Ɛbɛ pɩwɛɛ se ŋla nɛ ŋkɛ Ɛsɔ taabalʋ?

1, 2. Yaa Yehowa taabalaa nabɛyɛ hɩla.

ANƖ ŋsɔɔlaa se ɛkɛ ña-taabalʋ? Pɩtʋʋ fɛyɩ se weyi ɛ-tɔm kɛdɩnɩ-ŋ yɔ. Weyi ña nɛ ɩ ɩnɩɣnɩ ɖama camɩyɛ yɔ. Weyi ɛwɛnɩ ɛyʋtʋ kɩbandʋ nɛ ɛ-lakasɩ kɛdɩɣnɩ-ŋ yɔ.

² Yehowa Ɛsɔ lɩzɩɣ ɛyaa nabɛyɛ se pɛkɛ ɛ-taabalaa. Bibl heyiɣ-ɖʋ se Abraham kaakɛ Ɛsɔ taabalʋ. (Izaayii 41:8; Yakubu 2:23) Yehowa kaasɔɔlɩ ɖɔɖɔ Daviid. Yehowa kaatɔm se Daviid kɛ ‘e-liu ɛyʋ.’ (Tʋma Labʋ 13:22) Danɩyɛɛlɩ kaakɛ ɖɔɖɔ ɛyʋ weyi Yehowa kaasɔɔlɩ-ɩ siŋŋ yɔ.​—Danɩyɛɛlɩ 9:23.

3. Ɛbɛ yɔɔ Yehowa kaalɩzɩ Abraham, Daviid nɛ Danɩyɛɛlɩ se pɛkɛ ɛ-taabalaa?

³ Ɛzɩma Abraham, Daviid nɛ Danɩyɛɛlɩ palaba nɛ papɩsɩ Yehowa taabalaa? Yehowa kaasɔɔlɩ Abraham ‘ɛ-ñamtʋ yɔɔ.’ (Kiɖe Tɛɛ Tɔm 22:18) Ɛyaa mba poluzuu pa-tɩ nɛ pañaŋ Yehowa yɔ, mba ɛlɩzɩɣ se pɛkɛ ɛ-taabalaa. Halɩ ɛjaɖɛ naɖɩyɛ taa ɛyaa tɩŋa pɩzɩɣ nɛ pɛkɛ ɛ-taabalaa. Yehowa kaaheyi Izrayɛɛlɩ samaɣ se: “Iwelisi mɔ-nɔɔ nɛ mɛnkɛ mɩ-Ɛsɔ nɛ ɩkɛ man-samaɣ.” (Yereemii 7:23) Ye mbʋ, ña ɖɔɖɔ ye ŋsɔɔlaa se Yehowa ɛlɩzɩ-ŋ nɛ ŋkɛ ɛ-taabalʋ yɔ, pɩwɛɛ se ŋña ɛ-paɣtʋ.

YEHOWA HUUZUU Ɛ-TAABALAA YƆƆ

4, 5. Ɛzɩma Yehowa huuzuu ɛ-taabalaa yɔɔ?

⁴ Bibl heyiɣ-ɖʋ se Yehowa tɩŋɩɣnɩ nʋmɔŋ ndɩ ndɩ yɔɔ nɛ ɛhaɣ “ɖoŋ mba petisiɣ ɛ-yɔɔ nɛ pɛtɛŋ pa-taa yɔ.” (4 Awiya 16:9) Keɣa 31:8 taa, Yehowa heyiɣ tɔm kɩbandʋ tʋnɛ ɛ-taabalaa se: “Malakɩ mawɩlɩ-ŋ nʋmɔʋ ŋgʋ ŋtɩŋ yɔ, mɔnsɔzʋʋ-ŋ lɔŋ nɛ mankandɩyɩ ñɔ-yɔɔ.”

