Ɛzɩma ɖɩpɩzɩɣ nɛ ɖɩkandɩyɩ ɛgbɛyɛ taa laŋhɛzɩyɛ nɛ kele kele wɛtʋ yɔɔ?

ƐZƖ Bibl natʋ tɔm natʋyʋ yɔɔdʋʋ yɔ, paa pɩnaɣ ŋga lɛ, ɛyaa kudokiŋ sakɩyɛ kɔŋ Yehowa ɖɩɣa taa se patɩŋnɩ kele kele Ɛsɔ sɛtʋ yɔɔ nɛ paɖʋ-ɩ lɩm. (Mik. 4:1, 2) Pɩkɛnɩ-ɖʋ taa leleŋ se ɖɩmʋ-wɛ “Ɛsɔ ɛgbɛyɛ” taa! (Tʋma 20:28) Pɩkɛdɩɣnɩ-wɛ se ɖa nɛ wɛ ɖɩkpɛndɩ nɛ ɖɩsɛɛ Yehowa laŋhɛzɩyɛ nɛ kele kele wɛtʋ taa, fezuu taa paradisuu taa. Ɛsɔ fezuu kiɖeɖeu nɛ ɛ-lɔŋ tasʋʋ mbʋ pɩwɛ Bibl taa yɔ, mbʋ sɩɣnɩnɩ-ɖʋ se ɖɩkandɩyɩ ɛgbɛyɛ taa laŋhɛzɩyɛ nɛ kele kele wɛtʋ yɔɔ.—Keɣa 118:105; Zek. 4:6.

² Ye ɖɩlakɩnɩ tʋmɩyɛ Bibl paɣtʋ kila yɔ, ɖɩwɛɣnɩ “ɛyʋtʋ kɩfatʋ.” (Kol. 3:10) Pɩsɩɣnɩ-ɖʋ se ɖise yoŋ nɛ piyeki ɖɔɖɔ nɛ ɖɩɩhɔŋ ɖama nɛ tɔm. Ye ɖɩwɛnɩ Yehowa lɩmaɣza yɔ, pɩsɩɣnɩ-ɖʋ nɛ ɖɩlɔ ɛjaɖɛ yɔɔ lakasɩ nzɩ sɩpɩzɩɣ nɛ sɩtayɩ ɖɛ-hɛkʋ taa yɔ, nɛ ɖɩkɛ ɛjaɖɛ kpeekpe yɔɔ koobiya hɔʋ ŋgʋ kɩ-taa nɔɔ kʋɖʋmaɣ wɛɛ yɔ.—Tʋma 10:34, 35.

³ Paa mbʋ yɔ, nabʋyʋ taa tɔm natʋyʋ kɔŋ nɛ tiyeki se pɩpasɩ laŋhɛzɩyɛ nɛ nɔɔ kʋɖʋmaɣ ŋga kɛwɛ ɛgbɛyɛ taa yɔ. Ɛbɛ cɔlɔ pɩlɩɣna? Ðoŋ ɖoŋ lɛ, pɩlɩɣnɩ ɛzɩma nabɛyɛ ɩɩlakɩnɩ tʋmɩyɛ Bibl lɔŋ tasʋʋ yɔ, pɩ-cɔlɔ. Ðɩwɛɛ nɛ ɖɩlʋkɩnɩ ɖɛ-tɛ mantɩtalɩ pilim wɛtʋ nɛ ɖɛ-ɛjandʋ. Ða-tɩŋa ɖɩkɛ kɩwɛɛkɩm laɖaa. (1 Yoh. 1:10) Nɔɔyʋ pɩzɩɣ nɛ ɛkpɛzɩ nɩŋgbaŋaɣ kɩdɛkɛdaɣ nakɛyɛ nɛ pɩkɔnɩ kaɖɛ wezuu kɩbaŋʋ caɣʋ, yaa fezuu taa kele kele wɛtʋ ndʋ tɩwɛ ɛgbɛyɛ taa yɔ, tɩ-yɔɔ. Ðɩpɩzɩɣ nɛ ɖɩyɔɔdɩ tɔm natʋyʋ, ndʋ ɖɩtɩmaɣzɩ tɩ-yɔɔ camɩyɛ yɔ, yaa ɖɩla nabʋyʋ nɛ pɩwɩzɩ nɔɔyʋ. Nɔɔyʋ ɖɔɖɔ pɩzɩɣ nɛ ɛyɔɔdɩ tɔm natʋyʋ yaa ɛla nabʋyʋ nɛ pituuli-ɖʋ. (Roma 3:23) Wɛtʋ ndʋ tɩ-taa lɛ, ɛbɛ pɩwɛɛ se ɖɩla nɛ ɖɩñɔɔzɩ tɔm ndʋ?

⁴ Ða-Caa sɔɔlɩm tʋ Yehowa maɣzɩ wɛtʋ ndʋ tɩ-tɩŋa tɩ-yɔɔ. Ɛtasɩ-ɖʋ lɔŋ ɛ-Tɔm taa se pɩsɩnɩ-ɖʋ nɛ ɖɩtɩlɩ mbʋ pɩwɛɛ se ɖɩla, alɩwaatʋ ndʋ kaɖɛ naɖɩyɛ kɔŋ yɔ. Ɛzʋtʋyaa ɖiyiɣ-ɖʋ nɛ sɔɔlɩm nɛ papɩzɩɣ nɛ pasɩnɩ-ɖʋ. Ye ɖɩlakɩnɩ tʋmɩyɛ lɔŋ weyi patɩŋɩɣnɩ Masɩ yɔɔ nɛ patasɩɣ-ɖʋ yɔ, piyeki nɛ laŋhɛzɩyɛ ɖaɣnɩ wɛʋ ɖa nɛ lalaa ɖɛ-hɛkʋ taa, nɛ ɖɔ-tɔm kɛdɩnɩ Yehowa. Ye ɖɩlabɩ kɩwɛɛkɩm nabʋyʋ nɛ pasɩɣzɩ-ɖʋ lɔŋ yaa pɔhɔ ɖa-nɩŋgbaŋʋʋ yɔ, pɩpɔzʋʋ se ɖɩtɩlɩ se nɩŋgbaŋʋʋ hɔm mbʋ, pɩkɛ nʋmɔŋ weyi ɩ-yɔɔ ɖa-Caa sɔɔlɩm tʋ tɩŋɩɣna nɛ ɛwɩlɩɣ-ɖʋ ɛ-sɔɔlɩm yɔ ɩ-taa lɛɛkʋ.—Adu. 3:11, 12; Ebr. 12:6.

ƐZƖMA PƖWƐƐ SE PƆCƆNƖ TƆM CIKPETU ÐEÐE?

⁵ Nabʋyʋ taa, ɖama kɩɩnɩnʋʋ yaa tɔm cikpetu natʋyʋ pɩzɩɣ nɛ tɩkɔɔ ɛgbɛyɛ taa mba hɛkʋ taa. Pɩpɔzʋʋ se pɔcɔnɩ ti-ɖeɖe kpɛdɛyɛ nɛ sɔɔlɩm. (Efɛz. 4:26; Fil. 2:2-4; Kol. 3:12-14) Pɩtʋʋ fɛyɩ se, ŋkaɣ naʋ se tɔm cikpetu ndʋ tɩkɔŋ ña nɛ koobiya lalaa mɩ-hɛkʋ taa yɔ, ŋpɩzɩɣ nɛ ŋcɔnɩ ti-ɖeɖe ye ŋlakɩnɩ tʋmɩyɛ apostoloo Pɩyɛɛrɩ lɔŋ tasʋʋ pʋnɛ yɔ: “Ɩsɔɔlɩ ɖama siŋŋ, mbʋ pʋyɔɔ yɔ sɔɔlɩm huuzuu kɩwɛɛkɩm sakɩyɛ yɔɔ.” (1 Pɩy. 4:8) Bibl yɔɔdaa se: “Pituuluu ɖa-tɩŋa tam sakɩyɛ.” (Yak. 3:2) Ye ɖɩlakɩ lalaa mbʋ ɖɩsɔɔlaa se palabɩ-ɖʋ, ɛzɩ Sika Paɣtʋ pɔzʋʋ yɔ, ɖɩpɩzɩɣ nɛ ɖɩsɔɔ tɔm cikpetu ndʋ tɩkɔm ɖa nɛ wɛ ɖɛ-hɛkʋ taa yɔ, tɩ-yɔɔ nɛ ɖikpeɣ-wɛ.—Mat. 6:14, 15; 7:12.

