Pɩnaɣ 2015 Teokrasɩ Ɛsɔ sɛtʋ sukuli sɩɣnɩ-ɖʋ se ɖɩwɛɛ niye tɔm wɩlʋʋ taa
1 Keɣa maɖʋ Daviid mawa se: “Mʋ mɔ-nɔɔ taa tɔm, mʋ ma-laŋɩyɛ midiɣ ndʋ yɔ, yele tɩtalɩ ñɛ-ɛzɩdaa, [Yehowa], mon-ɖoŋ kaaʋ nɛ ma-mʋyʋ.” (Keɣa 18:15) Ða ɖɔɖɔ ɖɩsɔɔlaa se ɖɔ-nɔɔ taa tɔm ɛkɛdɩnɩ Yehowa. Nɛ pɩkɛnɩ-ɖʋ hɩɖɛ ɖʋʋ siŋŋ se ɛha-ɖʋ waɖɛ se ɖɩyɔɔdʋʋ toovenim tɔm ɛgbɛyɛ taa nɛ tɔm susuu taa. Nʋmɔŋ weyi ɩ-yɔɔ Yehowa tɩŋɩɣna nɛ ɛfalɩsɩɣ-ɖʋ se ɖɩkpasɩ tɔm susuu taa yɔ, ɩ-taa nakʋyʋ lɛ Teokrasɩ Ɛsɔ sɛtʋ sukuli. Sukuli kʋnɛ palakɩ-kʋ paa kpɩtaʋ ŋgʋ agbaa wena acɛzɩ 111000 yɔ, a-taa ɛjaɖɛ kpeekpe yɔɔ. Kɩsɩnɩ koobiya mba pɛwɛ wɛtʋ ndɩ ndɩ taa kedeŋa kpeekpe yɔɔ yɔ se pakpasɩ tɔm susuu taa nɛ pawɩlɩɣ tɔm nɛ pitukuuni ɛyaa laŋa nɛ pɔyɔɔdʋʋ tɔm nɛ lɛɣtʋ nɛ abalɩtʋ.—Tʋma 19:8; Kol. 4:6.
2 Pɩnaɣ 2015 tɛ teokrasɩ sukuli ɖʋtʋ taa ɖɩkaɣ labɩnʋʋ tʋmɩyɛ nɛ takayɩsɩ sɩnɛ: Laŋhɛzɩyɛ Tɔm Ndʋ Tɩlɩnɩ Ɛsɔ Cɔlɔ Yɔ, Ñɔ-hɔʋ pɩzɩɣ nɛ kɩwɛɛ koboyaɣ taa nɛ Bibl Kɛdasɩ Takayaɣ. Pɩtasɩ lɛ, alɩwaatʋ ndʋ palakɩnɩ Bibl kalʋʋ nɛ sukulibɩɣa No. 1 tʋma yɔ, paɖaɣnɩ-tʋ lɛɣzʋʋ. Tayʋʋ mbʋ pɩkɔŋ yɔ, pɩkaɣ yɔɔdʋʋ lɛɣzɩtʋ tʋnɛ nɛ ɛzɩma pɩwɛɛ se sukulibiya ɩla sɩ-tʋma yɔ, pɩ-tɔm.
3 Bibl kalʋʋ taa lɩmaɣza kɩcɛyɩyɛ: Koobu weyi pahaɣ-ɩ hɔɔlʋʋ kʋnɛ yɔ, pɩwɛɛ se ɛkpaɣ cɛcɛsɩ naalɛ nɛ ɛtazɩnɩ kpɩtaʋ taa Bibl kalʋʋ hɔɔlʋʋ taa lɩmaɣzɩyɛ nɖɩ ɛnawa se ɖɩpɩzɩɣ nɛ ɖɩsɩnɩ koobiya fezuu taa yɔ. Pʋyɔɔ lɛ, pɩpɔzʋʋ se ɛñɔɔzɩ ɛ-tɩ camɩyɛ nɛ pɩsa nɛ lɩmaɣzɩyɛ kɩbanɖɛ nɖɩ ɛlɩzaa se ɛyɔɔdɩ nɛ pɩsɩnɩ koobiya yɔ, ɖɩɩtaacɛzɩ cɛcɛsɩ 2 yɔɔ. Pʋwayɩ lɛ, ɛzɩ ɖɩtɩɩlakʋʋ yɔ, ɛha tɔm welisiyaa cɛcɛsɩ loɖo nɛ pa-taa paa anɩ ɛyɔɔdɩ tɔm pazɩ kɛlɛmwaa 30 taa yaa pɩtaatalɩ mbʋ nɛ pawɩlɩ mbʋ pɩkɛdɩnɩ-wɛ kpɩtaʋ taa Bibl kalʋʋ taa yɔ. Pɩpɔzaa ɖɔɖɔ se koobiya ɩñɔɔzɩ pa-tɩ camɩyɛ pʋcɔ nɛ papɩzɩ nɛ pɔyɔɔdɩ tɔm ndʋ tɩkpazɩɣ lalaa ɖoŋ yɔ kɛlɛmwaa 30 taa. Pañaɣ pana nɛ pala mbʋ yɔ, pɩfalɩsɩɣ-wɛ siŋŋ nɛ pɩsɩɣnɩ ɖɔɖɔ lalaa se papɩzɩ nɛ pɔyɔɔdɩ lɔŋ weyi pɛkpɛlɩkɩ hɔɔlʋʋ ŋgʋ kɩ-taa yɔ.