⁵ Koyindu nɔɔyʋ ñɩnɩɣ se ɖɩtaakɛ Ɛsɔ taabalaa. Ɛlɛ Yehowa sɔɔlaa se ɛkandɩyɩ ɖɔ-yɔɔ nɛ ɛtaalabɩ-ɖʋ nabʋyʋ. (Kalɩ Keɣa 54:23.) Yehowa kɛ ɖa-taabalʋ, pʋyɔɔ lɛ, ɖɩsɛɣ-ɩ nɛ ɖa-laŋɩyɛ pilim. Paa kaɖɛ nɖɩ ɖɩ-taa ɖɩñakɩ pana se ɖɩla ɛ-sɔɔlɩm. Nɛ sɔɔndʋ ɛɛkpaɣ-ɖʋ nɛ nabʋyʋ. Ɛzɩ keɣa maɖʋ nɔɔyʋ kaayɔɔdʋʋ yɔ, Yehowa ‘wɛ ɖa-nɩwaŋ yɔɔ’ pʋyɔɔ sɔɔndʋ ɛɛkpaɣ-ɖʋ nɛ nabʋyʋ. (Keɣsi 15:8; 62:9) Ɛlɛ iyele nɛ ɖɩna ɛzɩma Sataŋ lakɩ se ɖɩtaapɩzɩ ɖɩkɛ Ɛsɔ taabalaa yɔ.

CƐTƖM TƆM NDƲ SATAŊ YƆƆDƖ ƐYAA YƆƆ YƆ

6. Tɔm ndʋ Sataŋ yɔɔdɩ ɛyaa yɔɔ?

⁶ Ñʋʋ ŋgʋ kɩɖɛwa yɔ kɩ-taa, ɖɩnawa se Sataŋ kʋyɩ Yehowa yɔɔ se ɛkɛ cɛtɩyʋ nɛ e-kewiyitu tɔɔʋ fɛyɩ siɣsiɣ. Ɛyɔɔdaa se pɩɩpɔzaa se Yehowa ɛha nʋmɔʋ Aɖam nɛ Ɛva nɛ pa-maɣmaɣ palɩzɩ mbʋ pɩwɛ ɖeu nɛ mbʋ pɩfɛyɩ ɖeu yɔ. Bibl taa takayaɣ ŋga payaɣ se Yɔb yɔ, kawɩlɩɣ ɖɔɖɔ se Sataŋ yɔɔdɩ cɛtɩm tɔm ɛyaa mba pɔsɔɔlaa se pɛkɛ Ɛsɔ taabalaa yɔ pɔ-yɔɔ. Sataŋ yɔɔdaa se pɩtɩkɛ sɔɔlɩm pɛsɛɣnɩ Ɛsɔ ɛlɛ pɛsɛɣ-ɩ mbʋ pʋyɔɔ yɔ, pehikiɣ wazasɩ ɛ-cɔlɔ. Halɩ ɛyɔɔdaa se ɛpɩzɩɣ eyele nɛ ɛyaa tɩŋa ha Ɛsɔ siɣye. Yele nɛ ɖɩna mbʋ Yɔb tɔm kpɛlɩkɩɣ-ɖʋ yɔ, nɛ ɛzɩma Ɛsɔ kaahuuzi ɛ-yɔɔ yɔ.

7, 8. (a) Ɛzɩma Yehowa nɛ Yɔb pɛ-hɛkʋ taa kaawɛɛ? (b) Tɔm ndʋ Sataŋ yɔɔdɩ Yɔb yɔɔ?

⁷ Anɩ payaɣ se Yɔb? Yɔb kaacaɣʋ wezuu yɔ, pɩlakɩ pɩnzɩ ɛzɩ 3600 mbʋ yɔ, nɛ ɛɛkɛ ɛyʋ kɩbanʋ weyi ɛsɛɣaɣ Ɛsɔ camɩyɛ yɔ. Yehowa yɔɔdaa se Yɔb kaawɛ siɣsiɣ pɩkpaɖɩ ɛ-alɩwaatʋ taa ñɩma tɩŋa. Ɛñaŋaɣ Ɛsɔ siŋŋ nɛ ɛpaɖɩɣ kɩdɛkɛdɩm. (Yɔb 1:8) Pɩtʋʋ fɛyɩ se Yɔb kaakɛ Yehowa taabalʋ kɩbanʋ.

