“Ɩtɔzɩ mba pɛɖɛɣ nɔɔ mɩ-hɛkʋ taa yɔ pɔ-yɔɔ”

APOSTOLOO Pɔɔlɩ manɩ tɔm tʋnɛ Ebree mba 13:7 taa, nɛ papɩzɩɣ pɛɖɛzɩ-tʋ ɖɔɖɔ se: “Ɩtɔzɩ mba peɖiyiɣ-mɩ yɔ pɔ-yɔɔ.” Kpaɣnɩ pɩnaɣ 33 tɛ Pantekooti wiye, apostoloowaa siɣsiɣ ñɩma paɣzɩ labʋ nɔɔɖɛyaa ɛgbɛyɛ tʋmɩyɛ nɖɩ Kɩbaɣlʋ Yesu Krɩstʋ ɖʋ-wɛ yɔ, nɛ peɖiyiɣ Krɩstʋ ɛgbɛyɛ nɖɩ ɖɩñɔwa pitileɖi yɔ. (Tʋma 6:2-4) Pɩtalɩ pɩnaɣ 49 taa mbʋ yɔ lɛ, pɩtasɩnɩ apostoloowaa lɛ, tɔmkpɛlɩkɩyaa nabɛyɛ kaawɛ nɔɔɖɛyaa ɛgbɛyɛ nɖɩ ɖɩ-taa. Alɩwaatʋ ndʋ nɔɔhɔnɖɛ naɖɩyɛ kaakɔm ɛgbɛyɛ taa pɩlɩɩnɩ ɛyaa pɛlʋʋ yɔɔ yɔ, patanɩ tɔm ndʋ nɔɔɖɛyaa ɛgbɛyɛ cɔlɔ, pʋ-tɔbʋʋ se “apostoloowaa nɛ ɛzʋtʋyaa cɔlɔ Yeruzalɛm.” (Tʋma 15:1, 2) Mba pɩɩwɛ se pɔcɔnɩ tɔm ndʋ titukuuni Krɩstʋ ñɩma tɩŋa payɩ yɔ ti-ɖeɖe. Pakpaɣ lɩmaɣza nɛ pama takayɩsɩ nɛ petiyini agbaa. Pɩkpazɩ agbaa ɖoŋ siŋŋ nɛ piyele ɖɔɖɔ nɛ tɔmkpɛlɩkɩyaa la nɔɔ kʋɖʋmaɣ pa-lɩmaɣza nɛ pa-lakasɩ taa. Agbaa kaaluzi a-tɩ nɔɔɖɛyaa ɛgbɛyɛ tɛɛ nɛ alakɩnɩ tʋmɩyɛ ɖɩ-lɔŋ tasʋʋ; piyeba nɛ Yehowa wazɩ-yɛ nɛ ahuu camɩyɛ.—Tʋma 8:1, 14, 15; 15:22-31; 16:4, 5; Ebr. 13:17.

² Apostoloowaa sɩm wayɩ lɛ, tisuu yebiyaa kɔm nɛ pɔtɔyɩ siŋŋ. (2 Tes. 2:3-12) Ɛzɩ Yesu kaayɔɔdʋʋ ɖomaɣ kɩbaŋa nɛ ñɩtʋ kɩdɛkɛdɩtʋ eduuye taa yɔ, ñɩtʋ kɩdɛkɛdɩtʋ (cɛtɩm Krɩstʋ ñɩma) kɔma nɛ tihuuzi ɖomaɣ kɩbaŋa (Krɩstʋ ñɩma patam numwaa) yɔɔ. Pɩnzɩ mɩnɩŋ sakɩyɛ nzɩ sɩtɩŋ pʋwayɩ yɔ sɩ-taa, peyeba se tindima ana a-naalɛ apaɣlɩ nɛ pɩkɔɔ pɩtalɩ kʋmtʋ alɩwaatʋ taa, pʋ-tɔbʋʋ se “ɛjaɖɛ yɔɔ ɖʋtʋ tɛm alɩwaatʋ” taa. (Mat. 13:24-30, 36-43) Alɩwaatʋ ndʋ tɩ-taa, paa patam numwaa nabɛyɛ kaawɛ tɛtʋ yɔɔ nɛ pɛwɛɛnɩ Ɛsɔ lootiye yɔ, pataakɛ nɔɔɖɛyaa ɛgbɛyɛ; Yesu taatɩŋɩɣnɩ nɔɔyʋ yɔɔ nɛ eɖiyiɣ ɛ-wayɩ tɩŋɩyaa. (Mat. 28:20) Ɛlɛ ɛzɩ natʋ tɔm kaayɔɔdʋʋ yɔ, pɩkaɣ lɛɣzʋʋ kʋmtʋ alɩwaatʋ taa.