4 Tʋmɩyɛ No. 1: Papasɩ Bibl kalʋʋ alɩwaatʋ yɔɔ lɛɛlɛɛyɔ se tɩmaɣnɩ cɛcɛsɩ naadozo yaa pɩtaatalɩ mbʋ nɛ hɔɔlʋʋ ŋgʋ pakalɩɣ yɔ, kɩtɩtasɩ ɖɔʋ ɖɔɖɔ ɛzɩ ɖooo lɛ yɔ. Ɛyaa mba pahaɣ-wɛ tʋmɩyɛ ɖɩnɛ yɔ, pʋcɔ nɛ palabɩ-ɖɩ ɛgbɛyɛ ɛzɩdaa lɛ, pɩcɛyaa se pakalɩ hɔɔlʋʋ ŋgʋ paha-wɛ yɔ, tam sakɩyɛ nɛ nɔɔ kɩkʋyaɣ nɛ payaa tɔm pee nɛ alɩɩ camɩyɛ kpayɩ kpayɩ nɛ lɩmaɣza wena pakalɩɣ yɔ, a-taa nɩʋ wɛɛ ɖɔɖɔ kɛlɛʋ. Ɛzɩma kalʋʋ tɔm cɛyɩ siŋŋ ɖɛ-Ɛsɔ sɛtʋ taa yɔ, pɩwɛɛ se Yehowa sɛyaa kpeekpe ɛñaɣ pana nɛ pɛkɛ tɔm kalɩyaa kɩbama. Ða-taa wɛ leleŋ pɩdɩɩfɛyɩ se ɖe-piya sakɩyɛ sɩm kalʋʋ camɩyɛ nɛ ɖɩsaŋ lʋlɩyaa ɛzɩma pañakɩ pana nɛ pasɩɣnɩ pe-piya nɛ sɔɔlɩm se sɩkɛnɩ tɔm kalɩyaa kɩbama yɔ.
5 Tʋmɩyɛ No. 2: Koobu halɩñɩnʋ pɩwɛɛ se paha tʋmɩyɛ ɖɩnɛ nɛ ɛlabɩ-ɖɩ cɛcɛsɩ kagbanzɩ taa. Tɔm ñʋʋ ŋgʋ paha-ɩ yɔ, ŋgʋ pɩwɛɛ se ɛlabɩnɩ tʋmɩyɛ. Pɩwɛɛ se ɛɛlakɩ ɛ-tʋmɩyɛ lɛ, ɛñɩɣ niye hɔɔlʋʋ ŋgʋ kɩpɩzɩɣ nɛ kɩsɩnɩ koobiya se pɛwɛɛ niye tɔm susuu taa yaa pɛwɛɛnɩ fezuu taa wɛtʋ kɩbandʋ natʋyʋ yɔ, kɩ-yɔɔ. Pɩtasɩ lɛ, ɛpɩzɩɣ nɛ ɛlabɩnɩ tʋmɩyɛ masɩ nzɩ sɩsɩɣna se panɩɩ tɔm ñʋʋ taa camɩyɛ yɔ. Sukuli yɔɔ cɔnɩyʋ haɣnɩ-ɩ weyi pɩwɛɛ se ɛ nɛ ɩ pala tʋmɩyɛ yɔ.
6 Tʋmɩyɛ No. 3: Papɩzɩɣ nɛ paha tʋmɩyɛ ɖɩnɛ koobu halɩñɩnʋ yaa koobu abalɩñɩnʋ nɛ ɛlabɩ-ɖɩ cɛcɛsɩ kagbanzɩ taa. Ye koobu halɩñɩnʋ paha tʋmɩyɛ nɖɩ yɔ, pɩwɛɛ se ɛlabɩ-ɖɩ ɛzɩ sukulibɩɣa naalɛ ñɩŋga lakʋʋ ka-tʋmɩyɛ yɔ. Ye koobu abalɩñɩnʋ paha tʋmɩyɛ ɖɩnɛ yɔ, pɩwɛɛ se ɛlabɩ-ɖɩ ɛzɩ palakʋʋ samaɣ taa tɔm yɔɔdʋʋ yɔ, ɛmaɣzɩ ɖɔɖɔ ɛgbɛyɛ taa mba kɩcɛyɩm yɔɔ. Weyi paha-ɩ tʋmɩyɛ yɔ, pɩwɛɛ se ɛyɔɔdɩ tɔm ñʋʋ ŋgʋ paha-ɩ yɔ, kɩ-yɔɔ tɔm, ɛlɩzɩ masɩ nzɩ sɩmʋnaa yɔ nɛ ɛñɩɣ niye lɔŋ weyi pɩkpɛlɩkɩɣ-ɖʋ yɔ ɩ-yɔɔ camɩyɛ.