⁸ Sataŋ yɔɔdaa se pɩtɩkɛ yem nɛ Yɔb sɛɣ Ɛsɔ, ɛlɛ wazasɩ nzɩ ehikiɣ yɔ, sɩ-yɔɔ ɛsɛɣ-ɩ. Sataŋ heyi Yehowa se: “Ɛzɩ ŋtihuuzi ɛ nɛ ɛ-ɖɩɣa nɛ ɛ-ñɩm kpeekpe pɔ-yɔɔ nɛ ŋcɔɔ nɛ ŋta, nɛ ŋwazɩ e-nesi tɛɛ tʋma yɔɔ nɛ ŋyele ɛ-ñɩm huu tɛtʋ yɔɔ? Ɛlɛ sezi ñe-nesi pazɩ nɛ ŋtukuni pɩtɩŋa mbʋ ɛtɩna yɔ nɛ ŋna, monɖuki se ɛtʋʋ-ŋ ñɛ-ɛzɩdaa kaɣlaa.”​—Yɔb 1:10, 11.

9. Ɛbɛ Yehowa ha nʋmɔʋ Sataŋ se ɛla?

⁹ Sataŋ yɔɔdaa se wazasɩ nzɩ Ɛsɔ lakɩ Yɔb yɔ, sɩ-yɔɔ Yɔb sɛɣ Ɛsɔ. Ɛyɔɔdaa ɖɔɖɔ se ɛpɩzɩɣ ɛla nɛ Yɔb yele Yehowa sɛʋ. Yehowa nawa se Sataŋ fɛyɩnɩ toovenim, ɛlɛ ɛha-ɩ nʋmɔʋ se ɛtakɩ Yɔb nɛ paa weyi ɛna se sɔɔlɩm yɔɔ Yɔb sɛɣ Ɛsɔ, pɩtɩkɛ wazasɩ yɔɔ.

SATAŊ TAKƖ YƆB

10. Ɛzɩma Sataŋ takɩ Yɔb? Nɛ ɛzɩma Yɔb ñalaba?

¹⁰ Kajalaɣ lɛ, Sataŋ yeba nɛ pamɩlɩ Yɔb kpɩna naayɛ, nɛ ɛtɩŋnɩ nʋmɔʋ ndɩ ndɩ yɔɔ nɛ ɛɖɩzɩ wena akazaa yɔ a-tɩŋa payɩ. Pʋwayɩ lɛ, Sataŋ kʋ Yɔb lɩmɖʋyaa sakɩyɛ. Toovenim taa lɛ, Yɔb lesi ɛ-ñɩm kpeekpe. Kɛdɛzaɣ ɖeɖe lɛ, Sataŋ tɩŋnɩ helim sɔsɔm nabʋyʋ yɔɔ nɛ ɛkʋ Yɔb piya 10. Ɛlɛ takɩm mbʋ pɩtɩŋa pɩ-taa, Yɔb ɖɔkɩ e-siɣsiɣ wɛtʋ kpam. “Pɩtɩŋa payɩ pɩ-taa mbʋ yɔ, Yɔb tɩla kɩwɛɛkɩm nɛ e-ndomee, nɛ ɛtɩyɔɔdɩ kɩmɛlɛndʋ tɔm natʋyʋ kaaʋ Ɛsɔ yɔɔ.”​—Yɔb 1:12-19, 22.

11. (a) Takɩm mbʋ Sataŋ tasɩ kɔnʋʋ Yɔb yɔɔ? (b) Nɛ ɛzɩma Yɔb laba?