⁶ Ye ŋyʋsaa se ñɔ-yɔɔdaɣ yaa ña-lakasɩ nasɩyɩ yeba nɛ pɩwɩzɩ nɔɔyʋ yɔ, pɩpɔzʋʋ se ŋkpɛzɩ nɩŋgbanzɩ nzɩ sɩmʋnaa yɔ lɔŋ, nɛ laŋhɛzɩyɛ pɩsɩ ña nɛ ɩ mɩ-hɛkʋ taa. Tɔzɩ se tɔm ndʋ, tɩpɩzɩɣ nɛ tɩwɛɛnɩ ɖoŋ ña nɛ Yehowa mɩ-taabalɩyɛ yɔɔ ɖɔɖɔ. Yesu tasɩ lɔŋ ɛ-tɔmkpɛlɩkɩyaa se: “Ye mbʋ, ye ŋɖiɣni wonuu ña-haɖɛ altaaru yɔɔ nɛ ŋtɔzɩ se ño-koobu taa wɛnɩ-ŋ nɛ natʋyʋ yɔ, yele ña-haɖɛ altaaru ɛsɩndaa peeɖe, nɛ ŋɖɛɛ. Kajalaɣ lɛ, ña nɛ ño-koobu iceɣ, nɛ pʋwayɩ lɛ ŋpɩsɩ ŋkɔɔ nɛ ŋha ña-haɖɛ.” (Mat. 5:23, 24) Pɩtɩla ɩtɩnɩɩnɩ ɖama kɩnɩnɩʋ. Ye mbʋ yɔ, pɩpɔzʋʋ se ɩyɔɔdɩnɩ ɖama. Ye ɛgbɛyɛ taa ñɩma tɩŋa ɩyɔɔdʋʋnɩ ɖama camɩyɛ yɔ, piyeki nɛ ɖama kɩɩnɩnʋʋ ɛɛkɔŋ ɖoŋ ɖoŋ, nɛ ye mantɩtalɩ pilim wɛtʋ eyeba nɛ tɔm natʋyʋ kɔɔ yɔ, papɩzɩɣ nɛ pɔñɔɔzɩ-tʋ lɔŋ.

MASƖ YƆƆ LƆŊ TASƲƲ MBƲ PƖMƲNAA YƆ

⁷ Nabʋyʋ taa, ɛzʋtʋyaa pɩzɩɣ nɛ pamaɣzɩ se pɩpɔzʋʋ se patasɩ koobu nɔɔyʋ lɔŋ nɛ pɔñɔɔzɩ ɛ-lɩmaɣza. Ɛlɛ pɩfɛyɩ kɛlɛʋ paa ɛzɩmtaa se pala mbʋ. Apostoloo Pɔɔlɩ ma tɔm tʋnɛ nɛ etiyini Galaatii Krɩstʋ mba: “Koobiya, paa ɛyʋ nɔɔyʋ ɛkpɛzɩ nɩŋgbaŋaɣ kɩdɛkɛdaɣ nakɛyɛ pʋcɔ nɛ eɖiɣzina yɔ, mɩ mba ɩpɩ fezuu taa yɔ ɩñaɣ pana nɛ ɩñɔɔzɩ ɛyʋ ɛnʋ nɛ hɛɛɛ wɛtʋ.”—Gal. 6:1.

⁸ Ye ɛzʋtʋyaa ikilimiɣ koobiya yɔɔ ɖoŋ ɖoŋ yɔ, piyeki nɛ pakandɩyɩ ɛgbɛyɛ yɔɔ camɩyɛ fezuu taa, nɛ pɛfɛɛ tɔm sakɩyɛ. Ɛzʋtʋyaa ñakɩ pana se ɛzɩma palakɩ pa-tʋma ɛgbɛyɛ taa yɔ, pɩla nɔɔ kʋɖʋmaɣ nɛ tamaɣ ŋga Yehowa kaatɩŋnɩ Izaayii yɔɔ nɛ ɛla yɔ; tamaɣ ŋga yɔ: “Abalʋ kaɣ kɛʋ ɖɩjɔzɩyɛ helim nɛ ɖɩmɛlɩyɛ kancʋʋlaɣ, ɛzɩ lɩm lemisi lɔkɔtʋ tɛtʋ taa yɔ, nɛ ɛzɩ kaaʋ kuzotuu wɩlɩŋ tɛtʋ taa yɔ.”—Iza. 32:2.

ƖYƲSƖ MBA PƆÐƆŊ ÐƆNƐ NÐƖ ÐƖTƖTƲƲZƖ YƆ

⁹ Apostoloo Pɔɔlɩ paɣ-ɖʋ pɩlɩɩnɩ mba pe-wezuu caɣʋ pɩzɩɣ nɛ pɩwɛɛnɩ ɖoŋ kɩdɛkɛdɩŋ ɛgbɛyɛ yɔɔ yɔ, pɔ-yɔɔ. Pɔɔlɩ yɔɔdaa se: “Ðiheyiɣ-mɩ . . . se, iposi mɩ-tɩ nɛ koobiya mba payɩ pɔɖɔŋ ɖɔnɛ nɖɩ ɖɩtɩtʋʋzɩ nɛ paaɖɔŋ sɔnzɩ nzɩ ɩmʋ ɖɔ-cɔlɔ yɔ sɩ-yɔɔ yɔ.” Ɛlɩzɩ ɛ-tɔm ndʋ tɩ-taa nɛ ɛtɔ se: “Ye nɔɔyʋ ɛɛñaŋ ɖɔ-tɔm ndʋ tɩwɛ takayaɣ kanɛ ka-taa yɔ, ɩyʋsɩ ɛyʋ ɛnʋ nɛ mɩ nɛ ɩ iyele taabalɩyɛ ɖʋʋ, se pɩsa nɛ fɛyɛ kpa-ɩ. Paa mbʋ yɔ, ɩtaakpaɣ-ɩ ɛzɩ koyindu yɔ, ɛlɛ iwolo pɩ-yɔɔ nɛ ɩpaɣ-ɩ ɛzɩ koobu yɔ.”—2 Tes. 3:6, 14, 15.

¹⁰ Nabʋyʋ taa, nɔɔyʋ lakasɩ pɩzɩɣ nɛ sɩwɩlɩ kaɣlaa se ɛfɛyɩnɩ ñamtʋ paɣtʋ ndʋ paɖʋ Krɩstʋ ñɩma yɔ tɩ-yɔɔ; ɛlɛ ɛɛlakɩ kɩwɛɛkɩm sɔsɔm mbʋ pɩpɩzɩɣ nɛ piyele se palɩzɩ-ɩ ɛgbɛyɛ taa yɔ. Ɛ-lakasɩ nzɩ sɩpɩzɩɣ nɛ sɩkɛ feendu kadadayaɣ, tɔm hɔm nɛ lalaa yaa kʋzɔɔtʋ. Pɩtɩla yɔ, ‘ɛɖʋʋ ɛ-nɔɔ tɔm ndʋ tɩtɩkɛ ɛ-ñɩndʋ yɔ tɩ-taa.’ (2 Tes. 3:11) Pɩtɩla ɖɔɖɔ yɔ, ɛtɩŋɩɣnɩ ajitu nʋmɔʋ nakʋyʋ yɔɔ nɛ emuluu koobiya tomnaɣ yɔɔ, yaa ɛlakɩ aleɣya wena pɩnaɣ kaɣlaa se atɩmʋnɩ Krɩstʋ ñɩma yɔ. Ɛ-ɖɔnɛ nɖɩ ɖɩtɩtʋʋzɩ paa ññɩɩ nɛ pʋyɔɔ lɛ, ɖipisiɣ ɛgbɛyɛ nɛ ɖɩpɩzɩɣ ɖɔɖɔ nɛ ɖɩwɛɛnɩ ɖoŋ kɩdɛkɛdɩŋ koobiya lalaa yɔɔ.

