YUUDI TAKAYAƔ

1 Ma Yuudi, Yesu Krɩstʋ yom nɛ Yakubu+ neu, mamaɣnɩ takayaɣ kanɛ ɛyaa mba paya-wɛ yɔ,+ mba Caa Ɛsɔ sɔɔlɩ-wɛ nɛ ɛñɔɔzɩ-wɛ nɛ ɛsɩɩ Yesu Krɩstʋ yɔ:+

2 Tɛtɛ nɛ Ɛsɔ na mɩ-pʋtɔdɩyɛ nɛ pɩkɩlɩ, ɛha-mɩ laŋhɛzɩyɛ nɛ ɛsɔɔlɩ-mɩ nɛ pɩkɩlɩ.

3 Man-kʋsɔɔlaa, maawɛɛ nɛ mañakɩ pana siŋŋ se mama-mɩ ɖa-tɩŋa ɖa-ñʋʋ yabʋ tɔm lɛ,+ mana se pɩcɛyaa se mama-mɩ takayaɣ nɛ menseɣti-mɩ se ɩlʋ siŋŋ tisuu mbʋ paha ɛyaa kiɖeɖema tam kʋɖʋm nɛ pɩkpaɣ pɩɖɛɛ yɔ pɩ-yɔɔ.+ 4 Mamaɣ-mɩ, mbʋ pʋyɔɔ yɔ ɛyaa nabɛyɛ sʋ mɩ-hɛkʋ taa ɖaaa nɛ Masɩ kaayɔɔdɩ pɔ-tɔm hʋʋ pʋnɛ pɩ-tɔm ɖooo lɔŋ; pɛkɛ ɛyaa mba paañaŋ Ɛsɔ nɛ pawaɣnɩ Ɛsɔ lootiye nɛ palakɩ lakasɩ nzɩ sɩwɛ fɛyɛ yɔ,*+ nɛ pekiziɣ weyi e-ɖeke koŋ ɛkɛ ɖa-tʋ* nɛ ɖa-Kɩbaɣlʋ yɔ, Yesu Krɩstʋ.+

5 Paa ɩsɩm tɔm tʋnɛ tɩ-tɩŋa camɩyɛ yɔ, mɔnsɔɔlaa se mɔntɔzɩ-mɩ se Yehowa* kaaholi samaɣ nakɛyɛ Ejipiti ɛjaɖɛ taa,+ nɛ pʋwayɩ lɛ ɛɖɩzɩ ka-taa mba pataawɩlɩ se pɛwɛnɩ tisuu yɔ.+ 6 Nɛ Ɛsɔ tiyiyaa mba peyebi lone nɖɩ paawɛnɩ kiɖe tɛɛ, nɛ peyele pa-maɣmaɣ pa-ɖɩjaɣyɛ yɔ,+ ɛhɔkɩ-wɛ tamtam kpasɩ nɛ ɛɖʋ-wɛ cɩkpɛndʋʋ sɔsɔʋ taa nɛ ɛsɩɩ-wɛ se pahʋʋnɩ-wɛ tɔm kɩyakʋ sɔsɔʋ wiye.+ 7 Mbʋ ɖɔɖɔ Sodom nɛ Gomɔɔrɩ nɛ tɛtʋ ndʋ tɩɩcɔ-wɛ nɛ tɩta yɔ tɩ-taa mba cɛlɩ pa-tɩ kʋzʋʋ kɩdɛkɛdʋʋ* kadadayaɣ nɛ pɛ-ɛsɩyɛ sɛɛnɩ tomnaɣ kɔɖɛyɩ ŋgʋ kɩtɩmʋna yɔ;+ pɔhɔm pa-nɩŋgbaŋʋʋ tamtam miŋ taa nɛ paha-ɖʋ pa-kɩɖaʋ se papaɣnɩ-ɖʋ.+

