KƲÑƆWIYE
א [Alɛf]*
1 Tɛtʋ ndʋ tɩ-taa ɛyaa kaasuwa yɔ, ɩna ɛzɩma tɩcaɣ ti-ɖeke lɛɛlɛɛyɔ yɔ!+
Ɩna ɛzɩma tɩpɩsɩ ɛzɩ lelu yɔ, tɛtʋ ndʋ ajɛɛ taa lɛ, ɛyaa kaasu tɩ-taa pɩdɩɩfɛyɩ yɔ!+
Ɩna ɛzɩma tɛtʋ ndʋ tɩɩkɛ abiɖe ageeta taa yɔ paɖʋ-tʋ kɩjɛyʋʋ tʋma yɔ!+
ב [Bɛtɩ]
2 Ewiɣ siŋŋ ɖoo taa,+ nɛ ɛ-ɛsɩtɛɣlɩm kpeŋ ɛ-lɩkpaɣzɩsɩ yɔɔ cɔɔɔ.
Mba paasɔɔlɩ-ɩ yɔ pa-taa nɔɔyʋ fɛyɩ se ɛhɛzɩ ɛ-laŋɩyɛ.+
Ɛ-maɣmaɣ ɛ-taabalaa tɩŋa lɩ ɛ-wayɩ;+ papɩsɩ e-koyindinaa.
ג [Gimɛl]
3 Pɛkɛzɩ Yuuda tɛtʋ+ nɛ ɛwɛɛ kʋñɔŋ taa nɛ yomiye sɔsɔɖɛ taa.+
Pɩwɛɛ se ɛwɛɛ ajɛɛ taa;+ eehikiɣ ɖɩhɛzɩyɛ lone naɖɩyɛ.
Ɛ-nazɩyaa kpeekpe kɔm nɛ pehiɣ-i ɛ-kʋñɔŋ taa.
ד [Dalɛtɩ]
4 Habɛɛ wena awokini Siyɔŋ yɔ awɛ kʋñɔwiye taa, mbʋ pʋyɔɔ yɔ nɔɔyʋ ɛɛkɔŋ kazandʋ taa.+
Kɩ-nɔnɔsɩ tɩŋa wɛ kpɛɖɛ;+ kɩ-cɔjɔnaa wɛɛ nɛ pɔmɔlʋʋ.
Kɩ-pɛlaa mba patɩtɩlɩ abalaa yɔ* pɛwɛ laŋwɛɛkɩyɛ taa, nɛ kɩwɛ wɩzasɩ taa siŋŋ.
ה [He]
5 Lɛɛlɛɛyɔ lɛ, ki-koyindinaa pɩsɩ kɩ-ñʋʋdʋ; ki-koyindinaa paa fɛyɩnɩ natʋyʋ.+
Mbʋ pʋyɔɔ yɔ kɩ-kɩwɛɛkɩm sakɩyɛ yɔɔ lɛ, Yehowa yeba nɛ kɩwɛɛ laŋwɛɛkɩyɛ taa.+
Koyindu kpaɣ ki-piya nɛ ewoni-sɩ yomiye taa.+
ו [Vav]
6 Siyɔŋ pɛlɛ keɖeɣa kpeekpe ɖɛwa.+
Kɩ-awumbiya wɛ ɛzɩ cɩyɩŋ* weyi itihiɣ ñɩtʋ ɖɩdɔɔyɛ,
Nɛ ɩɖɔŋ pɔŋɔ pɔŋɔ, weyi ɛtaŋɩ-ɩ yɔ ɛ-ɛsɩndaa yɔ.
ז [Zayin]
7 Kɩyakɩŋ weyi ɩ-taa Yeruzalɛm kaawɛ kʋñɔŋ taa nɛ kɩfɛyɩnɩ ɖɩzʋyɛ yɔ, kɩwɛɛ nɛ kɩtɔzʋʋ
Ñɩm wondu ndʋ payɩ kɩɩwɛnɩ caanaʋ taa yɔ tɩ-yɔɔ.+
Alɩwaatʋ ndʋ kɩ-samaɣ tɔlɩ ki-koyindu nesi tɛɛ nɛ kɩfɛyɩnɩ sɩnɩyʋ yɔ,+
ח [Hɛɛtɩ]
8 Yeruzalɛm labɩ kɩwɛɛkɩm sɔsɔm.+
Pʋyɔɔ kɩpɩsɩ mbʋ pɩwɛ kʋzɔɔtʋ yɔ.
Mba payɩ paɖʋwaɣ-kʋ hɩɖɛ yɔ, lɛɛlɛɛyɔ lɛ peniŋ-kʋ; mbʋ pʋyɔɔ yɔ pana kɩ-ndaakpeɖe.+
Kɩ-maɣmaɣ kɩwɛɛ nɛ kɩmɔlʋʋ+ nɛ fɛyɛ kpa-kʋ nɛ kɩkɛzɩɣ kɩ-ɛsa.
ט [Tetɩ]
9 Kɩ-azuluma pisi ki-tokonaa.
Kɩtɩmaɣzɩ mbʋ pɩtalɩɣ-kʋ cee wayɩ yɔ pɩ-yɔɔ.+
Kɩ-tɔlʋʋ ɖɩɣzɩ ɛyaa; nɔɔyʋ fɛyɩ se ɛhɛzɩ kɩ-laŋɩyɛ.
Hayɩ Yehowa, na man-kʋñɔŋ, mbʋ pʋyɔɔ yɔ koyindu wɛɛ nɛ ɛkʋndʋʋ.+
י [Yod]
10 Koyindu lazɩ kɩ-ñɩm kpeekpe.+
Mbʋ pʋyɔɔ yɔ kɩna ajɛɛ, asʋ ki-kooka kiɖeɖeɣa taa,+
Ajɛɛ wena ŋtaaha-yɛ nʋmɔʋ se asʋʋ ña-samaɣ taa yɔ.
כ [Kaf]
11 Kɩ-ɛyaa kpeekpe wɛɛ nɛ pɔmɔlʋʋ; pɛwɛɛ nɛ pañɩnɩɣ tɔɔnaɣ.*+
Pɛcɛlɩ po-wondu ndʋ tɩmʋ ñɩm yɔ tɔɔnaɣ yɔɔ se papɩzɩ nɛ pɛwɛɛ wezuu.*
Hayɩ Yehowa, cɔna nɛ ŋna ɛzɩma manpɩsɩ ɛzɩ halʋ weyi ɛfɛyɩ wazaɣ yɔ.*
ל [Lamɛd]
12 Mɩ mba payɩ ɩwɛ habɩyɛ yɔɔ nɛ ɩɖɛɣ yɔ, ɛzɩ piiheyiɣ-mɩ natʋyʋ?
Ɩcɔna nɛ ɩna!
Ɛzɩ wɩzasɩ nasɩyɩ wɛ ɛzɩ nzɩ paɖʋ-m yɔ,
Nzɩ Yehowa yeba nɛ manɩɩ ɛ-pana sɔsɔna kɩyakʋ wiye yɔ?+
מ [Mem]
13 Etiyi miŋ nɛ ɛsɔdaa nɛ itii mɔ-mɔɔ taa,+ nɛ eluzuu ɛ-tɛɛ paa mɔ-mɔɔyɛ nɖɩ.
Ɛlɔ ma-nɩŋgbanzɩ piyuu; ɛkpa-m nɛ ɖoŋ se manpɩsɩnɩ wayɩ.