¹¹ Kajalaɣ lɛ, ɛzʋtʋyaa tɩŋɩɣnɩ Bibl yɔɔ nɛ patasɩ lɔŋ weyi ɛɖɔŋ ɖɔnɛ nɖɩ ɖɩtɩtʋʋzɩ yɔ. Ɛlɛ ye patasɩ ɛyʋ ɛnʋ lɔŋ tam sakɩyɛ nɛ ekizi lɛɣzʋʋ yɔ, ɛzʋtʋyaa pɩzɩɣ nɛ pakpaɣ lɩmaɣzɩyɛ se pɔyɔɔdʋʋ paɣʋ tɔm ɛgbɛyɛ ɛsɩndaa. Pʋcɔ nɛ patɩlɩ se pɩmʋnaa yaa pɩtɩmʋna se pɔyɔɔdɩ tɔm ndʋ lɛ, pɩpɔzʋʋ se ɛzʋtʋyaa ɩtazɩ camɩyɛ, nɛ pana se ɛyʋ ɛnʋ ɛ-lakasɩ wɛɛkɩ siŋŋ nɛ sɩwɛnɩ ɖoŋ kɩdɛkɛdɩŋ lalaa yɔɔ? Tɔm yɔɔdɩyʋ tasɩɣ lɔŋ pɩlɩɩnɩ ɖɔnɛ nɖɩ ɖɩtɩtʋʋzɩ yɔ ɖɩ-yɔɔ, ɛlɛ ɛɛyaɣ weyi ɛwɛɛ nɛ ɛɖɔŋ ɖɔnɛ nɖɩ yɔ, ɛ-hɩɖɛ. Piyeki nɛ mba paasɩm wɛtʋ ndʋ tɩ-taa ɛyʋ ɛnʋ ɛwɛɛ yɔ, poposi pa-tɩ nɛ ɩ, paa pɩpɔzʋʋ se powolo pɩ-yɔɔ nɛ pa nɛ ɩ palakɩ fezuu taa tʋma nɛ ‘papakɩ-ɩ ɛzɩ koobu yɔ.’

¹² Ðɩtaɣ liu se ye koobiya lalaa mba pɛwɛ siɣsiɣ yɔ pɔɖɔkɩ kpam nɛ poposi pa-tɩ nɛ weyi ɛɖɔŋ ɖɔnɛ nɖɩ ɖɩtɩtʋʋzɩ yɔ, piyeki nɛ fɛyɛ kpa-ɩ nɛ ɛlɛɣzɩ ɛ-wɛtʋ. Ye pʋwayɩ, pɔkɔma nɛ pana kaɣlaa se ɛlɛɣzɩ ɛ-wɛtʋ yɔ, pɩpɔzʋʋ se peyebi-i yʋsʋʋ se ɛkɛ weyi ɛɖɔŋ ɖɔnɛ nɖɩ ɖɩtɩtʋʋzɩ yɔ.

ƐZƖMA PƆCƆŊNƖ KƖWƐƐKƖM SƆSƆM MBƲ PALABƖ NƆƆYƲ YƆƆ YƆ PI-ÐEÐE?

¹³ Ye pɔtɔm se ɖɩsɔɔ kɩwɛɛkɩm mbʋ palabɩ-ɖʋ yɔ pɩ-yɔɔ nɛ ɖikpeɣ yɔ, pɩɩwɩlɩɣ se ɖihuuzuu ɛsa lakasɩ kɩdɛkɛdɩsɩ yɔɔ yaa sɩkɛdɩɣnɩ-ɖʋ. Pɩtɩkɛ mantɩtalɩ pilim wɛtʋ cɔlɔ kɩwɛɛkɩm kpeekpe lɩɣna, nɛ pɩɩwɛɣ ɖeu se ɖihuuzi ɛsa kɩwɛɛkɩm sɔsɔm yɔɔ. (Lev. 19:17; Keɣa 140:5) Moyizi paɣtʋ tɛɛ lɛ, kɩwɛɛkɩm nabʋyʋ kaakpaɖɩ lɛɛbʋ, nɛ mbʋ ɖɔɖɔ pɩwɛ Krɩstʋ ñɩma paɣtʋ taa.—1 Yoh. 5:16, 17.

¹⁴ Yesu yɔɔdɩ nɩŋgbanzɩ nzɩ pɩwɛɛ se pɛkpɛzɩ ye tɔm ɛkɔm Krɩstʋ ñɩma hɛkʋ taa yɔ sɩ-tɔm. Cɔna nɩŋgbanzɩ nzɩ sɩ-tɔm ɛyɔɔdaa se pɩpɔzʋʋ se pɛkpɛzɩ yɔ: “Ye ño-koobu ɛyʋsɩnɩ-ŋ kɔyɔ, [1] wolo nɛ ŋheyi-i ɛ-kɩwɛɛkɩm ña nɛ ɩ mɩ-taa mi-ɖeke. Ye ewelisini-ŋ yɔ, ŋwabɩ ño-koobu. Ɛlɛ ye etiwelisini-ŋ yɔ, [2] wolo nɛ ŋñɩnɩ ɛyʋ kʋɖʋm yaa ɛyaa naalɛ, se pɩsa nɛ aseɣɖe tɩnaa naalɛ yaa naadozo aseɣɖe tɔm yɔɔ lɛ, pɔcɔnɩ paa tɔm ndʋ lɛ ti-ɖeɖe. Ye etiwelisini-wɛ yɔ, [3] yɔɔdɩnɩ ɛgbɛyɛ. Ye etiwelisini ɛgbɛyɛ ɖɔɖɔ yɔ, ɛkɛ ñɛ-ɛsɩndaa ɛzɩ ajɛɛ taa tʋ nɛ ɛzɩ lambuu mʋyʋ yɔ.”—Mat. 18:15-17.

¹⁵ Eduuye nɖɩ Yesu tuu Maatiyee 18:23-35 taa yɔ, ɖɩwɩlɩɣ se kɩwɛɛkɩm mbʋ pɩ-tɔm ɛyɔɔdɩ Maatiyee 18:15-17 taa yɔ, pitukuuni liidiye yaa tɛtʋ yaa ñɩm lɛɛbʋ mbʋ ɛyʋ pɩzɩɣ nɛ ɛwɛɛna yɔ. Ye mbʋ, pɩkɛ kɩwɛɛkɩm mbʋ ɛyʋ lakɩ alɩwaatʋ ndʋ ɛɛhɛyɩɣ kɩmɩyɛ naɖɩyɛ yaa emuluu nɔɔyʋ yɔ. Pɩpɩzɩɣ nɛ pɩkɛ ɖɔɖɔ kɔlɔmɔtʋ tɔm ndʋ tipisiɣ nɔɔyʋ hɩɖɛ siŋŋ yɔ.

