CAƔ WEZUU ƐZƖ KRƖSTƲ TƲ YƆ

Kpɩtaʋ hɛkʋ taa kediɣzaɣ hɔɔlʋʋ kɩfalʋʋ

Kpaɣnɩ janvier 2018 lɛ, pakaɣ ɖʋʋ kpɩtaʋ hɛkʋ taa kediɣzaɣ taa, kpɛlɩkʋʋ tɔm kɩsɔzɩtʋ nɛ kɩlɛmɩŋ weyi ɩlɩnɩ intɛrnɛɛtɩ yɔɔ kpɛlɩkʋʋ Bibl ŋgʋ payaɣ se La Bible. Traduction du monde nouveau (nwtsty) yɔ kɩ-taa yɔ; paa kpɛlɩkʋʋ Bibl ŋgʋ kɩtɩtɩɩwɛtɩ kabɩyɛ taa yɔ. Pɩtʋʋ fɛyɩ se pɩkaɣ yebu nɛ ŋñɔɔzɩ ñe-kediɣzisi camɩyɛ nɛ pɩkɩlɩ. Kɔzɩ kɔzɩ lɛ, tɛtɛ pɩɩsɩnɩ-ŋ nɛ ŋñɔtɩnɩ ɖa-Caa kʋsɔɔlʋ Yehowa!

KPƐLƖKƲƲ TƆM KƖSƆZƖTƲ

Kpɛlɩkʋʋ tɔm kɩsɔzɩtʋ taa pama masɩ sakɩyɛ yɔɔ sɔnzɩ, lona nɛ kʋnʋmɩŋ tɔm ndɩ ndɩ.

Maatiyee 12:20

Miŋ nimaɣ ŋga kalɩɣ ñɔsɩ yɔ: Ðɩɣa taa kanɖʋnaa kaakɛ cʋʋ ñanzɩ cikpesi nzɩ sɩ-taa paɖʋʋ oliivi num yɔ. Num mbʋ pɩkpaɣaɣ pɩsatʋ nimaɣ ŋga paɖʋ pɩ-taa yɔ kɔ-yɔɔ se pɩsa nɛ miŋ etaaɖe. Grɛɛkɩ taa lɛ, papɩzɩɣ nɛ panɩɩ tɔm loyaɣ kanɛ ka-taa se nimaɣ ŋga kalɩɣ ñɔsɩ yɔ, mbʋ pʋyɔɔ yɔ pɩɩkazɩ mamala pazɩ ɛlɛ miŋ ñɛwɛɛ nɛ ɛpasɩɣ pazɩ pazɩ yaa ɛtɛm ɖem. Izaayii natʋ tɔm yɔɔdaɣ pʋtɔdɩyɛ naʋ lɩmaɣza wena Yesu kaɣ wɛnʋʋ yɔ; ɛɛkaɣ yebu nɛ lidaʋ ŋgʋ tɩ luziyaa nɛ ponuutamwaa pɛwɛna pazɩ yɔ, kɩtɛzɩ ɖem caɣ caɣ.

Maatiyee 26:13

Toovenim taa lɛ: Grɛɛkɩ taa amɛn, nɛ Ebree tɔm piye amén pɛlɛɣzaa nɛ pama-ɖɩ mbʋ; ɖɩ-tɔbʋʋ lɛ se “Pɩla mbʋ,” yaa “pɩtʋʋ fɛyɩ.” Yesu labɩnɩ tɔm pee ana tʋmɩyɛ ɖoŋ ɖoŋ se ɛpaɣzɩnɩ tɔm yaa lidaʋ tɔm yaa natʋ tɔm ndʋ ɛñɩnaɣ yɔɔdʋʋ yɔ. Ɛyɔɔdɩ tɔm pee ana se ɛwɩlɩ se tɔm ndʋ ɛkaɣ yɔɔdʋʋ yɔ, papɩzɩɣ nɛ pataa tʋ liu nɛ tɩkɛ toovenim siŋŋ. Pɔyɔɔdaa se ɛzɩma Yesu labɩnɩ tɔm pee ana tʋmɩyɛ yɔ, patɩlabɩnɩ-yɛ tʋmɩyɛ Ɛsɔ sɛtʋ takayaɣ nakɛyɛ taa mbʋ ɖɔɖɔ. Ye Yesu ɛpɩlɩ tɔm pee (amɛn, amɛn) ana ɖama yɔɔ ɛzɩ palabʋ Yohanɛɛsɩ takayaɣ tɩŋa taa yɔ, pɛɖɛzɩ-ɖɩ se “Ɛɛɛ, toovenim taa lɛ.”—Yoh 1:51.

MULTIMÉDIAS

Fotonaa, anjaʋwaa, videowaa mba pa-taa paayɔɔdʋʋ yɔ nɛ wondu lɛɛtʋ sɩɣnɩ-ɖʋ se ɖɩcɔnɩ wondu ndʋ payɩ pɔyɔɔdɩ tɩ-tɔm Bibl taa yɔ.