¹¹ Ɛlɛ Sataŋ tɩsɩɩnɩ peeɖe. Eheyi Ɛsɔ se: “Sezi ñe-nesi nɛ ŋtukuni ɛ-mɔɔyɛ nɛ e-tomnaɣ nandʋ, ɖɩnɛ ɛlɛ ŋkaɣ naʋ se ɛtʋʋ-ŋ ñɛ-ɛzɩdaa kaɣlaa.” Sataŋ wolo nɛ ɛɖʋ Yɔb kʋdɔŋ sɔsɔʋ nakʋyʋ. (Yɔb 2:5, 7) Ɛlɛ Yɔb ɖɔkɩ ɛ-cɩŋgɩlɩm wɛtʋ kpam. Ɛyɔɔdaa se: “Pɩkɔɔ pɩtalɩ men-fezuu tisuu lɛ, mancakɩ mɔn-tɔm yɔɔ.”​—Yɔb 27:5.

12. Ɛzɩma Yɔb lɩzaa ɛwɩlɩ se Sataŋ kɛ cɛtɩyʋ?

¹² Yɔb taatɩlɩ se Sataŋ takaɣnɩ-ɩ nɛ ɛtaatɩlɩ ɖɔɖɔ se Sataŋ cɔlɔ ɛ-kʋñɔmɩŋ lɩnaa. Ɛmaɣzaɣ se Yehowa cɔlɔ ɛ-kʋñɔmɩŋ lɩnaa. (Yɔb 6:4; 16:11-14) Paa mbʋ yɔ, Yɔb ɖɔkɩ e-siɣsiɣ wɛtʋ kpam Yehowa ɛzɩdaa. Lɛɛlɛɛyɔ, tɔm taa tʋ kpayɩ kpayɩ se pɩtɩkɛ wazasɩ nasɩyɩ yɔɔ Yɔb sɛɣaɣ Ɛsɔ. Ɛɛkɛ Ɛsɔ taabalʋ mbʋ pʋyɔɔ yɔ ɛɛsɔɔlɩ Ɛsɔ. Pɩwɩlɩ kpayɩ kpayɩ se Sataŋ kɛ cɛtɩyʋ.

13. Pee wena Yɔb siɣsiɣ wɛtʋ lʋlaa?

¹³ Paa Yɔb ɛtaatɩlɩ tɔm ndʋ Sataŋ yɔɔdɩ ɛ-yɔɔ Ɛsɔ ɛzɩdaa yɔ, ɛɖɔkɩ e-siɣsiɣ wɛtʋ kpam nɛ ɛwɩlɩ se Sataŋ kɛ kɩdɛkɛdʋ. Yehowa wazɩ Yɔb mbʋ pʋyɔɔ yɔ, Yɔb wɩlaa se ɛkɛ taabalʋ kɩbanʋ.​—Yɔb 42:12-17.

ƐZƖMA SATAŊ TAKƖƔ-Ŋ?

14, 15. Cɛtɩm tɔm ndʋ Sataŋ yɔɔdɩ ɛyaa tɩŋa yɔɔ?

¹⁴ Ŋpɩzɩɣ nɛ ŋkpɛlɩkɩ lɔŋ kɩbaŋ nɩɩyɩ mbʋ pɩtalɩ Yɔb yɔ pɩ-taa. Sɔnɔ Sataŋ yɔɔdʋʋ se ɖɩsɛɣ Yehowa mbʋ pʋyɔɔ yɔ ɛwazɩɣ-ɖʋ. Sataŋ yɔɔdɩ Yɔb 2:4 taa se: “Ɛyʋ cɛlɩɣ pɩtɩŋa mbʋ ɛwɛna yɔ e-wezuu yɔɔ.” Ye mbʋ, Sataŋ yɔɔdʋʋ se wazasɩ yɔɔ Yɔb sɛɣ Ɛsɔ yɔ, pɩtɩkɛ e-ɖeke ɛ-tɔm ɛyɔɔdaɣ, ɛlɛ ɛyaa kpeekpe tɔm ɛyɔɔdaɣ. Yɔb sɩba nɛ pɩla pɩnzɩ mɩnɩŋ sakɩyɛ lɛ, Sataŋ wobi pɩ-yɔɔ nɛ ɛtʋʋ Yehowa nɛ ɛyɔɔdʋʋ cɛtɩm tɔm ɛyaa yɔɔ. Pʋyɔɔ Aduwa 27:11 yɔɔdʋʋ se: “Man-pɩyalʋ, ka ñʋʋ nɛ lɔŋ nɛ man-taa la leleŋ, nɛ manpɩzɩ mankalɩ weyi ɛtʋʋ-m yɔ.”

