Ŋŋsɩm-tʋ?

Ɛzɩma ɖɩlaba nɛ ɖɩna se minziiki tɔm kaacɛyɩ Izrayɛɛlɩ mba wezuu caɣʋ taa?

MINZIIKI tɔm kaacɛyɩ Izrayɛɛlɩ mba wezuu caɣʋ taa kpem. Bibl yɔɔdɩ ɛyaa nabɛyɛ tɔm se palakaɣnɩ tʋmɩyɛ minziiki wondu yaa peteɣaɣ hendu. Bibl hɔɔlɩŋ sakɩyɛ kɛ hendu. Kɩɖaŋ nɩɩyɩ lɛ Keɣsi takayaɣ, Hendu taa Hendu takayaɣ nɛ Kʋñɔwiye takayaɣ. Pʋyɔɔ pɔyɔɔdɩ takayɩsɩ nzɩ sɩyɔɔdʋʋ Bibl alɩwaatʋ taa wezuu caɣʋ tɔm yɔ sɩ-taa nakɛyɛ taa se Bibl wɩlɩɣ kpayɩ kpayɩ se Izrayɛɛlɩ mba lakaɣnɩ minziiki tʋmɩyɛ pa-tʋma sakɩyɛ taa.

Palakaɣnɩ tʋmɩyɛ minziiki paa evemiye nɖɩ. Izrayɛɛlɩ mba makaɣ minziiki nɛ peteɣ hendu se pawɩlɩ ɛzɩma pɩlakɩ-wɛ yɔ. (Iza. 30:29) Halaa makaɣ nesi tɛɛ suye, peteɣ taa leleŋ hendu nɛ papaɣ alɩwaatʋ ndʋ pasɩɣ wiyaʋ kɩfalʋ nɔɔyʋ yɔ, alɩwaatʋ ndʋ sɔɔjanaa wakɩ you taa yɔ nɛ pɛ-Ɛsɔ sɛtʋ kazandʋ taa. (Tɔh. 11:34; 1 Sam. 18:​6, 7; 1 Awi. 1:​39, 40) Izrayɛɛlɩ mba teɣaɣ ɖɔɖɔ laŋwɛɛkɩyɛ hendu alɩwaatʋ ndʋ pɛwɛ kʋñɔwiye taa yɔ. (2 Kro. 35:25) Pʋyɔɔ takayaɣ nakɛyɛ yɔɔdaa se: «Izrayɛɛlɩ samaɣ kaakɛ samaɣ ŋga kaasɔɔlɩ minziiki kpem yɔ.» (McClintock and Strong’s Cyclopedia)

Pamakaɣ minziiki awiya ɖɩɣa taa. Izrayɛɛlɩ awiya kaasɔɔlɩ minziiki tɔm. Wiyaʋ Sɔɔlɩ kaakɔnɩ Daviid ɛ-ɖɩɣa taa se ɛmabɩ-ɩ minziiki. (1 Sam. 16:​18, 23) Pʋwayɩ Daviid maɣmaɣ pɩsɩ wiyaʋ lɛ, eyele nɛ polu minziiki wondu, polu hendu kɩbandʋ nɛ palɩzɩ ɛyaa nabɛyɛ se pama minziiki Yehowa templo taa. (2 Kro. 7:6; Amo. 6:5) Wiyaʋ Salomɔɔ kaawɛnɩ hendu teyaa abalɩñɩma nɛ halɩñɩma ɛ-ɖɩɣa taa.—Ekl. 2:8.

Pamakaɣ minziiki Ɛsɔ sɛtʋ taa. Kɔzɩ kɔzɩ lɛ, Izrayɛɛlɩ mba makaɣ minziiki se pɛsɛɛnɩ Yehowa. Ɛyaa 4000 makaɣnɩ minziiki templo taa Yeruzalɛm. (1 Kro. 23:5) Pamakaɣ ŋgbamɛɛ, cɩmʋʋ wondu ndʋ tɩ-yɔɔ wɛ nimasɩ yɔ, cɩmɩŋ nɛ pahʋlʋʋ aganda. (2 Kro. 5:12) Ɛlɛ pɩtɩkɛ cɩmʋʋ maɖaa mba pɛwɛ niye yɔ pe-ɖeke patɩŋaɣnɩnɩ minziiki yɔɔ nɛ pɛsɛɣ Yehowa. Izrayɛɛlɩ mba sakɩyɛ teɣaɣ hendu alɩwaatʋ ndʋ pɔɖɔŋ nʋmɔʋ nɛ powoki Yeruzalɛm se pɔtɔɔ kazandʋ yɔ. Payaɣaɣ hendu ndʋ se Tɛtʋ taa kpaʋ hendu. (Keɣ. 120-134) Pɩtasɩ lɛ, Yuuda mba takayɩsɩ nasɩyɩ yɔɔdʋʋ se Izrayɛɛlɩ mba teɣaɣ Halɛɛlɩ Keɣsia alɩwaatʋ ndʋ pɔtɔkaɣ Paska tɔɔnaɣ yɔ.

Sɔnɔ ɖɔɖɔ minziiki tɔm cɛyɩ Yehowa sɛyaa ɛsɩndaa. (Yak. 5:13) Hendu teu kɛ ɖɛ-Ɛsɔ sɛtʋ hɔɔlʋʋ nakʋyʋ. (Efɛz. 5:19) Alɩwaatʋ ndʋ ɖa nɛ ɖo-koobiya ɖɩkpɛndɩɣ nɛ ɖiteɣ hendu Yehowa yɔ, ɖɩñɔtʋʋnɩ ɖama nɛ pɩkɩlɩɣ. (Kol. 3:16) Pɩtasɩ lɛ, minziiki hɛzɩɣ ɖa-laŋɩyɛ alɩwaatʋ ndʋ ɖɩkatɩɣ kala yɔ. (Tʋma 16:25) Minziiki kɛnɩ nʋmɔʋ kɩbaŋʋ ŋgʋ kɩ-yɔɔ ɖɩpɩzɩɣ nɛ ɖɩtɩŋna nɛ ɖɩwɩlɩ se ɖɩwɛnɩ tisuu Yehowa yɔɔ nɛ ɖɩsɔɔlɩ-ɩ yɔ.