8 Paa mbʋ yɔ, ɛyaa mba ɖɔɖɔ peyeki pa-tɩ nɛ ɖoza, pepisiɣ tomnaɣ, peniŋ ñʋndɩnaa, nɛ pɔyɔɔdʋʋ tɔm kɩdɛkɛdɩtʋ mba pamʋ samtʋ yɔ pɔ-yɔɔ.+ 9 Ɛlɛ alɩwaatʋ ndʋ tɔm kaakɔm Ɛsɔ tiyiyu sɔsɔ+ Mikayɛɛlɩ+ nɛ Eleeu pɛ-hɛkʋ taa nɛ pɔhɔŋ tɔm Moyizi tomnaɣ yɔɔ yɔ,+ ɛtɩkatɩ nɛ eheyi Eleeu tɔm kɩdɛkɛdɩtʋ se ɛhʋʋnɩ-ɩ tɔm;+ ɛlɛ ɛyɔɔdaa se: «Yehowa* ɛhɔ ña-nɩŋgbaŋʋʋ.»+ 10 Ɛlɛ ɛyaa mba, mbʋ payɩ pɩ-yɔɔ pɔyɔɔdʋʋ tɔm kɩdɛkɛdɩtʋ yɔ, toovenim taa lɛ, paanɩɣ pɩ-taa.+ Nɛ mbʋ payɩ pa-maɣmaɣ pɔ-lɔŋ ɖiyiɣ-wɛ nɛ panɩɣ pɩ-taa ɛzɩ kpɩna wena aamaɣzɩɣ yɔ,+ powoki pɩ-yɔɔ nɛ palakɩ-pʋ nɛ pɛtɛzɩɣ pa-tɩ wɛɛkʋʋ.

11 Pɩtɔɔ-wɛ, mbʋ pʋyɔɔ yɔ patɩŋ Kayɩnɩ+ nʋmɔʋ nɛ pekpidisi nɛ pakpaɣ Baalam nʋmɔʋ kɩdɛkɛdʋʋ+ se pehiɣ kɩhɛyʋʋ, nɛ pasɩ mbʋ pʋyɔɔ yɔ pɔyɔɔdʋʋ ñʋʋ taa ɖoŋ tɔm+ ɛzɩ Kora yɔ!+ 12 Pɛkɛ kaaŋ weyi ɩmɛlɩ lɩm tɛɛ mɩ-sɔɔlɩm kazandʋ+ wiye alɩwaatʋ ndʋ pɛkpɛndɩɣ mɩ-yɔɔ nɛ mɩ nɛ wɛ ɩtɔkɩ kazandʋ yɔ, pɛkɛ ninɖiɣyaa mba pacalɩɣ pa-tɩ nɛ sɔɔndʋ ɛɛkpaɣ-wɛ yɔ;+ pɛkɛ mɩndʋ ndʋ tɩ-taa lɩm fɛyɩ nɛ helim cɔzʋʋ-tʋ yɔ;+ pɛkɛ tɩŋ weyi ɩɩlʋlʋʋ pee alɩwaatʋ yɔɔ yɔ, weyi ɩsɩbɩ tam nabʋlɛ* nɛ pɛkpɛzɩ-ɩ yɔ; 13 pɛkɛ teŋgu lɩm hola sɔsɔna wena akpazɩɣ huluu ŋgʋ kɩkɛ pɛ-fɛyɛ yɔ nɛ alɔʋ yɔ;+ pɛkɛ tɩɩnzɩ nzɩ sɩfɛyɩnɩ nʋmɔʋ ŋgʋ kɩ-taa pɩwɛɛ se sɩɖɔ yɔ, nzɩ pɔñɔɔzɩ-sɩ cɩkpɛndʋʋ sɔsɔʋ nɛ pasɩɩ tam yɔ.+

14 Ɛɛɛ, Enɔɔkɩ+ weyi ɛkɛ ɛyʋ 7 tʋ Aɖam lʋlʋʋ taa yɔ, ɛɛyɔɔdɩ ɖɔɖɔ pɔ-yɔɔ natʋ tɔm se: «Ɩna! Yehowa* kɔma, ɛ nɛ e-tiyiyaa kiɖeɖema kudokiŋ kudokiŋ*+ 15 se ɛhʋʋnɩ ɛyaa tɩŋa tɔm,+ nɛ ɛkʋ mba paañaŋ Ɛsɔ yɔ pɔ-tɔm kaañamtʋ lakasɩ nzɩ palabɩ pa-kaañamtʋ taa yɔ sɩ-tɩŋa sɩ-yɔɔ, nɛ tɔm kɩdɛkɛdɩtʋ sɔsɔtʋ tɩŋa, ndʋ kɩwɛɛkɩm laɖaa mba paañaŋ Ɛsɔ yɔ pɔyɔɔdɩ ɛ-yɔɔ yɔ tɩ-yɔɔ.»+

