WAYƖ WAYƖ PAƔTƲ

1 Tɔm tʋnɛ Moyizi heyi Izrayɛɛlɩ mba kpeekpe kañɩmbusuu taa Yɔɔrdaŋ egeetiye taa, kañɩmbusuu kɛdɛɛnzɩ taa Sufʋ ɛsɩndaa, Paraanɩ, Tofɛɛlɩ, Labaanɩ, Hazerɔɔtɩ nɛ Dizahaabɩ pɛ-hɛkʋ taa. 2 Kpaɣnɩ Orɛɛbʋ nɛ ŋwolo Kadɛɛsɩ-Barneya,+ ye ɛyʋ ɛtɩŋɩɣnɩ Seyiri Pʋʋ nʋmɔʋ yɔ pɩkpakɩɣ kɩyakɩŋ hiu nɛ kʋɖʋm. 3 Pɩnaɣ 40 ñɩŋga taa,+ fenaɣ 11 ñɩŋga taa, ka-kɩyakʋ kajalaɣ ñɩŋgʋ wiye lɛ, Moyizi yɔɔdɩnɩ Izrayɛɛlɩ mba* nɛ eheyi-wɛ paɣtʋ ndʋ payɩ Yehowa kaaɖʋ-ɩ se eheyi-wɛ yɔ tɩ-tɔm. 4 Ɛwabɩ Amoori mba wiyaʋ Sihɔɔnɩ+ weyi ɛɛwɛ Hɛsɩbɔɔnɩ yɔ nɛ Basaanɩ wiyaʋ Oogi+ weyi ɛɛwɛ Astarɔtɩ, Edreyi+ yɔ nɛ pɩtɛ lɛ eheyi-wɛ tʋ. 5 Moyizi lɩzɩ Paɣtʋ+ taa Yɔɔrdaŋ egeetiye taa Mowaabʋ ɛjaɖɛ taa nɛ ɛyɔɔdɩ se:

6 «Ðɛ-Ɛsɔ Yehowa heyi-ɖʋ Orɛɛbʋ se: “Ɩcaɣ pʋŋ egeetiye ɖɩnɛ ɖɩ-taa caɣʋ mbʋ yɔ pɩɖɔ mbʋ.+ 7 Lɛɛlɛɛyɔ ɩkʋyɩ nɛ ɩha ɛsa nɛ Amoori mba+ pʋŋ egeetiye nɛ mba payɩ pɛwɛ pɔ-cɔlɔ kpɛɛɛ yɔ Araba taa,+ pʋŋ egeetiye taa, Seefela taa, Negɛɛbʋ taa nɛ teŋgu kidiiliŋ yɔɔ,+ Kanaŋ mba ɛjaɖɛ, nɛ Libaŋ*+ nɛ piwolo nɛ pɩtalɩ pɔɔ sɔsɔɔ, pʋ-tɔbʋʋ se Efraatɩ pɔɔ.+ 8 Ɩna, mansɩ ɛjaɖɛ mɩ-ɛsɩndaa. Ɩsʋʋ nɛ ɩmʋ ɛjaɖɛ nɖɩ Yehowa ɖuwaa se ɛcɛlɩɣ mɩ-caanaa yɔ, se ɛcɛlɩɣ Abraham, Izaakɩ+ nɛ Yakɔɔb+ nɛ pa-lʋlʋʋ taa mba*+ yɔ.”

9 «Nɛ maaheyi-mɩ alɩwaatʋ ndʋ tɩ-taa se: “Men-ɖeke maapɩzɩɣ nɛ mankpaɣ mɩ-sʋʋtʋ.+ 10 Mɩ-Ɛsɔ Yehowa yeba nɛ ɩɖɔɔ, lɛɛlɛɛyɔ ɩɖɔwa ɛzɩ ɛsɔdaa tɩɩnzɩ yɔ.+ 11 Tɛtɛ nɛ mɩ-cɔzɔnaa tɛ Ɛsɔ Yehowa yele nɛ ɩɖɔ ɖɔʋ mbʋ yɔ, ɩtasɩ huuu+ mbʋ tam 1 000; nɛ tɛtɛ nɛ ɛwazɩ-mɩ ɛzɩ ɛlabʋ-mɩ tamaɣ yɔ.+ 12 Ɛzɩma malakɩ nɛ mankpaɣ mɩ-sʋʋtʋ men-ɖeke, nɛ mɔncɔnɩ mɩ-tɩlasɩ kpeekpe nɛ mɩ-ñaɖɩŋ ɖeɖe?+ 13 Ɩlɩzɩ abalaa lɔŋsɩnɖaa, mba pɛwɛ niye nɛ pɛwɛɛ lɛɣtʋ yɔ mi-cejewe taa; nɛ mansɩɩ-wɛ nɛ pɛkɛ mɩ-ñʋndɩnaa.”+ 14 Nɛ icosi-m se: “Mbʋ ŋheyi-ɖʋ se ɖɩla yɔ pɩwɛ ɖeu.” 15 Mbʋ mankpaɣ mi-cejewe ñʋndɩnaa mba, mba paakɛ abalaa mba paawɛnɩ lɔŋsɩnɖɛ nɛ lɛɣtʋ yɔ, nɛ mansɩɩ-wɛ se pɛkɛ mɩ-ñʋndɩnaa, ɛyaa kudokiŋ ñʋndɩnaa, ɛyaa mɩnɩŋ ñʋndɩnaa, ɛyaa nɩɩnʋwawaa ñʋndɩnaa, ɛyaa hiŋ ñʋndɩnaa nɛ mi-cejewe yɔɔ cɔnɩyaa.+

16 «Alɩwaatʋ ndʋ tɩ-taa lɛ, manɖʋ mɩ-tɔm hʋyaa paɣtʋ se: “Iwelisiɣ tɔm ndʋ tɩkɔm mi-koobiya hɛkʋ taa yɔ nɛ pɩtɛ lɛ, pɩwɛɛ se ɩhʋʋ tɔm siɣsiɣ+ ɛyʋ nɛ e-koobu pɛ-hɛkʋ taa yaa ɛ nɛ ɛgɔm pɛ-hɛkʋ taa.+ 17 Pɩfɛyɩ se ɩhʋʋ tɔm tɛ yɔɔ tɛ yɔɔ.+ Iwelisini ɛjam ɛzɩ iwelisinuu sɔsɔ yɔ.+ Itaase sɔɔndʋ ɛyaa,+ mbʋ pʋyɔɔ yɔ Ɛsɔ tɩnɩ tɔm hʋʋ;+ nɛ ye tɔm natʋyʋ ɛcɛzɩ-mɩ yɔ, pɩwɛɛ se ɩkɔnɩ-m tʋ nɛ manɩɩ.”+ 18 Alɩwaatʋ ndʋ tɩ-taa, maawɩlɩ-mɩ mbʋ payɩ pɩwɛɛ se ɩla yɔ.

19 «Pʋwayɩ lɛ, ɖɩkʋyɩnɩ Orɛɛbʋ nɛ ɖɩɖɔ kañɩmbusuu sɔsɔʋ ŋgʋ kɩcaɣ sɔɔndʋ yɔ kɩ-tɩŋa kɩ-taa,+ ŋgʋ ɩna alɩwaatʋ ndʋ ɖɩɖɛɣaɣ Amoori mba+ pʋŋ egeetiye taa, ɛzɩ ɖɛ-Ɛsɔ Yehowa ɖʋʋ-ɖʋ paɣtʋ yɔ; nɛ pɩtɛmna se ɖɩtalɩ Kadɛɛsɩ-Barneya.+ 20 Ðɩnɛ ɛlɛ meheyi-mɩ se: “Ɩtalɩ Amoori mba pʋŋ egeetiye nɖɩ ɖɛ-Ɛsɔ Yehowa cɛlɩɣ-ɖʋ yɔ ɖɩ-taa. 21 Ɩna, mɩ-Ɛsɔ Yehowa ɖʋzɩ ɛjaɖɛ mi-nesi taa. Ɩkpa nɛ ɩmʋ-ɖɩ nɛ ɖɩpɩsɩ mɩ-ñɩm, ɛzɩ mɩ-cɔzɔnaa tɛ Ɛsɔ Yehowa kaaheyuu-mɩ yɔ.+ Sɔɔndʋ ɛtaakpa-mɩ nɛ itaaseli.”

22 «Ɛlɛ mɩ-tɩŋa ɩñɔtɩnɩ-m nɛ ɩyɔɔdɩ se: “Yele nɛ ɖitiyi abalaa nabɛyɛ nɛ pɛɖɛɛ-ɖʋ nɔɔ nɛ pɔcɔŋ ɛjaɖɛ nɖɩ nɛ pɔkɔɔ nɛ ɖɩna se nʋmɔʋ ŋgʋ pɩwɛɛ se ɖɩtɩŋ nɛ ɛzɩma tɛtʋ ndɩ ndɩ ndʋ ɖɩkaɣ naʋ peeɖe yɔ tɩwɛɛ.”+ 23 Lɩmaɣzɩyɛ nɖɩ ɖɩɩkɛdɩnɩ-m, pʋyɔɔ maalɩzɩ abalaa 12 mɩ-taa, paa cejewiye nɖɩ lɛ ɖɩ-taa abalʋ kʋɖʋm.+ 24 Pɛɖɛɛ nɛ pakpa pʋŋ egeetiye taa+ nɛ patalɩ Ɛsɩkɔɔlɩ Fɛɛʋ* taa nɛ pɔcɔŋ-ɖɩ. 25 Nɛ pakpaɣ ɛjaɖɛ nɖɩ ɖɩ-taa tɩŋ pee naayɛ nɛ pɔkɔnɩ-ɖʋ nɛ peheyi-ɖʋ se: “Ɛjaɖɛ nɖɩ ɖɛ-Ɛsɔ Yehowa cɛlɩɣ-ɖʋ yɔ, ɖɩwɛ ɖeu.”+ 26 Ɛlɛ ikizi se ɩɩkpaɣ, nɛ ɩkaɖɩnɩ mɩ-Ɛsɔ Yehowa paɣtʋ.+ 27 Ɩɩwɛɛ nɛ imidiɣ mi-kizinzikiŋ tɛɛ nɛ ɩtɔŋ se: “Yehowa paɖɩɣ-ɖʋ, pʋyɔɔ ɛlɩzɩ-ɖʋ Ejipiti ɛjaɖɛ taa se ɛɖʋzɩ-ɖʋ Amoori mba nesi taa nɛ pakʋ-ɖʋ. 28 Ɛjaɖɛ nɖɩ ɖɩ-ɖɔndɩ taa ɖiwoki mbʋ yɔ? Ðo-koobiya lɩzɩ ɖa-laŋa,*+ mbʋ pʋyɔɔ yɔ pɔyɔɔdaa se: ‘Ɛyaa mba pɛwɛ ɛjaɖɛ nɖɩ ɖɩ-taa yɔ pakpaɖɩ-ɖʋ, nɛ pɩtasɩ lɛ pakɩlɩ-ɖʋ ɖaɣlʋʋ, nɛ pɛ-tɛtʋ ndɩ ndɩ paɣlaa nɛ pɔcɔzɩ-tʋ kolonzi nɛ pɩɖɛɛ pɩkpa ɛsɔdaa,*+ nɛ ɖɩna Anakɩ mba+ peeɖe.’”

29 «Pʋyɔɔ meheyi-mɩ se: “Itaaseli nɛ itaase-wɛ sɔɔndʋ.+ 30 Mɩ-Ɛsɔ Yehowa kaɣ-mɩ ɖɛʋ nɔɔ nɛ eyoo mi-lone taa,+ ɛzɩ ɛɛlabʋ Ejipiti ɛjaɖɛ taa mɩ-ɛsɩndaa yɔ.+ 31 Nɛ ɩɩna kañɩmbusuu taa ɛzɩma mɩ-Ɛsɔ Yehowa kpaɣ-mɩ ɛzɩ caja kpakʋʋ ɛ-pɩyalʋ yɔ, ɛkpaɣ-mɩ lona wena a-taa payɩ iwoba yɔ nɛ ɩkɔɔ nɛ ɩtalɩ lone ɖɩnɛ ɖɩ-taa.” 32 Ɛlɛ paa mbʋ yɔ, ititisi mɩ-Ɛsɔ Yehowa yɔɔ,+ 33 ɛnʋ weyi ɛɖɛɣaɣ-mɩ nɔɔ nʋmɔʋ taa se ɛñɩnɩ-mɩ lone nɖɩ ɖɩ-taa ɩpɩzɩɣ nɛ ɩcaɣ yɔ. Ɛtɩŋaɣnɩ miŋ yɔɔ nɛ ɛwɩlɩɣ-mɩ ɛ-tɩ ɖoo taa nɛ ɛtɩŋɩɣnɩ mɩndʋ yɔɔ nɛ ɛwɩlɩɣ-mɩ ɛ-tɩ wɩsɩ taa, se ɛwɩlɩ-mɩ nʋmɔʋ ŋgʋ kɩ-taa pɩwɛɛ se ɩɖɔ yɔ.+

34 «Alɩwaatʋ ndʋ tɩ-tɩŋa tɩ-taa, Yehowa welisaɣ tɔm ndʋ ɩyɔɔdaɣ yɔ, nɛ ɛ-taa wɩɩ nɛ eɖuu se:+ 35 “Kpaɖʋʋ kɩdɛkɛdʋʋ kʋnɛ, kɩ-taa paa ɛyʋ kʋɖʋm ɛɛkaɣ naʋ ɛjaɖɛ kɩbanɖɛ nɖɩ monɖuwaa se mɛncɛlɩɣ mɩ-caanaa yɔ,+ 36 ɛlɛ Yefunee pɩyalʋ Kalɛɛbɩ ɖeke kaɣnɩ ɖɩ-taa sʋʋ. Ɛkaɣ-ɖɩ naʋ, nɛ mankaɣ ɛ nɛ ɛ-pɩyalaa cɛlʋʋ tɛtʋ ndʋ tɩ-yɔɔ ɛɖɔma yɔ, mbʋ pʋyɔɔ yɔ ɛtɩŋ Yehowa nɛ ɛ-laŋɩyɛ pilim.+ 37 (Halɩ mɩ-yɔɔ yɔɔ lɛ, Yehowa taa wɩnɩ-m nɛ eheyi-m se: ‘Ña ɖɔɖɔ ŋŋkaɣ sʋʋ ɖɩ-taa.+ 38 Nuuni pɩyalʋ Yozuwee, weyi ɛsɩŋɩɣ ñɛ-ɛsɩndaa yɔ,+ ɛnʋ kaɣnɩ sʋʋ ɛjaɖɛ nɖɩ ɖɩ-taa.+ Kpazɩ-ɩ ɖoŋ,*+ mbʋ pʋyɔɔ yɔ ɛnʋ kaɣnɩ labʋ nɛ Izrayɛɛlɩ mʋ-ɖɩ.’) 39 Pɩtasɩ lɛ, mi-piya nzɩ ɩyɔɔdaa se pakaɣ-sɩ kpaʋ yomiye,+ nɛ mɩ-pɩyalaa mba paasɩŋ kɩbam nɛ kɩdɛkɛdɩm sɔnɔ yɔ, mba kaɣnɩ sʋʋ ɖɩ-taa, nɛ mankaɣ-wɛ ɖɩ cɛlʋʋ nɛ ɖɩpɩsɩ pa-ñɩm.+ 40 Ɛlɛ mɩ lɛ, ɩpɩsɩ nɛ ɩtɩŋnɩ Teŋgu Kɩsɛɛmʋʋ nʋmɔʋ nɛ iwolo kañɩmbusuu taa.”+

41 «Ðɩnɛ ɛlɛ iheyi-m se: “Ðɩyʋsɩnɩ Yehowa. Lɛɛlɛɛyɔ lɛ ɖɩkpaɣ nɛ ɖɩla you, ɛzɩ ɖɛ-Ɛsɔ Yehowa ɖʋʋ-ɖʋ paɣtʋ yɔ!” Peeɖe mɩ-taa paa weyi kpaɣ e-you wondu, nɛ ɩmaɣzaɣ se pɩkaɣ wɛʋ kɛlɛʋ se ɩkpa pʋʋ taa.+ 42 Ɛlɛ Yehowa heyi-m se: “Heyi-wɛ se: ‘Ɩtaakpa se ɩlakɩ you, mbʋ pʋyɔɔ yɔ maakaɣ wɛʋ mɩ-cɔlɔ.+ Ye ɩkpawa yɔ, mi-koyindinaa kaɣ-mɩ wabʋ.’” 43 Pʋyɔɔ mɔyɔɔdɩnɩ-mɩ, ɛlɛ itiwelisi. Nɛ ɩmaanɩ Yehowa paɣtʋ yɔɔ nɛ ɩla ñʋʋ taa ɖoŋ nɛ ɩtɛ mɩ-taa se ɩkpaɣ pʋʋ taa. 44 Peeɖe Amoori ñɩma mba paawɛ pʋʋ ŋgʋ kɩ-taa yɔ palɩwa nɛ pakatɩ-mɩ nɛ pɔɖɔɔnɩ-mɩ ɛzɩ tʋŋ ɖɔɔnʋʋ ɛyaa yɔ, nɛ pamɩzɩ-mɩ Seyiri nɛ piwolo nɛ pɩtalɩ ɖooo Hɔrma. 45 Nɛ ɩpɩsɩ nɛ ɩpaɣzɩ wiu Yehowa ɛsɩndaa, ɛlɛ Yehowa tiwelisini-mɩ nɛ etikemni-mɩ. 46 Pʋyɔɔ ɩcaɣ Kadɛɛsɩ nɛ pileɖi mbʋ.

2 «Nɛ ɖɩpɩsɩ nɛ ɖɩkpaɣ Teŋgu Kɩsɛɛmʋʋ nʋmɔʋ se ɖiwolo kañɩmbusuu taa, ɛzɩ Yehowa kaaheyuu-m yɔ,+ nɛ ɖɩɖɔ kɩyakɩŋ sakɩyɛ Seyiri Pʋʋ cɔlɔ. 2 Nɛ Yehowa heyi-m se: 3 “Kɩyakɩŋ weyi ɩɖɔm pʋʋ kʋnɛ kɩ-cɔlɔ yɔ ɩmaɣ mbʋ. Lɛɛlɛɛyɔ lɛ, ɩpɩsɩnɩ hayo kiŋ. 4 Ðʋ samaɣ paɣtʋ tʋnɛ: ‘Ɩkaɣ tɩŋnʋʋ mi-koobiya kamaɣ cɔlɔ, Ezaawuu lʋlʋʋ taa ñɩma+ mba pɛwɛ Seyiri yɔ;+ nɛ sɔɔndʋ kaɣ-wɛ kpaʋ nɛ mɩ,+ pɩwɛɛ se ɩkpa mɩ-tɩ camɩyɛ. 5 Itaayooni-wɛ,* mbʋ pʋyɔɔ yɔ maakaɣ-mɩ cɛlʋʋ pɛ-tɛtʋ hɔɔlʋʋ nakʋyʋ, paa naatalʋʋ ɖɩfɛyɩyɛ maɣmaɣ; mbʋ pʋyɔɔ yɔ mɛncɛlɩ Ezaawuu Seyiri Pʋʋ se pɩkɛ ɛ-ñɩm.+ 6 Pɩwɛɛ se ɩcɛlɩ-wɛ liidiye tɔɔnaɣ ŋga ɩkaɣ tɔɔʋ yɔ kɔ-yɔɔ, nɛ pɩwɛɛ se ɩhɛyɩ lɩm mbʋ ɩkaɣ ñɔʋ yɔ pɩ-yɔɔ.+ 7 Mbʋ pʋyɔɔ yɔ ñɛ-Ɛsɔ Yehowa wazɩ-ŋ mbʋ payɩ ŋlaba yɔ pɩ-taa. Ɛna nʋmɔʋ ŋgʋ payɩ ŋɖɔm kañɩmbusuu sɔsɔʋ kʋnɛ kɩ-taa yɔ. Pɩnzɩ 40 sɩnɛ sɩ-taa, ñɛ-Ɛsɔ Yehowa kaawɛ ñɔ-cɔlɔ nɛ ŋtɩtɛɖɩ nabʋyʋ.’”+ 8 Nɛ ɖɩtɩŋnɩ ɖo-koobiya Ezaawuu lʋlʋʋ taa ñɩma+ mba pɛwɛ Seyiri yɔ pɔ-cɔlɔ, nɛ ɖiposi ɖa-tɩ nɛ Araba nʋmɔʋ, Elatɩ nɛ Eziyɔnɩ-Gebɛɛrɩ.+

«Pʋwayɩ lɛ, ɖɩpɩsɩ nɛ ɖɩtɩŋnɩ Mowaabʋ kañɩmbusuu nʋmɔʋ.+ 9 Nɛ Yehowa heyi-m se: “Taacaa Mowaabʋ tɔm nɛ taayooni-i, mbʋ pʋyɔɔ yɔ maakaɣ-ŋ cɛlʋʋ ɛ-tɛtʋ hɔɔlʋʋ nakʋyʋ se kɩpɩsɩ ña-ñɩm, mbʋ pʋyɔɔ yɔ mɛncɛlɩ Lɔɔtɩ lʋlʋʋ taa mba+ Ar se kɩpɩsɩ pa-ñɩm. 10 (Ðooo lɛ Emim mba+ kaawɛnɩ peeɖe, pɛkɛ samaɣ ŋga ka-taa ɛyaa kpeetaa, pɔɖɔɔ nɛ paɖaɣlɩ ɛzɩ Anakɩ mba yɔ. 11 Refayim mba+ kaawɛ ɖɔɖɔ ɛzɩ Anakɩ mba+ yɔ, nɛ Mowaabʋ mba yaɣaɣ-wɛ se Emim mba. 12 Ðooo lɛ, Hori mba+ kaawɛnɩ Seyiri, ɛlɛ Ezaawuu lʋlʋʋ taa mba mʋ pa-ñɩm nɛ paɖɩzɩ-wɛ nɛ pacaɣ po-lone taa,+ ɛzɩ Izrayɛɛlɩ mba kɔŋʋʋ labʋ ɛjaɖɛ nɖɩ paa pɩɩla ɛzɩma Yehowa kaɣ-wɛ cɛlʋʋ se ɖɩpɩsɩ pa-ñɩm yɔ.) 13 Lɛɛlɛɛyɔ lɛ, iwolo nɛ ɩtɛzɩ Zerɛɛdɩ Fɛɛʋ.”* Ðɩnɛ ɛlɛ ɖɩtɛzɩ Zerɛɛdɩ Fɛɛʋ.*+ 14 Ðɩkʋyʋʋnɩ Kadɛɛsɩ-Barneya nɛ ɖɩɖɔ nɛ ɖɩtɛzɩ Zerɛɛdɩ Fɛɛʋ* yɔ pɩkpaɣ-ɖʋ pɩnzɩ 38; ɖɩɖɔma nɛ pɩkɔɔ pɩsɩɩnɩ alɩwaatʋ ndʋ maalika taa abalaa mba paatalɩ you labʋ yɔ pa-kpaɖʋʋ tɩŋa sɩba yɔ, ɛzɩ Yehowa kaaɖuunuu-wɛ yɔ.+ 15 Yehowa kpazɩ e-nesi pɔ-yɔɔ nɛ ɛɖɩzɩ-wɛ maalika taa pɩkɔɔ nɛ pɩsɩɩnɩ alɩwaatʋ ndʋ pɩtɩkazɩ pa-taa nɔɔyʋ yɔ.+

16 «Samaɣ taa abalaa mba paatalɩ you labʋ yɔ, pa-tɩŋa pañɩtaa nɛ pasɩ lɛ,+ 17 Yehowa tasɩ-m yɔɔdɩnʋʋ nɛ ɛtɔ se: 18 “Sɔnɔ, ŋkaɣ tɩŋnʋʋ Mowaabʋ egeetiye cɔlɔ, pʋ-tɔbʋʋ se Ar. 19 Alɩwaatʋ ndʋ ŋñɔtʋʋnɩ Amooni mba yɔ, taanazɩ-wɛ nɛ taacaa-wɛ tɔm; mbʋ pʋyɔɔ yɔ maakaɣ-ŋ cɛlʋʋ Amooni mba tɛtʋ hɔɔlʋʋ nakʋyʋ se kɩpɩsɩ ña-ñɩm, mbʋ pʋyɔɔ yɔ mɛncɛlɩ-tʋ Lɔɔtɩ lʋlʋʋ taa mba se tɩkɛ pa-ñɩm.+ 20 Pakpakaɣ tɛtʋ ndʋ ɖɔɖɔ se tɩkɛ Refayim mba+ tɛtʋ. (Ðooo lɛ, Refayim mba kaawɛnɩ peeɖe; nɛ Amooni mba yaɣaɣ-wɛ se Zamzumim mba. 21 Paakɛ samaɣ ŋga ka-taa ɛyaa kpeetaa, pɔɖɔɔ nɛ paɖaɣlɩ ɛzɩ Anakɩ mba+ yɔ; ɛlɛ Yehowa ɖɩzɩ-wɛ Amooni mba ɛsɩndaa, nɛ paba ɖɔɔnɩ-wɛ nɛ pacaɣ po-lone taa. 22 Mbʋ ɛlabɩ Ezaawuu lʋlʋʋ taa ñɩma, mba lɛɛlɛɛyɔ pɛwɛ Seyiri+ yɔ, alɩwaatʋ ndʋ ɛɖɩzɩ Hori mba+ pɛ-ɛsɩndaa yɔ, se papɩzɩ pamʋ pa-ñɩm nɛ pacaɣ po-lone taa halɩ nɛ sɔnɔ. 23 Piyele nɛ Aviim mba lɛ, paacaɣ tɛtʋ cikpetu ndɩ ndɩ taa nɛ piwolo pɩtalɩ Gaazaa,+ pɩkɔɔ nɛ pɩsɩɩnɩ alɩwaatʋ ndʋ Kaftɔɔrɩ ñɩma+ mba palɩnɩ Kaftɔɔrɩ* yɔ paɖɩzɩ-wɛ nɛ pacaɣ po-lone taa yɔ.)

24 «“Ɩkʋyɩ nɛ iwolo ɩtɛzɩ Arɩnɔɔnɩ Fɛɛʋ.*+ Ɩna, manɖʋzɩ mi-nesi tɛɛ Hɛsɩbɔɔnɩ wiyaʋ, Amoori tʋ Sihɔɔnɩ.+ Pʋyɔɔ lɛ, ɩpaɣzɩ mʋʋ ɛ-tɛtʋ nɛ iyooni-i. 25 Kpaɣnɩ sɔnɔ, malakɩ nɛ ɛyaa mba payɩ pɛwɛ tɛtʋ yɔɔ nɛ panɩɣ mɩ-taŋ yɔ, peseli nɛ sɔɔndʋ kpa-wɛ nɛ mɩ. Mɩ-yɔɔ yɔɔ lɛ, pɩkaɣ siduu pa-ñʋŋ taa nɛ peseli.”*+

26 «Nɛ mankʋsɩ ɛyaa Kedemɔɔtɩ+ kañɩmbusuu taa nɛ mentiyi-wɛ Hɛsɩbɔɔnɩ wiyaʋ Sihɔɔnɩ cɔlɔ, se peheyi-i laŋhɛzɩyɛ tɔm tʋnɛ:+ 27 “Ha-m nʋmɔʋ nɛ mantɩŋnɩ ñɛ-ɛjaɖɛ taa. Habɩyɛ yɔɔ ɖeke mankaɣ ɖɔm, maakaɣ hɛyʋʋ nɩwaŋ yɔɔ yaa nɩmɩyɛ yɔɔ.+ 28 Tɔɔnaɣ ŋga ŋpɛdɩɣnɩ-m yɔ ke-ɖeke mankaɣ tɔɔʋ, nɛ lɩm mbʋ ŋpɛdɩɣnɩ-m yɔ pi-ɖeke mankaɣ ñɔʋ. Nʋmɔʋ ɖeke mañɩnɩɣ se ŋha-m nɛ mɔnɖɔ nɛ mɛntɛzɩ 29 nɛ pɩkɔɔ pɩsɩɩnɩ alɩwaatʋ ndʋ mɛntɛzɩ Yɔɔrdaŋ nɛ mantalɩ ɛjaɖɛ nɖɩ ɖɛ-Ɛsɔ Yehowa haɣ-ɖʋ yɔ ɖɩ-taa yɔ. (Mbʋ Ezaawuu lʋlʋʋ taa ñɩma mba pɛwɛ Seyiri yɔ nɛ Mowaabʋ ñɩma mba pɛwɛ Ar yɔ paasɩnɩ-m.)” 30 Ɛlɛ Hɛsɩbɔɔnɩ wiyaʋ Sihɔɔnɩ tɩha-ɖʋ nʋmɔʋ se ɖɩtɩŋnɩ ɛ-ɛjaɖɛ taa, mbʋ pʋyɔɔ yɔ ñɛ-Ɛsɔ Yehowa yeba nɛ ɛla ñʋʋ taa ɖoŋ+ nɛ ɛ-laŋɩyɛ sʋʋ kpɩzɩŋ ɖɔɖɔ, se pɩsa nɛ ɛɖʋzɩ-ɩ ñe-nesi taa, ɛzɩ pɩwɛʋ lɛɛlɛɛyɔ yɔ.+

31 «Nɛ Yehowa heyi-m se: “Na, mɛntɛm paɣzʋʋ ɖʋzʋʋ ñe-nesi taa Sihɔɔnɩ nɛ ɛ-ɛjaɖɛ. Paɣzɩ ɛ-ɛjaɖɛ mʋʋ.”+ 32 Sihɔɔnɩ nɛ ɛ-samaɣ kpeekpe palɩwa se poyooni-ɖʋ Yahaz lɛ,+ 33 ɖɛ-Ɛsɔ Yehowa ɖʋzɩ-ɩ ɖe-nesi taa, nɛ ɖɩwa ɛ nɛ ɛ-pɩyalaa nɛ ɛ-samaɣ kpeekpe. 34 Ðɩɩmʋ ɛ-tɛtʋ kpeekpe alɩwaatʋ ndʋ, pɩtɩkazɩ natʋyʋ nɛ ɖɩɖɩzɩ paa tɛtʋ ndʋ, pɩkpɛndɩnɩ abalaa, halaa nɛ piya. Ðɩtɩkazɩ nɔɔyʋ nɛ ɛ-ɛsa.+ 35 Pa-kpɩna ɖeke ɖɩkpaɣaa nɛ apɩsɩ ɖa-ñɩna nɛ pɩtasɩnɩ tɛtʋ ndɩ ndɩ ndʋ ɖɩmʋwa yɔ tɩ-taa wondu. 36 Kpaɣnɩ Arowɛɛrɩ+ ŋgʋ kɩwɛ Arɩnɔɔnɩ Fɛɛʋ* nɔɔ yɔɔ yɔ (pɩkpɛndɩnɩ tɛtʋ ndʋ tɩwɛ fɛɛʋ taa yɔ), nɛ piwolo Galaadɩ, pɩtɩkazɩ tɛtʋ natʋyʋ se ɖɩtɩpɩzɩ nɛ ɖɩmʋ-tʋ. Ðɛ-Ɛsɔ Yehowa ɖʋzɩ ti-kpeekpe ɖe-nesi taa.+ 37 Paa mbʋ yɔ, ɩtɩñɔtɩnɩ Amooni mba+ ɛjaɖɛ, Yaabɔɔkɩ+ Fɛɛʋ* tɩŋa nɛ pʋŋ egeetiye taa tɛtʋ ndɩ ndɩ, nɛ lona lɛɛna wena payɩ ɖɛ-Ɛsɔ Yehowa kizini-ɖʋ yɔ.

3 «Pʋwayɩ lɛ, ɖɩpɩsɩ nɛ ɖɩkpaɣ Basaanɩ nʋmɔʋ kpaʋ yɔɔ. Nɛ Basaanɩ wiyaʋ Oogi nɛ ɛ-samaɣ kpeekpe palɩɩ se poyooni-ɖʋ Edreyi.+ 2 Ðɩnɛ ɛlɛ Yehowa heyi-m se: “Taase-i sɔɔndʋ, mbʋ pʋyɔɔ yɔ mankaɣ ɖʋzʋʋ ɛ nɛ ɛ-samaɣ kpeekpe nɛ ɛ-ɛjaɖɛ ñe-nesi tɛɛ, nɛ ŋkaɣ-ɩ labʋ ɖeyi ɖeyi ɛzɩ ŋŋlabʋ Amoori mba wiyaʋ Sihɔɔnɩ weyi ɛɛwɛ Hɛsɩbɔɔnɩ yɔ.” 3 Mbʋ ɖɛ-Ɛsɔ Yehowa ɖʋzɩ ɖɔɖɔ Basaanɩ wiyaʋ Oogi nɛ ɛ-samaɣ kpeekpe ɖe-nesi tɛɛ, nɛ ɖɩwɛɛ pa-kʋʋ yɔɔ pɩkɔɔ nɛ pɩsɩɩnɩ alɩwaatʋ ndʋ pɩtɩkazɩ ɛ-samaɣ taa nɔɔyʋ yɔ. 4 Ðɩmʋ ɛ-tɛtʋ ndɩ ndɩ tɩŋa. Pɩtɩkazɩ tɛtʋ natʋyʋ se ɖɩtɩmʋ pɔ-cɔlɔ; ɖɩmʋ tɛtʋ 60, Arɩgob egeetiye tɩŋa, Oogi kewiyaɣ Basaanɩ taa.+ 5 Tɛtʋ ndʋ, paacɔzɩ tɩ-taa paa ndʋ lɛ kolonzi nzɩ sɩkʋyaa yɔ, tɩɩwɛnɩ ɖɔɖɔ nɔnɔsɩ nɛ nɔnɔsɩ ɖaŋ* nɛ pɩkandɩyɩɣ tɩ-yɔɔ, tɩ nɛ tɛtʋ cikpetu sakɩyɛ. 6 Paa mbʋ yɔ, ɖɩɩɖɩzɩ tɛtʋ ndɩ ndɩ ndʋ,+ ɛzɩ ɖɩɩlabʋ Hɛsɩbɔɔnɩ wiyaʋ Sihɔɔnɩ ɖeyi ɖeyi yɔ; ɖɩɖɩzɩ tɛtʋ tɩŋa nɛ pɩkpɛndɩnɩ abalaa, halaa nɛ piya.+ 7 Nɛ ɖɩkpaɣ kpɩna tɩŋa nɛ ɖɩlazɩ tɛtʋ taa wondu.

8 «Alɩwaatʋ ndʋ tɩ-taa, ɖɩmʋ Amoori awiya+ 2 wena aawɛ Yɔɔrdaŋ egeetiye taa yɔ a-ɛjaɖɛ, kpaɣnɩ Arɩnɔɔnɩ Fɛɛʋ* nɛ piwolo nɛ pɩtalɩ ɖooo Hɛrɩmɔɔnɩ Pʋʋ+ 9 (pʋʋ ŋgʋ Siidɔɔ mba yaɣaɣ se Siriyɔɔnɩ nɛ Amoori mba ñayaɣaɣ-kʋ se Seniiri), 10 piyaɣ ŋga ka-ñʋʋ taa wɛ landamm yɔ kɛ-tɛtʋ ndɩ ndɩ tɩŋa, Galaadɩ kpeekpe nɛ Basaanɩ kpeekpe piwolo pɩtalɩ ɖooo Saleka nɛ Edreyi,+ Oogi kewiyaɣ tɛtʋ ndɩ ndɩ Basaanɩ taa. 11 Basaanɩ wiyaʋ Oogi kaakɛnɩ Refayim mba taa kɛdɛzaɣ tʋ weyi pɩɩkazaa yɔ. Taya* wena a-yɔɔ paahɩzɩ e-tomnaɣ yɔ aakɛ ñɩɣtʋ* taya, nɛ awɛ Amooni mba tɛ Raba halɩ nɛ sɔnɔ. A-ɖaɣlɩkɩŋ kɛ nuŋgolonzi* 9 nɛ a-walanzɩ ñɛkɛ nuŋgolonzi 4, nuŋgoloŋa ŋga patʋʋzʋʋna yɔ ŋga pamaɣzɩnaa. 12 Alɩwaatʋ ndʋ tɩ-taa, ɖɩmʋ ɛjaɖɛ ɖɩnɛ: kpaɣnɩ Arowɛɛrɩ+ ŋgʋ kɩwɛ Arɩnɔɔnɩ Fɛɛʋ* cɔlɔ yɔ, nɛ Galaadɩ pʋŋ egeetiye hɔɔlʋʋ, nɛ mɛncɛlɩ ɖɩ-tɛtʋ ndɩ ndɩ Rubɛɛnɩ mba nɛ Gaadɩ mba.+ 13 Nɛ mɛncɛlɩ Galaadɩ hɔɔlʋʋ ŋgʋ kɩkazaa yɔ nɛ Basaanɩ kpeekpe ŋgʋ kɩɩwɛ Oogi kewiyaɣ taa yɔ Manaasee cejewiye hɔɔlʋʋ.+ Arɩgob egeetiye kpeekpe, nɖɩ ɖɩwɛ Basaanɩ taa yɔ, paasɩm-ɖɩ se ɖɩkɛ Refayim mba ɛjaɖɛ.

14 «Manaasee pɩyalʋ Yayiirɩ+ kaamʋ Arɩgob egeetiye kpeekpe+ nɛ piwolo nɛ pɩtalɩ ɖooo Gesuur mba nɛ Maakat mba+ kamaɣ yɔɔ, nɛ ɛyaa Basaanɩ tɛtʋ cikpetu ndɩ ndɩ ndʋ ɛ-maɣmaɣ ɛ-hɩɖɛ, pʋ-tɔbʋʋ se Havɔɔtɩ-Yayiirɩ,*+ halɩ nɛ sɔnɔ. 15 Maacɛlɩ Galaadɩ egeetiye Makiir.+ 16 Nɛ mɛncɛlɩ Rubɛɛnɩ mba nɛ Gaadɩ mba+ egeetiye nɖɩ ɖɩwɛ kpaɣnɩ Galaadɩ nɛ piwolo Arɩnɔɔnɩ Fɛɛʋ* yɔ (fɛɛʋ hɛkʋ kaakɛnɩ kamaɣ), nɛ piwolo nɛ pɩtalɩ ɖooo Yaabɔɔkɩ, fɛɛʋ ŋgʋ kɩkɛ Amooni mba kamaɣ yɔ, 17 nɛ pɩtasɩnɩ Araba, Yɔɔrdaŋ nɛ ki-kidiiliŋ, kpaɣnɩ Kinerɛtɩ nɛ piwolo pɩtalɩ Araba Teŋgu, Ðɔm Teŋgu,* Pizɩga kajalanzɩ tɛɛ, wɩsɩ ɖɩlɩyɛ hɔɔlʋʋ taa.+

18 «Nɛ maaɖʋ-mɩ paɣtʋ tʋnɛ: “Mɩ-Ɛsɔ Yehowa cɛlɩ-mɩ ɛjaɖɛ ɖɩnɛ se ɩmʋ-ɖɩ nɛ ɖɩpɩsɩ mɩ-ñɩm. Mɩ-sɔdɩŋ kpeekpe ɩkpaɣ you wondu nɛ ɩtɛzɩ pɔɔ mi-koobiya Izrayɛɛlɩ mba ɛsɩndaa.+ 19 Mɩ-halaa, mi-piya nɛ mɩ-kpɩna ɖeke (mana camɩyɛ se ɩwɛnɩ kpɩna sakɩyɛ) kaɣnɩ caɣʋ tɛtʋ ndɩ ndɩ ndʋ mɛncɛlɩ-mɩ yɔ tɩ-taa, 20 nɛ pɩkɔɔ pɩtalɩ alɩwaatʋ ndʋ Yehowa haɣ mi-koobiya hɛzʋʋ ɛzɩ ɛlabʋ-mɩ ɖɔɖɔ yɔ, nɛ paba ɖɔɖɔ pamʋ ɛjaɖɛ nɖɩ mɩ-Ɛsɔ Yehowa cɛlɩɣ-wɛ Yɔɔrdaŋ nɛ wayɩ yɔ. Pʋwayɩ lɛ, mɩ-taa paa weyi pɩzɩɣ nɛ ɛpɩsɩ ɛ-tɛtʋ ndʋ mɛncɛlɩ-mɩ yɔ tɩ-yɔɔ.”+

21 «Alɩwaatʋ ndʋ tɩ-taa, maaɖʋ Yozuwee+ paɣtʋ tʋnɛ: “Ña-maɣmaɣ ŋnanɩ ñɛ-ɛsa mbʋ mɩ-Ɛsɔ Yehowa labɩ awiya ana a-naalɛ yɔ. Kewiyisi nzɩ payɩ ŋtɛzɩɣ pɔɔ nɛ ŋsʋʋ sɩ-taa yɔ, mbʋ ɖeyi ɖeyi Yehowa kaɣ-sɩ labʋ.+ 22 Pɩfɛyɩ se ise-sɩ sɔɔndʋ, mbʋ pʋyɔɔ yɔ mɩ-Ɛsɔ Yehowa lakɩnɩ you mi-lone taa.”+

23 «Alɩwaatʋ ndʋ tɩ-taa, mentendi Yehowa se: 24 “Hayɩ, Kɩbaɣlʋ Kɩlɩm Yehowa, ŋpaɣzɩ wɩlʋʋ ña-lɩmɖʋyʋ ñɔ-sɔsɔtʋ nɛ ñe-nesi ɖoŋ ñɩnzɩ,+ mbʋ pʋyɔɔ yɔ ɛsɔ weyi wɛ ɛsɔdaa yaa tɛtʋ yɔɔ nɛ ɛlakɩ lakasɩ sɔsɔsɩ ɛzɩ ña yɔ?+ 25 Mentendi-ŋ, yele nɛ mɛntɛzɩ nɛ mana ɛjaɖɛ kɩbanɖɛ nɖɩ ɖɩwɛ Yɔɔrdaŋ nɛ wayɩ yɔ, pʋŋ egeetiye kɩbanɖɛ nɖɩ nɛ Libaŋ.”+ 26 Ɛlɛ mɩ-yɔɔ lɛ, Yehowa kɔ-m nɛ pana wena yɔ aawɛ mbʋ,+ nɛ etiwelisini-m. Ɛlɛ Yehowa heyi-m se: “Pɩmaɣ mbʋ! Taatasɩ-m tɔm ndʋ heyuu wiɖiyi. 27 Kpa Pizɩga ñʋʋ taa,+ nɛ ŋcɔnɩ wɩsɩ ɖɩɖʋyɛ taa, hayo kiŋ, hadɛ kiŋ nɛ wɩsɩ ɖɩlɩyɛ taa nɛ ŋna ɛjaɖɛ nɖɩ nɛ ñɛ-ɛsa, mbʋ pʋyɔɔ yɔ ŋŋkaɣ tɛzʋʋ Yɔɔrdaŋ kʋnɛ.+ 28 Sɩɩ Yozuwee ɖiyiyu+ nɛ ŋseɣti-i nɛ ŋkpazɩ-ɩ ɖoŋ, mbʋ pʋyɔɔ yɔ ɛnʋ kaɣnɩ samaɣ kanɛ ɖɛʋ nɔɔ nɛ kɛtɛzɩ pɔɔ+ nɛ ɛnʋ kaɣnɩ yebu nɛ kamʋ ɛjaɖɛ nɖɩ ŋkaɣ naʋ yɔ.” 29 Pɩtɩŋa payɩ mbʋ yɔ pɩɩlabɩ alɩwaatʋ ndʋ ɖɩɩwɛ fɛɛʋ taa Bɛtɩ-Peyɔɔrɩ+ ɛsɩndaa yɔ.

4 «Lɛɛlɛɛyɔ, Oo Izrayɛɛlɩ, iwelisi paɣtʋ nɛ tɔm hʋʋ paɣtʋ ndʋ manɖʋʋ-mɩ se ɩɖɔ tɩ-yɔɔ yɔ nɛ ɩwɛɛ wezuu,+ nɛ ɩsʋʋ nɛ ɩmʋ ɛjaɖɛ nɖɩ mɩ-cɔzɔnaa tɛ Ɛsɔ Yehowa cɛlɩɣ-mɩ yɔ. 2 Pɩfɛyɩ se ɩsɔzɩ paɣtʋ natʋyʋ ndʋ manɖʋʋ-mɩ yɔ tɩ-yɔɔ, nɛ pɩfɛyɩ ɖɔɖɔ se ɩpasɩ natʋyʋ tɩ-yɔɔ,+ nɛ piyele nɛ ɩɖɔ mɩ-Ɛsɔ Yehowa paɣtʋ ndʋ manɖʋʋ-mɩ yɔ tɩ-yɔɔ.

