Yesu yɔɔdɩnɩ halʋ nɔɔyʋ lɔkɔ nɔɔ

Yesu nɛ ɛ-tɔmkpɛlɩkɩyaa pɛtɛm tɔɔʋ Paska kazandʋ lɛ, patɩŋnɩ Samaarii tɛtʋ taa se papɩsɩ Galilee. Patalɩ Siicaarɩ lɛ, Yesu sɩŋ lɔkɔ ŋgʋ payaɣ se Yakɔɔb lɔkɔ yɔ kɩ-cɔlɔ. Ɛcaɣ lɔkɔ cɔlɔ nɛ ɛhɛzɩɣ nɛ ɛ-tɔmkpɛlɩkɩyaa ñowolo tɔɔnaɣ yabʋ tɛtʋ taa.

Pɩkɛdaa lɛ, halʋ nɔɔyʋ kɔɔ lɔkɔ yɔɔ se eluu lɩm. Yesu heyi-i se: «Ha-m lɩm nɛ mɔñɔɔ.» Halʋ pɩsɩnɩ-ɩ se: “Ɛbɛ yɔɔ ŋyɔɔdʋʋnɩ-m? Mɛnkɛ halʋ Samaarii tʋ. Yuuda mba ɩɩyɔɔdʋʋnɩ Samaarii mba.” Yesu cosi-i se: “Ye ŋŋsɩm weyi mɛnkɛnaa yɔ, ñaapɔzɩnɩ-m se maha-ŋ lɩm nɛ ŋñɔɔ, nɛ maaha-ŋ wezuu lɩm.” Halʋ pɔzɩ-ɩ se: “Suwe ŋcaɣ yɔɔdʋʋ? Ŋfɛyɩnɩ tɔka se ŋluni lɩm.” Yesu heyi-i se: “Ye nɔɔyʋ ɛñɔ lɩm mbʋ mahaɣ-ɩ yɔ, lɔkɔtʋ ɛɛtasɩɣ-ɩ ɖɛʋ kaaʋ.” Halʋ pɩsɩnɩ-ɩ se: «Ðajaa, ha-m lɩm mbʋ.»

Pʋwayɩ lɛ, Yesu heyi halʋ ɛnʋ se: “Wolo nɛ ŋyaa ña-walʋ nɛ ɛkɔɔ.” Halʋ cosi-i se: «Mɛnfɛyɩnɩ walʋ.» Nɛ Yesu heyi-i se: “Ŋyɔɔdɩ toovenim. Ŋŋwɛnɩ walaa 5, nɛ abalʋ weyi ña nɛ ɩ ɩwɛ lɛɛlɛɛyɔ yɔ, ɛtɩkɛ ña-walʋ.” Halʋ pɩsɩnɩ-ɩ se: “Manaɣ se ŋkɛ nayʋ. Samaarii mba yɔɔdʋʋ se papɩzɩɣ nɛ pɛsɛɛ Ɛsɔ pʋʋ kʋnɛ kɩ-yɔɔ, ɛlɛ mɩ Yuuda mba lɛ, ɩtɔŋ se Yeruzalɛm ɖeke pɩpɔzʋʋ se powolo nɛ pɛsɛɛ Ɛsɔ. Mɛwɛnɩ tisuu se Mesiya kɔŋ lɛ, ɛkaɣ-ɖʋ wɩlʋʋ ɛzɩma ɖɩsɛɛ Ɛsɔ yɔ.” Peeɖe Yesu heyi-i tɔm ndʋ etaatiiheyiti nɔɔyʋ yɔ; eheyi-i se: “Ma lɛ Mesiya.”

Halʋ se nɛ ewolo tɛtʋ taa nɛ eheyi Samaarii mba se: “Mamaɣzɩɣ se mana Mesiya. Ɛsɩm mɔ-yɔɔ tɔm payɩ. Ɩkɔɔ nɛ ɩna-ɩ.” Peeɖe patɩŋ halʋ nɛ powolo lɔkɔ cɔlɔ nɛ pewelisi Yesu tɔm.

Samaarii mba yaa Yesu se ɛkɔɔ nɛ ɛcaɣ pɛ-tɛtʋ taa. Yesu kpaɣ kɩyakɩŋ 2 nɛ ɛwɩlɩ tɔm peeɖe, nɛ ɛyaa sakɩyɛ tisi ɛ-yɔɔ. Tɛtʋ taa ɛyaa heyi Samaarii halʋ se: “Ðiwelisini abalʋ ɛnɛ nɛ pɩtɛ lɛ, ɖɩna se toovenim ɛnʋ kɛnɩ ɛjaɖɛ ñʋʋ yaɖʋ.”