Ñɔɔnɩ Yehowa ɛgbɛyɛ kpam

TƆMKPƐLƖKƖYƲ Yakubu mawa se: “Ɩñɔtɩ mɩ-tɩ nɛ Ɛsɔ, nɛ ɛkaɣ-mɩ ñɔtɩnʋʋ.” (Yak. 4:8) Toovenim, Yehowa tɩkɩlɩ-ɖʋ posinuu nɛ paa ɖɩtɩtalɩ pilim yɔ, ɛpɩzɩɣ nɛ ewelisini-ɖʋ. (Tʋma 17:27) Ɛzɩma ɖɩpɩzɩɣ nɛ ɖɩñɔtɩnɩ Ɛsɔ? Ðɩpɩzɩɣ nɛ ɖɩñɔtɩnɩ-ɩ ye ɖɩtɩmɩɣnɩ ɖa-laŋɩyɛ pilim se pɩsa nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa yɔ. (Keɣa 38:13) Taabalɩyɛ kɩbanɖɛ pɩzɩɣ ɖɔɖɔ nɛ ɖɩwɛɛ ɖa nɛ Yehowa ɖɛ-hɛkʋ taa, ye ɖɩkpɛlɩkɩɣ Bibl yɔ. Ye ɖɩkpɛlɩkɩɣ Bibl yɔ, pɩsɩɣnɩ-ɖʋ nɛ ɖɩtɩlɩ Yehowa, ɛ-kaɖʋsɩ nɛ lɩmaɣza wena ɛwɛnɩ ɖɔ-yɔɔ yɔ. (2 Tim. 3:16, 17) Piyeki nɛ ɖɩsɔɔlɩ-ɩ nɛ ɖɩwɛɛnɩ ñamtʋ ndʋ tɩmʋnaa yɔ ɛ-yɔɔ, nɛ pɩsa nɛ ɖɩtaala mbʋ ɛtɩsɔɔlɩ yɔ.—Keɣa 24:14.

² Ɛlɛ, pɩsa nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa lɛ, ɛ-Pɩyalʋ Yesu ɖeke yɔɔ ɖɩpɩzɩɣ nɛ ɖɩtɩŋna. (Yoh. 17:3; Roma 5:10) Ɛyʋ nɔɔyʋ ɛɛpɩzɩɣ nɛ ɛkpɛlɩkɩ-ɖʋ nɛ ɖɩtɩlɩ Yehowa lɩmaɣza ɛzɩ Yesu labʋ yɔ. Nɔɔ kʋɖʋmaɣ kaawɛ ɛ nɛ ɛ-Caa pɛ-hɛkʋ taa kpem, pʋyɔɔ ɛpɩzaa nɛ ɛyɔɔdɩ se: “Nɔɔyʋ ɛɛsɩŋ weyi Caa kɛnaa yɔ ye pɩtɩkɛ Pɩyalʋ nɛ weyi Pɩyalʋ sɔɔlaa se ekuli Caa yɔɔ nɛ ɛwɩlɩ-ɩ yɔ.” (Luka 10:22) Pʋyɔɔ lɛ, ye ɖɩkpɛlɩkɩɣ Evaŋgilimwaa se ɖɩtɩlɩ Yesu lɩmaɣza nɛ ɛ-lakasɩ yɔ, pɩwɩlɩɣ se ɖɩwɛɛ nɛ ɖɩkpɛlɩkɩɣ se ɖɩtɩlɩ ɖɔɖɔ Yehowa lɩmaɣza nɛ ɛ-lakasɩ. Kpɛlɩkʋʋ mbʋ, piyeki nɛ ɖɩñɔɔnɩ ɖɛ-Ɛsɔ kpam.

³ Ye ɖiluzuu ɖa-tɩ Ɛsɔ Pɩyalʋ tɛɛ yɔ, ɖɩkpɛlɩkɩɣ ɛzɩma ɖɩpɩzɩɣ nɛ ɖɩtɩŋnɩ ɛ-ɛgbɛyɛ nɖɩ ɖɩwɛ tɛtʋ yɔɔ yɔ ɖɩ-yɔɔ nɛ ɖɩñɔɔnɩ Yehowa kpam. Ɛgbɛyɛ nɖɩ ɖɩwɩlɩɣnɩ-ɖʋ Ɛsɔ sɔɔlɩm. Ɛzɩ pɔyɔɔdʋʋ Maatiyee 24:45-47 taa yɔ, Ñʋʋdʋ Yesu Krɩstʋ lɩzɩ “yom siɣsiɣ tʋ nɛ lɔŋsɩnɖʋ” se ɛhaɣ tɔɔnaɣ tisuu ɖɩɣa taa mba “alɩwaatʋ ndʋ tɩmʋnaa yɔ tɩ-yɔɔ.” Sɔnɔ, yom siɣsiɣ tʋ haɣ-ɖʋ fezuu taa tɔɔnasɩ sakɩyɛ. Pɩtɩŋnɩ yom ɛnʋ ɛ-yɔɔ lɛ, Yehowa tasɩɣ-ɖʋ lɔŋ se ɖɩkalɩɣ ɛ-Tɔm paa ɖooye, ɖiwoki kediɣzisi ɖoŋ ɖoŋ nɛ ɖɩwɛɛ kpekpeka “Kewiyaɣ tɔm kɩbandʋ” susuu taa. (Mat. 24:14; 28:19, 20; Yoz. 1:8; Keɣa 1:1-3) Paa yom siɣsiɣ tʋ ɛtɩtalɩ pilim yɔ, ɖɩnawa se Ɛsɔ ɖiyiɣni-i. Pɩwɛɛ se ɖɩñɔɔnɩ Yehowa ɛgbɛyɛ nɖɩ ɖɩwɛ tɛtʋ yɔɔ yɔ kpam nɛ pɩsa nɛ ɖiɖiyi-ɖʋ. Piyeki nɛ ɖɩñɔɔnɩ ɖɛ-Ɛsɔ Yehowa kpam nɛ ɖɩkpa ɖoŋ nɛ ɖɩlʋbɩnɩ kala wena ɖɩkatɩɣ yɔ.

