“Ɩla pɩtɩŋa Ɛsɔ samtʋ yɔɔ”

PƖPƆZƲƲ se paa ɛzɩmtaa lɛ, ɖɔ-yɔɔdaɣ nɛ ɖa-lakasɩ ɩwɩlɩ se ɖɩha ɖa-tɩ Ɛsɔ kele kele tʋ Yehowa se ɖɩla ɛ-sɔɔlɩm. Apostoloo Pɔɔlɩ yɔɔdaɣ paɣtʋ kiɖe nɖɩ pɩwɛɛ se ɖiɖiyi-ɖʋ hɔɔlʋʋ kʋnɛ kɩ-taa yɔ ɖɩ-tɔm lɛ, ɛtɔm se: “Paa ɩtɔkɩ yaa ɩñɔʋ yaa ɩlakɩ pʋyʋ lɛɛbʋ yɔ, ɩla pɩtɩŋa Ɛsɔ samtʋ yɔɔ.” (1 Kɔr. 10:31) Ye mbʋ, pɩwɛɛ se ɖɩñɔɔnɩ Yehowa paɣtʋ ndʋ tɩlakɩ nɔɔ kʋɖʋmaɣ nɛ e-pilim wɛtʋ yɔ. (Kol. 3:10) Pɩpɔzʋʋ se ɖɩmaɣzɩnɩ Ɛsɔ nɛ ɖɩkɛ samaɣ ŋga kɛwɛ kele kele yɔ.—Efɛz. 5:1, 2.

² Apostoloo Pɩyɛɛrɩ hɔm Krɩstʋ ñɩma lɩmaɣza nɛ ewoni tɔm tʋnɛ tɩ-yɔɔ nɛ ɛtɔ se: “Ɛzɩ piya nzɩ sɩñaŋ yɔ, ɩtaatasɩ yebu nɛ kɔɖɛyɩ ŋgʋ ɩɩwɛnɩ ɖooo lɔŋ mɩ-kɩɩsɩŋɩyɩtʋ taa yɔ, kɩwɛɛnɩ ɖoŋ mɩ-yɔɔ, ɛlɛ ɛzɩ Kiɖeɖeu weyi ɛya-mɩ yɔ, mɩ-maɣmaɣ ɩpɩsɩ kiɖeɖema mɩ-ɖɔnɛ kpeekpe taa, mbʋ pʋyɔɔ yɔ pamawa se: ‘Pɩwɛɛ se ɩkɛ kiɖeɖema, mbʋ pʋyɔɔ yɔ mɛnkɛ kiɖeɖeu.’” (1 Pɩy. 1:14-16) Pɩpɔzʋʋ se mba pɛwɛ Krɩstʋ ɛgbɛyɛ taa yɔ, pɛwɛɛ kele kele ɛzɩ pɩɩwɛʋ caanaʋ taa Izrayɛɛlɩ ɛjaɖɛ taa yɔ. Pʋ-tɔbʋʋ lɛ se pɛwɛɛ cɩɖɩ cɩɖɩ nɛ ɛjaɖɛ yɔɔ lakasɩ kɩdɛkɛdɩsɩ nasɩyɩ etaapisi-wɛ. Ye palabɩ mbʋ yɔ, pɛkɛɣnɩ samaɣ ŋga palɩzɩ-kɛ nɛ hɔɔlʋʋ se kala kele kele tʋmɩyɛ yɔ.—Ejl. 20:5.

³ Pɩsa nɛ ɖɩwɛɛ kele kele lɛ, pɩpɔzʋʋ se ɖɩlabɩnɩ tʋmɩyɛ Yehowa paɣtʋ nɛ paɣtʋ kila wena pɔyɔɔdɩ a-tɔm kpayɩ kpayɩ Masɩ Kele Kele taa yɔ. (2 Tim. 3:16) Ðɩtɩŋnɩ Bibl kpɛlɩkʋʋ yɔɔ nɛ ɖiyele nɛ Yehowa wɩlɩ-ɖʋ ɛ-nʋmɔŋ nɛ ɖɩñɔɔnɩ-ɩ. Kpɛlɩkʋʋ mbʋ, pɩsɩnɩ-ɖʋ nɛ ɖɩna se pɩwɛɛ se ɖɩsɩɩ Ɛsɔ Kewiyaɣ kajalaɣ lone taa, nɛ ɖiyele nɛ Yehowa sɔɔlɩm labʋ kɛ mbʋ pɩ-tɔm kɩlɩ cɛyʋʋ ɖe-wezuu caɣʋ taa yɔ. (Mat. 6:33; Roma 12:2) Pɩsa nɛ ɖɩla mbʋ lɛ, pɩpɔzaa se ɖɩwɛɛnɩ ɛyʋtʋ kɩfatʋ.—Efɛz. 4:22-24.