¹⁶ Ye ŋnawa se ɛgbɛyɛ taa tʋ nɔɔyʋ labɩ-ŋ kɩwɛɛkɩm mbʋ pɩ-taa nabʋyʋ yɔ, taakpedisi nɛ ŋwolo ŋna ɛzʋtʋyaa se paɖʋ pɔ-nɔɔ tɔm ndʋ tɩ-taa. Ɛzɩ Yesu tasʋʋ lɔŋ yɔ, calɩnɩ yɔɔdɩnʋʋ weyi ɛyʋsɩnɩ-ŋ yɔ. Ñaɣ pana nɛ ña nɛ ɩ ɩñɔɔzɩ tɔm mɩ-taa mi-ɖeke. Tɔzɩ se Yesu tɩyɔɔdɩ se ‘wolo tam kʋɖʋmam nɛ ŋheyi-i ɛ-kɩwɛɛkɩm.’ Ye mbʋ, ye ŋwoba nɛ etitisi ɛ-kɩwɛɛkɩm yɔɔ nɛ ekpiɖi yɔ, pɩwɛɣ ɖeu se ŋtasɩ pɩsʋʋ nɛ ŋna-ɩ pʋwayɩ. Ye ɩpɩzɩɣ se ɩcɔnɩ tɔm ndʋ ti-ɖeɖe mbʋ yɔ, pɩkɛdɩɣnɩ weyi ɛyʋsɩnɩ-ŋ yɔ se ŋtaaheyi nɔɔyʋ mbʋ ɛlabɩ-ŋ yɔ nɛ pipisi ɛ-hɩɖɛ ɛgbɛyɛ taa. Pʋbʋ lɛ, “ŋwabɩ ño-koobu.”

¹⁷ Ye kɩwɛɛkɩm laɖʋ etisaa se ɛyʋsɩnɩ-ŋ, ɛpɔzɩ se ŋkpaɣ nɛ ŋkpeɣ-i nɛ ɛpaɣzɩ ñaɣʋ pana se ɛñɔɔzɩ tɔm yɔ, pɩɩtasɩɣ pɔzʋʋ se ŋkpɛzɩ nɩŋgbanzɩ lɛɛsɩ. Paa ɛ-kɩwɛɛkɩm ɛkɛ sɔsɔm yɔ, mba kɩwɛɛkɩm mbʋ pitukunaa yɔ, papɩzɩɣ nɛ pɔñɔɔzɩ tɔm pa-taa pe-ɖeke.

¹⁸ Ye ɩtɩpɩzɩ nɛ ɩñɔɔzɩ tɔm “ña nɛ ɩ mɩ-taa mi-ɖeke” yɔ, pʋbʋ lɛ ŋpɩzɩɣ nɛ ŋla ɛzɩ Yesu yɔɔdʋʋ yɔ; “wolo nɛ ŋñɩnɩ ɛyʋ kʋɖʋm yaa ɛyaa naalɛ” nɛ ɩtasɩ yɔɔdɩnʋʋ koobu ɛnʋ. Mba ŋñɩnɩɣ yɔ, pɩwɛɛ se pa-kaɖʋwa ɛkɛnɩ se pasɩnɩ-mɩ nɛ ɩñɔɔzɩ tɔm. Pɩkɩlɩɣ ɖeu se mba ŋñɩnɩɣ yɔ, pɛkɛ mba panawa se ɛyʋ ɛnʋ ɛlabɩ-ŋ kɩwɛɛkɩm mbʋ yɔ. Ɛlɛ ye nɔɔyʋ ɛtɩna se palabɩ-ŋ kɩwɛɛkɩm mbʋ yɔ, ŋpɩzɩɣ nɛ ŋyaa nabɛyɛ se pɔkɔɔ nɛ pɛkɛ aseɣɖe tɩnaa, alɩwaatʋ ndʋ ɩtazɩɣ tɔm ndʋ tɩ-taa yɔ. Pɩwɛɛ se pɛkɛ mba pɛtɛm katʋʋ wɛtʋ ndʋ yɔ; pʋbʋ lɛ papɩzɩɣ nɛ pɔyɔɔdɩ se mbʋ pɩlaba yɔ pɩkɛ kɩwɛɛkɩm yaa pɩtɩkɛ kɩwɛɛkɩm. Ye ɛzʋtʋyaa ŋñɩnaa yɔ, pɛkɛɣnɩ ña-aseɣɖe tɩnaa, ɛlɛ paalakɩ tʋmɩyɛ nɖɩ ɛgbɛyɛ hɩɖɛ taa, mbʋ pʋyɔɔ yɔ pɩtɩkɛ ɛgbɛyɛ taa ɛzʋtʋyaa ɖʋnɩ-wɛ ɖɩ.

¹⁹ Ye ŋñaɣ pana tam sakɩyɛ yɔ, pʋ-tɔbʋʋ se ŋna-ɩ nɛ ɩyɔɔdɩ mɩ-taa mi-yeke nɛ ŋñɩnɩ ɖɔɖɔ ɛyʋ kʋɖʋm yaa ɛyaa naalɛ nɛ iwolo nɛ ɩna-ɩ, ɛlɛ ɩtɩpɩzɩ nɛ ɩñɔɔzɩ tɔm ndʋ, nɛ ŋŋpɩzɩɣ se ŋsɔɔ tɩ-yɔɔ yɔ, wolo ŋheyi-tʋ ɛgbɛyɛ taa ɛzʋtʋyaa. Taasɔɔ se pa-kaɖʋwa lɛ se peyele nɛ laŋhɛzɩyɛ nɛ kele kele wɛtʋ pɛwɛɛ ɛgbɛyɛ taa. Ye ŋɖʋ tɔm ndʋ ɛzʋtʋyaa nesi tɛɛ yɔ, pɩwɛɣ ɖeu se ŋyele nɛ pɔcɔnɩ ti-ɖeɖe nɛ ŋtaa Yehowa liu. Taayele kpa se nɔɔyʋ lakasɩ etuuli-ŋ nɛ ŋlesi taa leleŋ weyi ŋwɛnɩ Yehowa tʋmɩyɛ taa yɔ.—Keɣa 118:165.

²⁰ Ɛzʋtʋyaa kaɣ tazʋʋ tɔm ndʋ tɩ-taa. Ye patazaa nɛ pana se ɛlabɩ-ŋ kɩwɛɛkɩm sɔsɔm nɛ eekpiɖiɣ yaa ɛɛñakɩ pana se ye pɩsaŋ yɔ, ɛñɔɔzɩ mbʋ ɛwɛɛkaa yɔ, tɔm hʋʋ kɔɔmiite pɩzɩɣ nɛ kɩkpaɣ lɩmaɣzɩyɛ se kɩlɩzɩɣ kɩwɛɛkɩm laɖʋ ɛnʋ ɛgbɛyɛ taa. Piyeki se pakandɩyɩ koobiya nɛ ɛgbɛyɛ taa kele kele wɛtʋ yɔɔ.—Mat. 18:17.

ƐZƖMA PƆCƆŊNƖ KƖWƐƐKƖM SƆSƆM ÐEÐE?

²¹ Ye nɔɔyʋ ɛlabɩ kɩwɛɛkɩm sɔsɔm ɛzɩ hayitu, acɛyɛ, abalaa nɛ abalaa yaa halaa nɛ halaa ɖama sʋnʋʋ, tisuu yebu, sɩɩnaa latʋ nɛ kɩwɛɛkɩm sɔsɔm lɛɛbʋ yɔ, paakpeɣ-i yem nɛ pɩla se pɩtɛma. (1 Kɔr. 6:9, 10; Gal. 5:19-21) Kɩwɛɛkɩm mbʋ, pɩkɛ azuluma pʋyʋ nɛ pipisiɣ ɛgbɛyɛ fezuu taa nɛ pʋyɔɔ lɛ, pɩwɛɛ se patanɩ tɔm ndʋ ɛgbɛyɛ taa ɛzʋtʋyaa nɛ pɔcɔnɩ ti-ɖeɖe. (1 Kɔr. 5:6; Yak. 5:14, 15) Nabɛyɛ pɩzɩɣ powolo nɛ peheyi ɛzʋtʋyaa pa-maɣmaɣ pa-kɩwɛɛkɩm yaa kɩwɛɛkɩm mbʋ pasɩma se nɔɔyʋ laba yɔ. (Lev. 5:1; Yak. 5:16) Paa pɩtɩɩkɛ nʋmɔʋ ŋgʋ yɔɔ patɩŋnaa nɛ peheyi ɛzʋtʋyaa kɩwɛɛkɩm sɔsɔm mbʋ koobu nɔɔyʋ laba yɔ pɩ-tɔm yɔ, pɩwɛɛ se palɩzɩ ɛzʋtʋyaa naalɛ nɛ patazɩ tɔm ndʋ tɩ-taa. Ye patazaa nɛ pana se tɔm ndʋ tɩkɛ toovenim nɛ ndɛŋgbɛzaɣ fɛyɩ tɩ-yɔɔ yɔ, ɛgbɛyɛ taa ɛzʋtʋyaa lɩzɩɣ pa-taa naadozo yaa pɩcɛzɩ mbʋ se pala tɔm hʋʋ kɔɔmiite nɛ pɔcɔnɩ tɔm ndʋ ti-ɖeɖe.