3 «Mɩ-maɣmaɣ ɩnanɩ mɩ-ɛsa mbʋ Yehowa labɩ Peyɔɔrɩ tɛ Baalɩ tɔm taa yɔ; mɩ-Ɛsɔ Yehowa ɖɩzɩ abalaa mba payɩ paatɩŋ Peyɔɔrɩ tɛ Baalɩ yɔ mɩ-hɛkʋ taa.+ 4 Ɛlɛ mɩ mba ɩñɔnɩ mɩ-Ɛsɔ Yehowa kpam yɔ, mɩ-tɩŋa ɩwɛnɩ mɩ-ɛsa halɩ nɛ sɔnɔ. 5 Ɩna, mawɩlɩ-mɩ paɣtʋ nɛ tɔm hʋʋ paɣtʋ+ ɛzɩ mɛ-Ɛsɔ Yehowa ɖʋʋ-m paɣtʋ yɔ, se ɩpɩzɩ nɛ ɩɖɔ tɩ-yɔɔ ɛjaɖɛ nɖɩ ɩkaɣ mʋʋ yɔ ɖɩ-taa. 6 Pɩwɛɛ se ɩɖɔ tɩ-yɔɔ ɖeyi ɖeyi,+ mbʋ pʋyɔɔ yɔ mbʋ kaɣnɩ wɩlʋʋ ajɛɛ wena akaɣ nɩʋ paɣtʋ ndʋ tɩ-tɩŋa tɩ-taŋ yɔ a-ɛsɩndaa se ɩwɛnɩ lɔŋsɩnɖɛ+ nɛ tɔm taa nɩʋ lɛɣtʋ,+ nɛ akaɣ yɔɔdʋʋ se: “Samaɣ sɔsɔɔ kanɛ, pɩtʋʋ fɛyɩ se kɛwɛnɩ lɔŋsɩnɖɛ nɛ tɔm taa nɩʋ lɛɣtʋ.”+ 7 Mbʋ pʋyɔɔ yɔ samaɣ sɔsɔɔ ŋga wɛnɩ ɛsɔnaa, nɛ ɛsɔnaa mba pɔñɔtɩnɩ-kɛ kpam ɛzɩ ɖɛ-Ɛsɔ Yehowa ñɔtɩnʋʋ-ɖʋ kpam alɩwaatʋ ndʋ payɩ ɖɩyaɣ-ɩ yɔ?+ 8 Nɛ samaɣ sɔsɔɔ ŋga wɛnɩ paɣtʋ siɣsiɣ ñɩndʋ nɛ tɔm hʋʋ paɣtʋ siɣsiɣ ñɩndʋ ɛzɩ Paɣtʋ ndʋ payɩ manɖʋʋ mɩ-ɛsɩndaa sɔnɔ yɔ?+

9 «Ɛlɛ ɩtɩlɩ labʋ nɛ ɩcɔnɩ mɩ-tɩ* yɔɔ camɩyɛ nɛ ɩtaasɔɔ mbʋ mbʋ mɩ-ɛsa nawa yɔ pɩ-yɔɔ nɛ pɩtaalɩɩ mɩ-laŋɩyɛ taa mi-wezuu kɩyakɩŋ kpeekpe. Pɩwɛɛ ɖɔɖɔ se ɩwɩlɩ-pʋ mɩ-pɩyalaa nɛ mɩ-sayɩnaa.+ 10 Kɩyakʋ ŋgʋ ɩɩsɩŋ mɩ-Ɛsɔ Yehowa ɛsɩndaa Orɛɛbʋ yɔ, Yehowa heyi-m se: “Kpeɣli samaɣ mɔn-cɔlɔ nɛ meyele nɛ kanɩɩ mɔn-tɔm,+ nɛ piyele nɛ kɛkpɛlɩkɩ ɛzɩma kese-m sɔɔndʋ+ kɩyakɩŋ weyi payɩ kacakɩ wezuu tɛtʋ yɔɔ yɔ, nɛ kawɩlɩ tɔm ɖɔɖɔ ka-pɩyalaa.”+

11 «Mbʋ ɩɩñɔtaa nɛ ɩsɩŋ pʋʋ liu tɛɛ, pʋʋ kaawɛɛ nɛ kɩmʋʋ miŋ nɛ pɩkpaɣ ɖooo ɛsɔdaa; cɩkpɛndʋʋ kaawɛɛ, nɛ mɩndʋ ɖɔɖɔ, nɛ piiyu kpimm.+ 12 Nɛ Yehowa paɣzɩ-mɩ yɔɔdɩnʋʋ nɛ miŋ taa.+ Ɩnɩ ɛ-nɔɔ taŋ, ɛlɛ ɩtɩna-ɩ;*+ nɔɔ ɖeke ɩɩnɩwa.+ 13 Nɛ eheyi-mɩ ɛ-ɛgbɛyɛ tɔm,+ nɖɩ ɛɖʋ-mɩ paɣtʋ se ɩña yɔ: Paɣtʋ Hiu.*+ Pʋwayɩ lɛ, ɛma-tʋ pɩtaahalanzɩ 2+ yɔɔ. 14 Alɩwaatʋ ndʋ Yehowa ɖʋ-m paɣtʋ se mawɩlɩ-mɩ paɣtʋ nɛ tɔm hʋʋ paɣtʋ, ndʋ tɩ-yɔɔ pɩwɛɛ se ɩɖɔ ɛjaɖɛ nɖɩ ɖɩ-taa ɩkaɣ sʋʋ se ɩmʋ-ɖɩ yɔ ɖɩ-taa yɔ.

15 «Kɩyakʋ ŋgʋ Yehowa yɔɔdɩnɩ-mɩ nɛ miŋ hɛkʋ taa Orɛɛbʋ yɔ, ɩtɩna-ɩ.* Pʋyɔɔ lɛ, ɩcɔnɩ mɩ-tɩ* yɔɔ camɩyɛ 16 nɛ pɩtaakɛdɩ nɛ ɩsaɣ mɩ-tɩ sɩʋ kpeliɣa nakɛyɛ ŋga kanɩɣzɩnɩ nabʋyʋ yɔ nɛ piyele nɛ ɩla kɩdɛkɛdɩm, sɩʋ kpeliɣa ŋga kanɩɣzɩnɩ nɔɔyʋ yɔ paa pɩtɩɩkɛ abalʋ yaa halʋ yɔ,+ 17 ŋga kanɩɣzɩnɩ kpɩnɛ naɖɩyɛ tɛtʋ yɔɔ yɔ yaa ŋga kanɩɣzɩnɩ sumaɣ nakɛyɛ ŋga kakʋyʋʋ ɛsɔdaa yɔ,+ 18 ŋga kanɩɣzɩnɩ kpɩna wena atuu tataa yɔ a-taa naɖɩyɛ yɔ yaa ŋga kanɩɣzɩnɩ kpakpayaɣ nakɛyɛ lɩm taa yɔ.*+ 19 Nɛ ɩkpazɩɣ mɩ-ɛsa ɛsɔdaa nɛ ɩna wɩsɩ, fenaɣ nɛ tɩɩnzɩ lɛ—ɛsɔdaa wondu* kpeekpe—pitaapeɣzi-mɩ nɛ iluŋ wondu ndʋ tɩ-tɛɛ nɛ ɩsɛɛ-tʋ.+ Mɩ-Ɛsɔ Yehowa ha wondu ndʋ tɛtʋ kpeekpe yɔɔ samasɩ kpeekpe. 20 Ɛlɛ mɩ Yehowa kpaɣaa nɛ ɛlɩzɩ nɛ miŋ kpou ŋgʋ kɩ-taa poyolusuu ñɩɣtʋ yɔ kɩ-taa, ɛlɩzɩ-mɩ nɛ Ejipiti se ɩpɩsɩ samaɣ ŋga kɛkɛ ɛ-maɣmaɣ ɛ-pʋyʋ,*+ ɛzɩ ɩkɛʋ ɛ-maɣmaɣ ɛ-pʋyʋ sɔnɔ yɔ.

21 «Mɩ-yɔɔ lɛ, Yehowa kɔ-m nɛ pana,+ nɛ eɖuu se maakaɣ tɛzʋʋ Yɔɔrdaŋ nɛ maakaɣ sʋʋ ɛjaɖɛ kɩbanɖɛ nɖɩ mɩ-Ɛsɔ Yehowa cɛlɩɣ-mɩ se ɖɩpɩsɩ mɩ-ñɩm yɔ ɖɩ-taa.+ 22 Mbʋ pʋyɔɔ yɔ mankaɣ sɩbʋ ɛjaɖɛ ɖɩnɛ ɖɩ-taa; maakaɣ tɛzʋʋ Yɔɔrdaŋ,+ ɛlɛ mɩ lɛ ɩkaɣ tɛzʋʋ nɛ ɩmʋ ɛjaɖɛ kɩbanɖɛ nɖɩ nɛ ɖɩpɩsɩ mɩ-ñɩm. 23 Ɩkpa mɩ-tɩ camɩyɛ nɛ ɩtaasɔɔ mɩ-Ɛsɔ Yehowa ɛgbɛyɛ nɖɩ ɛɖʋ mɩ nɛ ɩ mɩ-hɛkʋ taa yɔ ɖɩ-yɔɔ,+ nɛ ɩtaasaɣ mɩ-tɩ sɩʋ kpeliɣa nakɛyɛ nɛ kanɩɣzɩnɩ mbʋ payɩ mɩ-Ɛsɔ Yehowa kizini-mɩ yɔ pɩ-taa nabʋyʋ.+ 24 Mbʋ pʋyɔɔ yɔ mɩ-Ɛsɔ Yehowa kɛ miŋ weyi ɛɖɩzɩɣ wondu caɣ caɣ yɔ,+ Ɛsɔ weyi ɛñɩnɩɣ se pɔñɔɔnɩ e-ɖeke koŋ yɔ.+

25 «Ye ɩkɔm nɛ ɩwɛɛnɩ pɩyalaa nɛ sayɩnaa nɛ ɩcaɣ wezuu ɛjaɖɛ nɖɩ ɖɩ-taa nɛ pileɖi nɛ ɩla lakasɩ kɩdɛkɛdɩsɩ nɛ ɩsaɣ sɩʋ kpeliɣa+ nakɛyɛ, paa pɩtɩɩkɛ ŋga, nɛ ɩla mbʋ pɩfɛyɩ ɖeu yɔ mɩ-Ɛsɔ Yehowa ɛsɩndaa nɛ ɩɖʋ-ɩ ɖɩwɩzɩyɛ yɔ,+ 26 mankpakɩɣ ɛsɔdaa nɛ tɛtʋ ɛzɩ aseɣɖe tɩnaa yɔ mɩ-yɔɔ sɔnɔ se paa pɩɩlabɩ ɛzɩma yɔ, ɩkaɣ tɛŋɩlʋʋ lɔŋ ɛjaɖɛ nɖɩ ɩtɛzɩɣ Yɔɔrdaŋ se ɩmʋ nɛ ɖɩpɩsɩ mɩ-ñɩm yɔ ɖɩ-taa. Ɩɩkaɣ leɖuu ɖɩ-taa, ɛlɛ pakaɣ-mɩ ɖɩzʋʋ caɣ caɣ.+ 27 Yehowa kaɣ-mɩ mɩzʋʋ samasɩ hɛkʋ taa,+ nɛ mɩ-taa nabɛyɛ pazɩ yem kaɣnɩ wezuu hiɣu+ ajɛɛ wena a-taa Yehowa ɖɔɔnʋʋ-mɩ se ewona yɔ a-taa. 28 Peeɖe ɩkaɣ sɛʋ ɛsɔnaa mba pasaɣnɩ ɖasɩ nɛ kaaŋ yɔ, mba ɛyʋ nesi saɣaa yɔ;+ ɛsɔnaa mba paapɩzɩɣ nɛ pana, panɩɩ, pɔtɔɔ yaa panɩɩ sɔzɩŋ yɔ.

29 «Ye ɩwɛ peeɖe nɛ ɩñɩnɩ mɩ-Ɛsɔ Yehowa, ye ɩñɩnɩ-ɩ nɛ mɩ-laŋɩyɛ kpeekpe nɛ mɩ-kalɩzaɣ* kpeekpe yɔ,+ pɩtʋʋ fɛyɩ se ɩkaɣ-ɩ naʋ.+ 30 Ɩwɛɣ kʋñɔŋ sɔsɔʋ taa nɛ pɩtɩŋa payɩ mbʋ yɔ pɩtalɩ-mɩ pʋwayɩ lɛ, ɖɩnɛ ɛlɛ ɩkaɣ pɩsʋʋ mɩ-Ɛsɔ Yehowa cɔlɔ nɛ iwelisi ɛ-nɔɔ.+ 31 Mbʋ pʋyɔɔ yɔ mɩ-Ɛsɔ Yehowa kɛ Ɛsɔ pʋtɔdɩyɛ nayʋ.+ Ɛɛkaɣ-mɩ yebu nɛ ɛɛkaɣ-mɩ ɖɩzʋʋ nɛ ɛɛkaɣ sɔʋ ɛgbɛyɛ nɖɩ eɖuuni mɩ-cɔzɔnaa yɔ ɖɩ-yɔɔ.+

32 «Lɛɛlɛɛyɔ, ɩpɔzɩ kɩyakɩŋ weyi ɩɖɛwa pʋcɔ nɛ mɩ-alɩwaatʋ talɩɣ yɔ ɩ-yɔɔ, kpaɣnɩ kɩyakʋ ŋgʋ Ɛsɔ lɩzɩ abalʋ tɛtʋ yɔɔ yɔ; ɩñɩnɩ kpaɣnɩ ɛsɔdaa kamaɣ yɔɔ nɛ piwolo ɛsɔdaa kamaɣ lɛɛka yɔɔ. Wiɖiyi pʋyʋ sɔsɔ nɔɔyʋ tɛm labʋ mbʋ? Yaa wiɖiyi nɔɔyʋ nɩ nabʋyʋ taŋ mbʋ yaa we?+ 33 Wiɖiyi samaɣ nakɛyɛ tɛm nɩʋ Ɛsɔ nɔɔ yɔɔdaɣnɩ miŋ taa ɛzɩ ɩnɩʋ ɛ-nɔɔ yɔ nɛ kɛwɛɛ wezuu na?+ 34 Yaa wiɖiyi Ɛsɔ tɛm ñaɣʋ pana se ɛtɩŋnɩ tɔm hʋʋ,* yʋsasɩ, maamaaci lakasɩ,+ you,+ nesi ɖoŋ ñɩnzɩ,+ nesi nzɩ esezaa yɔ nɛ lakasɩ nzɩ sɩcaɣ sɔɔndʋ yɔ+ sɩ-yɔɔ nɛ ɛlɩzɩ ɛ-tɩ ɛjaɖɛ naɖɩyɛ ɛjaɖɛ lɛɛɖɛ taa, ɛzɩ mɩ-Ɛsɔ Yehowa labʋ-mɩ mɩ-maɣmaɣ mɩ-ɛsɩndaa Ejipiti yɔ? 35 Pawɩlɩ-mɩ wondu ndʋ se ɩna se Yehowa kɛnɩ Ɛsɔ toovenim tʋ;+ nɔɔyʋ fɛyɩ nɛ pɩtasɩnɩ-ɩ.+ 36 Eyeba nɛ ɩnɩɩ ɛ-nɔɔ nɛ ɛsɔdaa kiŋ se ɛñɔɔzɩnɩ mɩ-wɛtʋ, nɛ eyeba nɛ ɩna e-miŋ sɔsɔŋ tɛtʋ yɔɔ, nɛ ɩnɩ ɛ-tɔm nɛ miŋ taa.+

37 «Ɛɛsɔɔlɩ mɩ-cɔzɔnaa nɛ ɛlɩzɩ pa-lʋlʋʋ taa mba,*+ pʋyɔɔ ɛtɩŋnɩ e-ɖoŋ sɔsɔŋ yɔɔ nɛ ɛlɩzɩ-mɩ Ejipiti ɛjaɖɛ taa ɛ-ɛsɩndaa. 38 Ɛɖɔɔnɩ mɩ-ɛsɩndaa ajɛɛ wena akɩlɩ-mɩ paɣlʋʋ nɛ akɩlɩ-mɩ ɖoŋ yɔ, se ewoni-mɩ a-taa nɛ ɛcɛlɩ-mɩ a-tɛtʋ nɛ tɩpɩsɩ mɩ-ñɩm, ɛzɩ pɩwɛʋ sɔnɔ yɔ.+ 39 Pʋyɔɔ lɛ, ɩtɩlɩ nɛ pɩsʋʋ mɩ-laŋa taa sɔnɔ se Yehowa kɛnɩ Ɛsɔ toovenim tʋ ɛsɔdaa nɛ tataa.+ Nɔɔyʋ fɛyɩ nɛ pɩtasɩnɩ-ɩ.+ 40 Pɩwɛɛ se ɩɖɔkɩ ɛ-ɖʋtʋ nɛ ɛ-paɣtʋ ndʋ manɖʋʋ-mɩ sɔnɔ yɔ, nɛ pɩɖɔmnɩ mɩ nɛ mɩ-pɩyalaa camɩyɛ, ɖɩnɛ ɛlɛ ɩkaɣ caɣʋ ɛjaɖɛ nɖɩ mɩ-Ɛsɔ Yehowa cɛlɩɣ-mɩ yɔ ɖɩ-taa nɛ pileɖi.»+

41 Alɩwaatʋ ndʋ tɩ-taa, Moyizi lɩzɩ kɩjaʋ tɛtʋ 3 Yɔɔrdaŋ wɩsɩ ɖɩlɩyɛ hɔɔlʋʋ taa.+ 42 Ye pɩlaba se nɔɔyʋ kʋ ɛyʋ lɛlʋ ɛlɛ ɛtaaɖʋna nɛ ɛtaapaɖɩɣ-ɩ yɔ,+ pɩwɛɛ se ese nɛ ewolo tɛtʋ ndʋ tɩ-taa natʋyʋ taa nɛ ɛwɛɛ wezuu.+ 43 Tɛtʋ ndʋ yɔ: Bezɛɛrɩ,+ kañɩmbusuu taa piyaɣ ŋga ka-ñʋʋ taa wɛ landamm yɔ kɔ-yɔɔ, Rubɛɛnɩ mba ñɩndʋ lɛ; Ramɔɔtɩ,+ Galaadɩ taa, Gaadɩ mba ñɩndʋ lɛ; nɛ Golaŋ,+ Basaanɩ taa, Manaasee mba ñɩndʋ lɛ.+

44 Paɣtʋ+ tʋnɛ Moyizi ɖʋ Izrayɛɛlɩ samaɣ ɛsɩndaa. 45 Tɔm kɩtɔzɩtʋ, paɣtʋ nɛ tɔm hʋʋ paɣtʋ tʋnɛ Moyizi cɛlɩ Izrayɛɛlɩ mba, pɛtɛm lɩnʋʋ Ejipiti lɛ,+ 46 Yɔɔrdaŋ egeetiye taa, fɛɛʋ ŋgʋ kɩha ɛsa nɛ Bɛtɩ-Peyɔɔrɩ yɔ kɩ-taa,+ Amoori mba wiyaʋ Sihɔɔnɩ weyi ɛɛwɛ Hɛsɩbɔɔnɩ yɔ ɛ-ɛjaɖɛ taa,+ weyi Moyizi nɛ Izrayɛɛlɩ mba paawabɩ-ɩ yɔ, pɛtɛm lɩnʋʋ Ejipiti lɛ.+ 47 Nɛ pamʋ ɛ-ɛjaɖɛ nɛ Basaanɩ wiyaʋ Oogi+ ɛjaɖɛ ɖɔɖɔ, Amoori mba awiya 2 wena aawɛ Yɔɔrdaŋ wɩsɩ ɖɩlɩyɛ egeetiye taa yɔ, 48 kpaɣnɩ Arowɛɛrɩ+ ŋgʋ kɩwɛ Arɩnɔɔnɩ Fɛɛʋ* nɔɔ yɔɔ yɔ, nɛ pɩɖɛɛ pɩkpa Siyɔɔnɩ Pʋʋ, pʋ-tɔbʋʋ se Hɛrɩmɔɔnɩ,+ 49 nɛ Araba kpeekpe Yɔɔrdaŋ wɩsɩ ɖɩlɩyɛ egeetiye taa, nɛ piwolo pɩtalɩ Araba Teŋgu,* Pizɩga kajalanzɩ tɛɛ.+

5 Ðɩnɛ ɛlɛ, Moyizi kpeɣli Izrayɛɛlɩ mba kpeekpe nɛ eheyi-wɛ se: «Oo Izrayɛɛlɩ, welisi paɣtʋ nɛ tɔm hʋʋ paɣtʋ ndʋ tɩ-tɔm meheyiɣ-mɩ sɔnɔ yɔ, pɩwɛɛ se ɩkpɛlɩkɩ-tʋ nɛ ɩɖɔ tɩ-yɔɔ ɖeyi ɖeyi. 2 Ðɛ-Ɛsɔ Yehowa ɖʋ ɛgbɛyɛ naɖɩyɛ ɖa nɛ ɩ ɖɛ-hɛkʋ taa Orɛɛbʋ.+ 3 Pɩtɩkɛ ɖɔ-cɔzɔnaa Yehowa ɖʋnɩ ɛgbɛyɛ nɖɩ, ɛlɛ ɖa ɛɖʋnɩ-ɖɩ; ɖa mba payɩ ɖɩwɛnɩ ɖɛ-ɛsa cɩnɛ sɔnɔ yɔ. 4 Yehowa yɔɔdɩnɩ-mɩ mɩ-ɛsɩndaa kaɣlaa pʋʋ taa, ɛyɔɔdɩnɩ-mɩ nɛ miŋ taa.+ 5 Alɩwaatʋ ndʋ, maasɩŋ mɩ nɛ Yehowa mɩ-hɛkʋ taa+ se meheyi-mɩ Yehowa tɔm, mbʋ pʋyɔɔ yɔ sɔɔndʋ kpaɣaɣ-mɩ nɛ miŋ ɛnɩ nɛ ɩtɩkpa pʋʋ taa.+ Ɛyɔɔdaa se:

6 «“Mɛkɛnɩ ñɛ-Ɛsɔ Yehowa, weyi ɛlɩzɩ-ŋ Ejipiti ɛjaɖɛ taa, yomiye ɖɩɣa taa yɔ.+ 7 Pɩfɛyɩ kaaʋ se ŋwɛɛnɩ ɛsɔnaa lalaa nɛ pɩtasɩnɩ-m.*+

8 «“Pɩfɛyɩ se ŋsaɣ ña-tɩ sɩʋ kpeliɣa nakɛyɛ+ yaa nabʋyʋ mbʋ pɩnɩɣzɩnɩ mbʋ pɩwɛ ɛsɔdaa, yaa tɛtʋ yɔɔ, yaa lɩm taa* yɔ pɩ-taa nabʋyʋ. 9 Pɩfɛyɩ se ŋluŋ pɩ-tɛɛ yaa ŋyele nɛ pɩhɔmɩ-ŋ nɛ ŋsɛɛ-pʋ,+ mbʋ pʋyɔɔ yɔ ma ñɛ-Ɛsɔ Yehowa lɛ, mɛnkɛ Ɛsɔ weyi ɛñɩnɩɣ se pɔñɔɔnɩ e-ɖeke koŋ yɔ,+ weyi caanaa kɩwɛɛkɩm yɔɔ lɛ, ɛkɔŋnɩ nɩŋgbaŋʋʋ hɔm pɩyalaa yɔɔ yɔ, mba papaɖɩɣ-m yɔ pa-kpaɖʋʋ 3 ñɩŋgʋ nɛ pa-kpaɖʋʋ 4 ñɩŋgʋ yɔɔ yɔ,+ 10 ɛlɛ mawɩlɩɣ sɔɔlɩm siɣsiɣ ñɩmbʋ* mba pɔsɔɔlɩ-m nɛ pɔɖɔŋ man-paɣtʋ yɔɔ yɔ pa-kpaɖʋʋ 1 000 ñɩŋgʋ.

11 «“Pɩfɛyɩ se ŋlabɩnɩ tʋmɩyɛ ñɛ-Ɛsɔ Yehowa hɩɖɛ ɛzɩma pɩtɩpɔzɩ yɔ,+ mbʋ pʋyɔɔ yɔ Yehowa ɛɛkaɣ yebu weyi ɛlakɩnɩ ɛ-hɩɖɛ tʋmɩyɛ ɛzɩma pɩtɩpɔzɩ yɔ ɛ-nɩŋgbaŋʋʋ hɔm.+

12 «“Ña Sabaatɩ kɩyakʋ nɛ ŋyele nɛ kɩkɛ kiɖeɖeu, ɛzɩ ñɛ-Ɛsɔ Yehowa ɖʋʋ-ŋ paɣtʋ yɔ.+ 13 Kɩyakɩŋ 6 pɩwɛɛ se ŋla tʋmɩyɛ nɛ mbʋ payɩ ŋwɛna se ŋlakɩ yɔ,+ 14 ɛlɛ kɩyakʋ 7 ñɩŋgʋ kɛ sabaatɩ ñɛ-Ɛsɔ Yehowa.+ Pɩfɛyɩ se ŋla tʋmɩyɛ naɖɩyɛ,+ paa pɩtɩɩkɛ ña, yaa ña-pɩyalʋ, yaa ñɛ-pɛlɛ, yaa ño-yom abalɩñɩnʋ, yaa ño-yom halɩñɩnʋ, yaa ñɔ-nɔ abalɩñɩnʋ, yaa ña-kpaŋaɣ, yaa ña-ɖɩɣa kpɩnɛ naɖɩyɛ, yaa ɛgɔm weyi ɛwɛ ñɛ-tɛtʋ* taa yɔ,+ se pɩsa nɛ ño-yom abalɩñɩnʋ nɛ ño-yom halɩñɩnʋ pɛhɛzɩ ɛzɩ ña ɖɔɖɔ yɔ.+ 15 Tɔzɩ se ŋŋpɩsɩ yom Ejipiti ɛjaɖɛ taa nɛ ñɛ-Ɛsɔ Yehowa lɩzɩ-ŋ peeɖe nɛ e-nesi ɖoŋ ñɩnzɩ nɛ nesi nzɩ esezaa yɔ.+ Pʋyɔɔ ñɛ-Ɛsɔ Yehowa ɖʋ-ŋ paɣtʋ se ŋña Sabaatɩ kɩyakʋ.

16 «“Ðʋ ña-caa nɛ ño-ɖoo hɩɖɛ,+ ɛzɩ ñɛ-Ɛsɔ Yehowa ɖʋʋ-ŋ paɣtʋ yɔ, nɛ ŋpɩzɩ ŋcaɣ wezuu nɛ pileɖi nɛ piɖeni-ŋ* ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-taa.+

17 «“Taakʋ ɛyʋ.+

18 «“Taala acɛyɛ ɖɔɖɔ.+

19 «“Taamɩlɩ ɖɔɖɔ.+

20 «“Taalɩzɩ ɖɔɖɔ cɛtɩm aseɣɖe ɛyʋ lɛlʋ yɔɔ.+

21 «“Ñe-liu tɛɛ ɛtaakɔtɩnɩ ɛyʋ lɛlʋ halʋ.+ Ñe-liu tɛɛ ɛtaakɔtɩnɩ ɖɔɖɔ ɛyʋ lɛlʋ ɖɩɣa, yaa ɛ-hayɩm, yaa e-yom abalɩñɩnʋ, yaa e-yom halɩñɩnʋ, yaa ɛ-nɔ abalɩñɩnʋ, yaa ɛ-kpaŋaɣ, yaa mbʋ payɩ pɩkɛ ɛyʋ lɛlʋ pʋyʋ yɔ.”+

22 «Paɣtʋ* ndʋ tɩ-tɔm Yehowa heyi mɩ-samaɣ kpeekpe pʋʋ taa, ɛyɔɔdɩnɩ nɔɔ sɔsɔɔ miŋ taa, mɩndʋ taa nɛ cɩkpɛndʋʋ sɔsɔʋ taa,+ nɛ ɛtɩsɔzɩ natʋyʋ tɩ-yɔɔ; pʋwayɩ lɛ ɛma-tʋ pɩtaahalanzɩ 2 yɔɔ nɛ ɛcɛlɩ-m.+

23 «Ɛlɛ ɩtɩɩnɩ nɔɔ taŋ cɩkpɛndʋʋ taa, alɩwaatʋ ndʋ pʋʋ mʋwaɣ miŋ lɛ,+ mi-cejewe ñʋndɩnaa kpeekpe nɛ ɛzʋtʋyaa pɔñɔtɩnɩ-m. 24 Nɛ ɩyɔɔdɩ se: “Ðɛ-Ɛsɔ Yehowa wɩlɩ-ɖʋ ɛ-samtʋ nɛ ɛ-paɣlɩka, nɛ ɖɩnɩ ɛ-nɔɔ miŋ taa.+ Sɔnɔ ɖɩnawa se Ɛsɔ pɩzɩɣ nɛ ɛyɔɔdɩnɩ ɛyʋ, ɛlɛ ɛyʋ ɛnʋ ɛwɛɛ wezuu.+ 25 Lɛɛlɛɛyɔ, ɛbɛ yɔɔ pɩwɛɛ se ɖɩsɩ? Miŋ sɔsɔŋ ɛnɛ ɛpɩzɩɣ nɛ ɛñaɣ-ɖʋ. Ye ɖɩwɛɛ nɛ ɖɩnɩɣ ɖɛ-Ɛsɔ Yehowa nɔɔ mbʋ yɔ, pɩtʋʋ fɛyɩ se ɖɩkaɣ sɩbʋ. 26 Mbʋ pʋyɔɔ yɔ ɛyʋ* weyi tɛm nɩʋ Ɛsɔ ɛsadʋ nɔɔ nɛ miŋ taa ɛzɩ ɖa yɔ nɛ ɛwɛɛ wezuu? 27 Ña-maɣmaɣ wolo nɛ ŋnɩɩ tɔm ndʋ payɩ ɖɛ-Ɛsɔ Yehowa kaɣ yɔɔdʋʋ yɔ; nɛ ñakaɣnɩ-ɖʋ heyuu ndʋ payɩ ɖɛ-Ɛsɔ Yehowa heyiɣ-ŋ yɔ, nɛ ɖɩkaɣ welisuu nɛ ɖɩɖɔ tɩ-yɔɔ.”+

28 «Nɛ Yehowa nɩɩ tɔm ndʋ iheyi-m yɔ, nɛ Yehowa heyi-m se: “Manɩ tɔm ndʋ samaɣ kanɛ keheyi-ŋ yɔ. Tɔm ndʋ payɩ kɔyɔɔdaa yɔ tɩwɛ ɖeu.+ 29 Ye paa ɛzɩmtaa kaawɛnɩ laŋɩyɛ nɖɩ ɖiseɣtiɣ-kɛ se kese-m sɔɔndʋ+ nɛ kɔɖɔŋ man-paɣtʋ tɩŋa yɔɔ yɔ,+ ɖɩnɛ ɛlɛ pɩɩɖɔmnɩ ka nɛ ka-pɩyalaa camɩyɛ tam.+ 30 Wolo nɛ ŋheyi-kɛ se: ‘Ɩpɩsɩ mi-kizinzikiŋ tɛɛ.’ 31 Ɛlɛ ña lɛ pɩwɛɛ se ŋcaɣ mɔn-cɔlɔ cɩnɛ, nɛ meheyi-ŋ paɣtʋ, ɖʋtʋ nɛ tɔm hʋʋ paɣtʋ tɩŋa ndʋ pɩwɛɛ se ŋwɩlɩ-kɛ nɛ kɔɖɔ tɩ-yɔɔ ɛjaɖɛ nɖɩ mɛncɛlɩɣ-kɛ se ɖɩpɩsɩ ka-ñɩm yɔ ɖɩ-taa yɔ.” 32 Nɛ mɩ lɛ, pɩwɛɛ se ɩkpa mɩ-tɩ nɛ ɩla ɖeyi ɖeyi ɛzɩ mɩ-Ɛsɔ Yehowa ɖʋʋ-mɩ paɣtʋ yɔ.+ Pɩfɛyɩ se ikpilini nɩwaŋ yɔɔ yaa nɩmɩyɛ yɔɔ.+ 33 Nʋmɔʋ ŋgʋ mɩ-Ɛsɔ Yehowa ɖʋ-mɩ paɣtʋ se ɩɖɔ kɩ-taa yɔ, pɩwɛɛ se ɩɖɔ kɩ-taa ɖeyi ɖeyi,+ nɛ ɩwɛɛ wezuu nɛ piɖeni-mɩ nɛ mɩ-kɩyakɩŋ ɖɔɔ ɛjaɖɛ nɖɩ ɩkaɣ mʋʋ yɔ ɖɩ-taa.+

6 «Paɣtʋ, ɖʋtʋ nɛ tɔm hʋʋ paɣtʋ tʋnɛ mɩ-Ɛsɔ Yehowa cɛlaa se pawɩlɩnɩ-mɩ tɔm, nɛ ɩɖɔ tɩ-yɔɔ alɩwaatʋ ndʋ ɩtɛzɩɣ nɛ ɩsʋʋ ɛjaɖɛ nɖɩ ɩkaɣ mʋʋ yɔ ɖɩ-taa yɔ, 2 se pɩsa nɛ ɩña mɩ-Ɛsɔ Yehowa nɛ ɩɖɔkɩ ɛ-ɖʋtʋ nɛ ɛ-paɣtʋ tɩŋa ndʋ manɖʋʋ-mɩ yɔ—mɩ nɛ mɩ-pɩyalaa nɛ mɩ-sayɩnaa+—mi-wezuu caɣʋ kɩyakɩŋ kpeekpe, nɛ ɩpɩzɩ ɩcaɣ wezuu nɛ pileɖi.+ 3 Oo Izrayɛɛlɩ, pɩwɛɛ se iwelisi nɛ ɩɖɔ tɩ-yɔɔ ɖeyi ɖeyi, nɛ piɖeni-mɩ nɛ ɩɖɔɔ siŋŋ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ, ɛzɩ mɩ-cɔzɔnaa tɛ Ɛsɔ Yehowa kaalabʋ-mɩ tamaɣ yɔ.

4 «Welisi, Oo Izrayɛɛlɩ: Ðɛ-Ɛsɔ Yehowa kɛ Yehowa kʋɖʋm koŋ.+ 5 Pɩwɛɛ se ŋsɔɔlɩ ñɛ-Ɛsɔ Yehowa nɛ ña-laŋɩyɛ kpeekpe, nɛ ña-kalɩzaɣ* kpeekpe+ nɛ ño-ɖoŋ* kpeekpe.+ 6 Paɣtʋ ndʋ manɖʋʋ-ŋ sɔnɔ yɔ, pɩwɛɛ se tɩwɛɛ ña-laŋɩyɛ taa, 7 pɩwɛɛ se ŋkpɛlɩkɩɣ-tʋ ñe-piya* nɛ ŋlɛlɩɣ kaahɛzaɣ*+ nɛ ŋyɔɔdʋʋ tɩ-tɔm alɩwaatʋ ndʋ ŋcakɩ ña-ɖɩɣa taa yɔ, alɩwaatʋ ndʋ ŋɖɔŋ nʋmɔʋ taa yɔ, alɩwaatʋ ndʋ ŋhɩnɩɣ yɔ nɛ alɩwaatʋ ndʋ ŋkʋyʋʋ yɔ.+ 8 Hɔkɩ-tʋ ñe-nesi yɔɔ nɛ ŋtɔzʋʋ tɩ-yɔɔ, nɛ pɩwɛɛ se tɩwɛɛ ñe-kiɖe taa* ɛzɩ ñʋʋ kɩtamʋʋ yɔ.+ 9 Ma-tʋ ña-ɖɩɣa pɔɔyɩŋ* yɔɔ nɛ ñɔ-nɔnɔsɩ yɔɔ.

10 «Alɩwaatʋ ndʋ mɩ-Ɛsɔ Yehowa wokini-mɩ ɛjaɖɛ nɖɩ eɖuuni mɩ-cɔzɔnaa Abraham, Izaakɩ nɛ Yakɔɔb se ɛcɛlɩɣ-mɩ yɔ ɖɩ-taa yɔ,+ ɛjaɖɛ nɖɩ ɖɩ-taa wɛ tɛtʋ sɔsɔtʋ nɛ kɩbandʋ ndɩ ndɩ ndʋ ɩtɩma yɔ,+ 11 ɖɩsɩ nzɩ wondu kɩbandʋ ndɩ ndɩ su sɩ-taa yɔ, wondu ndʋ ɩtɩla tʋmɩyɛ naɖɩyɛ pʋcɔ nɛ ihiɣ-tʋ yɔ, lɔkɔnaa* mba itihuyi yɔ nɛ viiñi hayɩm nɛ oliivi tɩŋ weyi ɩtɩsɔ yɔ, nɛ ɩtɔɔ nɛ ɩhaɣ lɛ,+ 12 ɩkpa mɩ-tɩ nɛ ɩtaasɔɔ Yehowa yɔɔ,+ ɛnʋ weyi ɛlɩzɩ-mɩ Ejipiti ɛjaɖɛ taa, yomiye ɖɩɣa taa yɔ. 13 Mɩ-Ɛsɔ Yehowa pɩwɛɛ se ise sɔɔndʋ,+ ɛnʋ pɩwɛɛ se ɩsɛɛ+ nɛ ɛ-hɩɖɛ pɩwɛɛ se iɖuuna.+ 14 Pɩfɛyɩ se ɩtɩŋ ɛsɔnaa lalaa, ajɛɛ wena acɔ-mɩ nɛ ata yɔ a-ɛsɔnaa,+ 15 mbʋ pʋyɔɔ yɔ mɩ-Ɛsɔ Yehowa weyi ɛwɛ mɩ-hɛkʋ taa yɔ, ɛkɛ Ɛsɔ weyi ɛñɩnɩɣ se pɔñɔɔnɩ e-ɖeke koŋ yɔ.+ Pɩtɩkɛ mbʋ yɔ, mɩ-Ɛsɔ Yehowa kɔʋ-mɩ nɛ pana siŋŋ+ nɛ ɛɖɩzɩ-mɩ tɛtʋ yɔɔ.+

16 «Pɩfɛyɩ se ɩtakɩ mɩ-Ɛsɔ Yehowa+ ɛzɩ ɩɩtakʋʋ-ɩ Masaa yɔ.+ 17 Pɩwɛɛ se ɩña mɩ-Ɛsɔ Yehowa paɣtʋ, ɛ-tɔm kɩtɔzɩtʋ nɛ ɛ-ɖʋtʋ ndʋ ɛɖʋ-mɩ paɣtʋ se ɩña yɔ ɖeyi ɖeyi. 18 Pɩwɛɛ se ɩla mbʋ pɩwɛ siɣsiɣ nɛ piɖe Yehowa ɛsɩndaa yɔ, se pɩsa nɛ piɖeni-mɩ nɛ ɩsʋʋ nɛ ɩmʋ ɛjaɖɛ kɩbanɖɛ nɖɩ Yehowa ɖuuni mɩ-cɔzɔnaa yɔ,+ 19 nɛ ɩɖɔɔnɩ mi-koyindinaa kpeekpe mɩ-ɛsɩndaa, ɛzɩ Yehowa kaalabʋ tamaɣ yɔ.+

20 «Cee wayɩ, ye mi-piya* ɩpɔzɩ-mɩ se: “Tɔm kɩtɔzɩtʋ, ɖʋtʋ nɛ tɔm hʋʋ paɣtʋ ndʋ ɖɛ-Ɛsɔ Yehowa ɖʋ-mɩ se ɩña yɔ tɩ-tɔbʋʋ lɛ suwe?” yɔ, 21 ɖɩnɛ ɛlɛ iicosi-sɩ se: “Ðɩɩpɩsɩ Farawɔɔ yomaa Ejipiti, ɛlɛ Yehowa tɩŋnɩ e-nesi ɖoŋ ñɩnzɩ yɔɔ nɛ ɛlɩzɩ-ɖʋ Ejipiti. 22 Nɛ Yehowa tiyele labʋ ɖɛ-ɛsɩndaa yʋsasɩ nɛ maamaaci lakasɩ sɔsɔsɩ nzɩ sɩwɛɛkɩɣ wondu yɔ nɛ ɛkɔnɩnɩ kʋñɔŋ Ejipiti yɔɔ,+ Farawɔɔ yɔɔ nɛ ɛ-ɖɩɣa taa mba tɩŋa yɔɔ.+ 23 Nɛ ɛlɩzɩ-ɖʋ peeɖe nɛ ɛkɔnɩ-ɖʋ cɩnɛ se ɛcɛlɩ-ɖʋ ɛjaɖɛ nɖɩ eeɖuuni ɖɔ-cɔzɔnaa yɔ.+ 24 Pʋwayɩ lɛ, Yehowa pɔzɩ-ɖʋ se ɖɩña paɣtʋ ndʋ ti-kpeekpe nɛ ɖise ɖɛ-Ɛsɔ Yehowa sɔɔndʋ nɛ piɖeni-ɖʋ tam,+ se pɩsa nɛ ɖɩwɛɛ wezuu,+ ɛzɩ ɖɩwɛʋ wezuu sɔnɔ yɔ. 25 Nɛ ye ɖɩñaŋ ɖɛ-Ɛsɔ Yehowa nɛ ɖɩɖɔŋ paɣtʋ ndʋ ti-kpeekpe tɩ-yɔɔ ɖeyi ɖeyi, ɛzɩ ɛɖʋʋ-ɖʋ paɣtʋ yɔ yɔ, ɛkaɣ-ɖʋ kpaɣʋ se ɖɩkɛ ɛyaa siɣsiɣ tɩnaa.”+

7 «Ñɛ-Ɛsɔ Yehowa wokini-ŋ ɛjaɖɛ nɖɩ ɖɩ-taa ŋcaɣ sʋʋ se ŋmʋ-ɖɩ nɛ ɖɩpɩsɩ ña-ñɩm yɔ ɖɩ-taa lɛ,+ ɛkaɣ ɖɔɖɔ hazʋʋ ajɛɛ wena a-taa ɛyaa ɖɔ sakɩyɛ yɔ ñɛ-ɛsɩndaa:+ Hɛɛtɩ mba, Girgasɩ mba, Amoori mba,+ Kanaŋ mba, Perizi mba, Hivi mba nɛ Yebuusi mba,+ ajɛɛ 7 wena a-taa ɛyaa kɩlɩ-ŋ ɖɔʋ nɛ pakɩlɩ-ŋ ɖoŋ yɔ.+ 2 Ñɛ-Ɛsɔ Yehowa kaɣ-wɛ ɖʋzʋʋ ñe-nesi taa, nɛ ŋkaɣ-wɛ wabʋ.+ Paa pɩtɩɩkɛ suwe yɔ, pɩwɛɛ se ŋɖɩzɩ-wɛ.+ Ña nɛ wɛ ɩtaaɖʋ ɛgbɛyɛ naɖɩyɛ nɛ taatɩɩnaʋ pa-pʋtɔdɩyɛ.+ 3 Pɩfɛyɩ se ña nɛ wɛ ɩɖʋ nesi ɖɔkʋʋ ɛgbɛyɛ* naɖɩyɛ. Taakpaɣ ñɛ-pɛlaa nɛ ŋcɛlɩ pa-pɩyalaa nɛ taakpaɣ pɛ-pɛlaa nɛ ŋcɛlɩ ña-pɩyalaa.+ 4 Mbʋ pʋyɔɔ yɔ pakaɣ yebu nɛ ña-pɩyalaa ha-m siɣye nɛ pɛsɛɛ ɛsɔnaa lalaa;+ ɖɩnɛ ɛlɛ pɩkaɣ kulusuu Yehowa pana ñɔ-yɔɔ nɛ ɛɖɩzɩ-ŋ lɔŋ.+

5 «Ɛlɛ mbʋ pɩwɛɛ se ɩlabɩ-wɛ yɔ, mbʋ yɔ: Ɩyɔkɩ pa-altaarunaa nɛ pe-tilima kiɖeɖena,+ ɩsɛtɩ pe-sizikasɩ kiɖeɖesi*+ nɛ ɩñaɣzɩ miŋ sɩʋ kpelisi nzɩ pasaɣaa yɔ.+ 6 Mbʋ pʋyɔɔ yɔ ɩkɛ samaɣ kiɖeɖeɣa mɩ-Ɛsɔ Yehowa, nɛ mɩ-Ɛsɔ Yehowa lɩzɩ-mɩ samasɩ kpeekpe nzɩ sɩwɛ tɛtʋ yɔɔ yɔ sɩ-taa se ɩpɩsɩ ɛ-samaɣ, e-ŋgee pʋyʋ.*+

7 «Pɩtɩkɛ se mɩkɩlɩnɩ ɖɔʋ samasɩ kpeekpe taa yɔɔ Yehowa sɔɔlɩ-mɩ nɛ ɛlɩzɩ-mɩ,+ toovenim taa lɛ mɩkɩlɩnɩ kɔzʋʋ samasɩ kpeekpe taa.+ 8 Ɛlɛ Yehowa sɔɔlɩ-mɩ, pɩtasɩ lɛ ɛɖɔkɩ ɖuutu ndʋ eeɖuuni mɩ-cɔzɔnaa yɔ,+ pʋyɔɔ Yehowa lɩzɩ-mɩ nɛ e-nesi ɖoŋ ñɩnzɩ, se ɛya mɩ-ñʋʋ yomiye ɖɩɣa taa,+ Ejipiti wiyaʋ Farawɔɔ ɖoŋ* tɛɛ. 9 Ŋsɩm camɩyɛ se ñɛ-Ɛsɔ Yehowa kɛ Ɛsɔ toovenim tʋ, Ɛsɔ siɣsiɣ tʋ, weyi ɛɖɔkʋʋ ɛ-ɛgbɛyɛ nɛ ɛwɩlɩɣ sɔɔlɩm siɣsiɣ ñɩmbʋ mba pɔsɔɔlɩ-ɩ nɛ pɔɖɔkʋʋ ɛ-paɣtʋ yɔ, piwolo nɛ pɩtalɩ pa-kpaɖʋʋ 1 000 ñɩŋgʋ.+ 10 Ɛlɛ mba papaɖɩɣ-ɩ yɔ, ɛɖɩzɩɣ-wɛ se ɛkpanɩ-wɛ kɩmɩyɛ pɛ-ɛsɩndaa.+ Ɛɛkaɣ labʋ ninika mba papaɖɩɣ-ɩ yɔ pɔ-tɔm taa; ɛkaɣ-wɛ kɩmɩyɛ kpaʋ pɛ-ɛsɩndaa. 11 Pʋyɔɔ lɛ, pɩwɛɛ se ŋɖɔkɩ camɩyɛ paɣtʋ, ɖʋtʋ nɛ tɔm hʋʋ paɣtʋ ndʋ manɖʋʋ-ŋ sɔnɔ yɔ nɛ ŋɖɔ tɩ-yɔɔ.

