AMOOSI
1 Amoosi* tɔm; ɛɛkɛ heŋ ɖɔyaa mba paawɛ Tekowa+ yɔ pa-taa lɛlʋ. Natʋ natʋyʋ yɔɔ pɩtɩŋnaa nɛ pawɩlɩ-ɩ tɔm ndʋ, nɛ titukuuni Izrayɛɛlɩ. Pawɩlɩ-ɩ tʋ Yuuda wiyaʋ Uziya+ alɩwaatʋ taa nɛ Yowaasɩ+ pɩyalʋ Yerobowam+ weyi ɛkɛ Izrayɛɛlɩ wiyaʋ yɔ ɛ-alɩwaatʋ taa, pɩnzɩ 2 pʋcɔ nɛ tɛtʋ ñamsɩɣ.+ 2 Ɛyɔɔdaa se:
«Yehowa nɔɔ kaɣ tiluu nɛ Siyɔŋ kiŋ,
Nɛ ɛkaɣ yebu nɛ panɩɩ ɛ-nɔɔ Yeruzalɛm taa.
Lona wena a-taa ninɖiɣyaa kpɩna tɔkɩ ñɩtʋ yɔ, akaɣ caɣʋ kʋñɔwiye,
Nɛ wɩlɩŋ kaɣ kpaʋ Karmɛɛlɩ pʋʋ ñʋʋ taa.»+
3 «Tɔm tʋnɛ Yehowa yɔɔdʋʋ:
“‘Damaasɩ kaañamtʋ lakasɩ* 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ pamabɩ Galaadɩ nɛ ñɩɣtʋ kɛɛkɛɛ ŋgʋ pamakɩnɩ tɔɔnaɣ yɔ.+
5 Mankaɣ pɛlʋʋ Damaasɩ+ nɔnɔsɩ yɔɔ ɖaŋ;
Mankaɣ ɖɩzʋʋ Bikat-Avɛɛnɩ taa mba
Nɛ weyi ɛtɔkɩ kewiyitu* Bɛtɩ-Edɛɛnɩ yɔ;
Nɛ Siirii taa mba kaɣ wobu yomiye taa Kiir,’+ Yehowa yɔɔdʋʋna.”
6 Tɔm tʋnɛ Yehowa yɔɔdʋʋ:
“‘Gaazaa+ kaañamtʋ lakasɩ 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ pakpaɣ yomaa tindimiye+ kpeekpe nɛ paɖʋzɩ-ɖɩ Edom nesi tɛɛ.
8 Mankaɣ ɖɩzʋʋ Asɩdoodi+ taa mba,
Nɛ weyi ɛtɔkɩ kewiyitu* Askelɔɔnɩ+ yɔ;
Mankaɣ kpazʋʋ me-nesi Ekrɔɔnɩ+ yɔɔ,
Nɛ Filistii ñɩma mba pɩkazaa yɔ, pakaɣ sɩbʋ,’+ Kɩbaɣlʋ Kɩlɩm Yehowa yɔɔdʋʋna.”
9 Tɔm tʋnɛ Yehowa yɔɔdʋʋ:
“Tiirɩ+ kaañamtʋ lakasɩ 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ pakpaɣ yomaa tindimiye kpeekpe nɛ paɖʋzɩ-ɖɩ Edom nesi tɛɛ,
Nɛ mbʋ pʋyɔɔ yɔ patɩtɔzɩ koobiya ɛgbɛyɛ ɖʋʋ yɔɔ.+
11 Tɔm tʋnɛ Yehowa yɔɔdʋʋ:
“Edom+ kaañamtʋ lakasɩ 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ ɛɖʋ ɛ-maɣmaɣ e-koobu wayɩ nɛ laɣɖɛ,+
Nɛ mbʋ pʋyɔɔ yɔ ekizaa se ɛɛnaɣ pʋtɔdɩyɛ;
Ɛ-pana taa lɛ, ɛwɛɛ nɛ ɛcɩyɩɣ-wɛ kaahɛzaɣ,
Nɛ ɛkɔ-wɛ nɛ pana tam.+
13 Tɔm tʋnɛ Yehowa yɔɔdʋʋ:
“‘Amooni mba+ kaañamtʋ lakasɩ 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ payasɩ Galaadɩ halaa hosi tɩnaa se pawalɩsɩ pa-maɣmaɣ pɛ-tɛtʋ.+
14 Pʋyɔɔ lɛ, mankaɣ ñaɣzʋʋ Raba+ koloŋa miŋ,
Nɛ ɩkaɣ ñaɣʋ ki-tilima* ɖoŋ ñɩna,
Alɩwaatʋ ndʋ pamakɩ you kubuka you kɩyakʋ wiye yɔ,
Alɩwaatʋ ndʋ helim makɩ ɖoŋ tɛʋ ŋgʋ kɩnɩɣnɩ helim yɔ kɩ-kɩyakʋ wiye yɔ.
15 Nɛ pe-wiyaʋ nɛ ɛ-awumbiya pakaɣ wobu yomiye taa,’+ Yehowa yɔɔdʋʋna.”
2 «Tɔm tʋnɛ Yehowa yɔɔdʋʋ:
“‘Mowaabʋ+ kaañamtʋ lakasɩ* 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ ɛñaɣzɩ Edom wiyaʋ mɔɔ miŋ nɛ ɛpɩsɩ-yɛ akalʋʋ.
2 Pʋyɔɔ lɛ, mankaɣ tiyinuu miŋ Mowaabʋ taa,
Nɛ ɩkaɣ ñaɣʋ Keriyɔɔtɩ+ tilima* ɖoŋ ñɩna;
Mowaabʋ kaɣ sɩbʋ kɔkɔɖɛ taa,
Nɛ you kubusi taa, nɛ nɔndɔʋ hʋlʋʋ+ taa.
3 Mankaɣ kʋsʋʋ weyi ɛtɔkɩ kewiyitu yɔ* Mowaabʋ hɛkʋ taa
Nɛ mankʋ ɛ nɛ kɩ-awumbiya tɩŋa,’+ Yehowa yɔɔdʋʋna.”
4 Tɔm tʋnɛ Yehowa yɔɔdʋʋ:
“Yuuda kaañamtʋ lakasɩ+ 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ pɔlɔ Yehowa paɣtʋ,*
Nɛ mbʋ pʋyɔɔ yɔ patɩɖɔ tɔm ndʋ eheyi-wɛ yɔ tɩ-yɔɔ;+
Ɛlɛ cɛtɩm mbʋ pɩ-wayɩ pɔ-cɔzɔnaa kaatɩŋaa yɔ, mbʋ ɖɔɖɔ piyeba nɛ pele.+
6 Tɔm tʋnɛ Yehowa yɔɔdʋʋ:
“Izrayɛɛlɩ kaañamtʋ lakasɩ+ 3 yɔɔ, nɛ 4 yɔɔ lɛ, maakaɣ lɛɣzʋʋ ma-lɩmaɣza,
Mbʋ pʋyɔɔ yɔ pɛpɛdɩɣ ɛyʋ siɣsiɣ tʋ liidiye pɔɔyɩsɩ yɔɔ,
Nɛ pɛpɛdɩɣ kʋñɔndʋ naataŋgbala 2 yɔɔ.+
Ɛyʋ nɛ ɛ-caa pasʋʋnɩ halɩbɩɣa kʋɖʋmaɣ,
Nɛ pepisiɣ ma-hɩɖɛ kiɖeɖeye.
8 Polosuu pa-tɩ pɩsaŋ yɔɔ paa altaaru+ ŋgʋ lɛ kɩ-cɔlɔ. Pamʋ pɩsaŋ ɛnɩ mba pɔtɔɔ-wɛ kɩmɩyɛ yɔ pɔ-cɔlɔ se pɛhɛyɩ-wɛ lɛ pʋcɔ nɛ papɩsɩnɩ-wɛ pɩsaŋ ɛnɩ;+
Nɛ vɛɛ ŋgʋ pɔñɔʋ pɛ-ɛsɔnaa ɖɩɣa* taa yɔ, pamʋ-kʋ mba pɛpɛlɩ-wɛ kɩmɩyɛ yɔ pɔ-cɔlɔ.”
