Paradisuu Ñɔtaa!

Kɩdɛkɛdɩm lakasɩ nzɩ sɩwɛ ɛjaɖɛ yɔɔ sɔnɔ yɔ, sɩwɩlɩɣ se Paradisuu ñɔtaa. Bibl tɔm se Paradisuu ñɔtʋʋ lɛ, ɖɩkaɣ sʋʋ alɩwaatʋ kaɖɛ ndʋ taa. Alɩwaatʋ ndʋ tɩ-taa ɖɩwɛ lɛɛlɛɛyɔ. Mbʋ mbʋ Bibl tɔm se pɩkaɣ labʋ yɔ, mbʋ yɔ:

Yoŋ sɔsɔŋ. “Ɛjaɖɛ lɛɛɖɛ kaɣ kʋyʋʋ ɛjaɖɛ lɛɛɖɛ yɔɔ, nɛ kewiyaɣ lɛɛka kaɣ kʋyʋʋ kewiyaɣ lɛɛka yɔɔ.” (Maatiyee 24:7) Natʋ tɔm ndʋ, tɩlabɩ mbʋ ɖeyi ɖeyi. Kpaɣ nɛ pɩnaɣ 1914 palabɩ Caama you kajalaɣ ñɩŋgʋ nɛ naalɛ ñɩŋgʋ nɛ yoŋ cikpeŋ sakɩyɛ. Ɛyaa miiliyɔɔwaa sɩbɩ yoŋ ɛnɩ ɩ-taa.

Kʋdɔmɩŋ tɔyʋʋ. “Kʋdɔmɩŋ . . . kaɣ lɩʋ yem yem; cɩnɛ yɔ nɛ lɔlɔ yɔ.” (Luka 21:11) Toovenim pɩlabɩ mbʋ? Ɛɛɛ. Canɩyɛ-kʋdɔŋ, laŋɩyɛ-kʋdɔŋ, kpeziwɩlaɣ, pɔtʋ kʋdɔŋ, SIDA nɛ kʋdɔmɩŋ lɛɛŋ kʋ ɛyaa miiliyɔɔwaa ɛjaɖɛ yɔɔ.

Tɔɔnasɩ kɛdɛɖaɣ. Ɛjaɖɛ kpeekpe yɔɔ ɛyaa wɛɛ, paanaɣ tɔɔnaɣ sakɩyɛ se pɔtɔɔ. Paa pɩnaɣ ŋga haŋaɣ kʋʋ ɛyaa miiliyɔɔwaa. Pɩkɛnɩ yʋsaɣ lɛɛka ŋga kawɩlɩɣ se Paradisuu ñɔtaa yɔ. Bibl tɔm se: “Ñɔɔsɩ kaɣ lɩʋ.”—Maarkɩ 13:8.

Tɛtʋ ñamsʋʋ. “Tɛtʋ [ñamsɩɣ] ɖoli ɖoli.” (Maatiyee 24:7) Piɖiɣni labʋ mbʋ ɖeyi ɖeyi sɔnɔ ɖɔɖɔ. Kpaɣ nɛ pɩnaɣ 1914 nɛ sɔnɔ ɛyaa mba tɛtʋ ñamsaa nɛ pʋkʋ yɔ, pɛcɛzɩ miiliyɔɔ kʋɖʋm.

Ɛyaa kɩdɛkɛdaa. Ɛyaa kaɣ wɛʋ “liidiye laazaɣ,” nɛ “panɩɣnɩ pa-tɩ yeke.” Pakaɣ kɛʋ “leleŋ ɛgbaɣdɩnaa pɩkɩlɩ Ɛsɔ mba.” Piya ɩɩkaɣ “pa-ñɩma ñam.” (2 Timootee 3:1-5) Ŋmaɣzɩɣ suwe? Sakɩyɛ lakɩ mbʋ sɔnɔ yaa paalakɩ mbʋ? Sakɩyɛ ɩɩñaŋ Ɛsɔ nɛ panazɩɣ mba pañɩnɩɣ patɩlɩ Ɛsɔ yɔ.

Kɩdɛkɛdɩm labʋ. “Kɩdɛkɛdɩm labʋ ɖɔʋ” ɖɔɖɔ. (Maatiyee 24:12) Pɩtala ña-maɣmaɣ ŋɖiɣni naʋ se kɩdɛkɛdɩm labʋ tɔyɩ sɔnɔ pɩkɩlɩ pɩnzɩ nzɩ sɩɖɛwa yɔ sɩ-taa. Paa le paa le, sɔɔndʋ kpaɣ ɛyaa se nɔyʋʋ ɛtaamɩlɩ-wɛ, etaamuli-wɛ yaa ɛtaacamɩ-wɛ.

Pɩtɩŋa payɩ mbʋ yɔ, pɩwɩlɩɣ se Ɛsɔ Kewiyaɣ ñɔtaa. Bibl tɔŋ se: “Mɩ ɖɔɖɔ ye ɩnaɣ pɩtɩŋa payɩ mbʋ yɔ lɛ, ɩtɩlɩ se Ɛsɔ Kewiyaɣ ñɔtaa kɛlɛ.” (Luka 21:31) Ɛbɛ Ɛsɔ Kewiyaɣ kɛnaa? Kɛkɛ Ɛsɔ komina ŋgʋ kɩwɛ ɛsɔdaa yɔ, nɛ kɩkaɣ kɔnaʋ Paradisuu tɛtʋ yɔɔ. Ɛsɔ Kewiyaɣ kaɣ lɛɣzʋʋ ɛjaɖɛ yɔɔ kominawaa.—Danɩyɛɛlɩ 2:44.