Bɛtɩfaajee, Oliivi Pʋʋ nɛ Yeruzalɛm

Video cikpeluu kʋnɛ kɩ-taa, ɖɩkʋyaa nɛ ɖɩtɩŋɩɣnɩ wɩsɩ ɖɩlɩyɛ hɔɔlʋʋ taa nʋmɔʋ nɛ ɖɩñɔtʋʋnɩ Yeruzalɛm; ɖɩkʋyɩnɩ tɛtʋ cikpetu ndʋ payaɣ sɔnɔ se et-Tour (ɛyaa maɣzɩɣ se pɩtɩla pɩkɛɣnɩ Bɛtɩfaajee ŋgʋ pɔyɔɔdɩ kɩ-tɔm Bibl taa yɔ) nɛ ɖiwolo ɖɩsɩŋ Oliivi pʋʋ yɔɔ lona wena akɩlɩ kʋyʋʋ yɔ a-taa naɖɩyɛ yɔɔ. Betaanii kaawɛ Bɛtɩfaajee wɩsɩ ɖɩlɩyɛ hɔɔlʋʋ taa, Oliivi Pʋʋ wɩsɩ ɖɩlɩyɛ hɔɔlʋʋ taa. Yesu nɛ ɛ-wayɩ tɩŋɩyaa pɔkɔŋaɣ Yeruzalɛm lɛ, poɖowaɣ Betaanii tɛtʋ taa; peeɖe tɛtʋ ndʋ payaɣ sɔnɔ se el-ʽAzariyeh (El ʽEizariya ) yɔ, tɩwɛɛ. Hɩla ana alɩnɩ arabʋ kʋnʋŋ taa nɛ a-tɔbʋʋ lɛ se “Lazaarɩ lone.” Pɩwɩlɩɣ se Yesu cakaɣ Maarta, Maarɩɩ nɛ Lazaarɩ pɛ-tɛ. (Mat 21:17; Mark 11:11; Luka 21:37; Yoh 11:1) Yesu kʋyaɣ peeɖe se ɛɖɛɣ Yeruzalɛm lɛ, pɩtɩla ɛtɩŋaɣ nʋmɔʋ ŋgʋ yɔ, kɩɩwɛ ɛzɩ ŋgʋ ɖɩna video taa yɔ. Nisaŋ kɩyakʋ 9 ŋgʋ wiye pɩnaɣ 33 taa, pʋtɔma Bɛtɩfaajee tɛtʋ taa ɛcaɣ kaŋaɣ pɩɣa nakɛyɛ yɔɔ nɛ ɛtɛzɩ Oliivi Pʋʋ nɛ ɛkpaɣ Yeruzalɛm nʋmɔʋ.

Habɩyɛ nɖɩ ɖɩlɩnɩ Betaanii nɛ ɖiwoki Bɛtɩfaajee yɔ
Bɛtɩfaajee
Oliivi Pʋʋ
Sedrɔɔ hɛɛŋa
Pʋʋ tɛ Templo

Ñɩmɩyɛ naɖɩyɛ wɛ naatalʋʋ mɔɔyɛ taa

Foto kʋnɛ kɩwɩlɩɣ naatalʋʋ mɔɔyɛ naɖɩyɛ, ɖɩ-taa nɛ ñɩmɩyɛ naɖɩyɛ ɖɩ-ɖaɣlɩkɩŋ kɛ 11,5 cm. Paana kajalaɣ ñɩnɖɛ 1968 taa alɩwaatʋ ndʋ pohuyaɣ tɛtɛɛ Yeruzalɛm nɛ hayo kiŋ se pañɩnɩ nabʋyʋ yɔ. Ñɩmɩyɛ nɖɩ nɛ mɔɔyɛ nɖɩ paawɛ Roma mba alɩwaatʋ taa na. Pɩwɩlɩɣ se alɩwaatʋ ndʋ tɩ-taa ye pañɩnɩɣ se pɔhɔ nɔɔyʋ nɩŋgbaŋʋʋ yɔ, pakaŋaɣ-ɩ nɛ ñɩma ɖasɩ yɔɔ. Pɩtɩla ñɩmɩyɛ nɖɩ ɖɩwɛ ɛzɩ nɖɩ Roma mba sɔɔjanaa kaakamnɩ Yesu Krɩstʋ nazɩm sizika yɔɔ yɔ. Pana ñɩmɩyɛ nɖɩ pɛɛ aɖakaɣ nakɛyɛ taa. Ɛyʋ nɔɔyʋ kaasɩba nɛ ɛ-tomnaɣ ɖazɩ nɛ pɩtɛ lɛ, pakpaɣ ɛ-mɔɔ nɛ paɖʋ aɖakaɣ ŋga ka-taa. Pɩwɩlɩɣ se paa pɔhɔm nɔɔyʋ nɩŋgbaŋʋʋ nɛ pakam-ɩ ɖaʋ yɔɔ yɔ, papɩzɩɣ nɛ palabɩ-ɩ aɖakaɣ nɛ pepimi-i camɩyɛ.—Mat 27:35.