FEZUU TAA NƐ WEZUU CAƔƲ TAA KELE KELE WƐTƲ

⁴ Pɩfɛyɩ kɛlɛʋ paa ɛzɩmtaa se ɖɩñɔɔnɩ Yehowa paɣtʋ. Ðo-koyindu Sataŋ Eleeu ñɩnɩɣ se eposi-ɖʋ nɛ toovenim. Ɛjaɖɛ yɔɔ ɖoŋ kɩdɛkɛdɩŋ nɛ ɖa-maɣmaɣ ɖɛ-tɛ mantɩtalɩ pilim wɛtʋ yeki ɖɔɖɔ nɛ pɩlakɩ-ɖʋ kaɖɛ nabʋyʋ taa. Pɩpɔzʋʋ se ɖɩlʋ siŋŋ fezuu taa, pʋcɔ nɛ ɖɩpɩzɩ nɛ ɖɩcaɣ wezuu ŋgʋ kɩmʋnɩ ɛyaa mba paha pa-tɩ Ɛsɔ yɔ. Masɩ heyiɣ-ɖʋ se pɩfɛyɩ se pɩɖɩɣzɩ-ɖʋ ye pakaɖɩɣnɩ-ɖʋ yaa panazɩɣ-ɖʋ yɔ. Pɩwɛɛ se ɖɩla kʋñɔŋ pʋcɔ nɛ ɖɩwɛɛ siɣsiɣ. (2 Tim. 3:12) Ye ɖɩwɛ nazɩm taa yɔ, ɖa-taa pɩzɩɣ nɛ pɩla leleŋ mbʋ pʋyɔɔ yɔ, ɖɩnawa se nazɩm mbʋ pɩwɩlɩɣ se ɖɩwɛɛ nɛ ɖɩlakɩ Ɛsɔ sɔɔlɩm.—1 Pɩy. 3:14-16; 4:12, 14-16.

⁵ Paa Yesu kaatalɩ pilim yɔ, ɛkpɛlɩkɩ ñamtʋ kʋñɔmɩŋ weyi ɛtɔwaa yɔ, ɩ-taa. Yesu tɩtɔlɩ Sataŋ kpaca nakʋyʋ taa nɛ ɛtaañɩnɩɣ ɖɔɖɔ ɛjaɖɛ yɔɔ wondu. (Mat. 4:1-11; Yoh. 6:15) Ɛtatɩɩmaɣzʋʋ paa tam kʋɖʋm maɣmaɣ se ɛmaɣ Ɛsɔ paɣtʋ yɔɔ. Ɛlɛ ɛɛñɔnɩ Yehowa paɣtʋ tam, paa ɛɛnawa se ɛjaɖɛ kaɣ-ɩ paɖʋʋ e-siɣsiɣ wɛtʋ yɔɔ yɔ. Pɩɩkazɩ pazɩ se ɛsɩ lɛ, eheyi ɛ-tɔmkpɛlɩkɩyaa se ɛjaɖɛ kaɣ-wɛ paɖʋʋ ɖɔɖɔ. Kpaɣnɩ alɩwaatʋ ndʋ, pɛwɛɛ nɛ panazɩɣ Yesu wayɩ tɩŋɩyaa, ɛlɛ pɔɖɔkɩ kpam nɛ abalɩtʋ mbʋ pʋyɔɔ yɔ, panawa se Ɛsɔ Pɩyalʋ wabɩ ɛjaɖɛ.—Yoh. 15:19; 16:33; 17:16.

⁶ Pɩsa nɛ ɖɩwɛɛ ndɩ nɛ ɛjaɖɛ lɛ, pɩwɛɛ se ɖɩɖɔkɩ Yehowa paɣtʋ kpam ɛzɩ ɖa-Ñʋʋdʋ kaalabʋ yɔ. Pɩtasɩna se ɖɩɩɖʋʋ nɔɔ ɛjaɖɛ yɔɔ politiki nɛ ɛyaa wala yɔɔ lʋbʋ agbaa tɔm taa lɛ, ɖɩkaɖɩɣnɩ ɖɔɖɔ ɛjaɖɛ yɔɔ wezuu kɩdɛkɛdʋʋ caɣʋ. Lɔŋ tasʋʋ mbʋ pɩwɛ Yakubu 1:21 taa yɔ, pɩ-tɔm cɛyɩ siŋŋ ɖɛ-ɛsɩndaa; pɔyɔɔdɩ peeɖe se: “Ɩlɔ azuluma kpeekpe nɛ paa kɩdɛkɛdɩm mbʋ, nɛ itisini hɛɛɛ wɛtʋ se poɖuu mɩ-taa tɔm ndʋ tɩpɩzɩɣ nɛ tɩya mɩ-ñʋŋ yɔ.” Ye ɖɩkpɛlɩkɩɣ Bibl nɛ ɖiwoki kediɣzisi yɔ, piyeki nɛ “poɖuu” toovenim tɔm ɖa-lɩmaɣza nɛ ɖa-laŋa taa; nɛ pɩsɩnɩ-ɖʋ nɛ ɖa-lɩmaɣza etaatiiwobu ɛjaɖɛ lakasɩ yɔɔ paa ññɩɩ. Tɔmkpɛlɩkɩyʋ Yakubu mawa se: “Ɩɩsɩŋ se ɛyʋ ɛkɛ ɛjaɖɛ taabalʋ yɔ ɛpɩsɩɣ Ɛsɔ koyindu na? Pʋyɔɔ lɛ, weyi ɛsɔɔlaa se ɛkɛ ɛjaɖɛ taabalʋ yɔ, eɖiɣni ɛ-tɩ pɩsʋʋ Ɛsɔ koyindu.” (Yak. 4:4) Pʋyɔɔ Bibl paɣ-ɖʋ se ɖɩñɔɔnɩ Yehowa paɣtʋ kpam nɛ ɖiposini ɛjaɖɛ.

