Pawazɩ Yakɔɔb nɛ pɛɖɛzɩ-ɩ ñɩm

Izaakɩ kaawɛnɩ pɩnzɩ 40 lɛ ɛkpaɣ Rebeka. Ɛɛsɔɔlɩ-ɩ pɩdɩɩfɛyɩ. Paawɛnɩ abalɩbiya 2, sɩkɛ ɖomaa.

Payaɣaɣ sɔsɔɔ se Ezaawuu nɛ payaa cikpelaɣ se Yakɔɔb. Ezaawuu kaakɛ ɛgbam sɔsɔ nɛ ɛtaasɔɔlɩ ɖɩɣa caɣʋ. Ɛlɛ Yakɔɔb ñaasɔɔlɩ ɖɩɣa caɣʋ.

Alɩwaatʋ ndʋ tɩ-taa lɛ, ye caja nɔɔyʋ ɛsɩba yɔ, ɛ-pɩyalʋ sɔsɔ pɛcɛlɩɣ ɛ-tɛtʋ nɛ e-liidiye hɔɔlʋʋ sɔsɔʋ. Nɛ ɛ-caa ñɩm mbʋ payaɣ se ñɩm mbʋ pɛɖɛzɩɣ ɛyʋ yɔ. Izaakɩ hɔʋ taa lɛ, caja ñɩm mbʋ pɩwɛɛ se pɛɖɛzɩ piya yɔ, pɩ-taa lɛɛbʋ lɛ tamaɣ ŋga Yehowa kaalabɩ Abraham yɔ. Ezaawuu lakasɩ wɩlaɣ se ɛ-paa fɛyɩnɩ tamaɣ ŋga, ɛlɛ kaamʋ ñɩm siŋŋ Yakɔɔb ɛsɩndaa.

Kɩyakʋ nakʋyʋ Ezaawuu wobi ɛgbandʋ nɛ ɛpɩsɩ ɛkɔɔ lɛ, pɩnɩ-ɩ pɩdɩɩfɛyɩ. Peeɖe ɛnɩ tɔɔnaɣ ŋga Yakɔɔb ɖiɣni tɩzʋʋ yɔ kɔ-sɔzɩŋ, nɛ ɛtɔ se: “Ñɔɔsɩ wɩɣ-m! Ha-m ñɔ-tɔɔnaɣ kɩsɛɛmaɣ ŋga yɔ!” Yakɔɔb cosi-i se: “Mahaɣ-ŋ, ɛlɛ ɖuu se ŋpɛdɩɣnɩ-m ñɩm mbʋ pakaɣ-ŋ ɖɛzʋʋ yɔ.” Nɛ Ezaawuu pɩsɩnɩ-ɩ se: “Malakɩnɩ we ñɩm mbʋ? Ŋpɩzɩɣ ŋmʋ-pʋ. Ñɔɔsɩ ñawɩɣnɩ-m cɩnɛ.” Ŋmaɣzɩɣ se mbʋ Ezaawuu labɩ mbʋ yɔ pɩwɛ ɖeu na? Aayɩ, yaa we? Tɔɔnaɣ yɔɔ lɛ, elesi mbʋ pɩwɛ ñɩm siŋŋ yɔ.

Izaakɩ kɔm nɛ ɛkpadɩyɩ siŋŋ lɛ, ɛkpaɣ lɩmaɣzɩyɛ se ɛwazɩɣ ɛ-pɩyalʋ sɔsɔ. Ɛlɛ Rebeka sɩnɩ Yakɔɔb nɛ ɛmʋ wazasɩ nzɩ. Ezaawuu kɔm nɛ ɛna mbʋ lɛ, ɛkɔ pana siŋŋ nɛ ɛɖʋ ɛ-taa se ɛkʋʋ e-ɖomɖa Yakɔɔb. Izaakɩ nɛ Rebeka paasɔɔlaa se pakandɩyɩ Yakɔɔb yɔɔ, pʋyɔɔ peheyi-i se: “Se nɛ ŋwolo ñe-egbele Labaanɩ tɛ pɩkɔɔ pɩsɩɩnɩ alɩwaatʋ ndʋ Ezaawuu pana hɛɣ yɔ.” Yakɔɔb welisini ɛ-lʋlɩyaa nɛ ese nɛ ɛɖɛɛ se ɛkandɩyɩ e-wezuu yɔɔ.