Ðɛ-Ɛsɔ sɛtʋ lona

PAÐƲ paɣtʋ Yehowa sɛyaa toovenim ñɩma se pekpeɣliɣ nɛ pawɩlɩɣ-wɛ tɔm nɛ pakpazɩɣ ɖama ɖoŋ. (Ebr. 10:23-25) “Ɛsɔ sɛtʋ kɩɖanɖʋʋ” kaakɛnɩ lone nɖɩ ɖɩ-taa Izrayɛɛlɩ piya kaakpeɣlaɣ nɛ kalakɩ kɛ-Ɛsɔ sɛtʋ tʋmɩyɛ. Izrayɛɛlɩ piya kaakɛnɩ samaɣ ŋga Ɛsɔ lɩzaa yɔ. (Ejl. 39:32, 40) Pʋwayɩ lɛ, Daviid pɩyalʋ Salomɔɔ ma ɖɩɣa yaa templo se ɛɖʋnɩ Ɛsɔ hɩɖɛ. (1 Aw. 9:3) Pɔyɔkɩ templo ŋgʋ pɩnaɣ 607 P.P.Y. nɛ pʋwayɩ lɛ, Yuuda mba kpeɣliɣ lona wena payaɣaɣ se sinaagɔɔgɩwaa yɔ, a-taa nɛ pɛsɛɣ Ɛsɔ. Pʋwayɩ pɔkɔma nɛ patasɩ maʋ templo lɛ, kɩɖaɣnɩ pɩsʋʋ kele kele Ɛsɔ sɛtʋ lone. Yesu wɩlɩ tɔm sinaagɔɔgɩwaa taa nɛ templo taa. (Luka 4:16; Yoh. 18:20) Halɩ Yesu labɩ kediɣzaɣ ɖɔɖɔ pʋʋ nakʋyʋ yɔɔ.—Mat. 5:1–7:29.

² Yesu sɩm wayɩ lɛ, Krɩstʋ ñɩma kpelaɣ lona wena a-taa ɛyaa sakɩyɛ cakɩ yɔ, nɛ ɖɩsɩ taa se pɩsa nɛ pasɩnɩ ɛyaa nɛ panɩɩ Masɩ taa nɛ panɩɩ koobiɖe sɔɔlɩm leleŋ. (Tʋma 19:8, 9; Roma 16:3, 5; Kol. 4:15; Filem. 2) Nabʋyʋ taa, nazɩm yɔɔ lɛ, pɩɩcɛyaa se kajalaɣ Krɩstʋ ñɩma ikpeɣli lona wena aposaa yɔ a-taa nɛ po-koyindinaa ɩtaana-wɛ. Ye mbʋ, caanaʋ taa Ɛsɔ sɛyaa siɣsiɣ ñɩma ɩɩwɛnɩ tisuu sɔsɔm nɛ pɔsɔɔlɩ kpeɣluu pɛ-Ɛsɔ sɛtʋ lona taa se pɛkɛ “[Yehowa] sukulibiya.”—Iza. 54:13.

³ Sɔnɔ ɖɔɖɔ, Krɩstʋ ñɩma katɩɣ lona wena a-taa ɛyaa kpeɣliɣ sakɩyɛ yɔ nɛ ɖɩsɩ taa nɛ palakɩ pɛ-Ɛsɔ sɛtʋ tʋmɩyɛ. Ðoŋ ɖoŋ lɛ, pekpeɣliɣ ɖɩsɩ taa se pɛɖɛɛ posusi tɔm. Mba petisiɣ nɛ pekpeɣliɣ pa-ɖɩsɩ taa yɔ, panaɣ se pɩkɛnɩ-wɛ waɖɛ sɔsɔɖɛ. Sakɩyɛ yɔɔdaa se pehiɣ fezuu taa wazasɩ sakɩyɛ, alɩwaatʋ ndʋ petisaa se pala kediɣzisi nzɩ pɛ-tɛ yɔ.

