Akpadɩyɩtʋ taa pɩɣa!

Abraham nɛ Saara pɔɖɔkʋʋ nesi yɔ pɩlakɩ pɩnzɩ sakɩyɛ yɔ. Peyebi ɖɩɣa kɩbaŋa ŋga paawɛnɩ Uuri yɔ nɛ pɔkɔɔ nɛ pɛwɛɛ kizinzikiŋ tɛɛ. Ɛlɛ Saara taɣaɣ Yehowa liu nɛ etaakpiɖiɣ.

Saara kaasɔɔlɩ kpem se ɛwɛɛnɩ pɩɣa, pʋyɔɔ eheyi Abraham se: “Ye ma-lɩmɖʋyʋ Hagaarɩ ɛlʋlɩ pɩɣa yɔ, mankpakɩɣ-kɛ ɛzɩ ma-ñɩŋga yɔ.” Pʋwayɩ lɛ, Hagaarɩ lʋlɩ abalɩbɩɣa nakɛyɛ nɛ payaa-kɛ se Isimayɛɛlɩ.

Pɩnzɩ sakɩyɛ wayɩ lɛ, Abraham nɛ Saara pamʋ agɔma nabɛyɛ 3. Alɩwaatʋ ndʋ tɩ-taa lɛ, Abraham kaawɛnɩ pɩnzɩ 99 nɛ Saara ñaawɛnɩ pɩnzɩ 89. Abraham heyi agɔma mba se pacaɣ tɩʋ tɛɛ nɛ pɔtɔɔ tɔɔnaɣ. Ŋsɩm mba agɔma mba paakɛnaa yɔ? Ɛsɔ tiyiyaa! Peheyi Abraham se: “Pɩnaɣ ŋga kɔkɔŋ yɔ ka-taa, alɩwaatʋ tʋnɛ tɩ-yɔɔ lɛ, ña-halʋ kaɣ lʋlʋʋ abalɩbɩɣa nakɛyɛ.” Saara kaawɛ kizinziku tɛɛ. Nɛ ɛnɩ tɔm ndʋ lɛ, ehoŋ nɛ ɛtɔ se: “Ma weyi mankpadɩyɩ ɛzʋnɔ yɔ, manpɩzɩɣ nɛ mantasɩ lʋlʋʋ pɩɣa na?”

Pɩnaɣ ŋga katɩŋaa yɔ ka-taa, Saara lʋlɩ abalɩbɩɣa, ɛzɩ tiyiyu kaaheyuu-wɛ yɔ. Abraham ha pɩɣa ŋga hɩɖɛ se Izaakɩ, nɛ hɩɖɛ nɖɩ ɖɩ-tɔbʋʋ lɛ se «hoŋa.»

Izaakɩ kɔm nɛ ɛwɛɛnɩ pɩnzɩ ɛzɩ 5 mbʋ yɔ lɛ, Isimayɛɛlɩ wɛɛ nɛ ɛnazɩɣ-ɩ nɛ Saara na-wɛ. Saara ñɩnaɣ se ɛkandɩyɩ ɛ-pɩyalʋ yɔɔ, pʋyɔɔ eheyi Abraham se ɛɖɔɔnɩ Agaarɩ nɛ Isimayɛɛlɩ. Abraham taasɔɔlɩ se ɛɖɔɔnɩ-wɛ. Ɛlɛ Yehowa ɖɔɖɔ ñɩnaɣ se ɛkandɩyɩ Izaakɩ yɔɔ, pʋyɔɔ eheyi Abraham se: “Welisini Saara. Mankaɣ cɔnʋʋ Isimayɛɛlɩ yɔɔ. Ɛlɛ Izaakɩ yɔɔ pɩkaɣ tɩŋnʋʋ nɛ man-tamasɩ la.”