²² Ɛgbɛyɛ taa ɛzʋtʋyaa ñakɩ pana se pɔcɔnɩ heɣsi yɔɔ camɩyɛ nɛ kaɖɛ naɖɩyɛ ɛtaatalɩ-sɩ fezuu taa. Patɩŋɩɣnɩ ɖɔɖɔ Ɛsɔtɔm yɔɔ se papaɣ weyi ɛlabɩ kɩwɛɛkɩm yɔ nɛ pasɩnɩ-ɩ nɛ ɛkpa ɖoŋ fezuu taa. (Yud. 21-23) Pa-pana ñaɣʋ mbʋ, pɩlabɩ nɔɔ kʋɖʋmaɣ nɛ tɔm ndʋ apostoloo Pɔɔlɩ heyi Timootee yɔ: “Manɖʋʋ-ŋ paɣtʋ Ɛsɔ ɛsɩndaa nɛ Krɩstʋ Yesu, weyi ɛkaɣ hʋnʋʋ ɛsadɩnaa nɛ sɩɖaa tɔm yɔ ɛ-ɛsɩndaa . . . kizini ɛyaa tɔm, kalɩ-wɛ, seɣti-wɛ; la mbʋ nɛ suuɖu tɩŋa nɛ tɔm wɩlʋʋ lɛɣtʋ tɩŋa.” (2 Tim. 4:1, 2) Pɩ-labʋ kpakɩɣ alɩwaatʋ, ɛlɛ tʋma sɔsɔna wena ɛzʋtʋyaa lakɩ yɔ a-taa naɖɩyɛ lɛ. Ɛgbɛyɛ saŋ-wɛ pa-tʋma yɔɔ nɛ ɖɩmaɣzɩɣ se “pamʋnɩ hɩɖɛ ɖʋʋ tam nabʋlɛ taa.”—1 Tim. 5:17.

²³ Patazaa nɛ pana se koobu nɔɔyʋ labɩ kɩwɛɛkɩm yɔ, paa ɛzɩmtaa ɛzʋtʋyaa kajalaɣ kaɖʋwa lɛ se pasɩnɩ koobu ɛnʋ nɛ ɛkpa ɖoŋ fezuu taa. Ye koobu ɛnʋ ekpiɖi ɛ-kɩwɛɛkɩm mbʋ pɩ-yɔɔ siŋŋ nɛ papɩzɩɣ se pasɩnɩ-ɩ yɔ, pɩwɛɛ se pakalɩ-ɩ yaa pekizini-i tɔm alɩwaatʋ ndʋ ɛwɛɣ e-yeke yɔ, yaa pɩwɛɛ se pakalɩ-ɩ mba panawa se ɛlabɩ kɩwɛɛkɩm mbʋ nɛ palɩzɩ aseɣɖe tɔm hʋʋ kɔɔmiite ɛsɩndaa yɔ pɛ-ɛsɩndaa. Piyeki nɛ sɔɔndʋ ndʋ tɩmʋnaa yɔ, tɩkpa lalaa. (2 Sam. 12:13; 1 Tim. 5:20) Paa ɛzɩma tɩyɛ tɔm hʋʋ kɔɔmiite etiikizini-i tɔm yɔ, pɩwɛɛ se pɔhɔ ɛ-nɩŋgbaaŋ hɔɔlɩŋ nɩɩyɩ taa. Pɩsɩɣnɩ kɩdɛkɛdɩm laɖʋ ɛnʋ se ɛñɔɔzɩ ɛ-nɩŋgbanzɩ “nʋmɔŋ weyi ɩtʋʋzaa” yɔ. (Ebr. 12:13) Alɩwaatʋ ndʋ pɩnaɣ kaɣlaa se kɩwɛɛkɩm laɖʋ ɛnʋ ɛkpa ɖoŋ fezuu taa lɛ, pɩwɛɛ se peyele ɛ-nɩŋgbaŋʋʋ hɔm tɔm ndʋ.

ƐYƲ NƖŊGBAŊƲƲ HƆM YƆƆ TƆM SUSUU

²⁴ Ye tɔm hʋʋ kɔɔmiite ɛnawa se kɩwɛɛkɩm laɖʋ kpiɖi ɛ-kɩwɛɛkɩm yɔɔ, ɛlɛ ɛgbɛyɛ taa koobiya yaa egeetiye taa ɛyaa kɔŋ nɩʋ mbʋ pɩlaba yɔ pɩ-tɔm yɔ, yaa ye pɩwɛɛ se papaɣ koobiya kɩwɛɛkɩm laɖʋ weyi ekpiɖi ɛ-kɩwɛɛkɩm yɔɔ yɔ ɛ-yɔɔ yɔ, papɩzɩɣ nɛ posusi tɔm natʋyʋ Ðe-wezuu caɣʋ nɛ ɖɛ-Ɛsɔ sɛtʋ kediɣzaɣ alɩwaatʋ taa. Pɩwɛɛ se posusi se: “Pɔhɔm [ɛyʋ ɛnʋ ɛ-hɩɖɛ] nɩŋgbaŋʋʋ.”

YE PƐSƐTƖ TƆM TAA SE PALƖZƖƔ NƆƆYƲ ƐGBƐYƐ TAA YƆ

²⁵ Nabʋyʋ taa lɛ, kɩwɛɛkɩm laɖʋ pɩzɩɣ nɛ ɛla ñʋʋ taa ɖoŋ nɛ ekizi se pataasɩnɩ-ɩ. Alɩwaatʋ ndʋ pahʋʋnɩ kɩwɛɛkɩm laɖʋ ɛnʋ tɔm yɔ, paanaɣ ɛ-lakasɩ taa ‘tʋma wena awɩlɩɣ se ekpiɖi ɛ-kɩwɛɛkɩm yɔɔ yɔ.’ (Tʋma 26:20) Ye pɩwɛ mbʋ yɔ, ɛbɛ pɩwɛɛ se pala? Pɩlabɩ mbʋ yɔ, pɩpɔzʋʋ se palɩzɩ kɩwɛɛkɩm laɖʋ ɛnʋ ɛgbɛyɛ taa, nɛ ɛ nɛ Yehowa samaɣ ŋga kɛwɛ kele kele yɔ, pataatasɩ taabalɩyɛ ɖʋʋ. Piyeki nɛ kɩwɛɛkɩm laɖʋ ɛɛtasɩɣ wɛnʋʋ ɖoŋ kɩdɛkɛdɩŋ ɛgbɛyɛ yɔɔ. Piyeki ɖɔɖɔ nɛ pakandɩyɩ ɛgbɛyɛ yɔɔ fezuu taa nɛ wezuu kɩbaŋʋ caɣʋ hɔɔlʋʋ taa se pitaapisi ɖɩ-hɩɖɛ. (Wp. 21:20, 21; 22:23, 24) Apostoloo Pɔɔlɩ nɩ fɛyɛ tɔm ndʋ tɩɩlabɩ Kɔrɛntɩ ɛgbɛyɛ taa yɔ lɛ, eheyi ɛzʋtʋyaa se: “Pɩwɛɛ se ɩɖʋzɩ abalʋ ɛnʋ Sataŋ nesi tɛɛ . . . , se pɩsa nɛ [ɛgbɛyɛ] fezuu hiɣ ñʋʋ yabɩtʋ.” (1 Kɔr. 5:5, 11-13) Pɔɔlɩ tasɩ yɔɔdʋʋ ɖɔɖɔ kajalaɣ pɩnzɩ mɩnʋʋ taa Krɩstʋ ñɩma lalaa mba paakaɖɩnɩ toovenim nɛ palɩzɩ-wɛ ɛgbɛyɛ taa yɔ, pɔ-tɔm.—1 Tim. 1:20.