¹⁵ Ŋpɩzɩɣ ŋlɩzɩ se ŋñaŋ Yehowa nɛ ŋkɛ ɛ-taabalʋ kɩbanʋ nɛ pɩwɩlɩ se Sataŋ kɛ cɛtɩyʋ. Paa pɩkaɣ pɔzʋʋ se ŋñɔɔzɩ ñe-wezuu caɣʋ hɔɔlɩŋ sakɩyɛ pʋcɔ nɛ ŋpɩsɩ Yehowa taabalʋ yɔ, pɩwɛɣ ɖeu se ŋñaɣ pana nɛ ŋla mbʋ. Mbʋ pʋyɔɔ yɔ pɩ-tɔm kɩlɩnɩ cɛyʋʋ ñe-wezuu caɣʋ kpeekpe taa. Pɩtɩkɛ aleɣya tɔm. Sataŋ yɔɔdaa se ye ŋkatɩ kala yɔ, ŋŋkaɣ pɩzʋʋ nɛ ŋɖɔkɩ ña cɩŋgɩlɩm wɛtʋ Ɛsɔ ɛzɩdaa. Pʋyɔɔ ɛñakɩ pana se etuzi-ɖʋ nɛ ɖɩla mbʋ pɩtɩtʋʋzɩ yɔ Ɛsɔ ɛzɩdaa. Nʋmɔŋ weyi yɔɔ ɛtɩŋɩɣna?

16. (a) Nʋmɔŋ weyi yɔɔ Sataŋ tɩŋɩɣna se etuyi ɛyaa nɛ peyele Yehowa sɛʋ? (b) Ŋmaɣzɩɣ se nʋmɔʋ ŋgʋ yɔɔ Sataŋ pɩzɩɣ ɛtɩŋna se epeɣzi-ŋ?

¹⁶ Sataŋ tɩŋɩɣnɩ nʋmɔŋ ndɩ ndɩ yɔɔ se ɛtakɩ-ɖʋ nɛ ɖɩtaatasɩ kɛʋ Ɛsɔ taabalaa. Ɛñɩnɩɣ se ɛpʋʋtɩ-ɖʋ ɛzɩ mʋʋzʋʋ ŋgʋ ‘kɩmʋdʋʋ, nɛ kɩñɩnɩɣ se kihiɣ nɔɔyʋ nɛ kɩtɔɔ yɔ.’ (1 Pɩyɛɛrɩ 5:8) Ye mbʋ, ye ña-taabalaa, ñɔ-hɔʋ taa ñɩma yaa ɛyaa lalaa ɩñɩnɩɣ se paɖɩɣ-ŋ nʋmɔʋ nɛ ŋtaakpɛlɩkɩ Bibl nɛ ŋla mbʋ pɩtʋʋzaa yɔ, pɩtaaɖɩɣzɩ-ŋ. Alɩwaatʋ ndʋ tɩ-taa lɛ, tɩlɩ se Sataŋ takɩɣnɩ-ŋ.a (Yohanɛɛsɩ 15:19, 20) Nabʋyʋ taa ɖɔɖɔ lɛ, Sataŋ lakɩ ɛzɩ “ɛkɛ mintʋsʋʋ tɛ tiyiyu” yɔ. Ɛlakɩ ɛ-tɩ mbʋ se pɩsa nɛ epeɣzi-ɖʋ nɛ ɖɩmaanɩ Yehowa paɣtʋ yɔɔ. (2 Kɔrɛntɩ 11:14) Sataŋ tɩŋɩɣnɩ nʋmɔʋ lɛɛkʋ yɔɔ ɖɔɖɔ se etuyi-ɖʋ nɛ ɖiyele Yehowa sɛʋ. Ɛñɩnɩɣ se ɖɩmaɣzɩ se paa ɖɩɩlabɩ ɛzɩma yɔ, ɖɔ-tɔm ɛɛpɩzɩɣ nɛ pɩkɛdɩnɩ Ɛsɔ.​—Aduwa 24:10.

