AGEE

1 Wiyaʋ Dariyusi pɩnaɣ 2 ñɩŋga taa, fenaɣ 6 ñɩŋga kɩyakʋ kajalaɣ ñɩŋgʋ wiye lɛ, Yehowa tɔm tɩŋnɩ nayʋ Agee*+ yɔɔ nɛ tɩtalɩ Seyalɩtɩyɛɛlɩ pɩyalʋ Zorobabɛɛlɩ+ weyi ɛɛkɛ Yuuda egeetiye ñʋʋdʋ yɔ, nɛ Yehozadaakɩ pɩyalʋ Yozuwee weyi ɛɛkɛ cɔjɔ kɩlɩm yɔ se:

2 «Tɔm tʋnɛ yoyaa tɛ Yehowa yɔɔdʋʋ: “Samaɣ kanɛ kɔtɔŋ se: ‘Alɩwaatʋ tɩtalɩta se pama* Yehowa ɖɩɣa.’”»*+

3 Nɛ Yehowa tasɩ tɩŋnʋʋ nayʋ Agee+ yɔɔ nɛ ɛyɔɔdɩ se: 4 «Alɩwaatʋ talaa se mɩ mɩcaɣ ɖɩsɩ kɩbanzɩ taa nɛ ɖɩɣa kanɛ kaka ñɛkɛ njɛyɛ mbʋ?+ 5 Lɛɛlɛɛyɔ tɔm tʋnɛ yoyaa tɛ Yehowa yɔɔdʋʋ: “Ɩmaɣzɩ mɩ-ɖɔnɛ yɔɔ camɩyɛ. 6 Iɖu tɔɔnaɣ pee sakɩyɛ, ɛlɛ ɩkʋm pazɩ yem.+ Ɩtɔkɩ, ɛlɛ ɩɩhakɩ. Ɩñɔʋ, ɛlɛ mɩ-lɔkɔtʋ ɛɛsɩkɩ. Isuu wondu, ɛlɛ piisoŋuu mɩ-taa nɔɔyʋ. Weyi ɛlakɩ tʋmɩyɛ se pɛhɛyɩ-ɩ yɔ, ɛɖʋʋ ɛ-kɩhɛyʋʋ kabʋa ŋga katʋlɩ pɔŋ yɔ ka-taa.”»

7 «Tɔm tʋnɛ yoyaa tɛ Yehowa yɔɔdʋʋ: “Ɩmaɣzɩ mɩ-ɖɔnɛ yɔɔ camɩyɛ.”»

8 «“Ɩkpa pʋʋ taa nɛ ɩkɔnɩ ɖasɩ+ nɛ ɩma ɖɩɣa,+ nɛ pɩkɛdɩnɩ-m nɛ pɩɖʋ-m hɩɖɛ,”+ Yehowa yɔɔdʋʋna.»

9 «“Ɩɩɖaŋ sakɩyɛ, ɛlɛ ɩmʋ pazɩ yem; nɛ iwoni-pʋ ɖɩɣa lɛ mohosi pɩ-yɔɔ nɛ pɩmʋʋ.+ Ɛbɛ yɔɔ? Mbʋ pʋyɔɔ yɔ man-ɖɩɣa kɛ njɛyɛ, ŋgʋ mɩ-taa paa anɩ seɣ nɛ ɛkpaɣ nɛ etiki nɛ ɛcɔŋnɩ ɛ-maɣmaɣ ɛ-ɖɩɣa yɔɔ,+ yoyaa tɛ Yehowa yɔɔdʋʋna. 10 Pʋyɔɔ ɛsɔdaa pɛm-mɩ ki-ɖoluu nɛ tɛtʋ pɛm-mɩ tɩ-tɔɔnaɣ. 11 Maya wɩlɩŋ tɛtʋ yɔɔ, pʋŋ yɔɔ, tɔɔnaɣ pee yɔɔ, vɛɛ kɩfalʋʋ yɔɔ, num yɔɔ, mbʋ pɩñɔʋnɩ tɛtɛɛ yɔ pɩ-yɔɔ, ɛyaa yɔɔ nɛ kpɩna yɔɔ, nɛ mi-nesi tɛɛ tʋma kpeekpe yɔɔ.”»

