MALAKII

1 Tɔm kɩcɛyɩtʋ:

Tɔm ndʋ Yehowa tɩŋnɩ Malakii* yɔɔ nɛ eheyi Izrayɛɛlɩ yɔ ndʋ yɔ:

2 «Mawɩlɩ-mɩ sɔɔlɩm,»+ Yehowa yɔɔdʋʋna.

Ɛlɛ mɩpɔzʋʋ se: «Ɛzɩma ŋwɩlɩ-ɖʋ sɔɔlɩm?»

«Ezaawuu taakɛ Yakɔɔb ɖalʋ yaa we?+ Ɛlɛ maasɔɔlɩ Yakɔɔb,» Yehowa yɔɔdʋʋna. 3 «Nɛ Ezaawuu ɛlɛ lɛ, maapaɖɩ-ɩ;+ nɛ manpɩsɩ ɛ-pʋŋ njaa+ nɛ meyele nɛ ɛ-ñɩm pɩsɩ kañɩmbusuu taa tɛyɛ hasɩ ɖɩjaɣyɛ.»+

4 «Paa Edom ɛyɔɔdʋʋ se: “Pɔyɔkɩ-ɖʋ, ɛlɛ ɖɩkaɣ pɩsʋʋ nɛ ɖɩɖaɣnɩ kʋsʋʋ njaa” yɔ, tɔm tʋnɛ yoyaa tɛ Yehowa yɔɔdʋʋ: “Pakaɣ maʋ, ɛlɛ mankaɣ yɔkʋʋ, nɛ pakaɣ-wɛ yaʋ se ‘kañatʋ lakasɩ egeetiye’ nɛ ‘samaɣ ŋga Yehowa kʋ kɔ-tɔm tam yɔ.’+ 5 Mɩ-maɣmaɣ mɩ-ɛsa kaɣ-pʋ naʋ, nɛ ɩkaɣ yɔɔdʋʋ se: ‘Pasa Yehowa Izrayɛɛlɩ egeetiye kpeekpe taa.’”»

6 «“Pɩyalʋ ɖʋʋ ɛ-caa hɩɖɛ,+ nɛ yom ɖʋʋ ɛ-ñʋʋdʋ hɩɖɛ. Ye mbʋ, ye mɛnkɛ caja,+ le hɩɖɛ ɖʋʋ mbʋ mamʋnaa yɔ pɩwɛɛ?+ Nɛ ye mɛnkɛ ñʋʋdʋ,* le ñamtʋ* ndʋ mamʋnaa yɔ tɩwɛɛ?” Yoyaa tɛ Yehowa pɔzʋʋnɩ-mɩ cɔjɔnaa, mɩ mba iniŋ ma-hɩɖɛ yɔ.+

«“Ɛlɛ ɩpɔzʋʋ se: ‘Ɛzɩma ɖinim ña-hɩɖɛ?’”

7 «“Mbʋ pʋyɔɔ yɔ ɩsɩɣ tɔɔnaɣ* ŋga pepisi-kɛ yɔ ma-altaaru yɔɔ.”

«“Nɛ ɩpɔzʋʋ se: ‘Ɛzɩma ɖipisi-ŋ?’”

«“Mbʋ pʋyɔɔ yɔ ɩyɔɔdʋʋ se: ‘Yehowa tɛ taabɩlɩ+ kɛ mbʋ pɩwɛɛ se peni yɔ.’ 8 Nɛ alɩwaatʋ ndʋ iwokini kpɩnɛ nɖɩ ɖɩyʋlʋmaa yɔ se ɩlaɣ kɩlaʋ yɔ, ɩyɔɔdʋʋ se: ‘Pɩtɩwɛɛkɩ pʋyʋ.’ Nɛ iwokini kpɩnɛ taɖɩyɛ tʋ yaa kpɩnɛ kʋdɔndʋ lɛ, ɩyɔɔdʋʋ se: ‘Pɩtɩwɛɛkɩ pʋyʋ.’”»+

«Mentendi-ŋ, kpaɣ-yɛ nɛ ŋwoni ño-komina ñʋʋdʋ nɛ ŋna. Ɛ-taa kaɣ-ŋ labɩnʋʋ leleŋ na? Ɛkaɣ-ŋ mʋʋ camɩyɛ na?» yoyaa tɛ Yehowa yɔɔdʋʋna.

