Janvier

Alɩwaatʋ ndʋ Moyizi kaakɛ Ejipiti wiyaʋ hɔʋ taa tʋ yɔ, ɛtaawɛɛnɩ tɩ luzuu. Pʋyɔɔ ɛmʋ pana siŋŋ alɩwaatʋ natʋyʋ nɛ ɛkʋ abalʋ nɔɔyʋ, mbʋ pʋyɔɔ yɔ ɛmaɣzaɣ se ɛlɛ labɩ mbʋ pɩtɩtʋʋzɩ yɔ. Moyizi maɣzaɣ se mbʋ ɛlaba yɔ pɩkɛdɩnɩ Yehowa. Yehowa kpaɣ pɩnzɩ 40 mbʋ yɔ nɛ ɛsɩnɩ Moyizi nɛ ɛlɛ nɩɩ pɩ-taa se pɩtɩkɛ abalɩtʋ ɖeke pɩpɔzʋʋ se ɛwɛɛna nɛ ɛpɩzɩ eɖiyi Izrayɛɛlɩ samaɣ, ɛlɛ pɩpɔzʋʋ-ɩ tɩ luzuu ɖɔɖɔ. Nɛ pʋcɔ nɛ ɛwɛɛnɩ tɩ luzuu lɛ, pɩpɔzʋʋ ɖɔɖɔ se ɛwɛɛnɩ ñamtʋ nɛ hɛɛɛ wɛtʋ. Moyizi mʋ lɔŋ tasʋʋ mbʋ camɩyɛ nɛ ɛpɩsɩ ɖiyiyu kɩbanʋ siŋŋ. (Ejl. 2:​11, 12; Tʋma 7:​21-​30, 36) Sɔnɔ, pɩwɛɣ ɖeu se hɔŋ ñʋndɩnaa nɛ ɛgbɛyɛ taa ɛzʋtʋyaa ɩmaɣzɩnɩ Moyizi. Alɩwaatʋ ndʋ nɔɔyʋ ɛɛñaŋɩ-ŋ yɔ, taamʋ pana lɛɛ lɛɛ. Luzi ña-tɩ nɛ ŋɖiɣzini hɔɔlɩŋ weyi ɩ-taa picoɖi-ŋ yɔ. (Ekl. 7:​9, 20) Ðɔ nʋmɔʋ ŋgʋ Yehowa wɩlɩɣ-ŋ se ŋtɩŋnɩ kɩ-yɔɔ nɛ ŋcɔnɩ tɔm natʋyʋ ɖeɖe yɔ kɩ-yɔɔ nɛ ñamtʋ. Nɛ paa ɛzɩmtaa lɛ, cosi tɔm yɔɔ nɛ nɔɔ kɩbaŋa. (Adu. 15:1) Hɔŋ ñʋndɩnaa nɛ ɖiyiyaa mba palakɩ mbʋ yɔ, pɔ-tɔm kɛdɩɣnɩ Yehowa, peyeki se laŋhɛzɩyɛ ɛwɛɛ, nɛ pɛkɛɣnɩ kɩɖaŋ kɩbaŋ tɩ luzuu nʋmɔʋ taa. w19.02 8 § 1; 10 § 9-​10

Ɛbɛ yɔɔ Yesu nɩ samaɣ ŋga ke-siziŋ, yaa ɛbɛ yɔɔ ɛna ka-pʋtɔdɩyɛ? Ɛyɔɔdaa se samaɣ ŋga “kaawɛ ɛzɩ heŋ weyi ɩfɛyɩnɩ ninɖiɣyu yɔ.” Pɩtɩla Yesu kaanawa se samaɣ ŋga ka-taa ɛyaa nabɛyɛ kaakɛ kʋñɔndɩnaa, nɛ pɩpɔzɩ se pala tʋmɩyɛ alɩwaatʋ sakɩyɛ pʋcɔ papɩzɩ nɛ pɔcɔnɩ pɔ-hɔŋ kɩcɛyɩm ɖeɖe. Pɩtɩla ɖɔɖɔ yɔ, pa-taa nabɛyɛ nɩɣaɣ wɩzasɩ mbʋ pʋyɔɔ yɔ, pelesi pɛ-ɛyʋ kʋsɔɔlʋ nɔɔyʋ. Ye mbʋ, Yesu pɩzaɣ se ɛnɩɩ wɛtʋ ndʋ tɩ-taa paawɛɛ yɔ, tɩ-taa ­camɩyɛ. Ɛzɩ ɖɩyɔɔdʋʋ tɔm ñʋʋ ŋgʋ kɩɖɛwa yɔ kɩ-taa yɔ, pɩtɩla Yesu maɣmaɣ kaalʋbɩnɩ kala ana a-taa naayɛ. Yesu maɣzaɣ lalaa yɔɔ yɔ, nɛ piseɣti-i nɛ esusi-wɛ laŋɩyɛ hɛzʋʋ tɔm. (Iza. 61:​1, 2) Ɛbɛ Yesu kɩɖaʋ kpɛlɩkɩɣ-ɖʋ? Ɛzɩ Yesu yɔ, ɛyaa mba pɔcɔ-ɖʋ nɛ pata yɔ, pɛwɛ “ɛzɩ heŋ weyi ɩfɛyɩnɩ ninɖiɣyu yɔ.” Pɛwɛ kala sakɩyɛ taa. Nɛ ɖɩwɛnɩ mbʋ pɩpɔzʋʋ-wɛ yɔ: Kewiyaɣ tɔm. (Natʋ 14:6) Pʋyɔɔ lɛ, ɖɩmaɣzɩɣnɩ ɖa-Ñʋʋdʋ nɛ ɖisusuu tɔm kɩbandʋ, mbʋ pʋyɔɔ yɔ, ɖɩnaɣ “kʋñɔndʋ nɛ ɛjam” pa-pʋtɔdɩyɛ. (Keɣa 71:13) Ðɩnaɣ lalaa pʋtɔdɩyɛ nɛ ɖɩsɔɔlaa se ɖɩla nabʋyʋ nɛ ɖɩsɩnɩ-wɛ. w19.03 21-​22 § 6-7

Lɩmaɣza wena a-yɔɔ pɩwɛɛ se ɖɩsɔɔlɩ Yehowa yɔ, aɖɔ sakɩyɛ. Pɩtasɩnɩ se ɛhaɣ-ɖʋ mbʋ payɩ pɩwazɩɣ-ɖʋ paa evemiye nɖɩ yɔ lɛ, ɛwɩlɩɣ-ɖʋ ɛ-yɔɔ toovenim tɔm nɛ ɛ-kaɖʋsɩ tɔm ɖɔɖɔ. (Yoh. 8:​31, 32) Ɛha-ɖʋ Krɩstʋ ɛgbɛyɛ se ɖiɖiyiɣ-ɖʋ nɛ ɖɩkpazɩɣ-ɖʋ ɖoŋ. Ɛmaɣzɩɣ ɖɔ-yɔɔ yaa ɛsɩɣnɩ-ɖʋ se ɖɩpɩzɩ nɛ ɖɩsɩɣlɩ ɖa-sʋʋtʋ sɔnɔ; nɛ ɛhaɣ-ɖʋ lidaʋ se ɖɩkaɣ caɣʋ wezuu tam tam wɛtʋ ndʋ tɩtalɩ pilim yɔ tɩ-taa. (Natʋ 21:​3, 4) Ye ɖɩkpakɩɣ alɩwaatʋ nɛ ɖɩmaɣzɩɣ mbʋ payɩ Yehowa tɛm labʋ nɛ ɛwɩlɩ-ɖʋ se ɛsɔɔlɩ-ɖʋ yɔ pɩ-yɔɔ yɔ, piseɣtiɣ-ɖʋ nɛ ɖɩsɔɔlɩ-ɩ ɖɔɖɔ. Nɛ alɩwaatʋ ndʋ ɖɩsɔɔlʋʋ Yehowa yɔ, piyeki nɛ ɖɩwɛɛnɩ sɔɔndʋ ndʋ tɩmʋnaa yɔ. Sɔɔndʋ kpaɣ-ɖʋ se ɖɩtaala mbʋ pɩɩkɛdɩɣnɩ Weyi ɖɩsɔɔlɩ-ɩ siŋŋ yɔ. Ye ŋwɛɛ nɛ ŋtɔzʋʋ ɛzɩma Yehowa paɣtʋ wazɩɣ-ŋ siŋŋ yɔ, pɩsɩɣnɩ-ŋ nɛ ŋsɔɔlɩ-ɩ nɛ ŋsɔɔlɩ ɖɔɖɔ ɛ-paɣtʋ nɛ pɩkpaɖɩ. Ye ŋlabɩ mbʋ yɔ, Sataŋ ɛɛkaɣ pɩzʋʋ nɛ ɛtɩŋnɩ nabʋyʋ yɔɔ nɛ eyele nɛ ŋkizi Yehowa sɛʋ. Pɩnzɩ kudoku wayɩ, ŋkaɣ ɖiɣzinuu se lɩmaɣzɩyɛ nɖɩ ŋkpaɣaa se pamɩyɩsɩ-ŋ lɩm yɔ, nɖɩ kpaɖɩnɩ ɖeu lɩmaɣza wena ŋkpaɣ ñe-wezuu caɣʋ kpeekpe taa yɔ a-taa. w19.03 6 § 14; 7 § 19

Ye paa weyi ɛwɩlɩɣ se ɛwɛnɩ ɛsɩmɩyɛ hɔʋ taa yɔ, pɩwazɩɣ hɔʋ kpeekpe. Ye nesi ɖɔkɩyaa ɩwɩlɩɣ ɖama ɛsɩmɩyɛ nɛ pɩkpaɖɩ yɔ, piyeki nɛ pɔñɔtɩnɩ ɖama nɛ pɩkpaɖɩ. Pɩwɛɣ-wɛ ɖɔɖɔ kɛlɛʋ se pekpeɣ ɖama alɩwaatʋ ndʋ payʋsʋʋnɩ ɖama yɔ. Walʋ weyi ɛwɩlɩɣ ɛsɩmɩyɛ ɛ-halʋ yɔ, pɩtasɩna se ɛyʋsʋʋ tɔm kɩbandʋ ndʋ ɛ-halʋ yɔɔdʋʋ nɛ kɩbam mbʋ ɛlakɩ yɔ lɛ, ‘ɛñɔkʋʋ-ɩ’ ɖɔɖɔ. (Adu. 31:28) Nɛ halʋ lɔŋ tʋ heyiɣ ɛ-walʋ mbʋ ɖeyi ɖeyi ɛlɛ lakɩ nɛ pɩkɛdɩɣnɩ-ɩ yɔ. Lʋlɩyaa, nʋmɔŋ weyi ɩ-yɔɔ ɩpɩzɩɣ ɩtɩŋna nɛ ɩwɩlɩ mi-piya ­ɛzɩma sɩwɩlɩ ɛsɩmɩyɛ yɔ? Ɩtaasɔɔ se mi-piya kaɣ maɣzɩnʋʋ mɩ-yɔɔdaɣ nɛ mɩ-lakasɩ. Pʋyɔɔ lɛ, ɩha kɩɖaʋ kɩbaŋʋ nɛ ɩsɛɛ mi-piya se sɩlabaɣ lɛ alɩwaatʋ ndʋ sɩlakɩ-mɩ kɩbam nabʋyʋ yɔ. Pɩtasɩ lɛ, ɩwɩlɩ mi-piya se sɩsɛɛ se ‘ŋlabaɣ lɛ,’ ­alɩwaatʋ ndʋ nɔɔyʋ lakɩ-sɩ kɩbam nabʋyʋ yɔ. Ɩsɩnɩ mi-piya nɛ sɩnɩɩ pɩ-taa se ɛsɩmɩyɛ wɩlʋʋ lɩɣnɩ laŋɩyɛ taa na, nɛ tɔm ndʋ sɩyɔɔdʋʋ se sɩwɩlɩnɩ ɛsɩmɩyɛ yɔ, tɩwɛnɩ wazaɣ sɔsɔɔ. w19.02 17 § 14-​15