12 «Ye ŋwobi pɩ-yɔɔ nɛ ŋwelisiɣ tɔm hʋʋ paɣtʋ tʋnɛ nɛ ŋɖɔŋ tɩ-yɔɔ nɛ ŋɖɔkʋʋ-tʋ kpam yɔ, ñɛ-Ɛsɔ Yehowa kaɣ ɖɔkʋʋ ɛgbɛyɛ nɛ sɔɔlɩm siɣsiɣ ñɩmbʋ mbʋ eɖuuni ñɔ-cɔzɔnaa yɔ. 13 Ɛkaɣ-ŋ sɔɔlʋʋ nɛ ɛwazɩ-ŋ nɛ eyele nɛ ŋhuu. Ɛɛɛ, ɛkaɣ-ŋ wazʋʋ nɛ ŋwɛɛnɩ piya sakɩyɛ,+ ɛkaɣ wazʋʋ mbʋ ñɛ-tɛtʋ lʋlʋʋ yɔ, ñɔ-tɔɔnaɣ pee, ñɛ-vɛɛ kɩfalʋʋ, ño-num,+ ñe-newee nɛ ñe-heɣsi, ɛjaɖɛ nɖɩ eɖuuni ñɔ-cɔzɔnaa se ɛcɛlɩɣ-ŋ yɔ ɖɩ-taa.+ 14 Ŋkaɣ kɛʋ samaɣ ŋga pawazɩ-kɛ nɛ pɩkɩlɩ samasɩ kpeekpe yɔ;+ nɛ abalʋ nɔɔyʋ yaa halʋ nɔɔyʋ ɛɛkaɣ wɛʋ ñɛ-tɛ nɛ ɛfɛyɩnɩ pɩɣa nɛ mbʋ ɖɔɖɔ ña-kpɩnɛ naɖɩyɛ ɛɛkaɣ wɛʋ nɛ ɖɩfɛyɩnɩ pɩɣa.+ 15 Yehowa kaɣ-ŋ posinuu kʋdɔmɩŋ kpeekpe, nɛ ɛɛkaɣ yebu nɛ kʋdɔmɩŋ sɔsɔŋ weyi ŋŋsɩmɩ-ɩ Ejipiti yɔ ɩ-taa nakʋyʋ kpa-ŋ.+ Ɛlɛ eyeki nɛ kʋdɔmɩŋ ɛnɩ ɩkpa mba payɩ papaɖɩɣ-ŋ yɔ. 16 Pɩwɛɛ se ŋɖɩzɩ* samasɩ nzɩ payɩ ñɛ-Ɛsɔ Yehowa ɖʋzʋʋ ñe-nesi taa yɔ.+ Pɩtɩpɔzɩ se ŋna* sɩ-pʋtɔdɩyɛ,+ nɛ pɩtɩpɔzɩ se ŋsɛɛ sɩ-ɛsɔnaa,+ mbʋ pʋyɔɔ yɔ ye ŋlabɩ mbʋ yɔ pɩkaɣ-ŋ kɛnʋʋ kpaca.+

17 «Ye ŋyɔɔdʋʋ ña-laŋɩyɛ taa se: “Samasɩ sɩnɛ sɩkɩlɩ-ɖʋ ɖɔʋ. Ɛzɩma manpɩzɩɣ mala nɛ mɔnɖɔɔnɩ-sɩ?” yɔ,+ 18 pɩfɛyɩ se sɔɔndʋ ɛkpa-ŋ nɛ sɩ.+ Pɩwɛɛ se ŋtɔzɩ mbʋ ñɛ-Ɛsɔ Yehowa labɩ Farawɔɔ nɛ Ejipiti kpeekpe yɔ pɩ-yɔɔ,+ 19 tɔzɩ nɩŋgbaŋʋʋ hɔm* sɔsɔm mbʋ ŋnanɩ ñɛ-ɛsa yɔ, yʋsasɩ nɛ maamaaci lakasɩ+ nɛ nesi ɖoŋ ñɩnzɩ nɛ nesi nzɩ ñɛ-Ɛsɔ Yehowa sezaa nɛ ɛlɩzɩnɩ-ŋ yɔ sɩ-yɔɔ.+ Mbʋ ɖɔɖɔ ñɛ-Ɛsɔ Yehowa kaɣ labʋ samasɩ nzɩ payɩ ŋseɣ sɔɔndʋ yɔ.+ 20 Ñɛ-Ɛsɔ Yehowa kaɣ yebu nɛ pɩlabɩ-wɛ ɛzɩ pɔ-tɔm tɛma yɔ* nɛ pɩkɔɔ pɩsɩɩnɩ alɩwaatʋ ndʋ mba pakazaa+ nɛ pɛwɛɛ nɛ pɛmɛlɩɣ ñɛ-ɛsɩndaa yɔ pasɩba yɔ. 21 Sɔɔndʋ ɛtaakpa-ŋ nɛ wɛ, mbʋ pʋyɔɔ yɔ ñɛ-Ɛsɔ Yehowa wɛ ñɔ-cɔlɔ,+ ɛkɛ Ɛsɔ sɔsɔ nɛ ɛcaɣ sɔɔndʋ.+

22 «Pɩtʋʋ fɛyɩ se ñɛ-Ɛsɔ Yehowa kaɣ ajɛɛ ana ɖɔɔnʋʋ ñɛ-ɛsɩndaa pazɩ pazɩ.+ Ɛɛkaɣ-ŋ haʋ nʋmɔʋ se ŋɖɩzɩ-yɛ tam kʋɖʋm, se pɩtaakɛdɩ nɛ tɛtɛgbɩna tɔyɩ nɛ akʋyɩ ñɔ-yɔɔ. 23 Ñɛ-Ɛsɔ Yehowa kaɣ-wɛ ɖʋzʋʋ ñe-nesi taa nɛ ɛwabɩ-wɛ caɣ caɣ nɛ pɩkɔɔ pɩsɩɩnɩ alɩwaatʋ ndʋ ɛɖɩzɩ-wɛ yɔ.+ 24 Ɛkaɣ ɖʋzʋʋ pa-awiya ñe-nesi taa,+ nɛ ŋkaɣ hɩzʋʋ pa-hɩla tɛtʋ yɔɔ.+ Nɔɔyʋ ɛɛkaɣ pɩzʋʋ nɛ ɛkaɖɩnɩ-ŋ,+ pɩkɔɔ pɩsɩɩnɩ alɩwaatʋ ndʋ ŋɖɩzɩ-wɛ yɔ.+ 25 Pɩwɛɛ se ɩñaɣzɩ miŋ pɛ-ɛsɔnaa sɩʋ kpelisi nzɩ pasaɣaa yɔ.+ Ñe-liu tɛɛ ɛtaakɔtɩnɩ liidiye nɛ sika ŋga kɛwɛ sɩ-yɔɔ yɔ,+ nɛ taakpaɣ wondu ndʋ nɛ ŋsɩɩnɩ ña-tɩ, se pɩtaakɛdɩ nɛ ŋtɔlɩ tɩ-kpaca taa; mbʋ pʋyɔɔ yɔ pɩkɛ mbʋ ñɛ-Ɛsɔ Yehowa paɖɩɣ yɔ.+ 26 Pɩfɛyɩ se ŋsʋnɩ kʋzɔɔtʋ pʋyʋ ña-ɖɩɣa taa mbʋ pʋyɔɔ yɔ, ɛzɩ pʋyʋ ɛnʋ yɔ ŋkaɣ pɩsʋʋ mbʋ pɩwɛɛ se paɖɩzɩ yɔ. Pɩwɛɛ se pɩcaɣ kiniŋ kpem ñɛ-ɛsɩndaa nɛ ŋpaɖɩ-pʋ nɛ ŋtɛ ña-taa, mbʋ pʋyɔɔ yɔ pɩkɛ mbʋ pɩwɛɛ se paɖɩzɩ yɔ.

8 «Paɣtʋ ndʋ manɖʋʋ-mɩ sɔnɔ yɔ, pɩwɛɛ se ɩkpa mɩ-tɩ camɩyɛ nɛ ɩɖɔ tɩ-tɩŋa tɩ-yɔɔ; nɛ ɩpɩzɩ ɩwɛɛ wezuu+ nɛ ihuu nɛ ɩsʋʋ nɛ ɩmʋ ɛjaɖɛ nɖɩ Yehowa kaaɖuuni mɩ-cɔzɔnaa yɔ.+ 2 Tɔzɩ nʋmɔʋ kɩɖaɣlʋʋ ŋgʋ ñɛ-Ɛsɔ Yehowa yeba nɛ ŋɖɔ pɩnzɩ 40 sɩnɛ kañɩmbusuu taa yɔ kɩ-yɔɔ.+ Ɛɛlabɩ mbʋ se ɛtɩŋnɩ pɩ-yɔɔ nɛ eluzi-ŋ nɛ ɛtakɩ-ŋ+ nɛ ɛna mbʋ pɩɩwɛ ña-laŋɩyɛ taa yɔ,+ nɛ ɛna se ŋkaɣ ɖɔkʋʋ ɛ-paɣtʋ yaa ŋŋɖɔkʋʋ. 3 Pʋyɔɔ eluzi-ŋ nɛ eyele nɛ ñɔɔsɩ wɩ-ŋ+ nɛ ɛcalɩ-ŋ nɛ maana;+ maana ŋgʋ ña nɛ ña-caanaa mɩ-taa nɔɔyʋ taasɩ yɔ, se eyele nɛ ŋtɩlɩ se pɩtɩkɛ tɔɔnaɣ* ɖeke yekina se ɛyʋ ɛwɛɛ wezuu, ɛlɛ tɔm ndʋ payɩ tɩlɩɣnɩ Yehowa nɔɔ taa yɔ, ndʋ yekina nɛ ɛyʋ wɛɣ wezuu.+ 4 Wondu ndʋ ŋsuwa yɔ tɩtɩcɩyɩ, nɛ ña-naataŋ tife ɖɔɖɔ pɩnzɩ 40 sɩnɛ sɩ-taa.+ 5 Ŋsɩm ña-laŋɩyɛ taa camɩyɛ se ñɛ-Ɛsɔ Yehowa kaawɛɛ nɛ ɛsɩɣzɩɣ-ŋ lɔŋ ɛzɩ caja sɩɣzʋʋ ɛ-pɩyalʋ lɔŋ yɔ.+

6 «Lɛɛlɛɛyɔ lɛ, pɩwɛɛ se ŋɖɔkɩ ñɛ-Ɛsɔ Yehowa paɣtʋ nɛ ŋɖɔ ɛ-nʋmɔŋ taa nɛ ŋse-i sɔɔndʋ. 7 Mbʋ pʋyɔɔ yɔ ñɛ-Ɛsɔ Yehowa ɖiɣni-ŋ wonuu ɛjaɖɛ kɩbanɖɛ taa,+ ɛjaɖɛ nɖɩ ɖɩ-taa lemisi, hila taa lɩm nɛ lɩm cukaŋ ñɩmbʋ kpeŋ fɛɛʋ taa nɛ pʋŋ egeetiye taa yɔ, 8 ɛjaɖɛ nɖɩ ɖɩ-taa tɔɔnasɩ nzɩ payaɣ se blee nɛ orjɩ yɔ sɩwɛɛ yɔ, nɖɩ ɖɩ-taa viiñi tɩŋ, fiigi tɩŋ nɛ girenaadɩ tɩŋ wɛɛ yɔ,+ nɖɩ ɖɩ-taa oliivi num nɛ tʋŋ num wɛɛ yɔ,+ 9 ɛjaɖɛ nɖɩ ɖɩ-taa tɔɔnaɣ ɛɛtɛɖɩɣ nɛ nabʋyʋ ɛɛkaɣ-ŋ tɛɖʋʋ yɔ, ɛjaɖɛ nɖɩ ɖɩ-taa ñɩɣtʋ wɛ pɛɛ taa yɔ nɛ nɖɩ ɖɩ-taa ŋkaɣ huyuu ñɩɣtʋ kɩsɛɛmtʋ pʋŋ taa yɔ.

10 «Ŋtɔkɩ nɛ ŋhaɣ lɛ, pɩwɛɛ se ŋsa ñɛ-Ɛsɔ Yehowa ɛjaɖɛ kɩbanɖɛ nɖɩ ɛha-ŋ yɔ ɖɩ-yɔɔ.+ 11 Kpa ña-tɩ nɛ taasɔɔ ñɛ-Ɛsɔ Yehowa yɔɔ nɛ ŋkizi ɛ-paɣtʋ, ɛ-tɔm hʋʋ paɣtʋ nɛ ɛ-kpalɩtʋ ndʋ manɖʋʋ-ŋ sɔnɔ yɔ tɩ-yɔɔ ɖɔm. 12 Ŋtɔkɩ nɛ ŋhaɣ nɛ ŋma ɖɩsɩ kɩbanzɩ nɛ ŋcaɣ sɩ-taa lɛ,+ 13 ña-naŋ nɛ ñe-heŋ nɛ ña-pʋŋ ɖɔʋ nɛ ñe-liidiye nɛ ñe-sika huu nɛ pɩtɩŋa payɩ pɩtɔyɩnɩ-ŋ yem tɔɖɩɩɩ lɛ, 14 taayele nɛ ña-laŋɩyɛ kpazɩ ɖɩ-tɩ+ nɛ ɖiyele nɛ ŋsɔɔ ñɛ-Ɛsɔ Yehowa, weyi ɛlɩzɩ-ŋ Ejipiti ɛjaɖɛ taa, yomiye ɖɩɣa taa yɔ ɛ-yɔɔ,+ 15 ɛnʋ weyi eyeba nɛ ŋɖɔ kañɩmbusuu sɔsɔʋ ŋgʋ kɩcaɣ sɔɔndʋ yɔ kɩ-taa yɔ,+ ŋgʋ kɩ-taa ɖʋmaa mba pɛwɛ sɔtʋ yɔ pɛwɛɛ nɛ pɩjɩsɩ wɛɛ ɖɔɖɔ yɔ, ɖenɖe tɛtʋ wɩlɩ kaŋkaŋ nɛ lɩm nabʋyʋ fɛyɩ yɔ. Eyeba nɛ lɩm lɩɩnɩ kaaʋ ɖoŋ ñɩŋgʋ* taa+ 16 nɛ ɛcalɩ-ŋ nɛ maana+ kañɩmbusuu taa, maana ŋgʋ ña-caanaa taasɩ yɔ, se eluzini-ŋ+ nɛ ɛtakɩnɩ-ŋ nɛ pɩwazɩ-ŋ cee wayɩ.+ 17 Ye ŋyɔɔdɩ ña-laŋɩyɛ taa se: “Ma-maɣmaɣ mon-ɖoŋ nɛ me-nesi ɖoŋ mancazɩnɩ ñɩm pʋnɛ man-tɩ” yɔ,+ 18 tɔzɩ se ñɛ-Ɛsɔ Yehowa hanɩ-ŋ ɖoŋ nɛ ŋcazɩnɩ ñɩm,+ se pɩsa nɛ ɛɖɔkɩ ɛ-ɛgbɛyɛ nɖɩ eeɖuuni ñɔ-cɔzɔnaa yɔ, ɛzɩ pɩwɛʋ sɔnɔ yɔ.+

19 «Ye wiɖiyi ŋsɔ ñɛ-Ɛsɔ Yehowa yɔɔ nɛ ŋtɩŋ ɛsɔnaa lalaa nɛ ŋsɛɛ-wɛ nɛ ŋluŋ pɛ-tɛɛ yɔ, manpakɩ-ŋ* sɔnɔ se paa pɩɩla ɛzɩma yɔ, ŋkaɣ tɛŋɩlʋʋ.+ 20 Ɩkaɣ tɛŋɩlʋʋ ɛzɩ ajɛɛ wena Yehowa ɖɩzɩɣ mɩ-ɛsɩndaa yɔ, mbʋ pʋyɔɔ yɔ itiwelisi mɩ-Ɛsɔ Yehowa nɔɔ.+

9 «Welisi, Oo Izrayɛɛlɩ, sɔnɔ ŋtɛzɩɣ Yɔɔrdaŋ+ se ŋsʋʋ nɛ ŋmʋ samasɩ nzɩ sɩkɩlɩ-ŋ paɣlʋʋ nɛ sɩkɩlɩ-ŋ ɖoŋ yɔ sɩ-ɛjaɖɛ,+ tɛtʋ sɔsɔtʋ ndɩ ndɩ, ndʋ pɔcɔzɩ-tʋ kolonzi nɛ pɩɖɛɛ pɩkpa ɛsɔdaa yɔ,*+ 2 ɛjaɖɛ nɖɩ ɖɩ-taa ɛyaa kpeetaa nɛ paɖaɣlɩ yɔ, Anakɩ ñɩma,+ mba ŋsɩma nɛ ŋnɩɩ pɔyɔɔdɩ pɔ-tɔm se: “Apɩzɩɣ nɛ ɛkaɖɩnɩ Anakɩ pɩyalaa?” yɔ. 3 Pʋyɔɔ lɛ, pɩwɛɛ se ŋtɩlɩ sɔnɔ se ñɛ-Ɛsɔ Yehowa kaɣ-ŋ ɖɛʋ nɔɔ nɛ ŋtɛzɩ.+ Ɛkɛ miŋ weyi ɛɖɩzɩɣ wondu caɣ caɣ yɔ,+ nɛ ɛkaɣ-wɛ ɖɩzʋʋ. Ɛkaɣ-wɛ luzuu ñɛ-ɛsɩndaa se pɩsa nɛ ŋɖɔɔnɩ-wɛ lɔŋ nɛ ŋɖɩzɩ-wɛ, ɛzɩ Yehowa kaalabʋ-ŋ tamaɣ yɔ.+

4 «Alɩwaatʋ ndʋ ñɛ-Ɛsɔ Yehowa ɖɔɔnʋʋ-wɛ ñɛ-ɛsɩndaa yɔ, taayɔɔdɩ ña-laŋɩyɛ taa se: “Men-siɣsiɣ wɛtʋ yɔɔ Yehowa kɔnɩ-m ɛjaɖɛ ɖɩnɛ ɖɩ-taa se mamʋ-ɖɩ.”+ Ɛlɛ samasɩ nzɩ sɩ-kañatʋ lakasɩ yɔɔ+ Yehowa ɖɔɔnʋʋ-sɩ ñɛ-ɛsɩndaa. 5 Pɩtɩkɛ se ŋwɛ siɣsiɣ yaa ña-laŋɩyɛ tʋʋzaa yɔɔ ŋsʋʋ se ŋmʋ samasɩ nzɩ sɩ-ɛjaɖɛ. Ɛlɛ sɩ-kañatʋ lakasɩ yɔɔ ñɛ-Ɛsɔ Yehowa ɖɔɔnʋʋ-sɩ ñɛ-ɛsɩndaa,+ pɩtasɩ lɛ, Yehowa ɖɔɔnʋʋ-sɩ se pɩsa nɛ ɛɖɔ tɔm ndʋ eeɖuuni ñɔ-cɔzɔnaa Abraham,+ Izaakɩ+ nɛ Yakɔɔb+ yɔ tɩ-yɔɔ. 6 Ye mbʋ, tɩlɩ se pɩtɩkɛ ñe-siɣsiɣ wɛtʋ yɔɔ ñɛ-Ɛsɔ Yehowa cɛlɩɣ-ŋ ɛjaɖɛ kɩbanɖɛ nɖɩ se ɖɩpɩsɩ ña-ñɩm, mbʋ pʋyɔɔ yɔ ŋkɛ samaɣ ŋga ka-ñʋʋ taa wɛ ɖoŋ yɔ.*+

7 «Tɔzɩ ɛzɩma ŋɖʋ ñɛ-Ɛsɔ Yehowa ɖɩwɩzɩyɛ kañɩmbusuu taa yɔ pɩ-yɔɔ,+ taasɔɔ kpa. Kpaɣnɩ kɩyakʋ ŋgʋ ŋkʋyɩnɩ Ejipiti ɛjaɖɛ taa nɛ ŋkɔɔ ŋtalɩ cɩnɛ yɔ, ŋwɛɛ nɛ ŋkaɖɩɣnɩ Yehowa.+ 8 Halɩ ɩɖʋ Yehowa ɖɩwɩzɩyɛ Orɛɛbʋ, nɛ Yehowa taa wɩɩnɩ-mɩ siŋŋ nɛ halɩ ɛñɩnaɣ se ɛɖɩzɩ-mɩ.+ 9 Maakpa pʋʋ taa se mamʋ pɩtaahalanzɩ,+ ɛgbɛyɛ nɖɩ Yehowa ɖʋ mɩ nɛ ɩ mɩ-hɛkʋ taa yɔ ɖɩ-pɩtaahalanzɩ lɛ,+ mancaɣ pʋʋ taa kɩyakɩŋ 40 nɛ ɖoo 40,+ mantɩtɔɔ tɔɔnaɣ nɛ mantɩñɔɔ lɩm ɖɔɖɔ. 10 Nɛ Yehowa cɛlɩ-m pɩtaahalanzɩ nzɩ sɩ-naalɛ, nzɩ sɩ-yɔɔ Ɛsɔ maɣmaɣ ma tɔm nɛ e-niye yɔ, nɛ tɔm ndʋ payɩ Yehowa kaaheyi-mɩ pʋʋ taa yɔ tɩɩwɛ sɩ-yɔɔ, ndʋ eeheyi-mɩ nɛ miŋ taa kɩyakʋ ŋgʋ samaɣ kaakpeɣlaa yɔ.+ 11 Kɩyakɩŋ 40 ɛnɩ nɛ ɖoo 40 ana atɛma lɛ, Yehowa cɛlɩ-m pɩtaahalanzɩ nzɩ sɩ-naalɛ, ɛgbɛyɛ pɩtaahalanzɩ, 12 nɛ Yehowa heyi-m se: “Kʋyɩ nɛ ŋtii lɛɛ lɛɛ, mbʋ pʋyɔɔ yɔ ña-samaɣ ŋga ŋlɩzɩnɩ Ejipiti yɔ kalabɩ kɩwɛɛkɩm.+ Keyebi nʋmɔʋ ŋgʋ manɖʋ-kɛ paɣtʋ se katɩŋ yɔ lɛɛ lɛɛ. Kolubi ka-tɩ ñɩɣtʋ sɩʋ kpeliɣa nakɛyɛ.”*+ 13 Nɛ Yehowa tasɩ-m heyuu se: “Mana samaɣ ŋga, kɛkɛ samaɣ ŋga ka-ñʋʋ taa wɛ ɖoŋ yɔ.*+ 14 Yebi-m nɛ manɖɩzɩ-kɛ, nɛ mahɩzɩ ka-hɩɖɛ tɛtʋ kpeekpe yɔɔ, nɛ manpɩsɩ-ŋ samaɣ ŋga kakɩlɩ-kɛ ɖoŋ nɛ kakɩlɩ-kɛ ɖɔʋ yɔ.”+

15 «Ðɩnɛ ɛlɛ, manpɩsɩ nɛ mentii pʋʋ alɩwaatʋ ndʋ kɩɩwɛɛ nɛ kɩmʋʋ miŋ yɔ,+ nɛ ɛgbɛyɛ pɩtaahalanzɩ nzɩ sɩ-naalɛ sɩɩwɛ me-nesi 2 taa.+ 16 Nɛ mɔncɔnaa lɛ, mana se ɩyʋsɩnɩ mɩ-Ɛsɔ Yehowa! Ilubi mɩ-tɩ ñɩɣtʋ neɣye.* Iyebi nʋmɔʋ ŋgʋ Yehowa ɖʋ-mɩ paɣtʋ se ɩtɩŋ yɔ lɛɛ lɛɛ.+ 17 Peeɖe mɛnpɛɖɩ pɩtaahalanzɩ nzɩ sɩɩwɛɛ me-nesi 2 taa yɔ sɩ-naalɛ nɛ mɔyɔkɩ-sɩ mɩ-ɛsɩndaa.+ 18 Nɛ moluŋ Yehowa ɛsɩndaa ɛzɩ maalabʋ kajalaɣ ɖeɖe yɔ, kɩyakɩŋ 40 nɛ ɖoo 40. Mantɩtɔɔ tɔɔnaɣ nɛ mantɩñɔɔ lɩm ɖɔɖɔ,+ kɩwɛɛkɩm mbʋ payɩ ɩlaba yɔ pʋyɔɔ, ɩlabɩ mbʋ pɩfɛyɩ ɖeu yɔ Yehowa ɛsɩndaa nɛ ɩɖʋ-ɩ ɖɩwɩzɩyɛ. 19 Mbʋ pʋyɔɔ yɔ, pana sɔsɔna wena Yehowa kaakɔ nɛ mɩ+ nɛ halɩ ɛñɩnaɣ se ɛɖɩzɩ-mɩ yɔ a-yɔɔ lɛ, sɔɔndʋ kpaɣaɣ-m. Ɛlɛ Yehowa kaawelisini-m alɩwaatʋ ndʋ ɖɔɖɔ.+

20 «Yehowa taa kaawɩnɩ Aarɔɔnɩ siŋŋ nɛ halɩ ɛñɩnaɣ se ɛkʋ-ɩ,+ ɛlɛ maatendi Aarɔɔnɩ yɔɔ alɩwaatʋ ndʋ ɖɔɖɔ. 21 Pʋwayɩ lɛ, mankpaɣ kɩwɛɛkɩm wonuu ŋgʋ iluba yɔ, pʋ-tɔbʋʋ se neɣye nɖɩ,+ nɛ mañaɣzɩ-ɖɩ miŋ; mɔyɔkɩ-ɖɩ nɛ manaŋ-ɖɩ nɛ ɖɩkpɩzɩ ɖʋkʋ ɖʋkʋ ɛzɩ puuyuu yɔ, nɛ mamɩzɩ puuyuu ŋgʋ lemeɣa ŋga kalɩɣnɩ pʋʋ taa nɛ ketiki yɔ ka-taa.+

22 «Pɩtasɩ lɛ, ɩɖaɣnɩ kulusuu Yehowa pana Taberaa,+ Masaa+ nɛ Kibɩrɔɔtɩ-Hataava.+ 23 Alɩwaatʋ ndʋ Yehowa kaatiyi-mɩ nɛ Kadɛɛsɩ-Barneya+ nɛ eheyi-mɩ se: “Ɩkpa nɛ ɩmʋ ɛjaɖɛ nɖɩ mankaɣ-mɩ cɛlʋʋ paa pɩɩkpawa nɛ pitii yɔ!” lɛ, ɩɖaɣnɩ kaɖɩnʋʋ mɩ-Ɛsɔ Yehowa paɣtʋ+ nɛ ititisi ɛ-yɔɔ+ nɛ ɩtɩñamɩ-ɩ. 24 Ðooo mansɩmʋʋ-mɩ yɔ, ɩwɛɛ nɛ ɩkaɖɩɣnɩ Yehowa.

25 «Nɛ mɛwɛɛ Yehowa tɛɛ luŋuu yɔɔ kɩyakɩŋ 40 nɛ ɖoo 40;+ maaluŋ mbʋ, mbʋ pʋyɔɔ yɔ Yehowa kaatɔm se ɛɖɩzɩɣ-mɩ. 26 Nɛ mentendi Yehowa nɛ mɔyɔɔdɩ se: “Hayɩ Kɩbaɣlʋ Kɩlɩm Yehowa, taaɖɩzɩ ña-samaɣ. Kɛkɛ ña-maɣmaɣ ña-pʋyʋ,*+ ña-samaɣ ŋga ŋtɩŋnɩ ñɔ-sɔsɔtʋ yɔɔ nɛ ŋya ka-ñʋʋ nɛ ŋlɩzɩ-kɛ Ejipiti nɛ ñe-nesi ɖoŋ ñɩnzɩ yɔ.+ 27 Tɔzɩ ña-lɩmɖʋyaa Abraham, Izaakɩ nɛ Yakɔɔb pɔ-yɔɔ.+ Taacɔnɩ samaɣ kanɛ ka-ñʋʋ taa ɖoŋ lakasɩ, ka-kañatʋ lakasɩ nɛ ka-kɩdɛkɛdɩm.+ 28 Pɩtɩkɛ mbʋ yɔ, ɛjaɖɛ nɖɩ ɖɩ-taa ŋlɩzɩ-ɖʋ yɔ ɖɩ-taa mba kaɣ yɔɔdʋʋ se: ‘Yehowa taapɩzɩɣ se ewoni-wɛ ɛjaɖɛ nɖɩ ɛɛlabɩ-wɛ tamaɣ se ewokini-wɛ yɔ ɖɩ-taa, nɛ ɛpaɖaɣ-wɛ, pʋyɔɔ ɛlɩzɩ-wɛ se ɛkʋ-wɛ kañɩmbusuu taa.’+ 29 Mbʋ pʋyɔɔ yɔ pɛkɛ ña-samaɣ nɛ ña-maɣmaɣ ña-pʋyʋ,*+ ña-samaɣ ŋga ŋlɩzɩnɩ ño-ɖoŋ sɔsɔŋ nɛ ñe-nesi nzɩ ŋsezaa yɔ.”+

10 «Alɩwaatʋ ndʋ Yehowa heyi-m se: “Saɣ ña-tɩ pɩtaahalanzɩ 2 nɛ sɩwɛɛ ɛzɩ kajalaɣ ñɩnzɩ yɔ,+ nɛ ŋkpa mɔn-cɔlɔ pʋʋ taa; pɩwɛɛ ɖɔɖɔ se ŋkpaɣ tɩŋ nɛ ŋsaɣnɩ ña-tɩ aɖakaɣ. 2 Nɛ mankaɣ maʋ pɩtaahalanzɩ nzɩ sɩ-yɔɔ tɔm ndʋ tɩɩwɛ kajalaɣ pɩtaahalanzɩ yɔɔ yɔ, nzɩ ŋyɔkaa yɔ; nɛ pɩwɛɛ se ŋsɩɩ-sɩ aɖakaɣ ŋga ka-taa.” 3 Ðɩnɛ ɛlɛ mankpaɣ akasɩya tɩŋ nɛ mansaɣnɩ aɖakaɣ nakɛyɛ, nɛ mansaɣ ɖɔɖɔ pɩtaahalanzɩ 2 nzɩ sɩwɛ ɛzɩ kajalaɣ ñɩnzɩ yɔ, nɛ mɔnɖɔkɩ pɩtaahalanzɩ nzɩ sɩ-naalɛ me-nesi taa nɛ mɛnɖɛɛ nɛ mankpa pʋʋ taa.+ 4 Nɛ ɛma pɩtaahalanzɩ nzɩ sɩ-yɔɔ tɔm ndʋ ɛɛmawa nɛ pɩɖɛɛ yɔ,+ Paɣtʋ Hiu,*+ ndʋ Yehowa kaaheyi-mɩ pʋʋ taa yɔ, ndʋ eeheyi-mɩ nɛ miŋ taa+ kɩyakʋ ŋgʋ samaɣ kaakpeɣlaa yɔ;+ nɛ Yehowa cɛlɩ-m sɩ. 5 Nɛ manpɩsɩnɩ pʋʋ taa nɛ mentii+ nɛ mansɩɩ pɩtaahalanzɩ nzɩ aɖakaɣ ŋga maasaɣaa yɔ ka-taa; sɩwɛ peeɖe mbʋ, ɛzɩ Yehowa ɖʋʋ-m paɣtʋ yɔ.

6 «Pʋwayɩ lɛ, Izrayɛɛlɩ mba kʋyɩnɩ Beerɔɔtɩ Bene-Yaakanɩ nɛ powolo Mosera. Peeɖe Aarɔɔnɩ sɩba nɛ peeɖe pepimi-i,+ nɛ ɛ-pɩyalʋ Eleyaazaarɩ pɩsɩ cɔjɔ e-lone taa.+ 7 Pakʋyɩnɩ peeɖe lɛ, powolo Gudgoda, nɛ pakʋyɩnɩ Gudgoda lɛ powolo Yotibata,+ ɛjaɖɛ nɖɩ ɖɩ-taa lemisi wɛɛ yɔ.

8 «Alɩwaatʋ ndʋ tɩ-taa Yehowa lɩzɩ Leevi cejewiye taa mba+ nɛ kɩjaʋ se pakpakɩɣ Yehowa ɛgbɛyɛ ɖʋʋ aɖakaɣ,+ pasɩŋɩɣ Yehowa ɛsɩndaa nɛ palakɩ-ɩ tʋmɩyɛ, nɛ pawazɩɣ samaɣ ɛ-hɩɖɛ taa,+ ɛzɩ palakʋʋ halɩ nɛ sɔnɔ yɔ. 9 Pʋyɔɔ Leevi fɛyɩnɩ ɖeɖe yaa ñɩm nabʋyʋ e-koobiya hɛkʋ taa. Yehowa kɛnɩ ɛ-ñɩm, ɛzɩ ñɛ-Ɛsɔ Yehowa heyuu-i yɔ.+ 10 Ma lɛ, maacaɣ pʋʋ taa ɛzɩ maacaɣʋ kajalaɣ ɖeɖe yɔ, kɩyakɩŋ 40 nɛ ɖoo 40;+ nɛ Yehowa welisini-m alɩwaatʋ ndʋ tɩ-taa ɖɔɖɔ.+ Yehowa taasɔɔlɩ se ɛɖɩzɩ-ŋ. 11 Pʋwayɩ lɛ, Yehowa heyi-m se: “Ðɛɛ samaɣ nɔɔ, nɛ ɩñɔɔzɩ mɩ-tɩ nɛ ɩɖɛɛ; pɩsa nɛ kasʋʋ nɛ kamʋ ɛjaɖɛ nɖɩ maaɖuuni kɔ-cɔzɔnaa se mɛncɛlɩɣ-kɛ yɔ.”+

12 «Lɛɛlɛɛyɔ, Oo Izrayɛɛlɩ, ɛbɛ ñɛ-Ɛsɔ Yehowa pɔzʋʋ-ŋ?+ Pʋnɛ pi-ɖeke: se ñɛ-Ɛsɔ Yehowa sɔɔndʋ,+ ɖɔ ɛ-nʋmɔŋ kpeekpe taa,+ sɔɔlɩ-ɩ, sɛɛ ñɛ-Ɛsɔ Yehowa nɛ ña-laŋɩyɛ kpeekpe nɛ ña-kalɩzaɣ* kpeekpe,+ 13 nɛ ŋɖɔ Yehowa paɣtʋ nɛ ɛ-ɖʋtʋ ndʋ manɖʋʋ-ŋ paɣtʋ sɔnɔ se ŋɖɔ tɩ-yɔɔ nɛ pɩwazɩ-ŋ yɔ tɩ-yɔɔ.+ 14 Na, ñɛ-Ɛsɔ Yehowa tɩnɩ ɛsɔdaa, halɩ pɩkpɛndɩnɩ ɛsɔdaa tɛ ɛsɔdaa,* nɛ tɛtʋ nɛ mbʋ payɩ pɩwɛ tɩ-yɔɔ yɔ.+ 15 Ɛlɛ ñɔ-cɔzɔnaa ɖeke Yehowa ñɔtɩnaa nɛ ɛwɩlɩ-wɛ ɛ-sɔɔlɩm, nɛ ɛlɩzɩ-ŋ, ña weyi ŋkɛ pa-lʋlʋʋ taa tʋ yɔ,+ samasɩ kpeekpe hɛkʋ taa, ɛzɩ ŋwɛʋ sɔnɔ yɔ. 16 Lɛɛlɛɛyɔ, pɩwɛɛ se ɩpɩsɩ mɩ-laŋa kele kele*+ nɛ iyele ñʋʋ taa ɖoŋ labʋ.*+ 17 Mbʋ pʋyɔɔ yɔ mɩ-Ɛsɔ Yehowa kɛnɩ ɛsɔnaa taa Ɛsɔ,+ nɛ kɩbaɣlaa taa Kɩbaɣlʋ, Ɛsɔ sɔsɔ, Ɛsɔ ɖoŋ tʋ nɛ weyi ɛcaɣ sɔɔndʋ yɔ, weyi ɛɛlakɩ tɛ yɔɔ tɛ yɔɔ lakasɩ yɔ+ nɛ weyi ɛɛmʋʋ kʋjɔʋ se emuli tɔm hʋʋ taa yɔ. 18 Ɛhʋʋ pɩɣa ŋga kɛfɛyɩ caa yɔ* nɛ lelu pɔ-tɔm siɣsiɣ,+ ɛsɔɔlɩ ɛgɔm+ nɛ ɛhaɣ-ɩ tɔɔnaɣ nɛ wondu kususutu. 19 Pɩwɛɛ se mɩ ɖɔɖɔ ɩsɔɔlɩ ɛgɔm, mbʋ pʋyɔɔ yɔ ɩɩpɩsɩ agɔma Ejipiti ɛjaɖɛ taa.+

20 «Ñɛ-Ɛsɔ Yehowa pɩwɛɛ se ŋse sɔɔndʋ, ɛnʋ pɩwɛɛ se ŋsɛɛ,+ ɛnʋ pɩwɛɛ se ŋñɔɔna, nɛ ɛ-hɩɖɛ pɩwɛɛ se ŋɖuuna. 21 Ɛnʋ pɩwɛɛ se ŋsa.+ Ɛnʋ lɛ ñɛ-Ɛsɔ, weyi ɛlabɩ-ŋ wondu sɔsɔtʋ tʋnɛ tɩ-tɩŋa, ndʋ tɩcaɣ sɔɔndʋ nɛ ña-maɣmaɣ ŋnanɩ ñɛ-ɛsa yɔ.+ 22 Ñɔ-cɔzɔnaa tikaɣ Ejipiti lɛ paakpɛndɩ ɛyaa* 70,+ ɛlɛ lɛɛlɛɛyɔ ñɛ-Ɛsɔ Yehowa labɩ-ŋ nɛ ŋɖɔɔ ɛzɩ ɛsɔdaa tɩɩnzɩ yɔ.+

11 «Pɩwɛɛ se ŋsɔɔlɩ ñɛ-Ɛsɔ Yehowa+ nɛ paa ɛzɩmtaa lɛ, ŋla mbʋ ɛpɔzʋʋ-ŋ yɔ, nɛ ŋɖɔkɩ ɛ-ɖʋtʋ, ɛ-tɔm hʋʋ paɣtʋ nɛ ɛ-paɣtʋ. 2 Ɩsɩm mbʋ se mɩ mɔyɔɔdʋʋnɩ sɔnɔ, pɩtɩkɛ mɩ-pɩyalaa mba paasɩŋ nɛ patɩna ɖɔɖɔ mɩ-Ɛsɔ Yehowa nɩŋgbaŋʋʋ hɔm,+ ɛ-sɔsɔtʋ,+ e-nesi ɖoŋ ñɩnzɩ+ nɛ e-nesi nzɩ esezaa yɔ. 3 Patɩna yʋsasɩ nɛ lakasɩ nzɩ ɛlabɩ Ejipiti ɛjaɖɛ taa Ejipiti wiyaʋ Farawɔɔ nɛ ɛ-ɛjaɖɛ kpeekpe yɔ;+ 4 patɩna ɖɔɖɔ mbʋ ɛlabɩ Ejipiti sɔɔjanaa yɔ, mbʋ ɛlabɩ Farawɔɔ kpaŋnaŋ nɛ e-you kɛɛkɛɛnaa yɔ, mba Teŋgu Kɩsɛɛmʋʋ taa lɩm wadɩ pɔ-yɔɔ alɩwaatʋ ndʋ paɖʋwaɣ mɩ-wayɩ yɔ, nɛ Yehowa ɖɩzɩ-wɛ kpaagbaa ɖɩzʋʋ.*+ 5 Patɩna mbʋ ɛlabɩ-mɩ kañɩmbusuu taa nɛ ɩkɔɔ nɛ ɩtalɩ cɩnɛ yɔ, 6 patɩna ɖɔɖɔ mbʋ ɛlabɩ Dataanɩ nɛ Abiram, Rubɛɛnɩ pɩyalʋ Eliyaabɩ pɩyalaa yɔ, alɩwaatʋ ndʋ tɛtʋ ha nɔɔ nɛ tilibi-wɛ, pɩkpɛndɩnɩ pa-ɖɩsɩ taa mba, pe-kizinzikiŋ nɛ mbʋ payɩ pɩɩwɛ wezuu nɛ pɩtɩŋɩɣ-wɛ yɔ, Izrayɛɛlɩ mba kpeekpe ɛsɩndaa yɔ.+ 7 Mɩnanɩnɩ mɩ-ɛsa lakasɩ sɔsɔsɩ nzɩ payɩ Yehowa laba yɔ.

8 «Paɣtʋ ndʋ manɖʋʋ-mɩ sɔnɔ yɔ, pɩwɛɛ se ɩɖɔkɩ tɩ-tɩŋa, ɖɩnɛ ɛlɛ ɩkpaɣ ɖoŋ nɛ ɩtɛzɩ nɛ ɩsʋʋ ɛjaɖɛ taa nɛ ɩmʋ-ɖɩ, 9 nɛ ɩcaɣ wezuu nɛ pileɖi+ ɛjaɖɛ nɖɩ Yehowa ɖuwaa se ɛcɛlɩɣ mɩ-cɔzɔnaa nɛ pa-lʋlʋʋ taa mba*+ yɔ ɖɩ-taa, ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+

10 «Ɛjaɖɛ nɖɩ iwoki mʋʋ yɔ ɖɩfɛyɩ ɛzɩ Ejipiti ɛjaɖɛ nɖɩ ɖɩ-taa ɩlɩnaa yɔ, ɖenɖe iɖuwaɣ mi-ɖomaɣ nɛ ɩmɩzɩɣ-kɛ lɩm nɛ mɩ-naataŋ* ɛzɩ ɖozi hatʋ kaɖaɣ taa yɔ. 11 Ɛlɛ ɛjaɖɛ nɖɩ ɩtɛzɩɣ se ɩsʋʋ nɛ ɩmʋ yɔ, ɖɩkɛ pʋŋ ɛjaɖɛ nɛ fɛɛŋ ɛjaɖɛ.+ Tɛʋ lɩm ɖɩ-tɛtʋ ñɔʋ;+ 12 ɖɩkɛ ɛjaɖɛ nɖɩ ñɛ-Ɛsɔ Yehowa cɔŋnɩ ɖɩ-yɔɔ yɔ. Ñɛ-Ɛsɔ Yehowa ɛsa wɛ ɖɩ-yɔɔ tam, kpaɣnɩ pɩnaɣ ɖɩbazɩyɛ nɛ piwolo pɩnaɣ ɖɩdɛnɖɛ.

13 «Nɛ ye ɩɖɔŋ paɣtʋ ndʋ manɖʋʋ-mɩ sɔnɔ yɔ tɩ-yɔɔ camɩyɛ nɛ ɩsɔɔlɩ mɩ-Ɛsɔ Yehowa nɛ ɩsɛɛ-ɩ nɛ mɩ-laŋɩyɛ kpeekpe nɛ mɩ-kalɩzaɣ* kpeekpe yɔ,+ 14 ma ɖɔɖɔ mankaɣ haʋ tɛʋ mɩ-tɛtʋ kɩ-alɩwaatʋ yɔɔ, kajalaɣ tɛŋ* nɛ wayɩ wayɩ tɛŋ;* nɛ ɩkaɣ kpeɣluu mɩ-tɔɔnaɣ pee nɛ mɩ-vɛɛ kɩfalʋʋ nɛ mi-num.+ 15 Nɛ mankaɣ haʋ mɩ-kpɩna ñɩtʋ mɩ-hayɩm taa, nɛ ɩkaɣ tɔɔʋ nɛ ɩhaɣ.+ 16 Ɩkpa mɩ-tɩ nɛ itaayele nɛ nabʋyʋ peɣzi mɩ-laŋɩyɛ nɛ ɩɖɛɛ nɛ ɩsɛɛ ɛsɔnaa lalaa nɛ iluŋ pɛ-tɛɛ.+ 17 Pɩtɩkɛ mbʋ yɔ, Yehowa kɔʋ-mɩ nɛ pana siŋŋ nɛ ɛɖɩɣ ɛsɔdaa se tɛʋ ɛtaanɩɩ,+ nɛ tɛtʋ ɛɛlʋlʋʋ tɩ-tɔɔnaɣ nɛ ɩkaɣ ɖɩm lɛɛ lɛɛ ɛjaɖɛ kɩbanɖɛ nɖɩ Yehowa cɛlɩɣ-mɩ yɔ ɖɩ-taa.+

18 «Pɩwɛɛ se ɩma mɔn-tɔm tʋnɛ mɩ-laŋɩyɛ yɔɔ nɛ mɩ-kalɩzaɣ* yɔɔ nɛ ɩhɔkɩ-tʋ mi-nesi yɔɔ nɛ ɩtɔzʋʋ tɩ-yɔɔ, nɛ pɩwɛɛ se tɩwɛɛ mi-kiɖe taa* ɛzɩ ñʋʋ kitemuu yɔ.+ 19 Ɩwɩlɩ-tʋ mi-piya: yɔɔdɩ tɩ-tɔm alɩwaatʋ ndʋ ŋcakɩ ña-ɖɩɣa taa yɔ, alɩwaatʋ ndʋ ŋɖɔŋ nʋmɔʋ taa yɔ, alɩwaatʋ ndʋ ŋhɩnɩɣ yɔ nɛ alɩwaatʋ ndʋ ŋkʋyʋʋ yɔ.+ 20 Ma-tʋ ña-ɖɩɣa pɔɔyɩŋ* yɔɔ nɛ ñɔ-nɔnɔsɩ yɔɔ, 21 nɛ pɩsa nɛ mɩ nɛ mɩ-pɩyalaa ɩcaɣ wezuu nɛ pileɖi+ ɛjaɖɛ nɖɩ Yehowa ɖuwaa se ɛcɛlɩɣ mɩ-cɔzɔnaa yɔ ɖɩ-taa,+ nɛ ɩcaɣ ɖɩ-taa alɩwaatʋ ndʋ payɩ ɛsɔdaa wɛ tɛtʋ ñʋʋ yɔɔ yɔ.

22 «Ye ɩɖɔkɩ paɣtʋ ndʋ mɛncɛlɩɣ-mɩ yɔ kpam nɛ ɩɖɔ tɩ-yɔɔ nɛ ɩsɔɔlɩ mɩ-Ɛsɔ Yehowa,+ ɩɖɔ ɛ-nʋmɔŋ tɩŋa taa nɛ ɩñɔɔnɩ-ɩ yɔ,+ 23 ɖɩnɛ ɛlɛ Yehowa kaɣ ɖɔɔnʋʋ ajɛɛ ana a-kpeekpe mɩ-ɛsɩndaa,+ nɛ ɩkaɣ mʋʋ ajɛɛ wena akɩlɩ-mɩ paɣlʋʋ nɛ akɩlɩ-mɩ ɖɔʋ yɔ a-tɛtʋ.+ 24 Lona wena a-taa payɩ ɩfɛyɩɣ mɩ-naataŋ yɔ apɩsɩɣ mɩ-pʋyʋ.+ Mɩ-kamaɣ kaɣ wɛʋ kpaɣnɩ kañɩmbusuu nɛ pɩɖɛɛ nɛ pɩkpa Libaŋ; kpaɣnɩ Pɔɔ, Efraatɩ pɔɔ nɛ pɩɖɛɛ pɩtalɩ wɩsɩ ɖɩɖʋyɛ taa teŋgu.*+ 25 Nɔɔyʋ ɛɛkaɣ-mɩ kaɖɩnʋʋ.+ Mɩ-Ɛsɔ Yehowa kaɣ labʋ nɛ mɩ-yɔɔ lɛ, tɛtʋ ndʋ tɩ-yɔɔ payɩ ɩɖɔŋ yɔ, tɩ-taa ɛyaa se-mɩ sɔɔndʋ nɛ peseli,+ ɛzɩ ɛlabʋ-mɩ tamaɣ yɔ.

