Ɛfalɩsɩ-wɛ se papɩzɩ posusi tɔm paa pɛwɛ nazɩm taa yɔ

Yesu wɩlɩ ɛ-apostoloowaa ɛzɩma pɩwɛɛ se posusi tɔm camɩyɛ yɔ, nɛ ɛtayɩ-wɛ naalɛ naalɛ se pɛɖɛɛ nɛ posusi tɔm. Ɛlɛ ɛtɩsɩɩnɩ pi-ɖeke. Eheyi-wɛ se pakaɣ katʋʋ koyindinaa. Ɛtɔm se: “Ɩna, mentiyiɣ-mɩ ɛzɩ heɣsi yɔ kpemtɔɔyɩsɩ hɛkʋ taa . . . Ɩɖaŋ mɩ-tɩ nɛ ɛyaa, mbʋ pʋyɔɔ yɔ, pakaɣ-mɩ kpaʋ nɛ powoni sɔsaa tɔm tɩŋ tɛɛ nɛ pama-mɩ Sinaagɔɔgɩwaa taa; Apakaɣ-mɩ hɔm nɛ powoni kominawaa nɛ awiya pɔ-tɔm tɩŋ tɛɛ, mɔ-yɔɔ.”​—Maatiyee 10:16-18.

Toovenim, Yesu wayɩ tɩŋɩyaa kaɣ katʋʋ nazɩm siŋŋ, ɛlɛ ɛyɔɔdɩ tɔm tʋnɛ nɛ ɛhɛzɩnɩ pa-laŋa se: “Ye pakpa-mɩ mbʋ lɛ, ɩtaayɔkɩ mɩ-ñʋʋ se ɛzɩma ɩɩyɔɔdɩ, yaa ndʋ iiheyi yɔ, peeɖe nɖɩ pɩkaɣ-mɩ cɛlʋʋ ndʋ ɩkaɣ yɔɔdʋʋ yɔ, mbʋ pʋyɔɔ yɔ pɩtɩkɛ mɩkaɣnɩ yɔɔdʋʋ, ɛlɛ mɩ-Caa fezuu kaɣnɩ yɔɔdʋʋ mɩ-taa, koobu kaɣ kʋʋ e-koobu, caja kaɣ ɛ-pɩyalʋ kʋʋ, piya kaɣ sɩ-ñɩma wayɩ lɩʋ se sɩkʋ-wɛ. Nɛ ma-hɩɖɛ yɔɔ lɛ, ɛyaa kpeekpe ɩɩkaɣ-mɩ naʋ nɛ ɛzɩyɛ, pɩtɛ lɛ weyi ɛɖɔkɩ kpam nɛ pɩkɔɔ pɩtɛ lɛ, ɛnʋ kaɣnɩ ɛ-ñʋʋ yabʋ.”​—Maatiyee 10:19-22.

Ɛzɩma tɔm susuu tʋmɩyɛ ɖɩnɛ ɖɩ-tɔm cɛyɩ siŋŋ yɔ, pʋyɔɔ Yesu tasɩ ɛ-tɔmkpɛlɩkɩyaa lɔŋ se pɛwɛɛ lɛɣtʋ nɛ papɩzɩ pehiɣ waɖɛ nɛ pala pa-tʋmɩyɛ camɩyɛ. Eheyi-wɛ se: “Ye pawɩlɩɣ-mɩ ñaŋ tɛtʋ natʋyʋ taa kɔyɔ, ise ɩɖɛɛ lɛɛtʋ taa, nɛ ye pɔɖɔɔnʋʋ-mɩ peeɖe yɔ, ise ɩɖɛɛ tozo ndʋ taa. Tʋtʋyɛ taa meheyiɣ-mɩ se ɩɩkaɣ tɛm Izrayɛɛlɩ tɛtʋ nɛ pʋcɔ Ɛyʋ Pɩyalʋ kɔɔ.”​—Maatiyee 10:23.