MBƲ PƲYƆƆ KALA ÐƆ SAKƖYƐ YƆ

⁴ Pɩtɩla ŋwɛʋ toovenim taa yɔ, pɩlakɩ pɩnzɩ sakɩyɛ yɔ. Ye mbʋ yɔ, pɩtʋʋ fɛyɩ se ŋtɛm katʋʋ kala wena atakɩɣ ɛyʋ siɣsiɣ wɛtʋ yɔ. Ɛlɛ ye paa ŋsɩm Yehowa nɛ ŋla nɔɔ kʋɖʋmaɣ nɛ ɛ-samaɣ yɔ pitileɖi yɔ, ŋɖiɣzinaa ɖɔɖɔ se Sataŋ Eleeu kaɖɩɣnɩ mba payɩ poluzuu pa-tɩ Yehowa kewiyitu tɔɔʋ tɛɛ yɔ. (2 Tim. 3:12) Ye mbʋ, paa ŋpaɣzʋʋ katʋʋ kala yɔ, pileɖaa yaa pitileɖi yɔ, pɩfɛyɩ se sɔɔndʋ ɛkpa-ŋ yaa pitibi-ŋ yɔɔɔ. Yehowa labɩ tamaɣ se ɛkaɣ-ŋ wazʋʋ nɛ ɛsɩnɩ-ŋ nɛ ŋhiɣ wezuu cee wayɩ.—Ebr. 13:5, 6; Natʋ 2:10.

⁵ Ða-tɩŋa payɩ, ɖɩkaɣ katʋʋ kala Sataŋ ɛjaɖɛ kɛdɛzaɣ kɩyakɩŋ ɛnɛ ɩ-taa. Kpaɣnɩ alɩwaatʋ ndʋ pasɩ Ɛsɔ Kewiyaɣ 1914 yɔ, Sataŋ tɩtasɩ wɛnʋʋ waɖɛ se ɛkpa Yehowa cɔlɔ ɛsɔdaa. Pɛpɛɖɩ ɛ nɛ tiyiyaa kɩdɛkɛdaa tɛtʋ yɔɔ. Mbʋ yebina nɛ kañatʋ lakasɩ tɔyɩ ɛjaɖɛ yɔɔ nɛ panazɩɣ Yehowa samaɣ siŋŋ. Sataŋ pana ana, awɩlɩɣ se ɖɩwɛ kɛdɛzaɣ kɩyakɩŋ taa nɛ pɩkazɩ pazɩ ɛɛtasɩɣ ɖoŋ wɛnʋʋ ɛyaa yɔɔ.—Natʋ 12:1-12.

⁶ Wɛtʋ ndʋ tɩ-taa Sataŋ wɛɛ yɔ, tiyeba nɛ ɛkɔ pana siŋŋ mbʋ pʋyɔɔ yɔ, ɛnawa se alɩwaatʋ ndʋ tɩkazɩ-ɩ yɔ tɩtɩɖɔɔ. Ɛ nɛ ɛ-aleewaa pɛwɛɛ nɛ pañakɩ pana siŋŋ se pakaɖɩnɩ tɔm susuu tʋmɩyɛ, nɛ pɛwɛɛkɩ nɔɔ kʋɖʋmaɣ ŋga kɛwɛ Yehowa sɛyaa hɛkʋ taa yɔ. Mbʋ yebina nɛ ɖɩsʋʋ fezuu taa you nakʋyʋ taa. Bibl yɔɔdɩ you ŋgʋ kɩ-tɔm se: “Pɩtɩkɛ ɖa nɛ calɩm nɛ tomnaɣ ɖɩlʋkɩna, ɛlɛ ɖa nɛ kominawaa, ɖa nɛ ñʋndɩnaa, ɖa nɛ cɩkpɛndʋʋ kʋnɛ kɩ-tɛ ɛjaɖɛ ñʋndɩnaa, ɖa nɛ feziŋ kɩdɛkɛdɩŋ weyi ɩwɛ ɛsɔdaa yɔ ɖɩlʋkɩna.” Pɩsa nɛ ɖɩwɛɛ Yehowa hɔɔlʋʋ yɔɔ nɛ ɖɩwa you ŋgʋ lɛ, pɩfɛyɩ se ɖiyele nɛ pitibi-ɖʋ yɔɔɔ, ɛlɛ pɩwɛɛ se ɖɩlabɩnɩ fezuu taa you wondu tʋmɩyɛ camɩyɛ. Pɩsɩɣnɩ-ɖʋ nɛ ‘ɖɩpɩzɩ ɖɩɖɔkɩ kpam nɛ ɖɩkaɖɩnɩ Eleeu ajitu lakasɩ.’ (Efɛz. 6:10-17) Pɩsa nɛ ɖɩla mbʋ lɛ, pɩpɔzʋʋ se ɖɩwɛɛnɩ laŋɩyɛ ɖɔkʋʋ.

