KƆRƐNTƖ MBA TAKAYAƔ KAJALAƔ ÑƖŊGA

1 Ma Pɔɔlɩ, weyi paya-ɩ se ɛkɛ Krɩstʋ Yesu tɛ apostoloo+ pɩtɩŋnɩ Ɛsɔ sɔɔlɩm yɔɔ yɔ, nɛ ɖo-koobu Sɔsɩtɛɛnɩ, 2 ɖamaɣnɩ takayaɣ kanɛ Ɛsɔ ɛgbɛyɛ nɖɩ ɖɩwɛ Kɔrɛntɩ+ yɔ, ɖamaɣnɩ-kɛ mɩ mba papɩsɩ-mɩ kele kele tɩnaa Krɩstʋ Yesu taa yɔ,+ nɛ payaa-mɩ se ɩkɛ kiɖeɖema yɔ, pɩkpɛndɩnɩ mba payɩ payaɣ ɖa-Kɩbaɣlʋ Yesu Krɩstʋ hɩɖɛ paa le yɔ,+ ɛnʋ weyi ɛkɛ pa-Kɩbaɣlʋ nɛ ɖa-Kɩbaɣlʋ yɔ:

3 Tɛtɛ nɛ ɩwɛɛnɩ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ.

4 Mɛnsɛɣ mɛ-Ɛsɔ tam mɩ-yɔɔ se ɛlabaɣ lɛ, Ɛsɔ lootiye nɖɩ paha-mɩ Krɩstʋ Yesu taa yɔ ɖɩ-yɔɔ; 5 mbʋ pʋyɔɔ yɔ pɩtɩŋa pɩ-taa lɛ, papɩsɩ-mɩ ñɩm tɩnaa ɛ-taa, nɛ ɩwɛɛ niye siŋŋ yɔɔdaɣ taa, nɛ ɩwɛɛnɩ sɩmtʋ tɩŋa,+ 6 ɛzɩ Krɩstʋ yɔɔ aseɣɖe tɔm+ kam camɩyɛ mɩ-hɛkʋ taa yɔ; 7 nɛ pʋyɔɔ lɛ, ɩɩtɛɖɩɣ kʋjɔʋ nakʋyʋ paa ññɩɩ alɩwaatʋ ndʋ ɩwɛɛ nɛ ɩɖaŋɩɣ kpam ɖa-Kɩbaɣlʋ Yesu Krɩstʋ yɔɔ kuluu yɔ.+ 8 Ɛkaɣ yebu ɖɔɖɔ nɛ ɩka camɩyɛ nɛ pɩkɔɔ nɛ pɩtalɩ tɩnaɣ yɔɔ, se pɩsa nɛ pataana kɩdɛkɛdɩtʋ natʋyʋ mɩ-yɔɔ ɖa-Kɩbaɣlʋ Yesu Krɩstʋ kɩyakʋ wiye.+ 9 Ɛsɔ wɛ siɣsiɣ,+ ɛnʋ yanɩ-mɩ se mɩ nɛ ɛ-Pɩyalʋ, ɖa-Kɩbaɣlʋ Yesu Krɩstʋ, ɩkɛ taabalaa.*

10 Lɛɛlɛɛyɔ lɛ koobiya, menseɣtiɣ-mɩ ɖa-Kɩbaɣlʋ Yesu Krɩstʋ hɩɖɛ taa, se mɩ-tɩŋa payɩ ɩkpɛndɩ yɔɔdaɣ, nɛ tayʋʋ ɛtaawɛɛ mɩ-hɛkʋ taa;+ ɛlɛ ɩla nɔɔ kʋɖʋmaɣ camɩyɛ maɣzɩm kʋɖʋmʋm taa nɛ ɩwɛɛnɩ lɩmaɣza kʋɖʋma.+ 11 Mbʋ pʋyɔɔ yɔ, mon-koobiya, Klowee ɖɩɣa taa mba nabɛyɛ heyi-m mɩ-tɔm se ɖama kɩɩnɩnʋʋ wɛ mɩ-hɛkʋ taa. 12 Tɔm ndʋ mancaɣ yɔɔdʋʋ yɔ, ndʋ lɛ se mɩ-taa paa weyi lɛ ɛtɔŋ se: «Ma yɔ, mɛnkɛ Pɔɔlɩ ñɩnʋ,» lɛlʋ se: «Ma lɛ, mɛnkɛ Apoloosi+ ñɩnʋ,» lɛlʋ ɖɔɖɔ se: «Ma lɛ, mɛnkɛ Sefaasɩ* ñɩnʋ,» nɛ lɛlʋ ñɔtɔŋ se: «Ma lɛ, mɛnkɛ Krɩstʋ ñɩnʋ.» 13 Ɛzɩ patayɩ Krɩstʋ? Pɔɔlɩ pakam sizika yɔɔ mɩ-yɔɔ yaa we? Yaa Pɔɔlɩ hɩɖɛ taa pamɩyɩsɩ-mɩ lɩm? 14 Mɛnsɛɣ Ɛsɔ se ɛlabaɣ lɛ, mbʋ pʋyɔɔ yɔ mantɩmɩyɩsɩ mɩ-taa nɔɔyʋ lɩm nɛ pɩtasɩnɩ Krispuusi+ nɛ Gayuusi,+ 15 se pɩsa nɛ nɔɔyʋ ɛtaapɩzɩ nɛ ɛyɔɔdɩ se ma-hɩɖɛ taa pamɩyɩsɩ-mɩ lɩm. 16 Ɛɛɛ, mamɩyɩsɩ lɩm ɖɔɖɔ Stefanaasɩ ɖɩɣa taa mba.+ Piyele nɛ pɩkazɩ mba yɔ, maasɩŋ se mamɩyɩsɩ nɔɔyʋ lɩm yaa mantɩmɩyɩsɩ. 17 Mbʋ pʋyɔɔ yɔ Krɩstʋ titiyi-m se mamɩyɩsɩ ɛyaa lɩm, ɛlɛ se monsusi tɔm kɩbandʋ;+ nɛ maatɩŋɩɣnɩ lɔŋsɩnɖaa yɔɔdaɣ yɔɔ, se pɩtaala nɛ Krɩstʋ nazɩm sizika* pɩsɩ mbʋ pɩfɛyɩ wazaɣ yɔ.

18 Mbʋ pʋyɔɔ yɔ nazɩm sizika* yɔɔ tɔm kɛ kɩmɛlɛndʋ tɔm mba paɖɩzɩɣ-wɛ yɔ;+ ɛlɛ ɖa mba peɖiɣni ɖa-ñʋʋ yabʋ yɔ, tɩkɛ-ɖʋ Ɛsɔ ɖoŋ.+ 19 Mbʋ pʋyɔɔ yɔ pamawa se: «Mankaɣ ɖɩzʋʋ lɔŋsɩnɖaa lɔŋsɩnɖɛ, nɛ mankaɣ lɔʋ* lɛɣtʋ tɩnaa lɛɣtʋ.»+ 20 Le lɔŋsɩnɖʋ wɛɛ? Le takayɩsɩ mayʋ* wɛɛ? Le ɛjaɖɛ ɖɩnɛ* ɖɩ-tɛ ndɔnjɔɔlɩyɛ laɖʋ wɛɛ? Ɛzɩ Ɛsɔ tɩpɩsɩ ɛjaɖɛ lɔŋsɩnɖɛ kɩmɛlɛndʋ na? 21 Mbʋ pʋyɔɔ yɔ Ɛsɔ lɔŋsɩnɖɛ hɔɔlʋʋ taa lɛ, ɛjaɖɛ tɩpɩzɩ nɛ ɖɩtɩlɩ Ɛsɔ+ pɩtɩŋnɩ ɖɩ-maɣmaɣ ɖɩ-lɔŋsɩnɖɛ yɔɔ,+ pʋyɔɔ pɩkɛdɩnɩ Ɛsɔ se ɛtɩŋnɩ tɔm ndʋ posusuu yɔ tɩ-kɩmɛlɛndʋ+ yɔɔ nɛ ɛya mba petisiɣ yɔ pa-ñʋʋ.

22 Mbʋ pʋyɔɔ yɔ Yuuda mba pɔzʋʋ se pawɩlɩ-wɛ yʋsasɩ+ nɛ Grɛɛkɩ mba ñɩnɩɣ lɔŋsɩnɖɛ; 23 ɛlɛ ɖa lɛ, ɖisusuu Krɩstʋ weyi pakamɩ-ɩ sizika yɔɔ yɔ, ɛkɛnɩ Yuuda mba mbʋ pituuluu yɔ; ɛlɛ ajɛɛ taa mba lɛ ɛkɛnɩ-wɛ kɩmɛlɛndʋ.+ 24 Ɛlɛ, Yuuda ñɩma nɛ Grɛɛkɩ ñɩma mba paya-wɛ yɔ, paba lɛ Krɩstʋ kɛnɩ-wɛ Ɛsɔ ɖoŋ nɛ Ɛsɔ lɔŋsɩnɖɛ.+ 25 Mbʋ pʋyɔɔ yɔ Ɛsɔ wonuu ŋgʋ kɩkɛ kɩmɛlɛndʋ pʋyʋ yɔ, kɩwɛ lɔŋ nɛ pɩkɩlɩ ɛyaa; nɛ Ɛsɔ wonuu ŋgʋ kɩkɛ ɛjandʋ pʋyʋ yɔ, kɩwɛ ɖoŋ nɛ pɩkɩlɩ ɛyaa.+

26 Mbʋ pʋyɔɔ yɔ, koobiya, ɩna mɩ mba ɛyawa yɔ: Sakɩyɛ tɩkɛ lɔŋsɩnɖaa tomnaɣ taa,*+ nɛ sakɩyɛ tɩkɛ ɖoŋ tɩnaa, nɛ sakɩyɛ tɩkɛ mba palʋlɩ-wɛ hɔŋ sɔsɔŋ taa yɔ;*+ 27 ɛlɛ Ɛsɔ lɩzɩ ɛjaɖɛ yɔɔ wondu ndʋ tɩkɛ kɩmɛlɛndʋ pʋyʋ yɔ se ɛɖʋnɩ fɛyɛ lɔŋsɩnɖaa; nɛ Ɛsɔ lɩzɩ ɛjaɖɛ yɔɔ wondu ndʋ tɩkɛ ɛjandʋ pʋyʋ yɔ se ɛɖʋnɩ fɛyɛ wondu ndʋ tɩwɛ ɖoŋ yɔ;+ 28 nɛ Ɛsɔ lɩzɩ ɛjaɖɛ yɔɔ wondu ndʋ tɩtɩlɩɩ pʋyʋ yɔ nɛ wondu ndʋ peniŋ-tʋ yɔ, wondu ndʋ tɩfɛyɩ yɔ, se ɛɖɩzɩnɩ wondu ndʋ tɩwɛɛ yɔ,+ 29 se pɩsa nɛ nɔɔyʋ* ɛtaakʋndɩ Ɛsɔ ɛsɩndaa. 30 Ɛlɛ ɛ-cɔlɔ pɩlɩnaa nɛ mɩ nɛ Krɩstʋ Yesu ɩwɛɛ nɔɔ kʋɖʋmaɣ, weyi ɛpɩsɩ lɔŋsɩnɖɛ nɖɩ ɖɩlɩnɩ Ɛsɔ cɔlɔ yɔ ɖɔ-yɔɔ yɔ, weyi ɛpɩsɩ ɖɔɖɔ siɣsiɣ wɛtʋ+ nɛ kele kele wɛtʋ+ nɛ holuu pɩtɩŋnɩ kɩhɛyʋʋ pʋ-ñʋʋ taa yɔɔ yɔ,+ 31 se pɩla ɛzɩ pamaʋ yɔ: «Weyi ɛkʋndʋʋ yɔ, ɛkʋndɩ Yehowa* yɔɔ.»+

2 Pʋyɔɔ lɛ koobiya, alɩwaatʋ ndʋ mɔnkɔm mɩ-cɔlɔ se monsusi-mɩ Ɛsɔ mɛsaɣ tɛɛ tɔm kiɖeɖetu yɔ,+ pɩtɩkɛ tɔm pee sɔsɔna+ yaa lɔŋsɩnɖɛ mɔnkɔmnaa. 2 Mbʋ pʋyɔɔ yɔ mɛntɛm man-taa se maatɩlɩɣ natʋyʋ mɩ-hɛkʋ taa nɛ pɩtasɩnɩ Yesu Krɩstʋ, weyi pakamɩ-ɩ sizika yɔɔ yɔ.+ 3 Nɛ maakɔm mɩ-cɔlɔ ɛjandʋ taa nɛ sɔɔndʋ taa nɛ maawɛɛ nɛ menseliɣ siŋŋ; 4 nɛ mɔ-yɔɔdaɣ nɛ tɔm ndʋ monsusaa yɔ patɩkɛ lɔŋsɩnɖɛ tɔm ndʋ tiyeba nɛ mawabɩ-mɩ yɔ, ɛlɛ pɛkɛ fezuu nɛ ɖoŋ wɩlʋʋ,+ 5 se pɩsa nɛ mi-tisuu ɛtaawɛɛ ɛyaa lɔŋsɩnɖɛ taa, ɛlɛ pɩwɛɛ Ɛsɔ ɖoŋ taa.

6 Nɛ ɖɩyɔɔdʋʋ lɔŋsɩnɖɛ tɔm mba papɩwa yɔ pɔ-cɔlɔ,+ ɛlɛ pɩtɩkɛ ɛjaɖɛ ɖɩnɛ* ɖɩ-lɔŋsɩnɖɛ, nɛ pɩtɩkɛ ɖɔɖɔ ɛjaɖɛ ɖɩnɛ ɖɩ-ñʋndɩnaa mba pakaɣ-wɛ ɖɩzʋʋ yɔ pɔ-lɔŋsɩnɖɛ tɔm ɖɩyɔɔdʋʋ.+ 7 Ɛlɛ ɖɩyɔɔdʋʋ Ɛsɔ lɔŋsɩnɖɛ tɔm, nɖɩ ɖɩwɛ mɛsaɣ tɛɛ tɔm kiɖeɖetu taa yɔ;+ nɖɩ pɛmɛsɩ-ɖɩ, nɛ nɖɩ Ɛsɔ kaaɖʋ ɖa-samtʋ yɔɔ pʋcɔ nɛ ɛjaɖɛ yɔɔ ɖʋtʋ wɛɣ yɔ. 8 Lɔŋsɩnɖɛ nɖɩ ɛjaɖɛ ɖɩnɛ* ɖɩ-ñʋndɩnaa taa nɔɔyʋ tɩpɩzɩ nɛ ɛtɩlɩ yɔ;+ mbʋ pʋyɔɔ yɔ ye paatɩlɩ-ɖɩ yɔ, pataakʋ* Kɩbaɣlʋ sɔsɔ. 9 Ɛlɛ ɛzɩ pamaʋ yɔ: «Wondu ndʋ Ɛsɔ ñɔɔzaa nɛ ɛsɩɩ mba pɔsɔɔlɩ-ɩ yɔ, ɛsɩyɛ tɩna-tʋ nɛ nɩŋgbaŋʋʋ tɩnɩɩ-tʋ, nɛ ɛyʋ laŋɩyɛ tɩmaɣzɩ tɩ-yɔɔ ɖɔɖɔ.»+ 10 Mbʋ pʋyɔɔ yɔ, ɖa Ɛsɔ tɩŋnɩ e-fezuu yɔɔ+ nɛ ekuli tɩ-yɔɔ nɛ ɛwɩlɩ;+ mbʋ pʋyɔɔ yɔ fezuu tazɩɣ pɩtɩŋa pɩ-taa, halɩ pɩkpɛndɩnɩ Ɛsɔ wondu ndʋ tɩwɛ cukaŋ yɔ, tɩ-taa.+

11 Mbʋ pʋyɔɔ yɔ ɛyaa taa anɩ pɩzɩɣ nɛ ɛtɩlɩ ɛyʋ wondu, ye pɩtɩkɛ fezuu ŋgʋ kɩwɛ ɛyʋ ɛnʋ ɛ-taa yɔ? Mbʋ ɖɔɖɔ nɔɔyʋ tɩpɩzɩ nɛ ɛtɩlɩ Ɛsɔ wondu, ye pɩtɩkɛ Ɛsɔ fezuu yɔ. 12 Ða lɛ, ɖɩtɩmʋ ɛjaɖɛ fezuu, ɛlɛ ɖɩmʋ fezuu ŋgʋ kɩlɩnɩ Ɛsɔ cɔlɔ yɔ,+ se pɩsa nɛ ɖɩpɩzɩ nɛ ɖɩtɩlɩ wondu ndʋ Ɛsɔ ha-ɖʋ faaa yɔ. 13 Wondu ndʋ, ɖɩyɔɔdʋʋ ɖɔɖɔ tɩ-tɔm, ɛlɛ pɩtɩkɛ tɔm pee wena ɛyʋ lɔŋsɩnɖɛ+ wɩlɩ-ɖʋ yɔ ana ɖɩyɔɔdʋʋna, ɛlɛ ɖɩyɔɔdʋʋnɩ tɔm pee wena fezuu+ wɩlɩ-ɖʋ yɔ, alɩwaatʋ ndʋ ɖɩlɩzɩɣ fezuu taa tɔm tɔbʋʋ nɛ fezuu taa tɔm pee yɔ.

14 Ɛlɛ tomnaɣ yɔɔ ɛyʋ ɛɛmʋʋ* Ɛsɔ fezuu wondu, mbʋ pʋyɔɔ yɔ tɩkɛ-ɩ kɩmɛlɛndʋ tɔm; nɛ ɛɛpɩzɩɣ se ɛtɩlɩ-tʋ, mbʋ pʋyɔɔ yɔ fezuu taa patazɩɣ tɩ-taa. 15 Ɛlɛ fezuu taa ɛyʋ tazɩɣ wondu tɩŋa taa;+ ɛlɛ ɛ-maɣmaɣ lɛ, ɛyʋ nɔɔyʋ ɛɛtazɩɣ ɛ-taa. 16 Mbʋ pʋyɔɔ yɔ «apɩzaa nɛ ɛtɩlɩ Yehowa* maɣzɩm, se pɩsa nɛ ɛwɩlɩ-ɩ tɔm?»+ Ɛlɛ, ɖa lɛ, ɖɩwɛnɩ Krɩstʋ maɣzɩm.+

3 Pʋyɔɔ lɛ koobiya, mantaapɩzɩɣ se mɔyɔɔdɩnɩ-mɩ ɛzɩ fezuu taa ɛyaa yɔ,+ ɛlɛ ɛzɩ tomnaɣ yɔɔ ɛyaa yɔ, ɛzɩ piya ajamaa+ Krɩstʋ taa yɔ. 2 Naalɩm maaha-mɩ se ɩñɔɔ, pɩtɩkɛ tɔɔnaɣ yuŋ ñɩŋga, mbʋ pʋyɔɔ yɔ ɩtaatɩɩkpatɩ ɖoŋ camɩyɛ. Toovenim taa lɛ, lɛɛlɛɛyɔ ɖɔɖɔ ɩtɩkpatɩ ɖoŋ camɩyɛ,+ 3 mbʋ pʋyɔɔ yɔ ɩkɛ tomnaɣ yɔɔ ɛyaa mbʋ.+ Alɩwaatʋ ndʋ sʋsɩ nɛ you pɛwɛ mɩ-hɛkʋ taa yɔ, ɛzɩ ɩtɩkɛ tomnaɣ yɔɔ ɛyaa+ nɛ ɩɖɔŋ ɛzɩ ɛyaa ɖɔŋʋʋ yɔ? 4 Mbʋ pʋyɔɔ yɔ, alɩwaatʋ ndʋ nɔɔyʋ tɔŋ se: «Mɛnkɛ Pɔɔlɩ ñɩnʋ,» ɛlɛ lɛlʋ ñɔtɔŋ se: «Ma lɛ, mɛnkɛ Apoloosi+ ñɩnʋ» yɔ, ɩɩlakɩ ɛzɩ ɛyaa yemwaa lɛ mbʋ yɔ?