26 «Ɩna, sɔnɔ mansɩɣ mɩ-ɛsɩndaa wazaɣ nɛ nɔɔ kɩdɛkɛdaɣ lɔʋ:+ 27 ye ɩñaŋ mɩ-Ɛsɔ Yehowa paɣtʋ ndʋ manɖʋʋ-mɩ sɔnɔ yɔ, pɩkɛɣnɩ-mɩ wazaɣ,+ 28 ɛlɛ ye ɩɩñaŋ mɩ-Ɛsɔ Yehowa paɣtʋ nɛ iyele nʋmɔʋ ŋgʋ manɖʋʋ-mɩ paɣtʋ sɔnɔ se ɩtɩŋ yɔ nɛ ɩtɩŋ ɛsɔnaa mba ɩɩsɩŋ yɔ yɔ, pɩkɛɣnɩ-mɩ nɔɔ kɩdɛkɛdaɣ lɔʋ.+

29 «Ñɛ-Ɛsɔ Yehowa wokini-ŋ ɛjaɖɛ nɖɩ ŋkaɣ mʋʋ yɔ ɖɩ-taa lɛ, pɩwɛɛ se ŋwazɩ ɛyaa* Gerizim Pʋʋ yɔɔ nɛ ŋlɔ ɛyaa yɔɔ nɔɔ kɩdɛkɛdaɣ Ebaalɩ Pʋʋ yɔɔ.+ 30 Pʋŋ ɛnɩ ɩwɛ Yɔɔrdaŋ hɔɔlʋʋ lɛɛkʋ yɔɔ wɩsɩ ɖɩɖʋyɛ taa kiŋ, Kanaŋ ñɩma mba pɛwɛ Araba yɔ pɛ-ɛjaɖɛ taa, Gilgaalɩ ɛsɩndaa, Mooree tɩŋ sɔsɔŋ cɔlɔ.+ 31 Mbʋ pʋyɔɔ yɔ iɖiɣni Yɔɔrdaŋ tɛzʋʋ se ɩsʋʋ nɛ ɩmʋ ɛjaɖɛ nɖɩ mɩ-Ɛsɔ Yehowa cɛlɩɣ-mɩ yɔ.+ Ɩmʋʋ-ɖɩ nɛ ɩwɛɛ ɖɩ-taa lɛ, 32 pɩwɛɛ se ɩkpa mɩ-tɩ nɛ ɩɖɔ paɣtʋ nɛ tɔm hʋʋ paɣtʋ ndʋ manɖʋʋ mɩ-ɛsɩndaa sɔnɔ yɔ tɩ-tɩŋa tɩ-yɔɔ.+

12 «Paɣtʋ nɛ tɔm hʋʋ paɣtʋ tʋnɛ pɩwɛɛ se ɩkpa mɩ-tɩ nɛ ɩɖɔ tɩ-yɔɔ kɩyakɩŋ weyi payɩ ɩkaɣ wezuu caɣʋ ɛjaɖɛ nɖɩ mɩ-cɔzɔnaa tɛ Ɛsɔ Yehowa kaɣ-mɩ cɛlʋʋ se ɖɩpɩsɩ mɩ-ñɩm yɔ ɖɩ-taa yɔ. 2 Pɩwɛɛ se ɩyɔkɩ lona wena payɩ a-taa ajɛɛ wena ɩkaɣ mʋʋ a-tɛtʋ yɔ asɛɣaɣ a-ɛsɔnaa yɔ cɩɖɩ cɩɖɩ,+ paa lona ana atɩɩwɛ pʋŋ sɔsɔŋ yɔɔ, piyisi yɔɔ yaa tɩŋ weyi ɩwɛ hatʋ camɩyɛ yɔ ɩ-tɛɛ yɔ. 3 Pɩwɛɛ se ɩyɔkɩ ajɛɛ ana a-altaarunaa nɛ a-tilima kiɖeɖena,+ ɩñaɣzɩ a-sizikasɩ kiɖeɖesi* miŋ nɛ ɩsɛtɩ a-ɛsɔnaa sɩʋ kpelisi nzɩ pasaɣaa yɔ nɛ ɩpɛɖɩ+ nɛ ɩhɩzɩ pa-hɩla peeɖe.+

4 «Pɩfɛyɩ se ɩsɛɛ mɩ-Ɛsɔ Yehowa mbʋ.+ 5 Ɛlɛ ɩñɩnɩ mɩ-Ɛsɔ Yehowa ɖenɖe ɛlɩzɩɣ se ɛ-hɩɖɛ ɛwɛɛ yɔ, ɖenɖe ɛlɩzɩɣ se pɩkɛnɩ ɛ-ɖɩjaɣyɛ mi-cejewe kpeekpe taa yɔ, nɛ iwolo peeɖe.+ 6 Peeɖe pɩwɛɛ se iwoni mɩ-kɩlaŋ kɩñaɣzɩŋ,+ mɩ-kɩlaŋ lɛɛŋ, hɔɔlɩŋ 10 ñɩŋ,+ mi-nesi tɛɛ kʋjɔʋ,+ mi-ɖuutu kɩlaŋ, mɩ-sɔɔlɩm haɖɛ+ nɛ mɩ-kajalaɣ newee wena pɩlʋlʋʋ yɔ nɛ mɩ-kajalaɣ heɣsi nɛ mbesi nzɩ pɩlʋlʋʋ yɔ.+ 7 Peeɖe pɩwɛɛ se mɩ nɛ mɩ-ɖɩɣa taa mba ɩtɔɔ mɩ-Ɛsɔ Yehowa ɛsɩndaa+ nɛ ɩnɩɩ leleŋ mbʋ payɩ ɩlakɩ yɔ pɩ-taa,+ mbʋ pʋyɔɔ yɔ mɩ-Ɛsɔ Yehowa wazɩ-mɩ.

8 «Ɩɩkaɣ tasʋʋ labʋ ɛzɩ ɖɩlakʋʋ sɔnɔ cɩnɛ nɛ paa weyi lɛ ɛlakɩ mbʋ pɩwɛ ɖeu ɛ-ɛsɩndaa yɔ;* 9 mbʋ pʋyɔɔ yɔ ɩtɩtalɩtɩ ɖɩhɛzɩyɛ taa,+ ɛjaɖɛ nɖɩ mɩ-Ɛsɔ Yehowa cɛlɩɣ-mɩ yɔ ɖɩ-taa. 10 Ɩtɛzɩɣ Yɔɔrdaŋ+ nɛ ɩcaɣ ɛjaɖɛ nɖɩ mɩ-Ɛsɔ Yehowa cɛlɩɣ-mɩ se ɖɩpɩsɩ mɩ-ñɩm yɔ ɖɩ-taa lɛ, pɩtʋʋ fɛyɩ se ɛkaɣ yebu nɛ ɩhɛzɩnɩ mi-koyindinaa mba payɩ pɔcɔ-mɩ nɛ pata yɔ, nɛ ɩkaɣ caɣʋ pɛɛyɛ taa.+ 11 Ɩkaɣ kɔnʋʋ mbʋ payɩ mɔnpɔzʋʋ-mɩ yɔ lone nɖɩ mɩ-Ɛsɔ Yehowa lɩzɩɣ se ɛ-hɩɖɛ ɛwɛɛ ɖɩ-taa yɔ ɖɩ-taa+—mɩ-kɩlaŋ kɩñaɣzɩŋ, mɩ-kɩlaŋ lɛɛŋ, hɔɔlɩŋ 10 ñɩŋ,+ mi-nesi tɛɛ kʋjɔʋ, nɛ ɖuutu kɩlaŋ weyi payɩ iɖuwaa se ɩlaɣ Yehowa yɔ. 12 Ɩkaɣ mɛyʋʋ mɩ-Ɛsɔ Yehowa ɛsɩndaa,+ mɩ nɛ mɩ-pɩyalaa, mɩ-pɛlaa, mi-yomaa abalɩñɩma nɛ halɩñɩma nɛ Leevi ñɩma mba pɛwɛ mɩ-tɛtʋ ndɩ ndɩ* taa yɔ, mbʋ pʋyɔɔ yɔ Leevi mba fɛyɩnɩ ɖeɖe yaa ñɩm nabʋyʋ mɩ-hɛkʋ taa.+ 13 Kpa ña-tɩ nɛ taalaa ña-kɩlaŋ kɩñaɣzɩŋ lone lɛɛɖɛ naɖɩyɛ nɖɩ ŋnaɣ yɔ ɖɩ-taa.+ 14 Lone nɖɩ Yehowa lɩzɩɣ mi-cejewiye naɖɩyɛ egeetiye taa yɔ, ɖɩ-taa ɖeke pɩwɛɛ se ɩlaa mɩ-kɩlaŋ kɩñaɣzɩŋ, nɛ peeɖe ɩkaɣ labʋ mbʋ payɩ mɔnpɔzʋʋ-mɩ yɔ.+

15 «Ɛlɛ alɩwaatʋ ndʋ payɩ nandʋ lakɩ-mɩ liu yɔ* ɩpɩzɩɣ nɛ ɩkʋ kpɩna nɛ ɩtɔɔ nandʋ,+ ɛzɩ mɩ-Ɛsɔ Yehowa wazʋʋ-mɩ mɩ-tɛtʋ* kpeekpe taa yɔ. Ɛyʋ weyi ɛfɛyɩ kele kele yɔ nɛ ɛyʋ weyi ɛwɛ kele kele yɔ papɩzɩɣ nɛ pɔtɔɔ-tʋ, ɛzɩ ɩtɔkʋʋ nɛnzɛm yaa hɩŋ ñɔɔɔ tʋ* yɔ. 16 Ɛlɛ ɩtaatɔɔ calɩm;+ pɩwɛɛ se ɩpɩyɩ-pʋ tataa ɛzɩ lɩm yɔ.+ 17 Ɩɩkaɣ wɛnʋʋ waɖɛ se ɩtɔɔ mɩ-tɛtʋ* ndɩ ndɩ taa mɩ-tɔɔnaɣ pee, mɩ-vɛɛ kɩfalʋʋ, nɛ mi-num pɔ-hɔɔlʋʋ 10 ñɩŋgʋ, mɩ-kajalaɣ newee wena pɩlʋlʋʋ yɔ nɛ mɩ-kajalaɣ heɣsi nɛ mbesi nzɩ pɩlʋlʋʋ yɔ,+ mi-ɖuutu kɩlaŋ weyi payɩ iɖuwaa se ɩlaɣ yɔ; mɩ-sɔɔlɩm haɖɛ, yaa mi-nesi tɛɛ kʋjɔʋ. 18 Mɩ-Ɛsɔ Yehowa ɛsɩndaa ɩkaɣ pɩtɩŋa payɩ mbʋ yɔ tɔɔʋ lone nɖɩ mɩ-Ɛsɔ Yehowa lɩzɩɣ yɔ ɖɩ-taa+—mɩ nɛ mɩ-pɩyalaa, mɩ-pɛlaa, mɩ-lɩmɖʋyaa abalɩñɩma nɛ halɩñɩma nɛ Leevi ñɩma mba pɛwɛ mɩ-tɛtʋ* ndɩ ndɩ taa yɔ; nɛ ɩkaɣ mɛyʋʋ mɩ-Ɛsɔ Yehowa ɛsɩndaa mbʋ payɩ ɩlakɩ yɔ pɩ-taa. 19 Alɩwaatʋ ndʋ payɩ ɩwɛɣ mɩ-ɛjaɖɛ taa yɔ, ɩkpa mɩ-tɩ nɛ ɩtaala kaakendu Leevi tʋ yɔɔ.+

20 «Ñɛ-Ɛsɔ Yehowa walɩsɩɣ ñɛ-tɛtʋ,+ ɛzɩ ɛɛlabʋ-ŋ tamaɣ yɔ lɛ,+ ye ŋtɔm se: “Me-liu wɛɛ se mɔntɔɔ nandʋ,” mbʋ pʋyɔɔ yɔ tɩlabɩ-ŋ* kɔɖɛyɩ yɔ, ŋpɩzɩɣ nɛ ŋtɔɔ-tʋ alɩwaatʋ ndʋ payɩ ñe-liu wɛ-tʋ yɔ.*+ 21 Ye lone nɖɩ ñɛ-Ɛsɔ Yehowa lɩzɩɣ se ɛ-hɩɖɛ ɛwɛɛ ɖɩ-taa yɔ+ ɖiposini-ŋ yɔ, ɖɩnɛ ɛlɛ kʋ ña-naŋ nɩɩyɩ yaa ñe-heŋ yaa ña-pʋŋ nɩɩyɩ weyi Yehowa ha-ŋ yɔ, ɛzɩ manɖʋʋ-ŋ paɣtʋ yɔ, nɛ ŋtɔɔ ɩ-nandʋ ñɛ-tɛtʋ ndɩ ndɩ taa* alɩwaatʋ ndʋ payɩ ñe-liu wɛ-tʋ yɔ.* 22 Ŋpɩzɩɣ nɛ ŋtɔɔ-tʋ ɛzɩ ŋtɔkʋʋ nɛnzɛm nɛ hɩŋ ñɔɔɔ tʋ* yɔ;+ ɛyʋ weyi ɛfɛyɩ kele kele yɔ nɛ ɛyʋ weyi ɛwɛ kele kele yɔ pa-tɩŋa papɩzɩɣ nɛ pɔtɔɔ-tʋ. 23 Ɛlɛ pɩwɛɛ se ŋtɛ ña-taa se ŋŋtɔkɩ calɩm,+ mbʋ pʋyɔɔ yɔ calɩm kɛ wezuu,*+ nɛ pɩfɛyɩ se ŋtɔɔ nandʋ nɛ ŋkpɛndɩnɩ wezuu.* 24 Pɩfɛyɩ se ŋtɔɔ-pʋ. Pɩwɛɛ se ŋpɩyɩ-pʋ tataa ɛzɩ lɩm yɔ.+ 25 Pɩfɛyɩ se ŋtɔɔ-pʋ, ɖɩnɛ ɛlɛ pɩkaɣ ɖɔmnʋʋ ña nɛ ñe-piya camɩyɛ; mbʋ pʋyɔɔ yɔ ŋlakɩ mbʋ pɩtʋʋzɩ Yehowa ɛsɩndaa yɔ. 26 Ŋŋwoki lone nɖɩ Yehowa lɩzɩɣ yɔ ɖɩ-taa lɛ, wondu kiɖeɖetu ndʋ tɩkɛ ña-ñɩndʋ yɔ nɛ ño-ɖuutu kɩlaŋ ɖeke ŋkpɛndɩɣna. 27 Peeɖe ŋkaɣ laʋ ña-kɩlaŋ kɩñaɣzɩŋ, nandʋ nɛ calɩm,+ ñɛ-Ɛsɔ Yehowa altaaru yɔɔ nɛ pɩwɛɛ se papɩyɩ ña-kɩlaŋ lɛɛŋ calɩm ñɛ-Ɛsɔ Yehowa altaaru cɔlɔ;+ ɛlɛ nandʋ lɛ, ŋpɩzɩɣ nɛ ŋtɔɔ tʋtʋ.

28 «Kpa ña-tɩ nɛ ŋɖɔ paɣtʋ tʋnɛ, ndʋ manɖʋʋ-ŋ yɔ ti-kpeekpe tɩ-yɔɔ, nɛ pɩɖɔmnɩ ña nɛ ña-pɩyalaa camɩyɛ tam, mbʋ pʋyɔɔ yɔ ŋlakɩ mbʋ pɩwɛ ɖeu nɛ pɩtʋʋzɩ ñɛ-Ɛsɔ Yehowa ɛsɩndaa yɔ.

29 «Ñɛ-Ɛsɔ Yehowa ɖɩzɩɣ ajɛɛ wena ŋkaɣ mʋʋ a-tɛtʋ yɔ,+ nɛ ŋcaɣ a-tɛtʋ yɔɔ lɛ, 30 pɛtɛŋ-yɛ ɖɩzʋʋ ñɛ-ɛsɩndaa lɛ, kpa ña-tɩ nɛ ŋtaatɔlɩ kpaca taa. Taapɔzɩ a-ɛsɔnaa yɔɔ nɛ ŋtɔ se: “Ɛzɩma ajɛɛ ana asɛɣaɣ a-ɛsɔnaa kɛ? Ma ɖɔɖɔ malakɩ mbʋ.”+ 31 Pɩfɛyɩ se ŋla ñɛ-Ɛsɔ Yehowa mbʋ, mbʋ pʋyɔɔ yɔ ajɛɛ ana alakɩ kʋzɔɔtʋ lakasɩ nzɩ payɩ Yehowa paɖɩɣ yɔ a-ɛsɔnaa, halɩ añaɣzɩɣ a-pɩyalaa nɛ a-pɛlaa miŋ a-ɛsɔnaa.+ 32 Paɣtʋ ndʋ payɩ manɖʋʋ-ŋ yɔ, tɩ-yɔɔ pɩwɛɛ se ŋɖɔ ɖeyi ɖeyi.+ Pɩfɛyɩ se ŋsɔzɩ natʋyʋ tɩ-yɔɔ nɛ pɩfɛyɩ ɖɔɖɔ se ŋpasɩ natʋyʋ tɩ-yɔɔ.+

13 «Ye nayʋ nɔɔyʋ yaa ɛyʋ nɔɔyʋ weyi ɛtɩŋɩɣnɩ ɖoza yɔɔ nɛ ɛyɔɔdʋʋ mbʋ pɩkaɣ labʋ cee wayɩ yɔ ɛlɩ mɩ-hɛkʋ taa nɛ ɛha-mɩ yʋsaɣ nakɛyɛ yaa eheyi-mɩ kawɩlaɣ nakɛyɛ tɔm, 2 nɛ yʋsaɣ ŋga yaa kawɩlaɣ ŋga eheyi-mɩ kɔ-tɔm yɔ kala ɛzɩ ɛyɔɔdʋʋ yɔ, nɛ eheyi-mɩ se: “Ðɩtɩŋ ɛsɔnaa lalaa, nɛ ɖɩsɛɛ-wɛ,” ɛsɔnaa mba ɩtɩtɩlɩ yɔ, 3 itaawelisi nayʋ ɛnʋ yaa ɖoziyu ɛnʋ ɛ-tɔm,+ mbʋ pʋyɔɔ yɔ mɩ-Ɛsɔ Yehowa takɩɣ-mɩ+ se ɛna se ɩsɔɔlɩ mɩ-Ɛsɔ Yehowa nɛ mɩ-laŋɩyɛ kpeekpe nɛ mɩ-kalɩzaɣ* kpeekpe yaa we.+ 4 Mɩ-Ɛsɔ Yehowa pɩwɛɛ se ɩtɩŋ, ɛnʋ pɩwɛɛ se ise sɔɔndʋ, ɛ-paɣtʋ yɔɔ pɩwɛɛ se ɩɖɔ, ɛ-nɔɔ pɩwɛɛ se iwelisi; ɛnʋ pɩwɛɛ se ɩsɛɛ nɛ ɛnʋ pɩwɛɛ se ɩñɔɔnɩ kpam.+ 5 Ɛlɛ pɩwɛɛ se pakʋ nayʋ ɛnʋ yaa ɖoziyu ɛnʋ,+ mbʋ pʋyɔɔ yɔ eseɣti-mɩ se ɩkaɖɩnɩ mɩ-Ɛsɔ Yehowa, weyi ɛlɩzɩ-mɩ Ejipiti ɛjaɖɛ taa nɛ ɛya mɩ-ñʋʋ yomiye ɖɩɣa taa yɔ; eseɣti-mɩ mbʋ se iyele tɩŋʋʋ nʋmɔʋ ŋgʋ mɩ-Ɛsɔ Yehowa ɖʋ-mɩ paɣtʋ se ɩtɩŋ yɔ. Pɩwɛɛ se ɩlɩzɩ mbʋ pɩfɛyɩ ɖeu yɔ mɩ-hɛkʋ taa.+

6 «Ye ño-koobu, weyi ɛkɛ ño-ɖoo pɩyalʋ yɔ, yaa ña-pɩyalʋ yaa ñɛ-pɛlɛ yaa ña-halʋ kʋsɔɔlʋ yaa ña-taabalʋ kɩbanʋ* ɛñɩnɩɣ se epeɣzi-ŋ mɛsaɣ tɛɛ, nɛ eheyi-ŋ se: “Ðiwolo nɛ ɖɩsɛɛ ɛsɔnaa lalaa,”+ ɛsɔnaa mba ña nɛ ñɔ-cɔzɔnaa ɩtɩtɩlɩ yɔ, 7 ajɛɛ wena acɔ-mɩ nɛ ata yɔ a-ɛsɔnaa nabɛyɛ, paa pɩtɩɩkɛ wena añɔtɩnɩ-mɩ yaa wena aposini-mɩ yɔ, kpaɣnɩ ɛjaɖɛ kamaɣ yɔɔ nɛ piwolo ɛjaɖɛ kamaɣ lɛɛka yɔɔ yɔ, 8 taatisini-i nɛ taawelisini-i;+ pɩfɛyɩ ɖɔɖɔ se ŋna ɛ-pʋtɔdɩyɛ yaa ŋnɩɩ e-siziŋ yaa ŋhuuzi ɛ-yɔɔ; 9 ɛlɛ paa pɩɩkpawa nɛ pitii yɔ, pɩwɛɛ se ŋkʋ-ɩ.+ Ñe-nesi pɩwɛɛ se sɩcalɩ kpaʋ ɛ-yɔɔ, nɛ pʋwayɩ lɛ samaɣ kpeekpe nesi kpa ɛ-yɔɔ nɛ ɩkʋ-ɩ.+ 10 Pɩwɛɛ se ŋyaɣ-ɩ pɛɛ nɛ ɛsɩ,+ mbʋ pʋyɔɔ yɔ ɛñɩnaɣ se ɛla nɛ ŋyele tɩŋʋʋ ñɛ-Ɛsɔ Yehowa weyi ɛlɩzɩ-ŋ Ejipiti ɛjaɖɛ taa, yomiye ɖɩɣa taa yɔ. 11 Ðɩnɛ ɛlɛ, Izrayɛɛlɩ mba kpeekpe kaɣ nɩʋ nɛ sɔɔndʋ kpa-wɛ, nɛ wiɖiyi paakaɣ tasʋʋ labʋ lakasɩ kɩdɛkɛdɩsɩ nasɩyɩ mbʋ mɩ-hɛkʋ taa.+

12 «Ye ɩnɩwa se tɛtʋ ndʋ mɩ-Ɛsɔ Yehowa cɛlɩɣ-mɩ se ɩcaɣ tɩ-taa yɔ, pɔyɔɔdɩ tɩ-taa natʋyʋ taa se: 13 “Abalaa maawazɩɣ pʋyʋ waa nabɛyɛ lɩnɩ mɩ-hɛkʋ taa se pɛkɛzɩ pɛ-tɛtʋ taa mba lɩmaɣza nɛ pɔtɔŋ se: ‘Ðiwolo nɛ ɖɩsɛɛ ɛsɔnaa lalaa’ yɔ, ɛsɔnaa mba ɩtɩtɩlɩ yɔ,” 14 pɩwɛɛ se ɩtazɩ tɔm taa nɛ ɩñɩnɩ camɩyɛ nɛ ɩpɔzɩ tete nɛ ɩna se pɩkɛ toovenim na;+ nɛ ye pɩkɛ toovenim se palabɩ lakasɩ kɩdɛkɛdɩsɩ nzɩ mɩ-hɛkʋ taa yɔ, 15 paa pɩɩkpawa nɛ pitii yɔ, pɩwɛɛ se ɩkʋ tɛtʋ ndʋ tɩ-taa mba nɛ laɣɖɛ.+ Ɩɖɩzɩ tɛtʋ ndʋ nɛ mbʋ payɩ pɩwɛ tɩ-taa yɔ nɛ laɣɖɛ, pɩkpɛndɩnɩ tɩ-taa kpɩna.+ 16 Pʋwayɩ lɛ, pɩwɛɛ se ikpeɣli wondu ndʋ payɩ ɩlazɩ tɩ-taa yɔ tɛtʋ kadaɣ hɛkʋ taa nɛ ɩñaɣzɩ tɛtʋ miŋ, nɛ wondu ndʋ ɩlazaa yɔ tɩkaɣ kɛʋ kɩlaʋ pilim mɩ-Ɛsɔ Yehowa. Tɛtʋ ndʋ tɩkaɣ pɩsʋʋ njɛyɛ tam. Paakaɣ-tʋ ɖaɣnʋʋ maʋ wiɖiyi kpa. 17 Pɩfɛyɩ se ɩkpaɣ mbʋ pasɩ kɩjaʋ se paɖɩzɩɣ-pʋ yɔ pɩ-taa nabʋyʋ,+ ɖɩnɛ ɛlɛ Yehowa pana sɔsɔna kaɣ hɛʋ nɛ ɛna mɩ-pʋtɔdɩyɛ nɛ ɛnɩɩ mi-siziŋ nɛ eyele nɛ ihuu, ɛzɩ eeɖuunuu mɩ-cɔzɔnaa yɔ.+ 18 Mbʋ pʋyɔɔ yɔ pɩwɛɛ se ɩña mɩ-Ɛsɔ Yehowa* nɛ ɩɖɔ ɛ-paɣtʋ ndʋ payɩ manɖʋʋ-mɩ sɔnɔ yɔ tɩ-yɔɔ, nɛ piyele nɛ ɩla mbʋ pɩtʋʋzɩ mɩ-Ɛsɔ Yehowa ɛsɩndaa yɔ.+

14 «Ɩkɛ mɩ-Ɛsɔ Yehowa pɩyalaa. Sɩɖʋ nɔɔyʋ yɔɔ lɛ, ɩtaahɛdɩ mɩ-tɩ+ nɛ ɩtaahʋ mi-kila taa koloŋgolo.*+ 2 Mbʋ pʋyɔɔ yɔ ɩkɛ samaɣ kiɖeɖeɣa+ mɩ-Ɛsɔ Yehowa, nɛ Yehowa lɩzɩ-mɩ samasɩ kpeekpe nzɩ sɩwɛ tɛtʋ yɔɔ yɔ sɩ-taa se ɩpɩsɩ ɛ-samaɣ, e-ŋgee pʋyʋ.*+

3 «Pɩfɛyɩ se ɩtɔɔ mbʋ pɩwɛ kʋzɔɔtʋ yɔ pɩ-taa nabʋyʋ.+ 4 Kpɩna wena ɩpɩzɩɣ nɛ ɩtɔɔ yɔ ana yɔ:+ nɔ, heu, pʋnʋ, 5 hɩŋ ñɔɔɔ tʋ,* nɛnzɛm, lakʋ taa pʋnʋ, tɛyɛ pʋnʋ, kpeleɣye, tɛyɛ heu nɛ pʋʋ taa heu. 6 Ɩpɩzɩɣ nɛ ɩtɔɔ kpɩna wena payɩ a-acaa taa faɣ nabʋlɛ nɛ ahokuu tɔɔnaɣ ŋga atɔwaa yɔ nɛ aɖaɣnɩɣ-kɛ tɔɔʋ yɔ. 7 Ɛlɛ kpɩna wena ahokuu tɔɔnaɣ ŋga atɔwaa yɔ nɛ aɖaɣnɩɣ-kɛ tɔɔʋ yɔ, yaa wena a-acaa taa yawa nɛ pɩfɛyɩ se ɩtɔɔ-yɛ yɔ ana yɔ: aɖaaɖaa, kozoŋa, nɛ kaaŋ taa kozoŋa,* mbʋ pʋyɔɔ yɔ ahokuu tɔɔnaɣ ŋga atɔwaa yɔ nɛ aɖaɣnɩɣ-kɛ tɔɔʋ, ɛlɛ a-acaa taa tɩya. Akɛ-mɩ mbʋ pɩfɛyɩ kele kele yɔ.+ 8 Afa ɖɔɖɔ, mbʋ pʋyɔɔ yɔ ɛ-acaa taa yawa, ɛlɛ eehokuu tɔɔnaɣ ŋga ɛtɔwaa yɔ nɛ ɛɖaɣnɩɣ-kɛ tɔɔʋ. Ɛkɛ-mɩ mbʋ pɩfɛyɩ kele kele yɔ. Pɩfɛyɩ se ɩtɔɔ kpɩna ana a-nandʋ yaa itukuni a-tomnasɩ kɩsɩbasɩ.

9 «Mbʋ payɩ pɩcakɩ wezuu lɩm taa yɔ pɩ-taa lɛ, mbʋ ɩpɩzɩɣ nɛ ɩtɔɔ yɔ, mbʋ yɔ: Mbʋ payɩ pɩwɛnɩ ɖɛɣtʋ* nɛ pɔɔyɛɛ yɔ, ɩpɩzɩɣ nɛ ɩtɔɔ-pʋ.+ 10 Ɛlɛ mbʋ payɩ pɩfɛyɩnɩ ɖɛɣtʋ nɛ pɔɔyɛɛ yɔ, pɩfɛyɩ se ɩtɔɔ-pʋ. Pɩkɛ-mɩ mbʋ pɩfɛyɩ kele kele yɔ.

11 «Ɩpɩzɩɣ nɛ ɩtɔɔ sumasɩ kele kele ñɩnzɩ tɩŋa. 12 Ɛlɛ pɩfɛyɩ se ɩtɔɔ sumasɩ sɩnɛ: kpeluu,* teŋgu yɔɔ edeɣdiye, abɛntɛ kɩkpɛdʋ,+ 13 makɩyɛ kɩsɛmɖɩyɛ, makɩyɛ kɩkpɛɛdɩyɛ, paa makɩyɛ lɛɛɖɛ nɖɩ, 14 kaŋgala tɩŋa, 15 taataa, kpizuu, teŋgu yɔɔ ehooye, paa makɩyaɣ ŋga, 16 kpizuu cikpeluu, kpizuu ŋgʋ kɩ-nɩŋgbaaŋ ɖaɣlaa yɔ, lɩm yɔɔ kpagbafɩɩ, 17 kpakpalikiyaɣ sɔsɔɔ, abɛntɛ, sumaɣ kɩkpɛɛdaɣ ŋga kakpaɣ kpakpasɩ yɔ,* 18 alɩŋgbayʋ, paa kɩlɛɛʋ ŋgʋ, sumaɣ njooye tʋ nɛ sɛmʋʋ. 19 Mbʋ payɩ pɩwɛnɩ keŋ nɛ pɩkpɛndɩɣ nɛ pɩɖɔŋ wiii yɔ, pɩkɛ-mɩ ɖɔɖɔ mbʋ pɩfɛyɩ kele kele yɔ. Pɩfɛyɩ se ɩtɔɔ-pʋ. 20 Ɩpɩzɩɣ nɛ ɩtɔɔ mbʋ payɩ pɩwɛ wezuu nɛ pɩkʋyʋʋ ɛsɔdaa nɛ pɩwɛ kele kele yɔ.

21 «Ye ihiɣ kpɩnɛ naɖɩyɛ ɖɩsɩba yɔ, pɩfɛyɩ se ɩtɔɔ-ɖɩ.+ Ɩpɩzɩɣ nɛ ɩcɛlɩ-ɖɩ ɛgɔm weyi ɛwɛ mɩ-tɛtʋ* taa yɔ, ɛlɛ pɩzɩɣ nɛ ɛtɔɔ-ɖɩ; yaa ɩpɩzɩɣ nɛ ɩpɛdɩ-ɖɩ nɛ agbaaɣdaa tʋ nɔɔyʋ. Mbʋ pʋyɔɔ yɔ ɩkɛ samaɣ kiɖeɖeɣa mɩ-Ɛsɔ Yehowa.

«Pɩfɛyɩ se ɩtɩzɩ mbeɣa ko-ɖoo hɩlɩm taa.+

22 «Paa pɩɩlabɩ ɛzɩma yɔ, mbʋ payɩ ña-hayɩm taa tɔɔnaɣ lʋlʋʋ yɔ, pɩwɛɛ se ŋha pɩ-hɔɔlʋʋ 10 ñɩŋgʋ paa pɩnaɣ ŋga.+ 23 Ŋkaɣ tɔɔʋ ñɔ-tɔɔnaɣ pee hɔɔlʋʋ 10 ñɩŋgʋ, ñɛ-vɛɛ kɩfalʋʋ hɔɔlʋʋ 10 ñɩŋgʋ, ño-num hɔɔlʋʋ 10 ñɩŋgʋ nɛ ña-kajalaɣ newee wena pɩlʋlʋʋ yɔ, nɛ ña-kajalaɣ heɣsi nzɩ pɩlʋlʋʋ yɔ ñɛ-Ɛsɔ Yehowa ɛsɩndaa, lone nɖɩ ɛlɩzɩɣ se ɛ-hɩɖɛ ɛwɛɛ ɖɩ-taa yɔ ɖɩ-taa,+ ɖɩnɛ ɛlɛ ŋkaɣ kpɛlɩkʋʋ ɛzɩma ŋse ñɛ-Ɛsɔ Yehowa sɔɔndʋ tam yɔ.+

24 «Ɛlɛ ye nʋmɔʋ ɛwɛ-ŋ poliŋ kpem, ye ŋŋpɩzɩɣ se ŋkpaɣ wondu ndʋ nɛ ŋwoni lone nɖɩ ɖɩ-taa ñɛ-Ɛsɔ Yehowa lɩzaa se ɛ-hɩɖɛ ɛwɛɛ ɖɩ-taa yɔ,+ mbʋ pʋyɔɔ yɔ lone nɖɩ ɖiposini-ŋ yɔ (mbʋ pʋyɔɔ yɔ ñɛ-Ɛsɔ Yehowa kaɣ-ŋ wazʋʋ), 25 ɖɩnɛ ɛlɛ ŋpɩzɩɣ nɛ ŋpɛdɩ-tʋ, nɛ ŋkpaɣ liidiye nɖɩ nɛ ŋwoni lone nɖɩ ɖɩ-taa ñɛ-Ɛsɔ Yehowa lɩzɩɣ yɔ. 26 Pʋwayɩ lɛ, ŋpɩzɩɣ nɛ ŋkpaɣ liidiye nɖɩ nɛ ŋyabɩnɩ mbʋ payɩ ñe-liu wɛɛ yɔ:* naŋ, heŋ, pʋŋ, vɛɛ nɛ sʋlʋm lɛɛbʋ mbʋ pɩkʋʋ ɛyʋ yɔ nɛ mbʋ payɩ ŋsɔɔlaa yɔ;* nɛ ŋtɔɔ mbʋ ŋyaba yɔ peeɖe, ñɛ-Ɛsɔ Yehowa ɛsɩndaa nɛ ŋmɛyɩ, ña nɛ ña-ɖɩɣa taa mba.+ 27 Taala kaakendu Leevi tʋ weyi ɛwɛ ñɛ-tɛtʋ taa yɔ ɛ-yɔɔ,+ mbʋ pʋyɔɔ yɔ ɛfɛyɩnɩ ɖeɖe yaa ñɩm nabʋyʋ mɩ-hɛkʋ taa.+

28 «Paa ɛzɩmtaa pɩnzɩ 3 tɛŋ lɛ, pɩwɛɛ se ŋwoni tɔɔnaɣ ŋga ŋhiɣ pɩnaɣ 3 ñɩŋga taa yɔ kɔ-hɔɔlʋʋ 10 ñɩŋgʋ tɩŋa nɛ ŋsɩɩ-kʋ ñɛ-tɛtʋ taa.+ 29 Nɛ Leevi tʋ weyi ɛfɛyɩnɩ ɖeɖe yaa ñɩm nabʋyʋ mɩ-hɛkʋ taa yɔ, ɛgɔm, pɩɣa ŋga kɛfɛyɩ caa yɔ* nɛ lelu weyi ɛwɛ ñɛ-tɛtʋ taa yɔ, paakɔɔ nɛ pɔtɔɔ tɔɔnaɣ ŋga nɛ pahaɣ;+ ɖɩnɛ ɛlɛ ñɛ-Ɛsɔ Yehowa wazɩɣ-ŋ mbʋ payɩ ŋlakɩ yɔ pɩ-taa.+

15 «Paa ɛzɩmtaa pɩnzɩ 7 tɛŋ lɛ, pɩwɛɛ se ŋkpeɣ kɩma.+ 2 Ɛzʋnɔ pɩwɛɛ se pekpeɣ kɩma: Ɛyʋ weyi ɛ-cɔlɔ tʋ* kɩndɩ ɛ-cɔlɔ nabʋyʋ yɔ, pɩwɛɛ se ɛkpaɣ-pʋ nɛ ekpeɣ-i. Pɩfɛyɩ se ɛpɔzɩ kɩmɩyɛ ɛ-cɔlɔ tʋ yaa e-koobu, mbʋ pʋyɔɔ yɔ Yehowa yɔɔ lɛ pakaɣ susuu se pekpeɣ kɩma.+ 3 Ŋpɩzɩɣ nɛ ŋpɔzɩ kɩmɩyɛ ɛgɔm,+ ɛlɛ pɩfɛyɩ se ŋpɔzɩ ño-koobu kɩma wena ɛtɔɔ-ŋ yɔ a-taa naɖɩyɛ. 4 Ɛlɛ pɩfɛyɩ se mɩ-taa nɔɔyʋ ɛpɩsɩ kʋñɔndʋ, mbʋ pʋyɔɔ yɔ pɩtʋʋ fɛyɩ se Yehowa kaɣ-ŋ wazʋʋ+ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-taa, 5 ɛlɛ pɩwɛɛ se ŋwelisi ñɛ-Ɛsɔ Yehowa nɔɔ ɖeyi ɖeyi, nɛ ŋɖɔ paɣtʋ ndʋ payɩ manɖʋʋ-ŋ sɔnɔ yɔ tɩ-yɔɔ tete.+ 6 Mbʋ pʋyɔɔ yɔ ñɛ-Ɛsɔ Yehowa kaɣ-ŋ wazʋʋ ɛzɩ ɛɛlabʋ-ŋ tamaɣ yɔ, nɛ ŋkaɣ kɩndʋʋ ajɛɛ sakɩyɛ; ɛlɛ ña lɛ, pɩɩkaɣ pɔzʋʋ se ŋkɩndɩ nɔɔyʋ cɔlɔ;+ ŋkaɣ wɛnʋʋ ɖoŋ ajɛɛ sakɩyɛ yɔɔ, ɛlɛ aakaɣ wɛnʋʋ ɖoŋ ñɔ-yɔɔ.+

7 «Ye ño-koobiya taa nɔɔyʋ ɛpɩsɩ kʋñɔndʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-tɛtʋ natʋyʋ taa yɔ, taayele nɛ ña-laŋɩyɛ sʋʋ kpɩzɩŋ yaa taasuli ñe-nikpiɖe ño-koobu kʋñɔndʋ ɛnʋ.+ 8 Mbʋ pʋyɔɔ yɔ pɩwɛɛ se ŋkuli-i ñe-nikpiɖe faaa+ nɛ ŋkɩndɩ-ɩ mbʋ payɩ pɩpɔzʋʋ-ɩ yɔ yaa mbʋ payɩ pɩtɛɖɩɣ-ɩ yɔ. 9 Kpa ña-tɩ nɛ taamaɣzɩ lɩmaɣzɩyɛ kɩdɛkɛdɩyɛ ɖɩnɛ ña-laŋɩyɛ taa: “Pɩnaɣ 7 ñɩŋga ŋga kɛkɛ kɩma kpeɣu pɩnaɣ yɔ kɔñɔtaa,”+ nɛ piyele nɛ ŋkizi kʋjɔʋ labʋ ño-koobu kʋñɔndʋ nɛ ŋkizi-i nabʋyʋ haʋ. Ye ɛmabɩ kubuka nɛ Yehowa cɔlɔ kiŋ ñɔ-yɔɔ yɔ, pɩkɛɣnɩ-ŋ kɩdɛkɛdɩm.+ 10 Pɩwɛɛ se ŋha-ɩ nɛ laŋɩyɛ kɩbanɖɛ,+ taaha-ɩ* nɛ pana, mbʋ pʋyɔɔ yɔ pʋyɔɔ ñɛ-Ɛsɔ Yehowa kaɣ wazʋʋ ña-lakasɩ nɛ ña-tʋma kpeekpe.+ 11 Mbʋ pʋyɔɔ yɔ kʋñɔndɩnaa kaɣ wɛʋ ɛjaɖɛ taa paa ɛzɩmtaa.+ Pʋyɔɔ manɖʋʋ-ŋ paɣtʋ se: “Pɩwɛɛ se ŋkuli ñe-nikpiɖe faaa nɛ ŋsɩnɩ ño-koobu kʋñɔndʋ weyi ɛwɛ tanɩm taa ñɛ-ɛjaɖɛ taa yɔ.”+

12 «Ye pɛpɛdɩnɩ-ŋ ño-koobu Ebree tʋ abalɩñɩnʋ yaa halɩñɩnʋ nɔɔyʋ nɛ ɛlabɩ-ŋ tʋmɩyɛ pɩnzɩ 6 yɔ, pɩnaɣ 7 ñɩŋga taa lɛ, pɩwɛɛ se ŋyebi-i nɛ ɛwɛɛ ɛ-tɩ yɔɔ.+ 13 Nɛ ŋŋyeki-i se ɛwɛɛ ɛ-tɩ yɔɔ lɛ, taayebi-i nɛ ɛɖɛɛ nesi kpɛɖɛ. 14 Pɩwɛɛ se ŋha-ɩ ñe-heŋ yaa ña-pʋŋ nɩɩyɩ faaa, pɩwɛɛ ɖɔɖɔ se ŋcozi tɔɔnaɣ ñɔ-tɔɔnaɣ ɖɩmaɖɛ, num ño-num ɖɩlaɖɛ nɛ vɛɛ ñɛ-vɛɛ ɖɩlaɖɛ nɛ ŋha-ɩ faaa. Pɩwɛɛ se ŋha-ɩ ɛzɩ ñɛ-Ɛsɔ Yehowa wazʋʋ-ŋ yɔ. 15 Tɔzɩ se ŋŋpɩsɩ yom Ejipiti ɛjaɖɛ taa nɛ ñɛ-Ɛsɔ Yehowa ya ña-ñʋʋ. Pʋyɔɔ manɖʋʋ-ŋ paɣtʋ se ŋla mbʋ sɔnɔ.

16 «Ɛlɛ ye ɛsɔɔlɩ ña nɛ ña-ɖɩɣa taa mba nɛ eheyi-ŋ se: “Maakaɣ ɖɛʋ ñɔ-cɔlɔ,” mbʋ pʋyɔɔ yɔ ɛɛwɛ taa leleŋ taa alɩwaatʋ ndʋ ɛɛwɛ ñɔ-cɔlɔ yɔ yɔ,+ 17 ɖɩnɛ ɛlɛ pɩwɛɛ se ŋsɩɩ ɛ-nɩŋgbaŋʋʋ pɔɔyʋʋ yɔɔ nɛ ŋtʋlɩ-kʋ pɔʋ nɛ ɛjɔʋ, nɛ ɛkaɣ pɩsʋʋ ño-yom e-wezuu caɣʋ kpeekpe. Mbʋ ɖɔɖɔ pɩwɛɛ se ŋla ño-yom halɩñɩnʋ. 18 Ye ŋyebi-i se ɛwɛɛ ɛ-tɩ yɔɔ nɛ ɛɖɛɛ ñɔ-cɔlɔ yɔ pɩtaacɛyɩ-ŋ, mbʋ pʋyɔɔ yɔ tʋmɩyɛ nɖɩ ɛlabɩ-ŋ pɩnzɩ 6 yɔ ɖɩtalɩ tʋmɩyɛ nɖɩ abaa tʋ lakɩ yɔ tam nabʋlɛ, nɛ ñɛ-Ɛsɔ Yehowa wazɩ-ŋ pɩtɩŋa pɩ-taa.

