Yom weyi ɛñaŋaɣ Ɛsɔ yɔ

Yakɔɔb pɩyalaa taa lɛ, Yosɛɛfʋ palʋlaa nɛ pʋcɔ palʋlʋʋ kɛdɛzaɣ tʋ. Ɛ-ɖalaa kɔɔ nɛ pana se pa-caa sɔɔlɩ-ɩ nɛ pɩkɩlɩ-wɛ. Ña-naʋ taa yɔ, ɛzɩma pɩlakɩ-wɛ? Papaɣzɩ Yosɛɛfʋ sʋsʋʋ nɛ papaɖɩɣ-ɩ. Pʋwayɩ lɛ, Yosɛɛfʋ paɣzɩ ɖozuu ɖoza naayɛ. Eheyi ɛ-ɖalaa ɖoza ana a-tɔm lɛ, paba ñamaɣzɩ se awɩlɩɣ se wiɖiyi pakaɣ luŋuu ɛ-tɛɛ. Nɛ papaɣzɩ-ɩ paɖʋʋ siŋŋ nɛ pɩkpaɖɩ.

Kɩyakʋ nakʋyʋ Yosɛɛfʋ ɖalaa woni kpɩna lone nɖɩ ɖɩñɔtɩnɩ Sekɛɛm tɛtʋ yɔ ɖɩ-taa se atɔɔ ñɩtʋ. Yakɔɔb tiyi Yosɛɛfʋ se ewolo nɛ ɛna se wɛtʋ ndʋ taa ɛ-ɖalaa wɛɛ. Polosi Yosɛɛfʋ eɖiɣni kɔm lɛ, peheyi ɖama se: “Ðoziyu ɛnʋ eɖiɣni kɔm. Ðɩkpa-ɩ nɛ ɖɩkʋ-ɩ.” Nɛ pakpa-ɩ nɛ pɛpɛɖɩ-ɩ pɔʋ sɔsɔʋ nakʋyʋ taa. Ɛlɛ ɛ-ɖalʋ weyi payaɣ se Yuuda yɔ, ɛyɔɔdɩ se: “Ðɩtaakʋ-ɩ. Ðɩpɛdɩ-ɩ nɛ ɛpɩsɩ yom.” Nɛ pakpaɣ Yosɛɛfʋ nɛ pɛpɛdɩnɩ Madiyaŋ mba tadɩyɛ laɖaa mba powokaɣ Ejipiti yɔ. Pɛpɛdɩ-ɩ liidiye pɔɔyɩsɩ 20.

Yosɛɛfʋ ɖalaa kʋ kpɩnɛ naɖɩyɛ nɛ pakpaɣ e-toko nɛ pelii ɖɩ-calɩm taa nɛ powona nɛ pawɩlɩ pa-caa nɛ pɔpɔzɩ-ɩ se: “Pɩtɩkɛ ña-pɩyalʋ toko yɔ?” Yakɔɔb na toko nɛ calɩm lɛ, ɛmaɣzɩ se tɛtɛgbɩnɛ naɖɩyɛ kʋnɩ Yosɛɛfʋ. Nɛ pɩha-ɩ laŋwɛɛkɩyɛ siŋŋ. Nabʋyʋ taapɩzɩɣ se pɩhɛzɩ ɛ-laŋɩyɛ.

Tadɩyɛ laɖaa mba, patanɩ Yosɛɛfʋ Ejipiti lɛ, pɛpɛdɩ-ɩ nɛ kaɖɩka sɔsɔɔ nakɛyɛ, payaɣ-kɛ se Potifaarɩ. Ɛlɛ Yehowa kaawɛ Yosɛɛfʋ cɔlɔ kpam. Potifaarɩ kɔɔ nɛ ɛna se Yosɛɛfʋ lakɩ ɛ-tʋma camɩyɛ nɛ papɩzɩɣ nɛ pataa-ɩ liu. Pitileɖi lɛ, ɛlɩzɩ-ɩ se ɛkɛ ɛ-ñɩm kpeekpe yɔɔ cɔnɩyʋ.

Potifaarɩ halʋ nawa se Yosɛɛfʋ ɖewa nɛ ɛtɛ ɛwɛɛ ɖoŋ. Pʋyɔɔ ɛwɛɛ nɛ eheyiɣ Yosɛɛfʋ paa ɖooye se ɛ nɛ ɩ pasʋʋ. Ɛbɛ Yosɛɛfʋ lakɩ yɔ? Ekizaa nɛ ecosi-i se: “Aayɩ! Pɩfɛyɩ ɖeu se mala mbʋ. Ma-ñʋʋdʋ taɣ-m liu pɩdɩɩfɛyɩ nɛ ñɛkɛnɩnɩ ɛ-halʋ. Ye ma nɛ ŋ ɖɩsʋwa yɔ, pɩkɛɣnɩ kɩdɛkɛdɩm sɔsɔm Ɛsɔ ɛsɩndaa!”

Kɩyakʋ nakʋyʋ lɛ, Potifaarɩ halʋ ñaɣ pana se ɛkpa Yosɛɛfʋ nɛ ɖoŋ nɛ ɛ nɛ ɩ pasʋʋ. Ɛhɔm toko ŋgʋ Yosɛɛfʋ kaasuwa yɔ, ɛlɛ Yosɛɛfʋ se nɛ ɛɖɛɛ. Potifaarɩ pɩsaa nɛ ɛkɔɔ lɛ, ɛ-halʋ cɛtɩ-ɩ nɛ eheyi-i se Yosɛɛfʋ kpa-ɩ nɛ ɖoŋ se ɛ nɛ ɩ pasʋʋ. Potifaarɩ taa wɩɩ siŋŋ nɛ ɛɖʋ Yosɛɛfʋ salaka taa. Ɛlɛ Yehowa tɩsɔɔ Yosɛɛfʋ yɔɔ.