⁷ Ɛsɔtɔm heyiɣ-ɖʋ se ɖise azuluma lakasɩ nɛ wezuu kɩdɛkɛdʋʋ caɣʋ. Tɩyɔɔdaa se: “Pataatɩɩyɔɔdʋʋ kʋzʋʋ kɩdɛkɛdʋʋ nɛ paa azuluma wena yaa ɛsa naɣ naɣ tɔm mɩ-hɛkʋ taa, ɛzɩ pɩmʋnaʋ ɛyaa kiɖeɖema yɔ.” (Efɛz. 5:3) Ye mbʋ, pɩfɛyɩ se ɖiyele nɛ ɖa-lɩmaɣza wolo azuluma, fɛyɛ yaa kʋzɔɔtʋ lakasɩ yɔɔ paa ññɩɩ, nɛ ɖɩtɩsɔɔlɩ ɖɔɖɔ se ɖɩla faawɩyɛ pɩlɩɩnɩ lakasɩ nzɩ sɩ-yɔɔ. Ye ɖɩlakɩ mbʋ yɔ, ɖɩwɩlɩɣ se ɖɩsɔɔlaa se ɖɩñɔɔnɩ Yehowa paɣtʋ ndʋ tiseɣtiɣ-ɖʋ se ɖɩwɛɛ kele kele ɖe-wezuu caɣʋ taa yɔ.

TOMNAƔ YƆƆ KELE KELE WƐTƲ

⁸ Pɩtasɩnɩ fezuu taa nɛ wezuu caɣʋ taa kele kele wɛtʋ lɛ, Krɩstʋ ñɩma nawa se pɩcɛyaa se pɛwɛɛ kele kele ɖɔɖɔ tomnaɣ yɔɔ. Ɛsɔ kele kele tʋ kaapɔzɩ caanaʋ taa Izrayɛɛlɩ piya se sɩla nɛ maalika taa wɛɛ kele kele. Pɩpɔzʋʋ se ɖa ɖɔɖɔ ɖɩwɛɛ kele kele nɛ Yehowa “ɛtaana azuluma pʋyʋ” ɖɔ-yɔɔ.—Wp. 23:14.

⁹ Bibl taa lɛ, nɔɔ kʋɖʋmaɣ nakɛyɛ wɛ kele kele wɛtʋ nɛ tomnaɣ yɔɔ cɩɖɩ cɩɖɩ wɛtʋ pɛ-hɛkʋ taa. Pʋyɔɔ Pɔɔlɩ mawa se: “Koobiya kʋsɔɔlaa, ɖɩñalɩ ɖo-tomnaɣ yɔɔ nɛ ɖa-maɣzɩm taa azuluma tɩŋa, nɛ ɖɛ-wɛtʋ kiɖeɖetu wɛɛ pilim Ɛsɔ sɔɔndʋ seu taa.” (2 Kɔr. 7:1) Pɩpɔzʋʋ se Krɩstʋ ñɩma abalaa nɛ halaa ɩsɔʋ lɩm ɖoŋ ɖoŋ, nɛ pɔcɔtʋʋ ɖɔɖɔ po-wondu nɛ pɩsa nɛ po-tomnasɩ wɛɛ cɩɖɩ cɩɖɩ. Pɩkɛ toovenim se wɛtʋ ndʋ tɩwɛ ɛjaɖɛ naɖɩyɛ taa yɔ, tɩpɩzɩɣ nɛ tɩwɛɛ ndɩ nɛ wɛtʋ ndʋ tɩwɛ ajɛɛ lɛɛna taa yɔ; paa mbʋ yɔ, paa le ɖɩtɩɩwɛɛ yɔ, ɖoŋ ɖoŋ lɛ, ɖɩpɩzɩɣ nɛ ɖihiɣ fɔɔfɔɔ nɛ lɩm nɛ ɖiyele nɛ ɖa nɛ ɖe-piya ɖɩwɛɛ cɩɖɩ cɩɖɩ.

¹⁰ Ðɩkɛ tɔm susuyaa nɛ pʋyɔɔ lɛ, ɖo-kooka taa ɛyaa sakɩyɛ sɩm-ɖʋ camɩyɛ. Ye ɖiyeba nɛ ɖa-ɖɩɣa ɛsɩndaa, ka-wayɩ nɛ ka-taa wɛɛ cɩɖɩ cɩɖɩ, nɛ ɖɩñɔɔzʋʋ ɖɔɖɔ wondu ka-taa camɩyɛ yɔ, pɩlɩzɩɣ aseɣɖe. Hɔʋ taa ñɩma tɩŋa pɩwɛɛ se peyele nɛ pɩwɛɛ mbʋ. Koobiya abalaa pɩwɛɛ se pɛɖɛɛ nɔɔ nɛ pɔñɔɔzʋʋ ɖɩɣa taa, kɛ-ɛsɩndaa nɛ ka-wayɩ mbʋ pʋyɔɔ yɔ, panawa se ɖɩɣa ŋga pɔcɔŋnɩ ke-ɖeɖe camɩyɛ yɔ, keyeki nɛ lalaa wɛɛnɩ lɩmaɣza kɩbana ɖɔ-yɔɔ. Ye hɔŋ ñʋndɩnaa ɩɖɛɣ nɔɔ nɛ palakɩ tʋma ana nɛ pɔcɔŋnɩ ɖɔɖɔ pɔ-hɔŋ taa ñɩma fezuu taa kɩcɛyɩm ɖeɖe yɔ, pawɩlɩɣ se pɔcɔŋnɩ pɔ-hɔŋ yɔɔ camɩyɛ. (1 Tim. 3:4, 12) Pɩkɛnɩ ɖɔɖɔ koobiya halaa sʋʋtʋ se pɔcɔŋnɩ mbʋ mbʋ palakɩ pa-ɖɩsɩ taa yɔ pi-ɖeɖe. (Tiiti 2:4, 5) Piya nzɩ pafalɩsɩ-sɩ camɩyɛ yɔ, sɩlakɩ si-ɖoŋ ɖeɖe se sɩ-maɣmaɣ sɩwɛɛ cɩɖɩ cɩɖɩ nɛ sɩñɔɔzʋʋ ɖɔɖɔ si-kuduyuŋ tɛɛ camɩyɛ. Toovenim taa lɛ, ye hɔʋ taa ñɩma tɩŋa ɩlakɩ tʋmɩyɛ nɔɔ kʋɖʋmaɣ taa se pa-maɣmaɣ nɛ pa-ɖɩɣa taa ɩwɛɛ cɩɖɩ cɩɖɩ yɔ, pɩwɩlɩɣ se pɛwɛɛ nɛ pɔñɔɔzʋʋ pa-tɩ se pacaɣ wezuu cɩɖɩ cɩɖɩ ɛjaɖɛ kɩfaɖɛ nɖɩ Ɛsɔ Kewiyaɣ kaɣ ɖiyuu yɔ, ɖɩ-taa.