KEWIYAƔ KPAAŊ

⁴ Lone nɖɩ ɖɩ-taa Yehowa Aseɣɖe Tɩnaa kɩlɩɣ kpeluu yɔ lɛ Kewiyaɣ Kpaaŋ. Ðoŋ ɖoŋ lɛ, payakɩ tɛtʋ nɛ pama Kewiyaɣ Kpaaŋ kɩfalʋʋ, yaa pɔñɔɔzʋʋ kuduyuu kɩbɩnʋʋ nakʋyʋ nɛ kɩpɩsɩ Kewiyaɣ Kpaaŋ. Pɩsa nɛ pataakɩlɩ wɛɛkʋʋ liidiye nɛ palabɩnɩ lona ana tʋmɩyɛ camɩyɛ lɛ, ye pɩsaŋ yɔ, agbaa sakɩyɛ lakɩ kediɣzisi Kewiyaɣ Kpaaŋ kʋɖʋmʋʋ taa. Hɔɔlɩŋ nɩɩyɩ taa lɛ, pɩcɛyaa se pala haya Kpaaŋ nakʋyʋ. Ye pama Kpaaŋ kɩfalʋʋ nakʋyʋ yaa palabɩ nakʋyʋ yɔɔ lɛɣzɩtʋ sakɩyɛ yɔ, pɩwɛɣ ɖeu se paɖʋzɩ-kʋ Yehowa nesi tɛɛ. Ɛlɛ, ye ñɔɔzɩtʋ ndʋ palabɩ Kpaaŋ ŋgʋ kɩ-yɔɔ yɔ tɩtɩɖɔɔ yɔ, pɩtɩcɛyɩ se pala sɔnzɩ nasɩyɩ nɛ pɩwɩlɩ se paɖʋzʋʋ-kʋ Yehowa nesi tɛɛ.

⁵ Paaɖɛlɛsɩɣ niye Kewiyaɣ Kpaamɩŋ maʋ nɛ ɩ-ñɔɔzʋʋ taa se pɩhɔ ɛyaa lalaa lɩmaɣza. Ɛzɩma pamaɣ Kpaamɩŋ lone naɖɩyɛ taa yɔ, pɩpɩzɩɣ nɛ pɩwɛ ndɩ nɛ ɛzɩma pamaɣ-ɩ lone lɛɛɖɛ taa yɔ, ɛlɛ kaɖʋwa kʋɖʋmaɣ yɔɔ pamaɣ-ɩ. (Tʋma 17:24) Paa lone nɖɩ ɖɩ-taa lɛ, pɩpɔzʋʋ se Kpaaŋ ɛmʋnɩ lone nɖɩ ɖɩ-taa wɛtʋ, ɛlɛ pɩpɔzʋʋ ɖɔɖɔ se kɩwɛɛ kajʋka nɛ kɩmʋnɩ Krɩstʋ ñɩma kediɣzisi ɖɩlaɖɛ.

⁶ Agbaa wena akpeɣliɣ Kpaaŋ nakʋyʋ taa yɔ, a-tɩŋa pɩwɛɛ se aɖʋ nesi tʋma wena palakɩ se pɔcɔnɩ Kewiyaɣ Kpaaŋ yɔɔ yɔ. Paacɔʋ yaa paasʋlʋmʋʋ liidiye. Pasɩɣ haɖɛ aɖakasɩ se mba pɔkɔŋ kediɣzisi yɔ, papɩzɩ nɛ pala sɔɔlɩm haɖɛ se pɩsa nɛ pɔcɔnɩ Kpaaŋ kɩcɛyɩm ɖeɖe. Palakɩ haɖɛ nɖɩ nɛ pa-laŋɩyɛ pilim.—2 Kɔr. 9:7.

