖɩɩhɛyɩɣ nɩwaŋ yɔɔ yaa nɩmɩyɛ yɔɔ nɛ pɩkɔɔ nɛ pɩsɩɩnɩ alɩwaatʋ ndʋ ɖɩtɛzɩ ñe-egeetiye yɔ.”»+

18 Ɛlɛ Edom heyi-i se: «Ŋŋpɩzɩɣ nɛ ŋtɩŋnɩ ɖe-egeetiye taa. Ye pɩcɩbɩ-ŋ yɔ, mankaɣ lɩʋ nɛ mankatɩ-ŋ nɛ laɣɖɛ.» 19 Izrayɛɛlɩ mba kitini-i se: «Ðɩkaɣ tɩŋnʋʋ habɩyɛ sɔsɔɖɛ yɔɔ, nɛ ye ɖa nɛ ɖa-kpɩna ɖɩñɔ ña-lɩm yɔ, ɖɩhɛyɩɣ pɩ-yɔɔ.+ Ðɩɩñɩnɩɣ nabʋyʋ nɛ pɩtasɩna se ɖɩɖɔ nɛ ɖɩtɛzɩ.»+ 20 Ɛlɛ ɛtasɩ yɔɔdʋʋ se: «Ŋŋpɩzɩɣ nɛ ŋtɛzɩ.»+ Ðɩnɛ ɛlɛ Edom kpaɣ ɛyaa sakɩyɛ nɛ sɔɔjanaa ɖoŋ tɩnaa* nɛ ɛlɩɩ se ɛkatɩ-ɩ. 21 Mbʋ Edom kizaa se ɛɛhaɣ Izrayɛɛlɩ nʋmɔʋ se ɛtɩŋnɩ e-egeetiye taa; pʋyɔɔ Izrayɛɛlɩ lɛɣzɩ nʋmɔʋ.+

22 Izrayɛɛlɩ mba, samaɣ kpeekpe, kʋyɩnɩ Kadɛɛsɩ nɛ pɔkɔɔ nɛ patalɩ Hɔr Pʋʋ+ taa. 23 Ðɩnɛ ɛlɛ Yehowa heyi Moyizi nɛ Aarɔɔnɩ Hɔr Pʋʋ taa Edom ɛjaɖɛ kamaɣ yɔɔ se: 24 «Pakaɣ kpɛndʋʋ Aarɔɔnɩ ɛ-samaɣ yɔɔ.*+ Ɛɛkaɣ sʋʋ ɛjaɖɛ nɖɩ mɛncɛlɩɣ Izrayɛɛlɩ mba yɔ ɖɩ-taa, mbʋ pʋyɔɔ yɔ mɩ-naalɛ ɩkaɖɩnɩ paɣtʋ ndʋ manɖʋ Meriba lɩm yɔɔ yɔ.+ 25 Kpaɣ Aarɔɔnɩ nɛ ɛ-pɩyalʋ Eleyaazaarɩ nɛ ŋkpanɩ-wɛ Hɔr Pʋʋ taa. 26 Hɔzɩ Aarɔɔnɩ tokonaa+ nɛ ŋsuu ɛ-pɩyalʋ Eleyaazaarɩ,+ Aarɔɔnɩ kaɣ sɩbʋ peeɖe.»

27 Nɛ Moyizi la ɖeyi ɖeyi ɛzɩ Yehowa ɖʋʋ-ɩ paɣtʋ yɔ, pakpa Hɔr Pʋʋ taa samaɣ kpeekpe ɛsɩndaa. 28 Nɛ Moyizi hɔzɩ Aarɔɔnɩ tokonaa nɛ esuu ɛ-pɩyalʋ Eleyaazaarɩ. Pʋwayɩ lɛ, Aarɔɔnɩ sɩ pʋʋ ñʋʋ taa peeɖe.+ Nɛ Moyizi nɛ Eleyaazaarɩ pakʋyɩnɩ pʋʋ taa nɛ petii. 29 Samaɣ kpeekpe nawa se Aarɔɔnɩ sɩba lɛ, Izrayɛɛlɩ ɖɩɣa kpeekpe wii-i kɩyakɩŋ 30.+

21 Kanaŋ tʋ Arad wiyaʋ+ weyi ɛwɛ Negɛɛbʋ yɔ, ɛnɩwa se Izrayɛɛlɩ tɩŋ Atarim nʋmɔʋ nɛ ɛtalɩ lɛ, ɛkʋyɩ Izrayɛɛlɩ yɔɔ nɛ ɛkpa pa-taa nabɛyɛ nɛ papɩsɩ yomaa. 2 Ðɩnɛ ɛlɛ Izrayɛɛlɩ ɖuuni Yehowa se: «Ye ŋɖʋzɩ samaɣ kanɛ me-nesi taa yɔ, paa pɩɩlabɩ ɛzɩma yɔ, mankaɣ kɛ-tɛtʋ ɖɩzʋʋ.» 3 Nɛ Yehowa welisini Izrayɛɛlɩ mba nɛ ɛɖʋzɩ Kanaŋ mba pe-nesi taa, nɛ paɖɩzɩ pa nɛ pɛ-tɛtʋ. Pʋyɔɔ paya lone nɖɩ se Hɔrma.*+

4 Pakʋyɩnɩ Hɔr Pʋʋ taa+ nɛ pakpaɣ Teŋgu Kɩsɛɛmʋʋ nʋmɔʋ se pokoli Edom ɛjaɖɛ+ lɛ, nʋmɔʋ ɖɔm paɣzɩ samaɣ* nɩʋ. 5 Nɛ samaɣ wɛɛ nɛ kɔyɔɔdʋʋ tɔm kɩdɛkɛdɩtʋ Ɛsɔ nɛ Moyizi pɔ-yɔɔ+ nɛ kɔtɔŋ se: «Ɛbɛ yɔɔ ɩlɩzɩ-ɖʋ nɛ Ejipiti ɛjaɖɛ taa nɛ ɩkɔnɩ-ɖʋ se ɖɩsɩ kañɩmbusuu taa? Tɔɔnaɣ nakɛyɛ fɛyɩ nɛ lɩm ɖɔɖɔ fɛyɩ,+ kpɔnɔ kʋnɛ yɔ, kɩfɛyɩ wazaɣ nakɛyɛ nɛ kɩlɩ-ɖʋ* sɔŋ.»*+ 6 Ðɩnɛ ɛlɛ Yehowa tiyini ɖʋmaa mba pɛwɛ sɔtʋ* yɔ samaɣ hɛkʋ taa, nɛ pɛwɛɛ samaɣ ñasʋʋ yɔɔ, piyeba nɛ Izrayɛɛlɩ mba sakɩyɛ sɩ.+

7 Peeɖe samaɣ kɔm Moyizi cɔlɔ nɛ keheyi-i se: «Ðɩlabɩ kɩdɛkɛdɩm, mbʋ pʋyɔɔ yɔ ɖɩyɔɔdɩ tɔm kɩdɛkɛdɩtʋ Yehowa yɔɔ nɛ ñɔ-yɔɔ.+ Tendi Yehowa nɛ ɛlɩzɩ ɖʋmaa mba ɖɛ-hɛkʋ taa.» Peeɖe Moyizi tendi-i samaɣ yɔɔ.+ 8 Ðɩnɛ ɛlɛ Yehowa heyi Moyizi se: «Lu ɖʋm nɔɔyʋ weyi ɛwɛ sɔtʋ* yɔ ɛ-lɛzʋʋ nɛ ŋpuzi-i ɖaʋ nakʋyʋ yɔɔ. Nɛ ye pɩñasɩ nɔɔyʋ yɔ, pɩwɛɛ se ɛcɔnɩ ɖʋm ɛnʋ nɛ ɛpɩzɩ nɛ ɛwɛɛ wezuu.» 9 Kpaagbaa mbʋ lɛ, Moyizi kpaɣ ñɩɣyʋʋ kɩsɛɛmʋʋ nɛ elubini ɖʋm nɔɔyʋ+ nɛ epuzi-i ɖaʋ yɔɔ,+ nɛ ɖʋm ñasɩɣ ɛyʋ nɔɔyʋ nɛ ɛyʋ ɛnʋ ɛñɩtɩ nɛ ɛcɔnɩ ñɩɣyʋʋ kɩsɛɛmʋʋ ɖʋm lɛ, ɛwɛɣ wezuu.+

10 Pʋwayɩ lɛ, Izrayɛɛlɩ mba kʋyɩ nɛ powolo pesiɣ kizinzikiŋ Obɔɔtɩ.+ 11 Pʋwayɩ ɖɔɖɔ lɛ, pakʋyɩnɩ Obɔɔtɩ nɛ powolo pesiɣ kizinzikiŋ Iye-Abarim,+ kañɩmbusuu ŋgʋ kɩha ɛsa nɛ Mowaabʋ yɔ kɩ-taa, wɩsɩ ɖɩlɩyɛ taa kiŋ. 12 Pakʋyɩnɩ peeɖe lɛ, powolo pesiɣ kizinzikiŋ Zerɛɛdɩ Fɛɛʋ*+ cɔlɔ. 13 Pakʋyɩnɩ peeɖe lɛ, powolo pesiɣ kizinzikiŋ Arɩnɔɔnɩ+ egeetiye taa, ɖɩwɛ kañɩmbusuu ŋgʋ kɩpaɣzɩnɩ Amoori mba kamaɣ yɔɔ yɔ kɩ-taa, mbʋ pʋyɔɔ yɔ Arɩnɔɔnɩ kɛ Mowaabʋ kamaɣ, kɩwɛ Mowaabʋ nɛ Amoori mba pɛ-hɛkʋ taa. 14 Pʋyɔɔ Yehowa Yoŋ takayaɣ yɔɔdʋʋ «Vahɛɛb ŋgʋ kɩwɛ Sufa yɔ nɛ Arɩnɔɔnɩ fɛɛŋ,* 15 nɛ fɛɛŋ* kajalaŋa* ŋga kɛɖɛnɩ Ar egeetiye taa kiŋ nɛ katalɩ Mowaabʋ kamaɣ yɔɔ yɔ» kɔ-tɔm.

16 Pʋwayɩ lɛ, powolo Beyɛɛrɩ. Lɔkɔ ŋgʋ kɩ-yɔɔ Yehowa kaaheyi Moyizi se: «Kpeɣli samaɣ nɛ maha-kɛ lɩm.»

17 Alɩwaatʋ ndʋ tɩ-taa Izrayɛɛlɩ te hendu tʋnɛ:

«Yabɩtɩ, Oo lɔkɔ!—Itisi!*

Pʋwayɩ lɛ, pakʋyɩnɩ kañɩmbusuu taa nɛ pɛɖɛɛ Matana; 19 pakʋyɩnɩ Matana lɛ pɛɖɛɛ Nahaliyɛɛlɩ; nɛ pakʋyɩnɩ Nahaliyɛɛlɩ lɛ pɛɖɛɛ Bamɔɔtɩ.+ 20 Pakʋyɩnɩ Bamɔɔtɩ lɛ pɛɖɛɛ fɛɛʋ ŋgʋ kɩwɛ Mowaabʋ+ egeetiye* taa yɔ kɩ-taa, Pizɩga ñʋʋ taa,+ ŋgʋ kɩha ɛsa nɛ Yesimɔɔnɩ*+ yɔ.

21 Ðɩnɛ ɛlɛ Izrayɛɛlɩ tiyi ɛyaa Amoori mba wiyaʋ Sihɔɔnɩ cɔlɔ se peheyi-i se:+ 22 «Ha-ɖʋ nʋmɔʋ nɛ ɖɩtɩŋnɩ ñɛ-ɛjaɖɛ taa. Ðɩɩkaɣ hɛyʋʋ hayɩm yaa viiñi nakʋyʋ taa. Ðɩɩkaɣ lɔkɔ nakʋyʋ taa lɩm ñɔʋ. Ðɩkaɣ ɖɔm Wiyaʋ Habɩyɛ yɔɔ nɛ ɖɩtɛzɩ ñe-egeetiye.»+ 23 Paa mbʋ yɔ, Sihɔɔnɩ tɩha nʋmɔʋ Izrayɛɛlɩ se ɛtɩŋnɩ e-egeetiye taa. Ɛlɛ Sihɔɔnɩ yele nɛ ekpeɣli ɛ-samaɣ kpeekpe kikpeɣlu nɛ ɛlɩɩ Izrayɛɛlɩ wayɩ kañɩmbusuu taa; ɛtalɩ Yahaz lɛ, ɛpaɣzɩ Izrayɛɛlɩ yonuu.+ 24 Ɛlɛ Izrayɛɛlɩ wabɩ-ɩ nɛ laɣɖɛ+ nɛ ɛmʋ ɛ-ɛjaɖɛ+ kpaɣnɩ Arɩnɔɔnɩ+ nɛ piwolo Yaabɔɔkɩ,+ Amooni mba cɔlɔ, mbʋ pʋyɔɔ yɔ Yazɛɛrɩ+ kɛnɩ Amooni mba+ egeetiye kamaɣ.

25 Mbʋ Izrayɛɛlɩ mʋ tɛtʋ ndʋ tɩ-tɩŋa, pɩtɩkazɩ natʋyʋ; nɛ papaɣzɩ caɣʋ Amoori mba+ tɛtʋ kpeekpe taa, Hɛsɩbɔɔnɩ taa nɛ tɛtʋ ndʋ tɩ-tɩŋa tɩɩcɔ-kʋ nɛ tɩta yɔ tɩ-taa. 26 Mbʋ pʋyɔɔ yɔ Hɛsɩbɔɔnɩ kaakɛ Amoori mba wiyaʋ Sihɔɔnɩ tɛtʋ, eeyoni Mowaabʋ wiyaʋ nɛ ɛmʋ ɛ-tɛtʋ tɩŋa ɛ-cɔlɔ nɛ piwolo pɩtalɩ ɖooo Arɩnɔɔnɩ. 27 Mbʋ yebina nɛ potuki tɔm caʋ eduuye ɖɩnɛ:

«Kɔɔ Hɛsɩbɔɔnɩ.

Iyele nɛ pama Sihɔɔnɩ tɛtʋ nɛ pasɩɩ ti-tigiɖe camɩyɛ.

28 Mbʋ pʋyɔɔ yɔ miŋ nɩɩyɩ lɩnɩ Hɛsɩbɔɔnɩ, miŋ nzʋlʋmɩyɛ naɖɩyɛ lɩnɩ Sihɔɔnɩ tɛtʋ taa.

Ɛñaɣ Ar ŋgʋ kɩwɛ Mowaabʋ yɔ, ɛñaɣ Arɩnɔɔnɩ lona kʋkʋya kɩbaɣlaa.

29 Mowaabʋ, pɩtɔɔ-ŋ! Ña Kemɔɔsɩ+ samaɣ, pakaɣ-ŋ ɖɩzʋʋ!

Eyeki nɛ ɛ-pɩyalaa pɩsɩ kʋyʋʋ ɖʋyaa nɛ ɛ-pɛlaa ñapɩsɩ Amoori mba wiyaʋ Sihɔɔnɩ yomaa.

31 Mbʋ Izrayɛɛlɩ caɣ Amoori mba ɛjaɖɛ taa. 32 Pʋwayɩ lɛ, Moyizi tiyi abalaa nabɛyɛ se powolo nɛ pɔcɔŋ Yazɛɛrɩ.+ Pamʋ tɛtʋ ndɩ ndɩ ndʋ tɩɩcɔ-kʋ nɛ tɩta yɔ nɛ pɔɖɔɔnɩ tɩ-taa Amoori ñɩma mba paawɛ peeɖe yɔ. 33 Pʋwayɩ lɛ, papɩsɩ nɛ pakpaɣ Basaanɩ nʋmɔʋ kpaʋ yɔɔ. Nɛ Basaanɩ wiyaʋ Oogi+ nɛ ɛ-samaɣ kpeekpe palɩɩ se poyooni-wɛ Edreyi.+ 34 Nɛ Yehowa heyi Moyizi se: «Taase-i sɔɔndʋ,+ mbʋ pʋyɔɔ yɔ mankaɣ ɖʋzʋʋ ɛ nɛ ɛ-samaɣ kpeekpe nɛ ɛ-ɛjaɖɛ ñe-nesi tɛɛ,+ nɛ ŋkaɣ-ɩ labʋ ɖeyi ɖeyi ɛzɩ ŋŋlabʋ Amoori mba wiyaʋ Sihɔɔnɩ weyi ɛɛwɛ Hɛsɩbɔɔnɩ yɔ.»+ 35 Nɛ pɛwɛɛ ɛ nɛ ɛ-pɩyalaa nɛ ɛ-samaɣ kpeekpe pa-kʋʋ yɔɔ, nɛ pɩkɔɔ nɛ pɩsɩɩnɩ alɩwaatʋ ndʋ pɩtɩkazɩ ɛ-samaɣ taa nɔɔyʋ yɔ,+ nɛ pamʋ ɛ-ɛjaɖɛ.+

22 Pʋwayɩ lɛ, Izrayɛɛlɩ mba ɖɛɛ nɛ powolo nɛ pesiɣ kizinzikiŋ Mowaabʋ kañɩmbusuu kɛdɛɛnzɩ taa Yɔɔrdaŋ nɛ wayɩ, Yeriikoo ɛsɩndaa.+ 2 Ŋgʋ Zipɔɔrɩ pɩyalʋ Baalaakɩ+ kaana mbʋ payɩ Izrayɛɛlɩ labɩ Amoori mba yɔ, 3 nɛ samaɣ ŋga kɔ-yɔɔ lɛ, sɔɔndʋ kpa Mowaabʋ mba pɩŋŋ, mbʋ pʋyɔɔ yɔ kaaɖɔ kpem; toovenim taa lɛ, Izrayɛɛlɩ mba yɔɔ lɛ, sɔɔndʋ kpa Mowaabʋ mba siŋŋ nɛ pɩpɩsɩ-wɛ kʋdɔŋ.+ 4 Pʋyɔɔ Mowaabʋ mba heyi Madiyaŋ+ ɛzʋtʋyaa se: «Samaɣ kanɛ, kakaɣ tɔɔʋ mbʋ payɩ pɩcɔ-ɖʋ nɛ pɩta yɔ, ɛzɩ nɔ abalɩñɩnʋ tɔkʋʋ ñɩtʋ hayɩm taa yɔ.»

Pʋbʋ taa lɛ, Zipɔɔrɩ pɩyalʋ Baalaakɩ kaakɛnɩnɩ Mowaabʋ wiyaʋ. 5 Etiyi ɛyaa Beyɔɔrɩ pɩyalʋ Baalam cɔlɔ Petɔɔrɩ+ tɛtʋ taa. Tɛtʋ ndʋ tɩ-taa palʋlɩ-ɩ, nɛ tɩwɛ Pɔɔ* nɔɔ. Etiyaa se payaa-ɩ, ɛtɔm se: «Na! Samaɣ nakɛyɛ lɩnɩ Ejipiti. Kawadɩ tɛtʋ* yɔɔ* wala wala,+ nɛ kɛwɛ cɛɛkɛ mɛ-ɛsɩndaa cɩnɛ. 6 Mentendi-ŋ, kɔɔ nɛ ŋlɔ-m samaɣ ŋga kɔ-yɔɔ nɔɔ kɩdɛkɛdaɣ,+ mbʋ pʋyɔɔ yɔ kakɩlɩ-m ɖoŋ. Ðɩnɛ ɛlɛ pɩtɩla yɔ, manpɩzɩɣ nɛ mawabɩ-kɛ nɛ mɔnɖɔɔnɩ-kɛ ɛjaɖɛ taa, mbʋ pʋyɔɔ yɔ mansɩm camɩyɛ se ɛyʋ weyi ŋwazɩɣ-ɩ yɔ pɩɖɔŋnɩ-ɩ camɩyɛ; nɛ weyi ɛ-yɔɔ ŋlɔʋ nɔɔ kɩdɛkɛdaɣ yɔ piyou-i.»

7 Ðɩnɛ ɛlɛ Mowaabʋ ɛzʋtʋyaa nɛ Madiyaŋ ɛzʋtʋyaa pakpaɣ nʋmɔʋ, pɛkpɛndɩnɩ liidiye nɖɩ pɛhɛyɩɣ tɩyɩtʋ yɔɔ yɔ nɛ powolo Baalam+ cɔlɔ nɛ peheyi-i tɔm ndʋ Baalaakɩ yɔɔdaa yɔ. 8 Peeɖe eheyi-wɛ se: «Iɖoo cɩnɛ, nɛ mankaɣ-mɩ heyuu tɔm ndʋ payɩ Yehowa heyiɣ-m yɔ.» Nɛ Mowaabʋ awumbiya caɣ Baalam cɔlɔ.

9 Pʋwayɩ lɛ, Ɛsɔ kɔɔ Baalam cɔlɔ nɛ ɛpɔzɩ-ɩ se:+ «Abalaa mba pɛwɛ ñɔ-cɔlɔ yɔ mba pɛkɛnaa?» 10 Baalam cosi Ɛsɔ toovenim tʋ se: «Mowaabʋ wiyaʋ Baalaakɩ, Zipɔɔrɩ pɩyalʋ tiyini-wɛ se peheyi-m se: 11 “Na! Samaɣ ŋga kalɩnɩ Ejipiti ɛjaɖɛ taa yɔ, kawadɩ tɛtʋ* yɔɔ* wala wala. Kɔɔ nɛ ŋlɔ-m kɔ-yɔɔ nɔɔ kɩdɛkɛdaɣ.+ Pɩtɩla yɔ, mankaɣ pɩzʋʋ nɛ moyooni-kɛ nɛ mɔnɖɔɔnɩ-kɛ.”» 12 Ɛlɛ Ɛsɔ heyi Baalam se: «Taatɩŋ-wɛ. Pɩfɛyɩ se ŋlɔ samaɣ ŋga kɔ-yɔɔ nɔɔ kɩdɛkɛdaɣ, mbʋ pʋyɔɔ yɔ pawazɩ-kɛ.»+

13 Baalam kʋyɩ tanaŋ tɛɛ nɛ eheyi Baalaakɩ awumbiya se: «Ɩpɩsɩ mɩ-ɛjaɖɛ taa, mbʋ pʋyɔɔ yɔ Yehowa kizaa se mantaatɩŋ-mɩ.» 14 Ðɩnɛ ɛlɛ Mowaabʋ awumbiya ɖɛɛ nɛ papɩsɩ Baalaakɩ cɔlɔ nɛ peheyi-i se: «Baalam kizaa se ɛɛtɩŋɩɣ-ɖʋ.»