9 «Ɛlɛ lɛɛlɛɛyɔ lɛ, mentendi-mɩ, itendi Ɛsɔ nɛ ɛna ɖa-pʋtɔdɩyɛ. Ɛzɩ mi-nesi tɛɛ kɩlaŋ ɛnɩ yɔ ɩ-ɖɔndɩ kaɣ yebu se ɛna mɩ-taa nɔɔyʋ pʋtɔdɩyɛ yaa we?» yoyaa tɛ Yehowa yɔɔdʋʋna.

10 «Nɛ mɩ-taa anɩ sɔɔlɩ faaa se ɛɖɩɣ nɔnɔsɩ?*+ Mbʋ pʋyɔɔ yɔ miŋ maɣmaɣ, ɩtɩsɔɔlɩ se ɩɖʋ ma-altaaru yɔɔ falaa.+ Mɩ-tɔm tɩkɛdɩnɩ-m kaaʋ; nɛ mi-nesi tɛɛ kɩlaʋ* nakʋyʋ tɩkɛdɩnɩ-m paa ññɩɩ,»+ yoyaa tɛ Yehowa yɔɔdʋʋna.

11 «Mbʋ pʋyɔɔ yɔ kpaɣnɩ wɩsɩ ɖɩlɩyɛ nɛ piwolo wɩsɩ ɖɩɖʋyɛ,* ma-hɩɖɛ kaɣ kɛʋ sɔsɔɖɛ ajɛɛ hɛkʋ taa.+ Paa le pakaɣ kɩlaŋ ñɔsɩ kpazʋʋ, nɛ pakaɣ ma-hɩɖɛ laʋ kɩlaŋ, nɛ pɩkɛnɩ kele kele haɖɛ; mbʋ pʋyɔɔ yɔ ma-hɩɖɛ kaɣ kɛʋ sɔsɔɖɛ ajɛɛ hɛkʋ taa,»+ yoyaa tɛ Yehowa yɔɔdʋʋna.

12 «Ɛlɛ ipisiɣ-ɖɩ*+ nɛ ɩyɔɔdʋʋ se: “Pepisi Yehowa taabɩlɩ, nɛ pɩwɛɛ se peni kɩlaŋ weyi pasɩ kɩ-yɔɔ yɔ, kɩ-yɔɔ tɔɔnaɣ.”+ 13 Ɩyɔɔdʋʋ ɖɔɖɔ se: “Ɩna! Pɩlɩ ɛyaa sɔŋ!” nɛ isekiɣ mɔɔŋ, yoyaa tɛ Yehowa yɔɔdʋʋna. Nɛ ɩkɔŋnɩ mɩlɩm kpɩna, kpɩna tala tɩnaa nɛ kpɩna kʋdɔndɩnaa. Ɛɛɛ, ɩkɔŋnɩ wondu ndʋ se pɩkɛnɩ haɖɛ! Ɛzɩ mankaɣ-ɖɩ mʋʋ mi-nesi tɛɛ?»+ Yehowa yɔɔdʋʋna.

14 «Piyo cɛtɩyʋ weyi ɛwɛnɩ kpɩnɛ abalɩñɩnɖɛ kɩbanɖɛ ɛ-kpɩna taa, ɛlɛ eɖuu nɛ ɛlaa Yehowa kpɩnɛ kʋdɔndʋ* yɔ. Mbʋ pʋyɔɔ yɔ mɛnkɛ Wiyaʋ sɔsɔ;+ nɛ ma-hɩɖɛ kaɣ caɣʋ sɔɔndʋ ajɛɛ hɛkʋ taa,»+ yoyaa tɛ Yehowa yɔɔdʋʋna.