KPƐLƖKƖ LAŊƖYƐ ÐƆKƲƲ

⁷ Laŋɩyɛ ɖɔkʋʋ tɔbʋʋ lɛ se: “Ɛyʋ ɛɖɔkɩ kpam kʋñɔmɩŋ yaa kala taa.” Bibl taa lɛ, ye pɔtɔm se ɛyʋ ɛɖɔkɩ ɛ-laŋɩyɛ yɔ, pʋ-tɔbʋʋ lɛ se ɛñɔɔnɩ mbʋ pɩwɛ siɣsiɣ yɔ paa ɛwɛ kaɖɛ, nazɩm, takɩm nɛ mbʋ payɩ pɩpɩzɩɣ nɛ piyele nɛ pɩwɛɛ-ɩ kaɖɛ se ɛɖɔkɩ ɛ-cɩŋgɩlɩm wɛtʋ Ɛsɔ ɛsɩndaa yɔ, pɩ-taa yɔ. Pɩwɛɛ se Krɩstʋ ñɩma ɩkpɛlɩkɩ laŋɩyɛ ɖɔkʋʋ. Pɩpɩzɩɣ nɛ pɩkpaɣ alɩwaatʋ. Ye ɖɩkpazɩɣ ɖe-tisuu ɖoŋ yɔ, pɩsɩɣnɩ-ɖʋ nɛ ɖɩɖɔkɩ ɖa-tɩ kala taa. Ye ɖɩɖɔkʋʋ ɖa-tɩ takɩm cikpem mbʋ ɖɩkatɩɣ alɩwaatʋ ndʋ ɖɩpɩsɩɣ Krɩstʋ tʋ yɔ pɩ-taa yɔ, ɖɩkpaɣ ɖoŋ nɛ pɩsɩnɩ-ɖʋ nɛ ɖɩɖɔkɩ ɖa-tɩ kala sɔsɔna wena awɛnɩ ɛsɩndaa yɔ, a-taa. (Luka 16:10) Pɩfɛyɩ se ɖɩɖaŋ se kala sɔsɔna ɩkɔɔ ɖɔ-yɔɔ pʋcɔ nɛ ɖɩtɛ ɖa-taa se ɖɩkpazɩɣ ɖe-tisuu ɖoŋ. Pɩwɛɛ se ɖɩsɛtɩ ɖa-tɩ tɔm pʋcɔ nɛ kala ana akɔɔ ɖɔ-yɔɔ. Apostoloo Pɩyɛɛrɩ yɔɔdaɣ se pɩwɛɛ se ɖɩkpɛlɩkɩ tɩ ɖɔkʋʋ nɛ wɛtʋ kɩbandʋ lɛɛtʋ lɛ, ɛsɔzaa se: “Ɩñaɣ pana siŋŋ nɛ ɩsɔzɩ mi-tisuu yɔɔ wɛtʋ kɩbandʋ, mɩ-wɛtʋ kɩbandʋ yɔɔ sɩmtʋ, mɩ-sɩmtʋ yɔɔ tɩ ɖɔkʋʋ, mɩ-tɩ ɖɔkʋʋ yɔɔ laŋɩyɛ ɖɔkʋʋ, mɩ-laŋɩyɛ ɖɔkʋʋ yɔɔ Ɛsɔ ñɔnʋʋ, mɩ-Ɛsɔ ñɔnʋʋ yɔɔ koobiye sɔɔlɩm, mi-koobiye sɔɔlɩm yɔɔ sɔɔlɩm.”—2 Pɩy. 1:5-7; 1 Tim. 6:11.

⁸ Yakubu hɔm ɖa-lɩmaɣza nɛ ewoni mbʋ pʋyɔɔ pɩcɛyaa se ɖɩkpɛlɩkɩ laŋɩyɛ ɖɔkʋʋ yɔ, pɩ-yɔɔ ɛ-takayaɣ taa nɛ ɛyɔɔdɩ se: “Mon-koobiya, alɩwaatʋ ndʋ ɩkatɩɣ takɩm ndɩ ndɩ yɔ, ɩkpaɣ-pʋ se pɩkɛ taa leleŋ sɔsɔŋ, mbʋ pʋyɔɔ yɔ ɩsɩm mbʋ se mi-tisuu mbʋ pɩtakɩ-pʋ mbʋ yɔ, pɩkɔŋnɩ laŋɩyɛ ɖɔkʋʋ. Ɛlɛ iyele nɛ laŋɩyɛ ɖɔkʋʋ tɛzɩ pɩ-tʋmɩyɛ labʋ, se pɩsa nɛ ɩwɛɛ pilim nɛ ɩtaawɛɛnɩ kɩwɛɛkɩtʋ natʋyʋ hɔɔlʋʋ nakʋyʋ taa, nɛ nabʋyʋ ɛtaatɛɖɩ-mɩ.” (Yak. 1:2-4) Yakubu yɔɔdaa se pɩwɛɛ se Krɩstʋ ñɩma taa ɛla leleŋ alɩwaatʋ ndʋ pakatɩɣ kala yɔ, mbʋ pʋyɔɔ yɔ, pɩsɩɣnɩ-wɛ se pɛwɛɛnɩ laŋɩyɛ ɖɔkʋʋ. Lɩmaɣza ana ŋwɛnɩ kala yɔɔ? Pʋwayɩ, Yakubu wɩlaa se laŋɩyɛ ɖɔkʋʋ ñɔɔzʋʋ-ɖʋ nɛ pɩsɩɣnɩ-ɖʋ se ɖɩwɛɛnɩ Krɩstʋ ñɩma wɛtʋ ndʋ tiyeki se ɖɔ-tɔm ɛkɛdɩnɩ Ɛsɔ nɛ pɩkɩlɩ yɔ. Toovenim taa lɛ, ɖɩɖɔkʋʋ ɖa-tɩ kala wena ɖɩkatɩɣ paa ɖooye yɔ a-taa, nɛ piyeki se ɖɩhayɩsɩ ɖa-tɩ nɛ ɖɩwɛɛnɩ laŋɩyɛ ɖɔkʋʋ. Laŋɩyɛ ɖɔkʋʋ yeki se ɖɩwɛɛnɩ wɛtʋ kɩbandʋ lɛɛtʋ ndʋ pɩpɔzʋʋ-ɖʋ yɔ.