16 Ɛyaa mba, pemidiɣ,+ pewiɣ pa-tɩ mbʋ pɩtalɩɣ-wɛ pe-wezuu caɣʋ taa yɔ pɩ-yɔɔ, palakɩ mbʋ pa-maɣmaɣ pe-liu wɛɛ yɔ,+ nɛ pɔ-nɔsɩ taa nɛ agʋnda tɔm sɔsɔtʋ, nɛ pa-maɣmaɣ pɛ-kɛzɛɣa yɔɔ lɛ pepeɣziɣ lalaa nɛ nɔɔ leleŋ tɔm.*+

17 Mɩ yɔ, man-kʋsɔɔlaa, ɩtɔzɩ tɔm ndʋ ɖa-Kɩbaɣlʋ Yesu Krɩstʋ apostoloowaa kaayɔɔdaa nɛ pɩɖɛɛ yɔ tɩ-yɔɔ; 18 peheyaɣ-mɩ se: «Kɛdɛzaɣ alɩwaatʋ taa, woŋiyaa kaɣ lɩʋ, nɛ palakɩ lakasɩ kɩdɛkɛdɩsɩ ɛzɩ pa-maɣmaɣ pe-liu wɛʋ yɔ.»+ 19 Pɛkɛ ɛyaa mba pɔkɔŋnɩ tayʋʋ yɔ,+ pɛwɛ ɛzɩ kpɩna yɔ* nɛ pɛfɛyɩnɩ fezuu taa wɛtʋ.* 20 Ɛlɛ mɩ yɔ, man-kʋsɔɔlaa, ɩkpa ɖoŋ mi-tisuu mbʋ pɩkɛ kiɖeɖem siŋŋ yɔ pɩ-taa, nɛ ɩtɩmɩ fezuu kiɖeɖeu ɖoŋ taa,+ 21 se pɩsa nɛ ɩɖɔkɩ mɩ-tɩ kpam Ɛsɔ sɔɔlɩm taa,+ alɩwaatʋ ndʋ iɖiɣni ɖaŋʋʋ ɖa-Kɩbaɣlʋ Yesu Krɩstʋ pʋtɔdɩyɛ naʋ se ihiɣ wezuu maatɛŋ yɔ.+ 22 Pɩtasɩ lɛ, itaayele mba papɩtɩɣ yɔ+ pa-pʋtɔdɩyɛ naʋ;+ 23 ɩlɩzɩ-wɛ miŋ taa nɛ ɩya pa-ñʋʋ.+ Ɛlɛ itaayele lalaa pʋtɔdɩyɛ naʋ, ɩla mbʋ nɛ sɔɔndʋ; nɛ ɩɩlakɩ mbʋ lɛ, ɩpaɖɩ pɩkpɛndɩnɩ po-toko ŋgʋ tomnaɣ pisi-kʋ yɔ.+

24 Nɛ Ɛsɔ weyi ɛpɩzɩɣ nɛ ɛkandɩyɩ mɩ-yɔɔ se pitaatuuli-mɩ, nɛ ɛla nɛ ɩsɩŋ nɛ ɩtaawɛɛnɩ kɩwɛɛkɩtʋ natʋyʋ+ ɛ-samtʋ ɛsɩndaa, taa leleŋ sɔsɔŋ taa yɔ, 25 ɛnʋ weyi ɛkɛ Ɛsɔ kʋɖʋm koŋ yɔ, ɛnʋ weyi ɛtɩŋnɩ ɖa-Kɩbaɣlʋ Yesu Krɩstʋ yɔɔ nɛ ɛya ɖa-ñʋʋ yɔ, ɛnʋ tɩnɩ samtʋ, sɔsɔtʋ, ɖoŋ nɛ kewiyitu kpaɣnɩ ɖooo tamtam nɛ lɛɛlɛɛyɔ nɛ pɩkpaɣ piwolo tamtam. Amɛn.