2 «Lɛɛlɛɛyɔ lɛ, mɩ cɔjɔnaa, mɩ paɖʋʋ paɣtʋ tʋnɛ.+ 2 Ye ikizaa se iiwelisiɣ nɛ ye ɩtɩɖʋ mɩ-laŋa taa se ɩsaŋ ma-hɩɖɛ yɔ, mankaɣ nɔɔ kɩdɛkɛdaɣ lɔʋ mɩ-yɔɔ,+ nɛ mankaɣ yebu nɛ mɩ-wazasɩ pɩsɩ nɔɔ kɩdɛkɛdaɣ lɔʋ.+ Ɛɛɛ, meyeba nɛ wazasɩ pɩsɩ nɔɔ kɩdɛkɛdaɣ lɔʋ, mbʋ pʋyɔɔ yɔ iiyeki se titii mɩ-laŋa taa,» yoyaa tɛ Yehowa yɔɔdʋʋna.

3 «Ɩna! Mɩ-lakasɩ yɔɔ lɛ, mankaɣ wɛɛkʋʋ* mi-ɖomaɣ ŋga iɖuwa yɔ,+ nɛ mankaɣ mɩzʋʋ pɩndʋ mɩ-ɛsɩndaa, mɩ-kazandʋ pɩndʋ; nɛ pakaɣ-mɩ wonuu tɩ-yɔɔ.* 4 Ðɩnɛ ɛlɛ, ɩkaɣ naʋ se manɖʋ-mɩ paɣtʋ tʋnɛ se pɩsa nɛ ma nɛ Leevi ɖɛ-ɛgbɛyɛ ɛtaacɛ,»+ yoyaa tɛ Yehowa yɔɔdʋʋna.

5 «Ɛgbɛyɛ nɖɩ ɖɩwɛ ma nɛ ɩ ɖɛ-hɛkʋ taa yɔ, ɖɩkɛ wezuu nɛ laŋhɛzɩyɛ ɛgbɛyɛ, nɛ maha-ɩ wezuu nɛ laŋhɛzɩyɛ se pɩsa nɛ ese-m sɔɔndʋ.* Toovenim taa lɛ, ese-m sɔɔndʋ, ɛɛɛ, ese ma-hɩɖɛ sɔɔndʋ siŋŋ. 6 Toovenim paɣtʋ* kaawɛ ɛ-nɔɔ taa,+ nɛ pataana kɩdɛkɛdɩm nabʋyʋ e-ndomee yɔɔ. Eyeba nɛ ma nɛ ɩ ɖɩɖɔ laŋhɛzɩyɛ taa nɛ siɣsiɣ wɛtʋ taa, nɛ eyeba nɛ sakɩyɛ ha siɣye kɩwɛɛkɩm.+ 7 Mbʋ pʋyɔɔ yɔ pɩwɛɛ se cɔjɔ ndomee ɩɖɔkɩ sɩmtʋ, nɛ pɩwɛɛ se samaɣ ɛñɩnɩ paɣtʋ* ɛ-nɔɔ taa,+ mbʋ pʋyɔɔ yɔ ɛnʋ kɛnɩ yoyaa tɛ Yehowa tiyiyu.

8 «Ɛlɛ mɩ lɛ iposi mɩ-tɩ nɛ nʋmɔʋ. Paɣtʋ hɔɔlʋʋ taa lɛ, iyeba* nɛ pituuli ɛyaa sakɩyɛ.+ Ɩwɛɛkɩ Leevi ɛgbɛyɛ,+ yoyaa tɛ Yehowa yɔɔdʋʋna. 9 Pʋyɔɔ lɛ, mankaɣ-mɩ ɖʋʋ fɛyɛ nɛ moluzi-mɩ samaɣ kpeekpe ɛsɩndaa, mbʋ pʋyɔɔ yɔ ɩtɩɖɔkɩ ma-nʋmɔŋ, ɛlɛ ɩlabɩ ɛsɩmɩyɛ yɔɔ lakasɩ paɣtʋ yɔɔ ɖɔm hɔɔlʋʋ taa.»+