Tɔm ndʋ, tɩwɩlɩɣ se Yɔɔb kaatɛm ɛ-taa se ɛɖɔkʋʋ ɛ-cɩŋgɩlɩm wɛtʋ paa ɛbɛ ɛtɩɩlakɩ yɔ. Sataŋ takɩ-ɩ lɛ, Yɔɔb kizaa se eeyeki ɛ-cɩŋgɩlɩm wɛtʋ; ɖa ɖɔɖɔ ɖɩpɩzɩɣ nɛ ɖɩla mbʋ. Sataŋ yɔɔdʋʋ tɔm kʋɖʋmtʋ ndʋ ɖa-taa paa weyi lɛ ɛ-yɔɔ ɖɔɖɔ. Ɛzɩma tɩyɛ? Ɛmaɣzɩɣ se ­toovenim taa lɛ, ŋtɩsɔɔlɩ Yehowa Ɛsɔ, ŋkaɣ-ɩ yebu sɛʋ se pɩsa nɛ ŋya ña-ñʋʋ alɩwaatʋ ndʋ ŋkatɩɣ kaɖɛ sɔsɔɖɛ naɖɩyɛ yɔ, nɛ ɛmaɣzɩɣ ɖɔɖɔ se ŋŋkaɣ ɖɔkʋʋ ña-cɩŋgɩlɩm wɛtʋ. (Yɔɔb 2:​4, 5; Natʋ 12:10) Tɔm ndʋ, ɛzɩma tɩlakɩ-ŋ? Pɩtʋʋ fɛyɩ se tɩɖʋʋ-ŋ ɖɩwɩzɩyɛ. Ɛlɛ maɣzɩ tɔm tʋnɛ tɩ-yɔɔ: Yehowa taɣ-ŋ liu siŋŋ nɛ halɩ pʋyɔɔ lɛ, ɛha-ŋ waɖɛ sɔsɔɖɛ ­naɖɩyɛ. Yehowa haɣ Sataŋ nʋmɔʋ se ­ɛtakɩ ña-cɩŋgɩlɩm wɛtʋ. Ɛtaɣ liu se ŋpɩzɩɣ nɛ ŋɖɔkɩ ña-cɩŋgɩlɩm wɛtʋ nɛ ŋyele nɛ patɩlɩ se Sataŋ kɛ cɛtɩyʋ. Nɛ eheyiɣ-ŋ se ɛkaɣ-ŋ sɩnʋʋ nɛ ŋpɩzɩ nɛ ŋla mbʋ. (Ebr. 13:6) Pɩkɛnɩ waɖɛ sɔsɔɖɛ siŋŋ se kedeŋa kpeekpe Kɩlɩm taɣ-ŋ liu! Ŋnaɣ mbʋ pʋyɔɔ pɩcɛyaa se ɖɩɖɔkɩ ɖa-cɩŋgɩlɩm wɛtʋ yɔ? Pɩhaɣ-ɖʋ waɖɛ se ɖɩwɩlɩ se Sataŋ kɛ cɛtɩyʋ, piyeki ɖɔɖɔ se ɖɩlʋ ɖa-Caa hɩɖɛ kɩbanɖɛ yɔɔ nɛ ɖɩtɩnɩ e-kewiyitu tɔɔʋ yɔɔ. w19.02 5 § 9-​10

Yesu heyi ɛ-apostoloowaa kala wena pakaɣ katʋʋ nɛ ɛsɩndaa yɔ a-tɔm. Eheyi-wɛ se pamaɣzɩnɩ ɛ-kɩɖaʋ nɛ pɩtɛ lɛ, eseɣti-wɛ se ‘pɔɖɔkɩ kpam’ yaa pɛwɛɛ abalɩtʋ. (Yoh. 16:​1-4a, 33) Pɩnzɩ sakɩyɛ wayɩ, Yesu tɔm ­kpɛlɩkɩyaa wobi pɩ-yɔɔ nɛ pamaɣzɩnɩ ɛ-kɩlaʋ lɩmaɣza nɛ pɛwɛɛ abalɩtʋ. Paa pɩɩpɩzaɣ se piyele nɛ pɔtɔɔ kʋñɔŋ yɔ, pasɩnɩ ɖama kala ndɩ ndɩ wena ­pakataa yɔ a-taa. (Ebr. 10:33, 34) Sɔnɔ, ɖa ɖɔɖɔ ɖɩmaɣzɩɣnɩ Yesu nɛ ɖɩwɩlɩɣ se ɖɩwɛ abalɩtʋ. Pɩpɔzʋʋ-ɖʋ abalɩtʋ pʋcɔ nɛ ɖɩpɩzɩ nɛ ɖɩsɩnɩ ɖo-koobiya mba panazɩɣ-wɛ pe-tisuu yɔɔ yɔ. Nabʋyʋ taa, papɩzɩɣ nɛ pɔtɔ ɖo-koobiya ­salaka ɖulum. Alɩwaatʋ ndʋ pɩtalɩɣ-wɛ mbʋ yɔ, pɩpɔzʋʋ se ɖɩla mbʋ ɖɩpɩzɩɣ yɔ nɛ ɖɩsɩnɩ-wɛ. Nɛ pɩpɩzɩɣ nɛ pɩpɔzɩ se ɖɩlʋ pɔ-yɔɔ. (Fil. 1:​14; Ebr. 13:19) Nʋmɔʋ lɛɛkʋ ŋgʋ kɩ-yɔɔ ɖɩtɩŋɩɣna nɛ ɖɩwɩlɩɣ se ɖɩwɛ abalɩtʋ yɔ, ŋgʋ lɛ se ­ɖiwoki pɩ-yɔɔ nɛ ɖisusuu tɔm nɛ “abalɩtʋ.” (Tʋma 14:3) Ɛzɩ Yesu yɔ, ɖɩtɛm ɖa-taa se ɖiwoki pɩ-yɔɔ nɛ ɖisusi Kewiyaɣ tɔm paa nabʋyʋ taa ɛyaa ɩkaɖɩɣnɩ-ɖʋ yaa panazɩɣ-ɖʋ yɔ. w19.01 22-​23 § 8-9

Ɛbɛ pɩzɩɣ nɛ pɩsɩnɩ-ɖʋ nɛ ɖicosi tɔm kediɣzisi taa nɛ tɩkpazɩ lalaa ɖoŋ? Mbʋ pɩ-tɔm kɩlɩ cɛyʋʋ yɔ lɛ se ŋñɔɔzɩ ña-tɩ pʋcɔ nɛ ŋwolo paa kediɣzaɣ ŋga. Ye ŋlakɩ ɖʋtʋ nɛ ŋñɔɔzʋʋ ña-tɩ camɩyɛ yɔ, pɩkaɣ-ŋ wɛʋ kɛlɛʋ se ŋcosi tɔm kediɣzisi taa. (Adu. 21:5) Ɛbɛ nɛ ɛbɛ pɩwɛɛ se ŋla nɛ pɩsa nɛ ŋñɔɔzɩ ña-tɩ camɩyɛ? Paa ɛzɩmtaa lɛ, pɩwɛɛ se ŋpaɣzɩnɩ adɩma nɛ ŋpɔzɩ Yehowa se ɛha-ŋ e-fezuu kiɖeɖeu. (Luka 11:13; 1 Yoh. 5:​14) Pʋwayɩ lɛ, pɩwɛɛ se ŋkpaɣ cɛcɛsɩ pazɩ nɛ ŋcɔnɩ ñʋʋ ŋgʋ ŋcaɣ kpɛlɩkʋʋ yɔ kɩ-hɔɔlɩŋ ndɩ ndɩ: Tɔm ñʋʋ, tɔm ñʋŋ cikpeŋ, kɩlɛmɩŋ nɛ tɔm pɔzʋʋ aɖakasɩ. Ŋŋkpɛlɩkɩɣ paa tayʋʋ mbʋ lɛ, ñaɣ pana nɛ ŋkalɩ masɩ nzɩ pama pɩ-taa yɔ, sɩ-taa sakɩyɛ. Ŋŋmaɣzɩɣ tɔm ndʋ ŋkalɩ tayʋʋ nɛ masɩ taa yɔ tɩ-yɔɔ lɛ, ka ñʋʋ tɔm ndʋ ŋsɔɔlaa se ŋcosi yɔ tɩ-yɔɔ nɛ pɩkpaɖɩ. Ye ŋñɔɔzʋʋ ña-tɩ camɩyɛ yɔ, pɩwazɩɣ-ŋ nɛ pɩkpaɖɩ nɛ pɩwɛɣ-ŋ ɖɔɖɔ kɛlɛʋ se ŋcosi tɔm.​—2 Kɔr. 9:6. w19.01 9 § 6; 11-​12 § 13-​15

