Yesu wa kʋdɔndʋ nɔɔyʋ Sabaatɩ wiye

Farɩsɩ mba paɖaɣ Yesu nɛ pañɩnaɣ nʋmɔʋ nakʋyʋ se patɩŋnɩ kɩ-yɔɔ nɛ pakpa-ɩ. Pɔyɔɔdaa se pɩtɩmʋna se Yesu ɛwaa kʋdɔndɩnaa Sabaatɩ wiye. Sabaatɩ kɩyakʋ nakʋyʋ wiye, Yesu na yʋlʋm nɔɔyʋ habɩyɛ yɔɔ, ɛɛwɛɛ nɛ ɛsʋlʋmʋʋ. Eheyi ɛ-tɔmkpɛlɩkɩyaa se: “Ɩna ɛzɩma Ɛsɔ ɖoŋ kaɣ waʋ abalʋ ɛnɛ yɔ.” Yesu tɔ ndaatʋ tataa nɛ enuutini tɛtʋ nɛ ɛtaa yʋlʋm ɛnʋ ɛ-ɛsa. Nɛ Yesu heyi-i se: “Wolo Siloowaam lɩŋgamʋʋ taa nɛ ŋkɔ ñɛ-ɛsa.” Abalʋ ɛnʋ ɛɖɛɛ nɛ ɛla mbʋ nɛ ɛpaɣzɩ naʋ. Ðooo palʋlʋʋ-ɩ yɔ, kajalaɣ ɖeɖe yɔ ɛpaɣzʋʋ naʋ yɔ.

Pɩɖɩɣzɩ ɛyaa. Peeɖe pɔpɔzaa se: “Pɩtɩkɛ abalʋ ɛnʋ ɛcakaɣnɩ peeɖeyɔ nɛ ɛsʋlʋmʋʋ yaa we? Yaa nɔɔyʋ lɩnɩ-ɩ?” Abalʋ pɩsɩnɩ-wɛ se: “Ma lɛ ɖeyi ɖeyi! Paalʋlɩ-m nɛ yʋlʋmtʋ.” Pɔpɔzɩ-ɩ se: “Pɩlabɩ ɛzɩma nɛ lɛɛlɛɛyɔ ŋnaɣ?” Eheyi-wɛ ɛzɩma pɩlaba yɔ lɛ, powoni-i Farɩsɩ mba cɔlɔ.

Abalʋ ɛnʋ eheyi Farɩsɩ mba se: “Yesu nuuti ahɔya nɛ ɛtaa mɛ-ɛsa yɔɔ nɛ eheyi-m se mowolo nɛ mɔnkɔ mɛ-ɛsa. Malabɩ mbʋ lɛ, manpaɣzɩ naʋ.” Peeɖe Farɩsɩ mba yɔɔdaa se: “Ye Yesu ɛwaɣ ɛyaa Sabaatɩ wiye yɔ, e-ɖoŋ ɛnɩ ɛtɩlɩɩnɩ Ɛsɔ cɔlɔ.” Ɛlɛ lalaa pɩsɩna se: “Ye e-ɖoŋ ɛtaalɩɩnɩ Ɛsɔ cɔlɔ yɔ, ɛtaapɩzɩɣ nɛ ɛwaɣ kʋdɔmɩŋ.”

Farɩsɩ mba yaa abalʋ ɛnʋ ɛ-lʋlɩyaa nɛ pɔpɔzɩ-wɛ se: “Pɩlabɩ ɛzɩma nɛ lɛɛlɛɛyɔ mɩ-pɩyalʋ naɣ?” Sɔɔndʋ kpa abalʋ ɛnʋ ɛ-lʋlɩyaa, mbʋ pʋyɔɔ yɔ Farɩsɩ mba kaaɖʋ paɣtʋ se ye nɔɔyʋ etisiɣ Yesu yɔɔ yɔ, paatasɩɣ-ɩ haʋ waɖɛ nɛ ɛsʋʋ Sinaagɔɔgɩ taa. Pʋyɔɔ pocosaa se: “Ðɩɩsɩŋ natʋyʋ. Ɩpɔzɩ ɛ-maɣmaɣ.” Farɩsɩ mba wɛɛ abalʋ ɛnʋ tɔm pɔzʋʋ yɔɔ pɩkɔɔ pɩsɩɩnɩ alɩwaatʋ ndʋ eheyi-wɛ se: “Mɛntɛm-mɩ heyuu pɩtɩŋa lɛ! Ndʋ ɖɔɖɔ ɩñɩnɩɣ se mantasɩ-mɩ heyuu?” Peeɖe Farɩsɩ mba taa wɩwa nɛ pɔɖɔɔnɩ-ɩ.

Yesu wolo nɛ ɛna abalʋ ɛnʋ nɛ ɛpɔzɩ-ɩ se: “Ŋwɛnɩ tisuu Mesiya yɔɔ?” Abalʋ cosi-i se: “Ye maasɩm weyi ɛkɛnaa yɔ, maatisi ɛ-yɔɔ.” Yesu heyi-i se: “Ma lɛ Mesiya.” Kɩbandʋ ndʋ Yesu labɩ abalʋ ɛnʋ yɔ tɩɖɔwa, mbʋ pʋyɔɔ yɔ, ɛwa ɛ-kʋdɔŋ nɛ ɛsɩnɩ-ɩ ɖɔɖɔ nɛ ɛwɛɛnɩ tisuu.