⁷ Koobiya nawa se pɩkɛnɩ-wɛ waɖɛ se pala haɖɛ nɛ pɔcɔŋnɩ Kpaaŋ kɩcɛyɩm ɖeɖe, nɛ paha ɖɔɖɔ pa-tɩ faaa nɛ pala tʋma wena pɩpɔzʋʋ nɛ Kpaaŋ wɛɛ cɔnʋʋ camɩyɛ yɔ. Ðoŋ ɖoŋ lɛ, ɛgbɛyɛ taa ɛzʋtʋyʋ nɔɔyʋ yaa ɛgbɛyɛ taa tʋmlaɖʋ nɔɔyʋ lakɩnɩ Kpaaŋ taa ñɔɔzʋʋ ɖʋtʋ. Sakɩyɛ taa lɛ, pɔpɔzʋʋ tɔm susuu agbaa se añɔɔzʋʋ Kpaaŋ taa, nɛ paa tɔm susuu ɛgbɛyɛ nɖɩ, ɖɩɩlakɩ tʋmɩyɛ nɖɩ lɛ, ɖɩ-yɔɔ cɔnɩyʋ yaa ɛ-sɩnɩyʋ ɖɛɣnɩ nɔɔ. Pɩpɔzʋʋ se Kpaaŋ taa, kɩ-ɛsɩndaa nɛ kɩ-wayɩ ɩwɛɛ kajʋka nɛ pɩɖʋ Yehowa nɛ ɛ-ɛgbɛyɛ hɩɖɛ.

⁸ Ye agbaa sakɩyɛ ikpeliɣni Kpaaŋ nakʋyʋ taa yɔ, agbaa ana, a-taa ɛzʋtʋyaa ɖʋʋ Kewiyaɣ Kpaaŋ yɔɔ cɔnʋʋ kɔɔmiite se kɩcɔnɩ Kpaaŋ kɩcɛyɩm tɩŋa ɖeɖe. Agbaa ana, a-taa ɛzʋtʋyaa lɩzɩɣ pa-taa nɔɔyʋ se ɛkɛ kɔɔmiite ŋgʋ kɩ-tʋmɩyɛ kpɛndɩyʋ. Kpaaŋ yɔɔ cɔnʋʋ kɔɔmiite taa tʋmlaɖaa lakɩ Kpaaŋ ñɔɔzʋʋ ɖʋtʋ, pɔcɔŋnɩ ki-ɖeɖe se kɩwɛɛ cɔnʋʋ paa ɛzɩmtaa nɛ mbʋ mbʋ pɩpɔzʋʋ se pɔñɔɔzɩnɩ-kʋ yɔ pɩtaatɛɖɩ koobiya; ɛlɛ pa nɛ ɛgbɛyɛ taa ɛzʋtʋyaa lalaa palakɩ tʋmɩyɛ nɖɩ nɔɔ kʋɖʋmaɣ taa. Pʋyɔɔ pɩwɛɛ se agbaa tɩŋa ɩɖʋʋ nesi ɖʋtʋ ndʋ palaba yɔ, nɛ nɔɔ kʋɖʋmaɣ wɛɛ a-hɛkʋ taa.

⁹ Ye agbaa sakɩyɛ ikpeɣliɣni Kpaaŋ nakʋyʋ taa yɔ, apɩzɩɣ nɛ anɩɩnɩ ɖama nɛ alɛɣzɩɣ a-kediɣzisi alɩwaatʋ. Pɩwɛɛ se ɛgbɛyɛ taa ɛzʋtʋyaa ɩwɩlɩ se pamaɣzɩɣ lalaa yɔɔ nɛ pɛwɛnɩ koobiɖe sɔɔlɩm alɩwaatʋ ndʋ palakɩ tʋmɩyɛ nɖɩ yɔ. (Fil. 2:2-4; 1 Pɩy. 3:8) Pɩfɛyɩ se ɛgbɛyɛ naɖɩyɛ ɛkpaɣ lɩmaɣza ɖi-ɖeke nɛ ɖɩñɩɣ agbaa lɛɛna yɔɔ se alabɩnɩ lɩmaɣza ana tʋmɩyɛ. Ye egeetiye yɔɔ cɔnɩyʋ ɛkɔm ɛgbɛyɛ naɖɩyɛ taa yɔ, pɩwɛɛ se agbaa lɛɛna wena alakɩ kediɣzisi kpaaŋ ŋgʋ kɩ-taa yɔ, alɛɣzɩ a-kediɣzisi alɩwaatʋ ɛzɩ pɩpɔzʋʋ yɔ, kpɩtaʋ ŋgʋ kɩ-taa.

