Pɔñɔɔzɩ pa-tɩ se pala Yehowa sɔɔlɩm

ƐSƆ sɛtʋ agbaa, politiki laɖaa, tadɩyɛ laɖaa nɛ ɛyaa wezuu caɣʋ yɔɔ cɔnʋʋ agbaa sakɩyɛ wɛ ɛjaɖɛ yɔɔ. Agbaa ana awɛnɩ wɛtʋ ndɩ ndɩ, kaɖʋsɩ ndɩ ndɩ nɛ lɩmaɣza ndɩ ndɩ. Ɛlɛ ɛgbɛyɛ naɖɩyɛ wɛɛ nɛ ɖɩwɛ ndɩ siŋŋ nɛ agbaa lɛɛna. Ɛsɔtɔm wɩlɩɣ kpayɩ kpayɩ se ɛgbɛyɛ nɖɩ lɛ Yehowa Aseɣɖe Tɩnaa ɛgbɛyɛ.

² Pɩlabɩ ɖeu se ŋsʋ Yehowa ɛgbɛyɛ taa. Ŋñɩnaa nɛ ŋtɩlɩ Ɛsɔ sɔɔlɩm nɛ ŋlakɩ-pʋ lɛɛlɛɛyɔ. (Keɣa 142:10; Roma 12:2) Ŋkɛ tɔm susuyu weyi ɛwɛ kpekpeka yɔ, nɛ ŋwɛ ɛjaɖɛ kpeekpe yɔɔ koobiya ɛgbɛyɛ taa. Sɔɔlɩm wɛ ɛgbɛyɛ nɖɩ ɖɩ-taa. (2 Kɔr. 6:4; 1 Pɩy. 2:17; 5:9) Ɛzɩ Ɛsɔtɔm haʋ-ɖʋ lidaʋ yɔ, piyeba nɛ ŋhiɣ wazasɩ sakɩyɛ nɛ koboyaɣ siŋŋ. (Adu. 10:22; Mark. 10:30) Ŋwɛɛ nɛ ŋlakɩ Yehowa sɔɔlɩm camɩyɛ lɛɛlɛɛyɔ, pɩkaɣ yebu nɛ ŋhiɣ wezuu maatɛŋ cee wayɩ.—1 Tim. 6:18, 19; 1 Yoh. 2:17.

³ Ða-Lɩzɩyʋ Sɔsɔ wɛnɩ ɛgbɛyɛ kʋɖʋmɖɩyɛ koŋ ɛjaɖɛ yɔɔ nɛ ɖɩɖɔŋ teokrasɩ paɣtʋ yɔɔ. Pʋ-tɔbʋʋ lɛ se Yehowa weyi ɛkɛ Ñʋʋdʋ Sɔsɔ yɔ ɛnʋ ɖiyiɣni-ɖɩ. Ðɩtaɣ-ɩ liu nɛ ɖa-laŋɩyɛ pilim. Ɛnʋ kɛnɩnɩ ɖɔ-Tɔm Hʋyʋ, ɖa-Paɣtʋ Ðʋyʋ nɛ ɖe-Wiyaʋ. (Iza. 33:22) Ɛkɛ Ɛsɔ weyi eesidiɣ wondu yem yem yɔ, pʋyɔɔ ɛlabɩ ɖʋtʋ camɩyɛ se ‘ɖa nɛ ɩ ɖɩkpɛndɩ nɛ ɖɩlakɩ tʋmɩyɛ’ nɛ ɖɩɖʋ nesi nɛ ɛ-tamaɣ la.—2 Kɔr. 6:1, 2.

