Alɩwaatʋ ndʋ wezuu caɣʋ lɩɣ ɛyʋ sɔŋ yɔ

Ðɩkpaɣ ɛzɩ Sallya weyi ɛwɛ Etaazuunii yɔ, helim sɔsɔm nabʋyʋ maba nɛ elesi ɛ-ñɩm hɔɔlʋʋ sɔsɔʋ lɛ, ɛyɔɔdaa se: “Mamaɣzaɣ se pɩcɛzɩ-m. Nɩɣzɛ nɛ siziŋ kaacɛzɩ-m nɛ pɩlakɩ-m ɛzɩ mɔn-tɔm tɛma yɔ.”

Nɛ ye ñɛ-ɛyʋ kʋsɔɔlʋ nɔɔyʋ ɛsɩba? Janice, weyi ɛwɛ Ositralii yɔ, ɛyɔɔdaa se: “Alɩwaatʋ ndʋ man-pɩyalaa naalɛ sɩba yɔ, mantaanaɣ se mankpaɣnɩ le nɛ pɩsa nɛ mantasɩ caɣʋ wezuu. Mentendi Ɛsɔ se: ‘Hayɩ! Wɩzasɩ nzɩ sɩ-taa mɛwɛɛ yɔ sɩcɛzɩ-m! Yele nɛ mɛntɛzɩ sɩbʋ. Mantɩsɔɔlɩ se mantasɩ wezuu caɣʋ.’”

Daniel ɛlɛ laŋɩyɛ kaawɛɛkɩ siŋŋ alɩwaatʋ ndʋ ɛ-halʋ labɩ acɛyɛ yɔ. Ɛlɩzɩ pɩ-taa se: “Alɩwaatʋ ndʋ ma-halʋ heyi-m se ɛlabɩ acɛyɛ yɔ, pɩɩlabɩ-m ɛzɩ sɩɣa nakɛyɛ pɔsɔbɩ ma-laŋɩyɛ taa yɔ. Wɩzasɩ nzɩ sɩɩwɛɛ nɛ sɩsʋʋ-m mbʋ fenasɩ sakɩyɛ.”

Feŋuu Tilimiye takayaɣ kanɛ, kakaɣ-ɖʋ wɩlʋʋ mbʋ pɩpɩzɩɣ nɛ pɩsɩnɩ ɛyʋ alɩwaatʋ ndʋ

• Asɛyʋʋ nakʋyʋ talɩɣ-ɩ yɔ

• Ɛ-ɛyʋ kʋsɔɔlʋ nɔɔyʋ sɩkɩ yɔ

• Ɛ-tɛŋga lakɩ acɛyɛ yɔ

• Ɛlʋkɩnɩ kʋdɔŋ sɔsɔʋ nakʋyʋ yɔ

• Wezuu caɣʋ lɩɣ-ɩ sɔŋ yɔ

Ye mbʋ, kajalaɣ lɛ, ɛzɩma ɛyʋ pɩzɩɣ nɛ ɛla alɩwaatʋ ndʋ asɛyʋʋ nakʋyʋ talɩɣ-ɩ yɔ?