¹⁰ Papɩzɩɣ nɛ pɔyɔɔdɩ nesi ɖɔkʋʋ tɔm yaa pimtu tɔm Kewiyaɣ Kpaaŋ taa; ɛlɛ pɩwɛɛ se pɔpɔzɩ nʋmɔʋ Ɛsɔ sɛtʋ tʋmɩyɛ kɔɔmiite nɛ pʋcɔ. Ɛgbɛyɛ taa ɛzʋtʋyaa mba pɛwɛ kɔɔmiite ŋgʋ kɩ-taa yɔ, patazɩɣ tɔm taa camɩyɛ nɛ pakpaɣ lɩmaɣza wena alakɩ nɔɔ kʋɖʋmaɣ nɛ lɔŋ tasʋʋ mbʋ ɛgbɛyɛ piliŋa ha-wɛ yɔ.

¹¹ Mba pahaɣ-wɛ nʋmɔʋ se pɔyɔɔdɩ nesi ɖɔkʋʋ tɔm yaa pimtu tɔm Kewiyaɣ Kpaaŋ taa yɔ, pɩwɛɛ se pa-lakasɩ ɩmʋnɩ Krɩstʋ ñɩma. Pɩfɛyɩ se pala nabʋyʋ Kpaaŋ taa nɛ pipisi ɛgbɛyɛ yaa Yehowa hɩɖɛ. (Fil. 2:14, 15) Ye ɛgbɛyɛ piliŋa ɛha nʋmɔʋ yɔ, papɩzɩɣ nɛ pala fezuu taa ɖʋtʋ lɛɛtʋ Kpaaŋ taa, ɛzɩ Kewiyaɣ Ɛsɔ sɛtʋ sukuli nɛ nʋmɔʋ lɩzɩyaa sukuli mbʋ yɔ.

¹² Pɩwɛɛ se ɛgbɛyɛ taa koobiya ɩwɛɛnɩ ñamtʋ kediɣzaɣ lone yɔɔ paa ɛzɩmtaa. Pɩwɛɛ se po-wondu suu, pa-tɩ sandʋʋ nɛ pa-lakasɩ ɩɖʋ hɩɖɛ Yehowa sɛtʋ. (Ekl. 4:17; 1 Tim. 2:9, 10) Ðɩwɩlɩɣ se ɖɩwɛnɩ ɛsɩmɩyɛ ɖe-kediɣzisi yɔɔ, ye ɖɩɖɔŋ lɔŋ tasʋʋ mbʋ paha-ɖʋ yɔ, pɩ-yɔɔ yɔ.

¹³ Pɩcɛyaa se kediɣzisi ɩɖɔ camɩyɛ cɔlɩɩɩ. Pɩpɔzʋʋ se piya ɩcaɣ sɩ-lʋlɩyaa cɔlɔ. Peseɣtiɣ lʋlɩyaa se pacaɣ ɖenɖe paakɩlɩɣ hɔm lalaa lɩmaɣza, ye pɩpɔzʋʋ se palɩnɩ pe-piya nɛ pɔhɔ sɩ-nɩŋgbaaŋ yaa pɔcɔnɩ sɩ-kɩcɛyɩm nabʋyʋ ɖeɖe yɔ.