¹¹ Sɔnɔ, Yehowa sɛyaa sakɩyɛ saɣ lɔɔɖa yaa kpokponaa nɛ powoki kediɣzisi. Hɔɔlɩŋ nɩɩyɩ taa lɛ, wondu ndʋ ɖɔɖɔ ɖiwokini tɔm susuu. Pɩpɔzʋʋ se pɔcɔnɩ ti-ɖeɖe camɩyɛ nɛ tɩwɛɛ cɔnʋʋ. Pɩwɛɛ se ɖa-ɖɩsɩ, ɖɔ-lɔɔɖa, ɖo-kpokponaa nɛ wondu lɛɛtʋ ndʋ ɖiwokini kediɣzisi nɛ tɔm susuu yɔ, tɩwɩlɩ se ɖɩwɛ Yehowa samaɣ ŋga kɛwɛ kele kele yɔ, ka-taa. Pɩpɔzʋʋ ɖɔɖɔ se ɖɔ-tɔm susuu huyiŋ nɛ ɖe-Biblwaa ɩwɛɛ cɩɖɩ cɩɖɩ.

¹² Pɩwɛɛ se ɖo-wondu suu nɛ ɖa-tɩ ñɔɔzʋʋ ɩla nɔɔ kʋɖʋmaɣ nɛ Ɛsɔ paɣtʋ kila. Ðɩɩpɩzɩɣ nɛ ɖisuu wondu ndʋ tɩtɩmʋna yaa tɩɩhaɣ ñamtʋ yɔ, nɛ ɖiwolo ɛyʋ sɔsɔ nɔɔyʋ cɔlɔ. Pʋyɔɔ pɩcɛyaa se ɖisuu wondu camɩyɛ nɛ pɩkɩlɩ alɩwaatʋ ndʋ ɖɩlakɩ tʋmɩyɛ Yehowa hɩɖɛ taa, tɔm susuu taa yaa koobiya ɛsɩndaa Kpaaŋ taa yɔ! Ða-tɩ ñɔɔzʋʋ nɛ ɖo-wondu suu pɩzɩɣ piyele nɛ lalaa wɛɛnɩ lɩmaɣza kɩbana yaa kɩdɛkɛda Yehowa sɛtʋ yɔɔ. Pɩɩwɛɣ ɖeu se ɖɩɖɛlɩsɩ niye ɖo-wondu suu taa, yaa ɖo-wondu suu ɛwɩlɩ se ɖɩfɛyɩnɩ ñamtʋ lalaa yɔɔ. (Mik. 6:8; 1 Kɔr. 10:31-33; 1 Tim. 2:9, 10) Pʋyɔɔ lɛ, alɩwaatʋ ndʋ ɖɩñɔɔzʋʋ ɖa-tɩ se ɖɩɖɛɛ tɔm susuu yaa ɖiwolo kediɣzisi, egeetiye kigbeɣliŋ yaa kigbeɣliŋ sɔsɔŋ taa yɔ, pɩwɛɛ se ɖɩtɔzɩ tɔm ndʋ Masɩ yɔɔdɩ tomnaɣ yɔɔ cɩɖɩ cɩɖɩ wɛtʋ nɛ wondu suu yɔɔ yɔ, tɩ-yɔɔ. Paa ɛzɩmtaa lɛ, pɩwɛɛ se ɖɩla pɩtɩŋa Yehowa samtʋ yɔɔ.

¹³ Mbʋ ɖɔɖɔ pɩwɛɛ se ɖɩla alɩwaatʋ ndʋ ɖiwoki se ɖikilimi ɛjaɖɛ yɔɔ Yehowa Aseɣɖe Tɩnaa tʋmɩyɛ ɖɩlaɖɛ sɔsɔɖɛ taa yaa ɛgbɛyɛ piliŋa nakɛyɛ taa yɔ. Tɔzɩ se Betɛɛlɩ tɔbʋʋ lɛ se “Ɛsɔ ɖɩɣa.” Pʋyɔɔ lɛ, pʋcɔ nɛ ɖiwolo peeɖe lɛ, pɩwɛɛ se ɖisuu wondu camɩyɛ nɛ ɖɩwɛɛnɩ wɛtʋ ndʋ pɩpɔzaa se ɖɩwɛɛna alɩwaatʋ ndʋ ɖiwoki kediɣzisi Kewiyaɣ Kpaaŋ taa yɔ.

¹⁴ Halɩ paa helim ɖɩlɩɣ mʋʋ yɔ, pɩpɔzʋʋ se ɖɩcɔnɩ ɖo-wondu suu nɛ ɖa-tɩ ñɔɔzʋʋ ɖeɖe camɩyɛ. Ðɩpɩzɩɣ nɛ ɖɩpɔzɩ ɖa-tɩ se: ‘Ɛzɩma monsu wondu yɔ pʋyɔɔ lɛ, pɩkaɣ-m cɛyʋʋ se manfanɩ alɩwaatʋ tʋnɛ nɛ malɩzɩ aseɣɖe na?’