Eyeba nɛ manpɩsɩ halʋ weyi ɛwɛ e-ɖeke yɔ.
Mɛnkɛ kʋdɔndʋ evemiye kpeekpe.
נ [Nuuni]
14 Ɛkpaɣ man-kɩwɛɛkɩm nɛ ɛhɔkɩnɩ me-liu ɛzɩ sʋʋtʋ ɖaʋ yɔ; e-nesi maɣmaɣ ɛhɔkɩnɩ-pʋ.
Patɩnɩ-pʋ mon-pondone yɔɔ nɛ mon-ɖoŋ tɛ.
Yehowa ɖʋzɩ-m mba maapɩzɩɣ se mankaɖɩnɩ-wɛ yɔ pe-nesi tɛɛ.+
ס [Samɛk]
15 Yehowa kpaɣ mɛ-ɛyaa ɖoŋ tɩnaa tɩŋa nɛ ɛɖɛna.+
Ekpeɣli ɛyaa samaɣ nakɛyɛ se kɔkɔɔ ma-wayɩ nɛ kapʋʋtɩ me-evebiya.+
Yehowa fɛyɩ Yuuda pɛlɛ weyi ɛtɩtɩlɩ abalʋ yɔ viiñi ɖɩfɛyɩyɛ taa.+
ע [Ayin]
16 Pʋyɔɔ mɛwɛɛ nɛ mewiɣ;+ ɛsɩtɛɣlɩm kpeŋ mɛ-ɛsɩndaa.
Mbʋ pʋyɔɔ yɔ weyi ɛpɩzaɣ se ɛhɛzɩ ma-laŋɩyɛ yaa ɛkpazɩ-m ɖoŋ* yɔ, eposini-m siŋŋ.
Man-pɩyalaa fɛyɩnɩ lidaʋ nakʋyʋ, mbʋ pʋyɔɔ yɔ koyindu wabɩ-wɛ.
פ [Pe]
17 Siyɔŋ posi ki-nesi;+ nɔɔyʋ fɛyɩ se ɛhɛzɩ kɩ-laŋɩyɛ.
Yehowa ɖʋ paɣtʋ koyindinaa mba payɩ pɔcɔ Yakɔɔb nɛ pata yɔ se pakaɖɩnɩ-ɩ.+
Yeruzalɛm pɩsɩ kʋzɔɔtʋ pʋyʋ pɛ-ɛsɩndaa.+
צ [Cade]
18 Yehowa wɛ siɣsiɣ,+ mbʋ pʋyɔɔ yɔ ɛ-paɣtʋ* mankaɖɩnaa.+
Samasɩ kpeekpe mɩ, iwelisi nɛ ɩna ma-wɩzasɩ.
Mɛn-pɛlaa mba patɩtɩlɩ abalaa yɔ* nɛ me-evebiya pɛɖɛ yomiye taa.+
ק [Kof]
19 Maya mba paasɔɔlɩ-m yɔ, ɛlɛ palɩɩ ma-wayɩ.+
ר [Resɩ]
20 Hayɩ Yehowa, na ɛzɩma mɛwɛ laŋwɛɛkɩyɛ sɔsɔɖɛ taa yɔ.
Mo-lotu taa* cʋʋdʋʋ.
Ma-laŋɩyɛ pɩsɩ man-taa kpɛlɩ, mbʋ pʋyɔɔ yɔ malabɩ kaañamtʋ lakasɩ pɩdɩɩfɛyɩ.+
Laɣɖɛ kʋ men-piya awayɩ;+ ɖɩsɩ taa lɛ, pɩwɛ ɛzɩ sɩm yɔ.
ש [Sin]
21 Ɛyaa nɩ mɔ-mɔla; nɔɔyʋ fɛyɩ se ɛhɛzɩ ma-laŋɩyɛ.
Mon-koyindinaa kpeekpe nɩ asɛyʋʋ ŋgʋ kɩtalɩ-m yɔ kɩ-tɔm.
Pa-taa wɛ leleŋ, mbʋ pʋyɔɔ yɔ ŋkɔnɩ-kʋ.+
Ɛlɛ ŋkaɣ kɔnʋʋ kɩyakʋ ŋgʋ kɩ-tɔm ŋŋsusaa yɔ.+ Alɩwaatʋ ndʋ lɛ, pakaɣ pɩsʋʋ ɛzɩ ma yɔ.+
ת [Tav]
22 Pa-lakasɩ kɩdɛkɛdɩsɩ kpeekpe ɩkɔɔ ñɛ-ɛsɩndaa, nɛ ŋlabɩnɩ-wɛ siŋŋ,+
Ɛzɩ ŋlabɩnʋʋ-m siŋŋ man-kɩwɛɛkɩm kpeekpe yɔɔ yɔ.
Mbʋ pʋyɔɔ yɔ mɔ-mɔla ɖɔwa, nɛ pɩwɩɣ ma-laŋɩyɛ.
א [Alɛf]
2 Ɩna ɛzɩma Yehowa kpaɣ ɛ-pana mɩndʋ nɛ ehuuzi Siyɔŋ pɛlɛ yɔɔ yɔ!
Ɛkpaɣ Izrayɛɛlɩ keɖeɣa nɛ ɛsɔdaa nɛ ɛlɔ tɛtʋ yɔɔ.+
Ɛtɩtɔzɩ ɛ-nɩŋgbanzɩ ɖɩzɩyɛ yɔɔ ɛ-pana kɩyakʋ wiye.+
ב [Bɛtɩ]
2 Yehowa libi lona wena a-taa Yakɔɔb cakɩ yɔ a-tɩŋa, ɛtɩna a-pʋtɔdɩyɛ.
Ɛyɔkɩ Yuuda pɛlɛ lona ɖoŋ ñɩna nɛ pana.+
Etisi kewiyaɣ+ nɛ ka-awumbiya+ tataa nɛ episi-wɛ.
ג [Gimɛl]
3 Ɛpɛlɩ Izrayɛɛlɩ ɖoŋ kpeekpe* nɛ pana sɔsɔna.
Ɛpɩsɩnɩ e-nesi kɩbanzɩ alɩwaatʋ ndʋ koyindu kɔma yɔ,+
Nɛ ɛwɛɛ nɛ ɛmʋʋ Yakɔɔb taa ɛzɩ miŋ weyi ɩñakɩ mbʋ payɩ pɩcɔ-ɩ nɛ pɩta yɔ.+
ד [Dalɛtɩ]
4 Ekoti* ɛ-tɔʋ ɛzɩ koyindu yɔ; ɛñɔɔzɩ e-nesi kɩbanzɩ nɛ ɛɖaŋ ɛzɩ koyindu yɔ;+
Ewobi pɩ-yɔɔ nɛ ɛkʋʋ mba payɩ pamʋ ñɩm ɖɛ-ɛsɩndaa yɔ.+
Nɛ ɛpɩyɩ ɛ-pana ɛzɩ miŋ yɔ+ Siyɔŋ pɛlɛ kizinziku tɛɛ.+
ה [He]
5 Yehowa pɩsɩ ɛzɩ koyindu yɔ;+
Elibi Izrayɛɛlɩ.
Elibi ki-tilima kpeekpe;
Ɛyɔkɩ ki-lona ɖoŋ ñɩna kpeekpe.
Nɛ eyeki se Yuuda pɛlɛ kʋñɔwiye nɛ e-peenduu pɩɖɔɔ siŋŋ.