9 “Ɛlɛ mɛkɛnɩ weyi ɛɛɖɩzɩ Amoori tʋ pɛ-ɛsɩndaa yɔ,+
Amoori tʋ weyi ɛɛɖaɣlɩ ɛzɩ sɛɛdrɩ tɩŋ nɛ ɛwɛɛ ɖoŋ ɛzɩ sɛɛnɩ tɩŋ yɔ;
Manɖɩzɩ e-pee hayo nɛ e-lila pɩ-tɛɛ.+
10 Malɩzɩ-mɩ Ejipiti ɛjaɖɛ taa,+
Nɛ meyele nɛ ɩɖɔ kañɩmbusuu taa pɩnzɩ 40,+
Se ɩmʋ Amoori tʋ ɛjaɖɛ nɛ ɖɩpɩsɩ mɩ-pʋyʋ.
Pɩtɩkɛ mbʋ yaa we, Oo Izrayɛɛlɩ samaɣ?” Yehowa yɔɔdʋʋna.
12 “Ɛlɛ ɩwɛɛ nɛ ɩhaɣ Naziireya mba vɛɛ se pɔñɔɔ,+
Nɛ ɩɖʋ paɣtʋ nayaa se: ‘Pɩtɩpɔzɩ se ɩyɔɔdɩ natʋ tɔm.’+
13 Pʋyɔɔ lɛ, mankaɣ-mɩ tɔyɩtʋʋ mi-lone taa,
Ɛzɩ kɛɛkɛɛ ŋgʋ kɩsɩɣlɩ tɔɔnaɣ pee sakɩyɛ wena pɛsɛtaa yɔ kɩtɔyɩtʋʋ mbʋ pɩ-yɔɔ kɩɖɔŋ yɔ.
14 Weyi eseɣ lɛɛ lɛɛ yɔ, ɛɛkaɣ wɛnʋʋ lone nɖɩ ɖɩ-taa ese nɛ ewolo yɔ,+
Weyi ɛkɛ ɖoŋ tʋ yɔ, e-ɖoŋ kaɣ tɛm,
Nɛ you laɖʋ nɔɔyʋ ɛɛkaɣ yabʋ e-wezuu* ñʋʋ.
15 Tɔʋ tɔyʋ ɛɛkaɣ sɩŋʋʋ e-ɖeɖe,
Weyi ɛ-naataŋ seɣ lɛɛ lɛɛ yɔ, ɛɛkaɣ tʋlʋʋ,
Nɛ kpaŋnʋ yɔɔ caɣyʋ ɛɛkaɣ yabʋ e-wezuu* ñʋʋ.
16 Halɩ you laɖaa taa weyi ɛkɩlɩ wɛnʋʋ abalɩtʋ yɔ*
Ɛkaɣ seu ndaakpeɖe kɩyakʋ ŋgʋ ki-wiye,”+ Yehowa yɔɔdʋʋna.»
3 «Oo, Izrayɛɛlɩ samaɣ, iwelisi tɔm ndʋ Yehowa yɔɔdɩ mɩ-yɔɔ yɔ, tɔm ndʋ ɛyɔɔdɩ samaɣ ŋga ɛlɩzɩ Ejipiti ɛjaɖɛ taa yɔ ke-kpeekpe kɔ-yɔɔ yɔ:
2 “Mi-ɖeke mansɩm tɛtʋ yɔɔ hɔŋ kpeekpe taa.+
Pʋyɔɔ mankaɣ-mɩ pɔzʋʋ akɔnta mɩ-kɩdɛkɛdɩm kpeekpe yɔɔ.+
3 Ye ɛyaa 2 ɩtɩnɩɩnɩ ɖama se pakatɩ ɖama yɔ, pakaɣ kpɛndʋʋ nɛ pɔɖɔ na?
4 Ye mʋʋzʋʋ ɛtɩna nabʋyʋ se kɩcaɣ kpaʋ yɔ, kɩmakɩ kubusi laʋ tɛɛ?
Ye mʋʋzʋʋ* ɛtɩkpa nabʋyʋ yɔ, kɩmʋdʋʋ kɩ-ɖɩmɛlɩyɛ taa?
5 Ye nɔɔyʋ ɛtɩñɩ sumaɣ kpaca nakʋyʋ yɔ, kakaɣ tɔlʋʋ kpaca ŋgʋ kɩ-taa tataa?*
Ye kpaca ɛtɩkpa nabʋyʋ yɔ, kɩtɔʋ yem?
6 Ye pahʋlɩ nɔndɔʋ tɛtʋ taa yɔ, ɛyaa iiseliɣ yaa we?
Ye asɛyʋʋ nakʋyʋ ɛlabɩ tɛtʋ taa yɔ, pɩtɩkɛ Yehowa cɔlɔ pɩlɩnaa yaa we?
7 Mbʋ pʋyɔɔ yɔ Kɩbaɣlʋ Kɩlɩm Yehowa ɛɛkaɣ nabʋyʋ labʋ
Ye etikuli ɛ-mɛsaɣ tɛɛ tɔm yɔɔ nɛ ɛwɩlɩ ɛ-lɩmɖʋyaa mba pɛkɛ nayaa yɔ.+
8 Mʋʋzʋʋ mabɩ kubuka!+ Anɩ sɔɔndʋ ɛɛkaɣ kpaʋ?
Kɩbaɣlʋ Kɩlɩm Yehowa yɔɔdaa! Aakaɣ yɔɔdʋʋ natʋ tɔm?”+
9 “Isusi-tʋ Asɩdoodi tilima ɖoŋ ñɩna yɔɔ
Nɛ tilima ɖoŋ ñɩna yɔɔ Ejipiti ɛjaɖɛ taa.
Ɩyɔɔdɩ se: ‘Ikpeɣli Samaarii pʋŋ yɔɔ;+
Ɩna ɛzɩma pisidi kɩ-taa yem yem yɔ
Nɛ mulum lakasɩ nzɩ sɩwɛ kɩ-taa yɔ.+
10 Mbʋ pʋyɔɔ yɔ paasɩŋ ɛzɩma pala mbʋ pɩtʋʋzaa yɔ,
Mba pekpeɣliɣ puuyaɣ lakasɩ nɛ ɖɩzʋʋ nɛ pakpazɩɣ huwa pe-tilima* ɖoŋ ñɩna taa yɔ,’ Yehowa yɔɔdʋʋna.”
11 Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Koyindu nɔɔyʋ kaɣ ɛjaɖɛ cɔʋ nɛ ɛta,+
Ɛkaɣ mʋʋ ño-ɖoŋ,
12 Tɔm tʋnɛ Yehowa yɔɔdʋʋ:
“Ɛzɩ ninɖiɣyu hɔɔzʋʋ nɩŋgbanzɩ 2 yaa nɩŋgbaŋʋʋ hɔɔlaɣ mʋʋzʋʋ nɔɔ taa yɔ,
Mbʋ ɖɔɖɔ pakaɣ hɔɔzʋʋ Izrayɛɛlɩ mba,
Mba lɛɛlɛɛyɔ lɛ, pacaɣ kaɖʋnaa mba pɛwɛ kajʋka yɔ pɔ-yɔɔ nɛ kpelisi kɩbanzɩ* yɔɔ Samaarii taa yɔ.”+
13 “Iwelisi nɛ ɩpaɣ* Yakɔɔb ɖɩɣa, Kɩbaɣlʋ Kɩlɩm Yehowa, yoyaa tɛ Ɛsɔ yɔɔdʋʋna.