HELIM MƲƲ NƐ ALEƔYA WENA AMƲNAA YƆ

¹⁵ Helim mʋʋ nɛ aleɣya tɔm cɛyaa mbʋ pʋyɔɔ yɔ, pɩsɩɣnɩ ɛyʋ se ɛwɛɛnɩ tomnaɣ taa alaafɩya. Kɩyakʋ nakʋyʋ Yesu ya ɛ-tɔmkpɛlɩkɩyaa se pɛkɛzɩ pa-tɩ hɔɔlʋʋ nɛ ‘pɛhɛzɩ pazɩ.’ (Mark. 6:31) Helim mʋʋ yaa aleɣya wena amʋnaa yɔ, apɩzɩɣ nɛ aha ɛyʋ taa leleŋ. Pɩpɩzɩɣ nɛ pɩkpazɩ-ɖʋ ɖoŋ nɛ pʋwayɩ ɖiwolo ɖa-tʋmɩyɛ yɔɔ.

¹⁶ Aleɣya tɔyɩ ɛjaɖɛ yɔɔ sɔnɔ, ye mbʋ pɩwɛɛ se Krɩstʋ ñɩma ɩlabɩnɩ tʋmɩyɛ Ɛsɔ lɔŋsɩnɖɛ nɛ patɩlɩ aleɣya wena pɩwɛɛ se palɩzɩ yɔ. Paa aleɣya tɔm ɛcɛyaa yɔ, pɩfɛyɩ se pɩkɛnɩ mbʋ pɩ-tɔm kɩlɩ cɛyʋʋ ɛyʋ wezuu caɣʋ taa yɔ. Papaɣ-ɖʋ se “kɛdɛzaɣ kɩyakɩŋ” taa lɛ, ɛyaa kaɣ ‘sɔɔlʋʋ leleŋ nɩʋ pɩkɩlɩ Ɛsɔ.’ (2 Tim. 3:1, 4) Aleɣya sakɩyɛ ɩɩkɛdɩɣnɩ mba pɔsɔɔlaa se pɔɖɔ Yehowa paɣtʋ kila yɔɔ yɔ.

¹⁷ Pɩɩpɔzɩ kajalaɣ Krɩstʋ ñɩma pana ñaɣʋ se pɩsa nɛ pakaɖɩnɩ aleɣya kɩdɛkɛda wena aatɔyɩ pa-alɩwaatʋ taa yɔ. Panazaɣ ɛyaa Roma mba aleɣya kadasɩ taa nɛ lalaa cɔŋna nɛ panɩɣ leleŋ. Lakasɩ nzɩ palakaɣ aleɣya kadasɩ taa yɔ, sɩ-taa nasɩyɩ lɛ, nazɩm, calɩm kpɛdʋʋ nɛ kʋzʋʋ kɩdɛkɛdʋʋ lakasɩ, ɛlɛ kajalaɣ Krɩstʋ ñɩma posaɣ pa-tɩ nɛ lakasɩ nzɩ. Sɔnɔ ɖɔɖɔ, lakasɩ nzɩ sɩtɔyɩ aleɣya sakɩyɛ taa nɛ siseɣtiɣ ɛyʋ tomnaɣ nandʋ sɔɔlɩm. Pɩwɛɛ se ‘ɖɩcɔnɩ ɛzɩma ɖɩɖɔŋ yɔ pɩ-yɔɔ camɩyɛ’ nɛ ɖiposi ɖa-tɩ nɛ aleɣya wena apɩzɩɣ nɛ acamɩ-ɖʋ yɔ. (Efɛz. 5:15, 16; Keɣa 10:5) Ɛlɛ paa aleɣya naayɛ ɩtɩkɛ kɩdɛkɛda yɔ, wɛtʋ ndʋ tɩ-taa palakɩ-yɛ yɔ, tɩpɩzɩɣ tiyele nɛ aamʋʋna.—1 Pɩy. 4:1-4.

¹⁸ Aleɣya kɩbana sakɩyɛ wɛɛ nɛ Krɩstʋ ñɩma pɩzɩɣ nɛ palabɩ-yɛ. Sakɩyɛ ɖɔm Bibl lɔŋ tasʋʋ nɛ lɔŋ tasʋʋ mbʋ pɩwɛ ɛgbɛyɛ takayɩsɩ taa yɔ, pɩ-yɔɔ nɛ pɩwazɩ-wɛ.

¹⁹ Nabʋyʋ taa, hɔŋ sakɩyɛ pɩzɩɣ nɛ ikpeɣli koobu nɔɔyʋ ɖɩɣa taa nɛ ɩmʋ helim. Yaa papɩzɩɣ nɛ payaa koobiya abalaa nɛ halaa nesi ɖɔkʋʋ kazandʋ yaa kazandʋ natʋyʋ taa mbʋ yɔ. (Yoh. 2:2) Pɩwɛɛ se mba pɔcɔŋnɩ kazandʋ ndʋ tɩ-yɔɔ yɔ, patɩlɩ se mbʋ payɩ pɩlakɩ peeɖe yɔ, pɩkɛnɩ pa-sʋʋtʋ. Ye ɛyaa ɩɖɔwa yɔ, pɩwɛɛ se patɩlɩ labʋ. Koobiya kpeɣliɣ sakɩyɛ lɛ, pɩpɩzɩɣ nɛ piyele nɛ nabɛyɛ maanɩ Krɩstʋ ñɩma paɣtʋ natʋyʋ yɔɔ, ɛzɩ sʋlʋm kpaŋʋʋ nɛ tɔɔnaɣ tɔɔʋ kadadayaɣ mbʋ yɔ. Halɩ nabɛyɛ pɩzɩɣ nɛ pala kɩwɛɛkɩm sɔsɔm lɛɛbʋ. Pʋyɔɔ lɛ, Krɩstʋ ñɩma nabɛyɛ lakɩ lɛɣtʋ nɛ paaleɣyiɣ lɛ, paakɩlɩɣ ɖɔʋ nɛ paakɩlɩɣ leɖuu ɖɔɖɔ. Ye sʋlʋm ɖoŋ ñɩmbʋ ɛwɛɛ yɔ, pɩwɛɛ se pɔñɔɔ nɛ pɩmaɣna. (Fil. 4:5) Ye ɛyaa ɩnɩ pɩ-taa se fezuu taa ɖoŋ kpazʋʋ mbʋ pehikiɣ alɩwaatʋ ndʋ pekpeɣliɣ yɔ, pɩ-tɔm kɩlɩnɩ cɛyʋʋ yɔ, paakaŋ pa-lɩmaɣza tɔɔnaɣ nɛ sʋlʋm yɔɔ.