²⁶ Ye tɔm hʋʋ kɔɔmiite ɛsɛtɩ tɔm taa se palɩzɩɣ kɩwɛɛkɩm laɖʋ weyi etikpiɖi ɛ-kɩwɛɛkɩm yɔɔ yɔ ɛgbɛyɛ taa yɔ, pɩwɛɛ se palɩzɩ kɩwɛɛkɩm laɖʋ ɛnʋ Bibl taa lɩmaɣza wena a-yɔɔ palɩzɩɣ-ɩ ɛgbɛyɛ taa yɔ, a-taa kpayɩ kpayɩ. Paalɩzɩɣ-ɩ tɔm ndʋ tɩ-taa lɛ, pɩwɛɛ se peheyi-i ɖɔɖɔ se ye ɛmaɣzɩɣ se patɩhʋʋ ɛ-tɔm camɩyɛ nɛ pomuli-i pɩdɩɩfɛyɩ nɛ ɛsɔɔlaa se paɖaɣnɩ-tʋ hʋʋ yɔ, pɩwɛɛ se ɛma takayaɣ nakɛyɛ nɛ ɛlɩzɩ mbʋ pʋyɔɔ ɛmaɣzɩɣ mbʋ yɔ pɩ-taa. Kpaɣnɩ alɩwaatʋ ndʋ tɔm hʋʋ kɔɔmiite heyi-i tɔm ndʋ yɔ, pɩwɛɛ se kɩyakɩŋ lʋbɛ ɩtaaɖɛɛ pʋcɔ nɛ ɛma takayaɣ ŋga. Ye tɔm hʋʋ kɔɔmiite ɛmʋ takayaɣ nakɛyɛ mbʋ yɔ, ɛgbɛyɛ taa ɛzʋtʋyaa yɔɔdʋʋnɩ egeetiye yɔɔ cɔnɩyʋ nɛ ɛlɛ lɩzɩ ɛzʋtʋyaa nabɛyɛ mba pamʋnaa yɔ, nɛ pala kɔɔmiite ŋgʋ kɩɖaɣnɩɣ tɔm hʋʋ yɔ. Kpaɣnɩ alɩwaatʋ ndʋ pamʋʋ takayaɣ ŋga yɔ, pɩwɛɛ se pañaɣ pana nɛ pɩtaacɛzɩ kpɩtaʋ pʋcɔ nɛ paɖaɣnɩ tɔm ndʋ hʋʋ. Ye kɩwɛɛkɩm laɖʋ ɛma takayaɣ mbʋ yɔ, paapadɩɣ susuu se palɩzɩ-ɩ ɛgbɛyɛ taa. Alɩwaatʋ ndʋ tɩ-taa lɛ, pɩfɛyɩ se paha kɩwɛɛkɩm laɖʋ waɖɛ se ecosi tɔm, ɛtɩmɩ yaa ɛla ɛgbɛyɛ taa tʋma lɛɛna.

²⁷ Ðʋtʋ ndʋ palaba se patasɩ hʋʋ kɩwɛɛkɩm laɖʋ tɔm yɔ, tɩkɛnɩ pʋtɔdɩyɛ naʋ ɖʋtʋ ndʋ tɩhaɣ-ɩ waɖɛ se patasɩ ɛ-tɔm taa tazʋʋ yɔ. Pʋyɔɔ lɛ, ye palabɩ ɖʋtʋ se patasɩɣ ɛ-tɔm hʋʋ nɛ ekizi nɛ etiwolo, nɛ pañaɣ pana se pakatɩ-ɩ ɛlɛ patɩpɩzɩ yɔ, papɩzɩɣ nɛ posusi se palɩzɩ kɩwɛɛkɩm laɖʋ ɛnʋ ɛgbɛyɛ taa.

²⁸ Ye kɩwɛɛkɩm laɖʋ ɛtɩsɔɔlɩ se patasɩ ɛ-tɔm hʋʋ yɔ, tɔm hʋʋ kɔɔmiite lɩzɩɣ-ɩ mbʋ pʋyɔɔ pɩcɛyaa se ekpiɖi ɛ-kɩwɛɛkɩm yɔɔ yɔ pɩ-taa, nɛ nɩŋgbanzɩ nzɩ pɩwɛɛ se ɛkpɛzɩ nɛ paɖaɣnɩ-ɩ mʋʋ yɔ. Pɩkɛnɩ kɩbandʋ labʋ nɛ sɩnʋʋ mbʋ papɩzɩɣ nɛ paha kɩwɛɛkɩm laɖʋ ɛnʋ se pɩsa nɛ ɛlɛɣzɩ ɛ-lakasɩ nɛ ɛpɩsɩ ɛkɔɔ Yehowa ɛgbɛyɛ taa yɔ.—2 Kɔr. 2:6, 7.

YE PALƖZƖ ƐYƲ ƐGBƐYƐ TAA YƆ, ƐZƖMA PƖWƐƐ SE POSUSI PƖ-TƆM?

²⁹ Ye pɩwɛɛ se palɩzɩ kɩwɛɛkɩm laɖʋ weyi itikpiɖi ɛ-kɩwɛɛkɩm yɔɔ yɔ ɛgbɛyɛ taa yɔ, pɩwɛɛ se posusi se: “[Ɛyʋ ɛnʋ ɛ-hɩɖɛ] tɩtasɩ kɛʋ Yehowa Aseɣɖe Tʋ.” Tɔm ndʋ posusaa yɔ, tiyeki se mba pɛwɛ siɣsiɣ ɛgbɛyɛ taa yɔ, peyele taabalɩyɛ ɖʋʋ nɛ weyi palɩzaa yɔ. (1 Kɔr. 5:11)

WEYI ƐLƖZƖ Ɛ-TƖ ƐGBƐYƐ TAA YƆ

³⁰ Ye pɔtɔm se nɔɔyʋ “lɩzɩ ɛ-tɩ ɛgbɛyɛ taa” yɔ, pɩwɩlɩɣ se weyi pamɩyɩsɩ-ɩ lɩm yɔ, ɛɖʋ ɛ-taa se ɛɛtasɩɣ ɖɔm Krɩstʋ ñɩma paɣtʋ yɔɔ yaa ekizaa se ɛɛtasɩɣ kɛʋ Yehowa Aseɣɖe Tʋ. Yaa ɛtɩŋɩɣnɩ ɛ-lakasɩ yɔɔ nɛ ɛwɩlɩɣ se ekizi lone nɖɩ ɛɛwɛnɩ ɛgbɛyɛ taa yɔ. Pɩpɩzɩɣ nɛ pɩla se ɛgbɛyɛ nɖɩ ɖɩ-taa ɛsʋwa yɔ, ɖɩ-kaɖʋsɩ kaɖɩɣnɩ Bibl wɩlɩtʋ nɛ Yehowa kaɣ-ɖɩ tɔm hʋnʋʋ.—Iza. 2:4; Natʋ 19:17-21.