5 Ye mbʋ, anɩ Apoloosi kɛnaa? Ɛɛɛ, anɩ Pɔɔlɩ kɛnaa? Pɛkɛ lɩmɖʋyaa+ mba pɩtɩŋnɩ pɔ-yɔɔ nɛ ɩwɛɛnɩ tisuu yɔ, ɛzɩ Kɩbaɣlʋ haʋ paa weyi yɔ. 6 Mɔnsɔwa,+ Apoloosi mɩzɩ lɩm,+ ɛlɛ Ɛsɔ lakaɣna nɛ pɩpaɣlɩɣ, 7 mbʋ yebina nɛ weyi ɛsɔʋ yɔ ɛtɩkɛ pʋyʋ nɛ weyi ɛmɩzɩɣ lɩm yɔ ɛtɩkɛ pʋyʋ ɖɔɖɔ, ɛlɛ Ɛsɔ weyi ɛlakɩ nɛ pɩpaɣlɩɣ yɔ.+ 8 Weyi ɛsɔʋ nɛ weyi ɛmɩzɩɣ lɩm yɔ, pɛkɛ kʋɖʋm;* ɛlɛ paa weyi ɛkaɣ mʋʋ ɛ-maɣmaɣ ɛ-kɩhɛyʋʋ ɛzɩ ɛlabʋ ɛ-tʋmɩyɛ yɔ.+ 9 Mbʋ pʋyɔɔ yɔ, ɖɩkɛ mba pa nɛ Ɛsɔ pɛkpɛndɩɣ nɛ palakɩ tʋmɩyɛ yɔ. Ɩkɛ Ɛsɔ hayɩm mbʋ eɖiɣni hayʋʋ yɔ, Ɛsɔ kuduyuu.+

10 Ɛsɔ lootiye nɖɩ paha-m yɔ ɖɩ-yɔɔ lɛ, mansɩ tigiɖe naɖɩyɛ+ ɛzɩ kuduyuŋ mayaa ñʋʋdʋ weyi ɛwɛ niye yɔ;* ɛlɛ ɛyʋ lɛlʋ wɛɛ nɛ ɛtɩnɩɣ ɖɩ-yɔɔ. Ɛlɛ paa weyi lɛ, ɛcɔnɩ ɛzɩma ɛwɛɛ nɛ ɛtɩnɩɣ ɖɩ-yɔɔ yɔ pi-ɖeɖe camɩyɛ. 11 Mbʋ pʋyɔɔ yɔ nɔɔyʋ ɛɛpɩzɩɣ nɛ ɛsɩɩ tigiɖe lɛɛɖɛ nɛ pɩtasɩnɩ nɖɩ pasɩwa yɔ, nɖɩ lɛ Yesu Krɩstʋ.+ 12 Nɛ ye nɔɔyʋ ɛtɩnɩɣ tigiɖe nɖɩ ɖɩ-yɔɔ sika, liidiye ñɩɣtʋ, ñɩɣlɩm pɛɛ, ɖasɩ, lɔtʋ, yaa kesi yɔ, 13 pɩkaɣ kuluu paa weyi lɛ ɛ-tʋmɩyɛ yɔɔ; mbʋ pʋyɔɔ yɔ kɩyakʋ kaɣ ɖɩ-yɔɔ kuluu, mbʋ pʋyɔɔ yɔ pakaɣ tɩŋnʋʋ miŋ yɔɔ nɛ pokuli ɖɩ-yɔɔ,+ nɛ miŋ maɣmaɣ kaɣ wɩlʋʋ tʋmɩyɛ nɖɩ paa weyi ɛlaba yɔ. 14 Ye tʋmɩyɛ nɖɩ nɔɔyʋ tɩnɩ tigiɖe yɔɔ yɔ, ɖɩtɩñaɣ yɔ, ɛkaɣ mʋʋ kɩhɛyʋʋ; 15 ye nɔɔyʋ tʋmɩyɛ ɛñaɣaa yɔ, pɩkaɣ-ɩ ɖʋzʋʋ, ɛlɛ ɛ-maɣmaɣ ɛkaɣ hiɣu ñʋʋ yabʋ; paa mbʋ yɔ pɩwɛɣ ɛzɩ ɛtɩŋnɩ miŋ taa nɛ ɛlɩɩ yɔ.

16 Ɩtɩtɩlɩ se mɩ-maɣmaɣ ɩkɛ Ɛsɔ templo+ nɛ Ɛsɔ fezuu wɛ mɩ-taa yaa we?+ 17 Ye nɔɔyʋ ɛyɔkɩ Ɛsɔ templo yɔ, Ɛsɔ kaɣ-ɩ ɖɩzʋʋ; mbʋ pʋyɔɔ yɔ Ɛsɔ templo kɛ kiɖeɖeu, nɛ mɩkɛnɩ templo ŋgʋ.+

18 Nɔɔyʋ ɛtaacɛtɩ ɛ-tɩ: Ye mɩ-taa nɔɔyʋ ɛmaɣzɩɣ se ɛwɛ lɔŋ ɛjaɖɛ ɖɩnɛ ɖɩ-yɔɔ* yɔ, ɛpɩsɩ kɩmɛlɛŋ nɛ pɩsa nɛ ɛpɩsɩ lɔŋsɩnɖʋ. 19 Mbʋ pʋyɔɔ yɔ, ɛjaɖɛ ɖɩnɛ ɖɩ-lɔŋsɩnɖɛ kɛ kɩmɛlɛndʋ Ɛsɔ ɛsɩndaa, mbʋ pʋyɔɔ yɔ pamawa se: «Ɛkpaɣ lɔŋsɩnɖaa pa-maɣmaɣ pa-ajitu taa.»+ 20 Nɛ pamawa ɖɔɖɔ se: «Yehowa* sɩm mbʋ se lɔŋsɩnɖaa lɩmaɣza kɛ falaa.»+ 21 Pʋyɔɔ lɛ, nɔɔyʋ ɛtaakʋndɩ ɛyaa yɔɔ; mbʋ pʋyɔɔ yɔ mɩtɩnɩ pɩtɩŋa, 22 paa pɩtɩɩkɛ Pɔɔlɩ yaa Apoloosi yaa Sefaasɩ*+ yaa ɛjaɖɛ yaa wezuu yaa sɩm yaa wondu ndʋ tɩwɛ lɛɛlɛɛyɔ yɔ yaa wondu ndʋ tɩkaɣ kɔm yɔ, mɩtɩnɩ pɩtɩŋa; 23 ɛlɛ mɩ lɛ, Krɩstʋ tɩnɩ-mɩ;+ piyele nɛ Krɩstʋ lɛ, Ɛsɔ tɩnɩ-ɩ.

4 Pɩwɛɛ se ɛyaa ɩcɔnɩ-ɖʋ ɛzɩ Krɩstʋ lɩmɖʋyaa* nɛ Ɛsɔ mɛsaɣ tɛɛ tɔm kiɖeɖetu yɔɔ cɔnɩyaa yɔ.+ 2 Hɔɔlʋʋ kʋnɛ kɩ-taa lɛ, mbʋ pɔpɔzʋʋ wondu yɔɔ cɔnɩyaa yɔ lɛ se pɛwɛɛ siɣsiɣ. 3 Nɛ ma lɛ, ye mɩ yaa tɔm hʋyaa nabɛyɛ ɩhʋʋnɩ mɔn-tɔm yɔ, pɩɩcɛyɩɣ-m. Toovenim taa lɛ, halɩ maahʋʋnɩ ma-maɣmaɣ man-tɩ tɔm. 4 Mbʋ pʋyɔɔ yɔ mɛ-ɛhʋyɛ ɛɛkʋʋ mɔn-tɔm nabʋyʋ yɔɔ. Ɛlɛ pʋnɛ pɩɩwɩlɩɣ se mɛwɛ siɣsiɣ; weyi ɛhʋʋnɩ-m tɔm yɔ, ɛnʋ lɛ Yehowa.*+ 5 Pʋyɔɔ lɛ, ɩtaahʋʋ tɔm+ natʋyʋ pʋcɔ nɛ alɩwaatʋ talɩ, pɩkɔɔ nɛ pɩtalɩ alɩwaatʋ ndʋ Kɩbaɣlʋ kɔŋ yɔ. Ɛkaɣ lɩzʋʋ mɛsaɣ tɛɛ lakasɩ nzɩ sɩwɛ cɩkpɛndʋʋ taa yɔ ñalɩmɩyɛ taa nɛ eyele nɛ patɩlɩ mbʋ pɩwɛ laŋa taa yɔ; nɛ ɖɩnɛ ɛlɛ, paa weyi ɛkaɣ mʋʋ ɛ-samtʋ Ɛsɔ cɔlɔ.+

6 Koobiya, tɔm ndʋ mɔyɔɔdaa yɔ tɩ-taa lɛ, ma-maɣmaɣ nɛ Apoloosi+ ɖɩkɛnɩ-mɩ kɩɖaʋ se pɩwazɩ-mɩ, se pɩsa nɛ pɩtɩŋnɩ ɖɔ-yɔɔ lɛ, ɩpɩzɩ nɛ ɩkpɛlɩkɩ tɔm tʋnɛ: «Ɩtaacɛzɩ tɔm ndʋ pamawa yɔ tɩ-yɔɔ,» se pɩtaakɛdɩ nɛ tɩ kpazʋʋ su mɩ-taa,+ nɛ ɩɖʋ nɔɔyʋ hɩɖɛ nɛ pɩkɩlɩ lɛlʋ. 7 Mbʋ pʋyɔɔ yɔ ayeki se ŋwɛɛ ndɩ nɛ ɛyʋ lɛlʋ? Toovenim taa lɛ, ɛbɛ ŋwɛna nɛ patɩha-ŋ pʋ kɩhaʋ?+ Ye paha-ŋ pʋ kɩhaʋ toovenim taa yɔ, ɛbɛ yɔɔ ŋkʋndʋʋ ɛzɩ patɩha-ŋ pʋ kɩhaʋ yɔ?

8 Ɩtɛm haɣʋ na? Ɩtɛm kɛʋ ñɩm tɩnaa na? Ɩtɛm paɣzʋʋ tɔɔʋ kewiyitu+ nɛ iyebi-ɖʋ? Me-liu wɛɛ siŋŋ se ɩpaɣzɩ kewiyitu tɔɔʋ se pɩsa nɛ ɖa ɖɔɖɔ lɛ, ɖa nɛ mɩ ɖɩtɔɔ kewiyitu.+ 9 Mbʋ pʋyɔɔ yɔ pɩlakɩ-m ɛzɩ Ɛsɔ lem ɖa mba ɖɩkɛ apostoloowaa yɔ kɛdɛzaɣ ɖeɖe ɛzɩ mba pakʋ pɔ-tɔm se pamʋnɩ sɩm yɔ;+ mbʋ pʋyɔɔ yɔ ɛjaɖɛ, Ɛsɔ tiyiyaa nɛ ɛyaa ɛsɩndaa lɛ, ɖɩpɩsɩ ɛzɩ mba pɔcɔŋnɩ-wɛ aleɣya ɖɩlaɖɛ taa yɔ.+ 10 Ðɩkɛ kɩmɛlɛmɩŋ+ Krɩstʋ yɔɔ; ɛlɛ mɩ lɛ, ɩkɛ lɔŋsɩnɖaa Krɩstʋ taa; ɖɩkɛ ajamaa, ɛlɛ mɩ lɛ, ɩkɛ ɖoŋ tɩnaa; paɖʋ-mɩ hɩɖɛ, ɛlɛ ɖa lɛ paɖʋ-ɖʋ fɛyɛ. 11 Pɩkɔm nɛ pɩtalɩ ñɩɣyʋʋ kʋnɛ kɩ-yɔɔ ɖeyi ɖeyi yɔ, ɖɩwɛɛ nɛ ɖɩsɩkɩ ñɔɔsɩ+ nɛ lɔkɔtʋ,+ nɛ ɖɩtɛɖɩɣ wondu kususutu* nɛ pɛwɛɛ nɛ pamakɩ-ɖʋ*+ nɛ ɖɩfɛyɩnɩ ɖɩzʋyɛ 12 nɛ ɖɩwɛɛ nɛ ɖɩlakɩ tʋmɩyɛ nɛ ɖa-maɣmaɣ ɖe-nesi nɛ ɖɔ-yɔɔ soŋuu.+ Patʋʋ-ɖʋ lɛ, ɖɩwazɩɣ kɩwazʋ;+ panazɩɣ-ɖʋ lɛ, ɖɩɖɔkʋʋ ɖa-laŋa nɛ suuɖu;+ 13 palakɩ ɖɔ-yɔɔ kɔlɔmɔtʋ lɛ, ɖicosuuni nɔɔ kɩbaŋa;*+ halɩ nɛ sɔnɔ ɖɩpɩsɩ ɛzɩ ɛjaɖɛ yɔɔ kʋzɔɔtʋ yɔ,* ñɩtʋ ndʋ payɩ pahazɩɣ yɔ.

14 Maamaɣ tɔm tʋnɛ se manɖʋ-mɩ fɛyɛ, ɛlɛ mamaɣ-tʋ se mantasɩ-mɩ lɔŋ ɛzɩ men-piya kʋsɔɔlɩsɩ yɔ. 15 Mbʋ pʋyɔɔ yɔ paa ɩwɛnɩ tɔm wɩlɩyaa* 10 000 Krɩstʋ taa yɔ, pɩtʋʋ fɛyɩ se ɩfɛyɩnɩ caanaa sakɩyɛ; mbʋ pʋyɔɔ yɔ Krɩstʋ Yesu taa lɛ, manpɩsɩ mɩ-caa pɩtɩŋnɩ tɔm kɩbandʋ yɔɔ.+ 16 Pʋyɔɔ lɛ, menseɣtiɣ-mɩ se ɩmaɣzɩnɩ-m.+ 17 Pʋyɔɔ mentiyiɣni-mɩ Timootee, mbʋ pʋyɔɔ yɔ ɛkɛ man-pɩɣa kʋsɔɔlaɣ nɛ siɣsiɣ ñɩŋga Kɩbaɣlʋ taa. Ɛkaɣ-mɩ tɔzʋʋ ma-nʋmɔŋ yɔɔ Krɩstʋ Yesu taa,+ ɛzɩ mɛwɛʋ nɛ mawɩlɩɣ nʋmɔŋ ɛnɩ paa le, paa ɛgbɛyɛ nɖɩ ɖɩ-taa yɔ.

18 Tɩ kpazʋʋ su nabɛyɛ taa, nɛ pɩwɛɛ ɛzɩ maakaɣ kɔm mɩ-cɔlɔ yɔ. 19 Ɛlɛ ye Yehowa* ɛsɔɔlaa yɔ, pɩkazɩ pazɩ lɛ, mankaɣ kɔm mɩ-cɔlɔ, nɛ mankaɣ tɩlʋʋ mba tɩ kpazʋʋ su pa-taa yɔ po-ɖoŋ, ɛlɛ pɩtɩkɛ pɔ-yɔɔdaɣ mankaɣ tɩlʋʋ. 20 Mbʋ pʋyɔɔ yɔ Ɛsɔ Kewiyaɣ tɩkɛ yɔɔdaɣ tɔm, ɛlɛ kɛkɛ ɖoŋ tɔm. 21 Ɛbɛ ɩkɩlɩ sɔɔlʋʋ? Mɔnkɔɔ mɩ-cɔlɔ nɛ ɖaʋ+ yaa mɔnkɔmnɩ sɔɔlɩm nɛ hɛɛɛ wɛtʋ fezuu?

5 Toovenim taa lɛ, pɛkɛdɩɣ se kʋzʋʋ kɩdɛkɛdʋʋ*+ nakʋyʋ wɛ mɩ-hɛkʋ taa, nɛ kʋzʋʋ kɩdɛkɛdʋʋ* ŋgʋ, halɩ kɩfɛyɩ ajɛɛ hɛkʋ taa: abalʋ nɔɔyʋ kpaɣ ɛ-caa halʋ.+ 2 Nɛ ɩkpazɩɣ mɩ-tɩ pʋyɔɔ? Ɛzɩ pɩtaawɛɛ se ɩwɛɛ kʋñɔwiye taa,+ nɛ abalʋ weyi ɛlabɩ lakasɩ nzɩ yɔ, palɩzɩ-ɩ mɩ-hɛkʋ taa yaa we?+ 3 Paa mɛnfɛyɩ mɩ-cɔlɔ tomnaɣ taa yɔ, mɛwɛ mɩ-cɔlɔ fezuu taa, nɛ abalʋ weyi ɛlabɩ mbʋ yɔ mɛntɛmɩ-ɩ tɔm hʋnʋʋ, ɛzɩ mɛwɛ mɩ-cɔlɔ toovenim taa yɔ. 4 Alɩwaatʋ ndʋ ikpeɣliɣ ɖa-Kɩbaɣlʋ Yesu hɩɖɛ taa, nɛ ɩtɩlɩ se mɛwɛ mɩ-cɔlɔ fezuu taa, nɛ ɖa-Kɩbaɣlʋ Yesu ɖoŋ ɖɔɖɔ wɛ mɩ-cɔlɔ yɔ, 5 pɩwɛɛ se ɩɖʋzɩ abalʋ ɛnʋ Sataŋ nesi tɛɛ+ nɛ paɖɩzɩ tomnaɣ, se pɩsa nɛ fezuu hiɣ ñʋʋ yabʋ Kɩbaɣlʋ kɩyakʋ wiye.+

6 Mɩ-agʋnda fɛyɩ ɖeu. Ɩɩsɩŋ se lɔlɔm pazɩ yem lakɩ nɛ mʋtʋ kpeekpe ñɩŋ* yaa we?+ 7 Ɩlɩzɩ lɔlɔm kɩbɩnʋʋ se pɩsa nɛ ɩkɛ mʋtʋ kɩfatʋ, mbʋ pʋyɔɔ yɔ mbʋ pɩñɩŋaa yɔ pɩfɛyɩ mɩ-taa.* Mbʋ pʋyɔɔ yɔ toovenim taa lɛ, Krɩstʋ weyi ɛkɛ ɖɛ-tɛ Paska heɣa yɔ,+ pala-ɩ.+ 8 Pʋyɔɔ lɛ, iyele nɛ ɖɩtɔɔ kazandʋ,+ ɖɩtaatɔɔ-tʋ nɛ lɔlɔm kɩbɩnʋʋ, ɖɩtaatɔɔ-tʋ ɖɔɖɔ nɛ kɩdɛkɛdɩm nɛ kañatʋ lakasɩ lɔlɔm; ɛlɛ ɖɩtɔɔ-tʋ nɛ kpɔnɔ ŋgʋ kɩ-taa patɩɖʋ lɔlɔm nɛ kɩkɛ siɣsiɣ wɛtʋ nɛ toovenim kpɔnɔ yɔ.