Pɩtʋʋ fɛyɩ se Yesu lɔŋ tasʋʋ nɛ ɖoŋ kpazʋʋ tɔm tʋnɛ tiyeba nɛ apostoloowaa 12 waa mba, pɛwɛɛ abalɩtʋ. Nɛ ɛ-tɔm tʋnɛ tɩkaɣ wazʋʋ mba payɩ pakaɣ labʋ tɔm susuu tʋmɩyɛ nɖɩ, ɛ-sɩm nɛ e-fem wayɩ yɔ. Mbʋ pʋyɔɔ yɔ, ɛtɔm se ‘ɛyaa kpeekpe ɩɩkaɣ-wɛ naʋ nɛ ɛzɩyɛ.’ Ye mbʋ, ɛjaɖɛ yɔɔ ɛyaa kpeekpe tɔm Yesu yɔɔdʋʋ pɩtɩkɛ mba pɔ-cɔlɔ etiyi apostoloowaa yɔ, pe-ɖeke. Pɩtasɩ lɛ, Bibl hɔɔlʋʋ nakʋyʋ tɩyɔɔdɩ se alɩwaatʋ ndʋ posusaɣ tɔm Galilee Egeetiye taa peeɖe yɔ, powoni apostoloowaa awiya nɛ tɔm hʋyaa ɛzɩdaa yaa pɔ-hɔŋ taa ñɩma nazɩ-wɛ nɛ pakʋ-wɛ.

Tobi lɛ, mbʋ pɩkaɣ talʋʋ ɛ-tɔmkpɛlɩkɩyaa cee wayɩ yɔ, pɩ-yɔɔ Yesu maɣzaɣ alɩwaatʋ ndʋ ɛyɔɔdɩnɩ apostoloowaa yɔ. Yesu heyi ɛ-apostoloowaa ɖɔɖɔ se ɛ-tɔmkpɛlɩkɩyaa ɩɩkaɣ tɔm susuu ageeta tɩŋa taa nɛ pɛtɛ nɛ “pʋcɔ Ɛyʋ Pɩyalʋ kɔɔ.” Pʋ-tɔbʋʋ lɛ se ɛ-tɔmkpɛlɩkɩyaa ɩɩkaɣ tɛm pɔ-tɔm susuu tʋmɩyɛ pʋcɔ nɛ Yesu Krɩstʋ weyi ɛpɩsɩ Wiyaʋ yɔ, ɛkɔɔ Ɛsɔ hɩɖɛ taa se ɛhʋʋnɩ ɛjaɖɛ tɔm.

Alɩwaatʋ ndʋ apostoloowaa kaasusuu tɔm lɛ, pɩtɩpɔzɩ se pɩɖɩɣzɩ-wɛ se panazɩɣ-wɛ, mbʋ pʋyɔɔ yɔ, Yesu kaatɛm-wɛ heyuu se: “Sukulibɩɣa tɩkɩlɩ ka-wɩlɩyʋ. Yom tɩkɩlɩ ɛ-tʋ.” Tobi lɛ, ɛcaɣ panɩɩ pɩ-taa se ɛzɩma pawɩlɩ-ɩ ñaŋ Ɛsɔ Kewiyaɣ tɔm susuu taa yɔ, mbʋ ɖɔɖɔ pakaɣ-wɛ nazʋʋ. Ɛlɛ Yesu kpazɩ-wɛ ɖoŋ nɛ ɛtɔ se: “Itaase sɔɔndʋ mba pakʋʋ tomnaɣ nɛ paapɩzɩɣ pakʋ ciyam yɔ, ɛlɛ ise sɔɔndʋ Weyi ɛpɩzɩɣ ɛkʋ tomnaɣ nɛ ɛpɛɖɩ ciyam nɛ tomnaɣ miŋ sɔsɔŋ [Geheena] taa yɔ.”​—Maatiyee 10:24, 28.