²⁰ Agɔma mʋʋ wɛ ɖeu. (1 Pɩy. 4:9) Alɩwaatʋ ndʋ ɖɩyaɣ koobiya ɖɛ-tɛ se ɖɩtɔɔ tɔɔnaɣ, ɖɩmʋ helim, ɖɩla aleɣya naayɛ nɛ ɖɩnɩɩ koobiɖe sɔɔlɩm leleŋ yɔ, pɩtɩmʋna se ɖɩsɔɔ ajamaa yaa kʋñɔndɩnaa yɔɔ. (Luka 14:12-14) Ye nɔɔyʋ ɛya-ɖʋ ɛ-tɛ yɔ, pɩwɛɛ se ɖa-lakasɩ ɛla nɔɔ kʋɖʋmaɣ nɛ lɔŋ tasʋʋ mbʋ pɩwɛ Maarkɩ 12:31 taa yɔ. Pɩwɛɛ se ɖɩwɩlɩ lalaa ɛsɩmɩyɛ paa ɛzɩmtaa, kɩbandʋ ndʋ palakɩ-ɖʋ yɔ tɩ-yɔɔ.

²¹ Krɩstʋ ñɩma taa wɛ leleŋ nɛ kʋjɔŋ sakɩyɛ weyi Ɛsɔ lakɩ-wɛ yɔ, mbʋ pʋyɔɔ yɔ panawa se ye ɛyʋ “ɛtɔkɩ nɛ ɛñɔʋ nɛ ɛnaɣ koboyaɣ ɛ-tʋmɩyɛ taa kɔyɔ, pɩkɛnɩ Ɛsɔ kʋjɔʋ.” (Ekl. 3:12, 13) Ye ɖɩlakɩ pɩtɩŋa “Ɛsɔ samtʋ yɔɔ” yɔ, ɖa-taabalaa nɛ ɖa-agɔma pa-taa lakɩ leleŋ alɩwaatʋ ndʋ ɖileɣyiɣ yɔ, mbʋ pʋyɔɔ yɔ pɩkpazɩɣ-wɛ ɖoŋ fezuu taa.

SUKULI TAA TƲMA

²² Yehowa Aseɣɖe Tɩnaa piya woki sukuli se sɩmʋ falɩsʋʋ mbʋ pɩmʋnaa yɔ. Lɩmaɣza wena a-yɔɔ siwoki sukuli yɔ, a-taa naɖɩyɛ lɛ se sɩkpɛlɩkɩ ɛzɩma sɩkalɩ nɛ sɩma tɔm yɔ. Falɩsʋʋ mbʋ sɩmʋʋ sukuli taa peeɖe yɔ, pɩsɩɣnɩ-sɩ se sɩtalɩ si-fezuu taa kaɖʋsɩ. Sukuli alɩwaatʋ taa lɛ, sɩñakɩ pana se ‘sɩtɔzɩ sɩ-Lɩzɩyʋ yɔɔ’ nɛ sɩsɩɣ fezuu taa wondu kajalaɣ lone taa.—Ekl. 12:1.

²³ Ye ŋkɛ Krɩstʋ tʋ pɩɣa evelaɣ nɛ ŋwoki sukuli yɔ, ñaɣ pana nɛ ña nɛ piya evelisi lɛɛsɩ nzɩ sɩtɩkɛ Yehowa Aseɣɖe Tɩnaa yɔ, ɩtaaɖʋ taabalɩyɛ. (2 Tim. 3:1, 2) Yehowa tɩŋɩɣnɩ nʋmɔŋ ndɩ ndɩ yɔɔ nɛ ɛkandɩyɩɣ ɖɔ-yɔɔ, pʋyɔɔ lɛ, ŋpɩzɩɣ ŋla ño-ɖoŋ ɖeɖe nɛ ŋkaɖɩnɩ ɛjaɖɛ ɖoŋ kɩdɛkɛdɩŋ. (Keɣsi 22:4; 90:1, 2) Ye mbʋ, pɩsa nɛ ŋkandɩyɩ ña-tɩ yɔɔ lɛ, ɖɔ Yehowa lɔŋ tasʋʋ yɔɔ.—Keɣa 22:5.