14 Mbʋ pʋyɔɔ yɔ kɩyakʋ ŋgʋ mankaɣ Izrayɛɛlɩ pɔzʋʋ akɔnta ɛ-kaañamtʋ lakasɩ* kpeekpe yɔɔ yɔ,+
Mankaɣ ɖɔɖɔ pɔzʋʋ akɔnta Betɛɛlɩ altaarunaa+ yɔɔ;
Pakaɣ pɛlʋʋ altaaru hɩŋ nɛ ɩtɔlɩ tataa.+
15 Mankaɣ yɔkʋʋ nikaɣ alɩwaatʋ ɖɩɣa pɩkpɛndɩnɩ soŋaɣ alɩwaatʋ* ɖɩɣa.”
4 «Iwelisi tɔm tʋnɛ, mɩ Basaanɩ naŋ halɩñɩŋ,
Weyi ɩwɛ Samaarii pʋʋ+ yɔɔ yɔ,
Mɩ halaa mba imuluu ajamaa+ nɛ ɩtɔyɩtʋʋ kʋñɔndɩnaa yɔ,
Mɩ mba iheyiɣ mɩ-walaa* se: “Ɩkɔnɩ-ɖʋ nabʋyʋ nɛ ɖɩñɔɔ” yɔ!
2 Kɩbaɣlʋ Kɩlɩm Yehowa ɖuuni e-kele kele wɛtʋ:
“‘Ɩna! Kɩyakɩŋ kaɣ kɔm mɩ-yɔɔ, nɛ alɩwaatʋ ndʋ lɛ ɛkaɣ-mɩ seɣu nɛ alikizaŋ ñɩma wena a-nɔsɩ kotaa yɔ
Nɛ eseɣ mɩ-taa mba pakazaa yɔ nɛ kolasɩ nzɩ pakpaɣnɩ kpakpasɩ yɔ.
3 Ɩkaɣ lɩnʋʋ koloŋa pɔŋ, paa weyi ɛtɩŋɩɣnɩ pɔʋ ŋgʋ kɩwɛ ɛ-ɛsɩndaa kpaagbaa yɔ kɩ-taa;
Nɛ pakaɣ-mɩ lɔʋ Harmɔɔnɩ taa,’ Yehowa yɔɔdʋʋna.”
5 Ɩñaɣzɩ kpɔnɔ ŋgʋ kɩ-taa paɖʋ lɔlɔm yɔ nɛ pɩkɛ ɛsɩmɩyɛ kɩlaʋ;+
Isusuni nɔɔ kɩkʋyaɣ mɩ-sɔɔlɩm haɖɛ!
Mbʋ pʋyɔɔ yɔ mbʋ ɩsɔɔlɩ labʋ, Oo Izrayɛɛlɩ samaɣ,” Kɩbaɣlʋ Kɩlɩm Yehowa yɔɔdʋʋna.
6 “Piyele nɛ ma yɔ, meyeba nɛ mi-kela wɛɛ cɩɖɩ cɩɖɩ tɔɔnaɣ kɛdɛɖaɣ yɔɔ,* mɩ-tɛtʋ kpeekpe taa
Nɛ meyeba nɛ kpɔnɔ tɛɖɩ mɩ-ɖɩsɩ kpeekpe taa;+
Ɛlɛ ɩtɩpɩsɩ nɛ ɩkɔɔ mɔn-cɔlɔ,”+ Yehowa yɔɔdʋʋna.
7 “Pɩtasɩ lɛ, fenasɩ 3 pʋcɔ nɛ kʋmtʋ talɩɣ lɛ, mankpa tɛʋ nɛ kɩtɩnɩɩ mɩ-tɛ;+
Meyeba nɛ tɛʋ nɩɩ tɛtʋ kʋɖʋmtʋ taa ɛlɛ kɩtɩnɩɩ tɛtʋ lɛɛtʋ taa.
Tɛʋ nɩɣaɣ kotoŋa kʋɖʋmaɣ yɔɔ,
Ɛlɛ kotoŋa lɛɛka yɔɔ ɖenɖe tɛʋ taanɩɣ yɔ, wɩlɩŋ kpaɣaɣ peeɖe.
8 Tɛtʋ 2 yaa 3 taa ɛyaa ɖɔŋaɣ cɔŋɔ cɔŋɔ nɛ powoki tɛtʋ kʋɖʋmtʋ taa se pɔñɔɔ lɩm,+
Ɛlɛ pataañɩɣzɩɣ;
Paa mbʋ yɔ ɩtɩpɩsɩ nɛ ɩkɔɔ mɔn-cɔlɔ,”+ Yehowa yɔɔdʋʋna.
9 “Mantɩŋnɩ helim miŋ ñɩmbʋ nɛ tɔɔnasɩ kʋdɔŋ yɔɔ nɛ mɛwɛɛkɩ mɩ-tɔɔnasɩ.+
Iyeba nɛ mɩ-kaɖasɩ nɛ viiñi hayɩm huu,
Ɛlɛ kudoloŋ tɔkaɣ mi-fiigi tɩŋ nɛ mi-oliivi tɩŋ;+
Nɛ paa mbʋ yɔ, ɩtɩpɩsɩ nɛ ɩkɔɔ mɔn-cɔlɔ,”+ Yehowa yɔɔdʋʋna.
10 “Mentiyini mɩ-hɛkʋ taa kʋdɔŋ sɔsɔʋ ɛzɩ ŋgʋ kɩkɔm Ejipiti yɔɔ yɔ.+
Mankʋ mi-evebiya nɛ laɣɖɛ+ nɛ menkpi mɩ-kpaŋnaŋ.+
Meyeba nɛ mi-ɖigbeɣliye lona* taa sɔŋ kpa mɩ-mɔɔŋ tɛɛ;+
Ɛlɛ ɩtɩpɩsɩ nɛ ɩkɔɔ mɔn-cɔlɔ,” Yehowa yɔɔdʋʋna.
11 “Mɔnkɔnɩ ɖɩzʋʋ mɩ-hɛkʋ taa
Ɛzɩ Ɛsɔ ɖɩzʋʋ Sodom nɛ Gomɔɔrɩ yɔ.+
Nɛ ɩɩwɛ ɛzɩ ɖeekukulaɣ ŋga palɩzɩnɩ miŋ taa yɔ;
Ɛlɛ ɩtɩpɩsɩ nɛ ɩkɔɔ mɔn-cɔlɔ,”+ Yehowa yɔɔdʋʋna.
12 Pʋyɔɔ lɛ, mbʋ mankaɣ-ŋ labʋ, Oo Izrayɛɛlɩ.
Ɛzɩma mankaɣ-ŋ labʋ mbʋ yɔ pʋyɔɔ lɛ,
Ñɔɔzɩ ña-tɩ nɛ ŋkatɩ ñɛ-Ɛsɔ, Oo Izrayɛɛlɩ.
13 Mbʋ pʋyɔɔ yɔ, na! Ɛnʋ labɩnɩ pʋŋ+ nɛ Ɛnʋ labɩnɩ helim;+
Eheyiɣ ɛyʋ ɛ-lɩmaɣza,
Ɛpɩsɩɣ tanaŋ tɛɛ ñalɩmɩyɛ cɩkpɛndʋʋ,+
Nɛ ɛfɛyɩɣ tɛtʋ yɔɔ lona kʋkʋya yɔɔ;+
Ɛ-hɩɖɛ lɛ yoyaa tɛ Ɛsɔ Yehowa.»
5 «Iwelisi tɔm tʋnɛ, ndʋ mɔyɔɔdʋʋ mɩ-yɔɔ nɛ tɩkɛ kʋñɔwiye hendu yɔ, Oo Izrayɛɛlɩ ɖɩɣa:
2 “Pɛlɛ weyi ɛtɩtɩlɩ abalʋ yɔ, weyi ɛkɛ Izrayɛɛlɩ yɔ, ɛtɔlaa;
Ɛɛpɩzɩɣ nɛ ɛtasɩ kʋyʋʋ.
Peyebi-i ɛ-maɣmaɣ ɛ-tɛtʋ yɔɔ;
Nɔɔyʋ fɛyɩ se ɛkʋsɩ-ɩ.”