15 Ɛlɛ Baalaakɩ tasɩ tiyuu awumbiya lalaa, pakɩlɩ kajalaɣ mba ɖɔʋ nɛ pa-hɩla sɛwa nɛ pɩkɩlɩ kajalaɣ mba. 16 Pɔkɔɔ Baalam cɔlɔ nɛ peheyi-i se: «Tɔm tʋnɛ Zipɔɔrɩ pɩyalʋ Baalaakɩ yɔɔdaa: “Mentendi-ŋ, taayele nɛ nabʋyʋ ɖɩɣ-ŋ nʋmɔʋ nɛ ŋkizi mɔn-cɔlɔ kɔm, 17 mbʋ pʋyɔɔ yɔ mankaɣ-ŋ hɩɖɛ ɖʋʋ pɩdɩɩfɛyɩ nɛ mankaɣ labʋ mbʋ payɩ ŋheyiɣ-m se mala yɔ. Pʋyɔɔ lɛ, mentendi-ŋ, kɔɔ nɛ ŋlɔ-m samaɣ ŋga kɔ-yɔɔ nɔɔ kɩdɛkɛdaɣ.”» 18 Ɛlɛ Baalam cosi Baalaakɩ lɩmɖʋyaa se: «Paa Baalaakɩ ɛcɛlɩɣ-m ɛ-ɖɩɣa maɣmaɣ nɛ liidiye nɛ sika su ka-taa yɔ, maapɩzɩɣ nɛ mala nabʋyʋ nɛ pɩkaɖɩnɩ mɛ-Ɛsɔ Yehowa paɣtʋ, paa pɩtɩɩkɛ cikpem yaa sɔsɔm yɔ.+ 19 Ɛlɛ mentendi-mɩ, mɩ ɖɔɖɔ ɩcaɣ cɩnɛ ɖoo anɛ nɛ mantɩlɩ tɔm ndʋ Yehowa tasɩɣ-m heyuu yɔ.»+

20 Ðɩnɛ ɛlɛ Ɛsɔ kɔɔ Baalam cɔlɔ nɛ ɖoo nɛ eheyi-i se: «Ye abalaa mba pɔkɔma se paya-ŋ yɔ, tɩŋ-wɛ. Ɛlɛ tɔm ndʋ meheyiɣ-ŋ se ŋyɔɔdɩ yɔ, ti-ɖeke pɩwɛɛ se ŋyɔɔdɩ.»+ 21 Peeɖe Baalam kʋyɩ tanaŋ tɛɛ nɛ ɛñɔɔzɩ ɛ-kpaŋaɣ* nɛ ɛtɩŋ Mowaabʋ awumbiya.+

22 Ɛlɛ Ɛsɔ kɔ pana siŋŋ, mbʋ pʋyɔɔ yɔ ɛɛwɛɛ nɛ ɛɖɛɣ, nɛ Yehowa tiyiyu sɩŋ nʋmɔʋ taa se ɛɖɩɣ-ɩ nʋmɔʋ. Baalam kaacaɣ ɛ-kpaŋaɣ yɔɔ nɛ ɛ-lɩmɖʋyaa 2 kaawɛ ɛ-cɔlɔ. 23 Nɛ kpaŋaɣ na Yehowa tiyiyu sɩŋ nʋmɔʋ taa nɛ ɛkpɛ laɣɖɛ nɛ ɛɖɔkɩ lɛ, kañɩnɩ se kɛlɛɣzɩ nʋmɔʋ, nɛ kasʋʋ ñɩtʋ taa. Ɛlɛ Baalam paɣzɩ kpaŋaɣ mabʋ se kapɩsɩ nʋmɔʋ taa. 24 Pʋwayɩ lɛ, Yehowa tiyiyu sɩŋ nʋmɔʋ kpɩyɩsɔɔ ñɩŋgʋ nakʋyʋ taa, viiñi hayɩm 2 hɛkʋ taa, pɛɛ koloŋa kʋɖʋmaɣ kaawɛ nɩwaŋ yɔɔ nɛ lɛɛka nɩmɩyɛ yɔɔ. 25 Kpaŋaɣ na Yehowa tiyiyu lɛ, kamalɩnɩ koloŋa nɛ kɛsɛyɩ Baalam nɩŋgbaŋaɣ nɛ koloŋa; nɛ Baalam ɖaɣnɩ-kɛ paɣzʋʋ mabʋ.

26 Yehowa tiyiyu tasɩ ɖɛʋ nɛ ɛsɩndaa kiŋ nɛ ɛsɩŋ lone naɖɩyɛ taa, nɖɩ ɖɩwɛ kpɩyɩsɔɔ yɔ, ɖenɖe nʋmɔʋ nakʋyʋ fɛyɩ se pɛhɛyɩ nɩwaŋ yɔɔ yaa nɩmɩyɛ yɔɔ yɔ. 27 Kpaŋaɣ na Yehowa tiyiyu lɛ, kahɩnɩ Baalam tɛɛ, ɖɩnɛ ɛlɛ Baalam taa wɩɩ siŋŋ nɛ ɛwɛɛ kpaŋaɣ mabʋ yɔɔ nɛ ɛ-ɖaʋ. 28 Pɩkɛdaa lɛ, Yehowa la nɛ kpaŋaɣ paɣzɩ yɔɔdʋʋ,*+ kɔpɔzɩ Baalam se: «Ɛbɛ malabɩ-ŋ nɛ ŋmabɩ-m tam nabudozo mbʋ?»+ 29 Baalam cosi kpaŋaɣ se: «Malabɩ mbʋ, mbʋ pʋyɔɔ yɔ ŋpɛmɩ-m tɛtɛ. Ye maaɖɔkɩ laɣɖɛ yɔ maakʋ-ŋ!» 30 Ðɩnɛ ɛlɛ kpaŋaɣ pɔzɩ Baalam se: «Ɛzɩ mantɩkɛ ña-kpaŋaɣ ŋga kɔ-yɔɔ ŋcaɣ ñe-wezuu kpeekpe nɛ pɩkɔɔ nɛ pɩtalɩ sɔnɔ yɔ? Maatɛmɩ-ŋ labʋ mbʋ wiɖiyi?» Ecosi se: «Aayɩ!» 31 Ðɩnɛ ɛlɛ, Yehowa kuli Baalam ɛsa nɛ ɛna+ Yehowa tiyiyu sɩŋ nʋmɔʋ taa, ɛkpɛ laɣɖɛ nɛ ɛɖɔkɩ. Kpaagbaa mbʋ lɛ, eluŋ nɛ ɛpa ɛ-ɛsa nɛ tɛtʋ.

32 Nɛ Yehowa tiyiyu heyi-i se: «Ɛbɛ yɔɔ ŋmabɩ ña-kpaŋaɣ tam nabudozo mbʋ? Na! Mɔkɔmna se mankaɖɩnɩ-ŋ, mbʋ pʋyɔɔ yɔ ña-nʋmɔʋ ɛɛlakɩ nɔɔ kʋɖʋmaɣ nɛ mɔn-sɔɔlɩm.+ 33 Kpaŋaɣ na-m lɛ, kañɩnɩ se kɛlɛɣzɩ nʋmɔʋ tam nabudozo.+ Maɣzɩ se kataalɛɣzɩ nʋmɔʋ! Pɩtalʋʋnɩ lɛɛlɛɛyɔ yɔ, maatɛmɩ-ŋ kʋʋ nɛ meyele kpaŋaɣ.» 34 Baalam heyi Yehowa tiyiyu se: «Malabɩ kɩwɛɛkɩm, mbʋ pʋyɔɔ yɔ mantaana se ñaasɩŋnɩ nʋmɔʋ taa se ŋkatɩ-m. Lɛɛlɛɛyɔ ye ŋnaɣ se pɩfɛyɩ ɖeu yɔ manpɩsɩɣ.» 35 Ɛlɛ Yehowa tiyiyu heyi Baalam se: «Tɩŋ abalaa mba, ɛlɛ tɔm ndʋ meheyiɣ-ŋ yɔ, ti-ɖeke pɩwɛɛ se ŋyɔɔdɩ.» Ðɩnɛ ɛlɛ Baalam tɩŋ Baalaakɩ awumbiya mba nɛ powolo pa-nʋmɔʋ ɖɔm yɔɔ.

36 Baalaakɩ nɩwa se Baalam kɔma lɛ, ewolo kpaagbaa nɛ ɛkatɩ-ɩ Mowaabʋ tɛtʋ ndʋ tɩwɛ Arɩnɔɔnɩ kidiiliŋ yɔɔ yɔ tɩ-taa, egeetiye kamaɣ yɔɔ. 37 Baalaakɩ pɔzɩ Baalam se: «Mantitiyi se paya-ŋ yaa we? Ɛbɛ yɔɔ ŋtɩkɔɔ mɔn-cɔlɔ yɔ? Ŋmaɣzaa se maapɩzɩɣ nɛ manɖʋ-ŋ hɩɖɛ pɩŋŋ yaa we?»+ 38 Baalam cosi Baalaakɩ se: «Tɔ, lɛɛlɛɛyɔ mɔnkɔma lɛ. Ɛlɛ pakaɣ-m haʋ nʋmɔʋ se mɔyɔɔdɩ tɔm natʋyʋ? Tɔm ndʋ Ɛsɔ ɖʋʋ mɔ-nɔɔ taa yɔ, ti-ɖeke manpɩzɩɣ nɛ mɔyɔɔdɩ.»+

39 Nɛ Baalam tɩŋ Baalaakɩ, nɛ powolo nɛ patalɩ Kiriyatɩ-Huzɔɔtɩ. 40 Baalaakɩ laa naŋ nɛ heŋ nɛ etiyini ɖɔɖɔ Baalam nɛ awumbiya mba paawɛ ɛ-cɔlɔ yɔ. 41 Tɛʋ fem tanaŋ tɛɛ lɛ, Baalaakɩ kpaɣ Baalam nɛ ɛkpanɩ-ɩ Bamɔɔtɩ-Baalɩ; ɛwɛɣ peeɖe lɛ, ɛpɩzɩɣ nɛ ɛna samaɣ kpeekpe.+

23 Ðɩnɛ ɛlɛ Baalam heyi Baalaakɩ se: «Ma altaarunaa 7 lone ɖɩnɛ ɖɩ-taa,+ ñɔɔzɩ-m ɖɔɖɔ naŋ abalɩñɩŋ 7 nɛ ɛyaŋ 7.» 2 Kpaagbaa mbʋ lɛ, Baalaakɩ la ɖeyi ɖeyi ɛzɩ Baalam yɔɔdʋʋ yɔ. Nɛ Baalaakɩ nɛ Baalam palaa nɔ abalɩñɩnʋ kʋɖʋm nɛ ɛyaʋ kʋɖʋmʋʋ paa altaaru ŋgʋ lɛ kɩ-yɔɔ.+ 3 Pʋwayɩ lɛ, Baalam heyi Baalaakɩ se: «Caɣ ña-kɩlaʋ kɩñaɣzʋʋ cɔlɔ cɩnɛ, ma lɛ mɛnɖɛɣ. Pʋtɔma yɔ, Yehowa kaɣ-m ɛ-tɩ wɩlʋʋ. Tɔm ndʋ payɩ eheyiɣ-m yɔ, mankaɣ-ŋ tʋ heyuu.» Ðɩnɛ ɛlɛ ɛɖɛɛ nɛ ɛkpa piyaɣ nakɛyɛ ñʋʋ taa.

4 Pʋwayɩ lɛ, Ɛsɔ wɩlɩ ɛ-tɩ Baalam,+ nɛ Baalam heyi-i se: «Mensiɣ altaarunaa mba pa-lʋbɛ, manpɩlɩ-wɛ canzɩ canzɩ; nɛ malaa nɔ abalɩñɩnʋ kʋɖʋm nɛ ɛyaʋ kʋɖʋmʋʋ paa altaaru ŋgʋ lɛ kɩ-yɔɔ.» 5 Nɛ Yehowa ɖʋ tɔm Baalam nɔɔ taa nɛ eheyi-i se:+ «Pɩsɩ Baalaakɩ cɔlɔ, nɛ ŋheyi-i tɔm ndʋ.» 6 Ðɩnɛ ɛlɛ, ɛɖɛɛ nɛ ɛpɩsɩ nɛ ɛna se Baalaakɩ nɛ Mowaabʋ awumbiya tɩŋa paasɩŋ ɛ-kɩlaʋ kɩñaɣzʋʋ cɔlɔ. 7 Ðɩnɛ ɛlɛ etuu eduuye ɖɩnɛ:+

“Kɔɔ nɛ ŋlɔ-m nɔɔ kɩdɛkɛdaɣ Yakɔɔb yɔɔ.

Ɛɛɛ, kɔɔ nɛ ŋkʋ Izrayɛɛlɩ tɔm.”+

 8 Ɛzɩma manpɩzɩɣ nɛ mɔlɔ nɔɔ kɩdɛkɛdaɣ mba pɔ-yɔɔ Ɛsɔ tɩlɔ nɔɔ kɩdɛkɛdaɣ yɔ?

Nɛ ɛzɩma manpɩzɩɣ nɛ mankʋ mba Yehowa tɩkʋ pɔ-tɔm yɔ pɔ-tɔm?+

11 Ðɩnɛ ɛlɛ Baalaakɩ heyi Baalam se: «Ɛbɛ ŋlabɩ-m mbʋ yɔ? Mɔnkɔnɩ-ŋ se ŋlɔ nɔɔ kɩdɛkɛdaɣ mon-koyindinaa yɔɔ, ɛlɛ ñeyele nɛ ŋwazɩ-wɛ kɩwazʋ.»+ 12 Nɛ ɛlɛ kitini-i se: «Pɩtɩkɛ tɔm ndʋ Yehowa ɖʋʋ mɔ-nɔɔ taa yɔ pɩwɛɛ se mɔyɔɔdɩ yaa we?»+

13 Nɛ Baalaakɩ heyi-i se: «Mentendi-ŋ, tɩŋɩ-m nɛ ɖɩɖɛɛ lone lɛɛɖɛ taa, ɖenɖe ŋpɩzɩɣ nɛ ŋwɛɛ nɛ ŋna-wɛ yɔ. Pɔ-hɔɔlʋʋ nakʋyʋ ɖeke ŋkaɣ naʋ; ŋŋkaɣ pe-kpeekpe naʋ. Wɛɛ peeɖe nɛ ŋlɔ-m pɔ-yɔɔ nɔɔ kɩdɛkɛdaɣ.»+ 14 Ðɩnɛ ɛlɛ ɛkpaɣ-ɩ nɛ ewoni Zofim hayɩm taa, Pizɩga ñʋʋ taa,+ nɛ ɛma altaarunaa 7 nɛ ɛlaa nɔ abalɩñɩnʋ kʋɖʋm nɛ ɛyaʋ kʋɖʋmʋʋ paa altaaru ŋgʋ lɛ kɩ-yɔɔ.+ 15 Nɛ Baalam heyi Baalaakɩ se: «Caɣ ña-kɩlaʋ kɩñaɣzʋʋ cɔlɔ cɩnɛ nɛ mowolo peeɖeyɔ nɛ Ɛsɔ wɩlɩ-m ɛ-tɩ.» 16 Nɛ Yehowa wɩlɩ ɛ-tɩ Baalam nɛ ɛɖʋ tɔm ɛ-nɔɔ taa nɛ eheyi-i se:+ «Pɩsɩ Baalaakɩ cɔlɔ, nɛ ŋheyi-i tɔm ndʋ.» 17 Ðɩnɛ ɛlɛ ɛpɩsɩ ɛ-cɔlɔ nɛ ɛna se ɛɛsɩŋ ɛ-kɩlaʋ kɩñaɣzʋʋ cɔlɔ, nɛ Mowaabʋ awumbiya kaawɛ ɛ-cɔlɔ. Nɛ Baalaakɩ pɔzɩ-ɩ se: «Suwe Yehowa yɔɔdaa?» 18 Ðɩnɛ ɛlɛ etuu eduuye ɖɩnɛ:+

«Baalaakɩ, kʋyɩ nɛ ŋwelisi.

Oo Zipɔɔrɩ pɩyalʋ, welisini-m.

Ye ɛyɔɔdɩ natʋyʋ yɔ, ɛɛkaɣ labʋ ɛzɩ ɛyɔɔdʋʋ yɔ?

Ye tɔm natʋyʋ ɛlɩnɩ ɛ-nɔɔ taa yɔ, ɛɛkaɣ tɩ-yɔɔ ɖɔm yaa we?+

22 Ɛsɔ ɖiɣni-wɛ lɩzʋʋ nɛ Ejipiti.+

Ɛwɛ-wɛ ɛzɩ tɛyɛ nɔ abalɩñɩnʋ hɩŋ yɔ.+

Papɩzɩɣ nɛ pɔyɔɔdɩ Yakɔɔb nɛ Izrayɛɛlɩ yɔɔ lɛɛlɛɛyɔ se:

“Na mbʋ Ɛsɔ laba yɔ!”

25 Nɛ Baalaakɩ heyi Baalam se: «Ye ŋŋpɩzɩɣ pɔ-yɔɔ nɔɔ kɩdɛkɛdaɣ lɔʋ yɔ, pɩfɛyɩ ɖɔɖɔ se ŋwazɩ-wɛ.» 26 Baalam cosi Baalaakɩ se: «Mantaaheyi-ŋ se: “Malakɩ mbʋ payɩ Yehowa yɔɔdʋʋ yɔ”?»+

27 Nɛ Baalaakɩ heyi Baalam se: «Mentendi-ŋ, kɔɔ nɛ mantasɩ-ŋ wonuu lone lɛɛɖɛ taa. Pʋtɔma yɔ, pɩkaɣ wɛʋ ɖeu Ɛsɔ toovenim tʋ ɛsɩndaa se ŋwɛɛ peeɖe nɛ ŋlɔ-m pɔ-yɔɔ nɔɔ kɩdɛkɛdaɣ.»+ 28 Ðɩnɛ ɛlɛ Baalaakɩ kpaɣ Baalam nɛ ɛkpanɩ-ɩ Peyɔɔrɩ ñʋʋ taa, peeɖe kaaha ɛsa nɛ Yesimɔɔnɩ.*+ 29 Ðɩnɛ ɛlɛ Baalam heyi Baalaakɩ se: «Ma altaarunaa 7 lone ɖɩnɛ ɖɩ-taa, ñɔɔzɩ-m ɖɔɖɔ naŋ abalɩñɩŋ 7 nɛ ɛyaŋ 7.»+ 30 Nɛ Baalaakɩ la ɖeyi ɖeyi ɛzɩ Baalam yɔɔdʋʋ yɔ, nɛ ɛlaa nɔ abalɩñɩnʋ kʋɖʋm nɛ ɛyaʋ kʋɖʋmʋʋ paa altaaru ŋgʋ lɛ kɩ-yɔɔ.

24 Baalam nawa se pɩɩkɛdɩnɩ Yehowa* se ɛwazɩ Izrayɛɛlɩ mba lɛ, ɛtɩtasɩ wobu se ɛpɔzɩ piye nɛ ɛkɔnɩ pɔ-yɔɔ asɛyʋʋ,+ ɛlɛ ɛha ɛ-ɛsa nɛ kañɩmbusuu taa kiŋ. 2 Baalam kpazɩ ɛ-ɛsa nɛ ɛna Izrayɛɛlɩ mba siɣ pe-kizinzikiŋ cejewiye cejewiye lɛ,+ Ɛsɔ fezuu tii ɛ-yɔɔ.+ 3 Ðɩnɛ ɛlɛ etuu eduuye ɖɩnɛ:+

10 Ðɩnɛ ɛlɛ, Baalaakɩ kɔ pana siŋŋ nɛ Baalam. Nɛ Baalaakɩ ma e-nesi taa nɛ pana, nɛ eheyi Baalam se: «Maya-ŋ se ŋlɔ mon-koyindinaa yɔɔ nɔɔ kɩdɛkɛdaɣ,+ ɛlɛ ŋpɩsɩ nɛ ŋwazɩ-wɛ kɩwazʋ tam nabudozo. 11 Lɛɛlɛɛyɔ, pɩsɩ ñɛ-tɛ lɔŋ. Maaɖʋwa se manɖʋʋ-ŋ hɩɖɛ siŋŋ,+ ɛlɛ Yehowa pɛmɩ-ŋ hɩɖɛ ɖʋʋ.»

12 Baalam cosi Baalaakɩ se: «Ɛzɩ mantaaheyi ɛyaa mba ŋŋtiyaa yɔ se: 13 “Paa Baalaakɩ ɛcɛlɩ-m ɛ-ɖɩɣa nɛ liidiye nɛ sika su ka-taa yɔ, maapɩzɩɣ nɛ mala nabʋyʋ man-tɩ yɔɔ* nɛ pɩkaɖɩnɩ Yehowa paɣtʋ, paa pɩtɩɩkɛ kɩbam yaa kɩdɛkɛdɩm yɔ, nɛ tɔm ndʋ Yehowa heyiɣ-m yɔ, ti-ɖeke mankaɣ yɔɔdʋʋ”?+ 14 Lɛɛlɛɛyɔ lɛ, mowoki man-samaɣ cɔlɔ. Kɔɔ nɛ meheyi-ŋ mbʋ samaɣ kanɛ kakaɣ labʋ ña-samaɣ cee wayɩ yɔ.»* 15 Ðɩnɛ ɛlɛ etuu eduuye ɖɩnɛ:+

20 Ɛna Amalɛɛkɩ lɛ, ewolo e-eduuye yɔɔ nɛ ɛyɔɔdɩ se:

21 Ɛna Keni mba+ lɛ, ewolo e-eduuye yɔɔ nɛ ɛyɔɔdɩ se:

«Ña-ɖɩjaɣyɛ cɛyɩsɩ camɩyɛ, nɛ pama ña-ɖɩɣa kaaʋ yɔɔ.

22 Ɛlɛ nɔɔyʋ kaɣ ñaɣzʋʋ miŋ Kayiin.

Alɩwaatʋ ɛzɩma pɩkazaa pʋcɔ nɛ Asiirii ɖɛnɩ-ŋ yomiye taa?»

23 Nɛ ewolo pɩ-yɔɔ nɛ ɛtasɩ tuuu eduuye se:

«Pɩtɔɔ-mɩ! Akaɣ hiɣu ñʋʋ yabʋ alɩwaatʋ ndʋ Ɛsɔ lakɩ mbʋ yɔ?