¹⁴ Palɩzɩɣ koobiya abalaa mba pamʋnaa yɔ, se pɛkɛnɩ ɛyaa mʋʋ tʋmɩyɛ ɖɔkɩyaa Kewiyaɣ Kpaaŋ taa. Pɩpɔzʋʋ se pɛkɛ ɛyaa mba pɛwɛ kpekpeka, pamʋʋyʋʋnɩ lalaa nɛ panɩɣ tɔm taa yɔ. Pa-tʋma naayɛ lɛ se pɛsɛɛ ɛyaa kɩfama nɛ pamʋ-wɛ camɩyɛ, pasɩnɩ mba pacaɣ wayɩ yɔ nɛ pehiɣ ɖɩjaɣyɛ, pakalɩ ɛyaa mba pɔkɔm kediɣzaɣ taa yɔ pa-ñʋʋ, nɛ pɔcɔnɩ helim fɛtʋʋ menziiniwaa ɖeɖe nɛ pɩla tʋmɩyɛ camɩyɛ. Ye pɩpɔzʋʋ yɔ, ɛyaa mʋʋ tʋmɩyɛ ɖɔkɩyaa pɩzɩɣ nɛ peheyi lʋlɩyaa se pɔcɔnɩ pe-piya ɖeɖe camɩyɛ nɛ sitaaseɣ Kpaaŋ taa pʋcɔ nɛ kediɣzisi paɣzɩ yaa sɩtɛŋ lɛ, nɛ sitaaleɣyiɣ ɖɔɖɔ tɔm ɖɩyɔɔdɩyɛ. Ye pɩɣa nakɛyɛ ɛɛcakɩ ɖiɣɖiɣ yɔ, papɩzɩɣ nɛ peheyi ka-lʋlɩyʋ nɛ nɔɔ kɩbaŋa se ɛlɩzɩ-kɛ nɛ awayɩ nɛ kataacɛyɩ lalaa. Ɛyaa mʋʋ tʋmɩyɛ ɖɔkɩyaa tʋmɩyɛ labʋ yeki se kediɣzisi ɩwazɩ paa weyi. Pɩkɩlɩɣ ɖeu se ɛyaa mʋʋ tʋmɩyɛ ɖɔkɩyaa ɩkɛ ɛgbɛyɛ taa ɛzʋtʋyaa yaa ɛgbɛyɛ taa tʋmlaɖaa.

KEWIYAƔ KPAAMƖŊ MAƲ

¹⁵ Kajalaɣ pɩnzɩ mɩnʋʋ taa, Krɩstʋ ñɩma nabɛyɛ kaawɛnɩ tomnaɣ yɔɔ ñɩm nɛ pɩkpaɖɩ lalaa, pʋyɔɔ Apostoloo Pɔɔlɩ mawa se: “Pɩtɩŋnɩ kɩmaŋ wɛʋ yɔɔ lɛ, mbʋ ɩwɛna lɛɛlɛɛyɔ nɛ pɩɖɛlɩsɩ yɔ, pɩsɩna nɛ pɔcɔnɩ pa-kɩcɛyɩm ɖeɖe nɛ mbʋ pɛwɛna nɛ pɩɖɛlɩsɩ yɔ, pɩsɩna ɖɔɖɔ nɛ pɔcɔnɩ mbʋ pɩtɛɖɩɣ-mɩ yɔ pi-ɖeɖe, se pɩsa nɛ pɩtɩŋa pɩwɛɛ kɩmaŋ.” (2 Kɔr. 8:14) “Kɩmaŋ wɛʋ” wɛtʋ ndʋ, tɩwɛ ɖɔɖɔ sɔnɔ. Pakpakɩɣ liidiye nɖɩ ɛjaɖɛ kpeekpe yɔɔ agbaa haɣ yɔ, nɛ pamaɣnɩ Kewiyaɣ Kpaamɩŋ nɩɩyɩ nɛ pɔñɔɔzʋʋnɩ lɛɛŋ. Sɔɔlɩm haɖɛ nɖɩ ɛjaɖɛ kpeekpe yɔɔ koobiya lakɩ yɔ, ɖɩkɛdɩɣnɩ Yehowa ɛgbɛyɛ nɛ agbaa wena pakpakɩɣ haɖɛ nɖɩ nɛ pasɩɣna yɔ.

¹⁶ Ðʋtʋ ndʋ ɛgbɛyɛ piliŋa lakɩ paa egeetiye nɖɩ ɖɩ-taa yɔ, tɩ-yɔɔ patɩŋɩɣna nɛ paha paa ɛgbɛyɛ nɖɩ lɛ, Kewiyaɣ Kpaaŋ ŋgʋ kɩ-taa pɩwɛɛ se ɖikpeɣli yɔ. Ɛgbɛyɛ piliŋa ɖɔɖɔ cɔŋnɩnɩ kɩ-ɛjaɖɛ yaa kɩ-ajɛɛ taa nɛ kɩna hɔɔlɩŋ weyi ɩ-taa pɩpɔzʋʋ se pama Kewiyaɣ Kpaamɩŋ kɩfaŋ yaa pɔñɔɔzɩ kɩbɩŋ yɔ, nɛ alɩwaatʋ ndʋ tɩ-taa pɩwɛɛ se pala mbʋ yɔ. Kɛgbɛdɩsaɣ nakɛyɛ lakɩ lɛ, palakɩ ɖʋtʋ nɛ pɔñɔɔzɩ Kewiyaɣ Kpaamɩŋ weyi ɩwɛɛkaa yɔ. Nabʋyʋ taa lɛ, pɔñɔɔzʋʋ koobiya ɖɩsɩ ɖɔɖɔ.