³ “Toovenim taa lɛ, akɛ yom siɣsiɣ tʋ nɛ lɔŋsɩnɖʋ?” Tɔm ndʋ Yesu pɔzaa nɛ ɛpaɣzɩnɩ eduuye naɖɩyɛ, ɛyɔɔdaɣ “ɛjaɖɛ yɔɔ ɖʋtʋ tɛm alɩwaatʋ yʋsaɣ” tɔm lɛ. (Mat. 24:3, 42-47) Yesu wɩlaa se yom siɣsiɣ tʋ ɛnʋ ɛkaɣ labʋ tʋmɩyɛ nɛ kpekpeka nɛ ɛha Ɛsɔ samaɣ fezuu taa tɔɔnaɣ “alɩwaatʋ ndʋ tɩmʋnaa yɔ tɩ-yɔɔ.” Kajalaɣ pɩnzɩ mɩnʋʋ taa, Yesu taatɩŋnɩ ɛyʋ kʋɖʋm yɔɔ nɛ eɖiyi ɛ-tɔmkpɛlɩkɩyaa, ɛlɛ ɛgbɛyɛ naɖɩyɛ yɔɔ ɛɛtɩŋnaa; mbʋ ɖɔɖɔ yom siɣsiɣ tʋ weyi Yesu lakɩnɩ tʋmɩyɛ kɛdɛzaɣ kɩyakɩŋ ɛnɛ ɩ-taa yɔ, ɛtɩkɛ ɛyʋ kʋɖʋm.

ÐƖTƖLƖ WEYI “YOM SIƔSIƔ TƲ NƐ LƆŊSƖNÐƲ” KƐNAA YƆ

⁴ Anɩ Yesu lɩzaa se ɛcalɩ ɛ-wayɩ tɩŋɩyaa? Toovenim taa lɛ, Krɩstʋ ñɩma patam numwaa mba pɛwɛ tɛtʋ yɔɔ yɔ, mba ɛlakɩnɩ tʋmɩyɛ. Bibl yaɣ-wɛ se “kewiyaɣ cɔjɔtʋ” nɛ paɖʋ-wɛ tʋmɩyɛ se ‘posusi paa le, Weyi ɛya-wɛ nɛ cɩkpɛndʋʋ tɛɛ nɛ ɛkɔnɩ-wɛ ɛ-ñalɩmɩyɛ sɔsɔɖɛ taa yɔ, ɛ-wɛtʋ kɩbandʋ nɛ ɛ-tʋma.’ (1 Pɩy. 2:9; Mal. 2:7; Natʋ 12:17) Ɛzɩ patam numwaa mba pɛwɛ tɛtʋ yɔɔ yɔ, pa-tɩŋa pɛkɛnɩ yom siɣsiɣ tʋ na? Aayɩ. Alɩwaatʋ ndʋ Yesu calɩ abalaa ɛzɩ 5 000 mbʋ yɔ, nɛ halaa nɛ piya tomnaɣ yɔɔ yɔ, ɛcɛlɩ tɔɔnaɣ ɛ-tɔmkpɛlɩkɩyaa nɛ paba tayɩ-kɛ samaɣ. (Mat. 14:19) Ɛtɩŋnɩ ɛyaa nabɛyɛ cabɩ yɔɔ nɛ ɛcalɩ samaɣ sɔsɔɔ. Mbʋ ɖɔɖɔ ɛlakɩ sɔnɔ nɛ ɛcalɩɣ ɛyaa fezuu taa.