³¹ Apostoloo Yohanɛɛsɩ yɔɔdaɣ ɛ-alɩwaatʋ taa ɛyaa mba pɔlɔ Krɩstʋ ñɩma tisuu yɔ pɔ-tɔm lɛ, ɛtɔm se: “Palɩnɩ ɖɛ-hɛkʋ taa, ɛlɛ pataakɛ ɖa-ñɩma; mbʋ pʋyɔɔ yɔ ye paakɛ ɖa-ñɩma yɔ, paacaɣ ɖɔ-cɔlɔ.”—1 Yoh. 2:19.

³² Yehowa ɛsɩndaa lɛ, weyi ɛlɩzɩ ɛ-tɩ ɛgbɛyɛ taa yɔ, ɛ-wɛtʋ wɛ ndɩ siŋŋ nɛ weyi ɛhɛ fezuu taa nɛ eyele tɔm susuu yɔ. Ɛyʋ pɩzɩɣ nɛ ɛhɛɛ fezuu taa mbʋ pʋyɔɔ yɔ, eyebi kpɛlɩkʋʋ Ɛsɔtɔm ɖoŋ ɖoŋ. Yaa pɩtɩla ɛkatɩ kala naayɛ yaa nazɩm nabʋyʋ e-wezuu caɣʋ taa nɛ piyele nɛ kpekpeka ŋga ɛɛwɛna Yehowa tʋmɩyɛ taa yɔ kɛhɛɛ. Pɩpɔzʋʋ se ɛgbɛyɛ taa ɛzʋtʋyaa nɛ ɛgbɛyɛ taa ñɩma lalaa iwolo pɩ-yɔɔ nɛ pasɩɣnɩ Krɩstʋ tʋ weyi ɛhɛ fezuu taa yɔ ɛzɩ pɩpɔzʋʋ yɔ.—Roma 15:1; 1 Tes. 5:14; Ebr. 12:12.

³³ Ɛlɛ ye nɔɔyʋ ɛlɩzɩ ɛ-tɩ ɛgbɛyɛ taa yɔ, pɩwɛɛ se posusi ɛgbɛyɛ ɛsɩndaa se: “[Ɛyʋ ɛnʋ ɛ-hɩɖɛ] tɩtasɩ kɛʋ Yehowa Aseɣɖe Tʋ.” Wɛtʋ ndʋ pɩwɛɛ se ɖɩwɛɛnɩ weyi palɩzɩ-ɩ ɛgbɛyɛ taa yɔ ɛ-yɔɔ yɔ, ndʋ ɖɔɖɔ pɩwɛɛ se ɖɩwɛɛnɩ weyi ɛlɩzɩ ɛ-tɩ ɛgbɛyɛ taa yɔ, ɛ-yɔɔ.

ƐYAA PƖSƖNƲƲ ƐGBƐYƐ TAA

³⁴ Ye palɩzɩ nɔɔyʋ ɛgbɛyɛ taa, yaa ye nɔɔyʋ ɛlɩzɩ ɛ-tɩ ɛgbɛyɛ taa, nɛ pʋwayɩ ɛlɩzɩ nɛ ɛwɩlɩ kpayɩ kpayɩ se ekpiɖi ɛ-kɩwɛɛkɩm yɔɔ nɛ eyele caɣʋ wezuu kɩdɛkɛdʋʋ yɔ, papɩzɩɣ nɛ paɖaɣnɩ-ɩ pɩsɩnʋʋ ɛgbɛyɛ taa. Pɩwɩlɩɣ se ɛsɔɔlaa se ɛñɔɔzɩ ɛ nɛ Yehowa pa-taabalɩyɛ. Ɛlɛ pɩfɛyɩ se ɛzʋtʋyaa ikpedesi, pɩwɛɛ se peyele nɛ alɩwaatʋ sakɩyɛ ɖɛɛ. Pɩlɩɣnɩ wɛtʋ ndʋ tɩ-taa ɛyʋ ɛnʋ ɛwɛɛ yɔ tɩ-cɔlɔ. Pʋyɔɔ lɛ, pɩpɩzɩɣ nɛ pɩpɔzɩ se peyele nɛ fenasɩ sakɩyɛ yaa pɩnaɣ ɖɛɛ nɛ pɩsa nɛ ɛwɩlɩ se ekpiɖi ɛ-kɩwɛɛkɩm yɔɔ toovenim. Halɩ alɩwaatʋ ndʋ peyeki se tɩɖɛɛ yɔ, tɩpɩzɩɣ nɛ tɩcɛzɩ mbʋ. Ɛzʋtʋyaa mʋʋ takayaɣ ŋga ɛmawa se papɩsɩnɩ-ɩ ɛgbɛyɛ taa yɔ lɛ, pɩwɛɛ se kɔɔmiite ŋgʋ kɩkaɣ sɛtʋ tɔm se papɩsɩnɩ-ɩ yɔ kɩkatɩ-ɩ. Kɔɔmiite ŋgʋ kɩtazɩɣ nɛ kɩna se ‘ɛlabɩ tʋma wena awɩlɩɣ se ekpiɖi ɛ-kɩwɛɛkɩm yɔɔ yɔ,’ nɛ kɩkpaɣ lɩmaɣzɩyɛ se kɩpɩsɩɣnɩ-ɩ ɛgbɛyɛ taa yaa kiyeki nɛ alɩwaatʋ tasɩ ɖɛʋ pazɩ nɛ pʋcɔ.—Tʋma 26:20.

³⁵ Weyi ɛpɔzʋʋ se papɩsɩnɩ-ɩ ɛgbɛyɛ taa yɔ, ye ɛgbɛyɛ lɛɛɖɛ naɖɩyɛ taa paalɩzɩ-ɩ yɔ, pɩpɔzʋʋ se pala kɔɔmiite nakʋyʋ ɛgbɛyɛ kɩfaɖɛ taa nɛ kɩtazɩ ɛ-tɔm taa. Ye kɔɔmiite ŋgʋ, kɩmaɣzɩɣ se pɩpɔzʋʋ se papɩsɩnɩ-ɩ ɛgbɛyɛ taa yɔ, kɩyaɣ ɛgbɛyɛ kɩbɩnɖɛ taa ɛzʋtʋyaa nɛ kiheyi-wɛ ndʋ kɩmaɣzɩɣ yɔ. Pɩpɔzʋʋ se ɛgbɛyɛ kɩfaɖɛ taa kɔɔmiite nɛ ɛgbɛyɛ kɩbɩnɖɛ taa kɔɔmiite pala tʋmɩyɛ nɔɔ kʋɖʋmaɣ taa, nɛ pɩsa nɛ patazɩ tɔm taa camɩyɛ nɛ pakpaɣ llɩmaɣzɩyɛ nɖɩ ɖɩmʋnaa yɔ. Ɛlɛ ɛgbɛyɛ kɩbɩnɖɛ taa kɔɔmiite pɩpɔzʋʋ se kɩsɛtɩ tɔm taa se pɩwɛɛ se papɩsɩnɩ ɛyʋ ɛnʋ ɛgbɛyɛ taa yaa pataapɩsɩnɩ-ɩ.

ƐGBƐYƐ TAA ƐYAA PƖSƖNƲƲ TƆM SUSUU

³⁶ Ye kɔɔmiite ŋgʋ kɩkaɣ kpaɣʋ lɩmaɣzɩyɛ se papɩsɩnɩ-ɩ yɔ, kɩtazɩ tɔm taa nɛ kɩna se ekpiɖi ɛ-kɩwɛɛkɩm yɔɔ toovenim nɛ pɩpɔzʋʋ se papɩsɩnɩ-ɩ yɔ, pɩwɛɛ se posusi tɔm ndʋ ɛgbɛyɛ nɖɩ ɖɩ-taa paacalɩ cɔnʋʋ ɛ-tɔm ɖeɖe yɔ ɖɩ-taa. Ye ɛwɛ ɛgbɛyɛ lɛɛɖɛ taa lɛɛlɛɛyɔ yɔ, pɩwɛɛ se posusi tɔm ndʋ ɛgbɛyɛ nɖɩ ɖɩ-taa ɖɔɖɔ. Posusuu kɛlɛʋ yem se: “Papɩsɩnɩ [ɛyʋ ɛnʋ ɛ-hɩɖɛ] Yehowa Aseɣɖe Tɩnaa hɛkʋ taa.”