19 «Pɩwɛɛ se ŋpɩsɩ kele kele ña-kajalaɣ newee abalɩñɩna wena payɩ pɩlʋlʋʋ yɔ nɛ ña-kajalaɣ heɣsi nɛ mbesi abalɩñɩnzɩ nzɩ payɩ pɩlʋlʋʋ yɔ ñɛ-Ɛsɔ Yehowa.+ Taakpaɣ ña-kajalaɣ neɣye nɖɩ pɩlʋlʋʋ yɔ nɛ ŋlabɩnɩ tʋmɩyɛ naɖɩyɛ nɛ taakɔ ña-kajalaɣ heɣa ŋga pɩlʋlʋʋ yɔ kɛ-kpɛm. 20 Ña nɛ ña-ɖɩɣa taa mba ɩkaɣ kpɩna ana tɔɔʋ ñɛ-Ɛsɔ Yehowa ɛsɩndaa paa pɩnaɣ ŋga, lone nɖɩ Yehowa lɩzɩɣ yɔ ɖɩ-taa.+ 21 Ɛlɛ ye kajalaɣ kpɩnɛ nɖɩ pɩlʋlʋʋ yɔ ɖɩwɛnɩ ɛjandʋ natʋyʋ, pʋ-tɔbʋʋ se ye ɖɩkɛ taɖɩyɛ tʋ, yaa yʋlʋm yaa ɖɩwɛnɩ ɛjandʋ sɔsɔtʋ lɛɛtʋ yɔ, pɩfɛyɩ se ŋlaa-ɖɩ ñɛ-Ɛsɔ Yehowa.+ 22 Pɩwɛɛ se ŋtɔɔ-ɖɩ ñɛ-tɛtʋ* taa; ɛyʋ weyi ɛfɛyɩ kele kele yɔ nɛ weyi ɛwɛ kele kele yɔ pa-tɩŋa papɩzɩɣ nɛ pɔtɔɔ-ɖɩ, ɛzɩ pɔtɔkʋʋ nɛnzɛm yaa hɩŋ ñɔɔɔ tʋ* yɔ.+ 23 Ɛlɛ pɩfɛyɩ se ŋtɔɔ ɖɩ-calɩm;+ pɩwɛɛ se ŋpɩyɩ-pʋ tataa ɛzɩ lɩm yɔ.+

16 «Ñɛ-ɛsɩyɛ ɛwɛɛ Abiib* fenaɣ yɔɔ nɛ ŋtɔɔ Paska ñɛ-Ɛsɔ Yehowa,+ mbʋ pʋyɔɔ yɔ Abiib fenaɣ taa ñɛ-Ɛsɔ Yehowa lɩzɩ-ŋ Ejipiti nɛ ɖoo.+ 2 Pɩwɛɛ se ŋlaa Paska kɩlaʋ ñɛ-Ɛsɔ Yehowa+ lone nɖɩ ɖɩ-taa Yehowa lɩzɩɣ se ɛ-hɩɖɛ ɛwɛɛ yɔ ɖɩ-taa,+ heŋ yaa pʋŋ taa nɛ naŋ taa pɩwɛɛ se ŋlɩzɩ.+ 3 Pɩfɛyɩ se ŋkpɛndɩnɩ nabʋyʋ mbʋ pɩ-taa paɖʋ lɔlɔm yɔ nɛ ŋtɔɔnɩ kɩlaʋ kpɩnɛ nɖɩ;+ kɩyakɩŋ 7 ŋkaɣ tɔɔʋ kpɔnɔ ŋgʋ kɩ-taa patɩɖʋ lɔlɔm yɔ, kʋñɔŋ kpɔnɔ, mbʋ pʋyɔɔ yɔ ŋlɩ Ejipiti ɛjaɖɛ taa kpedee kpedee.+ Lakɩ mbʋ nɛ ŋtɔzʋʋnɩ kɩyakʋ ŋgʋ ŋlɩnɩ Ejipiti ɛjaɖɛ taa yɔ kɩ-yɔɔ ñe-wezuu caɣʋ kpeekpe taa.+ 4 Ñe-egeetiye kpeekpe taa, pɩfɛyɩ se pana lɔlɔm ñɔ-cɔlɔ kɩyakɩŋ 7;+ nɛ kpɩnɛ nɖɩ ŋlaɣ kɩlaʋ kajalaɣ kɩyakʋ wiye ɖanaɣ yɔɔ yɔ, pɩfɛyɩ se ɖɩ-nandʋ natʋyʋ ɛkazɩ nɛ tɩcaɣ ɖoo tɩŋa nɛ tɛʋ fe.+ 5 Ŋŋkaɣ wɛnʋʋ waɖɛ se ŋlaa Paska kɩlaʋ tɛtʋ ndʋ ñɛ-Ɛsɔ Yehowa cɛlɩɣ-ŋ yɔ tɩ-taa paa ndʋ lɛ tɩ-taa. 6 Ɛlɛ lone nɖɩ ñɛ-Ɛsɔ Yehowa lɩzɩɣ se ɛ-hɩɖɛ ɛwɛɛ ɖɩ-taa yɔ, peeɖe pɩwɛɛ se ŋlaa-kʋ. Pɩwɛɛ se ŋlaa Paska kɩlaʋ ɖanaɣ yɔɔ, wɩsɩ ñɩtɩɣ nɛ sɩɖʋ lɛ,+ alɩwaatʋ ndʋ ŋŋlɩ Ejipiti yɔ tɩ-yɔɔ ɖeyi ɖeyi. 7 Pɩwɛɛ se ŋtɩzɩ kɩ-nandʋ nɛ ŋtɔɔ-tʋ+ lone nɖɩ ñɛ-Ɛsɔ Yehowa lɩzɩɣ yɔ ɖɩ-taa,+ nɛ tɛʋ feŋ tanaŋ tɛɛ lɛ, ŋpɩzɩɣ nɛ ŋpɩsɩ ñe-kizinzikiŋ tɛɛ. 8 Kɩyakɩŋ 6 pɩwɛɛ se ŋtɔɔ kpɔnɔ ŋgʋ kɩ-taa patɩɖʋ lɔlɔm yɔ, nɛ kɩyakʋ 7 ñɩŋgʋ wiye lɛ, pɩwɛɛ se ŋla ŋgee kigbeɣluu nɛ ŋɖʋnɩ ñɛ-Ɛsɔ Yehowa hɩɖɛ. Pɩfɛyɩ se ŋla tʋmɩyɛ naɖɩyɛ.+

9 «Pɩwɛɛ se ŋkalɩ kpɩtaŋ 7. Ŋpaɣzɩɣ kpɩtaŋ 7 ɛnɩ ɩ-kalʋʋ kpaɣnɩ alɩwaatʋ ndʋ ŋcalɩɣ loozo sezuu nɛ ŋkʋ tɔɔnaɣ yɔ.+ 10 Pʋwayɩ lɛ, pɩwɛɛ se ŋkpaɣ ñe-nesi tɛɛ sɔɔlɩm haɖɛ ɛzɩ ñɛ-Ɛsɔ Yehowa wazʋʋ-ŋ yɔ+ nɛ ŋtɔɔnɩ Kpɩtaŋ Kazandʋ ñɛ-Ɛsɔ Yehowa.+ 11 Pɩwɛɛ se ŋmɛyɩ ñɛ-Ɛsɔ Yehowa ɛsɩndaa, lone nɖɩ ɖɩ-taa ñɛ-Ɛsɔ Yehowa lɩzɩɣ se ɛ-hɩɖɛ ɛwɛɛ yɔ ɖɩ-taa, ña nɛ ña-pɩyalʋ, ñɛ-pɛlɛ, ño-yom abalɩñɩnʋ, ño-yom halɩñɩnʋ, Leevi tʋ weyi ɛwɛ ñɛ-tɛtʋ* taa yɔ, ɛgɔm, pɩɣa ŋga kɛfɛyɩ caa yɔ* nɛ lelu, mba pɛwɛ mɩ-hɛkʋ taa yɔ.+ 12 Tɔzɩ se ŋŋpɩsɩ yom Ejipiti ɛjaɖɛ taa+ nɛ ŋɖɔkɩ paɣtʋ tʋnɛ nɛ ŋɖɔ tɩ-yɔɔ.

13 «Ŋkuu ñɔ-tɔɔnaɣ ka-ɖɩmaɖɛ nɛ ŋkpaɣ num ño-num ɖɩlaɖɛ nɛ vɛɛ ñɛ-vɛɛ ɖɩlaɖɛ lɛ, pɩwɛɛ se ŋtɔɔ Coka* Kazandʋ+ kɩyakɩŋ lʋbɛ. 14 Mɛyɩ ña-kazandʋ alɩwaatʋ taa,+ ña nɛ ña-pɩyalʋ, ñɛ-pɛlɛ, ño-yom abalɩñɩnʋ, ño-yom halɩñɩnʋ, Leevi tʋ, ɛgɔm, pɩɣa ŋga kɛfɛyɩ caa yɔ nɛ lelu, mba pɛwɛ ñɛ-tɛtʋ taa yɔ. 15 Ŋkaɣ tɔɔʋ kazandʋ ñɛ-Ɛsɔ Yehowa lone nɖɩ Yehowa lɩzɩɣ yɔ ɖɩ-taa kɩyakɩŋ 7,+ mbʋ pʋyɔɔ yɔ ñɛ-Ɛsɔ Yehowa kaɣ wazʋʋ ñɔ-tɔɔnaɣ kpeekpe nɛ mbʋ payɩ ŋlakɩ yɔ pɩ-yɔɔ,+ nɛ taa leleŋ taa ɖeke ŋkaɣ wɛʋ.+

16 «Pɩwɛɛ se ña-ɖɩɣa taa abalaa tɩŋa iwolo ñɛ-Ɛsɔ Yehowa ɛsɩndaa, lone nɖɩ ɛlɩzɩɣ yɔ ɖɩ-taa, tam nabudozo pɩnaɣ taa: Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ+ alɩwaatʋ taa, Kpɩtaŋ Kazandʋ+ alɩwaatʋ taa nɛ Coka* Kazandʋ+ alɩwaatʋ taa; pɩfɛyɩ se pa-taa nɔɔyʋ ewolo Yehowa ɛsɩndaa nesi kpɛɖɛ. 17 Haɖɛ nɖɩ paa weyi ɛkɔŋna yɔ, pɩwɛɛ se ɖɩmʋnɩ ɛzɩma ñɛ-Ɛsɔ Yehowa wazɩ-ɩ yɔ.+

18 «Pɩwɛɛ se ŋsɩɩ paa cejewiye nɖɩ lɛ tɔm hʋyaa+ nɛ ñʋndɩnaa, tɛtʋ ndɩ ndɩ* ndʋ ñɛ-Ɛsɔ Yehowa cɛlɩɣ-ŋ yɔ tɩ-tɩŋa tɩ-taa; nɛ pɩwɛɛ se pahʋʋ samaɣ tɔm siɣsiɣ. 19 Pɩfɛyɩ se ŋkɛzɩ siɣsiɣ wɛtʋ kiŋgiɖe,+ ŋla tɛ yɔɔ tɛ yɔɔ lakasɩ+ yaa ŋmʋ kʋjɔʋ se ŋmuli tɔm hʋʋ taa; mbʋ pʋyɔɔ yɔ kʋjɔʋ ŋgʋ, kɩyʋlʋsʋʋ lɔŋsɩnɖʋ ɛsa,+ nɛ kiyeki nɛ siɣsiɣ tʋ tɔm ɛɛtʋʋzʋʋ. 20 Siɣsiɣ wɛtʋ, ɛɛɛ siɣsiɣ wɛtʋ pɩwɛɛ se ŋtɩŋ;+ ɖɩnɛ ɛlɛ ŋpɩzɩɣ nɛ ŋcaɣ wezuu nɛ ŋmʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ.

21 «Altaaru ŋgʋ ŋmaɣ ñɛ-Ɛsɔ Yehowa yɔ, pɩfɛyɩ se ŋsɔ tɩʋ nakʋyʋ kɩ-cɔlɔ se kɩkɛ sizika kiɖeɖeɣa.*+

22 «Pɩfɛyɩ ɖɔɖɔ se ŋsiɣ ña-tɩ tilimiye kiɖeɖeye naɖɩyɛ,+ pɩkɛ mbʋ ñɛ-Ɛsɔ Yehowa ɛɛnaɣ nɛ ɛsɩyɛ yɔ.

17 «Pɩfɛyɩ se ŋlaa nɔ abalɩñɩnʋ yaa heu weyi ɛwɛnɩ ɛjandʋ natʋyʋ yaa weyi e-ɖoli fɛyɩ camɩyɛ yɔ ñɛ-Ɛsɔ Yehowa, mbʋ pʋyɔɔ yɔ pɩkɛ mbʋ ñɛ-Ɛsɔ Yehowa paɖɩɣ yɔ.+

2 «Ye pana abalʋ yaa halʋ nɔɔyʋ mɩ-hɛkʋ taa, tɛtʋ ndʋ ñɛ-Ɛsɔ Yehowa cɛlɩɣ-ŋ yɔ tɩ-taa natʋyʋ taa, nɛ ɛlakɩ mbʋ pɩfɛyɩ ɖeu ñɛ-Ɛsɔ Yehowa ɛsɩndaa yɔ, nɛ ɛɛñaŋ ɛ-ɛgbɛyɛ,+ 3 nɛ ɛɖɛɛ nɛ ɛsɛɛ ɛsɔnaa lalaa nɛ eluŋ pɛ-tɛɛ yaa eluŋ wɩsɩ tɛɛ yaa fenaɣ tɛɛ yaa ɛsɔdaa wondu* kpeekpe tɛɛ,+ mbʋ mantɩɖʋ paɣtʋ se pala yɔ,+ 4 nɛ peheyi-ŋ tʋ yaa ŋnɩɩ-tʋ yɔ, ɖɩnɛ ɛlɛ pɩwɛɛ se ŋtazɩ tɔm taa tete. Ye pɩkɛ toovenim+ se palabɩ kʋzɔɔtʋ lakasɩ nzɩ Izrayɛɛlɩ taa yɔ, 5 pɩwɛɛ se ŋlɩnɩ abalʋ yaa halʋ weyi ɛlabɩ lakasɩ kɩdɛkɛdɩsɩ nzɩ yɔ tɛtʋ nɔnɔɔ taa, nɛ payaɣ-ɩ pɛɛ nɛ ɛsɩ.+ 6 Ɛyʋ weyi ɛmʋnɩ sɩm yɔ, pakaɣ-ɩ kʋʋ aseɣɖe tɩnaa 2 yaa aseɣɖe tɩnaa 3 aseɣɖe lɩzʋʋ* yɔɔ.+ Pɩfɛyɩ se pakʋ-ɩ aseɣɖe tʋ kʋɖʋm aseɣɖe lɩzʋʋ yɔɔ.+ 7 Aseɣɖe tɩnaa mba, pe-nesi pɩwɛɛ se sɩcalɩ kpaʋ ɛ-yɔɔ, nɛ pʋwayɩ lɛ samaɣ kpeekpe nesi kpa ɛ-yɔɔ nɛ pakʋ-ɩ. Pɩwɛɛ se ŋlɩzɩ mbʋ pɩfɛyɩ ɖeu yɔ mɩ-hɛkʋ taa.+

8 «Ye tɔm natʋyʋ ɛtalɩ mɩ-tɛtʋ natʋyʋ taa nɛ tɩ-hʋʋ kɩlɩ-ŋ kaɖɛ yɔ, paa pɩtɩɩkɛ calɩm kpɛdʋʋ tɔm+ yaa tɔm hʋʋ nabʋyʋ tɔm yaa puuyaɣ lakasɩ nzɩ nɔɔyʋ laba yɔ sɩ-tɔm yaa ɖama kɩɩnɩnʋʋ tɔm lɛɛtʋ yɔ, pɩwɛɛ se ŋkʋyɩ nɛ ŋwolo lone nɖɩ ñɛ-Ɛsɔ Yehowa lɩzɩɣ yɔ ɖɩ-taa.+ 9 Wolo cɔjɔnaa Leevi mba nɛ tɔm hʋyʋ+ weyi ɛhʋʋ tɔm kɩyakɩŋ ɛnɩ ɩ-taa yɔ pɔ-cɔlɔ nɛ ŋheyi-wɛ tɔm ndʋ nɛ peheyi-ŋ ɛzɩma pɩwɛɛ se ŋkpaɣna yɔ.+ 10 Pʋwayɩ lɛ, pɩwɛɛ se ŋla ɛzɩ peheyuu-ŋ lone nɖɩ Yehowa lɩzɩɣ yɔ ɖɩ-taa yɔ. Pɩwɛɛ se ŋla mbʋ payɩ peheyiɣ-ŋ yɔ ɖeyi ɖeyi. 11 Pɩwɛɛ se ŋɖɔ paɣtʋ ndʋ pawɩlɩɣ-ŋ yɔ nɛ tɔm ndʋ peheyiɣ-ŋ yɔ tɩ-yɔɔ.+ Mbʋ peheyiɣ-ŋ se ŋla yɔ, mbʋ ɖeyi ɖeyi pɩwɛɛ se ŋla; pɩfɛyɩ se ŋkpilini nɩwaŋ yɔɔ yaa nɩmɩyɛ yɔɔ.+ 12 Pɩwɛɛ se pakʋ ɛyʋ weyi ɛkpazɩɣ ɛ-tɩ nɛ eewelisiɣni cɔjɔ weyi ɛlakɩ ñɛ-Ɛsɔ Yehowa tʋmɩyɛ yaa eewelisiɣni tɔm hʋyʋ yɔ.+ Pɩwɛɛ se ŋlɩzɩ mbʋ pɩfɛyɩ ɖeu yɔ Izrayɛɛlɩ taa.+ 13 Ðɩnɛ ɛlɛ samaɣ kpeekpe kaɣ nɩʋ nɛ sɔɔndʋ kpa-kɛ, nɛ kaakaɣ tasʋʋ ka-tɩ kpazʋʋ.+

14 «Alɩwaatʋ ndʋ ŋsʋʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-taa nɛ ŋmʋ-ɖɩ nɛ ŋcaɣ ɖɩ-taa nɛ ŋyɔɔdɩ se: “Mansɩɣ man-tɩ wiyaʋ ɛzɩ ajɛɛ wena payɩ acɔ-m nɛ ata yɔ” lɛ,+ 15 ɖɩnɛ ɛlɛ weyi ñɛ-Ɛsɔ Yehowa lɩzɩɣ yɔ, ɛnʋ pɩwɛɛ se ŋsɩɩ wiyaʋ.+ Ño-koobu nɔɔyʋ pɩwɛɛ se ŋsɩɩ wiyaʋ. Ŋfɛyɩnɩ nʋmɔʋ se ŋsɩɩ ɛgɔm nɔɔyʋ weyi ɛtɩkɛ ño-koobu yɔ ñe-wiyaʋ. 16 Ɛlɛ pɩfɛyɩ se wiyaʋ ɛnʋ, ɛñɩnɩ ɛ-tɩ kpaŋnaŋ sakɩyɛ+ nɛ pɩfɛyɩ se ɛla nɛ samaɣ pɩsɩ Ejipiti se pɩsa nɛ ehiɣ kpaŋnaŋ sakɩyɛ,+ mbʋ pʋyɔɔ yɔ Yehowa kaaheyi-mɩ se: “Pɩfɛyɩ se ɩtasɩ nʋmɔʋ ŋgʋ kɩ-taa pɩsʋʋ kaaʋ.” 17 Pɩfɛyɩ ɖɔɖɔ se ɛkpaɣ halaa sakɩyɛ, ɖɩnɛ ɛlɛ ɛ-laŋɩyɛ eeposuuni nʋmɔʋ kɩbaŋʋ;+ nɛ pɩfɛyɩ se ɛñɩnɩ ɛ-tɩ liidiye nɛ sika nɛ ɛkpazɩ huwa.+ 18 Ɛcakɩ e-kewiyaɣ kpelaɣ yɔɔ lɛ, pɩwɛɛ se ɛma ɛ-tɩ Paɣtʋ tʋnɛ, ndʋ tɩwɛɣ cɔjɔnaa Leevi mba cɔlɔ yɔ tɩ-taa tɔm takayaɣ* nakɛyɛ taa.+

19 «Pɩwɛɛ se kɛwɛɛ ɛ-cɔlɔ, nɛ pɩwɛɛ se ɛkalɩɣ ka-taa tɔm e-wezuu kɩyakɩŋ kpeekpe,+ ɖɩnɛ ɛlɛ ɛkaɣ kpɛlɩkʋʋ ɛzɩma pɩwɛɛ se ese ɛ-Ɛsɔ Yehowa sɔɔndʋ yɔ nɛ ɛkaɣ ɖɔm Paɣtʋ ndʋ tɩ-taa tɔm kpeekpe yɔɔ nɛ ɖʋtʋ ndʋ tɩ-yɔɔ nɛ ɛñam-tʋ.+ 20 Piyeki nɛ ɛ-laŋɩyɛ ɛɛkpazɩɣ ɖɩ-tɩ e-koobiya yɔɔ, nɛ ɛɛkaɣ yebu paɣtʋ yɔɔ ɖɔm nɛ ekpilini nɩwaŋ yɔɔ yaa nɩmɩyɛ yɔɔ, piyeki nɛ ɛ nɛ ɛ-pɩyalaa pɔtɔɔ kewiyitu Izrayɛɛlɩ mba hɛkʋ taa nɛ pileɖi.

18 «Cɔjɔnaa Leevi mba nɛ Leevi cejewiye kpeekpe ɩɩkaɣ wɛnʋʋ ɖeɖe yaa ñɩm nabʋyʋ ɛzɩ Izrayɛɛlɩ mba lalaa yɔ. Kɩlaŋ weyi pañaɣzɩɣ-ɩ miŋ Yehowa yɔ, weyi ɩkɛ ɛ-ñɩm yɔ, ɩ-taa pakaɣ tɔɔʋ pɔ-tɔɔnaɣ.+ 2 Pʋyɔɔ lɛ, pɩfɛyɩ se pɛwɛɛnɩ ñɩm nabʋyʋ po-koobiya hɛkʋ taa. Yehowa kɛnɩ pa-ñɩm, ɛzɩ eheyuu-wɛ yɔ.

3 «Mbʋ cɔjɔnaa kaɣ wɛnʋʋ waɖɛ se samaɣ ɛcɛlɩ-wɛ yɔ mbʋ yɔ: Ye nɔɔyʋ ɛla kɩlaʋ nakʋyʋ, paa pɩtɩɩkɛ nɔ abalɩñɩnʋ yaa heu yɔ, pɩwɛɛ se ɛcɛlɩ cɔjɔ hamʋʋ, tamaɣ nɛ podo.* 4 Pɩwɛɛ se ŋcɛlɩ-ɩ ɖɔɖɔ ña-kajalaɣ tɔɔnaɣ pee, ñɛ-vɛɛ kɩfalʋʋ nɛ ño-num; nɛ kajalaɣ hʋndʋ ndʋ ŋkɔʋ ñe-heŋ yɔɔ yɔ.+ 5 Ñɛ-Ɛsɔ Yehowa lɩzɩ ɛ nɛ ɛ-pɩyalaa ñe-cejewe kpeekpe taa se pala tʋmɩyɛ Yehowa hɩɖɛ taa paa ɛzɩmtaa.+

6 «Ɛlɛ ye Leevi tʋ nɔɔyʋ ɛkʋyɩ mɩ-tɛtʋ natʋyʋ taa Izrayɛɛlɩ, ɖenɖe ɛɛwɛɛ yɔ+ nɛ e-liu* wɛɛ se ewolo lone nɖɩ Yehowa lɩzɩɣ yɔ* ɖɩ-taa yɔ,+ 7 ɛpɩzɩɣ nɛ ɛla tʋmɩyɛ peeɖe ɛ-Ɛsɔ Yehowa hɩɖɛ taa, ɛzɩ e-koobiya Leevi ñɩma mba payɩ pɛwɛ peeɖe Yehowa ɛsɩndaa yɔ palakʋʋ yɔ.+ 8 Ɛ nɛ wɛ pakaɣ mʋʋ tɔɔnaɣ kɩmaŋ,+ nɛ pɩtasɩnɩ mbʋ ehikiɣ ɛ-cɔzɔnaa ñɩm mbʋ ɛpɛdɩɣ yɔ pɩ-taa yɔ.

9 «Ŋsʋʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-taa lɛ, pɩfɛyɩ se ŋmaɣzɩnɩ kʋzɔɔtʋ lakasɩ nzɩ ɛyaa samasɩ nzɩ sɩwɛ peeɖe yɔ sɩlakɩ yɔ.+ 10 Pɩfɛyɩ se pana ñɛ-tɛ ɛyʋ weyi ɛñaɣzɩɣ ɛ-pɩyalʋ yaa ɛ-pɛlɛ miŋ yɔ,+ yaa weyi ɛtɩyɩɣ yɔ,+ yaa weyi ɛlakɩ maajiki yɔ,+ yaa piye pɔzɩyʋ+ yaa alɩfaa,+ 11 yaa weyi ɛhɔkʋʋ lalaa fadɩŋ se pɩkɔnɩ-wɛ kaɖɛ yɔ, yaa weyi ewoki tɩʋ tɛ se ɛlɛ ɛsʋzɩ sɩɖʋ yɔ,+ yaa tɩʋ weyi ɛyɔɔdʋʋ cee wayɩ tɔm yɔ+ yaa weyi ɛpɔzʋʋ se ɛnɩɩ sɩɖaa nɔɔ taa tɔm yɔ.+ 12 Mbʋ pʋyɔɔ yɔ Yehowa paɖɩɣ ɛyʋ weyi ɛlakɩ lakasɩ nzɩ yɔ, nɛ kʋzɔɔtʋ lakasɩ nzɩ sɩ-yɔɔ ñɛ-Ɛsɔ Yehowa ɖɔɔnʋʋ ɛyaa samasɩ nzɩ ñɛ-ɛsɩndaa. 13 Pɩfɛyɩ se ŋwɛɛnɩ kɩwɛɛkɩtʋ natʋyʋ ñɛ-Ɛsɔ Yehowa ɛsɩndaa.+

14 «Mbʋ pʋyɔɔ yɔ ɛyaa samasɩ nzɩ ŋmʋʋ sɩ-tɛtʋ yɔ, siwelisaɣni maajiki laɖaa+ nɛ tɩyaa,+ ɛlɛ ñɛ-Ɛsɔ Yehowa tɩha-ŋ nʋmɔʋ se ŋla lakasɩ nasɩyɩ mbʋ. 15 Ñɛ-Ɛsɔ Yehowa kaɣ-ŋ kʋsʋʋ nayʋ nɔɔyʋ ɛzɩ ma yɔ ño-koobiya hɛkʋ taa. Pɩwɛɛ se ŋwelisini-i.+ 16 Ñɛ-Ɛsɔ Yehowa lakɩ mbʋ se ɛcɛlɩ-ŋ mbʋ ŋŋpɔzɩ-ɩ Orɛɛbʋ, kɩyakʋ ŋgʋ samaɣ kaakpeɣlaa yɔ;+ alɩwaatʋ ndʋ ŋŋtɔm se: “Taayele nɛ mantasɩ nɩʋ mɛ-Ɛsɔ Yehowa nɔɔ yaa mantasɩ naʋ miŋ sɔsɔŋ ɛnɛ, nɛ mantaasɩ.”+ 17 Nɛ Yehowa heyi-m se: “Tɔm ndʋ pɔyɔɔdaa yɔ tɩwɛ ɖeu. 18 Mankaɣ-wɛ kʋsʋʋ nayʋ nɔɔyʋ ɛzɩ ña yɔ po-koobiya hɛkʋ taa,+ nɛ mankaɣ ɖʋʋ mɔn-tɔm ɛ-nɔɔ taa,+ nɛ ɛkaɣ-wɛ heyuu paɣtʋ ndʋ payɩ manɖʋʋ-ɩ yɔ.+ 19 Paa pɩɩlabɩ ɛzɩma yɔ, mankaɣ akɔnta pɔzʋʋ ɛyʋ weyi ɛɛkaɣ welisuu mɔn-tɔm ndʋ nayʋ ɛnʋ ɛkaɣ yɔɔdʋʋ ma-hɩɖɛ taa yɔ.+

20 «“Ye nayʋ nɔɔyʋ ɛkpazɩ ɛ-tɩ nɛ ɛyɔɔdɩ tɔm natʋyʋ ndʋ mantɩɖʋ-ɩ paɣtʋ se ɛyɔɔdɩ ma-hɩɖɛ taa yɔ yaa ɛyɔɔdɩ ɛsɔnaa lalaa hɩɖɛ taa yɔ, nayʋ ɛnʋ pɩwɛɛ se pakʋ-ɩ.+ 21 Ɛlɛ pɩtɩla ŋpɔzʋʋ ña-tɩ se: ‘Ɛzɩma ɖɩkaɣ labʋ nɛ ɖɩna se pɩtɩkɛ Yehowa yɔɔdɩnɩ tɔm ndʋ?’ 22 Ye nayʋ ɛnʋ ɛyɔɔdɩ tɔm Yehowa hɩɖɛ taa nɛ tɔm ndʋ tɩtɩla yaa pɩtɩɖɔ ɛzɩ ɛyɔɔdʋʋ yɔ yɔ, ɖɩnɛ ɛlɛ pɩtɩkɛ Yehowa yɔɔdɩnɩ tɔm ndʋ. Nayʋ ɛnʋ ɛkpazɩ ɛ-tɩ kɩkpazʋʋ nɛ ɛyɔɔdɩ-tʋ. Pɩfɛyɩ se ŋse-i sɔɔndʋ.”

19 «Ɛyaa samasɩ nzɩ ñɛ-Ɛsɔ Yehowa cɛlɩɣ-ŋ sɩ-ɛjaɖɛ yɔ, ñɛ-Ɛsɔ Yehowa ɖɩzɩɣ-sɩ nɛ ŋmʋ sɩ-ɛjaɖɛ nɛ ŋcaɣ sɩ-tɛtʋ ndɩ ndɩ taa nɛ sɩ-ɖɩsɩ taa lɛ,+ 2 pɩwɛɛ se ŋlɩzɩ kɩjaʋ tɛtʋ 3 ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-hɛkʋ taa.+ 3 Ɛjaɖɛ nɖɩ ñɛ-Ɛsɔ Yehowa cɛlɩ-ŋ se ɖɩpɩsɩ ña-ñɩm yɔ, pɩwɛɛ se ŋtayɩ ɖi-egeetiye hɔɔlɩŋ 3 taa, pɩwɛɛ ɖɔɖɔ se ŋñɔɔzɩ habɛɛ nɛ ɛyʋ kʋyʋ pɩzɩ ese nɛ ewolo tɛtʋ ndʋ tɩ-taa natʋyʋ taa.

4 «Ɛzʋnɔ pɩwɛɛ se pɩɖɔ ɛyʋ kʋyʋ weyi eseɣ se ewolo peeɖe nɛ ɛcaɣ wezuu yɔ ɛ-hɔɔlʋʋ taa: Ye ɛkʋ ɛyʋ nɔɔyʋ ɛlɛ ɛtaaɖʋna nɛ ɛtaapaɖɩɣ-ɩ yɔ;+ 5 ye pɩlaba se ɛ nɛ nɔɔyʋ pasʋ laʋ tɛɛ se pacaa ɖasɩ nɛ ɛkpazɩ laɖɩyɛ se ekeɖi tɩʋ, ɛlɛ laɖɩyɛ kpɛɛ ɖɩ-ɖaʋ yɔɔ nɛ ɖɩyaɣ ɛlɛ nɛ ɛsɩ yɔ, pɩwɛɛ se ɛyʋ kʋyʋ ɛnʋ ese nɛ ewolo tɛtʋ ndʋ tɩ-taa natʋyʋ taa nɛ ɛpɩzɩ nɛ ɛcaɣ wezuu.+ 6 Pɩtɩkɛ mbʋ yɔ, pana yɔɔ lɛ,* calɩm kɩmɩyɛ kpayʋ+ pɩzɩɣ nɛ ɛɖʋ ɛyʋ kʋyʋ wayɩ, ehiɣ-i nɛ ɛkʋ-ɩ, mbʋ pʋyɔɔ yɔ tɛtʋ ndʋ tɩ-taa pɩɩwɛɛ se ɛyʋ kʋyʋ ese nɛ ewolo yɔ, tɩkɩlɩ posuu. Ŋgʋ ɛtaamʋnɩ sɩm, mbʋ pʋyɔɔ yɔ ɛtaapaɖɩɣ ɛyʋ ɛnʋ.+ 7 Pʋyɔɔ manɖʋʋ-ŋ paɣtʋ se: “Lɩzɩ tɛtʋ 3 kɩjaʋ.”

8 «Ye ñɛ-Ɛsɔ Yehowa ɛwalɩsɩ ñe-egeetiye ɛzɩ eeɖuunuu ñɔ-cɔzɔnaa yɔ+ nɛ ɛcɛlɩ-ŋ ɛjaɖɛ nɖɩ ɛɛlabɩ tamaɣ se ɛcɛlɩɣ ñɔ-cɔzɔnaa yɔ ɖɩ-tɩŋa yɔ,+ 9 (ɛlɛ pɩwɛɛ se ŋɖɔ paɣtʋ ndʋ manɖʋʋ-ŋ sɔnɔ yɔ tɩ-tɩŋa tɩ-yɔɔ ɖeyi ɖeyi, sɔɔlɩ ñɛ-Ɛsɔ Yehowa nɛ ŋɖɔ ɛ-nʋmɔŋ taa tam)+ ɖɩnɛ ɛlɛ pɩwɛɛ se ŋsɔzɩ tɛtʋ 3 lɛɛtʋ tɛtʋ 3 ndʋ tɩ-yɔɔ.+ 10 Pʋbʋ lɛ, paakaɣ kpɛdʋʋ nɔɔyʋ calɩm ɖulum+ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-taa, nɛ ŋŋkaɣ ɖɔʋ calɩm kpɛdʋʋ wɛɛ.+

11 «Ɛlɛ ye ɛyʋ nɔɔyʋ ɛpaɖaɣ lɛlʋ+ nɛ ɛpabɩ-ɩ nɛ ɛkpa-ɩ nɛ ɛɖʋ-ɩ* heŋ sɩm yɔɔ sɩm yɔɔ nɛ ɛlɛ sɩ, nɛ ɛyʋ kʋyʋ ɛnʋ ese nɛ ewolo tɛtʋ ndʋ tɩ-taa natʋyʋ taa yɔ, 12 ɖɩnɛ ɛlɛ pɩwɛɛ se ɛyʋ kʋyʋ ɛnʋ ɛ-tɛtʋ taa ɛzʋtʋyaa itiyi ɛyaa peeɖe nɛ pɔkɔnɩ-ɩ nɛ paɖʋzɩ-ɩ calɩm kɩmɩyɛ kpayʋ nesi tɛɛ, nɛ ɛlɛ kʋ-ɩ.+ 13 Pɩfɛyɩ se ŋna* ɛ-pʋtɔdɩyɛ, pʋbʋ lɛ Izrayɛɛlɩ ɛɛɖɔʋ calɩm mbʋ pɛkpɛdɩ-pʋ ɖulum yɔ pɩ-wɛɛ,+ ɖɩnɛ ɛlɛ pɩɖɔŋnɩ-ŋ camɩyɛ.

14 «Ŋmʋʋ ñe-ɖeɖe ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-taa lɛ, pɩfɛyɩ se ŋkɛzɩ lone ɛyʋ lɛlʋ kamasɩ+ nzɩ cɔzɔnaa kaasiɣaa yɔ.

15 «Ye picoɖi nɔɔyʋ yaa ye ɛlabɩ kɩdɛkɛdɩm nabʋyʋ yɔ, paapɩzɩɣ nɛ pakʋ ɛ-tɔm aseɣɖe tʋ kʋɖʋm aseɣɖe lɩzʋʋ yɔɔ.*+ Aseɣɖe tɩnaa 2 yaa aseɣɖe tɩnaa 3 aseɣɖe lɩzʋʋ* yɔɔ pɩwɛɛ se patɩŋna nɛ pana se tɔm ndʋ tɩkɛ toovenim yaa we.+ 16 Ye lɩmaɣzɩyɛ kɩdɛkɛdɩyɛ naɖɩyɛ yɔɔ lɛ, ɛyʋ nɔɔyʋ ɛkʋyɩ lɛlʋ yɔɔ nɛ ɛlɩzɩ aseɣɖe se ɛlabɩ kɩdɛkɛdɩm nabʋyʋ yɔ,+ 17 pɩwɛɛ se ɛyaa mba pa-naalɛ, mba tɔm kɔm pɛ-hɛkʋ taa yɔ, pasɩŋ Yehowa ɛsɩndaa, cɔjɔnaa nɛ tɔm hʋyaa mba palakɩ tʋmɩyɛ kɩyakɩŋ ɛnɩ ɩ-taa yɔ, pɛ-ɛsɩndaa.+ 18 Pɩwɛɛ se tɔm hʋyaa ɩtazɩ tɔm taa tete,+ nɛ ye pɩlaba se weyi ɛlɩzɩ aseɣɖe yɔ, ɛkɛ aseɣɖe tʋ cɛtɩyʋ nɛ ɛcɛtɩnɩ e-koobu taa yɔ, 19 pɩwɛɛ se ŋlabɩ-ɩ ɖeyi ɖeyi ɛzɩ ɛɛɖʋʋ se ɛlakɩ e-koobu yɔ,+ pɩwɛɛ se ŋlɩzɩ mbʋ pɩfɛyɩ ɖeu yɔ mɩ-hɛkʋ taa.+ 20 Mba pɩkazɩɣ yɔ pakaɣ nɩʋ nɛ sɔɔndʋ kpa-wɛ, nɛ wiɖiyi paakaɣ tasʋʋ labʋ lakasɩ kɩdɛkɛdɩsɩ nasɩyɩ mbʋ mɩ-hɛkʋ taa.+ 21 Pɩfɛyɩ se pɩlabɩ-ŋ* pʋtɔdɩyɛ:+ Pɩwɛɛ se ŋhɛyɩ wezuu* wezuu* lone taa, ɛsɩyɛ ɛsɩyɛ lone taa, keɖe keɖe lone taa, nesi nesi lone taa, nɩŋgbaŋaɣ nɩŋgbaŋaɣ lone taa.+

20 «Ye ŋwoba se ŋlakɩ you nɛ ño-koyindinaa nɛ ŋna se pa-kpaŋnaŋ, pɛ-kɛɛkɛɛnaa nɛ po-you laɖaa kɩlɩ ña-ñɩma ɖɔʋ yɔ, sɔɔndʋ ɛtaakpa-ŋ nɛ wɛ, mbʋ pʋyɔɔ yɔ ñɛ-Ɛsɔ Yehowa weyi ɛlɩzɩ-ŋ Ejipiti ɛjaɖɛ taa yɔ, ɛwɛ ñɔ-cɔlɔ.+ 2 Ŋwɩzɩɣ you labʋ lɛ, pɩwɛɛ se cɔjɔ ɛñɔtɩnɩ samaɣ nɛ ɛyɔɔdɩnɩ-kɛ.+ 3 Pɩwɛɛ se eheyi-kɛ se: “Welisi, Oo Izrayɛɛlɩ, ŋcaɣ you labʋ nɛ ño-koyindinaa. Ña-laŋɩyɛ ɛtaalɩɩ. Sɔɔndʋ ɛtaakpa-ŋ nɛ wɛ, ña-laŋɩyɛ ɛtaamaa nɛ taaseli, 4 mbʋ pʋyɔɔ yɔ ña nɛ ñɛ-Ɛsɔ Yehowa ɩɖɔŋna se eyooni ño-koyindinaa ño-lone taa nɛ ɛya ña-ñʋʋ.”+

5 «Pɩwɛɛ se ñʋndɩnaa ɖɔɖɔ iheyi samaɣ se: “Ama ɖɩɣa kɩfalaɣ nɛ ɛtɩtʋlɩtɩ kɔ-nɔnɔsɩ? Ɛpɩsɩ ɛ-tɛ. Pɩtɩkɛ mbʋ yɔ, ɛpɩzɩɣ nɛ ɛsɩ you taa nɛ ɛyʋ lɛlʋ kaatʋlɩnɩ ɛ-ɖɩɣa ŋga kɔ-nɔnɔsɩ. 6 Asɔ viiñi tɩʋ nɛ etikoyiti ki-pee? Ɛpɩsɩ nɛ ekpe ɛ-tɛ. Pɩtɩkɛ mbʋ yɔ, ɛpɩzɩɣ nɛ ɛsɩ you taa nɛ ɛyʋ lɛlʋ kaakoyini ki-pee. 7 Nɛ asu pɛlɛ nɔɔyʋ nɛ ɛtɩkpaɣtɩ-ɩ? Ɛpɩsɩ nɛ ekpe ɛ-tɛ.+ Pɩtɩkɛ mbʋ yɔ, ɛpɩzɩɣ nɛ ɛsɩ you taa nɛ abalʋ lɛlʋ kpaɣ pɛlɛ ɛnʋ.” 8 Pɩwɛɛ se ñʋndɩnaa ɩpɔzɩ ɖɔɖɔ samaɣ se: “Anɩ sɔɔndʋ kpaɣ nɛ ɛ-laŋɩyɛ lɩɣ?+ Pɩwɛɛ se ɛpɩsɩ ɛ-tɛ, pɩtɩkɛ mbʋ yɔ ɛpɩzɩɣ eyele nɛ e-koobiya laŋɩyɛ lɩɩ ɛzɩ ɛ-ñɩnɖɛ lɩʋ yɔ.”*+ 9 Ñʋndɩnaa tɛŋ samaɣ yɔɔdɩnʋʋ lɛ, pɩwɛɛ se palɩzɩ sɔɔjanaa ñʋndɩnaa nɛ paba ɖiyi samaɣ.

10 «Ye ŋñɔtɩnɩ tɛtʋ natʋyʋ se ŋyouni-tʋ yɔ, pɩwɛɛ se ŋheyi-tʋ mbʋ tɩla nɛ laŋhɛzɩyɛ wɛɛ ña nɛ tʋ mɩ-hɛkʋ taa yɔ.+ 11 Ye ticosi-ŋ nɛ laŋhɛzɩyɛ nɛ tɩtʋlɩ-ŋ tɩ-nɔnɔsɩ yɔ, ɛyaa mba payɩ pɛwɛ tɩ-taa yɔ, papɩsɩɣ ña-pʋyʋ nɛ ŋkpa-wɛ nɛ ɖoŋ nɛ palakɩ-ŋ tʋma, nɛ pakaɣ-ŋ ɖʋʋ lɩm.+ 12 Ɛlɛ ye tikizaa se ña nɛ tʋ ɩtaala laŋhɛzɩyɛ nɛ tɩkʋyɩ se tiyooni-ŋ yɔ, ɖɩnɛ ɛlɛ pɩwɛɛ se ŋcɔɔ-tʋ nɛ ŋta nɛ ŋyooni-tʋ; 13 nɛ paa pɩɩlabɩ ɛzɩma yɔ, ñɛ-Ɛsɔ Yehowa kaɣ-tʋ ɖʋzʋʋ ñe-nesi taa, pɩwɛɛ se ŋkʋ tɩ-taa abalaa tɩŋa nɛ laɣɖɛ. 14 Ɛlɛ ŋpɩzɩɣ nɛ ŋkpaɣ halaa, piya, kpɩna nɛ mbʋ payɩ pɩwɛ tɩ-taa yɔ, mbʋ payɩ ŋlazɩ tɩ-taa yɔ;+ ŋkaɣ tɔɔʋ mbʋ ŋlazɩ ño-koyindinaa tɛ yɔ, mbʋ ñɛ-Ɛsɔ Yehowa cɛlɩ-ŋ yɔ.+

15 «Mbʋ ŋkaɣ labʋ tɛtʋ ndʋ payɩ tiposini-ŋ kpem yɔ, ndʋ tɩtɩkɛ ajɛɛ wena awɛ ñɔ-cɔlɔ kpɛɛɛ yɔ a-tɛtʋ yɔ. 16 Ɛlɛ pɩfɛyɩ se ŋyele mbʋ pifeziɣ yɔ pɩ-taa nabʋyʋ nɛ pɩ-ɛsa ɛyaa samasɩ sɩnɛ sɩ-tɛtʋ ndʋ ñɛ-Ɛsɔ Yehowa cɛlɩɣ-ŋ se tɩpɩsɩ ña-ñɩm yɔ tɩ-taa.+ 17 Pɩwɛɛ se ŋɖɩzɩ Hɛɛtɩ mba, Amoori mba, Kanaŋ mba, Perizi mba, Hivi mba nɛ Yebuusi mba tɩŋa caɣ caɣ,+ ɛzɩ ñɛ-Ɛsɔ Yehowa ɖʋʋ-ŋ paɣtʋ yɔ; 18 se pɩtaakɛdɩ nɛ pawɩlɩ-ŋ ɛzɩma ŋmaɣzɩnɩ kʋzɔɔtʋ lakasɩ nzɩ payɩ palabɩ pɛ-ɛsɔnaa yɔ, nɛ piyele nɛ ŋyʋsɩnɩ ñɛ-Ɛsɔ Yehowa.+

19 «Ye ŋcɔ tɛtʋ natʋyʋ nɛ ŋta se ŋmʋ-tʋ, nɛ ŋwɛɛ-tʋ yonuu yɔɔ kɩyakɩŋ sakɩyɛ yɔ, pɩfɛyɩ se ŋkpaɣ laɖɩyɛ nɛ ŋkeɖini tɩ-tɩŋ. Ŋpɩzɩɣ nɛ ŋtɔɔ i-pee, ɛlɛ pɩfɛyɩ se ŋtimi-i.+ Mbʋ pʋyɔɔ yɔ ɛzɩ ŋpɩzɩɣ nɛ ŋyooni hayɩm taa tɩʋ ɛzɩ ŋyounuu ɛyʋ yɔ? 20 Tɩʋ ŋgʋ ŋnawa se paatɔkɩ ki-pee yɔ, ki-ɖeke ŋpɩzɩɣ nɛ ŋkeɖi. Ŋpɩzɩɣ nɛ ŋtim-kʋ nɛ ŋlabɩnɩ-kʋ tʋmɩyɛ nɛ ŋyooni tɛtʋ ndʋ tiyouni-ŋ yɔ, pɩkɔɔ nɛ pɩsɩɩnɩ alɩwaatʋ ndʋ ŋwabɩ-tʋ yɔ.

21 «Ye pana sɩɖʋ nɔɔyʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-hayɩm nabʋyʋ taa, pakʋ-ɩ kʋkʋʋ ɛlɛ paasɩŋ weyi ɛkʋ-ɩ yɔ yɔ, 2 pɩwɛɛ se ñɛ-ɛzʋtʋyaa nɛ ñɔ-tɔm hʋyaa+ iwolo nɛ pamaɣzɩ ɖaɣlɩkɩŋ weyi ɩwɛ kpaɣnɩ ɖenɖe sɩɖʋ tomnaɣ wɛɛ yɔ nɛ piwolo tɛtʋ ndɩ ndɩ ndʋ tɩcɔ lone nɖɩ nɛ tɩta yɔ. 3 Ðɩnɛ ɛlɛ, pɩwɛɛ se tɛtʋ ndʋ tɩkɩlɩ sɩɖʋ ñɔtɩnʋʋ yɔ tɩ-taa ɛzʋtʋyaa ɩkpaɣ nɔ* halɩñɩnʋ nɔɔyʋ weyi patɩlabɩnɩ-ɩ tʋmɩyɛ wiɖiyi yɔ, weyi patɩtɩnɩ ɛ-yɔɔ sʋʋtʋ ɖaʋ wiɖiyi yɔ, 4 nɛ pɩwɛɛ se tɛtʋ ndʋ tɩ-taa ɛzʋtʋyaa iwoni nɔ halɩñɩnʋ ɛnʋ fɛɛʋ* nakʋyʋ taa, ɖenɖe lɩm kpeŋ nɛ patɩhayɩ nɛ patiɖuu ɖomaɣ peeɖe yɔ, nɛ pɛpɛlɩ nɔ halɩñɩnʋ ɛnʋ e-pondone fɛɛʋ taa peeɖe.+

5 «Nɛ pɩwɛɛ se cɔjɔnaa, Leevi mba ɩñɔtɩ pa-tɩ, mbʋ pʋyɔɔ yɔ ñɛ-Ɛsɔ Yehowa lɩzɩ-wɛ se palabɩ-ɩ tʋmɩyɛ,+ se pawazɩ ɛyaa Yehowa hɩɖɛ taa.+ Pakaɣ yɔɔdʋʋ ɛzɩma pɩwɛɛ se pɔcɔnɩ ɖama kɩɩnɩnʋʋ mbʋ pɩ-taa nɔɔyʋ lakɩ puuyaɣ lakasɩ yɔ pi-ɖeɖe yɔ.+ 6 Ðɩnɛ ɛlɛ, pɩwɛɛ se tɛtʋ ndʋ tɩkɩlɩ ñɔtɩnʋʋ sɩɖʋ yɔ tɩ-taa ɛzʋtʋyaa kpeekpe ɩsaŋ pe-nesi+ nɔ halɩñɩnʋ ɛnʋ, weyi pɛpɛlɩ e-pondone fɛɛʋ taa yɔ ɛ-yɔɔ, 7 nɛ pɔyɔɔdɩ se: “Ðe-nesi tɩkpɛdɩ calɩm pʋnɛ, nɛ ɖɛ-ɛsa tɩna alɩwaatʋ ndʋ pɛkpɛdɩ-pʋ yɔ. 8 Oo Yehowa, taasʋʋ lakasɩ sɩnɛ sɩ-sʋʋtʋ Izrayɛɛlɩ, ña-samaɣ ŋga ŋyabɩ ka-ñʋʋ yɔ;+ nɛ calɩm mbʋ pɛkpɛdɩ-pʋ ɖulum yɔ pʋyɔɔ lɛ, taayele nɛ ña-samaɣ Izrayɛɛlɩ ɖɔɔ wɛɛ.”+ Ðɩnɛ ɛlɛ paakaɣ-wɛ sʋʋ calɩm mbʋ pɩkpɛdaa yɔ pɩ-sʋʋtʋ. 9 Pʋbʋ lɛ, ɩkaɣ labʋ mbʋ pɩtʋʋzɩ Yehowa ɛsɩndaa yɔ nɛ ɩlɩzɩ mɩ-hɛkʋ taa calɩm mbʋ pɛkpɛdɩ-pʋ ɖulum yɔ pɩ-wɛɛ ɖɔʋ.