ו [Vav]
6 Ɛpʋʋtʋʋ e-cokiye,+ ɛzɩ cokiye nɖɩ ɖɩwɛ kaɖaɣ taa yɔ.
Eyeba nɛ ɛ-kazandʋ sɩɩ tɩnaɣ.*+
Yehowa yeba se pɔsɔɔ kazandʋ nɛ sabaatɩ yɔɔ Siyɔŋ taa,
Nɛ ɛ-ɖɩwɩzɩyɛ sɔsɔɖɛ yɔɔ lɛ, ɛ-paa fɛyɩnɩ wiyaʋ nɛ cɔjɔ.+
ז [Zayin]
7 Yehowa lɔ ɛ-altaaru;
Ekizi e-kooka kiɖeɖeɣa.+
Ɛɖʋzɩ Siyɔŋ tilima ɖoŋ ñɩna kolonzi koyindu nesi tɛɛ.+
Poko ɖoŋ Yehowa ɖɩɣa taa+ ɛzɩ kazandʋ wiye yɔ.
ח [Hɛɛtɩ]
8 Yehowa tɛm ɛ-taa se ɛɖɩzɩɣ Siyɔŋ pɛlɛ koloŋa.+
Eposi nimaɣ ŋga pamaɣzɩɣna yɔ.+
Ɛtɩkpa e-nesi se sɩtaakɔnɩ ɖɩzʋʋ.*
Nɛ eyeki se tilimiye nɛ koloŋa pɛwɛɛ kʋñɔwiye taa.
Pa-naalɛ pelesi po-ɖoŋ.
ט [Tetɩ]
9 Kɩ-nɔnɔsɩ sʋ tɛtɛɛ.+
Ɛpɛlɩ ñɩɣtʋ ndʋ paɖɩkɩnɩ kɩ-nɔnɔsɩ yɔ nɛ ɛɖɩzɩ-tʋ.
Ki-wiyaʋ nɛ kɩ-awumbiya wɛ ajɛɛ taa.+
Paɣtʋ* natʋyʋ fɛyɩ; halɩ kɩ-nayaa ɩɩnaɣ natʋ natʋyʋ se tɩlɩnɩ Yehowa cɔlɔ.+
י [Yod]
10 Siyɔŋ pɛlɛ ɛzʋtʋyaa caɣ tataa, posum ɖiɣ ɖiɣ.+
Paɖʋ puuyuu pa-ñʋŋ taa nɛ posuu fɔlɔtɔnaa.+
Yeruzalɛm pɛlaa mba patɩtɩlɩ abalaa yɔ poluzi pa-ñʋŋ nɛ pɩtalɩ tataa.
כ [Kaf]
11 Pɩnɩ mɛ-ɛsa nɛ ɛsɩtɛɣlɩm pɩyʋʋ.+
Mo-lotu taa* cʋʋdʋʋ.
Ma-laŋɩyɛ wɛɛkɩ siŋŋ,* mbʋ pʋyɔɔ yɔ man-samaɣ pɛlɛ* tɔlaa,+
Mbʋ pʋyɔɔ yɔ piya nɛ piya cikpesi ɖiɣni fiɣnuu tɛtʋ taa samaɣ kadasɩ taa.+
ל [Lamɛd]
12 Sɩwɛɛ nɛ sɩpɔzʋʋ si-ɖoonaa se: «Le tɔɔnaɣ pee nɛ vɛɛ pɛwɛɛ?»+
Alɩwaatʋ ndʋ siɖiɣni fiɣnuu tɛtʋ taa samaɣ kadasɩ taa ɛzɩ ɛyʋ weyi ɛmʋ heŋ yɔ,
Alɩwaatʋ ndʋ si-wezuu* ɖiɣni ɖɛʋ pazɩ pazɩ si-ɖoonaa nɔkɔyɩŋ taa yɔ.
מ [Mem]
13 Ɛbɛ manpɩzɩɣ mankpaɣ nɛ pɩkɛ-m aseɣɖe,
Yaa ɛbɛ manpɩzɩɣ nɛ mankpaɣ-ŋ nɛ mamaɣzɩna, Oo Yeruzalɛm pɛlɛ?
Ɛbɛ manpɩzɩɣ mankpaɣ-ŋ nɛ mɛnkɛdɩna se mɛhɛzɩnɩ ña-laŋɩyɛ, Oo Siyɔŋ pɛlɛ weyi ɛtɩtɩlɩ abalʋ yɔ?
Mbʋ pʋyɔɔ yɔ ɖenɖe pɩpɛlɩ-ŋ yɔ peeɖe walɩ ɛzɩ teŋgu yɔ.+ Apɩzɩɣ nɛ ɛwa-ŋ?+
נ [Nuuni]
14 Natʋ ndʋ ña-nayaa nawa nɛ peheyi-ŋ yɔ tɩkɛ cɛtɩm nɛ tɩfɛyɩnɩ wazaɣ nakɛyɛ,+
Nɛ patikuli ña-kɩwɛɛkɩm yɔɔ se pɩsa nɛ pataakpaɣ-ŋ nɛ powoni yomiye taa,+
Ɛlɛ powobi pɩ-yɔɔ nɛ panaɣ cɛtɩm tɔm nɛ tɔm ndʋ tipeɣziɣ yɔ nɛ peheyiɣ-ŋ.+
ס [Samɛk]
15 Mba payɩ pɔɖɔŋ habɩyɛ yɔɔ nɛ patɩŋɩɣnɩ ñɔ-cɔlɔ yɔ, pakpalɩɣ-ŋ pe-nesi taa nɛ nimtu.+
Pɩɖɩɣzɩ-wɛ nɛ pahʋlɩ kancʋʋlaɣ+ nɛ pekpiɣyi pa-ñʋŋ Yeruzalɛm pɛlɛ yɔɔ nɛ pɔyɔɔdɩ se:
«Tɛtʋ ndʋ pɔyɔɔdaɣ tɩ-tɔm se: “Ti-keɖeɣa talɩ pilim, tɩkɛ tɛtʋ kpeekpe tɛ taa leleŋ” yɔ, ndʋ yɔ?»+
פ [Pe]
16 Ño-koyindinaa tɩŋa kuli pɔ-nɔsɩ ñɔ-yɔɔ.
Pahʋlʋʋ kancʋʋlaɣ nɛ pasalɩɣ pe-kela nɛ pɔyɔɔdʋʋ se: «Ðilibi-kʋ.+
Kɩyakʋ kʋnɛ ɖɩɩɖaŋaa!+ Kɩtalaa, nɛ ɖɩna-kʋ!»+
ע [Ayin]
17 Yehowa labɩ mbʋ ɛɛɖʋwa yɔ;+ eyeba nɛ tɔm ndʋ ɛyɔɔdaa yɔ tɩla,+
Tɔm ndʋ ɛɛyɔɔdɩ ɖooo lɔŋ yɔ.+
Ɛɖɩzɩ-ŋ, ɛtɩna ña-pʋtɔdɩyɛ.+
Eyeba nɛ koyindu taa la leleŋ ñɔ-yɔɔ; eyeba nɛ ño-koyindinaa wɛɛ ɖoŋ nɛ pɩkpaɖɩ.*
צ [Cade]
18 Oo Siyɔŋ pɛlɛ,* samaɣ laŋɩyɛ wɛɛ nɛ ɖɩmakɩ kubusi nɛ ɖɩyaɣ Yehowa.
Ñɛ-ɛsɩtɛɣlɩm ekpe ɛzɩ lemeɣa yɔ wɩsɩ nɛ ɖoo.