ÑA YEHOWA PAƔTƲ

17. Ɛbɛ yɔɔ ɖɩñaŋ Yehowa?

¹⁷ Ye ɖɩñaŋ Yehowa yɔ, ɖɩwɩlɩɣ se Sataŋ kɛ cɛtɩyʋ. Ɛbɛ pɩzɩɣ pɩsɩnɩ-ɖʋ nɛ ɖɩña Yehowa paɣtʋ? Bibl yɔɔdaa se: “Ŋŋsɔɔlɩ Yehowa ñɛ-Ɛsɔ nɛ ña-laŋɩyɛ pilim nɛ ñe-ciyam pilim nɛ ño-ɖoŋ pilim.” (Wayɩ Wayɩ Paɣtʋ 6:5) Ðɩsɔɔlɩ Yehowa, pʋyɔɔ ɖɩñaŋɩ-ɩ. Ye sɔɔlɩm mbʋ ɖɩwɛnɩ Yehowa yɔɔ yɔ pɩcɛyɩsɩ camɩyɛ yɔ, ɖɩkaɣ tisuu nɛ ɖɩla mbʋ payɩ ɛpɔzʋʋ-ɖʋ yɔ. Apostoloo Yohanɛɛsɩ mawa se: “Ɛsɔ sɔɔlɩm kɔyɔ se: pɔɖɔ ɛ-paɣtʋ yɔɔ. Nɛ ɛ-paɣtʋ fɛyɩ yuŋ.”​—1 Yohanɛɛsɩ 5:3.

18, 19. (a) Mbʋ Yehowa heyiɣ-ɖʋ se pɩkɛ kɩdɛkɛdɩm yɔ, pɩ-taa nabʋyʋ lɛ mbʋ? (b) Ɛzɩma ɖɩlabɩ ɖɩna se Yehowa ɛɛpɔzʋʋ-ɖʋ se ɖɩla mbʋ pɩcɛzɩ ɖo-ɖoŋ kamaɣ yɔɔ yɔ?

¹⁸ Ɛlɛ ɛbɛ Yehowa heyiɣ-ɖʋ se pɩkɛ kɩdɛkɛdɩm? Pɩ-taa nabʋyʋ wɛ aɖakaɣ ŋga ka-ñʋʋ tɔŋ se “Paɖɩ mbʋ Yehowa paɖɩɣ yɔ” ka-taa. Pɩtɩla ŋpɩzɩɣ nɛ ŋmaɣzɩ se mbʋ pɩwɛ aɖakaɣ ŋga ka-taa yɔ, pɩtɩkɛ pɩtɩŋa pɩkɛnɩ kɩdɛkɛdɩm siŋŋ. Ɛlɛ ye ŋkalɩ Bibl Masɩ nɛ ŋkpaɣ alɩwaatʋ nɛ ŋmaɣzɩ sɩ-yɔɔ camɩyɛ yɔ, pɩsɩɣnɩ-ŋ nɛ ŋna ɛzɩma Yehowa paɣtʋ yɔɔ ɖɔm wazɩɣ pɩdɩɩfɛyɩ yɔ. Ŋpɩzɩɣ ɖɔɖɔ nɛ ŋna se pɩpɔzʋʋ se ŋlɛɣzɩ ñe-wezuu caɣʋ hɔɔlɩŋ nɩɩyɩ. Pɩkaɣ-ŋ labʋ kaɖɛ alɩwaatʋ natʋyʋ taa se ŋlɛɣzɩ ñe-wezuu caɣʋ hɔɔlɩŋ nɩɩyɩ, ɛlɛ ye ŋñaɣ pana nɛ ŋla lɛɣzɩtʋ ndʋ pɩpɔzʋʋ yɔ, ŋpɩsɩɣ Yehowa taabalʋ kɩbanʋ nɛ taabalɩyɛ nɖɩ ɖɩkɔŋnɩ-ŋ laŋhɛzɩyɛ nɛ koboyaɣ siŋŋ. (Izaayii 48:17, 18) Ɛlɛ ɛzɩma ɖɩlaba nɛ ɖɩna se ɛyʋ pɩzɩɣ nɛ ɛlɛɣzɩ e-wezuu caɣʋ nɛ ɛɖɔ Ɛsɔ paɣtʋ yɔɔ?