10 «Ye ŋwoba nɛ ŋyooni ño-koyindinaa nɛ ñɛ-Ɛsɔ Yehowa ɖʋzɩ-wɛ ñe-nesi taa nɛ ŋkpa-wɛ yomiye,+ 11 nɛ ŋna yomaa mba pa-taa halʋ nɔɔyʋ, eɖewa nɛ ɛ-tɔm kɛdɩnɩ-ŋ nɛ ñe-liu wɛɛ se ŋkpakɩɣ-ɩ halʋ yɔ, 12 ŋpɩzɩɣ nɛ ŋwoni halʋ ɛnʋ ña-ɖɩɣa taa. Pʋwayɩ lɛ, pɩwɛɛ se ɛhʋ ɛ-ñʋʋ, ɛkɛɛ ɛ-cɩkpaŋ, 13 nɛ ɛhɔzɩ e-yomiye tokonaa nɛ ɛcaɣ ña-ɖɩɣa taa. Ɛkaɣ wiu ɛ-caa nɛ e-ɖoo fenaɣ pilim,+ nɛ pʋwayɩ lɛ ŋpɩzɩɣ nɛ ŋsʋʋnɩ-ɩ; ŋkaɣ pɩsʋʋ ɛ-walʋ nɛ ɛpɩsɩ ña-halʋ. 14 Ɛlɛ ye ɛ-tɔm ɛtɩkɛdɩnɩ-ŋ yɔ, ɖɩnɛ ɛlɛ pɩwɛɛ se ŋyebi-i nɛ ɛɖɛɛ+ ɖenɖe e-liu wɛɛ yɔ.* Ɛlɛ ŋŋpɩzɩɣ nɛ ŋpɛdɩ-ɩ nɛ ŋmʋ liidiye nɛ pɩfɛyɩ se ŋwɩlɩ-ɩ ñaŋ, mbʋ pʋyɔɔ yɔ ŋɖʋ-ɩ fɛyɛ.

15 «Ye abalʋ nɔɔyʋ ɛwɛnɩ halaa 2 nɛ ɛsɔɔlɩ kʋɖʋm nɛ pɩkɩlɩ lɛlʋ,* nɛ pa-naalɛ palʋlɩ-ɩ abalɩbiya nɛ abalɩbɩɣa kajalaɣ ñɩŋga kɛ halʋ weyi ɛtɩsɔɔlɩ yɔ ɛ-ñɩŋga yɔ,+ 16 kɩyakʋ ŋgʋ ɛtayɩɣ ɛ-ñɩm ɛ-pɩyalaa yɔ, ɛfɛyɩnɩ nʋmɔʋ se ɛkpaɣ halʋ weyi ɛsɔɔlaa yɔ ɛ-pɩyalʋ ɛzɩ ɛnʋ kɛnɩ ɛ-kajalaɣ pɩɣa yɔ nɛ emuli kajalaɣ pɩɣa, pʋ-tɔbʋʋ se halʋ weyi ɛtɩsɔɔlɩ yɔ ɛ-pɩyalʋ. 17 Pɩwɛɛ se ɛtɩlɩ se halʋ weyi ɛtɩsɔɔlɩ yɔ ɛ-pɩyalʋ kɛnɩnɩ kajalaɣ pɩɣa; nɛ ɛɛtayɩɣ e-piya mbʋ payɩ ɛwɛna yɔ lɛ, pɩwɛɛ se ɛcɛlɩ-kɛ mbʋ lɛɛsɩ mʋʋ yɔ pɩ-tɛ nabʋlɛ; mbʋ pʋyɔɔ yɔ ŋga kɛnɩ ɛ-lʋlʋʋ ɖoŋ ɖɩbazɩyɛ. Ŋga wɛnɩnɩ kajalaɣ pɩɣa waɖɛ.+

18 «Ye abalʋ nɔɔyʋ ɛwɛnɩ abalɩbɩɣa nakɛyɛ nɛ ka-ñʋʋ taa wɛ ɖoŋ nɛ kɛkɛ kaañamtʋ tʋ nɛ kaanɩɣ ka-caa nɛ ko-ɖoo pɔ-tɔm,+ nɛ paba ñaɣ pana se pasɩɣzɩ-kɛ lɔŋ ɛlɛ kekizi-wɛ welisinuu yɔ,+ 19 pɩwɛɛ se ka-caa nɛ ko-ɖoo pakpa-kɛ nɛ powoni-kɛ ɛzʋtʋyaa cɔlɔ kɛ-tɛtʋ nɔnɔɔ taa 20 nɛ peheyi kɛ-tɛtʋ taa ɛzʋtʋyaa se: “Ða-pɩyalʋ ɛnɛ, ɛ-ñʋʋ taa wɛ ɖoŋ nɛ ɛkɛ kaañamtʋ tʋ, ekizaa se ɛɛnɩɣ tɔm ndʋ ɖiheyiɣ-i yɔ. Ɛkɛ hiluu tʋ+ nɛ sʋlʋm kpaŋɩyʋ.”+ 21 Ðɩnɛ ɛlɛ, pɩwɛɛ se ɛ-tɛtʋ taa abalaa tɩŋa ɩyaɣ-ɩ pɛɛ nɛ ɛsɩ. Mbʋ pɩwɛɛ se ŋlɩzɩ mbʋ pɩfɛyɩ ɖeu yɔ mɩ-hɛkʋ taa, nɛ Izrayɛɛlɩ mba kpeekpe kaɣ nɩʋ nɛ sɔɔndʋ kpa-wɛ.+

22 «Ye nɔɔyʋ ɛlabɩ kɩdɛkɛdɩm nabʋyʋ nɛ ɛmʋnɩ sɩm nɛ pakʋ-ɩ+ nɛ ŋpuzi-i ɖaʋ* nakʋyʋ yɔɔ yɔ,+ 23 pɩfɛyɩ se e-tomnaɣ ɛwɛɛ ɖaʋ* yɔɔ mbʋ ɖoo tɩŋa.+ Ɛlɛ pɩwɛɛ se ŋpimi-i puwiye maɣmaɣ, mbʋ pʋyɔɔ yɔ weyi popuzi-i ɖaʋ yɔɔ yɔ, Ɛsɔ lɔ ɛ-yɔɔ nɔɔ kɩdɛkɛdaɣ,+ nɛ pɩfɛyɩ se ŋpisi ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ.+

22 «Ye ŋna ño-koobu nɔ yaa e-heu ɖiɣni lebu yɔ, taayebi-i yem nɛ ŋɖɛɛ.+ Paa pɩɩlabɩ ɛzɩma yɔ pɩwɛɛ se ŋɖiyi-i nɛ ŋpɩsɩnɩ-ɩ ño-koobu. 2 Ɛlɛ ye ño-koobu ɛnʋ ɛ-tɛ ɛtɩñɔtɩnɩ-ŋ yaa ŋŋsɩŋɩ-ɩ yɔ, pɩwɛɛ se ŋwoni kpɩnɛ nɖɩ ñɛ-tɛ, nɛ ɖɩcaɣ ñɔ-cɔlɔ pɩkɔɔ nɛ pɩtalɩ alɩwaatʋ ndʋ ño-koobu ñɩnɩɣ-ɖɩ nɛ ɛkɔɔ yɔ. Ðɩnɛ ɛlɛ pɩwɛɛ se ŋcɛlɩ-ɩ ɖɩ.+ 3 Ye ño-koobu kpaŋaɣ, e-wondu kususutu yaa ɛ-pʋyʋ nɔɔyʋ eleba nɛ ŋhiɣ-pʋ yɔ, mbʋ pɩwɛɛ se ŋla. Pɩfɛyɩ se ŋna-pʋ nɛ ŋɖɛɛ pɩ-yɔɔ.

4 «Ye ŋna ño-koobu kpaŋaɣ yaa ɛ-nɔ tɔlɩ nʋmɔʋ taa yɔ, pɩfɛyɩ se ŋkpaɣ ña-nʋmɔʋ nɛ ŋɖɛɛ yem. Pɩwɛɛ se ŋsɩnɩ-ɩ nɛ ɛkʋsɩ kpɩnɛ nɖɩ.+

5 «Pɩfɛyɩ se halʋ esuu abalʋ wondu, nɛ pɩfɛyɩ ɖɔɖɔ se abalʋ esuu halʋ wondu. Mbʋ pʋyɔɔ yɔ weyi ɛlakɩ mbʋ yɔ ñɛ-Ɛsɔ Yehowa paɖɩɣ-ɩ.

6 «Ye ŋlɩ sumaɣ ɖandʋ natʋyʋ yɔɔ nʋmɔʋ nɔɔ, nɛ sumasɩ piya yaa yala wɛ tɩ-taa, paa pɩtɩɩkɛ tɩʋ nakʋyʋ yɔɔ yaa tataa, nɛ ɖoyo pabɩ piya yɔɔ yaa yala yɔɔ yɔ, pɩfɛyɩ se ŋkpa ɖoyo nɛ ŋkpɛndɩnɩ e-piya.+ 7 Pɩwɛɛ se ŋyele ɖoyo nɛ ɛɖɛɛ, ɛlɛ ŋpɩzɩɣ nɛ ŋkpa piya nɛ ŋɖɛna. La mbʋ nɛ pɩɖɔmnɩ-ŋ camɩyɛ nɛ ŋpɩzɩ ŋcaɣ wezuu nɛ pɩɖaɣlɩ.

8 «Ye ŋma ɖɩɣa kɩfalaɣ nakɛyɛ yɔ, pɩwɛɛ ɖɔɖɔ se ŋma ka-ñʋʋ taa koloŋa nɛ pɩcɔɔ pɩta,+ ɖɩnɛ ɛlɛ nɔɔyʋ ɛɛkaɣ lɩnʋʋ ka-ñʋʋ taa nɛ ɛtɔlɩ nɛ ña-ɖɩɣa ɖɔɔ calɩm wɛɛ.

9 «Pɩfɛyɩ se ŋɖuu ɖomasɩ* ndɩ ndɩ 2 ñe-viiñi hayɩm taa.+ Pɩtɩkɛ mbʋ yɔ, mbʋ ŋɖuwa yɔ mbʋ payɩ pɩlʋlʋʋ yɔ pamʋʋ-pʋ nɛ pɩkpɛndɩnɩ ñe-viiñi pee nɛ pɩpɩsɩ kooka kiɖeɖeɣa pʋyʋ.

10 «Pɩfɛyɩ se ŋkpɛndɩ nɔ abalɩñɩnʋ nɛ kpaŋaɣ nɛ ŋhayɩna.+

11 «Pɩfɛyɩ se ŋsuu toko ŋgʋ pɛkpɛndɩ heŋ hʋndʋ nɛ pɩsatʋ* nɛ palʋʋnɩ-kʋ yɔ.+

12 «Pɩwɛɛ se ŋɖʋʋ pɩsatʋ com com wondu ndʋ ŋsuu yɔ tɩ-nɔsɩ 4 yɔɔ.+

13 «Ye abalʋ nɔɔyʋ ɛkpaɣ halʋ nɛ ɛsʋʋnɩ-ɩ, ɛlɛ pʋwayɩ lɛ, ɛpaɣzɩ halʋ ɛnʋ paɖʋʋ* 14 nɛ ɛkʋyɩ ɛ-yɔɔ se ɛtɩcaɣ wezuu kɩbaŋʋ, nɛ ɛwɛɛkɩ ɛ-hɩɖɛ nɛ ɛyɔɔdɩ se: “Mankpaɣ halʋ ɛnɛ, ɛlɛ mansʋnɩ-ɩ lɛ, mantɩna mbʋ pɩwɩlɩɣ se ɛtaasɩ abalʋ yɔ” yɔ, 15 ɖɩnɛ ɛlɛ pɩwɛɛ se pɛlɛ caa nɛ e-ɖoo pawɩlɩ ɛzʋtʋyaa mbʋ pɩwɩlɩɣ se pɛ-pɛlɛ taasɩ abalʋ yɔ tɛtʋ nɔnɔɔ taa. 16 Pɩwɛɛ se pɛlɛ caa eheyi ɛzʋtʋyaa se: “Mɛncɛlɩ mɛn-pɛlɛ abalʋ ɛnɛ nɛ ɛpɩsɩ ɛ-halʋ, ɛlɛ ɛpaɖɩɣ* mɛn-pɛlɛ 17 nɛ ɛkʋyɩ ɛ-yɔɔ se ɛtaacaɣ wezuu kɩbaŋʋ nɛ ɛyɔɔdʋʋ se: ‘Mantɩna mbʋ pɩwɩlɩɣ se ñɛ-pɛlɛ taasɩ abalʋ yɔ.’ Lɛɛlɛɛyɔ lɛ mbʋ pɩwɩlɩɣ se mɛn-pɛlɛ taasɩ abalʋ yɔ mbʋ yɔ.” Nɛ pɩwɛɛ se poposi pɩsaʋ tɛtʋ taa ɛzʋtʋyaa ɛsɩndaa. 18 Ðɩnɛ ɛlɛ tɛtʋ taa ɛzʋtʋyaa+ kaɣ abalʋ ɛnʋ kpaʋ nɛ pɔhɔ ɛ-nɩŋgbaŋʋʋ.+ 19 Pakaɣ-ɩ pɛlʋʋ kɩmɩyɛ liidiye siklinaa* 100 nɛ pɛcɛlɩ-ɖɩ pɛlɛ caa, mbʋ pʋyɔɔ yɔ abalʋ ɛnʋ episi Izrayɛɛlɩ taa pɛlɛ weyi ɛɛsɩŋ abalʋ yɔ ɛ-hɩɖɛ,+ nɛ ɛkaɣ kɛʋ ɛ-halʋ mbʋ. E-wezuu kɩyakɩŋ kpeekpe, ɛɛkaɣ wɛnʋʋ nʋmɔʋ se ekizi halʋ ɛnʋ.

20 «Ɛlɛ, ye tɔm ndʋ ɛyɔɔdaa nɛ ɛkʋyɩnɩ halʋ yɔɔ yɔ tɩkɛ toovenim, nɛ nabʋyʋ fɛyɩ nɛ pɩwɩlɩɣ se halʋ ɛnʋ ɛtaasɩ abalʋ yɔ, 21 ɖɩnɛ ɛlɛ pɩwɛɛ se powoni halʋ ɛ-caa ɖɩɣa nɔnɔɔ taa, nɛ ɛ-tɛtʋ taa abalaa yaɣ-ɩ pɛɛ nɛ ɛsɩ, mbʋ pʋyɔɔ yɔ ɛlabɩ fɛyɛ lakasɩ+ Izrayɛɛlɩ taa, ɛcaɣ kʋzʋʋ kɩdɛkɛdʋʋ wezuu* ɛ-caa ɖɩɣa taa.+ Mbʋ pɩwɛɛ se ɩlɩzɩ mbʋ pɩfɛyɩ ɖeu yɔ mɩ-hɛkʋ taa.+

22 «Ye pakpa abalʋ nɔɔyʋ nɛ eɖiɣni sʋnʋʋ abalʋ lɛlʋ halʋ yɔ, pɩwɛɛ se pakʋ pa-naalɛ, abalʋ weyi ɛsʋnɩ halʋ yɔ nɛ halʋ ɛnʋ.+ Mbʋ pɩwɛɛ se ɩlɩzɩ mbʋ pɩfɛyɩ ɖeu yɔ Izrayɛɛlɩ taa.

23 «Ye abalʋ nɔɔyʋ esu pɛlɛ nɔɔyʋ, nɛ abalʋ lɛlʋ katɩ pɛlɛ ɛnʋ tɛtʋ taa nɛ ɛsʋʋnɩ-ɩ yɔ, 24 pɩwɛɛ se iwoni pa-naalɛ tɛtʋ ndʋ tɩ-nɔnɔɔ taa nɛ ɩyaɣ-wɛ pɛɛ nɛ pasɩ, pɩwɛɛ se pɛlɛ ɛnʋ ɛsɩ mbʋ pʋyɔɔ yɔ ɛtɩma kubusi tɛtʋ taa, nɛ pɩwɛɛ se abalʋ ɛnʋ ɛsɩ mbʋ pʋyɔɔ yɔ ɛɖʋ fɛyɛ abalʋ lɛlʋ halʋ.+ Mbʋ pɩwɛɛ se ɩlɩzɩ kɩdɛkɛdɩm mɩ-hɛkʋ taa.

25 «Ɛlɛ ye hayɩm taa abalʋ ɛkatɩ pɛlɛ weyi posu-i yɔ nɛ ɛkpa pɛlɛ ɛnʋ nɛ ɖoŋ nɛ ɛsʋʋnɩ-ɩ yɔ, abalʋ weyi ɛsʋnɩ pɛlɛ ɛnʋ yɔ e-ɖeke pɩwɛɛ se pakʋ, 26 pɩfɛyɩ se ɩla pɛlɛ ɛnʋ nabʋyʋ. Pɛlɛ ɛnʋ ɛtɩla kɩwɛɛkɩm nɛ ɛtɩmʋnɩ sɩm. Pɩwɛ ɖɔɖɔ ɛzɩ abalʋ nɔɔyʋ ɖakʋʋ abalʋ lɛlʋ nɛ ɛkʋʋ-ɩ yɔ.+ 27 Mbʋ pʋyɔɔ yɔ hayɩm taa ɛkatɩ pɛlɛ weyi posu-i yɔ, nɛ ɛlɛ mabɩ kubusi, ɛlɛ nɔɔyʋ taawɛɛ se ɛya ɛ-ñʋʋ.

28 «Ye abalʋ nɔɔyʋ ɛkatɩ pɛlɛ weyi ɛɛsɩŋ abalʋ nɛ patisuu-i yɔ, nɛ ɛkpa-ɩ nɛ ɛsʋʋnɩ-ɩ nɛ pakpa-wɛ yɔ,+ 29 pɩwɛɛ se abalʋ weyi ɛsʋnɩ pɛlɛ yɔ, ɛcɛlɩ pɛlɛ caa liidiye siklinaa 50, nɛ pɛlɛ ɛnʋ ɛpɩsɩ ɛ-halʋ.+ E-wezuu kɩyakɩŋ kpeekpe, ɛɛkaɣ wɛnʋʋ nʋmɔʋ se ekizi halʋ ɛnʋ, mbʋ pʋyɔɔ yɔ ɛɖʋ-ɩ fɛyɛ.

30 «Pɩfɛyɩ se abalʋ nɔɔyʋ ɛkpaɣ ɛ-caa halʋ, ɖɩnɛ ɛlɛ ɛɛkaɣ ɖʋʋ ɛ-caa fɛyɛ.+

23 «Pɩfɛyɩ se abalʋ weyi ɛ-ladɩwee yɔkaa yaa weyi pɛsɛtɩ ɛ-abalɩtʋ yɔ ɛsʋʋ Yehowa samaɣ taa.+

2 «Pɩfɛyɩ se acɛyɛ pɩɣa* ɛsʋʋ Yehowa samaɣ taa.+ Halɩ ɛ-lʋlʋʋ taa pɩɣa nakɛyɛ ɛɛpɩzɩɣ nɛ kasʋʋ Yehowa samaɣ taa, piwolo nɛ pɩtalɩ kpaɖʋʋ 10 ñɩŋgʋ.

3 «Amooni tʋ nɔɔyʋ yaa Mowaabʋ tʋ nɔɔyʋ ɛɛpɩzɩɣ nɛ ɛsʋʋ Yehowa samaɣ taa.+ Halɩ pa-lʋlʋʋ taa pɩɣa nakɛyɛ ɛɛpɩzɩɣ nɛ kasʋʋ Yehowa samaɣ taa kpa, piwolo nɛ pɩtalɩ kpaɖʋʋ 10 ñɩŋgʋ, 4 mbʋ pʋyɔɔ yɔ alɩwaatʋ ndʋ ɩlɩnɩ Ejipiti ɛjaɖɛ taa yɔ, patɩkpaɣ tɔɔnaɣ nɛ lɩm nɛ pakatɩnɩ-mɩ se paɖʋnɩ-mɩ nesi,+ pɩtasɩ lɛ paya Beyɔɔrɩ pɩyalʋ Baalam weyi ɛɛwɛ Petɔɔrɩ, Mezoopotamii taa yɔ se ɛkɔɔ nɛ ɛlɔ mɩ-yɔɔ nɔɔ kɩdɛkɛdaɣ nɛ pɛhɛyɩ-ɩ.+ 5 Paa mbʋ yɔ, mɩ-Ɛsɔ Yehowa tiwelisini Baalam.+ Ɛlɛ mɩ-Ɛsɔ Yehowa laba nɛ nɔɔ kɩdɛkɛdaɣ lɔʋ pɩsɩ-mɩ wazaɣ,+ mbʋ pʋyɔɔ yɔ mɩ-Ɛsɔ Yehowa sɔɔlɩ-mɩ.+ 6 Ɩtaañɩnɩ pa-kɩbandʋ kpa nɛ ɩtaañɩnɩ ɖɔɖɔ se piɖeni-wɛ kpa mi-wezuu kɩyakɩŋ kpeekpe.+

7 «Pɩfɛyɩ se ɩpaɖɩ Edom tʋ, mbʋ pʋyɔɔ yɔ ɛkɛ mi-koobu.+

«Pɩfɛyɩ se ɩpaɖɩ Ejipiti tʋ, mbʋ pʋyɔɔ yɔ ɩɩpɩsɩ agɔma ɛ-ɛjaɖɛ taa.+ 8 Pa-kpaɖʋʋ 3 ñɩŋgʋ taa piya pɩzɩɣ nɛ sɩsʋʋ Yehowa samaɣ taa.

9 «Alɩwaatʋ ndʋ ikpeɣliɣ se iyouni mi-koyindinaa yɔ, pɩwɛɛ se ɩkpa mɩ-tɩ nɛ mbʋ payɩ pɩfɛyɩ ɖeu yɔ.*+ 10 Ye kɩjabɩyʋʋ ekpemni abalʋ nɔɔyʋ ɖoo taa nɛ ɛpɩsɩ weyi ɛfɛyɩ kele kele yɔ,+ pɩwɛɛ se ɛlɩɩ ɖigbeɣliye* nɛ wayɩ, nɛ pɩfɛyɩ se ɛtasɩ ɖigbeɣliye taa sʋʋ. 11 Ðanaɣ ɖanɩɣ lɛ, pɩwɛɛ se ɛsɔ lɩm, ɖɩnɛ ɛlɛ ɛpɩzɩɣ nɛ ɛpɩsɩ ɖigbeɣliye taa, wɩsɩ kpeŋ lɛ.+ 12 Pɩwɛɛ se ŋlɩzɩ lone naɖɩyɛ kɩjaʋ maalika wayɩ, peeɖe pɩwɛɛ se ŋwolo nɛ ŋlɩɩ awayɩ. 13 Pɩwɛɛ se ŋwɛɛnɩ kaŋgamaɣ nakɛyɛ ño-wondu taa. Pʋcɔ nɛ ŋsobi lɛ, ŋga pɩwɛɛ se ŋhuyini pɔʋ nɛ pʋwayɩ lɛ ŋhuuzi ña-pɩndʋ yɔɔ. 14 Mbʋ pʋyɔɔ yɔ ñɛ-Ɛsɔ Yehowa ɖiɣni cɔʋ ña-maalika taa+ se eholi-ŋ nɛ ɛɖʋzɩ ño-koyindinaa ñe-nesi taa; pʋyɔɔ lɛ pɩwɛɛ se ña-maalika ɛkɛ kiɖeɖeɣa+ nɛ ɛtaana kʋzɔɔtʋ natʋyʋ ñɔ-cɔlɔ nɛ ekizi-ŋ tɩŋʋʋ.

15 «Ye yom nɔɔyʋ ese ɛ-caa cɔlɔ nɛ ɛkɔɔ ñɔ-cɔlɔ yɔ, pɩfɛyɩ se ŋpɩsɩnɩ-ɩ nɛ ŋcɛlɩ ɛ-caa. 16 Ɛpɩzɩɣ nɛ ɛcaɣ ñɔ-cɔlɔ lone nɖɩ ɛlɩzɩɣ ñɛ-tɛtʋ natʋyʋ taa yɔ ɖɩ-taa, ɖenɖe ɛsɔɔlaa yɔ. Pɩfɛyɩ se ŋwɩlɩ-ɩ ñaŋ.+

17 «Pɩfɛyɩ se Izrayɛɛlɩ pɛlɛ nɔɔyʋ ɛpɩsɩ templo taa hayitu laɖʋ,+ mbʋ ɖɔɖɔ pɩfɛyɩ se Izrayɛɛlɩ pɩyalʋ nɔɔyʋ ɛpɩsɩ templo taa hayitu laɖʋ.+ 18 Pɩfɛyɩ se ŋkɔnɩ mbʋ pɛhɛyɩ halʋ hayitu laɖʋ yaa mbʋ pɛhɛyɩ abalʋ hayitu laɖʋ* yɔ* ñɛ-Ɛsɔ Yehowa ɖɩɣa taa se ŋɖɔmnɩ ño-ɖuutu natʋyʋ yɔɔ, mbʋ pʋyɔɔ yɔ pɩ-naalɛ pɩkɛ mbʋ ñɛ-Ɛsɔ Yehowa paɖɩɣ yɔ.

19 «Ye ŋkɩndɩ ño-koobu liidiye, tɔɔnaɣ yaa mbʋ payɩ papɩzɩɣ nɛ pɔpɔzɩ ɛyʋ se ɛɛhɛyɩɣ-pʋ lɛ esuyi kɛzɛɣa pɩ-yɔɔ yɔ, pɩfɛyɩ se ɛɛhɛyɩɣ-ŋ pʋ lɛ ŋpɔzɩ-ɩ se esuyi kɛzɛɣa pɩ-yɔɔ.+ 20 Ye ɛgɔm ɛkɩndɩnɩ nabʋyʋ ñɔ-cɔlɔ yɔ, ŋpɩzɩɣ nɛ ŋpɔzɩ-ɩ se ɛɛhɛyɩɣ-ŋ pʋ lɛ esuyi kɛzɛɣa pɩ-yɔɔ,+ ɛlɛ pɩfɛyɩ se ŋpɔzɩ ño-koobu se ɛɛhɛyɩɣ-ŋ mbʋ ɛkɩndɩ ñɔ-cɔlɔ yɔ lɛ esuyi kɛzɛɣa pɩ-yɔɔ,+ ɖɩnɛ ɛlɛ ñɛ-Ɛsɔ Yehowa kaɣ-ŋ wazʋʋ mbʋ payɩ ŋlakɩ ɛjaɖɛ nɖɩ ŋmʋʋ se ɖɩpɩsɩ ña-ñɩm yɔ ɖɩ-taa yɔ.+

21 «Ye ŋɖuu ɖuutu natʋyʋ ñɛ-Ɛsɔ Yehowa yɔ,+ taala ninika nɛ tɩ-yɔɔ ɖɔm.+ Mbʋ pʋyɔɔ yɔ paa pɩɩlabɩ ɛzɩma yɔ, ñɛ-Ɛsɔ Yehowa pɔzʋʋ-ŋ tʋ; pɩtɩkɛ mbʋ yɔ, pɩpɩsɩɣ-ŋ kɩdɛkɛdɩm.+ 22 Ɛlɛ ye ŋtiɖuu ɖuutu natʋyʋ yɔ, ŋŋkaɣ ɖɔʋ wɛɛ.+ 23 Pɩwɛɛ se ŋɖɔ ñɔ-tɔm yɔɔ,+ nɛ sɔɔlɩm haɖɛ ɖuutu ndʋ ña-maɣmaɣ ŋɖuu ñɛ-Ɛsɔ Yehowa yɔ, pɩwɛɛ se ŋɖɔ tɩ-yɔɔ.+

24 «Ye ŋsʋ ño-koobu viiñi hayɩm taa yɔ, ŋpɩzɩɣ nɛ ŋtɔɔ viiñi pee nɛ ŋñɩɣzɩ,* ɛlɛ pɩfɛyɩ se ŋɖʋ naayɛ nabʋyʋ taa nɛ ŋɖɛna.+

25 «Ye ŋsʋ ño-koobu tɔɔnaɣ pee hayɩm taa yɔ, ŋpɩzɩɣ nɛ ŋloyi tɔɔnaɣ pee wena apɩwa yɔ nɛ ñe-nesi, ɛlɛ pɩfɛyɩ se ŋkʋ ño-koobu tɔɔnaɣ pee nɛ loozo.+

24 «Ye abalʋ nɔɔyʋ ɛkpaɣ halʋ nɛ halʋ ɛnʋ ɛtɩkɛdɩnɩ-ɩ, mbʋ pʋyɔɔ yɔ ɛna nabʋyʋ mbʋ pɩfɛyɩ ɖeu yɔ halʋ yɔɔ yɔ, pɩwɛɛ se abalʋ ɛnʋ ɛma-ɩ nesi cɛbʋ takayaɣ+ nɛ ɛcɛlɩ-ɩ kɛ nɛ ɛlɩzɩ-ɩ ɛ-ɖɩɣa taa.+ 2 Halʋ lɩɣ abalʋ ɛnʋ ɛ-ɖɩɣa taa nɛ pɩtɛ lɛ, ɛpɩzɩɣ nɛ ɛpɩsɩ abalʋ lɛlʋ halʋ.+ 3 Ye abalʋ 2 tʋ ɛpaɖɩɣ* halʋ ɛnʋ nɛ ɛma-ɩ nesi cɛbʋ takayaɣ nɛ ɛcɛlɩ-ɩ kɛ nɛ ɛlɩzɩ-ɩ ɛ-ɖɩɣa taa, yaa ye abalʋ 2 tʋ weyi ɛkpaɣ halʋ ɛnʋ yɔ ɛsɩba yɔ, 4 pɩtɩha nʋmɔʋ halʋ ɛnʋ ɛ-kajalaɣ walʋ weyi eekizi-i yɔ se ɛɖaɣnɩ-ɩ kpaɣʋ nɛ ɛpɩsɩ ɛ-halʋ, mbʋ pʋyɔɔ yɔ halʋ ɛnʋ ɛtɩtasɩ wɛʋ kele kele, pɩkɛ mbʋ Yehowa paɖɩɣ yɔ. Pɩfɛyɩ se ŋsʋnɩ kɩwɛɛkɩm ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-taa.

5 «Ye abalʋ nɔɔyʋ ɛkpaɣ halʋ fam nɛ fam yɔ, pɩfɛyɩ se ɛla sɔɔjatʋ tʋmɩyɛ yaa paɖʋ-ɩ tʋmɩyɛ lɛɛɖɛ naɖɩyɛ. Pɩnaɣ pilim pɩfɛyɩ se paɖʋ-ɩ tʋmɩyɛ naɖɩyɛ, ɛcaɣ ɖɩɣa nɛ ɛla nɛ ɛ-halʋ nɩɩ leleŋ.+

6 «Pɩfɛyɩ se pamʋ nɔɔyʋ cɔlɔ namɩyɛ yaa nem se ɛhɛyɩ kɩmɩyɛ nɖɩ ɛtɔwaa yɔ pʋcɔ nɛ papɩsɩnɩ-ɩ,+ mbʋ pʋyɔɔ yɔ pɩwɛɣ ɛzɩ pamʋʋ ɛyʋ cɔlɔ mbʋ piyeki se ɛcaɣ wezuu yɔ* se ye ɛhɛyɩ kɩmɩyɛ nɖɩ ɛtɔwaa yɔ lɛ, paapɩsɩnɩ-pʋ yɔ.

7 «Ye panawa se nɔɔyʋ kpa e-koobu Izrayɛɛlɩ tʋ nɔɔyʋ nɛ ɖoŋ nɛ ɛɖɛna nɛ ɛwɩlɩ-ɩ ñaŋ nɛ ɛpɛdɩ-ɩ yɔ,+ pɩwɛɛ se pakʋ weyi ɛkpa lɛlʋ nɛ ɖoŋ yɔ.+ Pɩwɛɛ se ŋlɩzɩ mbʋ pɩfɛyɩ ɖeu yɔ mɩ-hɛkʋ taa.+

8 «Ye canatʋ kʋdɔŋ* ɛkpa mɩ-taa nɔɔyʋ yɔ, pɩwɛɛ se ɩkpa mɩ-tɩ camɩyɛ nɛ ɩla mbʋ payɩ cɔjɔnaa Leevi mba heyiɣ-mɩ se ɩla yɔ ɖeyi ɖeyi.+ Pɩwɛɛ se ɩla ɖeyi ɖeyi ɛzɩ manɖʋʋ-wɛ paɣtʋ yɔ. 9 Ɩtɔzɩ mbʋ mɩ-Ɛsɔ Yehowa kaalabɩ Miriyam alɩwaatʋ ndʋ ɩɩlɩnɩ Ejipiti nɛ ɩkɔŋ yɔ pɩ-yɔɔ.+

10 «Ye ŋkɩndɩ nabʋyʋ ño-koobu yɔ,+ pɩfɛyɩ se ŋsʋʋ ɛ-ɖɩɣa taa nɛ ŋkpaɣ nɛ ɖoŋ mbʋ ɛyɔɔdaa se ɛcɛlɩɣ-ŋ nɛ pɩwɛɛ ñɔ-cɔlɔ nɛ pɩsɩɩnɩ alɩwaatʋ ndʋ ɛhɛyɩɣ-ŋ ña-kɩmɩyɛ yɔ. 11 Pɩwɛɛ se ŋsɩŋ awayɩ, nɛ weyi ɛkɩndɩ nabʋyʋ ñɔ-cɔlɔ yɔ ɛkɔnɩ-ŋ peeɖe mbʋ ɛcɛlɩɣ-ŋ se pɩwɛɛ ñɔ-cɔlɔ nɛ pɩsɩɩnɩ alɩwaatʋ ndʋ ɛhɛyɩɣ-ŋ ña-kɩmɩyɛ yɔ. 12 Nɛ ye ɛyʋ ɛnʋ ɛwɛ kɩcɛyɩm taa yɔ, mbʋ ɛcɛlɩ-ŋ se pɩwɛɛ ñɔ-cɔlɔ nɛ pɩsɩɩnɩ alɩwaatʋ ndʋ ɛhɛyɩɣ-ŋ ña-kɩmɩyɛ yɔ, pɩfɛyɩ se ŋsɩɩ-pʋ ñɔ-cɔlɔ nɛ ŋsʋʋ ŋhɩnɩ.+ 13 Paa pɩtɩɩkɛ suwe yɔ, wɩsɩ ñɩtɩɣ nɛ sɩɖʋ lɛ, pɩwɛɛ se ŋpɩsɩnɩ-ɩ mbʋ ɛcɛlɩ-ŋ se pɩwɛɛ ñɔ-cɔlɔ nɛ pɩsɩɩnɩ alɩwaatʋ ndʋ ɛhɛyɩɣ-ŋ ña-kɩmɩyɛ yɔ, nɛ ɛsʋʋ ɛhɩnɩnɩ e-toko,+ ɖɩnɛ ɛlɛ ɛkaɣ-ŋ wazʋʋ; nɛ ŋkaɣ kɛʋ siɣsiɣ tʋ ñɛ-Ɛsɔ Yehowa ɛsɩndaa.

14 «Pɩfɛyɩ se ŋmuli abaa tʋ weyi ɛwɛ kɩcɛyɩm taa nɛ ɛkɛ kʋñɔndʋ yɔ, paa pɩtɩɩkɛ ño-koobu nɔɔyʋ yaa ɛgɔm weyi ɛwɛ ñɛ-ɛjaɖɛ taa tɛtʋ* natʋyʋ taa yɔ.+ 15 Pɩwɛɛ se ŋhɛyɩ-ɩ kɩyakʋ ŋgʋ ki-wiye maɣmaɣ,+ pʋcɔ nɛ wɩsɩ ɖʋ; mbʋ pʋyɔɔ yɔ ɛwɛ kɩcɛyɩm taa, nɛ mbʋ ŋhɛyɩɣ-ɩ yɔ mbʋ ɖɔkʋʋnɩ e-wezuu.* Pɩtɩkɛ mbʋ yɔ, ñɔ-yɔɔ lɛ, ɛkaɣ mabʋ kubusi nɛ Yehowa cɔlɔ kiŋ, ɖɩnɛ ɛlɛ ŋɖɔʋ wɛɛ.+

16 «Pɩfɛyɩ se pakʋ caanaa mbʋ pe-piya laba yɔ pɩ-yɔɔ, nɛ pɩfɛyɩ se pakʋ piya mbʋ sɩ-caanaa laba yɔ pɩ-yɔɔ.+ Ɛyʋ maɣmaɣ kɩwɛɛkɩm ɖeke yɔɔ pɩwɛɛ se pakʋ-ɩ.+

17 «Pɩfɛyɩ se ŋkɛzɩ ɛgɔm yaa pɩɣa ŋga kɛfɛyɩ caa yɔ* kɔ-tɔm tuluŋa tɔm hʋʋ taa,+ nɛ pɩfɛyɩ ɖɔɖɔ se ŋmʋ lelu toko nɛ ɖoŋ se kɩwɛɛ ñɔ-cɔlɔ nɛ pɩsɩɩnɩ alɩwaatʋ ndʋ ɛhɛyɩɣ-ŋ ña-kɩmɩyɛ yɔ.+ 18 Tɔzɩ se ŋŋpɩsɩ yom Ejipiti ɛjaɖɛ taa, nɛ ñɛ-Ɛsɔ Yehowa holi-ŋ nɛ peeɖe.+ Pʋyɔɔ manɖʋʋ-ŋ paɣtʋ se ŋla mbʋ.

19 «Ye ŋkʋm ña-hayɩm taa tɔɔnaɣ nɛ pɩla se ŋsɔ hɔɔyɛ naɖɩyɛ yɔɔ hayɩm taa yɔ, taapɩsɩ se ŋkpaɣ-ɖɩ. Pɩwɛɛ se ŋyebini-ɖɩ ɛgɔm, pɩɣa ŋga kɛfɛyɩ caa yɔ nɛ lelu,+ ɖɩnɛ ɛlɛ ñɛ-Ɛsɔ Yehowa wazɩɣ-ŋ mbʋ payɩ ŋlakɩ yɔ pɩ-taa.+

20 «Ŋkoyuu ñɛ-tɛ oliivi pee lɛ, taatasɩ pɩsʋʋ se ŋkoyuu wena akazɩ pilinzi yɔɔ yɔ. Wena akazaa yɔ, pɩwɛɛ se ŋyebini-yɛ ɛgɔm, pɩɣa ŋga kɛfɛyɩ caa yɔ nɛ lelu.+

21 «Ŋkoyuu viiñi pee ñe-viiñi hayɩm taa lɛ, pɩfɛyɩ se ŋpɩsɩ wena akazaa yɔ a-wayɩ se ŋkoyuu-yɛ. Pɩwɛɛ se ŋyebini-yɛ ɛgɔm, pɩɣa ŋga kɛfɛyɩ caa yɔ nɛ lelu. 22 Tɔzɩ se ŋŋpɩsɩ yom Ejipiti ɛjaɖɛ taa. Pʋyɔɔ manɖʋʋ-ŋ paɣtʋ se ŋla mbʋ.

25 «Ye tɔm natʋyʋ ɛkɔm ɛyaa nabɛyɛ hɛkʋ taa yɔ, pɩwɛɛ se powolo tɔm hʋyaa ɛsɩndaa,+ nɛ paba hʋʋ pɔ-tɔm nɛ peɖezi weyi ɛwɛ siɣsiɣ yɔ ɛ-tɔm nɛ pakʋ weyi ɛkɛ kɩdɛkɛdʋ yɔ ɛ-tɔm.+ 2 Weyi ɛkɛ kɩdɛkɛdʋ yɔ, ye pɩpɔzʋʋ se pamabɩ-ɩ yɔ,+ pɩwɛɛ se tɔm hʋyʋ eyele nɛ pahɩzɩ-ɩ tataa nɛ pamabɩ-ɩ tɔm hʋyʋ ɛsɩndaa. Tam* ɛzɩma pamakɩ-ɩ yɔ, pɩwɛɛ se pɩmʋnɩ kɩdɛkɛdɩm mbʋ ɛlaba yɔ. 3 Papɩzɩɣ pamabɩ-ɩ nɛ pɩtalɩ tam* 40,+ ɛlɛ pɩfɛyɩ se pɩcɛzɩ mbʋ. Ye pɛwɛɛ pamakɩ-ɩ nɛ pɩkɔɔ pɩcɛzɩ mbʋ yɔ, pɩɖʋʋ ño-koobu fɛyɛ ñɛ-ɛsɩndaa.

4 «Pɩtɩpɔzɩ se ŋhɔkɩ nɔ abalɩñɩnʋ nɔɔ alɩwaatʋ ndʋ ɛwɛɛ nɛ ɛmakɩ tɔɔnaɣ pee yɔ.*+

5 «Ye koobiya nabɛyɛ ɩwɛ ɖoli kʋɖʋm nɛ pa-taa lɛlʋ sɩ ɛlɛ ɛfɛyɩnɩ abalɩbɩɣa yɔ, pɩfɛyɩ se weyi ɛsɩba yɔ ɛ-halʋ ɛlɩɩ hɔʋ ŋgʋ kɩ-taa nɛ ɛɖɛɛnɩ agbaaɣdaa nɛ ɛwalɩ nɔɔyʋ. Pɩwɛɛ se sɩɖʋ koobu ewolo ɛ-cɔlɔ nɛ ɛkpaɣ-ɩ nɛ ɛpɩsɩ ɛ-halʋ, nɛ ɛhɔ lelu.+ 6 Kajalaɣ pɩɣa ŋga halʋ ɛnʋ ɛlʋlʋʋ yɔ, kakaɣ kpaɣʋ abalʋ koobu weyi ɛsɩba yɔ ɛ-hɩɖɛ,+ se ɛ-hɩɖɛ ɛtaaɖɩ Izrayɛɛlɩ taa.+

7 «Ɛlɛ ye abalʋ ɛnʋ ɛtɩsɔɔlɩ se ɛkpaɣ e-koobu weyi ɛsɩba yɔ ɛ-halʋ yɔ, pɩwɛɛ se lelu ɛnʋ ewolo tɛtʋ nɔnɔɔ taa ɛzʋtʋyaa cɔlɔ nɛ eheyi-wɛ se: “Ma-walʋ koobu kizaa se ɛɛlakɩ nɛ e-koobu hɩɖɛ ɛtaaɖɩ Izrayɛɛlɩ taa. Etitisi se ɛhɔmɩ-m nɛ manpɩsɩ ɛ-halʋ.” 8 Pʋbʋ lɛ, pɩwɛɛ se ɛ-tɛtʋ taa ɛzʋtʋyaa ɩyaa-ɩ nɛ pɔyɔɔdɩnɩ-ɩ. Ɛlɛ ye ɛtɛm ɛ-taa kpem nɛ ɛyɔɔdɩ se: “Mantɩsɔɔlɩ se mankpaɣ-ɩ halʋ” yɔ, 9 ɖɩnɛ ɛlɛ pɩwɛɛ se e-koobu weyi ɛsɩba yɔ ɛ-halʋ ɛñɔtɩnɩ-ɩ ɛzʋtʋyaa ɛsɩndaa, nɛ ɛhɔzɩ ɛlɛ naataŋgbaɖɛ+ nɛ ɛtɔ ndaatʋ ɛ-ɛsɩndaa nɛ ɛyɔɔdɩ se: “Ɛzʋnɔ pɩwɛɛ se pala abalʋ weyi ɛtɩsɔɔlɩ se ɛɖʋ e-koobu hɔʋ yɔ.” 10 Pʋwayɩ lɛ, hɩɖɛ nɖɩ pakaɣ tɩlɩnʋʋ ɛ-hɔʋ* Izrayɛɛlɩ taa yɔ, nɖɩ lɛ “Abalʋ weyi pɔhɔzɩ ɛ-naataŋgbaɖɛ yɔ ɛ-ɖɩɣa.”

11 «Ye abalaa 2 iyou nɛ pa-taa nɔɔyʋ halʋ wolo se ɛlʋkɩ ɛ-walʋ yɔɔ nɛ ɛlɩzɩ-ɩ abalʋ weyi ɛwɛɛ nɛ ɛmakɩ-ɩ yɔ e-nesi tɛɛ nɛ esezi e-nesi nɛ ekpi abalʋ ɛnʋ ɛ-kaɖɛ ɖeɖe yɔ, 12 pɩwɛɛ se ŋsɛtɩ halʋ ɛnʋ e-nesi. Pɩfɛyɩ se ŋna* ɛ-pʋtɔdɩyɛ.

13 «Pɩfɛyɩ se ŋwɛɛnɩ yuŋ kɩmaɣzɩŋ* ndɩ ndɩ 2 ño-huyuu taa,+ sɔsɔʋ nɛ cikpeluu. 14 Pɩfɛyɩ se ŋwɛɛnɩ ñanzɩ ndɩ ndɩ 2 nzɩ pamaɣzɩɣna yɔ* ña-ɖɩɣa taa,+ ñanaɣ sɔsɔɔ nɛ cikpelaɣ. 15 Yuŋ kɩmaɣzʋʋ ŋgʋ kɩwɛ siɣsiɣ nɛ kɩwɛɛ toovenim yɔ nɛ wondu kɩmaɣzʋʋ ŋgʋ kɩwɛ siɣsiɣ nɛ kɩwɛɛ toovenim yɔ, ŋgʋ pɩwɛɛ se ŋwɛna; ɖɩnɛ ɛlɛ ŋkaɣ caɣʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-taa nɛ pileɖi.+ 16 Mbʋ pʋyɔɔ yɔ ñɛ-Ɛsɔ Yehowa paɖɩɣ ɛyʋ weyi emuluu nɛ ɛlakɩ lakasɩ nzɩ yɔ.+

17 «Tɔzɩ mbʋ Amalɛɛkɩ kaalabɩ-ŋ alɩwaatʋ ndʋ ŋŋlɩnɩ Ejipiti ɛjaɖɛ taa nɛ ŋkɔŋ yɔ pɩ-yɔɔ,+ 18 ɛzɩma ɛkatɩ-ŋ nʋmɔʋ taa alɩwaatʋ ndʋ pɩɩnɩ-ŋ nɛ pɩɖɛ-ŋ siŋŋ nɛ eyooni ñɛ-ɛyaa mba payɩ paawɛ ña-wayɩ nɛ pɔpɔŋʋʋ yɔ. Etise Ɛsɔ sɔɔndʋ. 19 Ñɛ-Ɛsɔ Yehowa yeki nɛ ŋhɛzɩnɩ ño-koyindinaa mba payɩ pɔcɔ-ŋ nɛ pata ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-taa lɛ,+ pɩwɛɛ se ŋhɩzɩ Amalɛɛkɩ hɩɖɛ tɛtʋ kpeekpe yɔɔ.+ Taasɔɔ.