9 Mama-mɩ man-takayaɣ taa se iyele taabalɩyɛ ɖʋʋ nɛ mba pacakɩ kʋzʋʋ kɩdɛkɛdʋʋ* wezuu yɔ, 10 maayɔɔdʋʋ se iposi mɩ-tɩ caɣ caɣ nɛ ɛjaɖɛ ɖɩnɛ ɖɩ-yɔɔ ɛyaa mba pacakɩ kʋzʋʋ kɩdɛkɛdʋʋ* wezuu yɔ+ yaa ɛsa naɣ naɣ tɩnaa yaa mɔntɔkɩnɩ mon-ɖoŋwaa yaa sɩɩnaa layaa. Ye pɩɩkɛ mbʋ yɔ, toovenim taa lɛ, pɩɩpɔzaa se ɩkʋyɩ ɛjaɖɛ yɔɔ.+ 11 Ɛlɛ lɛɛlɛɛyɔ lɛ, mamaɣ-mɩ se iyele taabalɩyɛ ɖʋʋ+ nɛ weyi payaɣ-ɩ se koobu nɛ ɛcakɩ kʋzʋʋ kɩdɛkɛdʋʋ* wezuu yɔ, yaa ɛkɛ ɛyʋ weyi ɛwɛ ɛsa naɣ naɣ yɔ,+ yaa sɩɩnaa layʋ, yaa ɛyaa tʋyʋ, yaa sʋlʋm kpaŋɩyʋ,+ yaa mɔntɔkɩnɩ mon-ɖoŋ,+ halɩ mɩ nɛ ɛyʋ ɛnʋ ɩtaatɔɔ. 12 Mbʋ pʋyɔɔ yɔ ma nɛ awayɩ mba suwe nɛ mahʋʋnɩ-wɛ tɔm? Ɩɩhʋʋnɩ tɔm mba pɛwɛ pɩ-taa yɔ 13 nɛ Ɛsɔ ñahʋʋnɩ awayɩ mba tɔm yaa we?+ «Ɩlɩzɩ ɛyʋ kɩdɛkɛdʋ mɩ-hɛkʋ taa.»+

6 Ye nɔɔhɔnɖɛ naɖɩyɛ ɛwɛ mɩ-taa nɔɔyʋ nɛ lɛlʋ pɛ-hɛkʋ taa yɔ,+ ɛkatɩɣ se ewoni-i tɔm ɖɩhʋyɛ, ɛyaa mba pɛfɛyɩ siɣsiɣ yɔ pɛ-ɛsɩndaa, nɛ eewokini-i ɛyaa kiɖeɖema ɛsɩndaa? 2 Yaa ɩtɩtɩlɩ se ɛyaa kiɖeɖema kaɣnɩ ɛjaɖɛ tɔm hʋnʋʋ?+ Nɛ ye mɩkaɣnɩ ɛjaɖɛ tɔm hʋnʋʋ, ɩɩpɩzɩɣ nɛ ɩhʋʋ tɔm cikpetu ndʋ tɩtɩlɩɩ pʋyʋ yɔ? 3 Ɩtɩtɩlɩ se ɖɩkaɣ Ɛsɔ tiyiyaa tɔm hʋnʋʋ yaa we?+ Ye mbʋ, ɛbɛ yɔɔ ɖɩɩpɩzɩɣ nɛ ɖɩhʋʋ wezuu kʋnɛ kɩ-taa tɔm? 4 Nɛ ye pɩwɛɛ se ɩhʋʋ wezuu kʋnɛ kɩ-taa tɔm yɔ,+ ɛyaa mba peniŋ-wɛ ɛgbɛyɛ taa yɔ ɩkpakɩɣ se pɛkɛ tɔm hʋyaa yaa we? 5 Mɔyɔɔdʋʋ mbʋ se fɛyɛ ɛkpa-mɩ. Ɛzɩ lɔŋsɩnɖʋ kʋɖʋm maɣmaɣ fɛyɩ mɩ-hɛkʋ taa, weyi ɛpɩzɩɣ nɛ ɛhʋʋ tɔm e-koobiya hɛkʋ taa yɔ? 6 Ɛlɛ koobu wokini koobu tɔm ɖɩhʋyɛ, nɛ halɩ ɛyaa mba pɛfɛyɩnɩ tisuu yɔ pɔ-cɔlɔ!

7 Toovenim taa lɛ, alɩwaatʋ ndʋ ɩyaɣ ɖama tɔm yɔ, pɩwɩlɩɣ se ɩtɛm tɔlʋʋ. Ɛbɛ yɔɔ ɩɩɖɔkʋʋ mɩ-tɩ alɩwaatʋ ndʋ palakɩ-mɩ mbʋ pɩfɛyɩ ɖeu yɔ?+ Ɛbɛ yɔɔ iiyeki mɩ-tɩ se pomuli-mɩ? 8 Ɛlɛ, ɩlakɩ mbʋ pɩfɛyɩ ɖeu yɔ nɛ imuluu, nɛ mi-koobiya ɩlakɩ mbʋ!

9 Yaa ɩɩsɩŋ se ɛyaa mba pɛfɛyɩ siɣsiɣ yɔ, paakaɣ hiɣu Ɛsɔ Kewiyaɣ?+ Itaapeɣzi* mɩ-tɩ.* Mba pacakɩ kʋzʋʋ kɩdɛkɛdʋʋ* wezuu yɔ,+ sɩɩnaa layaa,+ acɛyɛ laɖaa,+ abalaa mba pɛcɛlɩɣ pa-tɩ se abalaa lalaa ɩsʋʋnɩ-wɛ yɔ,+ abalaa mba pasʋʋnɩ abalaa yɔ,+ 10 mɩlaa, ɛsa naɣ naɣ tɩnaa,+ sʋlʋm kpaŋɩyaa,+ ɛyaa tʋyaa nɛ mɔntɔkɩnɩ mon-ɖoŋwaa ɩɩkaɣ hiɣu Ɛsɔ Kewiyaɣ.+ 11 Paa mbʋ yɔ, mbʋ mɩ-taa nabɛyɛ kaawɛɛ. Ɛlɛ pɔsɔ-mɩ lɩm nɛ ɩwɛɛ kele kele;+ papɩsɩ-mɩ kiɖeɖema;+ paya-mɩ se siɣsiɣ tɩnaa+ Kɩbaɣlʋ Yesu Krɩstʋ hɩɖɛ taa nɛ pɩtɩŋnɩ ɖɛ-Ɛsɔ fezuu yɔɔ.

12 Pɩha-m nʋmɔʋ se mala pɩtɩŋa, ɛlɛ pɩtɩkɛ pɩtɩŋa pɩwɛnɩ wazaɣ.+ Pɩha-m nʋmɔʋ se mala pɩtɩŋa, ɛlɛ maayeki se nabʋyʋ ɛwɛɛnɩ ɖoŋ mɔ-yɔɔ. 13 Tɔɔnaɣ yɔɔ lotu wɛɛ nɛ lotu ñɛwɛɛ tɔɔnaɣ yɔɔ, ɛlɛ Ɛsɔ kaɣ pa-naalɛ ɖɩzʋʋ.+ Pɩtɩkɛ kʋzʋʋ kɩdɛkɛdʋʋ* yɔɔ tomnaɣ wɛɛ ɛlɛ Kɩbaɣlʋ yɔɔ kɛwɛɛ,+ nɛ Kɩbaɣlʋ wɛɛ tomnaɣ yɔɔ. 14 Ɛlɛ Ɛsɔ fezi Kɩbaɣlʋ+ nɛ ɛkaɣ tɩŋnʋʋ e-ɖoŋ yɔɔ+ nɛ efezi-ɖʋ ɖɔɖɔ nɛ sɩm taa.+

15 Ɩtɩtɩlɩ se mi-tomnasɩ kɛ Krɩstʋ pilinzi na?+ Ye mbʋ, malɩzɩɣ Krɩstʋ pilinzi nɛ mɛnkpɛndɩ-sɩ halʋ hayitu laɖʋ yɔɔ? Pɩɩlakɩ mbʋ kpa! 16 Ɩɩsɩŋ se ye nɔɔyʋ ɛkpɛndɩ halʋ hayitu laɖʋ yɔɔ yɔ, ɛ nɛ ɩ pɛkɛ tomnaɣ kʋɖʋmaɣ na? Mbʋ pʋyɔɔ yɔ ɛyɔɔdaa se: «Pa-naalɛ pakaɣ kɛʋ tomnaɣ kʋɖʋmaɣ.»+ 17 Ɛlɛ weyi ɛkpɛndɩ Kɩbaɣlʋ yɔɔ yɔ, ɛ nɛ ɩ pɛkɛ kʋɖʋm fezuu taa.+ 18 Ise kʋzʋʋ kɩdɛkɛdʋʋ!*+ Kɩwɛɛkɩm lɛɛbʋ mbʋ payɩ ɛyʋ pɩzɩɣ nɛ ɛla yɔ, pɩwɛ e-tomnaɣ nɛ ka-wayɩ; ɛlɛ weyi ɛcakɩ kʋzʋʋ kɩdɛkɛdʋʋ wezuu yɔ, ɛwɛɛ nɛ ɛlakɩ kɩwɛɛkɩm ɛ-maɣmaɣ e-tomnaɣ.+ 19 Ɩtɩtɩlɩ se mi-tomnaɣ kɛ fezuu kiɖeɖeu ŋgʋ kɩwɛ mɩ-taa yɔ, ŋgʋ Ɛsɔ ha-mɩ yɔ+ kɩ-tɛ templo?+ Pɩtasɩ lɛ, pɩtɩkɛ mɩ-maɣmaɣ mɩtɩnɩ mɩ-tɩ,+ 20 mbʋ pʋyɔɔ yɔ ñɩm sɔsɔm pakpaɣaa nɛ payabɩnɩ-mɩ.+ Pʋyɔɔ lɛ, ɩsa Ɛsɔ+ mi-tomnaɣ taa.+

7 Piyele nɛ tɔm ndʋ tɩ-yɔɔ ɩma-m yɔ, pɩkɩlɩ ɖeu se abalʋ etaatukuni halʋ;* 2 ɛlɛ kʋzʋʋ kɩdɛkɛdʋʋ* tɔyɩ tɔyʋʋ mbʋ yɔ pʋyɔɔ lɛ, paa abalʋ weyi lɛ ɛwɛɛnɩ ɛ-maɣmaɣ ɛ-halʋ+ nɛ paa halʋ weyi lɛ ɛwɛɛnɩ ɛ-maɣmaɣ ɛ-walʋ.+ 3 Walʋ ɛcɛlɩ ɛ-halʋ mbʋ pɩmʋnaa se ɛcɛlɩ-ɩ yɔ, nɛ halʋ ɖɔɖɔ ɛla mbʋ ɛ-walʋ.+ 4 Halʋ fɛyɩnɩ ɖoŋ ɛ-maɣmaɣ e-tomnaɣ yɔɔ, ɛlɛ ɛ-walʋ wɛnɩnɩ ɖoŋ kɔ-yɔɔ; mbʋ ɖɔɖɔ walʋ fɛyɩnɩ ɖoŋ ɛ-maɣmaɣ e-tomnaɣ yɔɔ, ɛlɛ ɛ-halʋ wɛnɩnɩ ɖoŋ kɔ-yɔɔ. 5 Ɩtaapɛ mɩ-tɩ ɖama, ye pɩtɩkɛ se ɩnɩnɩ ɖama pɩkɔɔ nɛ pɩtalɩ alɩwaatʋ ndʋ ɩɖʋwa yɔ, se pɩsa nɛ ɩkpaɣ alɩwaatʋ nɛ ɩtɩmɩ nɛ pʋwayɩ lɛ ɩɖaɣnɩ kpɛndʋʋ, se pɩsa nɛ Sataŋ ɛtaawɛɛ nɛ ɛtakɩɣ-mɩ mbʋ pʋyɔɔ yɔ ɩɩpɩzɩɣ mɩ-tɩ ɖɔkʋʋ. 6 Ɛlɛ meheyiɣ-mɩ tɔm ndʋ se maha-mɩ nʋmɔʋ na, pɩtɩkɛ paɣtʋ manɖʋʋ-mɩ. 7 Ɛlɛ me-liu kaawɛɛ se ɛyaa tɩŋa ɩwɛɛ ɛzɩ mɛwɛʋ yɔ. Paa mbʋ yɔ paa weyi lɛ, ɛ nɛ ɛ-maɣmaɣ ɛ-kʋjɔʋ+ ŋgʋ Ɛsɔ ha-ɩ yɔ, nɔɔyʋ kʋjɔʋ kʋnɛ nɛ lɛlʋ lɛɛkʋ.

8 Nɛ meheyiɣ mba patɩɖɔkɩ nesi yɔ nɛ lelaa se ye pɛwɛ ɛzɩ mɛwɛʋ yɔ, pɩkɩlɩɣ-wɛ ɖeu.+ 9 Ɛlɛ ye paapɩzɩɣ pa-tɩ ɖɔkʋʋ yɔ, pɔɖɔkɩ nesi; mbʋ pʋyɔɔ yɔ nesi ɖɔkʋʋ kɩlɩ ɖeu kʋzʋʋ kɔɖɛyɩ miŋ ñakʋʋ ɛyʋ yɔ.+

10 Piyele nɛ mba pɔɖɔkɩ nesi yɔ, meheyiɣ-wɛ se halʋ ɛtaakʋyɩ ɛ-walʋ yɔɔ nɛ ɛɖɛɛ. Pɩtɩkɛ meheyiɣni-wɛ, ɛlɛ Kɩbaɣlʋ.+ 11 Ɛlɛ ye ɛkʋyɩ ɛ-walʋ yɔɔ nɛ ɛɖɛɛ yɔ, ɛcaɣ mbʋ, ɛtaawalɩ yaa ɛ nɛ ɛ-walʋ peceɣ; nɛ walʋ etaayele ɛ-halʋ.+

12 Ɛlɛ lalaa lɛ, ma meheyiɣni-wɛ, ɛɛɛ, ma, pɩtɩkɛ Kɩbaɣlʋ+ se: Ye koobu abalɩñɩnʋ nɔɔyʋ ɛwɛnɩ halʋ weyi eetisiɣ Kɩbaɣlʋ yɔɔ nɛ halʋ ɛnʋ ɛsɔɔlɩ se ɛcakɩ ɛ-cɔlɔ yɔ, koobu ɛnʋ etaayebi-i; 13 nɛ ye halʋ nɔɔyʋ ɛwɛnɩ walʋ weyi eetisiɣ Kɩbaɣlʋ yɔɔ nɛ walʋ ɛnʋ ɛsɔɔlɩ se ɛ nɛ ɩ pɛwɛɛ yɔ, halʋ ɛnʋ etaayele ɛ-walʋ. 14 Mbʋ pʋyɔɔ yɔ walʋ weyi eetisiɣ Kɩbaɣlʋ yɔɔ yɔ, ɛpɩsɩ kiɖeɖeu ɛ-halʋ yɔɔ, nɛ halʋ weyi eetisiɣ Kɩbaɣlʋ yɔɔ yɔ ɛpɩsɩ kiɖeɖeu koobu abalɩñɩnʋ yɔɔ; ye pɩtaakɛ mbʋ yɔ, mi-piya kaakɛ azuluma tɩnaa, ɛlɛ lɛɛlɛɛyɔ lɛ sɩpɩsɩ kiɖeɖesi. 15 Ɛlɛ ye weyi eetisiɣ Kɩbaɣlʋ yɔɔ yɔ, ɛlɩzaa se ɛɖɛɣ yɔ, ɛɖɛɛ; pɩtɩhɔkɩ koobu abalɩñɩnʋ yaa halɩñɩnʋ wɛtʋ ndʋ tɩ-taa, ɛlɛ Ɛsɔ ya-mɩ se ɩwɛɛ laŋhɛzɩyɛ taa.+ 16 Mbʋ pʋyɔɔ yɔ, halʋ, ɛzɩma ŋlaba nɛ ŋna se ŋŋkaɣ yabʋ ña-walʋ ñʋʋ?+ Yaa walʋ, ɛzɩma ŋlaba nɛ ŋna se ŋŋkaɣ yabʋ ña-halʋ ñʋʋ?

17 Paa mbʋ yɔ, ɛzɩ Yehowa* haʋ paa weyi yɔ, paa weyi lɛ ɛɖɔ ɛzɩ Ɛsɔ yaʋ-ɩ yɔ.+ Nɛ paɣtʋ ndʋ manɖʋʋ agbaa tɩŋa taa. 18 Paya nɔɔyʋ alɩwaatʋ ndʋ pɛtɛmɩ-ɩ pɛlʋʋ yɔ?+ Ɛtaañɩnɩ se ɛpɩsɩ kɩdɩbɛlʋʋ. Paya nɔɔyʋ alɩwaatʋ ndʋ ɛɛkɛ kɩdɩbɛlʋʋ yɔ? Ɛtaañɩnɩ se pɛpɛlɩ-ɩ.+ 19 Pɛlɩtʋ tɩkɛ pʋyʋ, nɛ kɩdɩbɛlɩtʋ tɩkɛ pʋyʋ;+ mbʋ pɩkɛ pʋyʋ yɔ lɛ Ɛsɔ paɣtʋ yɔɔ ɖɔm.+ 20 Wɛtʋ ndʋ tɩ-taa paya paa weyi yɔ, ɛwɛɛ tɩ-taa mbʋ.+ 21 Paya-ŋ alɩwaatʋ ndʋ ŋkɛ yom yɔ? Taanɩɣzɩ pɩ-yɔɔ;+ ɛlɛ ye ŋpɩzɩɣ se ŋwɛɛ ña-tɩ yɔɔ yɔ, labɩnɩ waɖɛ nɖɩ tʋmɩyɛ. 22 Mbʋ pʋyɔɔ yɔ weyi paya-ɩ Kɩbaɣlʋ taa alɩwaatʋ ndʋ ɛkɛ yom yɔ, ɛkɛ Kɩbaɣlʋ ɛyʋ weyi poholi-i yɔ;+ mbʋ ɖɔɖɔ weyi paya-ɩ alɩwaatʋ ndʋ ɛwɛ ɛ-tɩ yɔɔ yɔ, ɛkɛ Krɩstʋ yom. 23 Ñɩm sɔsɔm pakpaɣaa nɛ payabɩnɩ-mɩ;+ iyele pɩsʋʋ ɛyaa yomaa. 24 Koobiya, wɛtʋ ndʋ tɩ-taa paya paa weyi yɔ, ɛwɛɛ tɩ-taa mbʋ Ɛsɔ ɛsɩndaa.

25 Piyele nɛ mba paasɩŋ abalʋ yaa halʋ yɔ* pɔ-tɔm yɔ, mantɩmʋ paɣtʋ natʋyʋ Kɩbaɣlʋ cɔlɔ, ɛlɛ mɔyɔɔdʋʋ ma-lɩmaɣza na,+ ɛzɩ ɛyʋ weyi Kɩbaɣlʋ na ɛ-pʋtɔdɩyɛ se ɛwɛɛ siɣsiɣ yɔ. 26 Pʋyɔɔ lɛ, mamaɣzɩɣ se kala wena awɛ alɩwaatʋ tʋnɛ tɩ-taa yɔ a-yɔɔ lɛ, pɩkɩlɩ ɖeu se ɛyʋ ɛwɛɛ wɛtʋ ndʋ tɩ-taa ɛwɛɛ yɔ. 27 Pɩhɔkɩ-ŋ nɛ halʋ na? Taañɩnɩ se ŋyebi-i.+ Pɩtɩtasɩ-ŋ hɔkʋʋ nɛ halʋ na? Yele halʋ ñɩnʋʋ. 28 Ɛlɛ paa ŋɖɔkɩ nesi yɔ, ŋtɩla kɩwɛɛkɩm nabʋyʋ. Nɛ ye weyi ɛɛsɩŋ abalʋ yaa halʋ yɔ ɛɖɔkɩ nesi yɔ, ɛtɩla kɩwɛɛkɩm nabʋyʋ. Ɛlɛ mba pɔɖɔkʋʋ nesi yɔ, pakaɣ katʋʋ kʋñɔmɩŋ po-tomnaɣ taa. Ɛlɛ mañɩnɩɣ se ɩtaatalɩ-mɩ.