Yehowa tɩŋnɩ e-fezuu kiɖeɖeu yɔɔ nɛ ɛsɩnɩ Habakuuki nɛ ɛlɛ ma mbʋ pɩcɛyaɣ-ɩ yɔ, se ɛkpɛlɩkɩ-ɖʋ lɔŋ kɩbaŋ nɩɩyɩ. Lɔŋ ɛnɩ yɔ: Pɩtɩpɔzɩ se sɔɔndʋ ɛkpa-ɖʋ se ɖiheyi-i ɖa-kɩcɛyɩm yaa abʋta wena ɖɩwɛna yɔ. Toovenim taa lɛ, eheyiɣ-ɖʋ nɛ sɔɔlɩm se ɖɩtɩmnɩ-ɩ nɛ ɖiheyi-i mbʋ pɩwɛ ɖa-laŋɩyɛ taa yɔ. (Keɣa 49:15; 61:9) Habakuuki tɛm ɛ-taa se ɛñɔʋnɩ Yehowa weyi ɛkɛ ɛ-Taabalʋ nɛ ɛ-Caa yɔ kpam. Habakuuki taamaɣzɩɣ wɛtʋ ndʋ tɩ-taa ɛɛwɛɛ yɔ tɩ-yɔɔ ɖeke nɛ ɛtaɣ liu ɛ-maɣmaɣ ɛ-lɔŋsɩnɖɛ. Ɛlɛ ɛtɩmnɩ Yehowa nɛ eheyi-i ɛ-lɩmaɣza nɛ ɛ-nɩɣzɛ nɛ ɛkɛnɩ kɩɖaʋ kɩbaŋʋ. Pɩtasɩ lɛ, Yehowa weyi ɛkɛ adɩma Welisiyu yɔ, eseɣtiɣ-ɖʋ se ɖɩwɩlɩ se ɖɩtaɣ-ɩ liu nɛ ɖɩtɩŋnɩ adɩma yɔɔ nɛ ɖiheyi-i ɖa-nɩɣzɛ. (Keɣa 65:19) Ye ɖɩlakɩ mbʋ yɔ, ɖɩkaɣ naʋ ɛzɩma ɛkaɣ tɩŋnʋʋ nʋmɔʋ nakʋyʋ yɔɔ nɛ ecosi ɖa-adɩma yɔɔ nɛ eɖiyi-ɖʋ nɛ sɔɔlɩm yɔ. (Keɣa 72:​23, 24) Ɛkaɣ-ɖʋ sɩnʋʋ nɛ ɖɩtɩlɩ ɛ-lɩmaɣza paa kaɖɛ nɖɩ lɛ ɖɩ-taa. Nʋmɔŋ weyi ɩ-yɔɔ ɖɩtɩŋɩɣna nɛ ɖɩwɩlɩɣ se ɖɩtaɣ Ɛsɔ liu yɔ, ɩ-taa lɛɛkʋ lɛ adɩma wena ɖɩlakɩnɩ ɖa-laŋɩyɛ pilim yɔ. w18.11 13 § 2; 14 § 5-6

Keɣa maɖʋ Daviid taalɩzɩ ɛ-taabalaa ɛ-ɖaɣʋnaa ɖeke hɛkʋ taa. Ŋtɔzʋʋ ɛyʋ ‘sɔsɔ’ weyi ɛpɩsɩ Daviid taabalʋ kɩbanʋ yɔ ɛ-hɩɖɛ yɔɔ? Ɛ-hɩɖɛ lɛ Yonataanɩ. Toovenim taa lɛ, pɛwɛ ɛyaa mba Bibl yɔɔdʋʋ pɔ-tɔm se taabalɩyɛ kɩbanɖɛ kaawɛ pɛ-hɛkʋ taa yɔ pa-taa. Ɛlɛ ŋnawa se Yonataanɩ kaakɩlɩ Daviid nɛ pɩnzɩ 30 mbʋ yɔ? Ye mbʋ, ɛbɛ kaayeba nɛ taabalɩyɛ wɛɛ pɛ-hɛkʋ taa? Pa-tɩŋa paawɛnɩ tisuu Ɛsɔ yɔɔ, pañaŋaɣ ɖama siŋŋ, nɛ pana ɖɔɖɔ ɛzɩma pa-taa paa anɩ lɩzɩ abalɩtʋ nɛ ɛwɩlɩ alɩwaatʋ ndʋ poyowaɣni Ɛsɔ koyindinaa yɔ. (1 Sam. 13:3; 14:13; 17:48-​50; 18:1) Ɛzɩ Daviid nɛ Yonataanɩ yɔ, ye ŋɖʋʋ taabalɩyɛ nɛ ɛyaa mba pɔsɔɔlɩ Yehowa nɛ pawɩlɩɣ se pɛwɛnɩ tisuu ɛ-yɔɔ yɔ, ña ɖɔɖɔ pɩkaɣ-ŋ haʋ “taa leleŋ siŋŋ.” Kiera sɛ Yehowa pɩnzɩ sakɩyɛ; ɛyɔɔdaa se: “Manɖʋ taabalɩyɛ nɛ ɛyaa mba palɩnɩ ɛjaɖɛ hɔɔlɩŋ ndɩ ndɩ taa yɔ, mba pacaɣ wezuu wɛtʋ ndɩ ndɩ taa nɛ pɛwɛɛnɩ sɔnzɩ ndɩ ndɩ yɔ.” Ye ña ɖɔɖɔ ŋwalɩsɩɣ ña-taabalɩyɛ ɖʋʋ mbʋ yɔ, ŋkaɣ naʋ ɛzɩma Masɩ nɛ Ɛsɔ fezuu kiɖeɖeu sɩnɩ-ɖʋ nɛ ɖɩwɛɛ nɔɔ kʋɖʋmaɣ taa ɛjaɖɛ kpeekpe yɔɔ yɔ kpayɩ kpayɩ. w18.12 26 § 11-​13

Tɔm pee “kʋzʋʋ kɩdɛkɛdʋʋ ” tɔbʋʋ lɛ se weyi ɛsʋʋnɩ weyi ɛtɩkɛ ɛ-tɛŋga yɔ. Nɛ lakasɩ nzɩ sɩpɩzɩɣ nɛ sɩkɛ acɛyɛ, hayitu, mba patɩɖɔkɩ nesi yɔ pa-ɖama sʋnʋʋ, mba paka kʋzʋʋ pilinzi yɔ pa-ɖama sʋnʋʋ, nɛ kpɩna sʋnʋʋ. Ye abalʋ nɔɔyʋ ɛɖɔkɩ nesi nɛ ɛcaɣ kʋzʋʋ kɩdɛkɛdʋʋ wezuu yɔ, ɛ-halʋ pɩzɩɣ nɛ ɛkpaɣ lɩmaɣzɩyɛ se ekiziɣ-i yaa se eekiziɣ-i. Tɔm ndʋ Yesu yɔɔdaa yɔ, tɩɩwɩlɩɣ se kʋzʋʋ kɩdɛkɛdʋʋ (pɔrɩneya) lakasɩ nzɩ mba pɔɖɔkɩ nesi yɔ pa-taa nɔɔyʋ lakɩ yɔ sɩ-yɔɔ lɛ, pɩwɛɛ se pɛcɛ pe-nesi. Ðɩkpaɣ kɩɖaʋ. Halʋ nɔɔyʋ pɩzɩɣ nɛ ɛlɩzɩ se eekiziɣ ɛ-walʋ paa ɛlɛ ɛcaɣ kʋzʋʋ kɩdɛkɛdʋʋ wezuu yɔ. Ɛpɩzɩɣ nɛ ewolo pɩ-yɔɔ nɛ ɛsɔɔlʋʋ-ɩ nɛ ɛlɩzɩ se ekpeɣ-i faaa nɛ pɛwɛɛ ɖama cɔlɔ nɛ pasɩnɩ ɖama nɛ pɛcɛyɩsɩ pe-nesi ɖɔkʋʋ. ­Toovenim taa lɛ, ye ekizi-i nɛ ɛtɩɖaɣnɩ walʋʋ yɔ, ɛpɩzɩɣ nɛ ɛkatɩ kala. Akaɣ cɔnʋʋ e-tomnaɣ yɔɔ kɩcɛyɩm ɖeɖe? Nɛ kʋzʋʋ hɔɔlʋʋ taa yɔ? Pɩɩkaɣ-ɩ labʋ ɛzɩ ɛwɛ e-ɖeke yɔ? Pɛwɛnɩ piya nɛ pɩpɔzʋʋ se pɔcɔnɩ sɩ-yɔɔ? (1 Kɔr. 7:​14) Tobi lɛ, weyi ekizi ɛ-tɛŋga mbʋ pʋyɔɔ yɔ ɛlɛ caɣ kʋzʋʋ kɩdɛkɛdʋʋ wezuu yɔ, ɛkaɣ katʋʋ kala sakɩyɛ. w18.12 12 § 10-​11

Yehowa paɖɩɣ kʋzɔɔtʋ lakasɩ. (Iza. 61:8) Paa Yehowa ɛnawa se ɖɩtɩtalɩ pilim nɛ pʋyɔɔ lɛ, nabʋyʋ taa ɖa-lakasɩ nasɩyɩ ɩɩtʋʋzʋʋ yɔ, eseɣtiɣ-ɖʋ se ɖɩpaɖɩ ɖɔɖɔ kʋzɔɔtʋ lakasɩ. Ye ɖɩmaɣzɩɣ mbʋ pʋyɔɔ Yehowa paɖɩɣ kɩdɛkɛdɩm yɔ pɩ-yɔɔ yɔ, pɩsɩɣnɩ-ɖʋ nɛ ɖɩwɛɛnɩ ɛ-maɣzɩm nɛ mbʋ kpazɩɣnɩ-ɖʋ ɖoŋ se ɖɩlʋbɩnɩ kɩdɛkɛdɩm. Ye ɖɩwɛnɩ lɩmaɣza wena Yehowa wɛnɩ kɩdɛkɛdɩm yɔɔ yɔ, pɩkaɣ-ɖʋ sɩnʋʋ ɖɔɖɔ nɛ ɖɩtɩlɩ se lakasɩ nasɩyɩ fɛyɩ ɖeu, paa Masɩ ɩtɩyɔɔdɩ sɩ-tɔm kpayɩ yɔ. Kɩɖaʋ nakʋyʋ yɔ. Payɛ naɖɩyɛ wɛɛ nɛ ɖɩtɔyʋʋ ɛjaɖɛ yɔɔ sɔnɔ nɛ ɖɩ-taa lɛ, ɛyaa suu ­won­du nɛ pɩnaɣ po-tomnaɣ hɔɔlɩŋ sakɩyɛ se piseɣti lalaa kʋzʋʋ nʋmɔʋ taa. Nabɛyɛ pɩzɩɣ nɛ pamaɣzɩ se lakasɩ nzɩ sɩtɩwɛɛkɩ pʋyʋ nɛ pɔyɔɔdʋʋ se sɩwɛ ndɩ nɛ kʋzʋʋ kɩdɛkɛdʋʋ wezuu caɣʋ. Ɛlɛ lakasɩ nzɩ sɩlabɩ nɔɔ kʋɖʋmaɣ nɛ Ɛsɔ weyi ɛpaɖɩɣ kɩdɛkɛdɩm lakasɩ tɩŋa yɔ ɛ-lɩmaɣza na? Pɩwɛɣ ɖeu se ɖɩñaɣ pana nɛ ɖɩwɛɛnɩ tɩ ɖɔkʋʋ nɛ ɖɩpaɖɩɣ mbʋ Yehowa paɖɩɣ yɔ nɛ pɩsa nɛ ɖiposi ɖa-tɩ nɛ lakasɩ kɩdɛkɛdɩsɩ.​—Roma 12:9. w18.11 25 § 11-​12

