“Ɩpɩsɩ mɩ-kalɩzasɩ ninɖiɣyu nɛ sɩ-yɔɔ cɔnɩyʋ cɔlɔ”

ÑA-TAA ɛtɛ se Yehowa kaɣ-ŋ sɩnʋʋ alɩwaatʋ ndʋ ŋñakɩ pana se ŋpɩsɩ ɛ-cɔlɔ yɔ. Ɛkaɣ-ŋ sɩnʋʋ nɛ ŋwɛɛnɩ ɛhʋyɛ kɩbanɖɛ nɛ pɩsa nɛ ŋlʋbɩnɩ nɩɣzɛ, ŋlɔ lɩmaɣza kɩdɛkɛda nɛ ŋhiɣ laŋɩyɛ hɛzʋʋ. Pɩkaɣ-ŋ tuyuu nɛ ŋtasɩ kpɛndʋʋ Yehowa sɛyaa lalaa yɔɔ nɛ ña nɛ wɛ ɩsɛɛ-ɩ. Piyeki nɛ ñɛ-wɛtʋ la nɔɔ kʋɖʋmaɣ nɛ kajalaɣ pɩnzɩ mɩnʋʋ taa Krɩstʋ ñɩma mba pɔ-tɔm apostoloo Pɩyɛɛrɩ yɔɔdaa yɔ. Ɛtɔm se: “Ɩɩwɛ ɛzɩ heŋ weyi iɖiɣni lebu yɔ, ɛlɛ lɛɛlɛɛyɔ lɛ ɩpɩsɩ mɩ-kalɩzasɩ ninɖiɣyu nɛ sɩ-yɔɔ cɔnɩyʋ cɔlɔ.”—1 Pɩyɛɛrɩ 2:25.

Mbʋ ŋpɩzɩɣ ŋla nɛ pɩwɛɛ ɖeu nɛ pɩkɩlɩ yɔ mbʋ yɔ: Pɩsɩ Yehowa cɔlɔ. Ɛbɛ yɔɔ? Piyeki nɛ Yehowa taa la leleŋ. (Aduwa 27:11) Ɛzɩ ŋtɛm sɩm yɔ, mbʋ ɖɩlakɩ yɔ pɩpɩzɩɣ pɩha Yehowa laŋhʋlʋmɩyɛ yaa laŋwɛɛkɩyɛ. Toovenim, Yehowa ɛɛkpaɣ-ɖʋ nɛ ɖoŋ se ɖɩsɔɔlɩ-ɩ nɛ ɖɩsɛɛ-ɩ. (Wayɩ Wayɩ Paɣtʋ 30:19, 20) Bibl taa tazɩyʋ nɔɔyʋ yɔɔdaɣ pɩ-tɔm lɛ, ɛtɔm se: “Nɔɔyʋ ɛɛpɩzɩɣ nɛ ekuli ña-laŋɩyɛ. Ña-maɣmaɣ pɩwɛɛ se ŋkuli-ɖɩ.” Ðikuluu ɖa-laŋɩyɛ alɩwaatʋ ndʋ ɖɩsɛɣ Yehowa nɛ laŋɩyɛ pilim nɛ sɔɔlɩm yɔ. Alɩwaatʋ ndʋ ɖɩlakɩ mbʋ yɔ, ɖɩhaɣ Yehowa kʋjɔʋ kɩbaŋʋ nakʋyʋ nɛ pɩhaɣ-ɩ taa leleŋ siŋŋ; kʋjɔʋ ŋgʋ lɛ ɖa-cɩŋgɩlɩm wɛtʋ. Toovenim taa lɛ, alɩwaatʋ ndʋ ɖɩhaɣ Yehowa sɛtʋ ndʋ ɛmʋnaa se paha-ɩ yɔ; ɖɩnɩɣ taa leleŋ weyi yɔ, ɩ-wayɩ fɛyɩ.—Tʋma Labʋ 20:35; Natʋ 4:11.