12 Seyalɩtɩyɛɛlɩ+ pɩyalʋ Zorobabɛɛlɩ+ nɛ Yehozadaakɩ+ pɩyalʋ Yozuwee weyi ɛɛkɛ cɔjɔ kɩlɩm yɔ, nɛ samaɣ taa mba pɩkazaa yɔ pa-tɩŋa, pewelisi pɛ-Ɛsɔ Yehowa nɔɔ taa tɔm nɛ tɔm ndʋ nayʋ Agee yɔɔdaa yɔ, mbʋ pʋyɔɔ yɔ pɛ-Ɛsɔ Yehowa tiyini-i; nɛ samaɣ paɣzɩ Yehowa sɔɔndʋ seu.

13 Nɛ Agee weyi Yehowa tiyaa yɔ, ɛtanɩ tɔm tʋnɛ samaɣ, ɛzɩ Yehowa kaaɖʋʋ-ɩ tʋmɩyɛ yɔ se: «“Mɛwɛ mɩ-cɔlɔ,”+ Yehowa yɔɔdʋʋna.»

14 Peeɖe Yehowa seɣti+ Seyalɩtɩyɛɛlɩ pɩyalʋ Zorobabɛɛlɩ weyi ɛɛkɛ Yuuda egeetiye ñʋʋdʋ yɔ,*+ Yehozadaakɩ pɩyalʋ Yozuwee+ weyi ɛɛkɛ cɔjɔ kɩlɩm yɔ,* nɛ samaɣ taa mba pɩkazaa yɔ pa-tɩŋa;* nɛ pɔkɔɔ nɛ papaɣzɩ pɛ-Ɛsɔ,+ yoyaa tɛ Yehowa ɖɩɣa tʋmɩyɛ. 15 Pɩɩkɛ Wiyaʋ Dariyusi pɩnaɣ 2 ñɩŋga,+ fenaɣ 6 ñɩŋga, kɩyakʋ 24 ñɩŋgʋ wiye.

2 Fenaɣ 7 ñɩŋga taa, kɩyakʋ 21 ñɩŋgʋ wiye, Yehowa tɩŋnɩ nayʋ Agee+ yɔɔ nɛ ɛyɔɔdɩ se: 2 «Mentendi-ŋ, pɔzɩ Seyalɩtɩyɛɛlɩ pɩyalʋ Zorobabɛɛlɩ+ weyi ɛkɛ Yuuda egeetiye ñʋʋdʋ+ yɔ, Yehozadaakɩ+ pɩyalʋ Yozuwee+ weyi ɛkɛ cɔjɔ kɩlɩm yɔ nɛ ɛyaa samaɣ ŋga pɩkazaa yɔ se: 3 “Mba paana ɖɩɣa* kanɛ ka-kajalaɣ samtʋ yɔ, pa-taa lɛ, mba pɩkazɩ mɩ-hɛkʋ taa?+ Lɛɛlɛɛyɔ ɛzɩma ɩnaɣ-kɛ? Ɩmaɣzɩɣnɩ-kɛ nɛ kajalaɣ ñɩŋga lɛ, pɩɩlakɩ-mɩ ɛzɩ kanɛ katɩlɩɩ pʋyʋ yɔ?”+

4 «“Ɛlɛ lɛɛlɛɛyɔ lɛ, ña Zorobabɛɛlɩ, kpa ɖoŋ, nɛ ña cɔjɔ kɩlɩm Yozuwee, Yehozadaakɩ pɩyalʋ, kpa ɖoŋ,” Yehowa yɔɔdʋʋna.

«“Nɛ mɩ, ɛjaɖɛ taa ɛyaa samaɣ kpeekpe, ɩkpa ɖoŋ+ nɛ ɩla tʋmɩyɛ,” Yehowa yɔɔdʋʋna.