⁹ Ɛzɩma ɖɩɖɔkʋʋ ɖa-laŋɩyɛ yɔ, pɩkɛdɩɣnɩ Yehowa, nɛ piyeki se ɛha-ɖʋ wezuu maatɛŋ. Yakubu tasɩ yɔɔdʋʋ se: “Koboyaɣ tʋ lɛ ɛyʋ weyi ɛɖɔkʋʋ ɛ-laŋɩyɛ takɩm taa yɔ, mbʋ pʋyɔɔ yɔ ɛpɩsɩɣ weyi ɛ-tɔm kɛdɩɣnɩ Ɛsɔ yɔ lɛ, ɛkaɣ mʋʋ wezuu wabɩtʋ hulaɣ ŋga Yehowa yɔɔdaa se ɛhaɣ mba powoki pɩ-yɔɔ nɛ pɔsɔɔlʋʋ-ɩ yɔ.” (Yak. 1:12) Pɩkɛ toovenim se ɖɩɖɔkʋʋ ɖa-laŋɩyɛ se ɖihiɣ wezuu. Ye ɖɩfɛyɩnɩ laŋɩyɛ ɖɔkʋʋ yɔ, ɖɩɩpɩzɩɣ nɛ ɖɩwɛɛ toovenim taa. Ye ɖɩtɩɖɔkɩ ɖa-tɩ takɩm mbʋ ɖɩkatɩɣ ɛjaɖɛ yɔɔ yɔ pɩ-taa yɔ, piyeki nɛ ɖɩpɩsɩ nɛ ɖɩpaɣzɩ labʋ ɛjaɖɛ yɔɔ lakasɩ. Ye ɖɩfɛyɩnɩ laŋɩyɛ ɖɔkʋʋ yɔ, ɖɩɩpɩzɩɣ nɛ ɖɩwɛɛnɩ Yehowa fezuu kiɖeɖeu nɛ ɖɩɩpɩzɩɣ nɛ ɖɩlʋlɩ ki-piye ɖe-wezuu caɣʋ taa.

¹⁰ Ye ɖɩsɔɔlaa se ɖɩɖɔkɩ ɖa-laŋɩyɛ kaɖɛ alɩwaatʋ tʋnɛ tɩ-taa yɔ, pɩpɔzʋʋ se ɖɩwɛɛnɩ lɩmaɣza kɩbana kala wena Krɩstʋ ñɩma katɩɣ yɔ a-yɔɔ. Tɔzɩ se Yakubu mawa se: “Ɩkpaɣ-pʋ se pɩkɛ taa leleŋ sɔsɔŋ.” Pɩfɛyɩ kɛlɛʋ mbʋ pʋyɔɔ yɔ, pɩpɩzɩɣ nɛ pɩkɔnɩ-ɖʋ kʋñɔŋ tomnaɣ yɔɔ nɛ pɩha-ɖʋ ɖɔɖɔ nɩɣzɛ. Ɛlɛ tɔzɩ se cee wayɩ kɩbaŋʋ ñɔtɩ kpam. Kala wena apostoloowaa kaakataa yɔ, asɩɣnɩ-ɖʋ nɛ ɖɩna ɛzɩma ɖa-taa pɩzɩɣ nɛ pɩla leleŋ alɩwaatʋ ndʋ ɖɩɖɔkʋʋ ɖa-laŋɩyɛ kala taa yɔ. Pama tɔm ndʋ Tʋma Labʋ takayaɣ taa, nɛ ɖɩkalɩɣ peeɖe se: “Payaa apostoloowaa, nɛ pamabɩ-wɛ, nɛ paɖʋ-wɛ paɣtʋ se pataatasɩ yɔɔdʋʋ Yesu hɩɖɛ taa, nɛ peyebi-wɛ nɛ pɛɖɛɛ. Nɛ palɩɩ Sahedrɛɛ taa mba ɛsɩndaa, nɛ pɛmɛyɩɣ mbʋ pʋyɔɔ yɔ pakpaɣ-wɛ se pamʋnaa se paɖʋ-wɛ fɛyɛ Yesu hɩɖɛ yɔɔ.” (Tʋma 5:40, 41) Apostoloowaa nɩ pɩ-taa se kʋñɔŋ ŋgʋ pɔtɔwaa yɔ, kɩwɩlɩɣ se pañam paɣtʋ ndʋ Yesu ɖʋ-wɛ yɔ, nɛ pɔ-tɔm kɛdɩnɩ Yehowa. Pɩnzɩ sakɩyɛ wayɩ, Pɩyɛɛrɩ maɣaɣ ɛ-kajalaɣ takayaɣ lɛ, ɛyɔɔdɩ pee kɩbana wena toovenim tɔm yɔɔ kʋñɔŋ tɔɔʋ lʋlʋʋ yɔ a-tɔm.—1 Pɩy. 4:12-16.