Apostoloo Pɔɔlɩ ɖiɣzinaa se Yehowa lidaʋ tɔm ndʋ tɩmʋ ñɩm siŋŋ, pʋyɔɔ ɛyɔɔdɩ mayaɣ ŋga ka-taa tɔm tam nabudozo takayɩsɩ nzɩ ɛmawa yɔ sɩ-taa. (Roma 1:​17; Gal. 3:​11; Ebr. 10:38) Paa kaɖɛ wɛtʋ ndʋ ɛyʋ siɣsiɣ tʋ ɛkatɩɣ yɔ, tisuu nɛ lidaʋ ŋgʋ ɛwɛnɩ Ɛsɔ yɔɔ yɔ piyeki se ɛwɛɛ wezuu nɛ ɛna ɛzɩma Ɛsɔ tamasɩ lakɩ yɔ. Yehowa heyiɣ-ɖʋ se ɖɩmaɣzɩ cee wayɩ wazasɩ yɔɔ. Ða mba ɖɩwɛ wezuu kɛdɛzaɣ kɩyakɩŋ ɩnɛ ɩ-taa yɔ, ɖɩkpɛlɩkɩɣ lɔŋ sakɩyɛ Habakuuki takayaɣ kanɛ ka-taa. Yehowa ɖʋwa se ɛhaɣ wezuu ɛyaa siɣsiɣ tɩnaa mba payɩ pawɩlɩɣ se pɛwɛnɩ tisuu nɛ pataɣ-ɩ liu yɔ. Pʋyɔɔ lɛ, ɖiwolo pɩ-yɔɔ nɛ ɖɩkpazɩɣ ɖoŋ ɖe-tisuu nɛ ɖɩtaɣ Ɛsɔ liu paa kala yaa nɩɣzɛ wena ɖɩkatɩɣ yɔ. Yehowa tɩŋnɩ Habakuuki takayaɣ yɔɔ nɛ eheyiɣ-ɖʋ se ɛɖʋʋ-ɖʋ nesi nɛ ɛya ɖa-ñʋʋ. Eheyiɣ-ɖʋ nɛ sɔɔlɩm se ɖɩtaa-ɩ liu nɛ ɖɩɖʋ suuɖu nɛ ɖɩɖaŋ alɩwaatʋ ndʋ ɛɖʋwa yɔ. Ɛsɔ Kewiyaɣ kɔŋ lɛ, ɛ-sɛyaa mba pɛwɛnɩ hɛɛ wɛtʋ yɔ pe-ɖeke pakaɣnɩ wɛʋ tɛtʋ kpeekpe yɔɔ taa leleŋ taa.​—Mat. 5:5; Ebr. 10:36-​39. w18.11 16-​17 § 15-​17

Kajalaɣ pɩnzɩ mɩnʋʋ taa, ɛyaa mba paacalɩ tisuu Yesu wɩlɩtʋ yɔɔ yɔ, pa-taa sakɩyɛ kɔma nɛ peyele toovenim taa ɖɔm. Ðɩkpaɣ kɩɖaʋ kʋnɛ: Yesu tɩŋnɩ piti lakasɩ yɔɔ nɛ ɛcalɩ samaɣ sɔsɔɔ nakɛyɛ lɛ, samaɣ ŋga katɩŋɩ-ɩ nɛ kɛtɛzɩ Galilee teŋgu kidiiliŋ lɛɛkʋ yɔɔ. Peeɖe Yesu yɔɔdɩ tɔm natʋyʋ nɛ pɩɖɩɣzɩ samaɣ ŋga. Ɛyɔɔdaa se: “Ye ɩtɩtɔɔ ɛyʋ Pɩyalʋ tomnaɣ nɛ ɩñɔɔ ɛ-calɩm yɔ, ɩfɛyɩnɩ wezuu mɩ-taa.” Samaɣ tɩpɔzɩ Yesu se ɛlɩzɩ-kɛ tɔm ndʋ tɩ-taa, ɛlɛ tiɖuki-wɛ nɛ pɔyɔɔdʋʋ se: “Tɔm tʋnɛ, tɩcaɣ kaɖɛ; apɩzɩɣ nɛ ewelisi-tʋ?.” Piyeba nɛ pa-taa “sakɩyɛ pɩsɩ ­won­du ndʋ ­peyebini wayɩ yɔ tɩ-cɔlɔ nɛ peyele ɛ-wayɩ tɩŋʋʋ.” (Yoh. 6:​53-​66) Pɩlabɩ pʋtɔdɩyɛ se ɛyaa nabɛyɛ yebi toovenim taa ɖɔm sɔnɔ ɖɔɖɔ. Pɩtɩla, tɔm ndʋ koobiya mba ­pɛɖɛɣ nɔɔ ɛgbɛyɛ taa yɔ pa-taa nɔɔyʋ yɔɔdaa yaa laba yɔ, mbʋ yebina nɛ peyele toovenim. Lalaa lɛ, pɩtɩla patɩŋnɩ Bibl yɔɔ nɛ patasɩ-wɛ lɔŋ yaa ɛgbɛyɛ taa koobu nɔɔyʋ wɛtʋ tɩkɛdɩnɩ-wɛ nɛ pʋyɔɔ lɛ, pɔkɔ pana nɛ peyele toovenim. w18.11 9 § 3-5

Ye ɖɩɩnɩɣ mbʋ pʋyɔɔ ɛgbɛyɛ labɩ lɛɣzɩtʋ natʋyʋ yɔ pɩ-taa ɖeyi ɖeyi yɔ, ­pɩwɛɣ ɖeu se ɖɩkpaɣ alɩwaatʋ nɛ ɖɩmaɣzɩ ɛzɩma Krɩstʋ kaaɖiyi Ɛsɔ samaɣ nɛ pɩɖɛɛ yɔ pɩ-yɔɔ. Paa pɩtɩɩkɛ Yozuwee alɩwaatʋ taa yaa pɩnzɩ mɩnʋʋ taa yɔ, Krɩstʋ labɩ ɖiyuu tʋmɩyɛ nɛ lɛɣtʋ, nɛ ehuuzi Ɛsɔ samaɣ yɔɔ, ­ɛkpazɩ ke-tisuu ɖoŋ nɛ eyele nɛ nɔɔ kʋɖʋmaɣ wɛɛ Ɛsɔ sɛyaa hɛkʋ taa. (Ebr. 13:⁠8) ‘Yom siɣsiɣ tʋ nɛ lɔŋsɩnɖʋ’ tasɩɣ-ɖʋ lɔŋ ­alɩwaatʋ kɩbandʋ yɔɔ, mbʋ wɩlɩɣna se Yesu maɣzɩɣ ɖe-fezuu taa ­alaafɩya yɔɔ camɩyɛ nɛ sɔɔlɩm. (Mat. 24:45) ­Alɩwaatʋ ndʋ ɖɩnaɣ ɛzɩma ­Krɩstʋ ɖiyiɣ-ɖʋ yɔ, ɖɩnɩɣ pɩ-taa se ɛmaɣzɩɣ ɖe-fezuu taa ɛsɩndaa ɖɛnʋʋ yɔɔ camɩyɛ. ­Pɩtasɩna se Krɩstʋ cɔŋnɩ ɖe-fezuu taa kɩcɛyɩm ɖeɖe lɛ, ɛsɩɣnɩ-ɖʋ ɖɔɖɔ se ɖɩka ñʋʋ nɛ tʋmɩyɛ nɖɩ ɖɩ-tɔm kɩlɩ cɛyʋʋ nɛ peɖiɣni-ɖɩ labʋ ɛjaɖɛ kpeekpe yɔɔ sɔnɔ yɔ​—nɖɩ lɛ tɔm susuu tʋmɩyɛ.​—Mark. 13:10. w18.10 25 § 13-​16

Tɔm ndʋ tɩwɛ 2 Samɩyɛɛlɩ 16:​5-​13 taa yɔ tɩkɛnɩ kɩɖaʋ kɩbaŋʋ siŋŋ tɩ ɖɔkʋʋ alɩwaatʋ ndʋ pacaɣ-ɖʋ tɔm yɔ hɔɔlʋʋ taa. Daviid nɛ ɛ-lɩmɖʋyaa pɔɖɔkɩ pa-tɩ alɩwaatʋ ndʋ Wiyaʋ Sɔɔlɩ hɔʋ taa tʋ Simeyii tʋwaɣ-wɛ nɛ ɛyakɩ-wɛ kaaŋ yɔ. Daviid ɖɔkɩ ɛ-tɩ paa ɛɛwɛnɩ ɖoŋ se ɛla nabʋyʋ nɛ tʋtʋ ndʋ tɩsɩɩ tɩnaɣ yɔ. Le Daviid hiɣ ɖoŋ nɛ ɛpɩzɩ nɛ ɛɖɔkɩ ɛ-tɩ mbʋ? Tɔm ndʋ tɩwɛ Keɣa naadozo ñɩŋga taa yɔ tɩwɩlɩɣ se Daviid maɣmaɣ mabɩnɩ-kɛ alɩwaatʋ ndʋ ɛ-pɩyalʋ Absalɔm ñɩnaɣ se ɛkʋ-ɩ yɔ. Kalɩtʋ 2 nɛ 3 yɔɔdʋʋ mbʋ pɩlabɩ Samɩyɛɛlɩ takayaɣ naalɛ ñɩŋga, ñʋʋ 16 taa yɔ, pɩ-tɔm. Keɣa 3:5 heyiɣ-ɖʋ mbʋ Daviid taɣaɣ liu yɔ. Ɛyɔɔdaa se: “Mamabɩ kubuka sɔsɔɔ nɛ [Yehowa] cɔlɔ, ɛnɩɩ nɛ ­ecosi-m.” Ða ɖɔɖɔ ɖɩpɩzɩɣ nɛ ɖɩtɩmɩ ­alɩwaatʋ ndʋ ɖɩwɛɣ kaɖɛ alɩwaatʋ taa yɔ. Yehowa kaɣ-ɖʋ haʋ e-fezuu kiɖeɖeu nɛ kɩsɩnɩ-ɖʋ nɛ ɖɩɖɔkɩ ɖa-tɩ. Ŋpɩzɩɣ nɛ ŋmaɣzɩ nɛ ŋna wɛtʋ ndʋ tɩ-taa ­pɩpɔzʋʋ se ŋwɛɛnɩ tɩ ɖɔkʋʋ yaa ŋkpeɣ faaa yɔ? Ŋtaɣ liu se Yehowa pɩzɩɣ nɛ ɛna kʋñɔŋ ŋgʋ kɩ-taa ŋwɛɛ yɔ nɛ ɛwazɩ-ŋ ña-tɩ ɖɔkʋʋ yɔɔ? w18.09 6-7 § 16-​17