«“Mbʋ pʋyɔɔ yɔ mɛwɛ mɩ-cɔlɔ,+ yoyaa tɛ Yehowa yɔɔdʋʋna. 5 Ɩtɔzɩ tamaɣ ŋga maalabɩ-mɩ alɩwaatʋ ndʋ ɩɩlɩnɩ Ejipiti yɔ kɔ-yɔɔ;+ pɩtasɩ lɛ men-fezuu wɛ mɩ-hɛkʋ taa.*+ Sɔɔndʋ ɛtaakpa-mɩ.”»+

6 «Mbʋ pʋyɔɔ yɔ tɔm tʋnɛ yoyaa tɛ Yehowa yɔɔdʋʋ: “Pɩkazɩ pazɩ, mankaɣ tasʋʋ ñamsʋʋ ɛsɔdaa nɛ tɛtʋ nɛ teŋgu nɛ tɛtʋ waɣwaɣ.”+

7 «“Nɛ mankaɣ ñamsʋʋ ajɛɛ tɩŋa, nɛ ajɛɛ tɩŋa taa ñɩm wondu* kaɣ kɔm ɖɩɣa kanɛ ka-taa;+ nɛ mankaɣ yebu nɛ samtʋ su ka-taa,”+ yoyaa tɛ Yehowa yɔɔdʋʋna.

8 «“Matɩnɩ liidiye, nɛ matɩnɩ sika,” yoyaa tɛ Yehowa yɔɔdʋʋna.

9 «“Samtʋ ndʋ ɖɩɣa kanɛ kakaɣ wɛnʋʋ yɔ, tɩkaɣ kɩlʋʋ kajalaɣ ñɩndʋ,”+ yoyaa tɛ Yehowa yɔɔdʋʋna.

«“Nɛ mankaɣ yebu nɛ laŋhɛzɩyɛ wɛɛ lone ɖɩnɛ ɖɩ-taa,”+ yoyaa tɛ Yehowa yɔɔdʋʋna.»

10 Dariyusi pɩnaɣ 2 ñɩŋga taa, fenaɣ 9 ñɩŋga, kɩyakʋ 24 ñɩŋgʋ wiye, Yehowa tɔm talɩ nayʋ Agee+ se: 11 «Tɔm tʋnɛ yoyaa tɛ Yehowa yɔɔdʋʋ: “Mentendi-ŋ, pɔzɩ cɔjɔnaa se suwe paɣtʋ yɔɔdʋʋ:+ 12 ‘Ye abalʋ nɔɔyʋ ɛɖʋ nandʋ kiɖeɖetu e-toko taa, nɛ e-toko tukuni kpɔnɔ, yaa tɔɔnaɣ ŋga patɩzaa yɔ, yaa vɛɛ, yaa num, yaa paa tɔɔnaɣ ŋga yɔ, kakaɣ pɩsʋʋ kiɖeɖeɣa yaa we?’”»

Cɔjɔnaa cosi se: «Aayɩ!»

13 Pʋwayɩ lɛ, Agee pɔzɩ se: «Ye nɔɔyʋ etukuni sɩɖʋ nɛ pɩpɩsɩ-ɩ weyi ɛfɛyɩ kele kele yɔ,* nɛ etukuni wondu ndʋ tɩ-taa nakʋyʋ, kɩkaɣ pɩsʋʋ mbʋ pɩfɛyɩ kele kele yɔ yaa we?»+

Cɔjɔnaa cosi se: «Kɩkaɣ pɩsʋʋ mbʋ pɩfɛyɩ kele kele yɔ.»

14 Peeɖe Agee yɔɔdaa se: «“Mbʋ samaɣ kanɛ kɛwɛɛ, nɛ mbʋ ɛjaɖɛ ɖɩnɛ ɖɩwɛ mɛ-ɛsɩndaa, nɛ mbʋ pe-nesi tɛɛ tʋma tɩŋa wɛɛ; mbʋ payɩ palaɣ peeɖe yɔ pɩfɛyɩ kele kele,” Yehowa yɔɔdʋʋna.