¹¹ Pɔɔlɩ nɛ Silaasɩ ɖɔɖɔ paalabɩ kʋñɔŋ. Paakɛ Ɛsɔtɔm tiyiyaa nɛ pɔɖɔm nʋmɔʋ nɛ patalɩ Filiipi tɛtʋ taa lɛ, pakpa-wɛ nɛ pɔtɔŋ se posusuu tɔm ndʋ tɩkaɖɩɣnɩ pɔ-sɔnzɩ yɔ. Pʋyɔɔ pamabɩ-wɛ siŋŋ nɛ pɔtɔ-wɛ salaka. Bibl kɛdaa se alɩwaatʋ ndʋ paawɛ salaka taa yɔ, pɔ-yɔɔ kaawɛ heŋ nɛ “pɩkɔm nɛ pɩtalɩ ɖoo hɛkʋ taa mbʋ yɔ lɛ, Pɔɔlɩ nɛ Silaasɩ pɛwɛɛ nɛ patɩmɩɣ nɛ peteɣ hendu nɛ pasaŋnɩ Ɛsɔ, nɛ salaka tɩnaa wɛɛ nɛ pewelisiɣni-wɛ.” (Tʋma 16:16-25) Pɔɔlɩ nɛ ɛ-taabalʋ panawa se kʋñɔŋ ŋgʋ pɔtɔɔ Krɩstʋ yɔɔ yɔ, kɩwɩlɩɣ ɛyaa se pɛwɛ siɣsiɣ Ɛsɔ ɛsɩndaa, nɛ pɩkɛnɩ-wɛ ɖɔɖɔ waɖɛ nɖɩ ɖɩ-yɔɔ papɩzɩɣ patɩŋna se palɩzɩ aseɣɖe laŋa kɩbana tɩnaa mba pakaɣ welisuu tɔm kɩbandʋ yɔ. Pitukaɣni lalaa wezuu ɖɔɖɔ. Ðoo kʋɖʋma ana a-taa, salaka yɔɔ cɔnɩyʋ nɛ ɛ-hɔʋ pewelisaa nɛ papɩsɩ tɔmkpɛlɩkɩyaa. (Tʋma 16:26-34) Pɔɔlɩ nɛ Silaasɩ pataɣaɣ Yehowa nɛ e-ɖoŋ liu, nɛ paanawa se ɛsɔɔlaa se ɛsɩnɩ-wɛ nɛ palɩɩ pa-kʋñɔmɩŋ taa. Nɛ pe-lidaʋ tɩɖʋ lɩm.

¹² Sɔnɔ ɖɔɖɔ, Yehowa ha-ɖʋ mbʋ payɩ pɩpɩzɩɣ nɛ pɩsɩnɩ-ɖʋ kala alɩwaatʋ taa yɔ. Ɛsɔɔlaa se ɖɩwɛɛnɩ laŋɩyɛ ɖɔkʋʋ. Ɛtɩŋɩɣnɩ ɛ-Tɔm ndʋ fezuu kiɖeɖeu sɩnaa nɛ pama yɔ tɩ-yɔɔ se ɛsɩnɩ-ɖʋ nɛ ɖɩtɩlɩ ɛ-sɔɔlɩm. Pɩkpazɩɣ ɖe-tisuu ɖoŋ. Ðɩwɛnɩ waɖɛ se ɖa nɛ ɖo-koobiya ɖɩla nɔɔ kʋɖʋmaɣ nɛ ɖɩla fezuu taa tʋma. Ðɩwɛnɩ waɖɛ ɖɔɖɔ se ɖɩtɩŋnɩ adɩma yɔɔ nɛ taabalɩyɛ kɩbanɖɛ wɛɛ ɖa nɛ Yehowa ɖɛ-hɛkʋ taa. Ewelisiɣ samtʋ ndʋ ɖɩhaɣ-ɩ nɛ ɛzɩma ɖɩtɩmɩɣnɩ-ɩ se ɛsɩnɩ-ɖʋ nɛ ɖɩwɛɛ kele kele ɛ-ɛsɩndaa yɔ. (Fil. 4:13) Nɛ ɖɩtaasɔɔ ɖɔɖɔ ɖoŋ weyi ɖihikiɣ alɩwaatʋ ndʋ ɖɩmaɣzɩɣ cee wayɩ tamaɣ ŋga ɖɩwɛna yɔ kɔ-yɔɔ yɔ.—Mat. 24:13; Ebr. 6:18; Natʋ 21:1-4.

