Pɩlakɩ nɔɔ kʋɖʋmaɣ nɛ Yehowa sɔɔlɩm na?

Pʋcɔ nɛ ɖɩkpaɣ lɩmaɣza naayɛ, paa akɛ sɔsɔna yaa cikpena yɔ, pɩwɛɛ se ɖɩpɔzɩ ɖa-tɩ se, ‘Alakɩ nɔɔ kʋɖʋmaɣ nɛ Yehowa sɔɔlɩm na?’ Ðɩɩkaɣ pɩzʋʋ nɛ ɖɩtɩlɩ Yehowa lɩmaɣza tɩŋa kaaʋ, paa mbʋ yɔ, ɛtɩŋɩɣnɩ ɛ-Tɔm yɔɔ nɛ ɛwɩlɩɣ-ɖʋ tɔm sakɩyɛ ndʋ tɩpɩzɩɣ tɩsɩnɩ-ɖʋ nɛ ɖɩla “paa tʋmɩyɛ kɩbanɖɛ nɖɩ” lɛ yɔ. (2Ti 3:16, 17; Rom 11:33, 34) Yesu kaasɩm kpayɩ kpayɩ mbʋ pɩkɛ Yehowa sɔɔlɩm yɔ, nɛ pɩ-tɔm kaakɩlɩnɩ cɛyʋʋ e-wezuu caɣʋ taa. (Yoh 4:34) Tɛtɛ Ɛsɔ yɔ, ɖɩɩmaɣzɩnɩ Yesu nɛ ɖɩñaɣ pana nɛ ɖɩla ɖo-ɖoŋ ɖeɖe nɛ lɩmaɣza wena ɖɩkpakɩɣ yɔ akɛdɩnɩ Yehowa.—Yoh 8:28, 29; Efɛ 5:15-17.

CƆNƖ VIDEO IWOLO PƖ-YƆƆ NƐ ƖTƖLƖ MBƲ YEHOWA SƆƆLƖM KƐNAA YƆ (LEV 19:18), NƐ PƲWAYƖ LƐ, ŊCOSI TƆM TƲNƐ TƖ-YƆƆ:

• Ɛbɛ yɔɔ pɩcɛyaa se ɖɩlabɩnɩ tʋmɩyɛ Bibl paɣtʋ kila ɖe-wezuu caɣʋ taa?

• Bibl paɣtʋ kila wena pɩwɛɛ se aɖiyi-ɖʋ nɛ ɖɩlɩzɩ minziiki nakʋyʋ se ɖiwelisiɣ?

• Bibl paɣtʋ kila wena pɩwɛɛ se aɖiyi-ɖʋ nɛ ɖɩlɩzɩ wondu ndʋ ɖisuu yɔ nɛ ɛzɩma ɖɩñɔɔzʋʋ ɖa-tɩ yɔ?

• Ðe-wezuu caɣʋ hɔɔlɩŋ weyi taa ɖɔɖɔ pɩwɛɛ se ɖɩlabɩnɩ tʋmɩyɛ Bibl paɣtʋ kila?

• Ɛbɛ pɩwɛɛ se ɖɩla nɛ pɩwɛɛ-ɖʋ kɛlɛʋ se ɖɩtɩlɩ mbʋ pɩkɛ Yehowa sɔɔlɩm yɔ?