Tɔm ndʋ ɖa-takayɩsɩ kalɩyaa pɔzʋʋ yɔ

Alɩwaatʋ ndʋ Sataŋ heyi Ɛva se ye ɛtɔɔ kɩbandʋ nɛ kɩdɛkɛdɩm pa-sɩmtʋ tɩʋ piye ɛɛkaɣ sɩbʋ yɔ, ɛzɩ eeheyi-i ɖɔɖɔ lɩmaɣzɩyɛ nɖɩ ɖɩtɔyɩ sɔnɔ se kalɩzaɣ ɛɛsɩkɩ yɔ ɖɩ-tɔm na?

Eleeu tiheyi Ɛva se ye ɛtɔɔ tɩʋ piye nɖɩ Ɛsɔ kizaa se pataatɔɔ yɔ, ɛsɩkɩ ɛsa yɔɔ yem nɛ ɛ-hɔɔlʋʋ ŋgʋ paanaɣ-kʋ (ŋgʋ ɛyaa nabɛyɛ yaɣ sɔnɔ se kalɩzaɣ maasɩkɩ) yɔ, kɩwɛɛ wezuu ɖoli. Sataŋ tɩŋnɩ ɖʋm yɔɔ nɛ eheyi Ɛva se ye ɛtɔɔ tɩʋ ŋgʋ ki-piye yɔ, ‘ɛɛkaɣ sɩbʋ’ siŋŋ. Ɛ-tɔm ndʋ, tɩwɩlɩɣ se Ɛva kaɣ wobu pɩ-yɔɔ nɛ ɛcaɣ wezuu, ɛnɩɩ wezuu leleŋ tɛtʋ yɔɔ nɛ ɛwɛɛ ɛ-tɩ yɔɔ nɛ Ɛsɔ eeɖiyiɣ-i.​—Kiɖe 2:17; 3:3-5.

Cɛtɩm tɔm ndʋ tɩyɔɔdʋʋ kalɩzaɣ maasɩkɩ tɔm nɛ pawɩlɩɣ-tʋ sɔnɔ yɔ, ye tɩtɩlɩɩnɩ Edɛɛnɩ, ɛzɩmtaa papaɣzɩ-tʋ wɩlʋʋ yɔ? Ðɩɩpɩzɩɣ nɛ ɖɩtɩlɩ keekee. Ðɩnawa se paɖɩzɩ cɛtɩm Ɛsɔ sɛtʋ tɩŋa tɛʋ sɔsɔʋ alɩwaatʋ taa, Noowa wɛɛ taa. Noowa nɛ ɛ-hɔʋ pe-ɖeke pehiɣni ñʋʋ yabʋ tɛʋ sɔsɔʋ alɩwaatʋ taa nɛ pa-tɩŋa paakɛ toovenim Ɛsɔ sɛyaa. Nɔɔyʋ taawɛɛ alɩwaatʋ ndʋ tɩ-taa nɛ ɛwɩlɩɣ cɛtɩm Ɛsɔ sɛtʋ wɩlɩtʋ natʋyʋ.

Ye mbʋ, wɩlɩtʋ ndʋ tɩtɔŋ se ɛyʋ kalɩzaɣ ɛɛsɩkɩ yɔ, pɩtʋʋ fɛyɩ se tɩpaɣzɩ tɛʋ sɔsɔʋ wayɩ na. Alɩwaatʋ ndʋ Ɛsɔ yeba nɛ kʋnʋmɩŋ sidi Babɛɛlɩ nɛ ɛyaa ‘mɩzɩ tɛtʋ kpeekpe yɔɔ’ yɔ, pɩtʋʋ fɛyɩ se paawɛnɩ kalɩzaɣ maasɩkɩ lɩmaɣza. (Kiɖe 11:8, 9) Paa ɛzɩmtaa cɛtɩm tɔm tʋnɛ tɩpaɣzaa yɔ, ɖa-taa pɩzɩɣ nɛ pɩtɛ se “cɛtɩm caa,” Sataŋ Eleeu wɛnɩ tɩ-wayɩ nɛ ɛ-taa lakɩ leleŋ alɩwaatʋ ndʋ ɛnaɣ se tɩwɛɛ nɛ tɩyɛlɩɣ yɔ.​—Yoh. 8:44.