Ðiisusuu tɔm lɛ, pɩcɛyaa se paa ɛzɩmtaa lɛ, ɖɩwɩlɩ se ɖɩmaɣzɩɣ lalaa yɔɔ nɛ ɖɩñaŋ-wɛ nɛ ɖɩsɔɔlaa ɖɔɖɔ se ɖɩtɩlɩ ɖe-egeetiye taa ñɩma camɩyɛ. Alɩwaatʋ ndʋ ɖisusuu tɔm kpaɣ ɖɩɣa nɛ ŋwolo ɖɩɣa yɔ, pɩwɛɛ se ɖɩtɔzɩ se ɖɩsʋʋ mba pa-ɖɩsɩ taa yɔ pataana se ɖɩkaɣ pɔ-cɔlɔ wobu. Pʋyɔɔ pɩcɛyaa siŋŋ se ɖiwolo pɔ-cɔlɔ alɩwaatʋ ndʋ tɩ-yɔɔ pɩwɛɣ-wɛ kɛlɛʋ se pamʋ-ɖʋ nɛ ɖa nɛ wɛ ɖɩla faawɩyɛ yɔ. (Mat. 7:​12) Ñe-egeetiye taa ñɩma iifeŋ lɔŋ Mazaɣ nɛ Kujuka tanamɩŋ tɛɛ? Ye mbʋ yɔ, pɩwɛɣ ɖeu se ŋpaɣzɩnɩ tɔm susuu habɛɛ yɔɔ, samaɣ taa tɔm susuu yaa ŋpaɣzɩnɩ labʋ pɩsɩ nɛ ŋna-ɩ waa mba ŋnawa se pɩtʋʋ fɛyɩ se pɛtɛm fem yɔ. Ɛyaa sakɩyɛ fɛyɩnɩ alɩwaatʋ nɛ pʋyɔɔ lɛ, pɩwɛɣ ɖeu se ɖɩtaamʋ-wɛ alɩwaatʋ, kɔzɩ kɔzɩ evemiye nɖɩ ɖɩcalɩ wobu yɔ. (1 Kɔr. 9:​20-​23) Ye ɛyaa ɩnawa se ɖɩmaɣzɩɣ pɔ-yɔɔ nɛ ɖɩnawa ɖɔɖɔ se pɛfɛyɩnɩ alɩwaatʋ yaa pe-nesi ɖɔkaa yɔ, pɩkaɣ-wɛ kɛdɩnʋʋ se pamʋ-ɖʋ alɩwaatʋ ndʋ ɖɩpɩsɩɣ pɔ-cɔlɔ yɔ. Tobi lɛ, alɩwaatʋ ndʋ ɖisusuu ɛyaa tɔm yɔ, pɩcɛyaa se ɖɩlɩzɩ Ɛsɔ fezuu piye wɛtʋ nɛ ɖɩwɩlɩ. Ye ɖɩlakɩ mbʋ yɔ, pɩwɩlɩɣ se toovenim lɛ, “ɖɩkɛ mba pa nɛ Ɛsɔ pɛkpɛndɩɣ nɛ palakɩ tʋmɩyɛ yɔ.” Nɛ halɩ Yehowa pɩzɩɣ nɛ ɛtɩŋnɩ pɩ-yɔɔ nɛ ɛhɔ nɔɔyʋ nɛ ɛkɔnɩ toovenim taa.​—1 Kɔr. 3:​6, 7. w18.09 32 § 15-​17

Ɛzɩma tɩyɛ laŋɩyɛ kɩbanɖɛ wɛnʋʋ yeki se ɛyʋ ɛwɛɛ koboyaɣ taa? Ɛyaa sakɩyɛ tɩlɩɣ toovenim lɛ, pɛlɛɣzɩ pe-wezuu caɣʋ. Pʋcɔ nɛ patɩlɩɣ toovenim lɛ, pɩtɩla paawɛ kañatʋ, pɔsɔɔlɩ tɔm caʋ nɛ palakɩ puuyaɣ lakasɩ. Ɛlɛ lɛɛlɛɛyɔ, pakpaɣ “ɛyʋtʋ kɩfatʋ” nɛ pawɩlɩɣ se pɛwɛnɩ “pʋtɔdɩyɛ naʋ tɛ sɔɔlɩm sɔsɔm, camɩyɛ lakasɩ, tɩ luzuu, hɛɛɛ wɛtʋ, nɛ suuɖu.” (Kol. 3:​9-​12) Piyeba nɛ lɛɛlɛɛyɔ pɛwɛɛ laŋhɛzɩyɛ taa, pɔsɔɔlɩ ɛyaa nɛ pehikiɣ koboyaɣ siŋŋ pe-wezuu caɣʋ taa. Pɩtasɩ lɛ, Masɩ yɔɔdʋʋ se pakaɣ tɩɣyʋʋ “tɛtʋ.” (Keɣa 36:​8-​10, 29) Ɛzɩma tɩyɛ laŋɩyɛ kɩbanɖɛ tʋ ‘tɩɣyɩɣ tɛtʋ’? Krɩstʋ wayɩ tɩŋɩyaa patam numwaa tɩɣyɩɣ tɛtʋ alɩwaatʋ ndʋ pɛkɛɣ awiya nɛ cɔjɔnaa ɛsɔdaa nɛ peɖiyi-tʋ yɔ. (Natʋ 20:⁠6) Ɛyaa miiliyɔɔwaa lalaa mba pɛfɛyɩnɩ ɛsɔdaa kpaʋ lidaʋ yɔ, paba kaɣ tɩɣyʋʋ tɛtʋ alɩwaatʋ ndʋ patalɩɣ pilim nɛ pacaɣ wezuu maatɛŋ tɛtʋ yɔɔ koboyaɣ taa yɔ. w18.09 19 § 8-9

Yehowa hanɩ kɩɖaʋ ŋgʋ kɩ-wayɩ fɛyɩ yɔ hɔɔlʋʋ ŋgʋ kɩ-taa. (Kiɖe 18:32; Yoz. 10:14) Na lɔŋ weyi ɖɩpɩzɩɣ nɛ ɖɩkpɛlɩkɩ kɛdaɣ ŋga kɛwɛ Ejipiti Lɩʋ 32:11-​14 taa yɔ. Paa Moyizi lɩmaɣza tɔm ɛtaakɩlɩ cɛyʋʋ yɔ, Yehowa ha-ɩ waɖɛ se ɛyɔɔdɩ ndʋ ɛmaɣzɩɣ yɔ. Ŋkaɣ ɖʋʋ suuɖu nɛ ŋwelisini camɩyɛ weyi ɖoŋ ɖoŋ lɛ ɛfɛyɩnɩ lɩmaɣza kɩbana yɔ nɛ pʋwayɩ lɛ, ŋlabɩnɩ tʋmɩyɛ tɔm ndʋ ɛyɔɔdaa yɔ? Yehowa ɖʋʋ suuɖu nɛ ewelisiɣni ɛyaa mba payɩ payaɣ-ɩ nɛ tisuu yɔ. Pɩwɛɛ se ɖa-taa paa anɩ ɛpɔzɩ ɛ-tɩ se: ‘Ye Yehowa ɛpɩzaa nɛ eluzi ɛ-tɩ nɛ ewelisini ɛyaa ɛzɩ Abraham, Rasɛɛlɩ, Moyizi, Yozuwee, Manowaa, Eliya nɛ Ezekiyaasɩ mbʋ yɔ, pɩɩwɛɣ ɖeu se ma ɖɔɖɔ manɖʋ mon-koobiya hɩɖɛ nɛ mewelisini-wɛ nɛ halɩ malabɩnɩ pa-lɩmaɣza kɩbana tʋmɩyɛ na? Nɔɔyʋ fɛyɩ mɛ-ɛgbɛyɛ taa yaa mɔ-hɔʋ taa nɛ pɩpɔzʋʋ se mewelisini-i? Ɛbɛ manpɩzɩɣ nɛ mala ɖeyi ɖeyi?’​—Kiɖe 30:6; Th. 13:9; 1 Aw. 17:22; 4 Aw. 30:20. w18.09 6 § 14-​15

Ye mba pɔcɔ-ɖʋ nɛ pata yɔ, pasɩɣ pɛ-kɛzɛsɩ kajalaɣ lone taa yɔ, pɩpɩzɩɣ nɛ pɩwɛɛ-ɖʋ kaɖɛ se ɖiwolo pɩ-yɔɔ nɛ ɖɩkɛ kʋjɔŋ laɖaa. Ɛlɛ Yesu yɔɔdaa se paɣtʋ naalɛ ndʋ tɩkɛ sɔsɔtʋ yɔ, ndʋ lɛ se ɖɩsɔɔlɩ Yehowa nɛ ɖa-laŋɩyɛ pilim, ɖe-ciyam pilim, ɖa-maɣzɩm kpeekpe nɛ ɖo-ɖoŋ kpeekpe nɛ ɖɩsɔɔlɩ ɖɔɖɔ ɖo-koobiya ɛzɩ ɖa-maɣmaɣ yɔ. (Mark. 12:28-​31) Mba pɔsɔɔlɩ Yehowa yɔ, pamaɣzɩɣnɩ-ɩ. Yehowa nɛ Yesu pɛkɛ kʋjɔŋ laɖaa. Nɛ peseɣtiɣ-ɖʋ se ɖa ɖɔɖɔ ɖɩla mbʋ, mbʋ pʋyɔɔ yɔ, piyeki nɛ ɖihiɣ taa leleŋ siŋŋ. Ye ɖɩñakɩ pana nɛ ɖɩwɩlɩɣ se ɖɩkɛ kʋjɔŋ laɖaa, mbʋ ɖɩlakɩ Yehowa nɛ ɖo-koobiya yɔ pɩ-taa kɔyɔ, pɩɖʋʋ Yehowa hɩɖɛ nɛ pɩwazɩɣ ɖa-maɣmaɣ nɛ ɛyaa lalaa. Ðɩɩpɩtɩɣ se ŋwɛɛ nɛ ŋñakɩ pana nɛ ŋhaɣ ña-tɩ faaa nɛ ŋsɩɣnɩ lalaa, kɔzɩ kɔzɩ ño-koobiya Krɩstʋ ñɩma. (Gal. 6:​10) Ye ŋwobi pɩ-yɔɔ nɛ ŋlakɩ mbʋ yɔ, ñɔ-tɔm kɛdɩɣnɩ-wɛ nɛ pɔsɔɔlɩ-ŋ nɛ ña ɖɔɖɔ ŋkaɣ hiɣu taa leleŋ. w18.08 22 § 19-​20