10 «Ða-tɩŋa, ɖa-caa tɩkɛ kʋɖʋm yaa we?+ Pɩtɩkɛ Ɛsɔ kʋɖʋm lɩzɩnɩ-ɖʋ yaa we? Ye mbʋ, ɛbɛ yɔɔ ɖipeɣziɣ ɖama+ nɛ ɖipisiɣ ɖɔ-cɔzɔnaa ɛgbɛyɛ? 11 Yuuda labɩ pɩ-tɛɛ nɛ pɩ-yɔɔ lakasɩ, nɛ pala ɛzaɣtʋ lakasɩ Izrayɛɛlɩ taa nɛ Yeruzalɛm taa; mbʋ pʋyɔɔ yɔ Yuuda tɩña Yehowa kele kele wɛtʋ,*+ kele kele wɛtʋ* ndʋ ɛlɛ sɔɔlaa yɔ, nɛ ɛkpaɣ agbaaɣdaa ɛsɔ nɔɔyʋ pɛlɛ nɛ ɛpɩsɩ-ɩ ɛ-halʋ.+ 12 Yehowa kaɣ lɩzʋʋ Yakɔɔb kizinzikiŋ tɛɛ mba payɩ palakɩ mbʋ yɔ pa-taa paa weyi, paa ɛtɩɩkɛ anɩ yɔ,* paa ɛkɔnɩ haɖɛ nɛ ɛlaa kɩlaʋ yoyaa tɛ Yehowa yɔ.»+

13 «Ɩtasɩɣ nabʋyʋ labʋ ɖɔɖɔ,* nɛ piyeki nɛ Yehowa tɛ altaaru suuni ɛsɩtɛɣlɩm, witu nɛ sizuu, nɛ pʋyɔɔ lɛ ɛɛtasɩɣ kemnuu mɩ-haɖɛ, nɛ mbʋ payɩ pɩlɩɣnɩ mi-nesi tɛɛ yɔ, pɩ-taa nabʋyʋ ɛɛtasɩɣ-ɩ kɛdɩnʋʋ.+ 14 Nɛ ɩpɔzʋʋ se: “Ɛbɛ yɔɔ?” Mbʋ pʋyɔɔ yɔ Yehowa lɩzɩ aseɣɖe ña nɛ ñe-evebitu taa halʋ mɩ-hɛkʋ taa, halʋ weyi ŋpeɣzaa yɔ,* ŋgʋ ɛkɛ ña-taabalʋ nɛ ɛkɛ ɖɔɖɔ halʋ weyi ña nɛ ɩ ɩɖʋ ɛgbɛyɛ nɛ ɛpɩsɩ ña-halʋ yɔ.*+ 15 Ɛlɛ nɔɔyʋ kaawɛɛ nɛ ɛlɛ tɩla mbʋ, mbʋ pʋyɔɔ yɔ ɛɛwɛnɩ Ɛsɔ fezuu kiɖeɖeu hɔɔlʋʋ nakʋyʋ. Ɛbɛ ɛyʋ ɛnʋ ɛñɩnaɣ? Ɛsɔ lʋlʋʋ taa mba.* Pʋyɔɔ lɛ, ɩɖɔkɩ mi-fezuu* camɩyɛ, nɛ nɔɔyʋ etaapeɣzi* e-evebitu taa halʋ. 16 Mbʋ pʋyɔɔ yɔ manpaɖɩɣ* nesi cɛbʋ,+ Izrayɛɛlɩ tɛ Ɛsɔ Yehowa yɔɔdʋʋna, “nɛ manpaɖɩɣ weyi ɛkpakɩɣ puuyaɣ lakasɩ nɛ ehuuzuuni e-toko yɔɔ* yɔ,” yoyaa tɛ Yehowa yɔɔdʋʋna. “Ɩɖɔkɩ mi-fezuu* camɩyɛ, nɛ pɩfɛyɩ se ɩla agutaaku lakasɩ.”+

17 «Ɩnɩ Yehowa nɛ mɩ-tɔm.+ Ɛlɛ ɩpɔzʋʋ se: “Ɛzɩma ɖɩnɩ-ɩ?” Ɩnɩ-ɩ mbʋ pʋyɔɔ yɔ ɩyɔɔdʋʋ se: “Weyi ɛlakɩ kɩdɛkɛdɩm yɔ ɛkɛ kɩbanʋ Yehowa ɛsɩndaa, nɛ ɛ-tɔm kɛdɩɣnɩ-ɩ,”+ nɛ ɩyɔɔdʋʋ se: “Le siɣsiɣ wɛtʋ tɛ Ɛsɔ wɛɛ?”»