26 «Ŋkɔŋ nɛ ŋsʋʋ ɛjaɖɛ nɖɩ ñɛ-Ɛsɔ Yehowa cɛlɩɣ-ŋ se ɖɩpɩsɩ ña-ñɩm yɔ ɖɩ-taa nɛ ŋmʋ-ɖɩ nɛ ŋcaɣ ɖɩ-taa lɛ, 2 pɩwɛɛ se ŋkpaɣ tɔɔnaɣ* ŋga payɩ tɛtʋ lʋlʋʋ yɔ ka-kajalaɣ pee naayɛ, tɔɔnaɣ ŋga ŋkaɣ kʋm ɛjaɖɛ nɖɩ ñɛ-Ɛsɔ Yehowa cɛlɩɣ-ŋ yɔ ɖɩ-taa yɔ ka-kajalaɣ pee, nɛ ŋɖʋ-yɛ ɖɔkʋ nakʋyʋ taa nɛ ŋwoni lone nɖɩ ɖɩ-taa ñɛ-Ɛsɔ Yehowa lɩzɩɣ se ɛ-hɩɖɛ ɛwɛɛ yɔ ɖɩ-taa.+ 3 Nɛ ŋwolo cɔjɔ weyi ɛkaɣ tʋmɩyɛ labʋ alɩwaatʋ ndʋ tɩ-taa yɔ ɛ-cɔlɔ nɛ ŋheyi-i se: “Sɔnɔ, meheyiɣ ñɛ-Ɛsɔ Yehowa se mansʋ ɛjaɖɛ nɖɩ Yehowa kaaɖuuni ɖɔ-cɔzɔnaa se ɛcɛlɩɣ-ɖʋ yɔ ɖɩ-taa.”+

4 «Ðɩnɛ ɛlɛ cɔjɔ kaɣ mʋʋ ɖɔkʋ ñe-nesi taa nɛ ɛsɩɩ-kʋ ñɛ-Ɛsɔ Yehowa altaaru ɛsɩndaa. 5 Pʋwayɩ lɛ, pɩwɛɛ se ŋyɔɔdɩ ñɛ-Ɛsɔ Yehowa ɛsɩndaa se: “Man-caa kaakɛ Arameya tʋ,+ yotiyu,* eetibi Ejipiti ɛjaɖɛ taa+ nɛ ɛcaɣ ɛgɔndʋ peeɖe, ɛ nɛ ɛyaa pazɩ yem mba ɛɛwɛnɩ ɛ-hɔʋ taa yɔ.+ Ɛlɛ ɛpɩsɩ peeɖe samaɣ sɔsɔɔ, samaɣ ɖoŋ ñɩŋga, nɛ ŋga ka-taa ɛyaa ɖɔ sakɩyɛ yɔ.+ 6 Nɛ Ejipiti mba wɩlɩ-ɖʋ ñaŋ nɛ panazɩ-ɖʋ nɛ paɖʋ-ɖʋ yomaa tʋma kaɖɛ ñɩna.+ 7 Pʋyɔɔ ɖɩpaɣzɩ kubusi mabʋ nɛ ɖɔ-cɔzɔnaa tɛ Ɛsɔ Yehowa cɔlɔ kiŋ, nɛ Yehowa nɩɩ ɖa-taŋ nɛ ɛna ɖa-kʋñɔŋ, ɖa-wɩzasɩ nɛ nazɩm mbʋ pɩ-taa ɖɩɩwɛɛ yɔ.+ 8 Nɛ pɩtɛmna se Yehowa lɩzɩ-ɖʋ Ejipiti, ɛlɩzɩ-ɖʋ nɛ e-nesi ɖoŋ ñɩnzɩ, nɛ e-nesi nzɩ esezaa yɔ,+ nɛ lakasɩ nzɩ sɩcaɣ sɔɔndʋ yɔ, nɛ yʋsasɩ nɛ maamaaci lakasɩ.+ 9 Pʋwayɩ lɛ, ɛkɔnɩ-ɖʋ lone ɖɩnɛ ɖɩ-taa nɛ ɛcɛlɩ-ɖʋ ɛjaɖɛ ɖɩnɛ, ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+ 10 Lɛɛlɛɛyɔ, mɔnkɔnɩ tɛtʋ ndʋ Yehowa ha-m yɔ tɩ-kajalaɣ tɔɔnaɣ pee.”+

«Pɩwɛɛ se ŋsɩɩ ɖɔkʋ ŋgʋ ñɛ-Ɛsɔ Yehowa ɛsɩndaa nɛ ŋluŋ ñɛ-Ɛsɔ Yehowa ɛsɩndaa. 11 Pʋwayɩ lɛ, ŋpɩzɩɣ nɛ ŋnɩɩ leleŋ wondu kɩbandʋ ndʋ payɩ ñɛ-Ɛsɔ Yehowa ha ña nɛ ña-ɖɩɣa taa mba yɔ tɩ-yɔɔ, ña nɛ Leevi tʋ nɛ ɛgɔm weyi ɛwɛ mɩ-hɛkʋ taa yɔ.+

12 «Ŋtɛŋ ñɔ-tɔɔnasɩ hɔɔlʋʋ 10 ñɩŋgʋ tɩŋa kpeɣluu+ pɩnaɣ 3 ñɩŋga, ŋga kɛkɛ hɔɔlʋʋ 10 ñɩŋgʋ pɩnaɣ yɔ ka-taa lɛ, pɩwɛɛ se ŋcɛlɩ-kʋ Leevi tʋ, ɛgɔm, pɩɣa ŋga kɛfɛyɩ caa yɔ* nɛ lelu, nɛ pɔtɔɔ nɛ pahaɣ ñɛ-tɛtʋ ndɩ ndɩ* taa.+ 13 Ðɩnɛ ɛlɛ ŋŋyɔɔdɩ ñɛ-Ɛsɔ Yehowa ɛsɩndaa se: “Malɩzɩ hɔɔlʋʋ kiɖeɖeu man-ɖɩɣa taa nɛ mɛncɛlɩ-kʋ Leevi tʋ, ɛgɔm, pɩɣa ŋga kɛfɛyɩ caa yɔ nɛ lelu,+ ɛzɩ ŋɖʋʋ-m paɣtʋ yɔ. Mantɩmaanɩ ña-paɣtʋ yɔɔ nɛ mantɩla kaakendu tɩ-yɔɔ. 14 Mantɩtɔɔ kɩ-hɔɔlʋʋ nakʋyʋ alɩwaatʋ ndʋ maawɛ kʋñɔwiye taa yɔ nɛ mantɩlɩzɩ kɩ-hɔɔlʋʋ nakʋyʋ alɩwaatʋ ndʋ mantaawɛɛ kele kele yɔ nɛ mantɩha kɩ-hɔɔlʋʋ nakʋyʋ sɩɖaa yɔɔ. Mɛ-Ɛsɔ Yehowa, mañam ñɔ-nɔɔ taa tɔm nɛ mala mbʋ payɩ ŋɖʋ-m paɣtʋ se mala yɔ. 15 Lɛɛlɛɛyɔ, tisi ñɛ-ɛsa nɛ ɛsɔdaa, lone kiɖeɖeye taa ɖenɖe ŋwɛɛ yɔ, nɛ ŋcɔna nɛ ŋwazɩ ña-samaɣ Izrayɛɛlɩ nɛ ɛjaɖɛ nɖɩ ŋha-ɖʋ yɔ,+ ɛzɩ ŋŋɖuunuu ɖɔ-cɔzɔnaa yɔ,+ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.”+

16 «Sɔnɔ, ñɛ-Ɛsɔ Yehowa ɖʋʋ-ŋ paɣtʋ se ŋɖɔ ɖʋtʋ nɛ tɔm hʋʋ paɣtʋ tʋnɛ tɩ-yɔɔ. Pɩwɛɛ se ŋñam-tʋ nɛ ŋɖɔ tɩ-yɔɔ nɛ ña-laŋɩyɛ kpeekpe+ nɛ ña-kalɩzaɣ* kpeekpe. 17 Sɔnɔ, ŋnɩ tɔm ndʋ Yehowa yɔɔdaa se ɛkaɣ pɩsʋʋ ñɛ-Ɛsɔ nɛ pɩwɛɛ se ŋɖɔ ɛ-nʋmɔŋ taa nɛ ŋña ɛ-ɖʋtʋ,+ ɛ-paɣtʋ+ nɛ ɛ-tɔm hʋʋ paɣtʋ+ yɔ, nɛ pɩwɛɛ se ŋwelisi ɛ-nɔɔ taa tɔm yɔ. 18 Nɛ sɔnɔ, Yehowa nɩ tɔm ndʋ ŋyɔɔdaa se ŋkaɣ pɩsʋʋ ɛ-samaɣ, e-ŋgee pʋyʋ,*+ ɛzɩ ɛɛlabʋ-ŋ tamaɣ yɔ; ɛnɩ ɖɔɖɔ tɔm ndʋ ŋyɔɔdaa se ŋkaɣ ɖɔm ɛ-paɣtʋ tɩŋa yɔɔ yɔ, 19 nɛ ɛkaɣ-ŋ kpazʋʋ ajɛɛ lɛɛna wena ɛlɩzaa yɔ a-tɩŋa a-ñʋʋ yɔɔ,+ nɛ pɩkɛnɩ-ŋ samtʋ, hɩɖɛ sɛʋ nɛ hɩɖɛ ɖʋʋ alɩwaatʋ ndʋ ŋwɩlɩɣ se ŋkɛ ñɛ-Ɛsɔ Yehowa samaɣ kiɖeɖeɣa yɔ,+ ɛzɩ ɛlabʋ tamaɣ yɔ.»

27 Pʋwayɩ lɛ Moyizi nɛ Izrayɛɛlɩ ɛzʋtʋyaa paɖʋ paɣtʋ samaɣ, Moyizi heyi-kɛ se: «Ɩɖɔ paɣtʋ ndʋ manɖʋʋ-mɩ sɔnɔ yɔ ti-kpeekpe tɩ-yɔɔ. 2 Nɛ kɩyakʋ ŋgʋ ɩtɛzɩɣ Yɔɔrdaŋ pɔɔ nɛ ɩsʋʋ ɛjaɖɛ nɖɩ mɩ-Ɛsɔ Yehowa cɛlɩɣ-mɩ yɔ ɖɩ-taa lɛ, pɩwɛɛ se isiɣ pɛɛ sɔsɔna nɛ ɩtaa a-yɔɔ pɔlʋʋ.*+ 3 Ɩtɛŋ tɛzʋʋ lɛ, ɩma Paɣtʋ tʋnɛ tɩ-taa tɔm tɩŋa a-yɔɔ, se ɩpɩzɩ nɛ ɩsʋʋ ɛjaɖɛ nɖɩ mɩ-Ɛsɔ Yehowa cɛlɩɣ-mɩ yɔ ɖɩ-taa, ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ, ɛzɩ mɩ-cɔzɔnaa tɛ Ɛsɔ Yehowa kaalabʋ-mɩ tamaɣ yɔ.+ 4 Ɩtɛzɩɣ Yɔɔrdaŋ pɔɔ lɛ, pɩwɛɛ se isiɣ pɛɛ ana Ebaalɩ Pʋʋ yɔɔ+ nɛ ɩtaa a-yɔɔ pɔlʋʋ,* ɛzɩ manɖʋʋ-mɩ paɣtʋ sɔnɔ yɔ. 5 Pɩwɛɛ ɖɔɖɔ se ɩma mɩ-Ɛsɔ Yehowa altaaru nakʋyʋ peeɖe, pɩwɛɛ se pɩkɛnɩ pɛɛ altaaru. Pɩfɛyɩ se ɩlabɩnɩ ñɩɣtʋ wondu natʋyʋ tʋmɩyɛ pɛɛ ana a-yɔɔ.+ 6 Pɛɛ wena awɛ pilim yɔ ana pɩwɛɛ se ɩkpaɣ nɛ ɩmanɩ mɩ-Ɛsɔ Yehowa altaaru nɛ ɩlaa kɩ-yɔɔ kɩlaŋ kɩñaɣzɩŋ mɩ-Ɛsɔ Yehowa. 7 Pɩwɛɛ se ɩlaa laŋhɛzɩyɛ kɩlaŋ+ nɛ ɩtɔɔ-ɩ peeɖe,+ nɛ ɩkaɣ mɛyʋʋ mɩ-Ɛsɔ Yehowa ɛsɩndaa.+ 8 Pɩwɛɛ se ɩma pɛɛ ana a-yɔɔ Paɣtʋ tʋnɛ tɩ-taa tɔm tɩŋa kpayɩ kpayɩ.»+

9 Pʋwayɩ lɛ, Moyizi nɛ cɔjɔnaa Leevi mba pɔyɔɔdɩnɩ Izrayɛɛlɩ mba kpeekpe nɛ peheyi-wɛ se: «Oo Izrayɛɛlɩ, su ɖiɣ ɖiɣ nɛ ŋwelisi. Sɔnɔ, ŋpɩsɩ ñɛ-Ɛsɔ Yehowa samaɣ.+ 10 Pɩwɛɛ se ŋwelisi ñɛ-Ɛsɔ Yehowa nɔɔ taa tɔm nɛ ŋɖɔ ɛ-paɣtʋ+ nɛ ɛ-ɖʋtʋ ndʋ manɖʋʋ-ŋ sɔnɔ yɔ tɩ-yɔɔ.»

11 Puwiye Moyizi ɖʋ paɣtʋ samaɣ nɛ eheyi-kɛ se: 12 «Ɩtɛzɩɣ Yɔɔrdaŋ pɔɔ lɛ, cejewe anɛ akaɣnɩ sɩŋʋʋ Gerizim Pʋʋ+ yɔɔ nɛ awazɩ samaɣ: Siimeyɔɔ, Leevi, Yuuda, Isakaarɩ, Yosɛɛfʋ nɛ Bɛnjamɛɛ. 13 Nɛ cejewe anɛ alɛ kaɣ sɩŋʋʋ Ebaalɩ Pʋʋ+ yɔɔ nɛ alɔ nɔɔ kɩdɛkɛdaɣ: Rubɛɛnɩ, Gaadɩ, Asɛɛrɩ, Zebulɔɔnɩ, Daanɩ nɛ Naftalii. 14 Nɛ Leevi mba kaɣ heyuu Izrayɛɛlɩ mba tɩŋa nɛ nɔɔ kɩkʋyaɣ se:+

15 «“Pɔlɔ nɔɔ kɩdɛkɛdaɣ weyi ɛsakɩ sɩʋ kpeliɣa+ yaa eluki ñɩɣtʋ sɩʋ kpeliɣa*+ nɛ ɛmɛsɩ-kɛ yɔ ɛ-yɔɔ, pɩkɛ mbʋ Yehowa paɖɩɣ yɔ;+ nesi tɛɛ tʋmlaɖʋ* nesi tɛɛ tʋmɩyɛ pɩkɛnaa.” (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”*)

16 «“Pɔlɔ nɔɔ kɩdɛkɛdaɣ weyi eniŋ ɛ-caa yaa e-ɖoo yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

17 «“Pɔlɔ nɔɔ kɩdɛkɛdaɣ weyi etuzuu ɛyʋ lɛlʋ kamaɣ yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

18 «“Pɔlɔ nɔɔ kɩdɛkɛdaɣ weyi ɛlakɩ nɛ yʋlʋm le nʋmɔʋ yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

19 «“Pɔlɔ nɔɔ kɩdɛkɛdaɣ weyi ɛkɛzɩɣ ɛgɔm, pɩɣa ŋga kɛfɛyɩ caa yɔ* yaa lelu+ tɔm tuluŋa tɔm hʋʋ taa yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

20 «“Pɔlɔ nɔɔ kɩdɛkɛdaɣ weyi ɛsʋʋnɩ ɛ-caa halʋ yɔ ɛ-yɔɔ, mbʋ pʋyɔɔ yɔ ɛɖʋʋ ɛ-caa fɛyɛ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

21 «“Pɔlɔ nɔɔ kɩdɛkɛdaɣ weyi ɛsʋʋnɩ kpɩnɛ naɖɩyɛ yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

22 «“Pɔlɔ nɔɔ kɩdɛkɛdaɣ weyi ɛsʋʋnɩ ɛ-kɔɔ yaa e-neu halɩñɩnʋ yɔ ɛ-yɔɔ, paa pɩtɩɩkɛ ɛ-caa pɛlɛ yaa e-ɖoo pɛlɛ yɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

23 «“Pɔlɔ nɔɔ kɩdɛkɛdaɣ weyi ɛsʋʋnɩ ɛ-yɔsɔ yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

24 «“Pɔlɔ nɔɔ kɩdɛkɛdaɣ weyi ɛpabɩɣ ɛyʋ lɛlʋ nɛ ɛkʋ-ɩ yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

25 «“Pɔlɔ nɔɔ kɩdɛkɛdaɣ weyi ɛmʋʋ kʋjɔʋ nakʋyʋ se ɛkʋ ɛyʋ nɔɔyʋ ɖulum* yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

26 «“Pɔlɔ nɔɔ kɩdɛkɛdaɣ weyi ɛɛɖɔkʋʋ Paɣtʋ tʋnɛ tɩ-taa tɔm nɛ ɛɖɔ tɩ-yɔɔ yɔ ɛ-yɔɔ.”+ (Nɛ pɩwɛɛ se samaɣ kpeekpe ecosi nɛ kɔyɔɔdɩ se: “Amɛn!”)

28 «Nɛ ye ŋwelisiɣ ñɛ-Ɛsɔ Yehowa nɔɔ taa tɔm camɩyɛ nɛ ŋɖɔŋ ɛ-paɣtʋ ndʋ manɖʋʋ-ŋ sɔnɔ yɔ tɩ-tɩŋa tɩ-yɔɔ ɖeyi ɖeyi yɔ, paa pɩɩlabɩ ɛzɩma yɔ, ñɛ-Ɛsɔ Yehowa kaɣ-ŋ kpazʋʋ tɛtʋ yɔɔ ajɛɛ lɛɛna kpeekpe ñʋŋ taa.+ 2 Wazasɩ sɩnɛ sɩ-tɩŋa sɩkaɣ ñɔ-yɔɔ kɔm nɛ sɩtalɩ-ŋ,+ mbʋ pʋyɔɔ yɔ ŋwelisiɣ ñɛ-Ɛsɔ Yehowa nɔɔ:

3 «Pakaɣ-ŋ wazʋʋ tɛtʋ taa, nɛ pakaɣ-ŋ wazʋʋ hayɩm taa ɖɔɖɔ.+

4 «Pakaɣ wazʋʋ ñe-piya,+ mbʋ ñɛ-tɛtʋ lʋlʋʋ yɔ, ña-kpɩna piya, ñe-newee nɛ ñe-heɣsi.+

5 «Pakaɣ wazʋʋ ñɔ-ɖɔkʋ+ nɛ ñanaɣ ŋga ka-taa ŋnuutuu mʋlʋm yɔ.+

6 «Pakaɣ-ŋ wazʋʋ alɩwaatʋ ndʋ ŋsʋʋ yɔ, nɛ pakaɣ-ŋ wazʋʋ alɩwaatʋ ndʋ ŋlɩɣ yɔ.

7 «Yehowa kaɣ labʋ nɛ ŋwa ño-koyindinaa mba pakʋyʋʋ ñɔ-yɔɔ yɔ.+ Nʋmɔʋ kʋɖʋmʋʋ taa pakaɣ lɩnʋʋ nɛ pɔkɔɔ ña-wayɩ, ɛlɛ nʋmɔŋ 7 pakaɣ tɩŋʋʋ nɛ pese pɛɖɛɛ.+ 8 Yehowa kaɣ wazʋʋ ño-kpoŋ+ nɛ tʋma wena payɩ ŋlakɩ yɔ; nɛ paa pɩɩlabɩ ɛzɩma yɔ, ñɛ-Ɛsɔ Yehowa kaɣ-ŋ wazʋʋ ɛjaɖɛ nɖɩ ɛcɛlɩɣ-ŋ yɔ ɖɩ-taa. 9 Yehowa kaɣ-ŋ pɩsʋʋ ɛ-samaɣ kiɖeɖeɣa,+ ɛzɩ eeɖuuni-ŋ yɔ,+ mbʋ pʋyɔɔ yɔ ŋtiyele ñɛ-Ɛsɔ Yehowa paɣtʋ yɔɔ ɖɔm nɛ ŋtiyele ɖɔɖɔ ɛ-nʋmɔŋ taa ɖɔm. 10 Tɛtʋ yɔɔ samasɩ kpeekpe kaɣ naʋ se Yehowa hɩɖɛ wɛ ñɔ-yɔɔ,+ nɛ sɩkaɣ-ŋ seu sɔɔndʋ.+

11 «Yehowa kaɣ labʋ nɛ ñe-piya, ña-kpɩna nɛ ña-hayɩm taa tɔɔnaɣ ɖɔɔ sakɩyɛ kʋmmm+ ɛjaɖɛ nɖɩ Yehowa kaaɖuuni ñɔ-cɔzɔnaa se ɛcɛlɩɣ-ŋ yɔ ɖɩ-taa.+ 12 Yehowa kaɣ-ŋ tʋlʋʋ e-kpou kɩbaŋʋ, pʋ-tɔbʋʋ se ɛsɔdaa, nɛ ɛha ñɛ-tɛtʋ tɛʋ kɩ-alɩwaatʋ yɔɔ+ nɛ ɛwazɩ mbʋ payɩ ŋlakɩ yɔ pɩ-yɔɔ. Ŋkaɣ kɩndʋʋ ajɛɛ sakɩyɛ, ɛlɛ ña lɛ pɩɩkaɣ-ŋ pɔzʋʋ se ŋkɩndɩ nɔɔyʋ cɔlɔ.+ 13 Ñɛ-Ɛsɔ Yehowa paɣtʋ ndʋ manɖʋʋ-ŋ sɔnɔ se ŋɖɔkɩ nɛ ŋɖɔ tɩ-yɔɔ yɔ, ye ŋtiyebi-tʋ ñam yɔ, Yehowa kaɣ-ŋ labʋ nɛ ŋpɩsɩ ñʋʋ, pɩtɩkɛ suu; ŋkaɣ wɛʋ ñʋʋ yɔɔ,+ pɩtɩkɛ pɩ-tɛɛ. 14 Paɣtʋ ndʋ manɖʋʋ-ŋ sɔnɔ yɔ, pɩfɛyɩ se ŋyele tɩ-taa natʋyʋ nɛ ŋkpilini nɩwaŋ yɔɔ yaa nɩmɩyɛ yɔɔ,+ nɛ ŋtɩŋ ɛsɔnaa lalaa se ŋsɛɛ-wɛ.+

15 «Ɛlɛ ye ŋtiwelisi ñɛ-Ɛsɔ Yehowa nɔɔ nɛ ŋɖɔ ɛ-kpalɩtʋ nɛ ɛ-paɣtʋ ndʋ manɖʋʋ-ŋ sɔnɔ yɔ tɩ-tɩŋa tɩ-yɔɔ ɖeyi ɖeyi yɔ, nɔɔ kɩdɛkɛdaɣ lɔʋ pʋnɛ pɩtɩŋa pɩkaɣ ñɔ-yɔɔ kɔm nɛ pɩtalɩ-ŋ:+

16 «Pakaɣ lɔʋ nɔɔ kɩdɛkɛdaɣ ñɔ-yɔɔ tɛtʋ taa, nɛ pakaɣ lɔʋ nɔɔ kɩdɛkɛdaɣ ñɔ-yɔɔ hayɩm taa ɖɔɖɔ.+

17 «Pakaɣ lɔʋ nɔɔ kɩdɛkɛdaɣ ñɔ-ɖɔkʋ yɔɔ+ nɛ ñanaɣ ŋga ka-taa ŋnuutuu mʋlʋm yɔ kɔ-yɔɔ.+

18 «Pakaɣ lɔʋ nɔɔ kɩdɛkɛdaɣ ñe-piya yɔɔ,+ mbʋ ñɛ-tɛtʋ lʋlʋʋ yɔ pɩ-yɔɔ, ñe-newee yɔɔ nɛ ñe-heɣsi yɔɔ.+

19 «Pakaɣ lɔʋ nɔɔ kɩdɛkɛdaɣ ñɔ-yɔɔ alɩwaatʋ ndʋ ŋsʋʋ yɔ, nɛ pakaɣ lɔʋ nɔɔ kɩdɛkɛdaɣ ñɔ-yɔɔ alɩwaatʋ ndʋ ŋlɩɣ yɔ.

20 «Yehowa kaɣ lɔʋ ñɔ-yɔɔ nɔɔ kɩdɛkɛdaɣ, eyele nɛ pisidi-ŋ nɛ ɛhɔ ña-nɩŋgbaŋʋʋ, mbʋ payɩ ŋlakɩ yɔ pɩ-taa, pɩkɔɔ nɛ pɩtalɩ alɩwaatʋ ndʋ paɖɩzɩ-ŋ caɣ caɣ nɛ ŋtɛŋɩlɩ lɛɛ lɛɛ yɔ, mbʋ pʋyɔɔ yɔ ŋlabɩ lakasɩ kɩdɛkɛdɩsɩ nɛ ŋlɔ-m.+ 21 Yehowa kaɣ labʋ nɛ kʋdɔŋ ñɔɔnɩ-ŋ, pɩkɔɔ nɛ pɩtalɩ alɩwaatʋ ndʋ ɛɖɩzɩ-ŋ ɛjaɖɛ nɖɩ ŋmʋʋ se ɖɩpɩsɩ ña-ñɩm yɔ ɖɩ-taa yɔ.+ 22 Yehowa kaɣ kɔnʋʋ ñɔ-yɔɔ kpeziwɩlaɣ, ɛkaɣ labʋ nɛ ŋsaa miŋ,+ ñɔ-yɔɔ huu, ŋsaa miŋ kaŋ kaŋ, ɛkaɣ kɔnʋʋ laɣɖɛ ñɔ-yɔɔ,+ ɛla nɛ wɩlɩŋ kpa ñɔ-tɔɔnaɣ nɛ kʋdɔŋ kpa ñɔ-tɔɔnasɩ;+ nɛ pɩtɩŋa mbʋ yɔ pɩkaɣ ña-wayɩ wɛʋ pɩkɔɔ nɛ pɩsɩɩnɩ alɩwaatʋ ndʋ ŋtɛŋɩlaa yɔ. 23 Ɛsɔdaa kaɣ kɛʋ ñɩɣyʋʋ kɩsɛɛmʋʋ ña-ñʋʋ yɔɔ, nɛ tɛtʋ kaɣ kɛʋ ñɩɣtʋ ñɛ-tɛɛ.+ 24 Yehowa kaɣ labʋ nɛ ñɛ-ɛjaɖɛ taa tɛʋ pɩsɩ puuyuu nɛ mʋzʋʋ, nɛ kɩnɩɩ ñɔ-yɔɔ pɩkɔɔ nɛ pɩtalɩ alɩwaatʋ ndʋ paɖɩzɩ-ŋ caɣ caɣ yɔ. 25 Yehowa kaɣ labʋ nɛ ño-koyindinaa wabɩ-ŋ.+ Nʋmɔʋ kʋɖʋmʋʋ taa ŋkaɣ lɩnʋʋ se ŋyooni-wɛ, ɛlɛ nʋmɔŋ 7 ŋkaɣ tɩŋʋʋ nɛ ŋse pɛ-ɛsɩndaa; nɛ ŋkaɣ pɩsʋʋ sɔɔndʋ pʋyʋ tɛtʋ yɔɔ kewiyisi tɩŋa ɛsɩndaa.+ 26 Nɛ ña-sɩɖaa kaɣ pɩsʋʋ tɔɔnaɣ ɛsɔdaa sumasɩ tɩŋa nɛ tɛtʋ yɔɔ kpɩna tɩŋa, nɛ nɔɔyʋ ɛɛkaɣ ɖʋʋ sɔɔndʋ sumasɩ nzɩ yaa kpɩna ana nɛ ɛɖɔɔnɩ-yɛ.+

27 «Yehowa kaɣ kɔnʋʋ ñɔ-yɔɔ Ejipiti mʋya, tɔbʋlutiye, awiza nɛ tɔnʋʋ yɔɔ kʋdɔmɩŋ, nɛ ñɔ-yɔɔ ɛɛkaɣ cɛbʋ. 28 Yehowa kaɣ labʋ nɛ ŋsʋʋ kpaaŋ, ŋyʋlʋmɩ+ nɛ pisidi-ŋ. 29 Ŋkaɣ takʋʋ wɩsɩ kaalaŋa taa ɛzɩ yʋlʋm takʋʋ yɔ,+ nɛ pɩɩkaɣ-ŋ ɖenuu mbʋ payɩ ŋlakɩ yɔ pɩ-taa; pakaɣ-ŋ muluu nɛ pamɩlɩɣ-ŋ paa ɛzɩmtaa, nɛ nɔɔyʋ ɛɛkaɣ ña-ñʋʋ yabʋ.+ 30 Ŋkaɣ pɛlɛ nɔɔyʋ suu, ɛlɛ abalʋ lɛlʋ ɖakɩ-ɩ nɛ ɛsʋʋnɩ-ɩ. Ŋkaɣ ɖɩɣa maʋ, ɛlɛ ŋŋkaɣ ka-taa sʋʋ.+ Ŋkaɣ viiñi tɩŋ sɔʋ, ɛlɛ ŋŋkaɣ i-pee tɔɔʋ.+ 31 Pakaɣ ñɔ-nɔ abalɩñɩnʋ kʋʋ ñɛ-ɛsɩndaa, ɛlɛ ŋŋkaɣ e-colimaɣ nakɛyɛ ɖɩkʋʋ. Pakaɣ mɩlʋʋ ña-kpaŋaɣ ñɛ-ɛsɩndaa, ɛlɛ kaakaɣ pɩsʋʋ ñɔ-cɔlɔ. Pakaɣ ñe-heŋ cɛlʋʋ ño-koyindinaa, ɛlɛ ŋŋkaɣ wɛnʋʋ ñʋʋ yaɖʋ nɔɔyʋ. 32 Ñɛ-ɛsɩndaa pakaɣ cɛlʋʋ ña-pɩyalaa nɛ ñɛ-pɛlaa samaɣ nakɛyɛ,+ nɛ ñe-liu kaɣ wɛʋ tam se ŋɖaɣnɩ-wɛ naʋ, ɛlɛ ŋŋkaɣ wɛnʋʋ ɖoŋ se ŋla nabʋyʋ. 33 Samaɣ ŋga ŋŋsɩŋ-kɛ yɔ, ŋga kaɣnɩ tɔɔʋ mbʋ ñɛ-tɛtʋ lʋlʋʋ yɔ nɛ mbʋ payɩ ŋlakɩ tʋmɩyɛ nɛ ŋhiɣ yɔ;+ nɛ paa ɛzɩmtaa lɛ, pakaɣ-ŋ muluu nɛ ponuuti-ŋ. 34 Mbʋ ñɛ-ɛsa naɣ yɔ pɩkaɣ yebu nɛ ŋsʋʋ kpaaŋ.

35 «Yehowa kaɣ labʋ nɛ mʋya wena awɩɣ siŋŋ nɛ aawaɣ yɔ alɩɩ ña-nʋmbɔla nɛ ña-nɩŋgbanzɩ yɔɔ, awɛɣ kpaɣnɩ ña-naataŋ tɛɛ nɛ pɩkpa ña-ñʋdaka taa. 36 Yehowa kaɣ wonuu ña nɛ wiyaʋ weyi ŋkaɣ sɩʋ se ɛtɔɔ kewiyitu ñɔ-yɔɔ yɔ ɛjaɖɛ nɖɩ ña nɛ ñɔ-cɔzɔnaa ɩtɩtɩlɩ yɔ ɖɩ-taa,+ nɛ ŋkaɣ sɛʋ ɛsɔnaa lalaa peeɖe, ɛsɔnaa mba palabɩnɩ tɩŋ nɛ pɛɛ yɔ.+ 37 Nɛ ŋkaɣ pɩsʋʋ sɔɔndʋ pʋyʋ nɛ mbʋ peniŋ yɔ* nɛ woŋa pʋyʋ samasɩ nzɩ sɩ-taa payɩ Yehowa wokini-ŋ yɔ sɩ-hɛkʋ taa.+

38 «Ŋkaɣ ɖuu ɖomaɣ sakɩyɛ hayɩm taa, ɛlɛ ŋkaɣ kʋm pazɩ yem,+ mbʋ pʋyɔɔ yɔ kudoloŋ kaɣ-kɛ tɔɔʋ. 39 Ŋkaɣ sɔʋ viiñi tɩŋ nɛ ŋhayɩ ɩ-tɛɛ, ɛlɛ ŋŋkaɣ ñɔʋ vɛɛ nɛ ŋŋkaɣ nabʋyʋ koyuu,+ mbʋ pʋyɔɔ yɔ sonzoowa kaɣ i-pee tɩŋa tɔɔʋ. 40 Ŋkaɣ wɛnʋʋ oliivi tɩŋ ñe-egeetiye kpeekpe taa, ɛlɛ ŋŋkaɣ taʋ num, mbʋ pʋyɔɔ yɔ ño-oliivi pee kaɣ tɔʋ. 41 Ŋkaɣ lʋlʋʋ abalɩbiya nɛ halɩbiya, ɛlɛ sɩɩkaɣ kɛʋ ñe-piya tam, mbʋ pʋyɔɔ yɔ pakaɣ-sɩ wonuu yomiye taa.+ 42 Kudoloŋ* kaɣ huu ña-tɩŋ kpeekpe yɔɔ nɛ mbʋ ñɛ-tɛtʋ lʋlʋʋ yɔ pɩtɩŋa pɩ-yɔɔ. 43 Ɛgɔm weyi ɛwɛ mɩ-hɛkʋ taa yɔ, ɛkaɣ wɛʋ nɛ ɛkpaɣ kpaʋ yɔɔ ña-ñʋʋ yɔɔ, ɛlɛ ña lɛ ñɛwɛɣ nɛ ŋtiki tibu yɔɔ. 44 Ɛkaɣ-ŋ kɩndʋʋ, ɛlɛ ña lɛ ŋŋkaɣ pɩzʋʋ nɛ ŋkɩndɩ-ɩ.+ Ɛkaɣ pɩsʋʋ ñʋʋ, ɛlɛ ña lɛ ñakaɣ pɩsʋʋ suu.+

45 «Paa pɩɩlabɩ ɛzɩma yɔ, nɔɔ kɩdɛkɛdaɣ lɔʋ pʋnɛ,+ pi-kpeekpe pɩkaɣ kɔm ñɔ-yɔɔ nɛ pɩɖʋ ña-wayɩ nɛ pihiɣ-ŋ nɛ pɩkɔɔ pɩtalɩ alɩwaatʋ ndʋ paɖɩzɩ-ŋ caɣ caɣ yɔ,+ mbʋ pʋyɔɔ yɔ ŋtiwelisi ñɛ-Ɛsɔ Yehowa nɔɔ taa tɔm nɛ ŋɖɔ ɛ-kpalɩtʋ nɛ ɛ-paɣtʋ ndʋ ɛɖʋ-ŋ yɔ tɩ-yɔɔ.+ 46 Nɛ pɩkaɣ wɛʋ ña nɛ ña-lʋlʋʋ taa mba yɔɔ nɛ pɩkɛ yʋsaɣ nɛ kawɩlaɣ tam,+ 47 mbʋ pʋyɔɔ yɔ ŋtɩsɛɛ ñɛ-Ɛsɔ Yehowa nɛ taa leleŋ nɛ laŋhʋlʋmɩyɛ alɩwaatʋ ndʋ pɩtɩŋa pɩɩtɔyɩnɩ-ŋ yɔ.+ 48 Yehowa kaɣ tiyuu ño-koyindinaa nɛ pɔkɔɔ ña-wayɩ nɛ ŋkaɣ-wɛ lɩm ɖʋʋ+ alɩwaatʋ ndʋ ŋwɛɣ ñɔɔsɩ taa,+ lɔkɔtʋ taa, nɛ alɩwaatʋ ndʋ ŋtɛɖɩɣ wondu kususutu nɛ ŋtɛɖɩɣ ɖɔɖɔ pɩtɩŋa yɔ. Ɛkaɣ tɩnʋʋ sʋʋtʋ ɖaʋ ŋgʋ palabɩnɩ ñɩɣtʋ yɔ ño-pondone yɔɔ nɛ pɩkɔɔ pɩtalɩ alɩwaatʋ ndʋ ɛɖɩzɩ-ŋ caɣ caɣ yɔ.

49 «Yehowa kaɣ kʋsʋʋ ɛjaɖɛ naɖɩyɛ poliŋ taa nɛ ɖɩkɔɔ ña-wayɩ,+ ɖɩlɩɣnɩ tɛtʋ kamaɣ yɔɔ; ɖɩkaɣ tibu ñɔ-yɔɔ tuda ɛzɩ kpeluu* tikuu nabʋyʋ yɔɔ yɔ,+ ɖɩkɛ ɛjaɖɛ nɖɩ ŋŋkaɣ nɩʋ ɖɩ-kʋnʋŋ yɔ,+ 50 ɛjaɖɛ nɖɩ ɖɩcaɣ sɔɔndʋ nɛ ɖɩɩkaɣ ñam akpadɩyʋ nɛ ɖɩɩkaɣ naʋ evebu pʋtɔdɩyɛ yɔ.+ 51 Pakaɣ tɔɔʋ ña-kpɩna piya nɛ mbʋ ñɛ-tɛtʋ lʋlʋʋ yɔ, nɛ pɩkɔɔ nɛ pɩtalɩ alɩwaatʋ ndʋ paɖɩzɩ-ŋ caɣ caɣ yɔ. Paakaɣ-ŋ kazʋʋ paa tɔɔnaɣ piye yaa vɛɛ kɩfalʋʋ yaa num yaa neɣye yaa heɣa, pɩkɔɔ pɩtalɩ alɩwaatʋ ndʋ paɖɩzɩ-ŋ yɔ.+ 52 Pakaɣ-ŋ cɔʋ nɛ pata, pakaɣ-ŋ ɖɩɣʋ ñɛ-tɛtʋ ndɩ ndɩ* tɩŋa taa ñɛ-ɛjaɖɛ kpeekpe taa nɛ pɩkɔɔ pɩtalɩ alɩwaatʋ ndʋ ño-kolonzi kʋkʋyɩsɩ ɖoŋ ñɩnzɩ nzɩ ŋtaɣ-sɩ liu yɔ sɩtɔlaa yɔ. Toovenim taa lɛ, pakaɣ-ŋ cɔʋ nɛ pata ñɛ-tɛtʋ ndɩ ndɩ tɩŋa taa, ɛjaɖɛ nɖɩ ñɛ-Ɛsɔ Yehowa cɛlɩ-ŋ yɔ ɖi-kpeekpe ɖɩ-taa.+ 53 Ðɩnɛ ɛlɛ, ŋkaɣ tɔɔʋ ña-maɣmaɣ ñe-piya, ña-pɩyalaa nɛ ñɛ-pɛlaa+ mba ñɛ-Ɛsɔ Yehowa ha-ŋ yɔ pa-nandʋ, mbʋ pʋyɔɔ yɔ pɔcɔʋ-ŋ cɔʋ mbʋ yɔ pɩwɛɣ kaɖɛ kpem, nɛ ño-koyindu kaɣ-ŋ kʋñɔŋ wɩlʋʋ siŋŋ.

54 «Halɩ mɩ-taa abalʋ weyi ɛwɛnɩ hɛɛɛ wɛtʋ nɛ pɩkɩlɩ nɛ ɛcakɩ leleŋ nɩʋ wezuu yɔ, ɛɛkaɣ naʋ e-koobu yaa ɛ-halʋ kʋsɔɔlʋ yaa ɛ-pɩyalaa mba pakazaa yɔ pa-pʋtɔdɩyɛ kaaʋ, 55 nɛ ɛɛkaɣ-wɛ haʋ ɛ-pɩyalaa nandʋ ndʋ ɛtɔkɩ yɔ tɩ-taa natʋyʋ, mbʋ pʋyɔɔ yɔ ɛɛtasɩɣ wɛnʋʋ nabʋyʋ, mbʋ pʋyɔɔ yɔ pɔcɔʋ-ŋ cɔʋ mbʋ yɔ pɩwɛɣ kaɖɛ kpem nɛ ño-koyindu kaɣ ñɛ-tɛtʋ ndɩ ndɩ kʋñɔŋ wɩlʋʋ siŋŋ.+ 56 Nɛ mɩ-taa halʋ weyi ɛwɛnɩ hɛɛɛ wɛtʋ nɛ ɛcakɩ leleŋ nɩʋ wezuu, nɛ halɩ ɛ-hɛɛɛ wɛtʋ ndʋ tɩ-yɔɔ lɛ, ɛtɩmaɣzɩ wiɖiyi kaaʋ se ɛfɛyɩɣ ɛ-naatalʋʋ tataa yɔ,+ ɛɛkaɣ naʋ ɛ-walʋ kʋsɔɔlʋ yaa ɛ-pɩyalʋ yaa ɛ-pɛlɛ pʋtɔdɩyɛ kaaʋ, 57 nɛ halɩ ɛɛkaɣ naʋ sɔndʋ ndʋ tɩlɩɣnɩ e-yoo hɛkʋ taa yɔ* tɩ-pʋtɔdɩyɛ nɛ ɛɛkaɣ naʋ piya nzɩ ɛlʋlaa yɔ sɩ-pʋtɔdɩyɛ, mbʋ pʋyɔɔ yɔ ɛkaɣ-sɩ tɔɔʋ mɛsaɣ tɛɛ, mbʋ pʋyɔɔ yɔ pɔcɔʋ-ŋ cɔʋ mbʋ yɔ pɩwɛɣ kaɖɛ kpem, nɛ ño-koyindu kaɣ ñɛ-tɛtʋ ndɩ ndɩ kʋñɔŋ wɩlʋʋ siŋŋ.

58 «Ye ŋtɩɖɔ Paɣtʋ tʋnɛ tɩ-taa tɔm ndʋ payɩ pama takayaɣ kanɛ ka-taa yɔ tɩ-yɔɔ ɖeyi ɖeyi+ nɛ ye ŋtɩña hɩɖɛ sɔsɔɖɛ ɖɩnɛ, nɖɩ ɖɩcaɣ sɔɔndʋ yɔ,+ pʋ-tɔbʋʋ se ñɛ-Ɛsɔ Yehowa hɩɖɛ+ yɔ, 59 Yehowa kaɣ kɔnʋʋ asɛyɩŋ kaɖɛ ñɩŋ ña nɛ ña-lʋlʋʋ taa mba yɔɔ, asɛyɩŋ sɔsɔŋ weyi ɩkaɣ wɛʋ nɛ pileɖi yɔ,+ nɛ kʋdɔmɩŋ sɔsɔŋ weyi ɩɩkaɣ waʋ lɔŋ yɔ. 60 Ɛkaɣ pɩsɩnʋʋ ñɔ-yɔɔ Ejipiti kʋdɔmɩŋ weyi ŋseɣaɣ sɔɔndʋ yɔ i-kpeekpe, nɛ paa pɩɩlabɩ ɛzɩma yɔ ɩkaɣ-ŋ ñɔnʋʋ. 61 Pɩtasɩ lɛ, halɩ Yehowa kaɣ kɔnʋʋ ñɔ-yɔɔ kʋdɔmɩŋ nɛ asɛyɩŋ weyi payɩ patɩma ɩ-tɔm Paɣtʋ tʋnɛ tɩ-takayaɣ taa yɔ, nɛ pɩkɔɔ pɩtalɩ alɩwaatʋ ndʋ paɖɩzɩ-ŋ caɣ caɣ yɔ. 62 Paa ɩɩɖɔwa ɛzɩ ɛsɔdaa tɩɩnzɩ yɔ,+ mɩ-taa ɛyaa pazɩ yem kaɣnɩ kazʋʋ,+ mbʋ pʋyɔɔ yɔ itiwelisi mɩ-Ɛsɔ Yehowa nɔɔ taa tɔm.

63 «Ɛzɩ Yehowa taa kaalabʋ leleŋ se ɛlakɩ nɛ piɖeni-mɩ nɛ eyele nɛ ihuu yɔ, mbʋ ɖɔɖɔ Yehowa taa kaɣ labʋ leleŋ se ɛɖɩzɩ-mɩ nɛ eyele nɛ ɩtɛŋɩlɩ caɣ caɣ; nɛ pakaɣ-mɩ kpɛzʋʋ ɛjaɖɛ nɖɩ ɩcaɣ mʋʋ se ɖɩpɩsɩ mɩ-ñɩm yɔ ɖɩ-taa.

64 «Yehowa kaɣ-ŋ mɩzʋʋ ajɛɛ kpeekpe taa, kpaɣnɩ tɛtʋ kamaɣ yɔɔ nɛ piwolo tɛtʋ kamaɣ lɛɛka yɔɔ,+ nɛ ŋkaɣ sɛʋ ɛsɔnaa mba palabɩnɩ tɩŋ nɛ pɛɛ yɔ peeɖe, ɛsɔnaa mba ña nɛ ñɔ-cɔzɔnaa ɩtɩtɩlɩ yɔ.+ 65 Ŋŋkaɣ hiɣu laŋhɛzɩyɛ ajɛɛ ana a-taa kaaʋ+ nɛ ŋŋkaɣ wɛnʋʋ ɖɔɖɔ ɖenɖe ŋfɛyɩ ña-naatalʋʋ yɔ. Ɛlɛ laŋɩyɛ nɖɩ ɖɩnɩɣzɩɣ yɔ Yehowa kaɣ-ŋ haʋ peeɖe+ nɛ ɛha-ŋ ɖɔɖɔ ɛsa wena pɩnɩ-yɛ yɔ nɛ eyele nɛ ŋlɔ lidaʋ.*+ 66 Ñe-wezuu kaɣ wɛʋ kaɖɛ sɔsɔɖɛ taa, sɔɔndʋ taa ŋkaɣ wɛʋ ɖoo nɛ wɩsɩ; nɛ ŋŋkaɣ ɖiɣzinuu se ŋhikiɣ ñʋʋ yabʋ yaa ŋŋhikiɣ. 67 Sɔɔndʋ ndʋ tɩkaɣ wɛʋ ña-laŋɩyɛ taa yɔ nɛ mbʋ ñɛ-ɛsa kaɣ naʋ yɔ pʋyɔɔ lɛ, tanaŋ tɛɛ lɛ ŋkaɣ yɔɔdʋʋ se: “Ɛbɛ kaalaba se ɖanaɣ tɛm ɖanʋʋ!” nɛ ɖanaɣ lɛ ŋkaɣ yɔɔdʋʋ se: “Ɛbɛ kaalaba se tɛʋ tɛm fem!” 68 Nɛ paa pɩɩlabɩ ɛzɩma yɔ, Yehowa kaɣ-ŋ sʋzʋʋ mɛlɛ nɛ ɛpɩsɩnɩ-ŋ Ejipiti, ɛtɩŋɩɣnɩ-ŋ nʋmɔʋ ŋgʋ kɩ-tɔm maaheyi-ŋ se: “Ŋŋkaɣ-kʋ tasʋʋ naʋ wiɖiyi” yɔ, nɛ ŋkaɣ ña-tɩ pɛdɩnʋʋ ño-koyindinaa peeɖe se payabɩ-ŋ nɛ ŋpɩsɩ yom, ɛlɛ nɔɔyʋ ɛɛkaɣ-ŋ yabʋ.»