3 «Mbʋ pʋyɔɔ yɔ tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Tɛtʋ ndʋ tiwokini ɛyaa 1 000 you taa yɔ, pɩkaɣ-tʋ kazʋʋ ɛyaa 100 ɖeke;
Nɛ ndʋ tiwokini ɛyaa 100 you taa yɔ, pɩkaɣ-tʋ kazʋʋ ɛyaa 10 ɖeke. Mbʋ kaɣnɩ talʋʋ Izrayɛɛlɩ ɖɩɣa.”+
4 «Mbʋ pʋyɔɔ yɔ tɔm tʋnɛ Yehowa heyiɣ Izrayɛɛlɩ ɖɩɣa:
“Ɩñɩnɩ-m nɛ iwolo pɩ-yɔɔ nɛ ɩwɛɛ wezuu.+
5 Ɩtaañɩnɩ Betɛɛlɩ,+
Itaawolo Kilgaalɩ+ yaa ɩtaatɛzɩ se iwolo Beyɛɛrɩ-Seeba,+
Mbʋ pʋyɔɔ yɔ pɩtʋʋ fɛyɩ se Gilgaalɩ kaɣ wobu yomiye taa,+
Nɛ Betɛɛlɩ ɛɛkaɣ tasʋʋ wɛʋ.*
6 Ɩñɩnɩ Yehowa, nɛ iwolo pɩ-yɔɔ nɛ ɩwɛɛ wezuu,+
Se pɩtaala nɛ ɛlɩɩ tuda ɛzɩ miŋ yɔ Yosɛɛfʋ ɖɩɣa yɔɔ,
Ɩkaɣ ñaɣʋ Betɛɛlɩ nɛ nɔɔyʋ fɛyɩ se ɛɖɩzɩ-ɩ.
8 Ɛnʋ Weyi ɛlabɩ Kima tɩɩnzɩ tindimiye* nɛ Kesil tɩɩnzɩ tindimiye*+ yɔ,
Ɛnʋ Weyi ɛpɩsɩɣ cɩkpɛndʋʋ sɔsɔʋ tanaŋ yɔ,
Ɛnʋ Weyi ɛlakɩ nɛ wɩsɩ taa yuu cɩkpɛndʋʋ ɛzɩ ɖoo taa yɔ,+
Ɛnʋ Weyi ɛyaɣ teŋgu taa lɩm
Se ɛpɩyɩ-pʋ tɛtʋ yɔɔ+ yɔ
—Ɛ-hɩɖɛ lɛ Yehowa.
9 Ɛkaɣ yebu nɛ ɖɩzʋʋ kɔɔ tuda ɖoŋ tʋ yɔɔ,
Nɛ ɛkɔnɩ ɖɩzʋʋ lona ɖoŋ ñɩna yɔɔ.
10 Papaɖɩɣ mba pekiziɣni ɛyaa tɔm tɛtʋ nɔnɔɔ taa yɔ,
Nɛ pa-taa wɩɣnɩ mba pɔyɔɔdʋʋ toovenim yɔ.+
11 Ɩpɔzʋʋ kʋñɔndʋ se ɛhɛyɩ hayɩm yɔɔ*
Nɛ ɩmʋʋ ɛ-tɔɔnaɣ pee se pɩkɛ lambuu;+ pʋyɔɔ lɛ,
Ɩɩkaɣ wobu pɩ-yɔɔ nɛ ɩwɛɛ mɩ-ɖɩsɩ nzɩ ɩmanɩ pɛɛ wena ɩsaɣaa yɔ sɩ-taa+
Nɛ ɩɩkaɣ ñɔʋ ɖɔɖɔ vɛɛ ŋgʋ ɩlabɩnɩ viiñi kɩbaŋʋ ŋgʋ ɩsɔwa yɔ.+
12 Mbʋ pʋyɔɔ yɔ mansɩm ɛzɩma mɩ-kaañamtʋ lakasɩ* ɖɔwa yɔ
Nɛ ɛzɩma mɩ-kɩwɛɛkɩm paɣlaa siŋŋ yɔ
—Ɩlakɩ kañatʋ ɛyʋ siɣsiɣ tʋ,
Ɩmʋʋ mulum kʋjɔŋ,*
Nɛ ikiziɣni kʋñɔndʋ wala wena ɛwɛna yɔ tɛtʋ nɔnɔɔ taa.+
13 Pʋyɔɔ lɛ, mba pɛwɛnɩ lɛɣtʋ yɔ, pakaɣ sum tamɩyɛ alɩwaatʋ ndʋ tɩ-taa,
Mbʋ pʋyɔɔ yɔ pɩkaɣ kɛʋ asɛyʋʋ alɩwaatʋ.+
14 Ɩñɩnɩ mbʋ pɩkɛ kɩbam yɔ, nɛ pɩtaakɛ mbʋ pɩkɛ kɩdɛkɛdɩm yɔ,+
Se pɩsa nɛ iwolo pɩ-yɔɔ nɛ ɩwɛɛ wezuu.+
Ðɩnɛ ɛlɛ yoyaa tɛ Ɛsɔ Yehowa pɩzɩɣ nɛ ɛwɛɛ mɩ-cɔlɔ,
Ɛzɩ ɩyɔɔdʋʋ se ɛwɛɛ yɔ.+
15 Ɩpaɖɩ mbʋ pɩkɛ kɩdɛkɛdɩm yɔ, nɛ ɩsɔɔlɩ mbʋ pɩkɛ kɩbam yɔ,+
Iyele nɛ siɣsiɣ wɛtʋ wa tɛtʋ nɔnɔɔ taa.+
Pɩtɩla yɔ yoyaa tɛ Ɛsɔ Yehowa
Kaɣ naʋ mba pɩkazɩ Yosɛɛfʋ yɔ pa-pʋtɔdɩyɛ.”+
16 «Pʋyɔɔ lɛ, tɔm tʋnɛ Yehowa, yoyaa tɛ Ɛsɔ Yehowa yɔɔdʋʋ:
“Peenduu kaɣ wɛʋ samaɣ kadasɩ tɩŋa taa,
Nɛ pakaɣ yɔɔdʋʋ habɛɛ tɩŋa yɔɔ se: ‘Hayɩ yabaa! Hayɩ yabaa!’
Pakaɣ yaʋ haɖaa se pacaɣ kʋñɔwiye
Nɛ mba pɛwɛ niye kʋñɔwiye caɣʋ taa yɔ se pepeendi.”
17 “Paa viiñi hayɩm mbʋ pɩ-taa lɛ, pakaɣ peenduu;+
Mbʋ pʋyɔɔ yɔ mankaɣ tɩŋʋʋ mɩ-hɛkʋ taa,” Yehowa yɔɔdʋʋna.
18 “Pɩtɔɔ mba pɔsɔɔlɩ Yehowa kɩyakʋ siŋŋ yɔ!+
Ye mbʋ, Yehowa kɩyakʋ kaɣ-mɩ kɛʋ we?+
Kɩkaɣ kɛʋ cɩkpɛndʋʋ, nɛ pɩtɩkɛ ñalɩmɩyɛ.+
19 Kɩkaɣ wɛʋ ɛzɩ ɛyʋ weyi eseɣ mʋʋzʋʋ nɛ ɛkatɩ kpemtɔɔyaɣ yɔ,
Nɛ ɛsʋʋ ɛ-ɖɩɣa taa nɛ ɛñɩɣ e-nesi koloŋa yɔɔ lɛ, ɖʋm ñasɩ-ɩ.
20 Yehowa kɩyakʋ kaɣ kɛʋ cɩkpɛndʋʋ, nɛ pɩtɩkɛ ñalɩmɩyɛ;
Kɩkaɣ yuu kpimm, nɛ pɩtɩkɛ ñalɩmɩyɛ ñamm.
21 Manpaɖɩɣ mɩ-kazandʋ, mantɩsɔɔlɩ-tʋ,+
Nɛ mi-ŋgee kigbeɣliŋ sɔzɩŋ ɛɛkɛdɩɣnɩ-m.
22 Paa ɩla-m kɩlaŋ kɩñaɣzɩŋ nɛ haɖɛ kɩlaŋ yɔ,
Ɩɩkaɣ-m kɛdɩnʋʋ;+
Nɛ man-taa ɛɛkaɣ labʋ leleŋ nɛ mɩ-laŋhɛzɩyɛ kɩlaŋ weyi ɩlabɩnɩ kpɩna num ñɩna yɔ.+
23 Ɩɖɛnɩ mɔ-yɔɔ mi-hendu kɔkɔɖɛ;
Nɛ itaayele nɛ manɩɩ mɩ-cɩmʋʋ wondu ndʋ tɩ-yɔɔ wɛ nimasɩ yɔ tɩ-taŋ.+
24 Iyele nɛ mbʋ pɩtʋʋzaa yɔ pikpe ɛzɩ lɩm yɔ,+
Nɛ siɣsiɣ wɛtʋ kpe ɛzɩ lemeɣa ŋga kekpeŋ tam yɔ.