29 Pɩtasɩ lɛ, koobiya, tɔm ndʋ mɔyɔɔdʋʋ yɔ ndʋ yɔ: alɩwaatʋ ndʋ tɩkazaa yɔ tɩtɩɖɔɔ.+ Kpaɣnɩ lɛɛlɛɛyɔ lɛ, mba pɛwɛnɩ halaa yɔ, pɛwɛɛ ɛzɩ pɛfɛyɩna yɔ; 30 nɛ mba pewiɣ yɔ, pɛwɛɛ ɛzɩ mba paawiɣ yɔ; nɛ mba pɛmɛyɩɣ yɔ, pɛwɛɛ ɛzɩ mba paamɛyɩɣ yɔ; nɛ mba payakɩ yɔ, pɛwɛɛ ɛzɩ mba pɛfɛyɩna yɔ; 31 nɛ mba palakɩnɩ tʋmɩyɛ mbʋ pɩwɛ ɛjaɖɛ yɔɔ yɔ, pɛwɛɛ ɛzɩ mba paalakɩnɩ-pʋ tʋmɩyɛ siŋŋ yɔ; mbʋ pʋyɔɔ yɔ ɛjaɖɛ ɖɩnɛ ɖɩ-wɛtʋ wɛɛ nɛ tɩlɛɣzɩɣ. 32 Toovenim taa lɛ, mantɩsɔɔlɩ se ɩwɛɛ nɩɣzɛ taa. Abalʋ weyi ɛtɩkpaɣ halʋ yɔ, ɛnɩɣzɩɣ Kɩbaɣlʋ wondu yɔɔ, ɛzɩma ɛpɩzɩɣ ɛla nɛ ɛ-tɔm kɛdɩnɩ Kɩbaɣlʋ yɔ. 33 Ɛlɛ abalʋ weyi ɛkpaɣ halʋ yɔ, ɛnɩɣzɩɣ ɛjaɖɛ yɔɔ wondu yɔɔ,+ ɛzɩma ɛpɩzɩɣ ɛla nɛ ɛ-tɔm kɛdɩnɩ ɛ-halʋ yɔ, 34 nɛ ɛ-taa tayaa. Pɩtasɩ lɛ, halʋ weyi ɛtɩwalɩ yɔ yaa pɛlɛ weyi ɛɛsɩŋ abalʋ yɔ, ɛnɩɣzɩɣ Kɩbaɣlʋ wondu yɔɔ,+ se pɩsa nɛ ɛkɛ kiɖeɖeu e-tomnaɣ taa nɛ e-fezuu taa. Ɛlɛ halʋ weyi ɛwalaa yɔ, ɛnɩɣzɩɣ ɛjaɖɛ yɔɔ wondu yɔɔ, ɛzɩma ɛpɩzɩɣ ɛla nɛ ɛ-tɔm kɛdɩnɩ ɛ-walʋ yɔ. 35 Ɛlɛ mɔyɔɔdʋʋ tɔm tʋnɛ mɩ-maɣmaɣ mɩ-kɛzɛɣa yɔɔ na, maañɩnɩɣ se manɖɩɣ-mɩ nʋmɔʋ,* ɛlɛ mañɩnɩɣ se menseɣti-mɩ nɛ ɩla mbʋ pɩmʋnaa yɔ nɛ ɩñɔɔnɩ Kɩbaɣlʋ tam nɛ nabʋyʋ ɛtaakɛzɩ mɩ-lɩmaɣza.

36 Ɛlɛ ye nɔɔyʋ ɛmaɣzɩɣ se ɛzɩma ɛtɩɖɔkɩ nesi yɔ piyeki nɛ ɛlakɩ mbʋ pɩtɩtʋʋzɩ yɔ, nɛ ye ɛɖɛ evebitu yaa pɛlɛtʋ alɩwaatʋ* yɔɔ yɔ, ɖɩnɛ ɛlɛ pʋnɛ pɩwɛɛ se ɛla: ɛla mbʋ ɛsɔɔlaa yɔ; ɛɖɔkɩ nesi.* Ye ɛlabɩ mbʋ yɔ ɛtɩla kɩwɛɛkɩm.+ 37 Ɛlɛ ye nɔɔyʋ ɛɖʋ ɛ-laŋɩyɛ taa kpem nɛ ɛfɛyɩnɩ kɩcɛyɩm nabʋyʋ, ɛlɛ ɛwɛnɩ ɖoŋ ɛ-maɣmaɣ ɛ-sɔɔlɩm yɔɔ nɛ ɛkpaɣ lɩmaɣzɩyɛ ɛ-maɣmaɣ ɛ-laŋɩyɛ taa se ɛɛɖɔkʋʋ nesi yɔ, ɛkaɣ labʋ camɩyɛ.+ 38 Pʋyɔɔ lɛ, weyi ɛɖɔkʋʋ nesi yɔ ɛlakɩ camɩyɛ, ɛlɛ weyi ɛɛɖɔkʋʋ nesi yɔ ɛkaɣ labʋ camɩyɛ nɛ pɩkɩlɩ.+

39 Pɩhɔkɩ halʋ alɩwaatʋ ndʋ ɛ-walʋ wɛ wezuu yɔ.+ Ɛlɛ ye ɛ-walʋ eɖo sɩm taa yɔ, ɛwɛnɩ waɖɛ faaa se ɛwalɩ weyi ɛsɔɔlaa yɔ, ɛlɛ Kɩbaɣlʋ taa ɖeke.+ 40 Ɛlɛ ma-naʋ taa yɔ, ye ɛwɛ ɛzɩ ɛwɛʋ yɔ, ehikiɣ koboyaɣ nɛ pɩkɩlɩ; nɛ toovenim taa lɛ, mamaɣzɩɣ se ma ɖɔɖɔ mɛwɛnɩ Ɛsɔ fezuu.

8 Nɛ tɔɔnaɣ ŋga pala-kɛ sɩɩnaa yɔɔ yɔ+ kɔ-hɔɔlʋʋ taa lɛ, ɖɩsɩm mbʋ se ɖa-tɩŋa ɖɩwɛnɩ sɩmtʋ.+ Sɩmtʋ yeki nɛ ɛyʋ kpazɩɣ ɛ-tɩ, ɛlɛ sɔɔlɩm kpazɩɣ ɖoŋ.+ 2 Ye nɔɔyʋ ɛmaɣzɩɣ se ɛsɩm nabʋyʋ yɔ, ɛtɩsɩmtɩ-pʋ ɛzɩ pɩpɔzʋʋ se ɛsɩm-pʋ yɔ. 3 Ɛlɛ ye nɔɔyʋ ɛsɔɔlɩ Ɛsɔ yɔ, Ɛsɔ sɩm ɛyʋ ɛnʋ.

4 Piyele nɛ tɔɔnaɣ ŋga pala sɩɩnaa yɔɔ yɔ kɔ-tɔɔʋ hɔɔlʋʋ taa lɛ, ɖɩsɩm mbʋ se sɩʋ kpeliɣa tɩkɛ nabʋyʋ+ ɛjaɖɛ yɔɔ nɛ Ɛsɔ kʋɖʋm ɖeke wɛna.+ 5 Mbʋ pʋyɔɔ yɔ, paa mbʋ payaɣ se ɛsɔnaa yɔ pɩwɛɛ yɔ, paa pɩtɩɩkɛ ɛsɔdaa yaa tɛtʋ yɔɔ yɔ,+ (nɛ mbʋ pɩwɛɛ ɖɔɖɔ, «ɛsɔnaa» sakɩyɛ nɛ «kɩbaɣlaa» sakɩyɛ wɛna) 6 toovenim taa lɛ, ɖɩnawa se Ɛsɔ kʋɖʋm wɛna,+ Caa,+ weyi ɛ-cɔlɔ wondu kpeekpe lɩnaa nɛ weyi ɛ-yɔɔ ɖɩwɛɛ yɔ;+ nɛ Kɩbaɣlʋ kʋɖʋm wɛna, Yesu Krɩstʋ, weyi ɛ-yɔɔ pɩtɩŋnaa nɛ wondu kpeekpe wɛɛ+ nɛ weyi ɛ-yɔɔ pɩtɩŋnaa nɛ ɖɩwɛɛ yɔ.

7 Paa mbʋ yɔ, pɩtɩkɛ ɖa-tɩŋa ɖɩwɛnɩnɩ sɩmtʋ tʋnɛ.+ Ɛlɛ nabɛyɛ lɛ, paañɔnɩ sɩɩnaa ɖooo lɛ; pʋyɔɔ lɛ, pɔtɔkɩ tɔɔnaɣ ŋga ɛzɩ mbʋ pala sɩʋ kpeliɣa yɔɔ yɔ,+ nɛ pipisiɣ pɛ-ɛhʋyɛ nɖɩ ɖɩwɛnɩ ɛjandʋ yɔ.+ 8 Ɛlɛ tɔɔnaɣ ɛɛkaɣ-ɖʋ ñɔtɩnʋʋ nɛ Ɛsɔ;+ ye ɖɩɩtɔkɩ yɔ pɩɩsɩkɩnɩ-ɖʋ, nɛ ye ɖɩtɔkɩ yɔ ɖɩɩwɛɣ weewee nɛ pɩkɩlɩ.+ 9 Ɛlɛ ɩkpa mɩ-tɩ paa ɛzɩmtaa se waɖɛ nɖɩ ɩwɛna se ɩlɩzɩ yɔ, ɖɩtaapɩsɩ pɩyɛ nɖɩ ɖituuluu yɔ mba pɛwɛnɩ ɛjandʋ yɔ hɔɔlʋʋ nakʋyʋ taa.+ 10 Mbʋ pʋyɔɔ yɔ, ye nɔɔyʋ ɛna ña weyi ŋwɛnɩ sɩmtʋ yɔ ŋɖiɣni tɔɔnaɣ tɔɔʋ sɩʋ kpeliɣa nakɛyɛ templo taa yɔ, ɛzɩ pɩɩkaɣ seɣtuu ɛnʋ weyi ɛwɛnɩ ɛjandʋ yɔ ɛ-ɛhʋyɛ se ɛtɔɔ tɔɔnaɣ ŋga pala sɩɩnaa yɔɔ yɔ? 11 Ye mbʋ, pɩtɩŋnɩ ña-sɩmtʋ yɔɔ lɛ, ŋwɛɛ nɛ ŋɖʋzʋʋ ɛyʋ weyi ɛwɛnɩ ɛjandʋ yɔ, ño-koobu weyi ɛ-yɔɔ Krɩstʋ sɩba yɔ.+ 12 Alɩwaatʋ ndʋ ɩlakɩ mi-koobiya kɩwɛɛkɩm mbʋ nɛ ɩɖʋʋ heŋ pɛ-ɛhʋyɛ nɖɩ ɖɩwɛnɩ ɛjandʋ yɔ,+ Krɩstʋ iɖiɣni labʋ kɩwɛɛkɩm. 13 Pʋyɔɔ lɛ, ye tɔɔnaɣ ɛlakɩ se pituuli mon-koobu yɔ, wiɖiyi maakaɣ tasʋʋ nandʋ tɔɔʋ kpa, se pɩsa nɛ mantaala nɛ pituuli mon-koobu.+

9 Mɛnfɛyɩ man-tɩ yɔɔ yaa we? Mantɩkɛ apostoloo yaa we? Mantɩna ɖa-Kɩbaɣlʋ Yesu yaa we?+ Ɩtɩkɛ man-tʋmɩyɛ Kɩbaɣlʋ taa yaa we? 2 Paa mantɩkɛ lalaa apostoloo yɔ, toovenim taa lɛ, mɛnkɛ-mɩ apostoloo! Mbʋ pʋyɔɔ yɔ mɩkɛnɩ mayaɣ ŋga kawɩlɩɣ se malakɩ apostoloo tʋmɩyɛ Kɩbaɣlʋ taa yɔ.

3 Tɔm ndʋ mɔyɔɔdʋʋ se malʋbɩnɩ man-tɩ yɔɔ mba pahʋʋnɩ-m tɔm yɔ pɔ-cɔlɔ yɔ, ndʋ yɔ: 4 Ðɩfɛyɩnɩ waɖɛ* se ɖɩtɔɔ nɛ ɖɩñɔɔ yaa we? 5 Ðɩfɛyɩnɩ waɖɛ se ɖɩkpɛndɩnɩ halʋ weyi ɛwɛnɩ tisuu yɔ,*+ ɛzɩ apostoloowaa lalaa nɛ Kɩbaɣlʋ newaa abalɩñɩma+ nɛ Sefaasɩ*+ yɔ yaa we? 6 Yaa ma nɛ Barnaabaasɩ+ ɖe-ɖeke ɖɩfɛyɩnɩnɩ waɖɛ se ɖiyele tʋmɩyɛ nɖɩ ɖɩsɩɣnɩ-ɖʋ se ɖɩcɔnɩ ɖa-tɩ yɔɔ yɔ ɖɩ-labʋ na? 7 Sɔɔja weyi lakɩ tʋmɩyɛ nɛ ɛ-maɣmaɣ e-liidiye? Ahayɩɣ viiñi hayɩm nɛ ɛɛtɔkɩ viiñi pee?+ Yaa aɖiyiɣ ewiɖe naɖɩyɛ nɛ ɛɛñɔʋ ewiɖe nɖɩ ɖɩ-naalɩm?

8 Tɔm ndʋ mɔyɔɔdʋʋ yɔ, tɩkɛ ɛyaa lɩmaɣza na? Paɣtʋ ɖɔɖɔ ɛɛyɔɔdʋʋ tɔm ndʋ yaa we? 9 Mbʋ pʋyɔɔ yɔ pama Moyizi Paɣtʋ taa se: «Pɩtɩpɔzɩ se ŋhɔkɩ nɔ abalɩñɩnʋ nɔɔ alɩwaatʋ ndʋ ɛwɛɛ nɛ ɛmakɩ tɔɔnaɣ pee yɔ.»*+ Ɛzɩ naŋ abalɩñɩŋ yɔɔ Ɛsɔ maɣzɩɣ yaa we? 10 Yaa toovenim taa lɛ, ɖɔ-yɔɔ ɛyɔɔdʋʋ-tʋ? Toovenim lɛ, ɖɔ-yɔɔ ɛma-tʋ; mbʋ pʋyɔɔ yɔ ɛyʋ weyi ɛhayɩɣ nɛ ɛyʋ weyi ɛmakɩ yɔ, pɩwɛɛ se pala mbʋ nɛ lidaʋ se pehikiɣ pe-ɖeɖe.

11 Ye ɖiɖu fezuu taa wondu mɩ-hɛkʋ taa yɔ, ɛzɩ pɩwɛɛkɩɣ nabʋyʋ ye ɖɩkʋm tomnaɣ yɔɔ wondu* mɩ-cɔlɔ yɔ?+ 12 Ye ɛyaa lalaa ɩwɛnɩ waɖɛ se pɔpɔzɩ-mɩ pʋ, ɖɩfɛyɩnɩ waɖɛ nɖɩ nɛ pɩkɩlɩ yaa we? Paa mbʋ yɔ, ɖɩtɩlabɩnɩ waɖɛ* nɖɩ tʋmɩyɛ,+ ɛlɛ ɖɩɖɔkʋʋ ɖa-laŋɩyɛ pɩtɩŋa pɩ-taa se pɩtaala nɛ ɖɩtɩŋnɩ nʋmɔʋ nakʋyʋ yɔɔ nɛ ɖɩɖɩɣ Krɩstʋ yɔɔ tɔm kɩbandʋ nʋmɔʋ.+ 13 Ɩtɩtɩlɩ se mba palakɩ tʋma kiɖeɖena yɔ, pɔtɔkɩ mbʋ pɩwɛ templo taa yɔ, nɛ mba palakɩ tʋmɩyɛ altaaru yɔɔ tam yɔ, pehikiɣ pe-ɖeɖe mbʋ pɩlɩɣnɩ altaaru yɔɔ yɔ pɩ-taa?+ 14 Mbʋ ɖɔɖɔ Kɩbaɣlʋ ɖʋ paɣtʋ mba posusuu tɔm kɩbandʋ yɔ se pɛwɛɛ wezuu pɩtɩŋnɩ tɔm kɩbandʋ yɔɔ.+

15 Ɛlɛ mantɩkpaɣ ɖʋtʋ ndʋ tɩ-taa natʋyʋ nɛ malabɩnɩ tʋmɩyɛ.+ Toovenim taa lɛ, mantɩma-mɩ tɔm tʋnɛ se palabɩ-m mbʋ, mbʋ pʋyɔɔ yɔ mansɩba yɔ pɩkɩlɩɣ ɖeu se... Nɔɔyʋ ɛɛkaɣ mʋʋ mbʋ pɩ-yɔɔ mankʋndʋʋ yɔ!+ 16 Lɛɛlɛɛyɔ ye monsusuu tɔm kɩbandʋ yɔ, pɩtɩkɛ pʋyɔɔ pɩwɛɛ se mankʋndɩ, mbʋ pʋyɔɔ yɔ pɩkɛnɩ-m kɩjɛyʋʋ se monsusi-tʋ. Toovenim taa lɛ, pɩtɔɔ-m ye maasusuu tɔm kɩbandʋ yɔ!+ 17 Ye malakɩ mbʋ nɛ laŋɩyɛ faaa yɔ, mɛwɛnɩ kɩhɛyʋʋ; ɛlɛ paa maalakɩ mbʋ nɛ laŋɩyɛ faaa yɔ, pɩkpɛndɩ pɩkɛ ɖɩɣa yɔɔ cɔnʋʋ tʋmɩyɛ nɖɩ paɖʋzɩ me-nesi tɛɛ yɔ.+ 18 Ye mbʋ, ɛbɛ kɛnɩ man-kɩhɛyʋʋ? Ŋgʋ lɛ se alɩwaatʋ ndʋ monsusuu tɔm kɩbandʋ yɔ, manpɩzɩ nɛ monsusi-tʋ* falaa, nɛ mantaalabɩnɩ ɖoŋ* weyi mɛwɛna yɔ tʋmɩyɛ ɛzɩma pɩtɩmʋna yɔ tɔm kɩbandʋ taa.

19 Mbʋ pʋyɔɔ yɔ paa mɛwɛ man-tɩ yɔɔ ɛyaa tɩŋa ɛsɩndaa yɔ, manpɩsɩ man-tɩ ɛyaa tɩŋa yom, se pɩsa nɛ mehiɣ ɛyaa sakɩyɛ. 20 Yuuda mba cɔlɔ lɛ, manpɩsɩ ɛzɩ Yuuda tʋ yɔ se pɩsa nɛ mehiɣ Yuuda mba;+ mba pɛwɛ paɣtʋ tɛɛ yɔ pɔ-cɔlɔ lɛ, manpɩsɩ ɛzɩ weyi ɛwɛ paɣtʋ tɛɛ yɔ, ŋgʋ ma-maɣmaɣ mɛnfɛyɩ paɣtʋ tɛɛ, se pɩsa nɛ mehiɣ mba pɛwɛ paɣtʋ tɛɛ yɔ.+ 21 Mba pɛfɛyɩnɩ paɣtʋ yɔ pɔ-cɔlɔ lɛ, manpɩsɩ ɛzɩ weyi ɛfɛyɩnɩ paɣtʋ yɔ, paa mantɩkɛ weyi ɛfɛyɩnɩ paɣtʋ Ɛsɔ cɔlɔ yɔ, ɛlɛ mɛwɛ paɣtʋ tɛɛ Krɩstʋ cɔlɔ,+ se pɩsa nɛ mehiɣ mba pɛfɛyɩnɩ paɣtʋ yɔ. 22 Ajamaa cɔlɔ lɛ, manpɩsɩ ɛjam, se pɩsa nɛ mehiɣ ajamaa.+ Manpɩsɩ pɩtɩŋa payɩ ɛyaa ndɩ ndɩ cɔlɔ, se ye pɩsaŋ kɔyɔ, mala mbʋ payɩ manpɩzɩɣ yɔ nɛ maya pa-taa nabɛyɛ ñʋʋ. 23 Ɛlɛ malakɩ pɩtɩŋa payɩ tɔm kɩbandʋ yɔɔ, se pɩsa nɛ monsusi-tʋ lalaa.*+

24 Ɩtɩtɩlɩ se mba peseɣ seya taa yɔ, pa-tɩŋa peseɣ, ɛlɛ kʋɖʋm ɖeke mʋʋnɩ kɩhɛyʋʋ na? Ise ɛzɩ pɩpɔzʋʋ yɔ nɛ ɩpɩzɩ nɛ ɩmʋ-kʋ.+ 25 Nɛ weyi eseɣ se ɛwa yɔ, ɛɖɔkʋʋ ɛ-tɩ pɩtɩŋa pɩ-taa. Toovenim taa lɛ, palakɩ mbʋ se pamʋ wabɩtʋ hulaɣ ŋga kapɩzɩɣ nɛ kɛwɛɛkɩ yɔ,+ ɛlɛ ɖa lɛ ŋga kaawɛɛkɩɣ yɔ ɖɩmʋʋ.+ 26 Pʋyɔɔ lɛ, ɛzɩma menseɣ yɔ, maaseɣ se pɔtɔm se pese;+ ɛzɩma mɔlɔʋ mo-ŋgulumee yɔ, maalɔʋ-yɛ se mama helim taa yem; 27 ɛlɛ mamakɩ mon-tomnaɣ*+ nɛ manpɩsɩɣ-kɛ yom, se pɩtaala nɛ mɛntɛŋ lalaa tɔm susuu lɛ, ma-maɣmaɣ manpɩsɩ weyi ɛtɩmʋna yɔ hɔɔlʋʋ nakʋyʋ taa.