Ɛlɛ ɛnʋ ɖɔɖɔ ɛkaɣ tɛŋɩlʋʋ caɣ caɣ.»

25 Pʋwayɩ lɛ, Baalam+ ɖɛɛ nɛ ɛpɩsɩ ɛ-tɛ. Baalaakɩ ɖɔɖɔ kpaɣ ɛ-nʋmɔʋ nɛ ɛɖɛɛ.

25 Izrayɛɛlɩ mba kaawɛ Sitiim+ lɛ, samaɣ nɛ Mowaabʋ pɛlaa papaɣzɩ kʋzʋʋ kɩdɛkɛdʋʋ wezuu caɣʋ.+ 2 Halaa kaaya samaɣ pɛ-ɛsɔnaa kɩlaŋ ɖeɖe,+ nɛ samaɣ paɣzɩ tɔɔʋ nɛ koluŋuu pɛ-ɛsɔnaa tɛɛ.+ 3 Mbʋ Izrayɛɛlɩ kpɛndɩ pɔ-yɔɔ nɛ pɛsɛɛ* Peyɔɔrɩ tɛ Baalɩ,+ nɛ Yehowa kɔ pana siŋŋ nɛ Izrayɛɛlɩ. 4 Yehowa heyi Moyizi se: «Kpa samaɣ kanɛ ke-ɖiyiyaa* kpeekpe nɛ ŋpuzi-wɛ ɖaŋ yɔɔ wɩsɩ kaalaŋa taa* Yehowa ɛsɩndaa, nɛ piyele nɛ pana sɔsɔna wena Yehowa kɔ nɛ Izrayɛɛlɩ yɔ ahɛɛ.» 5 Ðɩnɛ ɛlɛ, Moyizi heyi Izrayɛɛlɩ tɔm hʋyaa se:+ «Pɩwɛɛ se mɩ-taa paa weyi lɛ, ɛkʋ ɛ-ɛyaa mba pɛsɛ* Peyɔɔrɩ tɛ Baalɩ yɔ.»+

6 Peeɖe peeɖe lɛ, Izrayɛɛlɩ tʋ nɔɔyʋ talɩ e-koobiya cɔlɔ, ɛkɔnɩ Madiyaŋ halʋ+ nɔɔyʋ Moyizi nɛ Izrayɛɛlɩ samaɣ kpeekpe ɛsɩndaa, alɩwaatʋ ndʋ paba ɖiɣni wiu kediɣzaɣ kizinziku nɔnɔɔ taa yɔ. 7 Cɔjɔ Aarɔɔnɩ pɩyalʋ Eleyaazaarɩ pɩyalʋ Fineyaasɩ+ na mbʋ lɛ, ɛkʋyɩnɩ samaɣ hɛkʋ taa kpaagbaa nɛ ɛkpaɣ kɩgbɛzɛŋ nakʋyʋ. 8 Nɛ ɛtɩŋ Izrayɛɛlɩ abalʋ ɛnʋ nɛ ɛsʋʋ kizinziku tɛɛ nɛ ɛsɔ pa-naalɛ, Izrayɛɛlɩ abalʋ ɛnʋ nɛ halʋ ɛnʋ ɛ-halɩtʋ taa. Ðɩnɛ ɛlɛ, asɛyʋʋ ŋgʋ kɩtalɩ Izrayɛɛlɩ mba yɔ kɩsɩɩ tɩnaɣ.+ 9 Mba asɛyʋʋ ŋgʋ kɩɩkʋwa yɔ, paakpɛndɩ ɛyaa 24 000.+

10 Ðɩnɛ ɛlɛ Yehowa heyi Moyizi se: 11 «Cɔjɔ Aarɔɔnɩ pɩyalʋ Eleyaazaarɩ pɩyalʋ Fineyaasɩ+ hɛzɩ pana wena maakɔ nɛ Izrayɛɛlɩ samaɣ yɔ, mbʋ pʋyɔɔ yɔ ɛlabɩ sʋsɩ mɔ-yɔɔ pɛ-hɛkʋ taa.+ Pʋyɔɔ mantɩɖɩzɩ Izrayɛɛlɩ mba, paa mañɩnɩɣ se pɔñɔɔnɩ men-ɖeke koŋ yɔ.+ 12 Pʋyɔɔ lɛ, heyi-i se: “Mɛncɛlɩɣ-ɩ ma-laŋhɛzɩyɛ ɛgbɛyɛ. 13 Nɛ ɖɩkaɣ kɛʋ tamtam cɔjɔtʋ ɛgbɛyɛ ɛ nɛ ɛ-lʋlʋʋ taa mba,+ mbʋ pʋyɔɔ yɔ ɛlabɩ sʋsɩ ɛ-Ɛsɔ yɔɔ+ nɛ ɛlaba nɛ pekpeɣ Izrayɛɛlɩ samaɣ ka-kɩwɛɛkɩm.”»*

14 Izrayɛɛlɩ abalʋ weyi pakʋ ɛ nɛ Madiyaŋ halʋ yɔ ɛ-hɩɖɛ lɛ Zimirii, Salu pɩyalʋ, Siimeyɔɔ mba caanaa ɖɩɣa ñʋʋdʋ nɔɔyʋ. 15 Madiyaŋ halʋ weyi pakʋwa yɔ, ɛ-hɩɖɛ lɛ Kɔzɩbi, Zuuri+ pɛlɛ; Zuuri kaakɛ cejewiye naɖɩyɛ ñʋʋdʋ Madiyaŋ.+

16 Pʋwayɩ lɛ, Yehowa heyi Moyizi se: 17 «Ɩwɩlɩ Madiyaŋ mba ñaŋ nɛ ɩkʋ-wɛ,+ 18 mbʋ pʋyɔɔ yɔ patɩŋnɩ pa-ajitu lakasɩ yɔɔ nɛ pawɩlɩ-mɩ ñaŋ Peyɔɔrɩ+ tɔm taa nɛ Madiyaŋ mba ñʋʋdʋ nɔɔyʋ pɛlɛ Kɔzɩbi tɔm taa, po-koobu halɩñɩnʋ weyi pakʋ-ɩ+ asɛyʋʋ kɩyakʋ wiye Peyɔɔrɩ tɔm taa yɔ.»+

26 Asɛyʋʋ+ wayɩ lɛ, Yehowa heyi Moyizi nɛ cɔjɔ Aarɔɔnɩ pɩyalʋ Eleyaazaarɩ se: 2 «Ɩkalɩ Izrayɛɛlɩ samaɣ tɩŋa, ɩkalɩ mba payɩ pɛwɛnɩ kpaɣnɩ pɩnzɩ 20 nɛ pɩɖɛɛ nɛ papɩzɩɣ nɛ pala sɔɔjatʋ tʋmɩyɛ Izrayɛɛlɩ taa yɔ, pa-caanaa ɖɩsɩ nɔsɩ taa.»+ 3 Ðɩnɛ ɛlɛ Moyizi nɛ cɔjɔ Eleyaazaarɩ+ pɔyɔɔdɩnɩ-wɛ Mowaabʋ kañɩmbusuu kɛdɛɛnzɩ taa,+ Yɔɔrdaŋ nɔɔ, Yeriikoo+ cɔlɔ nɛ peheyi-wɛ se: 4 «Ɩkalɩ mba pɛwɛnɩ kpaɣnɩ pɩnzɩ 20 nɛ pɩɖɛɛ yɔ, ɛzɩ Yehowa ɖʋʋ paɣtʋ Moyizi yɔ.»+

Izrayɛɛlɩ pɩyalaa mba paalɩnɩ Ejipiti ɛjaɖɛ taa yɔ, mba yɔ: 5 Rubɛɛnɩ,+ Izrayɛɛlɩ kajalaɣ pɩɣa lɛ; Rubɛɛnɩ pɩyalaa+ yɔ: Hanɔɔkɩ mba hɔʋ lɩnɩ Hanɔɔkɩ taa; Paluu mba hɔʋ lɩnɩ Paluu taa; 6 Ɛsɩrɔɔnɩ mba hɔʋ lɩnɩ Ɛsɩrɔɔnɩ taa; Karɩmii mba hɔʋ lɩnɩ Karɩmii taa. 7 Rubɛɛnɩ mba hɔŋ lɛ; nɛ pɛ-ɛyaa mba pama pa-hɩla yɔ, paakpɛndɩ 43 730.+

8 Paluu pɩyalʋ lɛ Eliyaabɩ. 9 Nɛ Eliyaabɩ pɩyalaa yɔ Nemuwɛɛlɩ, Dataanɩ nɛ Abiram. Dataanɩ ɛnʋ nɛ Abiram, paakɛ samaɣ lone taa caɣyaa, mba kaakpɛndɩnɩ Kora nɛ ɛ-ɛyaa+ pɔ-yɔɔ nɛ pakaɖɩnɩ Moyizi+ nɛ Aarɔɔnɩ alɩwaatʋ ndʋ paakaɖɩnɩ Yehowa yɔ.+

10 Tɛtʋ kaaha tɩ-nɔɔ nɛ tilibi-wɛ. Kora ɛlɛ yɔ, ɛ nɛ mba patɩnaɣ ɛ-yɔɔ yɔ paasɩba alɩwaatʋ ndʋ miŋ ñaɣ abalaa 250 yɔ.+ Nɛ papɩsɩ kɩɖaʋ ŋgʋ papakɩnɩ lalaa yɔ.+ 11 Ɛlɛ Kora pɩyalaa taasɩ.+

12 Siimeyɔɔ+ pɩyalaa yɔ, pɔ-hɔŋ nɔsɩ taa: Nemuwɛɛlɩ mba hɔʋ lɩnɩ Nemuwɛɛlɩ taa; Yamiini mba hɔʋ lɩnɩ Yamiini taa; Yakiini mba hɔʋ lɩnɩ Yakiini taa; 13 Zeraa mba hɔʋ lɩnɩ Zeraa taa; Sawuuli mba hɔʋ lɩnɩ Sawuuli taa. 14 Siimeyɔɔ mba hɔŋ lɛ: Paakpɛndɩ 22 200.+

15 Gaadɩ+ pɩyalaa yɔ, pɔ-hɔŋ nɔsɩ taa: Zefonɩ mba hɔʋ lɩnɩ Zefonɩ taa; Agii mba hɔʋ lɩnɩ Agii taa; Suni mba hɔʋ lɩnɩ Suni taa; 16 Ozinii mba hɔʋ lɩnɩ Ozinii taa; Erii mba hɔʋ lɩnɩ Erii taa; 17 Arod mba hɔʋ lɩnɩ Arod taa; Arelii mba hɔʋ lɩnɩ Arelii taa. 18 Gaadɩ pɩyalaa hɔŋ lɛ, nɛ pɛ-ɛyaa mba pama pa-hɩla yɔ paakpɛndɩ 40 500.+

19 Yuuda+ pɩyalaa lɛ Ɛɛrɩ nɛ Onaanɩ.+ Ɛlɛ Ɛɛrɩ nɛ Onaanɩ paasɩbɩ Kanaŋ ɛjaɖɛ taa.+ 20 Nɛ Yuuda pɩyalaa yɔ, pɔ-hɔŋ nɔsɩ taa: Seelaa mba hɔʋ lɩnɩ Seelaa+ taa; Perɛɛzɩ mba hɔʋ lɩnɩ Perɛɛzɩ+ taa; Zeraa mba hɔʋ lɩnɩ Zeraa+ taa. 21 Nɛ Perɛɛzɩ pɩyalaa yɔ: Ɛsɩrɔɔnɩ mba hɔʋ lɩnɩ Ɛsɩrɔɔnɩ+ taa; Amuuli mba hɔʋ lɩnɩ Amuuli+ taa. 22 Yuuda hɔŋ lɛ; nɛ pɛ-ɛyaa mba pama pa-hɩla yɔ paakpɛndɩ 76 500.+

23 Isakaarɩ+ pɩyalaa yɔ, pɔ-hɔŋ nɔsɩ taa: Tola mba hɔʋ lɩnɩ Tola+ taa; Puni mba hɔʋ lɩnɩ Puva taa; 24 Yasuub mba hɔʋ lɩnɩ Yasuub taa; Simirɔɔnɩ mba hɔʋ lɩnɩ Simirɔɔnɩ taa. 25 Isakaarɩ hɔŋ lɛ, nɛ pɛ-ɛyaa mba pama pa-hɩla yɔ paakpɛndɩ 64 300.+

26 Zebulɔɔnɩ+ pɩyalaa yɔ, pɔ-hɔŋ nɔsɩ taa: Serɛɛdɩ mba hɔʋ lɩnɩ Serɛɛdɩ taa; Elɔɔnɩ mba hɔʋ lɩnɩ Elɔɔnɩ taa; Yaleyɛɛlɩ mba hɔʋ lɩnɩ Yaleyɛɛlɩ taa. 27 Zebulɔɔnɩ mba hɔŋ lɛ, nɛ pɛ-ɛyaa mba pama pa-hɩla yɔ paakpɛndɩ 60 500.+

28 Yosɛɛfʋ+ pɩyalaa yɔ, pɔ-hɔŋ nɔsɩ taa: Manaasee nɛ Efrayim.+ 29 Manaasee+ pɩyalaa yɔ: Makiir mba hɔʋ lɩnɩ Makiir+ taa; nɛ Makiir pɩyalʋ lɛ Galaadɩ;+ Galaadɩ mba hɔʋ lɩnɩ Galaadɩ taa. 30 Galaadɩ pɩyalaa yɔ: Iyezɛɛrɩ mba hɔʋ lɩnɩ Iyezɛɛrɩ taa; Helɛɛkɩ mba hɔʋ lɩnɩ Helɛɛkɩ taa; 31 Asɩriyɛɛlɩ mba hɔʋ lɩnɩ Asɩriyɛɛlɩ taa; Sekɛɛm mba hɔʋ lɩnɩ Sekɛɛm taa; 32 Semida mba hɔʋ lɩnɩ Semida taa; Hefɛɛrɩ mba hɔʋ lɩnɩ Hefɛɛrɩ taa. 33 Ɛlɛ, Hefɛɛrɩ pɩyalʋ Selofehaadɩ taawɛɛnɩ abalɩbɩɣa nakɛyɛ, halɩbiya ɖeke ɛɛwɛna;+ Selofehaadɩ pɛlaa+ hɩla yɔ: Maala, Noowa, Hogɩla, Milka nɛ Tiriza. 34 Manaasee hɔŋ lɛ; nɛ pɛ-ɛyaa mba pama pa-hɩla yɔ paakpɛndɩ 52 700.+

35 Efrayim+ pɩyalaa yɔ, pɔ-hɔŋ nɔsɩ taa: Sutelaa mba hɔʋ lɩnɩ Sutelaa+ taa; Beekɛɛrɩ mba hɔʋ lɩnɩ Beekɛɛrɩ taa; Tahaanɩ mba hɔʋ lɩnɩ Tahaanɩ taa. 36 Nɛ Sutelaa pɩyalaa yɔ: Eraanɩ mba hɔʋ lɩnɩ Eraanɩ taa. 37 Efrayim pɩyalaa hɔŋ lɛ; nɛ pɛ-ɛyaa mba pama pa-hɩla yɔ paakpɛndɩ 32 500.+ Yosɛɛfʋ pɩyalaa lɛ, pɔ-hɔŋ nɔsɩ taa.

38 Bɛnjamɛɛ+ pɩyalaa yɔ, pɔ-hɔŋ nɔsɩ taa: Beela mba hɔʋ lɩnɩ Beela+ taa; Asɩbɛɛlɩ mba hɔʋ lɩnɩ Asɩbɛɛlɩ taa; Ahiram mba hɔʋ lɩnɩ Ahiram taa; 39 Sufam mba hɔʋ lɩnɩ Sefufam taa; Ufam mba hɔʋ lɩnɩ Ufam taa. 40 Beela pɩyalaa lɛ Arɩdɩ nɛ Namaanɩ:+ Arɩdɩ mba hɔʋ lɩnɩ Arɩdɩ taa; Namaanɩ mba hɔʋ lɩnɩ Namaanɩ taa. 41 Bɛnjamɛɛ pɩyalaa lɛ, pɔ-hɔŋ nɔsɩ taa, nɛ pɛ-ɛyaa mba pama pa-hɩla yɔ paakpɛndɩ 45 600.+

42 Daanɩ+ pɩyalaa yɔ, pɔ-hɔŋ nɔsɩ taa: Suham mba hɔʋ lɩnɩ Suham taa. Daanɩ hɔŋ lɛ, pɔ-hɔŋ nɔsɩ taa. 43 Suham mba hɔŋ tɩŋa taa ɛyaa mba pama pa-hɩla yɔ paakpɛndɩ 64 400.+

44 Asɛɛrɩ+ pɩyalaa yɔ, pɔ-hɔŋ nɔsɩ taa: Iminaa mba hɔʋ lɩnɩ Iminaa taa; Isivii mba hɔʋ lɩnɩ Isivii taa; Beriya mba hɔʋ lɩnɩ Beriya taa; 45 Beriya pɩyalaa taa lɛ Hebɛɛrɩ mba hɔʋ lɩnɩ Hebɛɛrɩ taa nɛ Malɩkiiyɛɛlɩ mba hɔʋ lɩɩnɩ Malɩkiiyɛɛlɩ taa. 46 Payaɣaɣ Asɛɛrɩ pɛlɛ se Sera. 47 Asɛɛrɩ pɩyalaa hɔŋ lɛ, nɛ pɛ-ɛyaa mba pama pa-hɩla yɔ paakpɛndɩ 53 400.+

48 Naftalii+ pɩyalaa yɔ, pɔ-hɔŋ nɔsɩ taa: Yazeyɛɛlɩ mba hɔʋ lɩnɩ Yazeyɛɛlɩ taa; Guuni mba hɔʋ lɩnɩ Guuni taa; 49 Yezɛɛrɩ mba hɔʋ lɩnɩ Yezɛɛrɩ taa; Silɛɛm mba hɔʋ lɩnɩ Silɛɛm taa. 50 Naftalii hɔŋ lɛ, pɔ-hɔŋ nɔsɩ taa, nɛ pɛ-ɛyaa mba pama pa-hɩla yɔ paakpɛndɩ 45 400.+

51 Izrayɛɛlɩ ñɩma mba pama pa-hɩla yɔ pa-tɩŋa paakpɛndɩ 601 730.+

52 Pʋwayɩ lɛ, Yehowa heyi Moyizi se: 53 «Ɛyaa panɛ, mba patayɩɣ tɛtʋ nɛ tɩpɩsɩ pa-ñɩm, ɛzɩ pamaʋ pa-hɩla yɔ.*+ 54 Tindima wena a-taa ɛyaa ɖɔwa yɔ, pɩwɛɛ se a-tɛtʋ ɛɖɔɔ, piyele nɛ tindima wena a-taa ɛyaa tɩɖɔɔ yɔ, pɩwɛɛ se a-tɛtʋ ɛwɛɛ ññɩɩ.+ Paa tindimiye nɖɩ lɛ, pɩwɛɛ se pɛcɛlɩ-ɖɩ tɛtʋ nɛ tɩmʋnɩ ɖɩ-taa ɛyaa mba pama pa-hɩla yɔ pɔɖɔ ɖɔʋ mbʋ yɔ. 55 Ɛlɛ piye pɩwɛɛ se pɔtɔ nɛ patayɩnɩ tɛtʋ.+ Pa-caanaa cejewe hɩla nɔsɩ taa pɩwɛɛ se pamʋ pa-ñɩm. 56 Paa ñɩm mbʋ lɛ, piye pɔtɔʋ nɛ patayɩnɩ-pʋ, nɛ pɩwɛɛ se pɩmʋnɩ tindima taa ɛyaa ɖɔ ɖɔʋ mbʋ yɔ.»

