Yesu «kpɛlɩkɩ ñamtʋ»

Yesu ñaŋaɣ Yehowa paa ɛzɩmtaa. (Yoh. 8:29) Ye mbʋ ɛbɛ yɔɔ Bibl yɔɔdʋʋ se: «Ɛkpɛlɩkɩ ñamtʋ kʋñɔmɩŋ weyi ɛtɔwaa yɔ ɩ-taa»?—Ebr. 5:8.

Alɩwaatʋ ndʋ Yesu kaawɛ tɛtʋ yɔɔ yɔ, ɛkatɩ wɛtʋ ndʋ ɛtɩkatɩ ɛsɔdaa nɛ ɛna yɔ. Kɩɖaŋ nɩɩyɩ yɔ: Ɛ-lʋlɩyaa kaasɔɔlɩ Yehowa ɛlɛ pataatalɩ pilim. (Luka 2:51) Ɛlabɩ kʋñɔŋ Ɛsɔ sɛtʋ ñʋndɩnaa nɛ komina ñʋndɩnaa mba pɛwɛ kañatʋ yɔ pe-nesi tɛɛ. (Mat. 26:59; Mark. 15:15) Pɩtasɩ lɛ, ɛnɩ siziŋ siŋŋ pʋcɔ nɛ ɛsɩ. Bibl yɔɔdʋʋ se: «Eluzi ɛ-tɩ nɛ ɛña nɛ halɩ pɩtalɩ sɩm taa.»—Filp. 2:8.

Ye mbʋ, alɩwaatʋ ndʋ Yesu kaawɛ tɛtʋ yɔɔ yɔ ɛkpɛlɩkɩ ñamtʋ wɛtʋ kɩfatʋ ndʋ tɩ-taa. Pʋyɔɔ lɛ, ɛpɩzɩɣ nɛ ɛkɛ wiyaʋ nɛ Cɔjɔ kɩlɩm weyi ɛtalɩ pilim nɛ ɛpɩzɩɣ nɛ ɛnɩɩ ɖe-siziŋ yɔ. (Ebr. 4:15; 5:9) Yesu kpɛlɩkɩ ñamtʋ kʋñɔmɩŋ weyi ɛtɔwaa yɔ ɩ-taa nɛ pɩtɛ lɛ, ɛmʋ ñɩm siŋŋ Yehowa ɛsɩndaa nɛ pɩkɩlɩ. Ða ɖɔɖɔ, ye ɖiwobi pɩ-yɔɔ nɛ ɖɩñaŋ Yehowa halɩ pɩkpɛndɩnɩ kala taa yɔ ɖɩpɩzɩɣ nɛ ɖɩmʋ ñɩm ɛ-ɛsɩndaa nɛ pɩkɩlɩ nɛ ɖɩpɩzɩɣ ɖɔɖɔ nɛ ɖɩmʋna se ɖɩla paa tʋmɩyɛ nɖɩ.—Yak. 1:4.