LƲBƖNƖ KALA NDƖ NDƖ

¹³ Kala wena ɖɩkatɩɣ sɔnɔ yɔ, a-taa sakɩyɛ wɛ ɛzɩ kala wena Yesu Krɩstʋ tɔmkpɛlɩkɩyaa kajalaɣ ñɩma kaakataa yɔ. Ða-alɩwaatʋ tʋnɛ tɩ-taa, ɛyaa nabɛyɛ tʋʋ Yehowa Aseɣɖe Tɩnaa nɛ pawɩlɩɣ-wɛ ñaŋ, mbʋ pʋyɔɔ yɔ nabɛyɛ heyiɣ-wɛ cɛtɩm tɔm pɔ-yɔɔ. Mbʋ ɖɔɖɔ cɛtɩm Ɛsɔ sɛtʋ taa ɛyaa nazaɣ apostoloowaa, mbʋ pʋyɔɔ yɔ pawɩlaɣ Ɛsɔtɔm kpayɩ kpayɩ nɛ pokuluu pɛ-cɛtɩm wɩlɩtʋ nɛ pa-lakasɩ kɩdɛkɛdɩsɩ yɔɔ. (Tʋma 17:5-9, 13) Nabʋyʋ taa, Yehowa samaɣ tɩŋɩɣnɩ paɣtʋ ndʋ kominawaa ɖʋwa se tɩkandɩyɩ ɛyaa yɔɔ yɔ, tɩ-yɔɔ nɛ pakandɩyɩɣ pa-tɩ yɔɔ. (Tʋma 22:25; 25:11) Ɛlɛ nabʋyʋ taa ɖɔɖɔ lɛ, kominawaa ɖʋʋ paɣtʋ se paɖɩɣ-ɖʋ nʋmɔʋ se ɖɩtaala tʋma wena Krɩstʋ ɖʋ-ɖʋ yɔ. (Keɣa 2:1-3) Wɛtʋ ndʋ tɩ-taa lɛ, ɖɩmaɣzɩɣnɩ kɩɖaʋ ŋgʋ apostoloowaa hawa yɔ. Panazaɣ-wɛ lɛ, pɔyɔɔdaa se: “Ɛsɔ pɩwɛɛ se ɖɩña ɛzɩ ɖa-ñʋʋdʋ yɔ, pɩtɩkɛ ɛyaa.”—Tʋma 5:29.

¹⁴ Ɛyaa sakɩyɛ lɩmaɣza wɛɛ se palʋ pa-ajɛɛ yɔɔ, piyeba nɛ panazɩɣ mba Ɛsɔ ɖʋ-wɛ tʋmɩyɛ se posusi tɔm kɩbandʋ yɔ siŋŋ, se pɩsa nɛ peyele tʋmɩyɛ nɖɩ. Ɛsɔ sɛyaa tɩŋa taa lakɩ leleŋ nɛ tɔm ndʋ tɩwɛ Natʋ 14:9-12 taa nɛ tɩpakɩ ɛyaa se pakpa pa-tɩ nɛ “tɛtɛgbɩnɛ nɛ ɖɩ-sɩʋ kpeliɣa” sɛtʋ yɔ. Ðɩnɩɣ Yohanɛɛsɩ tɔm tʋnɛ tɩ-tɔbʋʋ: “Cɩnɛ pɩpɔzʋʋ ɛyaa kiɖeɖema laŋɩyɛ ɖɔkʋʋ, mba pɔɖɔŋ Ɛsɔ paɣtʋ yɔɔ nɛ pɔñɔʋnɩ Yesu tisuu kpam yɔ.”

¹⁵ Yoŋ, ñam ñam lakasɩ, nazɩm, komina paɣtʋ ndʋ tɩɖɩkɩ-ɖʋ nʋmɔʋ se ɖɩtaala ɖɛ-Ɛsɔ sɛtʋ tʋma nɛ wɛtʋ lɛɛtʋ pɩzɩɣ tiyele nɛ pɩwɛ-ŋ kaɖɛ se ŋla Krɩstʋ tʋma ɛzɩ pɩpɔzʋʋ yɔ. Pɩpɩzɩɣ nɛ pɩwɛɛ kaɖɛ se ɛgbɛyɛ kpeekpe ekpeɣli. Pɩpɩzɩɣ nɛ pɩwɛɛ kaɖɛ ɛgbɛyɛ se ɖɩyɔɔdʋʋnɩ ɛgbɛyɛ piliŋa nɛ ɖɩmʋʋ lɔŋ tasʋʋ kɔ-cɔlɔ. Pɩpɩzɩɣ nɛ pɩwɛɛ kaɖɛ ɖɔɖɔ se egeetiye yɔɔ cɔnɩyʋ ekilimiɣ mɩ-yɔɔ. Pʋtɔma, ɩɩmʋʋ ɛgbɛyɛ takayɩsɩ. Ye ɩkatɩ wɛtʋ tʋnɛ tɩ-taa natʋyʋ yɔ, ɛbɛ pɩwɛɛ se ɩla?

¹⁶ Tɔm cosuu yɔ: Wɛtʋ ndʋ tɩ-taa ŋwɛɛ yɔ, la mbʋ payɩ tɩhaɣ-ŋ nʋmɔʋ se ŋla yɔ. Ŋpɩzɩɣ nɛ ŋkpɛlɩkɩ ña-tɩ yɔɔ. Koobiya pɩzɩɣ nɛ pekpeɣliɣ cabɩ cabɩ ɖɩsɩ taa nɛ pɛkpɛlɩkɩɣ. Alɩwaatʋ ndʋ ɩlakɩ kediɣzisi yɔ, ɩpɩzɩɣ nɛ ɩlabɩnɩ tʋmɩyɛ takayɩsɩ nzɩ ɖɩɩkpɛlɩkaa nɛ pɩɖɛɛ yɔ nɛ Bibl. Sɔɔndʋ ɛtaakpa-mɩ, nɛ ɩtaakɩlɩ nɩɣzʋʋ. Ðoŋ ɖoŋ lɛ, ye pɩlakɩ yɔ, Nɔɔɖɛyaa Ɛgbɛyɛ tɩŋɩɣnɩ nʋmɔŋ nɩɩyɩ yɔɔ nɛ ɖɩyɔɔdʋʋnɩ koobiya mba pɔcɔŋnɩ ɛgbɛyɛ yɔɔ yɔ.