YE PƖƔA ŊGA PAMƖYƖSƖ-KƐ LƖM YƆ KALABƖ KƖWƐƐKƖM YƆ

³⁷ Ye pɩɣa ŋga pamɩyɩsɩ-kɛ lɩm yɔ, kalabɩ kɩwɛɛkɩm sɔsɔm nabʋyʋ yɔ, pɩpɔzʋʋ se patanɩ tɔm ndʋ ɛzʋtʋyaa. Alɩwaatʋ ndʋ ɛzʋtʋyaa cɔŋnɩ kɩwɛɛkɩm sɔsɔm mbʋ pi-ɖeɖe yɔ, pɩkɩlɩɣ ɖeu se ka-lʋlɩyaa mba pamɩyɩsɩ-wɛ lɩm yɔ, pɛwɛɛ peeɖe. Pɩkɛdɩɣnɩ-wɛ se paɖʋ nesi tɔm hʋʋ kɔɔmiite, nɛ pʋyɔɔ lɛ paakaɣ ñaɣʋ pana se pohuuzi pa-pɩɣa yɔɔ se pataahɔ ka-nɩŋgbaaŋ ɛzɩ pɩpɔzʋʋ yɔ. Ɛzɩ pɩwɛʋ ɛyaa sɔsaa mba palabɩ kɩwɛɛkɩm sɔsɔm yɔ pɔ-hɔɔlʋʋ taa yɔ, tɔm hʋʋ kɔɔmiite hɔŋ pɩɣa ŋga ka-nɩŋgbaaŋ nɛ kɩsɩnɩ-kɛ se kɔñɔɔzɩ ke-fezuu taa wɛtʋ. Ɛlɛ ye kekizaa se kaakpiɖiɣ ka-kɩwɛɛkɩm yɔɔ yɔ, palɩzɩɣ-kɛ ɛgbɛyɛ taa.

YE TƆM SUSUYAA MBA PATƖMƖYƖSƖTƖ-WƐ LƖM YƆ PALABƖ KƖWƐƐKƖM YƆ

³⁸ Ye tɔm susuyaa mba patɩmɩyɩsɩtɩ-wɛ lɩm yɔ, palabɩ kɩwɛɛkɩm sɔsɔm nabʋyʋ yɔ, ɛbɛ pɩwɛɛ se pala? Paapɩzɩɣ nɛ palɩzɩ-wɛ ɛgbɛyɛ taa, mbʋ pʋyɔɔ yɔ patɩmɩyɩsɩtɩ-wɛ lɩm. Ɛlɛ pɩtɩla, patɩtɩɩnɩtɩ Bibl paɣtʋ taa camɩyɛ kpayɩ kpayɩ, nɛ pʋyɔɔ lɛ pɩpɔzʋʋ se patasɩ-wɛ lɔŋ kɩbaŋ se pɩsa nɛ pɔɖɔ “nʋmɔŋ weyi ɩtʋʋzaa yɔ” ɩ-taa.—Ebr. 12:13.

³⁹ Ye tɔm susuyu weyi patɩmɩyɩsɩtɩ-ɩ lɩm yɔ, ɛlabɩ kɩwɛɛkɩm sɔsɔm nabʋyʋ nɛ ɛgbɛyɛ taa ɛzʋtʋyaa naalɛ ñaɣ pana se pasɩnɩ-ɩ, ɛlɛ ekizi se eekpiɖiɣ ɛ-kɩwɛɛkɩm yɔɔ yɔ, pɩpɔzʋʋ se peyele nɛ ɛgbɛyɛ tɩlɩ tɔm ndʋ. Pɩwɛɛ se posusi se: “[Ɛyʋ ɛnʋ ɛ-hɩɖɛ] tɩtasɩ kɛʋ tɔm susuyu patɩmɩyɩsɩtɩ-m lɩm.” Pɩwɛɛ se ɛgbɛyɛ taa ñɩma lalaa ɩkpaɣ-ɩ se ɛkɛ ɛjaɖɛ yɔɔ tʋ. Paa patɩlɩzɩ kɩwɛɛkɩm laɖʋ ɛnʋ ɛgbɛyɛ taa yɔ, pɩpɔzʋʋ se koobiya ɩkpa pa-tɩ nɛ pataaɖʋ-ɩ nɛ taabalɩyɛ. (1 Kɔr. 15:33) Pɩfɛyɩ se petisi nɛ pamʋ ɛ-tɔm susuu akɔnta.

⁴⁰ Tɔm susuyu weyi patɩmɩyɩsɩtɩ-ɩ lɩm nɛ ɛla kɩwɛɛkɩm sɔsɔm nabʋyʋ nɛ pamʋ tɔm susuu waɖɛ ɛ-cɔlɔ yɔ, pɩtɩla pʋwayɩ lɛ, ɛkaɣ ñɩnʋʋ se ɛɖaɣnɩ pɩsʋʋ tɔm susuyu. Ye mbʋ, ɛzʋtʋyaa naalɛ katɩɣ-ɩ nɛ pana se ewobini ɛsɩndaa fezuu taa. Ye ɛmʋnaa yɔ, posusuu se: “[Ɛyʋ ɛnʋ ɛ-hɩɖɛ] ɖaɣnɩ pɩsʋʋ tɔm susuyu patɩmɩyɩsɩtɩ-m lɩm.”

YEHOWA WAZƖƔ LAŊHƐZƖYƐ NƐ KELE KELE SƐTƲ

⁴¹ Mba payɩ palabɩ nɔɔ kʋɖʋmaɣ nɛ Ɛsɔ ɛgbɛyɛ sɔnɔ yɔ, pɛwɛɛ nɛ pehikiɣ wazasɩ sakɩyɛ fezuu taa wɛtʋ kɩbandʋ ndʋ tɩwɛ Yehowa samaɣ taa yɔ, tɩ-yɔɔ. Ðɩwɛnɩ fezuu taa tɔɔnaɣ kɩbaŋa nɛ fezuu taa lɩm kiniɣdim sakɩyɛ. Yehowa kandɩyɩɣ ɖɔ-yɔɔ ɖɔɖɔ pɩtɩŋnɩ teokrasɩ ɖʋtʋ ndʋ ɛlaba nɛ Yesu ɖiyiɣ-ɖʋ yɔ, tɩ-yɔɔ. (Keɣa 22; Iza. 32:1, 2) Kɛdɛzaɣ kɩyakɩŋ weyi ɩ-taa ɖɩwɛɛ yɔ, wezuu caɣʋ wɛ kaɖɛ siŋŋ; paa mbʋ yɔ, ɖɩwɛ pɛɛyɛ taa siŋŋ, mbʋ pʋyɔɔ yɔ ɖɩwɛ fezuu taa paradisuu taa.

⁴² Ye ɖɩñakɩ pana se ɖɩkandɩyɩ ɛgbɛyɛ taa laŋhɛzɩyɛ nɛ kele kele wɛtʋ yɔɔ yɔ, piyeki nɛ Kewiyaɣ toovenim ñalɩmɩyɛ ñandɩ camɩyɛ. (Mat. 5:16; Yak. 3:18) Ɛsɔ kaɣ-ɖʋ sɩnʋʋ nɛ ɖihiɣ taa leleŋ mbʋ pʋyɔɔ yɔ, ɛyaa sakɩyɛ kaɣ kpɛlɩkʋʋ nɛ patɩlɩ Yehowa nɛ pɛkpɛndɩ ɖɔ-yɔɔ nɛ ɖa nɛ wɛ ɖɩla ɛ-sɔɔlɩm.