10 Koobiya, mɔnsɔɔlaa se ɩtɩlɩ se ɖɔ-cɔzɔnaa tɩŋa kaawɛ ɛsɔmɩnʋʋ tɛɛ+ nɛ pa-tɩŋa pɛtɛzɩ teŋgu+ 2 nɛ pamɩyɩsɩ pa-tɩŋa Moyizi taa pɩtɩŋnɩ ɛsɔmɩnʋʋ nɛ teŋgu pɔ-yɔɔ, 3 nɛ pa-tɩŋa pɔtɔɔ fezuu taa tɔɔnaɣ kʋɖʋmaɣ+ 4 nɛ pa-tɩŋa pɔñɔɔ fezuu taa lɩm kʋɖʋmʋm.+ Mbʋ pʋyɔɔ yɔ, pɔñɔwaɣ lɩm fezuu taa kaaʋ ŋgʋ kɩtɩŋaɣ-wɛ yɔ kɩ-taa; nɛ kaaʋ ŋgʋ, kɩɩsɩŋnɩ* Krɩstʋ.+ 5 Paa mbʋ yɔ, pa-taa sakɩyɛ tɔm taakɛdɩnɩ Ɛsɔ, mbʋ pʋyɔɔ yɔ pakʋ-wɛ kañɩmbusuu taa.+

6 Nɛ tɔm ndʋ tɩpɩsɩ-ɖʋ kɩɖaŋ, se pɩsa nɛ ɖɩtaasɔɔlɩ wondu kɩdɛkɛdɩtʋ ɛzɩ paasɔɔlʋʋ-tʋ yɔ.+ 7 Ɩtaapɩsɩ ɖɔɖɔ sɩɩnaa layaa, ɛzɩ pa-taa nabɛyɛ labʋ yɔ; ɛzɩ pamaʋ yɔ: «Samaɣ caɣaa nɛ kɔtɔɔ nɛ kɔñɔɔ. Nɛ kakʋyɩ se kɛmɛyɩ amɛya.»+ 8 Ðɩtaacaɣ ɖɔɖɔ kʋzʋʋ kɩdɛkɛdʋʋ* wezuu, ɛzɩ pa-taa nabɛyɛ caɣʋ kʋzʋʋ kɩdɛkɛdʋʋ* wezuu, nɛ pa-taa ɛyaa 23 000 sɩ kɩyakʋ kʋɖʋmʋʋ yɔ.+ 9 Ðɩtaatakɩ ɖɔɖɔ Yehowa,*+ ɛzɩ pa-taa nabɛyɛ takʋʋ-ɩ, nɛ ɖʋmaa ñasɩ-wɛ nɛ pasɩ yɔ.+ 10 Itaamidi ɖɔɖɔ, ɛzɩ pa-taa nabɛyɛ miduu,+ nɛ ɖɩzɩyʋ kʋ-wɛ yɔ.+ 11 Nɛ pɩtalɩ-wɛ mbʋ se pɩkɛnɩ kɩɖaŋ, nɛ pama pɩ-tɔm se papaɣ-ɖʋ,+ ɖa mba ɛjaɖɛ yɔɔ ɖʋtʋ tɛm talɩ-ɖʋ yɔ.

12 Pʋyɔɔ lɛ, weyi ɛmaɣzɩɣ se ɛsɩŋaa yɔ, ɛkpa ɛ-tɩ nɛ ɛtaatɔlɩ.+ 13 Takɩm nabʋyʋ tɩkɔɔ mɩ-yɔɔ nɛ pɩtɩkɛ mbʋ pɩtalɩɣ ɛyaa yɔ.+ Ɛlɛ Ɛsɔ wɛ siɣsiɣ, nɛ ɛɛkaɣ yebu se pɩtakɩ-mɩ nɛ pɩcɛzɩ mbʋ ɩpɩzɩɣ nɛ ɩkaɖɩna yɔ,+ ɛlɛ alɩwaatʋ ndʋ takɩm kɔŋ yɔ, ɛkaɣ-mɩ wɩlʋʋ nʋmɔʋ ŋgʋ kɩ-yɔɔ pɩwɛɛ se ɩtɩŋna yɔ nɛ ɩpɩzɩ nɛ ɩɖɔkɩ mɩ-laŋɩyɛ pɩ-taa.+

14 Pʋyɔɔ lɛ, mɛ-ɛyaa kʋsɔɔlaa, ise sɩɩnaa latʋ.+ 15 Mɔyɔɔdʋʋnɩ-mɩ ɛzɩ ɛyaa mba pɛwɛnɩ lɛɣtʋ yɔ; mɩ-maɣmaɣ ɩmaɣzɩ tɔm ndʋ mɔyɔɔdʋʋ yɔ tɩ-yɔɔ nɛ ɩna. 16 Wazaɣ kɔpʋ ŋgʋ ɖɩwazɩɣ yɔ, kɩɩwɩlɩɣ se ɖɩka Krɩstʋ calɩm yaa we?+ Kpɔnɔ ŋgʋ ɖɩpɛlɩɣ yɔ, kɩɩwɩlɩɣ se ɖɩka Krɩstʋ tomnaɣ yaa we?+ 17 Kpɔnɔ kʋɖʋmʋʋ wɛna; pʋyɔɔ lɛ, paa ɖɩɖɔwa yɔ, ɖɩkɛ tomnaɣ kʋɖʋmaɣ,+ mbʋ pʋyɔɔ yɔ ɖa-tɩŋa ɖɩtayɩɣ kpɔnɔ kʋɖʋmʋʋ ŋgʋ.

18 Ɩcɔnɩ tomnaɣ yɔɔ Izrayɛɛlɩ nɛ ɩna: Mba pɔtɔkɩ kɩlaŋ wondu yɔ, pa nɛ altaaru patɩkaa pʋyʋ kʋɖʋm na?+ 19 Ye mbʋ, suwe menɖiɣni yɔɔdʋʋ yɔ? Se mbʋ pala sɩʋ kpeliɣa yɔɔ yɔ pɩkɛ pʋyʋ, yaa sɩʋ kpeliɣa kɛ pʋyʋ? 20 Aayɩ; ɛlɛ mɔyɔɔdʋʋ se mbʋ ajɛɛ laɣ yɔ, aleewaa alaɣ-pʋ, pɩtɩkɛ Ɛsɔ;+ nɛ mantɩsɔɔlɩ se mɩ nɛ aleewaa ɩkaa pʋyʋ.+ 21 Ɩɩpɩzɩɣ nɛ ɩñɔɔ Yehowa* kɔpʋ taa nɛ ɩtɛ ɩñɔɔ aleewaa kɔpʋ taa; ɩɩpɩzɩɣ nɛ ɩtɔɔ «Yehowa* taabɩlɩ» yɔɔ+ nɛ ɩtɛ ɩtɔɔ aleewaa taabɩlɩ yɔɔ. 22 Yaa «ɖɩwɛɛ nɛ ɖikulusuu Yehowa* sʋsɩ na»?+ Ɛzɩ ɖɩkɩlɩ-ɩ ɖoŋ yaa we?

23 Pɩha nʋmɔʋ se pala pɩtɩŋa payɩ, ɛlɛ pɩtɩkɛ pɩtɩŋa pɩwɛnɩ wazaɣ. Pɩha nʋmɔʋ se pala pɩtɩŋa payɩ, ɛlɛ pɩtɩkɛ pɩtɩŋa pɩkpazɩɣnɩ ɖoŋ.+ 24 Paa weyi lɛ, ɛtaawɛɛ nɛ ɛñɩnɩɣ ɛ-maɣmaɣ ɛ-kɛzɛɣa, ɛlɛ ɛñɩnɩ lɛlʋ ñɩŋga.+

25 Ɩtɔɔ mbʋ payɩ pɛpɛdɩɣ nandʋ kɩyakʋ taa yɔ, nɛ mɩ-ɛhʋyɛ yɔɔ lɛ, ɩtaapɔzɩ tɔm natʋyʋ; 26 mbʋ pʋyɔɔ yɔ «Yehowa* tɩnɩ tɛtʋ nɛ mbʋ payɩ pɩwɛ tɩ-yɔɔ yɔ.»+ 27 Ye weyi ɛfɛyɩnɩ tisuu yɔ ɛya-mɩ ɛ-tɛ nɛ ɩsɔɔlɩ se iwolo yɔ, ɩtɔɔ mbʋ payɩ pasɩɣ mɩ-ɛsɩndaa yɔ, nɛ mɩ-ɛhʋyɛ yɔɔ lɛ ɩtaapɔzɩ tɔm natʋyʋ. 28 Ɛlɛ ye nɔɔyʋ eheyi-mɩ se: «Pʋnɛ pɩkɛ mbʋ pala-pʋ kɩlaʋ yɔ,» weyi eheyi-mɩ tʋ yɔ ɛ-yɔɔ nɛ ɛhʋyɛ yɔɔ lɛ, ɩtaatɔɔ.+ 29 Pɩtɩkɛ mɩ-maɣmaɣ mɩ-ɛhʋyɛ mɔntɔŋ, ɛlɛ ɛyʋ lɛlʋ ñɩnɖɛ. Mbʋ pʋyɔɔ yɔ ɛbɛ yɔɔ pɩwɛɛ se ɛyʋ lɛlʋ ɛhʋyɛ ɛhʋʋnɩ man-tɩ yɔɔ wɛʋ tɔm?+ 30 Ye mɔntɔkɩ nɛ mahaɣ sɛtʋ yɔ, ɛbɛ yɔɔ pɔyɔɔdʋʋ mɔ-yɔɔ tɔm kɩdɛkɛdɩtʋ mbʋ pɩ-yɔɔ mahaɣ sɛtʋ yɔ pɩ-yɔɔ?+

31 Pʋyɔɔ lɛ, paa ɩtɔkɩ yaa ɩñɔʋ yaa paa ɛbɛ ɖɔɖɔ ɩlakɩ yɔ, ɩla pɩtɩŋa Ɛsɔ samtʋ yɔɔ.+ 32 Ɩkpa mɩ-tɩ nɛ ɩtaapɩsɩ mbʋ pituuluu Yuuda ñɩma nɛ Grɛɛkɩ ñɩma nɛ Ɛsɔ ɛgbɛyɛ yɔ,+ 33 ɛzɩ mɛwɛʋ nɛ mañakɩ pana se mɔn-tɔm ɛkɛdɩnɩ ɛyaa tɩŋa pɩtɩŋa pɩ-taa yɔ, maañɩnɩɣ ma-maɣmaɣ mɛn-kɛzɛɣa,+ ɛlɛ ɛyaa sakɩyɛ ñɩŋga mañɩnɩɣ, se pɩsa nɛ pehiɣ ñʋʋ yabʋ.+

11 Tɛtɛ nɛ ɩmaɣzɩnɩ-m, ɛzɩ ma ɖɔɖɔ mamaɣzɩɣnʋʋ Krɩstʋ yɔ.+

2 Mansaŋ-mɩ mbʋ pʋyɔɔ yɔ pɩtɩŋa pɩ-taa lɛ, ɩtɔzʋʋ mɔ-yɔɔ nɛ ɩɖɔkʋʋ sɔnzɩ kpam ɛzɩ manɖʋzʋʋ-sɩ mi-nesi tɛɛ yɔ. 3 Ɛlɛ mɔnsɔɔlaa se ɩtɩlɩ se paa abalʋ weyi lɛ, ɛ-ñʋʋdʋ lɛ Krɩstʋ;+ nɛ halʋ ñʋʋdʋ lɛ abalʋ;+ nɛ Krɩstʋ ñʋʋdʋ lɛ Ɛsɔ.+ 4 Abalʋ weyi ɛtɩmɩɣ yaa ɛyɔɔdʋʋ natʋ tɔm nɛ ehuuzi ɛ-ñʋʋ yɔɔ yɔ, ɛɖʋʋ ɛ-ñʋʋdʋ fɛyɛ; 5 ɛlɛ halʋ weyi ɛtɩmɩɣ yaa ɛyɔɔdʋʋ natʋ tɔm+ nɛ etihuuzi ɛ-ñʋʋ yɔɔ yɔ, ɛɖʋʋ ɛ-ñʋʋdʋ fɛyɛ; mbʋ pʋyɔɔ yɔ pɩwɛ ɖeyi ɖeyi ɛzɩ halʋ weyi ɛhʋm ɛ-ñʋʋ koloŋgolo yɔ. 6 Mbʋ pʋyɔɔ yɔ, ye halʋ eehuuzuu ɛ-ñʋʋ yɔɔ yɔ, pɩwɛɛ se eyele nɛ pɔkɔ ɛ-ñɔsɩ; ɛlɛ ye pɩkɛnɩ halʋ fɛyɛ se eyele nɛ pɔkɔ ɛ-ñɔsɩ yaa ɛhʋ koloŋgolo yɔ, pʋbʋ pɩwɛɛ se ehuuzi ɛ-ñʋʋ yɔɔ.

7 Mbʋ pʋyɔɔ yɔ abalʋ kɛ Ɛsɔ lɛzʋʋ+ nɛ ɛ-samtʋ nɛ pʋyɔɔ lɛ, pɩtɩpɔzɩ se ehuuzi ɛ-ñʋʋ yɔɔ, ɛlɛ halʋ ñɛkɛ abalʋ samtʋ. 8 Mbʋ pʋyɔɔ yɔ abalʋ tɩlɩɩnɩ halʋ taa, ɛlɛ halʋ lɩnɩnɩ abalʋ taa.+ 9 Pɩtasɩ lɛ, patɩlɩzɩ abalʋ halʋ yɔɔ, ɛlɛ halʋ palɩzɩ abalʋ yɔɔ.+ 10 Pʋyɔɔ pɩwɛɛ se halʋ ɛwɛɛnɩ ɛ-ñʋʋ yɔɔ yʋsaɣ ŋga kawɩlɩɣ se ɛwɛ ñʋʋdʋ nɔɔyʋ tɛɛ yɔ, Ɛsɔ tiyiyaa yɔɔ.+

11 Pɩtasɩ lɛ, Kɩbaɣlʋ taa lɛ, halʋ ɛɛwɛɣ nɛ abalʋ fɛyɩ, nɛ abalʋ ɛɛwɛɣ nɛ halʋ fɛyɩ. 12 Mbʋ pʋyɔɔ yɔ ɛzɩ halʋ lɩnʋʋ abalʋ taa yɔ,+ mbʋ ɖɔɖɔ abalʋ tɩŋnɩ halʋ yɔɔ nɛ ɛwɛɛ; ɛlɛ pɩtɩŋa pɩlɩnɩ Ɛsɔ cɔlɔ.+ 13 Mɩ-maɣmaɣ ɩmaɣzɩ nɛ ɩna: Ɛzɩ pɩmʋnaa se halʋ ɛtɩmnɩ Ɛsɔ nɛ etihuuzi ɛ-ñʋʋ yɔɔ? 14 Ɛjaɖɛ maɣmaɣ ɛɛwɩlɩɣ-mɩ se ñɔsɩ kɩɖaɣlɩsɩ ɖʋʋ abalʋ fɛyɛ, 15 ɛlɛ ye halʋ ɛwɛnɩ ñɔsɩ kɩɖaɣlɩsɩ yɔ, pɩkɛnɩ-ɩ samtʋ yaa we? Mbʋ pʋyɔɔ yɔ pɩha-ɩ ɛ-ñɔsɩ mbʋ ehuuzuuni ɛ-ñʋʋ yɔɔ yɔ pi-lone taa. 16 Ɛlɛ ye nɔɔyʋ ɛsɔɔlɩ lʋbʋ sɔnzɩ lɛɛsɩ yɔɔ yɔ, ɖɩfɛyɩnɩ nasɩyɩ, nɛ Ɛsɔ agbaa ɖɔɖɔ fɛyɩnɩ nasɩyɩ.

17 Ɛlɛ mɛncɛlʋʋ-mɩ wɩlɩtʋ tʋnɛ yɔ, maasaŋ-mɩ kɩsam, mbʋ pʋyɔɔ yɔ ikpeɣliɣ lɛ, wondu ɩɩñɔɔzʋʋ kɩñɔɔzʋ, ɛlɛ pɩtɛzɩɣ wɛɛkʋʋ kɩwɛɛkʋ. 18 Mbʋ pʋyɔɔ yɔ kajalaɣ lɛ, manɩɣ se alɩwaatʋ ndʋ ikpeɣliɣ ɛgbɛyɛ taa yɔ, tayʋʋ wɛ mɩ-hɛkʋ taa; nɛ hɔɔlʋʋ nakʋyʋ taa lɛ, mentisiɣ tɩ-yɔɔ. 19 Mbʋ pʋyɔɔ yɔ toovenim taa lɛ, kɩjaʋ yɔɔ agbaa ɖɔɖɔ kaɣ wɛʋ mɩ-hɛkʋ taa,+ se pɩsa nɛ mɩ-taa mba pɔ-tɔm kɛdɩnɩ Ɛsɔ yɔ, papɩzɩ nɛ pana-wɛ ɖɔɖɔ kaɣlaa.

20 Alɩwaatʋ ndʋ ikpeɣliɣ lone kʋɖʋmɖɩyɛ taa yɔ, toovenim taa lɛ, iikpeɣliɣ se ɩtɔɔ Kɩbaɣlʋ ɖanaɣ tɔɔnaɣ na.+ 21 Mbʋ pʋyɔɔ yɔ alɩwaatʋ ndʋ ɩtɔkɩ-kɛ yɔ, mɩ-taa paa weyi calɩɣnɩ tɔɔʋ ɛ-maɣmaɣ ɛ-ɖanaɣ tɔɔnaɣ, nɛ pʋyɔɔ lɛ ñɔɔsɩ wɩɣ nɔɔyʋ; ɛlɛ lɛlʋ lɛ, sʋlʋm kʋʋ-ɩ. 22 Ɩfɛyɩnɩ ɖɩsɩ nzɩ sɩ-taa ɩtɔɔ nɛ ɩñɔɔ yɔ? Yaa iniŋ Ɛsɔ ɛgbɛyɛ nɛ iyeki se fɛyɛ ɛkpa mba pɛfɛyɩnɩ pʋyʋ yɔ? Suwe manpɩzɩɣ nɛ meheyi-mɩ? Pɩwɛɛ se mansam-mɩ yaa we? Pʋnɛ pɩ-taa lɛ, maasaŋ-mɩ.

23 Mbʋ pʋyɔɔ yɔ mbʋ mamʋ Kɩbaɣlʋ cɔlɔ yɔ, mbʋ ɖɔɖɔ manɖʋzɩ mi-nesi tɛɛ, se Kɩbaɣlʋ Yesu, ɖoo wena+ a-taa palɩɣaɣ ɛ-wayɩ yɔ, ɛkpaɣ kpɔnɔ, 24 nɛ ɛsɛ Ɛsɔ nɛ pɩtɛ lɛ, ɛpɛlɩ-kʋ nɛ ɛtɔ se: «Pʋnɛ pɩsɩŋnɩ mon-tomnaɣ,+ ŋga pɛcɛlɩ mɩ-yɔɔ yɔ. Ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.»+ 25 Pɛtɛm ɖanaɣ tɔɔnaɣ tɔɔʋ lɛ, ɛkpaɣ kɔpʋ+ nɛ ɛla mbʋ ɖɔɖɔ nɛ ɛtɔ se: «Kɔpʋ kʋnɛ, kɩsɩŋnɩ ɛgbɛyɛ kɩfaɖɛ+ nɖɩ patɩŋnɩ man-calɩm yɔɔ nɛ paɖʋ yɔ.+ Alɩwaatʋ ndʋ tɩ-tɩŋa payɩ ɩñɔʋ-kʋ yɔ, ɩwɛɛ nɛ ɩlakɩ mbʋ nɛ ɩtɔzʋʋnɩ mɔ-yɔɔ.»+ 26 Mbʋ pʋyɔɔ yɔ alɩwaatʋ ndʋ tɩ-tɩŋa payɩ ɩtɔkɩ kpɔnɔ kʋnɛ nɛ ɩñɔʋ kɔpʋ kʋnɛ yɔ, ɩwɛɛ nɛ isusuu Kɩbaɣlʋ sɩm pɩkɔɔ nɛ pɩtalɩ alɩwaatʋ ndʋ ɛkɔŋ yɔ.