¹⁷ Paa wɛtʋ ndʋ tɩ-taa ŋwɛɛ yɔ, tiyeba nɛ ŋposini ño-koobiya Krɩstʋ ñɩma yɔ, taasɔɔ se ŋtiposini Yehowa nɛ ɛ-Pɩyalʋ Yesu Krɩstʋ. Ŋpɩzɩɣ nɛ ŋkpazɩ ñe-lidaʋ ɖoŋ. Yehowa pɩzɩɣ ewolo pɩ-yɔɔ nɛ ewelisiɣ ña-adɩma nɛ ɛtɩŋɩɣnɩ e-fezuu yɔɔ nɛ ɛkpazɩɣ-ŋ ɖoŋ. Ñɩnɩ ɛ-lɔŋ tasʋʋ. Tɔzɩ se ŋkɛ Yehowa sɛyʋ nɛ Yesu Krɩstʋ tɔmkpɛlɩkɩyʋ. Pʋyɔɔ lɛ, tɩŋnɩ nʋmɔŋ ndɩ ndɩ yɔɔ nɛ ŋlɩzɩ aseɣɖe. Yehowa kaɣ wazʋʋ ña-pana ñaɣʋ nɛ pɩtɩla piileɖiɣ lɛ, lalaa kɔŋ nɛ pɛkpɛndɩ ñɔ-yɔɔ toovenim Ɛsɔ sɛtʋ taa.—Tʋma 4:13-31; 5:27-42; Fil. 1:27-30; 4:6, 7; 2 Tim. 4:16-18.

¹⁸ Paa panazɩɣ-ŋ nɛ peheyiɣ-ŋ se pakaɣ-ŋ kʋʋ ɛzɩ paalabʋ apostoloowaa nɛ lalaa yɔ, taa liu “Ɛsɔ weyi efeziɣ sɩɖaa yɔ.” (2 Kɔr. 1:8-10) Tisuu mbʋ ŋwɛnɩ sɩɖaa fezuu lidaʋ ŋgʋ ɛha-ɖʋ yɔ kɩ-yɔɔ yɔ, pɩsɩɣnɩ-ŋ nɛ ŋɖɔkɩ kpam, halɩ pɩkpɛndɩnɩ nazɩm sɔsɔm taa. (Luka 21:19) Yesu Krɩstʋ ha-ɖʋ kɩɖaʋ kɩbaŋʋ hɔɔlʋʋ kʋnɛ kɩ-taa. Ɛnawa se ye ɛɖɔkɩ e-siɣsiɣ wɛtʋ takɩm taa yɔ, pɩkpazɩɣ lalaa ɖoŋ nɛ paba ɖɔɖɔ pala mbʋ. Ña ɖɔɖɔ, ŋpɩzɩɣ nɛ ŋtɩŋnɩ nʋmɔʋ ŋgʋ kɩ-yɔɔ nɛ ŋkpazɩ ño-koobiya ɖoŋ.—Yoh. 16:33; Ebr. 12:2, 3; 1 Pɩy. 2:21.

¹⁹ Pɩtasɩnɩ takɩm nɛ nazɩm lɛ, pɩtɩla pɩpɔzʋʋ se ŋɖɔkɩ ña-tɩ kaɖɛ wɛtʋ lɛɛtʋ taa. Pitibi koobiya nabɛyɛ yɔɔɔ mbʋ pʋyɔɔ yɔ, po-kookasɩ taa ɛyaa paa fɛyɩnɩ tɔm ndʋ posusuu yɔ. Lalaa lɛ, pɩwɛɛ se palʋbɩnɩ tomnaɣ yɔɔ yaa lɩmaɣza taa kʋdɔŋ nakʋyʋ, yaa ɛjandʋ lɛɛtʋ ndʋ tɩlɩnɩ mantɩtalɩ pilim wɛtʋ cɔlɔ yɔ. Ðɩkpaɣ ɛzɩ apostoloo Pɔɔlɩ mbʋ yɔ, pɩɩwɛ se ɛlʋbɩnɩ wɛtʋ ndʋ tɩkaɖaɣnɩ ɛ-tɔm susuu tʋmɩyɛ yaa wɛtʋ ndʋ tiyekaɣ se nabʋyʋ taa pɩwɛɛ-ɩ kaɖɛ se ɛla tʋmɩyɛ nɖɩ yɔ. (2 Kɔr. 12:7) Pɩtasɩ lɛ, kajalaɣ pɩnzɩ mɩnʋʋ taa Krɩstʋ tʋ weyi ɛlɩnɩ Filiipi nɛ payaɣ-ɩ se Epafrodiiti yɔ, “ɛ-laŋɩyɛ wɛɛkaa mbʋ pʋyɔɔ yɔ [ɛ-taabalaa nɩwa] se pɩwɩ-ɩ.” (Fil. 2:25-27) Ða-maɣmaɣ ɖɛ-ɛjandʋ nɛ lalaa ñɩndʋ pɩzɩɣ nɛ tɩkɔnɩ-ɖʋ kaɖɛ nɖɩ ɖɩ-taa pɩpɔzʋʋ se ɖɩɖɔkɩ ɖa-laŋɩyɛ yɔ. Ðama kɩɩnɩnʋʋ pɩzɩɣ nɛ pɩkɔɔ Krɩstʋ ñɩma hɛkʋ taa, nɛ halɩ hɔʋ kʋɖʋmʋʋ taa ñɩma hɛkʋ taa ɖɔɖɔ. Ɛlɛ, mba pɔɖɔŋ Yehowa lɔŋ tasʋʋ yɔɔ yɔ, papɩzɩɣ nɛ pɔɖɔkɩ pa-tɩ nɛ pɔcɔnɩ tɔm ndʋ ti-ɖeɖe camɩyɛ.—Ezek. 2:3-5; 1 Kɔr. 9:27; 13:8; Kol. 3:12-14; 1 Pɩy. 4:8.