57 Leevi ñɩma mba pama pa-hɩla yɔ mba yɔ,+ pɔ-hɔŋ nɔsɩ taa: Gɛrɩsɔɔnɩ mba hɔʋ lɩnɩ Gɛrɩsɔɔnɩ taa; Kehaatɩ mba hɔʋ lɩnɩ Kehaatɩ+ taa; Merarii mba hɔʋ lɩnɩ Merarii taa. 58 Leevi mba hɔŋ yɔ: Libinii mba hɔʋ,+ Ebrɔŋ mba hɔʋ,+ Maalii mba hɔʋ,+ Muusi mba hɔʋ,+ Kora mba hɔʋ.+

Amɩram caa yɔ Kehaatɩ.+ 59 Payaɣaɣ Amɩram halʋ se Yokebɛɛdɩ,+ ɛɛkɛ Leevi pɛlɛ, weyi Leevi halʋ lʋlɩnɩ-ɩ Ejipiti yɔ. Amɩram halʋ lʋlɩ-ɩ Aarɔɔnɩ, Moyizi nɛ pɔ-kɔɔ Miriyam.+ 60 Pʋwayɩ lɛ, Aarɔɔnɩ lʋlɩ Naadaabʋ, Abihu, Eleyaazaarɩ nɛ Itamaarɩ.+ 61 Ɛlɛ Naadaabʋ nɛ Abihu paba sɩ, mbʋ pʋyɔɔ yɔ powoni Yehowa ɛsɩndaa miŋ weyi pɩtɩha-wɛ nʋmɔʋ se powona yɔ.+

62 Abalaa mba payɩ pama pa-hɩla yɔ, mba payɩ paawɛnɩ kpaɣnɩ fenaɣ nɛ pɩɖɛɛ yɔ paakpɛndɩ 23 000.+ Pataakpɛndɩ pa-hɩla nɛ Izrayɛɛlɩ mba lalaa hɩla nɛ pama,+ mbʋ pʋyɔɔ yɔ pɩtaawɛɛ se paha-wɛ ñɩm nabʋyʋ Izrayɛɛlɩ mba hɛkʋ taa.+

63 Ɛyaa mba, pa-hɩla Moyizi nɛ cɔjɔ Eleyaazaarɩ pamawa alɩwaatʋ ndʋ pama Izrayɛɛlɩ mba hɩla Mowaabʋ kañɩmbusuu kɛdɛɛnzɩ taa Yɔɔrdaŋ nɔɔ, Yeriikoo cɔlɔ yɔ. 64 Ɛlɛ mba pa-hɩla Moyizi nɛ cɔjɔ Aarɔɔnɩ paamawa alɩwaatʋ ndʋ paakalɩ Izrayɛɛlɩ mba nɛ pama pa-hɩla Sinayii kañɩmbusuu taa yɔ, pa-taa nɔɔyʋ taawɛɛ pɛ-hɛkʋ taa.+ 65 Mbʋ pʋyɔɔ yɔ, Yehowa kaayɔɔdɩ pɔ-tɔm se: «Paa pɩɩlabɩ ɛzɩma yɔ, pakaɣ sɩbʋ kañɩmbusuu taa.»+ Pʋyɔɔ lɛ, pɩtɩkazɩ pa-taa nɔɔyʋ nɛ pɩtasɩnɩ Yefunee pɩyalʋ Kalɛɛbɩ nɛ Nuuni pɩyalʋ Yozuwee.+

27 Pʋwayɩ lɛ, Selofehaadɩ weyi ɛɛkɛ Hefɛɛrɩ pɩyalʋ, Galaadɩ pɩyalʋ, Makiir pɩyalʋ, Manaasee pɩyalʋ nɛ ɛlɩnɩ Yosɛɛfʋ pɩyalʋ Manaasee hɔŋ taa yɔ, ɛ-pɛlaa+ kɔɔ. Ɛ-pɛlaa hɩla yɔ: Maala, Noowa, Hogɩla, Milka nɛ Tiriza. 2 Pɔkɔma nɛ pasɩŋ Moyizi, cɔjɔ Eleyaazaarɩ, sɔsaa+ nɛ samaɣ kpeekpe ɛsɩndaa kediɣzaɣ kizinziku nɔnɔɔ taa nɛ pɔyɔɔdɩ se: 3 «Ða-caa sɩbɩ kañɩmbusuu taa, ɛlɛ ɛtaawɛɛ mba paalabɩ nɔɔ nɛ pakaɖɩnɩ Yehowa yɔ pa-taa, mba paatɩnɩ Kora yɔɔ yɔ,+ ɛlɛ ɛ-maɣmaɣ ɛ-kɩwɛɛkɩm yɔɔ ɛsɩba nɛ ɛtaawɛɛnɩ abalɩbɩɣa. 4 Ɛbɛ yɔɔ pɩwɛɛ se ɖa-caa hɩɖɛ ɛɖɩ ɛ-hɔʋ taa mbʋ pʋyɔɔ yɔ ɛfɛyɩnɩ abalɩbɩɣa? Ha-ɖʋ tɛtʋ ɖa-caa koobiya hɛkʋ taa.» 5 Nɛ Moyizi tanɩ pɔ-tɔm Yehowa ɛsɩndaa.+

6 Ðɩnɛ ɛlɛ Yehowa heyi Moyizi se: 7 «Selofehaadɩ pɛlaa wɛnɩ toovenim. Pɩcɛyɩ kpem se ŋha-wɛ tɛtʋ pa-caa koobiya hɛkʋ taa nɛ tɩpɩsɩ pa-ñɩm, nɛ ŋyele nɛ pa-caa ñɩm pɩsɩ pa-ñɩmbʋ.+ 8 Nɛ pɩwɛɛ se ŋheyi Izrayɛɛlɩ mba se: “Ye abalʋ nɔɔyʋ ɛsɩba nɛ ɛfɛyɩnɩ abalɩbɩɣa yɔ, pɩwɛɛ se iyele nɛ ɛ-ñɩm pɩsɩ ɛ-pɛlɛ ñɩmbʋ. 9 Nɛ ye ɛfɛyɩnɩ halɩbɩɣa yɔ, ɩkaɣ cɛlʋʋ ɛ-ñɩm ɛ-ɖalaa yaa e-newaa abalɩñɩma. 10 Nɛ ye ɛfɛyɩnɩ ɖalʋ yaa neu abalɩñɩnʋ nɔɔyʋ yɔ, ɩkaɣ cɛlʋʋ ɛ-ñɩm ɛ-caa ɖalaa yaa ɛ-caa newaa abalɩñɩma. 11 Nɛ ye ɛ-caa ɛfɛyɩnɩ ɖalʋ yaa neu abalɩñɩnʋ nɔɔyʋ yɔ, ɩkaɣ cɛlʋʋ ɛ-ñɩm ɛ-hɔʋ taa abalʋ weyi ɛ nɛ ɩ paka calɩm nɛ ɛkɩlɩ-ɩ ñɔtɩnʋʋ yɔ, nɛ pɩpɩsɩ ɛlɛ ñɩm. Tɔm hʋʋ paɣtʋ tʋnɛ tɩkaɣ kɛʋ paɣtʋ ndʋ tɩ-yɔɔ pɩwɛɛ se Izrayɛɛlɩ mba ɩɖɔ yɔ, ɛzɩ Yehowa ɖʋʋ paɣtʋ Moyizi yɔ.”»

12 Pʋwayɩ lɛ Yehowa heyi Moyizi se: «Kpa Abarim pʋʋ+ kʋnɛ kɩ-yɔɔ nɛ ŋcɔnɩ ɛjaɖɛ nɖɩ mankaɣ cɛlʋʋ Izrayɛɛlɩ mba yɔ.+ 13 Ŋtɛŋ-ɖɩ naʋ lɛ, pakaɣ ña ɖɔɖɔ kpɛndʋʋ ña-samaɣ yɔɔ*+ ɛzɩ ña-ɖalʋ Aarɔɔnɩ yɔ,+ 14 mbʋ pʋyɔɔ yɔ alɩwaatʋ ndʋ samaɣ yowaɣni-m Ziini kañɩmbusuu taa yɔ, ɩmanɩ paɣtʋ ndʋ manɖʋwa se ɩwɩlɩ se mɛnkɛ kiɖeɖeu* pɛ-ɛsɩndaa lɩm tɔm taa yɔ tɩ-yɔɔ.+ Lɩm mbʋ lɛ Meriba lɩm,+ Kadɛɛsɩ+ taa, Ziini kañɩmbusuu taa.»+

15 Ðɩnɛ ɛlɛ Moyizi heyi Yehowa se: 16 «Yehowa, Ɛsɔ weyi ɛhaɣ ɛyaa kpeekpe wezuu yɔ* ɛlɩzɩ ɛyʋ nɔɔyʋ nɛ eɖiyi samaɣ, 17 ɛyʋ weyi ɛlɩɣ nɛ ɛsʋʋ pɛ-ɛsɩndaa yɔ, weyi eɖiyiɣ-wɛ nɛ ɛlɩna nɛ ɛpɩsɩnɩ-wɛ yɔ, nɛ Yehowa samaɣ ɛtaawɛɛ ɛzɩ heŋ weyi ɩfɛyɩnɩ ninɖiɣyu yɔ.» 18 Ðɩnɛ ɛlɛ Yehowa heyi Moyizi se: «Kpaɣ Nuuni pɩyalʋ Yozuwee, ɛyʋ weyi ɛ-taa wɛ fezuu yɔ nɛ ŋtɩnɩ ñe-nesi ɛ-yɔɔ.+ 19 Pʋwayɩ lɛ ŋsɩnzɩ-ɩ cɔjɔ Eleyaazaarɩ nɛ samaɣ kpeekpe ɛsɩndaa, nɛ ŋsɩɩ-ɩ ɖiyiyu pɛ-ɛsɩndaa.+ 20 Pɩwɛɛ se ŋha-ɩ ño-ɖoŋ* hɔɔlʋʋ nakʋyʋ+ nɛ Izrayɛɛlɩ samaɣ kpeekpe welisini-i.+ 21 Ɛkaɣ sɩŋʋʋ cɔjɔ Eleyaazaarɩ ɛsɩndaa, nɛ ɛlɛ kaɣ tɩŋnʋʋ Uriim+ yɔɔ nɛ ɛpɔzɩ Yehowa se ɛwɩlɩ-ɩ ɛ-lɩmaɣza. Ɛnʋ kaɣnɩ paɣtʋ ɖʋʋ pʋcɔ nɛ palɩɩ nɛ ɛnʋ kaɣnɩ paɣtʋ ɖʋʋ pʋcɔ nɛ pasʋʋ, ɛ nɛ Izrayɛɛlɩ mba kpeekpe nɛ samaɣ kpeekpe.»

22 Nɛ Moyizi la ɖeyi ɖeyi ɛzɩ Yehowa ɖʋʋ-ɩ paɣtʋ yɔ. Ɛkpaɣ Yozuwee nɛ ɛsɩnzɩ-ɩ cɔjɔ Eleyaazaarɩ nɛ samaɣ kpeekpe ɛsɩndaa, 23 nɛ ɛtɩnɩ e-nesi ɛ-yɔɔ nɛ ɛsɩɩ-ɩ ɖiyiyu,+ ɛzɩ Yehowa tɩŋnʋʋ Moyizi yɔɔ nɛ ɛyɔɔdɩ yɔ.+

28 Pʋwayɩ lɛ, Yehowa heyi Moyizi se: 2 «Ðʋ Izrayɛɛlɩ mba paɣtʋ nɛ ŋheyi-wɛ se: “Ɩtaasɔɔ se ɩkɔnɩ-m ma-haɖɛ, mɔn-kpɔnɔ. Pɩwɛɛ se kɩlaŋ weyi palaɣ-m nɛ pañaɣzɩɣ-ɩ miŋ se pɩkɛnɩ sɔzɩŋ weyi ɛkɛdɩɣnɩ-m yɔ,* palaa-ɩ ɩ-alɩwaatʋ yɔɔ.”+

3 «Heyi-wɛ ɖɔɖɔ se: “Mbʋ pɩwɛɛ se ɩkɔna nɛ palaanɩ kɩlaʋ ŋgʋ pañaɣzɩɣ-kʋ miŋ Yehowa yɔ mbʋ yɔ: heɣsi abalɩñɩnzɩ 2 nzɩ sɩfɛyɩnɩ ɛjandʋ natʋyʋ nɛ sɩwɛnɩ pɩnaɣ kʋɖʋmaɣ yɔ paa evemiye nɖɩ nɛ pɩkɛnɩ kɩlaʋ kɩñaɣzʋʋ ɖoŋ ɖoŋ.+ 4 Pɩwɛɛ se ŋlaa heɣa abalɩñɩŋga kʋɖʋmaɣ tanaŋ tɛɛ, nɛ wɩsɩ ɖʋʋ* lɛ,+ ŋlaa heɣa abalɩñɩŋga lɛɛka 5 pɩkpɛndɩnɩ mʋlʋm mbʋ pɩkpɩzɩ camɩyɛ yɔ efa hɔɔlʋʋ 10 ñɩŋgʋ,* mbʋ pesidi-pʋ nɛ oliivi pee wena pɔsɔbɩ-yɛ yɔ a-num hiini* hɔɔlʋʋ 4 ñɩŋgʋ nɛ pɩkɛnɩ tɔɔnaɣ pee kɩlaʋ.+ 6 Pɩkɛnɩ kɩlaʋ kɩñaɣzʋʋ ŋgʋ palaɣ ɖoŋ ɖoŋ yɔ,+ ŋgʋ paɖʋ paɣtʋ Sinayii Pʋʋ yɔɔ se palaɣ nɛ pɩkɛnɩ kɩlaʋ ŋgʋ pañaɣzɩɣ-kʋ miŋ nɛ kɩ-sɔzɩŋ kɛdɩɣnɩ Yehowa yɔ,* 7 pɩkpɛndɩnɩ hiini hɔɔlʋʋ 4 ñɩŋgʋ nɛ pɩkɛnɩ kilizaɣ paa heɣa abalɩñɩŋga ŋga lɛ kɔ-yɔɔ.+ Pɩwɛɛ se papɩyɩ sʋlʋm kɩbɩbɩm lone kiɖeɖeye taa nɛ pɩkɛnɩ kilizaɣ Yehowa. 8 Nɛ wɩsɩ ɖʋʋ* lɛ, ŋlaa heɣa abalɩñɩŋga lɛɛka. Pɩwɛɛ se ŋkpaɣ tɔɔnaɣ pee kɩlaʋ nɛ kilizaɣ ɛzɩ ŋŋkpaɣʋ tanaŋ tɛɛ ɖeyi ɖeyi yɔ nɛ ŋlaanɩ-kɛ, nɛ pɩkɛnɩ kɩlaʋ ŋgʋ pañaɣzɩɣ-kʋ miŋ nɛ kɩ-sɔzɩŋ kɛdɩɣnɩ Yehowa yɔ.*+

9 «“Ɛlɛ Sabaatɩ wiye+ lɛ, kɩlaʋ ŋgʋ palaɣ yɔ kɩkɛɣnɩ pɩnaɣ kʋɖʋmaɣ heɣsi abalɩñɩnzɩ 2 nzɩ sɩfɛyɩnɩ ɛjandʋ natʋyʋ yɔ, pɩkpɛndɩnɩ ki-kilizaɣ, nɛ mʋlʋm mbʋ pɩkpɩzɩ camɩyɛ yɔ efa hɔɔlɩŋ 2 hɔɔlɩŋ 10 taa, mbʋ pesidi-pʋ nɛ num yɔ nɛ pɩkɛnɩ tɔɔnaɣ pee kɩlaʋ. 10 Sabaatɩ kɩlaʋ kɩñaɣzʋʋ lɛ, pɩkpɛndɩnɩ kɩlaʋ kɩñaɣzʋʋ ŋgʋ palaɣ ɖoŋ ɖoŋ yɔ nɛ ki-kilizaɣ.+

11 «“Paa fenaɣ ŋga ka-ɖɩbazɩyɛ lɛ,* pɩwɛɛ se iwoni naŋ* abalɩñɩŋ 2, ɛyaʋ kʋɖʋmʋʋ nɛ heɣsi abalɩñɩnzɩ 7 nzɩ sɩfɛyɩnɩ ɛjandʋ natʋyʋ nɛ paa ŋga lɛ kɛwɛnɩ pɩnaɣ kʋɖʋmaɣ yɔ, nɛ pɩkɛnɩ kɩlaʋ kɩñaɣzʋʋ Yehowa,+ 12 nɛ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ kɩmaɣzʋʋ hɔɔlɩŋ 3 hɔɔlɩŋ 10 taa nɛ pɩkɛnɩ tɔɔnaɣ pee kɩlaʋ+ paa nɔ abalɩñɩnʋ weyi lɛ ɛ-ñʋʋ taa, nɛ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ kɩmaɣzʋʋ hɔɔlɩŋ 2 hɔɔlɩŋ 10 taa nɛ pɩkɛnɩ tɔɔnaɣ pee kɩlaʋ ɛyaʋ ñʋʋ taa,+ 13 nɛ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ kɩmaɣzʋʋ hɔɔlʋʋ 10 ñɩŋgʋ nɛ pɩkɛnɩ tɔɔnaɣ pee kɩlaʋ paa heɣa abalɩñɩŋga ŋga lɛ ka-ñʋʋ taa, nɛ pɩkɛnɩ kɩlaʋ kɩñaɣzʋʋ, kɩlaʋ ŋgʋ pañaɣzɩɣ miŋ nɛ kɩ-sɔzɩŋ kɛdɩɣnɩ Yehowa yɔ.*+ 14 Nɛ kɩlaŋ ɛnɩ i-kilizasɩ kɛɣnɩ vɛɛ hiini hɔɔlʋʋ nɔ abalɩñɩnʋ ñʋʋ taa,+ nɛ hiini hɔɔlʋʋ 3 ñɩŋgʋ ɛyaʋ ñʋʋ taa+ nɛ hiini hɔɔlʋʋ 4 ñɩŋgʋ heɣa abalɩñɩŋga kʋɖʋmaɣ ñʋʋ taa.+ Pɩnaɣ tɩŋa taa lɛ, kɩlaʋ kɩñaɣzʋʋ ŋgʋ pɩwɛɛ se palaa paa fenaɣ ŋga. 15 Pɩtasɩ lɛ, pɩwɛɛ se palaa pʋnʋ* kʋɖʋm Yehowa nɛ pɩkɛnɩ kɩwɛɛkɩm yɔɔ kɩlaʋ nɛ pɩtasɩnɩ kɩlaʋ kɩñaɣzʋʋ ŋgʋ palaɣ ɖoŋ ɖoŋ yɔ nɛ ki-kilizaɣ.

16 «“Kajalaɣ fenaɣ kɩyakʋ 14 ñɩŋgʋ kaɣ kɛʋ Yehowa Paska.+ 17 Nɛ fenaɣ ŋga, ka-kɩyakʋ 15 ñɩŋgʋ kaɣ kɛʋ kazandʋ kɩyakʋ. Ɩkaɣ tɔɔʋ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ 7.+ 18 Pɩwɛɛ se ɩla kigbeɣluu kiɖeɖeu kɩyakʋ kajalaɣ ñɩŋgʋ wiye. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ. 19 Pɩwɛɛ se iwoni naŋ abalɩñɩŋ 2, ɛyaʋ kʋɖʋmʋʋ nɛ heɣsi abalɩñɩnzɩ 7, paa ŋga lɛ kɛwɛɛnɩ pɩnaɣ kʋɖʋmaɣ, nɛ pɩkɛnɩ kɩlaʋ kɩñaɣzʋʋ ŋgʋ patɩŋɩɣnɩ miŋ yɔɔ nɛ palaɣ Yehowa yɔ. Kpɩna wena afɛyɩnɩ ɛjandʋ natʋyʋ yɔ pɩwɛɛ se iwona.+ 20 Pɩwɛɛ se ɩlaa-yɛ nɛ pɩkpɛndɩnɩ a-tɔɔnaɣ pee kɩlaŋ; tɔɔnaɣ pee kɩlaŋ ɛnɩ ɩkɛɣnɩ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ,+ kɩmaɣzʋʋ hɔɔlɩŋ 3 hɔɔlɩŋ 10 taa nɔ abalɩñɩnʋ kʋɖʋm ñʋʋ taa nɛ kɩmaɣzʋʋ hɔɔlɩŋ 2 hɔɔlɩŋ 10 taa ɛyaʋ ñʋʋ taa, 21 nɛ kɩmaɣzʋʋ hɔɔlʋʋ 10 ñɩŋgʋ heɣsi abalɩñɩnzɩ 7 nzɩ sɩ-taa paa ŋga lɛ ka-ñʋʋ taa, 22 ɩkaɣ laʋ ɖɔɖɔ pʋnʋ nɛ pɩkɛnɩ kɩwɛɛkɩm yɔɔ kɩlaʋ nɛ palabɩnɩ-mɩ kɩwɛɛkɩm yɔɔ huuzuu sɔnzɩ. 23 Ɩkaɣ laʋ pɩtɩŋa mbʋ yɔ nɛ pɩtasɩnɩ tanaŋ tɛɛ kɩlaʋ kɩñaɣzʋʋ, ŋgʋ kɩkɛ kɩlaʋ kɩñaɣzʋʋ ŋgʋ palaɣ ɖoŋ ɖoŋ yɔ kɩ-hɔɔlʋʋ nakʋyʋ yɔ. 24 Ɛzɩma ɩlaɣ kɩlaŋ ɛnɩ kajalaɣ kɩyakʋ wiye yɔ, mbʋ ɖeyi ɖeyi ɩkaɣ-ɩ laʋ paa ɖooye, kɩyakɩŋ 7 nɛ pɩkɛnɩ tɔɔnaɣ,* kɩlaʋ ŋgʋ pañaɣzɩɣ miŋ nɛ kɩ-sɔzɩŋ kɛdɩɣnɩ Yehowa yɔ.* Pɩwɛɛ se ɩlaa-kʋ nɛ ɩkpɛndɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ nɛ ki-kilizaɣ. 25 Pɩwɛɛ se ɩla kigbeɣluu kiɖeɖeu kɩyakʋ 7 ñɩŋgʋ wiye.+ Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ.+

26 «“Kajalaɣ pee wena apɩwa yɔ a-kazandʋ wiye,+ alɩwaatʋ ndʋ ɩlaɣ tɔɔnaɣ kɩfalaɣ pee kɩlaʋ Yehowa yɔ,+ pɩwɛɛ se ɩla kigbeɣluu kiɖeɖeu mɩ-kpɩtaŋ kazandʋ taa.+ Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ.+ 27 Pɩwɛɛ se ɩkpaɣ naŋ abalɩñɩŋ 2, ɛyaʋ kʋɖʋmʋʋ nɛ heɣsi abalɩñɩnzɩ 7 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ, nɛ ɩlaanɩ kɩlaʋ kɩñaɣzʋʋ ŋgʋ kɩ-sɔzɩŋ kɛdɩɣnɩ Yehowa yɔ,*+ 28 nɛ kpɩna ana a-tɔɔnaɣ pee kɩlaʋ kɛɣnɩ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ, kɩmaɣzʋʋ hɔɔlɩŋ 3 hɔɔlɩŋ 10 taa paa nɔ abalɩñɩnʋ weyi lɛ ɛ-ñʋʋ taa, nɛ kɩmaɣzʋʋ hɔɔlɩŋ 2 hɔɔlɩŋ 10 taa ɛyaʋ ñʋʋ taa, 29 nɛ kɩmaɣzʋʋ hɔɔlʋʋ 10 ñɩŋgʋ heɣsi abalɩñɩnzɩ 7 nzɩ sɩ-taa paa ŋga lɛ ka-ñʋʋ taa; 30 ɩkaɣ laʋ ɖɔɖɔ pʋnʋ kʋɖʋm nɛ palabɩnɩ-mɩ kɩwɛɛkɩm yɔɔ huuzuu sɔnzɩ.+ 31 Ɩkaɣ kpɩna ana laʋ nɛ pɩtasɩnɩ kɩlaʋ kɩñaɣzʋʋ ŋgʋ palaɣ ɖoŋ ɖoŋ yɔ nɛ kɩ-tɔɔnaɣ pee kɩlaʋ, pɩkpɛndɩnɩ a-kilizasɩ. Pɩfɛyɩ se kpɩna ana awɛɛnɩ ɛjandʋ natʋyʋ.+