7 Ðʋtʋ kɩfatʋ ndʋ titukuuni koobiya abalaa mba pahaɣ-wɛ tʋmɩyɛ No. 3 yɔ: Ye Laŋhɛzɩyɛ Tɔm Ndʋ Tɩlɩnɩ Ɛsɔ Cɔlɔ Yɔ yaa Ñɔ-hɔʋ pɩzɩɣ nɛ kɩwɛɛ koboyaɣ taa takayaɣ taa palɩzɩnɩ ɛ-tʋmɩyɛ yɔ, pɩpɔzʋʋ se ɛlabɩ-ɖɩ ɛzɩ la ŋwɩlɩ ŋgʋ kɩ-taa peɖiɣni hɔʋ taa Bibl kpɛlɩkʋʋ labʋ yɔ, yaa ŋgʋ kɩwɩlɩɣ tɔm susuu taa wɛtʋ natʋyʋ yɔ. Ðoŋ ɖoŋ lɛ, sukuli yɔɔ cɔnɩyʋ haɣnɩ weyi pɩwɛɛ se ɛ nɛ koobu abalʋ ɛnʋ pala la ŋwɩlɩ ŋgʋ yɔ wɛtʋ (cadre) ndʋ tɩ-taa pɩwɛɛ se palabɩ-kʋ yɔ. Weyi ɛ nɛ koobu abalʋ ɛnʋ pakaɣ labʋ la ŋwɩlɩ ŋgʋ yɔ, ɛpɩzɩɣ nɛ ɛkɛnɩ koobu abalʋ ɛnʋ ɛ-hɔʋ taa tʋ nɔɔyʋ yaa ɛgbɛyɛ taa koobu abalʋ nɔɔyʋ. Bibl masɩ nzɩ sɩsɩɣnɩ se panɩɩ ɛ-tɔm ñʋʋ taa camɩyɛ yɔ, ɛpɩzɩɣ nɛ ɛlabɩnɩ-sɩ tʋmɩyɛ paa sɩfɛyɩ hɔɔlʋʋ ŋgʋ paha-ɩ yɔ, kɩ-taa yɔ. Nabʋyʋ taa lɛ, pakaɣ haʋ tʋmɩyɛ nɖɩ ɛgbɛyɛ taa ɛzʋtʋyʋ. Ye pɩkɛ ɛgbɛyɛ taa ɛzʋtʋyʋ yɔ, ɛpɩzɩɣ ɛlɩzɩ weyi ɛsɔɔlaa se ɛ nɛ ɩ pala la ŋwɩlɩ yɔ, nɛ wɛtʋ ndʋ tɩ-taa ɛsɔɔlaa se ɛlabɩ-kʋ yɔ. Pɩtʋʋ fɛyɩ se ye ɛgbɛyɛ taa ɛzʋtʋyaa ɩlakɩ la ŋwɩlɩwaa mba nɛ pawɩlɩɣ se pɛwɛ niye tɔm wɩlʋʋ taa yɔ, pɩkaɣ koobiya kpazʋʋ ɖoŋ siŋŋ.