3 «Ɩna! Mentiyiɣ men-tiyiyu, nɛ ɛkaɣ nʋmɔʋ ɖʋʋ* mɛ-ɛsɩndaa.+ Nɛ Kɩbaɣlʋ toovenim tʋ, weyi iɖiɣni ñɩnʋʋ yɔ, ɛkaɣ kɔm e-templo taa tuda;+ nɛ ɛgbɛyɛ tiyiyu kaɣ kɔm, ɛnʋ weyi ɛ-tɔm kɛdɩnɩ-mɩ yɔ. Ɩna! Paa pɩɩlabɩ ɛzɩma yɔ ɛkaɣ kɔm,» yoyaa tɛ Yehowa yɔɔdʋʋna.

2 «Ɛlɛ akaɣ pɩzʋʋ nɛ ɛɖɔkɩ ɛ-tɩ ɛ-kɔmtʋ wiye, nɛ akaɣ pɩzʋʋ nɛ ɛsɩŋ alɩwaatʋ ndʋ ɛlɩɣ yɔ? Mbʋ pʋyɔɔ yɔ ɛkaɣ wɛʋ ɛzɩ yolusiyu miŋ yɔ, nɛ ɛkaɣ wɛʋ ɛzɩ wondu cɔtɩyaa fɔɔfɔɔ yɔ.+ 3 Nɛ ɛkaɣ caɣʋ ɛzɩ liidiye yolusiyu nɛ liidiye ñalɩyʋ yɔ,+ nɛ ɛkaɣ ñalʋʋ Leevi pɩyalaa; nɛ ɛkaɣ-wɛ kelisuu* ɛzɩ pekelisuu sika nɛ liidiye yɔ, nɛ pɩtʋʋ fɛyɩ se pakaɣ pɩsʋʋ Yehowa samaɣ ŋga kalaɣ-ɩ kɩlaŋ* siɣsiɣ wɛtʋ taa yɔ. 4 Nɛ Yuuda nɛ Yeruzalɛm kɩlaŋ* kaɣ kɛdɩnʋʋ* Yehowa siŋŋ ɛzɩ pɩɩwɛʋ ɖooo lɔŋ kɩyakɩŋ taa yɔ, nɛ ɛzɩ pɩɩwɛʋ caanaʋ taa pɩnzɩ taa yɔ.+

5 «Mankaɣ-mɩ ñɔtɩnʋʋ se mahʋʋnɩ-mɩ tɔm, nɛ mankaɣ aseɣɖe lɩzʋʋ lɛɛ lɛɛ nɛ mankʋ maajiki laɖaa tɔm,+ acɛyɛ laɖaa tɔm, mba palakɩ cɛtɩm ɖuutu yɔ pɔ-tɔm,+ mba pomuluu weyi ɛlakɩ tʋmɩyɛ se pɛhɛyɩ-ɩ yɔ,+ mba pomuluu lelu nɛ pɩɣa ŋga kɛfɛyɩ caa yɔ* pɔ-tɔm,+ nɛ mba pekiziɣ se paasɩɣnɩ ɛgɔm yɔ* pɔ-tɔm.+ Patise-m sɔɔndʋ,» yoyaa tɛ Yehowa yɔɔdʋʋna.

6 «Mbʋ pʋyɔɔ yɔ mɛkɛnɩ Yehowa; maalɛɣzɩɣ.*+ Nɛ mɩkɛnɩ Yakɔɔb pɩyalaa; ɩtɩtalɩtɩ mɩ-ɖɩdɛnɖɛ. 7 Kpaɣnɩ mɩ-cɔzɔnaa alɩwaatʋ taa ɩha siɣye man-paɣtʋ nɛ ɩtɩɖɔ tɩ-yɔɔ.+ Ɩpɩsɩ mɔn-cɔlɔ, nɛ mankaɣ pɩsʋʋ mɩ-cɔlɔ,»+ yoyaa tɛ Yehowa yɔɔdʋʋna.

Ɛlɛ ɩpɔzʋʋ se: «Ɛzɩma tɩyɛ ɖɩpɩsɩɣ?»

8 «Ɛzɩ ɛyʋ yem pɩzɩɣ nɛ ɛmɩlɩ Ɛsɔ? Ɛlɛ ɩwɛɛ nɛ ɩmɩlɩɣ-m.»