25 Ɛzɩ ɩkɔnɩ-m kɩlaŋ nɛ haɖɛ kɩlaŋ
Pɩnzɩ 40 nzɩ ɩɩwɛ kañɩmbusuu taa yɔ, Oo Izrayɛɛlɩ ɖɩɣa?+
26 Lɛɛlɛɛyɔ lɛ, pɩkaɣ pɔzʋʋ se ɩkpaɣ mi-wiyaʋ Sakuuti nɛ Keyivaanɩ,*
Mɩ-sɩʋ kpelisi, mɩ-ɛsɔ tɩɩŋa, nzɩ ilubi mɩ-tɩ yɔ nɛ ɩɖɛna,
27 Nɛ mankaɣ-mɩ wonuu yomiye taa Damaasɩ nɛ kɩ-wayɩ,”+ weyi ɛ-hɩɖɛ lɛ yoyaa tɛ Ɛsɔ Yehowa+ yɔ, ɛnʋ yɔɔdʋʋna.»
6 «Pɩtɔɔ mba pataɣ pa-tɩ liu* Siyɔŋ taa yɔ,
Mba pamaɣzɩɣ se pɛwɛ pɛɛyɛ taa Samaarii pʋʋ yɔɔ yɔ,+
Ajɛɛ sɔsɔna taa ɛyaa mba pa-hɩla sɛwa yɔ,
Mba pɔ-cɔlɔ Izrayɛɛlɩ ɖɩɣa woki yɔ!
2 Ɩtɛzɩ nɛ iwolo Kalɩne nɛ ɩna.
Ɩkʋyɩnɩ peeɖe nɛ iwolo Hamatɩ Sɔsɔʋ+ taa,
Nɛ itii Filistii mba tɛ Gaatɩ taa.
Pɛwɛ ɖeu nɛ pɩkpaɖɩ kewiyisi* sɩnɛ yaa we?
Yaa pɛ-tɛtʋ walaa nɛ pɩkpaɖɩ mɩ-ñɩndʋ na?
4 Pahɩnɩɣ tukeɖe+ kaɖʋnaa yɔɔ nɛ pɛfɛdɩɣ yem kpelisi+ taa,
Pɔtɔkɩ ewiɖe taa ɛyaŋ nɛ newee* wena aɖʋ num yɔ;+
5 Patɩŋɩɣnɩ cɩmʋʋ*+ wiu yɔɔ nɛ poluki hendu,
Nɛ ɛzɩ Daviid yɔ, poluki minziiki wondu;+
6 Pɔñɔʋ vɛɛ kɔpʋnaa sɔsaa taa+
Nɛ pataɣ pa-tɩ num mbʋ pɩkpaɖɩ ɖeu yɔ.
Ɛlɛ pa-paa fɛyɩnɩ Yosɛɛfʋ asɛyʋʋ.*+
7 Pʋyɔɔ lɛ, pakaɣ lɛyʋʋ wobu yomiye taa mba pakaɣ wobu yomiye taa yɔ,+
Nɛ mba pɛfɛdɩ yem yɔ, pa-kazandʋ ndʋ tɩ-taa pɛɖɛlɛsɩɣ niye yɔ tɩkaɣ sɩʋ tɩnaɣ.
8 “Kɩbaɣlʋ Kɩlɩm Yehowa ɖuuni ɛ-maɣmaɣ ɛ-tɩ:*+
‘Man-taa wɩɣnɩ Yakɔɔb tɩ kpazʋʋ,+
Manpaɖɩɣ e-tilima ɖoŋ ñɩna,+
Nɛ mankaɣ kpaɣʋ tɛtʋ nɛ mbʋ pisu tɩ-taa yɔ nɛ manɖʋzɩ koyindinaa nesi tɛɛ,+ yoyaa tɛ Ɛsɔ Yehowa yɔɔdʋʋna.
9 «“‘Nɛ ye pɩkazɩ ɛyaa 10 ɖɩɣa kʋɖʋmaɣ taa yɔ, pakaɣ sɩbʋ ɖɔɖɔ. 10 Hɔʋ taa tʋ nɔɔyʋ* kaɣ kɔm nɛ ɛkpaɣ-wɛ nɛ ɛlɩna nɛ ɛñaɣzɩ-wɛ miŋ kʋɖʋm kʋɖʋm. Ɛkaɣ kpaɣʋ pɔ-mɔɔ ɖɩɣa taa nɛ ɛlɩna; nɛ ɛkaɣ pɔzʋʋ weyi ɛwɛ ɖɩɣa taa pɩ-taa kuduyuŋ taa yɔ se: “Pɩtasɩ nɔɔyʋ kazʋʋ ñɔ-cɔlɔ?” Nɛ ɛlɛ kaɣ cosuu se: “Pɩtɩkazɩ nɔɔyʋ!” Ðɩnɛ ɛlɛ ɛkaɣ yɔɔdʋʋ se: “Su ɖiɣ ɖiɣ! Mbʋ pʋyɔɔ yɔ pɩtɩkɛ alɩwaatʋ tʋnɛ pɩwɛɛ se payaa Yehowa hɩɖɛ.”’
11 Mbʋ pʋyɔɔ yɔ Yehowa haɣnɩ nɔɔ,+
Nɛ ɛkaɣ yɔkʋʋ ɖɩɣa sɔsɔɔ nɛ kapɩsɩ njɛyɛ,
Nɛ ɛkaɣ yɔkʋʋ ɖɩɣa cikpelaɣ nɛ katayɩ hɔɔlasɩ hɔɔlasɩ.+
12 Ɛzɩ kpaŋnaŋ seɣ kaaʋ sɔsɔʋ yɔɔ?
Yaa ɛyʋ kaɣ hayʋʋ peeɖe nɛ naŋ na?
Mbʋ pʋyɔɔ yɔ ɩlaba nɛ mbʋ pɩtʋʋzaa yɔ pɩpɩsɩ tɩʋ sɔtʋ ñɩŋgʋ,
13 Mɩ-taa lakɩ leleŋ nɛ mbʋ pɩfɛyɩ wazaɣ yɔ,
Nɛ ɩyɔɔdʋʋ se: ‘Pɩtɩkɛ ɖa-maɣmaɣ ɖo-ɖoŋ taa ɖɩpɩsɩ ɖoŋ tɩnaa* yaa we?’+
14 Pʋyɔɔ lɛ, Oo Izrayɛɛlɩ ɖɩɣa, mankaɣ mɩ-yɔɔ kɔnʋʋ ɛjaɖɛ naɖɩyɛ,+
Nɛ ɖɩkaɣ-mɩ wɩlʋʋ ñaŋ kpaɣnɩ Lebo-Hamatɩ*+ nɛ pitii ɖooo Lemeɣa,* Araabaa taa,” yoyaa tɛ Ɛsɔ Yehowa yɔɔdʋʋna.»
