Tɔm Ndʋ Ða-takayɩsɩ Kalɩyaa Pɔzʋʋ Yɔ

Mba kaakɛ Yuuda mba templo taa polisinaa? Tʋma wena palakaɣ?

Leevi ñɩma mba pataakɛ cɔjɔnaa yɔ, pa-taa nabɛyɛ lakaɣ tʋma lɛɛna ɛzɩ polisi tʋmɩyɛ mbʋ yɔ. Templo yɔɔ cɔnɩyʋ ɖʋwaɣnɩ-wɛ paɣtʋ. Yuuda mba takayaɣ taa mayʋ weyi payaɣ-ɩ se Philo yɔ, ɛkɛdɩ tʋma wena sɔɔjanaa mba palakaɣ yɔ a-tɔm nɛ ɛyɔɔdɩ se: “Pa-taa nabɛyɛ [Leevi mba] sɩŋaɣ nɔnɔsɩ cɔlɔ kpam nɛ pakandɩyɩɣ sɩ-yɔɔ, lalaa ñasɩŋaɣ pɩ-taa [templo kadaɣ taa] kooka kiɖeɖeɣa nɔnɔɔ yɔɔ se paɖaŋ mba paɣtʋ tɩha-wɛ nʋmɔʋ se pɛfɛyɩ nɩŋgbaŋaɣ peeɖe yɔ nɛ pataasʋʋ, paa peɖiɣzinaa yaa petiɖiɣzina yɔ. Nabɛyɛ ñɔɖɔŋaɣ nɛ pɔcɔʋ templo se pakandɩyɩ kɩ-yɔɔ. Pɛlɛɣzaɣ-wɛ nɛ palakɩ tʋmɩyɛ wɩsɩ nɛ ɖoo.”

Sahedrɛɛ taa ñɩma pɩzaɣ se pɔpɔzɩ sɔɔjanaa mba se paɖʋ-wɛ nesi. Yuuda mba samaɣ tindimiye nɖɩ, ɖɩ-taa ñɩma ɖeke Roma komina kaaha waɖɛ se pɔɖɔkɩ you wondu.

Bibl taa tazɩyʋ Joachim Jeremias lɩzɩ pɩ-taa se “alɩwaatʋ ndʋ sɔɔjanaa kaakpa Yesu yɔ, ɛpɔzɩ-wɛ se ɛbɛ yɔɔ patɩkpa ɛnʋ alɩwaatʋ ndʋ ɛnʋ wɩlaɣ tɔm templo taa yɔ. (Mat. 26:55) Yesu taapɩzɩɣ se ɛpɔzɩ tɔm ndʋ, ye sɔɔjanaa mba, pataakɛ templo taa polisi tʋmlaɖaa taa nabɛyɛ yɔ.” Bibl taa tazɩyʋ ɛnʋ ɛmaɣzɩɣ se ɛyaa mba paatɛm-wɛ tiyuu alɩwaatʋ natʋyʋ se pakpa Yesu yɔ, paakɛ ɖɔɖɔ templo taa polisinaa. (Yoh. 7:32, 45, 46) Pʋwayɩ, Sahedrɛɛ tiyi templo yɔɔ cɔnɩyʋ nɛ sɔɔjanaa nabɛyɛ se pakpa apostoloowaa nɛ pɔkɔna. Pɩtʋʋ fɛyɩ se templo taa polisinaa mba ɖɔɖɔ potuni apostoloo Pɔɔlɩ templo taa nɛ palɩzɩ-ɩ.—Tʋma 4:1-3; 5:17-27; 21:27-30.