⁴ Ɛjaɖɛ tɛm wɛɛ nɛ pɩñɔtʋʋ, pʋyɔɔ lɛ pɩpɔzʋʋ se ɖiwolo pɩ-yɔɔ nɛ ɖiluzuu ɖa-tɩ Yesu Krɩstʋ, Wiyaʋ weyi Yehowa lɩzaa yɔ ɛ-tɛɛ. (Iza. 55:4; Natʋ 6:2; 11:15) Yesu ɛnʋ ɛyɔɔdɩna se ɛ-wayɩ tɩŋɩyaa kaɣ labʋ tʋma sɔsɔna nɛ pɩkpaɖɩ wena ɛ-maɣmaɣ ɛɛlaba, alɩwaatʋ ndʋ ɛɛwɛ tɛtʋ yɔɔ yɔ. (Yoh. 14:12) Nɛ ɛɛwɛnɩ toovenim se ɛyɔɔdɩ mbʋ, mbʋ pʋyɔɔ yɔ ɛ-tɔmkpɛlɩkɩyaa kaɣ ɖɔʋ nɛ pakaɣ kpaɣʋ ɖɔɖɔ alɩwaatʋ sakɩyɛ nɛ pala tʋmɩyɛ ɛjaɖɛ hɔɔlɩŋ sakɩyɛ taa. Pakaɣ susuu Kewiyaɣ tɔm kɩbandʋ nɛ pɩtalɩ tɛtʋ kamaɣ yɔɔ.—Mat. 24:14; 28:19, 20; Tʋma 1:8.

⁵ Yesu tɔm ndʋ tɩtɛm labʋ. Ɛlɛ ɛzɩ Yesu kaayɔɔdʋʋ yɔ, tɔm susuu tʋmɩyɛ kaɣ sɩʋ tɩnaɣ alɩwaatʋ ndʋ Yehowa maɣmaɣ ɖʋwa yɔ tɩ-yɔɔ. Natʋ tɔm sakɩyɛ ndʋ tɩwɛ Ɛsɔtɔm taa yɔ, tɩwɩlɩɣ se Yehowa kɩyakʋ sɔsɔʋ ñɔtɩ kpam.—Yow. 3:4; Sof. 1:14-18; 2:2, 3; 1 Pɩy. 4:7.

⁶ Kɛdɛzaɣ kɩyakɩŋ ɛnɛ ɩ-taa ɖɩwɛɛ nɛ ɖɩtɩlɩɣ Yehowa sɔɔlɩm nɛ pɩkɩlɩɣ, pʋyɔɔ lɛ pɩpɔzʋʋ se ɖɩñaɣ pana siŋŋ nɛ ɖɩla ɛ-sɔɔlɩm. Ye mbʋ, pɩwɛɛ se ɖɩtɩlɩ ɛzɩma Yehowa ɛgbɛyɛ lakɩ tʋmɩyɛ yɔ camɩyɛ, nɛ ɖɩɖʋ-ɖɩ nesi nɛ ɖa-laŋɩyɛ pilim. Ɛgbɛyɛ nɖɩ, ɖɩlakɩnɩ tʋmɩyɛ Bibl paɣtʋ, kɩ-paɣtʋ kila, lɔŋ tasʋʋ, lɛɣtʋ nɛ wɩlɩtʋ ndɩ ndɩ.—Keɣa 18:8-10.

⁷ Yehowa samaɣ lakɩnɩ tʋmɩyɛ lɔŋ tasʋʋ mbʋ pɩwɛ Ɛsɔtɔm taa yɔ lɛ, nɔɔ kʋɖʋmaɣ nɛ laŋhɛzɩyɛ wɛɣ ka-taa ɛyaa hɛkʋ taa. (Keɣa 132:1; Iza. 60:17; Roma 14:19) Ɛbɛ cɛyɩsɩɣ nɔɔ kʋɖʋmaɣ ŋga kɛwɛ ɛjaɖɛ kpeekpe yɔɔ koobiya hɛkʋ taa yɔ? Sɔɔlɩm. Ðisuu sɔɔlɩm ɛzɩ toko yɔ, nɛ mbʋ tuyuuni-ɖʋ ɖa-lakasɩ kpeekpe taa. (Yoh. 13:34, 35; Kol. 3:14) Yehowa labɩ ɛ-samaɣ lootiye nɛ eyele nɛ nɔɔ kʋɖʋmaɣ wɛɛ kɛ-hɛkʋ taa, nɛ mbʋ yekina se ɖɩla nɔɔ kʋɖʋmaɣ nɛ ɛ-ɛgbɛyɛ hɔɔlʋʋ ŋgʋ kɩwɛ ɛsɔdaa yɔ.