7 Pʋnɛ Kɩbaɣlʋ Kɩlɩm Yehowa wɩlɩ-m: Na! Ɛlɩzɩ kudoloŋ alɩwaatʋ ndʋ tɔɔnaɣ ŋga pahayɩɣ wayɩ wayɩ yɔ* kapaɣzɩ ñɔʋ yɔ. Pɩkɛ tɔɔnaɣ ŋga pahayɩɣ wayɩ wayɩ, pɛtɛŋ kʋm wiyaʋ ñɩtʋ ndʋ pacalɩɣnɩ kpɩna yɔ lɛ. 2 Alɩwaatʋ ndʋ kudoloŋ tɛm tɔɔʋ ɛjaɖɛ taa mbʋ pɩñɔ tataa yɔ lɛ, mɔntɔ se: «Oo Kɩbaɣlʋ Kɩlɩm Yehowa, mentendi-ŋ, kpeɣ ña-samaɣ!+ Ɛzɩma Yakɔɔb pɩzɩɣ nɛ ɛcaɣ wezuu?* Mbʋ pʋyɔɔ yɔ ɛkɛ ɛjam!»+
3 Nɛ Yehowa lɛɣzɩ lɩmaɣza.*+ «Pɩɩkaɣ labʋ mbʋ,» Yehowa yɔɔdɩna.
4 Pʋnɛ Kɩbaɣlʋ Kɩlɩm Yehowa wɩlɩ-m: Na! Kɩbaɣlʋ Kɩlɩm Yehowa ya miŋ se ɛhɔmnɩ nɩŋgbaŋʋʋ. Ɩñaɣ lɩm sɔsɔm mbʋ pɩwɛ cukaŋ yɔ, nɛ ɩñaɣ ɛjaɖɛ hɔɔlʋʋ nakʋyʋ. 5 Nɛ mɔntɔ se: «Oo Kɩbaɣlʋ Kɩlɩm Yehowa, mentendi-ŋ, sɩŋ!+ Ɛzɩma Yakɔɔb pɩzɩɣ nɛ ɛcaɣ wezuu?* Mbʋ pʋyɔɔ yɔ ɛkɛ ɛjam!»+
6 Nɛ Yehowa lɛɣzɩ lɩmaɣza.*+ «Pʋnɛ ɖɔɖɔ pɩɩkaɣ labʋ,» Kɩbaɣlʋ Kɩlɩm Yehowa yɔɔdɩna.
7 Pʋnɛ ɛwɩlɩ-m: Na! Yehowa kaasɩŋ koloŋa ŋga palabɩnɩ pʋlɔŋ nimaɣ yɔ kɔ-yɔɔ, nɛ pʋlɔŋ nimaɣ kaawɛ e-nesi taa. 8 Nɛ Yehowa pɔzɩ-m se: «Ɛbɛ ŋnaɣ, Amoosi?» Nɛ moncosi se: «Pʋlɔŋ nimaɣ.» Nɛ Yehowa yɔɔdɩ se: «Na, manɖʋʋ pʋlɔŋ nimaɣ man-samaɣ Izrayɛɛlɩ hɛkʋ taa. Maakaɣ-kɛ tasʋʋ kpeɣu.+ 9 Izaakɩ lona kʋkʋya+ kaɣ pɩsʋʋ njaa, nɛ pakaɣ yɔkʋʋ Izrayɛɛlɩ kookasɩ kiɖeɖesi;+ nɛ mankaɣ kɔm Yerobowam ɖɩɣa wayɩ nɛ laɣɖɛ.»+
10 Betɛɛlɩ+ cɔjɔ Amaziya tiyini tɔm tʋnɛ Izrayɛɛlɩ wiyaʋ Yerobowam:+ «Amoosi wɛɛ nɛ ɛkpɛyɩɣ ñɔ-tɔm Izrayɛɛlɩ ɖɩɣa hɛkʋ taa.+ Ɛ-tɔm tɩŋa yɔɔ lɛ, ɛjaɖɛ ɛɛpɩzɩɣ se ɖɩɖɔkɩ ɖɩ-tɩ.+ 11 Mbʋ pʋyɔɔ yɔ, tɔm tʋnɛ Amoosi yɔɔdʋʋ: “Pakaɣ kʋʋ Yerobowam nɛ laɣɖɛ, nɛ pɩtʋʋ fɛyɩ se pakaɣ kʋsʋʋ Izrayɛɛlɩ ɛ-ɛjaɖɛ taa nɛ pɛɖɛnɩ-ɩ yomiye taa.”»+
12 Nɛ Amaziya heyi Amoosi se: «Oo ña weyi ŋnaɣ natʋ yɔ, ɖɛɛ, se nɛ ŋwolo Yuuda ɛjaɖɛ taa, ñɩnɩ ñɔ-kpɔnɔ* peeɖe, nɛ peeɖe ŋpɩzɩɣ nɛ ŋyɔɔdɩ natʋ tɔm.+ 13 Ɛlɛ pɩtɩpɔzɩ se ŋtasɩ natʋ tɔm yɔɔdʋʋ Betɛɛlɩ,+ mbʋ pʋyɔɔ yɔ pɩkɛ wiyaʋ kooka kiɖeɖeɣa+ nɛ kewiyaɣ ɖɩɣa.»
14 Nɛ Amoosi cosi Amaziya se: «Mantaakɛ nayʋ yaa nayʋ pɩyalʋ; ɛlɛ maakɛ ninɖiɣyu,+ nɛ mɔncɔŋnaɣ sikomɔɔrɩ fiigi tɩŋ yɔɔ.* 15 Ɛlɛ menɖiyaɣ ewiɖe lɛ, Yehowa ya-m, nɛ Yehowa heyi-m se: “Wolo, heyi man-samaɣ Izrayɛɛlɩ natʋ tɔm.”+ 16 Pʋyɔɔ lɛɛlɛɛyɔ lɛ, welisi Yehowa tɔm: “Ŋtɔŋ se: ‘Taayɔɔdɩ Izrayɛɛlɩ yɔɔ natʋ tɔm,+ nɛ taasusi tɔm+ Izaakɩ ɖɩɣa yɔɔ.’ 17 Pʋyɔɔ lɛ, tɔm tʋnɛ Yehowa yɔɔdʋʋ: ‘Ña-halʋ kaɣ pɩsʋʋ hayitu laɖʋ tɛtʋ taa, nɛ pakaɣ kʋʋ ña-pɩyalaa nɛ ñɛ-pɛlaa nɛ laɣɖɛ. Pakaɣ tayʋʋ ñɛ-tɛtʋ nɛ nimaɣ ŋga pamaɣzɩɣna yɔ, nɛ ña-maɣmaɣ ŋkaɣ sɩbʋ azuluma ɛjaɖɛ naɖɩyɛ taa; nɛ pɩtʋʋ fɛyɩ se pakaɣ kʋsʋʋ Izrayɛɛlɩ ɛ-ɛjaɖɛ taa nɛ pɛɖɛnɩ-ɩ yomiye taa.’”»+
8 Pʋnɛ Kɩbaɣlʋ Kɩlɩm Yehowa wɩlɩ-m: Na! Soŋaɣ alɩwaatʋ taa tɩŋ pee kaawɛ ɖɔkʋ nakʋyʋ taa. 2 Nɛ ɛpɔzɩ-m se: «Ɛbɛ ŋnaɣ, Amoosi?» Moncosi se: «Soŋaɣ alɩwaatʋ taa tɩŋ pee ɖɔkʋ nakʋyʋ taa.» Nɛ Yehowa heyi-m se: «Man-samaɣ Izrayɛɛlɩ tɛm talaa. Maakaɣ-kɛ tasʋʋ kpeɣu.+ 3 “Kɩyakʋ ŋgʋ ki-wiye lɛ, templo taa hendu kaɣ pɩsʋʋ peenduu,+ Kɩbaɣlʋ Kɩlɩm Yehowa yɔɔdʋʋna. Pakaɣ lɔʋ sɩɖaa tomnasɩ sakɩyɛ paa le+—su ɖiɣ ɖiɣ!”
4 Ɩnɩɩ tɔm tʋnɛ, mɩ mba ɩfɛyɩɣ kʋñɔndɩnaa yɔɔ yɔ
Nɛ mɩ mba ɩlakɩ nɛ ɛjaɖɛ taa hɛɛɛ tɩnaa ɖɩŋ yɔ,+
5 Mɩ mba ɩtɔŋ se: “Ɛzɩmtaa fenaɣ kɩfalaɣ kazandʋ kaɣ sɩʋ tɩnaɣ,+ se pɩsa nɛ ɖɩpɛdɩ ɖɔ-tɔɔnaɣ pee,
Nɛ ɛzɩmtaa Sabaatɩ kaɣ sɩʋ tɩnaɣ,+ se pɩsa nɛ ɖɩpɛdɩ tɔɔnaɣ pee?
