Maɣzɩɣ mbʋ piɖiɣni labʋ Bibl taa kɛdɛsɩ taa yɔ pɩ-yɔɔ

Kɛdɛsɩ sakɩyɛ wɛ Bibl taa nɛ sɩkpɛlɩkɩɣ-ɖʋ lɔŋ kɩbaŋ sakɩyɛ. Alɩwaatʋ ndʋ ɖɩkalɩɣ Bibl yɔ, ye ɖɩmaɣzɩɣ mbʋ piɖiɣni labʋ kɛdɛsɩ nzɩ sɩ-taa yɔ pɩ-yɔɔ yɔ, pɩpɩzɩɣ pɩsɩnɩ-ɖʋ nɛ ɖɩnɩɩ sɩ-taa camɩyɛ nɛ sɩwazɩ-ɖʋ nɛ pɩkɩlɩ. Iyele nɛ ɖɩna lɔŋ tasʋʋ mbʋ pɩpɩzɩɣ pɩsɩnɩ-ɖʋ nɛ ɖɩla mbʋ yɔ.

• Kalɩnɩ nɔɔ kʋkʋyaɣ. Ye ɖɩkalɩɣ Bibl nɛ nɔɔ kʋkʋyaɣ yɔ, pɩsɩɣnɩ-ɖʋ nɛ ɖɩmaɣzɩ nɛ ɖɩna mbʋ piɖiɣni labʋ kɛdaɣ nakɛyɛ taa yɔ camɩyɛ nɛ pɩkɩlɩ. Alɩwaatʋ ndʋ ɩkpɛndɩɣ se ɩkalɩ Bibl hɔʋ taa yɔ, pɩwɛɣ ɖeu se ɩtayɩ ɖama ɛyaa mba pɔyɔɔdɩ kɛdaɣ taa yɔ nɛ mɩ-taa paa weyi lɛ ɛkalɩ ndʋ kɛdaɣ taa tʋ nɔɔyʋ yɔɔdaa yɔ.

• Na mbʋ piɖiɣni labʋ yɔ ña-lɩmaɣza taa. Ñaɣ pana nɛ ŋtɩlɩ ndʋ kɛdaɣ taa mba wɛɛ nɛ pamaɣzɩɣ yɔ nɛ ɛzɩma pɩlakɩ-wɛ yɔ. Ŋpɩzɩɣ nɛ ŋpɔzɩ ña-tɩ se: «Ɛbɛ yɔɔ ɛyʋ ɛnʋ ɛyɔɔdɩ tɔm ndʋ yaa ɛbɛ yɔɔ ɛlabɩ lakasɩ nzɩ? Ye maawɛnɩ wɛtʋ ndʋ tɩ-taa suwe maamaɣzaa yaa ɛzɩma pɩɩlabɩ-m?»

• Lɩzɩ kɩlɛmɩŋ. Ye ŋlɩzɩɣ kɩlɛmɩŋ yɔ, pɩsɩɣnɩ-ŋ nɛ ŋna mbʋ piɖiɣni labʋ kɛdaɣ taa yɔ ña-lɩmaɣza taa nɛ ŋtɔzʋʋ pɩ-yɔɔ. Ñaɣ pana nɛ ŋla mbʋ paa ŋŋsɩŋ kɩlɛmɩŋ lɩzʋʋ camɩyɛ yɔ.