ÐƲ ÑA-TAA SE ŊÐƆKƲƲ ÑE-SIƔSIƔ WƐTƲ KPAM

²⁰ Pɩpɔzʋʋ se ɖɩñɔɔnɩ Yesu Krɩstʋ weyi Yehowa lɩzaa se ɛkɛ ɛgbɛyɛ Ñʋʋdʋ yɔ. (Kol. 2:18, 19) Pɩwɛɛ se ɖa nɛ “yom siɣsiɣ tʋ nɛ lɔŋsɩnɖʋ” nɛ koobiya lalaa mba palɩzaa se pɔcɔnɩ ɖɔ-yɔɔ yɔ, ɖɩla tʋmɩyɛ nɔɔ kʋɖʋmaɣ taa. (Ebr. 13:7, 17) Ye ɖɩñɔnɩ teokrasɩ ɖʋtʋ kpam nɛ ɖɩɖʋʋ nesi koobiya mba pɛɖɛɣ-ɖʋ nɔɔ yɔ, piyeki nɛ ɖɩñɔɔzɩ ɖa-tɩ nɛ ɖɩla Yehowa sɔɔlɩm camɩyɛ. Pɩcɛyaa se ɖɩlabɩnɩ tʋmɩyɛ adɩma labʋ waɖɛ camɩyɛ. Taasɔɔ se paa ŋwɛ salaka taa yaa paɖɩɣ ñe-ɖeke kuduyuu nakʋyʋ tɛɛ yɔ, pɩɩɖɩkɩ-ŋ nʋmɔʋ se ŋyɔɔdʋʋnɩ ɖa-Caa sɔɔlɩm tʋ weyi ɛwɛ ɛsɔdaa yɔ, nɛ pɩɩwɛɛkɩɣ ɖɔɖɔ nɔɔ kʋɖʋmaɣ ŋga kɛwɛ ña nɛ ño-koobiya mɩ-hɛkʋ taa yɔ.

²¹ Pɩwɛɛ se ɖɩɖʋ ɖa-taa se ɖɩɖɔkʋʋ ɖa-laŋɩyɛ nɛ ɖɩla mbʋ payɩ ɖɩpɩzɩɣ yɔ tɔm susuu tʋmɩyɛ taa, nɛ ɖɩla tʋmɩyɛ nɖɩ Yesu Krɩstʋ kaaɖʋʋ ɛ-wayɩ tɩŋɩyaa alɩwaatʋ ndʋ pefezi-i yɔ. Eheyi-wɛ se: “Pʋyɔɔ lɛ, iwolo nɛ ɩla ajɛɛ tɩŋa taa ɛyaa nɛ papɩsɩ tɔmkpɛlɩkɩyaa, ɩmɩyɩsɩ-wɛ lɩm Caa nɛ Pɩyalʋ nɛ fezuu kiɖeɖeu pa-hɩɖɛ taa, ɩwɩlɩ-wɛ nɛ pɔɖɔ tɔm ndʋ payɩ mawɩlɩ-mɩ yɔ tɩ-yɔɔ.” (Mat. 28:19, 20) Ðɩɖɔkɩ kpam ɛzɩ Yesu yɔ. Ðɩcɛyɩsɩ tisuu mbʋ ɖɩwɛnɩ Kewiyaɣ yɔɔ yɔ, nɛ ɖɩcɛyɩsɩ ɖɔɖɔ wezuu maatɛŋ lidaʋ ŋgʋ ɖɩwɛna yɔ. (Ebr. 12:2) Pamɩyɩsɩ-ɖʋ lɩm nɛ ɖɩkɛ Krɩstʋ tɔmkpɛlɩkɩyaa, pʋyɔɔ lɛ ɖɩwɛnɩ waɖɛ se ɖɩɖʋ nesi nɛ natʋ tɔm ndʋ Yesu kaayɔɔdaa pɩlɩɩnɩ “ɛjaɖɛ yɔɔ ɖʋtʋ tɛm alɩwaatʋ” yɔɔ yɔ tɩla. Ɛyɔɔdaa se: “Kewiyaɣ tɔm kɩbandʋ tʋnɛ, pakaɣ-tʋ susuu tɛtʋ kpeekpe yɔɔ se pɩkɛnɩ ajɛɛ kpeekpe aseɣɖe, nɛ ɖɩnɛ ɛlɛ ɛjaɖɛ tɛm kaɣ kɔm.” (Mat. 24:3, 14) Ye ɖɩñakɩ pana nɛ ɖɩlakɩ tʋmɩyɛ nɖɩ nɛ ɖa-laŋɩyɛ pilim alɩwaatʋ tʋnɛ tɩ-taa yɔ, ɖɩkaɣ hiɣu waɖɛ nɛ ɖɩcaɣ wezuu maatɛŋ Yehowa ɛjaɖɛ kɩfaɖɛ nɖɩ ɖɩ-taa siɣsiɣ wɛtʋ kaɣ wɛʋ yɔ!