27 Pʋyɔɔ lɛ, weyi ɛtɔkɩ kpɔnɔ yaa ɛñɔʋ Kɩbaɣlʋ kɔpʋ nɛ ɛtɩmʋna yɔ, ɛkaɣ ɖɔʋ wɛɛ Kɩbaɣlʋ tomnaɣ nɛ ɛ-calɩm pɔ-yɔɔ. 28 Pɩwɛɛ se ɛyʋ ɛcalɩnɩ ɛ-tɩ wiluu camɩyɛ nɛ ɛna se ɛmʋnaa;+ nɛ ye ɛmʋnaa lɛ, ɛtɔɔ kpɔnɔ nɛ ɛñɔɔ kɔpʋ. 29 Mbʋ pʋyɔɔ yɔ weyi ɛtɔkɩ nɛ ɛñɔʋ nɛ ɛtɩtazɩ nɛ ɛtɩlɩ mbʋ tomnaɣ kɛnaa yɔ, ɛtɔkɩ nɛ ɛñɔʋ ɛ-maɣmaɣ ɛ-tɔm hʋʋ. 30 Pʋyɔɔ mɩ-taa sakɩyɛ kɛ ajamaa nɛ kʋdɔndɩnaa, nɛ sakɩyɛ ɖiɣni ɖou sɩm taa.*+ 31 Ɛlɛ ye ɖɩtazaa nɛ ɖɩtɩlɩ mbʋ ɖa-maɣmaɣ ɖɩkɛnaa yɔ, paakaɣ-ɖʋ tɔm hʋnʋʋ. 32 Ɛlɛ, alɩwaatʋ ndʋ pahʋʋnɩ-ɖʋ tɔm yɔ, Yehowa* sɩɣzɩɣnɩ-ɖʋ lɔŋ,+ se pɩsa nɛ pataakpɛndɩ ɖa nɛ ɛjaɖɛ nɛ pakʋ ɖɔ-tɔm.+ 33 Pʋyɔɔ lɛ, mon-koobiya, alɩwaatʋ ndʋ ikpeɣliɣ se ɩtɔɔ-kɛ yɔ, ɩɖaŋ ɖama. 34 Ye ñɔɔsɩ ɛwɩɣ nɔɔyʋ yɔ, ɛtɔɔ ɖɩɣa; se pɩsa nɛ ikpeɣliɣ lɛ, pataahʋʋnɩ-mɩ tɔm.+ Ɛlɛ tɔm ndʋ tɩkazaa yɔ, mankaɣ-tʋ ñɔɔzʋʋ alɩwaatʋ ndʋ mantalɩɣ mɩ-cɔlɔ yɔ.

12 Piyele nɛ fezuu taa kʋjɔŋ hɔɔlʋʋ taa lɛ,+ koobiya, mantɩsɔɔlɩ se ɩwɛɛ nɛ ɩɩsɩŋ natʋyʋ. 2 Ɩsɩm mbʋ se alɩwaatʋ ndʋ ɩɩkɛ ajɛɛ taa mba* yɔ, pɩɩwɛnɩ ɖoŋ mɩ-yɔɔ nɛ pitolisuu-mɩ nɛ piwokini-mɩ sɩʋ kpelisi kaayɔɔdasɩ yɔɔ;+ nɛ iwoki ɖenɖe siɖiyiɣ-mɩ nɛ siwokina yɔ. 3 Lɛɛlɛɛyɔ lɛ, mancaɣ se ɩtɩlɩ se alɩwaatʋ ndʋ nɔɔyʋ tɩŋɩɣnɩ Ɛsɔ fezuu yɔɔ nɛ ɛyɔɔdʋʋ yɔ, ɛɛtɔŋ se: «Pɔlɔ nɔɔ kɩdɛkɛdaɣ Yesu yɔɔ!» nɛ nɔɔyʋ ɛɛpɩzɩɣ nɛ ɛyɔɔdɩ se: «Yesu kɛnɩ Kɩbaɣlʋ!» nɛ pɩtɩtɩŋnɩ fezuu kiɖeɖeu yɔɔ.+

4 Kʋjɔŋ ndɩ ndɩ wɛɛ, ɛlɛ fezuu kʋɖʋmʋʋ wɛna;+ 5 nɛ lɩm ɖʋʋ tʋma ndɩ ndɩ wɛɛ,+ ɛlɛ Kɩbaɣlʋ kʋɖʋm wɛna; 6 nɛ tʋma ndɩ ndɩ wɛɛ, paa mbʋ yɔ Ɛsɔ kʋɖʋm lakɩnɩ a-tɩŋa paa ɛyʋ weyi lɛ ɛ-taa.+ 7 Ɛlɛ fezuu lakɩ tʋmɩyɛ paa ɛyʋ weyi lɛ ɛ-taa se pɩwazɩ ɛyaa lalaa.+ 8 Mbʋ pʋyɔɔ yɔ, pɩha nɔɔyʋ lɔŋsɩnɖɛ yɔɔdaɣ* pɩtɩŋnɩ fezuu yɔɔ, pɩha lɛlʋ sɩmtʋ yɔɔdaɣ pɩtɩŋnɩ fezuu kʋɖʋmʋʋ ŋgʋ kɩ-yɔɔ, 9 pɩha lɛlʋ tisuu+ pɩtɩŋnɩ fezuu kʋɖʋmʋʋ ŋgʋ kɩ-yɔɔ, pɩha lɛlʋ kʋdɔndɩnaa waʋ kʋjɔŋ+ pɩtɩŋnɩ fezuu kʋɖʋmʋʋ ŋgʋ kɩ-yɔɔ, 10 pɩha lɛlʋ se ɛla maamaaci lakasɩ,+ pɩha lɛlʋ se ɛyɔɔdɩ natʋ tɔm, pɩha lɛlʋ fezuu taa tɔm lɛɣtʋ,+ pɩha lɛlʋ kʋnʋmɩŋ* ndɩ ndɩ,+ nɛ pɩha lɛlʋ se ɛɖɛzɩ kʋnʋmɩŋ taa.+ 11 Ɛlɛ fezuu kʋɖʋmʋʋ ŋgʋ kɩlakɩnɩ tʋma ana a-tɩŋa, nɛ kɩhaɣ paa weyi ɛzɩ kɩsɔɔlʋʋ yɔ.

12 Mbʋ pʋyɔɔ yɔ, tomnaɣ kʋɖʋmaɣ wɛna ɛlɛ kɛwɛnɩ pilinzi sakɩyɛ; nɛ paa tomnaɣ ŋga ke-pilinzi ɩɖɔwa yɔ, sɩ-tɩŋa sɩkɛ tomnaɣ kʋɖʋmaɣ,+ mbʋ ɖɔɖɔ Krɩstʋ wɛɛ. 13 Mbʋ pʋyɔɔ yɔ pɩtɩŋnɩ fezuu kʋɖʋmʋʋ yɔɔ lɛ, pamɩyɩsɩ ɖa-tɩŋa tomnaɣ kʋɖʋmaɣ taa, paa ɖɩkɛ Yuuda mba yaa Grɛɛkɩ mba yɔ, paa ɖɩkɛ yomaa yaa mba pɛwɛ pa-tɩ yɔɔ yɔ; nɛ peyeba nɛ ɖa-tɩŋa ɖɩñɔɔ fezuu kʋɖʋmʋʋ.

14 Mbʋ pʋyɔɔ yɔ, toovenim taa lɛ, pɩtɩkɛ piliŋa kʋɖʋmaɣ palabɩnɩ tomnaɣ, ɛlɛ pilinzi sakɩyɛ.+ 15 Ye nɩŋgbaŋaɣ ɛyɔɔdaa se: «Mantɩkɛ nesi, pʋyɔɔ lɛ mantɩkɛ tomnaɣ hɔɔlʋʋ nakʋyʋ» yɔ, piiyeki se kataakɛ tomnaɣ hɔɔlʋʋ nakʋyʋ. 16 Nɛ ye nɩŋgbaŋʋʋ ɛyɔɔdaa se: «Mantɩkɛ ɛsɩyɛ, pʋyɔɔ lɛ mantɩkɛ tomnaɣ hɔɔlʋʋ nakʋyʋ» yɔ, piiyeki se kɩtaakɛ tomnaɣ hɔɔlʋʋ nakʋyʋ. 17 Ye tomnaɣ tɩŋa kaakɛ ɛsɩyɛ, le nɩŋgbaŋʋʋ kaawɛɛ? Ye ka-tɩŋa kaakɛ nɩŋgbaŋʋʋ, le mɔɔʋ kaawɛɛ? 18 Ɛlɛ Ɛsɔ ɖʋ paa tomnaɣ piliŋa ŋga lɛ ko-lone taa ɛzɩ pɩkɛdʋʋnɩ-ɩ yɔ.

19 Ye sɩ-tɩŋa sɩɩkɛ piliŋa kʋɖʋmaɣ yɔ, le tomnaɣ kaawɛɛ? 20 Ɛlɛ lɛɛlɛɛyɔ sɩkɛ pilinzi sakɩyɛ, paa mbʋ yɔ tomnaɣ kʋɖʋmaɣ wɛna. 21 Ɛsɩyɛ ɛɛpɩzɩɣ nɛ ɖiheyi nesi se: «Ŋfɛyɩ-m wazaɣ nakɛyɛ,» nɛ ñʋʋ ɖɔɖɔ ɛɛpɩzɩɣ nɛ kiheyi nɩŋgbanzɩ se: «Ɩfɛyɩ-m wazaɣ nakɛyɛ.» 22 Ɛlɛ tomnaɣ pilinzi nzɩ ɖɩcɔŋnɩ-sɩ se sɩkɛ ajamaa yɔ, sɩ-tɔm cɛyaa; 23 nɛ tomnaɣ hɔɔlɩŋ weyi ɖɩmaɣzɩɣ se ɩtɩmʋnɩ hɩɖɛ ɖʋʋ yɔ, ɖɩɖʋʋ-ɩ hɩɖɛ sɔsɔɖɛ;+ ye mbʋ, ɖɔ-hɔɔlɩŋ weyi ɩfɛyɩ cɔnʋʋ yɔ, ɖɩcɔŋnɩ ɩ-yɔɔ nɛ pɩkɩlɩ; 24 piyele nɛ ɖɔ-hɔɔlɩŋ weyi ɩwɛ kajʋka yɔ, ɩfɛyɩnɩ kɛdɛɖaɣ nakɛyɛ. Ɛlɛ, Ɛsɔ labɩ tomnaɣ labʋ nabʋyʋ nɛ ɛɖʋ hɩɖɛ sɔsɔɖɛ hɔɔlʋʋ ŋgʋ kɩwɛnɩ kɛdɛɖaɣ yɔ, 25 se pɩsa nɛ tayʋʋ nabʋyʋ ɛtaawɛɛ tomnaɣ taa, ɛlɛ pɩwɛɛ se ke-pilinzi ɩmaɣzɩɣ ɖama yɔɔ.+ 26 Ye piliŋa kʋɖʋmaɣ ɛnɩɣ siziŋ yɔ, pilinzi lɛɛsɩ tɩŋa kpɛndɩɣ kɔ-yɔɔ nɛ sɩnɩɩ siziŋ;+ yaa ye pasam piliŋa kʋɖʋmaɣ yɔ, pilinzi lɛɛsɩ tɩŋa kpɛndɩɣ kɔ-yɔɔ nɛ sɩmɛyɩ amɛya.+

27 Ɩkɛ Krɩstʋ tomnaɣ,+ nɛ mɩ-taa paa weyi lɛ ɛkɛ piliŋa.+ 28 Nɛ Ɛsɔ ɖʋ ɛyaa ndɩ ndɩ tʋmɩyɛ ɛgbɛyɛ taa: kajalaɣ lɛ, apostoloowaa;+ nabʋlɛ lɛ nayaa;+ nabudozo lɛ, wɩlɩyaa;+ pʋwayɩ lɛ, maamaaci lakasɩ;+ pʋwayɩ lɛ, kʋdɔndɩnaa waʋ kʋjɔŋ;+ sɩnʋʋ tʋma; nʋmɔʋ wɩlʋʋ lɛɣtʋ;+ kʋnʋmɩŋ ndɩ ndɩ.+ 29 Pa-tɩŋa pɛkɛ apostoloowaa na? Pa-tɩŋa pɛkɛ nayaa na? Pa-tɩŋa pɛkɛ wɩlɩyaa na? Pa-tɩŋa palakɩ maamaaci lakasɩ na? 30 Pa-tɩŋa pɛwɛnɩ kʋdɔndɩnaa waʋ kʋjɔŋ na? Pa-tɩŋa pɔyɔɔdʋʋ kʋnʋmɩŋ lɛɛŋ na?+ Pa-tɩŋa pɛkɛ tɔm ɖɛzɩyaa na?+ 31 Ɛlɛ ɩwɛɛ pana ñaɣʋ yɔɔ* se ihiɣ kʋjɔŋ weyi ɩkpaɖaa yɔ.+ Paa mbʋ yɔ mankaɣ-mɩ wɩlʋʋ nʋmɔʋ nakʋyʋ nɛ kɩ-wayɩ fɛyɩ.+

13 Ye mɔyɔɔdʋʋ ɛyaa nɛ Ɛsɔ tiyiyaa pa-kʋnʋmɩŋ taa ɛlɛ mɛnfɛyɩnɩ sɔɔlɩm yɔ, manpɩsɩ agbogbo ŋgʋ kiwiɣ yaa ŋgbanɛ nɖɩ ɖiwiɣ yɔ. 2 Nɛ ye pɩha-m se mɔyɔɔdɩ natʋ tɔm nɛ manɩɩ mɛsaɣ tɛɛ tɔm kiɖeɖetu tɩŋa taa nɛ mɛwɛɛnɩ sɩmtʋ tɩŋa,+ nɛ ye mɛwɛnɩ tisuu tɩŋa se manpɩzɩ nɛ mɛnkpɛzɩ pʋŋ,* ɛlɛ mɛnfɛyɩnɩ sɔɔlɩm yɔ, mantɩkɛ pʋyʋ.*+ 3 Nɛ ye maha mbʋ mɛwɛna yɔ pɩtɩŋa se mancalɩ ɛyaa lalaa,+ nɛ ye mɛncɛlɩ mon-tomnaɣ se pɩsa nɛ mankʋndɩ, ɛlɛ mɛnfɛyɩnɩ sɔɔlɩm yɔ,+ mɛnfɛyɩ wazaɣ nakɛyɛ kpataa.

4 Sɔɔlɩm+ wɛ suuɖu+ nɛ pɩlakɩ kɩbandʋ.+ Sɔɔlɩm fɛyɩ sʋsɩ.+ Pɩɩkʋndʋʋ, pɩɩkpazɩɣ pɩ-tɩ,+ 5 pɩɩlakɩ mbʋ pɩtɩtʋʋzɩ yɔ,+ pɩɩñɩnɩɣ pɩ-maɣmaɣ pɩ-kɛzɛsɩ,+ pɩɩkɔʋ pana lɛɛ lɛɛ.+ Pɩɩcakɩnɩ nɔɔyʋ.+ 6 Pɩ-taa ɛɛlakɩ leleŋ nɛ mbʋ pɩfɛyɩ siɣsiɣ yɔ,+ ɛlɛ pɩ-taa lakɩ leleŋ nɛ toovenim. 7 Pɩkatɩɣ pɩtɩŋa,+ pitisiɣ pɩtɩŋa pɩ-yɔɔ,+ pɩwɛnɩ lidaʋ pɩtɩŋa pɩ-yɔɔ,+ pɩɖɔkʋʋ pɩ-laŋɩyɛ pɩtɩŋa pɩ-taa.+

8 Sɔɔlɩm ɛɛtɛŋ kpa. Ɛlɛ ye natʋ tɔm kʋjɔŋ ɩwɛɛ yɔ, ɩkaɣ mʋʋʋ; ye kʋnʋmɩŋ* ɩwɛɛ yɔ, ɩkaɣ sɩʋ tɩnaɣ; ye sɩmtʋ ɛwɛɛ yɔ, tɩkaɣ mʋʋʋ. 9 Mbʋ pʋyɔɔ yɔ sɩmtʋ pazɩ ɖɩwɛna+ nɛ ɖɩyɔɔdʋʋ natʋ tɔm pazɩ na, 10 ɛlɛ alɩwaatʋ ndʋ mbʋ pɩwɛ pilim yɔ pɩkɔŋ yɔ, mbʋ pɩfɛyɩ pilim yɔ pɩkaɣ mʋʋʋ. 11 Maakɛ pɩɣa lɛ, mɔyɔɔdaɣ ɛzɩ pɩɣa yɔ, mamaɣzaɣ ɛzɩ pɩɣa yɔ, malakaɣnɩ ma-maɣzɩm tʋmɩyɛ ɛzɩ pɩɣa yɔ; ɛlɛ lɛɛlɛɛyɔ manpɩsɩ sɔsɔ, nɛ pʋyɔɔ lɛ, meyebi pɩjatʋ lakasɩ. 12 Mbʋ pʋyɔɔ yɔ lɛɛlɛɛyɔ lɛ ɖɩnaɣ yem fiɖiyii pɩtɩŋnɩ ñɩɣtʋ ñɩnʋʋ nakʋyʋ yɔɔ; ɛlɛ alɩwaatʋ ndʋ tɩ-taa lɛ, ɖɩkaɣ naʋ kpayɩ kpayɩ ɛzɩ ɖɛ-ɛsɩndaa pɩwɛɛ yɔ. Sɔnɔ lɛ mansɩm pazɩ na, ɛlɛ alɩwaatʋ ndʋ tɩ-taa lɛ mankaɣ sɩm camɩyɛ* ɛzɩ pasɩmʋʋ-m camɩyɛ yɔ. 13 Ɛlɛ, lɛɛlɛɛyɔ lɛ, pʋnɛ pɩ-naadozo pɩkazɩɣ: tisuu, lidaʋ, sɔɔlɩm; ɛlɛ pɩ-taa lɛ sɔɔlɩm kpaɖɩna.+

14 Ɩtɩŋ sɔɔlɩm nʋmɔʋ, paa mbʋ yɔ ɩwɛɛ pana ñaɣʋ yɔɔ* se ihiɣ fezuu taa kʋjɔŋ, se pɩsa nɛ kɔzɩ kɔzɩ lɛ ɩyɔɔdɩ natʋ tɔm.+ 2 Mbʋ pʋyɔɔ yɔ, weyi ɛyɔɔdʋʋ kʋnʋŋ lɛɛkʋ yɔ, pɩtɩkɛ ɛyaa ɛyɔɔdʋʋna, ɛlɛ Ɛsɔ ɛyɔɔdʋʋna; mbʋ pʋyɔɔ yɔ nɔɔyʋ eewelisiɣ,+ ɛlɛ ɛtɩŋɩɣnɩ fezuu yɔɔ nɛ ɛyɔɔdʋʋ mɛsaɣ tɛɛ tɔm kiɖeɖetu.+ 3 Ɛlɛ weyi ɛyɔɔdʋʋ natʋ tɔm yɔ, ɛtɩŋɩɣnɩ ɛ-tɔm yɔɔ nɛ ɛkpazɩɣ ɛyaa ɖoŋ nɛ eseɣtiɣ-wɛ nɛ ɛhɛzɩɣ pa-laŋa. 4 Weyi ɛyɔɔdʋʋ kʋnʋŋ lɛɛkʋ yɔ, ɛ-maɣmaɣ ɛ-tɩ ɛkpazɩɣ ɖoŋ, ɛlɛ weyi ɛyɔɔdʋʋ natʋ tɔm yɔ, ɛkpazɩɣ ɛgbɛyɛ ɖoŋ. 5 Maasɔɔlaa se mɩ-tɩŋa ɩyɔɔdɩ kʋnʋmɩŋ lɛɛŋ,+ ɛlɛ me-liu wɛɛ nɛ pɩkɩlɩ se ɩyɔɔdɩ natʋ tɔm.+ Toovenim taa lɛ, weyi ɛyɔɔdʋʋ natʋ tɔm yɔ ɛkɩlɩ weyi ɛyɔɔdʋʋ kʋnʋmɩŋ lɛɛŋ yɔ, ye ɛlɛ ɛtɩɖɛzɩ ɛ-tɔm se pɩsa nɛ pɩkpazɩ ɛgbɛyɛ ɖoŋ yɔ. 6 Ɛlɛ lɛɛlɛɛyɔ lɛ koobiya, ye mɔnkɔma nɛ mɔyɔɔdʋʋnɩ-mɩ kʋnʋmɩŋ lɛɛŋ yɔ, kɩbandʋ ndʋ malakɩ-mɩ, ye mantɩyɔɔdɩnɩ-mɩ nɛ natʋ natʋyʋ+ yaa sɩmtʋ+ yaa natʋ tɔm natʋyʋ yaa wɩlɩtʋ natʋyʋ yɔ?