²⁴ Pɩsa nɛ siposi sɩ-tɩ nɛ ɛjaɖɛ, alɩwaatʋ ndʋ sɩwɛɣ sukuli taa yɔ lɛ, piya evelisi sakɩyɛ nzɩ sɩkɛ Yehowa Aseɣɖe Tɩnaa yɔ, sɩkpakɩɣ lɩmaɣzɩyɛ se sɩɩlakɩ mbʋ mbʋ palakɩ sukuli alɩwaatʋ wayɩ yɔ, ɛzɩ hola aleɣya nɛ aleɣya lɛɛna mbʋ yɔ. Pɩpɩzɩɣ nɛ pɩwɛɛ kaɖɛ sukulibiya lɛɛsɩ nɛ wɩlɩyaa se panɩɩ pɩ-taa. Paa mbʋ yɔ, mbʋ pɩ-tɔm kɩlɩ cɛyʋʋ yɔ lɛ se sɩ-tɔm ɛkɛdɩnɩ Ɛsɔ. Pɩwɩlɩɣ se pɩwɛɛ se ŋtɩŋnɩ Bibl yɔɔ nɛ ŋfalɩsɩ ñɛ-ɛhʋyɛ nɛ ŋtɛ ña-taa se ŋŋlakɩ lakasɩ yaa aleɣya wena a-taa ɛyaa lʋkɩnɩ ɖama, yaa palʋkɩ pɛ-ɛjaɖɛ yɔɔ yɔ. (Gal. 5:19, 26) Ye ŋwelisiɣni Bibl lɔŋ tasʋʋ mbʋ ña-lʋlɩyaa mba pɛkɛ Krɩstʋ ñɩma yɔ, pahaɣ-ŋ nɛ ŋɖʋʋ taabalɩyɛ nɛ ɛgbɛyɛ taa koobiya yɔ, ŋpɩzɩɣ nɛ ŋñɔɔnɩ Yehowa paɣtʋ.

TOMNAƔ YƆƆ TƲMƖYƐ NƐ TAABALƖYƐ ÐƲƲ

²⁵ Masɩ wɩlɩɣ se pɩkɛnɩ hɔʋ ñʋʋdʋ kɩjɛyʋʋ se ɛcɔnɩ ɛ-hɔʋ kɩcɛyɩm ɖeɖe. (1 Tim. 5:8) Paa mbʋ yɔ, Krɩstʋ ñɩma nawa se pɩfɛyɩ se tomnaɣ yɔɔ tʋmɩyɛ ɛmʋ ñɩm nɛ pɩkpaɖɩ Kewiyaɣ tʋma. (Mat. 6:33; Roma 11:13) Pañaŋ Ɛsɔ nɛ pe-liu sɩkɩnɩ tɔɔnaɣ nɛ wondu kususutu ndʋ pɛwɛna yɔ, pʋyɔɔ lɛ paaɖʋʋ pa-tɩ nɩɣzɛ nɛ paatɔlʋʋ kʋñɔmɩŋ weyi ɛsa naɣ naɣ kɔŋna yɔ ɩ-taa.—1 Tim. 6:6-10.

²⁶ Krɩstʋ ñɩma mba paha pa-tɩ Ɛsɔ yɔ, pɩpɔzʋʋ se pɔɖɔkɩ Bibl paɣtʋ kila kpam nɛ palabɩnɩ-yɛ tʋmɩyɛ pa-tʋma taa. Pɩsa nɛ ɖɩwɛɛ toovenim alɩwaatʋ ndʋ ɖɩñɩnɩɣ se ɖɩcɔnɩ ɖa-kɩcɛyɩm ɖeɖe yɔ lɛ, pɩpɔzʋʋ se ɖikizi lakasɩ nzɩ sɩkaɖɩɣnɩ Ɛsɔ paɣtʋ yaa ɛjaɖɛ paɣtʋ yɔ. (Roma 13:1, 2; 1 Kɔr. 6:9, 10) Ðɩtaasɔɔ kala wena taabalɩyɛ kɩdɛkɛdɩyɛ ɖʋʋ kɔŋna yɔ a-yɔɔ. Ðɩkɛ Krɩstʋ sɔɔjanaa nɛ pʋyɔɔ lɛ, ɖɩɩlakɩ tadɩyɛ nɖɩ ɖɩkaɖɩɣnɩ Ɛsɔ paɣtʋ, nɖɩ ɖiyeki se ɖɩɖʋ nɔɔ ɛjaɖɛ tɔm taa yaa nɖɩ ɖɩcamɩɣ-ɖʋ fezuu taa yɔ. (Iza. 2:4; 2 Tim. 2:4) Ðɩɩlakɩ ɖɔɖɔ mbʋ payɩ piyeki nɛ ɖɩla nɔɔ kʋɖʋmaɣ nɛ Ɛsɔ koyindu weyi payaɣ-ɩ se “Babilɔɔnɩ Sɔsɔʋ” yɔ.—Natʋ 18:2, 4; 2 Kɔr. 6:14-17.

²⁷ Ye ɖɩñɔnɩ Ɛsɔ paɣtʋ yɔ, ɖɩɩkaɣ tɩŋnʋʋ alɩwaatʋ ndʋ ɖa nɛ ɖo-koobiya ɖikpeɣliɣ se ɖɩsɛɛ Ɛsɔ yɔ tɩ-yɔɔ nɛ ɖɩlakɩ tadɩyɛ yaa tʋma lɛɛna wena awazɩɣ ɖa-maɣmaɣ tomnaɣ yɔɔ yɔ. Alɩwaatʋ ndʋ ɖa nɛ ɖo-koobiya ɖikpeɣliɣ kediɣzisi taa, egeetiye kigbeɣliŋ taa nɛ kigbeɣliŋ sɔsɔŋ taa yɔ, kaɖʋwa kʋɖʋmaɣ ŋga ɖɩwɛna yɔ lɛ se, ɖɩsɛɛ Yehowa. Pɩhaɣ-ɖʋ waɖɛ se ɖɩtɔɔ fezuu taa tɔɔnaɣ nɛ “ɖɩkpazɩ ɖama tisuu ɖoŋ.” (Roma 1:11, 12; Ebr. 10:24, 25) Ye mbʋ, fezuu taa tʋma yeke pɩwɛɛ se ɖɩla alɩwaatʋ ndʋ ɖikpeɣliɣ mbʋ yɔ.