29 «“Pɩwɛɛ se ɩla kigbeɣluu kiɖeɖeu fenaɣ 7 ñɩŋga taa, kɩyakʋ kajalaɣ ñɩŋgʋ wiye. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ.+ Kɩyakʋ ŋgʋ, kɩkaɣ kɛʋ kɩyakʋ ŋgʋ ɩhʋlʋʋ ɛgandɩyɛ yɔ.+ 2 Ɩkaɣ kpaɣʋ nɔ* abalɩñɩnʋ kʋɖʋm, ɛyaʋ kʋɖʋmʋʋ nɛ heɣsi abalɩñɩnzɩ 7 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ, nɛ ɩlaanɩ kɩlaʋ kɩñaɣzʋʋ ŋgʋ kɩ-sɔzɩŋ kɛdɩɣnɩ Yehowa yɔ;* kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ, 3 nɛ a-tɔɔnaɣ pee kɩlaʋ kɛɣnɩ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ, efa kɩmaɣzʋʋ hɔɔlɩŋ 3 hɔɔlɩŋ 10 taa nɔ abalɩñɩnʋ ñʋʋ taa, kɩmaɣzʋʋ hɔɔlɩŋ 2 hɔɔlɩŋ 10 taa ɛyaʋ ñʋʋ taa, 4 nɛ kɩmaɣzʋʋ hɔɔlʋʋ 10 ñɩŋgʋ heɣsi abalɩñɩnzɩ 7 nzɩ sɩ-taa paa ŋga lɛ ka-ñʋʋ taa, 5 ɩkaɣ laʋ ɖɔɖɔ tuluu* kʋɖʋmʋʋ, nɛ pɩkɛnɩ kɩwɛɛkɩm yɔɔ kɩlaʋ nɛ palabɩnɩ-mɩ kɩwɛɛkɩm yɔɔ huuzuu sɔnzɩ. 6 Ɩkaɣ kɩlaŋ ɛnɩ laʋ nɛ pɩtasɩnɩ kɩlaʋ kɩñaɣzʋʋ ŋgʋ ɩlaɣ paa fenaɣ ŋga yɔ nɛ kɩ-tɔɔnaɣ pee kɩlaʋ,+ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ nɛ kɩ-tɔɔnaɣ pee kɩlaʋ,+ pɩkpɛndɩnɩ kɩlaŋ ɛnɩ i-kilizasɩ,+ ɛzɩ paɣtʋ pɔzʋʋ yɔ, nɛ pɩkɛnɩ kɩlaʋ ŋgʋ pañaɣzɩɣ miŋ nɛ kɩ-sɔzɩŋ kɛdɩɣnɩ Yehowa yɔ.*

7 «“Fenaɣ 7 ñɩŋga ŋga, ka-kɩyakʋ 10 ñɩŋgʋ wiye lɛ, pɩwɛɛ se ɩla kigbeɣluu kiɖeɖeu,+ pɩwɛɛ se ɩnazɩ mɩ-tɩ.* Pɩfɛyɩ se ɩla tʋmɩyɛ naɖɩyɛ.+ 8 Nɛ pɩwɛɛ se ɩkpaɣ nɔ abalɩñɩnʋ kʋɖʋm, ɛyaʋ kʋɖʋmʋʋ nɛ heɣsi abalɩñɩnzɩ 7 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ, nɛ ɩlaa kɩlaʋ kɩñaɣzʋʋ ŋgʋ kɩ-sɔzɩŋ kɛdɩɣnɩ Yehowa yɔ;* kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ.+ 9 Nɛ a-tɔɔnaɣ pee kɩlaʋ kɛɣnɩ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ, kɩmaɣzʋʋ hɔɔlɩŋ 3 hɔɔlɩŋ 10 taa nɔ abalɩñɩnʋ ñʋʋ taa, kɩmaɣzʋʋ hɔɔlɩŋ 2 hɔɔlɩŋ 10 taa ɛyaʋ ñʋʋ taa, 10 nɛ kɩmaɣzʋʋ hɔɔlʋʋ 10 ñɩŋgʋ heɣsi abalɩñɩnzɩ nzɩ sɩ-taa paa ŋga lɛ ka-ñʋʋ taa; 11 pɩtasɩnɩ kɩwɛɛkɩm yɔɔ kɩlaʋ ŋgʋ ɩlaɣ kɩwɛɛkɩm yɔɔ huuzuu kɩyakʋ wiye+ nɛ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ nɛ kɩ-tɔɔnaɣ pee kɩlaʋ, nɛ kɩlaŋ ɛnɩ i-kilizasɩ lɛ, ɩkaɣ laʋ ɖɔɖɔ pʋnʋ* kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.

12 «“Fenaɣ 7 ñɩŋga kɩyakʋ 15 ñɩŋgʋ wiye lɛ, pɩwɛɛ se ɩla kigbeɣluu kiɖeɖeu. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ, nɛ pɩwɛɛ se ɩtɔɔ kazandʋ Yehowa kɩyakɩŋ 7.+ 13 Pɩwɛɛ se ɩkpaɣ naŋ abalɩñɩŋ 13, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ nɛ ɩlaanɩ kɩlaʋ kɩñaɣzʋʋ,+ kɩlaʋ ŋgʋ patɩŋɩɣnɩ miŋ yɔɔ nɛ palaɣ nɛ kɩ-sɔzɩŋ kɛdɩɣnɩ Yehowa yɔ;* kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ.+ 14 Nɛ a-tɔɔnaɣ pee kɩlaʋ kɛɣnɩ mʋlʋm mbʋ pɩkpɩzɩ camɩyɛ nɛ pesidi-pʋ nɛ num yɔ, kɩmaɣzʋʋ hɔɔlɩŋ 3 hɔɔlɩŋ 10 taa naŋ abalɩñɩŋ 13 ɛnɩ ɩ-taa paa weyi lɛ ɛ-ñʋʋ taa, kɩmaɣzʋʋ hɔɔlɩŋ 2 hɔɔlɩŋ 10 taa ɛyaŋ 2 ɛnɩ ɩ-taa paa ŋgʋ lɛ kɩ-ñʋʋ taa, 15 nɛ kɩmaɣzʋʋ hɔɔlʋʋ 10 ñɩŋgʋ heɣsi abalɩñɩnzɩ 14 nzɩ sɩ-taa paa ŋga lɛ ka-ñʋʋ taa; 16 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ nɛ ki-kilizaɣ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

17 «“Nɛ kɩyakʋ 2 ñɩŋgʋ wiye lɛ, pɩwɛɛ se ɩlaa naŋ abalɩñɩŋ 12, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ; kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 18 nɛ ɩkpɛndɩnɩ tɔɔnaɣ pee kɩlaʋ nɛ kilizasɩ naŋ abalɩñɩŋ ñʋŋ taa, ɛyaŋ ñʋŋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 19 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ kɩlaŋ ɛnɩ i-kilizasɩ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

20 «“Kɩyakʋ tozo ñɩŋgʋ wiye lɛ, ɩkaɣ laʋ naŋ abalɩñɩŋ 11, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ; kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 21 nɛ ɩkpɛndɩnɩ tɔɔnaɣ pee kɩlaʋ nɛ kilizasɩ naŋ abalɩñɩŋ ñʋŋ taa, ɛyaŋ ñʋŋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 22 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ ki-kilizaɣ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

23 «“Kɩyakʋ 4 ñɩŋgʋ wiye lɛ, ɩkaɣ laʋ naŋ abalɩñɩŋ 10, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ; kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 24 ɩkpɛndɩnɩ tɔɔnaɣ pee kɩlaʋ nɛ kilizasɩ naŋ abalɩñɩŋ ñʋŋ taa, ɛyaŋ ñʋŋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 25 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ ki-kilizaɣ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

26 «“Kɩyakʋ 5 ñɩŋgʋ wiye lɛ, ɩkaɣ laʋ naŋ abalɩñɩŋ 9, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ; kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 27 nɛ ɩkpɛndɩnɩ tɔɔnaɣ pee kɩlaʋ nɛ kilizasɩ naŋ abalɩñɩŋ ñʋŋ taa, ɛyaŋ ñʋŋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 28 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ ki-kilizaɣ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

29 «“Kɩyakʋ 6 ñɩŋgʋ wiye lɛ, ɩkaɣ laʋ naŋ abalɩñɩŋ 8, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ; kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 30 nɛ ɩkpɛndɩnɩ tɔɔnaɣ pee kɩlaʋ nɛ kilizasɩ naŋ abalɩñɩŋ ñʋŋ taa, ɛyaŋ ñʋŋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 31 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ ki-kilizasɩ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

32 «“Kɩyakʋ 7 ñɩŋgʋ wiye lɛ, ɩkaɣ laʋ naŋ abalɩñɩŋ 7, ɛyaŋ 2 nɛ heɣsi abalɩñɩnzɩ 14 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ; kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 33 nɛ ɩkpɛndɩnɩ tɔɔnaɣ pee kɩlaʋ nɛ kilizasɩ naŋ abalɩñɩŋ ñʋŋ taa, ɛyaŋ ñʋŋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 34 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ ki-kilizaɣ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

35 «“Kɩyakʋ 8 ñɩŋgʋ wiye lɛ, pɩwɛɛ se ɩla ŋgee kigbeɣluu nakʋyʋ. Pɩfɛyɩ se ɩla tʋmɩyɛ ɖoŋ ñɩnɖɛ naɖɩyɛ.+ 36 Ɩkaɣ kpaɣʋ nɔ abalɩñɩnʋ kʋɖʋm, ɛyaʋ kʋɖʋmʋʋ nɛ heɣsi abalɩñɩnzɩ 7 nzɩ sɩ-taa paa ŋga lɛ kɛwɛnɩ pɩnaɣ kʋɖʋmaɣ yɔ, nɛ ɩlaanɩ kɩlaʋ kɩñaɣzʋʋ, kɩlaʋ ŋgʋ pañaɣzɩɣ-kʋ miŋ yɔ, se pɩkɛ sɔzɩŋ weyi ɛkɛdɩɣnɩ Yehowa yɔ;* kpɩna ana, a-taa naɖɩyɛ ɛtaawɛɛnɩ ɛjandʋ natʋyʋ,+ 37 nɛ ɩkpɛndɩnɩ tɔɔnaɣ pee kɩlaʋ nɛ kilizasɩ nɔ abalɩñɩnʋ ñʋʋ taa, ɛyaʋ ñʋʋ taa nɛ heɣsi abalɩñɩnzɩ ñʋŋ taa, paa kpɩnɛ nɖɩ lɛ ɖɩ-ñʋʋ taa ɛzɩ paɣtʋ pɔzʋʋ yɔ; 38 pɩtasɩnɩ kɩlaʋ kɩñaɣzʋʋ ŋgʋ ɩlaɣ ɖoŋ ɖoŋ yɔ, nɛ kɩ-tɔɔnaɣ pee kɩlaʋ, nɛ ki-kilizaɣ lɛ, ɩkaɣ laʋ ɖɔɖɔ pʋnʋ kʋɖʋm, nɛ pɩkɛnɩ kɩwɛɛkɩm yɔɔ kɩlaʋ.+

39 «“Pɩwɛɛ se ɩlaa wondu ndʋ Yehowa mɩ-kazandʋ alɩwaatʋ taa,+ nɛ pɩtasɩnɩ mi-ɖuutu kɩlaŋ+ nɛ mɩ-sɔɔlɩm haɖɛ,+ se pɩkɛnɩ mɩ-kɩlaŋ kɩñaɣzɩŋ,+ mɩ-tɔɔnaɣ pee kɩlaŋ,+ mi-kilizasɩ+ nɛ mɩ-laŋhɛzɩyɛ kɩlaŋ.”»+ 40 Moyizi heyi Izrayɛɛlɩ mba paɣtʋ ndʋ payɩ Yehowa kaaɖʋ-ɩ yɔ.

30 Pʋwayɩ lɛ Moyizi yɔɔdɩnɩ Izrayɛɛlɩ cejewe ñʋndɩnaa+ nɛ eheyi-wɛ se: «Paɣtʋ ndʋ Yehowa ɖʋwa yɔ ndʋ yɔ: 2 Ye abalʋ nɔɔyʋ eɖuuni Yehowa ɖuutu natʋyʋ,+ yaa eɖuwaa+ se ɛsɔŋ nabʋyʋ yɔ, pɩfɛyɩ se ɛmaanɩ ɛ-tɔm yɔɔ.+ Pɩwɛɛ se ɛɖɔ ndʋ ɛyɔɔdɩ e-ɖuutu taa yɔ tɩ-tɩŋa tɩ-yɔɔ.+

3 «Ye halʋ nɔɔyʋ eɖuuni Yehowa ɖuutu natʋyʋ alɩwaatʋ ndʋ ɛkɛ pɛlɛ nɛ ɛwɛɛ ɛ-caa ɖɩɣa taa yɔ, yaa ye eɖuu alɩwaatʋ ndʋ se ɛsɔŋ nabʋyʋ, 4 nɛ ɛ-caa nɩɩ e-ɖuutu yaa ɖuutu ndʋ eɖuwaa se ɛsɔŋ* nabʋyʋ yɔ nɛ ɛ-caa tikizini-i yɔ, pɩkɛɣnɩ halʋ ɛnʋ kɩjɛyʋʋ se ɛɖɔ e-ɖuutu ndʋ tɩ-tɩŋa tɩ-yɔɔ nɛ ɖuutu ndʋ eɖuwaa se ɛsɔŋ nabʋyʋ yɔ tɩ-tɩŋa tɩ-yɔɔ. 5 Ɛlɛ alɩwaatʋ ndʋ halʋ ɛnʋ ɛ-caa nɩɣ se eɖuu ɖuutu natʋyʋ yaa eɖuwaa se ɛsɔŋ nabʋyʋ yɔ, ye ɛ-caa ekizini-i yɔ pɩtɩkɛnɩ-ɩ kɩjɛyʋʋ se ɛɖɔ ɖuutu ndʋ tɩ-yɔɔ. Yehowa kaɣ halʋ ɛnʋ kpeɣu, mbʋ pʋyɔɔ yɔ ɛ-caa kizinini-i.+

6 «Ɛlɛ ye ɛwalɩ abalʋ nɔɔyʋ alɩwaatʋ ndʋ ɛwɛ ɖuutu natʋyʋ tɛɛ, yaa alɩwaatʋ ndʋ pɩkɛnɩ-ɩ kɩjɛyʋʋ se ɛɖɔ tamaɣ ŋga ekpedesaa nɛ ɛla yɔ kɔ-yɔɔ, 7 nɛ ɛ-walʋ nɩɩ-tʋ, ɛlɛ kɩyakʋ ŋgʋ ɛnɩ-tʋ yɔ etikizini-i yɔ, pɩkɛɣnɩ halʋ ɛnʋ kɩjɛyʋʋ se ɛɖɔ e-ɖuutu yaa ɖuutu ndʋ eɖuwaa se ɛsɔŋ nabʋyʋ yɔ tɩ-yɔɔ. 8 Ɛlɛ kɩyakʋ ŋgʋ ɛ-walʋ nɩɣ-tʋ yɔ, ye ɛlɛ ekizini-i yɔ ɛpɩzɩɣ eyele nɛ ɖuutu ndʋ yaa tamaɣ ŋga halʋ kaakpedesaa nɛ ɛla yɔ kasɩɩ tɩnaɣ,+ nɛ Yehowa kaɣ halʋ ɛnʋ kpeɣu.

9 «Ɛlɛ ye lelu nɔɔyʋ yaa halʋ weyi ɛ-walʋ kizi-i yɔ eɖuu ɖuutu natʋyʋ yɔ, pɩkɛnɩ-ɩ kɩjɛyʋʋ se ɛɖɔ ndʋ ɛyɔɔdaa yɔ tɩ-tɩŋa tɩ-yɔɔ.

10 «Ɛlɛ alɩwaatʋ ndʋ halʋ nɔɔyʋ wɛ ɛ-walʋ ɖɩɣa taa yɔ, ye eɖuu ɖuutu natʋyʋ yaa eɖuwaa se ɛsɔŋ nabʋyʋ 11 nɛ ɛ-walʋ nɩɩ-tʋ ɛlɛ etikizini-i nɛ ɛtɩkaɖɩnɩ-ɩ ɖɔɖɔ yɔ, pɩkɛnɩ halʋ ɛnʋ kɩjɛyʋʋ se ɛɖɔ e-ɖuutu tɩŋa yaa ɖuutu ndʋ eɖuwaa se ɛsɔŋ nabʋyʋ yɔ tɩ-tɩŋa tɩ-yɔɔ. 12 Ɛlɛ kɩyakʋ ŋgʋ ɛ-walʋ nɩɣ ɖuutu ndʋ tɩ-tɔm yɔ, ye ɛlɛ ekizi kpem se pɩwɛɛ se ɖuutu nɛ mbʋ halʋ ɖuwaa se ɛsɔŋ yɔ pɩtɩŋa pɩsɩɩ tɩnaɣ yɔ, pɩtɩkɛnɩ halʋ kɩjɛyʋʋ se ɛɖɔ ɖuutu ndʋ tɩ-yɔɔ.+ Halʋ ɛnʋ ɛ-walʋ yebina nɛ e-ɖuutu sɩɩ tɩnaɣ, nɛ Yehowa kaɣ halʋ ɛnʋ kpeɣu. 13 Ðuutu ndʋ tɩ-tɩŋa halʋ ɖuki yaa sɔmtʋ ɖuutu ndʋ payɩ eɖuki se ekizini ɛ-tɩ nabʋyʋ yɔ,* ɛ-walʋ pɩwɛɛ se etisini-i tʋ yaa ekizini-i tʋ. 14 Ɛlɛ ye kɩyakɩŋ ɩɖɛɣ nɛ ɛ-walʋ eekiziɣni-i kaaʋ yɔ, ɖɩnɛ ɛlɛ pɩwɩlɩɣ se etisi ɖuutu ndʋ payɩ ɛ-halʋ ɖuwaa nɛ mbʋ payɩ eɖuwaa se ɛsɔŋ yɔ pɩ-yɔɔ. Etisi halʋ ɖuutu yɔɔ, mbʋ pʋyɔɔ yɔ etikizini-i kɩyakʋ ŋgʋ ɛnɩ ɛlɛ ɖuu-tʋ yɔ. 15 Ɛlɛ ye ɛnɩ halʋ ɖuutu ɛlɛ etikizini-i tʋ kɩyakʋ ŋgʋ ɛnɩ-tʋ yɔ, ɛlɛ ɛkɔɔ ekizini-i pʋwayɩ yɔ, ɛnʋ kaɣnɩ sɩɣlʋʋ mbʋ pɩlɩɣ wɛɛ wena halʋ ɖɔwa yɔ a-taa yɔ.+

16 «Paɣtʋ tʋnɛ Yehowa ɖʋ Moyizi, paɣtʋ ndʋ titukuuni walʋ nɛ ɛ-halʋ, caja nɛ ɛ-pɛlɛ weyi ɛwɛ ɛ-ɖɩɣa taa yɔ.»

31 Pʋwayɩ lɛ, Yehowa heyi Moyizi se: 2 «Kpa Madiyaŋ mba+ kɩmɩyɛ+ Izrayɛɛlɩ mba yɔɔ. Pʋwayɩ lɛ pakaɣ-ŋ kpɛndʋʋ ña-samaɣ yɔɔ.»*+

3 Ðɩnɛ ɛlɛ Moyizi heyi samaɣ se: «Ɩñɔɔzɩ abalaa mba pɛwɛ mɩ-hɛkʋ taa yɔ nɛ poyooni Madiyaŋ nɛ pakpa Madiyaŋ mba Yehowa kɩmɩyɛ. 4 Pɩwɛɛ se ɩlɩzɩ ɛyaa 1 000 paa cejewiye nɖɩ lɛ ɖɩ-taa, Izrayɛɛlɩ cejewe tɩŋa taa nɛ powolo you.» 5 Pʋyɔɔ palɩzɩ ɛyaa 1 000 paa cejewiye nɖɩ lɛ ɖɩ-taa Izrayɛɛlɩ ɛyaa kudokiŋ taa;+ mba pɔñɔɔzɩ-wɛ se powolo you* yɔ paakpɛndɩ ɛyaa 12 000.

6 Nɛ Moyizi tiyi-wɛ you taa, paa cejewiye nɖɩ ɖɩ-taa lɛ ɛyaa 1 000, pa nɛ cɔjɔ Eleyaazaarɩ pɩyalʋ Fineyaasɩ,+ ɛlɛ kaaɖɔkɩ wondu kiɖeɖetu nɛ you aganda.+ 7 Nɛ poyooni Madiyaŋ, ɛzɩ Yehowa kaaɖʋʋ paɣtʋ Moyizi yɔ, nɛ pakʋ abalaa kpeekpe. 8 Pɩtasɩnɩ ɛyaa lalaa mba paakʋwa yɔ lɛ, pakʋ ɖɔɖɔ Madiyaŋ awiya 5; a-hɩla yɔ Evii, Rekɛɛm, Zuuri, Huuri nɛ Reba. Pakʋ ɖɔɖɔ Beyɔɔrɩ pɩyalʋ Baalam+ nɛ laɣɖɛ. 9 Ɛlɛ Izrayɛɛlɩ mba kpa Madiyaŋ halaa nɛ piya nɛ papɩsɩ-wɛ yomaa. Pakpaɣ ɖɔɖɔ pa-ɖɩɣa kpɩna tɩŋa, pa-naŋ kpeekpe nɛ palazɩ pa-ñɩm kpeekpe. 10 Nɛ pañaɣzɩ miŋ tɛtʋ ndʋ tɩ-taa paawɛɛ yɔ tɩ-tɩŋa payɩ nɛ lona wena a-taa paasiɣ pe-kizinzikiŋ yɔ a-tɩŋa payɩ.* 11 Nɛ pakpaɣ mbʋ payɩ ɛyaa kaawɛna yɔ, pa-kpɩna tɩŋa nɛ pakpa ɛyaa ɖɔɖɔ yomiye. 12 Nɛ powoni mba pakpa-wɛ yomiye yɔ nɛ mbʋ palazaa yɔ Moyizi nɛ cɔjɔ Eleyaazaarɩ nɛ Izrayɛɛlɩ samaɣ cɔlɔ ɖigbeɣliye* taa, Mowaabʋ kañɩmbusuu kɛdɛɛnzɩ taa+ Yɔɔrdaŋ cɔlɔ, Yeriikoo.

