Natʋ ndʋ pawɩlɩ Yohanɛɛsɩ yɔ

Alɩwaatʋ ndʋ apostoloo Yohanɛɛsɩ kaawɛ salaka taa, lɩm hɛkʋ taa tɛtʋ ndʋ payaɣ se Patɩmoosɩ yɔ tɩ-taa yɔ, Yesu wɩlɩ-ɩ natʋ ndɩ ndɩ 16 ndʋ tɩyɔɔdʋʋ cee wayɩ tɔm yɔ. Natʋ ndʋ, tɩwɩlɩ ɛzɩma Yehowa kaɣ labʋ nɛ ɛ-hɩɖɛ yɔɔ ñalɩ, e-Kewiyaɣ kɔɔ nɛ pala ɛ-sɔɔlɩm tɛtʋ yɔɔ ɛzɩ ɛsɔdaa yɔ.

Natʋ ndʋ tɩ-taa natʋyʋ taa, Yohanɛɛsɩ na Yehowa, ɛcaɣ e-kewiyaɣ kpelaɣ yɔɔ, nɛ ɛzʋtʋyaa 24 cɔɔ-ɩ nɛ pata. Posu tokonaa kʋhʋlʋmaa nɛ papa awiya hulasɩ nzɩ palabɩnɩ sika yɔ. Tɛʋ ñɩlɩsaɣ nɛ tɛʋ nazaɣ nɛ kewiyaɣ kpelaɣ ŋga kɔ-cɔlɔ. Ɛzʋtʋyaa 24 mba poluŋaɣ Yehowa tɛɛ nɛ pasaŋɩ-ɩ. Natʋ lɛɛtʋ taa lɛ, Yohanɛɛsɩ na samaɣ sɔsɔɔ nakɛyɛ, kalɩnɩ ajɛɛ kpeekpe taa, samasɩ kpeekpe taa nɛ kʋnʋmɩŋ kpeekpe taa, nɛ kɛsɛɣ Yehowa. Heɣa yaa Yesu ɖiyaɣni-kɛ nɛ ewokini wezuu lɩm cɔlɔ. Pʋwayɩ natʋ lɛɛtʋ taa lɛ, Yesu paɣzɩ kewiyitu tɔɔʋ ɛsɔdaa, ɛ nɛ ɛzʋtʋyaa 24. Natʋ ndʋ tɩtɩŋ pʋwayɩ yɔ tɩ-taa lɛ, Yohanɛɛsɩ na Yesu, ɛwɛɛ nɛ eyouni ɖʋmanʋʋ yaa Sataŋ nɛ ɛ-aleewaa. Yesu wabɩ-wɛ nɛ ɛɖɔɔnɩ-wɛ ɛsɔdaa nɛ petii tataa.

Pʋwayɩ lɛ, Yohanɛɛsɩ na natʋ kɩbandʋ natʋyʋ taa Heɣa nɛ ɛyaa 144000 pasɩŋ Siyɔŋ Pʋʋ yɔɔ. Ɛna ɖɔɖɔ tiyiyu nɔɔyʋ, ɛwɛɛ nɛ eheyiɣ ɛyaa se pese Ɛsɔ sɔɔndʋ nɛ pasamɩ-ɩ.

Natʋ ndʋ tɩtɩŋ pʋwayɩ yɔ tɩ-taa, ɛna Armaagedɔɔ you. You ŋgʋ kɩ-taa, Yesu nɛ ɛ-sɔɔjanaa pawabɩ Sataŋ ɛjaɖɛ kɩdɛkɛdɩyɛ. Kɛdɛzaɣ natʋ taa lɛ, Yohanɛɛsɩ na nɔɔ kʋɖʋmaɣ ŋga kɛwɛ mba pɛwɛ ɛsɔdaa yɔ nɛ mba pɛwɛ tɛtʋ yɔɔ yɔ pɛ-hɛkʋ taa yɔ. Yehowa ɖɩzɩ Sataŋ nɛ ɛ-wayɩ tɩŋɩyaa cɩɖɩ cɩɖɩ. Ɛyaa mba pɛwɛ ɛsɔdaa nɛ tataa yɔ pe-kpeekpe pakpakaɣ Yehowa hɩɖɛ se ɖɩkɛ kiɖeɖeye nɛ pɛsɛɣ e-ɖeke koŋ.