Nɛ ɩpɔzʋʋ se: «Ɛzɩma tɩyɛ ɖɩmɩlɩ-ŋ?»

«Hɔɔlʋʋ 10 ñɩŋgʋ nɛ haɖɛ hɔɔlʋʋ taa. 9 Toovenim taa lɛ, pɔlɔ mɩ-yɔɔ nɔɔ kɩdɛkɛdaɣ,* mbʋ pʋyɔɔ yɔ ɩwɛɛ nɛ ɩmɩlɩɣ-m; ɛɛɛ, ɛjaɖɛ kpeekpe wɛɛ nɛ ɖɩlakɩ mbʋ. 10 Ɩkɔnɩ hɔɔlʋʋ 10 ñɩŋgʋ kpeekpe wondu ɖɩzɩyɛ taa,+ nɛ tɔɔnaɣ wɛɛ man-ɖɩɣa taa;+ nɛ mentendi-mɩ, ɩtakɩ-m hɔɔlʋʋ ŋgʋ kɩ-taa nɛ ɩna se maakaɣ-mɩ tʋlʋʋ ɛsɔdaa nɔnɔsɩ+ nɛ manpɩyɩ mɩ-yɔɔ wazaɣ pɩkɔɔ pɩsɩɩnɩ alɩwaatʋ ndʋ nabʋyʋ ɛɛtasɩɣ-mɩ tɛɖʋʋ yɔ,»+ yoyaa tɛ Yehowa yɔɔdʋʋna.

11 «Nɛ mɩ-yɔɔ lɛ, mankaɣ pʋʋtɩyʋ* ɛsɩndaa niye wɩlʋʋ, nɛ ɛɛkaɣ wɛɛkʋʋ mɩ-ɛjaɖɛ taa tɩŋ pee, nɛ mɩ-hayɩm taa viiñi tɩŋ ɩɩkaɣ kizuu pee lʋlʋʋ,»+ yoyaa tɛ Yehowa yɔɔdʋʋna.

12 «Ajɛɛ kpeekpe kaɣ-mɩ yaʋ se koboyaɣ tɩnaa,+ mbʋ pʋyɔɔ yɔ ɩkaɣ pɩsʋʋ taa leleŋ ɛjaɖɛ,» yoyaa tɛ Yehowa yɔɔdʋʋna.

13 «Tɔm ndʋ ɩyɔɔdɩ mɔ-yɔɔ yɔ tɩwɛ ɖoŋ,» Yehowa yɔɔdʋʋna.

Nɛ ɩpɔzʋʋ se: «Ɛzɩma tɩyɛ ɖɩyɔɔdɩ ñɔ-yɔɔ tɔm ɖɛ-hɛkʋ taa?»+

14 «Ɩtɔŋ se: “Ɛsɔ sɛʋ fɛyɩnɩ wazaɣ nakɛyɛ.+ Ðɩlabɩ mbʋ pɩɩkɛnɩ-ɖʋ kɩjɛyʋʋ ɛ-ɛsɩndaa se ɖɩla yɔ nɛ ɖɩɖɔmnɩ laŋwɛɛkɩyɛ yoyaa tɛ Yehowa ɛsɩndaa lɛ, kɛzɛɣa ŋga ɖihiɣaa? 15 Lɛɛlɛɛyɔ lɛ, ɖɩkpakɩɣ ɛyaa mba pakpazɩɣ pa-tɩ yɔ se pɛkɛ koboyaɣ tɩnaa. Pɩtasɩ lɛ, mba palakɩ kañatʋ lakasɩ yɔ, piɖeɣni-wɛ.+ Pakatɩɣ nɛ patakɩɣ Ɛsɔ nɛ nabʋyʋ ɛɛlakɩ-wɛ.”»