Taahɛzɩ, taayele nɛ ñɛ-ɛsɩyɛ* hɛzɩ.
ק [Kof]
19 Kʋyɩ! Ma kubusi ɖoo taa, kpaɣnɩ alɩwaatʋ ndʋ feŋuu alɩwaatʋ paɣzɩɣ yɔ.
Pɩyɩ mbʋ pɩwɛ ña-laŋɩyɛ taa yɔ Yehowa ɛsɩndaa ɛzɩ lɩm yɔ.
Ñe-piya weziŋ* yɔɔ lɛ, kpazɩ ñe-nesi nɛ ɛ-cɔlɔ kiŋ,
Ñe-piya nzɩ, ñɔɔsɩ yɔɔ lɛ, siɖiɣni fiɣnuu paa habɩyɛ kɔna ŋgʋ lɛ kɩ-taa yɔ.+
ר [Resɩ]
20 Hayɩ Yehowa, cɔna nɛ ŋna weyi ŋlabɩnɩ-ɩ siŋŋ yɔ.
Ɛzɩ pɩwɛɛ se halaa ɩwɛɛ nɛ pɔtɔkɩ piya nzɩ pa-maɣmaɣ palʋlaa yɔ, pa-maɣmaɣ pe-piya nzɩ sɩ nɛ sɩ-alaafɩya camɩyɛ yɔ?+
Yaa pɩwɛɛ se pakʋ cɔjɔnaa nɛ nayaa Yehowa kooka kiɖeɖeɣa taa?+
ש [Sin]
21 Evebiya nɛ akpadɩyaa pahɩnɩ tataa habɛɛ yɔɔ, pasɩba.+
Pakʋ mɛn-pɛlaa* nɛ me-evebiya nɛ laɣɖɛ.+
Ŋkʋ-wɛ ña-pana kɩyakʋ wiye; ŋkʋ-wɛ ŋtɩna pa-pʋtɔdɩyɛ.+
ת [Tav]
22 Ɛzɩ payaɣʋ ɛyaa kazandʋ taa yɔ,+ mbʋ ɖɔɖɔ ŋyaɣ sɔɔndʋ sɔsɔtʋ nɛ hɔɔlɩŋ kpeekpe taa.
Yehowa pana kɩyakʋ wiye, nɔɔyʋ tise nɛ ɛtʋlɩ yaa nɔɔyʋ tihiɣ ñʋʋ yabʋ;+
Mba malʋlɩ-wɛ* nɛ mɔncɔnɩ pɔ-yɔɔ nɛ papaɣlɩ yɔ, mon-koyindu kʋ-wɛ.+
א [Alɛf]
3 Ɛ-pana sɔsɔna ɖaʋ yɔɔ lɛ, mɛnkɛ ɛyʋ weyi ɛna kʋñɔŋ yɔ.
2 Ɛɖɔɔnɩ-m, nɛ mbʋ ɛzɩ eeyeba nɛ mɔnɖɔ ñalɩmɩyɛ taa lɛ, eyeki nɛ mɔnɖɔŋ cɩkpɛndʋʋ taa.+
3 Toovenim taa lɛ, ɛkpazɩɣ e-nesi mɔ-yɔɔ ɖoŋ ɖoŋ evemiye kpeekpe.+
ב [Bɛtɩ]
4 Eyeba nɛ mon-tomnaɣ nɛ mɔn-tɔnʋʋ pɛtɛ;
Ɛyɔkɩ mɔ-mɔɔ.
5 Ɛñɛyɩ-m; ɛkpaɣ sɔtʋ ñaŋ ñɩndʋ+ nɛ kaɖɛ wɛtʋ nɛ ɛcɔzɩ-m nɛ ɛta.
6 Ɛkpa-m nɛ ɖoŋ se mancaɣ cɩkpɛndʋʋ lona taa, ɛzɩ ɛyaa mba pasɩbɩ ɖooo lɔŋ yɔ.
ג [Gimɛl]
7 Ɛma koloŋa nɛ pɩcɔ-m nɛ pɩta se mantaapɩzɩ nɛ mense;
Ɛhɔkɩ-m nɛ ñɩɣyʋʋ kɩsɛɛmʋʋ kpasɩ+ nzɩ sɩwɛ yuŋ yɔ.
8 Nɛ alɩwaatʋ ndʋ mamakɩ kubusi kpem se ɛsɩnɩ-m yɔ, ekiziɣ ma-adɩma.*+
9 Ɛkpaɣ pɛɛ wena pasaɣ-yɛ yɔ nɛ ɛɖɩɣnɩ ma-nʋmɔŋ.
Eyeba nɛ ma-habɛɛ koti;+
ד [Dalɛtɩ]
10 Ɛɖaŋɩ-m se ɛlɩɩ mɔ-yɔɔ tuda ɛzɩ kpemtɔɔyaɣ yɔ, ɛzɩ mʋʋzʋʋ ŋgʋ kɩwɛ kɩ-ɖɩmɛlɩyɛ taa yɔ.+
11 Ɛhɔmɩ-m nɛ ɖoŋ nʋmɔŋ taa nɛ ɛkɛzɩ nɛ ɛcɩyɩ-m hɔɔlasɩ hɔɔlasɩ;*
Eyeba nɛ mancaɣ ndaakpasɩ.+
12 Ekoti* ɛ-tɔʋ, nɛ ɛtʋʋzɩnɩ-m se ɛyaɣ-m ñɩmɩyɛ.
ה [He]
13 Ɛtʋlɩ man-kataŋgayɩsɩ nɛ ɛ-kɔɔka taa tɔʋ ñɩma.*
14 Manpɩsɩ hoŋa pʋyʋ samasɩ kpeekpe, manpɩsɩ hendu ndʋ siteɣ yɔ evemiye kpeekpe.
15 Ɛkpaɣ mbʋ mbʋ pɩwɛ ñaŋ yɔ nɛ ɛhaɣzɩnɩ-m nɛ eyele nɛ ñandʋ* su man-taa.+
ו [Vav]
16 Ɛkpaɣ putowee nɛ ɛyɔkʋʋnɩ men-kela;
Ɛsʋzʋʋ-m tɔlɩma taa.+
17 Ŋyeba nɛ mɛnfɛyɩ laŋhɛzɩyɛ taa;* mɔnsɔ mbʋ pɩwɛ ɖeu yɔ pɩ-yɔɔ.