YEHOWA ƐGBƐYƐ HƆƆLƲƲ ŊGƲ KƖWƐ ƐSƆDAA YƆ

⁸ Nayaa Izaayii, Ezekɩyɛɛlɩ nɛ Danɩyɛɛlɩ paana Yehowa ɛgbɛyɛ hɔɔlʋʋ ŋgʋ kɩwɛ ɛsɔdaa yɔ natʋ ndɩ ndɩ taa. (Iz., ñʋʋ 6; Ez., ñʋʋ 1; Dan. 7:9, 10) Mbʋ ɖɔɖɔ apostoloo Yohanɛɛsɩ kaana ɛsɔdaa ɖʋtʋ kɩbandʋ ndʋ natʋ natʋyʋ taa nɛ ɛyɔɔdɩ tɩ-tɔm Natʋ takayaɣ taa. Ɛna Yehowa caɣ e-Kewiyaɣ kpelaɣ sɔsɔɔ yɔɔ, Ɛsɔ tiyiyaa cɔɔ-ɩ nɛ pata nɛ pɔyɔɔdʋʋ se: “Kiɖeɖeu, kiɖeɖeu, kiɖeɖeu lɛ Yehowa Ɛsɔ, Ðoŋ Tɩŋa Tʋ, weyi ɛɛwɛɛ nɛ weyi ɛwɛɛ nɛ weyi eɖiɣni kɔm yɔ.” (Natʋ 4:8) Yohanɛɛsɩ kaana ɖɔɖɔ “heɣa nakɛyɛ kasɩŋ kewiyaɣ kpelaɣ hɛkʋ taa”. Yesu Krɩstʋ payaɣ se Ɛsɔ Heɣa.—Natʋ 5:6, 13, 14; Yoh. 1:29.

⁹ Pɔyɔɔdʋʋ se Yehowa caɣ Kewiyaɣ kpelaɣ yɔɔ natʋ ndʋ tɩ-taa yɔ, pɩwɩlɩɣ se ɛnʋ kɛnɩ ɛgbɛyɛ Ñʋʋdʋ. Pɔyɔɔdɩ Yehowa sɔsɔtʋ tɔm 3 Awiya 29:11, 12 taa se: “Kɩbaɣlʋ, ñatɩnɩ paɣlɩka nɛ ɖoŋ, samtʋ, pɩzɩtʋ nɛ sɔsɔtʋ. Mbʋ mbʋ pɩwɛ ɛsɔdaa nɛ tataa yɔ, ñatɩnɩ-pʋ, Kɩbaɣlʋ, ñatɩnɩ kewiyaɣ, nɛ ŋkɩlɩ pɩtɩŋa ɛzɩ ñʋʋ yɔ. Ña-taa ñɩm nɛ samtʋ palɩɣna, ñañazɩɣna. Ñe-nee tɛɛ sɔsɔtʋ nɛ ɖoŋ pɛwɛɛ, ñe-nee lakɩna nɛ pɩtɩŋa pɩpaɣlɩɣ nɛ pɩkpaɣ ɖoŋ.”