TƲMƖYƐ LABƲ NƆƆ KƲÐƲMAƔ TAA

²⁸ Yehowa paɣtʋ yɔɔ ɖɔm pɔzʋʋ ɖɔɖɔ se ɖɩñaɣ pana siŋŋ nɛ ‘nɔɔ kʋɖʋmaɣ ŋga fezuu yeba nɛ ɖɩwɛɛna yɔ, kɛwɛɛ mbʋ tam laŋhɛzɩyɛ tomiye nɖɩ ɖɩhɔkɩ-ɖʋ nɛ ɖama yɔ ɖɩ-taa.’ (Efɛz. 4:1-3) Ðɩɩñɩnɩɣ ɖa-maɣmaɣ ɖɛ-kɛzɛɣa ɛlɛ paa weyi lɛ, ɛñɩnɩɣ lalaa kɛzɛɣa. (1 Tes. 5:15) Pɩtʋʋ fɛyɩ se ŋnawa se wɛtʋ ndʋ tɩwɛnɩ ñɛ-ɛgbɛyɛ taa. Paa tomnaɣ tɔlɩm mbʋ ɖɩwɛna, paa ɛjaɖɛ nɖɩ ɖɩ-taa ɖɩlɩnaa, paa tʋmɩyɛ nɖɩ ɖɩlakɩ, paa ɖɩtɩɩkɛ ñɩm tʋ yaa kʋñɔndʋ nɛ paa sukuli ŋgʋ ɖɩtɩɩlaba yɔ, ɖa-tɩŋa payɩ ɖiyeki se Ɛsɔ paɣtʋ eɖiyi-ɖʋ. Halɩ mba patɩkɛ Yehowa sɛyaa yɔ, panawa se wɛtʋ kɩbandʋ ndʋ Yehowa samaɣ wɛna.—1 Pɩy. 2:12.

²⁹ Apostoloo Pɔɔlɩ yɔɔdaɣ mbʋ pɩ-cɔlɔ nɔɔ kʋɖʋmaɣ lɩɣna yɔ pɩ-tɔm lɛ, ɛtɔm se: “Tomnaɣ kʋɖʋmaɣ wɛna, nɛ fezuu kʋɖʋmʋʋ, ɛzɩ lidaʋ kʋɖʋmʋʋ wɛʋ nɛ payaa-mɩ kɩ-yɔɔ yɔ; Kɩbaɣlʋ kʋɖʋm, tisuu kʋɖʋmʋm, lɩm mɩyɩsʋʋ kʋɖʋmʋm; Ɛsɔ kʋɖʋm nɛ ɛkɛ ɛyaa tɩŋa Caa, ɛnʋ weyi ɛwɛ ɛyaa tɩŋa ñʋʋ yɔɔ” yɔ. (Efɛz. 4:4-6) Pɩwɩlɩɣ se pɩsa nɛ nɔɔ kʋɖʋmaɣ wɛɛ ɖɛ-hɛkʋ taa lɛ, pɩpɔzʋʋ se ɖɩnɩɩ Bibl kajalaɣ wɩlɩtʋ nɛ ndʋ tilimaa yɔ tɩ-taa, nɛ ɖitisi ɖɔɖɔ Yehowa kewiyitu kɩkɩlɩtʋ tɔɔʋ yɔɔ. Toovenim, Yehowa ha ɛ-samaɣ kele kele kʋnʋŋ se kɛkpɛndɩ nɛ kala ɛ-tʋmɩyɛ nɔɔ kʋɖʋmaɣ taa.—Sof. 3:9.

³⁰ Nɔɔ kʋɖʋmaɣ nɛ laŋhɛzɩyɛ nɖɩ ɖɩwɛ Krɩstʋ ɛgbɛyɛ taa yɔ, ɖɩhɛzɩɣ Yehowa sɛyaa tɩŋa laŋa. Ðɩna ɛzɩma Yehowa natʋ tɔm tʋnɛ tɩlaba yɔ: “Mankaɣ-ɩ ɖɩʋ ɛzɩ wondu yɔ laŋaɣ tɛɛ.” (Mik. 2:12) Ðɩsɔɔlaa se ɖɩñɔɔnɩ Yehowa paɣtʋ nɛ pɩsa nɛ laŋhɛzɩyɛ nɖɩ ɖɩwɛ ɖɛ-hɛkʋ taa yɔ, ɖɩwɛɛ mbʋ tam.

³¹ Mba Yehowa mʋ-wɛ ɛ-ɛgbɛyɛ nɖɩ ɖɩwɛ kele kele yɔ ɖɩ-taa yɔ, pɛkɛ koboyaɣ tɩnaa! Paa ɛbɛ ɖɩtɩɩkpaɣ nɛ ɖɩlaa kɩlaʋ yɔ, pɩtɩlɩɩ pʋyʋ ye ɖɩkpaɣ-pʋ nɛ ɖɩmaɣzɩnɩ Yehowa hɩɖɛ nɖɩ ɖɩwɛ ɖɔ-yɔɔ yɔ. Ye ɖɩñakɩ pana se ɖɩñɔɔnɩ Yehowa paɣtʋ kpam nɛ ɖɩsɩɣnɩ ɖɔɖɔ lalaa se pala mbʋ yɔ, piyeki nɛ ɖɩkandɩyɩ taabalɩyɛ kɩbanɖɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ ɖɩ-yɔɔ.—2 Kɔr. 3:18.