¹⁷ Ɛgbɛyɛ piliŋa ɖʋʋnɩ tʋmɩyɛ koobiya mba pahaɣ pa-tɩ faaa nɛ pasɩɣna se paya tɛtʋ, pala Kewiyaɣ Kpaamɩŋ anjaʋwaa nɛ takayɩsɩ nzɩ komina pɔzʋʋ yɔ. Ŋga ɖʋʋnɩ ɖɔɖɔ tʋmɩyɛ mba pamaɣ kpaamɩŋ nɛ pɔñɔɔzʋʋ-ɩ yɔ. Pɩpɔzʋʋ se pama Kewiyaɣ Kpaamɩŋ sakɩyɛ ajɛɛ ndɩ ndɩ taa, pʋyɔɔ pɩwɛɛ se koobiya sakɩyɛ ɩha pa-tɩ nɛ pala tʋmɩyɛ nɖɩ. Koobiya mba payɩ pamɩyɩsɩ-wɛ lɩm, pamʋnaa nɛ pɔsɔɔlɩ yɔ, peseɣtiɣ-wɛ se pɔpɔzɩ pɛ-ɛgbɛyɛ taa Ɛsɔ sɛtʋ tʋmɩyɛ kɔɔmiite, takayaɣ ŋga ka-taa pɩpɔzʋʋ se pañɩɣ nesi nɛ paha pa-tɩ faaa yɔ. Halɩ tɔm susuyaa mba patɩmɩyɩsɩtɩ-wɛ lɩm yɔ, papɩzɩɣ nɛ paɖʋ nesi, alɩwaatʋ ndʋ pamaɣ yaa pɔñɔɔzʋʋ pa-maɣmaɣ pe-Kewiyaɣ Kpaaŋ yɔ.

KIGBEƔLUU KPAAMƖŊ

¹⁸ Ðoŋ ɖoŋ lɛ, kajalaɣ Krɩstʋ ñɩma kpeɣlaɣ cabɩ cabɩ. Ɛlɛ nabʋyʋ taa mba pekpeɣliɣ yɔ, pɛkɛ “ɛyaa samaɣ sɔsɔɔ.” (Tʋma 11:26) Mbʋ ɖɔɖɔ sɔnɔ, Yehowa sɛyaa sakɩyɛ kpeɣliɣ nɛ palakɩ egeetiye kigbeɣliŋ nɛ kigbeɣliŋ sɔsɔŋ. Papɩzɩɣ nɛ pala haya lone naɖɩyɛ nɛ pala kigbeɣliŋ ɛnɩ ɖɩ-taa; ɛlɛ ɖenɖe paapɩzɩɣ yɔ, pamaɣ Ɛsɔ sɛtʋ lona wena payaɣ se Kigbeɣluu Kpaamɩŋ yɔ.

¹⁹ Nabʋyʋ taa, payakɩ kuduyuu sɔsɔʋ nakʋyʋ nɛ pɔñɔɔzɩ-kʋ nɛ kɩpɩsɩ Kigbeɣluu Kpaaŋ. Ɛlɛ ɖoŋ ɖoŋ lɛ, tɛtʋ payakɩ nɛ pama Kigbeɣluu Kpaaŋ kɩfalʋʋ. Kigbeɣluu Kpaaŋ paɣlɩka lɩɣnɩ kɩcɛyɩm mbʋ pɩwɛ ɖenɖe pama-kʋ yɔ pɩ-cɔlɔ. Ɛgbɛyɛ piliŋa kpakɩɣnɩ lɩmaɣzɩyɛ se pama Kigbeɣluu Kpaaŋ kɩfalʋʋ yaa pɔñɔɔzɩ kuduyuu kɩbɩnʋʋ nakʋyʋ nɛ kɩpɩsɩ Kigbeɣluu Kpaaŋ. Ɛlɛ pʋcɔ nɛ pakpaɣ lɩmaɣzɩyɛ nɖɩ lɛ, palakɩ akɔnta camɩyɛ nɛ pana liidiye nɖɩ pɩkaɣ pɔzʋʋ yɔ, nɛ tam ɛzɩma pakaɣ labʋ kigbeɣliŋ, kpaaŋ ŋgʋ kɩ-taa yɔ.