¹⁰ Yesu weyi ɛsɩɣnɩ Yehowa tʋmɩyɛ labʋ yɔ, ɛwɛnɩ waɖɛ sɔsɔɖɛ naɖɩyɛ ɛsɔdaa nɛ paha-ɩ ɖɔɖɔ ɖoŋ sakɩyɛ. Toovenim taa lɛ, Ɛsɔ luzi “wondu tɩŋa ɛ-nɩŋgbanzɩ tɛɛ nɛ ɛpɩsɩ-ɩ ñʋʋdʋ ɛgbɛyɛ taa wondu tɩŋa yɔɔ.” (Efɛz. 1:22) Apostoloo Pɔɔlɩ yɔɔdɩ Yesu tɔm nɛ ɛtɔ se: “Ɛsɔ kpazɩ-ɩ lone sɔsɔɖɛ taa nɛ ɛha-ɩ hɩɖɛ nɖɩ ɖɩkɩlɩ hɩla tɩŋa payɩ yɔ faaa, se pɩsa nɛ Yesu hɩɖɛ taa lɛ, paa nʋmbɔɖɛ nɖɩ lɛ, ɖiluŋ—mba pɛwɛ ɛsɔdaa nɛ mba pɛwɛ tɛtʋ yɔɔ nɛ mba pɛwɛ tɛtɛɛ yɔ pa-nʋmbɔla—nɛ paa nzʋlʋmɩyɛ nɖɩ lɛ, ɖɩyɔɔdɩ kaɣlaa se Yesu Krɩstʋ kɛ Kɩbaɣlʋ nɛ piyele pasa Caa Ɛsɔ.” (Fil. 2:9-11) Ðɩpɩzɩɣ ɖɩtaa Yesu Krɩstʋ liu se ɛkɛ ɖiyiyu weyi ɛwɛ siɣsiɣ yɔ.

¹¹ Nayʋ Danɩyɛɛlɩ na natʋ natʋyʋ taa Kɩyakɩŋ Akpadɩyʋ, ɛcaɣ e-Kewiyaɣ kpelaɣ yɔɔ ɛsɔdaa nɛ Ɛsɔ tiyiyaa “akpaba akpaba ɖʋwaɣ-ɩ lɩm nɛ akpaba mɩnɩŋ nɛ hiŋ hiŋ kaasɩŋ ɛ-cɔlɔ.” (Dan. 7:10) Bibl yɔɔdaɣ Ɛsɔ tiyiyaa mba pɔ-tɔm lɛ, kɩtɔm se pɛkɛ “feziŋ weyi ɩlakɩ tʋmɩyɛ kiɖeɖee, weyi petiyi-i se ɩɖʋ lɩm mba pakaɣ hiɣu ñʋʋ yabɩtʋ yɔ.” (Ebr. 1:14) Ɛsɔ tiyiyaa mba paasidiɣ ɖama taa yem yem, pʋyɔɔ pɔyɔɔdɩ “kewiyaɣ kpelisi yaa kɩbaɣlaa yaa kominawaa yaa ñʋndɩnaa” pɔ-tɔm.—Kol. 1:16.

¹² Ye ɖɩkpaɣ alɩwaatʋ nɛ ɖɩmaɣzɩ Yehowa ɛgbɛyɛ hɔɔlʋʋ ŋgʋ kɩwɛ ɛsɔdaa yɔ, kɩ-hɔɔlɩŋ ndɩ ndɩ yɔɔ yɔ, pɩsɩɣnɩ-ɖʋ nɛ ɖɩnɩɩ mbʋ Izaayii labɩ alɩwaatʋ ndʋ ɛna natʋ natʋyʋ taa Yehowa “caɣ kewiyaɣ kpelaɣ sɔsɔɔ yɔɔ” nɛ ‘Serafimwaa sɩŋ ɛ-cɔlɔ’ yɔ pɩ-taa. Izaayii mawa se: “Pɩtɔɔ-m, meleba! Mbʋ pʋyɔɔ yɔ mɛnkɛ ɛyʋ weyi e-ndomee nɛ azuluma yɔ nɛ mɛwɛ ɖɔɖɔ ɛyaa samaɣ ŋga ko-ndomee nɛ azuluma yɔ kɛ-hɛkʋ taa nɛ mana wiyaʋ, yoyaa kpeekpe kɩbaɣlʋ nɛ mɛ-ɛsa.” Izaayii na Yehowa ɛgbɛyɛ hɔɔlʋʋ ŋgʋ kɩwɛ ɛsɔdaa yɔ kɩ-hɔɔlɩŋ nɩɩyɩ nɛ kɩ-paɣlɩka lɛ, sɔɔndʋ kpa-ɩ nɛ eluzi ɛ-tɩ nɛ ɛwɛɛnɩ ñamtʋ siŋŋ kɩ-yɔɔ. Mbʋ ɛnawa yɔ pɩlabɩ ɛ-yɔɔ tʋmɩyɛ siŋŋ, pʋyɔɔ Yehowa ya-ɩ nɛ ɛsɔdaa kiŋ se ɛɖʋ-ɩ tʋmɩyɛ se esusi ɛ-tɔm hʋʋ tɔm lɛ, ecosi se: “Ma yɔ, tiyi-m!”—Iza. 6:1-5, 8.