⁵ Ye mbʋ, “ɖɩɣa yɔɔ cɔnɩyʋ siɣsiɣ tʋ nɛ lɔŋsɩnɖʋ” kɛnɩ koobiya abalaa patam numwaa nabɛyɛ cabɩ, mba palakɩ fezuu taa tɔɔnaɣ nɛ patayɩɣ-kɛ Krɩstʋ wɛʋ alɩwaatʋ taa yɔ. (Luka 12:42) Kpaɣnɩ alɩwaatʋ ndʋ kɛdɛzaɣ kɩyakɩŋ paɣzaa yɔ, koobiya abalaa mba pɛkɛ “yom siɣsiɣ tʋ nɛ lɔŋsɩnɖʋ” yɔ, pɛkpɛndaa nɛ palakɩ tʋmɩyɛ Yehowa Aseɣɖe Tɩnaa tʋmɩyɛ ɖɩlaɖɛ sɔsɔɖɛ taa. Sɔnɔ, koobiya abalaa patam numwaa mba payaɣ se Yehowa Aseɣɖe Tɩnaa tɛ Nɔɔɖɛyaa Ɛgbɛyɛ.

⁶ Krɩstʋ tɩŋɩɣnɩ ɛgbɛyɛ nɖɩ ɖɩ-yɔɔ nɛ ɛlɩzɩɣ-ɖʋ ɛzɩma Bibl taa natʋ tɔm ɖiɣni labʋ ɖa-alɩwaatʋ taa yɔ pɩ-taa, nɛ ɛtasɩɣ-ɖʋ ɖɔɖɔ lɔŋ alɩwaatʋ ndʋ tɩmʋnaa yɔ tɩ-yɔɔ se pɩsa nɛ ɖɩlabɩnɩ tʋmɩyɛ Bibl paɣtʋ kila paa evemiye nɖɩ. Ɛtɩŋɩɣnɩ ɖɩ-yɔɔ ɖɔɖɔ nɛ ɛhaɣ fezuu taa tɔɔnaɣ Yehowa Aseɣɖe Tɩnaa agbaa tɩŋa. (Iza. 43:10; Gal. 6:16) Bibl alɩwaatʋ taa lɛ, yom yaa ɖɩɣa yɔɔ cɔnɩyʋ weyi pataɣ-ɩ liu yɔ, ɛnʋ cɔŋnɩnɩ mbʋ mbʋ pɩlakɩ ɖɩɣa taa yɔ pi-ɖeɖe. Mbʋ ɖɔɖɔ paɖʋ tʋmɩyɛ yom siɣsiɣ tʋ nɛ lɔŋsɩnɖʋ se ɛcɔnɩ ɖɩɣa taa ñɩma tisuu yɔɔ. Pʋyɔɔ lɛ, yom siɣsiɣ tʋ cɔŋnɩ tomnaɣ yɔɔ wondu ɖeɖe, ɛcɔŋnɩ tɔm susuu tʋmɩyɛ nɛ egeetiye kigbeɣliŋ nɛ kigbeɣliŋ sɔsɔŋ ɖʋtʋ yɔɔ, ɛlɩzɩɣ ɛzʋtʋyaa mba palakɩ tʋma ndɩ ndɩ ɛgbɛyɛ taa yɔ nɛ ɛlakɩ Bibl kpɛlɩkʋʋ takayɩsɩ. Nɛ pɩtɩŋa payɩ mbʋ yɔ, pɩwazɩɣ “ɖɩɣa taa mba.”—Mat. 24:45.