²⁰ Ɛgbɛyɛ piliŋa lɩzɩɣ koobiya abalɩñɩma nabɛyɛ se pɔcɔŋnɩ ɩ-yɔɔ nɛ pɔñɔɔzʋʋ ɩ-taa. Palakɩ ɖʋtʋ nɛ egeetiye taa koobiya ñɔɔzʋʋ kpaamɩŋ ɛnɩ ɩ-taa ɖoŋ ɖoŋ. Paa fenasɩ loɖo nzɩ sɩ-taa lɛ, palakɩ ɖɔɖɔ ɖʋtʋ nɛ pɔñɔɔzʋʋ kpaamɩŋ ɛnɩ ɩ-taa. Pɩtasɩ lɛ, palakɩ tʋma lɛɛna wena ayeki se kpaamɩŋ ɛnɩ ileɖi yɔ. Koobiya hikiɣ wazasɩ sakɩyɛ alɩwaatʋ ndʋ paɖʋʋ nesi nɛ palakɩ tʋma ana yɔ. Pʋyɔɔ peseɣtiɣ agbaa tɩŋa taa koobiya se paha pa-tɩ faaa nɛ paɖʋ nesi ɖʋtʋ ndʋ.—Keɣa 109:3; Mal. 1:10.

²¹ Nabʋyʋ taa, palakɩ teokrasɩ tʋma lɛɛna Kigbeɣliŋ Kpaamɩŋ taa, ɛzɩ Bibl kpɛlɩkʋʋ sukulinaa nɛ egeetiye yɔɔ cɔnɩyaa nɛ ɛgbɛyɛ taa ɛzʋtʋyaa ŋgee kediɣzisi mbʋ yɔ. Ɛzɩ pɩwɛʋ Kewiyaɣ Kpaamɩŋ hɔɔlʋʋ taa yɔ, paɖʋzʋʋ ɖɔɖɔ Kigbeɣliŋ Kpaamɩŋ Yehowa nesi tɛɛ. Alɩwaatʋ ndʋ ɖikpeɣliɣ Kigbeɣluu Kpaaŋ taa yɔ, pɩpɔzʋʋ se ɖa-lakasɩ, ɖo-wondu suu nɛ ɖa-tɩ sandʋʋ ɩmʋna, ɛzɩ alɩwaatʋ ndʋ ɖiwoki ɖɔɖɔ Kewiyaɣ Kpaaŋ taa se ɖɩsɛɛ Ɛsɔ yɔ.

²² Ɛyaa kɩfama sakɩyɛ wɛɛ nɛ pɔkɔŋ Ɛsɔ ɛgbɛyɛ taa kɛdɛzaɣ alɩwaatʋ tʋnɛ tɩ-taa. Pɩwɩlɩɣ kpayɩ kpayɩ se Yehowa wɛɛ nɛ ɛwazɩɣ ɛ-ɛgbɛyɛ. (Iza. 60:8, 10, 11, 22) Pʋyɔɔ pɩwɛɛ se ɖɩɖʋ nesi ɖʋtʋ ndʋ palaba se pɩsa nɛ ɖɩwɛɛnɩ Ɛsɔ sɛtʋ lona wena amʋnaa nɛ a-taa wɛɛ cɩɖɩ cɩɖɩ yɔ. Ye ɖɩlakɩ mbʋ yɔ, ɖɩwɩlɩɣ se ɖa-taa wɛ leleŋ nɛ kediɣzisi lona wena a-taa ɖikpeɣliɣ nɛ ɖɩkpazɩɣ ɖama ɖoŋ yɔ. Nɛ lɛɛlɛɛyɔ pɩpɔzʋʋ kpem se ɖɩlakɩ mbʋ, mbʋ pʋyɔɔ yɔ Yehowa kɩyakʋ ñɔtɩ kpam.