16 Alɩwaatʋ ndʋ tɩ-taa lɛ, mba peseɣ Yehowa sɔɔndʋ yɔ pɔyɔɔdɩnɩ ɖama, paa weyi lɛ, ɛ nɛ ɛ-taabalʋ, nɛ Yehowa kaawɛɛ nɛ ekeŋ nɛ ewelisiɣ. Nɛ paama tɔzʋʋ takayaɣ* nakɛyɛ ɛ-ɛsɩndaa,+ mba peseɣ Yehowa sɔɔndʋ nɛ mba pamaɣzɩɣ ɛ-hɩɖɛ yɔɔ yɔ* pɔ-yɔɔ.+

17 «Nɛ pakaɣ kɛʋ man-pʋyʋ,+ kɩyakʋ ŋgʋ manpɩsɩɣ-wɛ me-ŋgee pʋyʋ yɔ.*+ Mankaɣ naʋ pa-pʋtɔdɩyɛ ɛzɩ abalʋ naɣʋ ɛ-pɩyalʋ weyi ɛlakɩ-ɩ tʋmɩyɛ yɔ ɛ-pʋtɔdɩyɛ yɔ,+ yoyaa tɛ Yehowa yɔɔdʋʋna. 18 Nɛ ɩkaɣ tasʋʋ naʋ tʋkaɣ ŋga kɛwɛ ɛyʋ siɣsiɣ tʋ nɛ kañatʋ tʋ pɛ-hɛkʋ taa yɔ,+ tʋkaɣ ŋga kɛwɛ weyi ɛsɛɣ Ɛsɔ nɛ weyi ɛɛsɛɣ-ɩ yɔ pɛ-hɛkʋ taa yɔ.»

4 «Mbʋ pʋyɔɔ yɔ ɩna, kɩyakʋ ŋgʋ kiɖiɣni kɔm yɔ, kɩñakɩ ɛzɩ miŋ momoɖe yɔ,+ alɩwaatʋ ndʋ tɩ kpazɩyaa tɩŋa nɛ mba palakɩ kañatʋ lakasɩ yɔ pa-tɩŋa pakaɣ pɩsʋʋ ɛzɩ kesi yɔ. Pɩtʋʋ fɛyɩ se kɩyakʋ ŋgʋ kiɖiɣni kɔm yɔ kɩkaɣ-wɛ ñaɣʋ, nɛ pɩɩkaɣ-wɛ kazʋʋ liɖe yaa piliŋa, yoyaa tɛ Yehowa yɔɔdʋʋna. 2 Ɛlɛ mɩ mba ɩñaŋ* ma-hɩɖɛ yɔ, siɣsiɣ wɛtʋ wɩsɩ kaɣ mɩ-yɔɔ ñandʋʋ, kʋdɔmɩŋ waʋ wɛ sɩ-ñalɩmɩyɛ* taa; nɛ ɩkaɣ maʋ ɛzɩ newee wena awɛ num yɔ.»

3 «Nɛ ɩkaɣ fɛyʋʋ kañatʋ tɩnaa, mbʋ pʋyɔɔ yɔ pakaɣ wɛʋ ɛzɩ mʋzʋʋ yɔ mɩ-naataŋ tɛɛ kɩyakʋ ŋgʋ meyeki se pɩla mbʋ yɔ,» yoyaa tɛ Yehowa yɔɔdʋʋna.

4 «Ɩtɔzɩ ma-lɩmɖʋyʋ Moyizi Paɣtʋ yɔɔ, ɖʋtʋ nɛ tɔm hʋʋ ɖʋtʋ ndʋ manɖʋ Orɛɛbʋ se Izrayɛɛlɩ tɩŋa ɛña yɔ.+

5 «Ɩna! Mentiyiɣni-mɩ nayʋ Eliya+ pʋcɔ nɛ Yehowa kɩyakʋ sɔsɔʋ ŋgʋ kɩcaɣ sɔɔndʋ yɔ kɩtalɩ.+ 6 Ɛkaɣ kɛzʋʋ cajanaa laŋa nɛ pɩyalaa yɔɔ kiŋ,+ nɛ ɛkɛzɩ pɩyalaa laŋa nɛ cajanaa yɔɔ kiŋ, se mantaakɔɔ nɛ manazɩ tɛtʋ nɛ manɖɩzɩ-tʋ.»

(Ebree kʋnʋŋ nɛ Arameya kʋnʋŋ Masɩ taa tɔm ɖɛzʋʋ sɩ tɩnaɣ cɩnɛ, hɔɔlʋʋ ŋgʋ kɩkɔŋ yɔ kɩkɛ Krɩstʋ Mba Grɛɛkɩ Masɩ taa tɔm ɖɛzʋʋ)