Yozuwee nɛ Gabawɔɔ mba

Kanaŋ ajɛɛ kpeekpe nɩ Yeriikoo tɛtʋ yɔkʋʋ tɔm. Pʋyɔɔ ajɛɛ ana alabɩ nɔɔ se ayooni Izrayɛɛlɩ mba. Ɛlɛ Gabawɔɔ mba lɩmaɣza kaawɛ ndɩ. Posu tokonaa mba pahʋwa yɔ nɛ powolo pana Yozuwee nɛ peheyi-i se: “Ðɩlɩnɩ ɖooo poliŋ ɛjaɖɛ naɖɩyɛ taa. Ðɩnɩ Yehowa tɔm nɛ mbʋ payɩ ɛlabɩ-mɩ Ejipiti nɛ Mowaabʋ yɔ. Iɖuu se ɩɩkaɣ-ɖʋ labɩnʋʋ you, nɛ ɖa lɛ ɖɩkaɣ kɛʋ mi-yomaa.”

Yozuwee tisi pɔ-tɔm ndʋ tɩ-yɔɔ nɛ eheyi-wɛ se mba ɩɩkaɣ-wɛ labʋ you. Ɛlɛ kɩyakɩŋ 3 wayɩ lɛ, Yozuwee kɔɔ ɛna se Gabawɔɔ mba tɩlɩɩnɩ poliŋ ɛjaɖɛ naɖɩyɛ taa. Kanaŋ egeetiye taa peeɖe pɛwɛɛ. Nɛ ɛpɔzɩ-wɛ se: “Ɛbɛ yɔɔ ɩcɛtɩ-ɖʋ?” Pocosi-i se: “Sɔɔndʋ kpanɩ-ɖʋ! Ðɩnawa se mɩ-Ɛsɔ Yehowa sɩɣnɩ-mɩ yoŋ weyi ɩlakɩ yɔ ɩ-taa. Ðitendi-mɩ ɩtaakʋ-ɖʋ.” Yozuwee la ɛzɩ eeɖuu yɔ nɛ ɛtɩkʋ-wɛ.

Pitileɖi lɛ, Kanaŋ awiya 5 nɛ a-sɔɔjanaa wolo se poyooni Gabawɔɔ mba. Peeɖe Yozuwee nɛ ɛ-sɔɔjanaa pɔɖɔm ɖoo pilim se powolo paya Gabawɔɔ mba ñʋʋ. Tɛʋ fem tanaŋ tɛɛ lɛ, papaɣzɩ you. Kanaŋ mba paɣzɩ seu nɛ weyi ɛna nʋmɔʋ ŋgʋ lɛ ɛtɩŋ. Ɛlɛ ɖenɖe payɩ pɛɖɛɣaɣ yɔ, Yehowa yele nɛ ɖɔmbɛɛ lɩɩnɩ ɛsɔdaa nɛ atɔlʋʋ pɔ-yɔɔ. Peeɖe Yozuwee tendi Yehowa se eyele nɛ wɩsɩ sɩŋ si-ɖeɖe. Wiɖiyi wɩsɩ tɩsɩŋ si-ɖeɖe; ye mbʋ ɛbɛ yɔɔ Yozuwee pɔzʋʋ Yehowa lɛɛlɛɛyɔ se eyele nɛ pɩla mbʋ? Pɩwɩlɩɣ se ɛtaɣaɣ Yehowa liu nɛ ɛ-laŋɩyɛ pilim. Pɩla mbʋ nɛ Izrayɛɛlɩ mba pɩzɩ nɛ pakʋ Kanaŋ awiya ana nɛ a-sɔɔjanaa tɩŋa.