29 Ɛgbɛyɛ nɖɩ Yehowa ɖʋ paɣtʋ Moyizi se ɛɖʋnɩ Izrayɛɛlɩ samaɣ Mowaabʋ ɛjaɖɛ taa, pɩtasɩnɩ ɛgbɛyɛ nɖɩ ɛɛɖʋnɩ-wɛ Orɛɛbʋ yɔ, ɖɩ-taa tɔm yɔ.+

2 Nɛ Moyizi kpeɣli Izrayɛɛlɩ samaɣ kpeekpe nɛ eheyi-kɛ se: «Ɩna mbʋ payɩ Yehowa labɩ mɩ-ɛsɩndaa Farawɔɔ nɛ ɛ-lɩmɖʋyaa tɩŋa nɛ ɛ-tɛtʋ kpeekpe Ejipiti ɛjaɖɛ taa yɔ,+ 3 nɩŋgbaŋʋʋ hɔm* sɔsɔm mbʋ ɩnanɩ mɩ-ɛsa yɔ, yʋsasɩ sɔsɔsɩ nzɩ nɛ maamaaci lakasɩ sɔsɔsɩ nzɩ.+ 4 Ɛlɛ Yehowa tɩha-mɩ laŋɩyɛ se ɩnɩɩ tɔm taa, nɛ ɛsa se ɩna, nɛ nɩŋgbaaŋ se ɩnɩɩ, pɩkɔɔ nɛ pɩtalɩ sɔnɔ kɩyakʋ kʋnɛ.+ 5 “Alɩwaatʋ ndʋ menɖiyaɣ-mɩ kañɩmbusuu taa pɩnzɩ 40 yɔ,+ mi-wondu tɩcɩyɩ nɛ mɩ-naataŋgbala tɩtɛ.+ 6 Ɩtɩtɔɔ kpɔnɔ, nɛ ɩtɩñɔɔ vɛɛ yaa sʋlʋm mbʋ payɩ pɩkʋʋ ɛyʋ yɔ, se pɩsa nɛ ɩtɩlɩ se mɛkɛnɩ mɩ-Ɛsɔ Yehowa.” 7 Pʋwayɩ lɛ ɩkɔɔ nɛ ɩtalɩ lone ɖɩnɛ ɖɩ-taa, nɛ Hɛsɩbɔɔnɩ+ wiyaʋ Sihɔɔnɩ nɛ Basaanɩ+ wiyaʋ Oogi palɩɩ nɛ poyooni-ɖʋ, ɛlɛ ɖɩwabɩ-wɛ.+ 8 Pʋwayɩ lɛ, ɖɩmʋ pɛ-tɛtʋ nɛ ɖɩcɛlɩ-tʋ Rubɛɛnɩ mba, Gaadɩ mba nɛ Manaasee cejewiye hɔɔlʋʋ nɛ tɩpɩsɩ pa-ñɩm.+ 9 Pʋyɔɔ lɛ, ɩɖɔ ɛgbɛyɛ ɖɩnɛ ɖɩ-tɔm yɔɔ nɛ ɩñam-tʋ, se pɩsa nɛ mbʋ payɩ ɩlakɩ yɔ pɩɖɔ camɩyɛ.+

10 «Mɩ-tɩŋa ɩsɩŋ mɩ-Ɛsɔ Yehowa ɛsɩndaa sɔnɔ, mi-cejewe ñʋndɩnaa, mɩ-ɛzʋtʋyaa, mɩ-kaɖɩsɩ, Izrayɛɛlɩ abalaa tɩŋa, 11 mi-piya, mɩ-halaa+ nɛ ɛgɔm+ weyi ɛwɛ mi-ɖigbeɣliye* taa yɔ, kpaɣnɩ weyi ɛcaɣ-mɩ ɖasɩ yɔ nɛ piwolo weyi eluu-mɩ lɩm yɔ. 12 Ɩwɛ cɩnɛ se ɩsʋʋ mɩ-Ɛsɔ Yehowa ɛgbɛyɛ nɛ e-ɖuutu taa, ɛgbɛyɛ nɖɩ mɩ-Ɛsɔ Yehowa wɛɛ nɛ ɛɖʋʋnɩ-mɩ sɔnɔ yɔ+ 13 se pɩsa nɛ ɛlɩzɩ-mɩ sɔnɔ nɛ ɩkɛ ɛ-samaɣ+ nɛ ɛnʋ kɛ mɩ-Ɛsɔ,+ ɛzɩ ɛɛlabʋ-mɩ tamaɣ yɔ nɛ ɛzɩ eeɖuunuu mɩ-cɔzɔnaa Abraham,+ Izaakɩ+ nɛ Yakɔɔb+ yɔ.

14 «Ɛlɛ, pɩtɩkɛ mi-ɖeke mantɩŋɩɣnɩ ɖuutu yɔɔ nɛ manɖʋʋnɩ ɛgbɛyɛ ɖɩnɛ, 15 ɛlɛ manɖʋʋ-ɖɩ nɛ mba ɖa nɛ wɛ ɖɩsɩŋ cɩnɛ sɔnɔ ɖɛ-Ɛsɔ Yehowa ɛsɩndaa yɔ nɛ mba pɛfɛyɩ ɖɔ-cɔlɔ cɩnɛ sɔnɔ yɔ. 16 (Mbʋ pʋyɔɔ yɔ ɩsɩm camɩyɛ wezuu ŋgʋ ɖɩɩcaɣ Ejipiti ɛjaɖɛ taa yɔ nɛ ɛzɩma ɖɩtɩŋnɩ ajɛɛ ndɩ ndɩ taa ɖa-nʋmɔʋ ɖɔm taa yɔ.+ 17 Nɛ ɩnaɣaɣ a-kʋzɔɔtʋ lakasɩ nɛ a-sɩʋ kpelisi nzɩ sɩcaɣ kiniŋ*+ nɛ sɩwɛɛ a-hɛkʋ taa yɔ, nzɩ palabɩnɩ tɩŋ nɛ pɛɛ, liidiye nɛ sika yɔ.) 18 Ɩkpa mɩ-tɩ nɛ pataana sɔnɔ mɩ-hɛkʋ taa abalʋ nɔɔyʋ yaa halʋ nɔɔyʋ yaa hɔʋ nakʋyʋ yaa cejewiye naɖɩyɛ nɖɩ ɖɩhaɣ siɣye* ɖɛ-Ɛsɔ Yehowa nɛ ɖɩɖɛɛ nɛ ɖɩsɛɛ ajɛɛ ana a-ɛsɔnaa yɔ,+ ɩkpa mɩ-tɩ nɛ pataana mɩ-hɛkʋ taa liɖe naɖɩyɛ nɖɩ ɖɩlʋlʋʋ pee wena awɛ sɔtʋ yaa ɖɩyɛzɩɣ tɩʋ ŋgʋ kɩwɛ ñaŋ yɔ.+

19 «Ɛlɛ ye nɔɔyʋ ɛnɩ ɖuutu tʋnɛ tɩ-taa tɔm nɛ paa mbʋ yɔ ɛkpazɩɣ ɛ-tɩ nɛ ɛyɔɔdʋʋ ɛ-laŋɩyɛ taa se: “Paa mɛntɛm man-taa nɛ mɔnɖɔŋ nʋmɔŋ weyi ma-laŋɩyɛ wɩlɩɣ-m yɔ ɩ-taa yɔ mankaɣ hiɣu laŋhɛzɩyɛ,” nɛ ɛwɛɛkɩɣ pɩtɩŋa* ɛ-nʋmɔʋ taa yɔ, 20 Yehowa ɛɛkaɣ-ɩ kpeɣu.+ Ɛlɛ Yehowa kaɣ pana kɔʋ siŋŋ nɛ ɛyʋ ɛnʋ, nɛ paa pɩɩlabɩ ɛzɩma yɔ nɔɔ kɩdɛkɛdaɣ lɔʋ mbʋ payɩ pama takayaɣ kanɛ ka-taa yɔ pɩkaɣ kɔm ɛ-yɔɔ,+ nɛ paa pɩɩlabɩ ɛzɩma yɔ Yehowa kaɣ ɛ-hɩɖɛ hɩzʋʋ tɛtʋ kpeekpe yɔɔ. 21 Yehowa kaɣ-ɩ lɩzʋʋ kɩjaʋ Izrayɛɛlɩ cejewe kpeekpe taa nɛ ɛkɔnɩ asɛyʋʋ ɛ-yɔɔ nɛ pɩla nɔɔ kʋɖʋmaɣ nɛ ɛgbɛyɛ ɖʋʋ nɔɔ kɩdɛkɛdaɣ lɔʋ mbʋ payɩ pama Paɣtʋ takayaɣ kanɛ ka-taa yɔ.

22 «Alɩwaatʋ ndʋ mɩ-pɩyalaa kpaɖʋʋ ŋgʋ kɩkaɣ kɔm cee wayɩ yɔ nɛ agɔma mba palɩɣnɩ poliŋ ɛjaɖɛ naɖɩyɛ taa yɔ panaɣ ɛjaɖɛ ɖɩnɛ ɖɩ-asɛyɩŋ, kʋdɔmɩŋ weyi Yehowa kɔnɩ ɖɩ-yɔɔ yɔ lɛ— 23 tɩm nɛ ɖɔm nɛ miŋ, nɛ paakaɣ pɩzʋʋ nɛ poɖuu nabʋyʋ ɖɩ-tɛtʋ yɔɔ nɛ nabʋyʋ ɛɛkaɣ ñɔʋ, nɛ ñɩtʋ natʋyʋ ɖɔɖɔ ɛɛkaɣ ñɔʋ nɛ tɛtɛɛ, ɛzɩ paaɖɩzʋʋ Sodom nɛ Gomɔɔrɩ,+ Admaa nɛ Zebooyim+ yɔ, tɛtʋ ndʋ Yehowa ɖɩzɩ ɛ-pana taa nɛ ɛ-hɔpɩsɩyɛ taa yɔ— 24 pa nɛ ajɛɛ kpeekpe pakaɣ pɔzʋʋ se: “Ɛbɛ yɔɔ Yehowa labɩ ɛjaɖɛ ɖɩnɛ mbʋ?+ Ɛbɛ kɔnɩ pana sɔsɔna anɛ mbʋ?” 25 Ðɩnɛ ɛlɛ pakaɣ-wɛ cosuu se: “Mbʋ pʋyɔɔ yɔ pɛcɛbɩ pɔ-cɔzɔnaa tɛ Ɛsɔ Yehowa ɛgbɛyɛ+ nɖɩ ɛɖʋnɩ-wɛ alɩwaatʋ ndʋ ɛlɩzɩ-wɛ Ejipiti ɛjaɖɛ taa yɔ.+ 26 Powoba nɛ pɛsɛɛ ɛsɔnaa lalaa nɛ poluŋ pɛ-tɛɛ, ɛsɔnaa mba patɩtɩlɩ nɛ ɛtɩha-wɛ nʋmɔʋ se pɛsɛɛ yɔ.+ 27 Nɛ Yehowa kɔ pana siŋŋ nɛ ɛjaɖɛ nɖɩ, nɛ ɛkɔnɩ ɖɩ-yɔɔ nɔɔ kɩdɛkɛdaɣ lɔʋ mbʋ payɩ pama takayaɣ kanɛ ka-taa yɔ.+ 28 Pʋyɔɔ Yehowa kpɛzɩ-wɛ pɛ-tɛtʋ yɔɔ ɛ-pana taa+ nɛ ɛ-hɔpɩsɩyɛ nɛ ɛ-ɖɩwɩzɩyɛ sɔsɔɖɛ taa nɛ ewoni-wɛ ɛjaɖɛ lɛɛɖɛ taa, ɖenɖe pɛwɛ sɔnɔ yɔ.”+

29 «Ðɛ-Ɛsɔ Yehowa tɩnɩ mbʋ pɛmɛsaa yɔ,+ ɛlɛ ɖa nɛ ɖa-lʋlʋʋ taa mba ɖatɩnɩ mbʋ pokuli pɩ-yɔɔ yɔ tam, se pɩsa nɛ ɖɩɖɔ Paɣtʋ tʋnɛ tɩ-tɔm kpeekpe yɔɔ.+

30 «Alɩwaatʋ ndʋ tɔm ndʋ tɩ-tɩŋa payɩ tɩkɔŋ mɩ-yɔɔ yɔ, wazaɣ nɛ nɔɔ kɩdɛkɛdaɣ lɔʋ mbʋ manɖʋ mɩ-ɛsɩndaa yɔ,+ nɛ ɩtɔzɩ pɩ-yɔɔ*+ ajɛɛ wena a-taa payɩ mɩ-Ɛsɔ Yehowa mɩzɩ-mɩ yɔ,+ 2 nɛ mɩ nɛ mɩ-pɩyalaa ɩpɩsɩnɩ mɩ-Ɛsɔ Yehowa yɔɔ+ nɛ iwelisi ɛ-nɔɔ taa tɔm, nɛ mɩ-laŋɩyɛ kpeekpe nɛ mɩ-kalɩzaɣ* kpeekpe,+ ɛzɩ manɖʋʋ-mɩ paɣtʋ sɔnɔ yɔ lɛ, 3 ɖɩnɛ ɛlɛ, mɩ-Ɛsɔ Yehowa kaɣ pɩsɩnʋʋ mi-yomaa+ nɛ ɛna mɩ-pʋtɔdɩyɛ+ nɛ ɛɖaɣnɩ-mɩ ketuu nɛ samasɩ nzɩ payɩ sɩ-taa mɩ-Ɛsɔ Yehowa kaamɩzɩ-mɩ yɔ.+ 4 Paa mɩ-samaɣ ɛmɩzaa nɛ katalɩ ɛsɔdaa kamaɣ yɔɔ yɔ, mɩ-Ɛsɔ Yehowa kaɣ-mɩ ketuu nɛ peeɖe nɛ ɛpɩsɩnɩ-mɩ.+ 5 Mɩ-Ɛsɔ Yehowa kaɣ-mɩ kɔnʋʋ ɛjaɖɛ nɖɩ mɩ-caanaa kaamʋwa yɔ ɖɩ-taa nɛ ɩmʋ-ɖɩ nɛ ɖɩpɩsɩ mɩ-ñɩm; nɛ ɛkaɣ labʋ nɛ piɖeni-mɩ nɛ ihuu nɛ pɩkɩlɩ mɩ-caanaa.+ 6 Mɩ-Ɛsɔ Yehowa kaɣ pɩsʋʋ mɩ nɛ mɩ-lʋlʋʋ taa mba mɩ-laŋa kele kele,*+ nɛ ɩsɔɔlɩ mɩ-Ɛsɔ Yehowa nɛ mɩ-laŋɩyɛ kpeekpe nɛ mɩ-kalɩzaɣ* kpeekpe nɛ ɩcaɣ wezuu.+ 7 Ðɩnɛ ɛlɛ mɩ-Ɛsɔ Yehowa kaɣ kɔnʋʋ nɔɔ kɩdɛkɛdaɣ lɔʋ mbʋ pi-kpeekpe mi-koyindinaa mba papaɖɩ-mɩ nɛ panazɩ-mɩ yɔ pɔ-yɔɔ.+

8 «Ðɩnɛ ɛlɛ ɩkaɣ pɩsʋʋ nɛ iwelisi Yehowa nɔɔ taa tɔm nɛ ɩɖɔ ɛ-paɣtʋ ndʋ payɩ manɖʋʋ-mɩ sɔnɔ yɔ tɩ-yɔɔ. 9 Mɩ-Ɛsɔ Yehowa kaɣ labʋ nɛ pɩɖɔmnɩ-mɩ camɩyɛ kpem mbʋ payɩ ɩlakɩ yɔ pɩ-taa,+ eyeki nɛ mi-piya, mɩ-kpɩna nɛ tɔɔnaɣ ŋga mɩ-tɛtʋ lʋlʋʋ yɔ pɩtɩŋa pihuu; mbʋ pʋyɔɔ yɔ Yehowa taa kaɣ tasʋʋ labʋ leleŋ se eyele nɛ pɩɖɔmnɩ-mɩ camɩyɛ, ɛzɩ ɛ-taa kaalabʋ leleŋ nɛ mɩ-cɔzɔnaa yɔ.+ 10 Mbʋ pʋyɔɔ yɔ alɩwaatʋ ndʋ lɛ, ɩkaɣ welisuu mɩ-Ɛsɔ Yehowa nɔɔ taa tɔm nɛ ɩɖɔ ɛ-paɣtʋ nɛ ɛ-ɖʋtʋ ndʋ pama Paɣtʋ takayaɣ kanɛ ka-taa yɔ tɩ-yɔɔ, nɛ ɩkaɣ pɩsʋʋ mɩ-Ɛsɔ Yehowa cɔlɔ nɛ mɩ-laŋɩyɛ kpeekpe nɛ mɩ-kalɩzaɣ* kpeekpe.+

11 «Paɣtʋ tʋnɛ, ndʋ manɖʋʋ-ŋ sɔnɔ yɔ, tɩtɩkɩlɩ-ŋ kaɖɛ, nɛ tɩfɛyɩ ɖɔɖɔ ɖooo poliŋ taa.*+ 12 Pɩtɩkɛ ɛsɔdaa tɩwɛɛ se ŋŋyɔɔdɩ se: “Akaɣ kpaʋ ɛsɔdaa nɛ ɛkɔnɩ-ɖʋ tʋ nɛ ɖiwelisi-tʋ nɛ ɖɩñam-tʋ?”+ 13 Nɛ tɩfɛyɩ ɖɔɖɔ teŋgu nɛ wayɩ se ŋŋyɔɔdɩ se: “Akaɣ tɛzʋʋ teŋgu nɛ wayɩ nɛ ɛkɔnɩ-ɖʋ tʋ nɛ ɖiwelisi-tʋ nɛ ɖɩñam-tʋ?” 14 Mbʋ pʋyɔɔ yɔ tɔm ndʋ tɩwɛ ñɔ-cɔlɔ kpam, tɩwɛ ñɔ-nɔɔ taa nɛ ña-laŋɩyɛ taa+ se ŋɖɔ tɩ-yɔɔ.+

15 «Na, sɔnɔ, mansɩɣ ñɛ-ɛsɩndaa wezuu nɛ mbʋ pɩwɛ ɖeu yɔ, nɛ sɩm nɛ mbʋ pɩfɛyɩ ɖeu yɔ.+ 16 Ye ŋwelisi ñɛ-Ɛsɔ Yehowa paɣtʋ ndʋ manɖʋʋ-ŋ sɔnɔ yɔ, nɛ ŋsɔɔlɩ ñɛ-Ɛsɔ Yehowa+ nɛ ŋɖɔ ɛ-nʋmɔŋ taa nɛ ŋɖɔkɩ ɛ-paɣtʋ nɛ ɛ-ɖʋtʋ nɛ ɛ-tɔm hʋʋ paɣtʋ yɔ, ɖɩnɛ ɛlɛ ŋkaɣ wezuu caɣʋ+ nɛ ŋhuu, nɛ ñɛ-Ɛsɔ Yehowa kaɣ-ŋ wazʋʋ ɛjaɖɛ nɖɩ ŋwoki se ŋmʋ-ɖɩ yɔ ɖɩ-taa.+

17 «Ɛlɛ ye ña-laŋɩyɛ ɛhɛyɩ nʋmɔʋ+ nɛ ŋtiwelisi nɛ pipeɣzi-ŋ nɛ ŋluŋ ɛsɔnaa lalaa tɛɛ nɛ ŋsɛɛ-wɛ yɔ,+ 18 meheyiɣ-ŋ sɔnɔ se paa pɩɩlabɩ ɛzɩma yɔ, ŋkaɣ tɛŋɩlʋʋ.+ Ŋŋkaɣ caɣʋ wezuu nɛ pileɖi ɛjaɖɛ nɖɩ ŋtɛzɩɣ Yɔɔrdaŋ pɔɔ se ŋmʋ-ɖɩ yɔ ɖɩ-taa. 19 Mankpakɩɣ ɛsɔdaa nɛ tɛtʋ aseɣɖe tɩnaa ñɔ-yɔɔ sɔnɔ se mansɩ wezuu nɛ sɩm ñɛ-ɛsɩndaa, wazaɣ nɛ nɔɔ kɩdɛkɛdaɣ lɔʋ;+ nɛ pɩwɛɛ se ŋlɩzɩ wezuu nɛ ŋpɩzɩ nɛ ŋcaɣ wezuu,+ ña nɛ ña-lʋlʋʋ taa mba;+ 20 pʋyɔɔ lɛ sɔɔlɩ ñɛ-Ɛsɔ Yehowa,+ welisi ɛ-nɔɔ taa tɔm nɛ ŋñɔɔnɩ-ɩ cɩŋ cɩŋ,+ mbʋ pʋyɔɔ yɔ ɛnʋ kɛnɩ ñe-wezuu nɛ ɛnʋ kaɣnɩ yebu nɛ ŋcaɣ wezuu nɛ pileɖi ɛjaɖɛ nɖɩ Yehowa ɖuwaa se ɛcɛlɩɣ ñɔ-cɔzɔnaa Abraham, Izaakɩ nɛ Yakɔɔb yɔ ɖɩ-taa.»+

31 Pʋwayɩ lɛ, Moyizi lɩɩ nɛ eheyi tɔm tʋnɛ Izrayɛɛlɩ mba kpeekpe, 2 eheyi-wɛ se: «Mɛwɛnɩ pɩnzɩ 120 sɔnɔ.+ Maapɩzɩɣ nɛ mantasɩ-mɩ ɖiyuu,* mbʋ pʋyɔɔ yɔ Yehowa heyi-m se: “Ŋŋkaɣ tɛzʋʋ Yɔɔrdaŋ pɔɔ kanɛ yɔ.”+ 3 Mɩ-Ɛsɔ Yehowa ɖɛɣnɩ mɩ-nɔɔ nɛ ɩtɛzɩ, nɛ ɛ-maɣmaɣ ɛkaɣnɩ ɖɩzʋʋ ajɛɛ ana mɩ-ɛsɩndaa, nɛ ɩkaɣ-yɛ ɖɔɔnʋʋ.+ Yozuwee kaɣnɩ-mɩ ɖiyuu nɛ ɩtɛzɩ,+ ɛzɩ Yehowa yɔɔdʋʋ yɔ. 4 Yehowa kaɣ-yɛ labʋ ɛzɩ ɛɛlabʋ Amoori mba awiya Sihɔɔnɩ+ nɛ Oogi+ nɛ pɛ-ɛjaɖɛ yɔ, alɩwaatʋ ndʋ ɛɖɩzɩ-yɛ yɔ.+ 5 Yehowa kaɣnɩ yebu nɛ ɩwabɩ-yɛ, pɩwɛɛ se ɩlabɩ-yɛ ɛzɩ manɖʋʋ-mɩ paɣtʋ ɖeyi ɖeyi yɔ.+ 6 Ɩwɛɛ abalɩtʋ nɛ ɩwɛɛ ɖoŋ.+ Sɔɔndʋ ɛtaakpa-mɩ nɛ itaaseli pɛ-ɛsɩndaa,+ mbʋ pʋyɔɔ yɔ mɩ nɛ mɩ-Ɛsɔ Yehowa ɩɖɔŋna. Ɛɛkaɣ-mɩ yebu nɛ ɛɛkaɣ-mɩ siɣye haʋ.»+

7 Nɛ Moyizi yaa Yozuwee nɛ eheyi-i Izrayɛɛlɩ mba kpeekpe ɛsɩndaa se: «Wɛɛ abalɩtʋ nɛ ŋwɛɛ ɖoŋ,+ mbʋ pʋyɔɔ yɔ ñakaɣnɩ wonuu samaɣ kanɛ ka-taa ɛyaa ɛjaɖɛ nɖɩ Yehowa kaaɖuuni pɔ-cɔzɔnaa se ɛcɛlɩɣ-wɛ yɔ ɖɩ-taa, nɛ ŋkaɣ-wɛ ɖɩ cɛlʋʋ nɛ ɖɩpɩsɩ pa-ñɩm.+ 8 Yehowa maɣmaɣ ɖɔŋnɩ ñɛ-ɛsɩndaa, nɛ ɛkaɣ wɛʋ ñɔ-cɔlɔ.+ Ɛɛkaɣ-ŋ yebu nɛ ɛɛkaɣ-ŋ siɣye haʋ. Sɔɔndʋ ɛtaakpa-ŋ nɛ taaseli.»+

9 Ðɩnɛ ɛlɛ Moyizi ma Paɣtʋ tʋnɛ+ nɛ ɛcɛlɩ-tʋ cɔjɔnaa, Leevi ñɩma mba pakpakɩɣ Yehowa ɛgbɛyɛ ɖʋʋ aɖakaɣ yɔ nɛ Izrayɛɛlɩ ɛzʋtʋyaa kpeekpe. 10 Moyizi ɖʋ-wɛ paɣtʋ nɛ ɛyɔɔdɩ se: «Paa ɛzɩmtaa pɩnzɩ 7 tɛŋ, kɩma kpeɣu pɩnaɣ+ alɩwaatʋ ndʋ paɖʋwa yɔ tɩ-taa, Coka* Kazandʋ+ alɩwaatʋ taa, 11 Izrayɛɛlɩ mba kpeekpe kɔŋ mɩ-Ɛsɔ Yehowa ɛsɩndaa,+ lone nɖɩ ɛlɩzɩɣ yɔ ɖɩ-taa lɛ, pɩwɛɛ se ɩkalɩ Paɣtʋ tʋnɛ nɛ Izrayɛɛlɩ kpeekpe nɩɩ.+ 12 Ikpeɣli samaɣ,+ abalaa, halaa, piya* nɛ agɔma mba pɛwɛ mɩ-tɛtʋ ndɩ ndɩ* taa yɔ nɛ pewelisi nɛ pɛkpɛlɩkɩ nɛ patɩlɩ mɩ-Ɛsɔ Yehowa nɛ pese-i sɔɔndʋ nɛ pɔɖɔ Paɣtʋ tʋnɛ tɩ-taa tɔm kpeekpe yɔɔ ɖeyi ɖeyi. 13 Ðɩnɛ ɛlɛ pa-pɩyalaa mba patɩtɩlɩ Paɣtʋ tʋnɛ yɔ, pakaɣ welisuu+ nɛ pɛkpɛlɩkɩ ɛzɩma pese mɩ-Ɛsɔ Yehowa sɔɔndʋ kɩyakɩŋ weyi payɩ ɩcakɩ wezuu ɛjaɖɛ nɖɩ ɩtɛzɩɣ Yɔɔrdaŋ pɔɔ se ɩmʋ yɔ ɖɩ-taa yɔ.»+

14 Pʋwayɩ lɛ, Yehowa heyi Moyizi se: «Na! Ña-sɩm alɩwaatʋ ñɔtaa.+ Yaa Yozuwee, nɛ iwolo kediɣzaɣ kizinziku ɛsɩndaa, nɛ mansɩɩ-ɩ ɖiyiyu.»+ Ðɩnɛ ɛlɛ, Moyizi nɛ Yozuwee pɛɖɛɛ nɛ powolo kediɣzaɣ kizinziku ɛsɩndaa. 15 Nɛ Yehowa wɩlɩ ɛ-tɩ mɩndʋ tilimiye taa; mɩndʋ tilimiye nɖɩ, ɖɩɩsɩŋ kizinziku nɔnɔɔ taa.+

16 Nɛ Yehowa heyi Moyizi se: «Na! Ŋwɩzɩ sɩbʋ,* nɛ samaɣ kanɛ kakaɣ paɣzʋʋ labʋ fezuu taa hayitu nɛ agbaaɣdaa ɛsɔnaa mba pɔcɔʋ-kɛ nɛ pata ɛjaɖɛ nɖɩ ɖɩ-taa kowoki yɔ.+ Kakaɣ-m yebu+ nɛ kɛcɛ ɛgbɛyɛ nɖɩ manɖʋ ma nɛ kɛ ɖɛ-hɛkʋ taa yɔ.+ 17 Alɩwaatʋ ndʋ tɩ-taa, man-pana kaɣ kulusuu nɛ kɛ,+ nɛ mankaɣ-kɛ yebu+ nɛ maatasɩɣ-kɛ haʋ ɛsɩndaa+ nɛ pɩkɔɔ pɩsɩɩnɩ alɩwaatʋ ndʋ paɖɩzɩ-kɛ yɔ. Asɛyɩŋ nɛ kʋñɔmɩŋ sakɩyɛ kɔŋ kɔ-yɔɔ nɛ pɩtɛ lɛ,+ kakaɣ yɔɔdʋʋ se: “Pɩtɩkɛ ɖɛ-Ɛsɔ fɛyɩ ɖɛ-hɛkʋ taa yɔɔ asɛyɩŋ ɩnɛ ɩkɔm ɖɔ-yɔɔ mbʋ?”+ 18 Ɛlɛ kɩyakʋ ŋgʋ ki-wiye ɖɔɖɔ, maakaɣ-kɛ haʋ ɛsɩndaa, kañatʋ lakasɩ nzɩ payɩ kalaba nɛ katɩŋ ɛsɔnaa lalaa yɔ sɩ-yɔɔ.+

19 «Lɛɛlɛɛyɔ lɛ, ɩma mɩ-tɩ hendu tʋnɛ+ nɛ ɩwɩlɩ-tʋ Izrayɛɛlɩ mba.+ Iyele nɛ pɛkpɛlɩkɩ-tʋ* se pɩsa nɛ hendu tʋnɛ tɩkɛ ma-aseɣɖe tʋ Izrayɛɛlɩ samaɣ yɔɔ.+ 20 Alɩwaatʋ ndʋ mowokini-wɛ ɛjaɖɛ nɖɩ maaɖuuni pɔ-cɔzɔnaa yɔ ɖɩ-taa,+ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ,+ nɛ pɔtɔɔ nɛ pahaɣ nɛ piɖeni-wɛ* lɛ,+ pakaɣ tɩŋʋʋ ɛsɔnaa lalaa nɛ pɛsɛɛ-wɛ nɛ paakaɣ-m ñam nɛ pakaɣ cɛbʋ mɛ-ɛgbɛyɛ.+ 21 Alɩwaatʋ ndʋ asɛyɩŋ nɛ kʋñɔmɩŋ sakɩyɛ talɩɣ-wɛ yɔ,+ hendu tʋnɛ tɩkaɣ-wɛ kɛʋ aseɣɖe tʋ (mbʋ pʋyɔɔ yɔ pa-lʋlʋʋ taa mba ɩɩkaɣ tɩ-yɔɔ sɔʋ), mbʋ pʋyɔɔ yɔ mɛntɛm sɩm lɩmaɣza wena pɛwɛna yɔ+ halɩ pʋcɔ nɛ mowokini-wɛ ɛjaɖɛ nɖɩ maaɖuwaa se mɛncɛlɩɣ-wɛ yɔ ɖɩ-taa.»

22 Nɛ Moyizi ma hendu ndʋ kɩyakʋ ŋgʋ ki-wiye nɛ ɛkpɛlɩkɩ-tʋ Izrayɛɛlɩ mba.

23 Pʋwayɩ lɛ, ɛsɩɩ* Nuuni pɩyalʋ Yozuwee ɖiyiyu+ nɛ eheyi-i se: «Wɛɛ abalɩtʋ nɛ ŋwɛɛ ɖoŋ,+ mbʋ pʋyɔɔ yɔ ñakaɣnɩ wonuu Izrayɛɛlɩ mba ɛjaɖɛ nɖɩ maaɖuuni-wɛ yɔ ɖɩ-taa,+ nɛ mankaɣ wɛʋ ñɔ-cɔlɔ.»

24 Moyizi ñɩtaa nɛ ɛtɛzɩ maʋ Paɣtʋ tʋnɛ tɩ-taa tɔm tɩŋa takayaɣ nakɛyɛ taa lɛ,+ 25 Moyizi ɖʋ paɣtʋ Leevi ñɩma mba pakpakɩɣ Yehowa ɛgbɛyɛ ɖʋʋ aɖakaɣ yɔ se: 26 «Ɩkpaɣ Paɣtʋ takayaɣ+ kanɛ nɛ ɩsɩɩ-kɛ mɩ-Ɛsɔ Yehowa ɛgbɛyɛ ɖʋʋ aɖakaɣ cɔlɔ,+ nɛ kakaɣ kɛʋ aseɣɖe tʋ peeɖe mɩ-yɔɔ. 27 Mbʋ pʋyɔɔ yɔ ma-maɣmaɣ mansɩm camɩyɛ mɩ-kaañamtʋ lakasɩ+ nɛ mɩ-ñʋʋ taa ɖoŋ lakasɩ.*+ Ye alɩwaatʋ ndʋ mɛwɛ wezuu mɩ-hɛkʋ taa yɔ, ɩkaɖɩɣnɩ Yehowa siŋŋ yɔ ɛzɩma kpem pɩkaɣ wɛʋ alɩwaatʋ ndʋ mansɩkɩ yɔ? 28 Ikpeɣli mɔn-cɔlɔ mi-cejewe taa ɛzʋtʋyaa kpeekpe nɛ mɩ-ñʋndɩnaa nɛ meheyi-wɛ tɔm tʋnɛ nɛ panɩɩ nɛ mankpaɣ ɛsɔdaa nɛ tɛtʋ aseɣɖe tɩnaa pɔ-yɔɔ.+ 29 Mbʋ pʋyɔɔ yɔ mansɩm camɩyɛ se man-sɩm wayɩ lɛ, paa pɩɩlabɩ ɛzɩma yɔ ɩkaɣ labʋ lakasɩ kɩdɛkɛdɩsɩ+ nɛ iyele tɩŋʋʋ nʋmɔʋ ŋgʋ manɖʋ-mɩ paɣtʋ se ɩtɩŋ yɔ. Nɛ pɩtʋʋ fɛyɩ se asɛyʋʋ kaɣ-mɩ talʋʋ+ alɩwaatʋ ndʋ kɩyakɩŋ tɛŋ yɔ, mbʋ pʋyɔɔ yɔ ɩkaɣ labʋ mbʋ pɩfɛyɩ ɖeu Yehowa ɛsɩndaa yɔ nɛ ɩkaɣ tɩŋnʋʋ mi-nesi tɛɛ tʋma yɔɔ nɛ ɩɖʋ-ɩ ɖɩwɩzɩyɛ.»

30 Ðɩnɛ ɛlɛ Moyizi yɔɔdɩ hendu tʋnɛ tɩ-taa tɔm Izrayɛɛlɩ samaɣ kpeekpe nɩŋgbaaŋ taa, kpaɣnɩ ɖɩbazɩyɛ nɛ piwolo ɖɩdɛnɖɛ:+

 3 Mbʋ pʋyɔɔ yɔ mankaɣ susuu Yehowa hɩɖɛ.+

Ɩyɔɔdɩ ɖɛ-Ɛsɔ paɣlɩka tɔm!+

 5 Mba labɩnɩ lakasɩ kɩdɛkɛdɩsɩ.+

Patɩkɛ e-piya, pɔ-yɔɔ ɛjandʋ wɛɛ.+

Pɛkɛ kpaɖʋʋ kɩdɛkɛdʋʋ ŋgʋ kɩtɩtʋʋzɩ yɔ!+

15 Yesurun* ɖʋ num lɛ, ɛtɔ nɩŋgbaŋaɣ nɛ kaañamtʋ.

Ŋɖʋ num, ŋɖʋ tɔnʋʋ, ŋhuwa.+

Pʋyɔɔ eyebi Ɛsɔ weyi ɛma-ɩ yɔ,+

nɛ eni ɛ-ñʋʋ yabʋ Kaaʋ.

29 Ye paakɛ lɔŋsɩnɖaa yɔ,+ ɛzʋnɔ paamaɣzɩ pɩ-yɔɔ camɩyɛ.+

Ɛzʋnɔ paamaɣzɩ mbʋ pɩkaɣ-wɛ tɛmnʋʋ yɔ pɩ-yɔɔ.+

Pakʋyɩ nɛ pasɩnɩ-mɩ lɛ.

Papɩsɩ mɩ-ɖɩjɔzɩyɛ lɛ.

Mankʋʋ, nɛ mahaɣ wezuu.+

44 Mbʋ Moyizi kɔma, ɛ nɛ Nuuni pɩyalʋ Osee,*+ nɛ ɛyɔɔdɩ hendu ndʋ tɩ-taa tɔm kpeekpe samaɣ nɩŋgbaaŋ taa.+ 45 Moyizi heyi Izrayɛɛlɩ mba kpeekpe tɔm ndʋ tɩ-tɩŋa nɛ pɩtɛ lɛ, 46 eheyi-wɛ se: «Ɩɖɔkɩ tɔm ndʋ payɩ manpaɣnɩ-mɩ sɔnɔ yɔ mɩ-laŋa taa+ se pɩsa nɛ ɩpaɣ mɩ-pɩyalaa se pɔɖɔ Paɣtʋ tʋnɛ tɩ-taa tɔm kpeekpe yɔɔ ɖeyi ɖeyi.+ 47 Mbʋ pʋyɔɔ yɔ tɔm tʋnɛ tɩtɩkɛ-mɩ falaa tɔm, ɛlɛ tɩkɛ mi-wezuu,+ nɛ tɩ-yɔɔ pɩkaɣ tɩŋnʋʋ nɛ ɩpɩzɩ nɛ ɩcaɣ wezuu nɛ pileɖi ɛjaɖɛ nɖɩ ɩtɛzɩɣ Yɔɔrdaŋ pɔɔ se ɩmʋ-ɖɩ yɔ ɖɩ-taa.»

48 Yehowa yɔɔdɩnɩ Moyizi puwiye nɛ eheyi-i se: 49 «Kpa Abarim pʋʋ+ kʋnɛ kɩ-taa, Nebo Pʋʋ+ taa, pʋʋ ŋgʋ kɩwɛ Mowaabʋ ɛjaɖɛ taa yɔ, ŋgʋ kɩpam ɛsa nɛ Yeriikoo yɔ, nɛ ŋna Kanaŋ ɛjaɖɛ nɖɩ mɛncɛlɩɣ Izrayɛɛlɩ mba se ɖɩkɛ pa-ñɩm yɔ.+ 50 Nɛ ŋkaɣ sɩbʋ pʋʋ ŋgʋ kɩ-taa ŋkpaɣ yɔ nɛ pɛkpɛndɩ-ŋ ña-samaɣ yɔɔ,* ɛzɩ ña-ɖalʋ Aarɔɔnɩ ɖɔɖɔ sɩbʋ Hɔr Pʋʋ taa+ nɛ pɛkpɛndɩ-ɩ ɛ-samaɣ yɔɔ yɔ, 51 mbʋ pʋyɔɔ yɔ mɩ-naalɛ ɩtaawɛɛ siɣsiɣ mɛ-ɛsɩndaa Izrayɛɛlɩ mba hɛkʋ taa Meriba lɩm cɔlɔ+ Kadɛɛsɩ, Ziini kañɩmbusuu taa, mbʋ pʋyɔɔ yɔ ɩtɩwɩlɩ Izrayɛɛlɩ samaɣ ɛsɩndaa se mɛnkɛ kiɖeɖeu.*+ 52 Ðooo poliŋ taa ŋkaɣ naʋ ɛjaɖɛ nɖɩ, ɛlɛ ŋŋkaɣ sʋʋ ɛjaɖɛ nɖɩ mɛncɛlɩɣ Izrayɛɛlɩ samaɣ yɔ ɖɩ-taa.»+

33 Tɔm tʋnɛ Ɛsɔ toovenim tʋ tɛ ɛyʋ Moyizi yɔɔdaa nɛ ɛwazɩnɩ Izrayɛɛlɩ mba pʋcɔ nɛ ɛsɩ.+ 2 Ɛyɔɔdaa se:

 7 Tɔm tʋnɛ ɛyɔɔdaa nɛ ɛwazɩnɩ Yuuda:+

 8 Ɛyɔɔdɩ Leevi tɔm se:+

12 Ɛyɔɔdɩ Bɛnjamɛɛ tɔm se:+

13 Ɛyɔɔdɩ Yosɛɛfʋ tɔm se:+

18 Ɛyɔɔdɩ Zebulɔɔnɩ tɔm se:+

19 Pakaɣ yaʋ ɛyaa samasɩ nɛ sɩkpa pʋʋ taa.

Peeɖe pakaɣ laʋ siɣsiɣ wɛtʋ kɩlaŋ.

20 Ɛyɔɔdɩ Gaadɩ tɔm se:+

«Pawazɩ weyi ɛwalɩsɩɣ Gaadɩ kamasɩ yɔ.+

Samaɣ ñʋndɩnaa kaɣ kpeɣluu.

22 Ɛyɔɔdɩ Daanɩ tɔm se:+

«Daanɩ kɛ mʋʋzʋʋ pɩɣa.+

Basaanɩ ɛkaɣ kʋyɩnʋʋ nɛ ɛmaa.»+

23 Ɛyɔɔdɩ Naftalii tɔm se:+

Mʋ wɩsɩ ɖɩɖʋyɛ nɛ ŋmʋ ɖɔɖɔ hadɛ kiŋ.»

24 Ɛyɔɔdɩ Asɛɛrɩ tɔm se:+

«Paha pɩyalaa sakɩyɛ Asɛɛrɩ nɛ pawazɩnɩ-ɩ.

29 Oo Izrayɛɛlɩ, ŋkɛ koboyaɣ tʋ!+

34 Ðɩnɛ ɛlɛ Moyizi kʋyɩnɩ Mowaabʋ kañɩmbusuu kɛdɛɛnzɩ taa nɛ ɛkpa Nebo Pʋʋ+ yɔɔ, Pizɩga ñʋʋ taa,+ ŋgʋ kɩha ɛsa nɛ Yeriikoo yɔ.+ Nɛ Yehowa wɩlɩ-ɩ ɛjaɖɛ nɖɩ ɖi-kpeekpe, kpaɣnɩ Galaadɩ nɛ piwolo Daanɩ,+ 2 Naftalii kpeekpe nɛ Efrayim nɛ Manaasee pe-egeetiye, nɛ Yuuda egeetiye kpeekpe nɛ piwolo pɩtalɩ ɖooo wɩsɩ ɖɩɖʋyɛ taa teŋgu,*+ 3 nɛ Negɛɛbʋ+ nɛ Yɔɔrdaŋ Egeetiye,+ nɛ Yeriikoo fɛɛʋ, paŋ tɛtʋ, nɛ piwolo pɩtalɩ ɖooo Zowaarɩ.+

4 Nɛ Yehowa heyi-i se: «Ɛjaɖɛ ɖɩnɛ maaɖuuni Abraham, Izaakɩ nɛ Yakɔɔb se: “Ña-lʋlʋʋ taa mba* mankaɣ-ɖɩ cɛlʋʋ.”+ Meyeba nɛ ŋna-ɖɩ nɛ ñɛ-ɛsa, ɛlɛ ŋŋkaɣ tɛzʋʋ nɛ ŋsʋʋ ɖɩ-taa.»+

5 Pʋwayɩ lɛ, Yehowa lɩmɖʋyʋ Moyizi sɩ peeɖe Mowaabʋ ɛjaɖɛ taa, ɛzɩ Yehowa kaayɔɔdʋʋ yɔ.+ 6 Nɛ epimi-i fɛɛʋ taa Mowaabʋ ɛjaɖɛ taa, Bɛtɩ-Peyɔɔrɩ ɛsɩndaa, nɛ nɔɔyʋ tɩtɩlɩ ɖenɖe ɛ-pɩlaʋ wɛɛ yɔ halɩ nɛ sɔnɔ.+ 7 Moyizi kaawɛnɩ pɩnzɩ 120 alɩwaatʋ ndʋ ɛsɩkaɣ yɔ.+ Ɛ-ɛsa taacamɩ nɛ e-ɖoŋ taatɛ. 8 Izrayɛɛlɩ samaɣ wii Moyizi Mowaabʋ kañɩmbusuu kɛdɛɛnzɩ taa kɩyakɩŋ 30.+ Nɛ kɩyakɩŋ weyi pewi Moyizi nɛ pacaɣ kʋñɔwiye ɛ-yɔɔ yɔ ɩtɛ.

9 Lɔŋsɩnɖɛ fezuu kaasu Nuuni pɩyalʋ Yozuwee taa ɖo, mbʋ pʋyɔɔ yɔ Moyizi kaatɩnɩ e-nesi ɛ-yɔɔ;+ nɛ Izrayɛɛlɩ mba paɣzɩ-ɩ welisinuu, nɛ pala ɖeyi ɖeyi ɛzɩ Yehowa kaaɖʋʋ paɣtʋ Moyizi yɔ.+ 10 Ɛlɛ wiɖiyi nayʋ nɔɔyʋ tɩtasɩ lɩʋ Izrayɛɛlɩ taa ɛzɩ Moyizi yɔ,+ weyi Yehowa sɩmɩ-ɩ camɩyɛ siŋŋ yɔ.*+ 11 Ɛɛlabɩ yʋsasɩ nɛ maamaaci lakasɩ nzɩ payɩ Yehowa tiyi-i Ejipiti ɛjaɖɛ taa se ɛla Farawɔɔ nɛ ɛ-lɩmɖʋyaa kpeekpe nɛ ɛ-ɛjaɖɛ kpeekpe yɔ,+ 12 nɛ pɩtasɩnɩ nesi ɖoŋ ñɩnzɩ nɛ ɖoŋ sɔsɔŋ weyi Moyizi wɩlɩ Izrayɛɛlɩ kpeekpe ɛsɩndaa yɔ.+