Se pɩsa nɛ ɖɩla nɛ efa* kɩmaɣzʋʋ pɩsɩ ññɩɩ
Nɛ sikli* kɩmaɣzʋʋ wɛɛ yuŋ nɛ pɩkɩlɩ,
Nɛ ɖiyiɣdi kɩmaɣzɩŋ se pɩsa nɛ ɖimuli;+
6 Se pɩsa nɛ ɖɩkpaɣ liidiye nɛ ɖɩyabɩnɩ weyi ɛwɛ kɩcɛyɩm taa yɔ
Nɛ ɖɩkpaɣ naataŋgbala 2 nɛ ɖɩyabɩnɩ kʋñɔndʋ,+
Nɛ ɖɩpɛdɩ tɔɔnaɣ pee wena afɛyɩ wazaɣ yɔ.”
7 Yehowa ɖuuni Yakɔɔb Tɩ Kpazʋʋ:+
“Maakaɣ sɔʋ pa-lakasɩ kpeekpe yɔɔ kpa.+
Ɛzɩ ɖɩ-tɩŋa ɖɩɩkaɣ kpaʋ ɛzɩ Niili yɔ,
Nɛ ɖihuu nɛ ɖitii ɛzɩ Ejipiti Niili yɔ?”+
9 “Kɩyakʋ ŋgʋ ki-wiye,
Mankaɣ yebu nɛ wɩsɩ ɖʋ wɩsɩ siɣu alɩwaatʋ taa,
Nɛ mankaɣ yebu nɛ ɛjaɖɛ taa yu cɩkpɛndʋʋ wɩsɩ taa,+ Kɩbaɣlʋ Kɩlɩm Yehowa yɔɔdʋʋna.
10 Mankaɣ pɩsʋʋ mɩ-kazandʋ kʋñɔwiye+
Nɛ manpɩsɩ mi-hendu tɩŋa kʋñɔwiye hendu.
Mankaɣ tam fɔlɔtɔ tɩnzɩ kpeekpe taa nɛ manpɩsɩ paa ñʋʋ ŋgʋ lɛ ñʋʋ melem;
Mankaɣ yebu nɛ kɩwɛɛ ɛzɩ pacakʋʋ kʋñɔwiye pɩyalʋ ɛgbamɩyɛ yɔɔ yɔ,
Nɛ kɩ-tɛm wɛɛ ɛzɩ ñaŋ evemiye yɔ.”
11 “Na! Kɩyakɩŋ kaɣ kɔm, Kɩbaɣlʋ Kɩlɩm Yehowa yɔɔdʋʋna,
Nɛ alɩwaatʋ ndʋ lɛ, mankaɣ tiyinuu ñɔɔsɩ ɛjaɖɛ taa,
Pɩɩkɛɣnɩ tɔɔnaɣ* ñɔɔsɩ yaa lɩm lɔkɔtʋ,
Ɛlɛ Yehowa tɔm nɩʋ ñɔɔsɩ nɛ lɔkɔtʋ.+
12 Pakaɣ ɖɔm cɔŋɔ cɔŋɔ kpaɣnɩ teŋgu nɛ ŋwolo teŋgu
Nɛ kpaɣnɩ hayo kiŋ nɛ ŋwolo wɩsɩ ɖɩlɩyɛ.
Pakaɣ yotuu se pañɩnɩ Yehowa tɔm, ɛlɛ paakaɣ-tʋ naʋ.
13 Kɩyakʋ ŋgʋ ki-wiye lɛ, pɛlaa mba peɖewa nɛ patɩtɩlɩ abalaa yɔ pakaɣ fiɣnuu,
Evebiya ɖɔɖɔ kaɣ fiɣnuu, lɔkɔtʋ yɔɔ;
14 Mba poɖukini Samaarii+ kɩwɛɛkɩm nɛ pɔtɔŋ se:
‘Oo Daanɩ, ñɛ-ɛsɔ ñɩtʋʋ nɛ ɛwɛɛ wezuu yɔ!’+
Nɛ, ‘Beyɛɛrɩ-Seeba+ nʋmɔʋ ñɩtʋʋ nɛ kɩwɛɛ yɔ!’
Pakaɣ tɔlʋʋ, nɛ paakaɣ tasʋʋ kʋyʋʋ.”»+
9 Mana Yehowa+ sɩŋ altaaru ñʋʋ yɔɔ nɛ ɛtɔ se: «Ma tilimiye ñʋʋ, nɛ tigila kaɣ ñamsʋʋ. Sɛtɩ pa-ñʋŋ, nɛ mankaɣ kʋʋ pa-taa kɛdɛzaɣ ñɩma nɛ laɣɖɛ. Weyi eseɣ yɔ, ɛɛkaɣ lɩʋ pɩ-taa; nɛ weyi ɛñakɩ pana se ese nɛ ɛtʋlɩ yɔ, ɛɛkaɣ pɩzʋʋ.+
2 Ye pohuyaa nɛ petii ɖooo Pɩlaʋ* taa yɔ,
Me-nesi kaɣ-wɛ kpaʋ peeɖe;
Nɛ ye pakpa ɛsɔdaa yɔ,
Mankaɣ-wɛ tisuu nɛ peeɖe.
3 Nɛ ye pɛmɛlɩ Karmɛɛlɩ pʋʋ ñʋʋ taa yɔ,
Mankaɣ-wɛ ñɩnʋʋ peeɖe nɛ mankpa-wɛ.+
Ye pɛmɛlɩ ɖooo teŋgu cukaŋ taa se mantaana-wɛ yɔ,
Mankaɣ nɔɔ haʋ ɖʋm peeɖe nɛ ɛñasɩ-wɛ.
4 Ye po-koyindinaa iwoni-wɛ yomiye taa yɔ,
Mankaɣ nɔɔ haʋ laɣɖɛ peeɖe, nɛ ɖɩkaɣ-wɛ kʋʋ;+
Mankaɣ kam mɛ-ɛsa pɔ-yɔɔ se malabɩ-wɛ kɩdɛkɛdɩm, nɛ pɩɩkɛɣ kɩbam.+
5 Mbʋ pʋyɔɔ yɔ Kɩbaɣlʋ Kɩlɩm, yoyaa tɛ Yehowa, kɛnɩ Weyi etukuuni ɛjaɖɛ* yɔ,
Se ɖiyoli,+ nɛ ɖɩ-taa ɛyaa tɩŋa kaɣ caɣʋ kʋñɔwiye;+
Nɛ ɖɩ-tɩŋa ɖɩkaɣ kpaʋ ɛzɩ Niili yɔ,
Nɛ ɖitii ɛzɩ Ejipiti Niili yɔ.+
6 “Weyi ɛmaɣ e-tendemee ɛsɔdaa
Nɛ ɛsɩɣ e-kuduyuu tɛtʋ ñʋʋ yɔɔ yɔ;
Weyi ɛyaɣ teŋgu taa lɩm,
Se ɛpɩyɩ-pʋ tɛtʋ yɔɔ+ yɔ
—Ɛ-hɩɖɛ lɛ Yehowa.”+
7 “Ɛzɩ ɩfɛyɩ mɛ-ɛsɩndaa ɛzɩ Kuusi mba pɩyalaa yɔ, Oo Izrayɛɛlɩ samaɣ?” Yehowa yɔɔdʋʋna.
8 “Na! Kɩbaɣlʋ Kɩlɩm Yehowa ɛsa wɛ kewiyaɣ ŋga kalabɩ kɩwɛɛkɩm yɔ kɔ-yɔɔ,
Nɛ ɛkaɣ-kɛ ɖɩzʋʋ tɛtʋ yɔɔ.+
Ɛlɛ maakaɣ ɖɩzʋʋ Yakɔɔb ɖɩɣa caɣ caɣ,”+ Yehowa yɔɔdʋʋna.
9 “Mbʋ pʋyɔɔ yɔ, na! Menɖiɣni haʋ nɔɔ,
Nɛ mankaɣ ñamsʋʋ Izrayɛɛlɩ ɖɩɣa ajɛɛ kpeekpe hɛkʋ taa,+
Ɛzɩ pañamsʋʋ cataɣ se pacatɩ,
Nɛ putooye naɖɩyɛ ɛɛtɔlʋʋ tataa yɔ.