15 «“Ɛlɛ lɛɛlɛɛyɔ lɛ, mentendi-mɩ, kpaɣnɩ sɔnɔ, ɩmaɣzɩ tɔm tʋnɛ tɩ-yɔɔ camɩyɛ: Pʋcɔ nɛ patɩnɩɣ pɩyɛ pɩyɛ lɛɛɖɛ yɔɔ Yehowa templo taa lɛ,+ 16 ɛzɩma pɩɩwɛɛ? Nɔɔyʋ woki tɔɔnaɣ pee huuye naɖɩyɛ cɔlɔ nɛ ɛmaɣzɩɣ se ehiɣ tɔɔnaɣ pee kɩmaɣzɩŋ 20 lɛ, 10 ɖeke ehikaɣ; nɛ nɔɔyʋ woki viiñi ɖɩfɛyɩyɛ se ecozi vɛɛ kɩmaɣzɩŋ 50 lɛ, 20 ɖeke ehikaɣ;+ 17 mamabɩ mɩ-tɔɔnaɣ, mi-nesi tɛɛ tʋma tɩŋa nɛ helim miŋ ñɩmbʋ, nɛ tɔɔnasɩ kʋdɔŋ+ nɛ ɖɔmbɛɛ, ɛlɛ mɩ-taa nɔɔyʋ tɩpɩsɩ mɔn-cɔlɔ,” Yehowa yɔɔdʋʋna.

18 «“Mentendi-mɩ, ɩmaɣzɩ tɔm tʋnɛ tɩ-yɔɔ camɩyɛ kpaɣnɩ sɔnɔ, kpaɣnɩ fenaɣ 9 ñɩŋga kɩyakʋ 24 ñɩŋgʋ wiye, kpaɣnɩ kɩyakʋ ŋgʋ ki-wiye pasɩ Yehowa templo tigiɖe yɔ;+ ɩmaɣzɩ tɔm tʋnɛ tɩ-yɔɔ camɩyɛ: 19 Ðomaɣ nakɛyɛ kazɩ kpou* taa?+ Viiñi tɩʋ, fiigi tɩʋ, girenaadɩ tɩʋ nɛ oliivi tɩʋ tɩlʋlɩta, yaa we? Kpaɣnɩ sɔnɔ, mankaɣ tiyinuu wazaɣ.”»+

20 Yehowa tɔm talɩ Agee nabʋlɛ ɖeɖe fenaɣ kɩyakʋ 24 ñɩŋgʋ wiye+ se: 21 «Heyi Yuuda egeetiye ñʋʋdʋ Zorobabɛɛlɩ se: “Mankaɣ ñamsʋʋ ɛsɔdaa nɛ tɛtʋ.+ 22 Mankaɣ tuzuu kewiyisi kpelisi nɛ manɖɩzɩ ajɛɛ kewiyisi ɖoŋ;+ mankaɣ tuzuu kɛɛkɛɛ nɛ kɩ-yɔɔ caɣyaa, kpaŋnaŋ nɛ ɩ-yɔɔ caɣyaa pakaɣ tɔlʋʋ, paa weyi lɛ e-koobu laɣɖɛ kaɣnɩ-ɩ ɖɩzʋʋ.”»+

23 «“Evemiye nɖɩ ɖi-wiye, yoyaa tɛ Yehowa yɔɔdʋʋna, mankaɣ-ŋ kpaɣʋ, ña ma-lɩmɖʋyʋ, Seyalɩtɩyɛɛlɩ+ pɩyalʋ Zorobabɛɛlɩ,+ Yehowa yɔɔdʋʋna, nɛ mankaɣ-ŋ pɩsʋʋ ɛzɩ kokooye nɖɩ pañɩkɩɣnɩ niye yɔ, mbʋ pʋyɔɔ yɔ ña malɩzaa,” yoyaa tɛ Yehowa yɔɔdʋʋna.»