Samaɣ taa tɔm susuu nʋmɔʋ kɩfalʋʋ ŋgʋ kɩwɛ ɖeu siŋŋ yɔ
1. Ɛbɛ peseɣti agbaa wena awɛnɩ lona wena a-taa ɛyaa sakɩyɛ tɩŋɩɣ ɖoŋ ɖoŋ yɔ se ala?
1 Paaseɣti agbaa wena awɛnɩ lona wena a-taa ɛyaa tɩŋɩɣ ɖoŋ ɖoŋ yɔ se ala ɖʋtʋ nɛ alakɩ samaɣ taa tɔm susuu pɩtɩŋnɩ taabɩlɩnaa yaa présentoir waa yɔɔ. Ye palakɩnɩ tʋmɩyɛ présentoir yɔ, pɩpɔzʋʋ se tɔm susuyu kʋɖʋm (pɩpɩzɩɣ nɛ pɩɖɛɛ mbʋ) ɛsɩŋ yaa ɛcaɣ kɩ-cɔlɔ. Ɛlɛ ye palakɩnɩ tʋmɩyɛ taabɩlɩ yɔ, pɩpɔzʋʋ se tɔm susuyaa naalɛ ɩcɔnɩnɩ ki-ɖeɖe. Mba pɛwɛɣ présentoir yaa taabɩlɩ cɔlɔ yɔ, pɩpɔzʋʋ se pɛwɛɛ kpekpeka, pɔyɔɔdʋʋnɩ nɔɔ kɩbaŋa nɛ pamʋʋ ɛyaa camɩyɛ. Ye nɔɔyʋ ɛkɔm nɛ ɛcɔŋnɩ mbʋ pasɩ présentoir yaa taabɩlɩ yɔɔ yɔ, tɔm susuyaa taa kʋɖʋm pɩzɩɣ nɛ ɛpaɣzɩnɩ-ɩ yɔɔdɩnʋʋ; ɛpɩzɩɣ nɛ ɛpɔzɩ-ɩ se: “Wiɖiyi ŋtɛm pɔzʋʋ ña-tɩ se suwe Bibl wɩlɩɣ tɔm tʋnɛ tɩ-yɔɔ?” Alɩwaatʋ ndʋ tɩ-taa lɛ, pɩpɔzʋʋ se tɔm susuyaa lalaa (pɩpɩzɩɣ pɩkɛ kʋɖʋm yaa naalɛ) mba ɛ nɛ wɛ pɛwɛ peeɖe yɔ, paba ɩlɩzɩɣ alɩwaatʋ fanʋʋ aseɣɖe pɩ-cɔlɔ peeɖe kpam.
2. Ha kɩɖaʋ nakʋyʋ ŋgʋ kɩwɩlɩɣ se samaɣ taa tɔm susuu lʋlʋʋ pee kɩbana yɔ.
2 Tɔm susuu nʋmɔʋ kɩfalʋʋ kʋnɛ kiyeba nɛ papaɣzɩ Bibl kpɛlɩkʋʋ nɛ ɛyaa sakɩyɛ. Sukuli sɔsɔʋ taa sukulibɩɣa nakɛyɛ kaañɩnaɣ se kama tɔm Yehowa Aseɣɖe Tɩnaa yɔɔ alɩwaatʋ ndʋ kɔñɔɔzaɣ ka-tɩ se kala santaɖaʋ nakʋyʋ yɔ, ɛlɛ kataatɩlɩ ɖenɖe kapɩzɩɣ nɛ kana Kewiyaɣ Kpaaŋ nakʋyʋ yɔ. Kpɩtaʋ kʋɖʋmʋʋ wayɩ lɛ, kana taabɩlɩ nakʋyʋ yɔɔ Yehowa Aseɣɖe Tɩnaa takayɩsɩ ko-sukuli taa. Peeɖe kapaɣzɩ Bibl kpɛlɩkʋʋ, nɛ sɔnɔ lɛ, kapɩsɩ koobu nɛ kalakɩ ɖɔɖɔ samaɣ taa tɔm susuu tʋmɩyɛ nɖɩ.
3. Suwe nabɛyɛ maɣzɩɣ samaɣ taa tɔm susuu yɔɔ?
3 Koobu halɩñɩnʋ weyi ɛɛɖʋ nesi samaɣ taa tɔm susuu tʋmɩyɛ yɔ, ɛtɔm se: “Nabɛyɛ sɩŋɩɣ nɛ pakpakɩɣ fenaɣ ŋga ka-taa ɖɩwɛɛ yɔ, ka-takayɩsɩ. Lalaa ñataanɩɩ Yehowa Aseɣɖe Tɩnaa tɔm wiɖiyi kpa. Manpɩzaa nɛ mana se pɩtɩŋnɩ nʋmɔʋ kʋnɛ kɩ-yɔɔ lɛ, papɩzɩɣ nɛ potukuni ɛyaa sakɩyɛ.” Koobu halɩñɩnʋ lɛlʋ ñɔtɔm se: “Pɩkɛnɩ tɔm susuu nʋmɔʋ kɩfalʋʋ ŋgʋ kɩwɛ ɖeu siŋŋ yɔ, mbʋ pʋyɔɔ yɔ, ɛyaa maɣmaɣ kɔŋnɩ ñɔ-cɔlɔ nɛ paa pɩtɩkɛdɩnɩ nɔɔyʋ siŋŋ yɔ, ɛkɔŋ mbʋ se ɛna.”
4. Ɛbɛ yɔɔ pɩwɛ ɖeu se kpɩtaʋ taa lɛ, palɩzɩ kɩyakɩŋ nɩɩyɩ nɛ pasɩɣ présentoir yaa taabɩlɩ lone kʋyʋmɖɩyɛ taa nɛ alɩwaatʋ kʋyʋmtʋ yɔɔ?
4 Pɩwɛɣ ɖeu se kpɩtaʋ taa lɛ, palɩzɩ kɩyakɩŋ nɩɩyɩ, nɛ i-wiye lɛ, pasɩɣ présentoir yaa taabɩlɩ lone kʋyʋmɖɩyɛ taa nɛ alɩwaatʋ kʋyʋmtʋ yɔɔ. Piyeki nɛ, ɛyaa naɣ présentoir yaa taabɩlɩ ɖoŋ ɖoŋ, nɛ papɩzɩ nɛ pɔñɔtɩnɩ-kʋ faaa nɛ pɔpɔzɩ tɔm yaa pamʋ takayɩsɩ. Palakɩ samaɣ taa tɔm susuu mɩ-ɛgbɛyɛ taa? Ye ɛɛɛ, ŋpɩzɩɣ nɛ ŋɖʋ nesi tɔm susuu nʋmɔʋ kɩbaŋʋ kʋnɛ, ŋgʋ kɩhaɣ taa leleŋ nɛ kɩlʋlʋʋ pee kɩbana yɔ, nɛ ŋtɩŋnɩ kɩ-yɔɔ nɛ “ŋsusi Ɛsɔ Kewiyaɣ tɔm.”—Luka 9:60.