⁷ Ye mbʋ, mba kɛnɩ “ɖɩɣa taa mba”? Tobi lɛ, mba lɛ mba pacalɩɣ-wɛ yɔ. Alɩwaatʋ ndʋ kɛdɛzaɣ kɩyakɩŋ paɣzaa yɔ, ɖɩɣa taa mba tɩŋa kaakɛ patam numwaa. Nɛ pʋwayɩ lɛ, “samaɣ sɔsɔɔ” ŋga kɛkɛ “heŋ lɛɛŋ” taa hɔɔlʋʋ nakʋyʋ yɔ ka-taa mba kɔɔ posuyi patam numwaa yɔɔ, nɛ pɛkɛ ɖɔɖɔ ɖɩɣa taa mba. (Yoh. 10:16) Fezuu taa tɔɔnaɣ ŋga yom siɣsiɣ tʋ lakɩ yɔ, ŋga pacalɩɣnɩ patam numwaa nɛ samaɣ sɔsɔɔ.

⁸ Kʋñɔŋ sɔsɔʋ alɩwaatʋ taa, Yesu kɔŋ se ɛhʋʋnɩ tɔm ɛjaɖɛ kɩdɛkɛdɩyɛ ɖɩnɛ lɛ, ɛɖʋʋ yom siɣsiɣ tʋ tʋmɩyɛ se ɛcɔnɩ “mbʋ payɩ ɛwɛna yɔ” pɩ-yɔɔ. (Mat. 24:46, 47) Alɩwaatʋ ndʋ tɩ-taa lɛ, mba pɛkɛ yom siɣsiɣ tʋ yɔ, pamʋʋ pa-kɩhɛyʋʋ ɛsɔdaa. Pa nɛ ɛyaa 144 000 taa mba lalaa nɛ Krɩstʋ pɔtɔkɩ kewiyitu ɛsɔdaa. Ye mbʋ, yom siɣsiɣ tʋ nɛ lɔŋsɩnɖʋ ɛɛkaɣ tasʋʋ wɛʋ tɛtʋ yɔɔ. Paa mbʋ yɔ, Yehowa nɛ Yesu pakaɣ lɩzʋʋ ɛyaa nabɛyɛ se pɛkɛ “awumbiya” nɛ patɩŋnɩ pɔ-yɔɔ nɛ peɖiyi mba pakaɣ caɣʋ wezuu maatɛŋ tɛtʋ yɔɔ yɔ.—Keɣa 44:16.

ƐBƐ YƆƆ PƖWƐƐ SE ‘ÐƖTƆZƲƲ MBA PƐÐƐƔ NƆƆ ÐƐ-HƐKƲ TAA YƆ PƆ-YƆƆ’?

⁹ Lɩmaɣza wena a-yɔɔ pɩwɛɛ se ‘ɖɩtɔzʋʋ mba pɛɖɛɣ nɔɔ ɖɛ-hɛkʋ taa yɔ pɔ-yɔɔ’ nɛ ɖɩtaɣ-wɛ liu yɔ aɖɔwa. Ye ɖɩlabɩ mbʋ wazasɩ nzɩ ɖihikiɣ? Apostoloo Pɔɔlɩ yɔɔdaa se: “Ɩña mba pɛɖɛɣ nɔɔ mɩ-hɛkʋ taa yɔ nɛ iluzi mɩ-tɩ pɛ-tɛɛ, mbʋ pʋyɔɔ yɔ pɛwɛɛ nɛ pefeŋiɣ mɩ-yɔɔ ɛzɩ mba pakaɣ labʋ akɔnta yɔ, se pɩsa nɛ pala tʋmɩyɛ nɖɩ nɛ taa leleŋ nɛ pataalabɩ-ɖɩ nɛ mɔla, ye pɩtɩkɛ mbʋ yɔ pɩkaɣ-mɩ sɩbɩnʋʋ.” (Ebr. 13:17) Pɩcɛyaa se ɖɩña mba pɛɖɛɣ nɔɔ ɖɛ-hɛkʋ taa yɔ nɛ ɖiluzi ɖa-tɩ pɛ-tɛɛ, mbʋ pʋyɔɔ yɔ, pakandɩyɩɣ ɖɔ-yɔɔ nɛ pañɩnɩɣ se piɖeni-ɖʋ fezuu taa.