Mʋʋ lɔŋ tasʋʋ nɛ taa leleŋ nɛ ŋlakɩnɩ-pʋ nɛ tʋmɩyɛ nɛ pɩsɩnɩ-ŋ nɛ ŋɖɛɛnɩ ɛzɩdaa fezuu taa
8 Lɔŋ tasʋʋ: Paa sukulibɩɣa ŋga, kɛtɛŋ lɛ, sukuli yɔɔ cɔnɩyʋ kpaɣ cɛcɛsɩ naalɛ nɛ ɛsamnɩ-kɛ hɔɔlʋʋ ŋgʋ kalabɩ camɩyɛ yɔ, nɛ ɛyɔɔdɩ ɖɔɖɔ hɔɔlʋʋ ŋgʋ, kɩ-taa lɔŋ tasʋʋ mbʋ pɩwɛ Tirez profit de l’École du ministère théocratique takayaɣ taa yɔ. Sukuli yɔɔ cɔnɩyʋ kaayaɣ sukulibɩɣa se kɔkɔɔ nɛ kala ka-tʋmɩyɛ lɛ, pɩtɩpɔzɩ se ɛyɔɔdɩ hɔɔlʋʋ (Leçon) ŋgʋ kɩ-yɔɔ ɛkaɣ-kɛ lɔŋ tasʋʋ yɔ, kɩ-tɔm. Paa sukulibɩɣa ŋga kɛtɛŋ ka-tʋmɩyɛ lɛ, sukuli yɔɔ cɔnɩyʋ sam-kɛ nɛ ɛyɔɔdɩ hɔɔlʋʋ (Leçon) ŋgʋ paaha-kɛ yɔ, nɛ mbʋ pɩwɩlɩɣ se kalabɩ kɩ-yɔɔ tʋmɩyɛ yɔ, yaa ɛyɔɔdɩnɩ nɔɔ kɩbaŋa ɛzɩma sukulibɩɣa ŋga kaapɩzaɣ se kala nɛ piɖe camɩyɛ nɛ pɩkpaɖɩ yɔ.
9 Hɔɔlɩŋ weyi ɩ-yɔɔ pɩwɛɛ se patɩŋna nɛ patasɩ lɔŋ sukulibiya yɔ, ɩwɛ École du ministère takayaɣ hɔɔlɩŋ 79 nɛ piwolo 81 yɔɔ. Kediɣzaɣ tɛŋ lɛ, sukuli yɔɔ cɔnɩyʋ yʋsɩ sukuli pɩɣa takayaɣ taa ɛzɩ pɩpɔzʋʋ yɔ. Alɩwaatʋ ndʋ ɛtasɩɣ-kɛ lɔŋ ke-ɖeke yɔ, ɛpɔzɩ-kɛ nɛ ɛna se kalabɩ tʋmɩyɛ (Exercice) nɖɩ paha peeɖe yɔ. Ɛsa sukulibɩɣa nɛ ɛtasɩ-kɛ lɔŋ weyi ɩsɩɣnɩ-kɛ se kɛɖɛɛnɩ ɛzɩdaa kediɣzaɣ tɛm wayɩ yaa pʋwayɩ alɩwaatʋ natʋyʋ taa. Ɛzɩma patasɩɣ lɔŋ paa sukulibɩɣa ŋga yɔ, pɩwɛɛ se kanɩɩ leleŋ pɩ-yɔɔ se pɩkɛnɩ waɖɛ nɖɩ ɖɩ-yɔɔ patɩŋɩɣna se pasɩnɩ-kɛ nɛ kɛɖɛɛnɩ ɛzɩdaa fezuu taa yɔ.—1 Tim. 4:15.
10 Ye sukulibɩɣa eɖiɣni cɛzʋʋ ka-tʋmɩyɛ alɩwaatʋ yɔɔ yɔ, sukuli yɔɔ cɔnɩyʋ yaa ɛ-sɩnɩyʋ ɛla nabʋyʋ ɛzɩ nabʋyʋ yɔɔ kɔtʋʋ yaa nabʋyʋ yɔɔ mabʋ mbʋ yɔ, ɛlɛ pɩkɛnɩ mbʋ pɩɩcɛyɩɣ lalaa yɔ, nɛ pɩsɩnɩ sukulibɩɣa nɛ kana se ka-alɩwaatʋ tɛma. Ye sukulibɩɣa ɛna pɩtɛ yʋsaɣ ŋga pɩwɛɛ se kɛtɛzɩ tɔm loyaɣ ŋga keɖiɣni yɔɔdʋʋ yɔ, nɛ ketii kpaagbaa.—Cɔnɩ École du ministère h. 282 § 4.
11 Peseɣtiɣ mba payɩ pe-wezuu caɣʋ mʋnaa yɔ, se paha pa-hɩla teokrasɩ Ɛsɔ sɛtʋ sukuli taa. (Cɔnɩ École du ministère h. 282 § 6) Falɩsʋʋ mbʋ sukuli kʋnɛ kɩhaɣ Yehowa sɛyaa yɔ, pɩsɩɣnɩ-wɛ se posusi nɛ pawɩlɩ Kewiyaɣ tɔm kɩbandʋ nɛ abalɩtʋ nɛ sɔɔlɩm nɛ ñamtʋ wɛɛ tɩ-yɔɔ camɩyɛ. Pɩtʋʋ fɛyɩ se Yehowa taa wɛ leleŋ se mba peyeba nɛ teokrasɩ sukuli kʋnɛ kɩfalɩsɩ-wɛ yɔ, pa-tɩŋa payɩ pɛwɛɛ nɛ pasaŋɩ-ɩ.—Keɣa 148:12, 13; Iz. 50:4.