¹⁹ Yehowa ɛɛpɩzɩɣ nɛ ɛpɔzɩ-ɖʋ kpa se ɖɩla mbʋ pɩcɛzɩ ɖo-ɖoŋ kamaɣ yɔɔ yɔ. (Wayɩ Wayɩ Paɣtʋ 30:11-14) Ɛkɛ taabalʋ kɩbanʋ weyi ɛsɩm-ɖʋ nɛ pɩkpaɖɩ ɖa-maɣmaɣ yɔ. Ɛsɩm hɔɔlɩŋ weyi ɩ-taa ɖɩwɛ ɖoŋ nɛ hɔɔlɩŋ weyi ɩ-taa ɖɩwɛnɩ ɛjandʋ yɔ. (Keɣa 102:14) Apostoloo Pɔɔlɩ kpazɩ-ɖʋ ɖoŋ nɛ tɔm tʋnɛ se: “Cɛzɩm nabʋyʋ tɩlɩɩ mɩ-yɔɔ, nɛ pɩkɩlɩ ɛyʋtʋ ɖoŋ. Ɛsɔ cakɩ ɛ-tɔm yɔɔ. Ɛɛkaɣ haʋ nʋmɔʋ se pɩcɛzɩ-mɩ nɛ pɩɖɛɛ mi-ɖoŋ yɔɔ. Cɛzɩm kɔŋ lɛ, ɛhaɣ-mɩ lɔŋ nɛ ɖoŋ se ɩwa-pʋ.” (1 Kɔrɛntɩ 10:13) Ðɩpɩzɩɣ ɖɩtaa liu se paa ɛzɩmtaa lɛ, Yehowa kaɣ-ɖʋ haʋ ɖoŋ nɛ ɖɩla mbʋ ɛsɔɔlaa yɔ. Paa kaɖɛ nɖɩ ɖɩ-taa lɛ, ɛkaɣ-ɖʋ haʋ ɖoŋ weyi ɛcɛzɩ ɖa-ñɩŋ yɔ. (2 Kɔrɛntɩ 4:7) Pɔɔlɩ na ɛzɩma Yehowa sɩnɩ-ɩ kala ndɩ ndɩ taa yɔ lɛ, ɛyɔɔdɩ se: “Manpɩzɩɣ pɩtɩŋa payɩ, weyi ɛsɔzʋʋ-m ɖoŋ yɔ ɛ-yɔɔ.”​—Filiipu 4:13.