Yehowa ɛɛɖʋʋ tʋkaɣ ɛyaa taa pɩlɩɩnɩ po-tomnaɣ tɔlɩm, pɛ-ɛjaɖɛ yaa pa-kʋnʋŋ yɔɔ. Weyi ɛñaŋ Ɛsɔ nɛ ɛlakɩ mbʋ pɩtʋʋzaa yɔ, ɛ-tɔm kɛdɩɣnɩ-ɩ. (Gal. 3:​26-​28; Natʋ 7:​9, 10) Pɩtʋʋ fɛyɩ se ña ɖɔɖɔ ŋtisi tɔm tʋnɛ tɩ-yɔɔ. Ɛlɛ, ye ŋpaɣlɩ lone nɖɩ ɖɩ-taa ɛyaa wɛnɩ lɩmaɣza kɩdɛkɛda lalaa yɔɔ yɔ? Ŋpɩzɩɣ nɛ ŋmaɣzɩ se ŋfɛyɩnɩ tɛ yɔɔ tɛ yɔɔ wɛtʋ, ɛlɛ pɩtɩla toovenim taa lɛ, ŋwɛnɩ-tʋ hɔɔlɩŋ nɩɩyɩ taa. Halɩ Pɩyɛɛrɩ weyi Yehowa lɩzaa nɛ ɛwɩlɩ se tɛ yɔɔ tɛ yɔɔ wɛtʋ fɛyɩ ɖeu yɔ, pʋwayɩ ɛkɔma nɛ ɛla lakasɩ nasɩyɩ nɛ pɩwɩlɩɣ se wɛtʋ ndʋ tɩtɩtɛ cɩɖɩ cɩɖɩ ɛ-lakasɩ taa. (Gal. 2:11-14) Ɛzɩma ɖɩpɩzɩɣ ɖɩla nɛ ɖiyele cɔnʋʋ mbʋ pɩnaɣ ɛsa yɔɔ yem nɛ ɖɩhʋʋnɩ lalaa tɔm? Pɩcɛyaa se ɖa-taa paa anɩ ɛtɩŋnɩ Bibl yɔɔ nɛ ewili ɛ-tɩ camɩyɛ nɛ ɛna se ɛzɩ ɛfɛyɩnɩ wɛtʋ yaa lɩmaɣza wena atɩtʋʋzɩ yɔ lalaa yɔɔ? (Keɣa 118:105) Pɩtɩla yɔ, pɩpɔzʋʋ se lalaa ɩsɩnɩ-ɖʋ nɛ sɔɔlɩm nɛ ɖɩpɩzɩ nɛ ɖɩna se ɖɩwɛnɩ ɛjandʋ ndʋ, paa ɖa-maɣmaɣ ɖɩmaɣzɩɣ se ɖɩfɛyɩnɩ-tʋ yɔ. (Gal. 2:​11, 14) Pɩpɩzɩɣ nɛ pɩla se tɩkam lila siŋŋ ɖa-taa, nɛ pʋyɔɔ lɛ ɖa-maɣmaɣ ɖɩɩpɩzɩɣ se ɖɩna se ɖɩwɛnɩ-tʋ. w18.08 9 § 5-6

Pɔzɩ ña-tɩ se: ‘Ɛyaa tɩŋa naɣ kpayɩ kpayɩ se mɔñɔnɩ Yehowa? Mantɩŋɩɣnɩ nʋmɔŋ tɩŋa yɔɔ se ɛyaa ɩna se mɛnkɛ Yehowa Aseɣɖe Tʋ na?’ Ye Yehowa ɛnawa se ɖɩwɛ ɛ-samaɣ taa ɛlɛ ɖɩɩñɩnɩɣ se ɖɩwɩlɩ lalaa se ɖɩkɛ ɛ-pʋyʋ yɔ, ɛ-taa kaɣ wɩʋ siŋŋ. (Keɣa 118:46; Mark. 8:​38) Pɩlabɩ pʋtɔdɩyɛ se ɛyaa nabɛyɛ wezuu caɣʋ iiyeki se pana tʋkaɣ ŋga kɛwɛ mba pɛsɛɣ Yehowa nɛ mba paasɛɣ-ɩ yɔ pɛ-hɛkʋ taa yɔ; mbʋ pʋyɔɔ yɔ, peyeba nɛ “ɛjaɖɛ fezuu” wɛɛnɩ ɖoŋ pɔ-yɔɔ. (1 Kɔr. 2:​12) Fezuu ŋgʋ kiseɣtiɣ ɛyaa se pala ‘po-tomnaɣ sɔɔlɩm.’ (Efɛz. 2:3) Ðɩkpaɣ kɩɖaʋ: Ɛyaa nabɛyɛ paa fɛyɩnɩ lɔŋ weyi patasɩɣ-ɖʋ paa ɛzɩmtaa pɩlɩɩnɩ ɖo-­won­du suu yɔɔ yɔ, nɛ posuu ­won­du ndʋ tɩtɩmʋna yɔ. Posuu ­won­du ndʋ tɩɖɔkʋʋ-wɛ kpaɖɩɩɩ yaa tiyeki nɛ pɩnaɣ po-tomnaɣ hɔɔlɩŋ nɩɩyɩ yɔ, nɛ halɩ pɔkɔŋ kediɣzisi taa. Pahʋŋ yaa palakɩ ñɔsɩ nzɩ sɩtɩmʋna yɔ. (1 Tim. 2:​9, 10) Piyeki nɛ alɩwaatʋ ndʋ pɛwɛɣ ɛyaa lalaa hɛkʋ taa yɔ, pɩwɛ kaɖɛ se paɖʋ tʋkaɣ weyi ɛkɛ Yehowa pʋyʋ nɛ weyi ɛkɛ “ɛjaɖɛ taabalʋ” yɔ, pɛ-hɛkʋ taa.​—Yak. 4:4. w18.07 24-​25 § 11-​12

Lɩmaɣza wena a-yɔɔ ɖɩkɛ “koobiya” yɔ, a-taa lɛɛɖɛ lɛ se ɖa-tɩŋa ɖɩkɛ Aɖam sayɩnaa. (Tʋma 17:26) Ɛlɛ pɩtɩkɛ lɩmaɣzɩyɛ nɖɩ ɖi-ɖeke ɖɩ-yɔɔ ɖɩkɛ koobiya. Yesu yɔɔdaa se ɛ-tɔmkpɛlɩkɩyaa kɛ koobiya mbʋ pʋyɔɔ yɔ peɖiɣzinaa se Yehowa lɛ pa-Caa weyi ɛwɛ ɛsɔdaa yɔ. (Mat. 12:50) Pɩtasɩ lɛ, papɩsɩ fezuu taa hɔʋ kʋɖʋmʋʋ taa ñɩma mba pɛwɛnɩ sɔɔlɩm nɛ tisuu yɔ. Pʋyɔɔ takayɩsɩ nzɩ apostoloowaa mawa yɔ sɩ-taa, ɖoŋ ɖoŋ lɛ payaɣ tɔm mʋyaa lalaa se ­“koobiya.” (Roma 1:​13; 1 Pɩy. 2:​17; 1 Yoh. 3:​13) Yesu wɩlɩ kpayɩ kpayɩ se pɩcɛyaa se ɖɩcɔnɩ lalaa se pɛkɛ ɖo-koobiya nɛ pɩtɛ lɛ, ɛyɔɔdɩ se tɩ luzuu tɔm cɛyaa ɖɔɖɔ. (Mat. 23:11, 12) Ɛzɩ ɖɩnaʋ yɔ, tɩ kpazʋʋ kɔnɩ tayʋʋ apostoloowaa hɛkʋ taa. Nɛ tɩ kpazʋʋ tomnaɣ tɔlɩm yɔɔ pɩzɩɣ piyele nɛ tɔm kɔɔ ɛyaa hɛkʋ taa. Yuuda ñɩma kaawɛnɩ toovenim se pakpazɩ pa-tɩ mbʋ pʋyɔɔ yɔ pɛkɛ Abraham liɖe taa ñɩma na? Yuuda ñɩma sakɩyɛ kaawɛnɩ lɩmaɣza ana. Ɛlɛ Yohanɛɛsɩ lɩm mɩyɩsɩyʋ heyi-wɛ se: “Ɛsɔ pɩzɩɣ nɛ ɛlɩzɩ Abraham piya nɛ pɛɛ anɛ yɔ, a-taa.”​—Luka 3:8. w18.06 9-​10 § 8-9

Alɩwaatʋ ndʋ ŋkatɩɣ wɛtʋ natʋyʋ nɛ tɩɖʋ-ŋ ɖɩwɩzɩyɛ yɔ, yaa ŋkatɩɣ kala naayɛ ɖoŋ ɖoŋ yɔ, ŋɖɔkʋʋ ña-tɩ nɛ ŋmaɣzɩɣ nɛ pʋcɔ nɛ ŋyɔɔdʋʋ? (Adu. 10:19; Mat. 5:​22) Alɩwaatʋ ndʋ lalaa ɖʋʋ-ɖʋ ɖɩwɩzɩyɛ yɔ, pɩcɛyaa se ‘ɖiyele nɛ Yehowa pana la tʋmɩyɛ.’ (Roma 12:17-​21) Ye ɖɩpaŋ ɛsa nɛ Yehowa yɔ, ɖɩkaɣ wɛnʋʋ suuɖu nɛ ɖiyele nɛ ɛ-pana la tʋmɩyɛ alɩwaatʋ ndʋ pɩmʋnaa yɔ tɩ-yɔɔ nɛ ɖɩwɩlɩ se ɖɩhaɣ-ɩ ñamtʋ ndʋ tɩmʋnaa yɔ. Ɛlɛ ye ɖɩtɩɖaŋ Yehowa nɛ ­ɖa-maɣmaɣ ɖɩñɩnɩɣ se ɖɩtɩŋnɩ nʋmɔŋ nɩɩyɩ yɔɔ nɛ ɖɩcɔnɩ tɔm natʋyʋ ɖeɖe yɔ, pɩwɩlɩɣ se ɖɩfɛyɩnɩ ñamtʋ ɛ-yɔɔ. Ŋwɛɛ nɛ ŋɖɔŋ lɔŋ weyi Yehowa tasɩɣ-ɖʋ kɛdɛzaɣ kɩyakɩŋ ɩnɛ ɩ-taa yɔ ɩ-yɔɔ? Ye ɖɩɖɔŋ ɩ-yɔɔ yɔ, ɖɩɩkaɣ ñɔnʋʋ paa ɛzɩmtaa nʋmɔŋ weyi ɩ-yɔɔ ɖɩtɩŋaɣnɩ ɖooo lɔŋ nɛ ɖɩcɔŋnɩ tɔm natʋyʋ ɖeɖe yɔ. Ɛlɛ ɖɩkaɣ tisuu nɛ ɖɩɖɔ nʋmɔŋ kɩfaŋ weyi Yehowa tɩŋɩɣnɩ ɛ-ɛgbɛyɛ yɔɔ nɛ ɛwɩlɩɣ-ɖʋ yɔ ɩ-yɔɔ. (Ebr. 13:17) Alɩwaatʋ kʋɖʋmtʋ ndʋ tɩ-taa ɖɔɖɔ lɛ, pɩcɛyaa se ɖɩkpa ɖa-tɩ nɛ ‘ɖɩtaacɛzɩ tɔm ndʋ pamawa yɔ tɩ-yɔɔ.’ (1 Kɔr. 4:6) Ye ɖɩlakɩ mbʋ yɔ, ɖɩwɩlɩɣ se ɖɩpam ɛsa nɛ Yehowa. w18.07 15-​16 § 17-​18