7 Mbʋ ɖɔɖɔ pɩwɛ wondu ndʋ tɩfɛyɩnɩ fezuu nɛ tiwiɣ yɔ tɩ-hɔɔlʋʋ taa, paa pɩtɩɩkɛ hɩlaɣ yaa cɩmʋʋ yɔ. Ye tʋkaɣ nakɛyɛ ɛfɛyɩ ɛzɩma tiwiɣ yɔ pɩ-hɛkʋ taa yɔ, ɛzɩma papɩzɩɣ nɛ peɖiɣzini tɔm ndʋ pahʋlʋʋ hɩlaɣ taa yaa tɔm ndʋ pamakɩ cɩmʋʋ yɔɔ yɔ? 8 Mbʋ pʋyɔɔ yɔ ye patɩyaa ɛgandɩyɛ nɛ ɖɩ-taa tʋ camɩyɛ yɔ, akaɣ ɛ-tɩ ñɔɔzʋʋ se ewolo you? 9 Mbʋ ɖɔɖɔ, ye ɩɩkpakɩɣ mɩ-nzʋlʋmɩyɛ nɛ ɩyɔɔdʋʋnɩ tɔm ndʋ tɩ-taa nɩʋ wɛ kɛlɛʋ yɔ, ɛzɩma ɛyʋ lakɩ nɛ ɛtɩlɩ tɔm ndʋ iɖiɣni yɔɔdʋʋ yɔ? Toovenim taa lɛ, ɩkaɣ yɔɔdʋʋ helim taa. 10 Pɩpɩzɩɣ nɛ pɩla se yɔɔdasɩ ndɩ ndɩ wɛ ɛjaɖɛ yɔɔ, paa mbʋ yɔ nakɛyɛ fɛyɩ se kɛfɛyɩnɩ tɔbʋʋ nɩʋ. 11 Mbʋ pʋyɔɔ yɔ ye maanɩɣ yɔɔdaɣ nakɛyɛ tɔbʋʋ yɔ, mankaɣ kɛʋ ɛgɔm weyi ɛyɔɔdʋʋ yɔ ɛ-ɛsɩndaa; nɛ weyi ɛyɔɔdʋʋ yɔ ɛkaɣ-m kɛʋ ɛgɔm. 12 Pʋyɔɔ mɩ ɖɔɖɔ, ɛzɩma ɩñɩnɩɣ fezuu kʋjɔŋ siŋŋ yɔ pʋyɔɔ lɛ, ɩñaɣ pana nɛ ɩwɛɛnɩ kʋjɔŋ sakɩyɛ weyi ɩkaɣ kpazʋʋ ɛgbɛyɛ ɖoŋ yɔ.+

13 Pʋyɔɔ lɛ, weyi ɛyɔɔdʋʋ kʋnʋŋ lɛɛkʋ taa yɔ, ɛtɩmɩ se ɛpɩzɩ nɛ ɛɖɛzɩ-kʋ.+ 14 Mbʋ pʋyɔɔ yɔ ye mantɩmɩɣ kʋnʋŋ lɛɛkʋ taa yɔ, fezuu kʋjɔʋ ŋgʋ mɛwɛna yɔ, ŋgʋ tɩmɩɣna, ɛlɛ ma-maɣzɩm ɛɛlʋlʋʋ pee. 15 Ye mbʋ, ɛbɛ pɩwɛɛ se mala yɔ? Mankaɣ tɩmʋʋ nɛ fezuu kʋjɔʋ, ɛlɛ mankaɣ tɩmʋʋ ɖɔɖɔ nɛ ma-maɣzɩm. Mankaɣ teu samtʋ hendu nɛ fezuu kʋjɔʋ, ɛlɛ mankaɣ ɖɔɖɔ teu samtʋ hendu nɛ ma-maɣzɩm. 16 Ye pɩtɩkɛ mbʋ yɔ, ye ŋsaŋ Ɛsɔ nɛ fezuu kʋjɔʋ nakʋyʋ yɔ, ɛzɩma ɛyʋ yem weyi ɛwɛ mɩ-hɛkʋ taa yɔ, ɛkaɣ yɔɔdʋʋ se «Amɛn» ñɛ-sɛtʋ yɔɔ, ŋgʋ ɛɛsɩŋ tɔm ndʋ ŋɖiɣni yɔɔdʋʋ yɔ? 17 Toovenim taa lɛ, ŋwɛɛ nɛ ŋsɛɣ Ɛsɔ ɛzɩ pɩpɔzʋʋ yɔ, ɛlɛ pɩɩkpazɩɣ ɛyʋ lɛlʋ ɖoŋ. 18 Mɛnsɛɣ Ɛsɔ se ɛlabaɣ lɛ, mbʋ pʋyɔɔ yɔ mɔyɔɔdʋʋ kʋnʋmɩŋ lɛɛŋ sakɩyɛ nɛ pɩkɩlɩ mɩ-tɩŋa. 19 Paa mbʋ yɔ, alɩwaatʋ ndʋ mɛwɛɣ ɛgbɛyɛ naɖɩyɛ taa yɔ, pɩwɛ-m ɖeu se mɔyɔɔdɩ tɔm pee kagbanzɩ nɛ ma-maɣzɩm* se manpɩzɩ nɛ mawɩlɩ ɖɔɖɔ lalaa tɔm, nɛ pɩkɩlɩ se mɔyɔɔdɩ tɔm pee kudokiŋ hiu kʋnʋŋ lɛɛkʋ taa.+

20 Koobiya, ɩtaapɩsɩ piya cikpesi mɩ-tɔm taa nɩʋ lɛɣtʋ taa,+ ɛlɛ ɩkɛ piya cikpesi kɩdɛkɛdɩm labʋ hɔɔlʋʋ taa;+ nɛ ɩpɩsɩ sɔsaa mɩ-tɔm taa nɩʋ lɛɣtʋ taa.+ 21 Pama Paɣtʋ taa se: «Mankaɣ kpaɣʋ ɛyaa mba pɔyɔɔdʋʋ kʋnʋmɩŋ lɛɛŋ yɔ pa-nzʋlʋma nɛ agɔma ndomee nɛ mɔyɔɔdɩnɩ samaɣ kanɛ, nɛ halɩ kakaɣ kizuu se kaawelisiɣni-m; Yehowa* yɔɔdʋʋna.»+ 22 Ye mbʋ, kʋnʋmɩŋ tɩkɛ mba pɛwɛnɩ tisuu yɔ pa-yʋsaɣ, ɛlɛ ɩkɛ mba pɛfɛyɩnɩ tisuu yɔ pa-yʋsaɣ;+ piyele nɛ mba pɛfɛyɩnɩ tisuu yɔ pɩtɩkɛ mba tɩnɩ natʋ tɔm, ɛlɛ mba pɛwɛnɩ tisuu yɔ, mba tɩnɩ-tʋ. 23 Pʋyɔɔ lɛ, ye ɛgbɛyɛ tɩŋa ekpeɣli lone kʋɖʋmɖɩyɛ taa nɛ ɛyaa tɩŋa yɔɔdʋʋ kʋnʋmɩŋ lɛɛŋ, ɛlɛ ɛyaa yemwaa yaa mba pɛfɛyɩnɩ tisuu yɔ pasʋʋ yɔ, paakaɣ yɔɔdʋʋ se mɩ-ñʋŋ taa cɔwa yaa we? 24 Ɛlɛ ye mɩ-tɩŋa ɩwɛɛ nɛ ɩyɔɔdʋʋ natʋ tɔm nɛ weyi ɛfɛyɩnɩ tisuu yɔ yaa ɛyʋ yem nɔɔyʋ sʋʋ yɔ, mɩ-tɩŋa mɩ-tɔm kaɣ-ɩ tɔm kizinuu nɛ tiseɣti-i nɛ ɛtazɩ ɛ-taa tete. 25 Piyeki nɛ pikuli ɛ-laŋɩyɛ taa mɛsaɣ tɛɛ tɔm yɔɔ, nɛ ɛkaɣ pam ɛ-ɛsa nɛ tɛtʋ nɛ ɛsɛɛ Ɛsɔ nɛ ɛtɔ se: «Toovenim taa lɛ, Ɛsɔ wɛ mɩ-hɛkʋ taa.»+

26 Ye mbʋ koobiya, ɛbɛ pɩwɛɛ se ɩla yɔ? Alɩwaatʋ ndʋ ikpeɣliɣ yɔ, nɔɔyʋ wɛnɩ keɣa nakɛyɛ, lɛlʋ ñɛwɛnɩ wɩlɩtʋ natʋyʋ, lɛlʋ ñɛwɛnɩ natʋ natʋyʋ, lɛlʋ ñɛwɛnɩ kʋnʋŋ nakʋyʋ, nɛ lɛlʋ ñɛwɛnɩ tɔm ɖɛzʋʋ.+ Ɩla pɩtɩŋa se ɩkpazɩ ɖama ɖoŋ. 27 Nɛ ye nɔɔyʋ ɛyɔɔdʋʋ kʋnʋŋ lɛɛkʋ yɔ, pɩsɩɩnɩ 2 yaa pɩkɩlaa yɔ 3, nɛ pɔyɔɔdɩ kʋɖʋm kʋɖʋm; nɛ pɩwɛɛ se nɔɔyʋ ɛɖɛzɩ.+ 28 Ɛlɛ ye tɔm ɖɛzɩyʋ nɔɔyʋ ɛfɛyɩ yɔ, pɩwɛɛ se esu tamɩyɛ ɛgbɛyɛ taa nɛ ɛyɔɔdɩnɩ ɛ-maɣmaɣ ɛ-tɩ nɛ Ɛsɔ. 29 Nayaa+ 2 yaa 3 ɩyɔɔdɩ, nɛ lalaa ñɩnɩ nɛ panɩɩ pʋ-tɔbʋʋ. 30 Ɛlɛ ye ɛyʋ lɛlʋ ɛmʋ natʋ natʋyʋ alɩwaatʋ ndʋ ɛcaɣ peeɖe yɔ, pɩwɛɛ se kajalaɣ tɔm yɔɔdɩyʋ esu. 31 Mbʋ pʋyɔɔ yɔ mɩ-tɩŋa ɩpɩzɩɣ nɛ ɩyɔɔdɩ natʋ tɔm kʋɖʋm kʋɖʋm, se pɩsa nɛ ɛyaa tɩŋa kpɛlɩkɩ nɛ pɩkpazɩ pa-tɩŋa ɖoŋ.+ 32 Nɛ pɩwɛɛ se nayaa ɩlabɩnɩ nayaa fezuu kʋjɔŋ tʋmɩyɛ camɩyɛ. 33 Mbʋ pʋyɔɔ yɔ, Ɛsɔ tɩkɛ Ɛsɔ weyi esidiɣ wondu yem yem yɔ, ɛlɛ ɛkɛ laŋhɛzɩyɛ tɛ Ɛsɔ.+

Ɛzɩ pɩwɛʋ ɛyaa kiɖeɖema agbaa tɩŋa taa yɔ, 34 halaa isu tamɩyɛ agbaa taa, mbʋ pʋyɔɔ yɔ pɩtɩha-wɛ nʋmɔʋ se pɔyɔɔdɩ.+ Ɛlɛ poluzi pa-tɩ,+ ɛzɩ Paɣtʋ ɖɔɖɔ yɔɔdʋʋ yɔ. 35 Ye pañɩnɩɣ se patɩlɩ tɔm natʋyʋ yɔ, pɔpɔzɩ pa-walaa ɖɩɣa, mbʋ pʋyɔɔ yɔ pɩkɛnɩ halʋ fɛyɛ se ɛyɔɔdɩ ɛgbɛyɛ taa.

36 Mɩ-cɔlɔ Ɛsɔ tɔm lɩnaa yaa we, yaa mi-ɖeke tɩtalaa?

37 Ye nɔɔyʋ ɛmaɣzɩɣ se ɛkɛ nayʋ yaa ɛwɛnɩ fezuu kʋjɔʋ yɔ, pɩwɛɛ se ɛtɩlɩ se tɔm ndʋ mɛwɛɛ nɛ mamaɣ-mɩ yɔ, tɩkɛ Kɩbaɣlʋ paɣtʋ. 38 Ɛlɛ ye nɔɔyʋ ekizi-tʋ yɔ, pakaɣ-ɩ kizuu.* 39 Pʋyɔɔ lɛ, mon-koobiya, ɩwɛɛ pana ñaɣʋ yɔɔ se ɩyɔɔdɩ natʋ tɔm,+ ɛlɛ ɩtaaɖaŋ se pataayɔɔdɩ kʋnʋmɩŋ lɛɛŋ.+ 40 Ɛlɛ pɩtɩŋa pɩɖɔ camɩyɛ nɛ pʋtʋʋzɩ cɔlɩɩɩ.+

15 Koobiya, lɛɛlɛɛyɔ lɛ, mɔntɔzʋʋ-mɩ tɔm kɩbandʋ ndʋ monsusi-mɩ yɔ tɩ-yɔɔ,+ ndʋ itisaa ɖɔɖɔ nɛ ɩɖɔkɩ-tʋ kpam yɔ. 2 Pɩtɩŋnɩ tɩ-yɔɔ lɛ, iɖiɣni ɖɔɖɔ hiɣu ñʋʋ yabʋ, ye ɩɖɔkɩ tɔm kɩbandʋ ndʋ monsusi-mɩ yɔ kpam yɔ, ye ɩtɩpɩsɩ mba pɛwɛnɩ tisuu falaa yem yɔ.

3 Mbʋ pʋyɔɔ yɔ tɔm ndʋ mancalɩ ɖʋzʋʋ mi-nesi tɛɛ yɔ, ndʋ ɖɔɖɔ pɛcɛlɩ-m; ndʋ lɛ se Krɩstʋ sɩbɩ ɖa-kɩwɛɛkɩm yɔɔ ɛzɩ pɔyɔɔdʋʋ Masɩ taa yɔ;+ 4 nɛ pepimi-i;+ ɛɛɛ, pefezi-i+ kɩyakʋ tozo ñɩŋgʋ wiye+ ɛzɩ pɔyɔɔdʋʋ Masɩ taa yɔ;+ 5 nɛ ɛwɩlɩ ɛ-tɩ Sefaasɩ,*+ nɛ pʋwayɩ lɛ Hiu nɛ Naalɛ.+ 6 Pʋwayɩ lɛ, ɛwɩlɩ ɛ-tɩ koobiya mba pɛcɛzɩ 500 yɔ alɩwaatʋ kʋɖʋmtʋ taa,+ nɛ pa-taa sakɩyɛ wɛ ɖɛ-hɛkʋ taa halɩ nɛ sɔnɔ, ɛlɛ pa-taa nabɛyɛ ɖo sɩm taa. 7 Pʋbʋ wayɩ lɛ ɛwɩlɩ ɛ-tɩ Yakubu,+ nɛ pʋwayɩ lɛ, apostoloowaa tɩŋa.+ 8 Ɛlɛ kɛdɛzaɣ ɖeɖe lɛ, ɛwɩlɩ-m ɛ-tɩ ɖɔɖɔ,+ ma weyi mɛwɛ ɛzɩ weyi palʋlɩ-ɩ kɩdɩbɩbɩʋ yɔ.

9 Mbʋ pʋyɔɔ yɔ mɛnkɛ apostoloowaa taa cikpelu, nɛ mantɩmʋna se paya-m se apostoloo, mbʋ pʋyɔɔ yɔ manazɩ Ɛsɔ ɛgbɛyɛ.+ 10 Ɛlɛ pɩtɩŋnɩ Ɛsɔ lootiye yɔɔ lɛ, mɛnkɛ mbʋ mɛnkɛwa yɔ. Nɛ lootiye nɖɩ ɛlabɩ-m yɔ, ɖɩtɩkɛ falaa; ɛlɛ malabɩ tʋmɩyɛ nɛ pɩkɩlɩ pa-tɩŋa. Paa mbʋ yɔ, pɩtɩkɛ ma, ɛlɛ Ɛsɔ lootiye nɖɩ ɖɩwɛ mɔn-cɔlɔ yɔ. 11 Ye mbʋ, paa pɩtɩɩkɛ ma yaa mba yɔ, mbʋ ɖisusuu tɔm, nɛ mbʋ itisaa.

12 Ye mbʋ, ye peɖiɣni susuu se pefezi Krɩstʋ nɛ sɩɖaa taa,+ ɛbɛ yɔɔ mɩ-taa nabɛyɛ yɔɔdʋʋ se sɩɖaa femtu fɛyɩ? 13 Ye pɩkɛ toovenim se sɩɖaa femtu fɛyɩ yɔ, ɖɩnɛ patifezi Krɩstʋ ɖɔɖɔ. 14 Ɛlɛ ye patifezi Krɩstʋ yɔ, toovenim taa lɛ, ɖɔ-tɔm susuu kɛ falaa pʋyʋ, nɛ mi-tisuu kɛ falaa pʋyʋ ɖɔɖɔ. 15 Pɩtasɩ lɛ, ɖɩkɛɣnɩ ɖɔɖɔ Ɛsɔ aseɣɖe tɩnaa cɛtɩyaa,+ mbʋ pʋyɔɔ yɔ ɖɩlɩzɩ aseɣɖe nɛ ɖɩcɛtɩnɩ Ɛsɔ taa nɛ ɖɩyɔɔdɩ se efezi Krɩstʋ,+ ŋgʋ ye toovenim taa paafeziɣ sɩɖaa yɔ, ɖɩnɛ etifezi ɛlɛ ɖɔɖɔ. 16 Mbʋ pʋyɔɔ yɔ ye paafeziɣ sɩɖaa yɔ, ɖɩnɛ patifezi Krɩstʋ ɖɔɖɔ. 17 Pɩtasɩ lɛ, ye patifezi Krɩstʋ yɔ, mi-tisuu ɛɛwazɩɣ pʋyʋ; ɩɖaɣnɩ wɛʋ mɩ-kɩwɛɛkɩm taa mbʋ.+ 18 Nɛ ɖɔɖɔ lɛ, mba poɖo sɩm taa pa nɛ Krɩstʋ pɔ-nɔɔ kʋɖʋmaɣ labʋ taa yɔ, peleba.+ 19 Ye wezuu kʋnɛ kɩ-taa ɖeke ɖɩwɛnɩ lidaʋ Krɩstʋ yɔɔ yɔ, ɖɔ-tɔm labɩ pʋtɔdɩyɛ nɛ pɩkɩlɩ ɛyaa tɩŋa.