Yesu ha kɩɖaʋ kɩbaŋʋ hɔɔlʋʋ kʋnɛ kɩ-taa. Sɔɔndʋ tɩkpa-ɩ nɛ sɩm, ɛlɛ ewobi pɩ-yɔɔ nɛ ɛɖɔkɩ e-siɣsiɣ wɛtʋ kpam nɛ ɛla Ðoŋ Tɩŋa Tʋ Yehowa sɔɔlɩm. Toovenim, Ɛsɔ Ðoŋ Tɩŋa Tʋ pɩzɩɣna nɛ ɛɖɩzɩ ɛyʋ ciyam, pʋ-tɔbʋʋ se wezuu ŋgʋ ɛyʋ ɛnʋ ɛkaɣ hiɣu cee wayɩ yɔ, yaa ɛnʋ pɩzɩɣna nɛ efezi ɛyʋ ɛnʋ nɛ ɛha-ɩ tam tam wezuu. Pɩtʋʋ fɛyɩ se tɔm tʋnɛ tɩhɛzɩ apostoloowaa laŋa nɛ tɩkpazɩ-wɛ ɖoŋ siŋŋ.

Pʋwayɩ lɛ, Yesu tɩŋnɩ kɩɖaʋ kʋnɛ kɩ-yɔɔ nɛ ɛwɩlɩ ɛzɩma Ɛsɔ cɔŋnɩ ɛ-sɛyaa yɔɔ camɩyɛ yɔ, nɛ ɛtɔ se: “Ɛzɩ paapɛdɩɣ sumasɩ naalɛ kobo yaa we? Pɩtɛ lɛ sɩ-taa nakɛyɛ ɛɛtɔlʋʋ hadɛ yem nɛ mɩ-Caa tɩsɔɔlɩ . . . ɩtaalɛyɩ, ɩkɩlɩ sumasɩ sakɩyɛ kummm.”​—Maatiyee 10:29, 31.

Tɔm ndʋ Yesu tɔmkpɛlɩkɩyaa susuu yɔ, tɩkaɣ tayʋʋ hɔʋ kʋɖʋmʋʋ taa ñɩma hɛkʋ taa. Nabɛyɛ kaɣ-tʋ mʋʋ nɛ lalaa ñekizi-tʋ. Pʋyɔɔ Yesu yɔɔdaa se: “Ɩtaamaɣzɩ se mɔnkɔm laŋhɛzɩyɛ kɔnʋʋ tataa cɩnɛ.” Toovenim, ye hɔʋ taa tʋ nɔɔyʋ ɛsɔɔlaa se ɛɖɔ toovenim mbʋ ɛkpɛlɩkɩ Bibl taa yɔ pɩ-yɔɔ yɔ, pɩpɔzɩ-ɩ abalɩtʋ. Yesu tasɩ yɔɔdʋʋ ɖɔɖɔ se: “Weyi ɛsɔɔlɩ ɛ-caa yaa e-ɖoo nɛ pɩkɩlɩ-m kɔyɔ, pʋdʋ ɛnʋ ɛtɩmʋnɩ-m, nɛ weyi ɛsɔɔlɩ ɛ-pɩyalʋ yaa ɛ-pɛlɛ nɛ pɩkɩlɩ-m kɔyɔ, pʋdʋ ɛnʋ ɛtɩmʋnɩ-m.”​—Maatiyee 10:34, 37.

Paa mbʋ yɔ, nabɛyɛ kaɣ mʋʋ ɛ-tɔmkpɛlɩkɩyaa camɩyɛ. Ɛyɔɔdaa se: “Weyi ɛha paa cɛɛkɛ lɩkpadaɣ piya ajamaa panɛ yɔ pa-taa nɔɔyʋ, ma-hɩɖɛ taa, se ɛkɛ tɔm mʋyʋ yɔ, tʋtʋyɛ taa meheyiɣ-mɩ se ɛ-kɩhɛyʋʋ ɛɛkaɣ lɛzʋʋ yem.”​—Maatiyee 10:42.

Ɛfalɩsɩ-wɛ nɛ ɛkpazɩ-wɛ ɖoŋ mbʋ nɛ ɛtɛ lɛ, apostoloowaa kpaɣ nʋmɔʋ “nɛ powolo ɖoŋiye ɖoŋiye nɛ pawɩlɩɣ Tɔm Kɩbandʋ nɛ pakʋsʋʋ kʋdɔndɩnaa.”​—Luka 9:6.