¹³ Ye ɖɩnɩ ɛzɩma Yehowa ɛgbɛyɛ lakɩ tʋmɩyɛ yɔ pɩ-taa camɩyɛ nɛ ɖɩwɛɛnɩ ɛsɩmɩyɛ ɖɩ-yɔɔ yɔ, pituyuu-ɖʋ nɛ ɖɩla ɖɔɖɔ ɛzɩ Izaayii yɔ. Ðɩñakɩ pana nɛ ɖɩñɔɔnɩ ɛgbɛyɛ nɖɩ kpam, ɖiiwokini ɛsɩndaa lɛ. Ðɩlakɩ mbʋ payɩ ɖɩpɩzɩɣ yɔ, nɛ ɖɩwɩlɩ se ɖɩtaɣ Yehowa ɛgbɛyɛ nɖɩ ɖɩwɛ sɔnɔ yɔ liu.

YEHOWA ƐGBƐYƐ WOKINI ƐSƖNDAA

¹⁴ Ezekɩyɛɛlɩ natʋ tɔm takayaɣ ñʋʋ 1 taa, pɔyɔɔdɩ Yehowa tɔm se ɛcaɣ ɛsɔdaa kɛɛkɛɛ sɔsɔʋ nakʋyʋ yɔɔ. Kɛɛkɛɛ kɩbaŋʋ ŋgʋ, kɩsɩŋnɩ Yehowa ɛgbɛyɛ hɔɔlʋʋ ŋgʋ ɖɩɩpɩzɩɣ nɛ ɖɩna-kʋ nɛ ɖɛ-ɛsa yɔ. Ɛcaɣ kɛɛkɛɛ ŋgʋ kɩ-yɔɔ nɛ eɖiyiɣ-kʋ nɛ sɔɔlɩm se pɩsa nɛ ɛ-tamaɣ la.—Keɣa 102:20.

¹⁵ Paa kpeɖe nɖɩ lɛ, kpeɖe lɛɛɖɛ wɛ ɖɩ-hɛkʋ taa, nɛ naɖɩyɛ tɩkɩlɩ lɛɛɖɛ. Mbʋ yebina nɛ aɖɔŋ nɛ “awokini a-hɔɔlɩŋ naanza taa.” (Ezek. 1:17) Kpela ana apɩzɩɣ nɛ alɛɣzɩ nʋmɔʋ yem kpɛlɩ. Paa mbʋ yɔ, kɛɛkɛɛ ŋgʋ kɩɩɖɔŋ kɩ-tɩ yɔɔ yem, ɛlɛ nɔɔyʋ wɩlɩɣnɩ-kʋ nʋmɔʋ. Yehowa tiyele ɛ-ɛgbɛyɛ se ɖiwoki ɖenɖe ɖɩ-maɣmaɣ ɖɩsɔɔlaa yɔ. Ezekɩyɛɛlɩ 1:20 yɔɔdaa se: “Fezuu tuyaɣ-yɛ se awolo ɖenɖe yɔ, peeɖe awokaɣ.” Ye mbʋ, Yehowa tɩŋɩɣnɩ e-fezuu yɔɔ nɛ eɖiyiɣ ɛ-ɛgbɛyɛ se ɖiwolo ɖenɖe ɛsɔɔlaa yɔ. Pɩwɛɛ se ɖɩpɔzɩ ɖa-tɩ se: ‘Ɛzɩ ma ɖɔɖɔ mɔñɔnɩ ɛgbɛyɛ nɖɩ nɛ mowoki ɖenɖe ɖiwoki yɔ?’