13 Ðɩnɛ ɛlɛ Moyizi nɛ cɔjɔ Eleyaazaarɩ nɛ samaɣ ñʋndɩnaa kpeekpe palɩɩ nɛ pakatɩ-wɛ ɖigbeɣliye wayɩ. 14 Ɛlɛ Moyizi taa wɩɩnɩ abalaa mba palɩzaa se pɛɖɛɛ sɔɔjanaa nɔɔ yɔ, ɛyaa kudokiŋ ñʋndɩnaa nɛ ɛyaa mɩnɩŋ ñʋndɩnaa mba paalɩnɩ you taa nɛ pɔkɔŋ yɔ. 15 Nɛ Moyizi pɔzɩ-wɛ se: «Pɩlabɩ ɛzɩma nɛ iyele halaa kpeekpe nɛ pɛ-ɛsa? 16 Ɩnawa se mba ɖɔmnɩ Baalam tɔm yɔɔ nɛ pepeɣzi Izrayɛɛlɩ mba nɛ paba la lakasɩ nzɩ sɩfɛyɩ siɣsiɣ yɔ+ Yehowa ɛsɩndaa, Peyɔɔrɩ tɔm taa,+ nɛ pɩkɔnɩ asɛyʋʋ Yehowa samaɣ yɔɔ.+ 17 Lɛɛlɛɛyɔ lɛ, pɩwɛɛ se ɩkʋ piya nzɩ sɩkɛ abalɩbiya yɔ sɩ-tɩŋa nɛ ɩkʋ ɖɔɖɔ halaa mba payɩ pasɩm abalʋ yɔ. 18 Ɛlɛ halɩbiya nzɩ sɩɩsɩŋ abalʋ yɔ, ɩpɩzɩɣ nɛ iyele sɩ-tɩŋa nɛ sɩ-ɛsa.+ 19 Pɩwɛɛ se ɩcaɣ ɖigbeɣliye wayɩ kɩyakɩŋ 7. Mɩ-taa mba payɩ pakʋ ɛyʋ nɔɔyʋ* nɛ mɩ-taa mba payɩ potukuni sɩɖʋ nɔɔyʋ yɔ,+ pɩwɛɛ se papɩsɩ pa-tɩ kele kele+ kɩyakʋ tozo ñɩŋgʋ wiye nɛ kɩyakʋ 7 ñɩŋgʋ wiye, mɩ nɛ mba ɩkpa-wɛ yomiye yɔ. 20 Nɛ pɩwɛɛ ɖɔɖɔ se ɩpɩsɩ kele kele paa toko ŋgʋ, wondu ndʋ payɩ palabɩ-tʋ nɛ tɔnɛ yɔ, mbʋ payɩ palabɩnɩ pʋnʋ hʋndʋ yɔ nɛ wondu ndʋ payɩ palabɩnɩ tɩŋ yɔ.»

21 Nɛ cɔjɔ Eleyaazaarɩ heyi sɔɔjanaa mba paawobi you taa yɔ se: «Paɣtʋ tʋnɛ Yehowa kaaɖʋ Moyizi: 22 “Sika, liidiye ñɩɣtʋ, ñɩɣtʋ kɩsɛɛmtʋ, ñɩɣtʋ kɩkpɛɛdɩtʋ, ñɩɣtʋ kʋhʋlʋmtʋ* nɛ ñɩɣtʋ ndʋ payaɣ se pʋlɔŋ yɔ, 23 mbʋ payɩ pɩpɩzɩɣ nɛ pɩsʋʋ miŋ taa nɛ pɩlɩɩ yɔ, pɩwɛɛ se ɩɖʋ-pʋ miŋ taa, nɛ pɩpɩsɩ kele kele. Ɛlɛ pɩwɛɛ ɖɔɖɔ se pekelesi-pʋ nɛ lɩm mbʋ palakɩnɩ kele kele pɩsʋʋ sɔnzɩ yɔ.+ Mbʋ payɩ pɩɩpɩzɩɣ nɛ pɩsʋʋ miŋ taa nɛ pɩlɩɩ yɔ, pɩwɛɛ se ɩñalɩ-pʋ nɛ lɩm. 24 Nɛ pɩwɛɛ se ɩcɔtɩ mi-tokonaa kɩyakʋ 7 ñɩŋgʋ wiye nɛ ɩpɩsɩ kele kele, nɛ pʋwayɩ lɛ ɩpɩzɩɣ nɛ ɩsʋʋ ɖigbeɣliye taa.”»+

25 Nɛ Yehowa heyi Moyizi se: 26 «Ña nɛ cɔjɔ Eleyaazaarɩ nɛ samaɣ taa hɔŋ ñʋndɩnaa ɩkalɩ mbʋ palazaa yɔ pɩ-ñʋʋ, ɩkalɩ mba pakpa-wɛ yomiye yɔ, ɛyaa nɛ kpɩna. 27 Ɩtayɩ mbʋ palazaa yɔ nabʋlɛ taa nɛ ɩtayɩ-pʋ sɔɔjanaa mba paawobi you yɔ nɛ ɛyaa mba payɩ pɩkazɩ samaɣ taa yɔ.+ 28 Pɩwɛɛ se ŋmʋ sɔɔjanaa mba paawobi you yɔ pɔ-cɔlɔ kalɩzaɣ* kʋɖʋmaɣ kalɩzasɩ 500 yɔɔ, ɛyaa taa, naŋ taa, kpaŋasɩ taa, nɛ heŋ nɛ pʋŋ taa nɛ pɩkɛnɩ Yehowa lambuu. 29 Pɩwɛɛ se ɩlɩzɩ lambuu ŋgʋ sɔɔjanaa mba pɔ-hɔɔlʋʋ yɔɔ nɛ ɩcɛlɩ-kʋ cɔjɔ Eleyaazaarɩ nɛ pɩkɛnɩ haɖɛ nɖɩ ɩhaɣ Yehowa yɔ.+ 30 Pɩwɛɛ se ŋlɩzɩ hɔɔlʋʋ ŋgʋ ɩcɛlɩ Izrayɛɛlɩ mba yɔ kɩ-yɔɔ ɛyʋ kʋɖʋm ɛyaa 50 yɔɔ nɛ kpɩnɛ kʋɖʋmɖɩyɛ kpɩna 50 yɔɔ, naŋ taa, kpaŋasɩ taa, heŋ nɛ pʋŋ taa nɛ ɖɩɣa kpɩna tindima tɩŋa taa nɛ ŋcɛlɩ Leevi ñɩma+ mba palakɩ tʋma wena atukuuni Yehowa kɩɖanɖʋʋ yɔ.»+

31 Ðɩnɛ ɛlɛ Moyizi nɛ cɔjɔ Eleyaazaarɩ pala ɖeyi ɖeyi ɛzɩ Yehowa ɖʋʋ paɣtʋ Moyizi yɔ. 32 Mbʋ pɩkazɩ mbʋ you laɖaa kɔnɩnɩ you taa yɔ pɩ-taa yɔ, pɩɩkpɛndɩ heŋ nɛ pʋŋ 675 000, 33 naŋ 72 000, 34 nɛ kpaŋasɩ 61 000. 35 Pɛlaa mba paasɩŋ abalʋ yɔ+ paakpɛndɩ 32 000. 36 Hɔɔlʋʋ ŋgʋ pɛcɛlɩ mba paawobi you yɔ kɩɩkɛ heŋ nɛ pʋŋ 337 500. 37 Heŋ nɛ pʋŋ weyi palɩzaa se ɩkɛ Yehowa lambuu yɔ, ɩɩkpɛndɩ 675. 38 Naŋ kaakpɛndɩ 36 000, nɛ weyi palɩzaa se ɩkɛ Yehowa lambuu yɔ ɩɩkpɛndɩ 72. 39 Kpaŋasɩ kaakpɛndɩ 30 500, nɛ nzɩ palɩzaa se sɩkɛ Yehowa lambuu yɔ sɩɩkpɛndɩ 61. 40 Nɛ ɛyaa kaakpɛndɩ 16 000, nɛ mba palɩzaa se pɛkɛ Yehowa lambuu yɔ paakpɛndɩ ɛyaa* 32. 41 Ðɩnɛ ɛlɛ Moyizi cɛlɩ cɔjɔ Eleyaazaarɩ lambuu se pɩkɛnɩ haɖɛ Yehowa,+ ɛzɩ Yehowa kaaɖʋʋ paɣtʋ Moyizi yɔ.

42 Moyizi kaalɩzɩ abalaa mba paawobi you taa yɔ pɔ-hɔɔlʋʋ lɛ, hɔɔlʋʋ ŋgʋ pɩɩkazɩ Izrayɛɛlɩ mba yɔ, 43 hɔɔlʋʋ ŋgʋ, kɩ-taa heŋ nɛ pʋŋ kaakpɛndɩ 337 500, 44 kɩ-taa naŋ kaakpɛndɩ 36 000, 45 kɩ-taa kpaŋasɩ kaakpɛndɩ 30 500, 46 nɛ kɩ-taa ɛyaa kaakpɛndɩ 16 000. 47 Nɛ Moyizi lɩzɩ hɔɔlʋʋ ŋgʋ kɩkɛ Izrayɛɛlɩ mba ñɩŋgʋ yɔ kɩ-taa ɛyʋ kʋɖʋm ɛyaa 50 yɔɔ, nɛ kpɩnɛ kʋɖʋmɖɩyɛ kpɩna 50 yɔɔ, nɛ ɛcɛlɩ Leevi ñɩma+ mba palakɩ Yehowa kɩɖanɖʋʋ tʋmɩyɛ yɔ,+ ɛzɩ Yehowa kaaɖʋʋ paɣtʋ Moyizi yɔ.

48 Nɛ abalaa mba palɩzaa nɛ pɛɖɛɛ sɔɔjanaa kudokiŋ nɔɔ yɔ,+ ɛyaa kudokiŋ ñʋndɩnaa nɛ ɛyaa mɩnɩŋ ñʋndɩnaa, pɔñɔtɩnɩ Moyizi, 49 nɛ peheyi-i se: «Ða ña-lɩmɖʋyaa, ɖɩkalɩ sɔɔjanaa mba pɛwɛ ɖɛ-tɛɛ yɔ pa-ñʋʋ, nɛ pa-taa nɔɔyʋ tile.+ 50 Ye mbʋ, yele nɛ ɖa-taa paa weyi kɔnɩ mbʋ ehiɣaa yɔ nɛ pɩkɛnɩ haɖɛ Yehowa, sika wondu, nɩŋgbanzɩ lɩyɩŋ, kpasɩ nzɩ pɛlɛɣ nesi yɔɔ yɔ, niye ñɩɣʋ kokoo, naŋgbacaɣlanaa nɛ ajana wondu lɛɛtʋ, nɛ pɩsa nɛ ɖɩla ɖa-tɩ* kɩwɛɛkɩm yɔɔ huuzuu sɔnzɩ Yehowa ɛsɩndaa.»

51 Ðɩnɛ ɛlɛ Moyizi nɛ cɔjɔ Eleyaazaarɩ pamʋ pɔ-cɔlɔ sika ŋga, ajana wondu ndʋ tɩ-tɩŋa. 52 Sika ŋga paha Yehowa yɔ, ŋga pamʋ ɛyaa kudokiŋ ñʋndɩnaa nɛ ɛyaa mɩnɩŋ ñʋndɩnaa cɔlɔ yɔ, ka-tɩŋa kaakpɛndɩ siklinaa* 16 750. 53 Sɔɔjanaa taa paa weyi kaalazɩ ɛ-tɩ wondu. 54 Moyizi nɛ cɔjɔ Eleyaazaarɩ pamʋ sika ɛyaa kudokiŋ ñʋndɩnaa nɛ ɛyaa mɩnɩŋ ñʋndɩnaa cɔlɔ nɛ pasʋnɩ-kɛ kediɣzaɣ kizinziku tɛɛ, se Izrayɛɛlɩ samaɣ ɛtɔzʋʋ mbʋ Yehowa labɩ-kɛ yɔ pɩ-yɔɔ.*

32 Rubɛɛnɩ pɩyalaa+ nɛ Gaadɩ pɩyalaa+ paawɛnɩ kpɩna sakɩyɛ kpem, nɛ pana se Yazɛɛrɩ+ nɛ Galaadɩ kaakɛ ageeta wena a-taa papɩzɩɣ nɛ pɔɖɔɔ kpɩna camɩyɛ yɔ. 2 Pʋyɔɔ Gaadɩ pɩyalaa nɛ Rubɛɛnɩ pɩyalaa pɔñɔtɩnɩ Moyizi, cɔjɔ Eleyaazaarɩ nɛ samaɣ ñʋndɩnaa nɛ peheyi-wɛ se: 3 «Atarɔtɩ, Dibɔɔnɩ, Yazɛɛrɩ, Nimra, Hɛsɩbɔɔnɩ,+ Eleyale, Sebam, Nebo+ nɛ Beyɔnɩ,+ 4 egeetiye nɖɩ Yehowa wabɩ Izrayɛɛlɩ samaɣ ɛsɩndaa yɔ,+ ɖɩkɛ lone nɖɩ papɩzɩɣ nɛ pɔɖɔɔ kpɩna camɩyɛ ɖɩ-taa yɔ, nɛ ña-lɩmɖʋyaa wɛnɩ kpɩna sakɩyɛ.»+ 5 Nɛ patasɩ yɔɔdʋʋ se: «Ye ɖɔ-tɔm ɛkɛdɩnɩ-ŋ yɔ, yele nɛ pɛcɛlɩ egeetiye ɖɩnɛ ɖa ña-lɩmɖʋyaa nɛ ɖɩpɩsɩ ɖa-ñɩm. Taatɛzɩnɩ-ɖʋ Yɔɔrdaŋ pɔɔ.»

6 Ðɩnɛ ɛlɛ, Moyizi pɔzɩ Gaadɩ pɩyalaa nɛ Rubɛɛnɩ pɩyalaa se: «Mi-koobiya ɖɛɣ you nɛ mɩ mɩcakɩ cɩnɛ? 7 Ɛbɛ yɔɔ ɩcaɣ se ɩla nɛ pitii Izrayɛɛlɩ samaɣ yɔɔɔ nɛ kekizi tɛzʋʋ se kowolo nɛ kamʋ tɛtʋ ndʋ Yehowa tɛm ɛ-taa se ɛcɛlɩɣ-kɛ yɔ? 8 Mbʋ mɩ-caanaa kaalaba alɩwaatʋ ndʋ maakʋsɩ-wɛ nɛ Kadɛɛsɩ-Barneya nɛ mentiyi-wɛ se powolo nɛ pana ɛjaɖɛ yɔ.+ 9 Powobi Ɛsɩkɔɔlɩ Fɛɛʋ*+ taa nɛ pana ɛjaɖɛ lɛ, pala nɛ pitii Izrayɛɛlɩ samaɣ yɔɔɔ nɛ piyele nɛ ke-liu tɩtasɩ wɛʋ se kowolo ɛjaɖɛ nɖɩ Yehowa cɛlaɣ-kɛ yɔ ɖɩ-taa.+ 10 Yehowa kaakɔ pana siŋŋ kɩyakʋ ŋgʋ nɛ eɖuu se:+ 11 “Abalaa mba palɩnɩ Ejipiti yɔ, pa-taa mba pɛwɛnɩ kpaɣnɩ pɩnzɩ 20 nɛ pɩɖɛɛ yɔ, paakaɣ naʋ ɛjaɖɛ nɖɩ+ maaɖuwaa se mɛncɛlɩɣ Abraham, Izaakɩ nɛ Yakɔɔb yɔ,+ mbʋ pʋyɔɔ yɔ patɩtɩŋɩ-m nɛ pa-laŋɩyɛ kpeekpe; 12 Kenizi tʋ Yefunee pɩyalʋ Kalɛɛbɩ+ nɛ Nuuni pɩyalʋ Yozuwee+ pe-ɖeke pakaɣnɩ-ɖɩ naʋ, mbʋ pʋyɔɔ yɔ patɩŋ Yehowa nɛ pa-laŋɩyɛ kpeekpe.”+ 13 Mbʋ Yehowa kaakɔ pana siŋŋ nɛ Izrayɛɛlɩ mba nɛ eyele nɛ poyoti kañɩmbusuu taa pɩnzɩ 40,+ pɩkɔɔ nɛ pɩsɩɩnɩ alɩwaatʋ ndʋ kpaɖʋʋ ŋgʋ kɩlakaɣ kɩdɛkɛdɩm Yehowa ɛsɩndaa yɔ ki-kpeekpe kɩtɛma yɔ.+ 14 Nɛ lɛɛlɛɛyɔ mɩkʋyɩ mɩ-caanaa lone taa ɛzɩ kɩdɛkɛdɩm laɖaa pɩyalaa mba peyeki se pana wena Yehowa kɔ nɛ Izrayɛɛlɩ yɔ, atɛzɩ ɖoŋ kpaʋ kɩkpaʋ yɔ. 15 Ye ikizi-i tɩŋʋʋ yɔ, paa pɩɩlabɩ ɛzɩma yɔ, ɛkaɣ-wɛ tasʋʋ yebu kañɩmbusuu taa, nɛ ɩkaɣ kɔnʋʋ kʋñɔŋ samaɣ kanɛ ke-kpeekpe kɔ-yɔɔ.»

16 Pʋwayɩ lɛ paɖaɣnɩ-ɩ ñɔtɩnʋʋ nɛ peheyi-i se: «Yele nɛ ɖɩma cɩnɛ pɛɛ kalakɩŋ ɖa-kpɩna nɛ ɖɩma ɖɔɖɔ tɛtʋ ɖe-piya. 17 Ɛlɛ ɖa lɛ, ɖɩñɔɔzʋʋ ɖa-tɩ se ɖɩla you,+ nɛ ɖɩkaɣ ɖɛʋ Izrayɛɛlɩ mba nɔɔ nɛ pɩkɔɔ nɛ pɩtalɩ alɩwaatʋ ndʋ ɖɩtaŋnɩ-wɛ po-lone taa yɔ; ɖe-piya ñakaɣ wɛʋ tɛtʋ ɖoŋ ñɩndʋ taa, ɖenɖe ɛjaɖɛ taa mba ɩɩpɩzɩɣ nɛ palabɩ-sɩ kɩdɛkɛdɩm nabʋyʋ yɔ. 18 Ye Izrayɛɛlɩ mba tɩŋa ɩtɩmʋ pɛ-tɛtʋ nɛ tɩpɩsɩ pa-ñɩm yɔ, ɖɩɩkaɣ pɩsʋʋ ɖa-ɖɩsɩ taa.+ 19 Mbʋ pʋyɔɔ yɔ ɖɩɩkaɣ mʋʋ ñɩm nabʋyʋ kpaɣnɩ Yɔɔrdaŋ hɔɔlʋʋ lɛɛkʋ nɛ pɩɖɛɛ ɛzɩ mba yɔ, mbʋ pʋyɔɔ yɔ ɖɩmʋ ɖa-ñɩm Yɔɔrdaŋ wɩsɩ ɖɩlɩyɛ hɔɔlʋʋ taa.»+

20 Moyizi cosi-wɛ se: «Ye ɩkpaɣ you wondu Yehowa ɛsɩndaa se ɩlakɩ you,+ 21 nɛ ye mɩ-taa paa anɩ ɛkpaɣ you wondu nɛ ɛtɛzɩ Yɔɔrdaŋ pɔɔ Yehowa ɛsɩndaa alɩwaatʋ ndʋ ɛɖɔɔnʋʋ e-koyindinaa ɛ-ɛsɩndaa+ 22 nɛ pɩkɔɔ nɛ pɩsɩɩnɩ alɩwaatʋ ndʋ poluzi ɛjaɖɛ Yehowa ɛsɩndaa yɔ,+ ɖɩnɛ ɛlɛ ɩpɩzɩɣ nɛ ɩpɩsɩ+ nɛ ɩɩkaɣ wɛɛ naayɛ ɖɔʋ Yehowa nɛ Izrayɛɛlɩ pɛ-ɛsɩndaa. Ðɩnɛ ɛlɛ ɛjaɖɛ ɖɩnɛ ɖɩkaɣ pɩsʋʋ mɩ-ñɩm Yehowa ɛsɩndaa.+ 23 Ɛlɛ ye ɩtɩla mbʋ yɔ, ɩyʋsʋʋnɩ Yehowa. Ðɩnɛ ɛlɛ ɩtɩlɩ nɛ ɩsɩɩ se ɩkaɣ hiɣu mɩ-kɩdɛkɛdɩm kɛzɛɣa. 24 Ye mbʋ ɩpɩzɩɣ nɛ ɩma tɛtʋ mi-piya nɛ ɩma kalakɩŋ mɩ-kpɩna,+ ɛlɛ pɩwɛɛ se ɩɖɔ tamaɣ ŋga ɩlaba yɔ kɔ-yɔɔ.»

25 Gaadɩ pɩyalaa nɛ Rubɛɛnɩ pɩyalaa peheyi Moyizi se: «Ða ña-lɩmɖʋyaa ɖɩkaɣ labʋ ɖeyi ɖeyi ɛzɩ ɖa-kɩbaɣlʋ ɖʋʋ paɣtʋ yɔ. 26 Ðe-piya, ɖa-halaa, ɖɔ-ɖɔɖɛ nɛ ɖa-ɖɩɣa kpɩna tɩŋa kaɣ caɣʋ peeɖe Galaadɩ tɛtʋ ndɩ ndɩ taa,+ 27 ɛlɛ ña-lɩmɖʋyaa kaɣ tɛzʋʋ Yɔɔrdaŋ, paa abalʋ weyi lɛ ɛñɔɔzʋʋ ɛ-tɩ se ɛla you Yehowa ɛsɩndaa,+ ɛzɩ ɖa-kɩbaɣlʋ yɔɔdʋʋ yɔ.»

28 Pʋyɔɔ Moyizi ɖʋ paɣtʋ cɔjɔ Eleyaazaarɩ, Nuuni pɩyalʋ Yozuwee nɛ Izrayɛɛlɩ cejewe ñʋndɩnaa pɔ-yɔɔ. 29 Moyizi heyi-wɛ se: «Ye Gaadɩ pɩyalaa nɛ Rubɛɛnɩ pɩyalaa patɩŋ-mɩ nɛ pɛtɛzɩ Yɔɔrdaŋ pɔɔ, nɛ paa abalʋ weyi ɛñɔɔzɩ ɛ-tɩ se ɛla you Yehowa ɛsɩndaa, nɛ iluzi ɛjaɖɛ nɖɩ mɩ-ɛsɩndaa yɔ, ɖɩnɛ ɛlɛ ɩcɛlɩɣ-wɛ Galaadɩ egeetiye nɛ ɖɩpɩsɩ pa-ñɩm.+ 30 Ɛlɛ ye patɩkpaɣ you wondu nɛ mɩ nɛ wɛ ɩtɛzɩ yɔ, ɖɩnɛ ɛlɛ mɩ-hɛkʋ taa pakaɣ caɣʋ Kanaŋ ɛjaɖɛ taa.»