18 Pʋyɔɔ mɔyɔɔdʋʋ se: «Men-keɖeɣa mʋwaa, pɩkpɛndɩnɩ lidaʋ ŋgʋ mɛwɛnɩ Yehowa yɔɔ yɔ.»
ז [Zayin]
19 Tɔzɩ man-kʋñɔŋ yɔɔ nɛ ɛzɩma mɛnfɛyɩnɩ ɖɩɣa yɔ pɩ-yɔɔ,+ ñandʋ* nɛ sɔtʋ ñaŋ ñɩndʋ yɔɔ.+
20 Pɩtʋʋ fɛyɩ se ŋkaɣ tɔzʋʋ* nɛ ŋkpilini mɔ-yɔɔ nɛ ŋsɩnɩ-m.+
21 Mɔntɔzʋʋ pɩ-yɔɔ ma-laŋɩyɛ taa; pʋyɔɔ mankaɣ wɛʋ ɖaŋʋʋ yɔɔ.+
ח [Hɛɛtɩ]
23 Pɩkɛ kɩfam paa tanaŋ ŋgʋ;+ ñe-siɣsiɣ wɛtʋ ɖɔwa.+
24 Mɔyɔɔdaa se:* «Yehowa kɛnɩ men-ɖeɖe;+ pʋyɔɔ mankaɣ wɛʋ nɛ manɖaŋɩɣ-ɩ.»+
ט [Tetɩ]
25 Yehowa lakɩ camɩyɛ ɛyʋ weyi ɛtaɣ-ɩ liu yɔ,+ ɛyʋ* weyi ɛwɛɣ nɛ ɛñɩnɩɣ-ɩ yɔ.+
26 Pɩwɛ ɖeu se ɛyʋ esu tamɩyɛ nɛ ɛɖaŋ*+ ñʋʋ yabʋ mbʋ Yehowa kɔŋna yɔ.+
27 Pɩwɛ ɖeu se ɛyʋ ɛtɔɔ kʋñɔmɩŋ* e-evebitu taa.+
י [Yod]
28 Tɛtɛ nɛ ɛcaɣ e-ɖeke nɛ esu tamɩyɛ alɩwaatʋ ndʋ Ɛsɔ kɔŋnɩ kʋñɔmɩŋ ɛnɩ* ɛ-yɔɔ yɔ.+
29 Tɛtɛ nɛ eluzi ɛ-tɩ nɛ ɛpa ɛ-ɛsa mʋzʋʋ taa,*+ pʋtɔma lidaʋ nakʋyʋ tasɩ wɛʋ.+
30 Tɛtɛ nɛ ɛha ɛ-lɩkpaɣzaɣ weyi ɛcɛkɩ-ɩ kadanzɩ yɔ; tɛtɛ nɛ patʋʋ-ɩ ɛzɩ pɩpɔzʋʋ yɔ.
כ [Kaf]
31 Mbʋ pʋyɔɔ yɔ Yehowa ɛɛkaɣ-ɖʋ lɔʋ tam.+
32 Paa ɛkɔnɩ laŋwɛɛkɩyɛ yɔ, ɛ-sɔɔlɩm siɣsiɣ ñɩmbʋ sɔsɔm yɔɔ lɛ, ɛkaɣ ɖɔɖɔ naʋ pʋtɔdɩyɛ.+
33 Mbʋ pʋyɔɔ yɔ ɛtɩɖʋ ɛ-laŋɩyɛ taa se ɛkɔŋnɩ kʋñɔŋ yaa laŋwɛɛkɩyɛ ɛyaa piya yɔɔ.+
ל [Lamɛd]
34 Ɛyʋ fɛyʋʋ tɛtʋ yɔɔ salaka tɩnaa kpeekpe ɛ-nɩŋgbanzɩ tɛɛ yɔ,+
35 Ɛyʋ kizuu se ɛɛhʋʋ lɛlʋ tɔm siɣsiɣ Kɩlɩm ɛsɩndaa yɔ,+
36 Ɛyʋ muluu lɛlʋ tɔm hʋʋ taa yɔ
—Lakasɩ nzɩ, sɩɩkɛdɩɣnɩ Yehowa.
מ [Mem]
37 Ye mbʋ, apɩzɩɣ ɛyɔɔdɩ nɛ eyele nɛ pɩla ye Yehowa ɛtɩɖʋ paɣtʋ se pɩla mbʋ yɔ?
38 Mbʋ pɩkɛ kɩdɛkɛdɩm nɛ mbʋ pɩkɛ kɩbam yɔ,
Pɩɩkpɛndɩɣ nɛ pɩlɩɩnɩ Kɩlɩm nɔɔ taa.
39 Ɛbɛ yɔɔ pɩwɛɛ se ɛyʋ weyi ɛwɛ wezuu yɔ emidi mbʋ pɩlɩɣ ɛ-kɩwɛɛkɩm taa yɔ pɩ-yɔɔ?+
נ [Nuuni]
40 Ðɩtazɩ nɛ ɖiwili ɖa-nʋmɔŋ taa camɩyɛ,+ nɛ ɖɩpɩsɩ Yehowa cɔlɔ.+
41 Ðɩkpazɩ ɖa-laŋa nɛ ɖe-nesi nɛ Ɛsɔ cɔlɔ ɛsɔdaa nɛ ɖɩyɔɔdɩ se:+
42 «Ðɩmanɩ paɣtʋ yɔɔ nɛ ɖɩkaɖɩnɩ-ŋ,+ nɛ ŋtikpeɣ-ɖʋ.+
ס [Samɛk]
44 Ŋkpaɣ ɛsɔmɩnʋʋ nɛ ŋɖɩɣnɩ nʋmɔʋ se ɖa-adɩma ɛtaatɛzɩ nɛ atalɩ-ŋ.+
45 Ŋyeki se ɖɩpɩsɩ azuluma pʋyʋ nɛ mbʋ pɔlɔ huɖe yɔɔ yɔ samasɩ hɛkʋ taa.»
פ [Pe]
46 Ðo-koyindinaa tɩŋa kuluu pɔ-nɔsɩ ɖɔ-yɔɔ.+
47 Sɔɔndʋ nɛ kpacanaa pɩsɩ ɖa-pʋyʋ,+ ɖɩzʋʋ nɛ yɔkʋʋ.+
48 Lɩm lemisi lɩɣnɩ mɛ-ɛsɩndaa nɛ pikpeŋ, mbʋ pʋyɔɔ yɔ pɩpɛlɩ man-samaɣ pɛlɛ.+
ע [Ayin]
49 Mɛ-ɛsa tisiɣ ɛsɩtɛɣlɩm kaahɛzaɣ, pɩɩsɩŋɩɣ,+
50 Pɩkɔɔ nɛ pɩsɩɩnɩ alɩwaatʋ ndʋ Yehowa tisiɣ ɛ-ɛsa nɛ ɛsɔdaa nɛ ɛcɔna yɔ.+
51 Mɛn-tɛtʋ taa pɛlaa kpeekpe yɔɔ lɛ, mɛ-ɛsa kɔnɩ-m* laŋwɛɛkɩyɛ.+
צ [Cade]
52 Mon-koyindinaa ɖɔɔnɩ-m ɛzɩ sumaɣ yɔ, ŋgʋ mantɩla nabʋyʋ.
53 Peyeba nɛ me-wezuu su tamɩyɛ pɔʋ taa; pɛwɛɛ nɛ payakɩ-m pɛɛ.
54 Lɩm kpem ma-ñʋʋ yɔɔ, nɛ mɔyɔɔdɩ se: «Mɔn-tɔm tɛma!»
ק [Kof]
55 Hayɩ Yehowa, maya ña-hɩɖɛ nɛ ɖooo pɔʋ cukaŋ taa.+
56 Nɩɩ mɔ-nɔɔ; taaɖɩɣ ña-nɩŋgbaŋʋʋ alɩwaatʋ ndʋ mamakɩ kubusi se ŋsɩnɩ-m yɔ, alɩwaatʋ ndʋ mamakɩ kubusi se ŋya ma-ñʋʋ yɔ.
57 Ŋñɔtɩnɩ-m kɩyakʋ ŋgʋ ki-wiye maya-ŋ yɔ. Ŋyɔɔdaa se: «Sɔɔndʋ ɛtaakpa-ŋ.»
