Ða-taa wɛ leleŋ se ɖɩsɩm mɛɛsaɣ tɛɛ tɔm tʋnɛ

Nɔɔyʋ heyi-ŋ wiɖiyi mɛɛsaɣ tɛɛ tɔm natʋyʋ?—a Bibl yɔɔdʋʋ tɔm kɩcɛyɩtʋ natʋyʋ nɛ payaɣ-tʋ se ‘mɛɛsaɣ tɛɛ tɔm.’ Tɩkɛ tɔm kɩcɛyɩtʋ mbʋ pʋyɔɔ yɔ, tɩlɩnɩ Ɛsɔ cɔlɔ. Nɛ tɩkɛ mɛɛsaɣ tɛɛ tɔm mbʋ pʋyɔɔ yɔ, nɔɔyʋ taasɩm-tʋ. Halɩ Ɛsɔ tiyiyaa maɣmaɣ ñɩnaɣ se patɩlɩ-tʋ camɩyɛ nɛ pɩkɩlɩ. Ŋsɔɔlaa se ŋtɩlɩ mɛɛsaɣ tɛɛ tɔm ndʋ?—

Ŋmaɣzɩɣ se ɛbɛ Ɛsɔ tiyiyaa wɛɛ nɛ pañakɩ pana se patɩlɩ?

Ɛsɔ lɩzʋʋ kajalaɣ abalʋ nɛ kajalaɣ halʋ yɔ, pɩlakɩ pɩnzɩ kudokiŋ sakɩyɛ yɔ. Payaɣ abalʋ se Aɖam nɛ payaɣ halʋ se Ɛva. Ɛsɔ sɩ-wɛ kaɖaɣ kɩbaŋa ŋga payaɣ se Edɛɛnɩ yɔ ka-taa. Ye Aɖam nɛ Ɛva paañam Ɛsɔ yɔ, ɛzʋnɔ pa nɛ pe-piya paalaba nɛ tɛtʋ tɩŋa pɩsɩ paradisuu kɩbaŋʋ ɛzɩ Edɛɛnɩ kaɖaɣ yɔ, nɛ pɛwɛɛ Paradisuu taa tam tam. Ɛlɛ ŋtɔzʋʋ mbʋ Aɖam nɛ Ɛva palaba yɔ?—

Aɖam nɛ Ɛva patɩña Ɛsɔ, mbʋ yebina nɛ sɔnɔ ɖɩfɛyɩ paradisuu taa. Ɛlɛ Ɛsɔ yɔɔdaa se ɛkaɣ labʋ nɛ tɛtʋ tɩŋa pɩsɩ paradisuu nɛ paa weyi lɛ, ɛcaɣ wezuu nɛ ɛnɩɩ leleŋ tam tam. Ɛzɩma ɛkaɣ labʋ se pɩla mbʋ? Pɩɩkɛ tɔm ndʋ tɩɩwɛ mɛɛsaɣ tɛɛ pɩnzɩ sakɩyɛ nɛ ɛyaa tɩtɩlɩ-tʋ yɔ.

Alɩwaatʋ ndʋ Yesu kɔm tɛtʋ yɔɔ yɔ, ɛwɩlɩ ɛyaa mbʋ mɛɛsaɣ tɛɛ tɔm ndʋ tɩkɛnaa yɔ. Yesu wɩlaa se mɛɛsaɣ tɛɛ tɔm ndʋ, tɩkɛ Ɛsɔ Kewiyaɣ tɔm. Yesu heyi ɛyaa se patɩmɩ nɛ pɔpɔzɩ se Kewiyaɣ ŋga kɔkɔɔ. Kewiyaɣ ŋga kakaɣnɩ labʋ nɛ tɛtʋ kpeekpe pɩsɩ paradisuu ŋgʋ kɩwɛ kajʋka pɩdɩɩfɛyɩ yɔ.

Ña-taa lakɩ leleŋ se ŋtɩlɩ mɛɛsaɣ tɛɛ tɔm ndʋ yaa we?— Taasɔɔ se mba pañaŋ Yehowa yɔ, pe-ɖeke pakaɣnɩ caɣʋ Paradisuu taa. Bibl kɛdɩɣ-ɖʋ tɔm sakɩyɛ halaa nɛ abalaa mba pañam Yehowa yɔ, pɔ-yɔɔ. Ŋsɔɔlaa se ŋkpɛlɩkɩ pɔ-yɔɔ tɔm na?— Yele nɛ ɖɩkpɛlɩkɩ pa-taa nabɛyɛ yɔɔ tɔm nɛ ɖɩna ɛzɩma ɖɩpɩzɩɣ nɛ ɖɩmaɣzɩnɩ-wɛ yɔ.