20 Ɛlɛ lɛɛlɛɛyɔ lɛ, pefezi Krɩstʋ nɛ sɩɖaa taa, ɛkɛ mba poɖo sɩm taa yɔ pa-kajalaɣ piye.+ 21 Mbʋ pʋyɔɔ yɔ, ɛzɩ sɩm tɩŋnʋʋ ɛyʋ nɔɔyʋ yɔɔ nɛ pɩkɔɔ yɔ,+ mbʋ ɖɔɖɔ sɩɖaa femtu tɩŋɩɣnɩ ɛyʋ nɔɔyʋ yɔɔ nɛ pɩkɔɔ.+ 22 Mbʋ pʋyɔɔ yɔ, ɛzɩ pe-kpeekpe pasɩkʋʋ Aɖam taa yɔ,+ mbʋ ɖɔɖɔ pakaɣ pe-kpeekpe haʋ wezuu Krɩstʋ taa.+ 23 Ɛlɛ paa anɩ ɛ-alɩwaatʋ yɔɔ: Krɩstʋ, kajalaɣ piye;+ pʋwayɩ lɛ mba pɛkɛ Krɩstʋ pʋyʋ ɛ-wɛʋ alɩwaatʋ taa yɔ.+ 24 Pʋwayɩ lɛ pɩtɩŋa pɩtɛŋ, alɩwaatʋ ndʋ ɛɖʋzʋʋ Kewiyaɣ ɛ-Caa nɛ ɛ-Ɛsɔ nesi tɛɛ yɔ, ɛtɛŋ ɖɩzʋʋ kominawaa tɩŋa nɛ ñʋndɩnaa kpeekpe nɛ ɖoŋ kpeekpe lɛ.+ 25 Mbʋ pʋyɔɔ yɔ pɩwɛɛ se ɛtɔɔ kewiyitu nɛ pɩkɔɔ nɛ pɩtalɩ alɩwaatʋ ndʋ Ɛsɔ sɩ koyindinaa kpeekpe ɛ-nɩŋgbanzɩ tɛɛ yɔ.+ 26 Nɛ kɛdɛzaɣ koyindu weyi pakaɣ-ɩ ɖɩzʋʋ yɔ, ɛnʋ lɛ sɩm.+ 27 Mbʋ pʋyɔɔ yɔ Ɛsɔ «luzi wondu tɩŋa ɛ-nɩŋgbanzɩ tɛɛ.»+ Ɛlɛ ɛyɔɔdʋʋ se “poluzi wondu tɩŋa” yɔ,+ pɩwɩlɩɣ kpayɩ kpayɩ se Weyi eluzi wondu tɩŋa ɛ-tɛɛ yɔ, ɛfɛyɩ pɩ-taa.+ 28 Ɛlɛ alɩwaatʋ ndʋ poluzuu wondu tɩŋa ɛ-tɛɛ yɔ, Pɩyalʋ maɣmaɣ kaɣ ɛ-tɩ luzuu ɖɔɖɔ Weyi eluzi wondu tɩŋa ɛ-tɛɛ yɔ ɛ-tɛɛ,+ se Ɛsɔ ɛkɛ pɩtɩŋa paa anɩ.+

29 Ye pɩtaakɛ mbʋ yɔ, mba peɖiɣni-wɛ lɩm mɩyɩsʋʋ se pɩsa nɛ papɩsɩ sɩɖaa yɔ, ɛbɛ pakaɣ labʋ?+ Ye paafeziɣ sɩɖaa kaaʋ yɔ, ɛbɛ yɔɔ ɖɔɖɔ peɖiɣni-wɛ lɩm mɩyɩsʋʋ se papɩsɩ mbʋ? 30 Ɛbɛ yɔɔ ɖɔɖɔ ɖɩwɛ kaɖɛ taa paa ñɩɣyʋʋ ŋgʋ?*+ 31 Paa kɩyakʋ ŋgʋ, mɛwɛ sɩm nɔɔ taa. Koobiya, mɛntɛm man-taa nɛ tɔm ndʋ ɛzɩ mɛntɛm man-taa nɛ amɛya wena mɛmɛyɩɣ mɩ-yɔɔ yɔ, amɛya wena mɛwɛnɩ ɖa-Kɩbaɣlʋ Krɩstʋ Yesu taa yɔ. 32 Ye malʋbɩnɩ tɛtɛgbɩna Efɛɛzɩ ɛzɩ ɛyaa lalaa yɔ,*+ wazaɣ ŋga mɛwɛna? Ye paafeziɣ sɩɖaa yɔ, «ɖɩtɔɔ nɛ ɖɩñɔɔ, mbʋ pʋyɔɔ yɔ cee ɖɩkaɣ sɩbʋ.»+ 33 Itaayele nɛ pepeɣzi-mɩ. Taabalɩyɛ kɩdɛkɛdɩyɛ wɛɛkɩɣ wɛtʋ kɩbandʋ.*+ 34 Ife mɩ-lɩmaɣza taa ɛzɩ siɣsiɣ wɛtʋ pɔzʋʋ yɔ nɛ itaayele nɛ kɩwɛɛkɩm labʋ malɩnɩ-mɩ, mbʋ pʋyɔɔ yɔ nabɛyɛ fɛyɩnɩ sɩmtʋ natʋyʋ Ɛsɔ yɔɔ. Mɔyɔɔdʋʋ mbʋ se fɛyɛ ɛkpa-mɩ.

35 Ɛlɛ nɔɔyʋ kaɣ pɔzʋʋ se: «Ɛzɩma pakaɣ sɩɖaa fezuu? Ɛɛɛ, tomnaɣ ŋga pefeŋna?»+ 36 Kɩmɛlɛŋ ña! Mbʋ ŋɖuu yɔ, ye pɩtɩcalɩnɩ ɖazʋʋ yɔ, pɩɩñɔʋ.* 37 Nɛ pɩtɩkɛ tɩʋ* ŋgʋ kɩkaɣ paɣlʋʋ yɔ ŋɖuu, ɛlɛ piye yem, paa pɩtɩɩkɛ blee piye yaa ɖomaɣ piye lɛɛɖɛ yɔ; 38 ɛlɛ Ɛsɔ haɣ-ɖɩ tomnaɣ ɛzɩ ɛsɔɔlʋʋ yɔ, nɛ ɛhaɣ paa piye nɖɩ ɖɩ-maɣmaɣ ɖi-tomnaɣ. 39 Tomnasɩ tɩŋa tɩta, ɛlɛ ɛyaa tomnaɣ wɛɛ, ɖɩɣa kpɩna tomnaɣ wɛɛ, sumasɩ tomnaɣ ñɛwɛɛ, nɛ kpakpasɩ tomnaɣ ñɛwɛɛ ɖɔɖɔ. 40 Nɛ ɛsɔdaa tomnasɩ wɛɛ+ nɛ tataa tomnasɩ ñɛwɛɛ ɖɔɖɔ;+ ɛlɛ ɛsɔdaa tomnasɩ kajʋka wɛ ndɩ, nɛ tataa tomnasɩ kajʋka ñɛwɛɛ ndɩ ɖɔɖɔ. 41 Wɩsɩ ñalɩmɩyɛ wɛ ndɩ, nɛ fenaɣ ñalɩmɩyɛ ñɛwɛɛ ndɩ ɖɔɖɔ,+ nɛ tɩɩnzɩ ñalɩmɩyɛ ñɛwɛɛ ndɩ; toovenim taa lɛ, paa tɩɩŋa ŋga lɛ, ka-ñalɩmɩyɛ wɛ ndɩ nɛ tɩɩŋa lɛɛka.

42 Mbʋ ɖɔɖɔ sɩɖaa femtu wɛɛ. Poɖuu tomnaɣ ŋga kaɖazɩɣ yɔ; pefeziɣ tomnaɣ ŋga kaaɖazɩɣ yɔ.+ 43 Poɖuu-kɛ fɛyɛ taa; pefeziɣ-kɛ samtʋ taa.+ Poɖuu-kɛ ɛjandʋ taa; pefeziɣ-kɛ ɖoŋ taa.+ 44 Poɖuu tomnaɣ maɣmaɣ; pefeziɣ fezuu taa tomnaɣ. Ye tomnaɣ maɣmaɣ ɛwɛɛ yɔ, fezuu taa ñɩŋga wɛɛ ɖɔɖɔ. 45 Pʋyɔɔ pamawa se: «Kajalaɣ abalʋ Aɖam pɩsɩ ɛyʋ* weyi ɛwɛ wezuu yɔ.»+ Kɛdɛzaɣ Aɖam ñapɩsɩ fezuu ŋgʋ kɩhaɣ wezuu yɔ.+ 46 Paa mbʋ yɔ, pɩtɩkɛ fezuu taa ɛyʋ kɛnɩ kajalaɣ tʋ. Tomnaɣ taa ɛyʋ kɛnɩ kajalaɣ tʋ, nɛ pʋwayɩ lɛ fezuu taa ɛyʋ. 47 Kajalaɣ abalʋ kɛ tataa tʋ, nɛ mʋzʋʋ palabɩnɩ-ɩ;+ naalɛ tʋ kɛ ɛsɔdaa tʋ.+ 48 Mba palabɩ-wɛ nɛ mʋzʋʋ yɔ, pɛwɛ ɖɔɖɔ ɛzɩ weyi palabɩ-ɩ nɛ mʋzʋʋ yɔ; nɛ mba pɛkɛ ɛsɔdaa mba yɔ, pɛwɛ ɖɔɖɔ ɛzɩ weyi ɛkɛ ɛsɔdaa tʋ yɔ.+ 49 Nɛ ɛzɩ ɖɩkɛʋ weyi palabɩ-ɩ nɛ mʋzʋʋ yɔ ɛ-lɛzʋʋ yɔ,+ mbʋ ɖɔɖɔ ɖɩkaɣ kɛʋ ɛsɔdaa tʋ lɛzʋʋ.+

50 Ɛlɛ koobiya, meheyiɣ-mɩ se tomnaɣ nɛ calɩm paapɩzɩɣ nɛ pehiɣ Ɛsɔ Kewiyaɣ, nɛ mbʋ pɩɖazɩɣ yɔ, pɩɩpɩzɩɣ nɛ pihiɣ mbʋ pɩɩɖazɩɣ yɔ. 51 Ɩna! Meheyiɣ-mɩ mɛsaɣ tɛɛ tɔm kiɖeɖetu natʋyʋ: Ða-tɩŋa ɖɩɩkaɣ ɖou sɩm taa, ɛlɛ ɖa-tɩŋa pɩkaɣ-ɖʋ lɛɣzʋʋ+ 52 kpaagbaa, ɛzɩ ɛsɩyɛ piɖuu yɔ, alɩwaatʋ ndʋ payaɣ kɛdɛzaɣ ɛgandɩyɛ yɔ. Mbʋ pʋyɔɔ yɔ pakaɣ yaʋ ɛgandɩyɛ,+ nɛ sɩɖaa kaɣ fem nɛ tomnaɣ ŋga kaaɖazɩɣ yɔ; nɛ pɩkaɣ-ɖʋ lɛɣzʋʋ. 53 Mbʋ pʋyɔɔ yɔ pɩwɛɛ se mbʋ pɩɖazɩɣ yɔ, pɩpɩsɩ mbʋ pɩɩɖazɩɣ yɔ;+ nɛ mbʋ pɩsɩkɩ yɔ, pɩpɩsɩ mbʋ pɩɩsɩkɩ yɔ.+ 54 Ɛlɛ alɩwaatʋ ndʋ mbʋ pɩɖazɩɣ yɔ pɩpɩsɩɣ mbʋ pɩɩɖazɩɣ yɔ, nɛ mbʋ pɩsɩkɩ yɔ pɩpɩsɩ mbʋ pɩɩsɩkɩ yɔ lɛ, ɖɩnɛ ɛlɛ tɔm ndʋ pamawa yɔ, tɩkaɣ labʋ: «Pelibi sɩm kpaagbaa libu.»+ 55 «Sɩm, le ña-wabɩtʋ wɛɛ? Sɩm, le ñɛ-ɛjɔʋ wɛɛ?»+ 56 Ɛjɔʋ ŋgʋ kɩlʋlʋʋ sɩm yɔ ŋgʋ lɛ kɩwɛɛkɩm,+ nɛ kɩwɛɛkɩm ɖoŋ lɛ Paɣtʋ.*+ 57 Ɛlɛ ɖɩsɛɣ Ɛsɔ se ɛlabaɣ lɛ, mbʋ pʋyɔɔ yɔ ɛtɩŋɩɣnɩ ɖa-Kɩbaɣlʋ Yesu Krɩstʋ+ yɔɔ nɛ ɛhaɣ-ɖʋ wabɩtʋ.

58 Pʋyɔɔ lɛ, mon-koobiya kʋsɔɔlaa, ɩɖɔkɩ mɩ-tɩ kpam,+ pɩtaacɛŋɛsɩ-mɩ; paa ɛzɩmtaa lɛ, ɩwɛɛnɩ tʋma sakɩyɛ+ Kɩbaɣlʋ tʋmɩyɛ taa, mbʋ pʋyɔɔ yɔ ɩnawa se pana wena ɩñakɩ yɔ, atɩkɛ falaa+ Kɩbaɣlʋ taa.

16 Piyele nɛ mbʋ pɩwɛɛ se pɔcɔɔ ɛyaa kiɖeɖema yɔ pɩ-hɔɔlʋʋ taa lɛ,+ ɩpɩzɩɣ nɛ ɩɖɔ paɣtʋ ndʋ manɖʋ Galaatii agbaa yɔ tɩ-yɔɔ. 2 Paa kpɩtaʋ ŋgʋ kɩ-kajalaɣ evemiye wiye lɛ, pɩwɛɛ se mɩ-taa paa weyi ɛsɩɩ nabʋyʋ kɩjaʋ pɩlɩɩnɩ mbʋ ɛwɛna yɔ pɩ-cɔlɔ, se pɩsa nɛ pataacɔɔ nabʋyʋ alɩwaatʋ ndʋ mantalɩɣ yɔ. 3 Ɛlɛ mantalɩɣ lɛ, mankaɣ tiyuu abalaa mba ɩyɔɔdʋʋ pɔ-tɔm mɩ-takayɩsɩ taa se ɩtaɣ-wɛ liu yɔ+ se pakpaɣ kʋjɔʋ ŋgʋ ɩlabɩnɩ mɩ-laŋa faaa yɔ nɛ powoni Yeruzalɛm. 4 Ɛlɛ, ye mamaɣzɩɣ se pɩpɔzʋʋ se ma ɖɔɖɔ mowolo yɔ, ma nɛ wɛ ɖɩkaɣ wobu peeɖe.

5 Ɛlɛ mankaɣ kɔm mɩ-cɔlɔ alɩwaatʋ ndʋ mɛntɛzɩɣ Masedonii yɔ, mbʋ pʋyɔɔ yɔ mankaɣ tɛzʋʋ Masedonii;+ 6 nɛ pɩtɩla yɔ mankaɣ caɣʋ mɩ-cɔlɔ yaa halɩ mankaɣ wɛʋ mɩ-cɔlɔ nikaɣ alɩwaatʋ taa, se pɩsa nɛ ɩsɩ-m pazɩ ɖenɖe mankaɣ wobu yɔ. 7 Mbʋ pʋyɔɔ yɔ, lɛɛlɛɛyɔ mantɩsɔɔlɩ se mana-mɩ ɖɛʋ taa yem; mbʋ pʋyɔɔ yɔ, mantaɣ liu se mankaɣ caɣʋ mɩ-cɔlɔ alɩwaatʋ natʋyʋ pazɩ,+ ye Yehowa* ɛha nʋmɔʋ yɔ. 8 Ɛlɛ mancakɩ Efɛɛzɩ+ nɛ pɩkɔɔ nɛ pɩtalɩ Pantekooti Kazandʋ, 9 mbʋ pʋyɔɔ yɔ, patʋlɩ-m nɔnɔɔ sɔsɔɔ nakɛyɛ se pɩsa nɛ mala Ɛsɔ sɛtʋ tʋmɩyɛ,+ ɛlɛ koyindinaa sakɩyɛ wɛɛ.

10 Nɛ ye Timootee+ ɛtalaa yɔ, iyele nɛ sɔɔndʋ ɛtaakpa-ɩ nɛ nabʋyʋ, ɛwɛɣ mɩ-hɛkʋ taa lɛ; mbʋ pʋyɔɔ yɔ ɛwɛɛ nɛ ɛlakɩ Yehowa* tʋmɩyɛ+ ɛzɩ ma yɔ. 11 Pʋyɔɔ lɛ, nɔɔyʋ etaanimi-i. Ɩsɩɩ-ɩ laŋhɛzɩyɛ taa, se pɩsa nɛ ɛkɔɔ mɔn-cɔlɔ, mbʋ pʋyɔɔ yɔ manɖaŋɩ-ɩ, pɩkpɛndɩnɩ koobiya.

12 Piyele nɛ ɖo-koobu Apoloosi+ yɔ, mentendi-i siŋŋ se ɛkɔɔ mɩ-cɔlɔ, ɛ nɛ koobiya. Ɛtaasɔɔlɩ se ɛkɔɔ lɛɛlɛɛyɔ, ɛlɛ ɛkaɣ kɔm alɩwaatʋ ndʋ ehikiɣ waɖɛ yɔ.

13 Ɩcaɣnɩ mɩ-ɛsa,+ ɩɖɔkɩ kpam tisuu taa,+ ɩwɛɛ abalɩtʋ,+ ɩkpa ɖoŋ.+ 14 Mbʋ payɩ ɩlakɩ yɔ, ɩlabɩ-pʋ nɛ sɔɔlɩm.+

15 Lɛɛlɛɛyɔ lɛ koobiya, menseɣtiɣ-mɩ: Ɩsɩm mbʋ se Stefanaasɩ ɖɩɣa taa mba kɛnɩ Akayii taa kajalaɣ pee nɛ paha pa-tɩ nɛ paɖʋ lɩm ɛyaa kiɖeɖema. 16 Mɩ ɖɔɖɔ iwolo pɩ-yɔɔ nɛ iluzi mɩ-tɩ ɛyaa mba pɛwɛ pa-tɩyɛ nɛ mba payɩ pɛwɛ nɔɔ kʋɖʋmaɣ nɛ palakɩ tʋmɩyɛ siŋŋ yɔ pɛ-tɛɛ.+ 17 Ɛlɛ man-taa wɛ leleŋ nɛ ɛzɩma Stefanaasɩ+ nɛ Fɔrtunaatuusi nɛ Akayikuusi pɛwɛ mɔn-cɔlɔ yɔ, mbʋ pʋyɔɔ yɔ paasɩnɩ-m alɩwaatʋ ndʋ ɩfɛyɩ mɔn-cɔlɔ yɔ. 18 Mbʋ pʋyɔɔ yɔ, pɛhɛzɩ ma-laŋɩyɛ nɛ mɩ-ñɩnɖɛ.* Pʋyɔɔ lɛ, ɩwɩlɩ ɛyaa mba pɛwɛ ɛzɩ mba yɔ mɩ-ɛsɩmɩyɛ.

19 Aazii agbaa tiyiɣni-mɩ a-sɛtʋ. Akiila nɛ Prisɩka nɛ ɛgbɛyɛ nɖɩ ɖɩwɛ pa-ɖɩɣa taa yɔ,*+ pɛsɛɣ-mɩ nɛ taa leleŋ Kɩbaɣlʋ taa. 20 Koobiya tɩŋa sɛɣ-mɩ. Ɩsɛɛ ɖama nɛ sɔɔlɩm.*

21 Ma Pɔɔlɩ mɛn-sɛtʋ yɔ, ma-maɣmaɣ me-nesi tɛɛ sɛtʋ.

22 Ye nɔɔyʋ ɛtɩsɔɔlɩ Kɩbaɣlʋ yɔ, pɔlɔ ɛ-yɔɔ nɔɔ kɩdɛkɛdaɣ. Hayɩ ɖa-Kɩbaɣlʋ, kɔɔ! 23 Tɛtɛ nɛ Kɩbaɣlʋ Yesu lootiye wɛɛ mɩ-cɔlɔ. 24 Tɛtɛ nɛ mɔn-sɔɔlɩm wɛɛ mi-kpeekpe mɩ-cɔlɔ mɩ nɛ Krɩstʋ Yesu mɩ-nɔɔ kʋɖʋmaɣ labʋ taa.