¹⁰ Pɔɔlɩ yɔɔdɩ 1 Kɔrɛntɩ mba 16:14 taa se: “Mbʋ payɩ ɩlakɩ yɔ, ɩlabɩ-pʋ nɛ sɔɔlɩm.” Wɛtʋ kɩbandʋ ndʋ tɩ-yɔɔ patɩŋɩɣna nɛ pakpakɩɣ lɩmaɣza se piɖeni Yehowa samaɣ yɔ, ndʋ lɛ sɔɔlɩm. 1 Kɔrɛntɩ mba 13:4-8 yɔɔdɩ sɔɔlɩm tɔm se: “Sɔɔlɩm wɛ suuɖu nɛ pɩlakɩ kɩbandʋ. Sɔɔlɩm fɛyɩ sʋsɩ. Pɩɩkʋndʋʋ, pɩɩkpazɩɣ pɩ-tɩ, pɩɩlakɩ mbʋ pɩtɩtʋʋzɩ yɔ, pɩɩñɩnɩɣ pɩ-maɣmaɣ pɩ-kɛzɛsɩ, pɩɩmʋʋ pana lɛɛ lɛɛ. Pɩɩcakɩnɩ nɔɔyʋ. Pɩ-taa ɛɛlakɩ leleŋ nɛ mbʋ pɩfɛyɩ siɣsiɣ yɔ, ɛlɛ pɩ-taa lakɩ leleŋ nɛ toovenim. Pɩkatɩɣ pɩtɩŋa, pitisiɣ pɩtɩŋa pɩ-yɔɔ, pɩwɛnɩ lidaʋ pɩtɩŋa pɩ-yɔɔ, pɩɖɔkʋʋ pɩ-laŋɩyɛ pɩtɩŋa pɩ-taa. Sɔɔlɩm ɛɛtɛŋ kpa.” Patɩŋɩɣnɩ sɔɔlɩm yɔɔ nɛ pakpakɩɣ lɩmaɣza se piɖeni Yehowa samaɣ, mbʋ yekina nɛ sɔɔndʋ ɛɛkpaɣ-ɖʋ nɛ ɖitisiɣ se pɔcɔŋnɩ ɖɔ-yɔɔ camɩyɛ. Pɩwɩlɩɣ-ɖʋ ɖɔɖɔ sɔɔlɩm mbʋ Yehowa wɛnɩ ɖɔ-yɔɔ yɔ.

¹¹ Ɛzɩ pɩɩwɛʋ kajalaɣ pɩnzɩ mɩnʋʋ taa yɔ, mba pɔ-yɔɔ Yehowa tɩŋɩɣna nɛ eɖiyiɣ ɛ-samaɣ sɔnɔ yɔ, patɩtalɩ pilim. Paa mbʋ yɔ, Yehowa kaatɩŋnɩ ɛyaa mantɩtalɩ pilimwaa yɔɔ caanaʋ taa nɛ ɛla ɛ-sɔɔlɩm. Noowa labɩ aɖakaɣ nɛ esusi ɛ-alɩwaatʋ taa ɛjaɖɛ ɖɩzʋʋ tɔm. (Kiɖe 6:13, 14, 22; 2 Pɩy. 2:5) Paaɖʋ Moyizi tʋmɩyɛ se ɛlɩzɩ Yehowa samaɣ Ejipiti. (Ejl. 3:10) Fezuu kiɖeɖeu sɩnɩ ɛyaa mantɩtalɩ pilimwaa nɛ pama Bibl. (2 Tim. 3:16; 2 Pɩy. 1:21) Ɛzɩma Yehowa tɩŋɩɣnɩ ɛyaa mantɩtalɩ pilimwaa yɔɔ nɛ eɖiyiɣ tɔm susuu nɛ kpɛlɩkɩyaa labʋ tʋmɩyɛ sɔnɔ yɔ, pɩfɛyɩ se pɩpasɩ tisuu mbʋ ɖɩwɛnɩ ɛ-ɛgbɛyɛ yɔɔ yɔ. Ɛlɛ pɩkpazɩɣ-ɖʋ ɖoŋ mbʋ pʋyɔɔ yɔ, ɖɩnawa se pɩtaakɛ Yehowa sɩnʋʋ yɔɔ yɔ, ɛgbɛyɛ nɖɩ ɖɩtaapɩzɩ nɛ ɖɩla mbʋ ɖiɖiɣni labʋ sɔnɔ yɔ. Yom siɣsiɣ tʋ katɩ kala nɛ wɛtʋ ndɩ ndɩ sakɩyɛ, nɛ ɛzɩma ɛlabɩ wɛtʋ ndʋ tɩ-taa yɔ, pɩwɩlɩɣ se Ɛsɔ fezuu ɖiyiɣni-i. Yehowa ɛgbɛyɛ nɖɩ ɖɩwɛ tɛtʋ yɔɔ sɔnɔ yɔ, ɖihiɣ wazasɩ sakɩyɛ. Ye mbʋ, ɖiwolo pɩ-yɔɔ nɛ ɖɩɖʋʋ-ɖɩ nesi nɛ ɖa-laŋɩyɛ pilim nɛ ɖɩtaɣ-ɖɩ liu ɖɔɖɔ.