Pɩtasɩ lɛ, ye ŋɖaɣnɩ paɣzʋʋ sɛʋ Yehowa yɔ, pɩsɩɣnɩ-ŋ nɛ ŋcɔnɩ ñe-fezuu taa kɩcɛyɩm ɖeɖe. (Maatiyee 5:3) Ɛzɩma tɩyɛ? Ɛyaa mba pɛwɛ ɛjaɖɛ yɔɔ yɔ pɔpɔzʋʋ pa-tɩ se: ‘Ɛbɛ yɔɔ ɖɩwɛ wezuu?’ Pɔsɔɔlɩ siŋŋ se patɩlɩ kaɖʋwa ŋga kɔ-yɔɔ pɛwɛ wezuu yɔ. Yehowa lɩzɩ ɛyaa se papɩzɩ nɛ pɔcɔnɩ pe-fezuu taa kɩcɛyɩm ɖeɖe, pʋyɔɔ pɔsɔɔlaa se patɩlɩ tɔm ndʋ. Ɛlɩzɩ-ɖʋ se ɖɩsɛɛ-ɩ nɛ pɩha-ɖʋ taa leleŋ. Ðɩɩpɩzɩɣ nɛ ɖihiɣ laŋɩyɛ hɛzʋʋ siŋŋ ye ɖɩnawa se ɖɩɩsɛɣ Yehowa nɛ sɔɔlɩm yɔ.—Keɣa 62:2-6.

Ðitendi-ŋ, tɩlɩ se Yehowa sɔɔlaa se ŋpɩsɩ nɛ ŋkɔɔ ɛ-cɔlɔ. Ɛbɛ wɩlɩɣ se ɛsɔɔlaa se ŋpɩsɩ? Maɣzɩ nɛ ŋna: Palabɩ adɩma sakɩyɛ nɛ pakpaɣ alɩwaatʋ nɛ pɔñɔɔzɩ hatʋ cabɩ takayaɣ kanɛ. Pɩtɩla ɛgbɛyɛ taa ɛzʋtʋyʋ nɔɔyʋ yaa koobu lɛlʋ kɔnɩnɩ-ŋ kɛ. Pʋwayɩ lɛ, ŋkpaɣ alɩwaatʋ nɛ ŋkalɩ-kɛ nɛ ŋɖɔ ka-taa tɔm yɔɔ. Pɩtɩŋa payɩ mbʋ yɔ, pɩwɩlɩɣ se Yehowa tɩsɔɔ ñɔ-yɔɔ. Ɛlɛ, ɛyaɣ-ŋ nɛ taa leleŋ se ŋpɩsɩ nɛ ŋkɔɔ ɛ-cɔlɔ.—Yohanɛɛsɩ 6:44.

Ye ɖɩnawa se Yehowa ɛɛsɔʋ ɛ-sɛyaa mba paha-ɩ siɣye yɔ, pɔ-yɔɔ yɔ, pɩhɛzɩɣ ɖa-laŋɩyɛ. Mbʋ kaakpazɩnɩ ɖoŋ koobu halɩñɩnʋ weyi payaɣ-ɩ se Donna yɔ. Ɛyɔɔdaa se: “Maaposini toovenim tɔm, ɛlɛ mamaɣzaɣ Keɣa 138:23, 24 taa tɔm tʋnɛ tɩ-yɔɔ ɖoŋ ɖoŋ: ‘Wili-m nɛ ŋtɩlɩ ma-laŋɩyɛ, takɩ-m camɩyɛ nɛ ŋtɩlɩ man-lɩmaɣza. Cɔnɩ nɛ ŋna se maaleki nɛ ŋɖɔmnɩ-m tamtam wezuu caɣʋ nʋmɔʋ taa.’ Maanawa se mantɩkɛ ɛjaɖɛ yɔɔ tʋ. Mantaamaɣzɩ kpa se peeɖe pɩwɛɛ se mɛwɛɛ. Maanawa se Yehowa ɛgbɛyɛ taa pɩwɛɛ se mɛwɛɛ. Maapaɣzɩ nɩʋ pɩ-taa se Yehowa tɩsɔɔ mɔ-yɔɔ nɛ ma pɩwɛɛ se mañaɣ pana nɛ manpɩsɩ ɛ-cɔlɔ. Man-taa labɩ leleŋ se malabɩ mbʋ.”

Ðɩtɩmɩɣ se ña-ɖɔɖɔ ŋɖaɣnɩ nɩʋ “[Yehowa] taa leleŋ.” (Nehemiya 8:10) Ye ŋpɩsaa nɛ ŋkɔɔ Yehowa cɔlɔ yɔ, ŋŋkaɣ kpiɖuu kpa.