10 Pakaɣ-wɛ kʋʋ nɛ laɣɖɛ, man-samaɣ taa kɩwɛɛkɩm laɖaa tɩŋa,
Mba pɔyɔɔdʋʋ se: ‘Asɛyʋʋ ɛɛkaɣ-ɖʋ ñɔtɩnʋʋ yaa kɩɩkaɣ-ɖʋ talʋʋ’” yɔ.
11 “Kɩyakʋ ŋgʋ ki-wiye lɛ, mankaɣ kʋsʋʋ Daviid cokiye*+ nɖɩ ɖɩtɔlaa yɔ,
Mankaɣ ñɔɔzʋʋ hɔɔlɩŋ* weyi ɩyɔkaa yɔ,
Nɛ mankaɣ kʋsʋʋ ɖɩ-njaa;
Mankaɣ-ɖɩ tasʋʋ maʋ nɛ ɖɩwɛɛ ɛzɩ ɖooo lɔŋ yɔ,+
12 Se pɩsa nɛ pamʋ mbʋ pɩkazɩ Edom,+
Nɛ ajɛɛ wena a-yɔɔ paya ma-hɩɖɛ yɔ a-tɩŋa nɛ pɩpɩsɩ pa-ñɩm,” Yehowa yɔɔdʋʋna, ɛnʋ weyi eɖiɣni labʋ mbʋ yɔ.
13 “Na! Kɩyakɩŋ ɖiɣni kɔm,
Nɛ alɩwaatʋ ndʋ lɛ, haɖʋ kaɣ hiɣu kʋnɖʋ,
Nɛ viiñi pee fɛyɩyʋ kaɣ hiɣu ɖomaɣ ɖuyu;+
Nɛ vɛɛ leleŋ ñɩŋgʋ kaɣ catʋʋ pʋŋ yɔɔ,+
14 Mankaɣ kpeɣluu man-samaɣ Izrayɛɛlɩ yomaa nɛ manpɩsɩnɩ-wɛ,+
Nɛ pakaɣ ɖaɣnʋʋ maʋ pɛ-tɛtʋ ndʋ tɩpɩsɩ njɛyɛ yɔ nɛ pɛwɛɛ tɩ-taa;+
Pakaɣ sɔʋ viiñi nɛ pɔñɔɔ kɩ-vɛɛ,+
Nɛ pakaɣ labʋ kaɖasɩ nɛ pɔtɔɔ sɩ-taa pee.”+
15 “Mankaɣ-wɛ sɔʋ pɛ-tɛtʋ yɔɔ,
Nɛ paakaɣ-wɛ tasʋʋ kpɛzʋʋ kpa
Pɛ-tɛtʋ ndʋ mɛncɛlɩ-wɛ+ yɔ tɩ-yɔɔ,” ñɛ-Ɛsɔ Yehowa yɔɔdʋʋna.»
Pʋ-tɔbʋʋ se «Sʋʋtʋ kɛʋ» yaa «Sʋʋtʋ sɩɣlʋʋ.»
Yaa «Damaasɩ kɩdɛkɛdɩm.»
Piye piye, «weyi ɛɖɔkʋʋ kewiyitu ɖaʋ.»
Piye piye, «weyi ɛɖɔkʋʋ kewiyitu ɖaʋ.»
Yaa «Mowaabʋ kɩdɛkɛdɩm.»
Piye piye, «kʋsʋʋ tɔm hʋyʋʋ.»
Yaa «wɩlɩtʋ.»
Yaa «templo.»
Yaa «ɛ-kalɩzaɣ.»
Yaa «ɛ-kalɩzaɣ.»
Yaa «you laɖaa taa mba pa-laŋa wɛ ɖoŋ yɔ.»
Yaa «mʋʋzʋʋ ŋgʋ kɩwɛnɩ kpɛm ki-pondone yɔɔ yɔ.» Mʋʋzʋʋ ŋgʋ kɩ nɛ ki-ɖoŋ nɛ kɩtɩkpadɩyɩ yɔ kɩ-tɔm pɔyɔɔdʋʋ.
Pɩpɩzɩɣ pɩkɛ, «Ye patɩɖʋ tɔɔnaɣ kpaca nakʋyʋ yɔɔ yɔ, sumaɣ kaɣ tɔlʋʋ kpaca ŋgʋ kɩ-taa tataa?»
Yaa «Damaasɩ kpelisi.»
Yaa «ɩlɩzɩ aseɣɖe.»
Yaa «ɛ-kɩdɛkɛdɩm.»
Yaa «tɛzoŋgiye.»
Pɩpɩzɩɣ pɩkɛ, «Nɛ ɖɩsɩ sakɩyɛ.»
Yaa «mɩ-ñʋndɩnaa.»
Yaa «kaañamtʋ lakasɩ.»
Yaa «mantɩha-mɩ tɔɔnaɣ se ɩtɔɔ.»
Yaa «mɩ-maalikasɩ.»
Pɩpɩzɩɣ pɩkɛ, «Betɛɛlɩ kaɣ pɩsʋʋ mbʋ pɩ-taa nɩʋ wɛ kaɖɛ yɔ.»
Yaa «ñaŋ ñɩyʋʋ.»
Pɩkɛɣnɩ Kalɩmuuduwe tɩɩnzɩ nzɩ sɩwɛ Tooroo tɩɩnzɩ tindimiye taa yɔ.
Pɩkɛɣnɩ Nɔdɔmzuwe tɩɩnzɩ tindimiye.
Yaa «ɛhɛyɩ lambuu tɛtʋ yɔɔ.»
Yaa «mɩ-kɩwɛɛkɩm.»
Yaa «Ɩmʋʋ nɔɔ num taʋ liidiye.»
Pʋtɔma yɔ, ɛsɔnaa mba pa-naalɛ pasɩŋnɩ Saturini. Pɛsɛɣaɣ Saturini ɛzɩ ɛsɔ nɔɔyʋ yɔ.
Yaa «mba pacaɣ ɖiɣ ɖiɣ nɛ pa-paa fɛyɩ.»
Pɩtʋʋ fɛyɩ se Yuuda nɛ Izrayɛɛlɩ kewiyisi tɔm pɔyɔɔdʋʋ.
Piye piye, «ɖɩjaɣyɛ.»
Yaa «naŋ abalɩñɩŋ.»
Yaa «cɩmʋʋ wonuu ŋgʋ kɩ-yɔɔ wɛ nimasɩ yɔ.»
Piye piye, «patɩpɩsɩ kʋdɔndɩnaa Yosɛɛfʋ asɛyʋʋ yɔɔ.»
Yaa «ɛ-kalɩzaɣ.»
Piye piye, «Ɛ-caa koobu.»
Yaa «ñaŋ ñɩyʋʋ.»
Piye piye, «ɖɩkpaɣ ɖa-tɩ hɩŋ.»
Yaa «Hamatɩ nɔnɔɔ taa.»
Pʋ-tɔbʋʋ se Kɔlaɣ nɛ Lɛlaɣ fenasɩ taa.
Piye piye, «nɛ ɛkʋyɩ?»
Yaa «kpiɖi pɩ-yɔɔ.»
Piye piye, «nɛ ɛkʋyɩ?»
Yaa «kpiɖi pɩ-yɔɔ.»
Piye piye, «tɔɔ kpɔnɔ.»
Yaa «nɛ maakɛ sikomɔɔrɩ fiigi pee ñazɩyʋ.»
Cɔnɩ Tɔm kɩsɔzɩtʋ B14.
Cɔnɩ Tɔm kɩsɔzɩtʋ B14.
Yaa «tɛtʋ.»
Piye piye, «kpɔnɔ.»
Yaa «Sewɔɔlɩ,» pʋ-tɔbʋʋ se ɛyaa tɩŋa pɩlaʋ. Cɔnɩ Tɔm pee sɔsɔna tɔbʋʋ lɩzʋʋ.
Yaa «tɛtʋ.»
Yaa «kizinziku.»
Yaa «pɔ-hɔɔlɩŋ.»
Piye piye, «Nɛ piyisi kpeekpe kaɣ yoluu.»