Ŋŋɖɛɣnɩ ɛsɩndaa fezuu taa lɛ, ŋkaɣ naʋ se pɩcɛyaa se ŋlabɩnɩ tʋmɩyɛ Bibl paɣtʋ kila nɛ pɩkɩlɩ. Mbʋ pʋyɔɔ yɔ, ­paɣtʋ lakɩ tʋmɩyɛ hɔɔlɩŋ nɩɩyɩ taa ɖeke na, ɛlɛ paɣtʋ kila ñalakɩ tʋmɩyɛ hɔɔlɩŋ sakɩyɛ taa. Ðɩkpaɣ kɩɖaʋ kʋnɛ: Pɩɣa nakɛyɛ ɛɛpɩzɩɣ katɩlɩ mbʋ pʋyɔɔ taabalɩyɛ kɩdɛkɛdɩyɛ ɖʋʋ fɛyɩ ɖeu yɔ, pʋyɔɔ lɛ ka-caa pɩzɩɣ nɛ ɛɖʋ-kɛ paɣtʋ natʋyʋ se pɩkandɩyɩ kɔ-yɔɔ. (1 Kɔr. 15:33) Ɛlɛ pɩɣa ŋga kapaɣlɩɣ lɛ, kasɩŋ lɔŋ nɛ katɩlɩ ɛzɩma kalabɩnɩ Bibl paɣtʋ kila tʋmɩyɛ yɔ. Pɩsɩɣnɩ-kɛ se kakpaɣ lɩmaɣza kɩbana taabalɩyɛ ɖʋʋ nʋmɔʋ taa. (1 Kɔr. 13:11; 14:20) Ye ɖɩlakɩnɩ tʋmɩyɛ Ɛsɔ paɣtʋ kila yɔ, ɖɛ-ɛhʋyɛ ­kaɣ-ɖʋ kɛnʋʋ ­ɖiyiyu kɩbanʋ weyi ­ɛwɩlɩɣ-ɖʋ Ɛsɔ lɩmaɣza camɩyɛ yɔ. Ðɩwɛnɩ mbʋ payɩ pɩpɩzɩɣ pɩsɩnɩ-ɖʋ nɛ ɖɩkpaɣ lɩmaɣza wena ɛkɛdɩɣnɩ Yehowa yɔ? Ɛɛɛ. Ye ɖɩlakɩnɩ tʋmɩyɛ paɣtʋ nɛ paɣtʋ kila wena awɛ Ɛsɔtɔm taa camɩyɛ yɔ, ­ɖɩkaɣ kɛʋ ‘Ɛsɔ ɛyaa mba pamʋnɩ camɩyɛ, pɔñɔɔzɩ-wɛ camɩyɛ se papɩzɩ nɛ pala paa tʋmɩyɛ kɩbanɖɛ nɖɩ’ yɔ.​—2 Tim. 3:​16, 17. w18.06 19 § 14; 20 § 16-​17

Samaarii tʋ kɩbanʋ tɔm ndʋ Yesu kɛdaa yɔ, tɩwɩlɩɣ se Samaarii tʋ pɩzɩɣ ɛwɩlɩ Yuuda tʋ mbʋ koobu sɔɔlʋʋ siŋŋ kɛnaa yɔ. (Luka 10:25-37) Pɩsa nɛ Yesu tɔmkpɛlɩkɩyaa pɩzɩ nɛ pala tʋmɩyɛ nɖɩ paɖʋ-wɛ yɔ lɛ, pɩcɛyaa se peyele tɩ kpazʋʋ nɛ lɩmaɣza kɩdɛkɛda wena paawɛna lalaa yɔɔ yɔ. Pʋcɔ nɛ Yesu kpaɣ ɛsɔdaa lɛ, ɛɖʋ tʋmɩyɛ ɛ-tɔmkpɛlɩkɩyaa se posusi tɔm “Yuudee tɩŋa taa nɛ Samaarii taa, nɛ piwolo pɩtalɩ tɛtʋ kamaɣ yɔɔ.” (Tʋma 1:8) Yesu kaatɛm-wɛ falɩsʋʋ se papɩzɩ pala tʋmɩyɛ sɔsɔɖɛ nɖɩ pɩtɩŋnɩ ɛzɩma ɛhɔm pa-lɩmaɣza nɛ ewoni wɛtʋ kɩbandʋ ndʋ pɩwɛɛ se pɛwɛɛnɩ agɔma yɔɔ yɔ. Ɛsam sɔɔja ɛgɔm nɔɔyʋ e-tisuu mbʋ pʋwayɩ fɛyɩ yɔ pɩ-yɔɔ. (Mat. 8:​5-​10) Yesu yɔɔdɩ ɛzɩma Yehowa na agɔma pʋtɔdɩyɛ Nazarɛɛtɩ tɛtʋ ndʋ tɩ-taa paalʋlɩ-ɩ yɔ pɩ-tɔm. Agɔma mba pa-taa nabɛyɛ lɛ, Sarfaatɩ lelu weyi ɛwɛ Fenisi tɛtʋ taa yɔ, nɛ Namaanɩ weyi ɛɛkɛ canaɣ Siirii tɛtʋ taa yɔ. (Luka 4:​25-​27) Nɛ pɩtasɩnɩ se Yesu susi tɔm Samaarii halʋ nɔɔyʋ lɛ, ɛcaɣ Samaarii tɛtʋ ndʋ tɩ-taa kɩyakɩŋ naalɛ mbʋ pʋyɔɔ yɔ, ɛyaa kaasɔɔlaa se pewelisi ɛ-tɔm.​—Yoh. 4:​21-​24, 40. w18.06 10 § 10-​11

Apostoloo Pɔɔlɩ kpaɣ ɖa Krɩstʋ mba ɖe-wezuu caɣʋ nɛ ɛmaɣzɩnɩ sɔɔjanaa mba pɔñɔɔzɩ pa-tɩ se pala you yɔ. Ɛlɛ fezuu taa you ɖɩlakɩ pɩtɩkɛ tomnaɣ yɔɔ ñɩŋgʋ. Nɛ ɖo-koyindinaa wɛ keekee. Sataŋ nɛ aleewaa pɛwɛ niye nɛ pasɩm you labʋ camɩyɛ. Kajalaɣ taa lɛ, pɩwɛ ɛzɩ ɖɩtɩlɩɩ pʋyʋ pɛ-ɛsɩndaa yɔ. Kɔzɩ kɔzɩ lɛ, pɩwɛ ɛzɩ piya evelisi pakamnɩ ñʋʋ yɔ. Ɛzɩma sɩpɩzɩɣ sɩtaa liu se sɩkaɣ wabʋ Sataŋ nɛ aleewaa mba pakpaɖɩ ɛyaa ɖoŋ yɔ? Tɔm lɛ se piya evelisi pɩzɩɣ nɛ sɩwa nɛ sɩwɛɛ nɛ sɩwakɩ ɖɔɖɔ! Ɛbɛ yɔɔ ɖɩyɔɔdʋʋ mbʋ? Mbʋ pʋyɔɔ yɔ ‘si-ɖoŋ lɩɣnɩ Kɩbaɣlʋ taa.’ Ɛlɛ sɩlakɩ nabʋyʋ nɛ pɩcɛzɩ lidaʋ ŋgʋ sɩwɛnɩ Ɛsɔ ɖoŋ yɔɔ yɔ. Sɩñɔɔzɩ sɩ-tɩ se sɩpɩzɩ nɛ sɩla you. Ɛzɩ sɔɔjanaa mba pafalɩsɩ-wɛ camɩyɛ yɔ, ‘sɩsuu you ­won­du’ (Efɛz. 6:​10-​12) Alɩwaatʋ ndʋ Pɔɔlɩ kpakaɣ Krɩstʋ ñɩma wezuu caɣʋ nɛ ɛmaɣzɩɣnɩ sɔɔjanaa yɔ, pɩtɩla yɔ ɛ-lɩmaɣza kaawɛ you ­won­du ndʋ Roma sɔɔjanaa suu yɔ tɩ-yɔɔ.​—Tʋma 28:16. w18.05 27 § 1-2

Lɩmaɣzɩyɛ sɔsɔɖɛ nɖɩ ɖɩ-yɔɔ ɖisusuu tɔm yɔ lɛ se ɖɩtɩŋɩɣnɩ pɩ-yɔɔ nɛ ɖɩsaŋ Yehowa nɛ ɖiyeki ɖɔɖɔ se ɛ-hɩɖɛ ɛsɛɛ ɛjaɖɛ kpeekpe yɔɔ. (Yoh. 15:​1, 8) Ɛlɛ, ɖɩɩpɩzɩɣ nɛ ɖiyele nɛ Yehowa hɩɖɛ wɛɛ kele kele nɛ pɩkpaɖɩ. Ðɩtɛm wɛʋ kele kele ɛzɩ pɩpɔzʋʋ yɔ. Ɛlɛ yʋsɩ tɔm ndʋ nayʋ Izaayii yɔɔdaa yɔ: “Yoyaa kpeekpe [Yehowa] maɣmaɣ ɩsɛɛ [yaa pʋmʋnaa se ɛkɛ kiɖeɖeu mɩ-ɛsɩndaa. nwt]” (Iza. 8:​13) Nʋmɔŋ weyi ɩ-yɔɔ ɖɩtɩŋɩɣna nɛ ɖiyeki se Yehowa hɩɖɛ ɛsɛɛ yɔ, ɩ-taa lɛɛkʋ lɛ ɛzɩma ɖɩtɩlɩɣ se ɛ-hɩɖɛ wɛ ŋgee nɛ hɩla lɛɛna nɛ ɖɩsɩɣnɩ lalaa se ­patɩlɩ se ɖɩkɛ kiɖeɖee yɔ. Alɩwaatʋ ndʋ ­ɖiisusuu toovenim tɔm Yehowa wɛtʋ kɩbandʋ yɔɔ nɛ ɖɩsɩɣnɩ ɛyaa se patɩlɩ se Ɛsɔ wɛnɩ tamaɣ kɩbaŋa ɛyaa yɔɔ nɛ tamaɣ ŋga kaalɛɣzɩɣ yɔ lɛ, pɩwɩlɩɣ se ɖɩlʋkɩ Ɛsɔ hɩɖɛ yɔɔ nɛ ɖɩwɩlɩɣ se Sataŋ kɛ cɛtɩyʋ nɛ kɔlɔmɔtʋ tʋ. (Kiɖe 3:​1-5) Pɩtasɩ lɛ, ye ɖɩñakɩ pana nɛ ɖɩsɩɣnɩ ɖe-egeetiye taa ñɩma se pana se Yehowa pʋmʋnaa se ‘ɛmʋ samtʋ, hɩɖɛ ɖʋʋ nɛ ɖoŋ’ yɔ, ɖɩnɛ ɛlɛ ɖɩwɛɛ nɛ ɖiyeki se ɛ-hɩɖɛ ɛsɛɛ.​—Natʋ 4:​11. w18.05 18 § 3-4