ר [Resɩ]
58 Hayɩ Yehowa, ŋlʋbɩ mɔ-yɔɔ,* ŋyabɩ me-wezuu.+
59 Hayɩ Yehowa, ŋna kɩdɛkɛdɩm mbʋ palabɩ-m yɔ; mentendi-ŋ, hʋʋ mɔn-tɔm siɣsiɣ.+
60 Ŋna ɛzɩma pakpa-m kɩmɩyɛ yɔ, lɩmaɣza kɩdɛkɛda wena payɩ palabɩ mɔ-yɔɔ yɔ.
ש [Sin]
61 Hayɩ Yehowa, ŋnɩ tʋtʋ ndʋ patʋʋ-m yɔ, lɩmaɣza kɩdɛkɛda wena payɩ palabɩ mɔ-yɔɔ yɔ,+
62 Ŋnɩ mon-koyindinaa ndomee yɔɔ tɔm nɛ mɔn-tɔm ndʋ pɛwɛɛ nɛ pɛwɛɛtɩɣ ɖama evemiye kpeekpe yɔ.
63 Cɔnɩ-wɛ nɛ ŋna; paa pacaɣaa yaa pasɩŋaa yɔ, peteɣ hendu nɛ pohoŋuu-m!
ת [Tav]
64 Hayɩ Yehowa, ŋkaɣ-wɛ hɛyʋʋ pa-lakasɩ nɔɔ taa.
65 Ŋkaɣ yebu nɛ pa-laŋa sʋʋ kpɩzɩŋ nɛ pɩkɛ nɔɔ kɩdɛkɛdaɣ ŋga ŋlɔʋ pɔ-yɔɔ yɔ.
66 Yehowa, ŋkaɣ-wɛ tam nɛ pana nɛ ŋɖɩzɩ-wɛ tɛtʋ yɔɔ.
א [Alɛf]
4 Sika ŋga kañɩlɩsaɣ yɔ, sika ŋga kaakɛ kɩbaŋa yɔ, ɩna ɛzɩma kaatasɩɣ ñɩlɩsʋʋ yɔ!+
Ɩna ɛzɩma pamɩzɩ pɛɛ kiɖeɖena+ paa habɩyɛ kɔna ŋgʋ lɛ kɩ-taa yɔ!+
ב [Bɛtɩ]
2 Piyele nɛ Siyɔŋ pɩyalaa mba paakɛ ñɩm pʋyʋ yɔ, mba paakɛ ñɩm pʋyʋ ɛzɩ sika kele kele ñɩŋga* yɔ,
Ɩna ɛzɩma papɩsɩ ɛzɩ ŋgbaŋ weyi palabɩnɩ cʋʋ yɔ,
Weyi ɩkɛ cʋʋ mayʋ nesi tɛɛ tʋmɩyɛ yɔ!
ג [Gimɛl]
3 Halɩ tɛyɛ hasɩ haɣ hɩɖɛ si-piya se sɩmʋzɩ,
Ɛlɛ man-samaɣ pɛlɛ pɩsɩ kañatʋ tʋ,+ ɛzɩ taataanaa mba pɛwɛ kañɩmbusuu taa yɔ.+
ד [Dalɛtɩ]
4 Lɔkɔtʋ yɔɔ lɛ, hɩɖɛ yɔɔ pɩɣa nzʋlʋmɩyɛ taaɖɩ kɔ-nɔɔ taa.
Piya sʋlʋmʋʋ tɔɔnaɣ,*+ ɛlɛ nɔɔyʋ ɛɛhaɣ-sɩ nabʋyʋ.+
ה [He]
5 Mba pɔtɔkaɣ tɔɔnasɩ leleŋ ñɩnzɩ yɔ, ñɔɔsɩ kʋ-wɛ nɛ pahɩnɩ habɛɛ yɔɔ.+
Mba posuwaɣ wondu ndʋ tɩwɛ liidiye siŋŋ* kpaɣnɩ pa-pɩjatʋ taa yɔ,+ pahɩnɩ tɔlɩma huwa taa.
ו [Vav]
6 Man-samaɣ pɛlɛ nɩŋgbaŋʋʋ hɔm* paɣlaa nɛ pɩkɩlɩ Sodom kɩwɛɛkɩm yɔɔ nɩŋgbaŋʋʋ hɔm,+
Sodom ŋgʋ pɔyɔkɩ-kʋ alɩwaatʋ kʋɖʋmtʋ taa, nɛ nɔɔyʋ* taawɛɛ se ɛsɩnɩ-kʋ yɔ.+
ז [Zayin]
7 Kɩ-tɛ Naziireya mba+ wɛ kele kele nɛ pɩkɩlɩ ɖɔmbɛɛ, pahʋlʋmaa nɛ pɩkɩlɩ naalɩm.
Pɛsɛwa nɛ pɩkɩlɩ ñɩɣlɩm pɛɛ; pañɩlɩsaɣ ɛzɩ saafiirɩ pɛɛ yɔ.
ח [Hɛɛtɩ]
8 Lɛɛlɛɛyɔ, pɛ-ɛsɩndaa piyaa nɛ pɩkɩlɩ miiditina;
Paatasɩɣ-wɛ tɩlʋʋ habɛɛ yɔɔ.
Pɔ-tɔnʋʋ lowa nɛ kɩñɔɔnɩ pɔ-mɔɔ;+ kɩpɩsɩ ɛzɩ ɖeɣa kɩwɩlaɣ yɔ.
ט [Tetɩ]
9 Mba pakʋ-wɛ nɛ laɣɖɛ yɔ pɛwɛ weewee nɛ pɩkpaɖɩ mba ñɔɔsɩ kʋ-wɛ,+
Nɛ pɛwɛɛ nɛ pɛtɛŋ ɖanzɩ hayɩm taa tɔɔnaɣ kɛdɛɖaɣ yɔɔ nɛ pɩwɛɛ ɛzɩ pɔsɔbɩ-wɛ laɣɖɛ yɔ.
י [Yod]
10 Halaa mba pɛkɛ pʋtɔdɩyɛ nayaa yɔ, pe-nesi tɩzɩ pa-maɣmaɣ pe-piya.+
Sɩpɩsɩ pa-kʋñɔwiye tɔɔnaɣ, alɩwaatʋ ndʋ asɛyʋʋ talɩ man-samaɣ pɛlɛ yɔ.+
כ [Kaf]
11 Yehowa lɩzɩ ɛ-pana nɛ ɛwɩlɩ;
Ɛpɩyɩ ɛ-pana sɔsɔna.+
Nɛ ɛsɔbɩ miŋ nɩɩyɩ Siyɔŋ taa nɛ ɩñakɩ ki-tigila.+
ל [Lamɛd]
12 Tɛtʋ yɔɔ awiya nɛ tɛtʋ* yɔɔ mba kpeekpe taatisi
Se kaɖɩnɩyʋ nɛ koyindu pakaɣ sʋnʋʋ Yeruzalɛm nɔnɔsɩ.+
מ [Mem]
13 Kɩ-nayaa kɩwɛɛkɩm yɔɔ, kɩ-cɔjɔnaa kɩdɛkɛdɩm yɔɔ pɩlabɩ mbʋ,+
Mba pɛkpɛdɩ ɛyaa siɣsiɣ tɩnaa mba pɛwɛ kɩ-taa yɔ pa-calɩm yɔ.+
נ [Nuuni]
14 Poyotaɣ ɛzɩ yʋlʋmaa yɔ+ habɛɛ yɔɔ.
Calɩm pisi-wɛ,+
Nɛ pʋyɔɔ lɛ nɔɔyʋ ɛɛpɩzɩɣ nɛ etukuni po-tokonaa.