¹⁶ Pɩsa nɛ ɖɩñɔɔnɩ Yehowa ɛgbɛyɛ lɛ, kediɣzisi wobu nɛ tɔm susuu ɖeke tɩmaɣ. Mbʋ pɩ-tɔm kɩlɩ cɛyʋʋ yɔ lɛ se ɖiwobini ɛsɩndaa nɛ ɖɩpɩɩ fezuu taa. Pʋyɔɔ lɛ, pɩwɛɛ se ɖɩtɩlɩ “mbʋ pɩ-tɔm kɩlɩ cɛyʋʋ yɔ” nɛ ɖɩtɔkɩ fezuu taa tɔɔnaɣ alɩwaatʋ kɩbandʋ yɔɔ. (Fil. 1:10; 4:8, 9; Yoh. 17:3) Pɩpɔzʋʋ ɖɔɖɔ se ɖɩtɩlɩ se pʋcɔ nɛ ɛgbɛyɛ naɖɩyɛ ɖɔ camɩyɛ lɛ, pɩwɛɛ se pala ɖʋtʋ camɩyɛ nɛ nɔɔ kʋɖʋmaɣ wɛɛ ɖɩ-taa ɛyaa hɛkʋ taa. Ye mbʋ, pɩwɛɛ se ɖɩlabɩnɩ tʋmɩyɛ ɖa-alɩwaatʋ, ɖo-ɖoŋ, ɖɛ-lɛɣtʋ nɛ ñɩm mbʋ Yehowa ha-ɖʋ yɔ camɩyɛ nɛ ɖɩɖʋnɩ nesi ɛ-tʋmɩyɛ. Ye ɖiwobi pɩ-yɔɔ nɛ ɖɩñɔɔnɩ Yehowa ɛsɔdaa kɛɛkɛɛ yɔ, ɖe-wezuu caɣʋ lakɩ nɔɔ kʋɖʋmaɣ nɛ tɔm ndʋ ɖisusuu yɔ.

¹⁷ Pɩtɩŋnɩ Yehowa ɛgbɛyɛ sɩnʋʋ yɔɔ lɛ, ɖɩpɩzɩɣ nɛ ɖiwolo pɩ-yɔɔ nɛ ɖɩlakɩ Ɛsɔ sɔɔlɩm. Ðɩtaasɔɔ se Yehowa maɣmaɣ ɖiyiɣni ɛsɔdaa kɛɛkɛɛ. Pʋyɔɔ lɛ, pɩsa nɛ ɖɩñɔɔnɩ kɛɛkɛɛ ŋgʋ lɛ, pɩwɛɛ se ɖɩwɛɛnɩ ñamtʋ nɛ lidaʋ Yehowa weyi ɛkɛ ɖa-Kaaʋ yɔ ɛ-yɔɔ. (Keɣa 17:32) Bibl labɩ-ɖʋ tamaɣ se: “Kɩbaɣlʋ wazɩɣ ɛ-samaɣ yɔɔ laŋhɛzɩyɛ taa.” (Keɣa 28:11) Ðɩwɛ Yehowa ɛgbɛyɛ taa nɛ pʋyɔɔ lɛ, ɛkpazɩɣ-ɖʋ ɖoŋ nɛ eyeki se ɖihiɣ laŋhɛzɩyɛ, nɛ laŋhɛzɩyɛ nɖɩ ɖɩ-taa ɛ-samaɣ ŋga ɛñɔɔzɩ-kɛ camɩyɛ yɔ, kɛwɛɛ. Pɩtʋʋ fɛyɩ se ɖɩkaɣ hiɣu wazasɩ sakɩyɛ, ye ɖiwobi pɩ-yɔɔ nɛ ɖɩlakɩ Yehowa sɔɔlɩm kpaɣnɩ lɛɛlɛɛyɔ nɛ pɩɖɛɛ tamtam yɔ.