Kajalaɣ lɩmaɣzɩyɛ nɖɩ ɖɩ-yɔɔ pɩwɛɛ se piya evelisi ɩɖʋ sɩ-tɩ fezuu taa kaɖʋsɩ yɔ lɛ se sɩtɩŋɩɣnɩ pɩ-yɔɔ nɛ sɩwɩlɩɣ Yehowa sɩ-ɛsɩmɩyɛ, sɔɔlɩm nɛ mbʋ payɩ ɛlabɩ-wɛ yɔ pɩ-yɔɔ. Ye ŋkɛ pɩɣa evelaɣ yɔ, maɣzɩ nɛ ŋna mbʋ payɩ Yehowa ha-ŋ yɔ: Ñe-wezuu, tisuu mbʋ ŋwɛna yɔ, Bibl, Krɩstʋ ɛgbɛyɛ, nɛ cee wayɩ lidaʋ kɩbaŋʋ ŋgʋ ŋwɛna yɔ. Ye ŋsɩɣ fezuu taa tʋma kajalaɣ lone taa yɔ, pɩwɩlɩɣ se ŋwɛnɩ ɛsɩmɩyɛ Ɛsɔ wazasɩ nzɩ sɩ-yɔɔ nɛ piyeki nɛ ŋñɔtɩnɩ-ɩ nɛ pɩkɩlɩ. Alɩwaatʋ ndʋ ŋwɛɣ nɛ ŋñakɩ pana se ŋtalɩ fezuu taa kaɖʋsɩ nzɩ ŋɖʋ ña-tɩ yɔ lɛ, tʋma kɩbana wena ŋlakɩ Ɛsɔ ɛsɩndaa yɔ, apaɣzɩɣ ɖɔʋ ɖɔɖɔ. Piyeki ɖɔɖɔ nɛ ŋñɔtɩnɩ-ɩ nɛ pɩkpaɖɩ. Apostoloo Pɔɔlɩ yɔɔdaa se: “Ɛsɔ tɩkɛ weyi ɛfɛyɩ siɣsiɣ yɔ se ɛsɔɔ mɩ-tʋmɩyɛ nɛ sɔɔlɩm mbʋ ɩwɩlɩ ɛ-hɩɖɛ yɔɔ alɩwaatʋ ndʋ ɩɖʋ ɛyaa kiɖeɖema lɩm nɛ ɩwɛɛ ɩɖʋʋ-wɛ lɩm yɔ pɩ-yɔɔ.” (Ebr. 6:​10) Taamaɣzɩ kaaʋ se ŋtɩtalɩta se ŋwɛɛnɩ fezuu taa kaɖʋsɩ. Pɩɩwɛɣ ɖeu se ŋɖʋ ña-tɩ kaɖʋsɩ kɩbanzɩ nɛ ŋñakɩ pana se ŋtalɩ-sɩ yaa we?​—Fil. 1:​10, 11. w18.04 26 § 5-6

Kajalaɣ Krɩstʋ ñɩma caɣ wezuu alɩwaatʋ ndʋ Roma ñɩma tɔkaɣ kewiyitu ɛjaɖɛ yɔɔ yɔ, nɛ ɛyaa sakɩyɛ kpazaɣ pa-tɩ se pe-kewiyaɣ kɩlɩnɩ wɛnʋʋ paɣtʋ ndʋ tɩkɔŋnɩ siɣsiɣ wɛtʋ nɛ tɩ-yɔɔ wɛʋ yɔ. Paa mbʋ yɔ, yomaa kaayebina nɛ kewiyaɣ ŋga ka-hɩɖɛ sɛɛ. Alɩwaatʋ natʋyʋ taa, ɛyaa mɩnʋʋ yɔɔ lɛ 30 kaakɛ yomaa. Pɩtʋʋ fɛyɩ se yomiye nɛ tɩ-yɔɔ wɛʋ tɔm ɛyaa kɩlaɣ yɔɔdʋʋ alɩwaatʋ ndʋ tɩ-taa nɛ pɩkpɛndɩnɩ Krɩstʋ ñɩma ɖɔɖɔ. Takayɩsɩ nzɩ Pɔɔlɩ mawa yɔ sɩyɔɔdɩ tɩ-yɔɔ wɛʋ tɔm sakɩyɛ. Paa mbʋ yɔ, tʋmɩyɛ nɖɩ ɛlaba yɔ, ɖɩ-kaɖʋwa kaawɛ ndɩ nɛ samaɣ ñɩŋga, mbʋ pʋyɔɔ yɔ kaka ñɩnaɣ se katɩŋnɩ nʋmɔʋ nakʋyʋ yɔɔ nɛ lɛɣzɩtʋ kɔɔ politiki nʋmɔʋ taa nɛ hɔɔlɩŋ lɛɛŋ taa. Ɛlɛ Pɔɔlɩ nɛ e-koobiya Krɩstʋ ñɩma lalaa pañaɣ pana siŋŋ nɛ posusi Kewiyaɣ laŋhɛzɩyɛ tɔm nɛ kpekpeka nɛ pasɩnɩ ɛyaa se pataa liu Yesu Krɩstʋ kɩhɛyʋʋ pʋ-ñʋʋ taa kɩlaʋ se ki-ɖeke koŋ kɩpɩzɩɣna kiyele nɛ pɛwɛɛ pa-tɩ yɔɔ, nɛ tɛtʋ yɔɔ komina nakʋyʋ ɛɛkaɣ pɩzʋʋ nɛ kɩla mbʋ. Pɔɔlɩ sɩnɩ e-koobiya Krɩstʋ ñɩma nɛ patɩlɩ ɖenɖe tɩ-yɔɔ wɛʋ siŋŋ lɩɣna yɔ. w18.04 8 § 1-2

Ðoo wena a-taa pakpa Yesu yɔ, eheyi apostoloo Pɩyɛɛrɩ sɔnɔ evemiye mayaɣ taa tɔm. Pɩyɛɛrɩ wɩlaa se ɛkɛ tilimiye, kajalaɣ Krɩstʋ ɛgbɛyɛ taa. (Gal. 2:9) Ɛtɩŋnɩ ɛ-kɩɖaʋ kɩbaŋʋ yɔɔ nɛ ɛkpazɩ e-koobiya ɖoŋ Pantekooti wiye nɛ pʋwayɩ ɖɔɖɔ. Ɛtɛzaɣ ɛ-tɔm susuu tʋmɩyɛ lɛ, ɛma e-koobiya Krɩstʋ ñɩma takayaɣ nɛ ɛyɔɔdɩ se: “Mama-mɩ tɔm pazɩ se mankpazɩ-mɩ ɖoŋ nɛ malɩzɩ-mɩ aseɣɖe siŋŋ se lootiye nɖɩ Ɛsɔ labɩ-mɩ yɔ, ɖɩkɛ toovenim. Ɩɖɔkɩ mɩ-tɩ kpam ɖɩ-taa.” (1 Pɩy. 5:​12) Fezuu kiɖeɖeu sɩnɩ Pɩyɛɛrɩ nɛ ɛma takayɩsɩ nzɩ yɔ, sɩkpazɩ Krɩstʋ ñɩma ɖoŋ ɖooo caanaʋ taa, nɛ halɩ nɛ sɔnɔ sɩwɛɛ nɛ sɩkpazɩɣ-ɖʋ ɖoŋ. Ðoŋ kpazʋʋ pʋnɛ pɩ-tɔm cɛyɩ siŋŋ alɩwaatʋ ndʋ ɖɩɖaŋ kpam se Yehowa lidaʋ tɔm ɛla yɔ.​—2 Pɩy. 3:​13. w18.04 17 § 12-13

Paa le, ɛyaa ñɩnɩɣ se pala mbʋ pɔsɔɔlaa yɔ, yaa pacaɣ wezuu ɛzɩ pɔsɔɔlʋʋ yɔ. Pɩwɛ ɛyaa kaɖɛ se patɩlɩ nʋmɔŋ weyi ɩ-yɔɔ patɩŋna nɛ patalɩ pa-kaɖʋsɩ nzɩ yɔ. Politiki nʋmɔʋ taa nɛ hɔɔlɩŋ lɛɛŋ taa lɛ, sakɩyɛ tɩŋɩɣnɩ ñʋndɩnaa kaɖɩnʋʋ, nɔɔhɔnɖɛ, puuyaɣ lakasɩ nɛ halɩ you yɔɔ se pɩsa nɛ pɛwɛɛ pa-tɩ yɔɔ. Ɛlɛ papɩzaa nɛ patalɩ pa-kaɖʋwa na? Aayɩ, ɛlɛ ɖoŋ ɖoŋ lɛ, pɩkɔŋnɩ-wɛ kʋñɔmɩŋ sakɩyɛ nɛ nabɛyɛ lesiɣ pe-weziŋ. Wɛtʋ tʋnɛ tɩwɩlɩɣ kpayɩ kpayɩ se tɔm ndʋ fezuu kiɖeɖeu sɩnɩ Salomɔɔ nɛ ɛma se “ɛyʋ ñazɩɣ ɛyʋ nɛ ɛwɩlɩɣ-ɩ kʋñɔŋ” yɔ, tɩkɛ toovenim. (Ekl. 8:⁠9) Yakubu ñɩɣ niye mbʋ ɛyʋ pɩzɩɣ ɛla nɛ ehiɣ taa leleŋ nɛ koboyaɣ siŋŋ yɔ pɩ-yɔɔ sɔnɔ evemiye mayaɣ taa. Yehowa weyi ɛɖʋ paɣtʋ ndʋ tɩtalɩ pilim yɔ, ɛsɩm mbʋ payɩ pɩpɔzʋʋ ɛyaa nɛ papɩzɩ nɛ pɛwɛɛ taa leleŋ nɛ koboyaɣ taa siŋŋ yɔ. Ɛha kajalaɣ halʋ nɛ abalʋ mbʋ payɩ pɩpɔzʋʋ-wɛ se pɛwɛɛ taa leleŋ taa yɔ halɩ pɩkpɛndɩnɩ tɩ-yɔɔ wɛʋ siŋŋ. w18.04 3 § 1-3