ס [Samɛk]
15 Pokou nɛ peheyiɣ-wɛ se: «Ɩɖɛɛ! Azuluma tɩnaa mɩ! Ɩɖɛɛ! Ɩɖɛɛ! Itaatukini-ɖʋ!»
Mbʋ pʋyɔɔ yɔ papɩsɩ mba pɛfɛyɩnɩ ɖɩsɩ nɛ poyotuu yem yɔ.
Ɛyaa yɔɔdɩ ajɛɛ taa se: «Paapɩzɩɣ nɛ pacaɣ ɖɔ-cɔlɔ cɩnɛ.*+
פ [Pe]
Ɛyaa ɩɩkaɣ tasʋʋ ñam cɔjɔnaa,+ pa-paa ɛɛkaɣ wɛnʋʋ ɛzʋtʋyaa.»+
ע [Ayin]
17 Ðɩwɛɛ nɛ ɖɩcɔŋna se nɔɔyʋ kaasɩnɩ-ɖʋ, nɛ lɛɛlɛɛyɔ pɩnɩ ɖɛ-ɛsa.+
Ðɩñɩnaɣ sɩnʋʋ ɛjaɖɛ nɖɩ ɖɩtaapɩzɩɣ se ɖɩya ɖa-ñʋʋ yɔ ɖɩ-cɔlɔ kaahɛzaɣ.+
צ [Cade]
18 Paa nɩŋgbaŋaɣ ŋga ɖɩtɩɩkpɛzaa yɔ pɛwɛ ɖa-wayɩ,+ nɛ pʋyɔɔ lɛ ɖɩɩtasɩɣ pɩzʋʋ se ɖɩɖɔ ɖa-samaɣ kadasɩ taa.
Ðɛ-tɛm ñɔtaa; ɖa-avema tɛma, mbʋ pʋyɔɔ yɔ ɖɛ-tɛm talaa.
ק [Kof]
19 Mba pataŋaɣ-ɖʋ yɔ, peseɣ lɛɛ lɛɛ nɛ pɩkɩlɩ kpeliŋ* weyi ɩwɛ ɛsɔdaa yɔ.+
Pataŋaɣ-ɖʋ pʋŋ yɔɔ; papabɩ-ɖʋ kañɩmbusuu taa se palɩɩ ɖɔ-yɔɔ tuda.
ר [Resɩ]
20 Pakpa pɔ-pɔʋ sɔsɔʋ taa Yehowa tɛ patam num,+ weyi ɛkɛ ɖɔ-mɔɔŋ tɛɛ helim yɔ,+
Weyi ɛ-tɔm ɖɩyɔɔdaa se: «Ðɩkaɣ caɣʋ ajɛɛ taa e-kuzotuu taa» yɔ.
ש [Sin]
21 Oo Edom pɛlɛ, mɛyɩ amɛya nɛ ŋwɛɛ taa leleŋ taa,+ ña weyi ŋwɛ Uzi ɛjaɖɛ taa yɔ.
Ɛlɛ pakaɣ-ŋ cɛlʋʋ ɖɔɖɔ kɔpʋ,+ nɛ sʋlʋm kaɣ-ŋ kʋʋ nɛ ŋyele ña-tɩ ndaakpeɖe.+
ת [Tav]
22 Oo Siyɔŋ pɛlɛ, ña-kɩdɛkɛdɩm nɩŋgbaŋʋʋ hɔm talɩ pɩ-tɩnaɣ yɔɔ.
Ɛɛkaɣ-ŋ tasʋʋ kpaɣʋ nɛ ɛkɛzɩ tɛtʋ.+
Ɛlɛ ɛkaɣ kɛzʋʋ ɛ-lɩmaɣza nɛ ña-kɩdɛkɛdɩm yɔɔ, Oo Edom pɛlɛ.
Ɛkaɣ kuluu ña-kɩwɛɛkɩm yɔɔ.+
5 Hayɩ Yehowa, tɔzɩ mbʋ pɩtalɩ-ɖʋ yɔ pɩ-yɔɔ.
Cɔna nɛ ŋna ɖɛ-fɛyɛ.+
2 Ða-ñɩm pɩsɩ agɔma pʋyʋ, ɖa-ɖɩsɩ pɩsɩ agbaaɣdaa mba pʋyʋ.+
3 Ðɩpɩsɩ solisi nɛ ɖɩfɛyɩnɩ caa; ɖo-ɖoonaa wɛ ɛzɩ lelaa yɔ.+
4 Pɩwɛɛ se ɖɩcɛ ɖa-maɣmaɣ ɖa-lɩm pʋcɔ nɛ ɖɩñɔɔ,+ nɛ ɖɩyakɩ ɖa-maɣmaɣ ɖa-ɖasɩ kɩyabʋ.
5 Mba pɛwɛɛ nɛ pataŋ-ɖʋ yɔ, pɛwɛ ɖe-nimaɣ wayɩ;
Pɩnɩ-ɖʋ, ɛlɛ paayeki-ɖʋ se ɖɩhɛzɩ.+
6 Ðiposuu ɖe-nesi nɛ Ejipiti+ nɛ Asiirii+ yɔɔ se ɖihiɣ tɔɔnaɣ* nɛ ɖɩtɔɔ ɖɩhaɣ.
7 Ðɔ-cɔzɔnaa mba paalabɩ kɩwɛɛkɩm yɔ patɩtasɩ wɛʋ, ɛlɛ pɩwɛɛ se ɖɩsɩɣlɩ pa-kɩwɛɛkɩm.