31 Nɛ Gaadɩ pɩyalaa nɛ Rubɛɛnɩ pɩyalaa pocosi se: «Tɔm ndʋ Yehowa heyi ɖa ña-lɩmɖʋyaa yɔ tɩ-yɔɔ ɖɩkaɣ ɖɔm. 32 Ðɩkaɣ kpaɣʋ you wondu nɛ ɖɩtɛzɩ Yehowa ɛsɩndaa nɛ ɖiwolo Kanaŋ ɛjaɖɛ taa,+ ɛlɛ ñɩm mbʋ ɖɩkaɣ mʋʋ yɔ, Yɔɔrdaŋ pɔɔ hɔɔlʋʋ kʋnɛ kɩ-taa pɩwɛɣ.» 33 Mbʋ Moyizi cɛlɩ Gaadɩ pɩyalaa, Rubɛɛnɩ pɩyalaa+ nɛ Yosɛɛfʋ pɩyalʋ Manaasee cejewiye hɔɔlʋʋ+ Amoori mba wiyaʋ Sihɔɔnɩ kewiyaɣ+ nɛ Basaanɩ wiyaʋ Oogi kewiyaɣ,+ ageeta ana a-tɛtʋ ndɩ ndɩ, nɛ ɛjaɖɛ nɖɩ ɖɩwɛ pɩ-cɔlɔ kpɛɛɛ yɔ, ɖɩ-tɛtʋ ndɩ ndɩ.

34 Nɛ Gaadɩ pɩyalaa ma* Dibɔɔnɩ,+ Atarɔtɩ,+ Arowɛɛrɩ,+ 35 Atrɔtɩ-Sofaanɩ, Yazɛɛrɩ,+ Yogbeha,+ 36 Bɛtɩ-Nimra+ nɛ Bɛtɩ-Haraanɩ,+ tɩɩkɛ tɛtʋ ɖoŋ ñɩndʋ, nɛ pama ɖɔɖɔ pɛɛ kalakɩŋ pa-kpɩna. 37 Nɛ Rubɛɛnɩ pɩyalaa ma Hɛsɩbɔɔnɩ,+ Eleyale,+ Kiriyatayim,+ 38 Nebo+ nɛ Baalɩ-Meyɔɔnɩ+ (pɛlɛɣzɩ tɛtʋ ndʋ tɩ-hɩla), pama ɖɔɖɔ Sibima; nɛ payaa hɩla kɩfana tɛtʋ ndɩ ndɩ ndʋ paɖaɣnɩ maʋ yɔ.

39 Manaasee pɩyalʋ Makiir pɩyalaa+ wolo nɛ poyooni Galaadɩ egeetiye nɛ pamʋ-ɖɩ nɛ pɔɖɔɔnɩ Amoori ñɩma mba paawɛ ɖɩ-taa yɔ. 40 Pʋyɔɔ Moyizi cɛlɩ Galaadɩ egeetiye Manaasee pɩyalʋ Makiir, nɛ ɛlɛ caɣ ɖɩ-taa.+ 41 Nɛ Manaasee pɩyalʋ Yayiirɩ wolo nɛ eyooni-wɛ nɛ ɛmʋ pe-kizinzikiŋ tɛtʋ cikpetu ndɩ ndɩ, nɛ ɛyaa-tʋ se Havɔɔtɩ-Yayiirɩ.*+ 42 Nɛ Noba wolo nɛ eyooni Kenatɩ nɛ ɛmʋ kɩ nɛ kɩ-tɛtʋ ndɩ ndɩ ndʋ tɩɩcɔ-kʋ nɛ tɩta yɔ, nɛ ɛyaa-kʋ ɛ-maɣmaɣ ɛ-hɩɖɛ, pʋ-tɔbʋʋ se Noba.

33 Lona wena a-taa Izrayɛɛlɩ samaɣ tɩŋnaa alɩwaatʋ ndʋ Moyizi nɛ Aarɔɔnɩ paaɖɛ-kɛ nɔɔ,+ kaalɩnɩ Ejipiti ɛjaɖɛ taa,+ tindima tindima*+ yɔ ana yɔ. 2 Paa pa-nʋmɔʋ ɖɔm hɔɔlʋʋ ŋgʋ lɛ, Moyizi maɣaɣ lona wena a-taa pakʋyaɣna yɔ takayaɣ taa ɛzɩ Yehowa kaaɖʋʋ paɣtʋ yɔ; lona wena a-taa paatɩŋnaa alɩwaatʋ ndʋ pakʋyaɣ lone naɖɩyɛ taa nɛ pɛɖɛɣ lɛɛɖɛ taa yɔ ana yɔ:+ 3 Izrayɛɛlɩ mba kʋyɩnɩ Raamsɛɛsɩ+ fenaɣ kajalaɣ ñɩŋga kɩyakʋ 15 ñɩŋgʋ wiye.+ Palɩwa nɛ pɛɖɛɛ Ejipiti mba kpeekpe ɛsɩndaa Paska tɛʋ kifemuu,+ pa-laŋɩyɛ taamaɣnɩ natʋyʋ.* 4 Alɩwaatʋ ndʋ tɩ-taa lɛ, Ejipiti mba kaawɛɛ nɛ pepiŋ kajalaɣ piya nzɩ payɩ Yehowa kaakʋ pɛ-hɛkʋ taa yɔ,+ mbʋ pʋyɔɔ yɔ Yehowa kaahʋnɩ pɛ-ɛsɔnaa tɔm nɛ ɛhɔ pa-nɩŋgbaaŋ.+

5 Izrayɛɛlɩ mba kʋyɩnɩ Raamsɛɛsɩ lɛ, pesiɣ pe-kizinzikiŋ Sukɔɔtɩ.+ 6 Pʋwayɩ lɛ, pakʋyɩnɩ Sukɔɔtɩ nɛ pesiɣ pe-kizinzikiŋ Etaam,+ kɩwɛ kañɩmbusuu kamaɣ yɔɔ. 7 Pʋwayɩ ɖɔɖɔ lɛ, pakʋyɩnɩ Etaam nɛ papɩsɩ nɛ pɛɖɛɛnɩ Pihayirɔɔtɩ kiŋ, kɩwɛ Baalɩ-Zefonɩ+ ɛsɩndaa, nɛ pesiɣ pe-kizinzikiŋ Migɩdɔl+ ɛsɩndaa. 8 Pakʋyɩnɩ Pihayirɔɔtɩ nɛ pɔɖɔ teŋgu hɛkʋ taa+ nɛ powolo kañɩmbusuu taa,+ nɛ pɔɖɔ Etaam+ kañɩmbusuu taa kɩyakɩŋ 3 nɛ pesiɣ pe-kizinzikiŋ Maraa.+

9 Nɛ pakʋyɩnɩ Maraa nɛ patalɩ Elim. Lɩm hila 12 nɛ paŋ 70 kaawɛ Elim, pʋyɔɔ pesiɣ pe-kizinzikiŋ peeɖe.+ 10 Pʋwayɩ lɛ, pakʋyɩnɩ Elim nɛ pesiɣ pe-kizinzikiŋ Teŋgu Kɩsɛɛmʋʋ cɔlɔ. 11 Pʋwayɩ ɖɔɖɔ lɛ, pakʋyɩnɩ Teŋgu Kɩsɛɛmʋʋ cɔlɔ nɛ pesiɣ pe-kizinzikiŋ Sinɩ kañɩmbusuu+ taa. 12 Nɛ pakʋyɩnɩ Sinɩ kañɩmbusuu taa nɛ pesiɣ pe-kizinzikiŋ Dofka. 13 Pʋwayɩ lɛ, pakʋyɩnɩ Dofka nɛ pesiɣ pe-kizinzikiŋ Alusɩ. 14 Pʋwayɩ ɖɔɖɔ lɛ, pakʋyɩnɩ Alusɩ nɛ pesiɣ pe-kizinzikiŋ Refidim,+ ɖenɖe lɩm taawɛɛ se samaɣ ɛñɔɔ yɔ. 15 Pʋwayɩ lɛ, pakʋyɩnɩ Refidim nɛ pesiɣ pe-kizinzikiŋ Sinayii kañɩmbusuu taa.+

16 Pakʋyɩnɩ Sinayii kañɩmbusuu taa lɛ, pesiɣ pe-kizinzikiŋ Kibɩrɔɔtɩ-Hataava.+ 17 Nɛ pakʋyɩnɩ Kibɩrɔɔtɩ-Hataava nɛ pesiɣ pe-kizinzikiŋ Hazerɔɔtɩ.+ 18 Pʋwayɩ lɛ, pakʋyɩnɩ Hazerɔɔtɩ nɛ pesiɣ pe-kizinzikiŋ Ritɩma. 19 Pʋwayɩ ɖɔɖɔ lɛ, pakʋyɩnɩ Ritɩma nɛ pesiɣ pe-kizinzikiŋ Rimɔɔnɩ-Perɛɛzɩ. 20 Nɛ pakʋyɩnɩ Rimɔɔnɩ-Perɛɛzɩ nɛ pesiɣ pe-kizinzikiŋ Libna. 21 Pakʋyɩnɩ Libna lɛ, pesiɣ pe-kizinzikiŋ Risa. 22 Nɛ pakʋyɩnɩ Risa nɛ pesiɣ pe-kizinzikiŋ Kehelataa. 23 Pʋwayɩ lɛ, pakʋyɩnɩ Kehelataa nɛ pesiɣ pe-kizinzikiŋ Sefɛɛrɩ Pʋʋ taa.

24 Pʋwayɩ ɖɔɖɔ lɛ, pakʋyɩnɩ Sefɛɛrɩ Pʋʋ taa nɛ pesiɣ pe-kizinzikiŋ Harada. 25 Nɛ pakʋyɩnɩ Harada nɛ pesiɣ pe-kizinzikiŋ Makelɔɔtɩ. 26 Pʋwayɩ lɛ, pakʋyɩnɩ+ Makelɔɔtɩ nɛ pesiɣ pe-kizinzikiŋ Tahaatɩ. 27 Pʋwayɩ ɖɔɖɔ lɛ, pakʋyɩnɩ Tahaatɩ nɛ pesiɣ pe-kizinzikiŋ Teera. 28 Nɛ pakʋyɩnɩ Teera nɛ pesiɣ pe-kizinzikiŋ Mitka. 29 Pʋwayɩ lɛ, pakʋyɩnɩ Mitka nɛ pesiɣ pe-kizinzikiŋ Hasɩmona. 30 Pʋwayɩ ɖɔɖɔ lɛ, pakʋyɩnɩ Hasɩmona nɛ pesiɣ pe-kizinzikiŋ Moserɔtɩ. 31 Nɛ pakʋyɩ Moserɔtɩ lɛ, pesiɣ pe-kizinzikiŋ Bene-Yaakanɩ.+ 32 Nɛ pakʋyɩnɩ Bene-Yaakanɩ nɛ pesiɣ pe-kizinzikiŋ Hɔr-Hagidgaad. 33 Pʋwayɩ lɛ, pakʋyɩnɩ Hɔr-Hagidgaad nɛ pesiɣ pe-kizinzikiŋ Yotibata.+ 34 Pʋwayɩ ɖɔɖɔ lɛ, pakʋyɩnɩ Yotibata nɛ pesiɣ pe-kizinzikiŋ Abrona. 35 Nɛ pakʋyɩnɩ Abrona nɛ pesiɣ pe-kizinzikiŋ Eziyɔnɩ-Gebɛɛrɩ.+ 36 Pʋwayɩ lɛ, pakʋyɩnɩ Eziyɔnɩ-Gebɛɛrɩ nɛ pesiɣ pe-kizinzikiŋ Ziini kañɩmbusuu taa,+ pʋ-tɔbʋʋ se Kadɛɛsɩ.

37 Pʋwayɩ ɖɔɖɔ lɛ, pakʋyɩnɩ Kadɛɛsɩ nɛ pesiɣ pe-kizinzikiŋ Hɔr Pʋʋ taa,+ Edom ɛjaɖɛ kamaɣ yɔɔ. 38 Izrayɛɛlɩ mba lɩnɩ Ejipiti ɛjaɖɛ taa lɛ, pɩnaɣ 40 ñɩŋga taa cɔjɔ Aarɔɔnɩ kpa Hɔr Pʋʋ taa ɛzɩ Yehowa ɖʋʋ-ɩ paɣtʋ yɔ nɛ ɛsɩ peeɖe; ɛsɩbɩ fenaɣ 5 ñɩŋga taa, ka-kɩyakʋ kajalaɣ ñɩŋgʋ wiye.+ 39 Alɩwaatʋ ndʋ Aarɔɔnɩ sɩbɩ Hɔr Pʋʋ taa yɔ, ɛɛwɛnɩ pɩnzɩ 123.

40 Kanaŋ tʋ weyi ɛɛkɛ Arad wiyaʋ+ nɛ ɛwɛɛ Kanaŋ ɛjaɖɛ taa Negɛɛbʋ yɔ, ɛɛnɩwa se Izrayɛɛlɩ mba ɖiɣni kɔm.

41 Pʋwayɩ lɛ, pakʋyɩnɩ Hɔr Pʋʋ taa+ nɛ pesiɣ pe-kizinzikiŋ Zalɩmona. 42 Pʋwayɩ ɖɔɖɔ lɛ, pakʋyɩnɩ Zalɩmona nɛ pesiɣ pe-kizinzikiŋ Punɔɔnɩ. 43 Pʋwayɩ lɛ, pakʋyɩnɩ Punɔɔnɩ nɛ pesiɣ pe-kizinzikiŋ Obɔɔtɩ.+ 44 Nɛ pakʋyɩnɩ Obɔɔtɩ nɛ pesiɣ pe-kizinzikiŋ Iye-Abarim, Mowaabʋ+ kamaɣ yɔɔ. 45 Pʋwayɩ lɛ, pakʋyɩnɩ Iyim nɛ pesiɣ pe-kizinzikiŋ Dibɔɔnɩ-Gaadɩ.+ 46 Pʋwayɩ ɖɔɖɔ lɛ, pakʋyɩnɩ Dibɔɔnɩ-Gaadɩ nɛ pesiɣ pe-kizinzikiŋ Alɩmɔɔnɩ-Dibɩlatayim. 47 Nɛ pakʋyɩnɩ Alɩmɔɔnɩ-Dibɩlatayim nɛ pesiɣ pe-kizinzikiŋ Abarim pʋŋ+ taa, Nebo+ ɛsɩndaa. 48 Kɛdɛzaɣ ɖeɖe lɛ, pakʋyɩnɩ Abarim pʋŋ taa nɛ pesiɣ pe-kizinzikiŋ Mowaabʋ kañɩmbusuu kɛdɛɛnzɩ taa Yɔɔrdaŋ cɔlɔ, Yeriikoo.+ 49 Paasiɣ pe-kizinzikiŋ Yɔɔrdaŋ pɔɔ nɔɔ mbʋ, kpaɣnɩ Bɛtɩ-Yesimotɩ nɛ piwolo pɩtalɩ Abɛl-Sitiim,+ Mowaabʋ kañɩmbusuu kɛdɛɛnzɩ taa.

50 Yehowa yɔɔdɩnɩ Moyizi Mowaabʋ kañɩmbusuu kɛdɛɛnzɩ taa Yɔɔrdaŋ cɔlɔ Yeriikoo, nɛ eheyi-i se: 51 «Yɔɔdɩnɩ Izrayɛɛlɩ mba nɛ ŋheyi-wɛ se: “Iɖiɣni tɛzʋʋ Yɔɔrdaŋ pɔɔ se ɩsʋʋ Kanaŋ ɛjaɖɛ taa.+ 52 Pɩwɛɛ se ɩɖɔɔnɩ ɛjaɖɛ taa mba kpeekpe mɩ-ɛsɩndaa nɛ ɩɖɩzɩ pa-sɩʋ kpelisi nzɩ pasaɣnɩ pɛɛ yɔ si-kpeekpe+ nɛ pa-ñɩɣtʋ sɩʋ kpelisi* kpeekpe,+ nɛ pɩwɛɛ se ɩyɔkɩ po-lona kʋkʋya kiɖeɖena tɩŋa.+ 53 Ɩkaɣ mʋʋ ɛjaɖɛ nɛ ɩcaɣ ɖɩ-taa, mbʋ pʋyɔɔ yɔ paa pɩɩlabɩ ɛzɩma yɔ, mankaɣ-mɩ cɛlʋʋ ɛjaɖɛ nɖɩ nɛ ɖɩpɩsɩ mɩ-ñɩm.+ 54 Piye ɩkaɣ tɔʋ+ nɛ ɩtayɩnɩ ɛjaɖɛ nɖɩ mɩ-hɔŋ. Tindimiye nɖɩ ɖɩ-taa ɛyaa ɖɔwa yɔ pɩwɛɛ se ɖɩ-tɛtʋ ɛɖɔɔ, nɛ tindimiye nɖɩ ɖɩ-taa ɛyaa tɩɖɔɔ yɔ, pɩwɛɛ se ɖɩ-tɛtʋ ɛwɛɛ ññɩɩ.+ Paa weyi lɛ, hɔɔlʋʋ ŋgʋ piye tɔʋ wɩlɩɣ se pɛcɛlɩ-ɩ yɔ, ŋgʋ pakaɣ-ɩ cɛlʋʋ. Ɩkaɣ mʋʋ mɩ-tɛtʋ mɩ-caanaa cejewe nɔsɩ taa nɛ tɩpɩsɩ mɩ-ñɩm.+

55 «“Ɛlɛ ye ɩtɩɖɔɔnɩ ɛjaɖɛ nɖɩ ɖɩ-taa mba mɩ-ɛsɩndaa yɔ,+ mba ɩkaɣ kazʋʋ yɔ pakaɣ kɛʋ sɔɔ mɩ-ɛsa taa nɛ pɛkɛɣ ɖɔɖɔ sɔɔ mɩ-hʋyɩŋ tɛɛ, nɛ pakaɣ-mɩ nazʋʋ ɛjaɖɛ nɖɩ ɖɩ-taa ɩkaɣ caɣʋ yɔ.+ 56 Nɛ mankaɣ-mɩ labʋ mbʋ maaɖʋwa se malakɩ-wɛ yɔ.”»+

34 Nɛ Yehowa tasɩ yɔɔdɩnʋʋ Moyizi nɛ eheyi-i se: 2 «Ðʋ paɣtʋ tʋnɛ Izrayɛɛlɩ mba: “Ɩsʋʋ Kanaŋ ɛjaɖɛ taa lɛ,+ ɛjaɖɛ nɖɩ ɖɩkaɣ pɩsʋʋ mɩ-ñɩm yɔ ɖɩ-kamasɩ yɔ:+

3 «“Hadɛ kiŋ lɛ, mɩ-kamaɣ kaɣ kpaɣnʋʋ Ziini kañɩmbusuu, Edom cɔlɔ; nɛ hadɛ kiŋ wɩsɩ ɖɩlɩyɛ hɔɔlʋʋ taa lɛ, mɩ-kamaɣ kaɣ kpaɣnʋʋ Ðɔm Teŋgu*+ kamaɣ yɔɔ. 4 Mɩ-kamaɣ kaɣ kotuu nɛ katɩŋnɩ Akrabim ɖɩgbayɛ+ hadɛ kiŋ nɛ katalɩ Ziini, Kadɛɛsɩ-Barneya+ hadɛ kiŋ kaɣnɩ kɛʋ ka-tɩnaɣ. Nɛ kɛɖɛɛnɩ Hazaar-Adarɩ+ nɛ katalɩ Azɩmɔɔnɩ. 5 Kamaɣ kaɣ kotuu Azɩmɔɔnɩ nɛ katalɩ Ejipiti Lemeɣa,* nɛ kakaɣ sɩʋ tɩnaɣ nɛ Teŋgu.*+

6 «“Wɩsɩ ɖɩɖʋyɛ taa lɛ, mɩ-kamaɣ kaɣ kɛʋ Teŋgu Sɔsɔʋ* nɛ kidiiliŋ. Wɩsɩ ɖɩɖʋyɛ taa lɛ, mɩ-kamaɣ lɛ.+

7 «“Piyele nɛ hayo kiŋ lɛ, mɩ-kamaɣ yɔ: Ɩkaɣ ɖʋʋ mɩ-kamaɣ kpaɣnɩ Teŋgu Sɔsɔʋ nɛ piwolo Hɔr Pʋʋ. 8 Kpaɣnɩ Hɔr Pʋʋ lɛ, ɩkaɣ ɖʋʋ mɩ-kamaɣ nɛ katalɩ Lebo-Hamatɩ,*+ nɛ Zedaadɩ+ kaɣnɩ kɛʋ ka-tɩnaɣ. 9 Nɛ kakaɣ talʋʋ Zifɩrɔɔnɩ, nɛ kasɩɩ tɩnaɣ Hazaar-Enaanɩ.+ Hayo kiŋ lɛ, mɩ-kamaɣ lɛ.

10 «“Wɩsɩ ɖɩlɩyɛ taa lɛ, ɩkaɣ ɖʋʋ mɩ-kamaɣ kpaɣnɩ Hazaar-Enaanɩ nɛ piwolo Sefam. 11 Kamaɣ kaɣ kʋyɩnʋʋ Sefam nɛ piwolo Ribla, Ayinɩ wɩsɩ ɖɩlɩyɛ taa, kakaɣ tibu nɛ kɛtɛzɩ Kinerɛtɩ Teŋgu*+ kajalaŋa ŋga kɛwɛnɩ wɩsɩ ɖɩlɩyɛ taa kiŋ yɔ. 12 Kamaɣ kaɣ talʋʋ Yɔɔrdaŋ, nɛ Ðɔm Teŋgu+ kaɣnɩ kɛʋ ka-tɩnaɣ. Mɩ-ɛjaɖɛ+ nɛ ɖɩ-kamasɩ lɛ, pɩcɔɔ nɛ pɩta.”»