ƐZƖMA ÐƖWƖLƖƔ SE ÐƖTAƔ YEHOWA ƐGBƐYƐ LIU?

¹² Mba pɛwɛnɩ wala ɛgbɛyɛ taa yɔ, pawɩlɩɣ se pataɣ ɛgbɛyɛ liu, ye petisiɣ pa-tʋma nɛ taa leleŋ nɛ palakɩ-yɛ camɩyɛ yɔ. (Tʋma 20:28) Ða mba ɖɩkɛ Kewiyaɣ tɔm susuyaa yɔ, ɖɩlakɩ tʋmɩyɛ nɖɩ nɛ kpekpeka alɩwaatʋ ndʋ ɖisusuu tɔm kpaɣ ɖɩɣa nɛ ŋwolo ɖɩɣa, ɖɩlakɩ pɩsɩ nɛ ŋna-ɩ waa nɛ ɖɩkpɛlɩkɩɣnɩ ɛyaa Bibl yɔ. (Mt 24:14; 28:19, 20) Pɩsa nɛ tɔɔnaɣ ŋga yom siɣsiɣ tʋ haɣ-ɖʋ yɔ, kawazɩ-ɖʋ lɛ, pɩwɛɛ se ɖɩñɔɔzʋʋ ɖe-kediɣzisi, ɖiwoki-sɩ nɛ ɖiwoki ɖɔɖɔ egeetiye kigbeɣliŋ nɛ kigbeɣliŋ sɔsɔŋ. Ða nɛ ɖo-koobiya Krɩstʋ ñɩma lalaa ɖikpeɣliɣ lɛ, ɖihikiɣ wazasɩ sakɩyɛ mbʋ pʋyɔɔ, pɩkɛ alɩwaatʋ ndʋ tɩ-taa ɖɩkpazɩɣ ɖama ɖoŋ yɔ.—Ebr 10:24, 25.

¹³ Alɩwaatʋ ndʋ ɖɩɖʋʋ ɛgbɛyɛ nesi nɛ ɖa-ñɩm yɔ, pɩwɩlɩɣ kpayɩ kpayɩ se ɖɩtaɣ-ɖɩ liu. (Adu. 3:9, 10) Alɩwaatʋ ndʋ ɖɩnaɣ se ɖo-koobiya nabɛyɛ wɛnɩ tomnaɣ yɔɔ kɩcɛyɩm nabʋyʋ yɔ, ɖɩsɩɣnɩ-wɛ kpɛdɛyɛ. (Gal. 6:10; 1 Tim. 6:18) Koobiɖe sɔɔlɩm yɔɔ ɖɩlakɩ mbʋ, nɛ ɖɩtɩŋɩɣnɩ nʋmɔŋ ɛnɩ ɩ-yɔɔ paa ɛzɩmtaa, nɛ ɖɩwɩlɩɣ Yehowa nɛ ɛ-ɛgbɛyɛ se ɖa-taa wɛ leleŋ nɛ kɩbam mbʋ payɩ palakɩ-ɖʋ yɔ.—Yoh. 13:35.