8 Lɛɛlɛɛyɔ lɛ lɩmɖʋyaa tɔkɩ kewiyitu ɖɔ-yɔɔ; nɔɔyʋ fɛyɩ se ɛlɛɣ-ɖʋ pe-nesi taa.
9 Kañɩmbusuu taa laɣɖɛ yɔɔ lɛ, ɖɩɖʋʋ ɖe-wezuu* kaɖɛ taa pʋcɔ nɛ ɖɩkɔŋnɩ ɖɔ-tɔɔnaɣ.*+
10 Ñɔɔsɩ sɔsɔsɩ yɔɔ lɛ, ɖɔ-tɔnʋʋ sa miŋ ɛzɩ miŋ momoɖe yɔ.+
11 Paɖʋ fɛyɛ halaa mba pɛwɛ Siyɔŋ taa yɔ,* Yuuda tɛtʋ ndɩ ndɩ taa pɛlaa mba patɩtɩlɩ abalaa yɔ.+
12 Posusi awumbiya tɩŋ yɔɔ nɛ pe-nesi,+ nɛ patɩña ɛzʋtʋyaa.+
13 Evebiya sɩɣlɩ namɩyɛ, nɛ ɖasɩ yuŋ kɩlɩ abalɩbiya nɛ pɩcɛŋɛsɩɣ-sɩ.
14 Ɛzʋtʋyaa tɩtasɩ wɛʋ tɛtʋ nɔnɔɔ taa;+ evebiya ɩɩmakɩ pɛ-tɛ minziiki.+
15 Taa leleŋ tɩtasɩ wɛʋ ɖa-laŋa taa; ɖa-payɛ pɩsɩ kʋñɔwiye.+
16 Awiya hulaɣ lɩnɩ ɖa-ñʋʋ taa nɛ kɔtɔlɩ. Pɩtɔɔ-ɖʋ, mbʋ pʋyɔɔ yɔ ɖɩlabɩ kɩwɛɛkɩm!
17 Pʋyɔɔ lɛ, ɖa-laŋɩyɛ wɛ kʋdɔŋ taa,+
Nɛ pʋnɛ pʋyɔɔ lɛ, ɖɛ-ɛsa yɔɔ yu fiɖiyii,+
18 Mbʋ pʋyɔɔ yɔ Siyɔŋ Pʋʋ caɣ kpɛɖɛ;+ lɛɛlɛɛyɔ lɛ kɩ-yɔɔ sɔŋgɔlɔ hasɩ mɛyɩɣ.
19 Piyele nɛ ña yɔ, hayɩ Yehowa, ŋcaɣ ñe-kewiyaɣ kpelaɣ taa tam tam.
Ñe-kewiyaɣ kpelaɣ wɛɣ kpaɣ kpaɖʋʋ nɛ ŋwolo kpaɖʋʋ.+
20 Ɛbɛ yɔɔ ŋsɔ ɖɔ-yɔɔ tam nɛ ŋlɔ-ɖʋ alɩwaatʋ sakɩyɛ mbʋ?+
21 Hayɩ Yehowa, pɩsɩnɩ-ɖʋ ñɔ-cɔlɔ, nɛ ɖɩkaɣ ñɔ-cɔlɔ pɩsʋʋ faaa.+
Pɩsɩ ɖa-kɩyakɩŋ kɩfaŋ ɛzɩ caanaʋ taa kɩyakɩŋ yɔ.+
22 Ɛlɛ ŋlɔ-ɖʋ caɣ caɣ.
Ŋkɔ-ɖʋ nɛ pana siŋŋ nɛ ŋwɛɛ a-taa mbʋ.+
Ñʋʋ 1 nɛ piwolo 4 kɛ kʋñɔwiye hendu ndʋ pama-tʋ nɛ Ebree masɩ nɛ pɩcɔlɩ ɛzɩ pakalʋʋ masɩ nzɩ yɔ.
Yaa «Kɩ-pɛlaa.»
Cɩyɩŋ kɛ namɩŋ weyi ɩwɛnɩ hɩŋ ñɔɔɔ yɔ.
Yaa «pɛmɛyɩ.»
Piye piye, «kpɔnɔ.»
Yaa «se pa-kalɩzaɣ ɛpɩzɩ nɛ kɛwɛɛ wezuu.»
Yeruzalɛm tɔm pɔyɔɔdʋʋ ɛzɩ ɛyʋ yɔ.
Yaa «ɛkpazɩ man-kalɩzaɣ ɖoŋ.»
Piye piye, «ɛ-nɔɔ.»
Yaa «Mɛn-pɛlaa.»
Yaa «se pɩsa nɛ pa-kalɩzaɣ wɛɛ wezuu yɔ.»
Yaa «Man-taa lotu.»
Piye piye, «paa hɩlʋʋ ŋgʋ.»
Piye piye, «Ɛfɛyɩ.»
Yaa «Ɛɖɩzɩ ɛ-kazandʋ.»
Piye piye, «se sitaali.»
Yaa «Wɩlɩtʋ.»
Yaa «Man-taa lotu.»
Piye piye, «Mɔ-hɔyɛ huti tɛtʋ yɔɔ.»
Pɔyɔɔdɩ ɛjaɖɛ tɔm ɛzɩ ɛyʋ yɔ, pʋtɔma yɔ palabɩ mbʋ se palɩzɩ pʋtɔdɩyɛ naʋ yaa lalaa siziŋ nɩʋ nɛ pawɩlɩ.
Yaa «sɩ-kalɩzaɣ.»
Piye piye, «ɛkpazɩ ño-koyindinaa hɩlʋʋ.»
Piye piye, «Siyɔŋ pɛlɛ koloŋa.»
Piye piye, «ñɛ-ɛsɩyɛ pɛlɛ.»
Yaa «kalɩzasɩ.»
Yaa «Mɛn-pɛlaa mba patɩtɩlɩ abalaa yɔ.»
Yaa «Mba malʋlɩ-wɛ nɛ pɛwɛɛ alaafɩya camɩyɛ yɔ.»
Yaa «ɛkaɣdɩɣ ma-adɩma; ɛɖɩkɩ ma-adɩma nʋmɔʋ.»
Pɩpɩzɩɣ pɩkɛ, «nɛ eyeba nɛ mɛwɛɛ ɛzɩ hayɩm mbʋ peyebi-pʋ nɛ patɩhayɩ yɔ.»
Piye piye, «Ɛfɛyɩ.»
Piye piye, «ɛ-kɔɔka pɩyalaa.»
Pʋ-tɔbʋʋ se tɩʋ ŋgʋ kɩwɛ ñaŋ yɔ.
Yaa «Ŋyeba nɛ man-kalɩzaɣ fɛyɩ laŋhɛzɩyɛ taa.»
Pʋ-tɔbʋʋ se tɩʋ ŋgʋ kɩwɛ ñaŋ yɔ.
Yaa «ña-kalɩzaɣ kaɣ tɔzʋʋ.»
Yaa «Man-kalɩzaɣ yɔɔdʋʋ se.»
Yaa «kalɩzaɣ.»
Yaa «ɛyʋ ɛɖʋ suuɖu nɛ ɛɖaŋ.»
Piye piye, «ɛyʋ ɛkpaɣ sʋʋtʋ ɖaʋ.»
Yaa «Ɛsɔ tɩnɩɣ-kʋ.»
Yaa «Ɛsʋzɩ ɛ-nɔɔ mʋzʋʋ taa.»
Yaa «kɔnɩ man-kalɩzaɣ.»
Yaa «ŋlʋbɩ tɔm ndʋ man-kalɩzaɣ wɛna se pahʋʋ-tʋ yɔ tɩ-yɔɔ.»
Ebree tɔm piye nɖɩ palabɩnɩ tʋmɩyɛ yɔ, ye pɛɖɛzɩ-ɖɩ piye piye yɔ, ɖɩwɩlɩɣ ɛzɩma paɖʋʋ ñɩɣyʋʋ miŋ taa se kiyoli nɛ palɩzɩ kɩ-azuluma nɛ kɩwɛɛ cɩɖɩ cɩɖɩ yɔ.
Piye piye, «kpɔnɔ.»
Piye piye, «wondu kɩsɛɛmtʋ cɩɩɩ.»
Yaa «kɩdɛkɛdɩm.»
Yaa «nɛ nesi nasɩyɩ.»
Yaa «tɛtʋ ndʋ tɩlʋlʋʋ yɔ.»
Yaa «Paapɩzɩɣ nɛ pɛkɛ agɔma cɩnɛ.»
Piye piye, «Yehowa ɛsɩndaa.»
Yaa «keziyewaa.»
Piye piye, «kpɔnɔ.»
Yaa «ɖa-kalɩzaɣ.»
Piye piye, «ɖɔ-kpɔnɔ.»
Yaa «Pakpa halaa mba pɛwɛ Siyɔŋ taa yɔ nɛ ɖoŋ nɛ pasʋʋnɩ-wɛ.»