13 Ðɩnɛ ɛlɛ Moyizi ɖʋ paɣtʋ Izrayɛɛlɩ mba nɛ eheyi-wɛ se: «Ɛjaɖɛ nɖɩ ɩkaɣ tayʋʋ nɛ ɖɩpɩsɩ mɩ-ñɩm, piye ɩkaɣ tɔʋ+ nɛ ɩtayɩnɩ-ɖɩ, ɛzɩ Yehowa ɖʋʋ paɣtʋ se pɛcɛlɩ-ɖɩ cejewe 9 nɛ hɔɔlʋʋ yɔ. 14 Mbʋ pʋyɔɔ yɔ Rubɛɛnɩ cejewiye, Gaadɩ cejewiye nɛ Manaasee cejewiye hɔɔlʋʋ, pɛtɛm mʋʋ pe-ɖeɖe.+ 15 Cejewe 2 nɛ hɔɔlʋʋ ana, atɛm mʋʋ a-ñɩm egeetiye nɖɩ ɖɩwɛ Yɔɔrdaŋ hɔɔlʋʋ lɛɛkʋ yɔɔ yɔ ɖɩ-taa Yeriikoo cɔlɔ, wɩsɩ ɖɩlɩyɛ taa kiŋ.»+

16 Yehowa tasɩ yɔɔdɩnʋʋ Moyizi nɛ eheyi-i se: 17 «Abalaa mba pakaɣ-mɩ tayʋʋ ɛjaɖɛ nɛ ɖɩpɩsɩ mɩ-ñɩm yɔ pa-hɩla yɔ: Cɔjɔ Eleyaazaarɩ+ nɛ Nuuni pɩyalʋ Yozuwee.+ 18 Ɩkaɣ lɩzʋʋ ɖɔɖɔ ñʋʋdʋ kʋɖʋm paa cejewiye nɖɩ lɛ ɖɩ-taa nɛ patayɩ-mɩ ɛjaɖɛ nɛ ɖɩpɩsɩ mɩ-ñɩm.+ 19 Abalaa mba pa-hɩla yɔ: Yuuda cejewiye+ taa lɛ, Yefunee pɩyalʋ Kalɛɛbɩ;+ 20 Siimeyɔɔ pɩyalaa cejewiye+ taa lɛ, Amihuudɩ pɩyalʋ Semuwɛɛlɩ; 21 Bɛnjamɛɛ cejewiye+ taa lɛ, Kisilooni pɩyalʋ Elidaadɩ; 22 Daanɩ pɩyalaa cejewiye+ taa lɛ, ñʋʋdʋ kʋɖʋm, Yogili pɩyalʋ Bukii; 23 Yosɛɛfʋ pɩyalaa+ taa: Manaasee pɩyalaa cejewiye+ taa lɛ, ñʋʋdʋ kʋɖʋm, Efood pɩyalʋ Aniyɛɛlɩ; 24 Efrayim pɩyalaa cejewiye+ taa lɛ, ñʋʋdʋ kʋɖʋm, Sifɩtaanɩ pɩyalʋ Kemuwɛɛlɩ; 25 Zebulɔɔnɩ pɩyalaa cejewiye+ taa lɛ, ñʋʋdʋ kʋɖʋm, Parɩnaakɩ pɩyalʋ Elizafaanɩ; 26 Isakaarɩ pɩyalaa cejewiye+ taa lɛ, ñʋʋdʋ kʋɖʋm, Azaanɩ pɩyalʋ Palɩtɩyɛɛlɩ; 27 Asɛɛrɩ pɩyalaa cejewiye+ taa lɛ, ñʋʋdʋ kʋɖʋm, Selomi pɩyalʋ Ahihuudɩ; 28 Naftalii pɩyalaa cejewiye+ taa lɛ, ñʋʋdʋ kʋɖʋm, Amihuudɩ pɩyalʋ Pedahɛɛlɩ.» 29 Ɛyaa panɛ, mba Yehowa ɖʋ paɣtʋ se patayɩ tɛtʋ Izrayɛɛlɩ mba Kanaŋ ɛjaɖɛ taa.+

35 Yehowa tasɩ yɔɔdɩnʋʋ Moyizi Mowaabʋ kañɩmbusuu kɛdɛɛnzɩ taa Yɔɔrdaŋ cɔlɔ+ Yeriikoo, nɛ eheyi-i se: 2 «Ðʋ Izrayɛɛlɩ mba paɣtʋ se pɩwɛɛ se palɩzɩ tɛtʋ ndɩ ndɩ ndʋ pakaɣ mʋʋ se tɩkɛ pa-ñɩm yɔ tɩ-taa natʋyʋ nɛ pɛcɛlɩ-tʋ Leevi mba nɛ paba caɣ tɩ-taa,+ pɩwɛɛ ɖɔɖɔ se pɛcɛlɩ Leevi mba kpɩna ñɩtʋ ɖɩdɔɔyɛ ndɩ ndɩ wena acɔ tɛtʋ ndʋ nɛ ata yɔ.+ 3 Pakaɣ caɣʋ tɛtʋ ndʋ tɩ-taa, nɛ ñɩtʋ ɖɩdɔɔyɛ kaɣ kɛʋ pa-ɖɩɣa kpɩna, po-wondu nɛ pa-kpɩna lɛɛna tɩŋa ɖeɖe. 4 Tɛtʋ ndɩ ndɩ ndʋ ɩkaɣ cɛlʋʋ Leevi mba yɔ, pɩwɛɛ se paa ndʋ lɛ, tɩ-kpɩna ñɩtʋ ɖɩdɔɔyɛ ɖaɣlɩkɩŋ ɛtalɩ nuŋgolonzi* 1 000 kpaɣnɩ tɛtʋ koloŋa nɛ pɩcɔɔ tɛtʋ nɛ pɩta. 5 Ɩkaɣ maɣzʋʋ nuŋgolonzi 2 000 tɛtʋ wayɩ wɩsɩ ɖɩlɩyɛ taa, nuŋgolonzi 2 000 hadɛ kiŋ, nuŋgolonzi 2 000 wɩsɩ ɖɩɖʋyɛ taa nɛ nuŋgolonzi 2 000 hayo kiŋ, nɛ tɛtʋ wɛɛ hɛkʋ taa. Mbʋ kaɣnɩ kɛʋ pɛ-tɛtʋ ndɩ ndɩ ñɩtʋ ɖɩdɔɔyɛ.

6 «Tɛtʋ ndʋ ɩkaɣ cɛlʋʋ Leevi mba yɔ, tɩkaɣ kɛʋ ɖɩjɔzɩyɛ tɛtʋ 6,+ ɩkaɣ-wɛ tʋ cɛlʋʋ se ɛyʋ kʋyʋ ese nɛ ewolo tɩ-taa,+ ɩkaɣ-wɛ cɛlʋʋ ɖɔɖɔ tɛtʋ lɛɛtʋ 42. 7 Tɛtʋ ndʋ ɩcɛlɩɣ Leevi mba yɔ pɩwɛɛ se tɩ-tɩŋa tɩkpɛndɩ 48, paa ndʋ lɛ tɩ nɛ tɩ-kpɩna ñɩtʋ ɖɩdɔɔyɛ.+ 8 Tɛtʋ ndɩ ndɩ ndʋ ɩcɛlɩɣ-wɛ yɔ, Izrayɛɛlɩ mba ñɩm taa ɩkaɣ-tʋ lɩzʋʋ.+ Ɩkaɣ lɩzʋʋ tɛtʋ sakɩyɛ tindimiye nɖɩ ɖɩ-taa ɛyaa ɖɔwa yɔ ɖɩ-taa, nɛ ɩlɩzɩ tɛtʋ pazɩ tindimiye nɖɩ ɖɩ-taa ɛyaa tɩɖɔɔ yɔ ɖɩ-taa.+ Paa tindimiye nɖɩ lɛ, ɖɩkaɣ cɛlʋʋ ɖɩ-tɛtʋ taa natʋyʋ Leevi mba, nɛ pɩmʋnɩ ñɩm mbʋ ɖɩmʋwa yɔ pɩɖɔ ɖɔʋ mbʋ yɔ.»

9 Yehowa tasɩ yɔɔdɩnʋʋ Moyizi nɛ eheyi-i se: 10 «Yɔɔdɩnɩ Izrayɛɛlɩ mba nɛ ŋheyi-wɛ se: “Iɖiɣni tɛzʋʋ Yɔɔrdaŋ pɔɔ se iwolo Kanaŋ ɛjaɖɛ taa.+ 11 Pɩwɛɛ se ɩlɩzɩ mɩ-tɩ tɛtʋ ndɩ ndɩ ndʋ tɩmʋnaa yɔ nɛ tɩkɛnɩ ɖɩjɔzɩyɛ tɛtʋ, ndʋ tɩ-taa pɩwɛɛ se weyi ɛkʋ ɛyʋ nɔɔyʋ* ɛlɛ ɛtɩɖʋna yɔ ese nɛ ewolo yɔ.+ 12 Tɛtʋ ndʋ tɩkaɣ-mɩ kɛnʋʋ ɖɩjɔzɩyɛ nɛ ɩlɩɩ calɩm kɩmɩyɛ kpayʋ nesi tɛɛ,+ nɛ ɛyʋ kʋyʋ ɛtaasɩ nɛ patɩhʋtɩ ɛ-tɔm samaɣ ɛsɩndaa.+ 13 Ðɩjɔzɩyɛ tɛtʋ 6 ndʋ ɩlɩzɩɣ yɔ tɩ-kaɖʋwa lɛ. 14 Ɩkaɣ lɩzʋʋ tɛtʋ 3 Yɔɔrdaŋ hɔɔlʋʋ kʋnɛ kɩ-taa,+ nɛ ɩlɩzɩ ɖɔɖɔ tɛtʋ 3 Kanaŋ ɛjaɖɛ taa+ se tɩkɛnɩ ɖɩjɔzɩyɛ tɛtʋ. 15 Tɛtʋ 6 ndʋ, tɩkaɣ kɛnʋʋ ɖɩjɔzɩyɛ Izrayɛɛlɩ mba, agɔma+ nɛ mba pɔkɔm nɛ pacaɣ Izrayɛɛlɩ mba hɛkʋ taa yɔ, se weyi ɛkʋ ɛyʋ nɔɔyʋ* ɛlɛ ɛtɩɖʋna yɔ ese nɛ ewolo tɩ-taa.+

16 «“Ɛlɛ ye ɛmabɩ-ɩ nɛ ñɩɣtʋ wonuu nakʋyʋ nɛ ɛlɛ sɩ yɔ, ɛkɛ ɛyʋ kʋyʋ. Paa pɩɩlabɩ ɛzɩma yɔ, pɩwɛɛ se pakʋ ɛyʋ kʋyʋ ɛnʋ.+ 17 Nɛ ye ɛyaɣ-ɩ kaaʋ ŋgʋ kɩpɩzɩɣ nɛ kɩkɔnɩ ɛyʋ sɩm yɔ nɛ ɛlɛ sɩ yɔ, ɛkɛ ɛyʋ kʋyʋ. Paa pɩɩlabɩ ɛzɩma yɔ, pɩwɛɛ se pakʋ ɛyʋ kʋyʋ ɛnʋ. 18 Nɛ ye ɛmabɩ-ɩ nɛ wonuu nakʋyʋ ŋgʋ palabɩnɩ tɩʋ nɛ kɩpɩzɩɣ nɛ kɩkɔnɩ ɛyʋ sɩm yɔ nɛ ɛlɛ sɩ yɔ, ɛkɛ ɛyʋ kʋyʋ. Paa pɩɩlabɩ ɛzɩma yɔ, pɩwɛɛ se pakʋ ɛyʋ kʋyʋ ɛnʋ.

19 «“Calɩm kɩmɩyɛ kpayʋ pɩwɛɛ se ɛkʋ ɛyʋ kʋyʋ ɛnʋ. Alɩwaatʋ ndʋ calɩm kɩmɩyɛ kpayʋ katɩɣ-ɩ yɔ, ɛ-maɣmaɣ ɛkaɣnɩ-ɩ kʋʋ. 20 Ye ɛpaɖaɣ nɔɔyʋ nɛ etuzi-i yaa ɛzaɣtʋ lɩmaɣzɩyɛ naɖɩyɛ eyebina* nɛ ɛyaɣ-ɩ nabʋyʋ nɛ ɛlɛ sɩ,+ 21 yaa ye ɛpaɖaɣ nɔɔyʋ nɛ ɛmabɩ-ɩ nɛ e-nesi nɛ ɛlɛ sɩ yɔ, ɛyʋ weyi ɛmabɩ lɛlʋ yɔ, paa pɩɩlabɩ ɛzɩma yɔ, pɩwɛɛ se pakʋ-ɩ. Ɛkɛ ɛyʋ kʋyʋ. Alɩwaatʋ ndʋ calɩm kɩmɩyɛ kpayʋ katɩɣ ɛyʋ kʋyʋ ɛnʋ yɔ, ɛkaɣ-ɩ kʋʋ.

22 «“Ɛlɛ ye ɛtaaɖʋna nɛ ye pɩtaakɛ paɖɩyɛ yɔɔ etuzi-i yaa ye pɩtaakɛ ɛzaɣtʋ lɩmaɣzɩyɛ naɖɩyɛ yɔɔ* ɛyaɣ-ɩ nabʋyʋ,+ 23 yaa ye ɛlaba nɛ kaaʋ nakʋyʋ ɖabɩ-ɩ ŋgʋ ɛtaana-ɩ nɛ ɛlɛ taakɛ e-koyindu yaa ɛtaañɩnɩɣ ɛlɛ kɩdɛkɛdɩm, nɛ ɛyʋ ɛnʋ ɛsɩ yɔ, 24 ɖɩnɛ ɛlɛ pɩwɛɛ se samaɣ ɛhʋʋ ɛyʋ weyi ɛkʋ lɛlʋ yɔ nɛ calɩm kɩmɩyɛ kpayʋ pɛ-hɛkʋ taa tɔm, nɛ pɩla nɔɔ kʋɖʋmaɣ nɛ tɔm hʋʋ paɣtʋ tʋnɛ.+ 25 Ðɩnɛ ɛlɛ samaɣ kaɣ lɩzʋʋ ɛyʋ kʋyʋ ɛnʋ calɩm kɩmɩyɛ kpayʋ nesi tɛɛ nɛ kapɩsɩnɩ-ɩ ɖɩjɔzɩyɛ tɛtʋ ndʋ tɩ-taa eesewa nɛ ewolo yɔ, nɛ pɩwɛɛ se ɛcaɣ tɩ-taa nɛ pɩkɔɔ nɛ pɩsɩɩnɩ alɩwaatʋ ndʋ cɔjɔ kɩlɩm weyi pata-ɩ num kiɖeɖem yɔ ɛsɩba yɔ.+

26 «“Ɛlɛ ye ɛyʋ kʋyʋ ɛnʋ ɛlɩ ɖɩjɔzɩyɛ tɛtʋ ndʋ tɩ-taa eesewa nɛ ewolo yɔ tɩ-kamasɩ wayɩ 27 nɛ calɩm kɩmɩyɛ kpayʋ na ɛyʋ kʋyʋ ɛnʋ ɖɩjɔzɩyɛ tɛtʋ ndʋ tɩ-kamasɩ wayɩ nɛ ɛkʋ-ɩ yɔ, ɛɛkaɣ ɖɔʋ calɩm wɛɛ. 28 Mbʋ pʋyɔɔ yɔ pɩwɛɛ se ɛcaɣ ɛ-ɖɩjɔzɩyɛ tɛtʋ taa nɛ pɩkɔɔ nɛ pɩtalɩ cɔjɔ kɩlɩm sɩm. Ɛlɛ cɔjɔ kɩlɩm sɩm wayɩ lɛ, ɛyʋ kʋyʋ pɩzɩɣ nɛ ɛpɩsɩ ɛ-tɛtʋ yɔɔ.+ 29 Mbʋ kaɣnɩ-mɩ kɛʋ tɔm hʋʋ paɣtʋ, mɩ nɛ mɩ-lʋlʋʋ taa mba kpeekpe, mɩ-ɖɩjaɣyɛ kpeekpe taa.

30 «“Weyi ɛkʋʋ ɛyʋ nɔɔyʋ* yɔ, aseɣɖe tɩnaa lɩzɩɣ aseɣɖe* lɛ,+ pɩwɛɛ se pakʋ-ɩ, mbʋ pʋyɔɔ yɔ ɛkɛ ɛyʋ kʋyʋ;+ ɛlɛ paakaɣ nɔɔyʋ* kʋʋ aseɣɖe tʋ kʋɖʋm ɖeke aseɣɖe lɩzʋʋ yɔɔ. 31 Pɩfɛyɩ se itisi nɛ ɩmʋ kɩhɛyʋʋ nakʋyʋ nɛ ɩfɛɛ ɛyʋ kʋyʋ weyi pɩmʋnaa se pakʋ-ɩ yɔ e-wezuu,* mbʋ pʋyɔɔ yɔ paa pɩɩlabɩ ɛzɩma yɔ pɩwɛɛ se pakʋ-ɩ.+ 32 Pɩfɛyɩ ɖɔɖɔ se ɩmʋ kɩhɛyʋʋ nakʋyʋ nɛ ɩha nʋmɔʋ ɛyʋ weyi esewa nɛ ewolo ɛcaɣ ɖɩjɔzɩyɛ tɛtʋ taa yɔ se ɛpɩsɩ nɛ ɛcaɣ ɛ-tɛtʋ taa pʋcɔ nɛ cɔjɔ kɩlɩm sɩ.

33 «“Pɩfɛyɩ se ipisi tɛtʋ ndʋ tɩ-yɔɔ ɩwɛɛ yɔ, mbʋ pʋyɔɔ yɔ calɩm pisiɣ tɛtʋ,+ nɛ calɩm mbʋ pɛkpɛdɩ tɛtʋ yɔɔ yɔ, paapɩzɩɣ nɛ palabɩ-pʋ kɩwɛɛkɩm yɔɔ huuzuu sɔnzɩ nasɩyɩ ye pɩtɩkɛ weyi ɛkpɛdɩ-pʋ yɔ ɛ-calɩm yɔɔ patɩŋnaa yɔ.+ 34 Pɩfɛyɩ se ipisi tɛtʋ ndʋ tɩ-yɔɔ ɩwɛɛ yɔ, tɛtʋ ndʋ tɩ-yɔɔ mɛwɛɛ yɔ; mbʋ pʋyɔɔ yɔ ma Yehowa mɛwɛ Izrayɛɛlɩ samaɣ hɛkʋ taa.”»+

36 Nɛ Yosɛɛfʋ pɩyalaa hɔŋ taa tʋ Galaadɩ, weyi ɛkɛ Makiir pɩyalʋ,+ Manaasee pɩyalʋ yɔ, ɛ-lʋlʋʋ taa mba hɔŋ ñʋndɩnaa ñɔtɩnɩ Moyizi nɛ Izrayɛɛlɩ mba hɔŋ ñʋndɩnaa nɛ pɔyɔɔdɩnɩ-wɛ. 2 Pɔyɔɔdaa se: «Yehowa ɖʋ ɖa-kɩbaɣlʋ paɣtʋ se ɛtɔ piye+ nɛ ɛtayɩnɩ tɛtʋ Izrayɛɛlɩ mba nɛ tɩpɩsɩ pa-ñɩm; nɛ Yehowa kaaɖʋ ɖa-kɩbaɣlʋ paɣtʋ se ɛcɛlɩ ɖo-koobu Selofehaadɩ ñɩm ɛ-pɛlaa.+ 3 Ye pawalɩ Izrayɛɛlɩ cejewe lɛɛna taa abalaa yɔ, pɛlaa mba pa-ñɩm kaɣ lɩʋ ɖa-caanaa ñɩm taa nɛ pɩsɔzɩ cejewiye nɖɩ ɖɩ-taa pawalaa yɔ ɖɩ-ñɩm yɔɔ, ɖɩnɛ ɛlɛ pa-ñɩm mbʋ pɩkaɣ lɩʋ ɖa-ñɩm taa. 4 Izrayɛɛlɩ samaɣ talɩɣ Tɩ-yɔɔ wɛʋ pɩnaɣ+ lɛ, pɛlaa mba pa-ñɩm kaɣ sɔzʋʋ cejewiye nɖɩ ɖɩ-taa pawalaa yɔ ɖɩ-ñɩm yɔɔ, ɖɩnɛ ɛlɛ pa-ñɩm lɩɣ ɖa-caanaa cejewiye ñɩm taa.»

5 Ðɩnɛ ɛlɛ Moyizi ɖʋ paɣtʋ Izrayɛɛlɩ mba ɛzɩ Yehowa yɔɔdʋʋ yɔ se: «Tɔm ndʋ Yosɛɛfʋ pɩyalaa cejewiye yɔɔdʋʋ yɔ, tɩkɛ toovenim. 6 Paɣtʋ tʋnɛ Yehowa ɖʋ Selofehaadɩ pɛlaa: “Papɩzɩɣ nɛ pawalɩ weyi pɔsɔɔlaa yɔ. Ɛlɛ pɩwɛɛ se weyi pawalɩɣ yɔ, ɛkɛnɩ pa-caa cejewiye hɔʋ taa tʋ nɔɔyʋ. 7 Pɩfɛyɩ se Izrayɛɛlɩ mba ñɩm nabʋyʋ ɛkʋyɩnɩ cejewiye naɖɩyɛ taa nɛ pɩkɛɛ lɛɛɖɛ taa, mbʋ pʋyɔɔ yɔ pɩwɛɛ se Izrayɛɛlɩ mba ɩñɔɔnɩ pɔ-cɔzɔnaa cejewiye ñɩm kpam. 8 Nɛ ye pɛlɛ nɔɔyʋ ɛwɛnɩ ñɩm nabʋyʋ Izrayɛɛlɩ cejewe taa yɔ, ɛ-caa cejewiye taa tʋ nɔɔyʋ pɩwɛɛ se ɛwalɩ,+ ɖɩnɛ ɛlɛ Izrayɛɛlɩ mba cɔzɔnaa ñɩm wɛɣ pe-nesi taa tam. 9 Pɩfɛyɩ se ñɩm nabʋyʋ ɛkʋyɩnɩ cejewiye naɖɩyɛ taa nɛ pɩkɛɛ lɛɛɖɛ taa, mbʋ pʋyɔɔ yɔ pɩwɛɛ se Izrayɛɛlɩ mba cejewe ɩñɔɔnɩ a-maɣmaɣ a-ñɩm kpam.”»

10 Selofehaadɩ pɛlaa la ɖeyi ɖeyi ɛzɩ Yehowa kaaɖʋʋ paɣtʋ Moyizi yɔ.+ 11 Mbʋ Selofehaadɩ pɛlaa+ Maala, Tiriza, Hogɩla, Milka nɛ Noowa pawalɩ pa-caa koobiya pɩyalaa. 12 Pawalɩ Yosɛɛfʋ pɩyalʋ Manaasee hɔŋ taa abalaa, se pɩsa nɛ pa-ñɩm caɣ pa-caa hɔʋ cejewiye taa.

13 Paɣtʋ nɛ tɔm hʋʋ paɣtʋ ndʋ Yehowa tɩŋnɩ Moyizi yɔɔ nɛ ɛɖʋ Izrayɛɛlɩ mba Mowaabʋ kañɩmbusuu kɛdɛɛnzɩ taa Yɔɔrdaŋ cɔlɔ Yeriikoo yɔ ndʋ lɛ.+