¹⁴ Ðɩwɩlɩɣ ɖɔɖɔ se ɖɩtaɣ ɛgbɛyɛ liu, ye ɖiluzuu ɖa-tɩ ɖɩ-paɣtʋ tɛɛ yɔ. Mba pɔcɔŋnɩ ɖɔ-yɔɔ, ɛzɩ egeetiye yɔɔ cɔnɩyaa nɛ ɛgbɛyɛ taa ɛzʋtʋyaa mbʋ yɔ, patasɩɣ-ɖʋ lɔŋ ndɩ ndɩ. Ye ɖitisiɣ nɛ ɖɩlakɩnɩ lɔŋ ɛnɩ tʋmɩyɛ yɔ, ɖɩwɩlɩɣ se ɖiluzuu ɖa-tɩ ɛgbɛyɛ paɣtʋ tɛɛ. Koobiya mba, pɛwɛ ‘mba pɛɖɛɣ nɔɔ ɖɛ-hɛkʋ taa yɔ’ pa-taa, nɛ pɩwɛɛ se ɖɩñam-wɛ nɛ ɖiluzuu ɖa-tɩ pɛ-tɛɛ. (Ebr. 13:7, 17) Paa ɖɩɩnɩɣ mbʋ pʋyɔɔ pakpakɩɣ lɩmaɣza naayɛ yɔ pɩ-taa yɔ, ɖɩnawa se ye ɖɩɖʋʋ-wɛ nesi yɔ pɩɩsɩkɩnɩ-ɖʋ kpa. Piyeki nɛ Yehowa wazɩ-ɖʋ, mbʋ pʋyɔɔ yɔ ɖɩñaŋ Masɩ nɛ ɛ-ɛgbɛyɛ. Nɛ pɩwɩlɩɣ ɖɔɖɔ se ɖiluzuu ɖa-tɩ Yesu Krɩstʋ weyi ɛkɛ ɖa-Ñʋʋdʋ yɔ ɛ-tɛɛ.

¹⁵ Toovenim, ɖɩwɛnɩ lɩmaɣza sakɩyɛ wena a-yɔɔ pɩwɛɛ se ɖɩtaa yom siɣsiɣ tʋ nɛ lɔŋsɩnɖʋ liu yɔ. Sataŋ weyi ɛkɛ ɛjaɖɛ ɖɩnɛ ɖi-wiyaʋ yɔ, ɛwɛɛ nɛ ɛñakɩ pana se episi Yehowa nɛ ɛ-ɛgbɛyɛ pa-hɩɖɛ. (2 Kɔr. 4:4) Ðitaayele nɛ Sataŋ kpa-ɖʋ ɛ-kpacanaa taa! (2 Kɔr. 2:11) Ɛnawa se “alɩwaatʋ pazɩ yem pɩkazɩ-ɩ” se pɛpɛɖɩ-ɩ pɔʋ sɔsɔʋ taa; pʋyɔɔ ɛñakɩ pana se Yehowa sɛyaa sakɩyɛ ɩha ɛlɛ siɣye. (Natʋ 12:12) Paa Sataŋ ɛñakɩ pana ɛzɩma yɔ, ɖɩcɛyɩ ɖa-tɩ nɛ ɖɩñɔɔnɩ Yehowa kpam. Tɛtɛ ɖiwolo pɩ-yɔɔ nɛ ɖɩtaa liu Yehowa nɛ nʋmɔʋ ŋgʋ kɩ-yɔɔ ɛtɩŋɩɣna nɛ eɖiyiɣ ɛ-samaɣ sɔnɔ yɔ. Ye ɖɩlakɩ mbʋ yɔ, piyeki nɛ nɔɔ kʋɖʋmaɣ wɛɛ ɛgbɛyɛ taa.