Ñaɣ pana nɛ ŋcakɩ alɩwaatʋ yɔɔ tam
1. Kɩɖaʋ ŋgʋ Yehowa ha-ɖʋ alɩwaatʋ yɔɔ caɣʋ nʋmɔʋ taa?
1 Yehowa cakɩ alɩwaatʋ yɔɔ paa ɛzɩmtaa. Maɣzɩ kɩɖaŋ ɛnɛ ɩ-yɔɔ nɛ ŋna: Yehowa sɩɣnɩ ɛ-sɛyaa ‘alɩwaatʋ ndʋ tɩmʋnaa yɔ, tɩ-yɔɔ.’ (Ebree 4:16) Ɛhaɣ ɖɔɖɔ fezuu taa tɔɔnaɣ “kɩyakʋ ŋgʋ pɩmʋnaa yɔ.” (Maatiyee 24:45) Ye mbʋ ɖɩpɩzɩɣ nɛ ɖitisi se ɛ-pana kɩkʋ ŋgʋ kiɖiɣni kɔm yɔ, ‘kɩɩkaɣ caɣʋ wayɩ.” (Habakuuki 2:3) Yehowa cakʋʋ alɩwaatʋ yɔɔ yɔ, pɩwazɩɣ-ɖʋ pɩdɩɩfɛyɩ! (Keɣa 69:6) Ðɩwɛnɩ tʋma sakɩyɛ nɛ ɖɩkɛ mantɩtalɩ pilimwaa, pʋyɔɔ lɛ, pɩpɩzɩɣ nɛ pɩlabɩ-ɖʋ kaɖɛ se ɖɩcakɩ alɩwaatʋ yɔɔ. Ɛlɛ, ɛbɛ yɔɔ pɩcɛyaa kpem se ɖɩñakɩ pana nɛ ɖɩcakɩ alɩwaatʋ yɔɔ tam?
2. Ye ɖɩcakɩ alɩwaatʋ yɔɔ yɔ, ɛbɛ yɔɔ pɩɖʋʋ Yehowa hɩɖɛ?
2 Kɛdɛzaɣ kɩyakɩŋ ɛnɛ ɩ-taa ɛyaa sɔɔlɩ pa-tɩ yeke na nɛ paasɩŋ pa-tɩ ɖɔkʋʋ, pʋyɔɔ pɩwɛ kaɖɛ kpem se ɛyʋ ɛcaɣ alɩwaatʋ yɔɔ. (2 Tim. 3:1-3) Mbʋ yebina nɛ ye Krɩstʋ mba ɩɩcakɩ wayɩ pa-tʋma taa, yaa pɔɖɔŋ alɩwaatʋ ndʋ paɖʋʋ ɛyaa yɔ, tɩ-yɔɔ yaa pɔkɔŋ kediɣzisi alɩwaatʋ yɔɔ yɔ, lalaa naɣ nɛ pɩɖʋʋ Yehowa hɩɖɛ. (1 Pɩy. 2:12) Ðiwoki ɖa-tʋma taa alɩwaatʋ yɔɔ nɛ ɖɩcakɩ wayɩ teokrasɩ tʋma taa? Ye ɖiwoki kediɣzisi alɩwaatʋ yɔɔ pʋcɔ nɛ kajalaɣ hendu nɛ kajalaɣ adɩma paɣzɩ yɔ, ɖɩwɩlɩɣ se ɖɩsɔɔlaa se ɖɩmaɣzɩnɩ ɖa-Caa weyi ɛwɛ ɛsɔdaa nɛ ɛsɩɣ wondu ti-lona taa yɔ.—1 Kɔr. 14:33, 40.
3. Ɛbɛ yɔɔ pɔtɔŋ se alɩwaatʋ yɔɔ caɣʋ wɩlɩɣ se ɖɩhaɣ lalaa ñamtʋ?
3 Ye ɖɩcakɩ alɩwaatʋ yɔɔ yɔ, pɩwɩlɩɣ se ɖɩhaɣ lalaa ñamtʋ. (Filiipu 2:3, 4) Ye ɖɩɩkɔŋ kediɣzisi alɩwaatʋ yɔɔ, pɩkpɛndɩnɩ tɔm susuu kediɣzisi yɔ, piyiɣdiɣ ɖo-koobiya lɩmaɣza taa yem falaa. Pɩtasɩ lɛ, ye ɖɩcakɩ wayɩ ɖoŋ ɖoŋ yɔ, pɩlakɩ lalaa ɛzɩ ɖɩmaɣzɩɣ se ɖa-alɩwaatʋ wɛ ñɩm nɛ pɩkɩlɩ pa-ñɩndʋ yɔ. Weyi ɛcakɩ alɩwaatʋ yɔɔ yɔ, papɩzɩɣ nɛ pataa-ɩ liu, ɛwɩlɩɣ se ɛwɛ kpekpeka. Ye ɖɩwɛnɩ wɛtʋ ndʋ yɔ, tɩkɛdɩɣnɩ ɛyaa mba ɖa nɛ ɖɩwɛɛ yɔ.
4. Ye ɖɩcakɩ wayɩ ɖoŋ ɖoŋ yɔ, ɛbɛ ɖɩpɩzɩɣ ɖɩla nɛ ɖɩlɛɣzɩ?
4 Ye ɖɩcakɩ wayɩ ɖoŋ ɖoŋ yɔ, ɖɩmaɣzɩ nɛ ɖɩna se ɛbɛ yeba nɛ pɩlakɩ mbʋ. Ðɩla ɖʋtʋ kɩbandʋ ndʋ tɩhaɣ-ɖʋ nʋmɔʋ se ɖɩla paa tʋmɩyɛ nɖɩ lɛ ɖɩ-alɩwaatʋ yɔɔ yɔ. (Eklesɩyastɩ 3:1; Filiipu 1:10) Ðɩpɔzɩ Yehowa se ɛsɩnɩ-ɖʋ. (1 Yohanɛɛsɩ 5:14) Ye ɖɩcakɩ alɩwaatʋ yɔɔ yɔ, pɩwɩlɩɣ se ɖɩwɛnɩ ɛsɩmɩyɛ paɣtʋ naalɛ ndʋ tɩ-tɔm kɩlɩ cɛyʋʋ yɔ, tɩ-yɔɔ. Ndʋ yɔ: Sɔɔlɩ Ɛsɔ nɛ ŋsɔɔlɩ ño-koobu.—Maatiyee 22:37-39.