ÑAƔ PANA NƐ ŊSƆƆLƖ MBƲ ƐSƆ SƆƆLAA YƆ

20. Wɛtʋ kɩbandʋ ndʋ pɩwɛɛ se ɖɩwɛɛna? Nɛ ɛbɛ yɔɔ?

²⁰ Ye ɖɩsɔɔlaa se ɖɩkɛ Yehowa taabalaa yɔ, pɩpɔzʋʋ se ɖikizi labʋ mbʋ Yehowa yɔɔdaa se pɩkɛ kɩdɛkɛdɩm yɔ. Ɛlɛ pɩtaasɩɩnɩ peeɖe. (Roma 12:9) Ɛsɔ taabalaa sɔɔlɩ mbʋ Ɛsɔ maɣmaɣ sɔɔlaa yɔ. Pɔyɔɔdɩ mba pɛkɛ Ɛsɔ taabalaa yɔ, pɔ-tɔm Keɣa 14:1-5 taa. (Kalɩ Keɣa 14:1-5.) Yehowa taabalaa nɩɣzɩɣnɩ-ɩ nɛ pañakɩ pana se pɛwɛɛnɩ ɛ-wɛtʋ kɩbandʋ. Ɛ-wɛtʋ kɩbandʋ ndʋ tɩ-taa natʋyʋ yɔ: “Sɔɔlɩm, leleŋ, laŋhʋlʋmɩyɛ, laŋɩyɛ ɖɔkʋʋ, laŋɩyɛ kɩbanɖɛ, camɩyɛ labʋ, kpeɣu, pʋtɔdɩyɛ naʋ, wazʋʋ, lalaa liu taʋ, hɛɛɛ wɛtʋ, tɩ ɖɔkʋʋ.”​—Galaatɩ 5:22, 23.

21. Ɛbɛ pɩwɛɛ se ɖɩla nɛ ɖɩwɛɛnɩ wɛtʋ kɩbandʋ ndʋ Ɛsɔ sɔɔlaa yɔ?

²¹ Ɛbɛ pɩwɛɛ se ŋla nɛ ŋpɩzɩ ŋwɛɛnɩ wɛtʋ kɩbandʋ ndʋ? Pɩpɔzʋʋ se ŋkalɩɣ nɛ ŋkpɛlɩkɩɣ Bibl ɖoŋ ɖoŋ nɛ pɩsɩnɩ-ŋ nɛ ŋtɩlɩ mbʋ Yehowa sɔɔlaa yɔ. (Izaayii 30:20, 21) Ye ŋlakɩ mbʋ yɔ, sɔɔlɩm mbʋ ŋwɛnɩ Yehowa yɔɔ yɔ, pɩcɛyɩsɩɣ camɩyɛ. Nɛ sɔɔlɩm mbʋ pɩwɛɣ nɛ pɩcɛyɩsɩɣ lɛ, ŋsɔɔlʋʋ ɖɔɖɔ ɛ-paɣtʋ yɔɔ ɖɔm.

22. Ye ŋñaŋ Yehowa yɔ, wazasɩ nzɩ ŋkaɣ hiɣu?

²² Papɩzɩɣ pakpaɣ lɛɣzɩtʋ ndʋ pɩpɔzʋʋ se ŋla ñe-wezuu caɣʋ taa yɔ nɛ pamaɣzɩnɩ ɛzɩma ɛyʋ hɔzʋʋ toko kɩbɩnʋʋ nakʋyʋ se esuu kɩfalʋʋ yɔ. Bibl yɔɔdaa se pɩpɔzʋʋ se ŋyele “ɛyʋ kɩbɩnʋ” weyi ŋŋkɛnaa yɔ ɛ-lakasɩ nɛ ŋkpaɣ “ɛyʋ kɩfalʋ lakasɩ.” (Koloosi 3:9, 10) Toovenim taa lɛ lɛɣzɩtʋ ndʋ tɩ-labʋ fɛyɩ kɛlɛʋ, ɛlɛ ye ɖɩlabɩ mbʋ nɛ ɖɩñaŋ Yehowa yɔ, eheyiɣ-ɖʋ se ɛkaɣ yebu nɛ ɖihiɣ “kɛzɛɣa pɩŋŋ.” (Keɣsi 18:12) Ye mbʋ, ña Yehowa nɛ ŋwɩlɩ se Sataŋ kɛ cɛtɩyʋ. Wɩlɩ se pɩtɩkɛ kɩhɛyʋʋ nakʋyʋ yɔɔ ŋsɛɣ Yehowa, ɛlɛ ŋsɛɣ-ɩ mbʋ pʋyɔɔ yɔ, ŋsɔɔlɩ-ɩ nɛ ña-laŋɩyɛ pilim. Ye ŋlabɩ mbʋ yɔ, ŋkaɣ kɛʋ Ɛsɔ taabalʋ kɩbanʋ siŋŋ.